أخيراً التليفون الأرضي رجع عندي في البيت بعد انقطاع 4 أيام؛ المعتاد لما بيحصل انقطاع بتكلم Telecom Egypt تقولهم قطعتم الإنترنت قطع عاوز تعويض لعدم أداء الخدمة لكن هنا يحصل الموقف المعتاد.

*️⃣ في المفاهيم العقلية لشركة المصرية للاتصالات إنهم هيقولوا لك الخدمة قطعت 4 أيام؛ وانتا مشترك في نظام ب 450 جنية يبقي اليوم ب 15 جنية قطعنا 4 أيام يبقي ليك تعويض 60 جنية... هما تفكيرهم ان كده تم تعويضك بس التفكير دا في الشلاحات لييييه بقي

*️⃣ عشان أصلاً الخدمة قطعت 4 أيام فإنتا رجعت لي فلوسهم؛ فين التعويض؟ انتا لو مرجعتش فلوس ال 4 أيام تبقي سرقتني؛ ولو رجعتهم يبقي وصلنا لنقطة الصفر وهي ان حقي رجع لي؛ فين التعويض؟ هو مش في ضرر حصلي؟ أبسط ضرر ان البيت كله 4 أيام بيستخدم انترنت الموبايل اللي هو الجيجا فيه 10 اضعاف تكلفة الجيجا الأرضية.

*️⃣ المشكلة الأساسية إن المفاهيم دي بايظة عند المواطن؛ يعني أنا متفهم ان الشركة يكون لوايحها ان معندهاش تعويضات؛ بس المشكلة بتكون عندي إن موظف خدمة العملاء نفسه مش بيكون فاهم أنا بشتكي من إيه؛ اقوله فين التعويض؛ يقولي مهو قطعنا الخدمة 4 ايام وحضرتك هتاخد 60 تعويض؛ أقوله دا حقي فين التعويض... يهنج مني الموظف.

*️⃣ يعني تخيل مثلا عندك شقة سعرها مليون جنية؛ جت الدولة هتاخدها لأي سبب؛ وبفرض الدولة هتديك مليون جنية؛ كده انتا اخدت سعر الشقة؛ فين تعويضك علي طردك ومغادرتك لبيتك غصب؟

*️⃣ بحلم إن ييجي يوم المواطن نفسه يفهم الفارق بين الحق والتعويض؛ بالمناسبة أنا بطلت أتصل ب We اقول في مشكلة عاوز تعويض؛ أصل صحتي لا تسمح اني اقعد افهم أصلاً موظف ان في فارق بين الحق والتعويض عشان الموظف يوافق يقدم شكوي وهي في الغالب بتترفض 🤣🤣 يعني مشكلتي ان الموظفين نفسهم مش فاهمين المشكلة فين عشان يقدموا شكوى ما انتا هتاخد حقك... فصحتي اغلي من 60 جنية واحنا عايشين بمرارة واحدة 🤣🤣

*️⃣ طبعاً مش عاوز أحكي لكم أصدقائي بره مصر لما بيحصل معاهم موقف مماثل فالشركة لوحدها بتبعت لهم اعتذار وتعويضات عاملة إزاي؛ لكن دا عشان هما بره في مصر ولا بيتعاملوا مع شركاتنا 🤣

تصبحوا علي خير

مشروع التبرع بالدم والبلازما جميل بس في مشكلة...

*️⃣ الجهاز المركزي للتعبئة والإحصاء كان عمل تقرير عن الشعب اسمه "المسح الصحي للأسرة المصرية 2021" وخد بالك دا 2021 يعني قبل الأزمة الحالية... المسح دا قال إن الأطفال ما بين 6 شهور إلى 59 شهر انتشرت فيهم الأنيميا ووصلت ل 43% مقارنة ب 27.2% في 2014 ... التقرير قال إن في 2014 كانت ال 27.2% مقسمه بين 18% أنيميا بسيطة و 9.2% أنيميا متوسطة وخطيرة... أما في 2021 فالأرقام بقت 43% أنيميا عبارة عن 21% بسيطة و 22% ما بين متوسطة ومرتفعة.

*️⃣ الأنيميا خطر عالأطفال وخاصة في سن مهم زي الطفولة... طفل عنده أنيميا فمش هيقدر يركز في المذاكرة ومش هيقدر يلعب وو... فهو هيبقى متأخر ذهنياً وصحياً. والطفل دا هيكبر في يوم من الأيام وهيبقى الشاب اللي معتمدين عليه لمستقبل مصر.

