البــــــــدع
فوق هامات مرفوعه وشُمّخ رواسـي
غربي الحصن ذي محمي بقاده وحُـرّاس.

حَـطّ متاش للزوّار موقع أساسـي
قصر مبني من الفضّه ومنقوش بالمـاس.

لجل الاثنين ذي كل القُرى والممـاسي
كلّفت من يشاركهم مراسيم الاعـراس.

وانت ياحضرة المبعوث والدبلماسـي
والسفير الذي يربط علاقة مع النـاس.

دير بالك على اصحابي وقومي وناسـي
ذي على ذكرهم تحيا المشاعر والإحسـاس.

ماتناسيتهم خالص ولانا بناسـي
هم ضماري وهم مثل الغناء بعد الافـلاس.

وانت يا دار حلّيتك وكنّيت راسـي
اينما كنت مابنساك يامسقط الـراس.

أبعدتنا صعوبات الصراع السياسـي
الذي دار مابين المهلهل وجسّـاس.

فاعذرو من عليه الوقت قد صار قاسـي
واجبره بعد فقدان الأمل يقطع اليـأس.

كلمــــات الشــــاعر /
*منيــــــــر الزيــــــداني*


رحبـــي يالجبـال الشامـخـه والرواسي
من يريم الإباء لامشوره لا جــبل راس

قول عـملاق هيجـني ولخبــط حواسي
واضطرب بحري الراكد بموجه والانفاس

قول شاعر فطن مرعـب ورقمه قياسي
وارتعب منه المغنــي ومهدي وجواس

في مجال الادب كادر ومنـهج دراسي
من تعلم على يده خـرج فحل قرناس


مارده دعـــم اركان النــظــام الرئاسي
من شحن لا عدن للشـيخ لاراس عباس




ابوهمام الطاهـش


مشاركتي مع الشاعر الكبير منير الزيداني
ديوان الشعراء
قصائد. ومجاراة شعرية. للشعراء الاحرار
https://t.me/Dewanalshoara

لي منع ابوك ياجبر صيِّح صوت من قمة جراح.
الى عند ابو زايد امير القوم بالعفه يجيب.

قل له مظفر سعد مابين المحايب والضياح.
بالحسور العظمى مع اغنامه معزب والحبيب.

ان قد عمل تصريح للراعي فبه وادي فساح.
والا رجع للشيخ ابو زايد بشاله والعسيب.


أ//نعمان النصيري

ــــــــــــــــــــــــــــــــــ. ـــ
يامرحبا باستاذنا ذي دوما مكلل بالنجاح
ترحيب بالمليار يفوح منه ندا كاذي وطيب

بالمكرفون قد بانصيح لجل يسمع للصياح
ذي جاء يعزب دونما استئذان والله إنه غريب


وهل دخل يابن النصيري دون اولا بالسلاح
من أجل أبلغ صاحبي غالب زميلي والطبيب

يمكن يقع له حبس مادام قد قلب اسمه صلاح
لكن ياغالب على شاني تفكه والضريب

د/جبرمتاش ردا على الشاعر الكبير والعملاق استاذي الغالي/نعمان النصيري
ــــــــــــــــــــــــــــــــــــــــــ
قل للنصيري لايدهور شي حمانا للرباح

والهاج والداج يابن متاش والمسافر والجنيب

ماناش وكيل ادم بذريته ولا فيشي مباح

وحق لحمه لستحقه وانت يااستاذ ذيب

حتى ولوجاني مظفر سعد خافض لي جناح

الذل لا يمكن دخوله ترلو المال الخصيب


مع نعمان النصيري وجبر متاش من ابوزايد غالب الزيداني

ًــــــــــــــــــــــــــــــــــــــــــــً
ياوادي العفـه ثمــانين بالميــه منك ضــياح

وتسعطاعش نيس وواحد بالميه مال النسيب


رعيت بينه يوم واحد من جناحه لا. الجـــناح

حسستني أن وادي العفه كما وادي حـــريييب


من كثر ما بينه حرار ما كان ضاوي لي صُماح

وانا الذي ودفت ودافة طلي لا خشم. ذيــــب

بالمحيب اربع شث وبالوادي ثلاث اربع. طـلاح

مابش سما والشمس تشرق ضهر ومن. بعدا تغيب


مظفر الهمام

جواب على اساطير الحرف

الاستاذ نعمان النصيري
والدكتور جبر متاش
والشاعر غالب الزيداني
ديوان الشعراء
قصائد. ومجاراة شعرية. للشعراء الاحرار
https://t.me/Dewanalshoara

مالي ارى عملاء تتشدق بذكرئ الجلاء
ذولاء مع ذولاء وذولاك الذي هم في عدن. .....

راح اليمن اشلاء ما دخل اليمن في كربلاء
يا شعب كيف تسلاء وروحك فارقت اصل البدن

ابونجم الربيعي


عاد اليمن حبلى بآلاف المصائب والبلا
لاما ترى مليون ثكلى في يمنا يدمعن

كنا جميعاً في مصلى والامام واحد تلى
أيات ربي جل وعلا بالفرايض والسنن

واليوم شوف اين المعلا ياربيعي من ثُلا
واين الحديده والمكلا واين حجه من جبن

المجد يابونجم وللا وابدل الحزن السلا
الله يصيبه من تولى امرنا عن سوء ظن


عبدالله البحم



ابلي لمن ابلا يمنا
يابحم ربي دلا.
عايش كما الحبلى مظنك طول عمرة ماافتهن..


كان الخبرادلا واحلى لوتنازل وعتلى.
ولارجع ثكلى وحولى عنداصحاب المحن.

بس اليمن اغلى واعلالوحصل كل البلا.
مع الذي استولا وهمش كل ابطال اليمن..

نصبرونتسلى وباتهدا المشاكل وغتلى.
اللي بيتعلى على شعبه يذوق كل المحن..



:

كانت عدن حكلا بجيش الغرب من دون امتلاء
ومن اتئ صلى معاهم مش مهم حب الوطن

واكبر دليل ادلا بذاك الوقت لو قام الملاء
مالقادم استولا ولن يحتل في ذاك الزمن

هم كانو الاولى بحكم الشعب وامساك الولاء
عثمان مع بالا لــهم تاريخ جاري في اليــمن

ماليوم قد شعبي تخلا من حثالات الخلاء
في كل يوم يـُبلا بقتل النفس عايش في حزن

بمثل هــاؤلا عنتــجنب قواعــدهم دلاء
م̷ـــِْن شان هــآؤلا يعينونا على شرب اللــبن

بانسئل المولاء يجــنبنا محنهم والبلا
بآسمه الاعلى يصد الكــفر واعوان الــهيــن



✍️…… جبرالبحم
ديوان الشعراء
قصائد. ومجاراة شعرية. للشعراء الاحرار
https://t.me/Dewanalshoara

( إفوووووول كوووووكب )
------------------------------------
🌒 🌎 🌘 🌑

اَفَلَ كَوكَبَ سقط كوكب هوى كوكب
فَرَجّ البحر بسقوطه وهز الارض ب إفوله
🌙 🌙 🌙
الا ياالكوكب الدري الا يانجم يامذنب
قتلت الناس بسقوطك قفامالناس مقتوله
💥 💥 💥
إفُولك اوجع الثكلئ وهي كانت على المركب
ومركبها بلج البحر والموجات من حوله
💫 💫 💫
وقوعك انهك الدهماء من احديبو إلاالمندب
ومن وادي مِطُمِه لا شرس لانهم لاالغوله
📡 📡 📡
وخلئ ذبذبات البث والإرسال تتذبذب
ومافوق البسيطه اصبحت اعصاف مأكوله

