ماذا يفعل الإنسان عندما يجد نفسه تائه في مستنقع الأفكار!

سؤال عميق وجوابه في سطور هيكون ظلم للجواب وللسؤال، ولكن لعلها تكون مفاتيح تُساعد الباحث على معرفة الوِجّهةُ والطريق ..

- خليني أحلل الكلام وبعد كدا هنقول مقدمة ضرورية وحلول للسؤال إن شاء الله.

تائه = تشتت.
في مستنقع = سلبي / غير راضي عنه.
الأفكار = حلم وآمال الإنسان وتفكيره في حاضره أو مستقبله.

يعني المشكلة في الأساس = تشتت وكثرة تفكير في الحاضر إللي بنعيشه وفي المستقبل، ولو الوصف (مستنقع) دقيق ومقصود فالأفكار هذه أفكار سلبية على حسب الوصف.

■ تمام لحد هنا؟
~ تمام.

● إزاي نخرج بقى من مشكلة التشتت وكثرة التفكير في المستقبل؟ أو رؤية المستقبل بصورة سلبية؟
= شوف ياصديقي وعشان لا يَضِعُ وقتي ووقتك .. فلازم نقول مقدمة مهممممة جدااا، ألا وهي: "ثُلاثية التغيير الحقيقي".
📍يعني إيه ثُلاثية التغيير الحقيقي؟؟؟
= شوف ياسيدي، هسألك سؤال الأول: قولي فضلا كام مرة واجهتك مشكلة في حياتك أو سلوك من نفسك وحبيت تغيره ورحت استشارت حد أو شاهدت مادة أو قرأت كتاب عشان تحل مشكتلك دي؟
طيب هل حليت المشكلة فعلا؟ هل حدث تغيير حقيقي؟ هل غيرت السلوك إللي في نفسك دا؟ هل استمر التغيير ولا حصلك انتكاسة؟؟

~ في الغالب نفس السيناريو حصل معانا كلنا، تحصل مشكلة في حياتنا، ندور على حل، المشكلة تتحل حل مؤقت، نرجع تاني لنفس المشكلة وبتكون أكبر وأعظم.
= ودا ببساطة عشان بنحل المشكلة من على الأطراف والفروع، مش من الجُذُر، تخيل معايا شجرة في حديقة بيتكم، والشجرة دي عاملة مشاكل في الحديقة بتلم حشرات وذباب وناموس وقوارض، فأنت كل فترة تروح تقصقص من الشجرة وتقطف الفروع والأغصان وتسيب جذور الشجرة الأساسية! والمشكلة تروح وتخف أها، بس بعد شهر واتنين تلاقي المشكلة بترجع تاني، ورق جديد يطلع فروع جديدة تظهر غصون جديدة تشيل مشاكل عبارة عن نفس الذباب والناموس والقورض، فتقرر تعمل نفس العملية، وبالفعل ترجع ترتاح شوية ولكن برررضوووك بعد شهر واتنين نفسسس المشكلة ترجع! ودا طبيعي جدا لأنك محلتش المشكلة من الجذور :)

أغلبنا بيهتم بالفروع، لأن إزالتها سهل وبسيط، مش مُتعِب ولا مُؤلِم، محدش بيروح يحل المشكلة من جذورها، ينهيها خالص، يقضي عليها، لأن إزالة الجذور هيكون فيه تعب وألم وعلاجها كلنا بنهرب منه وبنخدَّرّ نفسنا بالحل المؤقت🫠

أنا عارف طولت عليكم ولكن المقدمة هي ٧٠% من جواب السؤال والله😊

فإزاااي بقى نُعالج المشكلة من الجُذُر؟؟
= ثُلاثية التغيير الحقيقي.

