نزلت الصورة السابقة في بوست قصير على فيس بوك
https://bit.ly/3dffjo1
وصراحة متوقعتش يعمل البوست خناقة وسوء الفهم دا

*️⃣ في اللي فهم إن نون بتقول إن منتج فيه مشكلة بايظ مش هيرجع ودا مش سليم

*️⃣ وفي اللي معترض إزااي يعني مش من حقي أشتري منتج استخدمه شوية وارجعه؟

*️⃣ المشكلة إن الناس فاكرة إن الشركات الكبيرة قوي بتدلع العميل من باب حب العميل وكده... خالص يا برنس الشركات دي بتاخد المنتج ترميه للتاجر فالتاجر يعمل شيء من اثنين... إما يلبس خسائر أو يكون بتاع حوارات يروح مقفل المنتج تاني وملبسه لزبون تاني... ملبسه هنا بقت وصف دقيق لإن شخص تاني هيشتري منتج وفاكر إنه أول شخص يستخدمه بس فعلياً لا...

*️⃣ ففعلياً الدلع دا بيكون تلبيس لحد تاني مش أكثر.

*️⃣ وأكبر لك شوية القصة... الشركات العملاقة مش بتعمل كده من جيبها لكن من جيبك إنتا بس إنتا مش واخد بالك مش أكثر؛ وأقولك قصة خيالية.

*️⃣ شركة عملاقة... تقعد تشتري منتجات وتبيعها أرخص من التكلفة كمان... عميل يستخدمها ويرجعها عادي... العملاء يحبوها والتجار المنافسين ميقدروش يستحملوا الخسائر دي... فالنتيجة ايييه؟ التجار تبطل تشتري المنتج X دا اللي بينافسهم فيه الشركة الكبيرة

*️⃣ بعد فترة تستفرد الشركة الكبيرة بالتوكيل أو المصنع وتقوله بص الأسعار دي مش عجباني إما هشتري منك بسعر كذا أو مش هشتري... ومعندكش خلاص زبون غيري... تسحق المورد دا وتخليه شغال عندها ويبيع بلا مكسب.

*️⃣ المورد أرباحه تقل بس هو خلاص وقع في الفخ عند الشركة الكبيرة... فيقرر المورد إنه يقلل العمالة أو يخفض الرواتب أو يلغي المكافئات... فتقل الفلوس المدفوعة للعمال.

*️⃣ فهنا يروح العامل دا ويقول ياااه صاحب شركتنا دا وحش قوي؛ أشحال بضاعته أول بأول بتتباع للشركة العملاقة الفلانية... يااااه لو كل الشركات في الدنيا بتعاملنا حلو زي الشركة العملاقة؛ دي شركة تحفة ودايماً نطلع منها كسبانين مش زي صاحب شغلنا اللي مستعبدنا ببلاش... خسارة...

*️⃣ والعامل ميعرفش إن الشركة العملاقة هى السبب في اللي بيحصله... هي بتديله خصم النهاردة قصاد عينه 5 جنية... بس هي بتعمل دا عشان هي عندها خطة تاخد من مرتبه بتاع بكره 10 جنية

*️⃣ فخ مثالي كل الكوكب بيقع فيه؛ كلنا بنجري وراء الجزرة ومش بناخد بالنا ايه هيحصلنا بعدها

أسوة ببوست صديقي شريف من كام يوم عن فلسفة حل المشاكل بتاعة 5 ليه... نبص عالوضع المصري

التقارير العالمية: مصر لازم تخفض العملة 10-20-30%

ليييييه؟

⬅️ عشان العملة مقومه بأكثر من قيمتها ولازم تعبر عن الوضع الحقيقي؟

لييييه الوضع الحقيقي قليل؟

⬅️ عشان الطلب عالدولار عندك أعلى من الإيراد الدولاري

لييييه الطلب عالدولار عندنا أعلى من إيرادنا؟

⬅️ عشان احنا مش شاطرين في الصناعة والتصدير ومش جذابين لرؤوس الأموال الأجنبية وبنهدر العملة الصعبة.

لييييه مصر مش جذابه بقى للصناعات وليه مش بنصدر؟

⬅️ عشان تصنيفك 93 في تنافسية السوق تبع دافوس و 102 في تقرير البنك الدولي بتاع سهولة القيام بأعمال و ترتيب 117 في الشفافية و 166 عالمياً في إنفاذ العقود... والجمارك عندك تعتبر من أسوء 10 دوائر جمركية في كوكب الأرض وووو


*️⃣ خلاص خلاص طيب انتم شايفين إن تخفيض الجنية لرقم كبير ليكن يا سيدي 0.04 دولار يعني يبقى الدولار ب 25 جنية كده تمام؟

*️⃣ اه تمام؛ دا هيخلي الواردات تقل والصادرات تزيد والميزان التجاري يتعدل وهتبقى دولة أرخص للسياحة العالمية.

*️⃣ طيب تعرف سيادتك إن الفنادق في مصر مسعره أصلاً بالدولار؟ يعني الدولار يزيد يقل مش هتفرق كده كده أساس التسعير دولار مش جنية؟ فمش هنبقى أرخص للسياحة؟

⬅️ طيب بص عارف مصر بتستهلك سنوياً بتاع 100 مليار دولار... إنتا بتقول إن دول لما الدولار يزيد هيقولوا صح؟

اه طبعاً

⬅️ طيب بص في 25 مليار دولار سداد ديون هل دا هيقل؟

لا دول بره الحسبة مش هيقلوا

⬅️ طيب بص عندك 5 مليار دولار قمح سنوي تفتكر هنطبل لما الدولار يزيد؟

لا خالص مش متوقع نهائي

⬅️ طيب يبقى أكيد هنبطل نستورد حديد ونحاس والومنيوم وشوية الخامات اللي بتاخد 8 مليار دولار سنوي دول

لا أكيد طبعاً مينفعش أومال المصانع عندك تشتغل إزاي

⬅️ يبقى خلاص هتبطل تستورد ال 7 مليار دولار بترول ومشتقاته والزيوت ووو...

بصراحة صعب قوي يمكن يقل شوية لكن أكيد هتفضل تستوردهم

⬅️ خلاص فهمتك يبقى هنبطل نستورد زيت الذرة والصويا والقهوة والشاي والحبوب الزراعية والأكل دا صح اللي بياكلوا 3-4 مليار دولار من الواردات صح

*️⃣ ايه يا عم هتعملها إزاي دي طبعاً مش هتقدر

⬅️ يبقى انتا أكيد قصدك ال 4-5 مليار دولار اللي بيروحوا في أخشاب وأوراق واللحمة

*️⃣ لا يا سيدي مينفعش يعني... هو انتا هتزرع غابات في مصر ولا هتجيب مايه منين للحيوانات

*️⃣ يا عم احنا بنتكلم عالتفاهات يعني عربيات؛ لعب أطفال؛ أثاث مستورد؛ ملابس مستورده والموبايلات والكومبيوترات وو الخ

*️⃣ ااااه بس هي الحاجات دي كلها على بعضها ميكملش 10% من الانفاق الدولاري المصري... يعني بتصرف 100 مليار دولار سنوي هما 10 مليار رايح للأمور التافهة دي

*️⃣ لكن مش مهم هما ال 10 مليار دول اللي سبب الأزمة؛ ايه البديل عندك؟ يعني هتبطل تستورد ملابس طيب هل انتاجك المحلي يكفي؟

