بص ي باشا تعالى نتكلم بالعربي اخ بيكلم اخوه 😅

ايه اللى ممكن يفيدك انت ك طالب طب و ناشر اوراق بحثية عد عندك ي سيدى 😅

اولا اخلص النية لله ان العلم اللى بتعمله ده ينفع الناس ف هتاخد حسنات و هتكون صدقة جارية ليك 💖

ثانيا البحث العلمى حلو جدا فى ال CV لو هتقدم فى اى حتة و حتى لو عايز تعمل اى معادلة

ثالث هتعمل connections كويسة مع ناس من معظم الدول العربية و كمان مع ناس من كل انحاء العالم و ده عن تجربة 😅

رابعا هيغير تفكيرك و هيخليك تفكر تفكير تحليلى فى كل حاجة حوليك

خامسا هيفتحلك ابواب كتير (مثلا لو حابب تسافر اى دولة برا و صعب عليك تعمل معادلة ممكن تروح على research position ) و ده العائد المادى بتاعه كويس 😅

سادسا و على ذكر ال money ممكن تمتهن سكة البحث العلمى (الحلال) و تاخد عائد مادى حلو 💖

بأختصار الريسيرش هيفتحلك فرص كبيرة و هيخلى ليك ميزة عن غيرك 🙏💖

⭐️ و من هنا تأتى اهمية تعلم البحث العلمى لينا ك طلاب طب و فى السلسه دى هنعرف ازاى نقرأ البحث و حتى ازى نعمله من اول خطوة الى النشر 🥰
استنونا فى بوستات جاية بإذن الله 🙏💖
#Research (1)

#ويحك_لا تفتحه✋️

عاوزك تتخيل معايا إن أنت ماشي في طريق🚶‍♂️ وعلى جانبيّ الطريق سور يمين وسور شمال ، وكل سور فيه أبواب ، وكل باب عليه ستار نازل عليه ، وآخر الطريق دا فيه نور وواحد بينادي عليك وبيقولك: " اوعى تفتح الباب.. اوعى "⚠️

شايف الصورة العبقرية دي الرسول -صلى الله عليه وسلم- صورهالنا في الحديث الصحيح.. قال رسول الله -صلّى الله عليه وسلَّم- :

"ضربَ اللهُ تعالى مثلًا صراطًا مستقيمًا ، وعلى جنْبَتَيِ الصراطِ سورانِ ، فيهما أبوابٌ مُفَتَّحَةُ ، وعلَى الأبوابِ ستورٌ مُرْخَاةٌ ، وعلى بابِ الصراطِ داعِ يقولُ : يا أيُّها الناسُ ! ادخلوا الصراطَ جميعًا ولَا تَتَعَوَّجوا ، وداعٍ يدعُو مِنْ فَوْقِ الصراطِ ، فإذا أرادَ الإِنسانُ أنْ يفتحَ شيئًا مِنْ تِلْكَ الأبْوابِ قال : وَيْحَكَ لا تَفْتَحْهُ ، فإِنَّكَ إِنْ تَفْتَحْهُ تَلِجْهُ ، فالصراطُ الإسلامُ ، والسُّورانِ حدودُ اللهِ ، والأبوابُ الْمُفَتَّحَةُ محارِمُ اللهِ تعالى ، وذلِكَ الدَّاعِي على رأسِ الصراطِ كتابُ اللهِ ، والداعي مِنْ فوقٍ واعظُ اللهِ في قلْبِ كُلِّ مسلِمٍ"

📌احذر من كلمة ( مرة واحدة بس )
-هغش مرة واحدة بس
-هبص بصة واحدة بس
-هكذب مرة واحدة بس
-هحط زينة محرمة مرة واحدة بس
-هتكلم مكالمة محرمة مرة واحدة بس
-هقعد مع صُحبة فاسدة مرة واحدة بس
وعندك أمثلة كتييييير

📌ف لما تلاقي شيطانك أو نفسك بيزينوا ليك الحرام في صورة ( مرة واحدة بس )

👈 افتكر " ويحك لا تَفْتَحْه ، إنَّك إنْ تفتحْه تَلِجْه "
👈 تمسّك بالقرآن الكريم، فهو الذي يدعوك لكل خير

حَفِظَنا اللهُ وإياكم من الفتن🤲🌱

حتى لا يُسرق منك رمضان

أحسب من أنفع الفيديوهات بخصوص السوشيال ميديا ورمضان

انشروه يا كرام واحتسبوا الأجر

https://youtu.be/PDeE01Uvw2Q?si=4N3Z-gQdfF--xedL

🚀 إزاي تبدأ أول Research ليك من الصفر؟ (خطوة بخطوة)

