بسم الله الرحمن الرحيم
زتونة سنة رابعة سمستر 8
عندنا أربع موديولز طبية .. هنتكلم في كل رسالة عن كل واحد بشكل منفصل ..
١. موديول الأطفال؛ موديول كبير ب 150 درجة
٢. موديول الجراحة، وده برضه كبير ب 150 درجة
٣. آخر اتنين كل واحد فيهم ب 100 درجة وهما
Endocrinology - infectious diseases
هنتكلم عن كل موديول في 4 نقاط ان شاء الله
١- مصدر المذاكرة ك كتاب
٢- مصدر المذاكرة ك شرح
٣- الامتحان وبييجي ازاي
٤- العملي

موديول الأطفال
١- مصدر المذاكرة :
هنذاكر من كتاب جامعة القاهرة ، أو من كتاب نبض -كتاب نبض هو نفسه كتاب القسم لكن تيم نبض حاولوا ينسقوه أكتر وينظموه-
طيب انا برجح لكم ايه؟ الأفضل كتاب جامعة القاهرة وطبعا على حسب ما ترتاح برضو .. انا عن نفسي ارتاحت في كتاب جامعة القاهرة - الموديول ده عايزك تذاكر من كتاب بترتاح فيه عشان تجمع معلومات منظمه -
فيه كتاب بيبي نيلسون ده خيار متاح بس كبير شوية وفيه تفاصيل .. ف لو انت نفسك طويل هاته
فيه بردو كتاب د. محمد اسماعيل، الكتاب ده هو نفسه كتاب جامعة القاهرة بالنّص، الفرق بس في الشكل وكتاب د محمد مختصره شوية وعامل شكل الكتاب أهدى وأروق شوية من كتاب جامعة القاهرة .. ف مفيش مشكلة خالص تذاكر من ده او ده الاتنين واحد
خلصت مذاكرة من الكتاب بتاعك الجميل؟
تفتح محاضرات الكلية وتشوف اي معلومة زيادة تقرأها .. ده مهم جدًا عشان بتنزل امتحان

2- مصدر الشرح والسماع :
د. على القزاز أفضل من شرح الطب .. مش عايز اقول اقتراحات غيره لأن هو أنسب حد الحقيقة
لكن لو قولنا اقتراحات تانية ممكن نرشح د. عرفة .. د. أبو الأسرار، الاتنين كويسين برضه

بس عموماً زي ما قولنا هو كتاب جامعة القاهرة مع شرح د القزاز ده جاب مع الناس من الآخر وهو اكتر حد كان مناسب، من مميزاته كمان متوفر ليه ريكوردات مراجعة ف هتعرف تراجع معاه، ووقته كويس مش طويل أوي، بيديك الزتونة ومبيرغيش كتير خالص
وعلى حسب ما ترتاح برضه لكن من وجهة نظري د القزاز هو ال Top في الجزء ده

كمان تفريغات د أبو الأسرار جميلة جداً كإضافة معلومات بعد ما تذاكر مع القزاز لو البحر حب الزيادة 😄

3- شكل الامتحان وبييجي ازاي :
عندنا مصادر لل MCQ الحمد لله كويسة جدًا، زي
- الفورماتيڤز اللي بتنزل
- كتاب د الموجي بييجي
- حوالي 100 MCQ كان نازل لسنة خامسة
- حوالي 2000 او 2500 سؤال ده مصدر تاني كان نازل لسنة خامسة .. كتير جدًا لكن بييجي منه .. عيبها الوحيد بس انها مش محلولة ومش بتتحل🤓 بس بييجي منها وانتو وشطارتكوا (بقترح عليكم توزعوها ع بعض كل واحد ٥٠ سؤال وهتحلوها كلها بإذن الله .. والمختلفين فيه هتسألوا عليه الدكاترة
و المفروض بنكون مذاكرين ف مش بنعتمد كليًا على مصادر الاسئلة دي، بنعتمد على مذاكرتنا في النظري والعملي كمان .. لكن الأسئلة بييجي منها وبتتكرر
بالنسبة للريتن فهو بييجي بسيط ومش بيكون معقد .. ال cases بتكون سهلة وواضحة للي عدا عالمنهج

ملحوظة في غاية الأهمية
علاقتكوا بالدكاترة هتحدد مدى صعوبة الامتحان او سهولته
لو مفيش علاقات طيبة مع الدكاترة اعرفوا انكوا هتشوفوا امتحان هيقطم وسطكوا .. من الآخر
اهتموا بحضور الراوندات، المحاضرات بالذات قسم الأطفال نهتم بحضورها
قسم الأطفال اكتر قسم منظم عندنا في الكلية والمستشفى كمان .. الدكاترة بيتضايقوا من عدم الحضور، الناس في القسم كلهم على أعلى مستوى من أصغر واحد لأكبر واحد كلهم ناس شاطرة جدًا ما شاء الله والحضور هيفيدك، فياريت تحضر