ونا من هول ماجلجل دويّكَ ظهري إحدودب
وأبِرِتِ لحمي المر الجريح سيوف مسلوله
🗡 🗡 🗡
واحشائي من الداخل على جمر الغضاء تلهب
وفي اعماق اعماق الحناياتُوقد الشوله
🔥 🔥 🔥
وفي خلف الضلوع العوج تنامى الحزن واعَشُوشَبَ
🌱 🌱 🌱
ونفسي كنها في غيهب الاحزان مجبوله

الا ياايها التاريخ بُعيد البارح إسِتَِنَدَبَ
ترى من بعد هذا اليوم ماعدلكش حيلوله
🤺 🤺 🤺
ترجل ايها الفارس فبعد اليوم لن تركب
فلا فرسان من بعدك ولا صوله ولاجوله
❗ ❗ ❗
وارضٍ انجبتك الأمس خلاص قدركبت لولب
وكيف تِنِجِبِ مثيلك مهبلتها اليوم مقفوله

من أيٌتَ صِلب باتخرج وقد صلب الرجال اجدب
ولا اُمٍ ستنجب مثلك الا لوتعود خوله

فكنت الصاحب الوافي وكنت الاخ وكنت الاب
وكنت الامن والقانون وكنت العدل والدوله
⚖ ⚖ ⚖
وكنت الفارس اللي لاامتطىَ صهوة جواد اشَهَبَ
وشمرساعده للحرب تَخٍراعداه مقتوله
🏇 🏇 🏇
ولااطٌلق من لسانه قط إن اطنب وإن اسهب
اذامااتكلم الفارس جميع الناس يصغوا له

الاَياايهاالراحل إلى الفردوس لاتَغظب
فأيدناعلى فرقاك إلا الاعناق مغلوله
🙅🏿‍♂ 🙅🏿‍♂ 🙅🏿‍♂
وهذا القدس بعدك صار الى يّدَ اليهود اقرب
ولم نسمع من الاعراب سوى كلمات معسوله
🕌 🕌 🕌
ستبقىَ وجوهناسوداء سيبقىَ صوتنا اشحب
دمانا في سبيل الحق والارواح مبذوله
‼‼‼‼






عبدالله البحم
8/ 12/ 2017
ديوان الشعراء
قصائد. ومجاراة شعرية. للشعراء الاحرار
https://t.me/Dewanalshoara

حصيلة سجالي في منتدى روائع الأدب

( فوضوية )

تغازلني بنات الفكر ونانايم ونا يقضان
وتتراقص باعماقي خذت قلبي بمعلاقه

فتارة تسلب الالباب وتارة تطرب الآذان
تداعب مفرداتي حس سامعها وخفاقه

تنافس بالبناوالسبك والمضمون والقيفان
كذلك بالطباق ثم الجناس هامات عملاقه

من الحكمة وترتيب الجُمل استحضرت لقمان
ومن صالح خذت عبره من اللي عقروا الناقه

ومن حيث الفصاحة سَطرت ما سطر النعمان
وقِس بن ساعده ذي ماتمنطق حدتمنطاقه

كأني استقيت الزخرفه من نابغة ذبيان
فإطنابي هو اطنابه واغراقي هواغراقه

ولا يخفاكم اني اكتسبت اخلاق من حسان
وياسعدالذي من ابن ثابت كانت اخلاقه

جزيلاتي هي فُلكي ومجدافي وانا القبطان
ونبحر في عباب البحر والموجات دفاقه

ألُف اقطاب هذاالبحر كماقد لف ماجلان
لآتي بالفرائد من شعاب البحر واعماقه

وقدراتي لتشبيه المشبه به على ميزان
وطاقاتي على حبك المعاني مالهاطاقه

فبيتي كالقصيدة والقصيدة كنهاديوان
قصيدة ثقلها ثقل الجبل في حال إطباقه

قصيدة مهذبة ومشذبة مستكملة لركان
قصيدة قدتراها فوضوية بس خلاقه

قصيدة فخر دونهاالبحم الشاعر الانسان
ثقوا ان التواضع دئماًنهجه وميثاقه

ولكن من قبيل انه تنافُس شعر بالميدان
ولي هاجس اذا قدأنبرى يغرق بإطفاقه



عبدالله البحم
ت 3/ 12/ 2020م
ديوان الشعراء
قصائد. ومجاراة شعرية. للشعراء الاحرار
https://t.me/Dewanalshoara

مجارة كامله بين (الفلاحي والطاهش والبحم والجيلاني وهاشم)

