علي فكرة تأخر اعلان البنزين الطويل دا حسسني إن في خلل في البروسيسور منتشر ؛ وهو من زمان أصلاً مش فاهم ليه…

*️⃣ البنزين معروف إن في إعادة تسعير؛ قوم إيه نقعد نتفاجئ ان في ظروف عالمية ومقلية ومشوية؛ وتلاقي عادي الدول اللي بتسعر شهري يوم 30 تقولك عادي السعر من بكره كام… بسيط قوي يعني مهواش فيلم معقد.

*️⃣ تيجي مثلا عند بوابة الرحاب؛ السكان اللي معاهم الكارت مش البادج؛ كارت NFC للدخول؛ تلاقيهم يخشوا البوابة يتفاجئوا إن في كارت ؛ تلاقيهم يقفوا وينزلوا الشماسة ويفتحوا الشباك يطلعوا الكارت؛ يعطل العربيات وراه؛ عارف بقي العربية اللي وراه متعطله؛ اوعي تقول هيستغل الوقفة ويطلع الكارت؛ لا دا هيكرر نفس السيناريو ويوصل للباب يفتكر برضك انه هيطلع كارت….

*️⃣ تروح تشتري دونات من كريسبي كريم ولا اي محل بتقف طابور بتاع 10 دقايق ولا اكثر… طابور طويل كده علي ما ييجي دورك؛ الفاترينه زجاج وانتا واقف منتظر؛ تفتكر ايه بيحصل؟ عااادي الناس تستني لغاية ما توصل الكاشير وتبدأ تتناقش اجيب انهي دونات؛ طب ما انتا واقف في الطابور وعارف ان هييجي دورك ومطلوب تختار؛ والاستاند زجاج وانتا شايفه من قبل ما ييجي دورك؛ لااا البروسيسور مش مستوعب دا.

*️⃣ طبعا في المطار تلاقي نفس الحوار؛ نوصل للبورد وتفتكر انك مفروض تطلع الباسبور… نوصل للبوابة بتاعة الباركينج ونبدأ ندور علي فكة وايه دا معناش ولا اشوف في العربية؛ كاننا اتفاجئنا اننا هندفع فلوس الباركينج.

*️⃣ يا رجل دا لو هتقابل حد؛ ورايحله تحت بيته؛ تستناك لما تبقي تحت وبعدين يفتكر انه مفروض يلبس الكوتشي ويشوف المحفظة ويشوف موبايله فين وو؛ ومش بقول متأخر لا حد يكون قاعد فاضي ويتفاجئ وقت التنفيذ

*️⃣ غالبا دا الجين بتاع الامتحانات واننا ننسي نذاكر لغاية يالهوي ليلة الامتحان؛ او احنا عايشين في انترنت اكسبلورر او شغالين بروسيسور عتيق من 10 سنين وفي تأخير…. بس بجد تتنقط من الناس اللي بتتفاجئ انها حاجة هما لو ركزوا ثواني هياخدوا بالهم…

*️⃣ ربنا يستر وييجي يوم وحاجة معروف معادها يوم السبت تلاقيها بتحصل يوم السبت عادي كده… مهواش ابتكار ولا انبهار ولا تقنية متطورة.

خبر زي دا يوضح ليه مترفعش البنزين غير ربع جنية؛ البنك المركزي مستهدف تضخم 7% مع سالب وموجب 2% رينج حركة في 2022... فاحنا لسه في الحدود المستهدفة بس بلاش نضغط عليها اكثر نروح فوق 8 ونبدأ في اللبش... كفاية علينا اجراءات الجمارك المنتظرة زي منع دخول غير المطابق للمواصفات الاوروبية اللي مفروض يتنفذ قريب وغيرها من العقبات

طيب هو عشان البوست السابق مش واضح
التضخم يعني كنت بتصرف مثلا يناير 2021 مبلغ 1000 جنية عشان تشتري مجموعة سلع محددة؛ يناير 2022 بقت 1073 يبقي تضخم 7.3%

وفي مواقع بتعمل حسابات
خش مثلا الموقع دا

https://www.worlddata.info/africa/egypt/inflation-rates.php

عندك من سنة 1979 لغاية 2021؛ تقول مثلا سنة 1985 كان مبلغ 100 جنية يساوي كام في 2021

هيقولك

فمثلا 1000 جنية سنة 1979 تساوي 100 الف جنية سنة 2021

و 1000 جنية في 2011 تساوي 3030 جنية في 2021 وهكذا

وبكده لو عاوز تعرف دخلك زاد حقيقة ولا زاد الرقم عالورق بس تقدر تعرف

المواقع دي بتحسبها بالارقام الرسمية للدولة؛ فخلي النقطة دي في بالك

أنا شوفت عالفيس النهاردة 100 بوست عن الأهلي والزمالك ومرتضى منصور وروسيا وأوكرانيا.

الغريب مشوفتش بوست واحد عن انتداب البحرين لظابط في الجيش الإسرائيلي للعمل في البحرين في مهمة كده في تحالف دولي مجهول من 34 دولة لمراقبة الإرهاب والتجارة ووو...

الأخبار دي مش مبقتش الناس تناقشها؛ دي مبقتش أصلا تاخد بالها من وجودها.

تفتكروا الإمارات هترد على البحرين 🤔🤔

من الحاجات اللي فعلاً منتظر اشوف تأثيرها عالسوق المصري؛ افتتاح العاصمة الإدارية.

*️⃣ بعيد عن انتا متفق أو مختلف سياسياً واقتصادياً لكن افتتاح العاصمة الإدارية فعلاً هيبقي مؤثر بشكل كبير من وجهة نظري وتعالى نشوف.

*️⃣ بغض النظر هيتم دا خلال 2022 او حتي 2023... هيتم تسليم عشرات وربما مئات الالاف من الشقق لأصحابها؛ وبالأمر في مئات الشركات الكبرى والوزارات للعاصمة.

*️⃣ شقق العاصمة مهياش شقق ل محدودي الدخل؛ دي شقق الطبقة فوق المتوسطة والعليا... يعني في الغالب أصحاب الشقق دي مهماش عايشين دلوقتي مع حماهم ومستنيين يستلموا الشقة عشان يعزلوا ليها... دول في الغالب عندهم شقق ثانية عايشين فيها حالياً.

*️⃣ معنى كده ان في الالاف مؤلفة من الشقق اللي مسكونة حالياً في مناطق زي مدينة نصر ومصر الجديدة والتجمعات هيتم تركها ويروح أصحابها للعاصمة الإدارية...

*️⃣ طبعاً بعضهم هيقفل القديمة لكن الغالبية هتطرح الشقق للبيع أو للإيجار؛ وللتذكير دي مش شقق الطبقة الكادحة اللي فيها عجز بالسوق؛ دي شقق من اللي بمليون وكده.

*️⃣ يعني فجأة الالاف الشقق الفاخرة هتنزل السوق ايجار وبيع... والمشكلة هتكون إن دا هيتم في وقت فيه ركود تضخمي... يعني يا باشا شقتك دي تساوي 1.5 مليون؛ طيب اعرضها للبيع... محدش يشتري... بعد 6 شهور... شقتك يا باشا تساوي 1.7 مليون؛ اعرضها ومحدش يشتري برضك... الأسعار تزيد دفترياً بس وبدون تنفيذ.

*️⃣ النقطة الكويسة شوية إن معظم الشقق القديمة في مصر مش تقسيط؛ فأصحابها مش مزنوقين يبيعوا فيحرقوا... لكن لكن الشقق في العاصمة تقريباَ كلها قسط؛ فلو لا قدر الله حصلت ازمة هيكونوا محتاجين سيولة للبيع فهنا هيروحوا للشقق القديمة.

*️⃣ كمان هيبقي في صراع الإيجار... الايجار مثلا لشقتك دلوقتي يساوي 8 الاف... دا حقيقي وبيحصل إيجار فعلاً بالسعر دا... لكن دا في الوضع الحالي؛ مش وضع فيه شقتك ومئات الشقق حوليك معروضين...

*️⃣ فبعد تسليم العاصمة وانتقال عشرات الالاف ليها؛ دا هياخد بتاع سنة مثلا يعني علي 2023؛ هيبدأ صدمة العقارات بالمناطق القديمة للبيع والايجار... واظن مش اقل من 6 شهور عشان يحصل تأثير خاصة إن العقلية المصرية عامة رافضة لفكرة العرض والطلب؛ وإحنا لو عارضين شقة للايجار ب 8 الاف وجالي زباين ب 7؛ ممكن نسيب الشقة سنة مش متأجرة ونخسر ايجار سنة ب 100 الف ولا اننا نخسر الف ايجار شهري...

*️⃣ فعشان كده منتظر اشوف تأثير تسليم العاصمة الإدارية عالسوق المصري والعقاري... طبعاً متنساش ان في عرض يومي متزايد...

*️⃣ كلاكيت للمرة الثالثة؛ السوق العقاري فيه عجز في الاسكان الشعبي؛ اللي هو تحت نص مليون؛ دا لو في عرض بيتشفط... الكلام عالعقارات من الفئة العليا...