4- العملي :
في مصدر مهم وجميل جدا ومعرفش حد ذاكر غيره للعملي وهو مذكرة د. محمد نصر .. شارح عليها فيديوهات للعملي جميلة جدا هتفيدك عملي ونظري، المذكرة موجودة على النت ممكن تطبعها عادي
بالنسبة لأمتحان العملي زي عملي الباطنة بالظبط، انت أصلًا هتذاكر عملي الباطنة عشان عملي الأطفال، هيفرق بس بعض الحاجات البسيطة زي ال development بتاع البيبي و النيوترشن assesment
يعني لو عندك 5 حالات هتدخل عليهم عملي الأطفال منهم 3 شبه حالات الباطنة بالظبط
في variations في تقييم العملي، هتلاقي ان في دكتور ممكن يسألك في نظري في امتحان العملي ..
المهم انه ممكن يدخل في النظري فتكون عامل حسابك انك تكون مذاكر بردو أجزاء النظري الخاصة بحالات العملي اللي هتدخل عليها
في حالات بردو بتكون موجودة في العملي مش موجودة في النظري خالص
زي مثلا حالة مهمة خالص هي ال cerebral palsy دي هتعمل عليها ريفليكسات زي الknee jerk وال babinski وهيسألك عنها نظري سؤال بسيط زي ايه انواعه؟ أو ممكن ميسألش انت وحظك بردو

انتظروا زتون باقي الموديولز
لا تنسونا من دعواتكم الطيبة

ملحوظة إضافية: دكتور السواح منسق موديول الأطفال حد محترم جدًا وبيحب الطلبة .. لكن بشرط انكم تسمعوا كلامه وخلي علاقتكم طيبة بالدكاترة الكبار عشان لو اشتكوله مش هيكون ف صالحكم تماماً

بسم الله الحكيم
زتونة موديول الجراحة
1- مصدر المذاكرة :
عندنا 3 اوبشنز أولهم كتاب د وائل، وده معظم الناس بتذاكر منه .. بيديك المفيد،
التاني هو كتاب د المطري وده مفصّل شوية، وده تسمع معاه د المطري
تالت اوبشن هو كتاب د علي حسيب وده كتاب رائع جداً ك text لكن مشكلته انه ابيض واسود ومفيهوش صور لكن ال Text بتاعه محترم جداً


2- مصدر الشرح والسماع :
لو هتذاكر من كتاب د وائل هتسمع عليه غالباً حد من 3
يا أما
- د وائل كويس لكن كتير بيقول انه بيقرأ بس وهتجرب عمومًا لو حبيت تنجز
في اوبشن برضو جميل في الشرح وهو د وهدان
- دكتور وهدان حلو جدًا للناس اللي معندهاش basic او واقع عندها خالص، د وهدان جميل جدًا في الجراحة لو حبيتوا تسمعوه هو يعتبر أفضل الناس اللي جمعت بين ال basic وال clinical
- د علي حسيب جايب المفيد المختصر وسريع .. يعني مش هينفع تسرعه انت هتسمعه زي ما هو كده على ×1
- د المطري رائع جدا لكن الريكوردات بتاعته طويلة جدا جدا جدا فهو بس للناس اللي نفسها طويل

ملحوظات
لما تخلص المنهج راجع من ريكوردات د نور الدين رائعة جدًا وبتنجز

3- شكل الامتحان وبييجي ازاي :
عندنا مصادر كتير لل MCQ الحمد لله وبأكد عليك حل امسكيوز كتير:
١. كتاب القسم بييجي منه نسبة في الامتحان الحمد لله
٢. MCQs دكتور المطري بييجي منه برضه في الامتحان لكن مش نسبة كبيرة .. وعندنا مصدرين لدكتور المطري؛ في كتاب صغير وكتاب كبير
طيب هنحل انهي فيهم؟ هنحل الاتنين عادي بس نبدأ طبعًا بالصغير، والكبير على فكرة كبير جامد فعلًا لو هتحل فيه ابدأ من أول السنة متزنقش نفسك فيه في الآخر عشان مش هيخلص وهتلاقي نفسك ملحقتش تعمل حاجة .. ده بالنسبة لل MCQ
٣. الفورماتيفز
بالنسبة للريتن بيكون الحمد لله واضح جدًا وصريح ومباشر وهتحل الريتن بتاع كتاب القسم ساعات بييجي منه

4- العملي :
هتدخل على حالات جراحة بحتة زي مثلا hernia .. زي varicocele
بتعمل examination بالطريقة المظبوطة ال هنتعلمها من مصدر سماع ومذاكرة العملي وال هيكون ڤيديوهات ال EMLE، دي ڤيديوز معمولة بشكل احترافي هتفيدك جدًا في ال examination ..
مصدر المذاكرة ك كتاب هو كتاب د وائل بتاع العملي قولا واحداً، ده الكتاب ال الناس كلها كانت بتذاكر منه، منظم وهيفيدك جدًا في الأجزاء اللي ممكن تتسأل فيها نظري وبتتسأل فعلاً، وفي تريكات جميلة جدًا في نهاية الكتاب في صورة سؤال وجواب منغفلش عنها عشان بتتسأل فيها والدكاترة بيفرحوا جدًا لما بتتجاوب

