Жыхар Горадні абураны заробкам у Беларусі

Прапаганда піша пра высокія заробкі ў краіне, але ці сапраўды гэта так?

Вось прыклад: беларус убачыў вакансію прадаўца ў краме ў Горадні — 880 рублёў (260 еўра) і вырашыў падлічыць, колькі ён атрымае на рукі з усімі расходамі.

Лічым: пры графіку 2/2, 15 дзён працы ў месяц, праезд — бярэм мінімум, ні таксі, ні маршрутка, аўтобус або тралейбус, 2 рублі ў дзень, 30 у месяц; харчаванне падчас 11–12-гадзіннай змены два разы ў дзень — гэта мінімум 15–20 рублёў. У выніку атрымліваем мінімум 330 рублёў расходаў. Пры заробку ў 880 рублёў чысты даход складае 550 рублёў (165 еўра).

Алімпійская турыстка з Наваполацку едзе дадому

Ганна Каралёва прыехала на Алімпіяду ў Італію па чужой ліцэнзіі, а цяпер бясслаўна вяртаецца ў Беларусь. Нейтральная лыжніца 12 лютага завяршыла свой выступ на дыстанцыі дзесяць кіламетраў, заняўшы 45-ае месца са 111.

Да гэтага яна была 34-й і 48-й.

Як вам выступ беларускай спартоўкі?

Пры гэтым не забудзем нагадаць, што супраць найлепшага ў гісторыі Беларусі лыжніка Сяргея Далідовіча за актыўную грамадзянскую пазіцыю ў Беларусі ўзбудзілі крымінальную справу і абвясцілі ў вышук у Расеі. Цяпер ён трэнуе ў Польшчы мясцовых біятланістаў – і ўжо дае вынікі.

Марына Зуева заняла 6-е месца на дыстанцыі 5000 метраў⛸

У спаборніцтвах па канькабежным спорце беларуска доўга заставалася лідаркай, пакуль на дарожку не выйшлі фаварыткі. Пакуль што гэта найлепшы вынік нейтральных спартовак з Беларусі на гэтай зімовай Алімпіядзе.

Вызначыліся супернікі ў футбольнай Лізе нацый

Беларусь згуляе з Албаніяй, Фінляндыяй і Сан-Марына. Матчы пройдуць восенню гэтага года.
Галоўны трэнер зборнай Беларусі Віктар Ганчарэнка пракаментаваў вынікі лёсавання:

– З каманд, якія былі ў першым кошыку, Албанія, напэўна, самы моцны супернік для нас. Тое самае тычыцца і Фінляндыі, што знаходзілася ў другім кошыку. Пра Сан-Марына можна сказаць, што цяпер слабых супернікаў няма.
Нас чакаюць цікавыя сустрэчы, і нам трэба вельмі добра падрыхтавацца. Важна, у якой форме нашы хлопцы падыдуць да матчаў. Упэўнены, што ўсе яны добра ўмеюць гуляць у футбол. Галоўнае – праявіць свае найлепшыя якасці, каб браць пункты ў кожнай гульні або ж перамагаць у кожным матчы

– заявіў Ганчарэнка прэс-службе АБФФ.

🇵🇱Польшча згуляе з Босніяй і Герцагавінай, Румыніяй і Швецыяй.

🇺🇦Украіну чакаюць матчы з Венгрыяй, Грузіяй і Паўночнай Ірландыяй.

Мы не пытаемся ці падыходзіш ты нам, мы пытаемся ці ёсць у цябе хараткар ?

