فلق الصباح .. كلمات : خليل فرح
فَلَق الصباح قـول لى
أهـو نورك لاح خِلِّى
يا خفيــف الــروح
هــو هـــذا نـداك
أم نــدى الأزهــار
من جنان رضـوان أصلك
لـذا كـل ربيع فصلك
اتـنـفــس فــوح
تتـنـفــس نـــاس
وريـــاض وبحـــار
ما ألذّ نسيـم وصلــك
مـا رأيت يا جميل مثلك
يـا بليــل السُّــوح
هــو هـــذا نــداك
أم هـوى الأسحــار
أنت روضة وليك زهرة
وله كوكب وليك بهرة
ضمخــوك للجبيــــر
زعفران وعبيـــر
إنتَ نـار فـى بهــار
صَبّـغْ الخـدين حُمرة
بعد ساعة بتشوف صفرة
الاصفـرار ده كتيـر
أخجلـوك يـا أميـر
ولّــه نُمّــت نهـار
صبح البُستـان شايل
شجـر الرمـان مايل
السُــلافْ فى الدِنـــان
والكنـــار فى حنـــان
والهِــزار فى هِــــزار
إنتَ كالطـاووس خــائـل
كبرياءك وفيـك خــايل
انـزل انـــت كمـــان
غـّن قـول يـا زمـــان
ويـــن حبـيـبــى آذار
مــا عرفنا عدوك زاهــل
ولَّـه لِسَّـه غُـــلام جاهل
مُتَهـــلل صيـــــف
شِتـــا عنــدك كيـــف
فــى اللـــعب بالنــار
فـى لهيبــك أشـوف ساحل
كالفــراشة أجيــك راحل
أنــا خــــايف كيـــف
يــا لطيـــف الطيـف
أهــوى وابقــى فـى نــار
فلــق الصبــاح نّـــوَّر
لــى نحــور... ✍️ابومؤيد

لوموهو اللاهي في الغرام بالله
قولو ليه الحب شي طبيعي إلهي

الغرام مابخير بين كبير وصغير
من زمان الحب امرو فينا يحير
ياجميل يانضير خلي هجرك غيّر
بكرة والله الحب بنلقي عمرو قصير

نادو لينا البنا يبني لينا الجنة
يبني طوبة حب ويرمي مونة محنه
بالكتاب والسنة يعقدو لينا اهلنا
انتصر ياحب نحنا نلنا املنا

سيرونا لنيلنا وسووا لينا عديلنا
فوق جناح الحب الملايكة تشيلنا
يوم تقلب خيلنا فوقا شبان جيلنا
والزغاريد حب خلي مافي مثيلنا

العاقبة لي حبانا وللبشاركو معانا
نحنا ناس الحب الله مابنسانا
نحنا صنا هوانا بشرف وامانة
ياجمال الحب وياجمال دنيانا.. ✍️ابومؤيد

كنوز محبة
كلمات / د: بشير عبد الماجد
غناء : زيدان ابراهيم
لما تشتاق للمشاعر
تملاء دنياك بعبيرا
لما تشتاق للعواطف
تنسجم تلبس حريرا
ابقي اسأل عن قلوبنا
تلقي فيها كنوز محبة
تلقي فيها بحور حنان
تلقي فيها الشوق يغني
تلقي فيها الريدة فاردة
جناحاتشتاق للربيع
لما تقسو عليك ليالي
الوحدة و الليل يبقي ليل
و النجوم تلمع بعيد بعيد
تسخر من السهران وحيد
ابقي اسأل عن قلوبنا
تلقي فيها كنوز محبة
تلقى فيها بحور حنان
تلقى فيها الشوق يغني
تلقى فيها الريدة فاردة
جناحا تشتاق للربيع
انت ما برضك حبيبنا
و الحنان الفي قلوبنا
اصلو نابع من عيونك
و المحبة الفيها لو ما
انت ما كانت محبة
كل اشواقنا و مشاعرنا
النبيلة انت ما اهديتا لينا
كيف تضيع احلي ما
اهديت يا غااالي. ✍️ابومؤيد

