طلاب العراق حاليا :

مثل رمح انشمر
وبين حربين
ما صيبن هدف
الغدر مو طبعي

الكاتب 𝑯.. 𝑫

الحب شي كلش حلو بس ويه اختيارك الصح يصير احلى
مو كل شخص نحبه يكون مناسب إلنا ومو كل شخص نرتاحله بالبداية يكون هو الشخص اللي يستحق نبقى وياه
الحب الحقيقي مو بس مشاعر وكلام حلو الحب أمان وراحة واحترام واهتمام
أنك تلكى شخص يفهمك بدون ما تشرح هواي ويعرف شلون يحتويك بوقت تعبك وما يخليك تشك بمكانتك عنده
لأن بالنهاية الحب وحده ما يكفي إذا الاختيار غلط
بس من تختار الشخص الصح يصير الحب وطن وتبقى الروح مرتاحة حتى وسط كل تعب الحياة

فا دائما الحظ أصدقائي المزوجين مشاكلهم على أشياء تافهة وأشوف شلون مرات كلمة صغيرة تكبر وتصير مشكلة ومرات العناد يخلي شخصين يحبون بعض يبتعدون عن بعض
وأظل أگول لو كل واحد منهم يحاول يفهم الثاني بدل ما يحاول يثبت أنه هو الصح جان هواي مشاكل انتهت من بدايتها

الحياة الزوجية مو منافسة حتى واحد يطلع منتصر والثاني خسران
هي شراكة وكل واحد بيها لازم يعرف متى يحچي ومتى يسكت ومتى يتنازل ومتى يحتوي الثاني
لأن بالنهاية إذا تحب الشخص فعلًا ما راح يكون همك منو انتصر بالنقاش قد ما يكون همك شلون تحافظون على محبتكم

لان البنت اكثر حساسية ومشاعرها احياناً تكون اقوى من الكلام اللي تبينه
ممكن كلمة بسيطة تفرحها وممكن كلمة ثانية تبقى ببالها فترة طويلة
ولهذا الاحتواء مو ضعف ولا تنازل عن الكرامة الاحتواء هو انك تعرف الشخص اللي يمك شنو يحتاج منك بهذا الوقت

مرات ما تحتاج منك حلول ولا محاضرة بس تحتاج تحس انك وياها وانك فاهمها وما راح تتركها تواجه الشي وحدها
ونفس الشي ينطبق على الرجل هم هو يحتاج اهتمام وتقدير وراحة مو بس البنت

والعلاقة الناجحة برأيي مو انكم ما تختلفون لان الاختلاف طبيعي بين اي شخصين
النجاح الحقيقي انكم تعرفون شلون تختلفون بدون ما تجرحون بعض وشلون ترجعون لبعض بعد الزعل بدون عناد وكبرياء

لان بالنهاية الشخص الصح مو اللي يخليك تعيش بدون مشاكل
الشخص الصح هو اللي يخليك تحس ان حتى المشاكل تهون وانتوا سوا

وكل هذا الحچي واني أصلاً ما مزوج 😂
بس شنسوي من كثر ما أشوف مشاكل المتزوجين وأشوف شلون مرات يضيع الحب بسبب أشياء بسيطة، الواحد يتعلم حتى من تجارب غيره
يمكن ما عندي تجربة زواج، بس عندي قناعة إن اختيار الشخص الصح والاحترام والاحتواء والحچي الهادئ أهم من هواي أشياء

ضحكتي يمكن تبين للناس مجرد ضحكة عادية، بس وراها هواي أشياء ما يعرفوها، يمكن مرات أضحك وأنا بداخلي تعبان، ومرات أضحك حتى ما أخلي الحزن ياخذ مكانه مني
تعلمت إن مو كلشي بداخلي لازم ينحچي، ومو كل وجع لازم يبين على وجهي، ولهذا ضحكتي صارت جزء مني، مهما مرت علي ايام ومواقف تبقى عندي قدرة أشوف الجانب الحلو بالحياة
يمكن ما يعرفون شكد مر بيه الإنسان اللي يضحك قدامهم، بس أنا أعرف، وأعرف هم إن بقاء الضحكة رغم كلشي مو ضعف، وإنما دليل إن الإنسان بعده متمسك بالحياة وبالأمل

لا تعيد الغلط، راح يرجع يجرحك بكل فرصة، يخلي بداخلك ألف جرح ويطلع وهو مو مذنب، يجرحك هواي وما يريد حتى يحس بتأنيب الضمير، عبالك انت حيوان مو بشر، لا تعيد الغلط
لأن بعض الناس مهما تعطيهم من فرص، يبقون يشوفون طيبتك ضعف، وسكوتك خوف، وتحملك شي يگدرون يستغلونه كل مرة، وانت كل مرة ترجع تبرر وتگول يمكن يتغير، يمكن هالمرة يفهم، بس بالنهاية يرجع نفس الجرح وبنفس المكان
لا تنتظر من شخص آذاك هواي إنه يصير فجأة الشخص اللي يحميك من الأذى، ولا تخلي قلبك يقنعك ترجع لمكان انت بنفسك تعرف شكد تعبت حتى تطلع منه

دائمن اكول لأصدقائي تره احنه ولا شي، احنه عشنا بزمن صعب، زمن علّمنا نعتمد على نفسنا ونسكت عن هواي أشياء ونكمل حتى واحنه من داخلنا تعبانين

يمكن احنه ما نشوف نفسنا سوينا شي كبير، بس بالحقيقة مجرد وصولنا لهنا بحد ذاته إنجاز، لأن كل واحد بينا مر بأشياء غيرته وخلته أقوى مما كان يتصور

عشنا أيام ما جانت سهلة، وخسرنا ناس وتعلمنا من مواقف، وضحكنا بوقت جان لازم نبچي بيه، وبقينا نحاول مهما ثگلت علينا الحياة

لهذا لا تستهينون بنفسكم، يمكن احنه بنظر نفسنا ولا شي، بس احنه جيل تعلّم يعيش رغم كلشي