*️⃣ أتمنى أشوف حملة توعية للأم المصرية بموضوع الأنيميا اللي بالمناسبة مش بس بتصيب الفقراء؛ حتى الأطفال الأثرياء منتشر فيهم الأنيميا... التقرير قال إن أقل فئة ثروة كانت نسبة الأنيميا 46.1% وأعلى فئة ثروة كانت 39%... التقرير قال إن نسب الأنيميا بتقل شوية مع مستوى تعليم الأم المرتفع وكذلك الثروة... بس يفضل إن أعلى مستوى دخل في مصر 39% من أطفالهم بيصابوا بدرجة ما من درجات الأنيميا.

*️⃣ فالموضوع كبير ومعقد... ففكرة دعوة شباب الجامعة لعمل بيزنس من التبرع ببلازما الدم فكرة حلوه وجميلة... بس الشباب مريض... فممكن يبقى بيزنس للدولة؛ توعي الشعب بالمخاطر الصحية فتبقى صحتهم حلوه فناخد منهم دم وبلازما ... فتبقى Win-Win صح ولا ايه... بجد على فكرة شم بتريق؛ استثمار للدولة في المواطن.

يوم 30 مايو أكتب بوست أقول فيه ان عدد الكروت مسبقة الدفع في مصر بنهاية ديسمبر 2022 هي 28.6 مليون كارت عشان كده صدر قرار بإيقاف الدفع الدولي ليها.

*️⃣ يومها قولت ان عدد كروت الحسابات 23.8 مليون كارت فيهم نسبة ميزة واقفة تلقائي لكن الدور القادم علي إيقافها ثم تتبقي الكريديت كارد اللي عددها 5 مليون ودي غالباً مش هتقف.

*️⃣ بعدين 4 شهور و 4 أيام ألاقي الناس باعته تقولي معلقتش علي موضوع البنك العربي الافريقي اللي قرر يوقف كروت الحسابات بره مصر ليه... حضرتك أعلق ليه ما أنا حكيت السيناريو دا من 4 شهور فاتوا.

*️⃣ الموضوع دلوقتي هو إما بالونة اختبار؛ يتعمم ولا يتراجع عنه؛ أو الخيار الثاني هو إن البنك لقى إساءة استخدام واسعة لكروته طبقاً لمعايير البنك فقرر إيقافها... طيب ليه العربي الأفريقي هقولك معرفش؛ واظن صدفة إن رئيس العربي الأفربقي السابق هو محافظ المركزي الحالي... عادي يعني مش شرط نظريات المؤامرة؛ بتحصل صدف.

الأيام القادمة هنعرف قرارات البنوك ايه؛ خلال أكتوبر الكروت كلها في كل البنوك بكل المستويات هتتشقلب... خلينا نتفرج وندعي الأزمة تعدي علي خير وربنا ينجي مصر وينجينا.

ركزوا بقي مع بوستاتي عشان بآجي لكن من المستقبل واقولكم الخازوق قبل شهور من حدوثه 😜😜

موديز خفضت التصنيف الإئتماني لمصر ودخلنا ملعب ال C تاني؛ طيب للناس اللي ملهاش في الكلام دا والمصطلحات... مين دول يعني ويفرقوا معانا في إيه ومين راح فين عاوز كام منين 🤣🤣.

*️⃣ في البداية في قاعدة أساسية في استثمار الفلوس بتقولك ان العائد عن الاستثمار ROI يساوي العائد خالي المخاطر يعني الربح اللي ممكن تعمله بدون وجع دماغ زي البنوك + هامش فوقه نظير اني بخاطر بفلوسي.

*️⃣ تخيل مثلا ان عندك مصنع جزم بيصدر لبره قالك متوقع ربح 27%؛ وقصادك برضك مزرعة فراخ قالك متوقع ربح 45% ؛ لو انتا شخص بتبص عالارقام بس هتقول الفراخ أحسن بكثير... لكن لما تيجي تحسبها... تلاقي الفايدة البنكية 20% يبقي كده بتاع الجزم بيقولك 7% وانتا بتقدر المخاطرة عنده ب 5% يبقي كده بيديك 2% فوق البنك والمخاطرة... بتاع الفراخ المخاطرة عنده عالية؛ اعلاف تنقص او تتغير فالفراخ تموت؛ الدنبا برضك الفراخ تموت؛ حر قوي هتموت برضك؛ تطعيم أتغير نوعه هيموتوا.. فالمخاطرة دي تساوي 30% في حين هو قالك هيديك 47% يعني 27% في حين حساباتك بتقول المخاطرة 30% يبقي كده بتاخد - 3%.

*️⃣ مصنع الجزم يعتبر موجب 2% والفراخ سالب 3% يبقي كده تلاقي ان استثمارك في مصنع الجزم ب 27% احسن من الفراخ ب 45%.