انا الحرف يصنع م̷ـــِْن حروفي ومنتجي
كما هاجسي مصباح باللــيل اســررجه

بدرب الوفاء والعز ذا اسير به واجي
ولكـن اذا قد هــاج واعلــن تشـنجه

يخضع نيوف الحيد والشامخ العجي
ينكس براسه كلما اعــلن تأجـجه

ولي بالأدب مصرف ثقافي وبرمجي
ومن جاوز المضمون يمكن نبرمجه



ابوالعـ̷ـــِْـز الفلاحـ̷ـــِْـي

يقـول الذي بالشعــر شــعـره نمــوذجـــي
وفـوق الثــريـاء شاد قصــره ومفــرجــه

وله مملـكــة عظمــى طـلاهـا بنـفـسـجي
ومشكاتــها في لــــوح دري مزجــجــه

سفـيـنة نجــاتي من صعـد متنــهـا نجي
ومن حب يغـرق مات ما احـد يخـرّجـه

فـ طـوفــان شـعـري هاج جـرّى تهـيــجي
وقـادم لكـم غاضـب لكثــرت تهيــجـــه

وأنا الطاهـش البـطاش جاهز ومحتــجي
أدق القشـــه واتــرك دمـاهـا مضــرجــه

وفانوســي السـحـري معــزز توهــــجي
وخلـى القرائـح معتــمـه مـن توهـــجـه

وابوحنـضلـة غنــاء بحــرفي وخُبــجـي
بقيـفـان سمـعتــها الأذاان المصـنـجــه

ومالـي ومـال انـسـان حاقـــد وبلطـجـي
سيعــرف متــى شليت راسـه وافـدجــه

ولازلت متــحـدي بكيـــلي ومذحـجــي
ولي شاعـــريه بالبــلاغــــــة مدججــه

وجـــوالي الأيفـــون حطــم لـ إلـ جــي
له اقـراص صلـبــه بالقــوافي مـبرمجـه

وخـط الثريـجـي أضمـحل من تأجـجـي
ومن سطـوتي صحيـت ضمـاير ممـنجـه

ولا اصدرت أمــري للقــوافي تمكيــجي
على طـول تحـزب لي وتقبــل ممكيـجه

ولا قلـت للـعـذرى هلمــي اليّ تـجـــي
تجــي صاغـرة وأبى جـمـاع المـزوجــه

ولا شاخت العانــس وبي جات تلتــجي
تزوجـتها وانكحـتهــا بعــل تحنـــجــه

ولا قلت للحانــق بأمــري تـــزوجــــي
على الفــور تـتـزوج ولـو هـي مـزوجـه

ومنهــج حمــورابي مـقـــرر بمنـهــجي
وقانـونـه اتطــبق بغلـظـــه وبلـطــجه

وتاج العروس أصـدر شـهـادة تخـرجــي
ومن لم ظفــر بينه حُــرم من تـَخـرّجه






مع الشاعر الكبير عز الدين الفلاحي



✍️ابو همـــام الطاهـــش




اذااقلعت من ساحة مطاري ومدرجي
يشـز الهـوا جنـحي بدايــة تعــرجـه

تلوب عصاتي كل أوســي وخزرجي
وتاوي خصومي في دماها مضرجه

توهـج مصابيـح الدجى من توهجي
ولا اسرجت خيل القاف من حقي اسرجه

اسوق على اسواق الفصاحات مُنتجي
على شكل البومات والاواح مدمجه

البحم






يقول ابن جيلان موج بحري تهيجي
وشعر البحم والهاشمي ذي يهيّجه


أنا الشاعر الجهبوذ لا يمكن ألتجي
ولي جهد امج البحر في فاي وامزجه


انا الدرع ذي كل الملاء فيه تحتجي
ابرمج شديد الصخر بالشعر برمجه


أنا من لي استسلم بكيلي ومدحجي
بقعري غرق تايه ومغرور واخرجه


حروفي وشعري ملح لا. الشعر سامجي
لأآآلاء دُرر ماهًي سوالف ولغـفجه






ابو مشعل الجيلاني

انا حازم المعروف لا اخشى ولا ارتجي
بشـر بل بحد السيـف اذله واحرجه

وحين الوغاء الاقدام طبعي ومنهجي
ولاشي يحول بينه ومابيـن منهجه

شدى حرفي الشحرور من صوته الشجي
ترانيـم تسعـد قلب حازم وتبهـجه

اذا قلت ياقيـفاني اسـري واعرجي
يعود العدو والخصم داره ومدرجه


حازم الشظمي

انالي مدافــع حاملتــها بـوارجي
تهز العدو تقصف مطاره ومدرجه

واناالان سامر مدكي وسط مفرجي
وقيـثارة القافي عليــا مزوجـــه

هوتني وعشقتني وتامن وتحتـجي
ولاتعشق اصحاب القصور المزججه


عبده هاشم
ديوان الشعراء
قصائد. ومجاراة شعرية. للشعراء الاحرار
https://t.me/Dewanalshoara

"الــــــــــــقــــــــــــصـــــــــــيـــــــــــده """""""

يالله يـاخـالـق ومـنـشئ كــل كـائـن مــن عــدم
خـلقت ابونا آدم في ابدع خلق من تربه وطين

اتـوسـلـك تــفـرج هـمـومـي يـامـفرج كــل هــم
واغــفـر لــي الــزلات يـاقـابل مـتـاب الـمـذنبين

وجـيـر عـبـدك مــن جـهنم يـوم حـشرك والـملم
فـي يـوم يـتخلی عـن الـمخلوق قـومه والبنين

الـحـمـدلك مـارتـل الـقـرآن مــن سـربـل وضــم
وازكی صـلاتـي تـبـلغ الـمختار خـتم الـمرسلين

قـال ابـن يـحي نـايف ايـام الـزمن فـرحه وغـم
والـدهـر مــن فـتـره لـفـتره يـقتلب شـده ولـين

كــم نــاس فـي عـمره تـهنی بـالسعاده وابـتسم
امـسی وهـو يـنعم بفرحه غامره واصبح حزين

وهــكــذا دنــيـا الـمـخـاطر والـمـهـالك والـنـقـم
مـاحد سـلم فـيها الـمتاعب والـمصائب والانين

يـاكـم وكــم هـلـكت بـهـا مــن قـبـلنا عـدة أمـم
مــابـاقـي الا الله سـبـحـانـه وخــلـقـه فـانـيـين

وانـــا بـحـكم الله قـانـع واحـمـده فـيـما حـكـم
عـلـيه مـتـوكل ومـاسـك حـبـله الـحـبل الـمتين

هــــو الــمـقـدر والـمـنـفـذ لاحــكـم نــفـذ وتـــم
مـابـش هـرب لـلعبد مـن مـكتوب رب الـعالمين

والاحـتساب والـصبر في وجه المصائب والالم
نـعـمه مــن الـرحمن يـعطيها الـرجال الـمؤمنين

والـعفو عـند الـمقدره مـن شيمة اصحاب الكرم
ومـن عـفا عـن اخـوه واصـلح نـالها دنـيا ودين

اقـسم بـرب الـخلق مـانا كـنت قـاصد سفك دم
لاكـنـها الاقــدار حـاطـت مــن شـمالي والـيمين

الـنـاس خـطـاؤون مـاحد مـن خـطاياه اعـتصم
والـقـتل حـكم الله والـفتنه مـن ابـليس الـلعين

والـيوم انـا مـسجون غارق في محيطات الندم
اجـالس احـزاني واعـاني وجـعة الجرح الدفين

فـي سـجن هـران الـحكومي جـمب كـمن متهم
أحــيـاء ولاكــنـا حـقـيـقه فــي عــداد الـمـيتين

والان بــاوجــه وصــيــه خــطـهـا حــبـر الـقـلـم
قـيـفان يـتـردد صـداهـا فــي خـيال الـسامعين

أوصي بها الاخوان واوصي كل صاحب وابن عم
بـطـاعة الـرحـمن حـسب الـنهج والـذكر الـمبين

والـصـبر نـوصـيهم مــع صـون الـمبادئ والـقيم
مـع مـراعاة الـصداقه والـصحب فـي كـل حين

يــوحـدو صـــف الـقـبيله يـشـحذو كــل الـهـمم
لايـهـملو الـمـوقف ولايـتجاهلو وضـع الـسجين

الـقـبـيله والـعـرف فـيـها طــب شـافـي لـلـسقم
هـي كـنز غـالي للقبايل والصحب مكسب ثمين

والــنـاس تـتـغـارم مـــع بـعـضـاتها مـنـذ الـقـدم
والـجمل بـين الـناس يـتقاضی علی مر السنين

يـامرسلي وصـل حـروف الـشعر ذي نايف نظم
مــــع تـحـيـاتـي وودي زفــهــا لـلـشـيـخ أمــيـن

ضـوره عـميد الـعرف ركـن الـديوله نـبع الـشيم
فـاروق عـصره ذي يـهمه صـلح شـأن المسلمين

لاقـالـهـا يـفـعـل ولاشــرع فــي الـمـوقف خـتـم
لـه قـدر في عتمه وسمعه مثل طيب الياسمين

كــل الـثـقه مــن بـعـد ربـي بـه وظـني والـعشم
انــه يـكـون الـعـون بـعـد الله حـسبي والـمعين

واهــدي تـحايا الـشكر والـتقدير لـلحيد الاصـم
الـشـيخ مـحمد عـبده الـريمي مـجير الـخايفين

لــيـث الــوغـا ســـود الـمـنـايا مــاتـرده لاعـــزم
يـسعی لـفعل الـخير ماقصر مع الناس اجمعين

والـشيخ ابن سعدان حصن العز ذي فوق القمم
الـعـزي الـوافـي حــزام الـطـارفه لـيـث الـعـرين

يـحـب فـعل الـخير يـحكم عـدل مـاعمره ظـلم
سـعـدان تــاج الـطيب والـريمي وربـعه طـيبين

تـشـهدلهم خــولان والـغـادر وجـرعون والـبحم
والمقدشي والشيخ ابو يابس والاحمر والظنين

وخـتـمها صـلـي عــدد مـالـراعد الـصـيفي دكـم
عــلی مـحـمد هــادي الامــه وخـتـم الـمـرسلين





نــــايــــف يـــحـــيــى عــــبــــدالله الـــجـــمــل
6 مــــــــــــــــــــــــــــــــــــــــــــــــــارس 2020

