🏥АБАЙ ОБЛЫСЫНДА ЖОСПАРЛАНҒАН 65 МЕДИЦИНАЛЫҚ АЛҒАШҚЫ КӨМЕК НЫСАНЫНЫҢ БАРЛЫҒЫ САЛЫНЫП БІТТІ

Абай облысында медициналық-санитариялық алғашқы көмек көрсететін 65 нысанның құрылысы толық аяқталды. Жалпы республика бойынша 813 денсаулық сақтау нысаны пайдалануға берілді, оның 655-і ұлттық жобаның шеңберінде іске асырылды. Бұл туралы ҚР Денсаулық сақтау вице-министрі Тимур Мұратов Аягөз ауданы тұрғындарымен кездесу барысында мәлімдеді.

🪧Вице-министр Аягөз ауданының орталық көпбейінді ауруханасына барып, магниттік-резонанстық томография бөлімшесінің жұмысымен танысты. Сондай-ақ аудан тұрғындарымен кездесу өткізіп, азаматтарды жеке қабылдады.

Ол елімізде ауылдық денсаулық сақтау жүйесін жаңғырту жұмыстары жалғасып жатқанын, оның ішінде аудандық ауруханаларды көпбейінді ауданаралық медициналық мекемелерге айналдыру көзделгенін атап өтті. Бұл шамамен 4 миллион ауыл тұрғыны үшін жоғары технологиялық медициналық көмектің қолжетімділігін арттыруға мүмкіндік береді.

💬Кездесу барысында халық денсаулығының негізгі көрсеткіштері бойынша мәліметтер келтірілді.

«2025 жылы күтілетін өмір сүру ұзақтығы 75,97 жасқа жетті. Бұл – тәуелсіздік жылдарындағы тарихи ең жоғары көрсеткіш. Абай облысында бұл көрсеткіш 74,87 жасты құрады», – деді вице-министр.

💬Сондай-ақ ол нәресте өлімінің төмендегенін хабарлады.

«2025 жылдың қорытындысы бойынша нәресте өлімі 14%-ға төмендеп, 1000 тірі туған нәрестеге шаққанда 5,85 жағдайды құрады. Абай облысында төмендеу 25,6%-ды құрап, 1000 тірі туған нәрестеге шаққанда 5,32 жағдай болды», – деп толықтырды Тимур Мұратов.

Тұрғындармен кездесу барысында медициналық көмектің қолжетімділігі, кадрлық қамтамасыз ету, дәрілік қамтамасыз ету және медициналық инфрақұрылымды дамыту мәселелері талқыланды. Азаматтардың барлық өтініштері бойынша түсіндіру жұмыстары жүргізіліп, жекелеген мәселелер жауапты бөлімшелердің қарауына алынды.

✔️Жеке қабылдау барысында аудан тұрғындары жергілікті жерлерде медициналық көмекті ұйымдастыруға қатысты бірқатар әлеуметтік маңызы бар мәселелерді көтерді.

💳ҚАЗАҚСТАНДА ЖЫЛ САЙЫН ШАМАМЕН 1,5 МЛН ЭНДОСКОПИЯЛЫҚ АРАЛАСУ ЖҮРГІЗІЛЕДІ

Астанада эндоскопия, онкология, хирургия және гастроэнтерология саласындағы жетекші мамандардың басын қосқан Қазақстандық эндоскопиялық қоғамның жиыны өтуде. Қатысушылар асқазан-ішек жолы ауруларын диагностикалау мен емдеудегі эндоскопияның заманауи мүмкіндіктерін, сараптамалық визуалды диагностиканы және аз инвазиялық емдеу әдістерін дамыту мәселелерін талқылауда.

👥Бүгінде Қазақстанда 400-ге жуық эндоскопист дәрігер жұмыс істейді, жыл сайын шамамен 1,5 млн эндоскопиялық зерттеу мен араласу жүргізіледі. Бұл бағыттың дамуы обыр алды өзгерістер мен онкологиялық ауруларды ерте кезеңде анықтауға, сондай-ақ ағзаны сақтайтын және аз инвазиялық емдеу технологияларын кеңінен қолдануға мүмкіндік береді.

Ұлттық ғылыми онкология орталығының сараптамалық эндоскопия бөлімшесінің меңгерушісі Қанат Батырбеков атап өткендей, заманауи эндоскопиялық технологиялар онкологиялық ауруларды ерте диагностикалауда жаңа мүмкіндіктер ашуда.

«Эндоскоптардың заманауи буыны шырышты қабықты, тамырлық және беткі құрылымды нақты уақыт режимінде егжей-тегжейлі бағалауға мүмкіндік береді. Бүгінде арнайы спектрлі, zoom және 3D-эндоскопия қарқынды дамып келеді, диагностиканың сапасын едәуір жақсартатын және обырды ең ерте сатысында анықтауға көмектесетін жаңа визуализация режимдері пайда болуда», — деді Қанат Батырбеков.

🛜Оның айтуынша, бұрын ашық хирургиялық операцияларды талап еткен көптеген араласулар бүгінде эндоскопиялық әдіспен — тіліксіз, жарақаттылығы төмен, емдеуде жату мерзімі қысқа және пациенттердің тез қалпына келуімен орындалуда.

