«كنت بمناطق النظام، وابني فهد كان بالمناطق المحاصرة. كل يوم كنا نحكي سوا، واسمع صوته واطمن عليه

بس بهديك الليلة ما كان في نت. دقيت أكثر من مرة بس ما حدا رد. قرأت على صفحات أخبار الثورة انو الغوطة انضربت بالسلاح الكيماوي، وقلبي ماعاد هدي من الخوف سألت أخواته، قالولي "ما في شي، لا تخافي" بس قلبي ما صدقهم. تاني يوم نزلت دغري عالغوطة، كنت بدي شوفه واطمن عليه… ما لحقت. قالولي "فهد مات ودفناه" ضليت اترجاهم يفتحولي القبر، يمكن يكون لسه عايش… بس انا ما بدي شوف ابني ميت.

فهد كان أبضاي ووجهه كله حياة. كان الأسود يلبقله كتير، ولما يحط نظارته بياخدو العقل عليه. مرة اعتقلوه وعذبوه كتير ,توقعنا يبطل يجيه أولاد بس لما حملت مرتو، فرحنا كتير. الكيماوي ما ترك فرحتنا تكمل اختنق فهد واختنقت مرتو وهي حامل بالشهر الثالث، وبيت حماه كلهم ماتوا.

اليوم ما بقي من فهد غير صورته… كل يوم بطلع فيها، وبحكي معه كأنه لسا قدامي. ما في يوم مر إلا واشتقت لصوته، ولا في وجع قد وجع غيابه.
الكيماوي اخد فهد من جنب عيوني بس ما اخد ذاكرتي وذكرياتي معه.

منى مكي - زملكا»