اؤلوم
عادی بیر کلمه دیر آرتیق
من هر گون بیلیرم اؤزلویومون بیر پارچاسی‌نین اؤلدویونو
بیر گون بارماق‌لاریم
بیر گون آیاق‌لاریم
بیر گون گؤزلریم
بیر گون قولاق‌لاریم
بیر گون سسیم
دوغروسو هر کسیم
اؤیره‌نمیشم اؤلومه
بیر تابلو دووارا اؤیره‌نن کیمی
تانیرام زیل-بم‌ین آرتیق
ایل‌لر دیر تکرارلاییرام اؤلومو
بو دا یاشاماین بیر بؤلومو
دوغروسو
بئینیمده اشباع اولونموش بیر نقطه‌دیر اؤلوم
گوندن گونه بؤیویور
بؤیویور
بؤیویور
من جمعه گون‌لری‌نین
آخشام چاغی‌لارین داریخماسی اولورام
سانکی بوتونلویوم اؤلوب
سانکی بیر دوستوم اؤلوب یالقیزلیغیندا
اؤلورم خبرسیزلیییمدن
یالقیزلیق اؤلومون باشقا بیر آدی اولور او آن
کیمسه‌یه بوشالتماز اوره‌یینی
بؤیویه‌ر
بؤیویه‌ر
یالقیزلیغین بویو
تلگراف دیرک‌لریندن، موبایل دکل‌لریندن داها اوجا
اونا یومروق سیخماق اولماز
اونا یالوارماق اولماز
بوتون باغلی قاپی‌لار، ایچه‌ریدن آچیلاجاق

#رسول_اسمعیلیان

@Edebiyaatt

https://www.instagram.com/p/CItMcsvF0d5/?igshid=5cjhvdw721lz

بئینیم کیچیک بیر خاورمیانه
ساواشا گیریر بئینیمده گونده نئچه اؤلکه
من ایسه آتاسی اؤله‌ن اوشاق‌لارین داریخماسی اولورام

آغلاماق ایسته‌رم
ائشیدیلسین آیدینجاسینا
آستاجا سس قیریق‌لاریم
بوردا
اوددان یارانیب هر بیر شئی
بوردا
بوتون بایرام‌لار باشا چاتار، دادینی حس ائتمه‌دن
بوردا
هر بیر شئی آتیلیب
یوخو حب‌لری کیمی
ایزله‌نیریک آن به آن
گؤزللیییمیز اولماسا دا، دولویوق دویغولاردان
دولویوق بوشلوق‌لاردان
غربتده یازیلان وطن شعرلری کیمی
اوخویون بیزی
بیز سیزین ساواش مئیدانیزیق
Beynim kiçik bir orta doğu
Savaşa girir beynimdə gündə neçə ölkə
Mən isə atası ölən uşaqların darıxması oluram
Ağlamag istərəm
Eşidilsin aydıncasına
Astaca səs qırıqlarım
Burda
Oddanyaranıb hər bir şey
Burda
Bütün bayramlar başa çatar, dadı his edilmədən
Burda
Hər bir şey atılıb
Yuxu həbləri kimi
İzlənirik an bə an
Gözəlliyimiz olmasada, doluyuq duyğulardan
Doluyuq boşluqlardan
Qurbətdə yazılan vətən şeiri kimi
Oxuyun bizi
Biz sizin savaş meydanızıq

#رسول_اسمعیلیان

https://www.instagram.com/p/CI0r8DbF15u/?igshid=1pwrtgb890o8e

@Edebiyaatt

.
بو دانیشیق‌لاردا گئدن سیرالامالارین یوزده دوخسان دوققوزو بلکه ایراندا دا گؤرونور. البته بورانین سیرالاماسیندا سایی‌لار چوخدور:

*ساتقین ادبیات‌چی‌لار
*مافیا ادبیاتچی‌لار
*ضررسیز ادبیاتچی‌لار(ساده‌جه رومانتیک یازانلار)
*زورونان ادبیاتچی‌لار
*ساوادسیز ادبیاتچی‌لار
*یالانچی ادبیاتچی‌لار
*ائله‌ بئله‌سی ادبیاتچی‌لار
*اؤزومه یازیرام، آما هامینیز اوخویون دییه‌ن ادبیاتچی‌لار...
*اوغرو ادبیاتچی‌لار
**باشقاسی‌نین نه‌مه‌نه‌سینن بی دوران ادبیاتچی‌لار
*مجازی ادبیاتچی‌لار
*اوزاقدان ادبیاتچی‌لار
*ادبیاتچی‌لار
--------------
*دانیشان سئیمور بایجان

