هذا البوست تم كتابك على مراحل متفرقة فأعتذر لو في عدم ترابط سردي.


*️⃣ يا محمد انتا ليه مكلمتناش عن شهادة الدولارية 7% و 9% ؛ طيب ليه مكلمتناش عن شهادة ال 3 سنين اللي بتصرف مقدماً 40% ؛ طيب ليه مقولتش رأيك في رفع الفايدة؛ طيب تثبيت الفايدة؛ الخ الخ.

*️⃣ طوال الشهور الأخير كنت بتجنب قدر الإمكان إني اكتب أي حاجة عن مصر؛ فمن ناحية الوضع ثابت في مصر ومن ناحية ثانية انتم فاهمين إن حالياً الكلام مش حلو إلا لو هتقول وااااو تحفة هو إزاي الوضع الاقتصادي جميل كده ؛ لولا بس شوية الحاجات الصغنونة اللي احنا مش سبب فيها وبتحصل في العالم كله كان وضعنا هيبقي احسن من سويسرا. دا المطلوب يتقال وبتشوفوه بس انا مش هقوله مبعرفش... لكن برضك مش هقول كلام وحش مقدرش 😁.

*️⃣ وبناء على المعطيات السابقة قررت اشرح ببساطة وبالهجايص اليات (السياسة النقدية والمالية).. كلام تاخده تطبقه علي اي دولة؛ حتي أمريكا نفسها.

*️⃣ لما الدولة يكون عندها ازمة تضخم ووضع اقتصادي بيكح تراب بتبدأ في عمليات اصلاح اقتصادي واستخدام آليات لضبط السوق واشهر حاجتين تلاقيهم في عناوين الاخبار هما السياسة النقدية والسياسة المالية... وآه الاقتصاديين بيفرقوا بين مصطلح نقود و أموال.. كمل انتا وهتوضح لك ان شاء الله.

*️⃣ هدف السياسات دي هي التحكم في الفلوس اللي مع الناس؛ المتعارف عليه في الظروف الطبيعية والبلاد الطبيعية ان آليات السوق هي اللي بتتحكم في الأسعار؛ يعني السوق فيه 100 عربية مرسيدس بس؛ هو بيدخله 100 عربية كل 3 شهور؛ واللي عاوزين مرسيدس 300 شخص؛ فهنا بشكل غير معلن هيبقي في مزاد؛ طيب 2 مليون ؛ بقوا 290 شخص... طيب 3 مليون؛ بقوا 200 شخص؛ طيب العربية ب 4 مليون؛ بقوا 100 زبون.. فهنا العربية الطبيعي سعرها 1.5 مليون تتباع ب 4 مليون بسبب الطلب عليها وقلة المعروض... سيبك من هري جشع التجار؛ التاجر كده كده عنده 100 عربية ومش هيدخل غيرهم غير بعد 3 شهور؛ يبيعهم ليه ب 1.5 مليون يعني 150 مليون؛ طالما يقدر يبيعهم ب 4 مليون العربية يعني 400 مليون... كده كده في النهاية في 100 واحد بس من ال 300 اللي واقفين هياخدوا عربيات و 200 هيروحوا؛ يختارهم ازاي؟ بالحب ولا اللي اسمه شبه اسم ابو التاجر؟ بالفلوس طبعاً.

*️⃣ بيع العربية ام 1.5 مليون ب 4 مليون دا بيعمل حاجة اسمها تضخم؛ فهنا الدولة بتدخل بالآليات بتاعتها عشان تحل التضخم دا؛ هدف الآليات باختصار انها تسحب الفلوس من ايد الناس... يعني مثالنا فوق ايه سبب ان العربية اتباعت ب 4 مليون بدل 1.5 مليون؟ السبب ان في 100 عربية ومطلوب 300... خلاص حلو احنا هنخلي اللي عاوزين يشتروا 200 او 150 بس وقتها لما يحصل المزاد بتاع زيادة السعر ده مش هيوصل ل 4. دي بقي الفكرة باختصار كده وطريقة علاج التضخم.

