بيصعب عليا قوي أي حد متدين وعاوز يبعد خالص عن أي شبهات مالية في الزمن دا ويريح نفسه وفي نفس الوقت مش عاوز فلوسه تنكمش وقيمتها تبقي رقم عالورق

*️⃣ يقولك أسيب الفلوس جنبي بالجنية؛ التضخم هيدمر له الفلوس أصلاً وكل سنة وانتا طيب.

*️⃣ يقولك خلاص أشتري شهادات؛ لا يا عم حرام وكمان مش هتعوض قيمة التضخم.

*️⃣ خلاص هشتري ذهب؛ بلح الذهب طالع نازل وممكن يحصل فيك زي ما حصل فترة 2014 و 2015 وقيمته فيهم اقل 10% من قيمته في 2013 بالجنية واقل 40% لو بالدولار... فكده قيمته بتقل وفي نفس الوقت في تضخم يعني خسارة مضاعفة.

*️⃣ خلاص يشتري دولار؛ كل الناس تخزن فلوسها دولار واضمن... بعيد عن ان الدولار مش بيدي نفس مردود الشهادات البنكية لكن مش مهم حلو يلا كلنا نشتري دولار... السؤال بقي هل في دولار يكفي؟ طيب جزء قدر يلحق يشتري والباقي ملحقش فالتكالب بتاع الدولرة من سياسة أنا ومن بعدي الطوفان؛ حميت نفسي وجبت دولار وهوب الدولرة خلته بقي ب 30 جنية او 40 كمان... الغلبان اللي معندوش مدخرات هيقدر ياكل ويشرب ويعيش؟ ولا هنقلد الطبقة المسيطرة في فلسفة مصلحتي وأنا مالي ب الغلبان 🤔. انا اخذ مصلحتي حتي لو هدمر الاقتصاد عادي طززز؛ مصلحتك أولا

*️⃣ خلاص بلاش دولار؛ هيروح يحط فلوسه في البورصة... وطبعا نظره عالبورصة المصرية كفيلة تخليك متعديش في شارع الشريفين في وسط البلد اللي فيه مقر البورصة.

*️⃣ خلاص عملات رقمية؛ طيب هل المواطن اللي عاوز يأمن نفسه يستحمل تقلباتها؟ ممكن فلوسه تتضاعف او تنزل النص.

*️⃣ خلاص الراجل يروح فين؛ يروح فين... خلاص يشغلهم... بوستات لازم تشغلوا فلوسكم وجو عارفين عشروميت مليار دول يفتحوا هبليون مشروع... يلا شغل الفلوس... اهلا بيكم في المستريحين والنصابين.

*️⃣ بجد بوستات متعملوش كذا عشان كذا... ناس قادرة علي ادارة فلوسها وتشغيلها وقاعدة تنظر علي الغلابة اللي ممكن دي اخر فلوس في حياتهم او مكافأة نهاية خدمة ولا ايتام ودا ميراثهم او او... نظرة تعالي عالناس دي وانتم ليه عاوزين Risk Free روحوا شغلوا فلوسكم.

*️⃣ مفروض كل النصابين في مصر يعملوا أحلى خطاب شكر للناس دي؛ لانهم بيزقوا الناس زق ويخلوهم زباين للنصابين... ناس اتولدت موظفين وعاشت حياتها موظفين... ميعرفوش مخاطرة... صح أو غلط مش دا الموضوع؛ النقطة ان الوضع الحالي هو كده... فيروحوا للنصاب يضحك عليهم... وطبعا القانون لا يحمي المغفلين.

*️⃣ فعلا ناس قاعدة عالانتريه وتنظر علي ناس تانية حرفياً مش عارفين يعملوا ايه؛ ظروف تخلي كل مشروع حتي يخسر؛ واي حاجة هتحظ فيها فلوسك هتلبسها... العقارات مش هتتباع؛ والمشاريع بتخسر؛ والدولرة هتدمر الاقتصاد ؛ مفيش ذهب يكفي كل الشعب؛ وفوايد البنوك لا... طيب ايه الناس تعمل ايه..

⬅️⬅️ البوست دا مبقصدش بيه أقدم حلول؛ أنا بس بقول للناس وسعوا النظرة ومتبقوش عايشين في تخيلات مثالية.. الوضع مبقاش انتا بتختار بين خيارات صح وغلط فالموضوع سهل؛ الزمن بقي صعب والخيارات كلها أسوء من بعض. مفيش رفاهية الأبيض والأسود.

من أسبوعين كتبت بوست خلاصة إني معرفش الدنيا في البلد والدولار والاستيراد وكله بس يومياً أصدقائي يبعتوا يسألوني (هو هيحصل تعويم تاني؛ هو الدولار هيبقى ب 20-22-25-30) هو هو.. ولما أقول معرفش بيقولوا طيب قولنا رأيك. ولإني بكرر نفس الردود فبناء عليه قررت أكتب بوست؛ فعلياً مفيهوش شيء جديد بس عشان لما اتسأل ابعت البوست للناس :D


⬅️⬅️⬅️ البوست طويل؛ فاللي مكسل يقراه ممكن يسمعه مشروع بكلام زيادة في اللينك آخر البوست؛ تسجيل صوتي ربع ساعة بودكاست بحكي فيه البوست بالتفصيل.


*️⃣ في البداية الفيدرالي الأمريكي هيجتمع يومي 3 و 4 مايو ويرفع الفائدة 0.5% كما هو متوقع؛ ومتوقع يفضل المركزي يزود في الاجتماعات التالية لغاية ما نوصل 2.0% أو 2.5%.

*️⃣ زيادة الفائدة على أي عملة بيخليها جذابه للمستثمرين؛ ودي مش أي عملة دا الدولار؛ يعني هيسحب الفلوس من منافسيه؛ المنافسين دول ممكن يكونوا اليورو وبالتالي البنوك المركزية الأوروبية هتزود الفائدة ورا الأمريكي عشان تقوي اليورو؛ وبرضك هيضعف الذهب عدو الدولار اللدود..

*️⃣ فبالتالي الذهب السنة دي متوقع له ميكملش رحلة الصعود اللي عملها وعوض خسائر 7 سنين قصاد الدولار... ويلف ويرجع تاني ويخسر... مفروض يعني مفروض.

*️⃣ بالنسبة بقى للعالم الثالث فزيادة الفيدرالي الأمريكي ثم البنوك الأوروبية من بعده هيخلي اللي حاطط فلوسه في العالم الثالث يخرج ويروحلهم بره... ودا مش لسه هيحصل؛ يعني المستثمرين مش لسه منتظرين القرار يوم 4 مايو فيقرر يوم 5 مايو يخرج... هما بالفعل بقالهم أكثر من شهرين ثلاثة بيخرجوا من الأسواق النامية. فبالتالي فكرة إن القرار يطلع يوم 4 فيوم 5 المستثمرين يخرجوا دي عبثية لإن الكوكب كله عارف قرار يوم 4 ايه.

*️⃣ نروح بقى لمصر... دلوقتي مصر عندها مشكلة أهم اسبابها خروج المستثمرين الأجانب اللي يقدر إنهم حتى الآن سحبوا 15-20 مليار دولار من السوق آخر 6-7 شهور ولسه يمكن في زيهم بالطريق.

*️⃣ المعطيات السابقة تعني إن الدولار في طريقة للصعود في مصر ومكمل يعني رحلته؛ بس نكمل المعطيات.

*️⃣ صندوق النقد الدولي في الكتالوج بتاعه في نقطتين أساسيين بيطلبهم من أي دولة يخشها؛ أول شيء هو تعويم حر.

*️⃣ بالنسبة للتعويم الحر فدا للي ميعرفش يعني أليات السوق هى اللي تحدد سعر العملة؛ العرض والطلب... مصر كانت بتستخدم شيء اسمه التعويم المدار وليس تثبيت سعر الصرف اللي كان في مصر لغاية تعويم 2016...

*️⃣ التعويم المدار يعني المركزي سايب العملة في السوق للعرض والطلب آه لكن هو عاوز سعر محدد؛ العرض يزيد يعني العملة هتقل فيخش يشتري؛ الطلب يزيد يعني الدولار هيزيد فيخش يبيع دولار فيعوض زيادة الطلب... لكن التعويم الحر يعني ارميه في المايه وسيبه للسوق... طبعاً في بلد زي مصر الشعب ملوش في الاستثمار من ناحية وبيحب يدولر؛ فهنا عادي ممكن يوصل لأي رقم تتخيله بقى وشوف بتعرف تعد لغاية كام.

