የኢትዮጵያ ቀይ መስቀል ማኅበር ወላይታ ዞን ቅርንጫፍ ጽ/ቤት 11ኛ ጠቅላላ ጉባዔውን አካሄደ፡፡

ጠቅላላ ጉባዔውን በንግግር የከፈቱት የደቡብ ኢትዮጵያ ክልል ቅርንጫፍ ጽ/ቤት የቦርድ አቃቤ ነዋይ አቶ ዘላለም ዘሪሁን እንዳሉት፣ የክልል ቅርንጫፍ ጽ/ቤቱ በአዲስ መልክ እየተደራጀ በመሆኑ ነባር የዞን ቅርንጫፍ ጽ/ቤቶች በትብብር ሊሰሩ እንደሚገባ አሳስበዋል፡፡ የማኅበሩን አባላት ቁጥር ለማሳደግ የሚደረገው ጥረትም ተጠናክሮ ሊሰራበት የሚገባ ጉዳይ መሆኑን ገልፀዋል፡፡

የኢትዮጵያ ቀይ መስቀል ማኅበር የደቡብ ኢትዮጵያ ክልል ቅርንጫፍ ጽ/ቤት ኃላፊ አቶ ተስፋዬ ዱንዳ በጉባዔው ላይ ባስተላለፉት መልዕክት፣ አምቡላንሶችን በአግባቡ ጥቅም ላይ ማዋል እንዲሁም የማኅበሩን ሰብዓዊ ተልዕኮ በህብረተሰቡ ውስጥ ለማስረፅ ተናቦና ተቀናጅቶ መስራት እንደሚያስፈልግ አመልክተዋል። የህብረተሰቡን ተሳትፎ ለማስፋት የቀይ መስቀል ክበባትን በትምህርት ቤቶች ማቋቋም እንደሚያስፈልግም ተናግረዋል፡፡

የወላይታ ዞን ቅርንጫፍ ጽ/ቤት የቦርድ ሰብሳቢ አቶ ደስታ ዳና በበኩላቸው፣ እያንዳንዱ የማኅበሩ ተግባር የህብረተሰቡን ባለቤትነት ባረጋገጠ መልኩ መከናወን እንደሚገባው በመግለፅ፣ ከሚመለከታቸው አካላት ጋርም ተቀናጅቶ መስራት እንደሚያስፈልግ ተናግረዋል።

በዕለቱ የተጓደሉ የቦርድ አመራሮችን ለመተካት አዳዲስ የቦርድ አባላት የተመረጡ ሲሆን፣ በአባላት ማበራከት ከፍተኛ አፈፃፀም ላስመዘገቡ የወረዳ መዋቅሮች የዋንጫና ሰርተፊኬት ተበርክቶላቸዋል፡፡

በጉባዔው ላይ የጠቅላላ ጉባኤው አባላትን ጨምሮ የተጋበዙ የዞን እና ወረዳ የመንግስት የሥራ ኃላፊዎች ተገኝተዋል።