رسائل ست الدار بت احمد جابر
للزين ودحامد
محمد الحسن حسن سالم (حميد )

( جواب أول )

باسم الحاضر والمستقبل
ست الدار بت أحمد قالت :
ليك يا الزين ود حامد شوقنا
أما بعد ،
المبعوتة المنك .. وصلت
ورُح فكيت الطلب الفوقنا
باقي الدين يا الزين خلصتو
قدر الفاضل .. مصروف راشد والتومات
والجايات من جاي .. لا جاي
زي ما قت لك قبال ده
شهر إتنين حا نطهر راشد
شهر إتنين المدرسة تأجز
الله يبعد العارضي تجينا
وراشد حالف ما يطهر
إلا أبوهو وعمتو تحضر
وإلا يجيبو الغنايين
شان الشوق بت سرنا ترقص
قلنا نجيب المداحين
طنطن .. أنا جاي من الحج
وعارف راشد لما يطنطن
كل الدنيا الفيي تطنطن
غايتو بشر .. بس ربو يهون
ما كلمتك بالتومات
أول البارح جني يرطنن
قالن نحنا الخواجات
بسم الله .. مرق حصلت
لقيت لك جعفر زارد البيت بالخواجات
يبقى حداشر وخواجية
ناس البلد الكسرو عليهن
صدو يقلبو في إيديهن
عدمانين من إسم حكيم
ولا خبيراً للمشروع
علماء آثار .. فضلت في آثار
ما خموها الجونا قبلكن
شن خلولنا بلا حجار
الله يصرف الخواجات
بينات جعفر والمحجوب
والمحجوب والخواجات
طقت حجي .. العمدة طفاها
باقي الناس الجات للفرجي
قنبو قيلو شبعو لحوم ..
والخواجة يصور ساكت
ستة خرفن وتيس ما كفن
ستة خرفن في فد يوم
المعدوم أشكال وألوان
أي خدار في اليوم داك في
كملن رف كمين دكان
أول كفو الخواجات
بعدو العمدة وصمد الساقية
ناس المجلس والمشروع
بعدو الطلبة وباقي الناس
حتى الشفع والحروم
ستة خرفن وتيس إنصفن
ستة خرفن في فد يوم
جات من صالح بت كلتوم
تسكت تخبز طول اليوم
لمن حرقت الدولاب
قنبت المسكينة تدعي
الله يصرف الخواجات
غاية الليلة السقا يشولق
واطات الله دي ست رشاها
ما في غنوتاً ما غناها
ما في مدحتاً ما سواها
حمارو صبح لحق أمات طه
سب الدين والأمريكان
جنس بدع
زولك ده يحير
عند الجد كان أده ينقنق
عند الفارغة يشيل ويبعزق
إذكرت كلامك ليا ..
إنو في ناس لاعبين بالدين
وناس لاعبابا الأمريكان
الله يصرف الأمريكان
الله يصرف الصرفيكان
ما خلوني نشدتك منك
كيفن حالك والخرتوم
كيف المصنع والعمال
حالم لسع نفس الحال ؟
وما رقوك سووك باشكاتب ؟
يورينا الله زيادة الراتب
كيف الناس والحالة عموم ؟
والعزابة الكحيانين
سيد البيت عل ما زكاكم
لسع تقعو تقومو براكم ؟
قلبي معاكم
ربي يخدر عود ضرعاتكم
بالي معاك يا الزين ود حامد
بالي هناك والشوق الشوق
خلى شدير الجوف محروق
راجي مطيرة الزين ود حامد
نحنا نصاحاً زي واطاتنا
نحنا نصاح إلا القراص والتجار
والحاصل البحصل كل صباح
شتلاتك قبضن
الحملان كبرن بلحيل
العضمين الروكة إنزرعن
اوعك تشفق من تالانا
ولا نبقالك مشغولية
زيك واحد مستورين
وما ناسين المسئولية
هي يا الزين زغرد
بت ام زين جابت لها بت
ستة أولاد حتان البت
المحجوب ينشد من خبرك
شافعو محسب من يومين
التومات طيبات ونصاح
إلا غباش بلحيل آ الزين
راشد كرر .. شهر اتنين
كان ما جيت أنا ما بطهر
الله يبعد العارضي تعال
كان فد دور يدوك يا تعال
كان بالخصم إن شاء الله تعال
وما تتوصى .. وداعة الله
أوعى البشغل والعربات
والحيكومة السمها فاير

