بعيد عن التريقة على أبل والآي فون؛ بس فعلياً شركة أبل هى الشركة الوحيدة في مجال الموبايلات اللي شغالة بخطة طويلة؛ تحس إن الآي فون بتاع 2022 و 2023 و 2024 و 2025 عندهم كخطة وقاعدين كل سنة يرسموا ويتحركوا في الخطة بتاعتهم...

*️⃣ هو اه بييجي عليهم تريقة لذيذة؛ بس زي ما قولت لصديق لي من يومين كان بيكلمني على تريقة سامسونج على أبل؛ فقولت له هى يعني لا هتبيع ولا هتتريق؛ دا كده كبت يعني.... بالمناسبة أبل هتبيع في أول أسبوعين أجهزة أيفون أكثر من اللي سامسونج هتبيعه في 12 شهر من عائلتي نوت و S مع بعض... ففي High-End لو في 10 موبايلات اتباعوا هيكونوا 7 آي-فون و 2 سامسونج و 1 من كل الشركات في الكوكب.

*️⃣ المهم بقى تعالوا أحكي لكم حاجة هتشوفوها في الآي فون 14 أو الآي فون 15 لسه منعرفش... وهو إن الآي فون هينزل بدون شريحة تركب فيه؛ هينزل eSIM بس.

*️⃣ أبل من بداية إطلاق الآي فون وهى عندها هوس التصميم؛ عاوزة تبقى حرة تماماً في تصميم التليفون؛ المشكلة إن في حاجات انتا مجبر عليها في الموبايلات وهى الحاجات اللي بتركب من بره؛ مشكلة الحاجات دي إنها بتجبرك على إن داخلياً يتحط المستقبلات اللي بتتعامل معاها... فهنا من أول يوم قررت أبل إنها تلغي شكل الموبايلات التقليدي.

1️⃣ الخطوة الأولى: التليفونات بتتفتح وتغير البطارية؛ والموبايلات بيركب فيها كارت ميموري... يبقى الآي فون ينزل بدون كارت ميموري ومقفل مش بيتغير له البطارية والجو بتاع 2007-2010-2012 لو فاكرينه دا.

2️⃣ الخطوة الثانية: كده فاضل عندنا شوية منافذ؛ أول منفذ هو منفذ الصوت... سنة 2012 نغير لمنفذ الـ Lightning ودا بيدعم نقل الصوت برضك؛ سنة اثنين ثلاثة الناس اتعودت عليه خلاص وبقى في أكسسوري كثير؛ سنة 2016 نلغي بقى منفذ الصوت ونحط للناس دلوقتي السماعة الـ Lightning مؤقتاً لغاية ما يتعودوا.

3️⃣ الخطوة الثالثة: عندنا منفذ الشريحة؛ مشكلة دا بيخلينا نحط ال Chip اللي بتقرأ الشريحة عالحرف؛ عاوزين نلغيه بس نعملها إزاي دي؟؟؟ سنة 2013 أبل تسجل براءة اختراع لشريحة وهمية وهى تعرف حالياً باسم eSIM؛ وهى إن في Chip جوا الموبايل بتحاكي وظيفة الشريحة.

*️⃣ طيب أنا دلوقتي عندي مشكلة؛ لسه مش مدعومة من شركات الاتصالات حتى سامسونج نزلت دعم eSIM في ساعة Gear S2 سنة 2015/2016 ومحدش عبرها ولا دعمها؛ جوجل نزلت eSIM في بيكسل 2 بس محدش دعمها قوي خاصة إن جوجل منزلها عشان Fi وإن بيكسل بيبيع في السنة كلها زي أول 24 ساعة نزول الآي فون...

*️⃣ فهنا تطلع أبل في 2017 وتطلق الساعة 3 بدعم eSIM وتقول إنها مدعومة في 9 دول فقط. وهنا يبدأ سباق الدعم العالمي؛ 6 شهور وتلاقي eSIM مدعومة في 17 دولة.

*️⃣ كده جه وقت الآي فون وتنزل أبل الآي فون Xs سنة 2018 وتقول للناس هو زي القديم مفيش حاجة غريبة عليه وهو تركيب شريحة واحدة؛ لكن في اوبشن اضافي؛ عاوز شريحة اضافية فهى eSIM؛ طبعاً شركات الاتصالات تتوسع في دعم الشريحة... ونوصل سنة 2021

*️⃣ دلوقتي eSIM بقت مدعومة في أكثر من 66 دولة؛ فتيجي أبل تعلن إن الآي فون 13 هيبقى أول جهاز ليها يدعم 2 شريحة eSIM؛ انتم خلاص أهو بقالكم 3 سنين اتعودتم على eSIM؛ هااا ايه رأيكم تخلوا ال 2 زي بعض eSIM؟ ولو عاوزين واحدة عادية فبرضك موجودة.

*️⃣ نعد مع بعض بقى 2 سنة؛ أبل هتقول خلاص اتعودتم على ان تليفونكم فيه 2 شريحة eSIM صح؟ مفيش شريحة عادية بقى... نتوقع دا في الآي فون 15 يعني سبتمبر 2023.

*️⃣ كده أبل انهت كروت الميموري ومنفذ السماعة وبالنسبة للشريحة فاضل سنة او اثنين؛ فاضل ايه؟ منفذ الشحن صح؟

4️⃣ الخطوة الرابعة : نرجع لمؤتمر 2020 السنة وأبل تعلن عن تقنية الشحن MagSafe للآي فون ودي مختلفة شوية عن الاسلكي؛ حتى الآن التقنية دي للشحن بس؛ أبل دلوقتي في مرحلة نشرها وفي مؤتمر اول إمبارح أعلنت عن اكسسوارات ليها.

*️⃣ التقنية دي تاخد شعبية وبعدين أبل تعلن عن الجيل الثاني منها وهو بيقدر ينقل داتا مش الشحن بس... أتوقع دا سبتمبر 2022؛ وتسيب الناس سنتين كمان؛ وفي سبتمبر 2024 تعلن عن إلغاء منفذ الشحن وقفلنا خلاص التليفون.

*️⃣ تقفيل التليفون جميل صح؛ بس خد بالك؛ دا هخليه قطعة واحدة؛ مفيش شيء اسمه منفذ الشحن باظ بنغيره؛ هيبقى أي اصابة بتغيير التليفون كلياً... ودا معناه عبء مالي إضافي علينا وأرباح إضافية لأبل.

*️⃣ بس يا سيدي وهى دي القصة؛ فلما ابل دعمت شريحتين قعدوا يتريقوا عليها؛ ألحقوا سنة 2018 ولسه جايه تدعم شريحتين؛ أبل مدعمتش الشريحتين عشان عاوزة الاي فون ب 2 شريحة؛ ابل دعمته عشان دا ضمن خطة الغاء الشريحة؛ حضرتك انتا بتتقرطس وبتتساق لطريق وفاكر ان جت لك فرصة تريقة علي أبل.

*️⃣ اتريق يا حبيبي اتريق؛ ولما يتلغي منفذ الشريحة وكل الشركات تعمله؛ هنضحك سوا... وقتها هتفتكر كلمتي؛ أبل بتسيبهم يتريقوا؛ وتاخد منهم فلوسهم... اتريق يا حبيبي بس هات فلوس؛ وانجوي بالتريقة بتاعتك.

استكمالاً لبوست الصبح؛ ايه بقى شريحة eSIM دي ومدعومة فين؟

*️⃣ شريحة الموبايل دي عبارة عن شريحة إلكترونية صغيرة دورها هى أنها تربط بين الموبايل وشركة اتصالات محددة؛ زماان كانت الشريحة كبيرة واسمها Mini-SIM وبعدين في 2010 تم اقرار شريحة اسمها Micro وأول جهاز نزل بيها كان الآي باد وأول تليفون هو الآي فون 4 عشان موضوع الشريحة عامل خرم في دماغ أبل.

*️⃣ سنة 2011/2012 أبل قدمت تصميم خاص لشريحة أصغر اسمها Nano-SIM ودخلت منافسه ضد بلاك بيري ونوكيا وموتورلا وكسبت أبل وتم تعميم الشريحة بتاعتها عالكوكب؛ وهى الشريحة اللي في موبايلك الحالي دي تصميم شركة أبل سنة 2012.

*️⃣ جت أبل سنة 2013 (هى وشركات أخرى) قالوا هو ليه عاوزين شريحة خارجية؟ هو مش الموبايل فيه كل التقنيات؟ يبقى نحط جوا الموبايل شريحة إلكترونية ونبرمجها مع أي شركة اتصالات. وتتبرمج إزاي يا سيدي بص معايا.

*️⃣ بتروح شركة الاتصالات بتاعتك ( لو سمحت خرج مصر وشركاتها من مخك واحنا بنتكلم على العالم) وتقوله عاوز خط eSIM فالموظف هيديك كود QR كده تروح بالموبايل بتاعك عامله سكان؛ الكود دا بقى يروح عالشريحة الإلكترونية ويتسجل؛ ممكن مجازاً نقول أن الكود QR دا كإنه اسم المستخدم والباسورد عشان تخش الشبكة.

*️⃣ يعني يروح موبايلك محاول الدخول لشبكة AT&T بالشريحة ال eSIM فالشبكة تقوله انتا مين يا أخ؟ فيقولهم أنا المستخدم XYZ والباسورد .... (اللي جابهم من الفرع كود QR) فالشبكة تقوله اااه انتا رقم 123456789 أهلاً بيك اتفضل.

⬅️ مين الدول اللي في منطقتنا بيدعموا E-SIM ولا هو بس في أوروبا والدول المتقدمة؟

*️⃣ لا حضرتك هو في أوروبا والدول المتقدمة وفي الدول العربية بس مش في مصر؛ يعني هتلاقيه موجود في لبنان؛ البحرين؛ المغرب؛ عمان ؛ فلسطين ؛ قطر ؛ جنوب أفريقيا ؛ تركيا ؛ الإمارات ؛ الأردن؛ الكويت؛ السعودية... بص هو موجود في أفغانستان وسريلانكا وكازخستان... وخلينا ساكتين بقى عشان دا زي 5G موجودة في موريشيوس وجنوب افريقيا وكينيا وسيشل وحتى أثيوبيا تعاقدت عليه ونيجيريا واوغندا و الجابون بيعملوا اختبارات الشبكة واحنا لا؛ عيب ولد متجبش سيرة تقنيات اتصالات عندنا وادعي تشوف 4G اصلا. بالمناسبة نظريا ليبيا فيها 5G تخيلوا ؛ نظريا بقي عشان مش هيلاقوا كهربا يشغلوا الابراج 😂

⬅️ طيب هيفرق معاك eSIM في ايه؟

*️⃣ كذا شيء يفرق eSIM فيه يعني مثلاً ممكن تشتري خط فودافون وموبنيل واتصالات و وي ال 4 وتضيفهم في الموبايل؛ ومن السيتنج بلمسه تقول الخط رقم 1 هو اتصالات ورقم 2 أوراج؛ وأكيد مش هتحط فودافون عشان فودافون معندهاش شبكات في مصر موبايل.... تسافر السعودية فلمسة تشغل الخط السعودية؛ وهكذا يعني موبايلك متبرمج على شبكات كثير ولمسة واحدة تغير الشبكة.