في نقطة كمان مهمة، في عملي الجراحة ساعات بيطلب منك history عادي وبعدها بيسألك في الحالة نفسها بقى ده اتكرر كتير وبيحصل عادي، بعكس الباطنة أن أغلب الأوقات بتكون OSCE بيشوف بس التكنيك بتاعك بتشتغل صح ولا غلط ويحاسبك عليها وبعدها بيسألك سؤال بسيط
لكن الجراحة عادي ممكن يطلب history ويسألك في الحالة ويسألك ال diagnosis كمان.

عندك كمان امتحان ع سلايدز ودا بيبقى واضح جدًا وسهل الحمد لله من صور كتاب دكتور وائل أو بينزلك ملف
واحتمال كبير ترجع تراجع اناتومي تاني عشان بينزل
مثال: يجبلك vein فالشرايح ويقولك identify وانت وضميرك بقى (أعرف واحد كان
بيسأل ف الامتحان “ده vein ولا artery يا دكتور؟” وقدامه الvessel ازرق :D)

نصيحة عامة
اكتب الاجابة المفيدة ومترغيش كتير سواء عملي او نظري .. تصحيح الجراحة غير ..


انتظروا زتون باقي الموديولز
لا تنسونا من دعواتكم الطيبة

بسم الله الكريم
زتونة موديول Endocrinology
1- مصدر المذاكرة:
عندنا اوبشنين أولهم كتاب د علام والتاني كتاب د موافي
اللي بيميز كتاب د موافي انه منظم، text محترم جداً وكمان جداول بمقارنات جميلة جداً ومفيش أي حشو في الكلام، لذلك شخصياً برجح كتاب د موافي، خصوصاً كمان ان د موافي مجدد ف الشغل فيه هيكون احسن وأحسن كمان
كتاب دكتور علام مشوفتهوش فمقدرش أحكم عليه
👈هنحتاج برضه كتاب الجراحة عشان نذاكر منه ال thyroid، بتنزل امتحان وخصوصاً عملي ف نركز عليها جدًا بتنزل وهتجيلك case ف منسيبهاش

👈كمان نقطة مهمة جدًا؛ لازم تشوفلك مصدر كويس للفسيولوچي تذاكر منه فسيو الاندوكراينولوچي ومتكتفيش باللي موجود في كتاب الباطنة فقط .. مش كافي خاالص، عشان بييجي منه في الامتحان وبييجي كتير كمان .. السنة ال فاتت كان بيسأل ف هرمونات زي ال Ghrelin وال Melatonin

تاني نقطة ..
2- مصدر الشرح والسماع:
عندنا اوبشنين، أولهم كورس د موافي وده انا شخصياً بفضله ع الكتاب بتاعه، بس لو تابعت مع د موافي لو هو ساب اي حاجة متسيبهاش انت اقرأها وبتنزل في الامتحان؛ زي مثلا ال preparations بتاعت الانسولين نزلت في الامتحان عندنا ريتن
تاني أوبشن هو د علام شارح برضه الاندوكراينولوچي كويس ومراجعاته جميلة .. والناس اللي بترتاحله تكمل معاه لكن انا عن نفسي برجح د موافي عشان الاسكيمات اللي بتلم المنهج والاندو غالباً بيحتاج انك تنجزه بسرعه عشان انت معاك جراحة ودي محتاجة مجهود

👈 تركاية هنا بس وانت بتذاكر هات الدرس اللي قبله متذاكرش الجديد الا وانت قارئ القديم، عشان الاندو شوية معتمد على انك بتربط المعلومات ببعضها وتقارن بين الدروس وال hormones المختلفة

👈 اقتراح ساعدني كتير برضه، مراجعة د علام بعد ما نخلص مذاكرة مهمة جدًا تلم بيها الدنيا، خصوصاً كمان ان د علام بيقول تركات كده في العملي تفيدك فمتغفلوش عنها .. واللي هيشوف حالات يشوفها في المستشفى هي هتكون كافية جدًا ان شاء الله

👈 دكتور علام لو عملكوا مراجعة في المستشفى احضروها كلكوا

تالت نقطة ..
3- شكل الامتحان وبييجي ازاي:
لازم ولابد انك تكون مذاكر كويس، مفيش حاجة اسمها هذاكر باطنة بس ولا جراحة بس لا لازم تكون ملم بمعلومات، الامتحان بتاع الاندو كان جاي فيه هرمونز كمان مش موجودة في الموديول .. يعني مثلا هرمون ال Ghrelin ده بتاع الجوع .. melatonin بتاع النوم الاتنين جم في الامتحان
ف ركز كده وجمع معلومات، الفسيو متهملوش .. أي هرمون في الجسم هاته واقرأ عنه كلمتين هتجيلك في MCQ وتحلها وتبقى زي الفل احسن ما تقعد كده مش فاهم اي حاجة خالص ولا عارف حاجة عن الهرمون وتقعد كده متنح للسؤال مش عارف تختار ايه

