أكثر سؤال الناس بتبعته لي إنبوكس وأنا بخاف وأنا برد عليه أو مش بحب اتسأله هو "نستثمر فلوسنا فين" يعني اللي يقولي عقارات واللي يقولي توقعك للذهب أو الدولار أو حتى البترول والبورصة.

*️⃣ السؤال دا مش بحب اتسأله لأسباب كثيره فمن ناحية مش شايف نفسي متخصص يعني ومن ناحية ثانية أخاف أدي نصيحة والطرف الآخر من ثقته فيا ينفذها... وفي الآخر أنا مجرد اتكلمت لكن هو اللي مطلع فلوس من جيبه.

*️⃣ فأنا بفضل إني دائماً يكون ردي بإني أخلي الآخر هو اللي يقرر لإنها فلوسه... لكن برضك مش بقوله يلا عيش مع نفسك... بقوله كل المعطيات إيجابيه وسلبيه اللي أنا أعرفها في مجال الاستثمار دا... وهو بقى يقرر لنفسه.. ولو عندي رأي شخصي محسوم في الموضوع دا بقوله رأيي الشخصي برضك لكن بعد ما أكون قولت له المزايا والعيوب .

*️⃣ فأنا بحضر بقالي يومين بوست كده رأي الشخصي في الذهب والدولار والعقارات والبورصة وحتى البيزنس الخاص.

المشكلة إن البوست دا بقى طويل قوي. فقاعد حيران بقى

1️⃣ أنزله أجزاء ورا بعضها بحيث يبقى بوست مستقل لكل نوع ودا ميزته إن الناس في التعليقات ستكون موحدة في نقاش أمر محدد... وعيبه إن اللي مش مهتم بالمجال دا هيفضل منتظر.

2️⃣ أنزله بوست واحد... ميزته هيبقى كله مرة واحدة... عيبه هيبقى طويل قوي... لكن في نقطة إن الناس تروح للي هى مهتمه بيه مش هتقعد تقراه كله... وممكن أحاول أختصره شوية وأشيل الرغي والهري المعتاد بتاعي.

فإيه رأيكم بقى في فكرة الموضوع نفسه؟ ولما أخلصه أنزله إزاي؟ 🤔 🤔

استثمر في الذهب ولا الدولار ولا عقارات ولا بترول ولا عقارات ولا بيزنس مستقل.

السؤال الصعب اللي مش بحب أرد عليه؛ فالبوست دا هيكون ردي اللي بقوله للناس اللي ب يسألوني انبوكس؛ اهو بالمرة بدل ما أفضل أرد اديهم لينك البوست دا.


قبل ما ابدا البوست في ملاحظتين مهمين:

1️⃣ الثبات يعني عودة للخلف؛ في حاجة اسمها تكلفة الفرصة البديلة؛ فلو انتا استثمرت في محل أو ذهب أو دولار وبعد سنتين لقيته مش مناسب فخرجت منه؛ أخدت نفس اللي دفعته؛ إنتا كده تفتكر انك خرجت بدون خسارة؛ انتا خسرت بحساب الفرصة البديلة؛ فلو مثلا البنك بيدي 10% سنوي يبقي انتا عالاقل خسرت 20%؛ ولو كنت اشتغلت بنفسك فانتا خسرت مجهود لو حطيته في مجال آخر كنت حققت عائد؛ لازم تفكر في الفرصة البديلة طالما بتعمل استثمار... اقل فرصة بديلة تحسب هي الفايدك البنكية اللي حالياً 9-10% وهتكمل نزول

2️⃣ أنا مش هذكر الجانب الشرعي؛ وعليك تشوف متخصص ديني تثق فيه؛ والموضوع أكبر من تفكير مجرد فايدة بنوك؛ في برضك امتلاك افتراضي للسلع وغيره من الاستثمارات... اسأل شيخ ومتسألش بن سامي 👳‍♂️ 😊😊.

*️⃣*️⃣*️⃣*️⃣*️⃣ الذهب *️⃣*️⃣*️⃣*️⃣*️⃣

*️⃣ تقريباً مفيش نوع استثمار واخد ثقة البشر مثل الذهب منذ الالاف السنين؛ الناس واثقة إن الذهب قيمته فيه ومش بيخسر ولو خسر النهاردة هيعوض بسرعه وو. وبصراحة التفكير دا لاول وهلة سليم وهو اللي بيخلي البشر وقت الكوارث تروح للذهب... بس تعالوا نفكر شوية بتعمق.

*️⃣ انتا عاوز تستثمر ولا تأمن فلوسك 🤔؛ يستثمر يعني يشتري ويبيع ويكسب وبرضك يخسر؛ يأمن فلوسه دا زي اتولد لك طفل فتروح تشتري سبيكة ليكن 50 جرام تشيلها له في خزينة عشان لما يكبر يكون نفسه بيها... احنا هنا مش بنكلم النوع الثاني بل الأول.

*️⃣ الذهب بيتم المضاربة عليه زي أي سلعه ويطلع وينزل بشكل قوي؛ ومفهوم إنه مش بيخسر دا بلح؛ اه بلح وتعالوا نشوف مثال

*️⃣ الذهب في يوليو 2011 وصل ل 1835 دولار للأوقية تقريباً ؛ وبعدين قابل زلطة اتكعبل وعمل نفسه نيمار ومقامش واتمرمغ ؛ فضل ينزل ينزل ينزل لغاية ديسمبر 2015 وصل 1065 دولار؛ ايوان نزل من 1835 الي 1065 يعني خسارة مباشرة فوق 40% من الفلوس اتبخرت. عارفين امتي الذهب طلع تاني وجاب 1835 دي 🤔🤔🤔 في 2020 لما جت الكورونا؛ تخيلوا حرب اقتصادية وترامب في الحكم ووو ولسه كان محتاج كارثة ووباء عالمي عشان يرجع تاني؛ فتخيل واحد اشتري ب 1700 مثلا في 2011 فضل خسران ل 2020.

*️⃣ طبعا ما سبق بنتكلم خسارة مباشرة لسه في فرصة بديلة برضك؛ لكن تعالوا للوقت الحاضر؛ وباء عالمي مخرتق الكوكب؛ الناس تشتري دولار ويوصل شهر 8 ل 2035 دولار الاوقية؛ وبعدين خطط الانعاس الاقتصادي للعالم تشتغل والعالم يفتح شوية وأمل في علاج فينزل شوية؛ حالياً هو 1865 دولار.

*️⃣ الاقتصاد العالمي التوقعات فيه إن 2020 كانت بس مجرد Demo أو عينة من الازمة الاقتصادية والصدمة هتيجي في 2021؛ فالنتيجة البنوك العالمية متوقعه للذهب ارتفاعات العام القادم وتوقعات البنوك من 2100 الي 2300 دولار في 2021؛. وملناش دعوة ببنك اوف أميركا اللي متوقع 3000 دولار؛ دا أوفر قوي 😊.

*️⃣ لكن توقعات البنوك مبنية ان مفيش علاج هيظهر في 2021؛ وهيحصل موجة ثانية وثالثة أسوء من الأولى؛ والكوكب هيقفل ووو ؛ وترامب مكمل حرب اقتصادية مع الصين والعالم مولع يعني؛ وأكبر 10 دول مشترية للذهب بالكوكب عندهم مشاكل زي الصين وأمريكا.

*️⃣ فدلوقتي مع رحيل ترامب؛ وبايدن عنده خطة انعاش كبيرة (هنتكلم عنها في الدولار) وبوادر اكتشاف علاج بتاع فايزر (هياخد سنة عشان نشوفه فعلياً) ففي أمل الاقتصاد العالمي يبقي أفضل من التوقعات؛ وأفضل لا يعني تحسن؛ لاني لو متوقع انكماش 5% وبقي 2% انكماش فهنا الاقتصاد العالمي بينكمش بس بقي أفضل (الأسوء قل).

*️⃣ فالخلاصة : طول ما الأزمة مستمرة الذهب هيطلع ؛ لكن أي بادرة تحسن هينزل؛ يعني لما ترامب يعترف بالهزيمة هينزل؛ لما بايدن يمسك الحكم هينزل؛ لو وقع خطة الدعم هينزل؛ لو مضوا اتفاقية وخف الخناق مع الصين هينزل؛ لو FDA أعلنت قرب الموافقة عالدواء هينزل وهكذا؛ وكلمة هينزل يعني هينزل عن المعدل اللي هو فيه وقت الخبر.

*️⃣ والعكس برضك لو الفيروس ضرب أوروبا بشكل كبير وقفلوا تماماً تاني هيطلع ولو خطة الانعاش الاقتصادي بتاعة بايدن فشلت هينزل وهكذا. فانتا بقي شوف توقعك للاقتصاد والعالم إيه وقرر... وطبعاً لو كلامك علي انك بتشيل ذهب لعيالك اللي في حضانة عشان بعد تخرجهم؛ لا متخافش شيل واطمن وبقول شبه؛ لان مثلا سنة 1980 كان متوسط سعر الذهب 600 دولار (وصل فوق 800 فترة يعني 600 متوسط) وبعدين نزل ومطلعش للمتوسط دا تاتي غير سنة 2006؛ يعني قعدت خسران 36 سنة.

*️⃣*️⃣*️⃣*️⃣*️⃣ الدولار *️⃣*️⃣*️⃣*️⃣*️⃣

نشيل فلوسنا في دولار؛ دا سؤال مهم؛ وعلي فكرة السؤال دا مرتبط بالفقرة السابقة وهى الذهب ؛ فأكيد في ناس استغربت لما عرفت إن الذهب وقع من 2011 ومرجعش تاني غير في 2020؛ وان مستويات 1980 مرجعتش غير في 2006 وهكذا.

*️⃣ سبب الموضوع دا إننا مصريين 😂 بتعامل لمؤاخذة بالجنية المصري؛ يعني سنة 1980 لو قولنا الاوقية ذهب ب 600 دولار فدا معناه 360 جنية (اه 😂 الدولار ب 60 قرش)... لكن لما نقول في 2004 الذهب الاوقية بقى 450 (دا اعلي حاجة) فدا معناه بالمصري 2700 جنية... فاللي شاري دولار قعد 34 سنة ولسه خسران 25% من فلوسه؛ واللي بيفكر بالجنية زينا ففلوسه بقت 750% 😂😂😂.

*️⃣ فللسبب السابق بقي احنا ك مصريين مش ينحس ان الذهب بينزل ويطلع؛ هو بيطلع علي طول؛ دا عشان لمواخذة الجنية المصري.

*️⃣ فنروح للدولار بقي وهنا في 2 معيار لعلاقة الدولار بالجنية (اي عملة كده بس خلينا في بلدنا).. حالة الاقتصاد المصري ؛ حالة الاقتصاد الأمريكي.

*️⃣ لو نتكلم بجد فالعلاقة بين العملات فعلاً مفروض تتأثر باقتصاد الطرفين؛ لكننا في مصر يعني ممكن الدولار ينزل في الكوكب ويطلع في مصر والعكس برضك بيحصل.

*️⃣ فنظرة سريعة للكوكب كده؛ زي ما قولنا مفروض يهدأ الصراع ترامب الصين (يهدى ويعقل مش يقف؛ دا صراع قوة 💪 مش هيقف لكن بقول يبقي في عقل 🧠).

*️⃣ ترامب مع بداية الكورونا بدا خطة انعاش اقتصادي ب 250 مليار ثم بقت 750 مليار ؛ وقبل الانتخابات قدم خطة ب 1800 مليار ؛ الديمقراطيين بقي خطتهم الأساسية 3000 مليار ولما تفاوضوا مع الجمهوريين قالوا خلاص 2200 من باب تقريب الارقام لبعضها.