*️⃣ ثاني شيء يفرق فيه هو سرقة الأجهزة؛ تخيل الحرامي أول شيء بيعمله ايه؟ يطفي الموبايل ويشيل الشريحة؛ طيب الشركات خلت الموبايلات متتقفلش وفي باسورد؟ عادي الحرامي يشيل الشريحة ففصل الموبايل عالنت... تخيل بقى الموبايل eSIM يبقى عشان يوقفه ويقفل النت لازم يخش السيتنج اللي مش هيعرف يوصلها بدون معرفة الباسورد... يعني هتقدر تتابع موبايلك.. وفاضل بس يخلوا الموبايل ميتقفلش والباسورد موجود وهنا بخ؛ هفضل أراقب موبايلي.

*️⃣ ضيف معاهم إن المكان اللي هيفضى بتاع الشريحة هتقدر تستخدمه الشركة في أي شيء؛ تزود شريحة تقنية معينة أو حتى بطارية؛ المهم هتطلع باستفادة منه.

⬅️ ايه مساؤئ ال eSIM؟

*️⃣ حتى الآن معرفش؛ غير إنه لو اتطبق وبقى اجباري في يوم ما؛ مش هنلاقي موبايلات في مصر عشان معندناش eSIM

بس يا سيدي وخلص البوست

الموضوع بتاع الفريق اللي نزل البئر ويقولك البير جميل وزي الفل مش زي ما الرسول قال؛ والناس ترد عليهم إن مش دا البير... المواضيع بالطريقة دي زادت قوي الفترة الماضية...

*️⃣ الفكرة كلها بتلعب على حاجة معينة والمشكلة إن المسلمين بينسوا حاجة برضك في الردود... اللعبة قايمة على نقطة العلم والغيب.

*️⃣ العالم الحالي قائم على الفكر المادي البحت... أهم شيء في الكون هو المادة؛ الفلوس؛ المظاهر؛ الشكل.. كنت كذا مرة اتكلمت في كده... انهم بيزقوك لإنك تخش في مود القياس المادي لكل شيء؛ لكن اشمعنى بقى؟

*️⃣ عشان تبقى مسلم أو مسيحي أو يهودي أو أي دين؛ لازم تبقى مؤمن بالغيبات؛ احنا مثلاً مؤمنين إن في ملاك اسمه سيدنا جبريل صح؛ طيب تقدر تثبت إنه موجود؟ أو أي أي من الملائكة؟ وطالما مش هتقدر تثبت إنهم موجودين يبقى خرافات.

*️⃣ الشق الثاني بقى اللي أي مسلم مؤمن بيه إن في ربنا وفي قدرة الله تفوق كل شيء؛ طيب فكر معايا كده؛ فاكر معجزات سيدنا محمد زي انشقاق القمر؛ ياما طلع علماء وملحدين قالوا محصلش ومفيش شق؛ ليييه عشان سببين أولاً مفيش حضارة كتبت إن القمر انشق وكمان مفيش أي اثار لإنشقاق القمر.

*️⃣ وشوفت مرة بنفسي نقاشات ضخمة للرد وخاصة في موضوع إن فيه علامات انشقاق ولا مفيش؛ وناس تقول الأخدود القمري وناس تقولهم لا دا حجمه صغير ومفروض يبقى في كل القمر؛ الخناقة دي كلها متخلفة لإنها قائمة على شيء مهم... إن الطرفين بيفكروا بشكل مادي.

*️⃣ احنا بنقيس قدرة ربنا بالمقاييس بتاعتنا؛ يعني لو القمر انشق يبقى أكيد في علامات؛ طب معلش هو اللي خلق القمر ميقدرش يشقه ويرجعه بدون ما يكون في أي علامات؟ ربنا يقدر ولا ميقدرش؟ طبعاً خد بالك لو قولت ميقدرش فكده اعقل وانطق الشهادة تاني...

*️⃣ نفس الحكاية برضك؛ إزاي انشق ومحدش شافه وكتب عنه غير في تاريخ المسلمين؛ لقيت ردود تقولك أصل الناس نايمة؛ أصل وقت الليل في شبه الجزيرة بيكون نهار في مناطق ثانية؛ أصله زي الخسوف مش هيظهر غير في مكان كده... وهري بقى... برضك عشان بنقيس بمقاييس البشر؛ هو ربنا ميقدرش يخلي القمر ينشق والمشركين والمسلمين شايفينه انشق وباقي الكون شايفه سليم؟ هتقولي إزاي يعني هيخدع بصرهم؛ هقولك نفس النقطة؛ دا ربنا مينفعش تحكم على قدرته بعقلك.. طيب يا سيدي ربنا ميقدرش يكون شق القمر وأي حد يبص يشوفه؛ بس بقدرته مخلاش ولا حد بص عليه وقت الشق غير مكة؟ أو يخليهم شافوه وينسوا يكتبوا عنه؟ مرة كمان لا تقيس قدرات ربنا بمقاييس البشر.

*️⃣ المشكلة إن المفهوم دا البشر نسيوه؛ وبقى في دين جديد وهو "أنا أصدق العلم"... لو قالك العلم أثبت كذا يبقى هو فعلاً صحيح... طيب افرض طلع عالم قالك عملت دراسة وأثبتت إن مفيش رسول جه اسمه محمد؟ أو اكتشفنا قرآن قبل زمن الرسول؟ أو مفيش قوم اسمهم عاد أو ثمود أو مفيش قوم صالح؟ إن مجاش حد اسمه سيدنا نوح والأرض غرقت؟ قالك فعلاً عملنا دراسة أهي ودي النتيجة؛ وانتا دروت لقيت الدراسة دي عكس حديث صحيح؛ واتأكدت 100% إنه صحيح وإن لا هو غلط ولا هو مفهوم غلط ومتفسر غلط... لا هو متعارض مع العلم.. هتكذب مين؟

*️⃣ اللي بيحصل إن الناس تروح قايله الدين دا كذب وهوب تلحد...

*️⃣ خد يا سيدي عندك؛ هو مش الأخوه التطوريين مقتنعين إن الإنسان مبدأش من سيدنا آدم فجأة؛ يعني مفيش حاجة اسمها ربنا خلق سيدنا آدم وكل البشر جم منه وكلكم لآدم وآدم من تراب؛ مفيش الكلام دا؛ الانسان اتطور من سلف سابق وهكذا... ودراسات بقى كثير وتعالى نقول مفيش تدليس وفعلاً هى صحيحة؛ هل فعلاً هتقول هما صح ومفيش حد اتخلق اسمه آدم؟

*️⃣ فالترند آخر سنوات هو؛ تعالوا نشوف حديث للرسول؛ قصة في القرآن ونطلعها بالدراسات العلمية غلط؛ وهوب مرة واثنين وثلاثة؛ هييجي ضعاف الثقة بالدين؛ هيقولوا مش ممكن كل المرات دي غلط؛ يبقى الإسلام غلط.

*️⃣ مرة كمان عشان تبقى مسلم؛ لازم تبقى بتسلم نفسك لله؛ لو لقيت شيء قطعي نهائي إنه أمر إلهي خلاص تسلم؛ وخد بالك عشان هنا اللعبة اللي بيدخلوا منها؛ إن الإسلام بيدعوك إنك متفكرش ووو... لا طبعاً فكر ودور ولازم قبل ما تسلم نفسك تتأكد صح إن دا نهائي قطعي من الله أو الرسول... بعدها خلاص تسلم نفسك.

*️⃣ يعني مثلاً جه فريق علماء عمل دراسة لمياه زمزم؛ وقالك لقينا إنها عادية زي أي مايه؛ لازم من جواك تكون عارف إنها مش زي أي مايه؛ هى اه تركيبها H2O وشوية أملاح ومعادن؛ يعني يقدر العلماء يجيبوا مايه من أي مكان في الكوكب وينزعوا المعادن منها ويظبطوها بحيث تبقى نفس نسب زمزم؛ ويتقالك أهي قدامك 2 زجاجة واحدة زمزم والثانية أختها صنعناها في معاملنا.

*️⃣ هل الإثنين زي بعض؟ اه علمياً زي بعض بس في حاجة العلم مش بيقدر يقيسها؛ قدرة ربنا؛ فربنا قادر إن اه الإثنين زي بعض بس تأثير دي عليك يكون غير دي؛ وممكن ربنا يريد غير كده...

*️⃣ الخلاصة في معيار العلم ميقدرش يحسبه؛ قدرة ربنا؛ ربنا يقدر يشق القمر ويرجعه؛ انسان اتحرق واتحول لرمال واترمت في البحر؛ هيرجع ثاني؛ إزاي؟ هل العلم يقدر يعرف؟ لا

*️⃣ فبلاش تبقوا مسلمين ويتضحك عليهم بلعبة العلم أثبت كذا وأنا أصدق العلم... عشان ياما شوفت ناس بتنفي إن في فرعون حارب سيدنا موسى وياما ناس قالت القصص اللي في القرآن دي حواديت للتسلية والعبرة لكنها محصلتش بجد ومفيش أشخاص ولا أنبياء جم بالأسماء دي.

*️⃣ لو القرآن قالي إن هامان اسمه هامان؛ وبعدين خبراء الآثار طلعوا قالوا اسمه سي-تي-بي-شي مثلاً... فهو اسمه هامان زي ما ربنا سماه.

وأكتفي كده عشان كانت نيتي أكتب سطرين ولقيت البوست بقى كده؛ وكمان عشان مش مجالي الكتابة فيما هو ديني بس مستفز قوي من ناشري الإلحاد تحت اسم العلم... وطبعاً هلاقي ريبورتات والفيس يروح مديني البان... فطز فيك مقدماً يصاحب العزبة هنا

معركة غيرت التاريخ

الشهر الماضي مرت الذكرى 950 سنة لمعركة تأثير الفراشة (التوابع) الخاصة بيها غيرت حاجات في شكل العالم دلوقتي.

*️⃣ في الزمن دا كانت دولة السلاجقة العظام وصلت لأقصي قوة ليها؛ وكانت غارات طغرل بيك ومن بعده ألب أرسلان مسببة خسائر ضخمة للدولة البيزنطية.

*️⃣ اتعملت معاهدة سلام لمدة سنتين؛ وتفرغ فيها الب ارسلان لتقوية جيشة؛ وبعد سنتين بعت الإمبراطور البيزنطي لالب ارسلان إنه يجددها فوافق الب ارسلان وبدأت يفرغ نفسه لتحرير الشام من الدولة الشيعية الفاطمية.

*️⃣ لكن في الحقيقة كانت خدعة من الإمبراطور رومانوس الرابع القضاء علي ألب ارسلان وبدأ يجهز جيش ضخم.

*️⃣ المراجع العربية بتقول الجيش كان 150 الف؛ الغربية بتتكلم علي حد أقصى 50 ألف؛ ورقم 50 مش مقتنع لإنهم بيقولوا جيش الدولة البيزنطية وهيطلع في قيادته الإمبراطور بنفسه وجاب مرتزقة انجليز وفرنسيين وبلغار ويونايين وإيطاليين ومن مناطق أخرى؛ وكل الجيش دا 50 ألف 😂. ليه جايب الفين من كل دولة.

*️⃣ المهم التقديرات كانت ان الجيش البيزنطي كان ما بين ضعف الي 5 اضعاف جيش السلاجقة؛ حاول الب ارسلان يناوش جيش البيزنطيين ويعمل اتفاق صلح؛ رفض الامبراطور وقاله الصلح هيتم في عاصمتك.