أم أولادك ست الدار بت أحمد جابر

ست الدار بت أحمد كيفك
جاني جوابك مفتوح شارع
جاني جوابك
وانا بتذكر في ناس راشد والتومات
في الشتلات والحالة عموم
ناس حلتنا التحت .. الفوق
الليهم الله وعيشة السوق
جاني جوابك وانا بتصور
في المشروع وعمايل جعفر
ولما بكيت .. يا ست الدار
أيوة بكيت .. يا ست الدار
لما قريت علماء آثار
علماء إيه يا بت الناس
سواح إيه .. ما عندك راس
ست الدار تتوهدبي ليه
ديلا جماعة السي آي إيه
تعرفي إيه السي آي إيه ؟؟
امريكان في كل مكان
ديل مالين الدنيا ملي
ديل قالين الخلق قلي
باسم الدين والأمريكان
أي عوج مبدي ومختوم
صوتنا هناك وهنا مكتوم
ومافي فرق في الوقت الراهن
بين واشنطن والخرطوم
أنا مأزوم .. مأزوم .. مأزوم
يا خرطوم وينك وينك
يا خرطوم شن شبّ وقلبك وسلبك
حلبك ؟ زنجك ؟ بجتك ؟ نوبتك ؟ عربك ؟
أنا مأزوم .. مأزوم .. مأزوم
يا خرطوم أزمني الصلبك فوق الطلحة الأمريكية
يا خرطوم .. أوه خرطوم .. أوه واشنطوم
طن .. لفتك فجراً يقطع رحطك
ست الدار سامعاني
يا اخيتي ومرتي وامي وأم الكل
أنا بندهلك من شارع الله
فوقي هجير والتحتي بقل
سبي معايا الشردو راجلك
والحرمونا شوية الضل
سبي الحالة العالة علينا
حتى احكيلك بالتفصيل
حاصل الحاصل يا بت أحمد
جاني وفد في المصنع زاير
وكان الوفد ده أمريكاني
لفّ وفات اليوم التاني
جانا مدير المصنع فاير
وشو حمار العمدة العاير
نف المصنع فيهو خساير
وقالوا يخفضوا مئتين عامل
مئتي عامل في فد مرة
مائتين عامل .. مائتين عامل
يبقوا هوامل .. يبقوا هوامل ؟؟
ما يهموش .. الهم المصنع
تفّ قراروا وفات في حالو
مسئولين ونقابيين مافي العارض واللا اترجى
العمال من سمعوا احتجوا .
سيرو موكب صامد وصامت
إتضامنا معاهم سرنا
أب عرام دور عربيتو .. العربية الامريكية
زنقح خلا الموكب ثابت
احتجينا مع الإحتجو
إتكلمنا كلام موضوعي
قلنا المصنع حق الدولة