الثلاثية عبارة عن ٣ أعمدة رئيسية بنرفع عليها أي مشكلة:
🔻 العمود الأول = النية الصادقة.
~ بمعني .. هل عندي نية فعلا في التغيير؟ ولا أنا بهرب من حاجة لحاجة وخلاص؟
هل عندي صدق في قطع الجُذُور ولا هخدر نفسي بقطع الفروع بس؟
هل أنا جاد في حل مشكلة التشتت والتفكير؟؟ ولا أنا هفضل أفكر إزاي أحل مشكلة التفكير وأزود عنصر تشتت آخر؟
☆ النية الصادقة هل البداية والمركز والانطلاقة إللي هتساعدك فعلا في جواب سؤالك "ماذا يفعل الإنسان عندما يجد نفسه تائه في مستنقع الأفكار"
عشان كدا راجع نيتك ياصديقي، هل عندك نية صادقة في البحث عن جواب السؤال، ولا بتسأل هروبا من مذاكرة الفاينل👀

🔻 العمود الثاني = العلم الصحيح.
والعلم الصحيح مش فقط العلم بطرق الحل!
بل العلم الصحيح بالمشكلة وطريقة الحل، يعني تكون مشخص نفسك صح أنك عندك over thinking والمستقبل شاغل بالك، وكمان مُؤرِق يومك، يعني مايكونش تفكيرك سليم وعايش يومك عادي ومجرد ما فكرت في مشروح التخرج وحواراته تقول "أنا بعاني من أوفر ثينكينج!" لاء دا أنت عادي وطبيعي وخلص تفكير في البدلة ومشروع التخرج وروح كمل مذاكره :)

فلازم يكون عندك العلم الصحيح بالتشخيص قبل كل شيء (وممكن تستعين بأي موقع على النت يساعدك في تشخيص نفسك، وشات جي بي تي قد ينفع على فكرة!)

ثانيا العلم الصحيح بطرق العلاج، يعني أنا خلاص تأكدت وشخصت نفسي وبينطبق عليا الـ criteria .. فلازم أبحث عن مصادر صحيحة بعلم صحيح يساعدني في علاج مشكلتي من الجذور، يعني ماروحش لحد ملخص كتاب عن التشتت وأسمعه وأقول أنا بحل مشكلة التشتت! ولا أروح ليوتيوبر قال كلمتين عن التشتت وأقول بسسس دا عنده الحل! ولا أروح لواحد بتاع تنمية بشرية يضحك عليا بكلتمين وأظن في نفسي خلاص أنا تمام وحليت المشكلة!
= لازم تتعب في البحث وتسأل وقد تستعين بمتخصص كمان، عشان العلم الصحيح جزء من الحل الجذري.

🔻 ثالث عمود = العمل.
~ بعد ما نويت نية صادقة عن التغيير، وبعد ماشخصت نفسي صح بعلم صحيح، وبعد ما عرفت العلاج بالعلم الصحيح .. يِيِجِي أصعب شيء في كل دا .. ألا وهل العمل.
= لازم تطبق، تتحرك، تجرب، تحاول، تَعمل بالعلم الصحيح إللي تعلمته.

وجزء العمل بصراحة هو أصعب جزء، وأكثر جزء فيه ألم بيوجع الإنسان، وأكثر محور الناس مابتكملش فيه وتقف عنده.
ولكن لو عديت المحور دا بسلام واجتهدت وعملت .. صدقني ٨٠% من المشكلة اتحلت.

والكلام يطوووول وأعمدة التغيير كثيرة ولكن اختصارا يعني :)

أيوا يعني أعمل ءيه؟🥺
= بص، أولا هتنوي نية صادقة أنك عاوز تبطل تفكير في المستقبل أو تنوي أنك لازم تخرج من مستنقع الأفكار.

= ثانيا، تشخص نفسك صح، وتبحث عن حلول بعلم حقيقي.

= ثالثا، تَعمل بالعلم إللي تعلمته وتسمع الكلام.