*️⃣ وهنا سأل ألب ارسلان قواده بخصوص المعركة؛ نحارب ولا نرجع. وقرر الجميع القتال؛ وهنا لبس السلطان ألب ارسلان الكفن بتاعه وقالهم دا كفني؛ ولبس جنود ليه وقادة الكفن برضك؛ وعشان كده في مصادر اسلامية مسمياها (معركة ذات الأكفان).

*️⃣ وكانت المعركة الساحقة؛ وعشان تتخيل حجمها والانتصار؛ فدي المعركة الوحيدة بين المسلمين والبيزنطيين اللي تم أسر الإمبراطور البيزنطي؛ متكررتش تاني.

*️⃣ بعيد عن تفاصيل المعركة وايه حصل وحجم الجيوش ونخش في الحوار دا؛ تعالوا نشوف ايه بعدها حصل ايه.

*️⃣ في الدولة البيزنطية تم دفع فدية مهولة 1.5 مليون دينار ذهب (تخيل فدية 1.5 مليون جنية ذهب وفكر كمان في التضخم لالف سنة)؛ ففرض ضرائب علي الشعب واتقلبت خناقات؛ وانقلب ابن زوجة الإمبراطور وقتله؛ وفضلت الدولة في فوضي وبعد سنوات تم الاطاحة بالامبراطور الجديد؛ مفيش 3 سنين وتم الاطاحة بيه هو كمان وجه الاستقرار مع اليكس كومنين اللي حكم الدولة 37 سنة ؛ وعشان تتخيل الفارق؛ ال 37 سنة اللي قبل اليكسس جه فيهم 8 اباطرة.

*️⃣ اليكسس كان عبقري وبعد ما عمل استقرار داخلي وخلص عالفوضي ومراكز القوة؛ قالك نبص لبرة ونحارب السلاجقة؛ لكنه كان عنده ذكري رومانوس؛ فجه في باله فكرة؛ ليه أحاربهم بنفسي؟

*️⃣ وقرر أليكسيس يتجاهل الخلاف التاريخي والقطيعة بين كنيسة الشرق والفاتيكان واللي عمره 600 سنة من عهد مجمع خلقيدونية؛ وقرر مراسلة بابا الفاتيكان وقاله ما تساعدونا ضد المسلمين.

*️⃣ وشاء ربنا إن وقتها كان في بابا عبقري وهو أوروبان الثاني اللي كان عنده نفوذ قوي وهو المؤسس الفعلي لمفهوم صكوك الغفران؛ يعني ادفعوا للكنيسة فلوس عشان تاخدوا الغفران وتخشوا الجنة؛ فالبابا دا قرر يعمل مؤتمر في فرنسا وأعلن فيه؛ الحملات الصليبية.

*️⃣ باقي القصة أنا حكيتها قبل كده في نفوذ فرنسا المستمر لغاية النهاردة؛ فالحملات الصليبية جت بطلب من اليكسس اللي خاف يكرر هزيمة رومانوس قصاد ألب ارسلان.

رابط لمقال فرنسا ونفوذها التاريخي جه من الحملة الصليبية.
https://www.facebook.com/583346180/posts/10159254003166181/?sfnsn=scwspmo
الرابط من تليجرام

https://t.me/BnSamyPosts/491

⬅️ الحملات الصليبية بقي تسببت في السيطرة عالقدس بعد انسحاب الدولة الفاطمية ومذبحة للي سابتهم وراها؛ المهم كان المسيحي في أوروبا في الزمن دا عارف انه هيدخل النار الا لو عمل حاجة للدين؛ يعني اما يحارب المسلمين ؛ او يدفع فلوس للكنيسة وياخد صك الغفران او يروح يحج لبيت المقدس.

*️⃣ ففي ناس متدينة قالت احارب ناس ليه؛ وادفع ليه فلوس؛ انا هروح احج وهي دي العبادة؛ وكانوا بالالاف يسافر يعيش فترة في القدس شهور وبعدين يرجع؛ ودي رحلة مكلفة ولما ييجي هيدفع فلوس وتبرعات بالقدس؛ فلازم ياخد فلوس معاه.

*️⃣ وهنا نشطت العصابات؛ الالاف البشر بتاخد فلوس كثير وتسافر؛ ياااه عالرزق؛ قطاع طرق بقي وشغل 5 نجوم.

*️⃣ هنا قرر مجموعة فرسان يشكلوا تحالف لحماية الحجاج المسافرين؛ اسمهم لاحقا فرسان الهيكل؛ وكانوا يسافروا مع افواج الحج ويحموهم؛ وبعدين جت فكرة؛ هي الناس ليه هتهاجم القوافل؟ عشان الفلوس الكثيرة؛ خلاص بصوا عندنا فكرة.

*️⃣ خلاص بصوا هتدونا الفلوس؛ وتسافروا وتروحوا هناك تستلموها في القدس؛ شوفتم بقي.

*️⃣ الفكرة دي انتشرت واتطورت واخدت دعم البابا نفسه؛ وبقى عندهم مقرات في مدن كثير؛ وبدأ الناس يتعاملوا معاهم؛ يعني بصوا خدوا الفلوس دي في باريس وهاخدها في روما؛ والاثرياء قالوا ليه نشيل الفلوس عندنا؛ فرسان الهيكل عندهم قلاع وحصون؛ خدوا الفلوس حطوها عندكم.

*️⃣ استمر دورهم لبعد الحملات الصليبية؛ واطنان الفلوس اللي عندهم خلتهم فكروا في فكرة؛ طيب ما ملوك اوروبا عاوزين فلوس عشان تمويل حروب؛ نسلفهم؛ والاثرياء عاوزين يعملوا بيزنس ويمولوا تجارة؛ نسلفهم.

*️⃣ بقوا أثرياء بشكل مهول وعملوا يعني شبه البنك وشركات تحويل الأموال.

*️⃣ كان مقرهم الرئيس هو المقر بتاعهم زي ما فاكرين قولنا باديين مع الحملات الصليبية اللي اطلقت من فرنسا؛ فكان مقرهم فرنسا (اتنقلوا كثير من القدس لعكا لقبرص لمناطق كثير لكن تركيزهم كان في النهاية بفرنسا.

*️⃣ المهم علي بداية القرن 14 (يعني 1300 وطالع) البابا بقي عاوزهم يندمجوا ويبقوا تحت سيطرته؛ ومن ناحية ثانية فيليب الرابع ملك فرنسا كان عندهم مشاكل وحروب ووو فاستلف منهم فلوس كثير وعاوز يسددها ومش عارف؛ هوب قرر مع الفاتيكان يقولوا دول مهرطقين (كفرة يعني) وحرامية وشواذ واذدراء المسيحية والصليب وتشكلية التهم المعلبة المعروفة؛ وبالفعل هاجم فيليب الحصون بتاعتهم وشتتهم.

*️⃣ وبدأت الفاتيكان بدعم الملك فيليب فباقي فرسان الهيكل قالوا لازم نروح مكان بعيد عن نفوذ الفاتيكان ونفوذ ملك فرنسا؛ نروح فين نروح فين؛ ايوا هي المنطقة المقطوعة اللي عايش فيها همج وكلها ناس فقيرة وو... المنطقة اللي اسمها سويسرا دي.

*️⃣ انتقلوا واتجمعوا في سويسرا واسسوا نظامهم تاني وبدأوا يحطوا قوانين ليه وطريقة ايداع وسحب والفوايد والضرايب وقالك نخفي ان فلان عنده فلوس عندنا عشان محدش يكون عدو ليه يهاجمنا... واخدين بالكم بنتكلم عن ايه؛ عن بنوك سويسرا ونظامها البنك.

*️⃣ سويسرا مشهورة انها بلد بنوك بسبب فرسان الهيكل اللي اتاسسوا بسبب احتلال القدس اللي جت من الحملات الصليبية اللي حصلت بدعوة من اوربان الثاني اللي عملها بدعوة من اليكسس امبراطور البيزنطيين اللي مرضاش يحارب بنفسه عشان ذكري اسر رومانوس الرابع بعذ هزيمة ملاذ كرد علي يد السلطان ألب ارسلان

*️⃣ كلمتكم قبل كده عن تأثير الفراشة؛ ووعدتكم اني اكتب بوست يوضحها؛ هو دا البوست...

*️⃣ النهاردة ومن دقايق ربنا رزقني بإبن 👶👶 ؛ وقررت اسميه (أرسلان) تيمناً بالقائد العظيم ألب أرسلان رحمه الله... ربنا يبارك لي فيك يا أرسلان انتا ولولي اختك 😍❤️😍 .. وأديني قولت قصة الاسم عشان هيتقالي مين أرسلان دا؛ حد مشهور يعني؛ اديكم شوفتم عمل الأسر الوحيد للمسلمين ل إمبراطور بيزنطي؛ وتأثير الفراشة هو سبب ان سويسرا معروفة بالبنوك وفرنسا ليها نفوذ في لبنان وسوريا. وبالمناسبة أرسلان يعني أسد بالتركية.

تعالوا أحكي لكم حدودتة دولة عالبحر المتوسط لو نفسك طويل.

*️⃣ في بداية الألفية الجديدة؛ الدولة دي كانت بتعمل نهضة اقتصادية ضخمة؛ ونهضة بجد يعني سنة 2002 كانت الناتج الاجمالي بتاعهم GDP يساوي 240 مليار دولار؛ وسنة 2008 يعني بعد 6 سنين بقت 770 مليار دولار.

*️⃣ الدولة دي عملت نمو وكانت شغالة في كله؛ بداية من بناء عشرات الالاف من المباني لغاية المطارات؛ تطورت السياحة بشكل مهول فيها؛ يعني سنة 2000 كانت 8 مليون وبقت سنة 2005 بقوا 25 مليون وسنة 2015 بقوا 41 مليون وسنة 2019 بقوا 51 مليون.

*️⃣ برضك كانوا بيصنعوا كل حاجة؛ مشاريع تصنيع مهولة؛ بداية من الاجهزة الكهربائية اللي يمكن مفيش بيت ممرش عليه جهاز منهم؛ لغاية العربيات؛ ونوصل للصناعات العسكرية اللي هما فيها بيصنعوا F16 لصالح أمريكا وسبق إن في طيارات منها اتباعت لمصر.

*️⃣ كانوا بيجيبوا فلوس منين؟ يعني عاوز تتقدم اعمل مشاريع؛ طيب هجيب فلوس المشاريع منين؟ هستلف بسيطة اهي.

*️⃣ في الاول كانوا بيستلفوا من البنوك المحلية؛ شركات والدولة... وبعدين فكروا في فكره؛ ليه نستلف من بلدنا بس؟ يعني الفايدة علي عملتنا في 2001 هي 74.7% وسنة 2002 هي 50.5% وسنة 2003 هي 37.68% وسنة 2004 هي 24.26% في حين علي الدولار في 2003 هي 1% تقريباً.. وعملتنا واقفة قصاد الدولار وقفة رجالة؛ ففي يناير 2002 بعد استقرار العملة من تعويم 2001؛ الدولار كان يساوي 1.3 من عملتنا... يناير 2005 الدولار يساوي 1.33 ويناير 2010 بقى 1.5 يعني 8 سنين زاد فيهم 15% بس يعني يكاد لا تذكر الزيادة السنوية.

*️⃣ عندنا فكرة صايعة؛ احنا هناخد قروض من بره؛ والدولار ثابت؛ نبيع الدولار في السوق وناخد الفلوس نعمل أي مشروع؛ حتى لو هبني عمارة ودخلها بعملتنا برضك ناخد قرض بالدولار. والنتيجة ديون الدولة الخارجية كانت 100 مليار دولار سنة 2000 بقت في 2008/2009 حوالي 290 مليار دولار. كله بياخد قروض من بره.