*️⃣ طيب يعني أنتا يا محمد دلوقتي بتقول الدولار هيطلع أهو طالع طالع صح؟ بتقول زيادة فائدة عليه فيدعم الصعود وتعويم حر وهوبا دولرة فكده طالع صح؟ الإجابة هى اه بس مش أكيد 100% في احتمالية لا.

*️⃣ أنا قولتها في بوست سابق وبكررها؛ في شيء اسمه الاقتصاد السلوكي؛ أو سيبكم من الكلام والمصطلحات وهسألك سؤال؛ دلوقتي الفيدرالي الأمريكي زود الفائدة فالدولار بعدها في مصر (سواء دا السبب أو تصادف) زاد من 15.7 ل 18.7... وبعدين الفيدرالي زود الفائدة تاني فالدولار قفز ل 22... دلوقتي هقولك إن في لسه 5 اجتماعات تاني هيزيد الفايدة فيهم فإنتا تلقائي متوقع ايه؟ كل اجتماع ب 3 جنية يبقى في 15 جنية كمان يبقى هيقفل 35 او 40 جنية.

*️⃣ أو حتى هتقول بلاش لو كل اجتماع قادم ب 1 جنية يعني هيبقى 27 مش 22 (احنا بنتكلم اننا بعد ارتفاع ووصلنا 22)... كده يعني 22.5% ربح متوقع في 6 شهور يعني 45% سنوي... ايه الحلاوة دي أنا هشتري دولار... وانتا تقول لأصحابك وملايين بقى المصريين هيفكروا كده.

*️⃣ فالنتيجة لدا ايه هيحصل؟ هل في أي بلد فيها دولار يكفي كل الشعب لو قرر يحول فلوسه لدولار؟ فتلقائي الطلب العنيف دا الخاطئ عالعملة هيدمر الاقتصاد؛ الدولار هيقفز تلقائي ل 27 بسرعة؛ فاللي كان متردد هيقولك لا دا شكله طالع ل 30 فيخش يشتري مع الناس؛ فيوصل 30 فدا يقنع ناس أكثر تخش تشتري فيوصل 35 ثم 40 ويلا بقى عيش.... مش عاوزك تستغرب قوي بص على الليرة التركية لما الشعب جاله شوطة مضاربه نهاية 2021... في خلال شهر واحد بس شهر ارتفع الدولار من 9.5 ليره ل 16.5 ليره.. واحنا بنتكلم عن عملة عالمية موجودة في الفوركس زي الليرة التركي فما أدراك بعملة محلية موجودة داخل حدود مصر وشكراً فدي يحصل فيها ايه بالدولرة.

*️⃣ فبناء على ما سبق فممكن المركزي بالتعاون مع المالية يستخدم أدوات السياسة النقدية والمالية ويحجم الطلب... هو بفرض إنه ملتزم قصاد صندوق النقد إنه ميضخش دولار بالسوق؛ قشطة مش هنضخ بس هنقتل الطلب عالعملة فمعادلة العرض والطلب تتظبط... المهم إنه ميشجعش الناس تدولر وإلا حرفياً رغيف العيش نشوفه ب 10 و 20 جنية عادي بقى.

*️⃣ طبعاً اللي مركز ومتاهش مني هيقولي طيب صندوق النقد إنتا قولت عنده 2 حاجة في الكتالوج بتاعه؛ التعويم الحر؛ الشيء الثاني هو خروج الدولة من السوق... يعني الدولة تمارس دورها الرقابي والتنظيمي للسوق ومتبقاش هى المصنع وتنافس القطاع الخاص.

*️⃣ واللي متابع الأخبار هيلاقي الاستثمارات الإماراتيه اللي جت اشترت حصة الدولة في شركات؛ وكذلك القطرية برضك هتخش تشتري؛ وفي مفاوضات دلوقتي بين صندوق مصر السيادي والصندوق السعودي إن السعودية تشتري شركة وطنية لمحطات الوقود وتشتري محطات كهرباء سيمنز.

*️⃣ ضيف على ما سبق إن الرئيس كلف الحكومة بطرح شركات الجيش في البورصة قبل نهاية 2022 وكمان عمل برنامج لبيع حصص الحكومة في الشركات بمستهدف 10 مليار دولار سنوي ولمدة لا تقل عن 4 سنين يعني 40 مليار دولار... (مين فاكر من كام يوم لما قولت مفيش دولة بتفلس ولسه عندها أملاك كثير فبلاش تشاؤم احنا بدري على موضوع الإفلاس دا).

*️⃣ فالخبر بتاع خروج الدولة وإن كان مؤلم لينا لكنه يعني إن الحكومة بقى عندها مورد دولاري إضافي هيستمر عدة سنوات عالأقل يعني... وكمان من المشاكل والعقبات الأساسية قصاد المستثمر الأجنبي هى إنه مش هيخش ينافس شركات الدولة والجيش؛ فلو دول خرجوا من السوق فدا يشجع المستثمر الأجنبي ييجي مصر يفتح شركات فيها...

*️⃣ فالخلاصة؛ الطبيعي الدولار صاعد بس ممكن ضرر التكالب والدولرة يبقي ضرره عالاقتصاد ضخم فالدولة تشوف طريقة لمنع الصعود لعدم اغراء المواطن بالدولة؛ بس برضك متبقاس بحرق فلوس لان صندوق النقد مش هيوافق.

⬅️⬅️ التسجيل الصوتي للبوست

https://anchor.fm/mohammed-samy4/episodes/2022-e1ho9iq

تحديث

تم اضافة التسجيل الصوتي هنا في تليجرام أيضاً ك تعليق

في قرار طلع من المركزي (غير رسمي طبعاً كالعادة) وهو إن مينفعش حد مستورد يجيب للبنك دولار من أي مصدر ويتم الاستيراد بيه؛ وطبعاً الاعتراض بيكون كده هنقتل الاستيراد؛ بس تعالوا نرغي شوية.

*️⃣ في البداية كده المستورد كان بيروح للبنك يقوله عاوز مثلا 100 الف دولار عشان استورد؛ البنك يقوله مش ببيع دولار؛ فالمستورد يروح للصرافة والسوق السودا يشتري منها ويستورد.

*️⃣ شراء المستوردين من السوق السوداء بيخلي السعر بتاعها يزيد؛ ولما السعر بتاعها يزيد فاللي معاه دولار هيبيع فين؟ يبيع للسوق السوداء طبعا اللي سعرها أغلي؛ فكده محدش هيبيع دولار للبنك.

*️⃣ ولما محدش يبيع للبنك؛ فالبنك موارده الدولارية تقل؛ فبالتالي ميلاقي دولار أكثر يوفره للمستوردين فيرفض او يتأخر علي ناس أكثر فمستوردين زيادة تروح للسوق السوداء..

*️⃣ فالبلد تتحول الي مصريين في الخارج والداخل معاهم دولار يبيعوه في السوق السوداء؛ ومستوردين يشتروا من السوق السوداء ومحدش يقرب من الطرفين من البنك.

*️⃣ فالبنك المركزي قالك خلاص اللي هيجيب لي دولار من الصرافات او من أي مصدر مش هفتح له اعتماد بيه؛ اللي عاوز اعتماد اما يجيب جنية؛ أو يكون شركة بتصدر وعندها دولار.

*️⃣ هدف القرار دا يخلي المستورد يبيع الدولار اللي معاه وميشتريش من السوق السوداء؛ فكده بالعرض والطلب السوق السوداء يبقي سعرها زي البنك فبالتالي الناس هتبيع للبنك فكده البنك بقي عنده دولار فالمستورد اللي حاطط جنية وطالب اعتماد يطلع له قرار تدبير لان البنك معاه دولار أهو.

*️⃣ فهو قرار طبيعي علي فكرة وسليم؛ وصراحة مش فاهم الناس اللي بتقول هيقتل الاستيراد؛ هو بعذ اللي حصل الشهر ونص الماضيين لسه بتسأل هو لو عاوز يقتل الاستيراد هيقتله بقرار زي دا؟

*️⃣ هو يعني المستورد الشهر الماضي دا اللي كان بيروح يجيب دولار من السوق؛ كان البنك بيعمل له الاعتماد؟ لا برضك... فالبنك المركزي لو عاوزك مستوردش؛ هتحط لي دولار؛ هتحط جنية؛ هتحط يورو؛ هتحط دهب... مش هيفتح لك اعتماد يبقي مفيش استيراد... مهواش مستني القرار دا يعني... عادي من قبله وهو كان موقف الدنيا.

*️⃣ فالقرار هدفه محاربة السوق السوداء؛ والبنوك مش هتبيع دولار الا لو بيدخل لها دولار... اما قتل الاستيراد فدا بيتم بقرار زي ما وضحت... وهات العملة اللي نفسك فيها؛ لو مش عاوزك تستورد مش هتستورد...