🛑نيجي بقا للحلول بتاعة المشكلة نفسها🙄

أولا بعد مانويت، هات ورقة وقلم وكوب قهوة أو شاي وعلى المكتب بتاعك، هنعمل عملية اسمها "تخلية" يعني هَتُخلّي كل إللي جواك، يعني هتطلع كل إللي جواك في الورقة، بص عاوزك ترجع في الورقة :)
رَجّع كل أفكارك، وكل شيء بتفكر فيه، وكل صغيرة وكبيرة، وكل حدث مؤرق حياتك، وكل كلمة حرفيا عاوزك تسجلها في الورقة على هيئة نقاط وتسيب تحت كل نقطة فراغ (وهقولك ليه تحت)، مثلا:
- أنا شاغل دماغي وبالي ببدلة التخرج

- أنا شاغل بالي بكويز يوم السبت

- أنا شاغل بالي بأختام الفاميلي

- أنا شاغل بالي بدرجات الرمد

- أنا شاغل بالي بالتخصص

- أنا شاغل بالي بالسفر

- وإلخخخخ ....
وحاول تفسر أكثر في كل نقطة، أنا بكتب باختصار عشان توصلك الفكرة.

ثانيا، فرغنا الأفكار! والدنيا تمام؟
= هنعمل حاجة اسمعا "مُعَالَجة" يعني هنعالج الأفكار دي، تحت كل نقطة هتبدأ تحط قرار وحل للمشكلة دي، فمثلا:
- مشكلة بدلة التخرج
⬅️ هقوم بكرا الصبح هخلص حوار البدلة (وتكتب هتخلصه إزاي هتعمل إيه يعني)
وهكذا مع كل مشكلة وكل تفكير.

ثالثا، العمل = تقوم الصبح أول حاجة تعملها تخلص حوار البدلة، أو على حسب أنت كاتب إيه وحالل المشكلة بتاعتك إزاي.

وبس.

كل دا اختصارا والكلام يطول عشان هيدخل في الموضوع دا حاجات كتير زي وهم الكمال أو المثالية، حسن الظن بالله، التوكل على الله، ما أهدافي من الحياة، مَن أنا؟ ولماذا أنا في الحياة؟، إيه هدفي في المرحلة الحالية - في شهر ١٢ - في اليوم دا، هل أفكاري عن المستقبل صحيحة أصلا ولا لاء؟، هل تفكيري دا يصح عليه كلمة مستنقع ولا لا؟ وإلخخخخ

حقيقي موضوع كبير بس أنا اختصرت لك خلاصة الخلاصة والله، ونصيحة أخيرة👇

خد قرار مهما كان الأمر سيء، قلل مصادر التشتت والتفكير، اشغل نفسك في المذاكرة لمدة 5 دقايق بس (أها قول لنفسك مش هفكر لمدة 5 دقايق بس / مش هفكر إلا لما أخلص صفحة مذاكرة واحدة بس)، اقرأ القرآن براحة خالص بتدبر مش بتلاوة، إلعب رياضة جيم أو كورة أو انزل اجري، بطل تسمع حاجة (أها بطل تسمع أفلام مسلسلات بودكاستات حتى لو مفيدة، بطل بس واعمل ديتوكس أي مواد خارجية تدخل عقلك غير الدراسة حاليا)، جرب تسمع نفسك وبس، صلي بخشوع وبتدبر ومتقلبش الصلاة، اقرأ في أسماء الله وصفاته الودود والحليم والمُعين والرازق + أي اسم يقابلك، ياريت لو تعمل ديتوكس سوشيال ميديا، متنعزلش وشارك أهلك وأصحابك.

وأخيرا ممكن تبكي وأنت بتكتب أفكارك :)
وهيكون فيه ألم :)
وممكن متقدرش تكمل :)
بس حاول وكمل وتذكر أنك نويت نية صادقة في البداية :)

فيه حاجة كمان بعد التخلية والمُعالجة واسمها "التحلية" ولكن مش وقتها عشان مطولش عليك :)

يارب حد يقرأ الكلام دا وينتفع به ويدعيلي.
.

تعلّم كيف تتعلّم!