*️⃣ أخذ القروض من بره يعد اهم سبب ورا ثبات العملة قصاد الدولار لغاية 2010؛ فانتا عمال تضخ دولار في الاقتصاد... كمان ارتفاع الفائدة المحلية رغم إن الاقتصاد ماشي زي الفل... خلى الأجانب يقولوا ما نخش الاقتصاد نبيع دولار ونشتري شهادات محلية؛ يعني تخيل معايا 2003 الفائدة عالدولار بره 1% وفي البلد دي 37%... التضخم 12-13% يعني آخر حلاوة بتكسب صافي 15-20% ... أحلى طوفان أموال ساخنة للاقتصاد.

*️⃣ أمطار الدولارات دي شجعت الدولة للتوسع والتطور أكثر؛ لكن بعد 2011 بدأ يحصل شوية أزمات وظهرت بشكل واضح بداية من 2013 ... اقتصادياً في الداخل بدأ يحصل تباطؤ في عمليات بيع العقارات وشوية على شوية مخاوف كده من تراجع النمو (اللي اتراجع فعلاً) فهنا الليرة اتحركت شوية... وشوية حلوين؛ يعني في يناير 2011 كانت 1.54 ويناير 2012 بقت 1.88 (زيادة 22% في سنة) فالدولة اتدخلت وهدت الموضوع ففضل 2012 ومعظم 2013 فضل متأرجح؛ يعني تقول كده بالبلدي متكتف بحلول 2014 ضرب الموضوع ضرب؛ يعني يناير 2014 بقى 2.16 وهكذا... يعني بنهاية 2015 كان قرب من 3 وتستمر.

*️⃣ كفاية أرقام؛ وتعالوا نحكي كده بالبلدي وبالهجايص ايه حصل... أنا واحد مقترض من الخارج وكانت العملة ب 1.5 في 2011 فالعملة لما تزيد؛ أنا كده القسط بتاعي بيزيد فبدأت تدريجي الشركات يحصلها مشاكل؛ كده هشتري بالغالي عشان أسدد قرض كنت صرفته بالرخيص... فنعمل ايه نعمل ايه؟ نستلف تاني؛ اه الحل السحري استلف عشان تسدد القرض القديم؛ ونأجل المشكلة... لعل وعسى الوضع يرجع زي ما كان ب 1.5 تاني.

*️⃣ فتخيل معايا حد استلف على 3 سنين والعملة في 2011 تساوي 1.5 جت 2014 لقاها فوق ال 2 فقالك ليه بص استلف قرض جديد أكبر يسدد القديم ويبقشش عليا ونأجل المشكلة ل 2017؛ فجت 2017 لقى العملة 3.5... فقالك لاااا خد 3 سنين تاني يعني هستلف ب 1.5 واقفله على 3.5 كارثة؛ جت 2020 لقاه ب 7 والكورونا وصلت

*️⃣ الاستلاف دا تسبب في ايه؟ فاكرين الديون اللي كانت 100 مليار دولار في 2000 وبقت 290 في 2010... فضلت تزيد وعلى 2015 بقت فوق ال 400 مليار دولار. ضيف مع دول إن المقرضين في الخارج بقوا قلقانين من المستقبل بتاعك؛ فزود الفائدة عشان المخاطر للتعثر...

*️⃣ فبعد ما التصنيف الإئتماني للدولة كان دائماً بيطلع معاه توقع مستقبلي إما مستقر أو إيجابي من 2003 وتعثر بسيط في أزمة 2008 وفضل كده ل 2013... بدأت المؤسسات المالية العالمية تقلبه ل سلبي من 2014 ومن 2014 للنهاردة مأخدوش تاني ولا مرة توقع إيجابي.

*️⃣ يعني مكانش في مؤامرات خارجية؟ طبعاً موجودة؛ مفيش بلد في العالم مش بيحصل عليها مؤامرات؛ المؤامرات شيء طبيعي ومينفعش دولة تتحجج إنها السبب. بس للأمانة ففعلاً في ضرر؛ يعني في يناير 2019 طلع الرئيس الأمريكي ترامب وقتها وهدد الدولة دي وقال صراحة في تويتر إنها لو متراجعتش هدمر لهم الاقتصاد تاني زي ما عملت قبل كده.

*️⃣ هل ترامب هو اللي دمر الاقتصاد بتاعها؟ لا و اه؛ يعني العقوبات والتهديدات الأمريكي طبعاً أقلقت المستثمرين؛ بس مش لوحدها؛ وجود مشاكل واضحة على الأرض كان سبب قوي كمان؛ يعني بعد انقلاب عسكري فاشل في 2016 بدأ رئيس الدولة دي يحارب الأعداء؛ وفي البداية كان الجميع معاه؛ بس الموضوع زاد وبقي الموضوع زي المسرحية ومقولة عادل إمام (يخرب بيت اللي بيكرهه؛ ويخرب بيت اللي بيحبه وجنبه واحد بيكرهه)... حتي الأصدقاء تم محاربتهم؛ ومش هقلب البوست سياسة لكن تخبطات في القرارات.

*️⃣ فاكرين فوق قولنا الأموال الساخنة اللي بتمطر عليهم؛ مع ارتفاع الدولار لقي المستثمر الاجنبي انه كده مش كسبان حاجة؛ ما اللي هييجي لي من الفايدة العالية هخسره فارق عملة؛ يبقي خلاص؛ سلامووو عليكوووو؛ كانوا شوية فلوس حلوين.

*️⃣ البنك المركزي قالك يبقي الحل الفايدة العالية؛ نغري الناس اللي بره بفايدة اعلي من زيادة سعر الدولار فترجع الاموال الساخنة؛ ومن ناحية ثانية نخلي الناس اللي معاها كاش وبتشتري دولار دي؛ تلاقي الفوايد عالعملة المحلية مغرية ليهم فيشتروها بدل الدولار والدولرة.

*️⃣ فبقى مزاد ارتفاع الفايدة فبعد الفايدة 4.5% في 2013؛ ثم الاستقرار علي منطقة 8% هوبااا تزيد ل 24%؛ اه زي ما قريت كده راحت ل 24% (طلع علي كذا قرار ورا بعض مرة مرة واحدة).

*️⃣ تعالي نفتكر لو انتا عندك شركة وعاوز قرض؛ اما هتروح لبره؛ وهنا هتلبس زيادة العملة؛ او تاخده محلي وهنا تلبس فوايد كانت بتوصل ل 30% سنوي... فكانت كارثة عالشركات. فشركات جديدة قعدت تفلس؛ والاسعار تغلي في البلد بشكل ضخم وركود اقتصادي والوضع بشع.

*️⃣ الجانب الاخر؛ الدولار كان وصل ل 6.3 في نهاية 2018 قبل قرارات زيادة الفايدة؛ بعدها فضل ينزل ل 5.25 في 6 شهور ويستقر؛ وهنا يظهر الرئيس تاني.

*️⃣ يروح الرئيس شايل محافظ المركزي ويتهمه انه سبب المشاكل في البلد برفع الفايدة؛ وييجي الجديد وينزل الفوايد ويفضل ينزل وينزل ويرجعها تاني تحت 10%... يا تري محتاج اقولكم حصل ايه؟ العملة طلعت تاني فوق ال 6.

*️⃣ المحافظ لقي ان الحل يرفع تاني الفايدة؛ وهوب يروح الرئيس شايله ويطلب من الجديد وكذلك من جوز بنته السيطرة عالعملة... اه صحيح هو في 2018 عين جوز بنته وزير مالية. وعامة هو استقال نهاية 2020.

*️⃣ المحافظ الجديد الثالث قال زي اللي قبله؛ مش مشكلتنا حجم الدين؛ عاوزين الدولار ينزل يبقي نزود الفايدة؛ بس المرة دي بدون فايدة؛ المستثمريين قلقوا خلاص وقالك مفيش فايدة؛ وفي مارس 2021 قبل اجتماع الفايدة للبنك المركزي ؛ يطلع الرئيس علنا ويطالبهم بخفض الفايدة؛ لكن البنك المركزي يقول لا ويزود الفايدة وتبص 19%

*️⃣ جن جنون الرئيس؛ وانتا شكلك كمان خاين ومعاهم وكلكم بتحاربوني؛ ويقرر للمرة الثالثة اقالة محافظ البنك المركزي؛ يعني كده عندنا 3 تم اقالتهم في اقل من سنتين.

*️⃣ طبعا الكورونا انا عديت اخبارها لانها معروفة؛ لكن الوضع الحالي ان الدولار بقي ب 8.5 من العملة؛ يروح طالع اخبار عن ضغط جديد من الرئيس علي محافظ المركزي (رقم 4 اهو) انه ينزل الفايدة؛ وتقول الاخبار ان المحافظ هيوافق؛ هوبا الدولار يطلع ل 8.77 والكل منتظر قرار الفايدة عشان يطلع فوق 9 او لغاية فين محدش يعرف.

*️⃣ المشكلة ان البلد واقعة في مزنق كارثي؛ الديون كانت وصلت لقرابة 470 مليار دولار في 2018 واتعلمت الدولة ان دا طريق اللي يروح ميرجعش فقررت تخفض ديونها وبالفعل في أقل من سنتين انخفضت حوالي 45 مليار دولار لكن جت الكورونا عشان تدمر الخطة دي والديون بقت 450 مليار دولار (الربع الاول).

*️⃣ الجدير بالذكر ان تقارير كثير قالت ان الدولة دي انفقت اكثر من 100 مليار دولار في محاولات دعم العملة المحلية بلا جدوي؛ يعني كل الانهيار دا رغم انفاق اكثر من 100 مليار دولار دعم العملة المحلية.

*️⃣ من مشاكل الدولة دي حاليا ان نمط المعيشة بتاع المواطن اتغير؛ فالتحسن الاقتصادي اللي حصل زمان وكمان التطورات في البلد خلته بيشتري المستورد؛ والدولة بتحاول تقلل دا قدر الإمكان بدون جدوي؛ يعني الاي فون في امريكا ب 1090 دولار (ب الضرايب) وسعره في الدولة دي 1800 دولار.

*️⃣ انخفاض العملة الرهيب ساعد الشركات اللي فيها وعايشة عالتصدير؛ لدرجة ان صادرات الدولة دي تجاوزت 200 مليار دولار بس لسه برضك الاستيراد أكثر. والدولة دي بقت تصنع حتي المدمرات الحربية ومشاريع حاملات طائرات وليها وجود في 3 قارات؛ بس يا تري هيكمل مع الكارثة الاقتصادية 🤔 فمش معني كلامي انهم خلاص بيشحتوا ومصانعهم قفلت

*️⃣ طبعا هييجي لي اشرار يقولوا ان الدولة دي اسمها تركيا؛ شاطر يا عفريت ما كله عارف. وبالمناسبة اردوغان خريج كلية اقتصاد 😂😂.

*️⃣ نرجع ل ترامب كحاجة اخيرة؛ ترامب ممكن نقول انه ادي الاقتصاد التركي كتف او خبطة؛ بس المشكلة ان تركيا كانت حافرة حفرة؛ فالخبطة كان تأثيرها اكبر من حجمها.