بالنسبة للريتن بيكون سهل جداً يعني كان مثلا جه في مرة قالك قول الهرمونز اللي بتطلع من البنكرياس .. مرة تانية يقولك قول اللي بتطلع من ال adrenal ف بتبقى حاجات جميلة يعني، ف عموماً الريتن متخافش منه لكن ال MCQs زي ما قولتلك جمع معلومات على قد ما تقدر متضيعش درجات

آخر نقطة معانا ..
4- العملي:
العملي مش بس هيجيلك حالات اندوكراينولوچي لا ده هينزلك حالات چينرال، غالبًا بيبقى حالتين واحدة چينرال وواحدة اندوكراين .. يعني تدخل الامتحان وتكون عارف ان في حالة چينرال لازم
لذلك چينرال الباطنة لازم يتذاكر قبل عملي الاندوكراين

👈 نأكد تاني وتالت ورابع، ال thyroid بتنزل عملي اكتر .. يعني مبتنزلش نظري؟ لأ مبتنزلش ولو نزلت بتبقى حاجات بسيطة جدا مش بيركز عليها .. لكن العملي لا بتيجي كتير جدًا

لا تنسونا من صالح دعائكم
انتظروا رسالة الInfectious diseases

بسم الله الحكيم
موديول infectious diseases
1-مصدرالمذاكرة:
احنا عندنا ٤ مصادر للمذاكرة
(كتاب دكتور علام ، أو كتاب دكتور الشافعى ، أو كتاب دكتور موافى) + محاضرات الكلية
ال3 كتب يعتبر قريبين من بعض جدًا
طب أنا برشح كتاب مين؟!
برشح كتاب دكتور الشافعى(هو فى شوية حاجات مختلفة عن كتاب دكتور موافى فى بعض الأجزاء زى ال drugs مثلًا..لكن هو شامل أكتر من كتاب دكتور موافى ودكتور علام..من الآخر يعنى هو شامل أكتر من الاتنين)
المصدر الرابع بقى معايا هو محاضرات الكلية
طب مهم افتحها يعنى؟!
ايوة مهم جدًا تفتحها....طب ليه؟!
لان فى حاجات موجودة فى محاضرات الكلية مش هتبقى موجودة فى المصادر اللى هتذاكر منها .. حاجة مثلًا زى ال Cat scratch disease والكوڤيد مش هتلاقيها فى الكتب التلاتة اللى قولنا عليهم
يبقى الخلاصة مصدرك تختار كتاب من التلاتة اللى ( ويُفضل الشافعى) وبعدها لازم تقرأ محاضرات الكلية

ملحوظة: فيه مواضيع بيحبوها بتبقى ف محاضرات الكلية بس زي Meningitis , Leptospirosis

2-مصدر الشرح والسماع:
برضو عندنا نفس ال 3 دكاترة دول اللى متوفرين (دكتور موافى،ودكتور الشافعى،ودكتور علام)
ويُفضل برضو دكتور الشافعى

فى عندك برضو داتا جامعة حلوان دى كويسة ومميزة جدًا إن هى أصلا خاصة بموديول ال infectious لكن برضو عيبها إن هى مش مغطية كل المواضيع
طب نرتبهم بقى كدا على حسب الأفضلية:
1-داتا جامعة حلوان
2- دكتور الشافعى
3- دكتور علام أو موافى

3-شكل الامتحان وبيجى إزاى:
عندنا الفورماتيفز
وعندنا برضو بعض الاسئلة اللى موجودة فى نهاية المحاضرات بتاعت الكلية
الامتحان أغلبه بيجى Gastroenteritis أو food poisoning أو ال infection الخاصة ب GIT عمومًا
والسبب فى كدا إن اللى ماسك الموديول دا قسم الجهاز الهضمى
والكبد

الريتن بيجبلك فيه الحاجت المشهورة زي Diagnosis of H pylori
أو علاجها مثلًا
أو علاجTB أو تشخصيه
وممكن يسألك ف الPatterns of fever
وبيحب يجيب الOpportunistic infections and tumors found in HIV patients
وساعات يقولك Mention two causes of hepatosplenomegaly and their ttt
وكل دا حاجات common المفروض تكون عارفها
فخليك ناصح وركز ع المشهور

4-العملى:
بفضل الله العملى بيجى سهل وبسيط جدًا.. غالبًا الامتحان بيكون 20 سلايد هينزلكم ملف للعملى هيجى منه جزء فقط ف الامتحان
وال 10 سلايد الباقيين متنوعين مابين mcq النظرى، ومابين حاجات من معلوماتك القديمة زى filariasis (يجيلك صورة راجل عنده Elephatiasis معروفة ومشهورة خالص يعنى ويسألك على ال parasite)وممكن يسألك على اسم المرض أو علاجه أو اسم البارزايت