⬅️1️⃣ السياسة النقدية:

*️⃣دي بقي باختصار كده الفلوس اللي معاها مباشرة ؛ السياسة دي هي اللي بنشوفها كثيو وبسهولة لإن المتحكم فيها البنك المركزي؛ هدف السياسة دي التحكم في كمية الفلوس اللي مع الناس زي ما قولنا في مثالنا؛ يعني الناس معاها فلوس كثير وعمالة تشتري السلع حتي مع زيادة أسعارها؛ هنا البنك المركزي ياخد شوية إجراءات كده يلم بيها الفلوس دي وهي

*️⃣*️⃣ ارفع الفايدة؛ ودي هدفها ان الناس تلاقي ان الادخار مغري؛ حوش يا عم وحط فلوسك في البنك هتلاقي فايدة عالية. يقولك ليه تحط 2 مليون في عربية؛ حطهم في البنك 3 ولا 4 سنين في شهادة هتلاقي ال 2 مليون بقوا 4 مليون... فكده اقنع شوية يخفوا الضغط عن السوق فيقل ارتفاع السلع.

*️⃣*️⃣الاحتياطي الالزامي : طيب البنوك دلوقتي معاها فلوس؛ هتروح رايحة مزودة القروض ومسهلة الشروط عشان تطلعها؛ في حاجة اسمها الاحتياطي الالزامي ودي نسبة من ودايع العملاء بتوع البنك لازم البنك يروح وايح حاططهم عند البنك المركزي مجاناً وبدون فوايد... مثلاً تكون النسبة 14% فيطلع المركزي يقولهم خلوا 18% ثم 20%... فكده بشيل الفلوس من ايد البنوك عشان مترجعهاش السوق تاني.

*️⃣*️⃣الودايع المركزي : لسه فاضل عند البنوك شوية فلوس؛ يروح المركزي قايلهم مش انتم مش لاقيين حد ياخد الفلوس دي؛ طيب يلا تعالوا أنا عاوز 100 مليار او 200 مليار وديعة؛ اه المركزي منبع الفلوس يعمل كإنه هو اللي بياخد القرض؛ فتروح البنوك تقولك يا سلام زبون مضمون بدل ما نخاطر ونسلف حد منعرفوش جوا البلد في الظروف دي. ويفضل المركزي يجدد في الودايع دي عشان يسحب سيولة البنوك ويحسبها عنده هو.


*️⃣ دي باختصار السياسة النقدية ولو بصيت عالكوكب كله هتلاقيهم بيقولوا اعلنت دولة كذا عن زيادة التضخم ؛ ثم اعلن البنك المركزي او البنك الفيدرالي عن زيادة الفايدة بهدف كبح جماح التضخم.

*️⃣محلياً آخر سنة ونص مصر عملت كل دا وزودت الفايدة فوق ال 10% وزودت الاحتياطي الالزامي وزودت طرح ربط الودايع... وسبق وصرح محافظ المركزي لبلومبيرج ان السياسة النقدية فقط مش هتحل مشكلة مصر.. فيا تري ايه بقي السياسة المالية ؟ ما تيجوا نشوف

⬅️2️⃣ السياسة المالية:

*️⃣ السياسة دي في إيد الحكومة وليس البنك المركزي؛ وأشهر أداة فيها هي الضرائب؛ الهدف هو هو بتاع السياسة النقدية وهو التحكم بالفلوس لكن مع اختلاف أساسي وهو عدم التدخل في كم النقود؛ السياسة النقدية بترفع الفايدة وتزود الفلوس معاك؛ المالية مش هتزود الفلوس لكن هتلعب على قيمتها.

*️⃣في وفرة فلوس مع الشعب وعمال يشتري ومزود الطلب؛ طيب ارفع الضرايب والرسوم خلي سعر السلع يزيد والطلب عليها يقل؛ والعكس عاوزين ننشط السوق يبقي نقلل الضرايب فيقل سعر السلع.