⬅️ ردود مسبقة علي بعض التعليقات المتوقعة

*️⃣ هل الاقتراض من بره غلط؟ لا عادي؛ دا انتا بتجيب دولار؛ لكن لازم تفكر في السداد هيكون ازاي؛ تفكر في إدارة المنظومة فعادي تقترض 1 مليار دولار تحل بيه ازمة فتدخل 2 مليار دولار... فعادي استلف لكن فكر هتدير دا ازاي؛ مش تستلف وتصرف وربنا يكرم. وعادي تفكر في انك وقت السداد هتاخد قرض جديد؛ بس هل انتا ضامن استقرار عملتك المحلية؛ بدل ما تستلف ب 1.5 وتسدد ب 6 زي القصة هنا

*️⃣ تركيا لم تنهار؛ هي من اكبر 10 دول سياحية ؛ تركيا بتنتج سيارات 30 ضعف مصر تقريباً وضعف اكبر مصنع سيارات عربي وهو المغرب (المغرب وصلت ل 700 الف سيارة ومصر 50 الف وتركيا 1.5 مليون)... وحاجات كثير قوية بتحصل لكن عدم استقرار سعر الدولار كارثة عالشركات ككل لانك مش عارف وقت التحصيل هيكون بكام الدولار ويحس انه لازم يعمل تحوط.

*️⃣ يعني تقصد الازمة رجعتهم لنقطة الصفر؟ لا بس فاكر لما قولت لك ان سنة 2008 كان الناتج المحلي 770 مليار دولار؛ سنة 2019 بقي 760 مليار دولار؛ يعني 11 سنة ونفي الناتج المحلي تقريباً؛ والسبب ان الدولار بقي 4 أضعاف.

*️⃣ يعني انتا بتشجع الدول تستلف؛ مش حرام عليك؟ أنا مش بشجع حد علي حاجة؛ أنا راجل بحكي حواديت؛ فمش معني اني بحكي اللي حصل يبقي أنا مؤيد أو معارض للي حصل؛ فرق بين حد بيحكي حاجة وبين حد بينصح بحاجة... دي حدوته.

*️⃣ يعني كل المشاكل سببها أخطاء سياسة؟ لا طبعاً؛ يمكن جزء كبير من المشكلة سياسي؛ خلافات سياسية تؤدي لقلق مستثمرين؛ يخرجوا ويسحبوا الأموال الساخنة؛ العملة تتحرك فيتضرر المستثمر الحقيقي سواد المحلي أو الأجنبي اللي يلاقي نفسه بيكسب في السوق التركي لكن لما يقيس بالدولار يلاقي مكسبه راح.

*️⃣ هل تتوقع يعدوا الأزمة؛ معرفش الصراحة؛ أردوغان واخد الموضوع عناد شخصي؛ حتي زمايله القدامي عبد الله جول وأحمد داوود أوغلو وغيرهم بقوا ينتقدوه علناً رغم انهم كانوا رجالته في رحلة صعود تركيا. فمحدش عارف ودي مشكلة تركيا الحالية؛ ان محدش عارف حاجة؛ عندهم تقنيات تصنيع ومهارات وسياحة وامكانيات قوية؛ بس حالة العصبية السياسية اللي بتدار بيها الدولة خطر...

*️⃣ العملة التركية اتشال منها 6 اصفار سنة 2005؛ فلما اقول سنة 2002 سعر الدولار 1.3 ليرة؛ دي مجازا لان وقتها كانت 1.3 مليون ليرة؛ بس اكيد مش هقولك 1.3 مليون بس متنساش تشيل 6 اصفار عشان دي الليرة القديمة.

*️⃣ ما هو مذكور هو بعض المشاكل وليس كلها؛ لاننا بنكتب بوست مش بعمل دراسة

*️⃣ تحديث لان البوست مكتوب من كذا يوم؛ المركزي نزل الفايدة امبارح من 19% ل 18%

الرئيس التونسي قيس السعيد عمل من شوية حركة صايعة؛ عين رئيسة وزارء. واحدة ست رئيسة وزراء وأظن دي سابقة بالدول العربية (لو في قبله حد يبلغني)... وبصراحة حركة صايعة جداً.

*️⃣ دلوقتي الجماعة بتوع الغرب قطاع كبير منهم مبسوط بالإطاحة بالإسلاميين؛ بس في شوية كده معترضين نص نص؛ فهنا تلعب عالكارت العالمي الربحان؛ السيداو وحقوق المرأة... رئسية وزراء ست اهى في دولة عربية... اه سبق لمسلمات وصلوا لأعلى منصب في الدولة في بنجلاديش وباكستان وتركيا وإندونسيا وحتى أوروبا في كوسوفو... بس فضلت الدول العربية مفيش رئيس وزراء ست.

*️⃣ الحركة دي هتجيب دعم بدون تفكير ليه؛ تأييد غربي واضح؛ وطبعاً عربي... الموضوع بتاع حقوق المرأة دا كارت كسبان كسبان.

*️⃣ عندك مثلاً أفغانستان؛ ايه الأخبار اللي بتسمعها عنهم؟ يا ترى بيسألوا الحكومة هناك هتعملوا ايه في الفقر المدقع للشعب؟ ولا بيقولوا لهم يا ترى الستات هتقعد جنب الرجالة في الجامعات والوظائف؟ هو دا المهم؛ متكلمنيش عالفقر والهبل دا.

*️⃣ طبعاً للاستثناء هتلاقي بعض الأخبار الاقتصادية؛ بس هتلاقيها بصيغة أفغانستان تتخلى عن مسلمي الإيجور وتعقد صفقات تجارية مع الصين... لكن عامة شوف كده الأخبار في التايم لاين هتلاقيها عن حقوق المرأة.

*️⃣ فتونس هتلعب نفس اللعبة؛ يلا خدوا ست رئيسة وزراء؛ كله هنسى أي شيء... عادي يعني زي ما الغالبية ناسية أو متعرفش أصلاً إن من أكثر بلاد العالم عدم مساواه مع المرأة في المناصب هى اليابان... اليابان في تصنيفات خلتها أسوء من مصر ومعظم الدول العربية... ومتلاقيش ست مسئولة عن شيء عندهم؛ لدرجة إن الحكومة عملت وزارة للمرأة عشان تشوف حل للثقافة اليابانية دي.

*️⃣ بس خلاص البوست خلص... بس لازم لازم أكتب الأكلاشية بتاع إن مش معنى ما سبق إن الواحد بيأيد ظلم المرأة أو إنه ضد تعليمها أو أو أو... لكني بقول إن دا لا هيخلي الدولة متقدمة ولا متخلفة؛ وإن بص العصفورة بتشتغل ممتاز لو فيها واحدة ست.

*️⃣ ومن مكاني هذا بقول الإجابة تونس... نمشي مصطفى مدبولي ونعين وزيرة الصحة مكانه 😂😂 ... بهزر معاكم ؛ لا متنفعش طبعاً؛ نعين فايزة أبو النجا.

أمريكا اعلنت منذ قليل إن في شحنة هدية من أمريكا لمصر 1.6 مليون لقاح فايزر اتحركوا في الطريق لمصر

مبروك فايزر قادم؛ يا تري هيروح لمستشفيات القطاع الخاص ولا العاديين؛ ولا هيحصل ايه فيهم... امريكت اعلنت انها شحنتهم لينا

تحديث توضيحي:

فايزر محتاج ثلاجات خاصة؛ ومصر متعاقدة علي 63 ثلاجة استلمنا 20 منهم من اسبوعين... يعني مش هنقدر نوزعه عالجمهورية

تخيل معايا صاحب شركة قال لموظف عنده إنتا شغال معايا بقالك 10 سنين صح... مرتبك كان 3000 جنية دلوقتي بقى 8000 جنية شوفت

*️⃣ في حاجة مهمة قوي الناس بتنسى الموضوع دا... التضخم؛ هى ال 3 الاف جنية سنة 2011 تساوي كام سنة 2021؟ دا بفرض إن الموظف في نفس المهارات ونفس الشغل ومش بيترقى.

*️⃣ في مواقع كثير قوي بتحسب الموضوع دا... بتقول عاوز دولة كذا... سنة مثلاً 1990 مبلغ كذا يساوي كام في 2021

*️⃣ دا عشان تحسب معدل الربح الحقيقي... حتى الفوائد البنكية دائماً بيحسبوا حاجة اسمها الفائدة الحقيقية.. يعني البنك يديك فائدة 8% والتضخم 6% يبقى كده الفائدة الحقيقية 2%

*️⃣ بينما ممكن دولة أحرى تديك فائدة في البنك 4% والتضخم 1% يبقى فائدة حقيقية 3%

*️⃣ معنى كده إن البلد الثانية اللي فائدتها 4% أفضل من الأولى اللي 8%

*️⃣ تخيل أنتا تقول تعرف فلان اشترى شقة في التجمع أو الشيخ زايد ب 200 ألف سنة 1998 دلوقتي الشقة ب 2 مليون... عاوز اشتري شقة عشان اكسب زيه كده... طيب السؤال هو بجد كسب 1.8 مليون؟

⬅️ الموقع دا كمثال بيحسب الموضوع دا

https://www.worlddata.info/africa/egypt/inflation-rates.php

*️⃣ تقول مثلاً مرتبي سنة 2013 كان 4000 جنية ودلوقتي بقبض 10 الاف جنية يبقى كده وضعي ايه. هتلاقي الموقع بيقولك ال 4 الاف سنة 2013 تساوي 10.3 ألف في 2021... يبقى كده مرتبك زي ما هو؛ انتا بس أخدت فارق العملة والتضخم؛ مفيش أي زيادة بسبب الخبرات

*️⃣ عشان كده كثير منا بيلاقي نفسه بيقول أنا كنت زماان وضعي أحسن بالرغم من إني بقبض أكثر.

*️⃣ الألة الحاسبة دي تنفع في أي شيء... يعني مثلاً الحكومة تقولك كنت بصرف عالتعليم سنة 2013 مبلغ 65 مليار دلوقتي 170 مليار شوفتهم الاهتمام بالتعليم زاد ازاي... تروح فاتح الموقع وكاتب 65 سنة 2013 تساوي كام في 2021 تلاقيها 167 وهما بيصرفوا 170 يعني لا في اهتمام ولا شيء دا مجرد فارق قيمة العملة.

*️⃣ التضخم بيحصل إزاي؛ هيبقى لدا موضوع مستقل؛ بس زيادة الأسعار بتكون إما فلوس زيادة مع الناس؛ يعني الحكومة طبعت فلوس كثير... أو زيادات لأسباب أخرى؛ يعني مثلاً كانت الضرائب 10% فالدولة خلتها 15% فكده سعر كل شيء هيزيد؛ أنا هنا لا طبعت عملة ولا شيء... فرضت ضريبية زودت الأسعار...

*️⃣ المهم بس وهدفي بالبوست دا تعارف تقارن بين الأسعار؛ روحت اشتريت شقة ب 400 ألف سنة 2000 أيام مبارك ودلوقتي بقت 1.5 مليون جنية؛ كده كسبت ولا ايه؟ تشوف تلاقي 400 ألف سنة 2010 تساوي 2.75 مليون في 2021 يبقى كده مكسبتش فعلياً والشقة محافظتش حتى على قيمة فلوسك

في ميزة في iOS 15 في أبل وهى إن الآي فون اتضاف لشبكات Find My الخاصة بأبل.