У Беластоку шукаюць гульцоў у рэгбійную каманду

У рэгбі разнастайнасць — гэта сіла 💪 У нас ёсць месца для кожнага 🏉 Мы не пытаемся, ці падыходіш ты. Мы пытаемся, ці ёсць у цябе характар і жаданне быць часткай каманды.
👉 Ідзе набор у секцыю сеньёраў Rugby Białystok для гульцоў 2009 года нараджэння і старэйшых.
Мы — амбіцыйны аматарскі клуб, які выступае ў найвышэйшай лізе Польшчы. Мы будуем каманду, заснаваную на працы, павазе і барацьбе да канца. Табе не трэба адпавядаць чыімсьці ўяўленням пра спартсмена. Дастаткова жадання прыняць выклік. 🗓 Адборачныя трэнаванні і праходзяць кожны аўторак у лютым і сакавіку. 📌 Бакавое поле Chorten Arena⏱️ 20:00 Ёсць пытанні?☎️ Патэлефануй: 539 221 275
📧 Напішы: oskar@rugbybialystok.pl

Датскі трэнер зборнай Фінляндыі: не магу закрыць вочы на палітычную сітуацыію

Якаб Фрыіса прызнаўся, што разачарваны, што прыйдзецца гуляць з Беларуссю.

"Я ўсяго толькі футбольны трэнер, але я не магу закрываць вочы на палітычную сітуацыю. Я расчараваны тым, што Беларусь апынулася ўцягнутай у гэта, таму што мы ведаем, што адбываецца ва Украіне. Гэтая жараб’ёўка — ганьба. Што да астатніх супернікаў — заўсёды можна сказаць, што адзін супернік лягчэйшы за другога. Мы ўпэўненыя, што здольныя выйграць гэтую групу, і я сказаў бы тое самае незалежна ад таго, у якой групе мы апынуліся б. Мы падыдзем да восені з такім настроем, але, вядома, нам таксама трэба паказаць сябе на полі."

А зборная Беларусі пачне ў Албаніі🇦🇱

І дакладна не зможа згуляць у Менску
Ёй зноў прыйдзецца праводзіць хатнія гульні на нейтральным полі, і верагодна зноў у Вугоршчыне.
Гэтак гульні на выедзе: 26 верасня Албанія, 29 верасня Фінляндыя, 13 лістапада – Сан-Марына.
Фармальна хатнія: 3 і 6 кастрычніка Сан-Марына і Фінляндыя, 16 лістапада – Албанія.
Пераможца групы мае шанец згуляць на Еўра-2028.

У Беластоку на дзень усіх закаханых запрашаюць на дзіцячы спектакль

"- 14 лютага запрашаем на спектакль «Птушыны суд» паводле казкі-прытчы Сяргея Кавалёва. На сцэне граюць маладыя акцёры – падлеткі, што адточваюць свой талент у тэатральнай студыі Аляксандра Енджэеўскага. Спектакль раскажа гісторыю пра тых, хто адважыўся выйсці за межы адведзенай яму ролі; пра бессэнсоўнасць калектыўнага суда і пра ўразлівасць чалавека, які адрозніваецца ад іншых. Мова спектакля - беларуская"

Дзе і калі:
Młodzieżowy Dom Kultury w Białymstoku
ul. Warszawska, 79A
14 лютага
13:00
Уваход вольны.

Памятаеце расейца, якому ў жніўні мінулага года Навроцкі даў польскае грамадзянства?

Цяпер ён заваяваў для Польшчы медаль Алімпіяды.
Уладзімір Сяміруні заваяваў срэбра ў канькабежным спорце на дыстанцыі 10 тысяч метраў.
У Польшчу хлопец пераехаў у 2022 і выказаўся супраць расейскага ўварвання.
Гэта другі медаль для Польшчы. Яшчэ адно срэбра ўзяў лыжны скакун Кацпер Тамасяк.

Бразілія заваявала першае ў сваёй гісторыі золата зімовых Алімпіядаў🥇

На зімовых гульнях гэтая краіна Паўднёвай Амерыкі выступае з 1992 года, і дагэтуль яе найлепшым вынікам было дзявятае месца ў 2006 годзе. Але ў Дзень закаханых першую алімпійскую ўзнагароду – і адразу залатую – Бразіліі прынёс Лукас Бротэн, які перамог у спаборніцтвах па гіганцкім слаламе.

