شلون نعطي دم بشكل سريع
هواي من الحالات النزف الشديد والمريض داخل class 4 hemorrhagic shock يحتاج نعطي دم بشكل سريع جدا وما ينفع نخلي الدم يقطر على راحته مثل ما نسوي في الحالات الاعتيادية
اهم الطرق الي نكدر نسويها
١. نخلي كانيولا wide caliber الي مذكور بالكتب هي كانيولا gauge 16 الي يكون لونها رصاصي والي نادرا ما تكون متوفرة في مستشفياتنا ، في المقابل الي متوفر هي الكانيولا الخضرة gauge 18 وهي اكبر حجم ممكن نحصله في مستشفياتنا
٢. نخلي كانيولات ٣ او ٤ او ٥ عادة المذكور بالكتب نخلي كانيولات ٢ بس على فرض هي كيجها ١٦ وبما ان الي متوفر عدنا اقل من هذا القياس لذلك نخلي ٤ كانيولات او حتى اكثر .
٣. نختار وريد كبير واذا ما حصلنا نكدر نخلي في external jugular
٤. ما نضيع وقت على cv line اذا عدنا كانيولات خضر كافيات .
٥. يحتاج نعطي الدم بشكل سريع من خلال ان نعصر البطل بايدينا او نستخدم three way stopcock من خلال ربطها بالكانيولا ونربط بيها سرنجة ام 20 او اكثر وندفعها بالكانويلا بشكل سريع .
٦. اذا ما متوفر threeway نكدر نسحب دم من البطل بالسرنجة مباشرة بحيث واحد يسحب دم وواحد يدفع علمود السرعة .
٧. اكو cuff خاص بالدم موجود في بعض المستشفيات نكدر نخلي بي البطل وننفخ الكف وراح يفيدنا في ان يخلي الدم يمشي سريع .
٨.في كل بطل دم منفذين لجهاز الاعطاء لذلك نكدر نخلي 2 iv set ونخليهم يمشون كل واحد على كانيولا .
هذا فيديو قصير يوضح كيفية عمل threeway .
وصورة cuff الي نستخدمه للدم

@DrMohammadZwain
https://t.me/EMclinicalnotes

اليوم كانت فرصة كبيرة
ان نلتقي مع زميلاتنا وزملائنا الاعزاء من ستاجيرية طب جابر بن حيان
وسولفنا شوية عن airway management و DC shock و vascular access
في الحقيقة كانوا مجموعة رائعة
تلمست منهم الحرص الكبير على تطوير معلوماتهم ومهاراتهم
وسعيد جدا بلقائي معهم
ان شاء الله اشوفهم مستقبلا من انجح الاطباء وامهرهم

Gauge of cannula
على غلاف كل كانيولا ينكتب حجمها guage و flow مالتها
وكلما الرقم اكبر يعني قياسها اصغر والفلو اقل
مثلا كانيولا الخضراء كيجها 18 والفلو مالتها 90ml/min
بالمقابل الوردية الاصغر كيجها 20 والفلو 60ml/min
اذا استخدمنا الكانيولا الخضراء يعني نكدر نعطي 500ml سواء blood او fluid ب5.5 دقيقة طبعا الدم يكون ابطأ بسبب اللزوجة .
واذا خلينا 4 كانيولات خضر معناها نكدر نعطي 4 pint او 2000 ml من blood او fluid خلال 5.5 دقيقة .
وعلى هذا الاساس كانيولات خضر اثنين افضل من triple lumen CV-line قياسه french 7  لان central lumen كيجه 16 والفلو  56 ml/min والاثنين الجانبيات كيجهن 18 والفلو 30ml/min 
والسبب انه اقل من الكانيولا هو بسبب طول cv-line الي يقلل من الفلو
لذلك كانيولات خضر اثنين الفلو مالتهن 180ml/min
في حين cv-line مجموع الفلو في كل قنواته 116ml/min .