@Edebiyaatt

(سونولور آرش ساعی‌یه)
----------------
او قدر قیشقیردیق
گؤیه‌ردی سسیمیزین بیر یانی
یالقیز قالدیق
تانری‌لارین اقتداری اولدو یالقیزلیق
ساواشدیق
خشاب‌لارا دولان فشنگ‌لریمیز
قبیرلره باسدیریلان جسدلریمیز اولدو
و اَن گؤزل ماهنیمیز
پیچاق‌لارین ایتیلمک‌ سسی اولدو
او قدر قیشقیردیق
اونوتدوق
گؤزلریمیزین نه‌لر گؤردوک‌لرینی
قولاق‌لاریمیزین نه‌لر ائشیتدیک‌لرینی
بودور بوتون پاییمیز اؤلکه‌دن
بودور بوتون پاییمیز یاشامدان
سازاق دیر
یولداش
اَللری‌نین ایسی‌لییینی گولوش‌لرینده گیزلت
---------------
o qədər qışqırdıq
göyərdi səsimizin bir yanı
yalqız qaldıq
tanrıların iqtidarı oldu yalqızlıq
savaşdıq
xəşablara dolan fişənglərimiz
qəbirlərə basdırılan cəsədlərimiz oldu
və ən gözəl mahnımız
piçaqların itilmək səsi oldu
o qədər qışqırdıq
unutduq
gözlərimizin nələr gördüklərini
qulaqlarımızın nələr eşitdiklərini
budur bütün payımız ölkədən
budur bütün payımız yaşamdan
sazaqdır
yoldaş
əlləiinin isiliyini gülüşlərində gizlət
#شعر
#رسول_اسمعیلیان


https://www.instagram.com/p/CJRDV9glQe8/?igshid=1mo57c9x9yr6v

@Edebiyaatt

#شعر


هردن
خاطیرلاماسان دا خاطره‌لری
خاطیرلاتدیراجاقلار اؤزلرینی سنه بیر ته‌هر
چاغیراجاقلار سنی
بیر رنگ کیمی
بیر یئمک کیمی
بیر کوچه کیمی
چاغیراجاقلار سنی
اَل وئردییین بیر اَلین ایستی‌لییی کیمی
بیر استکان چای اولوب دانیشدیراجاقلار سنی
کافه‌لرین بیرینده
شعر اوخویاجاق سنه
بیردن
خاطره‌لرین بیری
یاپیشاجاق بوغازیندان
و سنی توللایاجاق کئچمیش‌لره
دونوب قالاجاقسان کئچمیش‌لرده
سونرا جئب تئلفونو گؤتوروب، بیرینه زنگ آچیب، چیخاجاق اوردان
دولاناجاق خیابان‌لارین شاختالی قیشیندا
سن اوشویه‌جکسن کئچمیشده
ساواشاجاق بیریسی‌له
بورنون قانایاجاق کئچمیشده
اوزوله‌جک
اوره‌یین توتولاجاق کئچمیشده
بیردن
ایش یئرینه گئده‌جک
ایش‌له‌دییینده آلنی‌نین تری
گؤز یاش‌لارین اولاجاق کئچمیشده
ائوه دؤنه‌جک
باش قویوب دیزلرینه یاتدیغی او دیز
داش اولاجاق باشیوین آلتیندا
سونرا
باغرینا باساجاق سئوینج‌له بیریسی‌نی
سن ایسه
حس ائده‌جکسن اونون یوخلوغونو
سونرا
سئوه‌جک بیریسی‌نی
یالقیز قالاجاقسان کئچمیشده
و بوتون باغرینا باسدیق‌لاری وارلیق‌لارین
حس ائده‌جکسن یوخلوق‌لارینی
اوندا بیله‌جکسن
خاطره‌دن خاطره‌یه آزالیر بیر شئی سندن
ناغیل دییه‌ن اؤلسه‌ده، سؤیله‌نیلیر ناغیل هله ده
.....

Hərdən
xatırlamasan da xatirələri
xatırlatdıracaqlar özələrini sənə bir təhər
çağıracaqlar səni
bir rəng kimi
bir yemək kimi
bir küçə kimi
çağıracaqlar səni
əl verdiyin bir əlin istiliyi kimi
bir istəkan çay olub danışdıracaqlar səni
kafelrin birində
şeir oxuyacaq sənə
birdən
xatirələrin biri
yapışacaq boğazından
və səni tullayacaq keçmişlərə
donub qalacaqsan keçmişlərdə
sonra ceb telefonu götürüb, birinə zəng açıb çıxacaq ordan
dolanacaq xiyabanların şaxtalı qışında
sən üşüyəcəksən keçmişdə
Savaşacaq birisilə
burnun qanayacaq keçmişdə
üzüləcək
ürəyin tutulacaq keçmişdə
birdən
İş yerinə gedəcək
İşlədiyində alnının təri
göz yaşların olacaq keçmişdə
evə dönəcək
baş qoyub dizlərinə yatdığı o diz
daş olacaq başıvın altında
sonra
bağrına basacaq sevinclə birisini
sən ısə
hiss edəcəksən onun yoxluğunu
sonra
sevəcək birisini
yalqız qalacaqsan keçmişdə
və bütün bağrına basdıqları varlıqların
hiss edəcəksən yoxluqlarını
onda biləcəksən
xatirədən xatirəyə azalır bir şey sənədən
nağıl deyən ölsə də, söylənilir nağıl hələ də