لطالما سمعنا عن الدروس الشهيرة تحت عنوان «تعلّم كيف تتعلّم»، لكنّي أودّ الحديث عن جانب آخر من هذا المفهوم، وهو: تعلّم كيف تتعلّم ممّن سبقوك في الطريق.

فكلّما ازددت علمًا واطّلاعًا، أدركت حجم ما تجهله، وكأنّ دائرة جهل الإنسان تتّسع كلّما نما وعيه! وهنا تظهر أهمية وجود المرشد / المعلّم / المربّي / الشيخ؛ ذاك الذي يأخذ بيدك، ويختصر عليك سنوات من البحث والتعب والتجرِبة. فإذا وُفّقت في العثور عليه، فتعلّم منه، وأصغِ أكثر ممّا تتكلّم، واستشره، وانهل من علمه بصدق، ولا تدع صحبتك له تمرّ دون فائدة حقيقية.

وقد كان هذا المعنى جليًّا في حياة سلفنا الصالح -رحمهم الله- كان الواحد منهم يسافر الأيام والشهور ليلزم شيخًا يتعلّم منه ويتهذّب على يده، ولا يفارقه حتى يحصّل من علمه ما يكفيه، ثم ينتقل إلى غيره.

أما اليوم، فقد غلبت المظاهر على المقاصد، فصار بعض الناس يتعاظم بعلمه السطحي، ويظنّ أنه بلغ منزلة العلماء، وما بلغ إلا “قشور القشور”!
ومع انتشار ما يُعرف بـ"العلم الشعبي" أو البوب ساينس، بات كثيرون يظنون أنفسهم من أهل الفهم، وهم لا يحسنون أساسيات فقه الطهرة ولا أدوات التفكير السليم!

وصحيح أن وسائل التواصل سهّلت الوصول إلى المعرفة، إلا أنها في المقابل فتحت الباب واسعًا أمام الجهل المقنّع، وأبرزت من لا علم لهم حتى صاروا في أعين الناس مراجعَ وقدوات.

لهذا، تذكّر دائمًا: تعلّم كيف تتعلّم من أهل العلم الحقيقي، من أصحاب الأثر النافع، من الصادقين الذين يريدون لك الخير حقًا.

والله المستعان.

.

ولا يظنّن القارئ أنني أقصد علمًا بعينه — كالعلم الشرعي مثلًا — بل حديثي يشمل جميع مجالات الحياة؛ فكل طريقٍ تحتاج فيه أن تُصاحب من سبقوك لتتعلّم منهم، حتى وإن اختلفت معهم في الرأي أو الاتجاه.

وأخصّ بالذكر في هذه الفقرة علم الطب كمثال، فكم من طبيب حديث التخرّج اكتفى بما تعلّمه في الجامعة وظنّ أنه بلغ الغاية، وهو في الحقيقة لا يزال في أول الطريق! فالطب ليس علمًا نظريًا فحسب، بل مهنة لا تزدهر إلا بالممارسة العملية، والملازمة الطويلة لأصحاب الخبرة، والنهل من تجاربهم الواقعية في التعامل مع الحالات المختلفة.

📍وخلاصة القول يا صديقي:

«تعلّم كيف تتعلّم ممّن سبقوك في الطريق»

> مهارة إن أتقنتها، ستصنع في حياتك فرقًا حقيقيًا ونقلة نوعية بإذن الله تعالى.
.
.

ومن الأمثلة الرائعة على ذلك:👇
قناة الدكتور محمد الألفي — أخصائي واستشاري باطنة مصري بارز — والتي تهتم بنقل خبرته الطبية الغنية من خلال لقاءاته مع الطلاب والأطباء الشباب في علم الباطنة, ودعوة الأطباء والطلاب لحضور مروره في مستشفى السيد جلال بطنطا.
🔗 اضغط هنا للانضمام

فإن سنحت لك فرصة حضور لقاءاته أو متابعته، لا تتردّد لحظة؛ فهذه هي الملازمة الحقيقية لمن سبقك في الطريق!