*️⃣ طب هي الكومبيوترات أمور تافهة والموبايلات والعربيات؟ هنركب كارته ولا هنحسب على ايدينا ونتواصل بالحمام الزاجل؟

*️⃣ طب سيبك من دا كله؛ الطبقة الثرية الفاحشة الثراء؛ اللي بتستورد رخام من إيطاليا والهند؛ وتجيب أثاث مستورد وعندها إحصنة وجيش حيوانات أليفة... لما أسعار السلع دي يزيد هل هيبطلوا يشتروها فبالتالي الدولة توفر دولار السلع دي؟ لا خالص هتفض تصرفه

*️⃣ عاوز تعرف الإجابة؟ بص سنة 2015 كانت مصر بتستورد ب 78.7 مليار دولار... حصل تعويم في 2016 والدولار بقى الضعف؛ تفتكر في 2017 استوردنا ب كام؟ 75.9 مليار دولار... وفي 2018 ب 88.8 مليار دولار... ايه دا يعني الدولار تضاعف

*️⃣ طيب بلاش نبص على طرف واحد للكوباية؛ الطرفين؛ الواردات والصادرات والفارق بينهم

*️⃣ سنة 2015 قبل التعويم كان الفارق 50 مليار دولار لصالح الاستيراد
سنة 2017 الفارق قل ل 42.6
سنة 2018 زاد ل 51.1
سنة 2019 رجع يقل ل 47.1
سنة 2020 الكورونا قل ل 42.8

⬅️ ملحوظة بس قبل ما تقول نجحنا أهو؛ في 2020 انهار سعر البترول فبدل ما كنا بندفع في 2019 مبلغ 12 مليار دولار؛ دفعنا في 2020 مبلغ 7 مليار دولار... ففي عوامل بتلعب في المعادلة مش بس تصدير واستيراد؛ فكر في السعر العالمي للمدخلات

⬅️ بالمناسبة سنة 2011 صدرنا ب 40 مليار والدولار كان ب 6 جنية وفي 2019 بقى 16 والصادرات بقت 38 مليار

⬅️⬅️ للأسف الأرقام في oec.world مفيهاش سنة 2021

*️⃣ عارفين المشكلة الأكبر فين ان أكثر من نصف أو قول 60% من استهلاك الدولار في مصر بتقوم به الحكومة... سداد ديون أو استيراد مشتقات بترولية أو قمح وزيوت أو حاجات مستورده زي القطارات وووو... يعني 60 مليار دولار بتوع الحكومة.. فلما يزيد الدولار من 15.5 ل 23.5 بتاعة الإشاعة معناها في بتاع 450 مليار جنية مصاريف زيادة عالحكومة... هتجيبها منين؟ هما مصدرين... الأول قروض جديدة والثاني ضرائب جديدة...

بس يا سيدي وخلصت الحكاية

معنديش مشكلة في موضوع تخفيض مصر لإنتاج الكهرباء من أجل توفير غاز وتصديره لأوروبا من منطلق اللي يعوزه الأسياد يحرم عالعبيد

*️⃣ لكن لو الموضوع وصل ل قطع كهرباء منظم لتقليل الاستهلاك؛ فلازم يكون قطع الكهرباء متناسب مع الاستهلاك... يعني قطع كهرباء عن فيلا لمدة ساعة هيوفر كهرباء زي قطع الكهرباء نص يوم عن عمارة في منطقة شعبية وهكذا.

*️⃣ وعلي سبيل المثال فطبقاً لشركة الكهرباء فواتير كهرباء الساحل الشمالي الشهر الماضي يوليو لقطاع صغار المشتركين كانت 35 مليون جنية بينما فواتير كبار المشتركين كانت 52 مليون جنية... مع إن عددياً مفروض الصغيرين أكثر من الكبار. لكن الكبار 60% من الاستهلاك

*️⃣ وبالانتقال لقطاع كهرباء مرسي مطروح فقيمة فواتير الكهرباء للصغار 25 مليون والكبار 38 مليون جنية يعني الكبار برضك 60% من الاستهلاك

*️⃣ ضيف بقي مع ما سبق نقطة... الكلام عن الفواتير؛ يعني عدادات قديمة؛ أي حد ركب عداد آخر 5 سنين جاله ب كارت... يعني الكلام اللي فوق مفيهوش كل الساحل الشرير... دا الكلام عن الغلابة في بداية الساحل والجماعة بتوع مراقيا ومارينا 1 و 2 و 3 وكده... لكن العلمين ومراسي وسيدي عبد الرحمن وهاسيندا ووو كل دول مفيهمش عدادات قديمة دول.

*️⃣ فلو دخلت استهلاكهم تلاقي ان كبار المشتركين بيستهلكوا 75% من الطاقة... يبقى مفروض يطولهم 75% من أي انقطاع يحصل.

*️⃣ وللتذكير فالجهاز المركزي كان اعلن في احصاء 2017/2018 ان فقط 12.2% من المصريين عندهم تكييف دا كمتوسط عام والنسبة بالحضر 21% وبالريف 4% ... فبالمنطق دا الريف ميشوفش انقطاع كهرباء.

⬅️ ملحوظة : أنا شخص مستفيد بعدم المساواه بمصر؛ يعني ساكن بالقاهرة الجديدة وعندي تكييف؛ فطبعاً الكوسة بتخليهم يقطعوا عن المطرية وعين شمس وشبرا... ويسيبونا 😁 بس أنا بتكلم في البوست عن اللي مفروض يكون... لكن تحيا الكوسة 😂💪💪

⬅️ توضيح للشفافية؛ الحكومة مقالتش هتقطع عن حد؛ قالت هنقفل كهرباء الشوارع والمولات بالليل والمباني الحكومية وهنقلل الاستهلاك... لكن أنا مصري من زمان ف عارف ايه اللي هيحصل 😂

في توضيح سريع كده عاوز أوضحها عشان البوستات الأخيرة فيها لبس

أنا مقولتش الدولار هيجيب 23/25 والجو دا؛ ولا حتى بقول الكهرباء هتقطع عن البيوت

اللي متابعني من زمان عارف إني بحب فكرة بوستات تعالوا نتخيل؛ يعني بيقولوا الدولار هيبقي ب 23؛ قشطة تعالوا نتخيل ايه هيحصل... الحكومة هتخفف احمال؛ تعالوا نتخيل دا مفروض يتطبق ازاي. عاوزين الحكومة تروح تحارب الغلاء وتعمل تسعيره؟ طيب تعالوا نتخيل دا ممكن يتم فعلاً

فدا توضيح عشان لما بتخيل حاجة واناقش توابعها؛ الناس بتتعامل ان دا هيتم خلاص ودا قرار صدر وووو...

نفسي أعرف مين اللي أقنع المصريين بمفهوم إن الجنية جنية في بلده والدولار دولار في بلده... يعني لو حاجة ب 500 دولار فنقول دي كإنها 500 جنية بالظبط.

*️⃣ هو حرفياً الناس كلها مقتنعه بالمفهوم دا... يعني كده اللي بيقبض 30 ألف دينار كويتي (100 ألف دولار أمريكي شهري) عايش في مستوى معيشي زي اللي بيقبض 30 ألف جنية مصري 1555 دولار؟؟؟

*️⃣ غالباً والله أعلم إنه كان عاوز يقول متعملش تحويل... يعني محدش يقولك مرتبي في الإمارات 20 ألف درهم فتقول والدرهم ب 5 جنية يعني 100 ألف جنية مصري وبعدين تبص على مصر تشوف ال 100 ألف جنية دي الناس عايشة فيها وتتخيل إن اللي بيقبض 20 ألف درهم عايش كده.