@DrMohammadZwain
https://t.me/EMclinicalnotes

ا NG tube في عشر نقاط
١. يحتاج تحضر lidocain gel وسرنجة ام 50 او 60 ml خاصة بالتغذية بحيث الفتحة مالتها تكعد بالNG مباشرة .
٢. مرات يصير اشتباه ويتم استخدام suction tube بدل من NG tube  والفرق بينهن ان NG نهايته مسدودة والفتحات جانبية حتى لمن يدخل بال nasopharynx ما يسبب تروما ونزف على خلاف suction tube الي تكون نهايته مفتوحه .
٣. اكبر تحدي نواجهه هو الشعور المزعج والgag reflex لمن ندخل NG اكو عدة طرق ممكن تساعد في تقليلها مثل lidocaine gel و lidocaine spary وافضل طريقه واكثرهن فعالية هيlidocain nebulizer في ان نخلي 4ml من 10% lidocaine راح يفيدنا في تقليل discomfort .
٤. بعدها نحتاج نخلي lubricant لل tube وومكن نستخدم lidocaine gel 2% اما نسحبه بسرنجة ام 5ml وندفعه وننتظر كم دقيقة حتى يشتغل كتخدير للمنطقة او نخلي على التيوب مباشرة وهنا راح يفيدنا فقط في lubrication .
٥. القياس الي نحتاجه عادة بالبالغين 16f او 18f نقيس المسافة من xiphoid الى ear lobe وبعدها الى nose ونضيف على هذا الطول الي قسنا 15 cm ونؤشر على التيوب عن طريق بلاستر
٦. نبدي ندخل التيوب باحدى فتحات الانف ويكون اتجاهنا نحو floor of nose اسفل inf. turbenate .
وندفعه على كيفنا بهدوء واذا واجهنا مقاومة ممكن ندفع شوية اقوى او نفر التيوب على كيفنا .
٧. اذا المريض واعي نحثه يشرب شوية ماء ويبلعه او يبلع ريقه باثناء الدفع الى نعبر nasopharynx بعدها نخلي يثني رقبته الى الامام .
٨. اذا المريض صارت عنده كحة قوية وخنقة وشفنه ضباب على التيوب باثناء للعملية نسحب التيوب لان معناها رايح لل trachea
٩. بعدها يحتاج نتاكد من ان التيوب داخل للمعدة الطريقة الشهيرة ان ندفع هواء ونسمع bubbles  في المعدة وكون ما نسمع شي في chest بس هذه الطريقة مو كافية وحدها ونحتاج نحذر ولا سيما في الشخص الغير واعي ، لان المريض الواعي اذا التيوب رايح في trachea راح تبين عنده اعراض وافضل طريقة للتاكد هو من خلال CXR .
١٠ .واخيرا نثبت التيوب على الانف من خلال بلاستر كما موضح بالصورة .
فيديو مفيد عن الموضوع
https://youtu.be/1OakmxZDa5c

@DrMohammadZwain
https://t.me/EMclinicalnotes

‏Adrenalin
ملك الادوية وكون حاطه بجيبك وتمشي 😅😅
المهم هو الجرع والindication .
طبعا الموجود عدنا هو الامبولة ام 1mg/ml ، الي يعتبر تركيزه 1:1000 ، فاذا نريد نستخدمه عضلي ماعدنا مشكلة ، في حين اذا ردنا نستخدمه وريدي كون يتخفف ب9 NS حتى يتحول الى 1:10000 .
1- عدنا اول شي CPR بالبالغين نعطي 1mg يعني الامبولة كلها وره ما تتخف مثل ما ذكرنا فوك وتنعاد كل 3-5 دقائق .
2- بالاطفال الجرعة هي 0.1ml/kg ابو 1:10000 يعني نسحب من الامبولة عشر وحدات بالسرنجة مال الانسولين الي بيها 100 وحدة يعني وتكمل الباقي 90 وحدة NS بهذه الحالة صار عدنا عشر وحدات لكل كيلو ، فاذا الطفل وزنه 5 كيلو يحتاج 50 وحدات adrenaline ، واذا وزنه 10 كيلو يحتاج 100 وحدات وهكذا . وايضا تنعاد كل 3-5 دقائق .
3-في anaphylaxis تكون الجرعة في البالغين 0.5mg يعني نصف مل ويعطي عضلي في عضلة الفخذ في middle third ويعاد كل 5 دقائق حسب الحاجة .
بالاطفال الي جوه 5 سنوات تكون الجرعة 0.15mg يعني تسحب مل كامل بالسرنجة مال الانسولين وتحسب 15 وحدة بالسرنجة مال الانسولين تعطى عضلي وتعاد 5 دقايق حسب الحاجة .
والاطفال جوه 11 سنة نعطيهم 0.3mg يعني 30 وحدة .
والاكبر من 11 سنة حالهم حال البالغين بالجرعة .
4- في asthma الي تكون life threatening الجرعة تكون ايضا 0.5 مل عضلي او تحت الجلد ويعاد بعد نصف ساعة لثلاث مرات .
5- بالcroup : الجرعة 0.4mg/kg اقصى جرعة هي 5mg وينعاد كل نصف ساعة حسب الحاجة .
يعني اذا طفل وزنه 15 كيلو راح يحتاج 6 mg , لكن عادة نعطي امبولة وحدة بالبخاخ وياها فد 3 مل NS كافية والمريض يتحسن عليها .
6- عدنا بالshock : على الرغم استعماله مو شائع عدنا لكن نكدر نعطي بجرعة 0.002 الى 0.01 mg بالدقيقة ، يعني اذا خلينا امبولة 1mg في 500 مل NS راح يكون في كل 1 مل 0.002 mg يعني كون يخلص 1مل بالدقيقة يعني 20 قطرة بالدقيقة .