*️⃣ فبغض النظر مين فين وكام بالظبط؛ الديمقراطيين مع طرح فلوس أكثر؛ الحكومة تقترض وتغرق امريكا دولارات وقروض ووو؛ مفروض عالمدى القصير دا يعمل انتعاش؛ فلوس كثير وقروض شبه بدون فوايد وتيسيرات ووو؛ فالهدف الاقتصاد يرجع والتصدير يتحسن والشركات تكسب فالحكومة تلم الفلوس دي ضرايب... طيب لو الاقتصاد امتص الفلوس دي ومحصلش الانتعاش 😂؛ البديل (الذهب) هيطلع؛ مش عشان هو حلو لكن عشان قيمة الدولار هتنزل.

*️⃣ كفاية كلام بره؛ مالنا احنا ومال الكلام دا؛ نفضل في مصر بقي وايه مصير الدولار جنية.

*️⃣ أي عملة مفروض في الظروف الطبيعية المؤثر العرض والطلب؛ وبالمناسبة العرض يعني توفر العملة من مصادره القروض؛ اه القروض ايراد؛ وسداد القروض يعتبر طلي ومصروف؛ ودي نقطة الناس بتنساها؛ تقارن بس بين صادرات مصر ووارداتها وتلاقي عجز فتقول ازاي الدولار مش بيزيد...

*️⃣ ايراد الاقتصاد كله بيتجمع؛ قروض؛ سياحة؛ تصدير ؛ تحويلات (التحويلات بتدخل الاقتصاد)؛ قناة السويس؛ استثمارات أجنبية في الشركات أو السندات؛ منح وصفقات خارجية (زي المقاولين العرب لما تاخد مناقصة بناء سد في إفريقيا) وهكذا.

*️⃣ الناحية الثانية تخصم كل الطالع؛ استيراد؛. سداد قروض؛ سياحة خارجية.

*️⃣ طبعا الكورونا شقلبت الاقتصاد فلما نبص كده ايه حصل في الايرادات.

*️⃣ السياحة انخفضت للثلث؛ التجارة العالمية قلت فاثرت علي قناة السويس؛ في تقارير بتتكلم عن عودة 1 مليون مصري من الخليج خلال سنة فالتحويلات لاحقاً هتقل ؛ الاقتصاد العالمي واقع فالاموال الساخنة قلت؛ ومبقاش حد معاه فلوس الاستثمارات الدولية...

*️⃣ لكن برضك الناحية الثانية؛ فاتورة الاستيراد في مصر بتقل بشكل مستمر؛ البترول رخيص فاستيراده بقي مش مكلف زي زمان؛ بالنسبة للقروض فالحكومة بقالها سنتين بتعمل تبديل مراكز للقروض؛ يعني بدل ما عندي قرض 5 مليار يسدد في 3 سنين؛ ابدله بقرض 10 مليار يسدد في 30 سنة؛ فدا يخفف قلق الحكومة من اقساط القروض... حتي الكورونا لما جت قدمنا قروض سريعه 12 شهر تعدينا الازمة علي ما ندبر قرض 30 سنة بداله. بل وفي قروض 40 سنة ؛ أنا متذكر ان في قرض آخر قسط فيه 2073 بس مش متذكر تفاصيله.

*️⃣ بشكل شخصي من ساعة التعويم وأنا غير مقتنع بسعر الدولار جنية؛ أنا كان توقعي مستوي 14 جنية مش يوصل 19 و 20... دا ساعد علي الدولرة.

*️⃣ الدولرة هي لعنة علي اي اقتصاد ؛ مفيش اقتصاد يتحمل الدولرة؛ لان مفيش اقتصاد عنده دولار يكفي الشعب كله ولا حتي 5% منه.. فلما الشعب يكون مقتنع ان الدولار هيطلع يروح يحوش دولار؛ فنجيب دولار منين يكفي الشعب.

*️⃣ اللي متابع اللي حصل في الاقتصاد التركي؛ البنك المركزي التركي ضخ يمكن 100 مليار دولار من اول السنة وبالرغم من كده العملة فقدت 25% وأكثر...

*️⃣ بعد التعويم الناس قالت الدولار هيكمل ل 20 ثم 25 وفي حد قال 300 جنية فاكرينه 😂😂 ؛ فالناس اشترت؛ المركزي عرفت يثبت الدولار 18؛ مع مرور 2017 ثم 2018 الناس لقت ان السعر ثابت؛ ونفتكر في الأول؛ ثابت يعني خسران لان في بدايل؛ فالناس بدأت تتخلى عن الدولار؛ فبدأ النزول الدرامي في 2019 واستمر في 2020؛ جت الكورونا الناس قالت هيزيد وبدأ تكالب بسيط وطلع ل 16؛ لكن الحكومة وفرت الدولار السريع (آجل سنة) وحرقت 10 مليار من الاحتياطي؛ فرجع تاني.

*️⃣ حاليا الدولار رايح لمنطقة 15.5 ولو كسرها فاحنا رايحين تحت 15 جنية؛ توقعي الشخصي ل 2021 انه مكمل نزول طالما الدولة عارفه توفر العملة بدون مشكلة فالدولار مكمل نزول... لغاية ما نشوف تأثير عودة المصريين ومصير السياحة ووو... فتوقعي مفيش صعود... دا توقعي الشخصي ومفيش هنا يعني مفيش 16 ثم 16 ونص وهكذا؛ لكن حركة 20 قرش دا مش صعود لانه بيرجعهم تاني.

*️⃣ بالمناسبة عارفين اللي محتفظ اشتري دولار ب 9 جنية وفضل شايله للنهاردة؛ لو برضك مشتراش دولار وحط فلوسه في الشهادات الحكومية 20% ثم 18% ثم 15% فحاليا فلوسه اكثر من اللي جاب دولار ب 9 وسايبه جنبه.

*️⃣*️⃣*️⃣*️⃣*️⃣ الشهادات البنكية *️⃣*️⃣*️⃣*️⃣*️⃣

لو انتا بتحط فلوسك في البنك؛ فالفايدة ام 15% اتلغت؛ البنوك نزلت ل 10% وهيفضل البنك المركزي ينزل الفايدة ؛ توقعي الشخصي هينزل بنكيا (شهادات الاهلي ومصر) ل 8% نص 2021 وممكن قبلها؛ وممكن في 2022 نشوف فايدة 6% لو محصلتش مشكلة مفاجأة.

*️⃣ انخفاض الفايدة طبيعي؛ الحكومة بتدي مفروض اعلي فايدة حقيقية ؛ مينفعش تكون بتعلن عن تضخم 4% مثلا وتدي فايدة 9% كده الفارق (يسمي الفايدة الحقيقية) حوالي 5% 🤔🤔 ؛ مفروض المعتاد تبقي 2% وساعات أقل... بالمناسبة بعد التعويم كانت الفايدة الحقيقية سالب 😂😂😂.

*️⃣ الخلاصة الشهادات البنكية مهياش خيار مناسب مستقبلاً عشان شوية ومش هتجيب فلوس... تخيل تحط 100 الف جنية وتحقق دخل 600-700 جنية شهري عائد؛ بلح طبعا.

*️⃣*️⃣*️⃣*️⃣*️⃣ البترول *️⃣*️⃣*️⃣*️⃣*️⃣

اه يا جدعان تقدروا تشتروا بترول؛ عادي البترول زي أي سلعه بتشتريها وتبيعها؛ وفي عقود شراء افتراضية وغيرها... المهم البترول سلعة

*️⃣ دلوقتي البترول في وضع سيء؛ اقتصاد عالمي منهار فالطلب انخفض؛ وكمان توجه عالمي للطاقة النظيفة... دا مخلي في كارثة بالاقتصادات البترولية (ربنا يكرم واخلص مقال السعودية 🇸🇦).

*️⃣ لكن مع شوية اخبار لتحسن الاقتصاد العالمي ممكن البترول يصعد. بصراحة مش بنصح انك تخاطر بقي مع البترول الا لو انتا شاطر في التحليل الاخباري والمالي؛ بس ادينا شايفين المؤسسات العالمية بتخفض توقعاتها للسعودية ولأرامكو ومستقبلهم.

*️⃣*️⃣*️⃣*️⃣*️⃣ العقارات *️⃣*️⃣*️⃣*️⃣*️⃣

احنا عايشين في عصر مقاولات 😂😂؛ فهنا ممكن نقسم القطاع دا ل قسمين

1️⃣ هتشتري شقة استثمار : غالبا هتشوف مشروع صاعد وتشتري فيه وتقسط؛ هنا لازم تفكر في نقطة؛ السوق فيه اغراق شقق؛ فهنا محتاج تفكر كذا مرة؛ شقتك هيزيد قيمتها الدفترية لكن هل لما تعرضها للبيع هتتباع 🤔 مين هييجي يدفع لك كاش مثلا 2 مليون لما ممكن بشتري بالتقسيط علي 15 سنة. ولو خطتك انك تأجر فهل المكان دا هيتعمر 🤔.

*️⃣ فكر معايا كده في مشروعك اللي هتستثمر فيه؛ الكومباوند دا لو جديد لسه في الغالب؛ هل بعد سنة هيتعمر ؟🤔 ولا معظم المشتريين زيك مستثمرين؛ مشكلة الكومباوند لو مستثمرين انه هيبقي متباع كله بس يفضل مهجور؛ فلما تعرض شقتك للايجار مين هيروح يقعد في مكان مهجور... ايه اخبار المواصلات ليه؟ مهو لو مكان مهجور فمش هيكون ليه مواصلات عادية غالباً.

*️⃣ عشان كده قولت لك ممكن شقتك تزيد قيمتها دفترياَ؛ اشتريتها ب 1 مليون وبعدن 4 سنين بقت ب 1.5 مليون او حتي 2 مليون يا سيدي... تعرضها للبيع محدش ييجي... تعرضها للايجار فتبقي شقة ب 2 مليون وتتأجر ب 4 الاف جنية يعني في السنة 48 الف في حين لو حاطط ال 2 مليون بالبنك حتي هيجيب لك 180 الف سنوي... ولاحظ هنا مش بقارن بين البنك وبين الشقق لكن بقولك فلوس مهدرة؛ فهل شقتك هيزيد قيمتها 150 الف (فارق الايجار والشهادات السنوي) وهل هتقدر تبيعها 🤔... لو الاجابة اه دوس يا معلم الشقق استثمار كويس لو هتعرف تبيعها والسوق شغال.

2️⃣ المقاولات : ممكن تشغل فلوسك في مقاولات؛ تبني عمارة وتبيعها وهنا هتروح لنفس النقطة السابقة؛ المشاريع الكبيرة هتوفر تقسيط 10 و 15 سنة فهل هتعرف تنافسهم 🤔 ؛ ممكن تشوف مقاولات بس تشطيب وتنفيذ للغير تخش تبني تشطب وتاخد فلوسك؛ الشقة اتباعت او لا انتا خلاص متعرفهاش... الموضوع دا ممتاز بس السوق اتملي شركات؛ فلوس عندك علاقات وهتعرف تجيب عقود تشطيب من الباطن دوووس هتكسب ذهب وتبقي من اصحاب الرانج روفر... معندكش علاقات فهتزعل؛ هتزعل زعلة تزعلك 😔😔. فادرس الموضوع والعلاقات الأول.


