سواء الحالات والأمراض، النفسية أو الجسدية والمبالغة بتصويرها بشكل درامي، ليست بالشيء الجيد.. أبداً

متل ماقال د. أسامة عزيزية من كم يوم على صفحته على فيسبوك

ونعم، كثرة التشاخيص المبنية على بوستات الميديا ليست صحيحة، سواء كانت جسدية أو نفسية..

وإصابتك بحالة معينة، مثلاً أنا مصاب بالبايبولار أو الشخصية الحدية أو اعتلال عضلة القلب المابعرف إيش أو عندي سرطان ب 5 خلايا بأسفل ظهري وعانيت وصارعت وكذا
ليست شخصيتك، وليست هويتك، وليست طريقة لجذب النظر... ومالازم تكون.. والأهم.. مانها إنجاز


ولكن، يختلط مفهوم " التصوير الدرامي " للحالات الصحية عند الكثيرين مع مفهوم " انتشار الحالة "


يعني اليوم في ناس أكتر معها سكري من قبل
ممكن نقول بسبب نمط الحياة الحديثة اي نعم ولتغيرات بالبيئة المحيطة environment
بس بنفس الوقت هو بسبب تقدم الطب ووسائل التشخيص وزيادة الوعي وإن الناس صارت تكشف عن حالها أكتر..

أخدت السكري كمثال بسيط..

مريض ارتفاع الضغط الشرياني اليوم صار بيحس ع حاله وبينكشف عليه وبيتشخص بنسبة أكتر تقريباً من 60% من ال70 سنة الماضيين..
كمان فينا نقول نمط الحياة الحديث وغيره من الأسباب
بس ازدياد انتشار الحالة وشيوعها مو يعني إنها صارت " علكة " و نقول فلان مافيه شي وعم يتظاهر
و " عم يمثّل "
" وعم يطلب أتنشن "
على هوانا وكيفنا
وانو نقول (ماشالله الكل صار عندو اكتئاب أو الكل صار عندو adhd.. وغيره)
بس لأن شفنا تزايد بالحكي عن الحالة


اي في ناس هوجاء
وفي ناس متسرعة بالحكم
وفي ناس " بتحب تعيش الدور " متل ماتم الوصف من قبل البعض

بس في ناس عنجد عم تعاني
وعم تحارب
وأحياناً لما تشوف فيديو أو بوست عم يحكي عن معاناتها أو يفسره بتحس براحة نفسية
بتحس بانتماء..


لما بكون عنا مدمن كحول، وببلش بطريقة التعافي والانسحاب، بينضم لمجموعات دعم كرمال يحس بشعور الانتماء..


الشفاء يتزايد مع الجماعة..
وهاد العلم بقلنا هيك


منروح بنصير نطالع الغلّ الي جواتنا والفهمنة الي عندنا على هدول الأشخاص الي بينشروا هيك؟
طيب ما أغلب المعترضين مانهم اختصاصيين!


ماعم انفي وجود أشخاص بحبو يستغلوا المرض كرمال الظهور
كام عندي رفيق سابقاً، سنتين كاملين وهو يقنعني انو عنده سرطان وعم يتعالج كيمياوي.. بس كرمال جذب الانتباه!


بس مافيي ارمي التهم جزافاً وقول كلو صار عندو كذا وكلو صار عندو هالحالة
واقعد اتهم الآخرين بحب الظهور وبالفزلكة وبتقمص الدور..


تصوير المرض بصورة فائقة الرومنسية وتجميل الحالات الصعبة شيء خاطئ.. لا نقاش في الأمر.. يضر المصاب بها وغير المصاب بها على حد سواء

و كمان رمي التهم على الناس جزافاً غلط.. وبيضر أكتر ما بيخطر على بال حدا.. خصوصاً من قِبل غير الأخصائيين المحبين لفكرة خالف تعرف.. والنقد العشوائي لمجتمعات بشرية شايفينها (أقل من مستواهم الفكري)
ولا يُقصد التعميم، أبداً..


مصرّين نرجع للوقت الي كان فيه الواحد يعترف إنه عنده مشكلة.. ويطلب مساعدة.. ويحس بالانتماء أو الدعم.. مصرين نرجّع الوصمة على المرض النفسي أو الجسدي لو كان نادر شوي.. ولكن بصبغة حديثة


ليش بس؟
ليش؟

نصيحة أخيرة بعد الإطالة، خُذوا المعلومة من أهلها، وماترموا عقلكم بالزبالة حتى بوقت تاخدوها.. حاكموها بعقولكم قبل ماتاخدوها مسلّمات..