من الآخر العملى تعمل فيه حاجتين تذاكر الملف اللى هينزلوه + تراجع الحاجات المشهورة فى البارا وعلاجها
وانت ونصيبك (مش بقلقك لكن لازم تعمل حسابك)

بسم الله العليم ..
زتونة بداية أول موديولين ف سنة تالتة
لو تعرف حد ابعتله الرسالة دي
هتكلم ف كل موديول عن (هتسمع مين - أفضل مصدر - الMCQ المهم - ملاحظات ونصائح)

١. الطب الشرعي
ده أمتع حاجة هتدرسها ف الترم الأول

الشرح: شرح الكلية كويس جداً؛ دكتور محمد الجندي الاسئلة اللي بيقولها بتيجي في الامتحان بالظبط، وبيعمل كمان ملخص في الآخر للنظري بييجي منه كتير برضو.

ممكن برضو تسمع د شيرين غالب ف شابتر الIdentification ومينفعش تسمع غيرها حقيقي أفضل شرح بتحشيشات رائعة هتخرج حافظ وفاهم

بقية الشباتر أيًا كانت هتسمع فيهم دكتور خالد ، أفضل حد مع دكتور شيرين وهقولك ليه تسمع د. خالد ف الجزء بتاع افضل مصدر

ملحوظة: شابتر الSexual assault ممكن تسمع فيه بردو دكتور شيرين منظمة كالعادة لكن مش هيمشي أوي مع المصدر ال هقولك عليه وللأسف مش كامل ف لو انت من الناس اللي بتحب تتابع بالكلمة بلاش الخيار ده ..

أفضل المصادر: كتاب الكلية هو الأساس، كل الاسئلة تقريباً منه ولو في سؤال غريب جه في الامتحان فهو منه بالنص ونادراً أوي لما بتخرج الاسئلة براه

الMCQ المهم فعلًا: كتاب الكلية يتحل كله كله كله، كويس جدًا جدًا
وييجي بعده كتاب جامعة القاهرة ، خلصت وعايز تتسلى؟ كتاب عين شمس

ملاحظات ونصائح:
١. اسمع بفهم كأنك بتسمع قصة والشرعي مشوّق وهتحس نفسك كونان :D

٢. الشرح للأسف الأسيف مش مغطي كل الأجزاء ال بتيجي ف الامتحانات لكن متشغلش نفسك بالزيادات قبل ال هيشرحه؛ لأن الزيادات مش هتلاقي حد شارحها، ممكن تبحث عنها ع اليوتيوب واحدة واحدة كده مع آخر اسبوع ف الموديول وتكون مظبط الباقي
طب الزيادات دي اجيبها منين؟ من الامتحانات السابقة .. هتحلها وهتلاقي نفسك مش عارف حاجات أو معدتش عليك ف الشابتر ال بيسأل فيه .. وعشان كده هتحاول تشوفها من مصدر تاني (زي كتاب د شيرين)

٣. متشتتش نفسك وأوعى تلجأ لأي مصدر بيكتب كتير ويعقدك، هات كتاب الكلية وذاكر منه وريح بالك

٤. لوجبت كتاب القاهرة فخلي بالك ف الشرح مش كاتب حاجات قايلها دكتور خالد ومهمة وتحديدًا ف شابتر الPregnancy، لازم تشوفها من مصدر دكتور شيرين أو حتى من عالنت

٥. العملي بسيط وسهل صور هتنزل pdf هتكون بسيطة ان شاء الله خصوصًا لو دكاترتنا الكرام شرحوها .. ومبيخرجش عن الشرح بيكون وافي جدًا ..
ودكتور محمد الجندي بيعمل ملخصات للعملي الامتحان بييجي منه بالنص

وأعتقد إن الرسالة دي غطينا فيها أغلب التفاصيل وبالتفصيل ..
وانتظروا زتونة الكوميونتي …

2.موديول الكوميونتي:

الشرح:
د أحمد خالد وف الصورة دي ال عليك برقم الفيديو
اضغط هنا عشان تروح للبلاي ليست
السورس او الكتب: كتاب د. أحمد خالد الجزء التاني والتالت (+ جزء بسيط عليك ف أول جزء)

الMCQ: كتاب الكلية ولازم الكل يشتري الكتب -وإلا كل سيبكي على ليلاه- .