*️⃣*️⃣*️⃣*️⃣*️⃣ البتكوين *️⃣*️⃣*️⃣*️⃣*️⃣

مش بفهم فيه والله؛. فكرة البلوك شين رائعة بس أنا مش بفهم فيها ومش هخش فيها لو معايا فلوس... بالمناسبة فاكرين الشقلباظات بتاعة الدولار اللي قولتها فوق... اهي دوي cute جنب البتكوين... ممكن تبقي مليونير وممكن تشهر افلاسك 😂😂😂.

*️⃣ يطلع ل 20 الف دولار ديسمير 2017 وفي ابريل 2018 يعني 4 شهور يبقي ب 7 الاف دولار والشهر اللي بعده يطلع ل 9800 ويختم السنة عند 3500؛ انتم متخيلين ديسمبر 2017 ب 20 الف وفي ديسمير 2018 بقي 3.5 الف 😂 ؛ ديسمير 2019 بقي 7 الاف وحاليا 16 الف... دا اعنف من الفوركس للي جربها 😭😭😭😭.


*️⃣*️⃣*️⃣*️⃣*️⃣ البورصة *️⃣*️⃣*️⃣*️⃣*️⃣

هو مفروض البورصة مكان كويس دايماً لكن الوضع المصري غامض؛ البورصة المصرية بالذات وضعها حاليا مش مستقر خاصة مع التدخل في CIB اللي هو يمثل ربع البورصة المصرية.

*️⃣ مش معني الفقرة السابقة إن دخول البورصة وحش؛ لان حزم الدعم الاقتصادي بتدعم الشركات؛ لكن هتحتاج تستني كام شهر كده؛ احنا داخلين علي بداية السنة والشركات هتعلن نتايج 2020 المالية ومعظمهم هيعلن خسارة ؛ فممكن تفكر وهما بينزلوا وقتها واشتري... بس فكر مرتين قبل ما تبص علي اسهم EX30 وخاصة CIB فكر 3 مرات...

*️⃣ فكر في صناديق الاستثمار برضك خيار كويس؛ بس شوف تاريخها الأول.


*️⃣ الخلاصة البورصة كويسة بس حاليا مش مستقرة لأسباب مختلفة... وبص علي EX50 و EX100 عشان ال 30 ال CIB مدمره 😔😔

*️⃣*️⃣*️⃣*️⃣*️⃣ الشركات *️⃣*️⃣*️⃣*️⃣*️⃣

الواحد محرج يتكلم في دا نظرا لان عندي دكان تك وكده في تعارض مصالح 😂😂؛ بس انتا دي خيار موجود في السوق برضك والخيار دا تعالوا نفكر فيه

عاوزين نبص علي حاجة اسمها ROI او العائد علي الاستثمار يعني تبقي عائد كام عشان تدخل في البيزنس دا.

ممكن نبسط المعادلة بتاعته للتالي
ROI= Risk Free + Risk

*️⃣ يعني باختصار العائد الخالي من المخاطر هو الفايدة البنكية وهي حاليا 9-10% نقول 10% ونضيف عليه المخاطرة.

*️⃣ هنا بقي تفكر في البيزنس دا؛ ايه حجم المخاطرة؟ فمثلا المقاولات فوق في مخاطر كثيرة انك متقدرش تبيع الشقة أو تعثر العميل أو تغير اسعار الخامات (زي الكارثة اللي عملها التعويم في الشركات) عشان كده قطاع المقاولات بيكون ربحه عالي؛ لان مخاطرته عالية؛ وممكن مثلاً قطاع تربية الدواجن مثلاً؛ دا في مخاطر زي الشتاء والأمراض فالفراخ ممكن تموت يبقي الهامش لازم يبقي عالي...

*️⃣ لو روحت لشركات ناشئة والأفكار المبتكرة وجو Startup فهنا في مخاطرة ضخمة؛ وممكن بنسبة 90% فلوسك تبقي صفرررر. فهنا انتا بتكون داخل ومنتظر عائد أضعاف أضعاف المبلغ المدفوع... اللي بيتاجر في المخدرات 😂😂 عنده مخاطرة مهولة وبالتالي الربح فلكي.

*️⃣ فانتا ممكن نفس الشخص يتعرض عليك 3 مشاريع واحد ب 20% والثاني 30% والثالث 40% وتلاقي ان الأفضل هو 20%؛ وان مثلا ابو 40% دا لما تحسب مخاطرته تلاقي نفسك مش هتقبل أقل من 60% عشان تدخله يبقي هو كده فعليا مديك سالب 20%.

*️⃣ نقطة تانية تفكر فيها؛ ايه حجم المخاطرة؛ انتا حطيت فلوسك في مشروع يبقي ممكن تكسب وممكن تخسر. فتخيل مشروع العائد 75% وحسبت لقيته مناسب ROI؛ فمعني وجود عائد 75% يبقي فى مخاطرة عالية... من 12 سنة اخدت كورس تحليل فني للبورصة والفوركس؛ اول محاضرة بدأت نصايح؛ منها فاكر مقولة (متخاطرش بفلوس مش هتقدر تخسرها)؛ المشروع طالما هامش ربحه كبير يبقي مخاطرته كبيرة؛ لو المشروع هامش ربحه ضخم ومخاطرة قليلة؛ فالكل هيروح يعمله؛ ولما الكل يعمله؛ التنافس هيقلل هامش الربح... كده وضحت... فكر انتا تقدر تشيل مخاطرة لغاية أد ايه.

*️⃣ الضرايب والحكومة ؛ ممكن مشروع شغال زي الفل بس صاحبه عايش طول عمره لا بيقرب من الضرايب ولا تأمينات ولا دولة؛ سارق كهرباء ومستخبي في مكان وبيصنع شيء... الفترة القادمة الحكومة هتنخور ورا الكل؛ ففكر لو هو مشي شبه قانوني (ظبط ورقه) هيفضل مشروع زي الفل أم لا. فكررر

عارفين الأكلاشية المشهور بتاع ولاد خالتك أشطر منك؛ من وأنا صغير بحب ولاد خالتي جداً؛ يمكن عشان كنت بحب خالتي أكثر من أي حد.

كنا ساكنين قريب من بعض؛ كانوا أكبر مني ب 4 سنين والثاني 3 سنين ؛ كانت تربيتهم مختلفة عني؛ فأنا بابا كان قافل علينا في البيت وطفولتي كانت كلها قصص وكتب؛ مكنتش أعرف أي حاجة عالأرض بس كنت حافظ عواصم كل دول العالم واسماء الانهار في كل قارة.

*️⃣ كانت بتبقي فسحة جميلة لما أنزل أعدي الشارع أروح عند ولاد خالتي؛ أكبر مني مش كثير لكنهم عايشين عالأرض مش في الكتب زيي؛ بيخرجوا ينزلوا يتفسحوا ويلعبوا كورة مع أصحابهم في الحته ووو؛ كل اللي كنت محروم منه.

*️⃣ ابن خالتي الكبير أحمد كان كمان شاطر؛ دخل صيدلة القاهرة وكان دحيح؛ فكان هو النموذج المخالف لنظرية والدي اللي رباني بيها وهي انك عاوز تنزل وتبقي فاشل ؛ أهو أحمد بقي شاطر أهو.

*️⃣ لما اتقلنا الرحاب في 2006 وكبرنا مبقناش بنشوفهم كثير؛ خاصة أحمد اللي اهتم بالصيديلات بتاعته وانشغل بالحياة؛ وخلافات حصلت أسرية بينه وبين أخويا وأمي لكن أنا عمري ما دخلت خلاف معاه في خلاف شخصي وان كنت مختلف معاه في امور كثير لدرجة انه كان آخر مرة شوفته من أكثر من سنتين واخر اتصال بينا كان من سنة.

*️⃣ إمبارح بالليل جالي تليفون؛ ابن خالتي عمل حادثة بالعربية ومات ؛ حادثة كده ومات... أنا قعدت شوية مش فاهم هو مين اللي مات وإزاي ومات ايه بس 😔😔.

*️⃣ مخي أنا مدربه من زمان بيعرف بسرعة يتاقلم يعني فشلت اعلم نفسي أبقي متوازن فعلمته يرجع لي بسرعه؛ مفيش دقايق وعادي أنا بقيت في المود الطبيعي... لكن حبه ومخي وقف تاني... هو مين االي مات بس؛ انتم بتهزروا...

*️⃣ أنا لسه فاكر لما عرفني علي قصص رجل المستحيل وملف المستقبل وأنا في إعدادي ودخلني عالم القصص دي؛ لسه فاكر قبل ثانوي وهو بيشرح لي سمكة البلطي. لسه فاكر لما كانوا بياخدوني وأنا صغير مركز شباب الأميرية نلعب كورة... اه مكنتش بلعب وواخدني كده وخلاص بس فاكر كنت مبسوط... ولسه فاكر لما كنا بنروح الميريلاند كلنا وخالتي ربنا يرحمها ووو. لسه فاكر القصص دي كلها.

*️⃣ لما صحيت من 3 ساعات صحيت عادي خالص؛ فبخطط لليوم مع مراتي وبقولها هروح كذا ثم كذا فقالت لي لسه هتروح المطرية؛ أنا مخي حرفياً نساني الموضوع وولما سمعت دا قعدت ثانيتين كده بفكر هروح ليه المطرية؟ 🤔

*️⃣ أكثر حد صعبان عليا هو محمود؛ ابن خالتي الثاني؛ أحمد أخوه الوحيد؛ فقده وبقي بدون أخوات؛ هو اه فعليا فقد في طفولته أخته الكبيرة برضك اللي توفت ب مرض لكن كنا أطفال؛ لكن أحمد كان نصف محمود الثاني؛ الفارق بينهم 1 سنة بالظبط ؛ نفس الشهر بفارق سنة... كل العيلة بتقول كده أحمد ومحمود... توأمه يعني. يمكن محمود صعبان عليا أكثر من جوز خالتي اللي فقد ابنه.

*️⃣ ربنا يرحمك يا أحمد ويغفرلك وإدعوا له 😔.

شوية نصايح للي هيعمل شوبنج من بره في البلاك فرايدي

*️⃣ أيام ونخش مود البلاك فرايدي أو الجمعة السوداء أو البيضاء أو شوف اللون اللي تحبه وابعدوني عن الحوار بتاع الموروثات الثقافية والأسود لون العبيد والشؤم فاللي يوصف شيء بالأسود يبقى بيشتمه ونخش في حوار مينفعش نشتم الزمن... فنخلي النقاشات العنصرية دي لاحقاً ونخش في الجد بقى.

*️⃣ طبعاً احنا كلنا تقريباً تم برمجتنا بشكل استهلاكي؛ بحاول بقالي شهرين أكتب بوست اشرح حوار البرمجة دا بس مش عاوز يظبط معايا... فبلاش نقاوم بقى ويلا نغطس في الرأسمالية والاستهلاكية المادية اللي معظمنا وخد بالك من (نا) يعني أنا متبرمج معاكم عليها.