حامد. ✍️ ابومؤيد

والعمال أصحاب الحق
هي اللي تقرر والتتولى
هي البتحدد سير المصنع
إيد العامل هي العاد تنتج
ما المكنات الأمريكية
زيت العامل ياهو البطلع
مو المكنات الأمريكية
ودرن الأيدي العمالية
أنضف من لسنات الفجرة
ودين الدقن الشيطانية
ومن كرفتة البنك الدولي
وكل وجوه الراسمالية
وأشرف من ..............
داك الحين المصنع هاج
جات عربات اللات بوليس
فضوا العالم بالكرباج
والبمبان الأمريكاني
شرقت شمس اليوم التاني
كنا حداشر ونوباوية
متهمنا بالتخريب والتحريض والشيوعية
البوليس صاقع شيوعية
وفاكر نفسو بنبذ فينا
هي آ بوليس أمك مسكينة
البوليس عمدني شيوعي
التحقيق طلعني مدان
التحقيق طبعاً تحقيقهم أو تحقيق الأمريكان
اسبوعين عشناهم جوه
اسبوعين زادننا قوة
ست الدار ما تشفقي خالص
ست الدار أنا ياني الزين
ست الدار سامعاني كويس ؟
كل الهم ما يغشى الغم بيتنا وراشد والتومات
وكل الناس الحالهم شاهد
ست الدار الشوق الواحد
لي حلتنا وليكم ليكم
وللإشراق في عينيكم
وكل الناس الزولهم صامد
شوق وسلام .
الزين ود حامد
ردي سريع .. باليد .. باليد
في دورين موعود بي شغلة
لمت لمت .. كان ما لمت أنا جاييكم وما ندمان

( بعد الحاصل والإتحصل ست الدار بت أحمد تكتب ) :
زيني الزين .. أب حالاً زين
جاني جوابك .. يا المبروك
وسابني أشوف الدنيا كويس
وأعرف غلط الصاح مظبوط
سابني أميز .. وأقدر أفرز .. أرجع أميز
فرحانابك يا أحزان
فرح النار بي لوح الزان
مبسوطابك يا المبسوط
ما هزاني مصيرك
قدر ما هزوني الميتين عامل
ميتين عامل في فد مرة
ميتين اسرة تروح وين
في الأيام النجسة المرة
ميتين عامل؟؟
والله مهازل
والله عمايل
يا أوغاد .. وينا نقابة السجم الشوم
وين عمال السكة رماد
وين الطلبة ووين الوين
بعتو شفيعكم يا عمال
بعتو وجيعكم للراسمال
وشن راجين يا تعسا الحال
هاكم دي ..
والله مهازل
ميتين عامل ؟
والله عمايل
عامل ساكن في آخر الدنيا
وصل المصنع بآخر بنية
ينتج كيف؟ شغال بي فونيا؟
عامل ينتج عشرين حتة
تلحقو منها قيمة إتنين
ستة بغطوا المنصرفات
سبعة.. تمانية .. تسعة بغطوا
أدها تسعة المنصرفات
كل الفايض .. بدخل وين؟
قولوا البفضل بمشي لي مين؟
وبرضو خساير؟
والله مهازل
يا مضغوط .. خفض ميزك حبة تين
تنك القعدة تلاتة خطوط
خفف مرتك توب مضغوط
من التمسحبو كبابي الصين
خفض عمرك يا ابن الفانية
وبي نظارتك واجه ثانية
ثانية عيون الشغالين
ثانية وبس
والله مهازل
ميتين عامل ؟
ميتين بيت ؟
ميتين اسرة بلا راس خيط؟
ميتين اسرة ملوها جراح
ميتين اسرة حا تولد صاح
وليكم يوم يا أولاد الهرمة
ليه يا الزين بتوصي عليّ
وانا بت احمد ست الدار
ام اولادك وهم صغار
ام اولادك وهم كبار
وياك الزين ود حامد داك
كان متوظف .. ياكا الزين
كان متوقف .. ياكا الزين
ليش يا الدخري توصي عليا
اسبوعين قضيتن جوه
يبقى غصب .. زادنك قوة
ليش يا الزين بتوصي عليا
ليش يا الدخري توصي عليا
وعارف ام راشد والتومات
مرتاً دغري وغلباوية
آه يا الزين .. لو كنت معاكم
كنت بقيت النوباوية
ما تهتم يا الزين بالحاصل
واصل سعيك .. واصل واصل
واصل سيرك
كان ما كنت الزين ود حامد
كان حا يكونك واحد غيرك
في فضاء فالك يا إنسان
نسمة تقولك في الإمكان
أبدع واحسن من ما كان
ياتو مطرتاً سوت شو
فرقو غيما الأمريكان
ياتو رصاص ما عقبو خلاص
ياتو سجن يا الزين ود حامد
ياتو محن تمحى الإحساس
لما يكون في الساس والرأس
ياتو وطن يا الزين ود حامد
ياتو زمن دام للأنجاس
طه ترابلتو راحو الديش
غزّا بكانا اتنين رطانة
صاقع كلو من اسماعين
هو الفسر لهن الشغلانة
ويا اسماعين
ما كان الديش شقّ مسيمعك بالجبخانة
لو المجلس قبل اوراقك
أو في الثانوي لقيت لك خانة
لكن قدرك يا إنسان ..
بلداً هاص هيصة جبانة
طالو الناس التريانين
ضلو الله الما ضلانا
أخّدو نورة الحاج بالدق
باكر دور ما خشّ عليها
خاتي اللوم قطع التمرات الفوق راس بيتو
الخلفاء شكوهو وما لقو حق
المحجوب إتلقى اخبارك وقال جاييك في أول بص
البرسيم طهرنا البارح
نعجة راشد صبحت والدة
الحيضان سقناهن لوبي
التومات طيبات ونصاح
راشد طيب
وانا طيبين
كل الناس يا الزين طيبين
ينشدو منك في الأفراح
وفي الأتراح .. الزين الزين
ما تشغل بالك
بس يا الزين كان درت مشورتي
اصلو كتالك ياهو كتالك
تجي مندلي
الواطة تراها
وبي جاي جاي .. بندبر حالك
ما الحيكومة الضاقت دمك
عينا محل قبلت قبالك
شورتك عندك
عندك شورتك
والببقالك .. الببقالك
التمرات بعناها آ الزين
خفنا السوس ونزالة السوق
مبعوتالك عشرة جنيه
والأشواق من هنا لا عندك
ست الدار أحمد جابر
تلغرافات :
تلغرفين في وقت واحد :
نوري . السوق .. ست الدار بت أحمد جابر
المحجوب في قطر اليوم
عفش الزين
النوباوية
الخرطوم .. الخرطوم بحري .. كشك الشعلة .. الزين ود حامد
راشد راقد والواطة جعفر طالق فيها بهايمو
ست الدار بت احمد جابر
نوري السوق المحجوب ود أحمد جابر
كتب الزين .. كل الاوراق .. راشد كيف
النوباوية
الخرطوم .. الخرطوم بحري .. كشك الشعلة
النوباوية
أنا في السكة وست الدار
راشد ود الزين ود