في زمان التمادي سئمنا الصبر بالبيت والوادي
والمنادي ينادي وكل الناس تشتاق للعـوده

يابحم في بــلادي تعاقبنا بمهدي وبن هادي
بعد ذاك القيادي فقدناايام كانت هي الجوده




تحيات ###فارس الجبوبي

➿➿➿➿➿➿➿➿➿


انبري يامدادي وسيفي لايظليش بغمادي
لب ذاالصوت عادي فأني قدعرفت ايش مقصوده

حظنا اســود رمــادي وقادتنا من الجرف والنادي
يحكمواوالايادي تصفق والحناجير مسدوده



عبدالله البحم

➿➿➿➿➿➿➿➿➿

قربو لي جوادي وهاتو سيفي الخاص يااولادي
حان وقت الجهادي لماذا الناس صرعاء ومبلوده

وضعنا الاقتصادي تدهور والوطن ضاع يااسيادي
ذي تغدا زبادي رقد والجوع في معدته دوده



مع الشاعر فارس الجبوبي

صفوان الحدي


شيء طبيعي أعادي عدو الله و الشعب و احفادي
قبل ما أعلن حدادي علئ ماضي أو أشياء مفقوده


لأجل ديني و زادي مكافح ، حر ، من يوم ميلادي
و المدن و البوادي بأذن الله با الخير موعوده




✍ ابورعد النجري
ديوان الشعراء
قصائد. ومجاراة شعرية. للشعراء الاحرار
https://t.me/Dewanalshoara

🦄🦄🦄🦄🦄

على ظهر النعامة جيت طاهش والظلام أبلـج
يراودني على البيرق و انا بيرق سما حجاج.

وفي ركب الحليـلة جيت حارس حقها الهودج
وهي مهرة اصيلة من قبيلة رعـدها رجاج

وانا قـد الفروســية وفي زغنــي صميل أعوج
وسيفي حد في غمـده ردينـي مثلما الحَجاج

إذا سليتـه اتهـاوت حيود القافيـة واحرج
فطاحل شاخ فيها الوقت كانت للأدب منهاج.

وفأسي مثلما تورغوت لا قد هاج واتشنج
رجع راوي وله شفرة تحب الدم والفداج

وسيلي كالعرم لا اقبل بـ طـوفان القوافي عج
يطم اليابسة وان هاج بحـري بالبـلاغة هاج

و يجبر قاصرات الطرف تخـرج ليه تتـفرج
وتشخص في حدقهـا كيف تتلاطم به الأمواج

ويقذف من صدفـه اللـول والمرجان ما يزلج
وفي عمقه مناجم حميرية للذهب والعاج

وإعصاري تسـونامي إذا قد فاض واِتهيج
عصف بالخارطة واطبق على الأسفلت والبطناج

وفي يدي عصا موسى إذا غيـري معه عوسج
أخليها ليوم الجن تضــرب هاجهـا والداج

وانا فارس بكيلي حاشدي صبة قبُل مذحج.
ومن يحصب ذرى شمريهرعش جيت حامل تاج.

ومن صفوة بني قحطان اصل الأوس والخزرج
ومن قـوم اسعد الكامل قبيلـي قح مايحتاج

وحولي مملكة عظمى وقصري داخله مفرج
وبرجي بالفصاحة والبلاغــة قـزّم الأبراج

وقيصر عرشها الطاهش وصعب الكنـق يتدحرج
من الكرسـي وله مارد جري متنفخ الأوداج

ومن قانـون قيـفاني أنشـتاين قد استنتج
قوانيـنه.. وقانـوني قد اصبح مصدر الإزعاج

على الكوكب.. وفانوسي بصدر القافية سرج
و بانت لي مفاتنــها جلـية دونمـا مكـياج

وشفت اِكعـوبها تهـتز قالت هيت لك تلعج
ومالت عجـزها نحـوي وقالت ضمنـي ياحاج

وعانقنـي فديت الفـم لا تخـزى ولا تحـرج
ومص الشهـد من ثغري مع التـلال واللجاج

وحور العـين تتقشــف تجاهي جات تتبرج
لـ تبـدي لي محاسنها وقلبي داخل الادراج

وحرفي ماسي استملك حنايا بنتـها واثلـج
صدور الناس واستحوذ وعذبـه للمهج ثجاج

ولي منهج حمورابي وضعته لليمن مـنهج
وعممـته على العربان واصبح للعجم منهاج

إذا رتلت حـرف القاف أتقـن حقه المخرج
واغنّــه واظـهره واخفيـه حسب النطق والإخراج

سليل المجـد.. قيفاني سمعها مستمع و اصنج
وكل اعمى قريها.. رد يبـصر نـورها الوهاج

وحبي لليمن كعبة شريفـة من قصدها حج
وفي محرابها القدسـي تبات الناس والحجاج

وانا من شادها عنـوة ومن شطب ومن رنج
ومن أكسيتها سـندس وإستبرق مع الديباج

لها مشكاة روحـية بجنـح الليـل تتـوهـج
ومن شدة إضاءتها أتـوا من كل فـج افواج


ومن قيثاري اتراقص بحضني كل غصن اغنج
مدحلج وادعج العينين واتمايل على المكساج

وانا حاسوب متكامل وقرصي بالأدب مدمج
مدعم بانظـمة تشغـيل تتنـاغم مع الإنتاج

أردت اسري إلى المريخ واصعد من على المدرَج
واحلق في سماء القيـفان كالرافـال والميراج

لـ أبلـغ منتهى الإبداع.. وفي متن البراق أعرج
إلى السدرة واعود الليل ..طابت ليلة المعراج

فاِن حـزت اللقـب ياقوم هـذا يعتـبر مبـرج
وان مالم فيبـقى دين داثر صاحبه محـتاج

وصعب الطاهش البطاش لا مال الحكم يحتج
وحرفه يضمن البيرق فهاتوا له بدون احراج

وحبـي لليمـن ملـة عزيـزة غالية و احنج
من الدنيا وما فيها وحبـي للـوطن فـلاج

غريزة داخلي فطرة بنبض الروح تتأجج
وتجري في شراييني وتستفحل في الأمشاج

اراها في مقام أمي اذا قد شفـتها اتهــفج
على الأقدام أقبلها بحرقه هات يا مضاج


يسهرني ألمها وان بكت من حزنها اشحرج
بعبرة حزن واعزفها على قيثارتي والصاج

وحين تبكي بفارغ صمت ضربت الصوت واتشهج
وينخرني بكاها نخر صح النـوم يا باحاج

وانا في برها محتاج وانته لا دعاها احوج
وجمع الأم بالاسـرة ويحضن حفتر السراج

وهي في قاع مستنقـع ببحر الدم تتـضرج
وشبت حربها الشعـواء ودب الجرح من دماج

كفـايه لاهنـا نعبـث بها والغـير يتبـلـطج
ونهدم مجـدها العامر وهي فوق العروبه تاج

وبعدى نضرب الوايب الى الخارج ونتلبج
ونحنو الطب والعلة لنزع السهم والايلاج
....