*️⃣ أهو مثال الجزم والفراخ دا بيطبق في الدول... لكن في حجم الدول مش هيمشي الموضوع بالحب والتقدير وانتا شايف الفراخ مخاطرها 30% وأنا شايفها 40% واخويا شايفها 20%... فمن هنا جت مؤسسات التصنيف الائتماني.

*️⃣ مؤسسات دورها تدرس الدول وتديها تصنيف يقولك مدى الخطورة لما تسلف الدول دي... زادت المخاطر يبقي محتاج فايدة أعلى ورسوم تأمين عالقروض عالية.

*️⃣ العالم فيه مؤسسات كثير لكن 3 منهم واكلين 90% من السوق؛ المعلم الكبير S&P ومنافسه موديز ووراهم مؤسسة فيتش... كل مؤسسة ليها مسميات التصنيف الخاصة لكن ممكن للتبسيط نختصرهم في 3 درجات لكن افتكر كل درجة في جواها تصنيفات كثير؛ أنا بس بختصر البوست 🤣.

1️⃣ عائلة تصنيف A وتضم 7 مستويات؛ وبالبلدي كده التصنيف دا معناه ان الدول دي تمام التمام؛ فلوسهم كثير ووضعهم الاقتصادي فل الفل؛ سلفهم وفي بطنك بطيخة صيفي؛ عادي تلاقيهم واخدين سندات آجل 40 سنة عااادي؛ ناس مضمونة ومستقبلها مضمون. وهتلاقي أمريكا وكندا وغرب أوروبا واليابان والدول الكبيرة في فئة A دي... عربياً تلاقي السعودية والإمارات والكويت وقطر... افريقياً مفيش غير بوتسوانا (حسب موديز فقط).

2️⃣ عائلة B ودي بتضم 9 درجات فرعية... بالبلدي كده التصنيف دا معناه ان الدول دي شغالة مقبولة؛ عاوز تسلفهم دوس بس خد فايدة عالية عشان عندهم مخاطر لكن الموضوع مقبول... عالمياً تلاقي في التصنيف دا أسبانيا وإيطاليا واليونان؛ وعربياً تلاقي عمان والبحرين والمغرب والأردن؛ وأفريقياً تلاقي نامبيا ومورشيوس وجنوب أفريقيا ورواندا واوغندا وكنيا وتوجو وغيرهم.

3️⃣ عائلة C وتضم داخلياً نظرياَ 5 تصنيفات وبقول نظريا لان في درجات دول فلست لكن موصلتش لها ففعليا قول 4 درجات... التصنيف دا معناه ان البلاد دي خطر؛ عاوز تسلفهم براحتك بس خد فايدة خزعبلية عشان في فرصة كبيرة يفلسوا ومش هيدفعوا... فمحتاج زي مثال الفراخ فوق فايدة كبيرة تعوضك عالمخاطر... عالمياً تلاقي دول زي سيرلانكا و المالديف وباكستان ودولة في حرب زي أوكرانيا... عربياً تلاقي لبنان وتونس والعراق وأفريقياً تلاقي موزمبيق وأثيوبيا والنيجر ونيجيريا.

*️⃣ مصر كانت حسب موديز سابقاً في أقل درجة من ال 9 بتوع ال B وإمبارح تم تخفيض التصنيف الإئتماني ل Caa1 اللي هو أحسن حاجة في ال 4 بتوع ال C... معانا في التصنيف دا 6 دول تصنيف CAA1 هو تصنيف يضم مع مصر 6 دول وهي العراق ونيجيريا والكاميرون و الجابون وجزر سليمان وبوليفيا والمالديف.

*️⃣ هل مصر أول مرة تتخفض للتصنيف دا؟ الإجابة هي لا يعني حصل قبل كده إن موديز أيام الرئيس الأسبق مرسي خفضت مصر 3 مرات في شهرين منهم 2 تخفيض في أسبوع ودا بداية 2013 وقت تعثر مفاوضات مصر مع صندوق النقد. وبعد رحيل مرسي واستقرار الوضع السياسي تم رفع التقييم في أبريل 2015 مرة أخري لعائلة ال B وفضلنا كده نصعد ونتحرك في B لغاية إمبارح رجعنا Caa1 تاني... فمش جديد علينا التصنيف دا.

*️⃣ يعني يا بن سامي مقولتش هيفرق معانا في إيه؟ قلبي قلبي 😭😭😭 وصلت لغاية هنا وبتسأل برضك... ما قولت لك تصنيف أقل يعني مخاطر أكبر يبقي تدفع فايدة أعلى عشان تغري المستثمر الأجنبي يتجاهل المخاطر دي ويسلفك... لكن مش شرط التخفيض يضرك جامد.