وأخيراً
دُمتم بخير، وحُبّ بعيداً عن عاشقي الشائعات والتُّهَم.. ومن لا يعجبهم العجب..⁦🙏🏻⁩⁦❤️⁩


- تكملة الحديث بوجه آخر:
https://t.me/c/2130619597/282

منشور قادم..

لفت نظري هاد البوست اليوم

فينا نعتبر الكلام القادم تكملة لمنشوري السابق مباشرةً..

بدايةً الكيتوبروفين Ketoprofen هو مضاد التهاب غير ستيروئيدي
استخداماته الرئيسية لتخفيف الألم الناتج عن التهابات المفاصل الروماتيزمية وتخفيف الوذمة والألم بعد الجراحة.. وبشكل ثانوي تخفيف الألم الناتج عن عسر الطمث وآلام الدورة الطمثية..

آلية عمله..
لو تتذكروا ف من فترة نزلت د. ليليان حديث عن آلام الدورة والبروستاغلاندين

ف آلية عمل هالدوا ببساطة بيعطّل أنزيم معين هاد الأنزيم وظيفته يفعل البروستاغلاندين

يعني بيقطع السلسلة تبع تفعيل البروستاغلاندين الي بسبب التقلصات المؤلمة كتير هي..

طيب.. لنجي للأهم وتصحيح المفهوم الخاطئ عند الصبية

أنا ماني صيدلاني ولذلك مابعرف شو الأسماء التجارية للدواء بالسوق اليوم
بس بشكل أساسي في شكلين لمضغوطات الكيتوبروفين
مديد التحرر وسريع التحرر

يعني وحدة بتتحرر منها المادة المؤثرة فوراً بس ناخدها ووحدة بدها مدة

وعليه بيختلف وقت أخد الدوا

مديدة التحرر تؤخذ قبل بساعة أو ساعتين من الوجبة
وبعد الوجبة بمدة مابتقل عن ساعتين..

سريعة التحرر تؤخذ بعد الوجبة مباشرةً

البروستاغلاندين أحد عوامل الحماية لبطانة المعدة

يعني

الكيتوبروفين بتأثيره الي بقلل البروستاغلاندين بيعرّض نسيج بطانة المعدة للتخريش أو الأذى بسبب الحمض الطبيعي الموجود بالمعدة

تمام لهون؟

بالنسبة لعسر الطمث،
أيمتى مناخد المسكنات هي؟

بشكل عام

أحدث الدراسات بتقول
لو دورة الأنثى منتظمة نسبياً وفينا نحسبها
بيبقى لو أخدناها قبل 12-36 ساعة قبل بداية الأعراض ف بتخفف الوجع بنسبة منيحة جداً أكتر من لو انأخدت بعد بداية الألم

لكن
الأدلة ليست كافية للدرجة الي بتخوّلنا نعمم هالشي دائماً
ولكن
تؤخذ للاحتياط هيك مافي مشكلة


أما أثناء الألم
مناخدها
ومابتزيد الألم
وإنما رح تخففه طبعاً
منرجع منشوف بوست الدكتورة ليليان هون لو حبينا نتأكد
https://t.me/Knowledge_24_A/66
لذلك ماتخافوا من تناول المسكنات هي أثناء عسر الطمث


أخيراً
شوية شغلات يجب الانتباه إلها

بعض الناس عندها حساسية من مضادات الالتهاب اللاستيروئيدية.. نحاول نبعد عنها ونستبعدها بالبارا سيتامول آمن وظريف وخفيف

بعض الناس بمراحل الإرضاع أو الحمل أو على وشك..

عنا مشاكل كبدية أو كلوية أو مشاكل سابقة (يفضل نستشير الطبيب بهالحالة ونعمل التحاليل اللازمة)

عنا التهابات معدية أو عنا سوابق فرط تحسسية معدية


لو بسببلكن ألم معدة
فينا ناخد مثبطات مضخة البروتون حبة صباحاً (اوميبرازول ومشتقاته) خلال مدة التداوي بهي المسكنات


اي وبس كده
لو في لسا شي ابقوا خبروني بالتعليقات

وتذكروا دائماً تاخدوا المعلومات الصح من الأشخاص المؤهلين والمختصين
والمصادر الموثوقة


سلامتكن جميعاً..


المصادر:

ncbi
medscape

#Medicine

لم أنسَ..
امتحانات بس

وأنا مابحب الهبد
لذلك ال research قبل الكتابة

واجب
وأساس
وضرورة

" كل حاجة جميلة بتاخد وقت "

موفقين جداً بامتحاناتكم وأشيائكم الجميلة..

