ويبقى العراق..

طبعًا هي فترة عصيبة،تتخالط بيها المشاعر والافكار والحب والأمل والبؤس وهواي امور،شارع مضطرب واختلاف اراء تضرب العقل وتخليك بحيرة وضياع،لكن دوماً مايمتلك للشخص إيمان بموضوع معين يخليه يتكأ عليه بظل وجود الضياع،هواي منشورات مابين محفزة و مضادة ومنشورات حيادية تجاه الثورة،بعضها تفسر مضادتها للثورة بالخوف من سقوط ضحايا وشهداء جُدد،وهناك مدفوعة من جهات حتى تنهي المد الثائر،وحيادية تنظر للامور وتنتظر منها تنتهي حتى تقرر،صح الموضوع مو سهل وضبابي بصورة تضيع بصيرة الانسان بيها،لكن احنا مدنعيش بمكان صالح للعيش ولا مكان يحترم كرامة الانسان ولا مكان يمتلك سيادة وحظور،احنه دنعيش بمستنقع الذل والاستهلاك البشري،الموت والضحايا مو جديدة وغير منتهية عندنا،نعيش تحت خط الفقر،وبأسوء مقومات العيش مقارنة بالعالم الخارجي ،ونتصنف من اسوء الدول ،الفساد ينهش المجتمع والمؤسسات والقوانين،
العنصرية والطائفية تنزرع من القوى الحاكمه وتتمول وتصعد وضحيتها البشر،مهما كانت نتائج الثورة ومهما حملت من سلبية ومهما كانت سيئه فماراح تكون بنفس سوء الوضع الي جاي نعيشه، على الاقل،عن طريق الثورة فقط،تكتشف انك انسان تمتلك صوت وتگدر تصرخ بكلام الحق المختنق بداخلك!
وإلا منو جان يكدر يسب سياسي فاسد بالشارع؟
شويه خفوها

وفففف منصورين يبعد حيلي

دمعتني!

- الرساله ؛ نحو اللاشيء ؟
-نحن اللاشيء ..

وهم

أنا جسدًا هارب لا يعلمُ كيف وجد ملاذهُ في منفى الوطن..!

ويا وطني تمنيتُني شعبًا حتى أُحِبُك بالشكلِ الذي يُرضيك،
وتمنيتُني دواءً يُشافي كُل مرضٌ فيك،
وياوطني تمنيتُني أرضًا بحجمِ تأريخك،
وتمنيتني وطناً ياوطني يُحِبُك ويحتويك،
ولكنني ياوطني لستُ أكثر من جسدًا ناحِلًا لا يملِكُ سوى روحًا بها يُريدُ أن يُفديك..

الثورة
انطلقت شرارة الثورة من اللحظة الي اعتدت بيها السلطات على معتصمين الشهادات العليا،ولإن الشارع العراقي شارع حامي و يغلي ضد السلطة وضد رداءة الوضع فكان هذا سبب عظيم يأجج الحراك الشعبي،بدأت بأعتصامات بسيطة لاقت مواجهة عنيفة من السلطة حاولت انهائها الا ان هاي المحاولة قلبت الطاولة وحركت الشارع بصورة اكبر ، وماحتاج اذكركم بالسيناريو الي حصل والي هو محفوظ على ظهر قلب لكن ححاول اركز على السلبيات الي حصلت،ولان الثورة خرجت تحت اطار حركة الوعي فلازم نخلي بالحسبان المطاطية تجاه الانتقادات وناخذها بعين الاعتبار،ولان الضربة الي ماتموتك تقويك فلازم نعرف نستغل قوتنا لانا ما متنا بعد،