*️⃣أداة أخرى هي الانفاق الحكومي؛ الدولة تتدخل وتنفق وتديلك دعم ومساعدات بشكل أو بآخر... فإنتا بتصرف 10% من دخلك عالصحة والعلاج؛ فتلاقي العلاج بتاع الدولة جيد ومجاني؛ فهنا توفر معاك 10% من دخلك بدون ما الدولة تطبع فلوس وتدهالك؛ دخلك زاد 10% فتصرفه في مجالات أخرى ويتحسن مستوى معيشتك بنفس الراتب بدون زيادة عن طريق خدمات القيمة المضافة..

*️⃣ فالدولة في السياسة النقدية بتكون مايسترو؛ تزود الانفاق هي وتضخ فلوس في السوق وتوفر لم خدمات فتحسن من معيشتك؛ والعكس أحياناً ترفع الضرايب على بعض السلع عشان تسحب منك الفلوس وتقلل انفاقك.

⬅️3️⃣الإصلاحات الاقتصادية

*️⃣دي معتبرش أداة مباشرة لكن دايماً نسمع اصلاح اقتصادي؛ ايه هي فكرته بقى؟ يعني لو نفس مثالنا... السياسة النقدية هتخليني افكر ليه اشتري العربية ما احط فلوسها في البيت... والسياسة المالية هترفع الضرايب او تقلل الضرايب وتتحكم بانفاق الدولة بحيث تتحكم في سعر العربية فبالتالي يتحكم في الطلب عليها... الاصلاح الاقتصادي هيعمل ايه بقي؟

*️⃣باختصار كده هو كإنه في مثالنا هيروح للمعرض ويقوله؛ هو انتا ليه عارض 100 بس؟ عشان اجراءات الاستيراد معقدة؛ طيب بسطنهالك يا سيدي هات 200... او يقوله انتا محتاح ايه مننا عشان تصنع 300 عربية؟ تعديلات في قوانين كذا وكذا وتدريب فني وكهرباء ومياة باسعار كويسة ووو... شوبيك لوبيك اتفضل عدلنا القوانين وظبطنا الدنيا يلا صنع يا سيدي.

*️⃣ فالسياسات النقدية والمالية خلاص بالنسبة لها 100 عربية معروضة رقم مسلم به و بيلعبوا في الطلب ال 400؛ لكن الاصلاح الاقتصادي فكرته انه يلعب في رقم 100 دا ويزوده؛ اللي ينفع يزيد تصنيع محلي تمام واللي يزيد استيراد تمام... فالنهاية محدش بيصنع كله محلي ولا حد ب يستورد كل شيء...

*️⃣طبعاً دا اختزال رهيب للاصلاح الاقتصادي لكن دا الهدف النهائي؛ عندي سلعة مطلوبه 400 ومعروض 100 بس ليييه؛ نصنعها؛ طيب ايه العقبات ؟ قوانين كذا وكذا؛ نغيرهم؛ منافسة الدولة للقطاع الخاص؛ الدولة تطلع.. نقص مهارة؛ نشوف طريقة نطور بيها مهارة الخريجين وننقل ال Know How؛ قوانين بنكية صعبة؛ نسهلها... مفيش طرق كويسة؛ نعمل طرق وكباري؛ مفيش موانئ تساعد؛ نطور المواني وهكذا.

*️⃣فالبنك المركزي ليه أدوات محددة بيشتغل بيها؛ صعوبات تصريح البناء للمصانع مش شغلة البنك المركزي لكنها هتضر الاقتصاد؛ انقطاع الكهرباء مش شغلة المركزي؛ وهكذا.

*️⃣ فالاقتصاد بيدار بقي ك أوركسترا ضخمة؛ سياسة موحدة للدولة وكل جهة تخش تشتغل بالأدوات بتاعتها لحل الأزمة. ولازم الكل يشتغل بتنسيق وتناغم مع الآخرين والا هيبقي نشاذ.