انتا مستورد سويسري يا كابتشن وفاكر انه مستني قرار زي دا عشان يمنعك؟ 🤔🤔🤔 غريب قوي الصراحة بعد البهدلة اللي بتحصل من منتصف فبراير الناس متخيله انه منتظر قرار زي دا عشان يقفلها.


ملحوظة : مش كل البوستات هتبقي صوتي؛ عادة لو البوست شرح وتحليل؛ لكن لو تعليق علي اخبار ف عادة مش هيتحول لصوت

الصبح نزلت بوست عالفيس وكان بوست عادي فمنشرتوش هنا؛ قولت اسأل ليه ظاهره ان الأسر بقت تجيب كحك جاهز وكده وبيقل موضوع ان الناس تعمل الكحك بنفسها زي زمان.

*️⃣ توقعت إن الأسباب عادة تكون الطعم أحسن ودا مبرر منطقي؛ أو لضيق الوقت؛ أو حتى عشان خلاص الستات مبقتش تعرف خلاص تطبخ وتخبز. دي كانت المبررات اللي متوقعها.

*️⃣ لكن لقيت مبرر تاني؛ المجهود؛ ليه نتعب نفسنا ونعمل حاجة ممكن نشتريها من بره؛ ليه المجهود دا؟ طبعاً مش دايماً الرد كان صريح كده لكن دا المعنى المقصود.

*️⃣ شيء غريب قوي إن المجهود المبذول لحاجة في البيت بقى خلاص يتحسب بالفلوس... يعني أمي الله يرحمها كانت السنة الأخيرة قبل الوفاة ايديها بتترعش بشكل شبه دائم؛ لكن كانت بتحب تقوم تطبخ وحتى تخبز وتعجن لينا؛ تروح المطبخ وهي بتمشي ب 2 عكاز وتعجن بإيديها اللي بتترعش...

*️⃣ طيب هو إحنا مكناش قادرين نروح نشتري أكل وبسكويت وكيك ووو بدل ما نتعبها؟ لا طبعاً الحمد لله قادرين وعرضنا عليها كثير ونادر ما كانت تقبل والغالب كانت لا بتقوم بنفسها عشان هي حابه دا.

*️⃣ هي كانت حابه تعمل وتخبز لعيالها وأحفادها وتطبخ لهم... مش موضوع فلوس وتوفر... عمر ما المجهود اللي الست بتبذله في البيت بيتحسب ما اوفره احسن مقابل X جنية... فلما الاقى المبلغ مقبول يبقي خلاص الست تقول بلاش اعمل دا بنفسي لعيالي وبيتي.

*️⃣ اللي اعرفه ان الستات بتحب تعمل دا لعيالها عشان الحب... كان الاكل زي ما بيقولوا مخبوز ومطبوخ ب حب. فعشان كده حسابتنا احنا لما نقولها ما توفري دا ونجيب من بره؛ فالمفهوم في مخها ان مش الفلوس اللي تعوض المشاعر.

*️⃣ من صغري كنت غلس في الاكل؛ طبيعتي مش غاوي خالص معظم الاكل التقليدي؛ مش بحب قوي الطبيخ؛ مليش قوي في المحاشي والفتة 😁... فماما كانت بتطبخ لهم اكل وتطبخ لي اكل مخصوص... جهد مضاعف مبذول... بحسابات الماديات مش منطقي لكن بحسابات المشاعر منطقي جداً.

*️⃣ للاسف دخلت الحسابات المادية في البيت؛ اعمل دا لعيالي ولا اريح واشتريه؟ اقعد اشرح لعيالي واعلمهم ولا اشوف مدرسة اغلي؛ مدرس خصوصي (في سن صغير)؛ الخ الخ... بقينا نحسب المجهود اللي نعمله لبيتنا بالفلوس ولو لقينا نقدر ندفع سعره؛ نجيب غيرنا يعمله... عشان كده مش غريب لما في الطبقات الثرية تلاقي ست جايبه مربية للعيال وبشوف في النادي / المطاعم عندنا ستات جايبين مربية للعيال؛ وهي قاعدة مع صاحباتها يشيشوا ولا يحكوا... نربي ليه مهو المجهود دا اجيب مربية بكام الف جنية.

رحمة الله عليكي يا أمي؛ أول عيد في حياتي متبقيش معايا فيه 😔

كمية حوادث العربيات اللي عالتايم لاين عندي رهيبة؛ المؤسف إن بقالنا سنة ولا سنتين عمالين نقول قمة السفهه انشاء طرق سريعة HighWay وسط المناطق السكنية وكماااان تعملها 4 حارات وبدون اشارات ولا مطبات ولا كباري مشاه؛ توليف سحرية لقتل الشعب... اللي هيعدي علي رجله هيتداس واللي سايق العربية هيشوف نفسه في حلبة فورميلا 1 ويجري.

*️⃣ الفكرة إن الهدف مفقود؛ ايه الهدف من عمل كوبري عربيات (متوسط تكلفة 130 مليون سابقاً وحاليا 200 مليون جنية للكوبري الواحد دا رقم الدولة ) وكباري مشاه (متوسط تكلفة 10 الي 20 مليون بارقام الدولة)... الهدف هو الدنيا تبقي سالكة صح.

*️⃣ طيب هي ليه مش سالكة؟ هل مثلا لان في عربيات كثييير قوي راكنة صف ثاني وثالث؟

⬅️ طب ما نعمل خطة كده نجبر اصحاب العمارات علي تشغيل الجراج ك جراج فعلاً؛ ونشتري ك دولة قطع أراضي او حتي المباني اللي عملنا لها ازالة ونحول أرضها جراج؟ ونشتري جيش عربيات وموتوسيكلات للمرور يلفوا شوارع القاهرة يمنعوا الركن صف تاني؟ وبكده هتقل الازمة شوية.

⬅️ في برضك سبب وهو ان الناس مضطرة تروح بالعربيات عشان مفيش مواصلات آدمية.

⬅️ طيب تعرف ان تكلفة انشاء 1 كوبري كمتوسط يساوي تكلفة شراء 50 الي 70 أتوبيس... طبعا لو قولنا بس انشاء الكوبري بيشتغل عمالة اد كده؛ فال 50 أتوبيس دول هيشغلوا متوسط 250 شخص بشكل مباشر من سواق ومحصل وصيانة غير العمالة غير المباشرة. بالمناسبة تكلفة تطوير شرق القاهرة بس تكفي لشراء اكثر من 35000 اتوبيس.

*️⃣ ايوا بس برضك حتي لو شغلنا الجراجات وجبنا اتوبيسات هتفضل في مناطق زحمة بسبب وجود كثافة شركات ومحلات فيها.

⬅️ هنا يا سيدي ممكن تركب في الشوارع دي عداد المرور traffic counter وتشوف امتي التكدسات المرورية وتشوف حلول زي تحويلات مرورية مثلا... طلع مفيش أمل تلجأ بقي للكباري وتوسعة الشوارع.

*️⃣ دا بقي اللي انا بشوفه وبسمع عنه كشخص عادي؛ لا ليا في المرور ولا بفهم فيه لكن بشوف الدول غيرنا بتعمل ايه في أزمات المرور عندها...

*️⃣ لكن اللي بيحصل في مصر؛ شيل المناطق الخضراء ووسع الشوارع واعمل كباري.

*️⃣ طيب هل هتعمل مطبات واشارات مرور متوصله فعلا بكاميرات بتدي مخالفات فورية بحيث اللي يكسر الاشارة يتعور في محفظته فالناس تخاف؟ لا خالص هعملك طريق سريع وخلاص.

*️⃣ طيب حضرتك هتعمل خدمات مرورية في الشوارع 24 ساعة تمسك العيال اللي بتسوق عربيات اهلها؟ والعيل مهما يكون ابوه مين وعمه مين يتمسك برضك؟ لا طبعاً انتا عاوز تقطع نفس ادارة المرور وتشغلهم 24 ساعة؛ وكمان يزعلوا اولاد اصحابهم ومعارفهم ويقبضوا عليهم في الكماين؟

*️⃣ طيب هل طبقت نظام النقاط المروري بحيث الثري اللي بيجري ومش فارق معاه مخالفة ب 100 ولا 500 طز هو شاري عربية استون مارتن ولا افنتادور ولا 911 ولا ولا ولا بفلوس 10 الاف مخالفة فعادي يجري... نظام النقط المتصاعذ اللي يوصله للحرمان للابد من السواقة؟ لا طبعاً يعني عاوزنا نخسر فلوس مخالفات ليه؛ طالما بيدفع حقه يجري.

*️⃣ طيب شددت الرقابة على اصدار رخص السواقة بحيث اللي بياخد رخصة سواقة شخص بيعرف فعلا يسوق مش شخص بيعرف يستخدم ال ATM 🤔؛ لا برضك عادي وكلنا عارفين.