*️⃣ البوست دا يكون أساسي عن الشوبنج من بره؛ ومش هقولك اشتري ايه ومتشتريش ايه؛ البوست هيكون زي عادة بوستاتي اللي هى اختصاراً "انتا واخد قرارك ماشي؛ بس خد بالك من الخوازيق دي"

*️⃣ طبعاً اللي هيشوبنج من مصر فالموضوع بسيط دا هتشوف الإعلانات طالعه لك من حنفية الحمام؛ واللي مهتم بالتكنولوجيا محلياً يعني ممكن برضك أنصحه يتابع صفحة يستاهل yestahil وبرضك قناة يستاهل في تليجرام https://t.me/yestahil وبرضك صفحة Tech Comics وقناتها في تليجرام https://t.me/TechComics وفي ناس آخرين ... وعشان عارف التعليقات المتوقعه؛ أنا مش بعمل إعلان لحد؛ دول صفحات أصحابها أصدقائي ليا وأنا بستفيد منها فقولت أقولكم؛ ومحدش فيهم عارف إني هنزل بوست أجيب سيرته أصلاً؛ دا توضيح مش مضطر عليه بس عشان أخلص

نعدي التسوق من مصر ونروح بره بقى

*️⃣*️⃣*️⃣*️⃣*️⃣ هتشتري منين *️⃣*️⃣*️⃣*️⃣*️⃣

*️⃣ طبعاً إحنا ك مصريين مبرمجين؛ أو يمكن معظم الكوكب؛ شوبنج يعني أمازون أمريكا و AliExpress الصيني والمصري الشطور تلاقيه زود عليهم eBay ... مع إن في مواقع كثير ظريفة زي WallMart و NewEgg وطبعاً أنا مليش في الملابس والتجميل فمعرفش مواقعهم... أنا واحد بحب التقنية بس.

*️⃣ المهم نركز مع أمازون اللي غالبيتنا عليها... في موقع اسمه CamelCamelCamel اللي هو الجمل الجمل الجمل دا تاخد اللينك من أمازون وتحطه فيه عشان تعرف تاريخ سعر المنتج وهل دا أفضل سعر ولا دا عرض وهمي...

*️⃣ بعض المنتجات في أمازون هتوفرلك الشحن المجاني لمصر... لو انتا بتشتري دي بس فمعلش ضيعت وقتك بالكلام في البوست... أصلي كاتبه للشباب اللي بيحب يشوبنج من أي مكان وأي منتج ويلبس معانا.

*️⃣*️⃣*️⃣*️⃣*️⃣ نبعت لمصر إزاااي *️⃣*️⃣*️⃣*️⃣*️⃣

*️⃣ زي ما قولت في منتجات أمازون بتشحنها مباشر؛ دي جميلة ومريحة وأمازون محاسبك على كله ومش هتدفع جنية زيادة بل ممكن يرجعلك فلوس... بس خد نصيحة؛ لو المنتج بياخد موافقات زي اتصالات وكده؛ واتبعت لك مع أراميكس فمجرد تعرف إنه اتشحن ابدأ جهز شكوى لأمازون عشان أراميكس هتضيعه غالباً ومش هتعرف تخلصه.. أراميكس حالياً ثقب أسود فاشل... فجهز الشكوى وبعد شهر كده هتيأس من التواصل مع أراميكس فروح ابعت لأمازون عشان يردوا لك سعر المنتج.

*️⃣ اللي بيشتري بقى من مواقع مختلفة فأشهر خدمة هى شوب أند شيب بتاعة أراميكس؛ أظن واضح في السطر اللي فات اللي يجيب شيء على أراميكس يكون بس مش محتاجه أو شاريه للأولاد لما يكبروا. المشكلة إن خدمة شوب أند شيب هى الوحيدة اللي بتديك عنوان افتراضي في أكثر من 30 دولة... فلو هتعمل شوبنج من ماليزيا ولا سنغافورة ولا تايلاند ولا اليابان ووو فهتلاقي نفسك مجبر للأسف تستخدمها.

*️⃣ أما بقى لو بتستخدمها عشان الشوبنج من أمريكا ففي مواقع كثير بتعملك الحوار نفسه زي مثلاً fishisfast و MyUS وshipsterusa و غيرهم كثير وأنا شخصياً لما بحتاج شيء كده بستخدم Globalshopaholics... المواقع دي فيها كذا ميزة؛ زي إن عنوانها في ولايات معفية من القيمة المضافة الأمريكية؛ فمش هتخش في حوار إنك تجيب الحاجة مع أراميكس اللي عنوانهم في نيويورك وضريبة 8.88% وبعد ما يوصل تراسل أمازون عشان تسترد الضريبة وحوار... الآخرين بيحطوا عناوين في أماكن معفاه ضريباً.

*️⃣ ميزة كمان ليهم وهى التخزين والتجميع؛ يعني عجبك قلم في Ebay ثم كمامتين في Sam's Club وشاحن في WallMart وهكذا... شوب أند شيب تيجي شحنة تبعتها عليك ودا هيلبسك وهشرح ليه في حوار الجمارك... دول بقى تفضل تبعت شحنات وبعدين تقوله جمعهم لي في صندوق واحد وتروح شاحنه مرة واحدة فترحم نفسك من خوازيق زي الرسوم (قولت هشرحها أصبروا) وكمان رسوم الشحن هتقل.

*️⃣ وميزة إضافية إنهم بيقولوا لك تحب تشحنها مع مين... أدي كذا خيار شحن وأسعارهم وانتا تختار؛ وفي برضك إنهم يصوروا لك المنتجات قبل ما تتشحن بحيث لو في شيء غلط ترجعه بدل ما تكتشف الخازوق لما يوصل مصر.

*️⃣ *️⃣ في خيارات للتسوق زي ادفعلي ولينكس بس ربنا معاك... دول ساعات هيجيبوا لك الشحنة في 3 أسابيع وساعات 3 شهور؛ فاستخدمهم وكلم والدتك تدعي لك.

*️⃣*️⃣*️⃣*️⃣*️⃣ الخلاصة *️⃣*️⃣*️⃣*️⃣*️⃣

*️⃣ خلاصة الموضوع هى إنك متروحش تجيب منتج رخيص عشان هتدفع أكثر من سعره؛ ولو منتج غالي أو في فئة جمركية عالية ففكر في خيارات زي هيتش هيكر أو صديق نازل... الجمارك هتزعلك أديني قولت... لو هتشتري منتج محتاج تصريح يعني لو فيه بلوتوث أو واي فاي زي الموبايل فتصريح اتصالات ولو بيصور فتصريح أمن عام ولو بيتاكل فتصريح أغذية ولو كتب فتصريح مطبوعات ولو أسطونات فتصريح مصنفات ولو مكملات غذائية فتصريح صيادلة ولو طابعة ملونة فتصريح جهة بتاعة التزوير مش فاكر اسمها؛ وفي برضك تصريح إذاعة وتليفزيون لبعض الحاجات... أما لو كنت عفريت ورايح تشتري كاميرا بتعمل بث زي جو برو كده فهتروح تصريح في جهة أمنية مش هتحبها؛ ومش الأمن الوطني دول طيبين جنبهم لإنهم نظرياً مدنيين زينا.

*️⃣ فلو أنتا بتجيب شيء عاوز تصاريح... أول خطوة فكر هل إنتا محتاجه فعلاً. وبعدها استعين بالوالدة تدعي لك لإن ساعات بتعدي بالبركة كده بدون تصاريح... وبعدها لما المنتج يوصل هتروح البنك اللي حسابك فيه وتعمل صحة توقيع على التفويض لشركة الشحن عشان تعملك تخليص وبعدها نام أسبوعين ثم اسأل كل يوم لغاية ما تقرف شركة الشحن وبعدين تاني تستعين بالوالدة تدعي لك ثم تشتكي لجهاز حماية المستهلك ومش هيعملك شيء بس اهو تشتكي وبرضك تتعلم إن الشكوى لغير الله مذله.

*️⃣ بس خلاص وأتمنى أكون جبت لكم إحباط زي اللي احنا عايشين فيه وعاشت شركة MTS وإلى الأمام والمركز 189 بانفراد إن شاء الله (في كذا دولة 188) 😁😁

*️⃣*️⃣*️⃣*️⃣*️⃣ الجمارك *️⃣*️⃣*️⃣*️⃣*️⃣

*️⃣ كل شوية أشوف بوست يقولك أنا دخلت على اكسبرس شوفت ساعة عجبتني ب 5 دولار يعني 80 جنية وطبلتها وبعدين لقيت البريد بيقولي عليك رسوم جمارك 400 أو 500 جنية... سرقة ؛ نصب؛ عليكم اللعنة؛ ووو والبوستات المضحكة التقليدية دي...
في الأول كده لازم نعرف إن مصطلح الجمارك دا نقصد بيه فعلياً 4 أنواع رسوم مش نوع واحد.

1️⃣ الجمارك ودي تساوي 0% لو موبايل وتابلت وكومبيوتر و 10% إلكترونيات عامة و 30% للسماعات و 40% للملابس و 40% شيكولاتات و 45% ما يخص التجميل و 60% منتجات الرفاهية مثل أي شيء مصنوع من الجلد أو أجهزة الألعاب زي Xbox وبلاي ستيشن و Wii والجو دا.

2️⃣ رسوم التخليص... دي شركة الشحن بتحطها على أي شحنة... بتختلف من شركة لأخرى وبتكون عالشحنة وليس المنتج... يعني ممكن شركة تقول رسومنا ثابته 100 جنية... كنت جايب شحنة ب 100 جنية أو 10 الاف جنية هتدفع الـ 100 بتوع التخليص دول؛ فاكر لما قولت لك يتبعتوا شحنة واحدة مش كذا شحنة فوق؛ أهو عشان متلبسش رسوم تخليص لكل شحنة.

3⃣ رسوم إدارية... دوسيهات ودمغات والجو المصري الجميل بتاعنا... ومعاهم 10 جنية للبريد المصري... هتقولي ايه البريد المصري دا أنا جايب الشحنة DHL هقولك إن في مصر مسموح فقط للبريد المصري بممارسة مهمة الشحن؛ فأي شركة عاوزة تشحن بقى في مصر بتروح تدفع للبريد رسوم عشان يسمح لها بالشغل... شوفتم البريد المصري برنس إزاي كل شحنة تتحرك في مصر أو تخش مصر ليه فيها فلوس (الرسوم الدولي غير المحلي).

4⃣ ضريبة القيمة المضافة... شوفت ال 3 بنود اللي فوق دول... اجمعهم وزود عليهم سعر الشحنة واحسب 14% قيمة مضافة.

*️⃣ طبعاً الحكومة حست إن الجمارك المصرية عاملة أزمة وفي فبراير 2020 صرح الأستاذ كمال نجم رئيس مصلحة الجمارك تصريح شهير وقال فيه إنه معترف بعقبات الجمارك وإن ترتيب مصر "ترتيب مصر 171 عالميا بمؤشر التجارة عبر الحدود" في تصنيف أصلاً بيضم 188 دولة وأنا محرج أقولكم إن الصومال 166 وإثيوبيا 156 وجيبوتي 147 وكينيا 117 بصوا للتسهيل أفريقيا فيها 54 دولة واللي أوحش مننا فيهم 11 بس... بالمناسبة الجمارك في قطاع غزة 54 والمغرب 58.

*️⃣ المهم رئيس مصلحة الجمارك قال إن الوضع دا مش هيستمر وبناء عليه عملوا شركة اسمها MTS دي عندها هدف رسمي وهو تسهيل عملية الاستيراد وتذليل العقبات.. وهدف غير رسمي وهو إن مينفعش مصر تبقى 171 من 188 ... ليه منبقاش رقم 1 من النهاية يعني الـ 188 🤔🤔

*️⃣ اللي هيهمكم في الموضوع بقى إن MTS فارضه رسوم 256 جنية على أي شحنة أي كان محتواها... لو جايب شيء ب 50 جنية هتحط عليك هى لوحدها 256 جنية... أما لو جايب شيء بيتعمله تصريح ليكن موبايل مثلاً فالرسوم بقت 750 جنية بتاعتها هى بس غير رسوم التصاريح 450 جنية وال 4 بنود اللي فوق متنساهمش

*️⃣ فتخيل أخدتك الحماسة وعجبك شيء ب 300 جنية اشتريته ونفترض من على اكسبرس شحن مجاني... تلاقي نفسك عندك 256 للنافذة وقول 100 رسوم إدارية وتخليص و 50 جمارك و 100 قيمة مضافة فتدفع 500 جنية رسوم... فتخش عالفيس تكتب بوست إن شركة الشحن نصابين فهنا العيب عند مين.