*️⃣ ولما فشل في توصيل مفهوم فارق القوة الشرائية للعمله وإن مثلاً لما تأجر شقة ب 5000 جنية لما تروح للسعودية مش هتروح تأجر شقة ب 1000 ريال المكافئ لل 5 الاف جنية... فيأس وقاله بص يا عم خنقتني الجنية جنيه في بلده وخلاص

*️⃣ فتلاقي حد مثلاً في أمريكا ولا ألمانيا يقولك انتا عارف طبق الأكل دا اللي بدفع فيه دلوقتي ما يوازي 10 دولار دا عندنا بدفع فيه 30 دولار... فتقوله طيب شايف عربيتك اللي انتا دافع فيهم 40 ألف دولار؛ أهي في مصر بندفع فيها ما يوازي 80 ألف دولار... وموبايلك اللي انتا شاريه ب 1000 دولار أنا شاريه في مصر بمبلغ يوازي 1500 دولار... فكده نحسبها إزاي بقى؟؟؟ يعني هتلاقي كل دولة فيها بعض السلع أرخص وبعضها أغلى... ايه الحل؟؟؟

*️⃣ الشيء الكويس إن انتا مش أول شخص في البشرية يفكر في الموضوع دا؛ فالجماعة بتوع الاقتصاد بيحاولوا يعملوا لك حاجات تحولك القيمة الشرائية للعملة... طبعاً مش هتلاقي حسابات دقيقة قوي وإجماع بين طريقة الحساب وهتختلف طبعاً مدينة عن مدينة ثانية وكده لكن ممكن تكون فكرة عامة. فشوف الموقع دا

https://www.chrislross.com/PPPConverter/

*️⃣ خش يا ريس عاللينك دا واختار دولتك وحط مرتبك واختار دولة ثانية وهيقولك المرتب المستهدف عشان تعيش نفس مستوى المعيشة... فمثلاً لو بتقبض 10 الاف جنية مصري فالمرتب المكافئ لو عايش في السعودية هو 3900 ريال ولو الإمارات 4370 درهم (رغم إن الريال والدرهم سعرهم زي بعض) وأمريكا مبلغ 2190 دولار وألمانيا 1623 يورو

*️⃣ يعني في مثالنا فوق واحد بيقبض 30 ألف دينار كويتي دا بفرض إن المبلغ الخزعبلي دا حد بيوصله؛ فنظريا المبلغ دا يساوي 1 مليون و 873 ألف جنية... لكنه بتحويل مستوى المعيشة هيبقى زي اللي دخله في مصر 853 ألف جنية... ومش عاوز أصدمك وأقولك إن في ناس في مصر ومش في القطاع الخاص لكن في حاجات شبه حكومية بتعدي المبلغ دا... اييييه تعالوا نحسدهم 😂😂😂

معلش 3️⃣ توضيحات عالسريع

1️⃣ مش أنا اللي عامل الموقع؛ فلو معترض متقوليش أنا.

2️⃣ الحياة بتختلف من مدينة للثانية في الدول لكن دي فكرة عامة.

3️⃣ الموقع معتمد على أرقام البنك الدولي فلو في دولة أرقامها لم تحدث فممكن يخلي الرقم مش دقيق.

4️⃣ تاني مش أنا اللي عامل الموقع فممكن تشوف اللي عملوه وتراسلهم.

من الحاجات اللي قاعد مستني اشوفها ازاي حسن عبد الله القائم بمهام محافظ المركزي لغاية مجلس الشعب ما يجتمع ويخليه المحافظ (روتين ورق) هيعمل ايه في ازمة الدولار

*️⃣ مصر عندها 33 مليار احتياطي منهم 7 وشوية ذهب؛ يعني فعليا عندك 25 تقريبا مليار دولار.

*️⃣ الودائع الخليجية أصلاً سواء طويلة أو قصيرة قيمتها 28 مليار دولار... وللتوضيح الودائع غير القروض؛ الوديعة ممكن تتسحب او تتنتهي ولا تجدد...

*️⃣ المشكلة كمان إن في رقم ما ما بين 15 ل 20 مليار دولار مفروض الاحتياطي مينزلش عنهم ودا لأسباب استراتيجية سياسية وهي تغطية واردات مصر من الأساسيات لمدة 6 شهور فالمعتاد ان مصر بتشيل المبلغ دا علي جنب وهو بمثابة خط أحمر قومي (دا مش رسمي ولا قانون لكن ممكن تقولوا عرف معتاد)

*️⃣ المهم يعني لما تجنب الرقم الاستراتيجي والذهب؛ المبلغ اللي فاضل لا يكفي أصلاً لطلبات الاستيراد اللي waiting؛ يعني فعلياً فتحت الاستيراد هتقلع لمؤاخذة ملط... فلازم تفضل قافل كده لغاية ما تمضي مع الصندوق ومن وراه سلسلة قروض تانية توفر لك دولار فتفتح الاستيراد

*️⃣ المشكلة بقى فين؟ المشكلة هى ان القفلة الحالية كل ما تستمر؛ كل ما الأسعار تزيد وسلع تخلص والشركات تخسر؛ الشركات تخسر = طرد موظفين = ناس أكثر مش قادرة تشتري = ركود أكثر = خساير أكثر = شركات أكثر تخسر = ناس أكثر تتطرد من وظايفها = الخ الخ الخ

*️⃣ فانتا محتاج في أسرع وقت تخرج من الحلزونة دي لإنك لو دخلتها هتفضل تلف عليك وتدمرك... بس في مشكلة؛ في أي تفاوض بيحصل ما يمكن تسميته ب عض الأصابع... اللي أضعف هيقول أاااي ويخسر... فلو انتا روحت للصندوق وتقوله بسرعة جداً... خلاص يا حلو انتا كده مزنوق وفي موقف ضعيف... ويبقى علي رأي رياض القصبجي في دوره الاسطوري الشاويش عطية (انتا وقعت ولا الهوى اللي رماك).

*️⃣ فالحل غالباً هيكون في المسكنات؛ المسكنات الخليجية؛ بيع شركات وأصول حكومية ليهم؛ فتجيب دولار يعرف يمشيك في فترة التفاوض مع الصندوق... بحيث تمشي بنظام ( لالا احنا مش مزنوقين قوي ؛ إحنا زي الفل 😭😭)...

*️⃣ طبعاً الناس عاوزة نقطة أيوا احنا وصلنا هنا ليه؛ بص هو وصلت هنا ليه مهمة عشان متوصلش هنا تاني... بس معلش حالياً الأهم انتا رايح فين... مينفعش تفضل سايق وانتا باصص لورا؛ الطبيعي ترمي عين في المراية تشوف ورا... لكن لازم تبص ماشي رايح فين.

وأخيراً يا تري احنا في تكرار ازمة 91 الاقتصادية ولا تكرار 2016؟ ادينا هنشوف

من البوستات اللي كاتبها وعمال أقول لنفسي بلاش تنشرها عشان الناس اللي بتفهم غلط وتفتكرك مبسوط ووو في حين انتا بتشرح ايه بيحصل... لكن خلاص قررت انشره واللي عاوز يفهم غلط براحته بقي ومش هقعد ابرر لحد

دا البوست
------

ليه دايماً بنسمع إن مصر عاوزة من صندوق النقد "شهادة الثقة" وليس الفلوس... الجملة السابقة حقيقية وفعلاً القرض اللي منعرفش قيمته أصلاً من صندوق النقد مش هيكون رقم ضخم؛ الودائع الخليجية اللي جت مؤخراً أكبر منه؛ فمن من يأتي السؤال.