من اسوأ ما يمكن أن تخوضه هو اعتقادك بأنّك تعرف شيئا لا تعرفه بالفعل، ومن ثمّ مشاركة هذا "التضليل غير المسؤول" مع الآخرين..

- لا يوجد شخص سواء أكان عالمًا أم لا على قيد الحياة لم يعاني من ذلك كثيرًا سواء أدرك ام لم يدرك ذلك، حقيقة هذا التضليل موجود دائمًا وبحاجة رقابة مستمرة صارمة، هذا هو السبب الرئيسي الذي يجعل الكثير من المعلومات العلمية قد تبدو مملة للبعض من العامة وحَذِرة للغاية..

- إذا كنت تتعامل مع الطبيعة وعلومها بالإهمال أو "الهوبرة والغوغائية" مثل ما نقول بالعامية، أو تقوم حتى بزخرفتها ووضع استنتاجات وافتراضات خارج سياقاتها كلّ حين وأخرى، فإنّ الطبيعة سوف تجعلك قريبًا أحمـ.ـقًا كاملًا يظنّ أنه يعرف ما يتحدث عنه..

- يجب على المرء أن يكون حذرًا للغاية وبشكلٍ صارم عند التعامل مع الكون، زلّة منطقية واحدة قد تجعل صرحًا علميًّا كاملًا ينهار، قطعة غير سليمة من آلة ما ستجعلها تتعطّل أو تتوقّف حتى تقوم بتغييرها..

- د. شفيق فرح

#Psychology #Neuroscience

من يجد نفسه يمر بشهر الكلب أو طاقة النار المتفجرة

لا تنسوا أن تشحنوا طاقة المال وجذب الثروات اليوم🤓


الي ماعنده وصلة يشحن يقلي عندي micro و type - c


و دُمتم بِخَير، وحُبّ..⁦ بعيداً عن وصلات الشحن الخربانة⁦❤️⁩⁦🙏🏻⁩

(علوم) الطاقة

مش أشياء من برا الكوكب وهيي شي رح يغير الدني

و عم تكشف المستور
والناس مو جاهزة لهالمحتوى
وغيره من هالهبد


ياجماعة
هي مانها علوم
فعلياً
لو كان فيها ذرة احتمال اصابة ولو 1% ماكنت أبداً حكيت بهالأسلوب

هي جهل
عم يحارب كل العلم والحقائق الي عم يبنوها علماء بالتجارب و بصرف عمرهن وتعبهن عليها


لما تقلي تجذب المال
علماء الاقتصاد رح ينتحروا بس يسمعوا حكيك

لما تقلي اجذب الفراشات السحرية مشان الطاقة الإيجابية
طالب الPh.D بعلم النفس بشي جامعة مرموقة برا رح يقعد يبكي لو سمع كلامك


التفاؤل
النظرة الإيجابية للأمور
الحب
الانتماء
العاطفة
التعبير
الوضوح
المشاركة

كلها قيم رائعة وجميلة وبتساعدنا نعيش حياة أحسن طبعاً وجزء من طبيعتنا

مو لأن عالمة الطاقة الوندر وومان قالتلنا اجذبوا طاقة الريح!


لو حدا حيزعل
معلش
الحقيقة بتزعل أحياناً

بس واجبي
وبفترض.. فقط افتراض
انو واجب كل شخص مؤمن بالعلم
وبالحقيقة
وبالإنسانية
ومختص وواعي وتعبان على نفسه وعلمه

ينشر الحقيقة
لنحارب فيها هاد الشي.. مو نحط الحزن بالجرن ونقول الدني مليانة شغلات غلط ونسكت..

لأنه مو شي جديد
ولا طلع مبارح

صرله دهور
ودائماً عم يتحارب ويسقط


كانوا مفكرين القمر.. معمول من الجبنة
والمطر..دموع الآلهة

العلم دائماً ينتصر
لأن العلم لا يعرف رأي
يعرف الحقيقة
يبحث عنها
دوماً


حبوا الحقيقة بتحبكم.. تقبّلوا أن الحياة مسيرة من الصعود والهبوط والحظ العاثر والجيد
وأننا دائماً علينا أن نحاول
فعلاً.. نحاول

الأشياء مارح تجي لعنا لمجرد اننا عبالنا (نجذبها)


وهالمرة
فعلاً
ليلة سعيدة
بعيداً عن كل الأشياء الي بتحاول تسطيح عمق التجربة البشرية بهالحياة..⁦🙏🏻⁩⁦❤️⁩

اجيت كتبت بوست
طويل
عن الأدوية مضادات الإقياء

لقيته مليان أنزيمات ومستقبلات ورموز..
حسيت إني رح عقدها


طلاب الطب والصيدلة بيقدروا يشوفوها من أي مرجع علمي


بس لنحكي كما يسمى (حكي شوارعي)