*️⃣ طبعاً الطيبين بتوع إن الحكومة هتلغي الايجار القديمة يشوفوا حته ناشفة يقعدوا فيها... قال 1.5 مليون شقة مقفولة مهجورة داخل المدن يطلع قرار يفتحهم... يا حلاوة أومال الشقق اللي طازة وبسمسم بتاعتنا اللي علي بعد 40 كيلو من القاهرة مين يسكن فيها لما تطرحوا بالسوق شقق ب الزمالك والمهندسين ومصر الجديدة ووو للناس... انتا بتهزر يا بو صلاح؛ افتح ايدك.

*️⃣ وطبعاَ مش محتاج اوضح إن دا بوست نقاشي وإني مليش في العقارات ولا عندي... فعادي اللي فاهم ممكن يوضح ويقولي ان تحليلي غلط... اهو نشوف أفكار مختلفة

بصراحة صفقة وعرض استحواذ بنك ابو ظبي الأول علي هيرمس؛ لا أتمني إنها تكمل. او عالأقل دلوقتي شوية كده وتتكرر وتكمل

*️⃣ هيرمس في مرحلة نمو رهيبة؛ لسه مستحوذ علي بنك الاستثمار العربي؛ وبيتوسع في السوق ؛ وقطاع التمويل بتاعه للأفراد والمعروف ب ValU مكسر البلد حرفياً وحاطط عالكل سواء بنوك أو تقسيط مباشر... توسع خزعبلي وحرق وانتشار غريب.

*️⃣ للي ميعرفش هيرمس فهي مؤسسة مالية؛ يعني بتقدم خدمات مالية بس مش بنك... يعني يا سيدي عاوز تقسيط عندك فاليو بتاعتهم... عاوز تستثمر في البورصة فبتروح تفتح حساب في هيرمس وتبقي هي الوسيط بتاعك... عندك شركة كبيرة وعاوز تبيعها فتجيب هيرمس تقيم الشركة بتاعتك؛ والعكس يعني ملياردير عاوز تشتري شركة فتجيب هيرمس تقيم الشركة دي ليك... يعني من الآخر كده هيرمس بتدير الفلوس للمستثمرين وتديهم نصايح وتدبر لهم تمويلات وكله.

*️⃣ بنك ابو ظبي الاول برضك دا مهول؛ يعني هو موجود في مصر أصلاً؛ ومن كام شهر استحوذ علي بنك عودة؛ فكمان يخش يشتري هيرمس وبنك الاستثمار العربي بتاعها فدا معناه تأسيس كيان ضخم في السوق المصري... ودا شيء كويس برضك.

*️⃣ لكن هيرمس في مرحلة نمو كبيرة؛ فيا تري الملاك هيوافقوا يتباع دلوقتي ولا يرفضوا بحيث شوية وحجمهم هيكبر فممكن السعر يزيد... عرض الشراء مش مغري؛ سعر السهم في البورصة 18 وعرض الشراء ب 19 فعادي يعني مهواش رافعين السعر قوي...

*️⃣ من الحاجات الظريفة إن رؤساء الطرفين ستات؛ يعني رئيس بنك ابو ظبي بالإمارات ست؛ ورئيس هيرمس في مصر ست وهي منى ذو الفقار بنت الممثل الراحل صلاح ذو الفقار 😂..

*️⃣ كان عندي فضول أول ما سمعت الصفقة؛ فضول طفولي كده... هيرمس دا انتا بتروح لهم يقيموا شركتك ويشوفوا عرض البيع دا مناسب ليها ام لا... فدلوقتي هما نفسهم هيتباعوا؛ فشغل المعلم ل إبنه بقي؛ او هنا المعلم لنفسه 😂😂 يقيموا نفسهم لنفسهم...

*️⃣ كان فضولي الطرف الإماراتي هيجيب مين يتفاوض ويبقي المقيم واللي بيدير الصفقة يعني ؛ مهو المشتري برضك بيكون عنده طرف يقيم؛ تقوله دي ب 10 يقولك ليييه دي ب 5 في كل حته 😂😂😂... المهم الإماراتيين اختاروا بنك روتشيلد؛ ايوا بنك روتشيلد 😂😂 طبعاً معروف مين روتشيلد بقي... فانتم يا هيرمس هتقيموا جبنا لهم ولاد.... بنفسهم يقيموكم...

*️⃣ طبعا اللي هيقولي ايوا يعني البوست دا نستفيد منه ب إيه؛ هقوله ولا حاجة؛ أنا مرهق نفسيا وحسيت إني عاوز أهري في صفحتي وسط جمهوري 😂 في مانع يا كابتشن.

*️⃣ اه اللي بيسأل ليه فاليو بتنتشر بالشكل دا؛ فببساطة طريقة تقسيط اسهل من البنوك؛ فكر كده تروح للبنك وتقول عاوز كارت فيزا؛ هينزلك استعلام بيت وشغل ومخاطر ائتمان وفيلم عربي طويل... روح الكشك بتاع فاليو؛ في دقايق الفلوس معاك لو طبعا إنتا في المنظومة البنكية... ففاليو جذبت ناس كثيرة عشان سهولتها بالمقارنة بالبنوك... وبالمناسبة مفيش تقسيط بدون فوايد؛ هي بتاخد الرسوم من البائع؛ فإما انتا هتدفعها او البائع؛ تماموز يا ريس كده وضحت.

*️⃣ طبعا تأثير انتشار فاليو والحاجات دي ايه؛ هيكون بوست تاني اهري فيه برضك؛ ضمن بوستات ممكن تقولوا خواطر كده

مجرد تفكير بصوت عالي زي ما عملت في بوست العاصمة الإدارية ؛ دي بوستات تفكير بصوت عالي مش أكثر

طيب عشان البوست اللي فات عالفيس نزلته وعمل خناقة كده فلازم أوضح شيء... أنا في حاجة شخصية ونفسية عندي وضدها بشكل عنيف وهى تسليع الحياة البشرية؛ أنا مقتنع إننا بني أدمين بنتعامل مع بعض ومش بالمفهوم الغربي.

البوست اهو عشان منشرتوش في تليجرام

https://www.facebook.com/BnSamy/posts/10159668195856181

*️⃣ المشكلة في المفهوم الغربي إن الحياه بالغرب مادية جداً والموضوع مصالح صرفة؛ من العلاقات العادية لغاية سياسات الدول البراجماتية؛ مصلحتك ويولع الكون من بعد مصلحتك... حتى الدول الاسكندنافية اللي بعتبرها أفضل نموذج في الغرب هى لعبت على نقطة؛ وهى إنها قدرت تقنع الشعب إن المصلحة الجماعية هتحقق لكل شخص مصلحة فردية بشكل مضاعف؛ فبقوا يفكروا في مصلحة المجتمع عشان هيرجع المصلحة ليهم برضك.

*️⃣ في السنوات الأخيرة المجتمعات بتاعتنا اتجرفت أخلاقياً ودينياً واجتماعياً بشكل بشع... بقى في عاهات على شكل بشر؛ بتشوف حوارات زي التحرش والاغتصاب وسرقة الحقوق والمواريث وفي ظلم بيحصل للستات فعلاً وفي ظلم مضاد للرجالة في حوارات طلاق والأطفال ووو... بصوا المجتمع اتنيل على عينه وبقى زفت.

*️⃣ هنا مفروض في خلل فنفكر إزاي نصلح دا؛ اللي حاصل بقى إن العقول المبرمجة عالفكر المادي الغربي قالك أحسن شيء هو قوانين رادعة صارمة؛ كل شيء يتحط له لوائح وقوانين واللي يعديها نقطع رقبته...

أنا بقى ضد الموضوع دا كلياً.

*️⃣ وللتوضيح أنا مش ضد وجود القوانين عشان بس في غباوة بتحصل دائماً فلازم تقعد توضح البديهيات؛ لكني ضد إنك تكون متخيل إن وجود قوانين عنيف هيحل الأزمات.... وفكر معايا كده.

*️⃣ هى قوانين المخدرات في الكوكب كله ايه؟ اعدام وسجن مدى الحياه... طيب المخدرات انتهت؟ هتعمل أعنف من الاعدام ايه؟

*️⃣ طب بلاش مخدرات؛ التحرش والاغتصاب؛ هو الغرب مش عنده قوانين عنيفة؟ الست في الغرب مش هتحرج تقول إنه تم التحرش بيها ومش هيكون صورتها قصاد المجتمع وحشة ووو فسهل تبلغ... طيب ايه الأخبار هل اختفى السلوك دا من الغرب؟ تحب نشوف التقارير الغربية عن ان 100% من الستات بيتم التحرش بيهم في المواصلات و 80% بالأماكن العامة ووو.

*️⃣ طيب ايه؟ انتا معندكش قوانين صارمة وعندك مجتمع هيقف ضد المرأة؛ وهما عندهم مجتمع مع المرأة وقوانين صارمة؛ وفي الحالتين الموضوع مستمر.

⬅️ يبقى هدفنا بالقوانين انتقام وليس ردع

*️⃣ في العلاقات الزوجية؛ في رجالة بتضرب زوجاتها؛ وفي ستات بنسبة أقل طبعاً بتضرب الأزواج... هل الحل هو القوانين؟ طيب مفيش خيار نربي الناس صح ونعلمهم دينهم وأخلاقهم.