*️⃣ يعني لو مفيش عندك نية اقتراض جديد من أسواق المال العالمية؛ فخلاص مش فارق؛ يعني مطلوب منك فايدة 10% أو 15% او حتي 500% ما أنا مش هستلف فمش هتفرق كثير.

*️⃣ وخد بالك من نقطة مش هتفرق كثير دي؛ لانها هتفرق؛ التصنيف الائتماني مش بيكون للدولة بس؛ للشركات كمان؛ يعني البنوك هتتخفض تصنيفها؛ فلو مصر مش هتستلف لكن البنك الأهلي فكر يستلف فهنا هيدفع فايدة أعلى كما ذكرنا.

تنويه

كان في غلطة بالبوست السابق كتبت المانيا مكان اسبانيا والبرتغال في التصنيف B ؛ المانيا اعلي تصنيف في العالم


شكرا للتنبية من الناس اللي مركزة

البوست يحدث باستمرار لاضافة الجديد

كده 5 بنوك كروت الحسابات بتاعتهم وقفت بره مصر

1️⃣ البنك العربي الأفريقي.
2️⃣ البنك العربي.
3️⃣ المصرف العربي الدولي.
4️⃣ بنك CIB الشركات وغالباً الأفراد كمان
5️⃣ بنك الاستثمار العربي.

دول وقفوا استخدام كروت الحسابات بره مصر وبقي استخدام محلي؛ وبالمناسبة لو فتحت مثلا طيران الإماراتيه ولا السعودي وظاهر لك السعر بالجنية فدا برضك دفع دولي مش محلي؛ دفع محلي يعني بتدفع في سوبر ماركت هنا ولا أمازون وكده.

للأسف زي ما قولت؛ احنا في طريقنا لإن الدفع الدولي يبقي حصري لل كريديت كارد فقط 😔😔؛ أو تجيب دولار وتفتح حساب دولاري وتحطه فيه وتطلع كارت بيسحب من دولاراتك انتا.

⬅️ لو حد يعرف بنك آخر وقف كروته برضك يقول وهحدث البوست.

واضح ان ناس كثير لسه موصلهاش

كل البنوك الكروت بتاعة الحساب/المرتب/ديبيت/ الخصم المباشر ؛ شوف انتا بتحب تسميه ايه دا وقف استخدام دولي

فقط اللي شغال الكريديت كارد أي البطاقة الائتمانية او ما يعرف شعبياً ب فيزا المشتريات

دي اللي لسه شغالة دولي

بتتعمل ازاي ايه طريقها عيوبها ومزاياها و خوازيقها ؛ دي ممكن ابقي اكتب بوست ليها لاحقاً

كان الله في عون أهلنا في غزة

أكثر من مليون كيلو جرام قنابل تم القاءها عليهم حسب بيانات العدو

مليون كيلو متفجرات

بيقولك ماك/بابا جونز/صلاح؛ الخ الخ تبرعوا للضحايا بمبلغ مش عارف كام.

*️⃣ طيب ما في دولة عربية كلنا عارفينها طلعت بيان يدين عمليات الأسر للأولاد الوسخة ووصفوهم بالمدنيين العزل وناقص يحطوا إيموجي 🥹... وبعدين أعلنت تبرعها ب 20 مليون دولار للضحايا.

*️⃣ اللي بيحصل لأهلنا هناك مش نقص فلوس؛ افتح تبرع شعبي عربي اسلامي وهتجمع مليارات الدولارات ليهم؛ وبعدين هيقفوا كلهم عالمعبر منتظرين الإذن من القتلة... لإن الرأي العام العالمي مش شايف في جريمة بتحصل.

*️⃣ قال المشكلة تخلص بالتبرع قال؛ لا وحاجات جايه بعد الضغط؛ إنما الصبر عند الصدمة الأولي؛ مش بعد ما تلاقي الضرب علي شوية تتصرف.... هناك المطاعم اتحركت من اليوم الأول لإنها مقتنعة بدا عقيدة؛ عندنا المطاعم قررت تتبرع لما لقت هجوم... نفس التصرف التقليدي لأي سلسلة هيحصل عليها Brand Attack فهي بتصرف حملة PR لإعادة تلميع صورة البراند. فالتبرعات دي مجرد جزء من حملات دعاية عاملاها مؤسسات PR بتاعتهم مش أكثر. فليسوا سواسية من يتحرك عن عقيدة ومن يتحرك تحت ضغط

كان الله في عون أهل غزة ونتمني شائعات ان اسرائيل سمحت لنا ندخل مساعدات اليوم تكون حقيقة