من غير ميعاد و اللقيا أجمل في الحقيقة بلا إنتظار
صحيتي في نفسي الوجود و رجعتي لعيوني النهار
*
كل الطيوب الحلوة يا مولاتي و الجيد الرقيق
و اللفتة و الخصل اللي نامت فوق تسابيح البريق
و خطاك و الهدب المكحل و فتنة التوب الأنيق
في لحظة مرت كالظلال تعبر رؤاي إحساس عميق
فتحتي جرح الليل عذاب و من صمتي ما قادر أفيق
*
لو مرة بعدك يا زمان الغربة تجمعنا الصدف
أنا كيف أعود من طيبة أول نظرة للدار منكسف
وا ضيعة الوتر اللي ما غنيت عليه و لا عزف
من صدفة عابرة بلا سلام قلبي الغريب بالهم نزف
يا ريتني ما شفتك ربيع و لا كان يلازمني الأسف
***
ضاع الكلام ماتت حروف اللقيا قبال أهمسها
و الله ما غابت محاسنك مرة لا الجرح إتنسى
لليلة ما وشوش نسيم بروض و ما غرد مساء
لليلة ما سافر عبير بالطيب يغازل نرجسها
لليلة يا حبي الكبير بحرقة لافيني الأسى. ✍️ ابومؤيد

مى منبهله فوق أصفاحها مردوم دوفه ..
قبضة ضميرها ، زى طى الحِجاب ملفوفه ..
شغلت فكرى خلت رأسى عِدم الصوفه ..
بقيت أجى فى الديار اسرح افوتن حوفه ..