*️⃣ أحسن رادع هو الإنسان نفسه إن القرار بعدم فعل الغلط يكون نابع من الإنسان... أو زي ما كان المفكر مالك بن نبي رحمه الله بيقول بناء الإنسان وعالم الأفكار وليس عالم الأشياء والمادة.

*️⃣ يعني لو أنا هنفق 100 ساعة من وقتي في حل مشاكل زي دي؛ يبقوا 20 ساعة للتفكير في القوانين؛ و 80 ساعة عشان أحسن من افكار البشر نفسهم بحيث يكونوا هم الردع؛ الوقاية خير من العلاج؛ ويبقى القوانين اللي بتتعمل هدفها ردع من لا يرتدع؛ لإن هتفضل فئة مش محترمة ومحتاجة تاخد على دماغها.

*️⃣ لكن فكرة؛ ايه دا جوزك بيقولك مش عارف ايه؛ انتي تروحي تديله في وشه وتتطلقي منه وشوفي القانون دا هيسجن أمه ومش هيشوف عياله... والطرف الثاني تقوله ايه دا انتا تقول عليها إنها شمال وتفضحها بحيث سمعتها تروح ومتعرفش تاخد حضانة العيال وتطلقها بدون حقوق.

*️⃣ فكرة يلا نشوف الحقوق... مفروض جوزك يجيب لك خادمة؛ ويدفع لك مرتب رضاعة ومفروض هو المسئول بس عن كل لبسك ولبس عيالك والأكل وكل شيء وإنتي تقعد في البيت الخدامة تطبخ لك وتغسل وتمسح وانتي تستمتعي بالحياه.

*️⃣ ونروح للطرف الثاني نقول على فكرة مفروض متفتحش باب بيتها بدون إذنك ولا حتى تشوف ابوها بدون موافقتك... وانتا مفروض اه تصرف عليها بس تصرف اللي انتا عاوزه يعني لا مفروض عليك تجيب لها موبايل ولا حتى تشحن لها رصيد انترنت ولا حتى مفروض عليك تجيب تليفزيون ولا لبس خروج كثير؛ ولبس خروج ليه مهي مش من حقها تخرج بدون موافقتك فمش هتخرجها كثير فمش هتستهلك لبس... ومش مفروض عليك توديها مصيف ولا أي دلع... المفروض عليك كسوة طقم لبس وأكل وشرب للحياه وشكراً.

*️⃣ ايه رأيكم كده في العلاقة الزوجية دي؟ طرفين قاعدين يدوروا عالحقوق بتاعتهم... علاقة بيزنس صريحة وأي طرف يخل بالعقد نلجأ للقضاء؛ مهو بقى نزاع قضائي وعقد تم الاخلال بالبنود بتاعته.

*️⃣ لما يحصل هجوم على شيخ الأزهر لأسابيع بسبب حوار ضرب الزوجات دا؛ فنراضيهم إزاي يا عضو لجنة سياسات حزب وطني سابق؛ امممم ندور في التاريخ على شيء اسمه حق الكد والسعاية.

*️⃣ راجل عنده شغل ومراته ساعدته فيه يبقى كده هى شريكة ليه فيه؛ صح طبيعي منطقي على فكرة بالحسابات وطريقة التفكير الغربية بتاعة 1 + 1 = 2 ... حقها ولا مش حقها؟

*️⃣ طيب هل دا منطقي؟ هل كده علاقات زوجية تستقيم؟ أنا مثلاً لما بدأت دكان تك مراتي كانت بتساعدني فيه وبتروح مشاوير وترد عالعملاء وتلف شحنات وكده... هل مراتي كانت بتعمل دا عشان يبقى ليها حق في ميراث إضافي لما اموت بصفتها ساعدتني؟

*️⃣ الست بتساعد جوزها والزوج بيساعد مراته عشان دي علاقة زوجية؛ حاجة إنسانية عاوزين يبقوا أحسن؛ لكن تدخل حوارات بيزنس في الموضوع؟ أصلها صرفت وهو صرف؟ ونقعد بقى نحسب مجهودها يساوي كام... طيب هى في المقابل أخدت كام برضك؟

*️⃣ تقولك مهو لولا مساعدتها ليه مكانش بقى غني؛ طيب وهو لو مكانش بقى غني كانت هى هتعيش في نفس الحياه ومستواها؟ لو هو غني فاكيد مهياش لابسة من التوحيد والنور ولا بتاكل لحمة مرة في الشهر ولا معايا نوكيا كشاف... مهو مستواه اتحسن فوسع عليها برضك.

*️⃣ لا مهو افرض زوج معفن معملش؛ افرض اتجوز عليها؛ افرض عمل مش عارف ايه... هنا مربط الموضوع؛ تعلم الناس تحسن أخلاقهم وتفكيرهم وتعرفهم إن دي علاقات إنسانية مش بتتحسب بالورقة والقلم؛ بحيث من البداية ميبقاش زوج معفن غني بس مش هيصرف على بيته.

*️⃣ فإن الأزهر عشان يدادي بتوع حقوق المرأة يروح يخش في خناقة تسليع الحياة الإنسانية؛ يخش في نفس اللعبة اللي الغرب المادي الحقير بيلعبها علينا... ويفتح باب حقك وحقها.

*️⃣ يبقى انتا اللي مفروض آخر درع وهو الدين اللي بيخلي البشر يفضلوا بشر ؛ تقرر تدور في الدين بما يخدم مصالح الأسياد في الغرب وهو تسليع الحياة

*️⃣ بتوع حقوق المرأة وشوية العاهات دول لما يقعدوا يتكلموا بطبق سياسة إن خرج العيب من أهل العيب ميبقاش عيب... بس لما يخرج العيب من اللي مفروض معلم الفضيلة؛ فهنا كارثة... لما تستغل آخر شيء فاضل للإنسان عشان يبقى إنسان في إنك تزق في تحويل حياة الإنسان لماديات... فكده بقت تيت

*️⃣ بوست طويل وهنشره فوراً بدون مراجعة أصلاً ولا حتى غلطات إملائية ولا حتى انتظر وقت مناسب لإن نص اليوم مش مناسب... بس الموضوع بالنسبة لي طاقة سلبية من الصدمة بتاعة مشاركة الأزهر في تسليع الإنسان فلازم أخرج الطاقة بالكتابة عشان اروح أكمل شغلي

اللي بيدي حد فلوس بيكون حاجة من إثنين؛ إما هدية هبة؛ أو دين عليه... يعني لو قولنا أب غني؛ ابنه كبر فهو قال لابنه خد مليون جنية افتح مشروع ليك.

*️⃣ دلوقتي لو هو بيديله المليون جنية ك ديون؛ فهنا الفلوس دي تظل بتاعة الاب؛ يحق ليه مطالبة إبنه بيها؛ ولو مات الابن ياخد الفلوس دي الأول قبل تقسيم ميراث الابن ولو كان ميراث الابن 900 الف؛ هياخدهم كلهم الاب ولا بترك جنية للورثة عشان تسديد الدين له أولوية.

*️⃣ لو هو بقي بيديله المليون ك هدية؛ فهنا انتهت علاقة الاب بالفلوس دي؛ مبقتش بتاعته وبقت بتاعة ابنه؛ مينفعش مثلا يتخانق مع ابنه يقوله هاتلي المليون اللي ادتهالك... الرجوع في الهدية حرام شرعاً علي حد علمي... يعني بقت فلوس الابن.

*️⃣ فلو فرضنا في نفس حوار الهري بتاع الكد والسعاية؛ الابن اخد مليون من ابوه وعمل شركة وبقي اغني من ابوه كمان؛ وبعدين مات... فايه بقي نصيب الاب في ثروة الابن اللي اتعملت من فلوس الاب...

*️⃣ نصيبه هو اللي قولناه فوق؛ لو المليون سلفة يبقي ياخدها؛ لو هدية فخلاص؛ نصيبه يبقي ميراثه الشرعي وشكراً... مينفعش بأي حال من الأحوال يقول الأب إن لولا فلوسه مكانتش شركة الابن دي اتعملت وبقي بالثراء دا...

*️⃣ فليه اصلا الحوار كله عن حق للزوجة في ميراث الزوج؛ طيب حق الابن في ميراث ابوه لو اشتغل معاه ونمى له ثروته؛ والعكس برضك... حق الاب في ميراث ابنه لو ساعده؛ وهكذا بقي مهي بقت سلطة مش مواريث.


*️⃣ ففي فارق بين المواريث وبين الديون وبين الهدايا... انك تدخل الثلاثة سوى عشان تعمل كوكتيل نسوي فدا تدليس ابن تيت.

*️⃣ النقطة الأهم بقي؛ ايه حكمة يفتحوا المواضيع دي؛ دي مواضيع عايمة تماما ومستحيلة التنفيذ واقعيا.

*️⃣ افرض يا سيدي زوجة اتفقت مع جوزها ومولت الشركة بتاعته بنصف رأس المال واشتغلت معاه كمان وهما متفقين ضمنيا إنها ليها النص؛ يعني شرعا ليها بس مش قانونا لانها مش في الورق... ومشي الزمن وهي قعدت في البيت تربي عيالها والزوج كمل؛ وكبر وعجز ومات.

*️⃣ دلوقتي هي عاوزة النص بتاعها؛ هتاخده ازاي؟ هترفع قضية علي اولادها مثلا وتثبت حقها؟ طيب ابن رفض هيروح مقاطع امه ومقاضيها. هي الاسر ناقصة تفكك أصلاً لما تدخلوا حوارات نفسيه وليا حق كذا ووو.