مصر رايحة صندوق النقد لييييه ويعني ايه الشهادة الدولية؟

*️⃣ في الأول لازم تعرف إن عادة أي دولة تقدر تستلف بس النقطة يا ترى بكام؟ يعني في دول زي اليابان وألمانيا كانوا بيستلفوا ب 0% وساعات سالب كمان.. وفي دول تستلف ب 1% ودول ب 2% ودول ب 5% ودول ب 10% ودول ب 20% ودول ب 30%.

*️⃣ فإنتا بقى هتستلف من أبو كام؟ اللي بيحدد عدة عوامل وأهمها والأساسي تصنيفك الإئتماني... في مؤسسات دورها تقعد تقول إنتا A إنتا B إنتا C ( للتوضيح في درجات يعني في AAA أو A+ وكده لكن للتبسيط في كل البوست هنتخيل إنهم A أو B أو C مفيش تفاصيل للتسهيل مش أكثر.

*️⃣ المؤسسات بتديك تقييم ورؤية مستقبلية... يعني بتقولك انتا B وشايفين أداء اقتصادك زي الفل فمتوقعين مستقبلاً تحسن يعني ممكن مستقبلاً تبقى A ( بكرر مفروض B في S&P لما يتحسن يبقى B+ ثم BB- ثم BB ثم BB+ ثم BBB- وووو لكن هنتخيل إن مفيش درجات بينهم)

*️⃣ المؤسسات بقى الدولية دي بتقيم على أساس إيه؟ على أساس معايير كثيرة زي تدفقات الدولار ليك والمطلوب منك... وخد بالك المهم داخلك دولار كام ومطلوب كام... مش جو انتا دولة بتصدر برافو وأنتا دولة مستورده وحشة... عادي عندك فرنسا دولة بتستورد أكثر ما بتصدر؛ بس لما بتبص للتدفقات المالية بتلاقي عندها سياحة وتصدير خدمات وعندها طن شركات بره بتبعت لها فلوس بما فيها عندنا في مصر مثلاً سوبر ماركت كارفور وجيان ودانون وبل ولاكتيل ووو

*️⃣ فمثلاً لما تبص على مؤسسة Moody's جت في 2018 قالت مصر تصنيفها B3 ونظرتنا المستقبلية إيجابية... وبالفعل في 2019 جت حسنت تقييم مصر ل B2 ونظرة مستقبلية مستقره لا إيجابي ولا سلبي... ثم جت الصدمة في 26 مايو 2022 لما قالت انتا لسه دلوقتي B2 لكن مستقبلاً سلبي.

*️⃣ ف سلبي دي يعني وضعك وتقييمك هيقل وآخر مرة مصر شافت من ال 3 الكبار نظرة مستقبلية سلبية كانت في 2015...

*️⃣ طيب كده يبقى المستثمرين لما يطلبوا من مصر فائدة هيعملوا حسابهم على مخاطر أكبر يبقى فائدة أكبر... فمصر تعمل اييييه بقى؟

*️⃣ تروح لصندوق النقد؛ مودز أو غيرهم لما يقولوا سلبي هما شايفين في قلق ومش مطمئنين للمستقبل؛ في خلل في المدفوعات أو خلل في حجم الدين للناتج ووو... المهم شايفين الوضع مش ظريف... فمصر تروح رايحة لصندوق النقد تقولهم تعالوا شوفوا اقتصادنا كده إزاي نخليه حلو.

*️⃣ فالصندوق يحط شوية طلبات كده؛ انتا توافق عليها وتمضي والصندوق يديك المبلغ المتفق عليه... هنا بقى الموضوع مش مبلغ... هنا انتا بتقول ل مودز "يا شباب صندوق النقد راجع اقتصادي وتم الاتفاق على خطة تخليه كويس" فهنا المؤسسات الدولية تتطمن وتقلل شوية الفوائد.

*️⃣ بس هي دي الفكرة وهى تقلل الفائدة وتدي المستثمرين ثقة أكبر فيك؛ وخد بالك مش كل المستثمرين بخشوا كل الأسواق.. في نوع يقولك أنا مش عاوز مخاطر أنا هسلف بس بتوع A وفي ناس تقولك ممكن اخش لبتوع B كمان بفايدة عالية؛ وفي نوع بيسلف الC أصلاً... فانتا هدفك تزود عدد اللي بيسلفوا وبالتالي فرصة حصولك على قروض ارخص بتزيد

*️⃣ دا كان بوست سريع للتوضيح لإن الناس فاكره إن هييجي لنا مبلغ ضخم من الصندوق يحل الأزمة؛ لا اللي هييجي هو ضوء أخضر للمزيد من المقرضين

ملحوظة على جنب... وكالات التصنيف الإئتماني دي حوار كبير كده يستحق بوستات؛ وممكن تشوفوا فيلم The Big Short وانتم تفهموا بيلعبوا إزاي بالتصنيفات... تخيل انتا مؤسسة دورها تعملك تقييم... طيب مين اللي دافع لها؟ إما انتا فكده انتا تدفع فلوس لحد يعملك تقييم فيا ترى هيقول إنك زي الزفت؟ طيب لو العكس اللي هيسلفك هو اللي عاوز التقييم؛ هل هيقولوا دول زي الفل يلا اديهم بأقل فائدة؟ يلا قولت النقطة دي لمحبي نظريات المؤامرة

طب سيبكم من الاقتصاد والدولار والجنية وصندوق النقد وووو؛ عارفين ايه الضرر الأكبر فعلاً اللي هيحصل وبيحصل ومحدش خالص بيعلق عليه. لا هتسمع مسئولين ولا حتي الفيسبوكيين زي حالاتي.

صحة الجيل الجديد

*️⃣ مع وضع اقتصادي اسوء؛  الناس هتعمل ايه؟  هتقلل من جودة الأكل اللي بتاكله؛  والناس هتروح لأرخص نوع غذاء يشبعهم ويشبع الأطفال.

*️⃣ الكربوهيدرات هي الخيار المثالي للفقراء؛  عيش ارز مكرونة...  بس حتى دي بقت غالية؛  يبقي نقلل جودتها...  يعني مثلاً اللي بيشتري مكرونة سيمولينا هيغير ويشتريها دقيق عادي؛  واللي اصلا بيشتري عادي هيشتري سايب؛  واللي بيشتري سايب هيشوف نوع ارخص واقل جودة..  طبعاً انتا كده بتضحي ب إيه؟  بالجودة بتاعة الأكل؛  بتزود الكربوهيدرات وتقلل البروتين والغذاء الفعلي.

*️⃣ نفس الحكاية في الأجبان؛  كيلو الجبن البيضاء بيحتاج عادة 4 لتر لبن؛  والجبن الرومي 8 لتر لبن...  طبعاً لك ان تتخيل الجبن اللي العلبة نص كيلو ب 10 جنية و 12 جنية دي محتواها ايه....  زيوت نباتيه...  مفيش فعلياً لبن...  الهدف الأساسي من اللبن ومشتقاته هو انك تاخد كالسيوم وغيره...  فعليا انتا بتاكل زيوت بنكهة اللبن...  فاكر انك بتأكل عيالك جبنه عشان صحية....