بالنسبة لمضادات الإقياء

عنا نوعين رئيسيين لنميز بيناتن وموجودين بالصيدليات

الأول هيي بتشتغل على مستقبلات نواقل الدوبامين D2 والها فرعين

التاني بتشتغل على مستقبلات السيروتونين


الفرعين تبع الأول
هنن ببساطة ميتوكلوبراميد غالبا اسمه بالصيدليات باسبيران (ماني متأكد.. بتمنى من اصدقائنا الصيادلة يخبرونا)
و دومبريدون واسمه غالبا بالصيدلية موتين (كمان مو متأكد)

شو الفرق بيناتن؟ بما انو التنين عنفس النواقل يانصاب..


عنا بالدماغ هيك متل منخل أو برداية وظيفتا ماتخلي المواد العشوائية توصل للدماغ
وهي تطورت معنا عبر التاريخ من كتير ماكانوا أجدادنا الهومو سابيان ياكلوا نباتات سامة وشغلات غريبة عجيبة


الميتوكلوبراميد مشكلته بيعبر الحاجز الدماغي هاد يعني بيعمل تأثيرات عالجهاز العصبي
وبشعة ومو مريحة
الدومبريدون مابيعبره يعني هي التأثيرات مابيعملها

لهيك عم ينسحب الميتوكلوبراميد من الصيدليات ومن زمان انسحب من برا الا بوصفة نظامية وبشكل مضبوط


أما النوع التاني
أونداسيترون
بتلاقوه ب اسم فومي كايند و دي ڤوميت و فوميدال ومدري ايش لسا (يا صيادلة كرمال الله أنقذونا)

المهم
هاد أثارو الجانبية ألطف بكتير كتير
وحلاوته بيعتبر العلاج الأمثل للي عم يعملوا علاج كيميائي للسرطانات للسيطرة على آثاره الجانبية للعلاج من غثيان واقياء وغيرها
ويعتبر بصراحة فعال أكتر من النوع الأول وأنا بحبه بصراحة وكل حاجة


بالنسبة لآخر نقطة بتخص مضادات الإقياء
خصوصاً النوع الأول
هي بتستخدم لتسريع عملية الإفراغ المعدي وأحياناً النفخات ببعض الحالات (ماتاخدوها اعتباطياً)

وبظن هيك بس
الأدوية هي مهمة وبتعمل لخبطات كتير
لهيك قلت بنحكي عنها

ودُمتم بِخَير، وحُبّ..⁦🙏🏻⁩⁦❤️⁩

#Medicine

الهوّة بين البحث العلمي ونتائجه والممارسة السريرية تحديداً عنا بسوريا شاسعة جداً لدرجة إن الممارسات المستخدمة حالياً عنا بعضها متروك عالمياً من عام 1982!!!!!!!!

مضادات الاكتئاب
الي بتشتغل على تثبيط إعادة امتصاص السيروتونين
SSRI

بمقدمتها الزولوفت (سيرترالين)


من أشهر أعراضها الجانبية
نقص القدرة الجنسية
نقص الرغبة الجنسية


حتى وصلت لبعض الدكاترة
يوصفوها بجرعة مخفضة للذكور
لعلاج سرعة القذف الشائع جداً


لأنه زيادة مستويات السيروتونين
بتنقص الحساسية العصبية برأس القضيب الذكري
وبالتالي
بحاجة وقت أكتر للوصول للنشوة


ليه بتقلل الرغبة؟
السيروتونين بالأصل متعلق ومتواسط بالرغبة الجنسية..
فلما بتاخد SSRI بزيد السيروتونين.. يعني بقلل استثارية الجهاز العصبي من جهة

ومن جهة تانية


في عنا هيك بالدماغ
بجهاز المكافأة
الجهاز الوسطي الطرفي mesolimbic
هاد عنا بالدماغ بحب الدوبامين كتير
بقوم السيروتونين جاي على النوى العصبية الي بالدماغ الوسطي وبثبط الإشارة الي بتوصلهم ببعض (الجهاز الطرفي و النوى هي raphe nucli in mid brain)