*️⃣ عشان كده ربنا قالها بشكل واضح؛ إذا تداينتم بدين فأكتبوه... ليك فلوس اكتبها؛ هتسيبها بدون كتابة هتولع الدنيا وتعمل كوارث في العيلة وتدمر الأسرة... فمش عشان مش عاوزين تقولوا للناس اكتبوا ديونكم؛ تقولوا يلا نولع في العائلات.

لما طلع زوج ممثلة قال إنه مش هيقبل إن مراته تتخن؛ وإنه متجوزها عربية سبور وهي لازم تفضل عربية سبور

*️⃣ انتقدوه بتوع المحن النسوي والتلزيق؛ مع إنك لما تفكر تلاقي دا هدفهم

*️⃣ معلش فكر معايا؛ وهنتكلم في التالي بشكل براجماتي مادي تام

*️⃣ دلوقتي إنتا بتقول للراجل مراتك مش ملزمة تساعدك ولو عملت دا يبقي بمقابل؛ ومش ملزمة تطبخ لك؛ ومش ملزمة ترضع عيالها وعيالك؛ ومفروض تجيب لها خدامة..

*️⃣ حلو تمام موافقين؛ بس دلوقتي هو هيتجوزك ليه؟ مفضلش غير جمالك

*️⃣ يبقي هو هيصرف عليكي مقابل دا؛ الشكل والجمال والعلاقة؛ زهق منك بعد شوية حقه يروح يجيب واحدة تانية تديله دا؛ أومال هو هيصرف فلوسه ليه؟

*️⃣ يعني كان العرف الاجتماعي إنك بتاخد شوية جمال وشوية مساعدة وتطبخ لك وتنظف البيت وتربى عيالك ووو.. فانتا صرفت واتجوزت وبتصرف كل شهر مقابل الباندل دي... هي الحياة كده

*️⃣ جيت قولت شيل العيلة والبيت والأولاد والمساعدة من المعادلة دي؛ خلاص مبقاش فاضل غير الجمال والشكل

*️⃣ فحقه يطلع زوج الممثلة يقول أنا متجوزها عربية سبور ولو اتغيرت هطلقها؛ لان دا الشيء الوحيد اللي هو بياخده.

*️⃣ وعلي فكرة مش بتكلم كلام فضائي؛ دي المعادلة المادية الغربية؛ هيتجوز عشان ايه؟ يلتزم ليه

هتلاقوا بوست جميل لصديقي علي محمد علي بيناقش الموضوع دا تفصيلي

https://m.facebook.com/story.php?story_fbid=10159106437955735&id=637905734&sfnsn=scwspmo

مفهوم خنق الاستيراد شيء شبه منطقي في دولة زي مصر؛ مصر بتستورد سنوي حوالي 75 مليار دولار وتصدر ب 30 مليار دولار (خرج البترول من المعادلة)... فمن الآخر عندك عجز خزعبلي.

*️⃣ لكن المشكلة إن الثقافة البسيطة تقولك نقفل الاستيراد ونصنع ووو... فلما المستوردين يلاقوا نفسهم مش عارفين يستوردوا هيصنعوا محلي... فكرة جميلة عيبها إنه مينفعش يقولها حد فوق 15 سنة 😁.

*️⃣ عارفين مين أكبر 4 دول مصدرة في العالم؟ الصين وأمريكا وألمانيا واليابان ... الحيتان الكبار يعني ومنطقي دول عندهم إمكانيات تصنيع من الإبرة للصاروخ؛ صح مش كده.

*️⃣ طيب مين أكبر 4 دول مستوردة؟ أمريكا والصين وألمانيا واليابان... اه هما هما برضك 😂😂

*️⃣ مفيش حاجة اسمها أنا هصنع كله ومش هستورد؛ دا فكر طفولي؛ كله بيستورد ومحدش برضك يتخيل ويقول أكيد الصين كل استيرادها دا مواد خام؛ لا برضك كل شيء بيتم استيراده لكن طبعا طبعا المواد الخام موجودة.

*️⃣ المعادلة في الدول بتكون ايه؟ ايه هيكل الاستيراد؟ تعمل قاعدة بيانات تعرف دلوقتي بتستورد ايه؛ وبعدين تحلل دا وتشوف هو ايه منهم ممكن تصنعه في بلدك؟ وتبدأ تاخد إجراءات لدا.

*️⃣ وزيرة الصناعة كانت وضحت بالفعل إنها بتعمل قايمة بمنتجات يمكن تصنعها محلي... طيب تصنعها محلي إزاي! غشومية برضك وفتحة صدر ويلا مش هنستورد الحاجة دي تاني وأبوكم واللي عاوزها يصنعها وكده؟

*️⃣ كده يبقي جو عنترية غبي؛ الصح تشوف إنتا محتاج إيه؟ عندك العمالة الماهرة؛ لا... طيب خلاص اعمل تدريب وتطوير مهارات... طيب بعده عندنا ال Know How التقنية؟ لا يبقي نشوف الشركات اللي عندها دا وتقولها تعالوا مصر؛ واعفاء ضريبي وجمركي 10% ودلع ووجبات ماكدونالد وكنتاكي وتسهيل ورق وكله؛ بس بشرط تعلموا المصريين وتنقلوا التقنية دي لينا... وبعد 10 سنين تلاقي الصناعة دي بقي عندك عدد ضخم من العمالة في بلدك متدربين عليها وتقدر تعمل صناعة محلية منها.

*️⃣ طبعا مصر يقال عاملة خطة لرفع الصادرات ل 100 مليار دولار... بس لازم نبقي عارفين إننا وقت ما نشوف 100 صادرات؛ الواردات هتبقي 150 عادي و 200 ودا مش فشل.

*️⃣ حاجة ثانية في الواردات محتاج تبص عليها؛ هو انتا بتستورد ايه اجباري... مينفعش نقول ان اكثر من نص واردات مصر هي قمح ولحمة وبترول ومواد كيماوية ذرة واخشاب ووو... فشوية حاجات كده كده هتستوردها... فكده قطاع كبير من الاستيراد مش رفاهية... هتعمل ايه في الخشب والورق؟ هتجيب غابات في مصر 😁. تعرفوا ان العربيات في مصر تمثل 5% من الواردات..

*️⃣ نيجي بقي للقرار الأخير بتاع المركزي بتاع الدفع ؛ القرار يعتبر تنظيمي للدفع؛ لا هيمنع حد يستورد ولا يضمن جودة استيراد ... بس اللي هيقدر يعمله هو تكلفة إضافية للاستيراد؛ فلو المستورد مش هيعرف يتصرف هيوقف الاستيراد وبكده وفرنا بشكل غير مباشرة؛ وخد بالك وفرنا ك دولة؛ لكن ك مواطن ففي سلعة مش هتيجي يبقي عرض وطلب السعر يزيد.

*️⃣ للي مش فاهم القرار فببساطة؛ كان قبل كده عاوز تستورد تعمل اتفاق مع المصنع؛ ممكن بكون السلعة بتحتاج تصنيع فيقولك ادفع 50% مقدم وبعد شهرين حاجاتك تكون اتصنعت تدفع الباقي نشحن لك... وممكن لو انتا قديم مع المصنع يعملك شوية تسهيلات؛ يعني تدفع 75% والباقي بعد شهرين ثلاثة كده تكون استلمت وبدأت تبيع... علي حسب بقي الوضع بينك وبينك المصنع. واكيد تعامل حد جديد لسه بيستورد من مصنع تحت بير سلم حاجة؛ وبين مصانع العربي لما تطلب قطع مواتير من توشيبا؛ العربي اكيد ليه تسهيلات لا نتخيلها.

*️⃣ المهم بقي كان الدفع ازاي؛ انتا اتفقت مع المصنع علي كله؛ تروح رايح للبنك تقولهم حولوا كذا دا؛ الدفعة ال 25% او ال 50% او حتي 100% حسب اتفاقك.. والبنك يحولك الفلوس.

*️⃣ النظام الجديد بقي هو إنك تروح البنك تقوله دي العقود والصفقة ب 100 الف دولار ؛ مفروض هسدد دلوقتي 50 الف وبعد شهر 25 وبعد شهر 25 الباقية...

*️⃣ البنك يقولك بص دلوقتي تحط لي ال 100 كلهم بتوع الصفقة دي؛ وأنا هبعت للبنك بتاع المصنع واقوله فلوسك مضمونة خلي المصنع يشتغل ويدينا اشعار الشحن وهنبعت له الفلوس... طيب المصنع كان محتاج ال 50% دي عشان يصنع بيها... لا مليش فيه هتاخد فلوسك لما تصنع وتدي البنك بتاعك اشعارات واوراق الشحن؛ وهو يبعت لي اشعارات الشحن.

*️⃣ فكده المصنع متكدر لو حجمه صغير ومعندوش ملاءة مالية.. لكن لو المصنع كبير عاادي معاه بس خد بالك انا كنت بقفش فلوس بدري؛ كده هتتأخر للشحن؛ فكده الفلوس هتتأخر يبقي التكلفة دي علي مين؟ الأسعار تزيد بقي عشان فلوسي بقت مؤخر مش آجل.

