واذا فكرتني هيج فعادي،

نفوت بصلب الموضوع الي ماعرفه شنو

بس هو الموضوع يعني يخص الحياة ،اي هاي الحياة الي مكأبتك وداخل بمود العبوس والقنوط،وتخلص الليل جكاير وشعر واغاني حزينه وصور ودموع علمودها،وكلشوي محضر الموس والحبل وتريد تروح نحو الربيع ،هاي الحياة الي كل ماتخلص من مشكله تلكاها محضرتلك مشكله اكبر،عبالك دتلعب بسلسلة مالت لعبة وكل مهمة اصعب من القبلها

اعتبرني شايب ع عكازة وشعره ابيض ولحيته شبر وشكله مال واحد ميحچي شي غلط،من ذولي الشياب القديمين مو شياب هالوكت جماعة التكتك وچاي وجذب،واخذني ع محمل الجد

هو يعني اعتبرني شايب بس بگدك واعرف بشنو دتفكر وشنو دتعيش بأطار كلنا نمر بظروف وتجارب متشابهة واذا مو هيج فالمشاعر حتكون متشابهة

المهم مثل ميگول ماركو هذا بحث اخر ونرجع للموضوع،شنو السعادة بتفكيرك؟
يعني هي تشكيلة مالت فلوس،ناس هواي يمكن توصل للشهرة،حبيبات ،او حبيبة ع الاقل ،حياة موفرتلك كل الجوانب، يعني حياة تشبه حياة ابن الوزير الي اذا حلم بالليل بشي،ياخذ ريست بالحلم يوصي عليه ويرجع يكمل الحلم حتى من يكعد الصبح يلگاه جدامه

بس هالشي مستحيل بحياتك حبيبي انت لازم تحير بالخمس تالاف حتى تطلع وي جماعتك واذا جنت متمكن فماراح تحير بس جماعتك حيكونون ربعهم لوگيه:)

بس مو هاي السعادة،ومراح اتفلسف هواي

بس راح احجي عن الي عشته اني والي شفته بطبيعة حياتي،ومثل ميگولون الحياة تجارب ومدرسة طويلة،

يابه خلينا داخلين بالمود يسيطرة اربعطعش:)

جا بس انتي تعرفين تاكلينا بلسانج:)

كمل اسفه 😂

المهم الي حيجي يقرا حيگول هذا مريض نفسي عادي حبيبي انت بس جوست سمايل

المهم ، بعد بحث طويل ،ومحاولات بائسه لفهم محتوى السعادة ،اكتشفت انوا السعادة مالها ابعاد واضحة،وماكو اشخاص محددين سعادة مطلقة،يتخايل للبشر انوا الطبقة الطاگة هاي الي يشوفوهم ليفوگ والي مخلصين حياتهم هيج تنثر فلوس ومن دولة لدولة وووو ،يحسوهم هم الي عايشين ذروة السعادة،لكن بطبيعة الحال هذولي الاشخاص اني صح ماتعرفت عليهم يعني:) لكن لو تصادف وصار هيج شخص صديق الك راح تلگاه مثلك كاره الحياة،بزعان من الروتين القاتل حتى لو كان يتريگ بباريس ويتعشى بسويسرا،(كذب داقنعكم؛)،حتلگه مثل هيج شخص ،انسان مجوف،ومعنده شغف بفد شي معين،لان كل الاشياء الي يريدها متوفره فماراح يعيش بلحظة تحقيق امر معين،من هاي النقطة نستبعد فكرة السعادة عند الاشخاص الطاگين

ومن تباوع ليجوه للاشخاص الكادحين حتلگاهم اشخاص يعيشون بحياة قاتله ومستبده،ويتراودلهم البؤس بكل ثانية من حياتهم ومشغولين الى ابعد الحدود

فتباوع لنفسك انت الي بالمنتصف،فتشوف نفسك تباوع للي فوگاك وتحسه عايش السعادة المطلقة وتباوع لحياتك فتلگاها عبارة عن تجمع للتجارب والظروف والعلاقات السيئة فتگعد تطگ اصبعتين وتلطم

لحد هنا مالگينا معالم واضحة للسعادة،اما الحزن فهو متجذر بينا،واحنه متشبثين بيه حتى اذا جزع منه يلگانه حاطيله لاصق ونذم بيه،

السعادة حسب ماتوضحلي مؤخرًا،هي قناعة،بساطة،رضى،
كل ما يمشي الزمن وياخذ من عمرك سنين تكتشف انو انت صرت اكثر اكتفاء بأمور اقل،اصدقاء اقل،مال اقل،طلعة اقل،اختلاط اقل،تكون تبحث عن الراحة والطمأنينة الداخلية والسلام،وهنا يكمن المبتغى،
بالرضى والقناعة،بالفترة الاخيرة،اكتشفت اشياء هواي جميلة بالبساطه،صار العمل الشاق الي ما ينتج اي امور مادية فقط من باب المساعدة،يبعث بداخل الشخص راحة لطيفة،اكتشفت انوا السير مع اشخاص لطفاء من اصدقائك بطرق منطقتك المكسره تزيدك طاقة ايجابية رائعة،اكتشفت ان الطلعة البسيطة الي مابيها فخفخة تبعث بداخلك طمأنينة رائعة،واعتقد السعادة هي نسيج من السلام والطمأنينة والراحة واهم شي القناعة،

الحياة متتحمل كل هذا الثقل ولا كل هذا العبء

مرات لازم تبطل تفكر،من يكون التفكير مجرد ثقل مو اكثر،

مرات لازم تبطل تحلم،اذا كان الحلم مجرد مهزلة لناتج مالي