وكلّما عثرنا على صفحات أو قنوات لأطباء ذوي خبرة يسمحون للطلاب بالاستفادة من تجاربهم، سننشرها في القناة بإذن الله, بحيث يكون هناك تغطية في الجانب الطبي بحول الله وعونه وتوفيقه.
.

- هل مرّت عليك أيام طويلة ومهامك كما هي على الورق لا تتحول إلى إنجاز حقيقي؟
- كم مرة بدأت بحماس ثم هبط الدافع في منتصف الطريق وتوقفت؟
- وكم مرة تذوقت شعور الرضا بعد إتمام مهمة وتمنيت لو يصبح هذا الإحساس عادة يومية لا استثناء عابرًا؟

📍كل هذا نحاول في علاجه سويا بإذن الله تعالى في قناة منجز✅👌🏻

🔻ما هي قناة مُنجِز؟
• قناة متخصصة في تنظيم جلسات بث مباشر للدراسة والعمل، تعتمد على المتابعة الجماعية والانضباط بالوقت.
• مساحة افتراضية تجمع طلابًا ومنجزين من تخصصات مختلفة، يلتزمون سويًا بإنهاء مهام محددة في كل جلسة.
• صوتيات عن الإنجاز وفعليات مختلفة وتحديات.

🔻ماذا نفعل في مُنجِز؟
• نتفق يوميًا (أو في الأيام المعلنة) على وقت واضح للإنجاز في اليوم أو الليل، ثم نفتح بثًا مباشرًا صوتي فقط ونبدأ الإنجاز سويا.
• نستخدم مؤقّتًا مشتركًا لمدة الجلسة يتم ضبطه في بث القناة، وبين كل جلستين نأخذ استراحة قصيرة، ومع الوقت نتدرّج في زيادة مدة التركيز والإنجاز.

⛔️ انضم الآن إن كنت تسعى لأن يكون الإنجاز جزءًا من يومك لا حدثًا نادرًا!
🎁 انضم الآن فالدعوة مجانية!
🔗 رابط القناة: منجز.
.

🚨كلمة عن عصيان الرب عز وجل في وقت ظهور نعمه علينا

مبدأيا مبارك لكل شباب s9 على انتهاء الجزء الأول من مشروع التخرج، وهانت الحمد لله معتش إلا القليل جدا.

بس عاوزك تتخيل معي يا صديقي أنه فيه شاب أعزب، غلبان، فقير، معدوم، محتاج يدخل جامعة عشان يدرس ويطلع يشتغل، ومحتاج يشتري بدلة محترمة عشان يكون شكله حلو ويفرح وسط زمايله في التخرج، ومحتاج يتزوج عشان ينفذ عبودية الله تعالى ويعف نفسه ويلاقي حد يأنس به في وقت البرد دا :)

وأنت إنسان غني جدا، معاك مال لا ينتهي. وأنت بطبعك إنسان كريم، بتحب تساعد الناس بدون مقابل، فقمت ساعدت الشاب دا.
= أعطيته المال يدخل جامعة خاصة، آلاف الشباب كانوا نفسهم يكونوا مكانه، وأعطيته المال يشتري بدلة يقدم بيها مشروع التخرج، وأعطيته المال يتزوج ويأنس بالكتكوتة بتاعته.

تخيل معي تاني المفروض الشاب دا يشكرك إزاي؟

تخيلت؟
= قام الشاب دا شتمك مع أول محطة ظهر عليه النضافة والنجاح والنعمة والفلوس إللى أنت
دفعتهاله كل سنيين الطب دي.
مع أول مناقشة مشروع تخرج ولما خلاص حسه أنه معتش محتاج مالك شتمك وسبك، وأنت رايح معاه تحضر تقديمه لمشروع التخرج وفرحان بيه وشايفه؛ يشتمك ويلعنك ويخلي الناس كمان تشتمك!