*️⃣ المشكلة إن الوضع في مصر صعب؛  من قبل الأزمة الحالية والتضخم الحالي وتقارير الدولة نفسها بتقول ان نسب التقزم في الأطفال وسوء التغذية تجاوزت 30%...  ودلوقتي مع الفقر الاضافي الأرقام تزيد؛  فتوقع ان النسب تبقي 50% من الجيل القادم.

*️⃣ هيبقي جيل مريض ضعيف؛  سوء التغذية والأنيميا هتخليه غير قادر أصلاً عالتركيز والتفكير...  فحتى لو فرضنا إنك قدرت تصلح منظومة التعليم وتدي الطالب معلومات مفيدة؛  فأصلاً جهاز الاستقبال في مخ الطفل فاصل وخارج الخدمة.

*️⃣ آثار الصحة مش هتبان بين يوم وليلة؛  بتحتاج سنين؛  بس تأثيرها بيكون قاسي ومدمر...  فأتمني اشوف وزارة الصحة عاملة حملة دعائية بتشرح للناس يعني ايه أكل صحي...  الناس أصلاً متعرفش ايه مفيد وايه ضار...  فممكن يبقى في شيء مفيد ومش غالي لكن ميعرفوش...  عالأقل نعرفهم ونسيبهم يحاولوا يحموا نفسهم.

*️⃣ عارف إن بوستاتي كئيبة على رأي كل أصحابي؛  بس أنا بحب فكرة اننا نشوف ايه هيحصل فينا بكره وبعده؛  بعد 10 سنين هيكون في ايه...

*️⃣ لكن عاوزين الدنيا ربيع؛  ماشي الدنيا ربيع والجو بديع؛  وعلى فكرة مش بكذب؛  حد شاف شهر أغسطس مفيهوش حرارة فوق ال 40 بالقاهرة؟؟؟  فالجو السنة دي حار ورطوبة بس مش الحر الخزعبلي...  يلا خبر جميل أهو... 

طبعاً هلاقي خبر عاجل من هيئة الأرصاد وإن في موجة 50 درجة جايه 😂😂

بسرعة لإن كذا شخص سألني إيه موضوع كروت Telda دا.

*️⃣ المنظومة البنكية في مصر تعتبر عتيقة وبدائية؛ عشان كده لما بدأ عصر التحول الرقمي والشركات المالية التقنية اللي بيرمز لها ب FinTech كان في فرصة ضخمة في البلد لإننا مفيش خالص... مصر بنكياً بالنسبة للعالم زي عصر السيوف مقارنة بعصر الطائرات كده.

*️⃣ المهم في مجموعة شباب في أبريل 2021 عملوا شركة اسمها تيلدا Telda وفي 1 مايو 2021 كنت كتبت بوست قولت للناس تنزله عشان أطلع في قايمة الانتظار 😂.

*️⃣ المهم بقى في مايو وبعد نجاح الحملة الدعائية بتاعة تيلدا عالانترنت؛ قدرت تاخد تمويل من مستثمرين ب 5 مليون دولار... وهوبا اسبوعين وشركة ماستر كارد العالمية دخلت أعلنت شراكة معاهم هي كمان... فلوس كثيييير يا عم كده دا الاسبونسر بتاعك ماستر كارد نفسهم 😂.

⬅️ طيب ايه بقي مين تيلدا دا يا عم الرغاي؛ مالي بقصة حياته يعني... أنا يفرق معايا ايه وليه اختفي من مايو 2021 لغاية اغسطس 2022؟

*️⃣ بص يا سيدي؛ من الأساسيات بره سهولة تحويل الفلوس؛ في طن منظومات دفع وتحويل؛ عاوز تبعت لحد فلوس عندك البنوك؛ مش عاجبك في Apple Pay واندرويد باي ووو؛ مش عاوزهم عندك PayPal و Stripe و Square وغيرهم... وكل واحد فيه مزايا.

*️⃣ في مصر لما تحب تبعد شوية عن العالم البنكي تعمل ايه؟ تروح فودافون كاش مثلاً؛ حلو عاوز اشتري من المحل؟ لا والله مفيش... طيب بص عاوز حاجة بدون فتح حساب بنكي يبقي عليك وعلى كروت ميزة؛ بتطلع وانتا واقف اهو ب 25 جنية اظن... حلو كروت ميزة وزي الفل.... بس في مشكلة برضك؛ لو خرجت بره مصر اييييه بقي؟ طيب خلاص هات ال Pre Paid التقليدي... حلو اهو وشغال بره مصر... طيب زي الفل عاوز بقي اعرف رصيدي كام اعمل ايه؟ من موبايلي... طيب واحد صاحبي يبعت لي عالكارت من كارته؟

*️⃣ بس يا سيدي والنقط دي هي فكرة تيلدا وكل الخدمات اللي هتشوفها في الشهور القادمة... كارت يطلع فوراً أونلاين ومفروض يوصلك لغاية البيت (عشان الاطلاق عملوها من فروع بنك القاهرة ويا رب يعقلوا وميطولوش) والكارت يطلع مجاناً... رسوم التحويل لأي حساب تيلدا مجاني... والكارت رسوم التجديد مجاناً برضك... الكارت ماستر كارد يعني شغال أونلاين + شغال بره مصر حتى السحب النقدي جوا وبره مصر شغال... تقدر بقى من الابلكيشن بتاعه توقفه لو وقع منك؛ لا محتاج تتصل بالبنك الحقوني وقع مني؛ ويكون بنكك البنك الأهلي كده وتلاقي خطوطه واقعه ويردوا عليك بعد ما تتسرق 😂😂.

*️⃣ الابلكيشن بتاع تيلدا هتقدر توقف الكارت؛ تطلب بدل فاقد؛ تشوف رصيدك وتبعت فلوس لحد وتطلب فلوس من حد. وتقدر توصل لرقم حسابك اللي يقدر ييجي لك عليه تحويلات بنكية.

*️⃣ هل كارت تيلدا هينجح؟ الله أعلم بس دا يتوقف على ايييه؟ على انتشار تيلدا بقى... البرنامج انتشر ففي ناس كثير هتستخدمه فلما تحب تحول لاصحابك هتلاقيهم في تيلدا... لو منتشرش فخلاص انسي مات.... ياما خدمات جميلة بس تموت بسبب قلة المستخدمين... ساعة ما بدأت استخدم تليجرام في 2014 كنت حاسس بصحراء جرداء... مع الوقت بقى الناس عليه... الناس بتروح واتس آب ليه؛ عشان الناس كلها عليه... نفس الفكرة هنا.

*️⃣ الخدمات زي Telda ثم قريب Nexta وغيرهم؛ للي ميعرفش نكستا فراجع معايا قولنا فوق تيلدا مدعوم من مين؟ ماستر كارد؛ بس يا سيدي فشركة فيزا تشوف حد وتدعمه بقى... هيبقى تيلدا نسخة فيزا 😁.

*️⃣ المهم يا سيدي تيلدا من مايو 2021 قاعد منتظر موافقة البنك المركزي؛ وزي ما قولنا إحنا بنكيا من العصور الوسطى؛ ففكرة إن شركة خاصة مش بنك تعمل كروت وتحويلات وفيزا وماستر كارد... لالا مش فاهمين اشرح كده تاني؛ اشرح ثالث... طيب هو؛ أصل بص... يعني عشان؛ الخ الخ... فتخيل انتا من مايو 2021 وتيلدا مدعوم من ماستر كارد العالمية ورغم كده على ما أخدوا الموافقة دا كانت في يوليو 2022؛ عادي يعني هي زيطة هي كل من هب ودب يخش السوق المصري. وبالمناسبة نكستا أخد موافقة "مبدأيه" من مارس 2022 ولسه النهائية.