الامتحان كله بييجي من الكتاب عدا شابتر ال Demography الدكتور بيخرج فيه .. حوالي 12 درجة كانوا كلهم من برا الMCQs .. جابهم من الباور بوينتس ده ف الاند موديول
أما في الاند سمستر فهو جاب الMCQs كلها من كتاب الكلية وكان سهل يعني عموماً

نصائح عامة:
1. خلي معاك المراجعة لدكتور أحمد احتياطي عشان لو الوقت مش هيسعفك ..
اضغط هنا عشان تروح للبلاي ليست
2. ابدأ بدري وانجز عشان الكوميونتي طويل.
3. خلص الدرس وحل عليه الMCQ بالرصاص ولما تخلص المنهج حل تاني قبل الامتحان.
4. العملي بسيط هتحله من كتاب العملي والإمتحان بيبقى بسيط.
ده كده أهم النقاط ف الموديول ده
لو هتبدأ مذاكرة ابدأ شرعي وابدأ بأهم الدروس (متروحش مثلا تذاكر الBlood stain :) وهبعتلك هنا أهم الدروس من فهرس كتاب القصر)
لو هتبدأ الموديولين سوا بالتزامن يبقى تبدأ بالإنفكشنز ف الكوميونتي لأنه الأهم

بسم الله العليم
زتونة موديول الNeuroscience بشكل ملخص ..
من أمتع الموديولز على الإطلاق -لو فهمته وربطت المعلومات كويس -
أكتر حاجة هتميز النيورو ان مصدر الكلية كافي للإمتحان جدًا -بإذن الله -
هتكلم ف كل مادة عن النقاط التالية (أسمع مين - مصدر مذاكرة للإمتحان - مصدر MCQs - ملاحظات)

مصدر مذاكرة للإمتحان لكل المواد: محاضرات الكلية قولًا واحدًا - لو فيه استثناء هقول -

مصدر MCQs لكل المواد:
أي مصدر متوفر من الكلية سواء نظري أو عملي، والنظام معروف

1. الفيزيولوجي

شرح:
👈 دكتور ناجي اسكندر
موجود ٢ كورسز للدكتور ناجي (كورس عادي - كراش كورس) ميفرقوش عن بعض كتير ونفس الوقت تقريبا ف خليك واعي عشان هتسمع كلام غريب
فيه بلاي ليست للسنسوري وأخرى للموتور
بلاي ليست السنسوري (٨ محاضرات كورس عادي - ٢ عملي - ٥ كراش كورس)
أوعى تسمع الكورس العادي وكمان الكراش !
بلاي ليست الموتور (٨ محاضرات كورس عادي - ٢ عملي )
👈 دكتور شريف، هو مراجعة بس يغني عن الشرح الأساسي ووقته مش كبير خالص بدل د ناجي لو حد مش بيسمعله

جزء العملي بيكون بسيط جدًا وممتع، اعرفوا المطلوب منكم بالظبط من المنسق (لأن ممكن ميكونش OSCE)
المهم انك أوعى تروح العملي بدون خلفية نظري كويسة عن كل تست هتعمله، لأني شخصيًا اتسألت ٣ أسئلة نظري غير المانوڤرز

مصدر مذاكرة للإمتحان:
كتاب القسم أهم حاجة يتقرى 3 اربع مرات اغلب الامتحان جاي منه هو وكتاب ال MCQs بتاع القسم.

مصدر MCQs:
من كتاب ال MCQs بتاعنا

ملاحظات: قبل ما تبدأ محاضرة جديدة اقرأ القديم ولو مرة، كل محاضرة بتبنى ع ال قبلها حرفيًا.

2. الأناتومي:
شرح:
👈 دكتور سامح غازي (كورس مدفوع) الفيديوز متوفرة لكن مش مسامح فيها بدون ما تدفع تمنها لأنها متسربة.
👈 دكتور وهدان
👈 دكتور أحمد فريد
👈 دكتور أحمد مصطفى كمال وغيرهم
أنا بفضل دكتور سامح خصوصًا ان فيديوهاته جديدة بجودة افضل.

مصدر مذاكرة للإمتحان:
أي كتاب هيكفيك جدًا متعقدش نفسك
المتوفر؛ كتاب د. أيمن خنفور، كتاب د. العطيفي، كتاب د. سامح دوس، كتاب د إيهاب (وده ماشي مع شرح د سامح غازي)
أنا بفضل المذاكرة من رسومات سامح غازي فقط مباشرة بعد الشرح، لكن لو بتحب تقرأ تكست ف عليك بأحد الكتب المذكورة.
ولو رسمت الTracts بنفسك هيثبت معاك المعلومة أكتر وأكتر
مصدر MCQs:
كتاب د. العطيفي عملي وMCQ

ملاحظات: الأناتومي لازم يتذاكر خصوصًا حاجة زي الNuclei عند كل Level من الBrain stem وكذلك الOrigins of each cranial nerve لأنهم هيلزموك مع بقية المواد.
فيه خطأ ف فيديو شرح الCerebellum وتحديدًا الstructural parts، ف فيديوهات د. سامح، راجع الصح من كتابك.
يفضل متبدأش اناتومي مش ألطف حاجة تعملها.