*️⃣ طيب نروح للمستورد؛ دلوقتي هو كان شغال ويبيع؛ يبعت دفعة للصين ثم دفعة بعدها ثم دفعة وهكذا؛ يبيع هنا ويبعت دفعات والمصنع يصنع ويبعت لها فتوصل يكون قرب يخلص المخزون يكمل بيع وهكذا... دلوقتي الوضع بقي هو لازم يحط كل فلوس الشحنة مرة واحدة؛ كلها مقدماً... طيب المصنع مش عاوز فلوسه مقدم يا عم...

*️⃣ طيب انا جامد تنين والمصنع فاتح لي اعتماد اسحب بضاعة آجل؛ لا مليش فيه حط فلوس الطلبية مقدماً... طبعا دا مش متاح للكل فكارثة توفير فلوس

*️⃣ طيب ايه هيحصل؟ سيناريوهات كثيرة؛ في شركات ثقيلة هتقول للبنك خلاص مول الصفقة؛ يعني بالبلدي كذه قرض؛ ودي تكلفة جديدة.

*️⃣ في شركات هتلاقي مشكلة أصلا إن المصنع بتاعها يرفض طريقة الدفع دي؛ فدي هتشوف وسيط صيني؛ يقبل هو طريقة الدفع دي وهو يشتري من المصنع ويسدد للمصنع بالطريقة بتاعته؛ لكن طبعاً دا ب مقابل ممكن 5% وممكن أكثر حسب الصفقة بقي...

*️⃣ يعني فلوس آجل يساوي تكلفة اضافية؛ رسوم تحويل اغلي تكلفة اضافية؛ وسيط صيني تكلفة إضافية؛ قروض للتمويل تكلفة إضافية... فالخلاص تكلفة إضافية وصعوبات..

*️⃣ لو انتا بقي صغير لا هتقدر تخلي البنك يمولك ولا عندك فلوس تكفي تمول مقدما الصفقات ولا هتستحمل تكاليف وسيط صيني... فللأسف إنتا شكلك رايح بره اللعبة.

*️⃣ حاجة علي جنب؛ البنوك هتبقي وسيط؛ بنوك الطرفين؛ فكده البنوك المصرية هتبقي عارفه كويس تفاصيل الشحنات بدقة وليس مجرد فواتير... فدا مفيد للدولة تعمل داتا بيز اكثر دقة للواردات... ومن ناحية ثانية فكر كده في البنك الصيني بقي عارف بدقة المصنع عمل ايه... الداتا دي هتروح للحكومة الصينية ومصلحة الضرايب الصينية؛ فلو مصنعك كان بيلعب شمال شوية ويدخل الدفعات كانها صفقات والحركات دي... فكده انتا كشفته لحكومته؛ فدي تكلفة إضافية كمان هيحاسبك عليها المصنع...

*️⃣ بس يا سيدي وكل ما هو مذكور هي قشور وانا متوقع ان في مستوردين عالارض محترفين ممكن يعلقوا ويوضحوا نقاط اضافية... عادي يا اهلا بيكوا... انا اصلا بشرح للشخص العادي ان في عقبات؛ تفاصيلها ايه وابعادها؛ هتفرق مع المستورد لكن المواطن عرف ان في خير كثييير خيييير

في نوعية سلع معروفة بالسلع الغير مرنة؛ يعني دي حاجة كده الحركة السعرية مش بتأثر قوي في الطلب.

*️⃣ المعروف في السلع الطبيعية هو المرونة؛ فلو زاد سعر سلعة مثلاً 10% فممكن تلاقي الطلب يقل 10% وممكن 15% وممكن غيره حسب القطاع.

*️⃣ والعكس لو نزلت سعر منتج 10% فممكن التخفيض دا يخلي السعر مناسب لشرايح اكثر فيزيد الطلب 20% عالسلعه مثلاً

*️⃣ أما بقي السلع الغير مرنة وأشهر مثال السجاير؛ فمثلاً لو قررت الحكومة بكره تخفيض سعر السجاير 25% فدا مش هيخلي الطلب عالسجاير يزيد 25% حتى؛ الناس اللي بتشرب 10 سجاير في اليوم مش هتقرر كلها تشرب 13 مهي رخصت... عادة هيفضلوا زي ما هما 10.

*️⃣ والعكس برضك ارتفاعات الاسعار المستمرة مش بتأثر؛ وأدينا شايفين أظن آخر سنوات السجاير بقت أضعاف أضعاف سعرها؛ وفي نفس الوقت شركة الشرقية للدخان بتعلن أعلى معدلات تصنيع في تاريخها ؛ يبقي الناس عادي مش بتنخفض وفي نفس الوقت بيدخل المدخنين الجدد.

*️⃣ السلع الغير مرنة دي بتكون هدف مثالي للدول في جني الأرباح؛ سلعة هفضل ازود في سعرها وأفرض عليها ضرايب وهيفضل عليها شغال ومش هيتضرر... فهي هدف مثالي لربح إضافي.

*️⃣ من الأمور المؤسفة إن خلال السنوات الأخيرة بقى في تركيز مع سلعة أخرى غير مرنة وهي الحج والعمرة؛ معظم المسلمين عاوزين يروحوا الكعبة... فنستغل دا ونغلي الأسعار 🤔.

*️⃣ الحج والعمرة يعتبروا من أكبر بنود انفاق الدولار بعد الاستيراد وخدمة الدين؛ لكن برضك مينفعش عشان بنقول أكبر بنود انك تحس انهم ضخمين؛ انفاق المصريين عامة في السياحة الخارجية سواء حج وعمره او حتي فسح في باريس حوالي 4 مليار دولار؛ ودا ولا حاجة جنب 75 مليار دولار واردات و 20-25 مليار دولار خدمة الدين...

*️⃣ المهم يعني إن الحكومة عارفه إن في كوته؛ عندي شعب لو فرضنا في 1 مليون عاوز يروح عمره... أجي اقول عندي 50 الف تأشيرة بس؛ هو كده قررنا نضيقها (يقال بقوا 20 الف)... فنلعب عرض وطلب بقي...

*️⃣ العرض والطلب كان طبيعي من شركات السياحة كل واحد يروح ياخد كوته؛ لكن طب ما نحط كده رسوم ادارية 3 الاف... العدد بقي نص مليون... طيب رسوم 5 الاف... العدد نزل ل ربع مليون... طيب رسوم 10 الاف طب 15 الف جنية... نفضل نزود ونزود وعارفين اصلا ان الكوتة المحطوطة هتوصل لكتلة غير مرنة... وانهم هيلاقوا 20 الف مصري مستعدين يروحوا بأي سعر...

*️⃣ ف ك بيزنس اجراء زي الفل؛ هحلب اللي رايح عمرة وحج؛ وكمان قللت العدد فأقلل الانفاق بره والضغط عالدولار؛ ويبقي كده زي الفل...

*️⃣ ف لما تنسي ان دي حج وعمرة وحاجات بتاعة ربنا بيتم استغلالها لتحقيق ربح... فالموضوع فعلاً صح... لكني ك محمد سامي بتضايق من استغلال حاجة روحية ودينية عند الناس للتربح منها... التربح بدون مقابل... السعودية حتي بتديك خدمات وبتشرف عالكعبة وبنية تحتيه ومجهودات ضخمة... هتكع فلوس ليها بس بتاخد مقابل... هنا مفيش مقابل؛ انتا ب تكع مقابل إنه يتم الافراج عنك والسماح لك بالسفر... فدية يعني.

يبقي المواطن بيعيط من سعر البنزين؛ ومش لاقي يجيب رغيف العيش؛ وأسعار كل حاجة غالية عليه

*️⃣ وقاعد يقول يلا بجد عاوزين مدعكة بين روسيا وأوكرانيا؛ وعاوزين دم وعاوزين الناس تتلم وكده

*️⃣ ومش بيقولوها قلش؛ لا بجد في ناس عاوزة حرب تحصل؛ غالبا عشان فكرهم عن الحروب جاي من الأفلام سواء الوثائقية أو الأكشن الأمريكاني.

*️⃣ مش متخيلين إن حروب يعني بني آدمين بجد هتموت مش استوووب مش حلو المشهد دا يلا قوموا نعيد تاني... لا هما هيكونوا بجد ماتوا خلاص

*️⃣ مش متخيلين إن سعر بترول 120 و 150 دولار دا؛ يخلي سعر البنزين عندك في مصر 15 جنية بالميت لو مكانش 20 جنية.... هل مستعد حضرتك تمون عربيتك ب 15 جنية اللتر؟

*️⃣ مش متخيل إن سعر القمح والزيت هيزيد للضعف؛ يعني شايف رغيف العيش؛ هيبقي ضعف سعره؛ المخبوزات كلها تزيد وكل حياتك تزيد.