*️⃣ المهم يا سيدي هما شبه بنوك الكترونية؛ عارف أنا اللي مش متابع الكوكب بره يحس إننا بنقول كلام خيالي؛ في حاجة اسمها بنوك الكترونية بتصدر كروت فيزا ديبيت وكريديت وتحويلات محلية ودولية وحتي قروض وتمويلات؛ وملهاش فروع عالأرض... اه مفيش فرع بنك تروحه كله الكتروني....

*️⃣ لكن تيلدا شبه بنك؛ يعني مفيش حسابات أكيد؛ مفيش عملات؛ مفيش ودائع وشهادات؛ الحد الأقصى بعد تفعيل الحساب هو رصيد 300 ألف؛ اخرك تصرف 100 الف شهري و 30 الف يومي... يعني هو نص بنك او شبه بنك لكن مش بنك حقيقي لإن كثير قالوا البنك الالكتروني الافتراضي الأول... ماشي هو بالنسبة لنا دا كده بنك بس مش بالنسبة للعالم... أصلاً هو مجبر على وجود بنك (بنك القاهرة).

لينك البرنامج للي عاوز ينزله؛ وكفاية تفتكر انه ببلاش؛ ببلاش الكارت والحساب والتحويل من والي وتجديد الكارت ببلاش.. فمتجربوش ليه ؛ أنا بحب أي حاجه ببلاش 😂😂

https://telda.page.link/Xb96

أنا لما بكتب بوست خاص بأي شيء يعني سواء بوست الأمس بخصوص Telda أو بوست انستا باي أو أي شيء... مش بيكون في جهة دافعة لي... أه دي تعتبر دعاية مجانيه يعني Telda جالهم مئات التحميلات مباشرة مني وفعلياً هيبقى آلاف بحساب الناس اللي اشتركت وقالت لغيرها.. وتطبيق InstaPay لما كتبت البوست عنه ففي أكثر من 4500 كليك حصل عاللينكات بتاعة التحميل يعني فعلياً عشرات الآلاف التحميلات...

المهم محدش دافع لي شيء...

*️⃣ فكل مرة ألاقي اللي يخش يقولي ليه بتتكلم عن دا؟ دعاية ليهم؟ حاطط ليه لينك ال Referral بتاعك؟ على فكرة في برنامج تاني أحسن؟ على فكرة كذا ووو.

*️⃣ فمن الآخر بحس إني أنا اللي عامل الأبلكيشن أو حد دافع لي عشان أعمله دعاية؟ وأنا مالي يا عم بالبرنامج؟ أنا جربت شيء عجبني قولت للناس عليه... ومحصلش إني أخدت مقابل لا قبل ولا بعد... إلا يعني في 2019 لما كتبت عن كارفور سيتي سنتر ألماظا ومنظومة التسوق والدفع Scan&Go والبوست وقتها لف مصر كلها وعمل عشرات الآلاف من المشاركات والتعليقات لدرجة إن كارفور كلموني وقابل الخواجة الفرنسي مدير الفرع... ووقتها إداني تورتايه هدية... يعني مأخدتش فلوس ولا كوبون شراء حتى 🤣🤣🤣🤣...

*️⃣ البوستات دي عادة برضك تلاقي اللي يدخل لك بطريقة المفتش كورومبو ويقولك اشمعنى دا؟ في برنامج ثاني أفضل؛ أيوا يا سيدي في أفضل بس معجبنيش... أنا بكتب اللي يعجبني... ولا إنتا داخل تعلي عليا زي الجماعة بتوع إني أقول أي شيء يقولك عندنا في ( السعودية / الإمارات / أوروبا / أمريكا ) الحاجة دي من زمااااان قوي.

*️⃣ لدرجة إني إمبارح قولت أعمل حسابي وأنا بكتب عن Telda وأقول معلش يا شباب المنظومة البنكية في مصر بدائية فاللي عايشين بره ميستغربوش والعالم كله فيه كده واحنا مفيش... برضك جالي بتوع ما موجود في PayPal و Wise و STC و بايونير وووووو... أيوا يعني ما أنا قايل... هو لازم تعلوا عليا؟

*️⃣ نظام على فكرة بطني بتوجعني... وانا بطني بتوجعني ورجلي الشمال مقطوعة ... طب أنا سناني مسوسة.... وأنا اهتم معنديش سنان أصلاً....

*️⃣ ما أنا متنيل عارف اللي بيحصل في الكوكب بره؛ هو أنا بكتب للي عايشين في إيطاليا؟ أنا بكلم ناس محبوسة معايا في الحفرة... مش دائماً تقولوا أنا نازل مصر وأنا مسافر بره... احنا هنا في حفرة... فعارف يا جدعان اللي عندكم... وعارف إن ماكينات البيبسي بتدفع فيها بالموبايل وعارف إن بنك Chase في أمريكا من 2018 وهو بيخليك تقدر تدخل حسابك في ماكينة ATM باستخدام أبل باي بدون الكارت ما يكون معاك... وووو

فشوية بس عشان أنا مريض ضغط على فكرة...

*️⃣ وعلى فكرة أنا بحط لينك الإحالة بتاعي عشان بس أشوف مدى قوة تفاعل الناس معايا وكده... مجرد فشخرة قصاد نفسي تمام... ولو حد دفع لي فلوس هقولكم....

اشوفكم بعدين؛ سلام

بمناسبة إن أوبك أعلنت خفض الإنتاج وكده؛ البترول صعد شوية النهاردة... للي مش فاكر فالموازنة محسوبة علي سعر البرميل ب 80 دولار... هتقولي طيب لما يزيد عند 80 يحصل ايه؟ هقولك عجز الموازنة هيزيد 😁؛ شوفت بسيطة إزاي.

*️⃣ طبقاً لموازنة مصر العام المالي الحالي 22/23 فكل 1 دولار زيادة في سعر البرميل يعني زيادة 1 مليار جنية عجز الموازنة.. طبعاً المقصود زيادة في المتوسط السنوي... يعني ممكن نقول كده بتقريب الأرقام للتبسيط؛ كل يوم تشوف فيه بترول فوق 80 لخام برنت؛ شوفوه فوق ال 80 بكام واضربه في 2.75 هيطلع لك رقم دا زيادة عجز الموازنة النهاردة.

*️⃣ يعني مثلا دلوقتي برنت ب 96 يعني زايد 16 فوق ال 80؛ يبقي 16*2.75 = 44 مليون جنية النهاردة زيادة في العجز... وطبعاً دا كلام تقديري للتبسيط لان اكيد مش لازم انتا تشتري كل يوم؛ يعني النهاردة السعر 96 فممكن تكون انتا شاري كمية تكفيك شهر ب 90 وممكن تكون ب 100 الله اعلم... بس الخلاصة نمشي بكلام الموازنة اللي مذكور فيه ان زيادة 1 دولار للبرميل يعني زيادة العجز 1 مليار جنية.

*️⃣ طيب يعني كلامك لو البترول بقي 80 يبقي خلاص زي الفل؛ اه يا صديقي... طيب لو بقي 75 كده هنكسب؟ لا 😂؛ كده خسايرك هتقل.