هعيد نشر جزء مقتطع من بوست قديم سبق نشرته في اكتوبر 2020؛ من باب ندي الناس أمل؛ فلو حاسس ان الموضوع مقصوص في بدايته فعادي دا جزء من بوست قديم تقدر تدور عليه بالبحث

*️⃣ زمان كان حصل خلاف بين السلطان السلجوقي (محمود) مع الخليفة العباسي ووقتها عماد الدين زنكي التابع لسلطان السلاجقة قام بعمل وساطة وصلح بين الاثنين والموضوع عدي؛ لكن بعد وفاة محمود جه السلطان مسعود اللي أعلن الحرب عالخليفة العباسي وقال بدل ما أبعت جيش أصدر أمر ل عماد الدين انه يحارب الخليفة.

*️⃣ عماد كان مجهز جيش عشان حرب مع الصليبين فالموقف ضايقه؛ فقال الخليفة العباسي دا ضعيف فأخد جيش صغير؛ لكن المفاجأة كانت ان الخليفة العباسي جمع جيش قوي وهزم عماد وطارده.

*️⃣ أثناد المطاردة عماد معرفش يرجع الموصل مقر حكمه فحاكم قلعة 🏰 تكريت وافق يحميه؛ مفروض حاكم تكريت دا تابع للخليفة لكنه عارف عماد الدين زكي ودوره ضد الصليبيين فحماه من الخليفة. والكلام دا سنة 1131 م

*️⃣ بعد ما رجع عماد لإمارته قال اللي بيحصل دا هبل؛ هنقعد مسلمين نحارب بعض ونسيب الصليبيين؛ وقال للسلطان السلجوقي مسعود انه مش هيشارك يعني في الخناقة مع العباسيين... ونفس الحكاية الخليفة العباسي قاله انضم ليا فبرضك رفض؛ حاول الخليفة العباسي يحارب عماد بس فشل؛ ولاحقا قتل (الخليفة العباسي) . وجه ابنه بعده فقرر يحارب السلطان مسعود لكنه مقدرش وطلع مسعود قرار بعزله فهرب واحتمي بعماد الدين.

*️⃣ الخليفة العباسي الجديد بقي قال مش هحارب مسعود مقدرش لكن هتخلص على رجالته حوليا؛ طبعا ميقدرش علي عماد الدين لكن افتكر حاكم قلعة تكريت فعمل مؤامرات لقتله.

*️⃣ حاكم تكريت عرف فأخذ أسرته وهرب راح لعماد الدين زنكي اللي رحب بيه ومكانش ناسى الجميله؛ ومسكه منصب لاحقاً وقرر يربي ابن حاكم تكريت الطفل المولود. وفي الوقت دا أعلن عماد استقلاله عن الخلافة العباسية والدولة السلجوقية. وأسس الدولة الزنكية.

*️⃣ بعدها بسنين تمكن عماد الدين من فتح مدينة الرها وازال أول إمارة صليبيه؛ لكن بعدها مباشرة عماد الدين زنكي قتل؛ والحمد لله جه بعده ولي عهد قوي وهو نور الدين محمود.

*️⃣ بالمناسبة الطفل المولود ابن حاكم تكريت كبر ؛ وقصته مشهورة؛ وأشهر ما فيها حصل يوم 2 أكتوبر 1187 لما دخل بجيوشه القدس؛ الطفل دا هو صلاح الدين الأيوبي. اللي حر القدس بعد 88 سنة.

*️⃣ فلو مكانش حصلت كارثة وهي حرب المسلمين لبعضهم؛ مكانش عماد الدين قابل حاكم تكريت؛ ومكانش أخد ابنه يوسف أو كما يعرف بصلاح الدين الأيوبي... فلولا الكارثة مكانش ظهر البطل... فمش دايماً الكوارث بتكون ظلمة؛ ساعات بيكون دور الكارثة انها تراعي بذرة صغيرة بتنمو؛ وقت الكارثة محدش هيحس بالبذرة؛ زي وقت الحرب بين العباسيين والسلاجقة محدش اكيد كان عارف ان الجنين هيطلع صلاح الدين. اللي حرر قدسنا بعد 88 سنة.

*️⃣ في زمن مكانش فيه صواريخ وتقنيات خارقة المسلمين أخدوا 88 سنة عشان يحرروا القدس و 180 سنة عشان يحرروا طرابلس ؛ ودلوقتي ييجي شوية ناس يقولوا إن عمر الكيان المحتل 75 سنة فخلاص بقي أمر واقع ومش ممكن ينتهي في يوم.