السلام عليكم ورحمة الله و بركاته اصدقاء و صحبة الدلتا لعلكم بخير ❤️
جمعة مباركة و رمضان كريم 🎊🥰

تعمل ايه لو حابب تبداء Research ي صديقى ، خلّيني ابسطلك الدنيا خطوة خطوة

بص مبدأيا لازم علشان يكون فيه بحث لازم الاول تبقى فيه مشكلة علشان يحلها البحث يعنى مثلا عايز تعرف مدى انتشار مرض معين فى محافظة المنصورة و لما دورت مش لقيت اى معلومات او مثلا علاقة الدواء الفولانى بالكانسر و ده اللى بنسميه ( Research gap) او (الفجوة البحثية) و دى ضرورية اى بحث لازم يُبنى على فجوة بحثية لاما مش هيكون ليه لازمة😔

بص عندك خيارين ك طالب انك تعملهم
اولا انك تجيب فجوة بحثية و تشتغل عليها و تعالى اقولك حاجات تسهلك الدنيا

اولا اختار مشكلة… مش عنوان
أكبر غلطة إنك تدور على عنوان شيك 😅

الصح إنك تسأل الاول هل فيه مشكلة بتتكرر قدامي او فيه حاجة مش واضحة في المجال ده طيب فيه نقطة محتاجة توضيح؟

طيب انا اعرف ازاى فيه مشكلة محتاجة بحث 😔؟
اقولك انه لازم تقرأ قبل ما تكتب يعنى مثلا انت بتفكر تعمل بحث عن مرضى ال Parkinson's disease

لازم تشوف الناس قالت إيه قبلك
اقرأ 5–10 أبحاث في نفس الموضوع(الامر نسبى)
علشان تعرف إيه اللي اتعمل و إيه اللي لسه محتاج يتعمل فين الفجوة البحثية (Research Gap)

اما الحل التانى بالنسبة لموضوع ال (Research gap) انك تستعين ب دكتور فى المجال اللى انت حابه يعنى مثلا انت حابب تعمل بحث فى تخصص النيورو و مش فى بالك اى حاجة و بحثت على قد م تقدر ف انت ممكن جدا تروح لدكتور نفس التخصص فى الجامعة و تكلمه انك لسه مبتدأ و حابب الشغل معاه و محتاج منه ي guide you و الامر يرجع للدكتور طبعا و لمهراتك فى التواصل و معظم الدكاترة مش بيرفضو بإذن الله

حاجة لازم تاخد بالك منها

ابدأ صغير

مش لازم أول بحث يبقى ضخم ابدأ بحاجة بسيطة قابلة للتنفيذ الهدف ي صديقى مش الكمال الهدف فى الاول تتعلّم(بمعنى تانى اشبط فى اى فرصة تيجى قدامك😂)

اشتغل مع فريق ي صديقى 👬
البحث مش شغل فردي غالبًا ، اشتغل مع حد عنده خبرة ده هيسهل عليك جدا جدا و اتعلم منه واسأل كتير

⭐️ و أهم نصيحة ي ريس 

ما تستناش تبقى جاهز 100٪ مفيش حد جاهز 100٪
ابدأ…وهتتعلم وإنت ماشي 👌
#Research (2)

السلام عليكم ورحمة الله و بركاته اصدقاء و صحبة الدلتا لعلكم بخير ❤️🙏

هنكمل كلامنا عن الموضوع الماضى و نمشى خطوة بخطوة
بعد م تحدد ال Research Gap بتاعتك هيواجهك عقبة تانى الا و هى اشتغل انهى نوع من الدراسات 😔
ي ترى اشتغل Primary research و لا Secondary طيب ايه الفرق بينهم اصلا و تقعد فى حيرة بقى 😔
انا هنا ي حبيب اخوك علشان افكلك الحيرة دى بإذن الله 🙏

تعالى نبداء بال Primary Research
ده ببساطة اللى انت بتجمع فيه بيانات لاول مرة فى المجال يعنى مثلا عايز تعرف (نسبة الأنيميا فى جامعة الدلتا) ف تسأل نفسك هل حد اشتغل على الكلام ده قبل كده لو لا يبقى البحث اللى هتعمله اسمه Primary Research
و من الامثلة على ال primary research
Cross-sectional study
Cohort study
Case-control study
Randomized clinical trial
و متقلقش هنشرح كل نوع بالتفاصيل المملة بإذن الله 😅