*️⃣ بص يا سيدي؛ الموازنة بتكون طرفين؛ ايرادات ومصروفات... تعالوا نبص عالموازنة الحالية كده طرف الإيرادات هتلاقيه كالتالي:
الضرائب تساوي 1169 مليار جنية
كل شيء آخر 348 مليار جنية
إجمالي الإيرادات 1517 مليار جنية

*️⃣ قبل ما تقولي يا سلام فلوس كثير وايرادات ضرايب وبتروح فين؛ تعالى أصدمك وأقولك المصروفات كده

بند خدمة الدين (أصل وفوائد) يساوي 1656 مليار جنية يعني أعلى من كل إيرادك بالضرائب وهم عبارة عن 965 أصل ديون و690 فوائد ديون
بند الرواتب 400 مليار جنية
بند الدعم 356 مليار جنية
باقي البنود 625 مليار جنية
كده يبقى إجمالي المصروفات + سداد القروض = 3066 مليار جنية ( في 30 مليار حيازة أصول)

*️⃣ يبقى كده نراجع كل دخل مصر 1517 ومصروفاتها 3066 يعني في عجز كام؟ بالظبط 1549 مليار.. بص هما فعلياً حسب المذكور في صفحة 136 بالموازنة مبلغ 1523 مليار جنية (عشان في كسور ورفايع كده بشيلها لتسهيل البوست).

*️⃣ يعني إنتا بسم الله يوم 1 يوليو بادئ العام المالي وأنتا عندك عجز 1523 مليار وحاطط خطة تستلفهم... طيب الحسابات فوق دي محسوبة إن البترول ب 80 دولار... فلما البترول يكون فوق 80 فالعجز عندك يزيد...

*️⃣ يعني دلوقتي صافي العجز ايه؟ هسدد 965 مليار واستلف 1523 مليار يعني الصافي الخطة هى إن ديون مصر تزيد السنة دي 558 مليار جنية بس.

*️⃣ نرجع للبترول ومش عارف ايه اللي دخلني في الحوار دا وأنا كنت ناوي أكتب بس إن ميصحش كده يا أوبك؛ ما صدقنا البترول بينزل وقرب من ال 80 المستهدفه تروحوا مطلعين قرار يرفع السعر؛ أوغاااااد...

*️⃣ شايفك ياللي هتقولي يعني فرقت يعني الكام دولار زيادة بالبرميل اللي بيعملوا عجز بالملايين يومياً؛ دا البوست كله مليارات وانتا جاي تقولي 44 مليون جنية يومي... صح عندك حق... بس اللي انتا متعرفوش إن العجز بتاع البترول إنتا بتسدده بالدولار.. اه كنت بقولك المكافئ جنية بس فعلياً السداد دولاري...

*️⃣ ربنا يسامحكم يا أوبك +

*️⃣ ملحوظة أخيرة عشان بتحصل تعليقات معينة في كل بوست بترول؛ في البترول والبنزين إنتا استهلاكك أكبر من إنتاجك؛ وكمان إنتا بتستورد حاجات مكتملة (أظن هنبطل قريب وهنستورد خام).... وعارف إنتاجك المحلي بقى؛ مش بتاعك لوحدك؛ في جزء مفروض يروح لشركات البترول نظير اللي صرفوه في بناء الآبار؛ وجزء تاني يروح برضك لشركات البترول نظير حصتهم في الإنتاج... وفي جزء بتاعنا...

*️⃣ اه إحنا بنقول للشريك الأجنبي معلش هناخد حصتك عشان مزنوقين فيها؛ فانتا هتشتريها منه بأسعار مفروض العالمية؛ خاصة إن الشريك الأجنبي بيقبض عالنوته حيث يتم تطبيق القاعدة المصرية الشهيرة ( ليك وهتاخد وعليا وهديك ).

*️⃣ كمان مرة ربنا يسامحك يا أوبك بلس روسيا.

تخيل انتا كده شخص أمريكي يقرر ينزل مصر فسحة؛ سائح بقي أو حتي سفير أمريكي جديد ولا وزير خارجيتها؛ جاي ينزل مصر نقوله بص يا كابتشن الاي فون بتاعك دا مش هيشتغل عندنا... ومحتاج تشتري اي فون جديد... اصل تليفونك الاي فون 14 دا شغال eSIM واحنا في مصر لسه شغالين حصري بالشريحة اللي بتركب في الموبايلات.

*️⃣ اشرح له بقي الموضوع ببساطة؛ قوله انتا نازل مصر؛ ومصر مشهورة بإيه؟ الفراعنة... اهي مصر بقي تقنيا وبنكيا وضريبياً وووو لسه من عصر الفراعنة... فمستغرب ليه؟

*️⃣ هيقولك مستغرب عشان ال eSIM شغالة في ما يقارب 110 دولة؛ ايوا بس مين فيهم من عصر الفراعنة؟؟؟؟ هو عشان تقنية شغالة في بوركينا فاسو وكولومبيا والكاميرون وكامبوديا وكازخستان وحتي فلسطين المحاصرة والسنغال وسيريلانكا اللي افلست دي عندها التقنية وطاجكستان ووووو تبقي خلاص توصل لمصر... حضرتك احنا فراعنة؛ احنا وقفنا هناك ومش هنتحرك....

*️⃣ وبعدين مستغرب ليه؟ طب ما عشرات الدول عندهم 5G واحنا ال 4G بعافية أصلاً... عادي يعني... حتي من ال 50-60 دولة اللي عندهم 5G دول فراعنة زينا؟

ناس غريبة قوي قوي...

بكره بقي هحكي لكم ايه قصة أبل مع ال eSIM وايه حكاية البوستات اللي نزلتها امبارح عالفيسبوك وبقول ان اتحقق كلامي اللي قولته من سنين؛ وقت ما كتبت في 2018 ان خلال 5 سنين هنشوف اي فون بشريحة eSIM فقط.

2 تحديث وتوضيح

1️⃣ فلسطين المحاصرة مقصود بيها تقنياً؛ يعني بلد لو عاوزة تجيب برج تقوية لازم عدوها يوافق لها ويعدي من مطاراته وجماركه.

2️⃣ مش هيشتغل يعني اي حد بيروح دولة بيشتري شريحة عشان يرحم نفسه من فواتير التجوال؛ في مصر بقي مش هيكون الاوبشن متاح؛ يجيب تليفون تاني معاه عشان يعرف يجيب شريحة مصري ويوفر التجوال... ادفع ما انتا غني بقي ادفع

تعالوا أحكي لكم حدودته أبل مع شريحة الاتصال

*️⃣ بداية كده أبل للي ميعرفش فأبل عندهت عداء مع فتحات الجهاز؛ بيحلموا ب آي فون بدون أي ثقوب؛ دا هيدي الشركة حرية أكثر من التصميم الداخلي؛ وضيف عليهم صعوبة إصلاح أكثر فكده اللي يبوظ جهازه هيشتري جديد 😉😉😉.

*️⃣ فأبل لغت منفذ الصوت 3.5mm فاكرين وقتها طبعاً لما الكوكب سخر من أبل وبعدين كالعادة حصل ايييه 😁. ومن سنين أبل حاطه عينيها علي منفذ الشريحة... لكن عشان البوست يبقي مفيد للناس القديمة ومش مكرر؛ تعالوا أحكي اكم قصة أبل مع شريحة الاتصالات من 12 سنة فاتوا.