*️⃣ الميزة للي ميعرفهاش هى إن أي جهاز خاص بأبل عندك يعني الآي فون أو AirPods أو AirTag ممكن حد يسرقه أو يقع منك... هنا الجهاز بيقعد يبعت شبه اشارات استغاثة بالبلوتوث بشكل مستمر؛ فلو صادف إن في حد معدي معاه آي فون فهنا تليفونه تلقائي بيبعت الإشارة دي لسيرفرات أبل ومعاها الموقع

*️⃣ فكرة الشبكات دي إن ممكن ممكن منتجات زي السماعة AirPods أو AirTag تقع منك أو تتاخد وهى مفيهاش أصلاً GPS فمش هتعرف مكانها عالخريطة؛ فأبل بتعتمد على أجهزه الآي فون بقى في إنها تلقط الإشارة وترفعها للسيرفرات.

*️⃣ أبل بقى ضافت الميزة للآي فون؛ تخيل كده الآي فون بتاعك وقع أو اتسرق؛ أو شيء الحرامي بيعمله هو إنه بيشيل الشريحة عشان يفصله عن النت؛ أو حتى يقفل الموبايل ككل.

*️⃣ الآي فون حتى وهو مقفول طالما مفعل Find My فيه؛ هيفضل يبعت اشارات الاستغاثة دي؛ فأي حد معدي جنب الحرامي ومعاه آي-فون هيلقطها ويرفعها لسيرفرات أبل.

*️⃣ الجميل إن أبل مخليه الميزة طالما فعلتها مكملة؛ الآي فون يتطفي أو حتى الحرامي يعرف يفرمت الموبايل... برضك شغالة وبرضك هتعرف تتابع التليفون وهو معمولة ظبط المصنع أو حتى جبت iOS وفرمته ونزلت نسخة جديدة عالتليفون... شغالة وهتفضل تتابعه برضك هو فين.

*️⃣ بصراحة معرفش أنا ك مصري هستفيد ايه بالميزة دي؛ أنا فاكر ليا صديق غير مصري كان جه من سنين لبلدنا؛ وهوب حراميه ثبتوه وسرقوا الآي فون بتاعه منه؛ فهو راح لقسم الشرطة ومن جهاز ثاني ورى الظابط مكانهم... فالظابط قاله دول في منطقة كذا فقاله يعني ايه؛ فقاله دي مينفعش نروحها .. وفضل صاحبي يراقب موبايله لغاية ما اتفرمت واختفى وقتها من الشبكة.... اييييه دنيااا....

*️⃣ مفروض أبل تضيف ميزة إن التليفون يرجع لوحده؛ أصلي هروح هلاقي بلطجية هيضربوني وهياخدوا المحفظة والفلوس اللي معايا كمان؛ فلازم أبل تتطور بقى وتعمل مزايا لكل الشعوب وتبطل شغل الفرافير بتاع العالم الأول دا.

بحس إن الصين وصلت لمرحلة من القوة الاقتصادية إنها بتنفذ في نفسها والكوكب التغيير بالصدمة؛ اعمل اللي نفسي فيه وأبهدل الكوكب معايا... وكمان الشركات الصينية كبرت قوي قوي فالحكومة عاوزة توريهم إنها هى الأصل؛ انتم مش في الغرب يا كباتن.

⬅️ ايه دا؛ جاك ما كبر قوي؛ مجموعة علي بابا ومجموعة النملة Ant Group كبروا جداً... ألو جاك؛ بص عاوزين نشاركك في النملة؛ ايه مش موافق؛ براحتك دي حرية شخصية... جاك يفتكر نفسه بجد أغنى رجل في الصين ويطلع ينتقد السياسة المالية للصين وإنها بتخنق الابتكار.... أمممم جاك محتاج يتأدب

*️⃣ جاك يختفي ومش بيظهر للعلن بقاله قرب السنة غير لقطات كده كتاكيد إنه عايش؛ مش بيحضر مؤاتمرات ولا يتكلم علناً.. مجموعة النملة برضك تتأدب؛ الطرح في بورصة شنغهاي يتلغي وشوية إجراءات رقابية كده لغاية ما الشركة جابت ورا وقررت تشارك ناس تبع الحكومة...

⬅️ المستقبل للسيارات الكهرباء؛ ايه دا في شركات كثير صينية ومش شاطرين؛ أممممم.... طيب لما يكون الوضع كده وناس متفرقة ومش شاطرين يبقى الحل القديم السحري؛ تجيب لهم كلب سعران وتسيبه عليهم وغصب عنهم هيتوحدوا وإلا هيموتوا... ألو ألو أليون ماسك؛ ازيك يا أبو X Æ A-Xii (دا اسم بنته)... تعالى افتح أكبر مصنع في الصين وتسهيلات زي الفل... وييجي اليون وتفوت كام سنة والشركات الصينية فعلاً توحد جهودها وتتطور جداً.... ايه دا يا أليون دا في عربيات بتولع وهنعمل تحقيقات لشركات ونشوف ايه الموضوع دا.

⬅️ القطاع العقاري بقى يمثل ربع الاقتصاد؛ حلو جميل بس مش جميل قوي؛ الشركات الصينية عمالة تاخد قروض بالهبل وتبني والشعب ياخد قروض ويشتري؛ انتم فاكرينا أمريكا وهنعمل أزمة الرهن العقاري؛ طلع يا ابني بإيقاف التمويلات للشركات اللي عليها ديون كثير زي إيفرجراند ؛ بس يا ريس الموضوع دا كارثي... طز تفلس عادي بس الشركات تبقى تحت السيطرة... وبالفعل قد تم.

⬅️ على سيرة العقارات؛ الحديد هو الخام الرئيسي؛ الطلب الصيني المستمر عالحديد يخليه يوصل لأرقام خزعبلية... طن الحديد يبدأ 2019 ب 75 دولار ويبدأ 2020 ب 95 دولار... لكن سيطرة الصين على كورونا تخلي جنان بقى من شهر يونيو 2020 والحديد يقفل السنة على 160 دولار... يخش 2021 والطن ب 160 قولنا وعلى شهر 7 يوصل ل 220 دولار.

*️⃣ طبعاً زيادة أسعار الحديد كانت من أسباب زيادة أسعار الشقق فالناس لما الشقق بتزيد تقولك دا استثمار زي الفل فتحوش أكثر فيها فالشركات زي إيفرجراند تاخد قروض أكثر عشان تبني وووو... طيب من ناحية أدي إيفرجراند خلصنا عليها بصفتها أكبر مستهلك حديد؛ وكمان مضاعفة ضرائب التصدير عشان محدش يصدر حديد... منتصف يوليو 2021 الحديد ب 220 دولار؛ شهرين وبقى 120 دولار.

*️⃣ أمممم ايه تاني لسه مأدبناهوش وبقى تحت السيطرة أو الغرب بيقول علينا وحشين بسببه؛ اه مهو الغرب عمال يلقح علينا ومستخدم عضو العيون الخمسة أستراليا في الخناقات؛ طيب يا أستراليا عقوبات اقتصادية عليكي؛ ممنوع استيراد الفحم منك... بس يا شي جين بيج يا كبيرنا؛ احنا أكبر مستهلك فحم في الكوكب؛ دا احنا ثلثين انتاج الكهرباء عندنا من الفحم.... طز مش مهم.

*️⃣ طيب شركات الفحم المحلية بقت مبسوطة والانتاج زاد والأسعار زادت وبقوا يكسبوا بالهبل... لا يا حبيبي منك له؛ شي جين بينج عاوز الصين تتحول للطاقات النظيفة؛ في أولمبياد شتوي جاي وعاوز السماء صافية؛ وعندك أحلى قيود على تصنيع واستخراج الفحم والإضرار بالبيئة.

*️⃣ طيب معاليك شركات الكهرباء هتنتج إزاي؛ مش مهم مش هتنتج كهرباء... طيب سيادتك المصانع تعمل ايه؛ امممممم ... طيب المصنع هيشتغل 3 أيام بس في الأسبوع مش 7 ايام؛ ولو الطاقة مش ظابطه؛ خلوه يشتغل يوم بس في الأسبوع... طيب الأسعار معاليك طيب الصناعات كثيفة الطاقة اللي عندنا... هو كده عاوز السماء صافية والهواء العليل وتزقزق الطيور... يلا اتغيروا وعدلوا كل شيء.

*️⃣ العالم كله بيكون عنده أزمات بتحصل إما لمشاكل عالمية زي ازمات اقتصادية عالمية أو كورونا؛ أو عقوبات اقتصادية عليهم من أمريكا... الصين بقى هى بتعمل المشاكل لنفسها... تقريباً بتطبق سياسة أقسى على ابنك عشان عضمة ينشف.... تمسك الشركات بتاعتها وتنزل فيها ضرب؛ هى بتعمل السياسية دي من زمان بس لدرجة إنها تعمل لنفسها أزمة كهرباء وتقطع عن مقاطعات كاملة الكهرباء؛ دي جديدة قوي.

*️⃣ الرئيس الصيني شي جين بينج بغض النظر عن اللي بيعمله؛ بس هو عنده خطة واضحة لدولته؛ خطة سيطرة شاملة وأظن شوفنا قرار منع ظهور ممثلين أو مذيعين أو أي حد في التليفزيون راجل؛ بس شكله مش راجل قوي؛ يكون بيقلد العيال الكوريين بتوع PoP-K أو هو يكون مش مظبوط... احنا بلد رجالة وهنفضل رجالة مش مخنثين (على فكرة دا قرار حقيقي)... الشركات تكبر براحتها بس تبقى عارفه مين اللي مكبرها؛ وتكبر بنموذج صيني مش تفتح لي قروض عالرابع ونبقى بنقلد أمريكا وأزمة 2008.

*️⃣ مش عارفين آخره الصين ايه بس أدينا هنشوف؛ الفترة القادمة الكوكب كله هيتبهدل في الأسعار بسبب الصين وتخفيض الانتاج... وعامة أظن دي تعتبر تطبيق قاسي لخطة الصين المعلن في 2015 تحت اسم "Made in China 2025"... متعرفش بقى لكن الأكيد ان الكوكب هيتمرمط بسبب الصين.

*️⃣ الصين معروفة بانها دولة بتتحرك بخطة طويلة هادية تماماً؛ حتى انهم عارفين إن مشكلة انقراض الصين هتبدأ والتوقعات إن بحلول 2025 هيبدأ عدد سكان الصين يقل بلا توقف.. فالصين دلوقتي اللي عدد سكانها فوق 1400 مليون متوقع بحلول 2100 تبقى ما بين 700 الي 730 مليون... عشان كده الحكومة الصينية أخدت قرار في 2015 بالسماح بالطفل الثاني وبتدرس الصين اعتباراً من 2025 السماح بالطفل الثالث.. ودا هيخلي في مصطلحات بتنقرض من الصينية ترجع؛ مصطلح زي أخويا؛ عمي؛ خالي... لإن محدش عنده اخوات ولا ابوه وامه عندهم اخوات. اييييه ملناش دعوة احنا يا موهيي على رأي فول الصين العظيم.

طب علي فكرة زيادة البنزين قليلة؛ أيوا الحكومة مش عارفة تزوده؛ وتوقعي كان 50 قرش المرة دي و 50 أخري يناير عشان يقفل 10 جنية ال 95؛ بس المشكلة ان الوضع الاقتصادي لا يسمح.

*️⃣ في حالة تباطؤ اقتصادي؛ الحكومة بتعمل إصلاحات (هي اسمها كده يا كابتشن 😂 أنا ماليش دعوة) في مجال الضرايب والجمارك؛ والحاجة اللي كنت ممكن تتغرم فيه 500 جنية بقيت تدفع فيها 30 الف 😂؛ وكده يعني.