تخيلت؟
=هتعمل فيه إيه وقتها؟ هتزعل منه؟ هتدايق؟ هتتصرف معاه إزاي؟

دا بظبط إللى بنعمله مع ربنا سبحانه وتعالى ولله المثل الأعلى، وتعالى ربنا كل كل تشبيه.
= ربنا رزق أهلك بالمال الكافي لدخولك جامعة خاصة آلاف الطلاب إللي مجابوش مجموع كانوا نفسهم يكونوا مكانك، وطول الأربع سنين بتدعيه وترجوه يوفقك في كل اختبار، وربنا هو إللى رزقك تشتري البدلة رغم إن فيه زمايلك تانيين مكنش عندهم مقدرة لشراء بدلة، وربنا إللي وفقك توصل وتخلص الجزء الأول من مشروع التخرج، فتيجي لما أثر نعمة الله وكرم الله وفضل الله يظهر عليك تعصيه بنشر صورك وكلها أغاني؟

يعني دا جزاء شكر النعمة؟
دا بدل ماتقوله شكرا يارب وتحمده على توفيقه لك كل السنوات الماضية وتحمده على نعمه عليك تقوم تعصيه؟ وتسمع الناس كلها أغاني؟ أهكذا يكون شكر النعمة؟

دا لو إنسان أحسن إليك مرة بتفضل شايل له الجميل، ما بالك رب العزة؟ إللي أنعم عليك حتى وصلت لمشروع التخرج؟

مابقولش منفرحش ولا ننشر صورنا، بس مانعصيش ربنا، لو بتسمع أغاني متسمعش الناس أغاني على صورك، ماتجهرش بمعصية الله وتشيل ذنب ناس تانية.

الموضوع مش بسيط والله يا شباب، دا جهر بالمعصية في أكثر وقت محتاجين نشكر فيه ربنا أنه وفقنا للوصول لمشروع التخرج.

لو لازم تنزل صوت على صورك = نزل أناشيد بتاعة حفلات التخرج بتاعة الأزهر، كلها كلمات رائعة والله وبدون ارتكاب معصية وجهر بها.
.

قال رسول الله صلى الله عليه وسلم:👇

إنَّ الحلالَ بيِّنٌ وإنَّ الحرامَ بيِّنٌ وبينهما أمورٌ مُشتبِهاتٌ لا يعلمهنَّ كثيرٌ من الناس فمنِ اتَّقى الشُّبُهاتِ استبرأ لدِينِه وعِرضِه ، ومن وقع في الشُّبهاتِ وقع في الحرامِ ، كالراعي يرعى حول الحِمى يوشكُ أن يرتعَ فيه ، ألا وإنَّ لكلِّ ملكٍ حمًى ، ألا وإنَّ حمى اللهِ محارمُه ، ألا وإنَّ في الجسدِ مُضغةً إذا صلُحتْ صلُح الجسدُ كلُّه وإذا فسدتْ فسد الجسدُ كلُّه ألا وهي القلبُ

خلاصة حكم المحدث : [اشترط في المقدمة أنه] صحيح على طريقة بعض أهل الحديث.
.

موسم الامتحانات يختبر سويتك النفسية!

موسم الامتحانات ليس مجرد سباقٍ في الحفظ والفهم، بل هو اختبار نفسي وعقائدي كبير جدا.
فتبدأ مراحله النفسية مع لحظة الاستعداد والتهيؤ، مرورًا بمواجهة الضغط والقلق، وانتهاءً بما بعد الامتحان، حين يبدأ الإنسان بمحاسبة نفسه وتأمل تقصيره أو أخطائه وجلد الذات :)

🔻ولكن في خضم هذه الرحلة، يبرز اختبارٌ خفيّ أعظم أثرًا من ورقة الأسئلة نفسها، اختبارٌ لا تُقاس نتيجته بالدرجات بل بنقاء السريرة وصدق النية.