*️⃣ عشان شوية جهلة مقرأوش يوم تاريخ؛ أو هما اللي بيختاروا ما يدرس لنا من تاريخنا. القدس رجعت بعد 88 سنة يعني أكنها سنة 2036 أما طرابلس فأكنها طرابلس سيتم استردادها سنة 2128. لكننا بنستعجل. هتتحرر ان شاء الله منهم

أسوء حاجة في نظري هي البيانات والتصريحات الحيادية ومشيها حيادية؛ بس وفكر معايا ليه.

*️⃣ مفيش حدث هيكون متابعة كل البشر؛ او متابعين حجمه؛ احنا بنغلي عشان اخواتنا؛ ممكن الدول اللي فيها مسلمين وعرب كثير او حتي يهود كثير يسمعوا بالاحداث منهم؛ لكن تخيل حد في مدينة صغيرة في شمال اسكتلندا ولا نيوزلندا ولا الأرجنتين؛ غالبا لو سمع مش هيكون حاسس بضخامة الحدث زينا.

*️⃣ هنا ييجي حد مشهور قوي يعمل كلام دبلوماسي مطاطي؛ ليكن قال انفجار المستشفي وقتل الأطفال غير مقبول؛ كلام المشهوو دا وصل لشخص مش متابع؛ فالراجل يقول مين الجبابرة اللي يعملوا جريمة زي دي.

*️⃣ فيفتح الإعلام بتاع بلده؛ هنا بقي الإعلام دا متسيطر عليه من مين؟ برافو عليك. من العدو؛ فيرحب بيه ويغسله مخه ويقوله القصة المعكوسة.

*️⃣ فهنا الحيادي في الغرب الكيوت دا تسبب في ايه لما ميوضحش مين الجاني ومين المجني عليه؛ مين الضحية ومين الظالم؛ مين المجرم ومين البريء؛ فهنا هو هيتسبب انه دخل شخص جديد لخانة الأعداء... فهو حب يكون دبلوماسي وكيوت لكنه تسبب في زيادة الخصوم...

*️⃣ لو عايش في دولة تبعنا وحابب تعمل كيوت كتكوت بطوط زعبوط؛ عاااادي الناس هتشوف هنا اللي بيحصل؛ لكن قاعد وسط اعلام معادي وتعمل كيوت؛ فكده هتجيب اعداء علينا أكثر... زودت زباين الميديا اللي هيحبوا يعرفوا الحقيقة ويعرفوها من الاعلام لإنهم مفهموش منك يا بطوط حاجة.

أفنجعل المسلمين كالمجرمين؛ مالكم كيف تحكمون

قال كل الدم مقدس قال؛ دم القاتل يتساوي مع المقتول؛ لا حول ولا قوة إلا بالله...

من ربع قرن دكتور عبد الوهاب المسيري رحمه الله وصفهم

في ال 24 ساعة او حتي الأيام في 3 أحداث حصلوا كان الطبيعي الاقي بوستات عليهم كثير لكن بسبب غزة مشوفتش بوستات ليهم كثير ودا شيء حلو:

1️⃣ مؤسسة S&P كبير التصنيف الائتماني بتاع الكوكب خفضت تصنيف مصر ل B- ودا أقل تصنيف عندها قبل النزول لمنطقة C ؛ وبالمناسبة دا أقل تصنيف مصر توصله عند S&P في تاريخها لكن مصر جابته كثير قبل كده فمش جديدة يعني.

2️⃣ الاهلي لعب؛ اه كان في ماتش كورة وعادة بوستات شايف الحكم وشايف اللعب؛ مشوفتش غير 1 بس عندي في التايم لاين كتب.

3️⃣ الزمالك كان عنده انتخابات لانتخاب رئيس للنادي؛ وأخبار الزمالك عادة بتكون ترند وكده لكن برضك هو شخص واحد ووحيد اللي شوفته علق عالانتخابات ونشر بوست بالتايم لاين.

⬅️⬅️ قبل دول ب 3 أيام وفي نفس وقت جريمة المستشفي فالبنوك المصرية حطت قيود وحد أقصي 250 دولار لاستخدام الكريديت كارد دولي بدون سفر. الموضوع دا شوفت بوستين ثلاثة لكن جالي رسايل كثير بتسألني عنه.

⬅️ للتوضيح فالليميت بتاع الكروت متغيرش؛ لما تيجي مسافر خد تذكرتك وباسبورك وتاشيرتك ومخدتك الغطا بتاعك وروح البنك قولهم في البنك انك مسافر؛ دا لو عرفت تدفع يعني تذكرة الطيران لان 250 دولار متحجزتش تذكرة 🤣 ؛ روح شركات السياحة بقي وعليك خير. فلما تروح البنك وتنام شوية فيه؛ هيترفع لك حد استخدام الكارت في المدة والدولة اللي الورق بتاعك بيقول انك رايحهم.