اما النوع التانى اسمه Secondary Research
و من اسمه انت بقى مش بتجمع بيانات جديدة لا انت بتحلل بيانات موجودة بالفعل يعنى مثلا لو فيه تجارب اولية بتقول ان Aspirin بيزود سيولة الدم و تجارب تانى بتقول هو اه بيزود سيولة الدم بس بنسبة قليلة و تجارب تالتة بتقول انه لا مش بيزود حاجة

فتيجى انت زى الشاطر بقى تمسك التجارب دى كلها و تعملها تحاليل و تطلع نتايج انه مثلا ي جماعة ال Aspirin بيزود سيولة الدم هنا بقى نقول على البحث انه Secondary Research
و من الامثلة على ال Secondary Research
Systematic Review
Meta-analysis
Literature Review
قولتلك اتقل و هفهمك كل حاجة متستعجلش هنشرح كل نوع على حدى 😅

طيب مين مهم اكتر فيهم بقى ؟👀
الاتنين مهمين واحد بيبني الطوب والتاني بيجمع الطوب ويشوف الصورة كاملة.

البحث العلمي مش نوع واحد فيه ناس بتنتج بيانات وفي ناس بتحللها وتطلع بأقوى استنتاج ممكن.

والعلم محتاج الاتنين 👌
#Research (3)

تعالى بقى فى ايجاز سريع نتكلم عن طريقة تقسيم تانية لل Research الا و هى التقسيم طبقا لقوة الدراسة زى الهرم كده كل م تطلع لفوق قوة الدراسة تبقى افضل

تعالى نبداء من تحت (اضعف حاجة) الا وهى رأى الخبير (Expert opinion) الغير مبنى على دراسات ، لا نقلل من شأنه و لاكن رأيه يحتمل الصواب و الخطأ

بعدين نطلع سلمه و نلاقى(Case Report) و معاه(Case Series) دول مفيدين لاكتشاف حالة جديدة و لاكن مش بتبين سبب الحالة او نتيجة الحالة

نطلع كمان سلمه هنلاقى ال (Case Control Study) دى بقى بنشوف المرض الموجود حاليا و نرجع بالزمن نشوف ايه كان سببه و هنضيف نوع تانى (Cross-Sectional Study) بنشوف هل فيه علاقة بين المرض و عامل معين فى اللحظة دى ؟

نطلع كمان سلمه هنلاقى(Cohort Study)نبدأ بعامل خطر ونتابع الناس قدام الزمن

السلمة اللى قبل الاخيرة الا و هى التجارب عشوائية المقارنة هى من أقوى الطرق لإثبات السببية وبيرمز لها (RCT)

اما السلمه الاخيرة و الاقوى هى الدراسة المنهجية (Systematic Review and Meta-analysis) وهنا بنجيب كل الدراسات ال RCT مثلا و نعملهم تحليل و نطلع نتايج منهم

و افتكر العلم درجات قوة فيها الضعيف و فيها القوى 🤝

صبَّحكم اللهُ بالخير يا صُحبة الدلتا🌱🤲

- ها عاملين اي في رمضان؟
أكيد أكييييد مش مراكمين مذاكرة عليكم 😉
ومقصرتوش شوية فالعبادة....

- مش هقولك مضى الثلث من رمضان ومهلاً رمضان والكلام دا.. لا خاااالص
👈 هبص على الجزء الحلوووو.. حتى لو قصرت ف لسه قدامك 20 صيام ب 20 دعوة مستجابة عند الإفطار ب 19 صلاة تراويح ب فرص كتيييير للعتق من النار ب 20 يوم لعمل detox لنفسك من الذنوب وأنك تطلع من رمضان نفسك خفيفة مُقبلة على الطاعة🕊

-وأقولك على سر.. من أهم أسباب الفتح في المذاكرة هي ترك الذنوب والمعاصي ، بتلاقي توفيق وبركة من ربنا غريبة 🌱

- رتِّب وقتك واعمل هدف في ال 10 أيام دول ثم هدف ل 10 الأواخر ، و تذكَّر..