3. هستولوجي:
شرح:
👈 د إيمان نبيل
👈 د چيهان
بفضل د إيمان عشان جودة الفيديو أفضل
اضغط هنا عشان تشوف البلاي ليست

مصدر مذاكرة:
-محاضرات الكلية أهم حاجة.
-كتاب د. محمد عبده (تقيل شويتين ومجاش منه الامتحان جه من المحاضرات بتاعته وهي مبسطة خالص أسهل من الكتاب بكتير)

مصدر MCQs:
١. د. محمود مسؤول المادة هتاخد منه MCQs وجه منها 90% السنة ال فاتت
٢. كتاب د. محمد عبدو (لو حابب تطمن ع مذاكرتك بس)

ملاحظات: الهستو لازم يتذاكر خصوصًا الأجزاء المرتبطة بالLevels of nuclei
السبيشال سنس عليك Auditory & Optic

4. الميكرو: دكتور هشام تبع القصر العيني كان كويس في الموديول ده.

بقية المواد هنذاكرها من مصدر الكلية ومفيش فيها ملاحظات مهمة

انتظروا زتونة التوكسو
https://t.me/Doctor_AE

بسم الله الكريم

زتونة موديول التوكسو
هتكلم عن (أسمع مين - مصدر مذاكرة - مصدر MCQs - ملاحظات)

مصدر المذاكرة والMCQ بدايةً هو كتاب الكلية

شرح:
١. متوفر كورس مجهزه دكتور منير السنادي مجاناً للجميع (يعتمد عليه جداً خصوصًا مع الإضافات ال بتيجي ف إمتحاناتنا)
اضغط هنا عشان تنضم للقناة ال عليها الشرح
لينك اليوتيوب
٢. د. خالد، رائع جدًا لكن للأسف مش متوفر شرح جميع الشابترز
٣. د. شيرين
بتشرح ع مذكرتها بطريقة الاسكيمات والتجميعات وشرحها في اللذيذ لكن للأسف الريكوردات المتوفرة جودتها صعبة جدًا.

مصدر مذاكرة:
١. مذكرة Concise toxicology (وال هترتاح جدًا بعد ما تقرأ منها لسهولة اللغة والشكل المنمق الرائع للصفحة)
السنادي مفيهاش كل محتوى كتاب الكلية لكن دكتور منير بيوضح الزيادات معاك ف الشرح
٢. كتاب الكلية (دا الأساس)
٣. كتاب جامعة القاهرة
٤. كتاب عين شمس

مصدر MCQs:
-كتاب الكلية أهم حاجة، بييجي منه أغلب الامتحان
-كتاب جامعة القاهرة (مهم يتحل كله مش MCQs بس)
-كتاب عين شمس (إختياري)

ملاحظة:
١. المذكرة لمذاكرتك ف اوضتك، متضايقش بيها حد من الدكاترة لمصلحتك.
٢. لازم تسجل الزيادات ف الشرح عشان تبقى ملم بكل المعلومات.

https://t.me/Doctor_AE

السلام عليكم ورحمه الله وبركاته
بالنسبة لمذكرة التوكسو يا شباب :
👈مذكرة Concise Toxicology
-المذكرة دي كنز ل من له علاقة بعلم السموم سواء طالب او غيره و دا لأنها بفضل الله معتمدة على:
١-اختصار غير مخل بالمعلومة بل بالعكس يحسسك ان المعلومة سهلة و بسيطة.
٢-دياجرامات كتير جدا و صور تعتبر مرجع ممتاز ليك و تساعدك في الاسترجاع في الامتحان بطريقة الذاكرة البصرية.
٣-و بالنسبالكو هتكون دي أهم حاجة ان شاء الله: التصميم نفسه مريح للعين و مش مليان ألوان متعبة للعين .
-يعيبها فقط بعض الزيادات ال مش موجودة فيها وموجودة ف كتاب القسم .. لكن دا هيتغطى ف الشرح ان شاء الله ف ضروري يكون معاك المذكرة
-وتقدر تاخد فيدباك من أي حد ذاكر منها السنة ال فاتت هيأكدلك ع الكلام دا
-المذكرة ١٠٨ صفحة
-متوفرة ف مكتبة تبارك بسعر ٥٠ج.
مش طالبين منكم غير الدعاء وفيدباك ع الشرح والمذكرة
وفقكم الله ♥️

شكل المذكرة في المكتبة ✅

اللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ، كَمَا صَلَّيْتَ عَلَى آلِ إِبْرَاهِيمَ، وبَارِكْ عَلَى مُحَمَّدٍ وَعَلَى آلِ مُحَمَّدٍ، كَمَا بَارَكْتَ عَلَى آلِ إِبْرَاهِيمَ، إِنَّكَ حَمِيدٌ مَجِيدٌ

زتونة موديولز سنة رابعة من أول هنا Reminder
عشان ال هيبدأ الراوند الجديد
موفقين ان شاء الله 🙏

شباب الراوند الأول لو حابين يزودوا حاجة يفيدوا بيها زمايلهم يتفضلوا مشكورين ..