ابوهمام الطاهش
ديوان الشعراء
قصائد. ومجاراة شعرية. للشعراء الاحرار
https://t.me/Dewanalshoara

مشاركتي في مسابقة حجاج للشعرالشعبي النسخة الخامسة 2020 م المرحلة الاقصائية الأولى

(موضوع المرحلةالتسامح)

( المسامِح كريم )

فاز مَوضوع هَذي المرحلة باعتباره
مِن أهم المواضيع الجَدِيره بالاتقان

(المسامح كريم) وتحت هَذي العباره
ضَع مائة خط واستفهام واوغِل بالامِعان

كيف صارت بِصدر اهل السماحات(شاره)؟
الإجابة تجيك الآن حِجّه وبُرهان

هاهُم اعطوك من حَقل التسامح ثِماره
والعطايا النَفيسِه ماتُقدّر بالاثمان

شِوف عَكس التسامح كَم كَوانا بناره
إنّهُ الحقِد جَرعنا مَذلّه وخُسران

النماذِج كَثيرة نكتفي بالإشاره
خنجر الكُره طاعِن في مُهجنا إلى الآن

أجَدَب القَلب واسودّت عروق المراره
َ انقضىَ العُمر واحنااصحاب إحناوالاحزان

بالتسامح بَنَىَ الانسان اكبر حضاره
كَم بِرُوّح التفاهم والإخا نهضّت اوطان

للسماحة مساحة ابنِ فيها إماره
سَندِس الصّرح واتربَع عَلىَ العَرّش سلطان

والتحاور حديقة والموده إناره
والتأخي لهذا الصرح أسطُح وعمدان

بالتفاؤل وحُسن الظن قامَت عِماره
بينما الغِل ياويلاه كَم هَد بُنيان

بالوفا بالتعايش بالنقا بالنضاره
تستقيم الحياة من دون يختّل مِيزان

حَثنا الدين ندفِن غَيظنا في مغاره
بل ونِسبّتدله سؤدد ورأفه وتِحنان

سَامَح الله (آدم) يوم خَالف قراره
حِين كَادَه وأستغواه بالمكر شيطان

ياَ لطِيب السماحة إن أتت عَن جَداره
حَسَبما جاءَ بالآية على لِسن لقُمان

لاتصعّر ولاتختال سيب الخَشَاره
مَن تواضع كُبر ومن تكبّر خبر كان

كُن من الكاظمين الغيظ اهل الطهاره
بينك انته ومن يسكنهم الحقد شتان

كَم تحَمل نبي الله من جور جاره
كَم عَفىَ.كَم دَفع بالسيئة عفو واحسان

مَجلس الأمن سَن السِلم مِن عُقر داره
بالتعايش بِسلمِيّة مع كل الاديان

التعايش تِجارة والتجِاره شَطاره
إن تِغابيت خَسران وان تِذاكيت كَسبان

كُون ياابن اليمن سفِيرنا والسَفاره
بالتسامح تِجاه الغَير مثل ابن حيان

بالتغاضي وحُب الناس حِزّت الصداره
صِرت يامَشعَل الاخلاق إنسان الانسان

ذا الخيار الوحيد للعيش في كل قاره
دون هَذا الخيار يا أنت فالكل نَدمان
***

مِن نُخَب مفرداتي قَد عَصرت العُصاره
يحتسوها رجال الفكر فنجان فنجان

جَزّلَة الحبك والتشبيه والإستعاره
كِنّ أبياتها في بعضها البعض أخَدان



عبدالله عبدالله البحم
ت 13/ 12/ 2020م
ديوان الشعراء
قصائد. ومجاراة شعرية. للشعراء الاحرار
https://t.me/Dewanalshoara

بدع عزالدين الفلاحي
ورد مظــــــفر الهمــــــام




قال الفلاحي صعب أصدق ماحصل
م̷ـــِْن بعدما ودفت لا القاع العميق

داخل محيطات المحبه والغزل
ذي حملتني بالهوى ما لٱ اطيق

واصبحت كني ياجماعه معتقل
بالسجن في رجلي حويصات الحليق

وفوق هذا خاب ظني والأمل
باصحابي اللي خانوا العهد الوثيق

في صحبتي عابو وبائوا بالفشل
وبالخيانه نالوا الفوز السحيق

ه̷̷َـَْـُذآ يبيعك لجل مايخسر أمل
وذاك م̷ـــِْن اجل الجمالي لٱ يضيق

مليت م̷ـــِْن كثر المكايد والحيل
والثعل من غيبوبته رافض يفيق

به فرق من كوكب عطارد لازحل
كالفرق بين البوم والصقر الطليق

والسوق منه يخرج الحاذق عطل
والبحر عمره ماينجي شي غريق

يعجبني الرجال ذي يمشي قبل
شامخ شموخه للسماا ماله معيق

انسان لاصاحب تمثل واامتثل
مايترك اصحابه على شان العشيق

اقل حاجه مثلما قال المثل
محد يفلت صاحبه نص الطريق

اخس حاجه بين الاحباب الزعل
واخس طعنه قد تجي ڵـڱ من صديق

و بعد موتي لٱ يبكيش المقل
ذي مايكن لي شي علـي الدنيا شفيق

مش من قلع ثومه رجع يغرس بصل
قبل الطريق اختار للرحله رفيق

به جيد تلقى صحبته مثل العسل
وفسل لاقد شفته الدنيا تضيق

ذي هو عسل كن بق لك منه وسل
مستخلصه صافي من ازهار الرحيق

والفسل منه مايجي غير الزبل
لاقد لقيته زاد فوق الضيق ضيق

قم شل حرفي يارسولي في عجل
طازج مرصع بالزبرجد والعقيق

لاعند شاعرنا المحنك والبطل
ذي قاذفه بالشعر قاذف منجنيق

تلقه مقنف هامته مثل الجبل
هذا مظفر صاحب العرق العريق

ساعة وصولك قله الاخضر وصل
من عند ابوالعز الفلاحي ياشقيق

واعطه وقله قال عزالدين هل
تقدر تجوب له على الحرف الانيق

مادام والعقل المغفل ماعقل
قد قال الاول ماصديق الا لضيق

لاصحت له حيا على خير العمل
جاوب ووحده جانبي يسوى فريق

واشكيك من صاحب مقامه قد نزل
وانا حسبته مثلما الحيد الشهيق

من بعد. ما شل الجمل فيما حمل
سوى جرايم بالصداقه ماتليق

هذا كلامي تفهمه فيما شمل
وارسل جوابك قبل يجتاح الحريق

وارسل لنا من واديك باغه قطل
والا دعينا يصتلب سعما مشيق

والختم ماصب المطر بارك وصل
الله على طه وصحبه والرفيق


موجهه للشاعر مظفر الهمام
ابوخالد

ابوالعز عزالدين الفلاحـــــــي




وما من الحب الحـــقيقي ماقتل
ون ما قتل يدي. بعظمانك صقيق

هذ مثل واسمح لي اضرب لك مثل
بين المئه تلقا فقط صاحب حقيــق

خيانة الصاحب. يولــد. لك زعــل
ليست كما من خان خله. والعشيـق

صبرك على الصاحب متى. ودف وزل
باع الصحب يوم اشترى الجنس الرقيق

فالاخ قد يقتل اخوه لجل الكــعل
لا عد تحمل صاحبك مالا. يطيق

جهده وجهده ما حمل حجم الثــقل
به فرق باللايق وذي هو ما يلييق

كم ياآوادم روس وكم ذي هم سبل
سع ما الزفير ياصاحبي عكس الشهيق

ماصاحب الا من خرج من حين دخل
بالنايبه كفه ومعلااااقه وثييييق

مابايبيعك لو حصل ايش ما. حصل
يكون لك اغلا من الاخ الشقيييييق

بطل بوجه اعداك وفي وجهك اذل
واحد فقط يغنيك عن كل الفريق

مالك من أصحاب الزغل هم والمغل
ذي يلبقك من كثر ما عنده لبــيق

لا تاحة الفرصه على وجهك دفـل
دفالة الخائن حٌمه ماهيش ريــق

يقلب مع من ثوره. الزاجي بتــل
ويفشلك جاغور صوته والنعييق

من خارجه صافي ومن داخل ذحل
احذر يغرك ملبسه لا هو أنيـق

ما له قبول في كامل الخمس العزل
بارجعه من سايلة وادي عسيـق

يروح من يحصب ومن قفر العول
ما تقبل الا كل ذي أصله. عــريق

مثلي ومثلك ياجبل يزحم جبل
ومرشد احمد ذي سكن داخل مشيق

شرفت يابو العز داااااااري والمحـل
ترحيب وازي كوكب الشمس الوسيق

ياعز شاعر من زمل بعدك زمـل
ماحد قصفني مثلك القصف الدقيق

لاقد نهض من عندك الناهض وشل
ترقف لها السبع السماوات الطبــيق


جواب على الشاعر عزالدين الفلاحي

ابوخالد مظفر الهمام
ديوان الشعراء
قصائد. ومجاراة شعرية. للشعراء الاحرار
https://t.me/Dewanalshoara