#رسول_اسمعیلیان

@Edebiyaatt

ایرمی بیرینجی یوزایللیکده
بیر گولوش، ساده‌جه بیر گولوش‌دور آرتیق
بیر باخیش، ساده‌جه بیر باخیش
و هر بیر شئی، راحاتجاسینا اونودولور بیر آندا
ایرمی‌ بیرینجی یوزایللیکده
انسان
معجزه‌سینی اونودان بیر پیغمبر دیر
سانکی اؤلدورولوب تانریسی‌
اومودسوز
اوزگون
نه سؤیله‌نه‌جک سؤزو قالمیش
نه گؤسته‌ره‌جک یولو
دوغروسو
ایرمی‌بیرینجی یوزایللیک
انسانین باشی‌نین آغریماسیندان باشلانیب
یوخو حب‌لری‌نین آتیلماسیندا بیته‌جک
بو ایسه
اَن بؤیوک اوغور ساییلیر
ایرمی‌بیرینجی یوزایللیکده یاشایان انسانا
........
21-ci yüz illikdə
Bir gülüş, sadəcə bir gülüşdür artıq
Bir baxış sadəcə bir baxış
Və hər bir şey, unudulur rahat adına bir anda
21-ci yüz illikdə
İnsan
Möcüzəsini unudan bir peyğəmbər dir
Şanlı öldürülüb tanrısı
Umudsuz
Üzgün
Nə söylənəcək sözü qalmış
Nə göstərəcək yolu
Doğrusu
21-ci yüz illik
İnsanın
Başının ağrıması dan başlanıb
Yuxu həblərinin atılmasında bitəcək
Bu isə
Ən böyük Uğur sayılır
21-ci yüz illikdə yaşayan insana

@Edebiyaatt

هانسی بیر شعرله باشلادیم سنی
هانسی بیر کلمه‌یله
اونوتما
داریخسان بیردن
منی دنیزلرین اَن درین یئرلرینده دوشون
تورپاقدان اوزاق
لاپ گؤزلری‌نین رنگینده
داریخسان بیردن
قوش‌لار اوچارکن منی قانادلاریندا گؤر
اونودولموش تارلالارین اورتاسیندا
تورپاقدان اوزاق
داریخسان بیردن
دوداق‌لارینی گونشین آخشام چاغلاری شفق‌لرینه وئر
و ساچلاری‌نین ساریشینلیغینی، گونشین گون دوغان ایشینتی‌لارینا
سندن هئچ ایسته‌ییم یوخ
منه اینانماقدان باشقا

#رسول_اسمعیلیان

@Edebiyaatt

هردن خیابانین او تاییندا
رستوراندا گؤرونن بیر بوش میز
گؤتوروب آپاریر سنی کئچمیش‌لره
ائله او آن
خیابانین اَنی‌ بویوندان اوزون اولور
هردن
دوواردا بوش بیر شکیل چرچیوه‌سی
دولو اولور خاطره‌لرله

Hərdən xiyabanın o tayında
Resturanda görünən bir boş masa
Götürüb aparır səni keçmişlərə
Elə o an
Xiyabanın əni boyundan uzun olur
Hərdən
Duvarda boş bir şəkil çərçivəsi
Dolu olur xatirələrlə


#رسول_اسمعیلیان
@Edebiyaatt

دیلیمده هئچ باشا چاتمایان بیر ماهنی سسله‌نیر
بو خیابانین بویونو آددیم‌لایاندا
سانکی بوندان کئچمیشده بو خیابانی آددیملایانلار یازیب-بسله‌میش بو ماهنی‌نی
آددیم‌لاریم اونلارین آددیم‌لاری‌نین آردی
باخیشلاریمسا باخیشلاری‌نین قالانی دیر

سن ایسه
باشا چاتمایان بیر یولو آددیملاییب
هئچ بیتمه‌یه‌ن بیر ماهنی‌نی سسله‌ندیره‌جکسن
داریخمالارین، داریخمالاری‌مین آردی اولاجاق
سئودیک‌لرین، سئودیک‌لریمین آردی
دوغروسو
دونیا هر زمان بیر شئی‌ین آردی‌دیر
باشا چاتمادان
هر کس بو دونیادا اؤزو قدر یاشاییب، اؤزو قدر اؤله‌جک
و هر کس ساده‌جه اؤز ناغیلی‌نین قهرمانی دیر اوغلوم

#شعر
#رسول_اسمعیلیان
#آیحان
#اوغلوما_ایتحاف
@Edebiyaatt