*️⃣ طيب صلحت الحفر اللي في الشوارع الجديدة نوفي اللس بتسبب كوارث وفقدان السواق للقدرة عالتحكم لما يلبس بعضها خاصة في الشوارع المظلمة؟ لا طبعاً اومال بتوع العفشة يشتغلوا ازاي... حرام عليك يا قطاع الارزاق.

*️⃣ طب حتي كباري مشاه كهرباء وحواجز تمنع عبور المشاه من الشارع في الأماكن اللي فيها الكباري؟ انتا مجنون؟ هل انت مجنون؟ انتا عارف كوبري كهرباء بيتكلف بتاع 20 مليون ومحتاج متابعة وصيانة؛ وانتا محتاج كده بتاع 100 كوبري يعني 2 مليار؛ وللاسف الميزانية بتاعة تطوير المنطقة دي كانت 100 مليار بس فلا تكفي كباري مشاه.

*️⃣ دا لو الهدف تحسين الحياة المرورية اليومية وتقليل الحوادث والقتلي اللي مش بيفوت يوم غير ونشوفهم... بدون الحلول السابقة وغيرها؛ هيفضل الناس تموت عادي؛ لان الناس مش في الخطة ولا الهدف اصلا بتاع الانفاق.

اظن الفيسبوك كله من إمبارح عمال يكتب على موضوع فايدة الفيدرالي ومصدوم وكده وكله منتظر الاحد تخفيض في الجنية والكلام دا... فخلاص الموضوع تم الرغي فيه كثير والكل عارف إن في زيادة بالفايدة الامريكية؛ والكل عارف برضك ان الفيدرالي هيجتمع تاني وهيزود تاني يوم 15 يونيو وهيجتمع كل شهر وهيزود كل شهر من هنا لاخر السنة عدا شهري 8 و 10 مفيش اجتماع... وعلي آخر السنة هتبقي الفايدة في أمريكا 2.5%. وبما إن الفيس بوك كله بيهري فأنا كمان ههري 😂😂

⬅️⬅️ لينك التسجيل الصوتي نهاية البوست

*️⃣ بس فعلاً في حالة رعب إكسترا الصراحة؛ بداية من إن الناس فاكرة ان الازمة الحالية والدولار طلع من 15.7 ل 18.6 الحالية بسبب ان الفيدرالي كان زود 0.25 % وعمالين يقولوا يالهوي أومال لما يزود نص ولا واحد هيحصل ايه... يعني أكن الوضع كان فله شمعه منورة لولا الربع بتاع الفيدرالي 😂.... مفيش الكلام دا.

*️⃣ كمان البوستات محسساني إن اول مرة في تاريخ البقرية والكندوز اقصد البشرية الفايدة هتوصل 2.5%... وصلت كثير وآخرها سلسلة زيادات 2017/2018 لما الفيدرالي قعد يحرك الفايدة ربع في ربع وزودها من 0.5 ل 2.5% نهاية 2018... وفي نفس الفترة عامي 17/18 دول المركزي المصري عارفين عمل ايه؟ خفض الفايدة وقتها من 19% ل 16% يعني الفيدرالي الأمريكي كان بيزود ومصر وقتها بتقلل...

*️⃣ وأكيد أكيد أكيد مرة ثالثة لا يعني ما سبق إنك تقولي (يعني قصدك المركزي هيقلل الفايدة) مفيش الكلام دا لكني بقولك حصلت قبل كده وقريب يعني الوصول ل 2.5% دي وعدت... وطبعاً لو قولنا بس الوضع الحالي العالمي صعب؛ فبرضك فترة 17/18 كانت صعبة جداً في مصر وتضخم غير مسبوق بعد التعويم اللي زاد الدولار فيه 100%؛ واخد بالك 100% مش 18% زي دلوقتي. وأكيد مفهوم إني مش بقلل من الأزمة الحالية؛ هي أزمة صعبة خاصة إن ظروفنا نفسها صعبة؛ فهي شبه شخص بيجري مسافة 2 كيلو؛ فلو في يوم هيجريها نهاية يوم شغل طويل هتبقي ال 2 كيلو طويلة قوي عكس لو هيجريها بداية اليوم... فالأزمة الكبرى مشكلتها اننا في نهاية اليوم ومش حمل جري.

*️⃣ طب اقولك حاجة غريبة وملهاش علاقة قوي بالموضوع لكنها لمجرد الرغي والمعلومات العامة؛ تعرف ان الفيدرالي كان خلى الفايدة في أمريكا في 2006/2007 ل 5.25% ؛ عارفين مصر وقتها كانت الفايدة كام؟ كانت 9% ؛ كان ولا يهمنا 😂... يلا الجماعة بتوع ولا يوم من ايامك عندكم طلعة 😂.

*️⃣ البنك المركزي المصري متوقع يجتمع يوم 19 مايو؛ ايوا لسه اسبوعين كده يقعدوا يشوفوا الوضع في البلد ويقرروا هتزيد الفايدة في مصر كام... ايوا ايوا الفايدة هتزيد في مصر.

*️⃣ طبعاً هنا الناس تقولك ايه دا يعني هتنزل شهادة 20%... لا يا سيدي مش بقولك كده؛ انتا فاكر ان الفايدة في مصر 18% 🤔🤔 اهي هي دي المشكلة لما الناس تتابع الاخبار لاول مرة فمتعرفش تفرق بين شهادة بنك استثنائية وبين فايدة الكوريدور اللي هي فايدة المركزي... يا شباب فايدة المركزي الحالية في مصر هي 9.25% ايداع و 10.25% اقراض... ايوان الفايدة 9.25% دي المركزي اللي علي اساسها بتتم تعاملات البنوك مع المركزي وايداع واقراض الليلة الواحدة وحوارات كده ملناش دعوة بيها..

*️⃣ يعني ممكن تقول بالبلدي كده لو في بنك راح حط فلوس ايداع في المركزي هياخد 9.25% مش 18% اللي الناس متخليلاها... شهادة ال 18% دي شهادة استثنائية هدفها سحب السيولة من السوق وهي بالفعل شفطت أكثر من 600 مليار جنية يعني تقريبا رايحة على 10% من ودائع المصريين كلهم... دي شهادة استثنائية هيتم الغاءها؛ امتى؟ الله أعلم بعد شهر بعد شهرين بعد سنة محدش عارف... دورها يقول للي معاه دولار او بيفكر في شراء دولار انه يشتريها من منطلق ان الدولار مفروض مش هيزيد 18% كمان ويوصل 22 جنية يعني... مفروض يعني.

*️⃣ فاضل بس نقطة وهي احنا ليه مهتمين بالفايدة الأمريكية؟ تأثيرها علينا ايه؟ باختصار كده في نوع من الفلوس بتتحرك بيكون هدفها الاستثمار صفر المخاطر؛ صناديق معاشات بقي وكده؛ عاوزين يحطوها في حاجة أمااااان... فمصر تقولهم الفايدة علي القروض /سند حكومي 14% عالجنية مثلا وامريكا بتقول 1%... طبعاً انتا هتقول وش 14% احسن من 1% ... نظريا صح بس فين المخاطرة؟

*️⃣ يعني وضع اقتصادي غير مستقر في مصر يؤدي الي ارتفاع الدولار... تخيل انا جايلك معايا 10 مليون دولار والدولار اهو ب 18.6 يعني هيبقوا 186 مليون جنية ونحطهم في سند حكومي ب 14% وبعد سنة فلوسي بقت 212 مليون جنية؛ يلا انا عاوزهم دولار واطلع؛ ايه بتقول ايه الدولار ب 23 جنية وفلوسي بقت 9.2 مليون دولار يعني خسرت 8% من فلوسي 🤔🤔 فهمت بقي راس المال الساخن او اللي عاوز بدون مخاطر دا بيفكر ازاي؛ مش موضوع بتديني 14% ودا 1%؛ انتا عندك مخاطرة كبيرة ان عملتك تفقد اكثر من 14% في حين امريكا 1% مضمون.