والذي يقيس السوية النفسية ونقاء السريرة = حين تمتلك تدريبات أو ملفات أو اختبارات مهمة جدا وتعلم أن زملاءك بحاجة إليها، فتقع في مفترق طريقين: أتعين غيرك وتنفعهم بما عندك، أم تحتفظ بما لديك لنفسك خشية المنافسة أو خسارة التميز؟ وهنا تكون المواجهة الحقيقية بينك وبين نفسك!

وأما الاختبار العقائدي = يكون في بعض النفوس التي تظن أن مشاركة الخير تُنقص من رزقها!، ولا تعلم أن ما قدّره الله لكل نفس لن يخطئها، وما لم يقدّره لن يصيبها، فقال النبي ﷺ لابن عباس رضي الله عنهما:

"واعلم أن ما أصابك لم يكن ليُخطئك، وما أخطأك لم يكن ليُصيبك."

(رواه الترمذي)

ولا يعلم صاحبنا أن الله تعالى كتب قدر كل عبد وأن درجته مكتوبة وموضوعة سواء شارك النفع مع الاخرين أم لا، فقال ﷺ

إنَّ اللَّهَ قدَّرَ مقاديرَ الخلائقِ قبلَ أن يخلقَ السَّمواتِ والأرضَ بخمسينَ ألفَ سنةٍ وَكانَ عرشُهُ على الماءِ

(رواه مسلم)

ولا يعلم المسكين أن الله كتب مقادير العباد كلهم كما كتب مقاديره، فلن يزداد أحدا درجات بسبب ما ينشره، وكذلك لن ينقصهم شيء!

⚠️ فاطمئن وطب نفسا يا صديقي! فلن يأخذ أحد من رزقك، ولن تنقص درجتك بسبب إحسانك، فإن الله عادل لا يظلم أحدًا، بل إن عطاءك وإحسانك قد يكونان باب التوفيق والتيسير لك.

ولعل تلك المشاركة التي تقدمها — خالصة النية صادقة القصد — تكون سببًا لبركةٍ تُصيب قلبك، وفتحٍ في علمك، وتوفيقٍ في طريقك. وقد قال رسول الله ﷺ:

خيرُ الناسِ أنفعُهم للناس

(رواه الطبراني)

فما أكرم أن تجعل موسم الامتحانات موسمًا لتهذيب النفس، وتجديد النية، وتزكية الطبع بمشاركة النفع قبل أن يكون موسمًا للعطاء الذهني والمجهود العقلي.
.

📢 الطريق إلى الامتياز في الدلتا

إن كنت تبحث عن الامتياز والتفوق فهناك أسرار لابد لك معرفتها, لذا معنا في أمسية يوم الجمعة الساعة 7.30 مساء أحد أعمدة جامعة الدلتا ودكتورنا الحبيب صديق الطلاب دكتور أحمد منير, ليكشف لنا أسرار طريق الامتياز في الدلتا👌

🛑 محاور اللقاء:
- إزاي أفهم دراسة الطب في الدلتا؟
- إزاي أجيب A+ في كل المواد؟
- إزاي أرفع ال GPA ؟؟
- إزاي أتعافى من الفشل في أول ترم في الجامعة؟

🔹 الموعد:
الجمعة القادمة 5 فبراير

🔹الساعة:
7.30 بعد صلاة العشاء.

🔹 المكان:
قناة صحبة الدلتا على التليجرام.
= رابط القناة https://t.me/DeltaFriendss

.

أهلا بطلاب العلم الأكارم أخواتنا الجدد إللي دخلوا القناة، إحنا صحبة الدلتا هنكون معاكم دايما طول مسيرتكم في الدلتا، هتلاقونا بندعمكم ونوجهكم ونشجعكم وناخد بأيدييكم في أمور الدين والدنيا، عشان تكون طبيب على علم وبصيرة، وهنساعدكم في أمور المذاكرة وبعض الشروحات، فأبشروا بكل الخير👌

وبنفكركم عندنا لقاء صوتي بكرا (الجمعة) مع دكتور أحمد منير هيكون مفيد جدا، لازم تحضروه وتعرفوا باقي زمايلكم يحضروه

ودي فرصة كويسة جدا لو عندكم أسئلة حابين تسألهوا للدكتور، لأنه طول السنة وقته مشغول، فدي استضافة مهمة جدا محدش يفوتها👌
.