*️⃣ اشتري بس اللي فارق السعر يستحق... حاجة في مصر ب 3000 جنية وبره ب 1000 جنية فتستحق تدفع 1000 رسوم بالجمرك على 300 شحن فتقف عليك 2300 وهى هنا قولنا ب 3000 فتبقى وفرت.

*️⃣*️⃣*️⃣*️⃣*️⃣ الجمارك بتتحسب إزاي *️⃣*️⃣*️⃣*️⃣*️⃣

*️⃣ هو أنا قولتها فوق بس بكررها تاني عشان كثير بتتخدع... تخيل معايا منتج سعره 1000 جنية وبند جمركي 10%... يعني جمارك 100 جنية صح... القيمة المضافة كام؟ متقوليش 140 جنية غلط يا صديقي.

*️⃣ سعر المنتج 1000 والجمارك 100 ونقول رسوم تخليص وإدارية ووو 300 جنية يبقى الإجمالي 1400 جنية... نحسب 14% على المجموع دا... هو فعلياً هتلاقي الفاتورة طالع لك جمارك 100 وقيمة مضافة 154 جنية (جمعوا الجمارك و سعر المنتج) وبعدها تلاقي رسوم بريد 10 جنية ثم قيمة مضافة بريد 1.4 جنية ثم رسوم تخليص 100 جنية ثم قيمة مضافة تخليص 14 جنية وهكذا... فسهل على نفسك واجمع كله واضرب في 14%.

*️⃣ القيمة المضافة بتتحسب على كل شيء... زي الفل كده 😭😭😭.

أبل أخد قرار من كام ساعة بتخفيض العمولة بتاعتها لتصبح 15% بدلاً من 30% للتطبيقات الصغيرة "يعني بتحقق أقل من 1 مليون دولار سنوياً"

*️⃣ ورأيي الشخصي دي حركة قمة في الذكاء من أبل وتعالوا احكي لكم الحدوته من زمان للي مش فاكرها

*️⃣ أبل بدأت مفهوم متجر البرامج الحالي سنة 2008 وبقول المفهوم الحالي عشان زمان كانت في برامج طبعاً. لكن إن المنظومة كلها تدار بواسطة الشركة دا كان مختلف. ولاحقاً الأندرويد ظهر وعمل نفس المفهوم مع حرية أكبر للمطورين.

*️⃣ عميل الآي فون ثري ومتوسط انفاقه بيكون من 3 إلى 5 أضعاف مستخدم الأندرويد (عادة الإحصائيات بتكون عن السوق الأمريكي). فنتيجة لدا المطورون اهتموا ب iOS وعملوا برامج ليه بجودة أعلى من أختها في الأندرويد فدا إدى الـ iOS الميزة الأشهر ليه وهى برامج بعضها بيكون حصري أصلاً يعني المطور ميهتمش ينزل نسخة أندرويد لبرنامجه.

*️⃣ فمع الوقت العجلة فضلت تدور؛ عميل أبل ييجي والشركات تعمل برامج فعملاء جدد ييجوا لأبل وهكذا.. وأبل حصتها 30%.

*️⃣ بعدين بدأت أبل تراقب وتشوف هى الفلوس بتتصرف فين؟ البداية زمااان كانت الكتب وعملت أبل وقتها iBooks ومتجر برامج واتفاقيات شمال من تحت الترابيزة مع دور نشر وكانت فضيحة لأبل واتنشرت من 10 سنين. وكمان الأفلام فكان متجر iTunes.

*️⃣ بعدين بدأ التريند في الدفع بالموبايلات فعملت Apple Pay عشان تاكل السوق دا... وبعدين الأغاني فعملت Apple Music.

*️⃣ باختصار كده أبل وفرت للمطورين أدوات تخليهم يعملوا برامج كويسة... والسوق اللي تلاقي فيه فلوس كويسة تروح ناطه فيه وعامله برنامج ليها وتحط على الشركات فيه.

*️⃣ نفتكر إن أبل مش بتدفع عمولة لحد زي ما حكيت قبل كده وبناء عليه لو هتبيع بنفس أسعار المنافس؛ تقدر تطلع تقول قصاد أي محكمة إني مش بحرق أسعار دا نفس سعر المنافس بتاعي... لكن فعلياً المنافس بيخسر جزء من فلوسه ك عمولة لأبل؛ يبقى كده أبل معاها فلوس أكثر... سعر منتجها اللي مش بينقص منه حته + عمولة من برنامج المنافس.

*️⃣ الموضوع دا خلى أبل يبقى معاها قدرة مادية أعلى من منافسيها في البرامج؛ طبعاً الموضوع دا بيحصل في الأندرويد نظرياً بس هو في حد هناك بيدفع فلوس؛ ولو حد دفع فلوس برضك في طرق تتحايل بيها عالمنظومة عكس أبل الموضوع مقفل.

*️⃣ دي كانت القصة باختصار وكتبتها هنا قبل كده مرتين ثلاثة... ايه بقى موضوع عمولة المخفضة؟!!

*️⃣ الشركات كلها كانت ساكته؛ كله بيدفع وهو ساكت واللي يفتح بقه يتحذف فوراً من ستور أبل؛ ويموت ومحدش يسمع عنه... خبر موت الصغير محدش بيسمع عنه وخبر إصابة الكبير مش حتى موته بيكتب في الصفحة الأولى.

*️⃣ لغاية ما جه واحد من الكبار اعترض وهو سبوتيفاي؛ بدأ قضية احتكار قصاد أبل؛ وهووب كانت كرة الثلج؛ شركات بقى تضامنت كبيرة مع الوقت لدرجة إن في عمالقة زي مايكروسوفت رئيسها فضل يلقح على أبل كذا مرة. وأظن الشهور الماضية كانت خناقة Epic مع أبل وحذفت أبل لعبة فورت نايت الشهيرة.

*️⃣ أبل حتى الآن معندهاش مشكلة؛ في مليارات في الخزائن ومعانا جيش محاميين جاهزين وشغلتهم الخناقات أصلاً أمال احنا معينين الناس دي ليه.

*️⃣ المشكلة إن الشركات الصغيرة بقى... أيوان المشكلة ظهرت من الشركات الصغيرة؛ بدأت الشركات الصغيرة تتجمع وتقدم شكاوى لحكوماتها ضد أبل وإن عمولتها 30% دي كثير ومش بتخليهم عارفين يكبروا ودا بيقتل سوق المنافسة.

*️⃣ وفعلاً كذا حكومة بدأت تحقيقات مع أبل سواء في الاتحاد الأوروبي أو روسيا اللي أصدرت قرار يدين أبل بالاحتكار وإنها مش سايبه مجال للشركات الصغيرة تنمو... ومن شهرين تحالف شركات صغيرة كورية جنوبية اشتكى للحكومة الكورية اللي طلبت باختصار كده من أبل تلم الدور عشان هتتعاقب.

*️⃣ أبل راحت للحكومة الكورية وقالت لها مش هعرف أتصرف في موضوع العمولة دا دلوقتي لكني موافقة أديكم 84 مليون دولار تستخدموهم في تطوير الشركات الصغيرة... مش المشكلة إنهم مش بيحققوا دخل كافي عشان يطوروا نفسهم.. أدي فلوس طوروا نفسكم بيها.

*️⃣ هنا أبل لقت مشكلة؛ الغرب شكل الديمقراطية عنده مهم... اه الحكومات بتحب تتعامل مع الكبار وجو الإمبريالية التقليدي دا... لكن برضك شكلنا مينفعش يبان إننا مش مع الصغيرين... وخناقة الكبار مع أبل شجعت الصغيرين على الظهور والشكوى... خاصة إن تحالف الكبار عملوا رابطه كده اسمها Time To Play Fair اللي سبوتيفاي عملتها موقع... والموضوع كبر وشهر 6 اللي فات الاتحاد الأوروبي أعلن إنه قبل الشكوى وهيبدأ تحقيق رسمي مع أبل عشان يتأكدوا من الضرر اللي هى بتعمله في الأسواق.

*️⃣ الموضوع بتاع العمولات دا أبل كانت ماشيه فيه بعنف؛ أبل عملت زي اللي ماسك شومة واللي يتكلم على دماغه لدرجة إن رئيس مكافحة الاحتكار في الكونجرس شبه أبل بالعصابات القديمة اللي بتفرض إتاوة عشان تسمح لك تعدي ...

*️⃣ المشكلة إن موظفي أبل بقوا فعلاً بياخدوا الموضوع بعنف إنهم قالوا لـ WordPress الشهيرة إنها مفروض تدفع فلوس لأبل وشركة ورد برس مش بتبيع أصلاً... بعدها باسبوع أبل اعتذرت وسمحت لهم ينزلوا برنامجهم.

*️⃣ بعدين جت فيسبوك عملت خدمة للشركات الصغيرة للاجتماعات ويحجزوا فيها وقررت فيسبوك تخليها ببلاش فمش هتاخد عمولة من حجز الايفينت للشركات الصغيرة... فجت أبل قالت لا أنا هاخد عمولة... طلبت منها فيسبوك تتنازل فأبل رفضت... فيسبوك بقت تطلع رسالة لأصحاب الايفينت والشركات الصغيرة إنهم ياخدوا بالهم إن التذكرة اللي هتتدفع دي أبل هتاخد 30% منها فاعملوا حسابكم على كده... راحت أبل رافضه برنامج فيسبوك ومنعت تحديثه على iOS...

*️⃣ طبعاً فيسبوك راح شايل التحذير... بس شرد لأبل عالإنترنت وشغلة فيسبوك اللت والعجن... اللي هو مثلاً ودا مثال تخيلي أي حد ينشر خبر إن أبل بتقمع الشركات الصغيرة وأديكم شوفتم أهو... يخلي الخبر دا ينتشر... طبعاً دا تخيل تخيل ولم يحدث... فأبل طلعت بيان إنها موافقة على عدم أخذ عمولة حتى نهاية العام وذلك دعماً منها للشركات الصغيرة.

*️⃣ النهاردة بقى أبل فكرت... هو الصغيرين دول بيجيبوا فلوس؟ لا خالص دا الفلوس أساسي من الحيتان... خلاص يا سيدي... ضمن خطوات أبل للعطف على الغلابة والفقراء "بقلش" ومساعدة للشركات الفقيرة حول العالم قررنا تخفيض العمولة ليكم تبقى 15%... الكبار هناخد منهم 30% أهو. أكيد محدش متضايق صح دول الحيتان.

*️⃣ بس يا سيدي... وكده أبل تكسب الشركات الصغيرة في صفها... والحكومات خلاص ترتاح من زن الصغيرين اللي يجبرهم على الوقوف معهم لإن الصغيرين مش هيقدروا يخشوا صراع قضائي ضد أبل عكس الكبار فكان لازم الحكومات تتدخل وتقف في صفهم عشان شكل الديمقراطية...

*️⃣ فيا ترى بقى أبل هتنجح؟ الله أعلم... بس اللي متأكد منه إن مش أبل اللي تقرر تسيب عمولة عطفاً منها على الغلابة. المهم قولوا لي رأيكم

أول ما الفيس بوك قالي إني من سنة نشرت بوست عن الصندوق السيادي النرويجي فبسرعة قولت هو صحيح حصله إيه في 2020 🤔؛ دا دخل الصندوق الأساسي من البترول اللي اتمرمغ في الأرض 😂 ؛ ومع بداية الكورونا الحكومة النرويجية قالت إنها ممكن تسحب من أرباح الصندوق عشان الوضع الاقتصادي.

