بالصدفه عرفت ان جامعه الملك سعود فيها بكالوريوس للغه اليابانيه وفيها اختبار JLPT حق اتقان اللغه والله شي

جاني حافز اني اشد حيلي باللغه ههههههه اتخيل دام اقدر اختبر بالسعوديه وبجامعه مستوحات من اسمي اكيد بيدفوني دف ويعطوني درجه تكون تقفيله

لكن مو الان بخليي مواضيع اختبار اللغه شوي قدام قدام مو وقته بس بفر واخذلي كم معلومه وخلفيه عن أليه الاختبارات

والي عنده خلفيه بخصوص جامعه الملك سعود يتحفنا عادي مو مشكله لو انك تعرف شخص اختبر نفسه باللغه الانجليزيه عادي علمني تجربته

وبالتوفيق لي ولكم جميعا

سلموليييي

سرد يداً جمييل تفداه صنادح بوتين

لكن لعلك نسيت شغله مهمه والي هي الحروف الجذابه هذي مهمه وخصوصا شخص متعود على الانجليزي وحول فجأه روسي بيخبص فيها واجد

الحروف الجذابه..

B.H.P.X.C.y

الحروف هذي كتابتها بالروسي مثل الانجليزي او اللاتيني بس نطقها يختلف

B = V
H = N
P = R
X = Kh
C = S
y = U

اول مبارح جربت الحركه ولين الحين مدري هل ارجحها ذكيه او غبيه لازم انطيها وقتها

العموم وقع الاختيار على موضوع الموجات

مدري ليه اخترته لكن فتحت كتاب فاينمان ولقيت اول 16 صفحه يتكلم فيها عن الموجات فا يس تعمقت بالموضوع من 3 الكتب وكل كتاب كتبت حسب الي فهمته منه مع كم مثال واحس خلاص الموجات فهمتها فهم لو تسئلني شسمك بقول موجات

كتاب (Conceptual Physics)

1. البندول ومنحنى الجيب صفحه 358

لما تمسك البندول وتسحبه وتخليه يروح ويرد. هو قاعد يسوي حركه نسميها ( حركه توافقيه بسيطه ) تخيل لو ربطنا بهالبندول ريشه ورسمنا حركته على الورق راح يطلع عندنا شكل موجه مرتبه اسمها بالفيزياء ( Sine Curve ) او منحنى جيبي. يعني الموجه هي مجرد حركه روحه ورده بس مرسومه


2. شلون نوصف الموجه ؟ صفحه 359

الموجه لها مواصفات لازم تعرفها

1- القمه ( Crest ) هي اعلى نقطه توصل لها الموجه فوق يعني التوب التوب 🔝


2- القاع ( Trougt ) اقل نقطه تحت يعني صج صج القاع

3- السعه ( Amplitude ) اهي مسافه من النص ليي فوق يعني شكثر هالموجه غويه او عاليه

4- الطول الموجي ( Wavelength ) هو مسافه بين قمه والقمه الي بعدها


3. التردد صفحه 359

لما التردد يعني هالموجه هذي كم مره اهتزت بالثانيه الوحده ونقسمها بوحده هرتز ( Hz ) يعني لو الموجه سوت 10 اهتزازات بثانيه وحده نقول ترددها 10 هرتز ( Hz ) كل مازاد التردد زادت السرعه والنشاط بالموجه

4. شلون تمشي الموجه ؟ صفحه 360

الموجه تنقل الطاقه بس ماتنقل الماده

مثال لو قطيت صخره على الماي بتشوف دوائر تمشي. هالدوائر هذي هي طاقه الصخره قاعده تنتقل بس جزييات الماي نفسها تروح فوق وتحت بمكانها ماتمشي معك يعني الطاقه تتغير والماده ثابته

كتاب ( Fundamentals of Physics )

1. طاقه الموجه وليش بعض الاصوات اغوى من غيرها صفحه 423

تخيل عندك سبيكر وقاعد تعلي الصوت. الفيزياء تقول لنا قدره الموجه يعني شكثر هي غويه او ضعيفه تعتمد على حاجتين اساسيه

1- مربع السعه. يعني كل مازدت ارتفاع الموجه الطاقه تزيد بشكل مضاعف

2- مربع التردد. يعني كل ماكانت الموجه سريعه ومتكرره اكثر الطاقه تزيد بشكل جنوني

مثال يوم تمر يمك سياره سبورت او سيكل وتسمع صوت المحرك يرج الارض وانت واقف بعيد هذا الصوت العالي اللي قاعد يهز قلبك الضعيف هو طاقه صوتيه عاليه ناتجه عن سعه كبيره للموجه لأن المحرك قاعد يحرك الهواء بغووه وعنف مو بس مجرد همس