*️⃣ حبيت اجمع كل الأخبار ورا بعض عشان مليش نفس أنشر بوستات مستقله؛ في مواضيع كثيرة.

*️⃣ دا حتي بالمناسبة بقالي أسبوع بحاول أكتب بوست عن دولة خنزيرة جارتنا وإنها في حرب ومؤسسات التصنيف سايبه تصنيفها A إزاي... ومش بوست مؤامرات كونية لكني هشرح ليه مفروض يتخفضوا طبقاً لمعايير مؤسسات التصنيف... يعني البوست أساسه شرح بتوع التصنيف بيبصوا على ايه في الدول وهضرب مثال بالكلاب والبنود دي وضعها ايه معاهم...

*️⃣ الخبر الكويس ان موديز أعلنت إمبارح إنها حطت تصنيفهم تحت المراجعة... أيوا كده يا مفضوحين ال... كده أووووفر؛ العبوها باحترافية يعني بدل A1 في موديز و AA- في S&P؛ نزلوهم ل A2 و A+... مش هتفرق كثير بس هتعيشوا في دور المحايدين...

*️⃣ المشكلة ان البوست دا قرفان أكتبه؛ بقالي 9 أيام مش عارف أخلصه لإني قرفان أدور في أخبارهم ومواقعهم.

يلا يا إعلام كوكب الأرض الغربي الوسخ؛ عاوزكم تصوروا المساعدات وهي داخلة؛ وهما 20 شاحنة بس أصلاً اللي دخلوهم؛ لكم صوروهم َذيعوهم إن إزاي ولاد ال 🤬🤬 كيووووت وحلوين ورحيميين... عشان لما يقفلوا ؛ تفضلوا تذيعوا اللقطات فالجحش المتابع ليكم بره يفضل متخيل إن الموضوع مستمر وأد ايه أعظم ديمقراطية في الشرق الأوسط جميلة.

اصلكم انتم وهما أوساخ والفيلم دا شوفناه كثييير؛ وخلاص تبقوا أخدتم اللقطة المطلوبة فمش محتاجين تاني... نتلكك ونقول شتمني وهو نايم اقفلوا مفيش حاجة داخله تاني.

دا الكوكب كله حافظ الفيلم دا وانهم هيقولوا خلاص روحوا اخدنا اللقطة اننا بندخل مساعدات 🤣🤣🤣

للأسف في موجة تضخمية هتبدأ بمناسبة وصول الدولار في السوق السوداء لأبواب ال 45 جنية... وطبعاً دا سعره هنا لسه مصاريف تحويله والعمولات والحبشتكنات... وضيف في بالك انه بيفكر في سعر البضاعة والدولار وقت وصول المنتج ليه بعد شهرين...

*️⃣ يعني فعلياً قول التسعير بقي ب 50 وطالع... دي عشان بيعجبني الناس اللي تقولك الدولار ب كذا في السوق السودا وسعر المنتج كذا بره يبقي كذا سعر مصر ؛ ناس طيبين قوي بتوع سريلانكا دول 🤣🤣 هو الدولار هيطير من هنا لهناك والبضاعة كذلك بالانتقال الآني 😂

*️⃣ في مجال شغلي كثير من الموردين بلغونا ايقاف البيع لإعادة التسعير؛ واللي لسه موقفش فالمناديب قالوا انه هيحصل خلال يومين...

*️⃣ فلو انتا مستني البلاك/وايت/فحلقي 🤣 فرايدي بعد شهر من النهاردة؛ الاسعار هتزيد وبعدين يتعمل عليها عرض ممكن يرجعها لسعرها الحالي.

*️⃣ لكن ممكن الأمل هيكون في التقسيط أو منتجات يقرر نون وأمازون يحرقوها (ودي التجار هيكونوا منتظرينها عشان يشتروها 😁)...

*️⃣ فاللي فات حمادة واللي هيحصل في الأسعار خلال ال 6 شهور القادمة حمادة تاني خالص؛ هنعيد 2022 و 2023 في 6 شهور كده... 😭😭😭😭

*️⃣ معلش بوست كئيب بس انتم عارفيني؛ لدرجة ان مرة صديق كان نشر صورة معايا ومع ناس تانية وسأل متابعية تعرفوهم فحد قاله اه نعرف حد بيتكلم في الاقتصاد وبيجيب لنا اكتئاب 🤣🤣🤣 بقيت علامة مسجلة زي عم ضياء (كله رااااايح).

الدولار بالسوق السوداء وصل ل 47 جنية؛ الارتفاع السريع المتواصل كارثة عالاقتصاد؛ الارتفاع يؤدي الي المزيد من الارتفاع تلقائياً كده.