*️⃣ المهم اللي ميعرفش موضوع الصندوق السيادي دا تعالوا نحكي القصة باختصار كده

*️⃣ كثير من الدول بتفكر في الأجيال القادمة باعتبار إن الأجيال دي هما أولادهم وأحفادهم؛ فيا تري هنورث لهم ايه 🤔 مينفعش إحنا ك حكومة نفكر بس في شعبنا وننسى اولادهم وأحفادهم والشعب اللي هييجي كمان 50 و 100 سنة. لازم نخطط لهم.

*️⃣ سنة 1990 النرويج قالت إحنا بلد غنية جداً؛ عندنا بترول كثير وعندنا غاز كمان وعندنا محيطات وثروات سمكية (هما اللي بيصدروا لنا السمك الماكريل وأنبوب كريم كافيار) وعندنا ثروات طبيعية ألومنيوم ونيكل وزنك وكوبلت وحديد وكمان عندنا مراعي وأراضي خضراء ولولا الثلوج كنا زرعنا كل المحاصيل. وحتى عندهم شركات واعدة (بالمناسبة سيري بتاعة أبل كانت شركة نرويجية) وكثير بيحصل إن صافي الحركة التجارية الخارجية (صادرات وواردات) تكون موجب يعني بنصدر أكثر ما نستورد.

*️⃣ المهم قالوا إحنا عندنا خير كثير... طيب والأجيال القادمة ايه وضعها؛ البترول والثروات دي مش هتفضل بنفس الأهمية بالمستقبل فالنتيجة أولادنا وأحفادنا مش هيعيشوا في رفاهية زينا...

*️⃣ يبقى الحل نأمن نفسنا للزمن من سقوط أي مورد من مواردنا... طيب نعمل ايه؟ عملوا ما يسمى بـ
NBIM

*️⃣ دا يا سيدي صندوق سيادي نرويجي؛ قالوا هنحط فيه كل عائدات بيع البترول؛ آه يا جدعان سابوا البترول كله للصندوق دا... وعينوا لجنة مستقله تحت اشراف البنك المركزي... وحطوا لائحة واضحة وصريحة... مش من حق الدولة تسحب الفلوس من الصندوق دا... لكن من حقها تسحب من الأرباح فقط زي ما قولنا انهم قالوا مع الكورونا انهم هيروحوا لأرباح الصندوق.

*️⃣ يعني الصندوق هياخد فلوس البترول يشغلها ويكسب منها... ممكن الدولة تسحب من الأرباح وليس من أصل المبلغ اللي جاي من البترول

*️⃣ الصندوق دا كان زي النهاردة السنة اللي فاتت وصل قيمته السوقية إلى 10.14 ترليون كرونه أي 18 ترليون جنية وقتها أي برضك بالدولار 1.11 ترليون دولار يعني 210 ألف دولار لكل مواطن متشالين بيستثمروهم له في ايه؟ من سنة.

*️⃣ فات سنة أهو؛ كورونا وازمة اقتصادية عالمية وبترول في الأرض واستثمارات منهارة في الكوكب فإيه وضع الصندوق بقي 🤔.

*️⃣ إوعا المفاجأة الصندوق النهاردة فيه 10.89 ترليون كرونه؛ يعني زاد 750 مليار كورونا تقريباً في سنة الأزمات دي 😂😂 يعني 1.2 ترليون دولار اجمالي اللي في الصندوق الآن

الصندوق بقي بيشغل الفلوس دي في ايه 🤔؛. أول قطاع هو الشركات يعني بيشتري أسهم وحصص في شركات.

*️⃣ الصندوق بيقول إنه مشغل فلوسه في 9202 شركة منتشرين في 74 دولة؛ وبيقول إنه عنده متوسط 1.5% من الشركات المدرجة للتداول في الكوكب؛ الشركات دي في منها شركات عملاقة زي أبل وجوجل ومايكروسوفت وأمازون اللي عندهم تقريباً 1% من كل شركه فيهم. التركيز الأساسي في اوروبا وأمريكا.

*️⃣ كمان الصندوق موجود في مصر؛ اه مصر يا جدعان عادي إحنا دولة كبيرة؛ الصندوق بيستثمر حوالي 500 مليون دولار في البورصة المصرية في 40 شركة مصرية شهيرة يعني عندهم 3.5% من طلعت مصطفي و 4.6% من مستشفيات كليوباترا و 3.4% من اوراسكوم و 1.3% من بنك CIB وغيرهم.

*️⃣ استثمارات الصندوق في قارة أفريقيا 5.7 مليار دولار يعني مصر تقارب 10%.

*️⃣ وفي الشرق الاوسط (الخليج والشام) بيتم استثمار 3.3 مليار منهم 1.3 مليار في الكيان و0.88 في الامارات و 0.49 مليار بالكويت و 0.44 مليار بالسعودية. وطبعاً كل الارقام السابقة بتحدث كل نهاية سنة.

*️⃣ ثاني مجال استثمار هو العقارات؛ بيشتروا عقارات وياجروها او يطوروها ويبيعوها.

*️⃣ ثالث مجال استثمار بيسمى عائد ثابت؛ يعني قروض وسندات وكده.

*️⃣ خشوا شوفوا موقعهم على https://www.nbim.no/ وشوفوا عداد فوري يظهر ثروتهم في اللحظة دي كام وحالياً ساعات بيكون العداد سلبي عشان أسواق المال العالمية والاقتصاد بتكون نازله وساعات ايجابي بس فكروا في الإجمالي.

*️⃣ طبعاً مش النرويج بس اللي بتعمل موضوع الصناديق بس صندوقهم هو أكبر واحد وأكبر واحد فيه شفافية.

*️⃣ ثاني أكبر صندوق الصندوق الصيني ودا فيه حاليا 1 ترليون دولار ؛ والثالث صندوق حكومة ابو ظبي (ابو ظبي مش الإمارات) ودا سر لا يعلن فيه كام عشان الحسد ويقال فيه 800 مليار؛ وراه صندوق الكويت يقال برضك فيه 600 مليار لكننا عارفين ان ثروات العرب سر؛ وخامس صندوق هو صندوق السعودية ويقال برضك فيه 500 مليار دولار 💵. وكلهم يقال عشان مفيش شفافية ورقابة.

*️⃣ بالمناسبة مصر حالياً بتأسس صندوق سيادي برضك لإدارة ثروات مصر؛ ودا اللي أملاك الدولة بتتنقل له زي القرار الجمهوري اللي صدر من شهرين لنقل ملكية مجمع التحرير وارض الحزب الوطني بالتحرير وارض وزارة الداخلية بالتحرير والقرية الكونية وارض معهد ناصر بشبرا الخيمة وحديقة حيوان طنطا ليه.

*️⃣ مؤسسة SWFI المتخصصة في الصناديق السيادية والثروات للدولة بتضع الصندوق السيادي المصري ضمن أكبر صندوق سيادي بالعالم وبتقدر قيمة الأصول المملوكة له ب 11.5 مليار دولار (دولار مش جنية).

*️⃣ فاكرين من كام شهر التصريح بتاع تصدير الكهرباء لاوروبا ب 2.5 سنت اي 45 قرش؛ دا مقالوش وزير الكهرباء او الحكومة ؛ بغض النظر إن التصريح مجتزأ ومغالط يعني متقالش كده؛ لكن اللي قاله هو أيمن سليمان رئيس الصندوق السيادي المصري.

*️⃣ مفيش معلومات عن الصندوق السيادي المصري كثير لكن مفروض كل املاك مصر الغير مستغله هتروح له وهيتم ادارتها؛ يعني مش هروحله فلوس لكن أراضي ومباني وحتي لو عندنا كهرباء نقدر ننتجها زيادة فالصندوق هيشتري من الحكومة (مفروض) وهو يبيع لأوروبا. وممكن نحوله ملكية شركة حكومية وهكذا؛ مش معروف تفاصيل بس كل شوية يصدر قرار جمهوري بنقل ملكيات شيء للصندوق.

*️⃣ عامة طبعاَ نتمني نعرف أي تفاصيل عن صندوق مصر السيادي؛ بس عامة هتسمعوا اسمه كثير السنتين ثلاثة القادمين؛ فاديكم عرفتم ايه الصندوق السيادي المصري دا.

*️⃣ طبعاً نتمني التوفيق للصندوق المصري؛ اهر نورث الأحفاد شيء مختلف عن الورث التقليدي اللي هيلبسوه.

كذا حد شوفته حاطط بوست عن موضوع محمد رمضان ومؤتمر الشركات الناشئة و الانتربونير في أسوان ومستغرب؛ الموضوع كله PR مش أكثر... لكن البوستات دي شجعتني اكمل كتابة بوست قديم. وهو مش بوست قوي زي الآخرين؛ دا اقرب ل دردشة يعني هنرغي سوا.

*️⃣ للتوضيح دا بوست رأي شخصي؛ يعني في بوستات بتكون معلومات وممكن حد يقول مصدر الخبر دا اجيب له؛ لكن دا بوست رأي شخصي والمصدر مخي 😂 اللي عاوزه يتفضل 😁😁.

*️⃣ في آخر قرن ونص حصل صراع ضخم الرأسمالية والشيوعية كمنظومات اقتصادية ؛ فبغض النظر عن الاختلافات الضخمة بين الاثنين وانهم عكس بعض لكن فعلياً نظرتهم للانسان مادية؛ سواء بقي الشيوعية معادية للأديان أو الرأسمالية اللي شجعت العلمانية اللي بدورها وصلت للإلحاد.

*️⃣ النظرة المادية دي هتلاقي لها شروحات كثيرة وخاصة للدكتور عبد الوهاب المسيري رحمه الله وهو بيشرح لك بتأثر على الإنسان؛ ممكن متبقاش متفق مع كل اللي هتشوفه لكن هتلاقي الجوهر والفكرة العامة هتتفق معاها.

*️⃣ الرأسمالية عاوزة استهلاك مستمر لأي حاجة؛ عاوزاك تستهلك أكثر من احتياجاتك لإنا هننتج برضك كده؛ عشان كده تلاقي الغرب بيشجعك أكثر علي الصرف؛ ابتكروا الكريديت كارد وأفكار التسويق المختلفة؛ عاوزينك تصرف وتشتري.

*️⃣ وخد بالك أنا هنا مش بعترض علي الاستهلاك لإنه محرك للاقتصاد بس بتكلم عن الاستهلاك المبالغ فيه اللي بيحولك لمجرد ماكينة مستهلكة سواء كنت محتاج الحاجة دي أم لا.

*️⃣ ولإن ربنا خلق الانسان بطبيعته عنده قدرة مهولة علي التكيف يعني بعد شوية هيزهق؛ فلازم نبتكر له؛ نبتكر أجهزة بقي أو نبتكر اساليب ترفيه معينة؛ شوف مصارعه محترفين؛ سباق قفز مش عارف فوق ايه؛ رياضات غريبة؛ انتا مش هتمارسهم لا انتا هتدفع وتتفرج عليهم.

*️⃣ انتا اللي مهم بس؛ انتا بس؛ وكل حاجة هنعملها هي عشان تعزز الفكرة دي؛ الحرية الشخصية؛ محدش ليه دعوة بيك؛ انتا مش ملزم بحد؛ عيالك كبروا يصرفوا علي نفسهم ويشتغلوا؛ اخوك اختك اصحابك؛ عاوز تعملهم حاجة وااااو انتا ازاي جامد كده دا ممكن الجرايد تكتب عنك.