-سلبيات الثورة
وحدة من اهم السلبيات الي حصلت بالثورة هي لغة التخوين والمزايدة الوطنية،وهاي اللغة سوت هوة مابين الثائر و شريحة جبيرة من المجتمع،فعلى سبيل المثال لغة تخوين الشارع الصدري او المزايدة الوطنية مابين الثائر المرابط بالتحرير والمواطن الزائر بصورة يومية او متقطعة،والنقطة الثانية هي محاولة زج لغة المزايدة الوطنية بالتقليل من شأن المحافظات الغربية واتهامهم بالخوف،امر اخر هو الاندفاع المفرط والحماس الزايد عند الثوار،فأحنا نعرف ان الحماس شغلة ايجابية اذا تم استخدامه واستغلالة بصورة صحيحة ،لكن كثورة مُحاربة فكريًا ومع وجود التمويل السياسي عسكريًا والكترونيًا لتغيير المسار فلازم يقل مدى الحماس ويقل اندفاع الثوار بصورة عشوائية وهنا حنحتاج للفئة المثقفة الي حنتطرق الها بعد شوي،،وحدة من الامور المهمة ، هي فكرة الوعي قائد،هالشي جعل كل ثائر يحس نفسه واعي ويتصرف بالطريقة الي يشوفها صح،الوعي قائد بالمجتمعات الي يعيش بيها الاشخاص بوعي فكري يوصل لحد الكمال او المقبولية،بالمجتمعات الي تتنعم بتدريس،وتوجيه بيئي صحيح،اما بمجتمعنا الي عاش برحم الجهل واستبداد العادات والتقاليد والتطرف الفكري،فاعتقد من السلبية الانصياع تحت هذا الشعار،اما النقطة الاخيرة فهي انعدام الثقة العشوائية،حتى بالشريحة المثقفة والواعية،فوطن مثل العراق ولاد بالمثقفين والواعين وهنا راح نجي لهاي النقطة
-المثقفين،ليش نحتاجهم ؟وشنو لازم يكون دورهم؟
كلنا نعرف العراق يغص بالمفكرين والمثقفين الشرفاء الي انتمائهم وحبهم للوطن مايخليهم يخونوا،بالتجربة السابقة واجهنا زعزعات جبيره بالثورة وچنا محتاجين المثقفين بصورة كبيرة،لكن مثل ماوضحنا آنفًا كان لانعدام الثقة وعدم الاستماع ولشعار الوعي قائد تكميم قوي للفئة المثقفة،
اعتقد بالفترة المقبلة نحتاج للجان مثقفة تتواجد بكثافة بساحات الاعتصام،ويكون اكو استماع ودراسة فعلية للامور الي تقدمها هاي الفئة،مو كلنا واعيين،وكلنا نجهل امور هواي،السياسة شيطان يزيفلك كل الامور وماتحس بأي لحظة يجرفك،لهالشي راح تلعب الفئة المثقفة دور كبير بدراسة التحركات السياسية وارشاد الثوار بطريقة صحيحة،بهالفترة نحتاج نسمع وندرس ونخطط ونمشي ،لازم نبطل عشوائيتنا واندفاعنا،حتى نحقق الهدف المنشود ،
بالأخير ،كلنا محترگين ع الوضع وكلنا نطمح نعيش برفاهية وبوطن يحترم كرامتنا،وكلنا نبحث لعراق سومر وبابل وآشور،وكلنا نريد عراق يليق بتأريخة ،احنا الحضارة الي زرعت الثقافة ،واحنا الحضارة الأولى والأكثر تحضر بتاريخ البشرية ، وحتى نرجع شي بسيط لعراقنا لازم نحكم العقل ونسير على خطوط عقلانية،
الحديث يطول،لكن اعتقد هذا وافي حتى على الاقل نسير بصورة صحيحة بالفترة القادمة،

رأيي ومنظوري الشخصي مو اكثر..

- الرساله ؛ المشكلة الفئة اللي تكلمت عنها ( المثقفين ) كلش قليلة اغلب اللي ديروح ديصعد هتافات اي ديتواجد هناك اي ديشارك ويتظاهر اي الموضوع مو قصة طلعة او حتى ستوريز او بوستات وعبارات وطنية والكل يقرأ بس مينفذ او ميتوجه ايد وحدة متصفگ اتوقع الشي اللي لازم يصير هو تكوين رابطة او مجموعة من داخل التحرير حصراً هل الرابطة يكون الها هدف وشوية شوية ينشرون الوعي وخلفية الموضوع الحقيقة وتصير حملة توعية وضمان. اكبر عدد من الشعب وتصير توصية بنشر هذا الوعي حتى تكبر هل القاعدة وتصير قدرة على انه نحقق الاشياء الاكبر واللي احنا رايديها فعلياً