بسم الله العليم
زتونة موديول الOstetrics & Gynecology بشكل ملخص ..

هتكلم عن النقاط التالية (أسمع مين - مصدر مذاكرة للإمتحان - مصدر MCQs - ملاحظات)

شرح:
👈 دكتورة نادين (بفضلها شخصياً)
المفيد والمهم في وقت مناسب ومثالي جدًا
شارحه النسا ف ٢٠ فيديو تقريباً وزيهم ولادة
بمعدل ٦٠-٧٠ دقيقة للفيديو ..


👈 دكتور خالد عبد الملك،
مفصل أكتر وممتع لو بتذاكر مع دياجراماته تحديدًا

👈 دكتور المندوه،
له ريكوردات وفيديوز
الفيديوز أفضل لكن مش كلها متاحة بشكل مجاني ..
⚠️ في ناس بتفضل سماع الNormal labour من المندوه وتكمل الباقي مع د. خالد


👈 دكتور السكري،
له كورس مش مجاني في ناس بتشكر فيه

👈 دكتور الشافعي،
مراجعته كويسة ع كتاب المندوه

جزء العملي الOSCE
مهم جدًا جدًا الSpecific history زي الMenstrual والObstetric

لازم هيجيلك حالة من التالي:
Infertility - Abnormal bleeding - placenta previa - recurrent abortion
ولازم هتتسأل نظري كالعادة (زي مثلاً إنه يسألك عن حاجة معينة من الFollowup مع الحوامل) ..

جزء العملي الOSPE
مضمون جداً وسهل ف الاتنين (نسا وولادة)
بص ع كل صور الملفات المتاحة قدامك ومتهملش أي حاجة منها ..


مصدر مذاكرة للإمتحان:
١. ورق نادين كان مغطي ٩٠٪؜ من أسئلة الامتحان (ووصل ١٠٠٪؜ مع أول جروب أخد ولادة)
٥٠ صفحة تقريباً هيلمولك المنهج ف دماغك .. هتحتاج تزود عليها نوتس
⚠️ تأكد انك بتطبع النسخة الجديدة ..

٢. دياجرامز د خالد:
جميلة ويعتمد عليها .. لكن كبيرة ومفرودة
وبيميزها رسم كل ما يمكن رسمه (وده ممتاز بالنسبالي)
⚠️ تأكد انك بتطبع النسخة الجديدة ..

٣. كتب د المندوه (الشرح والSummary)
ممكن تكتفي بالSummary كمصدر أساسي وممكن تجيبه مع ورق د نادين تستزيد منه (لكن مش بفضل ده لاختلاف المدرسة <د. نادين القصر ود. المندوه عين شمس>)


٤. كتاب د. خالد:
كويس ويعتمد عليه لكن الدياجرامز أمتع

وف النهاية قبل ما تشتري اي كتاب قرر هتسمع مين وجرب تتابع منه درس عالأقل ..

مصدر MCQs:
قبل أي شيء لازم تحل كل ده أهم من مذاكرتك لأن في امتحانات كاملة كانت منه عدا نقطة او نقطتين .. متخيل؟
١. ملف All Obs & Gyne
٢. ملف أسئلة د. نادين
٣. ملف (بدون اسم) غريب مليان أسئلة عجيبة (مهم جداً)،
٤. فورماتيفز الكلية
٥. امتحانات الدفعة السابقة
٦. امتحانات الجروبات السابقة (بيتكرر منها)

ملاحظات:
١. الولادة تذاكر فيها المحاضرات ال بتتكلم عن نفس التوبيكس ورا بعض ومتفصلش بأيام نهائياً .. مثلاً تاخد الNormal labour كله ورا بعض .. الBleeding كله ورا بعض ..
٢. تحضر الشوكات ومتضيعش أي درجة أكتڤتي ..
٣. طول مانت ماشي ف المنهج ارسم ال تعرف ترسمه ..
موفقين بإذن الموفق والمعين -سبحانه-

https://t.me/Doctor_AE

محتاجين نرفع ريتش البوست ده بمناسبة التخرج وكدا .. 😄💚

البوست

قال ابن القيم  - رحمه الله :
(ومن ثمرة الصلاة على النبي ﷺ :
أنها سبب لتثبيت القدم على الصراط، والجواز عليه)

- اللُهم صَل وٰسلم على نِبينا مُحمد .

مثال ع فيلم الآشعة بالحالة ال ممكن تدخل عليها ..
60 years old with back pain and numbness of bilateral lower limbs.
What is the type of this imaging?
What is your diagnosis?

Answer:
Lumbar spine MRI Scan
L4-L5 Severe disc bulge with severe bilateral nerve root compression and central canal stenosis

ده الملف العجيب ال ذكرته ف رسالة زتونة النسا والولادة ..
جه منه امتحان جروبين مختلفين ف راوند النسا ..