*️⃣ طيب بالنسبة لكونك دولة مقترضة من الطرفين؟ طن ديون من اوروبا وأمريكا؛ وبرضك ماضيين قروض من الروس زي ال 25 مليار دولار بتوع المفاعل... طيب لو دخلنا منطقة كل طرف عاوز يضغط عالثاني... عقوبات اقتصادية علي الشركات الروسية؛ يعني اللي يتعامل معاها يتعاقب اقتصادياً... كده هتعمل ايه في عقودك معاهم؟

*️⃣ الموضوع كبير قوي؛ واحنا دولة من الدول المفعول به؛ يعني من اللي بيحاسبوا عالمشاريب... يمكن الاستفادة الوحيدة ان الغاز اللي بنستورده من اسرائيل هنبيعه لاوروبا وخاصة ان اسرائيل اعلنت الاسبوع الماضي زيادة التصدير لمصر 50%؛ ومحطتين الإسالة بتوع دمياط وادكو اللي رفعوا قضية تحكيم ضد مصر وكسبوها في 2018 ب 2 مليار وعملنا تسوية في 2020 بسبب عدم تشغيلهم... هيتشغلوا نار وهنصدر... بس برضك كم الخوازيق اللي هتلبسها هتفوق العائد من فروقات سعر الغاز دي.

فالاجمالي اه هتعمل مصلحة من تصدير الغاز؛ بس لا تقارن مع الخساير الاقتصادية.

*️⃣ فبلاش عشان نفسك تعيش جو الأكشن تتمني حرب بجد؛ عادي اقلش براحتك لكن يكون أمنيتك الداخلية حدوثها؛ بلاش... نفسك في حياة المراهقة دي؛ روح السينما او شغل فيلم عالكومبيوتر وعيش

الواقع مختلف عن القصص والأفلام... والتاريخ الحربي اللذوذ دا مكانش لذيذ للي عايشين فيه... الشعوب مكانتش مبسوطة والتتار بتخش بلادها ولا الموقف كان بيعدي عليهم في 5 دقايق زي ما بيعدي عليك وانتا بتقرأ التاريخ.

نسيبنا من روسيا ونسيبنا من أوكرانيا؛ ونروح نغطس لدقايق كده في التاريخ

*️⃣ الإتحاد السوفيتي؛ دولة ضخمة لكن الشيخوخة تضربها في الثمانييات؛ هوب تتفكك وكل منطقة تبقي دولة مستقلة... آخر وزير خارجية للاتحاد السوفيتي كان مسيطر علي جمهورية جورجيا جوا الإتحاد؛ تلقائي انحل الاتحاد السوفيتي فبقي رئيس جمهورية جورجيا.

*️⃣ شيفر نادرة (هو الوزير السوفيتي والرئيس الجورجي) طبعاً دكتاتور ومسك جورجيا بيد من حديد؛ وكان عنده ولاء ل روسيا ورئيسها يلتسن ومن بعده بوتين... لكن دوام الحال من المحال.

*️⃣ فساد علي وضع اقتصادي زفت علي تزوير انتخابات؛ هوبا ثورة في 2004 تنزل مظاهرات وتطيح بيه؛ طبعا بوتين كان لسه بيأسس الاتحاد الروسي ودا بيجمع الدول السوفيتيه تاني... فكان لازم جورجيا تتعلم الأدب وميخرجش حد عن طوعه.

*️⃣ ايه دا في ناس في منطقة اسمها ابخازيا مش عاجبهم الحكم الجورجي؛ وناس في منطقة تانية اسمها اوسيتيا؛ خلاص احنا بندعمهم... دول اعلنوا الانشقاق... خلاص واحنا معترفين بيهم ك دول مستقلة.

*️⃣ العالم كله؛ انتي عبيطة يا روسيا مين الدول دي؛ محدش معترف بيهم ؛ لالا انا معترف بيهم وبناء عليه هساعدهم...

*️⃣ جورجيا تعتبر المناطق دي متمردة؛ تهاجمهم فهنا المنشقين دول يطلبوا من روسيا تحميهم... وتعلن روسيا التدخل في جورجيا سنة 2008.

*️⃣ الطيران الروسي يضرب العاصمة ويحلق فوق القصر الجمهوري الجورجي لدرجة ان مرة الرئيس الجورجي بيزور مناطق اتضربت؛ حلقوا فوق الرئيس نفسه والحراسة بتاعته مكانوش عارفين هو الروس هيغتالوا الرئيس الجورجي 🤔🤔.

*️⃣ بس يا سيدي كام اسبوع وتم اجبار جورجيا علي قبول الأمر الواقع؛ مش بقول اعترفت بالجمهوريات؛ رسمي لسه محدش بالكوكب معترف بيهم؛ لكن فعليا خلاص روسيا طلعتهم من جورجيا..

*️⃣ شوية عقوبات اقتصادية عالسريع كده علي روسيا؛ فهنا بوتين اتعلم درس؛ هتقدر تعمل اللي نفسك فيه؛ بس اجهز للحرب الاقتصادية؛ عسكريا محدش هيقرب لك.

*️⃣ ويستمر بوتين في السيطرة عالدول القديمة؛ لكن عنده مشكلة مع الدول الغربية السوفيتيه؛ كلها راح لأمريكا؛ فاضل بلاروسيا ودا الرئيس بتاعها صديق بوتين الانتيم؛ وأوكرانيا اللي رئيسها حليف برضك.

*️⃣ نجاح الاطاحة بشيفر نادرة في جورجيا شجع الشعب الأوكراني يعمل نفس الموضوع؛ ثورة في أوكرانيا تطيح بالرئيس الحليف؛ وبتصدر المشهد كذا شخص معادي ل بوتين صراحة؛ وتحاول روسيا تغتال المرشح الرئاسي الأوكراني وقتها فيكتور يوتشنكو لكن الغرب يعرف ينقذه... وكده أوكرانيا بقت عدو...

*️⃣ وهنا روسيا تقرر تمشي في طريقين؛ يلا دور علي متمردين عالأرض؛ ومن ناحية ثانية تتدخل في اوكرانيا وتشجع معارضين وتحاول تسيطر عالبلد.

*️⃣ لكن مع الوقت المسئولين الاوكرانيين الموالين ل روسيا بيقلوا واحد ورا الثاني؛ وبعد ما روسيا عرفت توصل رئيي حليف وهو فيكتوو يانكوفيتش للحكم؛ لكن الشعب يطيح بيه في 2014... وكده روسيا معندهاش غير خيار واحد

*️⃣ قولت لي عملنا ايه في جورجيا؟ متمردين استقلال نعترف نخش ندعم نفصلهم؛ تمام تمام..

*️⃣ وهنا المتمردين المواليين لروسيا يسيطروا عالقرم؛. روسيا تعترف بيهم؛ أوكرانيا ترفض دا؛ الجيش الروسي يخش ويسيطر عالقرم ويفصلها عن أوكرانيا.

*️⃣ وهنا أوروبا تثور؛ دي ثاني مرة تاخد نفس القفا؛ عقوبات بقي اقتصادية علي روسيا وعنيفة؛ شركات روسية تتمنع واخر يتتوقف؛ وحتي فرنسا كانت بتصنع حاملات طائرات لروسيا؛ وخلاص اتعملوا؛ تروح تلغي الصفقة؛ ومصر لاحقا اشترتهم وهم الحاملات المسترال بتوعنا؛ دول اصلا مصنعين لروسيا والتسليم اتلغي بسبب احتلال روسيا للقرم؛ ودا يوضح ليه مصر اشترت طائرات التمساح الروسية للمسترال؛ عشان هي اصلا مصنعه لها.

*️⃣ المهم أوكرانيا حست انه دا حصل فيها عشان ملهاش ظهر؛ خلاص أنا هروح الناتو... ومفاوضات كبيرة وكثير... وبوتين يحذر ووو والعالم برضك مفيش

*️⃣ بسيطة؛ طلع الخطة التقليدية؛ في اقليمي دونيتسك ولوغانيسك فيهم متمردين؛ المتمردين يعلنوا الاستقلال عن أوكرانيا؛ فهنا الجيش الاوكراني بخش يضربهم..

*️⃣ فهنا تقرر روسيا كلاكيت ثالث مرة؛ تخش عشان تحمي الاقاليم المستقلة اللي هي اعترفت بيهم؛ ودا اللي حاصل دلوقتي... روسيا داخله تفصل الاقليمين عن أوكرانيا؛ زي ما عملت في القرم 2014 وفي ابخازيا واوستيا 2004... عادي يعني كلاكيت ثالث مرة.

*️⃣ الغرب المرة دي حاسس انه بقي مهزق؛ مش ممكن بتضرب 3 مرة نفس القفا... بس في مشكلة؛ الحرب مكلفة؛ العقوبات الاقتصادية علي روسيا هي اللي هتضر الاقتصاد العالمي مش احتلال اوكرانيا هو اللي هيضر الاقتصاد..

*️⃣ يبقي ايه الحل؛ اممممم الشغل التقليدي؛ الاعلام؛ سخن الجو؛ احشد الشعوب؛ فلسفة Uncle Sam Wants You... التسخين والاكشن والنعرات والمحن القومي دا شغال مع كل الشعوب حتي لو اختلفت الدرجة.

*️⃣ يبقي لازم نشكل رأي عام عالمي ضد روسيا؛ عشان لما نفرض عقوبات اقتصادية؛ فدي تسبب اضرار اقتصادية للمواطن؛ دا يبقي علي قلب المواطن زي العسل؛ مش مهم نموت نموت ونبقي حطينا عالروس والسوفيت.