گلت نحتاج للجان ،هاي اللجان هي الي راح تتكفل بدراسة التحركات السياسية وهي الي راح تحدد مسار الثورة،لجان راح يتم الاستماع الها واهم شي تكون لجان وطنية، مراح تگدر تسيطر ع الزخم بصورة كليه لكن راح تسيطر اقلها ع العشوائية واضطراب المسار،الي بالتحرير مو مثل الي بالبيت وينشر من خلال بيج ،بالتحرير الامور اكثر وضوح ومفهومية،اظافة ان اللجان راح تكون قريبة من الثوار وراح يلتقون بيهم بصورة مستمرة ويكون كلشي واضح گدامهم ،واعتقد الثوار راح يتفهمون الوضع وياخذون الاوامر بعين الاعتبار ويدرسوها بصورة صحيحة ويطبقوها ع ارض الواقع

الامر يخص جميع الساحات طبعًا،يكون مابين اللجان بكل ساحة تناسق معين واتفاقات تنبني على اساسها القرارات..

- الرساله ؛ بكل صراحة الثورة ما حققت شي لان احنا جانت ماخذتنا الروح الوطنية لا اكثر ولا اقل بس اي تحقيق ماكو وتغير عادل جان بفضل امريكا مو بفضل الشعب وبس سليماني صار كباب ظهروا عبيد العبد وظهرت الفئة اللي عقلها مغسول وسواء تقبلنا هل الشي او لا اللي صار جان بسببنا جان بسبب قلة الوعي ظلوا ملتهين بالتبعية واللطم والسب ع الصحابة وناس تاكل بلحم ناس وشافوا الشعب متفرق استغلوا الوضع ونهبوا كلشي واسسوا تبعية وصارت الناس الهم عبيد وهم اصلا ما هامهم لا وضعنا ولا هامهم حقوقنا وحياتنا وكلشي رادوا سووا باسم الدين ( اهل العمايم ) .. ( اذا تريد تقنع اي شخص باي فكرة مجرد غلفها بالدين ) شوكت ما نصحى وينتهي شي اسمة ذيول وتبعية وننسى نسال انت شيعي لو سني ونعوف السب ع علي وعمر عود بذاك الوقت كولوا صرنا شعب وحققت الثورة انجاز ( متحدين نقف )..

هو انت متأكد من الي گلته؟
اكثر فئة انسبت بالثورة هي العمامة الفاسدة،
اكثر شي انحدر تطرفه هو الدين والتطرف الاسلاموي الموجود بالشارع،
اني ركزت ع السلبيات لان الايجابيات المفروض معروفة!
منو جان يكدر يسب سياسي بالشارع؟
منو جان يكدر يصرخ بوطنيته مقابل الخضراء؟
التطرف الديني الي تكلمت عنه برسالتك ترا متلگاه بس بوهمك ويم الذباب الالكتروني والتبعيه الي صاروا يشكلون نسبة ضئيلة من المجتمع!
اني نمت بمدينة الصدر ،ورحت لكينيل الي هو شيعي، وكعدت بخيمة اغلبها شيعة،
٩٩٪؜ من الاشخاص الي لقيتهم وكعدت وياهم هم شيعة،
بس محد سأل الثاني انت سني لو شيعي!
الثورة ماحققت شي؟
سياسيًا ماحققت،لكن مجتمعيًا الثورة جانت طفرة عظيمة بتاريخ العراق ،غيرت الفكر المجتمعي بصورة مو طبيعية ومحد جان متوقعها، السافرة والمحجبة والملحد ورجل الدين كلهم جانوا يهتفون بنفس المكان،والصور وثقت كل هالامور،ومستحيل ما لاحظتوها!
الثورة ما سوت تغيير سياسي بس بعثت الرعب بارواح الساسة،
الثورة رجعتلنا الثقة الي افتقدناها ،ومسحت كل الخطوط الحمر!

++ تغير عادل ابدًا مو بسبب امريكا،
امريكا مجانت تكدر تغير عادل عبد المهدي من الفراغ،الثورة هي السبب الاهم+ماجان هدف الثورة الاساسي عادل عبد المهدي!

هو انت جاي لتحرير لو بس حجي من تليفون