*️⃣ نقطة كمان لما يكون في دولة بتاخد قرض عشان تسدد بيه قرض قديم؛ فلما الفايدة الأمريكية تزيد فبالتالي تزيد المخاطر؛ في تصنيف ائتماني للدول زي جو A+ و A و B و C وكده بيقيس لك المخاطر المختلفة... فممكن مصر والسعودية وألمانيا يقولوا عاوزين قرض / سندات خزينة 10 مليار دولار مثلاً علي 10 سنين... فالمانيا تاخد القرض ب 0% فايدة 😁 قرض شرعي حلال اهو 😂😂 او 0.25% فايدة اللي هي فايدة الفيدرالي الامريكي زمان... السعودية تاخذه ب 1% فايدة ومصر ب 3% ودا عشان التصنيف بتاع كل دولة.... فلما أمريكا تزود الفايدة وتبقي 1% عالدولار فبالتالي المانيا كده هتاخد القرض ب 1% والسعودية ب 2% ومصر ب 4% وهكذا... الفايدة الامريكي تَصل 3% فتلاقي القروض لمصر بقت 6 و 7%... فكده مصر تلاقي نفسها بقت تستلف ب 7% عشان تسدد قرض قديم كانت وخداه ب 4% ومعرفناش نسدده فبنستلف له جديد... فما ادراك الجديد ابو 7% دا ايه.

*️⃣ فطول ما احنا سوق متوسط وتصنيفنا الائتماني بتشوف فيه حرف B كده؛ فانتا سوق مقلق؛ ومقلق وليس مرعب... بس تصنيفك بيقول بالبلدي كده خد بالك يا مستثمر وركز كويس... ممكن تخش وتكسب من السوق لكن تفقد كل مكاسبك في فروقات العملة او تواجه مشاكل في سحب الفلوس او او... طول ما احنا كده هنفضل مرعوبين من اي حركة امريكية... عاوزين قروض عشان نسدد قروض قديمة وعاوزين صناديق استثمار تخش تشتري سندات واذون خزينة... وعلى فكرة العالم كله مهتم بالسندات والاذون والاموال الساخنة.. بس مينفعش دا يكون مصدر دخلك الاجنبي الأساسي... حلو يبقي دخل اضافي ليك بس يبقي هو الاساسي ويوم ما يتعثر تنهار انتا فهنا مشكلة.

⬅️ فالخلاصة؛ نستني البنوك الأسبوع القادم واللي لو الوضع مستقر فالمركزي هيجتمع عادي يوم 19 اما لو حصلت حركة عنيفة والدولرة نجحت فنتوقع ميستناش ليوم 19 ويبدأ ياخد قرارات قاسية... ويمكن تخش معاه وزارة المالية بشوية قرارات برضك... والسياسات المالية والنقدية تتوحد علينا وننبسط كلنا 😂😂.


التسجيل الصوتي وشغال عادي يا جدعان مش لازم تنزل اي برامج؛ شغال ويب عادي

https://anchor.fm/mohammed-samy4/episodes/ep-e1i4c88

من الأمور اللي بحلم في مصر تتغير مستقبلاً وهتساعد في بيئة العمل والاقتصاد؛ ان يكون في سرعة تفاعل من المسئولين بخصوص الأخبار وخاصة خاصة الاقتصادية.

*️⃣ مينفعش تلاقي سوق الذهب اتجنن وبقي شغال مع نفسه فوق السعر العالمي ب 15% و 20% وتكون وزارة التموين المسئولة عنهم ساكته خااالص من منطلق انها في إجازة العيد؛ يعني وكيل الوزارة ولا الوزير يقطع اجازة العيد عشان موضوع زي دا؟

*️⃣ الفيدرالي يزود الفايدة واشاعات تغرق البلد ان الدولار طالع لفوق ال 20؛ تقارير ان مصر اشترت ذهب طب ليه ومنين؟ من الاحتياطي ولا من منجم السكري؛ الخ الخ... لا وزير المالية علق ولا البنك المركزي ولا الهوا أصلاً.

*️⃣ هي فلسفة خليهم يتسلوا دي لصاحبها عليه ما عليه الرئيس الأسبق مبارك؛ فلسفة مشهورة في مصر وفكرتها ان المواطن ماله ومال البلد؛ سيبه يهري واحنا نقرر وننفذ... شغالة وزي الفل بس الوضع الحالي مينفعش فيه دا.

*️⃣ دلوقتي انتا في وسط أزمة عالمية وعندنا جزء ضخم من المصريين فقد ثقته في العملة المحلية أصلاً ومفيش فينا حد الا وحوله ناس سألوه رأيك ايه احسن حاجة لفلوسنا بدل الجنية؛ ذهب ولا دولار ولا عقار ولا بتكوين ولا ايه...

*️⃣ تخيل في الوضع دا الناس قلقانه وعماله تقول يا تري ذهب؛ لالا بلاش؛ ففي جزء بيشتري فعلاً وجزء متردد... نروح سايبين تجار الذهب يلعبوا في السوق بتاعه وكذلك سوق الدولار ويسعروا كإن الدولار ب 22 وأكثر كمان... فكده المتردد بقي انتا بتزقه انه يروح يشتري... وكمان خليت اللي بيفكر في الدولار يقول شكل بتوع الذهب فاهمين وشكله هيبقي ب 22 جنية.

*️⃣ غياب المعلومات في وقت الأزمات كارثة؛ دا وقت مهم قوي نطمن الناس؛ حرفيا مفيش مسئول طلع شرح للناس الوضع وايه الخطة بتاعة مصر... ودا بيساعد ان الازمة تزيد والمواطن يقلق اكثر ويدولر ويشتري ذهب واللي معاه اي عملة ميبعش.

نعدي بس الازمة ونرجع تاني ننفض للمواطن؛ بس المرة دي لما ننفض له فممكن دا يخليه يعمل تصرفات عشوائية تسبب كوارث للدولة متقدرش تلمها أصلاً...

⬅️ وعشان هتسأل نفس السؤال اللي بجاوبه معرفش وبتقالي تتوقع ايه برضك؛ فأنا متوقع هبوط الذهب محلي والأرقام الغريبة الماضية دي منشوفهاش تاني لفترة طويلة... والدولار مش متوقع خالص يحصل قفزه فيه لما البنوك تفتح؛ كبيره يتحرك بسيط لكن مفيش قفزات... والفايدة بتاعة المركزي متوقع تتحرك من 9.25% الحاليه ل 10.5% مثلاً... طبعاً دا كله بفرض ان الدولة هتعرف تلم السوق السوداء ؛ لو متلمتش وحصلت دولرة؛ هنزود بقي 2% والدولار يتحرك ووو... أنا لا اتوقع ولا اتمني السيناريو الثاني؛ دا ضرر كارثي لينا ك مصريين قبل ما يكون ضرر عالدولة وعجز موازنتها. لكن في النهاية تبقي اننا بنتوقع بناء علي تخمين لان المعلومات محجوبة.

الأرقام الرسمية للتضخم أعلنت وهي نقلاً عن صفحة EconomyPlus

التضخم السنوي لإجمالي الجمهورية يسجل 14.9% في أبريل مقابل 4.4% في نفس الشهر من العام الماضي،

بعد ارتفاع أسعار الطعام والشراب بنسبة 29.3%، في مقدمتها الخضروات بنسبة 66%، والزيوت والدهون 36.6%.

التضخم السنوي في مدن #مصر بلغ 13.1% في أبريل مقابل 10.3% في مارس

⬅️ طبعاً احنا حاسين بالغلاء قوي وهما قايلين التضخم في الخضار 66% والزيوت 36% والأكل قرب ال 30%... رقم 14.9% دا يشمل كل حاجة يعني ايجارات ومصاريف مدارس وخدمات زي سعر المكالمات ووو... فال 14.9% متوسط


⬅️ كمان ملحوظة : التضخم علي أساس سنوي؛ يعني بيقارن مفروض الاسعار في أبريل 2022 ب أبريل 2021 وليس شهري يعني مش بيقارن سعر أبريل ب سعر مارس.

تقرير التضخم والتفاصيل من موقع الجهاز المركزي للي حابب يشوفه

202251082942_البيان الصحفي 4-2022.pdf

تخيل معايا إنك بتقول هو النهاردة درجة الحرارة 30 هنا في مصر فيا ترى الجو كده كويس ولا وحش وكان قدامك 3 أشخاص.

⬅️ الأول جاي حالاً من شمال أوروبا ودرجة الحرارة العظمى عندهم الأيام دي 15... تلقائي هيقولك ايه الحر الفظيع دا.

⬅️ الثاني مصري عادي فهيقولك قشطة 30 دا جو ظريف مش الحر قوي فعادي يوم جميل.

⬅️ الثالث بقى كان جاي من الخرطوم وعندهم هناك 46 فيقولك فين الحر حضرتك؟ دا احنا في ديسمبر ساعات بتجيب 31 دي... الجو تحفة.

*️⃣ الثلاثة قالوا كلام غير بعض رغم إن الموقف واحد وكمان موقف صريح ودرجة حرارة متقاسه يعني مش موقف رأي... بس بسبب اختلاف الأساس الفكري اللي بيقيسوا بيه فالثلاثة قالوا غير بعض.