الكااااااابوس


قال أبو خالد قبائل وين عاد القبــــيله

وينها يا اخر. قبائل. خالفت. ما قــبلها

وايش لي من حل يوصل في غياب المسئله

وان لقينا. مســــألتنا ما لقيـنا حلــها

كنت ابوها وامها كانت. زماااان البيكـله

إمها ماتت وأبوها . حــــي يرزق. لجلهـا

بالنهاية خلفت من. بطنها والمحبــله

عولها واليوم صارو مجتمـــعهــا واهلهــا

عولها عاله بذنب. العمعمه والمخــوله

لا أصاله في اصـولٍ ما توضــح فصـلهــا

والخلف ماهو كما كان السلف. نتسلسله

ليتها ماتت تجاه ما يخـلق الله نســـلهــا

وأصبحت ملقف لكم من مدعي أن هيه له

والحقيقه ان هذ القبــــــيله ماحد لهــا

القبائل ماشيه عكس. اتجااااه البوصله

والرجوله قيدو لك يـــدها. لا. رجــلها

انت في واقع تمـيز صاحبك من هيـكله

لست فاهم أن شكل الشخصيه مادخـــلها

بالمواقف باتميز صاحبك. من دااااااخله

من هناكه هين هذ الشخصيه. او جلــهـا

القبيلي من حفظك لك ماء وجهه واكمله

لا طبع وجهه يشل. اوتاد بقعا شلهــا

مثل مانا لو تحملني جبـل لا. اتحمــله

لو يدي حطت على وجهي بنانه. وللهــا

ون مسك خصمي على دقنه نعم فكيت له

قد طرح دقنه بوجهي عيب لا قد دلهــا

تعتبر قــــرآن محـرابي. وانا ذي رتــله

والحرم والكعبه اللي كل فرض اوصـل. لهـا

والكرم ياكفو مني شل منه. نااااااااوله

مخلبي مبسوط كل. البسط أكره غلــها

والوفاء معدن ضمير انساااااان ما تتخيــله

والكرامة عزتي. يارب لا اوصـــل ذلهــا

والشجاعه قرن رأسي رمح. يطـعن. بـــاوله

ما تهزه ريح. صرصر. والــزوابع كلهــا


.مظفر الهمام
ديوان الشعراء
قصائد. ومجاراة شعرية. للشعراء الاحرار
https://t.me/Dewanalshoara

قال ابو نوف مهما قيــل لازلت مهــــضوم
والحقوق ضايعه من بعد سلب الحكــومه

واصبح الزير متمسك بـ عمـر ابن كلـثوم
بينما عنـــــترة شــداد غابــت علــــومه

عبر جينات قيفاني هَــْـِْـْْـِلاّ بالكروسوم
نايف الجيد ذي بالشعر برك خصــومه

اسهر الليــل يا نايف كما كــنت ملــــزوم
ضيف ابو نوف لاداعــي لشرط العزومه

واصل السهد والشظمي مع ابن مكتــوم
منتظر شخص عــز الدين غابت نجــومه

وابن ناصر نظــم ديوان للشــعر مختــوم
للفطاحل صدى صوته وصل ارض رومه

فكري الليــل يا ساري بالاشعار ملغــوم
بأبجديات والهاجس مكثــف هجــومه

والأجل قال ابو همــام لاشك محــــتوم
ويله الويل م̷ـــِْن شارك بحرب العــمومه

قيس ليلى ترك بقعاء من الحب محروم
ما وصل حضــن ليلى قط لا احد يلومه

كهذا م̷ـــِْن عشق مثله معذب ومهــــموم
يسهــر الليــل يابن الموقــعي ما ينوومه


بينما الرزق عند الله باللــــوح مقســوم
لَـگِنْ البعض عمره بالمــرق والدســومه

بينما البعض بين الفقر جاوع ومحــــروم
والمصايب علـى راســه وبقعاء تــــدومه








بقلم ابوهمام الطاهش
ديوان الشعراء
قصائد. ومجاراة شعرية. للشعراء الاحرار
https://t.me/Dewanalshoara

قال ابو نوف لـولا الّــلات والــعُــزى
في قريش ما ضربنا بعـدها العازي

و اقتسمنا المعيشه قسـمةً ظيــزاء
في السعيدة ورام •اللّـہ̣̥ وبــنــــغازي

والذكي يا نـشامى يفــهم المــغزى
قبل يصبح سبيه في يد الــغــازي

م̷ـِْن قتـل شعبنا لا يحضر المعـزى
كل غازي يراجع مختــــم النــــازي





✍️ابوهمام الطاهـش
ديوان الشعراء
قصائد. ومجاراة شعرية. للشعراء الاحرار
https://t.me/Dewanalshoara

*زامــل شعبي البدع من الشاعر فارس الجبوبي ويليه جواب الشاعر عبدالله البحم والشاعر صفوان الحدي والشاعر أكرم النجري والشاعر جبر البحم*



في زمان التمادي سئمنا الصبر بالبيت والوادي
والمنادي ينادي وكل الناس تشتاق للعـوده

يابحم في بــلادي تعاقبنا بمهدي وبن هادي
بعد ذاك القيادي فقدناايام كانت هي الجوده




*تحيــــــــــات ### فارس الجبــوبي*

➿➿➿➿➿➿➿➿➿


انبري يامدادي وسيفي لايظليش بغمادي
لب ذاالصوت عادي فأني قدعرفت ايش مقصوده

حظنا اســود رمــادي وقادتنا من الجرف والنادي
يحكمواوالايادي تصفق والحناجير مسدوده



*عبدالله البحم*

➿➿➿➿➿➿➿➿➿

قربو لي جوادي وهاتو سيفي الخاص يااولادي
حان وقت الجهادي لماذا الناس صرعاء ومبلوده

وضعنا الاقتصادي تدهور والوطن ضاع يااسيادي
ذي تغدا زبادي رقد والجوع في معدته دوده



مع الشاعر فارس الجبوبي

*صفوان الحدي*

➿➿➿➿➿➿➿➿➿

شيء طبيعي أعادي عدو الله و الشعب و احفادي
قبل ما أعلن حدادي علئ ماضي أو أشياء مفقوده

لأجل ديني و زادي مكافح ، حر ، من يوم ميلادي
و المدن و البوادي بأذن الله با الخير موعوده



*أبورعد أكرم النجري*

➿➿➿➿➿➿➿➿➿

قد سمعت الربادي وطارش كان يحكئ بها اجدادي
يوم كان الزبادي مع التونه والاسعار محدوده