وبالتالي
بتخف الإشارات هون
وبصير ماعد يعتبر الجنس ك مكافأة
ولا ك حافز


بقل اهتمامنا بالجنس
وبممارسته

شوي وبصير بالتعليقات على هاد البوست ملف ظريف للاستزادة

ودُمتم بِخَير، وحُبّ🙏🏻❤️

كل منشور عم يسخر من إجابة الذكاء الصناعي الحديث بكون السبب بسوء الإجابة بنسبة كبيرة هو الأمر الي عطاه ياه المستخدم نفسه
ماعم قول إن الAi كامل متكامل
لكنه خارق فعلاً ومدهش لما تعطيه الأمر الصح!
لو حابين تتعلموا أساسيات كتابة الأوامر للذكاء الصناعي لتحصلوا الإجابات الي بتحتاجوها وتوفروا وقت الشغل والدراسة عليكن عالنص
تفاعلوا على هاد البوست وشاركوه ❤️

ملفان قادمان مساءً😤❤️

ما يقارب ال20% من الوفيات المبكرة لفئة الشباب عالمياً
مو السرطان ولا السكري ولا القلب..
وإنما..
الاحتراق النفسي
Burnout


تبقوا بخير واعتنوا بذاتكم قدر المستطاع🙏🏻❤️

#Medicine #Mental_Health

#English #Language

الجملة اللي بقولوها الزوجين المنفصلين "ما كنا مناسبين لبعض"
علميا و حسب علم النفس بتتفهم على انه كان في اختلاف جوهري إما بالشخصية personality او الطبع character او المزاج temperament بين التنين..

و لهيك نحنا منأكد على ضرورة وجود قاعدة اساسية عند اي شخص كان حول علم الشخصية و على الاقل نموذج من نماذج تصنيف الشخصية او الطباع (اعدادهم بالعشرات)

الغريب هو ان الدول و الحكومات بتفرض تحاليل ما قبل الزواج لنفي الامراض العضوية لكن ما بتفرض هيك اختبارات تكلفتها المادية تقترب من الصفر على المتزوجين!

هامش : القيم حتى لو كانت مختلفة ما بتأدي للانفصال..اكبر سبب للانفصال هو الاختلاف بالتيمبرمنت temperament و هاد منشوفه اكثر شي بخطب الصالونات (الخطبة القصيرة اللي بتلحقها زاجة فورا)


- د أحمد فران

#Psychology

لما كنا بأرحام امهاتنا حاسة وحدة فقط بتكون ناضجة عنا و لللي هي حاسة السمع..
حاسة السمع مهمة عند الجنين..لانها بتعطي اشارة و اجابة على سؤال : هل الخارج مكان آمن؟

بعد الولادة وفي الاشهر و السنوات الاولى نعتبر كل ما يدور في العالم متمركز حولنا..
البابا و الماما متفاهمين و مافي مشاكل؟
اوه واو شكلي انا نعمة و بركة
الماما عمتهتم فيني و ترعاني الي بشكل دائم؟
اوه معناها انا good boy و بستحق الحب

طيب...شو رح يصير اذا كنا برحم امهاتنا وفي ضجيج حولنا؟ (ضجيج بدءا من مشاكل زوجية وصولا لتهديد للحياة متل الحروب و القصف)
اول انطباع رح يكون عنا : الخارج ليس آمن..

للاسف مضطرين بعد ما نكمل الشهر التاسع نطلع لهاد الخارج..
هون و بالسنوات الاولى اذا كان في مشاكل و خناقات كمان رح نمحورها حولين نفسنا..

البابا عيط على الماما؟
شكلي عملت شي غلط

الماما بتضل حزينة؟
شكلي انا عبء..

البيت فيه مشاحنة دوما؟
رح ((أجبر)) حالي اني كون دائما منيح و طيوب كرمال تخف هالمشاحنة...و طبعا لاقدر اعمل هالشي لازم اكبح اي رغبة عندي او حاجة و اتصرف كما لو كنت طفل مطيع! #دائما

عرفتوا السوسيال ليش احيانا بياخد الولاد؟ الامثلة اللي فوق بتحكي فقط عن مشاحنات بين الام و الاب...ما حكينا لا على التعنيف ولا على الضرب!

تربية الاولاد...مهارة اصعب من تفكيك القنابل الموقوتة!


بعد عشرين سنة منزور الطبيب النفسي و منقله :

حاسس اني عبء على اللي حولي..حاسس بحزن غريب غير مفسر...حاسس اني عايش بشخصيتين

كل هالكلمات بتكون بالحقيقة coping mekanizma استراتيجيات تأقلم عاشت معنا بطفولتنا و كبرت معنا و صارت جزء مننا..و هلق عمنقولها للدكتور النفسي مشان يشللنا ياها..لانو بعد ما نكبر مانا بحاجة الها لكن بنفس الوقت انصهرت معنا و صار من المستحيل نشيلها من دون ما نحس بوجع او انسلاخ (متل لما بتشيل بالعدلة الشعر)


- د.أحمد فرّان
#Psychology