"مَن تركَ نفسَه بلا جدول ، جَدولَته المُلهيات" 👌

وفَّقكم اللهُ وسدَّد خُطاكم🤲🕊

📌لو ضيّعت ليلة امبارح.. متضيعش الليلة دي✋️

باقي تقريباً ٣ ساعات على الفجر 🚶‍♂️
اعملها..
نصف ساعة قرآن
نصف ساعة ذِكر واستغفار
نصف ساعة دعاء بما ترجو
نصف ساعة سحور وتحضيره
وساعة صلاة قيام

قوم لعلك تصيب من رحمات الله ما لا تستطيع إدراكه في عام كامل🌱🕊

صحبة الدلتا الكريمة عيد فطر مبارك عليكم جميعا🎉

تقبل الله منا ومنكم صالح الأعمال🤍

افرحوا بالعيد عشان الميد بعد العيد على طول😁

صباح الخير

أنا عارف أنك نازل الجامعة مش طايق نفسك وعندك امتحانات وبتتجرع مرارة المذاكرة، ومخلص 2 كيلو بن وسط أبو عوف، ومطبق بقالك يومين ونومك في أسوأ حالاته .. فأنا جاي أقولك بصبر نفسي بإيه في أيام التعب دي، فتابع المنشور👇

●● بصبر نفسي بشكر نعمة الجامعة والانشغال والمذاكرة، ومع كل شعور بالتعب بفكر في زملاء الدراسة إللي كان نفسهم يدخلوا كلية أو ثانوي حتى ولكن طريقهم كان مختلف، بفكر في صديقي إللي دخل صنايع خوفا من مصاريف الثانوي، وصديقي التاني إللي هرب لتجارة خوفا من مذاكرة الثانوي، وبفكر في صديقي إللي كان نفسه يدخل نفس الكلية بتاعتي، وصديقي إللي دخل كلية مش حاببها ومالهاش مستقبل.

عشان كدا يا صحبة الدلتا، أيا كان وضعك مع المذاكرة وتعبك ⬅️ تذكر نعمة الله عليك، وأنه سبحانه وتعالى اصطفاك وأعطاك فرصة كان غيرك بيحلم بيها، ورزق أهلك المال يدخلوك كلية خاصة، وتذكر أن الانشغال والمذاكرة نعمة، وأن العلم رفعة، والجهل ظلام.

ولازم تشكر الله تعالى على تلك المنحة، وشوف وبص حولك كدا وشوف كم واحد كان يتمنى أنه يكون مكانك، وتخيل نفسك بلا كلية، أو في كلية مالهاش مستقبل كان حالك هيكون عامل إزاي في الحياة إللي بيقع فيها بيتفرم!

استعينوا بالله على تعب المذاكرة وجددوا النية في كل مرة، واسألوه تعالى العون والتوفيق والسداد في الاختبارات.
.

📍الصورة النمطية إللي عن نفسك أهم من صورة الآخرين عنك!

عارف يا صديقي الدلتاوي إن الكلام دا مهم جدا في فترة الامتحانات؟
●● هتقولي ازاي وأي علاقة صورتي النمطية بالامتحانات؟
⬅️ هقولك خلينا نعرف إيه الاول "الصورة النمطية"
• دي الصورة إللي بيكونها عقلك عن تصوراتك ورؤيتك في الحياة، يعني كل شيء في حياتك له صورة نمطية في دماغك هو مترجمها على هيئة صورة بالفعل عشان يقدر يحفظها أو يعملها coding والصورة النمطية بتكون لسلوك / فعل / كلام / فكرة / شعور / حركة / أي شيء الحياة، يعني مش مجرد الشيء إللي بتشوفه بس.

طيب أي علاقة دا بالامتحانات؟
= ببساطة إنك ضروري ضروري متاخدش صورتك النمطية من وضعك الحالي أو نظرة إللي حولك ليك.

💠 يعني لو أنت حاليا في فترة ضعف وتشتت وأنت عارف أنك دا مش أنت ومش عارف تذاكر كويس ولا تأدي في امتحانات ⬅️ إوعى تاخد الصورة دي عن نفسك ويكون شعورك وحياتك ودندنك إللي تفضل عايشه طول سنين دراستك، ومتخليش كلام زملائك يأثر على صورتك عن نفسك بعدم القدرة أو الفشل.

حافظ على اطمئنان قلبك وسلامك النفسي لأن كل فكرة سلبية هتكونها عن نفسك هتترسخ مع الوقت وهتبوظ عليك حاجات كتر في حياتك.

وفي نفس الوقت متنامش في الخط، أو يكون عندك صورة معكوسة عن نفسك ووضعك الحالي، أو أنك سوبر هيرو بس فيه مؤامرة كونية ضدك عاوزاك تفشل ومتذاكرش ولا تنجح!