Лукас Бротэн нарадзіўся ў сям’і бацькі-нарвежца і маці з Бразіліі. Цяпер яму 25 гадоў, раней ён выступаў за Нарвегію, але ў 2024 годзе пачаў прадстаўляць Бразілію🇧🇷

У канцы 2025 года Бротэн выйграў першы ў гісторыі Бразіліі этап Кубка свету, а цяпер прынёс і першую алімпійскую ўзнагароду на зімовых гульнях, стаўшы алімпійскім чэмпіёнам.

У чацвер у Беласток прыедзе знакамітая італьянская Фіярэнціна.

Матч плэй-оф футбольнай Лігі канферэнцый Ягелонія – «Фіярэнціна» пройдзе 19 лютага і пачнецца а 21:00.

Сёння, 14 лютага, супернікі правялі матчы ў сваіх нацыянальных чэмпіянатах. «Ягелонія» згуляла 0:0 з «Краковіяй» і захавала лідарства ў чэмпіянаце Польшчы. А «Фіярэнціна» сенсацыйна перамагла «Кома» – 2:1 і ўпершыню з пачатку сезону пакінула зону вылету.

Блогер Павел Спірын у бяспецы

Экс-палітзняволены выехаў у Літву пасля пяці гадоў у турмах беларускага рэжыму.

Павел – юрыст паводле адукацыі. Некалі працаваў у дзяржаўным камунальным прадпрыемстве, але яго звольнілі з працы, калі ён узяў удзел у парламенцкіх выбарах. Пасля гэтага Спірын вырашыў заняцца YouTube. Яго палітычныя відэа збіралі сотні тысяч праглядаў.

У 2020 годзе блогер спрабаваў стаць кандыдатам у прэзідэнты, але яго ініцыятыўную групу не зарэгістравалі. Тады ён стаў даверанай асобай Святланы Ціханоўская.

Спірына арыштавалі ў верасні 2020 года. Яму прысудзілі 4,5 года калоніі нібыта за «распальванне варожасці». Блогера змясцілі ў калонію Бабруйск, а затым па артыкуле 411 КК (паводле якога людзей у турме можна ўтрымліваць фактычна бясконца) дадалі яшчэ год і адправілі ў калонію ў Горкі.
Пасля выхаду на ўмоўную свабоду Спірын выехаў за мяжу.

Расейскія акупанты стварылі аналаг украінскіх клубаў і заявілі іх у свой чэмпіянат

Чарговая крадзеж Расеі – цяпер яны стварылі два фэйкавыя клубы. Акупанты заяўляюць:

«Луганская "Заря"» і данецкі "Шахцёр" прайшлі атэстацыю Футбольная нацыянальная ліга (ФНЛ) і былі заяўленыя ў Другую лігу – дывізіён Б, зона Поўдзень – на сезон 2026 года. У лізе ўдакладнілі, што рашэнні былі прынятыя на пасяджэнні камісіі, і паводле вынікаў аднаго з пасяджэнняў атэстаты атрымалі 28 клубаў.

🇺🇦Сапраўдныя ж "Шахцёр" Данецк і "Заря" Луганск працягваюць выступаць у чэмпіянаце Украіны, а «Шахцёр» – яшчэ і ў плэй-оф Лігі канферэнцый.

Пакуль Расея магла выступаць на міжнароднай арэне і баялася санкцый, яна не чапала клубы з акупаваных тэрыторый. Але пазней уключыла ў свой чэмпіянат каманды з акупаванага Крыму і Данбасу.

На фота – сапраўдны «Шахцёр».

Расея запускае фэйкі пра сваё вяртанне ў вялікі футбол⚽️
Але ў бліжэйшы год гэтага не адбудзецца – тлумачым, чаму.