*️⃣ وفي نفس الوقت الصين قاعدة تتفرج؛ أصلاً هي في تحالف مع روسيا وفي ظهر روسيا؛ قاعدة تشوف أمريكا هتعمل ايه عشان هي عندها حلم قديم... حلم جمهورية الصين الشعبية لاحتلال جمهورية الصين الديمقراطية 😁... الصين وتايوان يعني.

*️⃣ فأمريكا عارفه إنها لازم تاخد رد قاسي؛ بس برضك الاقتصاد مش هيتسحمل؛ ومش هينفع نحارب الروس؛ ومش هينفع نسيب الموضوع وقفا ثالث.

*️⃣ فمن هنا لازم يبقي في رد؛ ممكن عسكريا يدعموا حملة أوكرانيا ضد المتمردين؛ وركز هما ضد المتمرديين وهيقولوا بنضرب المتمردين؛ ميقدرش يقولوا بنعمل غارات علي روسيا... والعكس برضك روسيا ممكن تكون بتضرب قوات أوروبية؛ لكن هتقول انها بتضرب الجيش الأوكراني.


*️⃣ عامة أدينا هنشوف؛ لكن حتي الآن مفيش حرب؛ حتي الان نفس اللي حصل 2004 ثم 2014 بيتكرر؛ تقول حرب بس لما الدبابات توصل العاصمة وتنزل عمل أوكرانيا... غير كده فدي عملية فصل الاقليم المتمرد عن أوكرانيا..

*️⃣ نفس يعني كلامي من اسبوع؛ هو يعني من أسبوع وأنا بقول روسيا تاخد دونبسيك دا اتفهم ازاي؟ هتبعت لاوكرانيا انها هتاخدها فترد عليها اتفضلي؛ مهو مفهوم ان لازم ضرب... ايه المفاجأة والجديدة.

*️⃣ فالأعلام العالمي دلوقتي بيأهل شعوبه لتحمل اضرار اقتصادية عن طريق إثارة المحن القومي جواهم؛ فبلاش احنا كمان نتخدع في التسخين والمحن دا.

قوم ايه يا أخي

المصريين اكتشفوا ان تايوان جزء من الصين

*️⃣ وميعرفوش إن أصلا أمريكا مفيش دولة هي معترفة بيها اسمها تايوان او اسمها الرسمي جمهورية الصين الديمقراطية

*️⃣ وبما إن أمريكا مش معترفة ب تايوان فمفيش حاجة اسمها السفارة الأمريكية في تايوان

*️⃣ وعاملين حاجة اسمها المعهد الأمريكي ودا القائم بمهام السفارة الأمريكية لكن مفيش سفارة زي ما قولنا عشان مش معترف بتايوان...

*️⃣ والصين من زمان قايله بشكل علني ان يوم ما أمريكا تعترف ان في دولة مستقلة اسمها تايوان؛ فثاني يوم الجيش الصيني هيبقي في تايبيه عاصمتها.

*️⃣ ولو متابعين ف بايدن قريب نشر تويته قال فيها اننا بعتنا لقاحات لعدد من (الدول) الصديقة ونشر قايمة الدول وحط تايوان فيها؛ راحت الخارجية الصينية علقت وقالت له (ايه؟) اللي هو انتا بتقول تايوان دولة؟ راحوا بسرعة شايلين التويته دي.

*️⃣ قوم ايه يا اخي؛ المعلومات اللي فوق معروفة ومعلنه ومفيش جديد

*️⃣ لكن لان 99% من سكان الكوكب مش بيتابعوا أي أخبار؛ فمجرد بس اعادة ذكر ما سبق؛ يقولك يالهوي ايه التطورات دي؛ هي الصين خلاص عاوزة تايوان والصين بتقول تايوان جزء من الصين؛ والصين بلعت تايوان...

*️⃣ مش بعيد بكره انجلترا تعلن ارسال قوات لجبل طارق؛ فالناس تحس ان انجلترا احتلتها؛ وميعرفوش ان جبل طارق اللي في اسبانيا محتل من انجلترا 😂 بقاله قرون وتقولوا ايه دا هي انجلترا محتليه اراضي اسبانيه؛ دا تطور جديد.

*️⃣ مفيش أسهل للسياسيين من إعادة تصريحات عتيقة؛ لكن عشان في تركيز؛ فهوبا الناس تصعد لوحدها؛ ومتقدرش تمسك عالسياسي أي ابن لذينا لانه هيقولك دا نفس كلامي... فيبقي انتا اللي عملت تصعيد ضد نفسك بنفسك 😂😂😂

*️⃣ اتفاجئوا يا جدعان ب أخبار جديدة بلاش تتفاجئوا بأخبار روتينية

ايه التأثير علينا ك مصريين من الحرب الروسية الأوكرانية دي؟ يعني ملناش دعوة بيهم وهتوصل لانهي مستوي والتعبئة العامة اللي أوكرانيا هتعملها خلال 90 يوم لسه 😂😂 وكمان إن عدد الوفيات امبارح في أوكرانيا من الكورونا 6 أضعاف القصف الجوي؛ تقولش بيضربوا مباني فاضية... المهم المهم احنا بقي وضعنا اييييه ك مصرييين 🤔

1️⃣ البترول والغاز : طبعاً الإثنين دول سعرهم اتجنن ولسه؛ وقبل ما تفرح زي العبيط وتقول هيييه الغاز بقي غالي وبنكسب منه؛ افتكر إن الغاز والبترول أصحاب؛ فاللي كسبته من الغاز هتدفع أكثر منه بترول... سواء بترول بتستورده؛ أو حتى انتاج محلي وعندك شريك أجنبي بتحاسبه على حصته بالسعر العالمي للبترول... وأحب أفكركم إن الموازنة المصرية لعام 2021/2022 الحالي محطوطه علي أساس سعر بترول 62 دولار... طبعاً يقال الحكومة عاملة تحوط؛ بس تحوط بنسبة كام؟ وسعر كام؟ ولمدة أد ايه؟ دي أسرار محدش يعرفها... الخلاصة البند دا هيزعل قوي قوي قوي.

2️⃣ السياحة : السياحة الروسية والاوكرانية تقريباً 50% وساعات أكثر من السياحة اللي بتيجي مصر عامة. ومش عاوزك تستقل بأوكرانيا وان عدد سكانها 44 مليون... فحسب الحكومة هناك فإن سنة 2021 مصر كانت 2 أكثر مكان الأوكرانيين بيسافروا له بإجمالي 1.5 مليون سايح... وللتذكير فقطاع السياحة كان أخد علقة في 2020 ونام خالص؛ وفي 2021 بدأ تعافي بسيط النصف الأول من العام وحقق 4 مليار دولار؛ لكن النصف الثاني من 2021 حقق قفزة رهيبة و بقي 9 مليار دولار... يعني اول 6 شهور عمل 4 وال 6 الثانين عمل 9 مليار... ودا معناه ان الشهور الاخيرة من انشط شهور السياحة في تاريخ مصر كلها وكان ممكن 2022 - كان بقي- هيحقق أحسن أرقام في تاريخ مصر.... دلوقتي خناقة كده ففكر في السياحة الأوكرانية؛ وفكر برضك في تأثير العقوبات وانهيار الروبيل عالسياحة الروسية اللي هي 25% وساعات 30% من السياحة اللي بتيجي مصر.

3️⃣ العقوبات الأمريكية : مفروض منتظر الكشف عن قايمة شركات روسية عليهم عقوبات؛ عادة أمريكا بتختار أكبر الشركات بحيث الضرر يكون ضخم عليهم... العقوبات دي يعني ممنوع حد يتعامل معاهم؛ والجهة /الدولة اللي تتعامل مع الشركات دي مش هتتعامل مع شركات أمريكية/ أوروبية... طبعاً هتقولي واحنا مالنا 🤔🤔 هقولك افرض كده تخيل حطوا شركة (روس آتوم) في العقوبات؟ دي الشركة اللي بتعملنا المفاعلات النووية بالبضعه اللي واخذين قرض 25 مليار دولار ليهم... تخيل لو انطبق عليها عقوبات 😔... طيب عندك منطقة اقتصادية روسية في محور قناة السويس برضك... الموضوع مقلق لإن أمريكا غشيمة وعاوزة تعاقب الاقتصاد الروسي بضرب أكبر شركاته... فممكن تتضرب انتا كمان هنا بشكل غير مباشر.

4️⃣ القمح : النقطة اللي مش محتاجة كلام؛ مصر أكبر مستورد قمح في كوكب الأرض؛ والعام الماضي مصر استوردت تقريبا 13 مليون طن؛ منهم 8.1 مليون من روسيا و 2.5 مليون من أوكرانيا... يعني بالبلدي كده 80% من واردات القمح في مصر جايه من البلدين دول... طبعاً طبعاً الخناقة عملت قفزة في السعر؛ ومش بس كده لكن في مشكلة ثانية... البدايل ايه؟ قمح أمريكي؛ قمح استرالي؟ طيب شايف مصر فين والبلدين دول فين؟ شايف فترة الشحن؟... روسيا وأوكرانيا بتستورد منهم بشكل سريع... السفن تتعبي في البحر الأسود وتعدي من المضايق التركية تبقي في البحر المتوسط؛ مبروك وصلت... تخيل بقي خط السير من استراليا ولا أمريكا... يعني مش بس هتشتري اغلي لكن كمان شحن اغلي بفترة أطول 😭😭.