شَخّص نفسك واعرف نفسك بصورتك الحقيقية، ومفيش مانع أنك يكون عندك إشكال في الإنتاجية والدراسة وتبحث له عن حل، مفيش حد بيتولد بيعرف يذاكر ويقفل المواد، ومفيش حد بيتولد في بؤه معلقة من دهب هياخد كل حاجة وهو نايم ومتكاسل ومبيحاولش يصلح من نفسه وحاله، فلازم لازم تعرف نفسك من نفسك أنت ومتاخدش عن نفسك صورة خطأ أو من كلام الناس.

🔻أنت لا تملك غير نفسك وبس، ومش هتعيش في الدنيا غير حياة واحدة وبس، فاختر لنفسك العيشة إللي فيها اطمئنان وراحة، ولا تعيش في ضيق وكدر وسخط دائما، وحط في بالك أنك لازم تتعلم إللي ناقصك وتكتسب مهارات جديدة وترفع الجهل عن نفسك وأنك ضعيف مش بطل وهمي زي مانت فاهم، ولازم تتقبل ضعفك ونقصك، وكل يوم تحاول تصلح عيوبك، وكل مرة تفشل تحاول تاني، بس إوعى تكون صورة غلط عن نفسك أو تصدق كلام الآخرين فيك!
.

السلام عليكم ورحمه الله وبركاته يا صُحبة الدلتا🌱
يوم عرفه قرب خلاص دقايق على يوم التلات بإذن الله 🎀
🌸🌸يوم عظيم وجليل يوم واحد معروف وبإذن الله أعمالنا فيه مقبوله
إنه يوم إكمال الدين وإتمام النعمة،   يوم عيد لأهل الموقف، يوم أقسم الله به . صيامه يكفر سنتين،  اليوم الذي أخذ الله فيه الميثاق على ذرية آدم، يوم مغفرة الذنوب والعتق من النار والمباهاة بأهل الموقف.

ففي الصحيحين عن عمر بن الخطاب رضي الله عنه أن رجلا من اليهود قال له: يا أمير المؤمنين، آية في كتابكم تقرؤونها لو علينا معشر اليهود نزلت لاتخذنا ذلك اليوم عيداً، قال: أي آية؟ قال: {اليوم أكملت لكم دينكم وأتممت عليكم نعمتي ورضيت لكم الإسلام دينا} (المائدة:3)، قال عمر : قد عرفنا ذلك اليوم والمكان الذي نزلت فيه على النبي صلى الله عليه وسلم وهو قائم بعرفة يوم الجمعة.



قال عليه الصلاة والسلام: ( ما من يوم أكثر من أن يعتق الله فيه عبدا من النار من يوم عرفة، وإنه ليدنو ثم يباهي بهم الملائكة فيقول ما أراد هؤلاء ) رواه مسلم ، وقال في حديث آخر: ( إن الله يباهي بأهل عرفات أهل السماء، فيقول لهم انظروا إلى عبادي جاؤوني شعثاً غبراً ) رواه أحمد .

🌸🌸هنعمل ايه في اليوم ده علشان نكسب اجر عظيم ؟؟
هنبدأ اليوم من اول قيام الليل علشان نكسب اجر كبير ونتحسر وننوى صيام يوم عرفه الا هيكفر ذنوب سنتين كاملين
ونصلي السنه والفجر ونقرأ اذكار الصباح ونقرأ قرآن لحد طلوع الشمس ونصلي ركعتين وبكده يكون اتكتبلك بإذن الله
اجر حجه وعمرة تامه ولحد قبل الظهر معانا نصلي صلاه الضحى و بعد كده نصلي الظهر والسنن قبل وبعد و بعد كده نصلي العصر ونقرأ اذكار المساء ولا ننسى الاذكار بعد كل صلاه و قراءه ورد من القرآن ونسمع خطبه الخطبه علشان نستشعر شعائر اليوم العظيم ده ولا ننسى الدعاء الكثير والكثير طوال اليوم لنفسنا ولكل الا بنحبهم ولا تنسوا اخواتنا في فلسطين من دعواتكم 🇵🇸🤲
استغلوا اليوم ده كويس اوي . ربنا بيدينا فرصه بعد رمضان نعيد حساباتنا تاني ونكفر عن ذنوبنا ونبدا من جديد
فلا تنسونا من دعواتكم أن ييسر لنا الله أمورنا ويوفقنا ويعيننا على رضاه اللهم امين 🤲