*️⃣ خد بقى دا في أي موقف بيحصل وتلاقي خلاف عليه... مش شرط دائماً المختلف يكون بيكذب أو بيضلل؛ هى الفكرة بس إنه بيقيس بمسطرة مختلفة

*️⃣ طبعاً ممكن دا يتفهم إن كل شيء في الحياه نسبي ومفيش صح وغلط وكله سلطة؛ هنا بقى الخدعة؛ كل شيء نسبي بس النقطة هى إن في نواة وأساس مفروض يتفق عليه فأي قياس غيره هيبقى غلط.

*️⃣ يعني مثلاً فوق أنا بقول هنا في مصر؛ يعني أنا بقول بالنسبة لمصر ال 30 دي ايه؟ هات السوداني أو الاسكندنافي دا وخليهم يعيشوا في مصر شهور أو سنين يتطبعوا وبعدين هتلاقيهم هيقولوا على درجة الحرارة 30 زي المصري ما قال؛ ولما يرجعوا بلادهم هيحسوا إن الجو صعب.

*️⃣ فلما تشوف المرة القادمة أي خلاف؛ أي خلاف فكر الأول في الأساس الفكري للآخر؛ يعني خلاف عن الوضع الاقتصادي؛ شوف هو الآخر دا من بتوع إن الأساس هو أرقام الدولة تكون زي الفل ولا المواطن يحس إن الوضع زي الفل؟.... لو الخلاف في نقاط دينية؛ شوف الآخر دا مؤمن بالدين الإسلامي ولا المسيحي ولا ملحد ولا من أتباع الدين الإنساني الجديد... مش منطقي تكون مسلم وخلفيتك الفكرية الكتاب والسنة والآخر دين إنساني وخلفيته الفكرية وثيقة حقوق الإنسان للأمم المتحدة وبعدين تتفاجئ إنكم مختلفون.

هو مفروض الناس تهري في اي موضوع؟ بعيد يعني عن الديمقراطية وان من حق أي حد يقوا اي حاجة والجو دا؟ لكن هل المفروض أصلا ان أي حد يهري في أي حاجة؟

في رأيي الإجابة هي لا؛ مفروض يكون كل واحد مركز في مجال هو بيفهم فيه؛ ولكن ولكن ولكن

⬅️ الفيسبوك والسوشيال ادي الجميع حرية الهري ويمكن اتشهر وابقي معروف.

➡️ الناس مش لاقيه اللي مسئولين عن الكلام فعلا متصدرين؛ يعني لو كلام في الإقتصاد؛ لو في داتا وشفافية وثقة في المسئول ليكن وزير المالية؛ وهو بسرعة تصدر وتكلم... فنسبة كبيرة من الهري هتختفي... ولو الدين مثلا يلاقوا شيخ ما يثقوا فيه. وهكذا... لكن المشكلة ان الناس بتلاقي اللي متصدرين المشهد مش بيتكلموا وكمان لو تكلموا فثقة الناس فيهم صفررر... فخلاص بقي اتكلم أنا.

*️⃣ لكن فعلا المضحك ان الناس اللي عاوزة تنشر الهبد؛ شغالة بحماس عنيف؛ والناس اللي ضد الهبد تقولك بلاش هري هقعد ساكت؛ فصوت الهري يبقي عالي... وبعدين يطلع فلاحيس وهو جمع الفلحوس 😁 اللي بيحبوا يعيشوا في دور العاقل الرزين؛ يروح منتقد اللي بيردوا عالهري... من منطلق انهم سبب الدوشة؛ لو سبتم الهري يعدي كان الموضوع خلص... حاضر يا فلحوس

وبكده نضمن رسالة معاً لنشر الجهل

كنت اتكلمت في الموضوع دا زمان بس عادي نكرره؛ تفتكروا هي أم كلثوم بقت أم كلثوم عشان هي موهوبة فقط؟ طيب أي ممثل شهير أو حتى لاعب كرة قدم وصل للي هو فيه لإنه عنده موهبة؟

*️⃣ طيب تفتكروا الاعب X وحط أي اسمه تحبه بقي الهداف / المهاري/ حارس المرمي / الخ الخ عشان هو أحسن واحد فعلاً كان عنده موهبة فعلاً؟

*️⃣ في حاجة اسمها صناعة المشاهير وصناعة النجوم... الفكرة هى إن مش كفاية كونك موهوب دا كفيل يخليك أسطوري؛ يعني مثلاً هل أم كلثوم لو كانت معارضة ل 52 كانت بقت أم كلثوم اللي نعرفها؟ ولا كانت أغانيها هتتردم وسيرتها تتنسي وشكراً.

*️⃣ تعالوا أحكي لكم القصة بشكل مبسط إزاي بتتم؛ إزاي شخص بيتحول من شخص موهوب آه بس في زيه مثلا 100 او حتي 500 شخص بنفس الموهبة؛ فبعد 20 سنة يبقي الموهوب دا الأفضل في مجاله أو من الأفضل ويتعد عالأصابع. وطبعاً الكد والاجتهاد والمثابرة والشعف والحماس وكل التنمية البقرية محفوظ حقها... بس تعالوا نتكلم في جانب ثاني..

*️⃣ في البداية بيكون في شخص موهوب؛ هو عنده موهبة بجد يعني مش بطيخة... فهنا ييجي الناس اللي دورها تصنع النجوم؛ عشان نصنعك نجم لازم تبقي إنتا متوافق معانا في كله؛ شكلك؛ طريقة لبسك؛ أراءك وأفكارك وانتماءك وكله... متفق مع أفكارنا اللي هي من الأساس القيم اللي الرأسمالية بتاعتنا ك (أصحاب الريموت) زارعينها في المجتمع.

*️⃣ لما تلاقيك مناسب نبدأ نساعدك ونصرف عليك؛ بالفلوس هنجيب لك مدربين أفضل؛ بتغني؟ بالفلوس هنجيب لك ملحنين أحسن وكتاب وشعراء أعلى من أقرانك الموهوبين؛ بالنفوذ والفلوس نخلي الإعلان يتكلم عنك أكثر؛ فالناس تلفت لك... ممكن تعمل أغنية وفي موهوب آخر منافس عمل أفضل منها؛ لكن انتا معانا ومرضي عنك والآخر لا... فنخلي الإعلام يتكلم عن اغنيتك؛ التليفزيون يستضيفك؛ قنوات الراديو تذيع أغنيتك أكثر... فأغنيتك الأقل جودة تنتشر أكثر وانتا تربح أكثر...

*️⃣ مع الوقت وبمساعدة المدربين اللي علي أعلي مستوي المتوفرين لك؛ وطاقم العمل المحترف؛ مستواك هيتطور أسرع من الموهوب المنافس ليك؛ فأغانيك فعلا هتبقي زيه وبعدين تبقي أفضل منه... فتكسب فلوس أكثر فتجيب ناس أفضل فدا يخليك تتطور أسرع وأحسن من منافسك دا...

*️⃣ مع السنين ومن الاحتكاك مع محترفين؛ مهارتك تضاعفت بسبب الأمور دي اللي متوفرتش للمنافس بتاعك؛ فمن 10 او 20 سنة كنت لو قارناك بالمنافس كان هو يكسب بفارق صغير؛ لكن دلوقتي بقى الفارق لصالحك وفارق كبير وضخم فعلاً... بقيت فعلاً أفضل منه مش مجاملات.

*️⃣ طيب لو انتا في نص طريقك قررت تقلب علينا ولقينا الغرور اخدك؟ هنا القرار بيطلع؛ محدش يشتغل معاك... اه الملحن الفلاني عارف انك مشهور وكده بس مصلحته معانا احنا... قناة التليفزيون عارفه انك محبوب ولو استضافوك هيحققوا مشاهدة؛ بس مصلحتها معانا أكبر منك؛ المنتج الفلاني برضك... لو انتا ممثل يعني فمش هنعمل لك فيلم؛ ولو حتي لقيت منتج م من الشلة بتاعتنا وعملك فيلم؛ فدور العرض بتاعتنا مش هتنزل فيلمك فيها. من الاخر هنشيل الأضواء من عليك.
*

*️⃣ فمهما كنت محبوب؛ انتا مجرد ك ممثل / مغني / لاعب كرة أو رياضة... مجرد شيء ترفيهي؛ لما تختفي من قصاد عيون الناس هتتنسي والناس هتعيش عادي من غيرك... أظن كثير تابعوا نصر محروس لما قرر يقعد بهاء سلطان في بيته 8 سنين عمل دا ؛ والناس نسيت بهاء سلطان عااادي جداً.

*️⃣ فأم كلثوم لو كانت زعلت النخبة الحاكمة بعد 52 كان ببساطة تتشال عالرف؛ محدش هيعمل معاها شغل؛ مش هييجي لها أفضل الملحنين والعازفين؛ مكانتش هتتطور فنيا؛ فكان هيطلع بدالها حد تاني.