*️⃣ فدا عامل ارتفاع أسعار؛ والتضخم بدأ يفلت تاني؛ والبنك المركزي بعد ما كانت التوقعات كل مرة يا تري تثبيت ولا خفض؛ هتبقي التوقعات اللي تسمعوها تثبيت ولا زيادة الفايدة.

*️⃣ مؤشر مديري المشتريات PMI أول إمبارح قال ان القطاع الخاص الغير نفطي في مصر بيعاني من انكماش للشهر ال 10 علي التوالي؛ والرقم الحالي هو الاقل في ال 4 شهور الماضية.

*️⃣ عالميا الصين فاحته الكوكب أزمات؛ والبنك المركزي الأمريكي بيدرس يرفع الفايدة ودا لو حصل هتبقي مراجيح ومصر هتضطر تزود الفايدة عشان تحافظ عالأموال الساخنة واستثمارات الاجانب في اذون الخزانة

*️⃣ وعلي سيرة القروض فمصر حاليا بتدفع أعلي فايدة عالجنية من 2019 ووصلت لفوق 15% لسندات 10 سنين.

*️⃣ بالنسبة للدولار فالشهر الماضي مصر اخدت قروض آجل 6 سنين بفايدة 5.8% وآجل 12 سنة بفايدة 7.6% وآجل 30 سنة ب 8.7% (عارف دي سندات مش قروض؛ بس بالنسبة لنا كشخص عادي؛ قرض هو سند صكوك اذون خزانة زي اي اسم تحبوا تقولوه؛ كلهم سلف ودين 😬) وللتوضيح الفايدة قلت بسيط عن 6.1% و 7.6% و 8.8% اللي كانوا قبلهم

*️⃣ فتخيل كده الحكومة تقولك زيادة 75 قرش مثلا بالبنزين؛ هوب الاسعار كلها تزيد والتضخم يزيد؛ المركزي يروح مزود الفايدة؛ السيولة في السوق تقل والشركات الاقتراض عليها يزيد؛ فالقطاع الخاص ينكمش أكثر ودوخيني يا ليمونة.

*️⃣ فصلوا عالنبي كده وصدقوني الحكومة نفسها تزود اكثر بس مش عارفة 😂؛ قال ربع جنية قال اللي زعلانين منه؛ اسكتوا اسكتوا؛ هتأجل الزيادة دي لما تطلع من المزنق الحالي؛ هنروح منها فييين يعني.

*️⃣ هي خطتها قائمة ان الإصلاحات الضريبية تتم في أسرع وقت؛ فحصيلة الضرايب تزيد فمتضطرش للقروض عالية الفوايد دي... واصلاح الجمارك يتم فتقلل الاستيراد فتوفر دولار فتقلل الاقتراض الدولاري.

*️⃣ في نفس الوقت برضك هتمشي في طرق اقتراض دولاري أنواع أخرى؛ زي امبارح موضوع القروض الخضراء بقيمة 2 مليار دولار اللي مصر طلباه؛ وسبق واخدنا 750 مليون دولار قروض خضراء... وللي ميعرفش القروض الخضراء دي بتتاخد عشان تعمل بيها مشاريع الحفاظ علي البيئة؛ بتكون حنينه شوية في الفايدة عشان دي رايح للبيئة واحنا بنحب اللي بيحافظ عالبيئة 😂😂.

*️⃣ مفروض 3 شهور كده ونخش مؤشر جي بي مورجان وشوية قروض جديدة... فكده هننوع مصادر القروض فلما يبقي قصادك كذا عرض فهنا ممكن تقل الفايدة؛ يعني تقول عاوز 2 مليار؛ يجيلك عرض قرض وعرض سندات واذون خزانة فانتا تختار بقي الارخص فيهم؛ او تاخد الاثنين 😂😂 زي ما عملنا في القرض الاخضر القديم؛ طلبنا 500 مليون اتعرض علينا 3700 مليون؛ فقررنا ناخد 750 مليون دولار مش 500 بس؛ والفايدة كانت 5.25% آجل 5 سنين.

*️⃣ بس يا سيدي ودي كانت دردشة سريعة صباحية؛ وان شاء الله مصر تعدي الأزمة الحالية علي خير؛ وللتذكير احنا في وسط ازمة عالمية؛ يعني مهواش العالم متدلع واحنا بس اللي مزنوقين. الكوكب مزنوق ولسه 2022 هيروح ورا مصنع الكراسي 😭

مصر مفيهاش 6 مليون لاجئ؛ ولا 3 مليون ولا 1 مليون ولا حتى نص مليون لاجئ... مفوضية الأمم المتحدة للاجئين UNHCR بتقول إن عدد الاجئين في مصر أو طالبي اللجوء بنهاية 2020 يساوي 259,292 شخص

*️⃣ المشكلة إن الثقافة الشعبية في مصر بعافية؛ فعشان شايفين سوريين وليبيين ووو كثير فنقول يااااه كل دول لاجئين ومصر الحضن الكبير اللي بيحتضن كل الأطياف والي آخر الكلام الشعبوي.

*️⃣ اللاجئ هو شخص بيروح لدولة؛ الدولة دي (أو الأمم المتحدة) بتوفر له سكن ومرتب شهري وخدمات (ممكن مش كلها يتوفر حسب الظروف للدولة).

*️⃣ لكن لو أجنبي موجود جوا دولة؛ شغال فيها؛ بيقبض مرتب من شغله و بيدفع مصاريف الإقامة من جيبه؛ بيدفع الإيجار بتاع بيته من مرتبه؛ يعني محدش بيصرف عليه جنية؛ فدا لا يعتبر لاجئ... دا أجنبي ساكن في الدولة وعايش فيها. لكن لو مثلاِ شغال بياخد ألفين جنية والدولة بتديله اعانة سكن والامم المتحدة اعانة علاج وووو فهنا يعتبر لاجئ؛ فلو بتصرف عليه يبقى هو لاجئ؛ خلاف ذلك لا.

*️⃣ هو ينفع نقول المصريين اللي في السعودية والإمارات والكويت دول لاجئين في الدول دي؟ طيب ينفع نقول اليونانيين مثلاً اللي شغالين في بريطانيا دول لاجئين ؟ طيب الأتراك اللي في ألمانيا ينفع نسميه اللاجئين الأتراك في ألمانيا؟ العمالة البنجلادشية في السعودية ينفع نقول دول لاجئين بنغال؟

*️⃣ فمينفعش يبقي في واحد جوا دولتك بيشتغل وبتاخد منه ضرائب وتقول عليه لاجئ.. اللاجئ يعني بيلجأ ليك وبتصرف عليه... خش موقع المفوضية هتلاقيهم قايلين إن في 55 ألف طالب مثلاً لاجئ في مصر هياخدوا منح تعليمية... يعني في حد هيدفع لهم رسوم المدرسة...

*️⃣ فالغالبية الكاسحة للسوريين مثلا في مصر مش لاجئين؛ دول ناس شغالة بفلوسها زي المصريين بالخليج بالظبط. فحته شوفتم احنا مش زي بره عندنا لاجئين بس مش بنعمل مخيمات إيواء ولاجئين بل دخلناهم جوا الدولة وووو... دي مش فشخرة... لما بتعمل مخيمات لاجئين فإنتا كده بتطلع من جيبك تصرف عليهم يبقى كده هما لاجئين؛ بينما لما تدخلهم جوا البلد يسكنوا من جيبهم والجمعيات الخيرية تجمع لهم؛ وتحاسبهم على كل شيء زي المصريين فهما هنا مبقوش لاجئيين ولا ينفع تحسبهم لاجئين لإنك مش بتصرف عليهم.


دا لينك الأمم المتحدة عن الاجئين في مصر

https://www.unhcr.org/ar/5ae5be924.html

نفسي مرة يوصل اختراع لمصر اسمه التعويض للعميل... أصلاً احنا نفسنا منعرفش يعني ايه تعويض أصلاً بجد وبنخلط بينه وبين الحصول على الحق.

*️⃣ يعني تخيل معايا انتا مشترك مع شركة اتصالات انترنت أرضي والشهر عندك يبدأ يوم واحد... روحت دفعت الاشتراك هوب حصل مشكلة في خطك الأرضي الخدمة فصلت وقعد كده ليوم 30 في الشهر.

*️⃣ شركة الاتصالات هتكلمها فتقولك طبعاً حقك يا فندم والشهر القادم مش هتدفع شيء... هتلاقي نفسك مبسوط وتمام شكراً وزي الفل.

*️⃣ هنا انتا مأخدتش تعويض؛ انتا أخدت حقك.... انتا واحد دفع فلوس خدمة 30 يوم؛ تعطل الخط والخدمة مأخدتهاش؛ رجع الخط فتاخد بقى الـ 30 يوم... فمفيش تعويض أصلاً

*️⃣ مرة فصل الخط الأرضي عني 10 أيام وبعدين اشتكيت لقيت شركة الانترنت بتقولي هنعوض حضرتك ب 47 جنية بدل ال 10 أيام اللي قطعنا فيهم الخدمة... فقولت لها دا مش تعويض دا اسمه رد الحق؛ لكن فين التعويض؟

*️⃣ قطع الخدمة 10 أيام خلاني اشتركت وقتها في باقات انترنت موبايل ب 200 جنية... فانتا مخسرني 200 جنية مفروض مكنتش أدفعها... دي مفروض أتعوض عنها ولو جزئياً.

*️⃣ نفس الفكرة تلاقوا في قطع المياه؛ شركة المايه تقطع لساعات طويلة ساعات بتعدي ال 12 و 15 ساعة زي إمبارح... الساكن لو مكانش عامل حسابه هيروح يشتري مياه معدنية صح.. فالمنطقي يكون في تعويض.

*️⃣ يعني تخيل في لائحة كده بتقول إن كل 1 ساعة انقطاع في الخدمة = تخفيض الفاتورة 1% لو الخدمة لاحقة زي المياه والكهرباء... أو كل 1 يوم انقطاع خدمات شهرية زي الانترنت يساوي تعويض 5 أيام...

*️⃣ وقتها مقدم الخدمة هيلاقي نفسه بيخسر من تضرر العميل؛ فتبقى علاقة صحية Win-Win

*️⃣ نفس المفهوم دا في الإزالات للشقق والأراضي للمشاريع؛ يقولك تشكيل لجنة لبحث السعر العادل للشقق والأراضي... بفرض أصلاً بفرض إنها وصلت إن الشقة دي سعرها العادل 500 ألف... خد يا مواطن 500 ألف أهو تعويض على شقتك؟ لا طبعاً دا اسمها خد 500 ألف سعر الشقة.. مفروض يكون في 500 ألف أخرى تعويض عالنقل الإجباري من المكان.... يعني مفروض يكون اللي بيدفع ضعف القيمة السوقية العادلة للمكان... 500 سعر المكان و 500 تعويض أدبي ونفسي ليك على أننا بنجبرك.

*️⃣ لما ماسورة مياه تضرب وتغرق شارع مثلاً وعربيات... تلقائي مفروض تتحمل شركة المياه تكاليف إصلاح جميع السيارات في المكان دا في التوكيل على حسابها... هتقولي يعني هو أصحابها بيصلحوا عربياتهم دي في التوكيل... هقول لا طبعاً بس دا تعويض ليه إنه هيتم اصلاح عربيته أحسن ما هو نفسه بيصلحها؛ تعويضاً ليه إنه هيتضرر يوم واثنين و 5 مثلاً انه عايش بدون العربية.

