إذا الواحد راح على أي مدينة كبيرة بالعالم بيشوف كيف الناس اللي إجوا عليها من برا ما كانوا مجرد ضيوف عابرين بالعكس صاروا جزء من هويتها وتركوا أثر واضح فيها. حلب مثال قريب وواضح الأرمن والشركس وغيرهم ما عاشوا فيها وبس وإنما شاركوا بصناعة شخصيتها وتركوا بصمتهم بالتجارة والصناعة والأكل والحرف والعمران وصاروا جزء من قصة المدينة نفسها.

وهي القصة مو خاصة بحلب. إسطنبول ما صارت إسطنبول من شعب واحد ولا من مرحلة وحدة ولشبونة وبرشلونة ومارسيليا كلها مدن تراكمت فوق بعضها طبقات من البشر والثقافات وكل جماعة مرت فيها تركت شي يضيف للمكان ويغنيه ويخليه أجمل وأغنى وأكثر تنوع.

أما المسكينة دمشق فدائماً عندي إحساس إن أغلب اللي إجوا عليها تعاملوا معها كمكان إقامة مؤقت مو كمدينة لازم ينزرع فيها ويتبنى مستقبل معها. مع إنها كانت الحضن والملاذ للجميع وكانت تستقبل الناس بأصعب الظروف وتفتح أبوابها لكل حدا قصده وما سألت حدا من وين إجا ولا شو قصته.

والمفارقة إن اللي بيسكن الشام عن جد غالباً ما بيحب يسكن بمكان تاني بالأرض. بتضل معلقة فيه بطريقة غريبة حتى لو تركها سنين طويلة. يمكن لأنها مو مجرد مدينة يمكن لأنها حالة كاملة.

واليوم بتمنى من قلبي ترجع دمشق مثل ما كانت أو على الأقل تقرب من دمشق الخمسينات والستينات وقت كانت الروضة فعلاً روضة ووقت كانت الشام القديمة تحفة عمرانية حقيقية مو مجرد ذكرى بصور قديمة ووقت كان في احترام أكبر للمكان ولتاريخه ولجماله.

وبصراحة بتمنى تخلص هالمدينة من كل اللي عم يشوه هويتها ومن كل المشاريع اللي عم تتعامل معها كغنيمة مو كمدينة عمرها آلاف السنين ومن كل الناس اللي عايشين فيها بدون أي إحساس بالانتماء إلها أو الحرص عليها. لأن دمشق بتستحق ناس تضيف إلها مو ناس تستهلكها وبس.