جف شربي وزادي وشوفت الطير من فوقكم شادي
دق فيها فوادي وايقنت ان الاوضاع معصوده

كنت بأول عدادي وكانت غايتي للوطن غادي
جات اهل البوادي وشالوها وهي بنت محسوده



*جبـــرالبحـــم*
ديوان الشعراء
قصائد. ومجاراة شعرية. للشعراء الاحرار
https://t.me/Dewanalshoara

*موضــوع اليـــــوم // (( البـــــاديه ))*

*الجمـعـــه ٢٠٢٠/١١/٢٠*
*===========🍀==========*

قال إبن صالح زيد حب الباديه
.......... فطره يشاركها شعوري والبدن

رغم المسافه و الحيـاه العاديه
.......... أعـز مـن صنعاء معا بندر عدن





*تحيات ///////////// ناصرالذيب 👋🏻*

🍀🍀🍀🍀🍀🍀🍀🍀🍀

حيا ابن صالح ذي قطوفه دانيه
............حبه تخلد داخل احشائي سكن

وعيش البو ادي تزرع الا نسانيه
..........ومن تربا فيهن ارتاح وافتهن


محادثه مع العميد ناصر الذيب


تحيات ابو غدير احمد الطيبي👋

🍀🍀🍀🍀🍀🍀🍀🍀🍀

بلحب لي يــــاذيب قــــو ايراديه
........ مثلي انا بلحب مافيش احدن

الحب ماهــــو باالصحف والراديه
........ الحب للي لي في العشقه فتن

خـلا فؤادي هــــام داخــــل واديه
........ وشل قلبي والمشــــاعر يازمن

وايش الجلــــيله جـــنبها او ناديه
........ مامثلـها انسان في قلبي سكن


مع الذيب
✍🏻محمد عبده علوان

🍀🍀🍀🍀🍀🍀🍀🍀🍀

محلا روابي عنس وصوت الراديه
عيشه بها جنه ويهنا من سكن

الكل عايش في مزارع واديه
يسقي ويزرع كل ماله والوطن



مشاركتي مع عميد الشعراء ابوزيد ناصر الذيب

ابوعنس التالبي

🍀🍀🍀🍀🍀🍀🍀🍀🍀

حياومرحب بالحروف القاديه
شاعرمثقف ماشبيهه ناصرحدن

منهانهلت المرحله الاعداديه
هي مسقط الراس يشهدالله والبدن

بقلم/ علي مطير
مشاركتي مع الشاعرناصرالذيب

🍀🍀🍀🍀🍀🍀🍀🍀🍀

يامرحبا بالذيب وهاذا ناديه
يشارك الشعار من كل المدن

الريف ياناصر طيورة شاديه
عذب المناهل لاتلوث اودرن


مشاركه مع العميد ناصر الذيب

عبدالله الجويد

🍀🍀🍀🍀🍀🍀🍀🍀🍀

ترحيب ماهبت هبوب الذاريه
بأبيات قد جتنا لها معنى وفن

كانت زمان الباديه والراعيه
يتغنوا الشعار بأبيات الشجن

واليوم ياناصر قديه غوجانيه
من باطل اللي فصلوا ثوب الحزن

من بعد أقدام الرخوم الحافيه
لبسوا حقوق الناس ذولاك الهين

واصبح عديم الذوق والانسانيه
مشرف ومتحكم وقايدي مؤتمن

بإسم آل البيت رأس الثانيه
نقبر شباب الجيل وندمر وطن

كم يا ماسي كم فعايل داميه
كيف ياحسين قالوا ولا يبقى حسن


ك صابر الشميري مشاركه مع العميد ناصر الذيب تحياتي للجميع

🍀🍀🍀🍀🍀🍀🍀🍀🍀

رغم المعاناه والظروف الماديه
الباديه بالقلب موقعها وطن


هيه للالم الوصفه السلباديه
والعافيه ذي ما يساويها ثمن




مشاركه مع الشاعر / ناصر الذيب



ابومحمد الصباحي

🍀🍀🍀🍀🍀🍀🍀🍀🍀

حب البوادي في النفوس الهاديه
......يجري بقلبي حبها طول الزمن


مهما افترقنا فاالقلوب متقاديه
........واحبنا للباديه ماله ثمن



برغم كلاً مننا في واديه
..... لاكن مااحد قد نسي حب اليمن



مشاركه مع الشاعر الكبير ناصر الذيب


ابوعاهد


.......