*️⃣ من عيوب نفس الانسان انها مش بتشبع؛ وحتى الحديث قال لو عندنا وادي ذهب هنتمني وادي ثاني؛ عدم الشبع دا ربنا وضعه فينا ك ميزة للانسان مش عيب؛ عشان ميوقفش تطور وسعي ابداً.. لكن أي شيء لو لم يقوم هيبقي كارثة؛ هيبقي نهم بلا حدود وبلا قيود.

*️⃣ كل ما حولك هو مخصص عشانك؛ طز في كل شيء بقي... كل ما حولنا هي أشياء ل خدمتنا حتي لو كانت شعوب؛ زي ما الأوروبيين اجتمعوا في برلين 1884 وقسموا قارة أفريقيا ووافقوا إن الكونغو تبقي ملكية شخصية لملك بلجيكا ليوبولد الثاني؛ وبقول ملكية شخصية للملك وليس لدولة بلجيكا؛ الملك بقي حر في ماله وما حكم في ماله فما ظلم؛ يقطع المواطنين عشان مجابوش التارجت 😂 عادي حقه... وملحوظة يقطع دي حرفياً وليس مجازاً؛ ليوبولد قتل 10 مليون كونغولي وحكم عادي لآخر يوم بموافقة ورضا فرنسا 🇫🇷 وألمانيا 🇩🇪 وبريطانيا 🇬🇧.

*️⃣ اه بلجيكا 🇧🇪 اللي دلوقتي تعتبر عاصمة الاتحاد الأوروبي 🇪🇺 الغير رسمية؛ ودولة بتروج لنفسها ك (كيوت)... عملوا المذابح دي وكانوا معتبرين البشر السود حيوانات لدرجة عملوا حديقة حيوان للزنوج؛ يعرض فيها الزنوج في اقفاص تتفرج عليهم؛ وآخر معرض حيوان بشري كان في بروكسل 1958؛ ايام الوحدة مع سوريا مش من القرون الوسطي؛ وعلي فكرة مش بلجيكا بس اللي عملت كده؛ كذا دولة عملت نفس الحوار.

*️⃣ اه للامانة لاحقا بلجيكا اعتذرت عن القتلي دول وقالت Sorry ؛ حاجة كده شبه ال Sorry اللي قالتها استراليا من كام يوم لما اكتشفوا ان قواتهم قتلت 39 مواطن افغاني خارج نطاق القانون؛ قالوا سوري خلاص... ايه هتنهبوا يعني؛ خلاص والقوات ال Naughty دي هنرجعها ؛ محدش هيتعدم ولا يسجن دول 39 مسلم افغاني 🇦🇫 ؛ ناقص تقولوا علينا ارهابيين بقي.

*️⃣ أسف سرحت بره موضوع البوست بس ال سوري بتاعة أستراليا بقالها كذا يوم مضايقاني ومحدش اهتم خالص عندنا ولا شوفنا بوستات عنها حتي.. عادي لكن لو كلب في فرنسا اتقتل هتلاقي 1000 بوست.

*️⃣ بقي في ابتكارات مستمرة تستهدفك؛ وقوانين تصدر تعزز الفكر دا؛ الالحاد انتشر لعدم وجود برضك لان الفكر دا يعززه الالحاد؛ لانه طالما انتا عايش مره واحدة ومفيش الهه يحاسبك يبقي انتا مش مضطر تعمل حاجة.

*️⃣ طالما مفيش الهه يحاسبني يبقي ايه معيار الغلط؛ يعني محدش هيقولي عمري افنيته في ايه؛ محدش هيحاسبني اني بعدي علي اخبار قتل اخواتنا في الوطن والدين عادي خالص ومحزنش حتي من جوايا... انا حر اعمل اللي نفسي فيه.

*️⃣ مع الوقت بقي في صراع ضخم؛ انتا في جيبك 100 دولار (اه يا ثري 🧐) وقصادك 10 عاوزين يخلوك تشتري منهم والسلع دي سعرها 500 دولار... فبقي في صراع على جيبك؛ وانتا خلاص برمجت إنك هتشتري يعني بقيت تفاضل تشتري من مين.

*️⃣ في أحد دروس المهندس ايمن عبد الرحيم حكي انه زمان وهو طفل لما كان يبقي معاه فلوس كان بيقول اشتري ايه؛ وانه مع الوقت فهم إنه مبرمج علي ثقافة الاستهلاك.

*️⃣ لولا ان الغربيين عارفين انهم مع بلوغهم ارزل العمر فأسرهم مش هيهتموا بيهم ؛ مكانوش فكروا في مفهوم صناديق التقاعد... كانوا صرفوا كله زي المعتاد.

*️⃣ المهم عندنا هنا مشكلة؛ عاوزينك تصرف كثير لكن العرض أكثر من اللي معاك؛ فانتا هتختار؛ هنا ييجي دور الإعلام بقي والتسويق؛ ومن من الحاجات اللي ركزوا عليها التبعية اللي بالفطرة عند الإنسان.

*️⃣ لسبب أو لآخر الإنسان لازم يحس بانتماء معين لدرجة إنه بيعتبر عدم الانتماء مرض نفسي. ينتمي الانسان الي قبيلة؛ دين؛ دولة؛ حزب. لكن مع الوقت المفاهيم دي تفككت؛ المدنية خلت القبايل مش موجودة؛ و العلمانية خلصت علي الدين. وكثير من الدول بتستخدم الانتماء للدولة ك واجهة للاستعباد فحتي دي بتضعف مع الوقت.

*️⃣ فهنا ظهر المشاهير؛ وهما مظهروش يعني دول موجودين طول عمر البشرية لكن أهميتهم زادت مع الحياة المادية؛ ممثلين ورياضيين ومغنيين وانفلونسر ووو...

*️⃣ بقى الشخص العادي يشوف فيهم المثال اللي بيحلم بيه؛ شخص مشهور ؛ مش مشكلة مشهوو ازاي؛ أنا عاوز شهرة وسلطة وقوة؛ تقولي وحش وحلو؛ طز فيك أنا بفكر في نفسي... مفيش سفاح عبر التاريخ غير وله محبين للنهاردة؛ هتلاقي معجبين بجنكيز خان وتيمور لنك وستالين وهتلر؛ وشارل ديجول وحتي جورج واشنطن؛ اه جورج واشنطن مؤسس أمريكا؛ دوروا عالنت كده عمل ايه في بقايا الهنود الحمر. حتي لو هتبقي مجرم؛ هو مش بابلو سكوبار محبوب 🤔.

*️⃣ المعيار مادي صرف؛ احنا عاوزين شهرة؛ بأي قيمة وأي شكل... فبالتالي الناس بقت تبص للمشهور أي كان قيمته فعلياً بانبهار وعاوزين نبقي زيه... هو بيلبس ايه؛ وياكل ايه...

*️⃣ فهنا ظهرت اهمية المشاهير اللي ساعات تفوق الأثرياء؛ ياما في أثرياء مش مشاهير؛ فالحل ايه؛ عاوزين نبقي مشاهير.

*️⃣ هنا ييجي دور مؤسسات صناعة المشاهير؛ اه المشاهير كثير منهم بيتم صناعتهم... هما عارفين البقرة عاوزة برسيم فبيخلوا الشخص يظهر يوزع البرسيم فالبقرة تروحله... بس كده.

*️⃣ معاك فلوس بقي وعاوز تتشهر تروح لهم؛ جبت فلوسك بقي مخدرات أو شركات عائلية أو أي شيء مش مهم... نخليك مشهور.

*️⃣ انتا حدد عاوز شكل الشهرة والميزانية؛ طبعاً لو معاك ميزانية مفتوحة فممكن زي ما حكيت قبل كده يتفقوا مع مغنية مشهورة لبنانية تتجوزها كام شهر؛ لكن في الظروف العادية بنلمعك تدريجي.

*️⃣ ناس متخصصة تدير حساباتك علي السوشيال ميديا؛ فريق مخصوص يصورك ويتابعك؛ وحد مسئول يتابع الأخبار؛ وفي كل حدث في المجال اللي انتا اخترت تبقي مشهور يطلع لك تصريح معين... قنوات التليفزيون المختلفة عندهم ناس في الاعداد يتصلوا بيك تعمل مداخلة؛ انتا فاكر ان كل المداخلات دي بيكون ناس لله وللوطن اتصلوا بيها تعلق... وساعات في حدث مهم يدخلوك تعلق في كذا قناة...

*️⃣ المهم يعني انتا بيصنفروك ؛ فالشخص العادي يفتح التليفزيون يلاقيك؛ الفيس بوك يلاقيك؛ الاخبار بتظهر فيها... لو في عزاء لحذ مشهور يقولوا لك روح؛ ويتفقوا مع مصورين الصحف انك تتصَر وتنزل وأفراح مهمة يحضروك وبرضك المصورين يصورك وتنزل وسط الصور.

*️⃣ الناس متعرفكش لكن مع الوقت عنيها تتعود علي وجودك؛ وخلاص انتا بتظهر في اي مكان حتي لو مهرجان أفلام مثلاً تظهر؛ مبروك أخدت الشهرة يا برنس... بس تستمر.

*️⃣ نرجع للبداية؛ في ايفينت للاعمال الناشئة؛ خش ادفع وابقي سبونسر واظهر... مؤسسة ما نتبرع لها وتكرمني كأفضل مش عارف ايه؛ التكريم دا طبعاً من اختيارهم.

*️⃣ مؤسسات ال PR تاخد التكريم وتنشره؛ في محبين ليا هينشروا الخبر فخر بيا؛ واللي بيكرهوني هينشروه ويشتموني؛ في الحالتين نشروه وفي الحالتين اخدت الشهرة؛ ودا الهدف مش قولت لكم قبل كده دا الهدف أي كان الثمن.

*️⃣ مش مهم ابقي مشهور ازاي؛ تصريح مستقز صورة غريبة الخ الخ... المهم الشهرة وبس؛ طبعا هتقولي والناس.

*️⃣ الناس برمجناها قولنا إن المعايير ماديه؛ ايه يعني دا خمورجي ولا بتاع نسوان ولا حرامي وفاسد ولا ولا... شوفت عربيته ؛ شوفت الرولز رويس بتاعة مراته؛ شوفت مدينته الساحلية؛ دا المهم لان المعايير ماديه. وادينا البقرة البرسيم.

*️⃣ عشان كده اللي مستغرب ازاي ايفينت GEN جاب سبونسر محمد رمضان ميستغربش؛ واللي فاكر ان صورة المرضان دا مع المغني بتاع ولاد العم هتأثر؛ لا خالص عشان المهم للاتباع البرسيم؛ وعقولهم بلا مبادئ ومبرمجه علي أمور معينة فال PR عارفه هتتعامل ازاي؛ وهتشوفوا ان الشعيية مش هتتأثر.

*️⃣ لانهم انهوا زمن ان المبادئ والدين والأخلاق تكون هي معيار حب فلان ولا علان؛ المعايير مادية؛ وبتشوفوا البوستات الحزينة علي الممثلين اللي دورهم نشر الانحلال؛ يبقي واحد عايش عمره ينشر الا اخلاق؛ بس بيضحكنا؛ يبقي طز في الدين؛ دا ب يضحكني.