من افضل الفيديوهات الي ممكن تستفاد منها في تعلم US-guided CV-line insertion
بالبداية قد تواجه صعوبة
لكن مع المحاولة يسهل الموضوع بالتدريج
https://youtu.be/QXsqFr-eGiM

اهدافنا لعام 2022
مع اقترابنا من نهاية السنة ضروري نراجع انفسنا ونشوف مدى تقدمنا من الناحية المهنية والعلمية والاخلاقية .
لان التقدم في مجال واحد مو كافي
ممكن حققت انجازات مهنية لكن بعدك متاخر في جوانب الحياة الاخرى .
التكامل في الحياة من كافي النواحي هو الهدف المطلوب
هواي نشوف اشخاص ناجحين ماديا ولكنهم فاشلين اجتماعيا او ناجحين علميا ومهنيا وفاشلين اخلاقيا وهكذا
مسيرتنا للتقدم في الحياة كون تشمل الجوانب الاخلاقية والمادية والمهنية والاجتماعية والخ
كل حسب اولوياته واهتماماته .
في المجال الطبي نشوف هذا الموضوع بوضوح
من خلال التهاون مع ارواح الناس وصحتهم وهذا يكشف عن تراجع اخلاقي كبير .
وكذلك الاخطاء العلمية والادارية تعكس الجانب العلمي والمهني .
وفي نفس الوقت سكوتنا وغضنا النظر عن هذه الاخطاء يعتبر تراجع اخلاقي كبير مهما كانت انجازاتنا المادية والمهنية .
موقفنا تجاه الازمات الاخلاقية تحدي كبير وكون يبقى في قمة اولوياتنا في عام 2022 او 2023 وعلى طول عمرنا .

@DrMohammadZwain
https://t.me/EMclinicalnotes

الف الحمد لله والشكر
بجهود المتبرعين
Trcheal tube introducer bougie
IGEL LMA
Incubating stylet
كلهن يعتبرن من ضمن life saving instrument
وان شاء الله ننزل عنهن منشورات مفصلة باقرب وقت
وان شاء الله نسعى ان يتم توفيرهن في المستشفى
الي يحب يتبرع يكدر يرسل صورة رصيد او حوالة او زين كاش 07803377234
او على الماستر كارت 2612705232

ومن احياها فكأنما احيا الناس جميعا

@DrMohammadZwain
https://t.me/EMclinicalnotes

شلون تخلي ET-tube  وانت بالصحراء 😅
طبعا صدك مرات تصير بموقف تحس روحك بالصحراء
لمن تريد تضطر تخلي تيوب في طوارئ مستشفيات العراق بحيث لو ماكو laryngoscope او عطلان .
هنا خو ما تبقى تنتظر الى ان تفقد المريض
وخاصة اذا جان bag mask ventilation مو كافي و ineffective
هنا عندك حل وهو digital intubation
بشرط كون المريض ماعنده response for painful stimulation و كون ما يدخل ضمن difficult intubation .
هنا راح تدخل ايدك اليسرى بحلك المريض وتتحسس epiglottis وترفعها بايدك و تمرر التيوب بين اصابعك السبابة والوسطى وتدفعه ويكون اتجاهه الى الاعلى .
راح تشعر ب click لمن يعبر التيوب vocal cord او المساعد يخلي ايده على trachea  راح يشعر بدخول tube .
نسبة نجاح هذه procedure حوالي 89%  وهي نسبة جيدة في حالات الضرورة وماعدنا بدائل اخرى .
اكثر خطر فيها هو على الطبيب من secretion او خاف يعضه المريض لذلك كون ياخذ احتياطاته زين وكون المريض deep coma ياله يكدر يسويها

@DrMohammadZwain
https://t.me/EMclinicalnotes

https://youtu.be/Yb1sGsUAZ-E

الف الحمد لله
بدعم احد المتبرعين
وبجهود د. محمد جعفر زين الدين
وصل الى طوارئ مستشفى الصدر في النجف
جهاز external cardiac Compressor
الذي يستخدم في CPR الانعاش القلبي الرئوي
وان شاء الله يكون سبب في انقاذ ارواح الناس
للتبرع ارسال حوالة على زين كاش 07803377234
او على الماستر 2612705232

@DrMohammadZwain
https://t.me/EMclinicalnotes