🍀🍀🍀🍀🍀🍀🍀🍀🍀


*مًشُآرکْتٌيَ آلَيَوٌمًيَةّ مًعٌ آلَشُآعٌر آلَمًبًدٍعٌ /نِآصّر آلَذِيَبً*



يقوووول ابوحيدر نبيل يالباااادية
يا نـَبض قلبي يا فؤاااادي والبـَدَن


مـُشتاق لـِك رَغم الحيااااة القاسية
ورَغم ما يـِحصـَل بأرجااااء الوَطـَن


يا مـَن جـَذوري في رُباكي رااااسية
يا مـَن مـِلكتي فالطـَبيعة كـُل فـَن


ما أحلئ الهـَواء فيه الدواء والعاااافية
واجمـَل مناظر مـَن نـَظَر فيها أفتهَن


يا مـَن جـِبالـِك والجـَداااول كااااسية
بالماء والخـُظرة والوَجه الحـَسَن


كـُل المنااااظر والقـُصووور العالية
العـَين تـِعشـَقها وقـَلبي صُدق حـَن



*مًعٌ تٌحًيَآتٌ آلَشُآعٌر /نِبًيَلَ آبًوٌحًيَدٍر*

🍀🍀🍀🍀🍀🍀🍀🍀🍀

مابش بوسط الريف بنيه زانيه
ولا بها يا أخي شوايب أو حزن

طعم البوادي بل المطاره ثانيه
يجنو ثمار الزرع وبزوهن ثمن






مشاركتي معا
عميد الشعراء
ناصر الذيب


✍️
دارس السالمي

🍀🍀🍀🍀🍀🍀🍀🍀🍀

الموضوع:
((البادية))
سلام يتصدر مع اول عاديه
ضبحاً تسابق مرسلات يتوافدن

للذيب واقحاح الرجال في ناديه
للشعر والباله ولا ساعه هدن

سرب البلابل دام والذيب حاديه
وارشف بديع الشعر بالله يا خدن

نجم الشتا آفل بمطلع حاديه
فاطرب مع الانغام والصوت الجدن

مشاركتي مع عميد الشعراء ناصر الذيب
✍🏼 أ/ علي غراب

🍀🍀🍀🍀🍀🍀🍀🍀🍀

محلا البوادي والطيور الشاديه
..........الماء مع الخضرة مع الوجه الحسن

تغزل الشاعر في أجمل واديه
...........محلى ربوعك يابلادي والسكن

مشاركه مع الشاعر ناصرالذيب

//////////✍🏻 أبومحمد المحاقري

🍀🍀🍀🍀🍀🍀🍀🍀🍀

📤مشاركتي لمجارات الذيب📥

الباديه والريف في ايام ماضيه
مااليوم ياذيب وضعهايدي الكنن

ايام كان الفرديفعل قافيه
لأبن المدينه جاه قيل وافتهن

يسدح ويذبح بالهناوالعافيه
مرحب ومسهل بالوصول من غيرمن

واليوم ﻹدالك قفوعه دافيه
علي زبادي واقلب اسمه لك لبن

سرحت اول امس ثورين جافيه
ولاحدزدقال من اين هذالمن


شاعربني حشيش
عبدالولي الفقيه

🍀🍀🍀🍀🍀🍀🍀🍀🍀

قال

النهاري كل من في وادية
هايم وضانك ماسلي شيء وافتهن

زين البوادي كالغزال الشاديه
تستاهل ادفع سعرها باغلا ثمن

كلمات/محمد ابن احمد النهاري
مشاركتي مع الشاعر الكبير ناصر الذيب

🍀🍀🍀🍀🍀🍀🍀🍀🍀

مرحب يبث عبرالهواء والراديه
ولاماوصل باحوله خط الكدن

رغم الحصاروالضروف الماديه
مسقط الرأس غاالي والبدن


مشاركه معا عميد الشعراء ناصر الذيب
تحيات # # # # # امين صلف

🍀🍀🍀🍀🍀🍀🍀🍀🍀

روعه هواها و الحياه الهاديه
نغمه جميله دان وادانه ودن



كل القلوب بالخير فيهاحاديه
الاصل فيها دائمآ روح الوطن


مشاركة مع عميد الشعراء
ابو زيد الذيب

نبيل الزوملي 👋

🍀🍀🍀🍀🍀🍀🍀🍀🍀

🕸️ *مشاركه مع العميد ناصر* 🕸️


================

قال الفتى كلن يهيم في واديه
.........ويدعي بالزور حبش يا يمن

والقتل في وسط الحضر والباديه
..........والحرب جاري والقلاقل والفتن

وفي محط التلفزه والراديه
...........تحريض عرقي كم يقشعر للبدن

يا هيه يا كل القوى المتماديه
........مابش لكم سلطه على ارض الوطن

الحكم حكم الشعب داخل ناديه
..........والارض ترجع له على مر الزمن


#احمد__الصباحي 👋🏻

🍀🍀🍀🍀🍀🍀🍀🍀🍀

حب البوادي والبلابل شاديه
بذات يا ابو زيد في ريف اليمن

في لون راقي والسواقي ناديه
تجلي اناظر. وتشفي. للبدن

تمر اليام والشهور متقاديه
تسعد على مر الااقامه والسكن

وزرع مالك بثمار الجاديه
تاكل وتشرب ماتهم ايت ثمن

والظان موجود فزريبه القاديه
تذبح وتكرم منهواك حاتم قطن

مشاركه معا العميد ناصر الذيب

#*#تحيات محمد الجوهري#*#

🍀🍀🍀🍀🍀🍀🍀🍀🍀

الـباديـه عكــس الحـيـاه المـاديه
........ للمـدن ذي من ضجيـجـه ما هدن

ريف المدينه ارض ابي واجداديه
........ أمـوت لـو با عيـش عنـها مبعداً





*طارق أبو رأفت*

*مشاركه مع الشاعر الكبير ناصر الذيب*

.🍀🍀🍀🍀🍀🍀🍀🍀🍀

بلسن شعري توعيه ارشاديه
ان البوادي مضجعي وافضل سكن

وحيث الاجواء باعتداله هاديه
حيث المواشي ذي تدر سمن او لبن

وحيث السواقي بالحقول في واديه
والواحه الخضراء مع الوجه الحسن

مشاركتي مع العميد ناصر الذيب

الشاعر حزام ﺍﻟﻌﺜﻤﺎﻧﻲ

🍀🍀🍀🍀🍀🍀🍀🍀🍀

لا تحسبو حب البوادي عاديه
حب البوادي عندنا مله ثمن


يمين يابو زيد منسا الباديه
لا ما البس القبر المجهز والكفن
وا

مشاركتي مع العميد ناصر الذيب


تحيات أبو رعد المرقبي

🍀🍀🍀🍀🍀🍀🍀🍀🍀

الما والخضره وصوت الناديه. **** لما تدندن. بالغنا فى صوت فن. **** محلا الغوانى كل من فى واديه. **** منظر امانه لايقارن فى ثمن. *** ابولقمان البردونى. مشاركه مع الاستاذ ناصر الذيب

🍀🍀🍀🍀🍀🍀🍀🍀🍀

الذيب ناصر معدن. الانسانيه

تضرب به الامثال سعماذويزن

شاعر كبير مبدع بنضم القافيه

وابيات شعره مايوا زنها ثمن

عبرالجريده والصحف والراديه

وكل شاشه يعلنو. باسمه علن

للباديه والريف راحه ثانيه

وجوها ثاني علا جو المدن

الباديه بأجواها الروحانيه

يبقئ بقلبي عزها طول الزمن

جبران خليل//////////
👋🏻

🍀🍀🍀🍀🍀🍀🍀🍀🍀

محلا البو ادي وردها ريحانيه

..........تجلي عيون الكل بلوجه الحسن


فيها البلابل والطيور الشاديه

.........تسجع علا اغصان الشجر وااليل دن

والان ضعنا في دوله تحاديه
..........دوله بصنعاء والاخيره في عدن

لاامن لا استقرارلادوله سياديه
............اصابت الشعب اليماني بلحزن



بسام المالكي مشاركه مع عميد الشعراء ناصر الذيب

🍀🍀🍀🍀🍀🍀🍀🍀🍀

*🚨 🙏🏻 الأخوة والأهل والأحبة والزملا فضلا وتكرما منكم نرجو التصويت للأديب والشاعر المشهور / عبدالله إبن عبدالله البحم ، 🔺 *رقم الشاعر 96*👍
في مسابقة (حجاج للشعر الشعبي النسخة الخامسة).
*(موضوع المرحلة التسامح)* 📃 *أبيات مختاره من قصيدة المشاركة*

*(المسامح كريم) وتحت هَذي العباره*
*ضَع مائة خط واستفهام واوغِل بالامِعان*
*شِوف عَكس التسامح كَم كَوانا بناره*
*إنّهُ الحقِد جَرعنا مَذلّه وخُسران*
*مِن نُخَب مفرداتي قَد عَصرت العُصاره*
*يحتسوها رجال الفكر فنجان فنجان*

*جَزّلَة الحبك والتشبيه والإستعاره*
*كِنّ أبياتها في بعضها البعض أخَدان*

*🛃🆗طريقة التصويت👇*
*اولاً*:- الأنظمام إلى مجموعة (مسابقة حجاج للشعر الشعبي النسخة الخامسة2020)من خلال هذا الرابط* https://www.facebook.com/groups/ZAYEDMOHAMMED/?ref=share
*ثانياً*:- *موعد التصويت
يوم غدا الأحد 20 / 12 /2020م. في تمام الساعة 9:00 مسائا والذي سنوافيكم برابط التصويت غدا إن شاء الله .
*ثالثا: آلية التصويت فما عليكم سوئ التكرم بمايلي:*
1. 👈🏻 الدخول عبر الرابط المحدد الذي سيعلن ونوافيكم به كما ذكرنا غدا .
2. التصويت بالضغط على أيقونة الأختيار ⏺️ *للشاعر عبدالله إبن عبدالله البحم ورقمه ( 96 )*
3.ومن ثم التعليق وذكر أسم ورقم الشاعر ( إن أمكن ).
*ولكم خالص الود والشكر والتقدير*

الفزعه يارجال هكذا طريقه التصويت تحط اشاره النقطه فوق الاسم
وتكتب في التعليق 96
عبدالله البحم

هذا رابط التصويت

https://www.facebook.com/groups/ZAYEDMOHAMMED/permalink/2858202627734168/

الكل يدخل يصوت

يعمم على كل الاصدقاء

الفزعه يا اصحابنا.مع الشاعر عبدالله البحم.يستاهل كل خير.


اخوكم .وليد صبره