*️⃣ فكر معايا كده؛ ليه تبيع دولار ب 45 وهو هيبقي 46؛ طيب بقي 46 ليه ابيع ما هيبقي 47 اهو؛ طيب دلوقتي ليه ابيع ب 47 ما هيبقي 48 بكره وليه 48 ما هيبقي 50 وليه أصلاً أبيع؟؟؟

*️⃣ ارتفاع السعر بيشجع علي البيع لما يكون فرصة؛ يعني الدولار ب 39 بقاله فترة ثم يطلع ل 42 فالناس تقولك فرصة ابيع علي 42؛ فالناس تبيع فالعرض يزيد فدا يسبب ايه؟ انخفاض السعر فينزل ل 39 فالناس تقولك راحت الفرصة وقف بيع... فالعرض يقل فالسعر يزيد ل 42 فالناس تقولك الفرصة جت تاني يلا بيع فينزل ل 39 وهكذا.

*️⃣ اللي فات دا هو السيناريو اللي كان شغال في مصر من مارس لغاية سبتمبر 2023 بالسوق السوداء؛ طيب تعالي نبص عالوضع الحالي ايه.

*️⃣ الدولار بيرتفع بشكل جنوني متواصل يومي؛ فهنا حائز الدولار مبقاش شايف فرصة؛ ما 45 بكره 46 بعده 47 بعده 48 بعده 50 بعده 60... دلوقتي مش بتكلم القيمة الحقيقية اللي مفروض يوصلها بالنسبة لاقتصادك كام... أنا بتكلم في النظرة الشعبوية للدولار... فلما يفقد السعر العالي ميزته فهنا هيبدأ المعروض يقل؛ الناس هتبيع ليه؟ فقط اللي مضطر عشان عنده التزامات بالمصري...

*️⃣ حتي أصحاب الشركات والمصانع ورجال الأعمال؛ عمالين يعانوا عشان يدخلوا مواد خام؛ ويعانوا عشان يدخلوا قطع غيار للمصانع؛ ويعانوا عشان يبيعوا؛ ويعانوا عشان يحصلوا فلوسهم من السوق... طيب ما نحول فلوسنا ل دولار ونكسب بدون مجهود؟

*️⃣ فالنتيجة تكون ان حائز الدولار اللي عاوز يبيع يقل؛ والمشتريين يزيدوا ؛ فالطلب أكثر من العرض؛ فالسعر يزيد؛ فالحائزين اللي بيبيعوا يقلوا؛ وهكذا... لغاية ما نوصل لمضاعفات كارثية.

*️⃣ حائز الدولار يبدأ يستلف مصري؛ يعني واحد عنده التزام مثلاً 180 ألف جنية كان هيبيع 4000 دولار ب 45 جنية؛ فيقولك هشوف حد صاحبي يسلفني 180 ألف شهرين؛ وبعد الشهرين الدولار اكيد هيكون وصل ل 60 جنية فوقتها ابيع 3 الاف دولار واسددهم له وابقي وفرت الف دولار... بس عارفين بعد شهرين لو حصل السيناريو دا ايه هيحصل؟ هييجي يقولك طيب جه وقت سداد الدين؛ ليه ابيع 3 الاف دولار ب 60 وهما هيبقوا 80 بعد 6 شهور؛ ما اروح استلف من حد او حتي اخد قرض واسدد لصديقي... وهكذا بقي.

⬅️⬅️ طبعاً كل الأرقام السابقة خيال بس دا مثال توضيحي عشان يتفهم إزاي الارتفاع المتواصل كارثي.

*️⃣ طيب ايه الطبيعي؟ الطبيعي مثلا وصلنا ل 47 يروح اللي بيلم في السوق وساحب الدولار يوقف؛ فالناس تبقي عاملة عرض ومفيش مطلوب؛ فالسعر ينزل ل 44 مثلا؛ فهنا يبدأ يلم ويوقف عند 47 تاني... فدا يخلي عند الناس مفهوم ان 47 دي مقاومة؛ بيع لما توصل عندها دي فرصة.

*️⃣ لكن صعود متواصل؟ الصعود هيأدي لمزيد من الصعود زي ما شرحنا؛ والسقف مفتوح والسماء محدش يقدر يوصلها...

⬅️ الاتجار في العملة الصعبة جريمة يعاقب عليها القانون المصري؛ وجب التنوية عشان محدش يسيب مفهوم البوست وانه شرح وييجي يمسكني أنا؛ أنا عن نفسي شغلي 100% منتجات مستوردة يعني نفسي الدولار يرجع 15 جنية 😭😭😭...