*️⃣ مفهوم التعويض في مصر غير موجود؛ وبسبب اننا مش بناخد حقوقنا فبقى لو جهة قالت لك هديك جقك؛ تحس إنه تم تعويضك وكده انتا مبسوط.

التعويض غير رد الحق... بس خلاص وصباح الفل

صعود اليمين المتطرف في أوروبا يوم بعد يوم بيكشف الوش الحقيقي بعيد عن القرطسة... بس أوروبا كلها كوم وفرنسا كوم تاني؛ فرنسا أصلاً بلد عنصري منذ قرون؛ وحتي الحملات الصليبية أعلنت من فرنسا.

*️⃣ فتخيلوا بقي بلد هي أساساً في الوضع العادي بتاعها متطرفة وعنصرية؛ فتخيلوا مع صعود اليمين المتطرف بقي... لا يبقي نعلي.

*️⃣ شوية ويخشوا شتيمة واهانة للرسول من منطلق الحريات وكمان عشان غالبية شعوبنا عادي هتقول الله يسامحك وبعدين تخش تشتري منتجات فرنسية من متاجر فرنسية عادي... ايه علاقة ان الرسول يتشتم باني مشتريش الجبنة الفرنسية اللي بحبها.

*️⃣ المثير للسخرية إن ماكرون عندهم هلع؛ صعود شعبية ماري لوبان المتطرفة (مصرية الأصل وجدتها من اسكندرية)؛ فقاعدين بنظام أنا اشتم العرب والمسلمين؛ فماكرون يقول ايه دا هو الشعب عشان عنصري ومتطرف هينتخبهم عشان بيشتموا المسلمين؛ لا ما أنا برضك بعرف اهين المسلمين والعرب عادي علي فكرة... ويروح معلي عليها وهي تعلي عليه والاثنين يهزقوا فينا؛ وعادي احنا نتشتم وقشطة؛ الدولة تشتري منهم والمواطن يشتري وعادي؛ الشتيمة مش بتلزق.

*️⃣ المهم بقي فرنسا بقالها شهر داخلة خناقة كبيرة مع الجزائر؛ الفكرة هي ان فرنسا زي ما انتم عارفين احتلت الجزاير فوق ال 130 سنة وخلوا المجتمع فرنسي بدرجة كبيرة؛ فبقي الجزائري يكبر يروح فرنسا؛ وهو اصلا يعرف فرنساوي اكثر من العربي.

*️⃣ فبقت فرنسا فيها ملايين الجزائريين؛ وبطبيعة المجتمع زي ما قولنا فوق عنصري؛ فوضع الجزائريين مش ظريف؛ وفاكرين احداث الشغب بتاعة 2005 وقتها وحوارات.

*️⃣ فالقصة بقت كالتالي... عندي ناس بتتولد تتكلم فرنساوي وحاسه انها عاوزة تبقي فرنسية؛ والوضع في بلادها مش كويس... فلا هما عارفين يقعدوا في الجزاير ولا فرنسا... المواطن الفرنسي مش بيحبهم فبيضيق عليهم... فلما تضيق اوضاعهم يعملوا اضطرابات... فال اضطرابات تخلي ناس اكثر تبقي عنصرية عليهم؛ فوضعهم يبقي اسوء فيعملوا مشاكل اكثر فناس اكثر تبقي ضدهم وهكذا..

*️⃣ فمع صعود اليمين المتطرف المعادي للاجانب عامة والمسلمين خاصة عشان معاه اسلاموفوبيا؛ فوضع الجزائريين بقي مش ظريف في فرنسا؛ ودول بتاع 4 الي 5 مليون... فهنا تقرر فرنسا التضييق عليهم زي وضع قيود في سفرهم ومنح الاقامات واللي تقفشه ترحله خصيصا يعني مهياش حملات عالاجانب عامة بل الجزائريين وهكذا.

*️⃣ وطبعا دا مش كفاية فيطلع ماكرون يستفذ الحزائريين ويعلن تكريم (حركيين) وكمان يقول هيعملهم قانون تعويضات ليهم.

*️⃣ مين بقي الحركيين دول؛ بص يا سيدي؛ فرنسا لما استعمرت الجزاير قالت هو احنا هنفضل نشحن فرنسيين عشان نحارب الجزائريين ونسيطر عليهم... لا احنا نخلي الجنود من الشعب الجزائري نفسه؛ نجند جزائري ينزل يحارب ويموت الجزائري اخوه؛ والفرنسي يعيش في أمان.

*️⃣ وتجنيد الجزائريين دا توسعوا فيه لما احتل هتلر فرنسا وعملوا كتائب كاملة؛ وبعد الحرب العالمية فرنسا قالت هبعت الجزائريين يحاربوا بدل جنودي في فيتنام (قبل وصول امريكا)؛ وبعدين لما بدأت الثورة الجزائرية ضد الاستعمار؛ انضم لفرنسا حوالي 200 الف جزائري حاربوا في صفوفها ضد الثوار بهدف استمرار احتلال فرنسا للجزائر... شوية خونة بيحاربوا مع المحتل ضد اللي عاوز يحررهم.

*️⃣ الثوار الجزائريين وصلوا من القوة ان لا الجيش الفرنسي ولا قوات الخونة الحركيين قادرة عليهم ففرنسا وقعت اتفاقية الاستقلال سنة 62 وحطت شرط بس لحماية الاقدام السود (اوروبيين الاصل مواليد الجزاير) ونفضت للحركيين خالص.

*️⃣ بل هي اخدت بتاع 30-40 الف واحد بس منهم وشحنتهم علي فرنسا؛ والباقي سحبت منه السلاح وسابته في الجزاير؛ طبعا اتقبض عليهم وتم اعدام وسجن الالاف منهم.

*️⃣ اللي اتشحنوا عالجزائر؛ رمتهم فرنسا في مخيمات غير آدمية بل ومنعت ل 8 سنين اولادهم من التعليم في المدارس الفرنسية واللي اعترض منهم سجنوه وفضلت تمرمط فيهم لغاية ما حصل احداث شعب واسعة سنة 75 فبدأت تحسن اوضاعهم شوية واخدوا الجنسية الفرنسية لكن فضل متعلم عليهم ك حركيين.

*️⃣ الحركيين فضلوا يعانوا من سباب الجميع؛ الفرنسيين يشتموهم بانهم مش فرنسيين زينا؛ والجزائريين طبعا يشتموهم لانهم خونة. وفضل الحركيين واولادهم يرفعوا قضايا عالدولة يطالبوا ب التعويضات... وانضم ليهم حركيين الجزائر اللي خرجوا من السجون واسرهم وبيطالبوا فرنسا تعوضهم؛ ونظام هو دا جزاء اني كنت خدامك يا فرنسا.

*️⃣ سنة 2005 فرنسا طلعت قانون تمجيد الاستعمار؛ اه اسمه كده قانون بيجرم حد يقول في فرنسا ان الاستعمار وحش ولازم يتم تمجيد العصر الاستعماري... وبعدها فرنسا طلعت قانون يجرم شتيمة الحركيين؛ لان العار واصل لاحفادهم اللي خلاص بقوا فرنسيين بس لسه بيتشموا بانهم احفاد الحركيين.

*️⃣ نرجع للعصر الحالي؛ ماكرون طلع الشهر الماضي وقال انه بيعتذر للحركيين علي اللي فرنسا عملته فيهم وانه هيتم تعويضهم ووو... طبعا التصريحات ضايقة الشعب الجزائري لكن الحكومة الجزائرية قالت ملناش دعوة دا قرار داخلي فرنسي ودول مش جزائريين ولا نعرفهم أصلاً.

*️⃣ وطبعا شعبيا فضل الهجوم علي فرنسا؛ تكريم حركيين؛ تقليل تأشيرات السفر لفرنسا للجزائريين؛ سباب للرسول؛ ترحيل جزائريين؛ فبقت فرنسا تتشم في الجزاير اكثر من ولاد المبقعة جيرانا وقعد الجزائريين ينشروا تاريخ فرنسا الوسخ.

*️⃣ راح ماكرون استفز قوي؛ وطلع قال ان الحكومة في الجزاير عايشة علي ثقافة الكراهية لفرنسا وانه تم تزوير التاريخ وتزييفه للشعب الجزائري؛ فتم ايهام الجزائري انه كان عنده امه جزائرية قبل وصول فرنسا واحنا يعني اللي جينا ازلنا الامة الجزائرية دي؛ وقال انه مستغرب من قدرة تركيا انها تضحك عالشعوب بحيث مش حاسين ان الدولة العثمانية كانت مستعمراهم؛ وشايفين فرنسا بس هي اللي مستعمره؛ ووجود العثمانيين في الجزاير عادي مش مستهجن... وقاعدين فاكرين انهم كانوا امة جزائرية قبل ما نيجي لهم وهما كانوا محتلين برضك فايه الفارق.

*️⃣ طبعا دي اهانة صريحة للجزاير؛ فولع الموضوع والحكومة الحزائرية وقفت اتفاقيات تعاون مع فرنسا واتاخدت اجراءات كثير منهم منع الطيران الحربي الفرنسي من استخدام المجال الجوي الجزائري واتوقفت شركات فرنسية من العمل في الجزاير واتسحب السفير وحوار كبير.

*️⃣ بل وصل لان الجزائر عملت لقاءات مع تركيا واحنا بنحب تركيا وتركيا بتحبنا (ماكرون ممكن تقوله نحدف عليك بيض ممشش ولا نقول تركيا حلوه؛ هيقولك احدفوا عليا كراتين عادي)... بل والجزاير حسبما يشاع هتزود في استيراد السلاح التركي الروسي وتقلل خالص اي تعاون مع فرنسا.

*️⃣ غشيمة قوي فرنسا؛ وجميل الخازوق دا؛ وجميل قبله القفا الامريكي البريطاني ليكم في صفقة الغواصات الاسترالية... وعامة متزعلوش... شوفوا عندكم ايه ومصر سدادة... احنا بنشتري منكم اي حاجة؛ بداية من عربيات مترو الانفاق واتفاقية التوريد الجديدة؛ لغاية الاسلحة... دا حتي مصر عاملة اتفاقية مع شركات فرنسية زي سماريس لانشاء اسواق الجملة زي مشروع سوق جملة ببرج العرب بقرض فرنسي ب 100 مليون يورو؛ اه هنجيب شركات فرنسية تعمل لنا اسواق جملة... طيب عارفين موقع الذكاء الصناعي المصري؛ فيه مشروع واحد ووحيد وهو تعاون مع شركة تاليس الفرنسية... ووزارة الاتصالات بتبحث مع فرنسا عمل اجهزة تحكم وادارة المدن الذكية ال جيل الخامس اللي مصر بتعملها و قرض فرنسي 2 مليار دولار للخط ال 6 للمترو (ايوا ال 6) وقرض فرنسي لمحطة معالجة المياه وشركات فرنسية هتمسك مشروع الهيدروجين الأخضر وكفاية كده.

*️⃣ شوفوا ايه الجزائر مش هتشتريه وادونا قرض وهناخده منكم 😂😂. وخاصة انكم قروضكم جميلة؛ لسه مجلس الشعب موافق من 3 ايام علي قرض فرنسي ب 3.2 مليار يورو لتمويل المشاريع الفرنسية بمصر؛ وفترة سداد 30 سنة... قالوا 1.7 مليار لمشاريع تم الاتفاق عليها و 1.5 مليار يورو لمشاريع لسه هنتفق عليه.