*️⃣ لما عملت شير اليوم عالفيسبوك لمقال صديقي علي محمد علي الخاص بمحمد صلاح وإنه عاوز يعمل أي حاجة عشان ياخد الكرة الذهبية؛ في ناس قالت ايه العبط دا اللي كاتبه علي؛ هو ميسي مثلا أخدها عشان مواقفه مع ولاد العم جيراننا ولاد المبقعة؟ ميسي موهوب فعلاً وأخدها باستحقاق... دا حقيقي بس هو وصل للموهبة دي ازاي؟ لو فرضنا ميسي سنة 2005 طلع له موقف يزعل ناس ثقيلة كان ايه هيحصل؟

*️⃣ لسه هو مكانش برشلونة معتمد عليه؛ فلاعب كويس بس مهواش (سيد معزة)؛ برشلونة يطلع وقتها يدين الموقف اللي مش عاجبنا للاعب الصاعد ميسي ويقرر عرضه للبيع... الأندية الكبرى تقرر متتعاقدش معاه لانها معترضه علي موقفه... يروح نادي متوسط... في النادي المتوسط هيحتك ب مدرب متوسط ومدرب لياقة بدنية متوسط وهيقابل فرق عاديه مفيش احتكاك قوي بأندية كبري في دوري ابطال أوروبا... باختصار مهاراته مش هيتم صقلها بالشكل اللي يخليه ميسي اللي نعرفه... فمكانش هيبقي ميسي اللي اخد الجوائز باستحقاق دلوقتي.

*️⃣ فلما تبص في الوسط الفني تستغرب هما إزاي تقريباً كلهم شبه بعض؛ أخلاق ومليطة وتوجه فكري وسياسي وكده... لان ببساطة اللي مش مناسب مش هيكمل وهيطلع بره.. وبالذوق يعني...

*️⃣ الموضوع دا عالمي؛ تفتكروا في ممثل ممكن ياخد الأوسكار او جايزة عالمية وهو عنده تصريحات مثلا معادية لجيرانا؛ أو معادي لفكرة افلام نتفليكس؟ ولو حصل مثلاً قولي كام %... هل دا يعبر على النسبة الحقيقية؟

*️⃣ عشان كده أي ممثل بقي مغني أو لاعب كورة أو حتي سياسي؛ عنده هدف يوصل في المنظومة؛ لازم ياخد باله من أصحاب المنظومة دي عاوزين ايه؛ ومش هقولك يسكت خالص بس؛ لا دا لازم يوضح انه معاهم... لان هييجي يوم نحتار فيه مين يعدي ويكسب؛ هيكون في قصادنا نقاط المهارة زي بعض؛ فهنرجح بقي لاعتبارات تانية غير فنية؛ اعتبارات مين محايد ومين مؤيد.

*️⃣ طلعت وبقيت مخرج مشهور وأخدت اخراج حفل أولمبياد طوكيو 2021 بس اكتشفنا انك في يوم صرحت ضدنا؛ بره يا كلب وابقى قولي هتمسك حتي اخراج مهرجان المزارطية 😁... شخص اعلامي وصلت لانك تبقي وزير في بلد عربية وبعدين نكتشف تصريح ليك ضدنا زمااان قبل ما تبقى وزير... مع السلامة...

*️⃣ فاللي انتا شايفه؛ أي كان هو مين في المنظومة الترفيهية العالمية خاصة يعني؛ موصلش هناك الا لو مرضى عنه... مهاراته موصلتش لكده الا لو كان مرضي عنه.

كذا حد طالب مني أعلق عالبرنامج الاقتصادي /الخطة / التصريحات اللي مصر أعلنتها قبل أيام للسنوات القادمة يعني هنتعامل إزاي مع الأزمة العالمية وأزمة مصر:

1️⃣ أنا مش بحب أعلق بشكل أساسي على قرارات سيادية مصرية وأكيد مفهوم ليه... من خاف سلم.

2️⃣ إتعلمت إن في مصر التصريحات حمادة وأرض الواقع حمادة تاني خالص؛ ياما طلعت قرارات جميلة كنت بصقف وأنا بسمعها من المسئولين وبعدين شوفت أرض الواقع اتصدمت... خلينا نشوف أرض الواقع هيكون في إيه.

3️⃣ مش معنى إن في حاجة هتتباع يبقي كارثة؛ لا مش لازم؛ الحكومة مدير فاشل؛ القطاع الخاص هو الأصلح للإدارة... بس عيب القطاع الخاص انه بيفكر في الفلوس وشكراً واللي ممعهوش ميلزموش ومفروض الحكومات مش بتفكر كده وبيكون أولويتها خدمة المواطن مش تكسب منه... مفروض يعني 😁...

*️⃣ المهم يعني في حالات الخصخصة دي تلقائي سلع وخدمات هتبقي مفروض أفضل لكن بسعر مش مناسب للجميع... فمفروض الدولة بتستخدم عائد البيع لمساعدة المواطن الغير قادر على سعر الخدمة... فالخلاصة؛ البيع نفسه مش مشكلة؛ المشكلة لو ضيعت فلوس وعائدات البيع وموفرتش خدمة للمواطن بيها؛ والمشكلة الأكبر لو بعت بدون رقابة حقيقية صارمة تحمي حقوق المواطن....

*️⃣ عشان تفهم النقطة الأخيرة؛ تخيل دولة باعت مصنع الصابون بتاعها الأساسي؛ المشتري طور المصنع وعمل نوعيات صابون بجودة أعلى لكن السعر أعلى؛ وبعدين صاحب المصنع لقي ان ليه أبيع الصابون لمواطنين الدولة لما ممكن اصدره واكسب اكثر؟ خلاص احرم المواطنين من الصابون أصلاً... فهنا ييجي دور الدولة اللي مفروض في العقد تقوله انتا حر بس مينفعش تحرم المواطنين من الصابون أو تشوف فكرة أي قيود تانية.

مش هطول عشان مش فاضي اليومين دول... نكمل وقت آخر

فينك مش بتكتب ليه؟

*️⃣ سؤال جميل جالي كذا مرة؛ وبيفرحني صراحة ان ناس مهتمة ومتابعة 😍 ... بس أنا مؤخراً مش قادر أكتب لخليط أسباب؛ شوية أمور مركز فيها بالشغل بتاعي ومعاهم إرهاق واستنزاف نفسي وفوقهم عدم استقرار صحي كده.

*️⃣ في كم أخبار مهول الأسبوعين الماضيين؛ من المركزي اللي زود الفايدة وطالع نازل دولار وحتي موديز اللي خلت نظرتها المستقبلية الائتمانية لمصر سلبية من مستقرة؛ وقرض صندوق النقد اللي بيتم حالياً ومفروض خلال شهرين يخلص... وحتى حوارات بعيد عن الاقتصاد زي الخناقات المعتادة في ثوابت دينية زي نقول الله يرحمها ولا لاء؛ طيب التعدد ممنوع ولا مسموح؛ طيب مش عارف ايه... المهم نجيب حاجة دينية نلطها وتبقي win-win خناقة بالنسبة لنا... المتدنين نفضوا للخناقة دي يبقي أفكارنا الوسخة عدت... ولو منفضوش وركزوا فيها يبقي شتتنا المجتمع عن التفكير في أمور أخرى.

*️⃣ دا من الأمور اللي في فترة الخمول الحالية كنت بفكر فيها؛ هو في فايدة بجد؟ هو بكره هيكون ايه.... لما ببص عالجيل اللي جاري تربيته أو بفضل مصطلح جاري تفخيخة؛ لانه لم يتربي بل هو قنبلة جاري تفخيخها لتنفجر في المجتمع.

*️⃣ لما كنت صغير كان في مفاهيم أساسية دون أن ندري مزروعة جوانا؛ حتى لو تحسها بسيطة زي احترام الكبير... دلوقتي في جيل (مبيكبرش لحد) جيل ممكن نقول تربية دارون كده؛ البقاء للأقوي وكل شيء ييجي بالذراع... زمان لو صاحب محل قال لعيال بتلعب في الشارع روح ياض العب عند بيتك؛ غالباً هيبرطموا شوية ومعلش نلعب هنا؛ يزعق لهم فيمشوا... دلوقتي متخيلين ايه يحصل؟ غالبا هيشتموه ان لم يسبوا الدين نفسه؛ ولو خرج لهم عشان يضربهم هيجروا؛ ويرجعوا بعد شوية يحدفوا المحل بالطوب.