البوست دا مجرد شوية افكار ودردشة والأفكار مش منظمة بل سردية

بعد وفاة مارادونا نبدأ فصل جديد من فيلم ربنا يرحمه مش يمكن عند ربنا احسن منكم 🤬🤬؛ دا كان بيفرح الناس؛ كإن المعيار عند ربنا مين كان بلياتشو في الأرض فاللي فرح أكثر يبقي دا حلو 😡😡😡

ربنا يشفيكم؛ مسلمين شكلهم عمرهم ما مسكوا مصحف غالباً 🤔

والله عنده حق اللي قال مفروض نبدأ مع الناس من البداية.

من اول ربنا خلق السماوات والأرض؛ قالوا اه نروح لان ربنا خلق سيدنا آدم؛ تمام نخش في انه ربنا بعت رسل وأنبياء.

لغاية ما نوصل للاسلام كده وبعدين نروح للهجرة بقى.

صورة بتوضح تكلفة أجزاء الأي فون 12 برو بتروح لمين.. التليفون بيتكلف "أجزاء" حوالي 406$ ومقسمه على الدول مثل الصورة التالية

للتوضيح بس جانبياً التكلفة دي هى بس لسعر القطع؛ مفيش أبحاث ولا نقل ولا ضمان ولا العلبة ومحتواها (الكابل بس) ولا حتى تكلفة التجميع في فوكسكون.

تكلفة القطع دي تقول إننا لو فرضنا أبل صنعت منه بـ 10 مليار دولار فهيروح كوريا الجنوبية 2.6 مليار وأمريكا 2.2 مليار واليابان 1.36 مليار بينما الصين هتاخد 0.46 مليار من ال 10 مليار.

وييجي ترامب الأهبل كان عاوز يفرض عقوبات (جمارك) على أبل عشان الآي فون صيني. دا القطع الصيني فيه 4.6% من تكلفته؛ وبالمناسبة مصنع فوكسكون اللي بيجمع لأبل وفيه أكثر من مليون عامل دا؛ هو مصنع تايواني لكن جوا الصين وعلى ما أذكر بياخد من أبل بتاع 5-6$ على الجهاز تجميع.

من 9 سنين كده لما اخويا خبط عمود نور وأنا اللي اتعملي محضر 😂؛ اتحولت قضية اتلاف ممتلكات الدولة وأخدت حبس شهر (مش سوابق متخافوش 😂😂؛ كنت عامل تصالح قبل الحكم ولغيته ومعنديش سوابق 🏴‍☠️ ).

*️⃣ المهم يعني خبط عمود نور تسبب في حكم حبس؛ وفعليا تصالح كلفنا 3000 جنية في 2011.

*️⃣ اشمعني بقي موظفين الدولة مش بيتحاكموا 🤔 ؛ كل شوية بيحفروا في حته كسروا خط كهرباء او كسروا خط ماية او او.

*️⃣ ليه بقي ميتحولش الموظف او المهندس للنيابة وياخد سجن او يتغرم تكلفة الإصلاح 🤔🤔 اشمعني أنا يعني 😡😡.

*️⃣ من أسبوعين قرر جهاز التجمع عند بيتي انه ييشيل الجناين في الشارع ويوسعه وفعلا قطع الشجر وبدأ التكسير؛ هووووب قطع خط تليفونات الشارع... وقعدوا من يوم 17 نوفمبر للنهاردة بيصلحوا فيه.

*️⃣ هل دا مش اهدار مال عام؟ 🤔 ليه مياخدش الموظف فيها 3 شهور حبس 🤔🤔 عشان الموظف اللي بعده ياخد باله.

*️⃣ أنا حتي الآن بدون تليفون؛ وحظي الجميل رجعت الخدمة من شوية للشارع كله الا أنا 😭😭😭؛ وعايش علي نت الموبايل اللي هو Vodafone Egypt الزفت اللي مش موجود أصلاً وهي اوسخ شركة بتقدم خدمة موبايل حالياً في مصر

*️⃣ ومن شوية لقيت شركة Telecom Egypt العظيمة بتكلمني تقولي هنديك تعويض 24 جنية عشان قطع النت الأرضي ... قال ايه تعويض 24 جنية يا أهبل منكم له؛ دا أنا في 10 أيام دول دافع قرب 200 جنية انترنت موبايل ليا ولمراتي لإن حياتي وشغلي عالنت... قال هنديك تعويض 24 جنية. ودا اسمه تعويض... دا مفروض التعويض يعني تاخد عدد ايام مساوية للي قطعت الخدمة فيها + تعويض للضرر اللي وقع بيك.

*️⃣ المهم ليه مفيش عقاب رادع لموظفي الدولة والمشاريع المختلفة يصل للسجن لما يتسببوا في تدمير ممتلكات الدولة 🤔🤔... طب المواطن زينا ودا شخص ملوش سعر ومحدش هيعوضه عن توقف الخدمة بسبب فعل الموظف واتلافه ملك الدولة؛ طيب الدولة تاخد حقها... عشان يبقي رادع.

*️⃣ اللي عاشوا في مناطق اتعملت فيها كباري أي شافوا كم كسر كل حاجة من مايه لكهرباء لصرف لغاز لتليفونات... ومسمعناش حد اتعوض ولا حد اتحاكم يعني.

حاجة تقرف وشركات مقرفة واديني قاعد علي نت الموبايل 😡😡😡؛ خدوا ال 24 جنية بتوعكم دول ولفوهم وهاتوا بيهم ساندوتش لو يشتروا ساندوتش أصلا

شكلي كتبت بوست ديني 😁

*️⃣ في حاجة مقتنع بيها اسمها السم في العسل؛ يعني ممكن تكون بتشوف كارتون مثلاً وفيه مشاهد مصممة عشان تدخل أفكار معينة وسط ما إنتا قاعد مبسوط بالفيديو او المحتوي تخش الأفكار التانية... ونفس الحكاية بتحصل كل الافلام والإعلام عامة..

*️⃣ كل شخص بقي أو مؤسسة أو جهة ما ليه ميول شخصية هتأثر عليه حتى لو حاول يكون محايد... فدايماً لازم تفكر هو اللي بتشوفه دا قناعاته ايه بحيث تاخد بالك أفكاره اللي بتسرب لك إنتا موافق عليها أم لا؛ وليكن البداية معايا أنا شخصياً

*️⃣ أيوا أنا ايه المشكلة 😂؛ أنا برضك ليا قناعات وميول؛ وعندنا مشكلة دائماً إننا فاكرين الميول دي بتكون سياسية بس أو دينية؛ لا الانسان عنده أفكار في كل مجال... ومرة حد عجبني في تعليق لما قالي أنا متفق مع أفكارك وميولك في كل الاتجاهات عدا السياسية... دا برنس ومركز.

*️⃣ وعشان كده ناوي علي فترات اكتب كذا بوست اشرح فيه وجهات نظري؛ بحيث اللي متابعني يكون واضح له رأيي في مختلف المواضيع (عدا السياسية مش هكتب في السياسة معلش 😁)

*️⃣ تعالوا بقي نشوف البوست بتاع من يومين بخصوص ماردونا وكان في من فترة لما ح ستيفين هوكينج مات وهكذا. وهو إني مقتنع بعدم الترحم علي غير المسلمين؛ وكل مرة نفس التعليقات وبرد عليهم نفس الردود فهخليها في بوست.

*️⃣ أي بوست وكلام ديني يفكرني باستاذ العربي في 1 ثانوي لما كان ملقبني ب (الشيخ التايواني)؛ كان بيقول عليا يعني الشيخ التايواني (المضروب يعني) بتاع الفصل 😂؛. ربنا يرحمه بقي استاذ محمد الشاعر... فأنا مش شيخ 👳؛ أنا شيخ مضروب تمام؛ تقليد صيني كمان بس مكانتش الصين لسه في كل مكان كده وقتها.
---------------------------------------------------------

*️⃣ في البداية نتفق علي قاعدة ودي عامة وهي إن ربنا قال (وما كان لمؤمن ولا مؤمنة إذا قضى الله ورسوله أمرا أن يكون لهم الخيرة من أمرهم ومن يعص الله ورسوله فقد ضل ضلالا مبينا) الاحزاب 36

*️⃣ الأية دي واضحة وبالعربي البسيط؛ لما ربنا يقرر حاجة مينفعش تقول بس أنا مش مقتنع... انتا حقك تفكر في التفاسير وتناقش في الشروحات؛ لكن لو ملقتش يبقي هنا حسم الأمر ومش بمزاجك وموضوع اقتناعك دا تحطه في جيبك.

--------------------------------------------------------

1️⃣ هو مش ربنا قال ورحمتي وسعت كل شيء؛ ليه بقي انتا رافض دا ومصر إنه هيرحم بس المسلمين 🤔.

*️⃣ دي أكثر آيه بشوفها في بوستات وحتي التليفزيون؛ المشكلة إن الناس بتقول الأية كده كإنها خلصت... محدش بيكملها ؛ عارفين ليه 🤔 تعالوا نشوف باقي الأيه

(فسأكتبها للذين يتقون ويؤتون الزكاة والذين هم بآياتنا يؤمنون) الأعراف 136

*️⃣ ودي باقي الآيه؛ فربنا اه قال إن رحمته واسعه بس موضح هو هيكتبها لمين؛ فلما يموت حد وتقول مش يمكن ربنا يطبق ورحمتي وسعت كل شيء معاه؛ قوله طيب ما ربنا وضح انها وسعت (من باب القدرة) لكن ربنا موضح كتبها وخصصها لمين؛ فليه بقي بتعند مع ربنا وبتقوله لا يا رب انتا بتقول رحمتك هيكتبها للفئة دي؛. لا عند بقي عاوزك ترحم دول كمان... دي قلة ادب مع ربنا.

*️⃣ ربنا في الدعاء قال (ادعوا ربكم تضرعا وخفية إنه لا يحب المعتدين) الاعراف 55... التفاسير اللي قريتها في ايه علاقة المعتدين بالدعاء؛ قالت إنك مينفعش تدعي بحاجة ربنا حرمها أو قطع فيها كلام... مينفعش تدعي وتقول يا رب عاوز أبقي نبي مثلا أو يا رب مموتش ولا يا رب أحي فلان ووو... أي حاجة ربنا حسمها وحددها مينفعش تروح تدعي بيها... وهنا ربنا محدد رحمته لمين فإزاي تعتدي وتدعي بالرحمة لمن لم يحددهم الله

--------------------------------------------------------

2⃣ طب ما سيدنا إبراهيم دعى لأبوه وهو كافر / ومبطلش دعاء غير لما ربنا وضح له إن عدو لله توقف عن الدعاء؛ بس فلان الغير مسلم دا مكانش بيحارب ربنا يبقي خلاص عادي.

*️⃣ برضم مرة تانية الناس بتقص الآيات؛ نشوف الأيه كلها والسياق.

( ما كان للنبي والذين آمنوا أن يستغفروا للمشركين ولو كانوا أولي قربى من بعد ما تبين لهم أنهم أصحاب الجحيم (113) وما كان استغفار إبراهيم لأبيه إلا عن موعدة وعدها إياه فلما تبين له أنه عدو لله تبرأ منه إن إبراهيم لأواه حليم) الايات 113 و 114 سورة التوبة

*️⃣ ففي البداية كده الاية الاولي بتقولك صراحة مينفعش تستغفر للمشركين؛ صريحة أهي... وربنا عشان عارف إن مسلمين هيقولوا موضوع سيدنا إبراهيم فوضح له إنه كان وعد قاله لأبوه وبعدين لما عرف إن ابوه كافر توقف... فتخيلوا بعد أكثر من 14 قرن ييجي نفس الناس وتكرر نفس الحوار... ما ربنا وضحها خلاص.