Іс-шара шеңберінде тәжірибе алмасуға ерекше назар аударылды. Форумның екінші күні жоғары технологиялық эндоскопиялық операциялардың тікелей эфирдегі live-трансляциялары жоспарланған. Мамандар өңеш, асқазан және ішек аурулары кезінде эндоскопиялық шырышасты диссекциясы мен өзге де аз инвазиялық араласулардың орындалуын бақылай алады.

🔘Жиынның жеке бөлігі заманауи эндоскопиялық жабдықтар мен диагностика және емдеуге арналған инновациялық шешімдер көрмесіне арналды. Ұсынылған технологиялар аз инвазиялық медицинаның одан әрі дамуын және отандық денсаулық сақтау жүйесінің онкологиялық және гастроэнтерологиялық аурулармен күрестегі мүмкіндіктерінің артып келе жатқанын көрсетеді.

📢«СЕВОРАН – АНЕСТЕЗИЯДА КЕҢІНЕН ҚОЛДАНЫЛАТЫН ТИІМДІ ПРЕПАРАТ», – дейді Астанадағы №2 Көпбейінді қалалық балалар ауруханасы Анестезиология және қарқынды емдеу бөлімінің меңгерушісі Нұрсұлтан Құрбанбеков «24KZ» арнасының «Сұхбат» бағдарламасында.

🎥 Бағдарламадан үзінді ұсынамыз.

📉ДЕНСАУЛЫҚ САҚТАУ МИНИСТРЛІГІ: ҚАЗАҚСТАНДА ҚАНТ ДИАБЕТІМЕН СЫРҚАТТАНУШЫЛЫҚ ТӨМЕНДЕДІ

Қазақстанда 2026 жылдың І тоқсанының қорытындысы бойынша қант диабетінің негізгі эпидемиологиялық көрсеткіштері бойынша оң динамика байқалды.

Бұл туралы бүгін ҚР Денсаулық сақтау министрлігінің алқа отырысында Денсаулық сақтау министрінің бірінші орынбасары Тимур Сұлтанғазиев мәлімдеді. Отырысқа өңірлік денсаулық сақтау басқармаларының, республикалық медициналық және ғылыми орталықтардың басшылары қатысты.


📈Ведомствоның мәліметінше, елімізде 1 және 2 типті қант диабеті бойынша жалпы сырқаттанушылық деңгейі төмендеген. Биылғы көрсеткіш 100 мың халыққа шаққанда 308,7-ні құрады, ал 2025 жылдың осы кезеңінде бұл көрсеткіш 100 мың тұрғынға шаққанда 313,5 болған.

Оң динамика эндокринологиялық қызметтің белсенді дамуы және медициналық-санитариялық алғашқы көмек деңгейінде профилактикалық жұмыстың күшеюі аясында байқалып отыр.

«Өңірлерде эндокриндік ауруларды диагностикалау, емдеу және алдын алумен айналысатын құзырет орталықтары ашылуда. Сонымен қатар, бейінді бөлімшелердегі төсек қоры кеңейтіліп, диабет мектептері мен мамандандырылған кабинеттер енгізілуде. Бұл қант диабеті және басқа да эндокриндік аурулары бар пациенттерге медициналық көмектің қолжетімділігі мен сапасын арттыруға мүмкіндік береді», — деп атап өтті Тимур Сұлтанғазиев.

Аурулардың алдын алу және ерте анықтау мәселесіне ерекше көңіл бөлінуде. 2026 жылдың І тоқсанының қорытындысы бойынша профилактикалық мақсатта МСАК ұйымдарына жүгіну үлесі жоспарланған 27% көрсеткіштің орнына 33,4%-ға дейін өсті. Бұл алғашқы буынның профилактикалық бағытының күшейгенін көрсетеді.

Созылмалы аурулары бар пациенттерді бақылау жүйесін жетілдіру шеңберінде Денсаулық сақтау министрлігі динамикалық бақылау мен диагностика тәсілдерін қайта қарады. Жоғары сезімталдықтағы тексеру әдістері енгізіліп, зерттеулердің жиілігі өзгертілді және пациенттердің жағдайына бақылау күшейтілді.

🔘Нәтижесінде инфекциялық емес аурулары бар пациенттерді динамикалық бақылаумен қамту деңгейі шамамен үш есеге — 12%-дан 34%-ға дейін артты.

Сонымен қатар, бірқатар өңірлерде профилактикалық тексерулермен қамтудың жеткіліксіздігі, емдеуге жатқызуды күту мерзімдері және нысаналы индикаторларға қол жеткізбеу сияқты мәселелер сақталуда.

🪧Отырыс қорытындысы бойынша Денсаулық сақтау министрі Ақмарал Әлназарова өңірлерге МСАК-тың негізгі көрсеткіштеріне ай сайын мониторинг жүргізуді, профилактикалық жұмысты күшейтуді және созылмалы аурулары бар пациенттерге медициналық көмектің сапасын бақылауды тапсырды.