2. الرنين.. وسر الموسيقى صفحه 433

الحين ليش العود السوري او الجيتار يطلعن صوت حلو ؟؟ السر بالرنين لما الموجه تصدم بطرف وتعكس داخل الموجه وتكون لنا موجات مستقره

شنو يعني ؟ مدري مدري الي اعرفه العود السوري عليه نغمه صوتيه شي ثاني والسبب يكون بالرنين


لكن مثلا عندك ديرفه اذا دفيتها بنفس التردد الي هي تحبه راح ترتفع اكثر واكثر هذه هو بالضبط الرنين اي حاجه بالكون له تردد معين يحبه اذا عطيته اياه راح يتفاعل معاه بغووه ويعطيك الدنيا ومافيها


3. مصادر الصوت صفحه 457

الصوت الي نسمعه من الالات الموسيقيه هو هواا مهتز او اوتار مهتزه

1- الاوتار : مثل الجيتار كل ماشديت الوتر اكثر او قصرته يتغير التردد وتطلع نغمه ثانيه

2- انابيب الهوا: الانبوب المفتوح من الطرفين يعطي نغمات تختلف عن الانبوب المسكر من طرف واحد

مثلا لو عندك قلاص ماي فاضي وقعدت تنفخ بوه راح تسمع صوت طنين او نغمه معنيه الي تسمعه بالضبط هو رنين الهواا .. وعندك بعد طاولات المدارس لو حطيت راسك فيها تنام بين الحصص بتسمع صوت مثل الشوشره هذه هو بعد رنين هوااا

كتاب فاينمان ( The Feynman) اعقد كتاب مر تبا يشرح الموجات من منظور ميكانيكا الكم..

1. داله الموجه والسعه.. صفحه 1-16

الحين مثلا اذا تبي توصف السياره تقول شسمها ومكانها ولونها وسرعتها كم بس بمكانيكا الكم يختلف الوضع انت توصف الذرات والجسيمات الصغيره ما توصف هيكل السياره خارجياً هذي الفكره الي فهمتها ومدري صراحه اذا الفكره صح او غلط بس الوكاد ميكانيكا الكم تركز على الذرات والجسيمات

1- داله الموجه ( Wave Function ) :

تقدر فيها توصف الجسيم مو بس تعطيك مكانه لا تعطيك حتى احتماليه وجوده كم بهالمكان.

2- اعتماد السعه على الموقع :

تخيل الموجه كأنها قيمه احتمالات السعه مالت هالموجه هي الي تحدد وتعلمنا الجسيم بنسبه كبيره موجود هنيي وبنسبه قليله موجود هناك. يعني اختصار العلم هنيي مايعطيك جواب صحيح واكيد لا بس يعطيك اغوى الاحتمالات

2. تداخل السعات صفحه 2

هذي النقطه هي الي تدوخ بمكانيكا الكم. الجسيمات مثل الالكترونات مو بس كرات صغيره هي تتصرف كأمواج

1- التداخل. تذكر لما ترمي حجرين بالماي وتتداخل الموجات ؟ الالكترونات تسوي نفس الشي السعات مالتهم تتداخل يا تغوي بعض وتصير عمليه اسمها ( تتداخل بناء ) او تلغي بعض وتصير ( تتداخل هدام )

2- الارقام الموجيه .
كل جسيم عنده تردد ورقم موجي يميزه لما نجمع هالسعات مع بعض تطلع لنا ظواهر غريبه وحلوه هي الي تخلي الكمبيوترات والترانزستورات تشتغل بهالطريقه الي نشوفها اليوم

مثلا عندك النوتات الموسيقى .. لما تعزف نوتتين مع بعض يعني يتتداخلون بيطلع لك نغمه جديده هذه بالضبط الي يصير بمكانيكا الكم

طرا على بالي موضوع بس مو وقته خلوه شوي قدام بخصوص الموجات بيعجبكم اذا مهتمين بالامن السيبراني او التحقيق الجنائي والبرمجه

بس المواضيع الغويه مثل هذي تحتاج شرح غويي فا شوي قدام قدام

يا جماعه الخير فيه اخ عزيز علي يمر بظرف صحي صعب . ادعوا له بالشفاء الله يجزاكم خير 🤍

عسى الله يشافيه ويعافيه ويقومه بالسلامه

بهالساعه المباركه اذكرو راكان بدعوه طيبه الله يقويه ويشافيه ويرده لنا ولأهله بصحه وعافيه