🍉ᴍʏ ᴍɪɴᴅ

Oxrgi paytlarda juda "ommalashib" borayotgan kitoblar haqida ikki og'iz: Ommaviy axborot vositalari orqali Booknomy, Tedbook va shu kabi kitoblar bilan qisqa fursatda chet tillarini o'rgatish va'da qilinayotgan reklamalarni ko'rsam ensam qotadi to'g'risi.…

Booknomy bo‘yicha turli shov-shuvlar sababli men ham ingliz tili mutahassisi sifatida o‘z fikrlarimni bildirishni lozim topdim:

1. Metod haqida

Kitoblarda innovasion yangi metod deb targ‘ib qilingan bo‘lsada bu faqat tinglashga asoslangan metod 1950 yillarda AQSHda harbiylarni o‘qitish maqsadida qo‘llanilgan. Bu metodning asosidagi bixeyvorizm, ya’ni inson ongli mavjudot emas, tashqi ta’sir yordamida avtomatik ravishda boshqarish mumkin bo‘lgan (Pavlov kuchuklarda o‘tkazgan eksperimentlar misolida) ob’yekt sifatida qaratilgan g‘oyalar psixologiya va pedagogikada keng tanqidga uchragan. Audiolingval metod ingliz tili o‘qitish metodikasi nuqtai nazaridan ham samarasi sust hisoblanadi. Hech kim hali faqat (va faqat) tinglab, bir kuni chet tilida ravon gapirib yeki yozishni o‘rgangan emas. Hozirgi kunda chet tili o‘rganishda kommunikativ metod – barcha nutq va til aspektlarini (gapirish, tinglash, o‘qish, yozish, so‘z boyligi, grammatika, fonologiya) birgalikda o‘rganilishi muhim hisoblanadi. Ona tilini tinglab o‘rganamiz, ingliz tilini ham shunday o‘rgansak bo‘ladi, deyish noto‘g‘ri. Yosh bolaning ona tilini o‘rganishi bilan kattalarning chet tilini o‘rganishlari orasida katta tafovut bor va ularni taqqoslab bo‘lmaydi. Men yashaydigan Kanadada ham 30 yillardan ortiq shu yerda yashab, muntazam ingliz tilini tinglab kelayotgan bo‘lsada, ingliz tilida gapira olmaydigan, yoza olmaydigan immigrantlar talaygina.

2. Kitobdagi xatolar

Kitobda juda ko‘p grammatik, leksik, stilistik, fonetik (talaffuzda) xatolar nafaqat ingliz tilida, hatto o‘zbek tilidagi tarjimasida ham mavjud. Xato o‘rganilgan so‘zlarni kelajakda nutqda tuzatish amri mahol. Bunday hodisa tilshunoslikda “qotib qolgan xatolar” deyiladi, va ularni to‘g‘rilash juda qiyin.

3. Sun’iy matnlar

Matnlar real hayotdan olinmagan, noautentik, sun’iy tuzilgan. Bunday matnlarni o‘quvchi hayotida ingliz tilida muloqotga kirishganda qo‘llay olmaydi.

4. Misli ko‘rilmagan narh

Nufuzli Oksford, Longmen, Makmillan kabi xalqaro nashriyotlari tomonidan chop etiladigan ingliz tilini o‘qitish bo‘yicha sifatli, rangli, bexato, zamonaviy metodlarga asoslangan, xalqaro approbasiyadan o‘tkazilgan kitoblari 20-30 AQSH dollari atrofida turadi. Bu kitobning bunday yuqori narh qo‘yilishi – asossiz.

©Nodira Isamuxamedova, filologiya fanlari nomzodi. O‘zbekiston va Kanadada ingliz tilini o‘qitish bo‘yicha 20 yildan ortiq tajribaga ega mutaxassis.

@menimcha_shu

183 viewsM :), 06:29