السلام عليكم

🚨هنفتح البث ياشباب ونتأكد من الصوت لحد ما الدكتور يدخل

🎙أسرار دراسة الطب مع دكتور أحمد منير

🔻محاور اللقاء:
- إزاي أفهم دراسة الطب في الدلتا؟
- إزاي أجيب +A في كل طريقة؟
- إزاي أرفع الـ GPA ؟؟
- هل فيه أمل أتخرج بامتياز لو شلت مادة في أول سنة؟
- إزاي أتعافى من أول ترم؟
- أفضل طريقة للمذاكرة؟
- طريقة حساب الـ GPA بتاعي ؟؟
- الأسئلة.

صحبة الدلتا
.

.
بمناسبة الكلام عن المذاكرة وطرق المذاكرة، فدي طريقة من اجتهادي وتحصيل خبرة سنوات في المذاكرة والانتاجية والعادات، عمرك ماهتشوفها في مكان تاني، اتفرج على الفيديوهات بورقة وقلم وطبق الطريقة بظبط واكتب التعليمات إللي قولتلك عليها في ورقة وعلقها أدامك، وبإذن الله في خلال سنة هتذكر ٦ ساعات وأكثر يوميا بتوفيق الله لك

●● الفيديو الأول👇
https://youtu.be/4iYImk2yXNE?si=WQkX4THzT0aKgTM_

●● الفيديو الثاني👇
https://youtu.be/xBc56AoyBRE?si=ximk6JLCWWrcEBPX

اسمع الحلقتين بورقة وقلم وعلقها أدامك، وهنا قناتي الخاصة بنزل عليها الحلقات الجديدة وخواطر خاصة عن الطب والدراسة والعادات والانتاجية والسوكيات
https://t.me/Arrchiveyy

وقريبا بإذن الله هنزلكم فيديو عن أهم الحاجات إللي اتكلمنا فيها أنا ودكتور أحمد منير وحلقة مهمة جدا للطلاب والأهالي عن "لو الطالب شال مادة أو تقديره وحش يتعامل إزاي بعد كدا وأهله يتعاملوا معاه إزاي"
.

صبَّحكم الله بالخير يا صُحبة الدلتا🤲🌱

📌ها بدأتوا المحاضرات ولا لسه في مود الإجازة؟؟

= بصراحة ملحقناش نفرح بالإجازة ومش قادرين ندخل على محاضرات وسكاشن وأسينمنتات وامتحانات.

👈اممم طيب من باب "﴿وَذَكِّرْ فَإِنَّ الذِّكْرَى تَنفَعُ الْمُؤْمِنِينَ﴾

قال رسولُ الله -صلَّى اللهُ عليه وسلَّم- : "الْمُؤْمِنُ القَوِيُّ خَيْرٌ وَأَحَبُّ إلى اللهِ مِنَ المُؤْمِنِ الضَّعِيفِ، وفي كُلٍّ خَيْرٌ. احْرِصْ علَى ما يَنْفَعُكَ، وَاسْتَعِنْ باللَّهِ وَلَا تَعْجِزْ، وإنْ أَصَابَكَ شَيءٌ، فلا تَقُلْ: لو أَنِّي فَعَلْتُ كَذَا كانَ كَذَا وَكَذَا، وَلَكِنْ قُلْ: قَدَّرُ اللهُ وَما شَاءَ فَعَلَ؛ فإنَّ (لو) تَفْتَحُ عَمَلَ الشَّيْطَانِ."

أعانكم اللهُ وسدَّد خُطاكم🤲🕊