*️⃣ الحبوب : اه مهو الموضوع مش قمح بس؛ عارف باقي الحبوب الزيتيه؛ يعني الذرة؛ عباد الشمس (دوار الشمس)؛ فول الصويا؛ الخ الخ... دول برضك من أوكرانيا وروسيا 😭 يعني نفس حوار القمح...

*️⃣ الحديد : عارف الحديد بتاع التسليح والمباني ووو... دا بيتم انتاجه من خام البليت؛ مصر عندها انتاج محلي بس مش بيكفي فبنستورد؛ حذر فذر منين؛ روسيا وأوكرانيا؛ اه يا عفريت شاطر.... عامة في بديل كويس وقريب؛ تركيا 😁 و تركيا واكله 25% من السوق المصري في الحديد دا وكده نسبتها هتزيد.

*️⃣ العقوبات تاني ؛ اه شايف الشركات الروسية اللي بتصدر لنا قمح وذرة وحديد والومنيوم ونيكل وزيوت وووو افرض مثلا مثلا يعني امريكا ضافت حد منهم في العقوبات...

⬅️ كل ما سبق دا التأثير المباشر عشان علاقاتك مع روسيا وأوكرانيا؛ في بقي تأثيرات غير مباشرة.

*️⃣ الاقتصاد العالمي هيتضرر = زيادة الفايدة في اوروبا وامريكا = زيادتها في مصر تلقائي = زيادة تكلفة المشاريع.

*️⃣ الاستقطاب العالمي هيزيد؛ يعني بالبلدي كده هنرجع لمفهوم انتا معايا ولا مع الناس التانيين؛ فالفلسفة السياسية المصرية بتاعة انا صاحب الكل مش هتكون مناسبة وقد نجبر نقف مع طرف في النظام العالمي المحدث القادم... فنختار صح بقي.

ونكتفي بهذه الجرعة المحبطة بس عشرات التعليقات والرسايل مصرة إني اكتب في الموضوع دا... مع إني مش حابب اصدم الناس بس اهو احسن احسن عشان تحرموا تسألوا تاني 😁😂😜

درس أمريكي من قرنين للروس؛ خش العاصمة ومضيهم علي كمبيالات وبيعهم أرضهم

*️⃣ قبل قرنين كانت أمريكا دولة مستقله حديثاً وشابه وقوية؛ مكانتش أمريكا بالشكل الحالي المعروف؛ كانت مجرد ولايات الساحل الشرقي والمنتصف وشكراً... الغرب كانت اما تبع المكسيك الأسبانية أو بريطانيا أو فرنسا.

*️⃣ بعد استقلال أمريكا بشوية قالت يلا نتوسع؛ اخدوا قرار غلط الأول وهو توسع عسكري صريح علي حساب البريطانيين وقالك نروح كندا فحصلت حرب 1812-1815 وفشل الامريكان في دخول كندا والإنجليز عملوا هجوم مضاد لاحتلال أمريكا؛ اه نجح في دخول واشنطن وحرقوا البيت الأبيض لكن فشلوا في السيطرة... أسبانيا قالت تخش مع الانجليز؛ أخدت علي عنيها وخسرت فلوريدا لصالح أمريكا... اه فلوريدا مكانتش أمريكية 😂 كانت مكسيكية.

*️⃣ بعد الحرب دي أمريكا اتعلمت درس؛ الغشومية مش دايماً شغالة؛ الفلوووووس الفلووووس..... فبقوا يروحوا لمناطق كده يقولوا لهم خدوا فلوس وتعالوا انضموا؛ يا فرنسا انتي عندك لبش في أوروبا وعاوزة فلوس؛ خدي فلوس وسيبي منطقة كذا...

*️⃣ هزيمة أسبانيا كانت صعبة عليها وأصلا وضعهم كان زفت؛ فلما المكسيكيين ثاروا ضدهم حصلوا علي الاستقلال... المكسيك عاوزة فلوس عشان استقلت وهي مفلسة... تجيب منين؟ من أمريكا طبعاً.

*️⃣ ظروف المكسيك الصعبة خلت ولاية مكسيكية بعيدة شوية عن السيطرة وهي تكساس تقرر الثورة عن المكسيك وتستقل.. جمهورية تكساس الجديدة عاوزة فلوس عشان تدعن نفسها ضد المكسيك؛ مين يمولها؟ أمريكا طبعاً تقرض تكساس.

*️⃣ المكسيك ترفض الاعتراف باستقلال تكساس وتحاول تستردها وتفشل؛ لكنها برضك تحذر أمريكا من الاعتراف ب تكساس وان دا هيعمل حرب... تمر السنوات وولاية تكساس تقولك اتوسع؛ اتوسع ناحية الشمال الغربي؛ في نفس المناطق اللي امريكا عاوزاها بس للتوسع دا جوا ارض المكسيك.

*️⃣ المهم ييجي يوم وامريكا تبعت ل تكساس؛ ديونكم زادت؛ ما تيجوا تنضموا لأمريكا؟ وبالفعل بعد شهور وتصويت ووو انضموا... وافتكر ان دي ارض مكسيكية متنازع عليها...

*️⃣ طبعا المكسيك تحتج وتشجب وتندد؛ فامريكا تبعت للمكسيك وفد يقولهم بالبلدي... تكساس بعيدة مكنتوش هتطولوها... واصلا سيطرتكم عالشمال ضعيفة؛ وانتم عليكم فلوس كثير... خدوا قرشين كمان اهو فوق اللي عندكم... واحنا هناخد كاليفورنيا وكام ولاية كده.

*️⃣ المكسيك ترفض وتقولك كده الحرب؛ أمريكا تقول المكسيك فاكرة نفسها دولة وتعلن الحرب عليها وهوب الجيش الامريكي يسحق المكسيك.

*️⃣ ويقدر الجيش الامريكي انه يحتل العاصمة المكسيكية ويقبض عالحكومة المكسيكية.

*️⃣ امريكا كده هتحكم المكسيك؟ لا خالص؛ تعالي يا حكومة بصي امضي هنا معاهدة غوادالوبي هيدالغو... ايه المعاهدة دي... بالبلدي كده أمريكا قالت لهم احنا دمرناكم وعندكم خساير؛ خدوا 15 مليون دولار تعويضات؛ والجيش الأمريكي هينسحب وملناش دعوة بالحكم عندكم والبلد... بس تكساس خلاص مش من حقكم تطلبوها؛ انتم متنازلين عنها؛ وكاليفورنيا ونيفادا ويوتا واريزونا ونيو مكسيكو؛ بصوا انتم هتتنازلوا عن نص ارضكم؛ مساحة 1.3 مليون كم مربع... ودا تنازل نهائي يعني مش هتبقي مناطق تطالبوا بيها؛ وبالنسبة الديون اللي لينا عندكم... خلاص مش عاوزينها.

*️⃣ بس يا سيدي ودي كانت طريقة أمريكا في تشكيل أمريكا الحالية؛ فيا تري الروس هيعملوا كده؟ نوصل العاصمة ونجيب الرئيس نمضيه على انه متنازل عن المناطق الشرقية؛ وكمان يتعهد بعدم الانضمام للناتو... ولا هنحتلها بجد ونعملها شيشان ونجيب قاديروف ليها.

*️⃣ أدينا هنشوف لكن البيعه الغربية ل أوكرانيا تشجعهم يعملوا أي ابن لذينا أصلاً... دا حتي قولت الناتو هيبعت لهم وجبات عائلية من كنتاكي؛ مفيييش 😂😂😂 دا تحس انهم بيذلوهم عشان يدوهم سلاح؛ او قلقانين السلاح الغربي يقع في ايد روسيا بعد السيطرة فقالك بلاش 😁

⬅️ يا تري هنشوف معاهدة غوادالوبي هيدالغو جديدة؛ مش عارف بس الاكيد دي حرب غريبة؛ يقال دولة عدد سكانها 44 مليون هتحتل من غير ما يموت الفين جندي حتى.. دا ايه العبط دا... والأكثر كوميدية ان أوكرانيا لسه بتعمل التعبئة... زي ما يكون أوكرانيا مش عاوزة تحارب أصلاً... في حاجة مش مفهومة... أدينا هنشوف

تحديث

اوكرانيا اعلنت ان عدد الوفيات 193 مدني من العدوان الروسي في 3 ايام؛ في حين وفيات الكورونا ال 3 ايام الماضية اكثر من 900 شخص... غالبا مفروض يحاربوا الكورونا ويسبهم من الروس

في الوقت اللي احنا بنساعد المصريين على العودة لمصر من أوكرانيا على حسابهم 😁؛. وكالة يهودية اسمها شيلشيم أعلنت فتح مراكز في بولندا ومولدوفا ورومانيا والمجر عشان تساعد أي أوكراني يهودي هربان من الحرب وحابب ينتقل للحياة في إسرائيل بحيث توفر لهم كل حاجة عاوزينها.

ولاد الصايعة بيستغلوا أي ابن لذينا؛ وعندهم خطط سريعة وجاهزة؛ يعني بسرعة في 4 دول يفتحوا 6 مراكز تجميع ويتواصلوا ويفتحوا مع الخارجية بتاعتهم قناة تواصل والسفارات ووو.

بصراحة بصراحة لازم نتعلم الموضوع بتاع استغلال الفرص دا.