*️⃣الشرح فوق طبقه على أي دولة؛ حطه على لبنان أو اليونان؛ هتلاقي المركزي بيتدخل ويرفع الفايدة او يخفضها حسب وضع الدولة دي... والحكومة بتزود انفاقها او تقلله؛ وتخفض الضرايب او تزودها؛ وتعمل اتفاقيات مع مستثمرين لنقل الخبرات والتقنيات وتحارب الفساد والجريمة المنظمة وتزود عدالة التنافس ووو...

*️⃣ فالخلاصة كده القرارات اللي بتسمعها للمركزي؛ زود الفايدة خفض حرك سعر الصرف؛ دا شغل سياسة نقدية؛ مصر عاوزة شغل ثلاثي؛ نقدي ومالي واصلاح اقتصادي...

*️⃣ وأظن كده بقي مفهوم ليه محللين كثير بيقولوا تحريك سعر الصرف بشكل مستقل ليه ملوش لازمة؛ هتحرك سعر الصرف وتزود الفايدة؛ هتلعب في السياسة النقدية بمعزل عن الباقي؛ ولا ليها اي لازمة... عشان كده تثبيت المركزي لسعر الصرف يعتبر مفهوم السبب؛ مش هيؤدي الي اي حاجة؛ وحتي رفع الفايدة كان قبله 2 تثبيت لانه برضك مش هيؤدي لحاجة جوهرية.

*️⃣ يبقي كده التعويم عشان يؤدي الغرض لازم يصاحبه خطوات تانية واصلاح شامل؛ وفعلياً الدولة نوعاً ما بتعمل خطوات؛ يمكن السرعة قليلة قوي بس نقول انها شغالة.

أي حد هييجي يسألني علي أي شهادة جديدة او فايدة هتنزل هبعت له البوست دا 😂

علي سيرة الاي فون 15 اللي اعلنت عنه أبل.

*️⃣ تعرفوا ان 90% من الكروت البنكية في مصر متقدرش تشتري الاي فون 15 برو ماكس 😂

*️⃣ تخيل كده شخص عاوز يطلب اي فون 15 برو ماكس 512 جيجا... سعره الرسمي في موقع ابل الامارات شامل الضريبة ب 5950 درهم (1600 دولار) يعني بعد حساب ال 10% عمولة البنك محتاج 55 الف جنية

*️⃣ كروت الحسابات في بنوك شهيرة زي HSBC و كريدي اجريكول و QNB و EG Bank متقدرش تشتري اي فون اي كان ليفيل بتاعك... و بنوك زي الاهلي لازم يبقي حسابك بلاتنوم وطالع ( يعني حد ادني للرصيد 5 مليون وطالع) او CIB Wealth (رصيد 2 مليون وطالع)

*️⃣ تخيل كده واحد عميل برايفت في بنك اسكندرية يعني حد ادني لرصيد حسابه فوق ال 2.5 مليون؛ الكارت بتاعه اخره يدفع 25 الف جنية يومي 😂 اخره يشتري ساعة أبل.

*️⃣ تقريباً بنوك مصر بتقول ريحوا نفسكم والحل هو كريديت كارد مرتفع؛ بلاتنوم وورلد وسيجنتشر عشان تعرفوا تشتروا موبايل 😭؛ وخد بالك حتي دا مش مع كل البنوك؛ يعني بنك ثقيل زي HSBC ميقدرش يشتري أصلاَ موبايل اي كان شكل الكارت ديبيت كريديت كارد حتي لو بريمير؛ عميل HSBC ميقدرش يشتري اي فون بكارته ولازم كاش 😂😂.

*️⃣ القطاع البنكي في مصر بقي كوميدي قوي وليميت الكروت بقى مضحك ومستحيل الوضع يستمر كده.