12 лютага ў Бруселі прайшоў Кангрэс UEFA. Пасля яго ў сотнях, пераважна рускамоўных, СМІ і тэлеграм-каналаў з’явілася інфармацыя, што нібыта за вяртанне Расеі на міжнародную арэну прагаласавалі Казахстан, Балгарыя, Сербія, Грэцыя, Вугоршчына ды Боснія і Герцагавіна.

Мы ўважліва вывучылі праграму і справаздачы Кангрэса – і нідзе нават не згадвалася пытанне вяртання Расеі, не кажучы ўжо пра галасаванне па ім.

Ці была ўвогуле расейская дэлегацыя ў Бруселі?

Так, была.
Але хто ўваходзіў у яе склад – у адкрытых крыніцах няма.
Для параўнання: усе іншыя дэлегацыі паведамілі, хто канкрэтна прадстаўляў іх федэрацыю на канферэнцыі. Нават Беларусь.

Пазней некаторыя расейскія СМІ прызналі, што сапраўды ніякага галасавання не было, але «пытанне вяртання Расеі» абмяркоўвалася нібыта ў кулуарах. А краіны, якія нібыта падтрымліваюць Расею, – гэта прадстаўнікі краінаў у Выканаўчым камітэце УЕФА. Але ў выканкам уваходзяць 20 сябраў, і ніводны з іх публічна не заяўляў пра падтрыманне вяртання Расеі да афіцыйных спаборніцтваў.

Больш за тое, публічную пазіцыю УЕФА вельмі выразна агучыў прэзідэнт арганізацыі – Александэр Чэферын.
Паводле яго словаў, пазіцыя УЕФА не змянілася, і гаворкі пра вяртанне расейцаў у футбол няма, але арганізацыя «штодня аналізуе дэталі гэтай сітуацыі».

Другі фэйк: «Расею верне ФІФА без згоды УЕФА»

Калі гэты наратыў разваліўся, Расея запусціла новы фэйк: нібыта ў красавіку 2026 года на кангрэсе FIFA Расею вернуць у міжнародны футбол без згоды УЕФА.
Нібыта гэтую ідэю агучыў прэзідэнт ФІФА – Джані Інфантына.

Але ФІФА не мае права вяртаць Расею без згоды УЕФА.
Ніколі ў гісторыі ФІФА не аднаўляла ўдзел нацыянальнай зборнай у абыход кантынентальнай канфедэрацыі – гэта супярэчыць статуту.

Да якога часу аднаўленне ўдзелу Расеі немагчыма?

Да 4 сакавіка 2027 года, калі чарговы Кангрэс УЕФА ў Астана можа разглядаць гэтае пытанне, вяртанне Расеі немагчыма.

Гэта азначае, што Расея дакладна прапусціць Еўра-2028, лёсаванне якога адбудзецца 6 снежня 2026 года, а таксама мінімум яшчэ адзін цыкл еўракубкаў.

Уся іншая інфармацыя на гэтую тэму – ўкіды.

Чаму Расію выключылі?

Нагадаем, што ў 2022 годзе Расія была выключаная з усіх клубных і міжнародных спаборніцтваў УЕФА пасля поўнамаштабнага ўварвання ва Украіну.

IKEA адкрывае сваю першую краму ў Беластоку

Яна будзе нестандартнай — у кампактным фармаце. Новая IKEA з’явіцца ў Galeria Zielone Wzgórze, у памяшканні, якое раней займаў гіпермаркет Carrefour. Адкрыццё плануецца ўжо ў гэтым годзе.

Крама ў Беластоку — гэта працяг развіцця новага фармату, які дэбютаваў на польскім рынку ў Bielsko-Biała у 2025 годзе. Ён павінен стаць адказам брэнда IKEA на зменлівыя пакупніцкія паводзіны спажыўцоў, а таксама спосабам прынесці прапанову IKEA ў меншыя гарады.