أزمعتي الرحيل قصدك تزيدي جروحي
يا ام خشماً تقيل بى حبي مابيا تبوحي
حبك في الفؤاد دايماً مشحتف روحي
وين القى الرقاد كان ناوية انتي تروحي

سماح الدنيا مو لبسه وركوب عربات
سماح الدنيا في الخوه الملانه سبات
خاوي الفي الرجال تلقاهو زول حوبات
م تخاوي السهيت الفي الحديث لخبات

الروح يا نهله بالفراق محــــروقا
من الشوق ما فضلي إلا أنعي مروقا
كيف أنا و من و ين تجيني الروقا
وكل ما أشوفلي طرحة بشوفك فوقا

يا ريلة،،،،،،، يا ست الجمال الوأفر
بيك مؤمن وبي البشبهنك كااااافر
كل ما أطراك يا ريم البراري النافر
بسرح فيك بركب خيالي وأسافر

حبيت عيونك شان عيونك جنة
قلبك من الواليدين يا وريفة أحنة
يا الكتبناك شعر و بي غناك دندنه
ما تلؤمي عاشقك إن قالو ودر وجنه

من طبيعتي أنا زول حنون وعطوف
ومن سجيتي زول رياد وطبعي ولوف
قلبي يا ريله ديما بقلب البريدو شغوف
علا الحب أعمي وإحساسك ولاهو بشوف

مشيت دق دق باب ناس فلان دقيت
فتحت زولتي،،، فتشتا للكلام ما لقيت
قلتا ليها أمي قالت يا البي هواك جنيت
كهربتنا كطعت تعالي ضوي لينا البيت

مخلوقة أدهشت الخلوق إحتارو فيها أستغربو
لو شافا قيس ما كان بينظم شعر ليلى ويكتبو
لو شافا برضو جميل أكيد ما كان بثينة بتعجبو
عينيها شاهرة كما السيوف لو
جاها عنترة بي سيوفو بترهبو
يظهر نجم عز النهار ضوء الشمس ما بيحجبو
جدي الغزال وسط الزحام جمع الخلوق ما يرعبو
يا زهرة جملتي الفرع رغبتي فيهو الكان ابو
إتوجهت نسمات شعرنا عشان تغازلو تداعبو
بخت الهواهو يعذبك زي ما هواكي معذبو
بخت السعيد يا حلوة أيصبح لوليداتك أبو
قت . للتعابير أوصفو . عن عجزهن لي أعربو
قالن ده فات حد الوصف لكن شوية نقربو.
عودو الرطيب حبة نسيمه تلعبو
وجهو المنير لخبت حساب ال بالقمر كان بحسّبو
بسماتو تتشالع بروق خلت عضاي يتضاربو
والشامة فوق خدو الشمال شان من عيونا تحجّبو
نظرات عيونا. آه من عيونا. علي التصادفو تكهربو
ترسل سهم يأذى القلب بالفيهو ما بتحسّبو
يا دااااب عرفت انك شمالية الاصل أبو عن أبو
وفكرت في قول الجدود كان لينا دائما يغلبو
قالو الشمال منبع درر حسدو القدر في مكسبو..
سوى العمل سبب إرتحال ساعة عقيدو اتجاذبو
وعمت جنوب سودانا شرقو ومغربو
يا بلدى عاد استبشري ملك الجمال فيك لقبو
فيك كوكبا يهدي اليضلو ويضهبو
فيك الفريد الزيو قط ما انجبو
الشافا بختو وبختي بالزمن القليل الفزتبو.

التصميم الجديد للقناة هدية من احدى الاخوات بالقروب تعمل فى مجال التصميم كروت مناسبات دعوات فرح كروت رجال الاعمال