*️⃣ عارف ان البعض ممكن يقولي لالا مش للدرجة؛ حضرتك خرج راس النعامة بتاعتك من الأرض وشوف العيال اللي بترمي طوب عالقطارات للتسلية بس؛ او اكياس مايه وبمب عالاتوبيسات برضك للتسلية. ولو شايف دي حالات فردية؛ متقلقش عددهم بيزيد.

*️⃣ أنا مش متخيل جيل اتولد؛ الأب بيروح الشغل وبالليل إما بيشوف شغل تاني أو هربان عالقهوة قاعد يشرب شيشة مع أصحابه أو يحشش... عيال مين معرفهمش؛ دول تربية أمهم...

*️⃣ والأم بقي إما استرونج اندبنت واحدة ست؛ تروح شغلها برضك ونفترض دا لدعم المنزل؛ لان الأطفال مفروض زي البهايم محتاجين علف؛ محتاجين فلوس عشان نعلفهم لكنهم بهايم فمش محتاجين تربية عقول... يلا نشتغل عشان الظروف صعبة والعلف بقي غالي... طيب والعقل بتاع البهيمة دا ايه؟ لا دا مش عقل دا مخ بقري وبيتعمل ساندوتشات لذيذة.... وطبعاً ممكن متبقاش أم بتاعة شغل يعني وكده وتبقي عادي عالتيك توك والمسلسلات الكورية والمكسيكية والعيل دا منعرفوش

*️⃣ فيبقي الأب والأم اتسحلوا في الحياة؛ وسابوا مخ البهيمة فاضي... لكن المخ دا ربنا مخلقوش يقعد فاضي؛ لازم يخش فيه داتا... فيبدأ يدور على أي مصدر داتا.

*️⃣ يفكر في المدرسة؛ اممممم... لا المدارس مش بتربي حاجة ولا حد؛ فخلاص المدرسة بلح مفيش فايدة منها.

*️⃣ يبقي الاعلام والانترنت والأفلام؛ اللي هما مركزين عالعالم البلطجي والقوة وخد حقك بذراعك والفلووووس بأي شكل... انتا تاجر مخدرات /سلاح بس جدع وبتحب أهل منطقتك وبتساعدهم... مثال جميل قوي ومتكرر بأشكال مختلفة... مفهوم مفيش مانع تبقي وسخ بس هنطلع لك جانب إنساني جميل ولطيف... ما ابن منطقتك لما قالك بنتي عيانه في المستشفي اتبرعت وساعدته وبقيت جدع اهو... طيب بالنسبة للي مات في مستشفي تانية بسبب جرعة مخدرات من اللي بتبيعها ولا سلاح 🤔 لا دي مش هنجيبها لك في الفيلم بتاعتنا.

*️⃣ في يوم من الأيام حد هيعمل مسلسل عن إبليس وإزاي هو مظلوم والبني آدمين هما السبب... هما بس يركزوا في قصة ابليس انه أب وعنده عيال وكده... هبقي ألف لكم القصة دي واكتبها في بوست لاحق.

*️⃣ المشكلة إن المركز التفكيري للتفكير بقي مشاعرك؛ انتا مبسوط؟ انتا شايف التصرف دا إيه؟ لاننا في عالم دارويني ونسبي فمفيش حاجة مطلقة اسمها صح وغلط.

*️⃣ هتقولي لا في قيم الدين؛ اهاااا؛ هنا سأسكت قليلاً؛ بس عكس المقولة الشهيرة 😁... دين مين يا ابو دين... قولي هو الأطفال والجيل تحت 20 سنة دا سمع عن الدين فين؟ المكان الوحيد اللي سمع عن الدين فيه كان في المدرسة في مادة غير إجبارية؛ غير كده ميعرفش ايه الدين دا... يعني الجيل اللي قبله كان بيعدي قصاده شوية دين؛ شوية كده خفيفة؛ يعني يلاقي يوم الجمعة الشعراوي كده في التليفزيون... يروح الجامعة يلاقي أسر دينية؛ يلاقي زمان قنوات دينية في التليفزيون... بغض النظر عن التوجهات السياسية بس كان بيشوف في حياته كلمة دين حتي لو عالحيطة مكتوبة... دلوقتي ايه 🤔 اظن لو وقفت اي حد تحت 20 سنة وقولت له قولي اسم 10 صحابة؛ أي 10 من الصحابة فمش هيعرف أصلاً... مبقولش بيقتدي بيهم ولا بيقلدهم وهو متدين؛ مجرد بس اسماءهم؛ غالباَ 90% هيفشلوا.

*️⃣ وطبعاً عشان الأجيال متحسش بافتقاد الدين؛ اخترعنا لهم الدين العلماني الإنساني؛ الدين قايم على فكرة انتا شايف ايه؟ مش هنقوله بقي ادرس فقة ولغة عربية وعلم الحديث والجرح والتعديل ووو... لالا بلاش هري وكلام فارغ؛ انتا شايف ايه؟ الحاجة كده انتا شايفها كويسة صح؟ يبقي اكيد هي حلال مهو ربنا مش هيحرم حاجة جميلة كده... الفعل دا مش مرتاح له نفسياً؟ يبقي اكيد حرام مهو ربنا مش هيكون عاوز يجرحك نفسياً... الدين المعاملة يا ابني؛ طيب هو مفروض أعامل على أساس ايه؟ على أساس انتا شايف ايه صح؛ ايه أكثر كيوت فيبقي دا من الدين...

*️⃣ انتم اعلم بشئون دنياكم يا سيدي؛ طيب الموضوع دا مش من الدنيا دا من الدين؛ لا يا سيدي انا شايفه من أمور الدنيا... كل واحد يشوف دين خاص بيه؛ والهك يبقي مخك والهوى الشخصي... ونكرر مقولة (مهو أكيد ربنا مش هيحرم كذا؛ مهو أكيد ربنا مش هيحلل كذا؛ مهو أكيد ربنا مش هيعمل) القاعدة بقت إن الناس هي اللي بتقرر لله عز وجل ايه اللي مفروض في الدين مش العكس... هو ليه ربنا مظبطش الدين بما يناسب الدنيا بتاعتنا؟ مش العكس؛ يعني مش احنا اللي نظبط الدنيا علي ربنا؛ لا العكس...

*️⃣ وعلى فكرة كلنا هنخش الجنة؛ فكرة وانتا مالك مين هيروح النار؛ مفهوم قمة في التدليس... فعلاً هو وأنا مالي ما يولع ك شخص؛ بس اللي يهمني هو ليه رايح النار عشان معملش زيه واروح زيه... مهو لو متعرفش ايه الأفعال اللي تودي النار؛ فممكن تعملها وتلبس... فهمت يا غبي ليه مفروض تفكر في دا... هبقي اكتب لدا بوست مستقل؛ بس فعلاً الموضوع بقي مبهر... تلاقي دينا بيقولنا ان الرسول حذر اننا ك مسلمين هنتفرق ل 73 فريق؛ هيبقي 72 في النار و 1 في الجنة... يعني مسلمين (نظريا) وفي النار وتلاقي المفهوم العام بقي كما قال بلال فضل ان مين الاهبل اللي فاكر ان ربنا خلق مليارات البشر يعيشوا دور كومبارس في حياة هيدخل الجنة فيها المسلمين بس... تخيل انتا تبقي قاعد قلقان انك تبقي في فرقة من ال 72 اللي ضلوا وهيروحوا النار... وتلاقيهم بيقولوا لك (اسكت مش ممكن متبقاش مسلم اصلا وتروح الجنة)... طيب معلش ابقي مسلم ليه؟ طيب ربنا بعت سيدنا محمد ليه؟ مهو مش محتاجينه في شيء لانك ممكن تخش الجنة من غيره ومن غير الإسلام أصلاً... (اتمني تاخدوا المعني ومندخلش نقاش تفسير ال 73 وانها امه الدعوة وليس امة الاجابة وكده؛ خد المعني عن مسلمين نظرياً زي الاحمدية وكده)

*️⃣ استووووب استوووب؛ مش عارف ايه اللي حصل في البوست؛ أنا مسكت الموبايل وقولت هكتب سطرين اقول فيهم إني مرهق نفسياَ وذهنيا وعضوياً فمش قادر اكتب؛ لقيت نفسي بقالي قرب الساعة بكتب أهو والبوست بقى مترين ورغي المعيز.

⬅️ بالمناسبة بالمرة موضوع البودكاست مع صديقي شريف
Sherif Sayed Abdel Gawad مماتش؛ بس المشكلة كل ما نفكر في يوم يطلع في ماتش كورة سواء محلي أو عالمي ؛ يعني فكرنا النهاردة بس طلع في ماتشات... فربنا يسهل نلاقي يوم مناسب لينا وميبقاش فيه كورة 😁دورت عالتصريح عشان مستغربه