*️⃣ عام 2007 نزل أول آي فون؛ وأبل محاولتش وقتها تفتكس وكفاية مفاهيم السوفت وير والشاشة المالتي تاتش.... فحطت شريحة Mini SIM التقليدية؛ شريحة الموبايل الكبيرة.

*️⃣ في 2010 أبل كانت خلاص متمرسة وضمنت خلاص نجاح أجهزتها؛ فقررت تطلق جهاز جديد وهو الآي باد... ستيف جوبز قال الآي باد دا هيدعم 3G من شريحة جديدة وهي Micro SIM ؛ باختصار أبل بصت حوليها لقت في شريحة أصغر وهي المايكرو تم اعتمادها في 2003 لكن لسه مغمورة ومحدش مهتم بيها... خلاص قشطة الآي باد بيها والاي فون 4 نفس السنة بيها برضك... طبعاً تلقائي الشريحة بقت الشعبية وكل الشركات حولت أجهزتها ل مايكرو اسوة بأبل

*️⃣ في نفس السنة 2010 جت مؤسسة GSM ودي المسئولة عن معايير الشبكات... في كثير ميعرفوش ان التقنيات اللي بنستخدمها دي تعتبر مؤسسات وشركات... يعني في wifi alliance المسئول عن تطوير الواي فاي... و Bluetooth SIG اللي بتطور البلوتوث و USB-IF اللي بتطور ال USB وهكذا... تخيل تقول لحد انتا شغال فين يقولك شغال في ال USB وانتا فتقول وانا واي فاي 😂 ( ملحوظة الشركات دي بتكون تحالف لشركات التقنية سوى وليس شركة بالمفهوم المعتاد).

*️⃣ المهم مؤسسة GSM قالت لشركات الموبايلات تعالوا نفكر سوى في شكل شريحة موبايل مختلفة؛ نعملها سوفت وير بدل الشريحة العادية... الشركات طبعاً رحبت؛ لكن موتورولا قالت الفكرة دي ممتاز لكن لمجال الاتصال بين الألات والكومبيوترات مش للاستخدام التجاري... محدش يقول ايه موتورولا دي؛ الجيل الصغير يستهون بيها بس زمان دي كان ليها شنة ورنه؛ وكفاية تعرف إن موتورولا هي اللي اخترعت حاجة اسمها موبايل أصلا... تخيل لو كانت سجلت الاختراع دا حصري براءة اختراع محدش يصنع موبايلات غيرها (مجرد تخيل لان دا مستحيل).

*️⃣ المهم مين اعترض بقي ووقف ل موتورولا؟ أبل؛ أصرت أبل إنه مينفعش يتم اقرار إن التقنية دي تبقي حصري للاستخدامات الصناعية... وفي النهاية وبعد سنين تمت الموافقة علي اقتراح أبل وهو إنه يبقي في اصدارين؛ نسخة للاستخدام الصناعي ونسخدم للاستخدام التجاري وهي اللي دلوقتي بقت eSIM.

*️⃣ تسكت أبل علي كده؟ لاااا... تحالف GSM لاحقاً قال للشركات طيب عاوزين نعمل ال Nano SIM؛ يلا وروني مقترحاتكم... جالها طرف وهو موتورولا ونوكيا وبلاك بيري قدموا تصميم... دول تقريباً معظم موبايلات الزمن وقتها... وجت أبل قدمت تصميم تاني... وفي النهاية مؤسسة ETSI اختارت تصميم أبل لشريحة النانو... أيوا الشريحة اللي في موبايلك أي كان نوعه دي تصميم أبل في 2012.

*️⃣ في نفس السنة 2012 نزلت أبل الآي فون 5 بشريحة نانو... تزامن مع دا إن الاتحاد الأوروبي اعتمد معايير لفرع من شريحة eSIM أو للدقة يعتبر ابوه وهو eUICC لكن للعربيات تم تسميته eCall وال eCall دي منظومة للسيارات يهدف الاتحاد الأوروبي ان العربيات تقدر تبلغ عن الحوادث لما تحصل... المهم مش موضوعنا... اللي يهمنا في 2012 إن أبل سجلت أول براءة اختراع للتقنية دي في ديسمبر 2012... بدأت أبل تخطط عالمدي الطويل لشكل التقنية... وتضغط علي تحالف GSM أكثر.

*️⃣ هوبا في فبراير 2016 يتفاجئ العالم بساعة فيها eSIM؛ أول ساعة بالعالم فيها وهي سامسونج Gear S2... أيوا سامسونج مش أبل؛ الوقت دا سامسونج كانت ولا تزال عاوزة تسبق أبل؛ فإيه دا يا أبل مركزة مع معاييير eSIM خلاص هنسبقكم وننزل ساعة... الغريب ان الساعة اعلن عنها في فبراير 2016 بينما تم اعتماد أول معيار eSIM في مارس وفي نوفمبر 2016 تم اعتماد النسخة النهائية للمعايير... يعني سامسونج نزلت ساعة من باب اسبق العالم وأخد لقب الأول.

*️⃣ العالم يدخل 2017؛ الكل مستني الآي فون بشريحة eSIM؛ ايه دا يا أبل؛ حلو الآي فون X دا بس ليه مفيش eSIM؟ ثواني بس ايه دا ساعة أبل بشريحة eSIM؟ طب والاي فون؟ وهنا جوجل تقرر اطلاق بيكسل 2 بشريحة eSIM وتسبق أبل.

*️⃣ ليه أبل عملت كده رغم إنها كانت المتصدر الأول لل eSIM؟ ببساطة لإن ببساطة أبل مش بتدير الشركة بطريقة يلا نعمل شو؛ أيوا أبل بتعمل شو طبعاً لكن الإدارة بطريقة يلا نعمل فلوس... الآي فون أبل بتبيع ما يوازي قيمة 120 الي 150 مليار دولار سنوياً منه وساعات أكثر؛ حوالي 200 مليون آي فون سنوياً... مقابل جوجل اللي باعت في 2017 كلها 4 مليون بيكسل... شايفين الرقم 200 مليون مقابل 4 مليون...

*️⃣ الغلطة في أبل ب فورة؛ الآي فون يمثل 60% من دخل أبل... سامسونج باعت كام ساعة في 2017؟ عدد 3.1 مليون ساعة بكل الفئات؛ طيب أبل؟ باعت 17.7 مليون ساعة من ساعة واحدة بس بحجمين شاشة.

*️⃣ فأبل عشان كده استنت وصبرت لغاية ما ضمنت النجاح؛ وفي نهاية 2018 أطلقت الاي فون Xs واخواته بدعم eSIM... قبل اطلاق الاي فون وفي وجود ساعة سامسونج بقالها سنتين وجوجل بيكسل بقاله سنة ؛ كان في 10 دول بس فيهم eSIM وبعدين أبل أطلقت الاي فون فالرقم تضاعف سريعا؛ علي ما اذكر (بقول كده لاني بفتكر في 2019 كان ايه وليس من مصدر) بعد سنة ال 10 دول بقوا 40 ثم بقوا 60 ثم 80 ثم 110 دولة دلوقتي.

*️⃣ الآن الآي فون في أمريكا هينزل حصري eSIM ودي مجرد اشارة تحذير لباقي الكوكب؛ ممكن ببساطة تلاقيه نزل بعد كده عالمياً بدون شريحة... لإن الدول الداعمة هي أمريكا وكندا وكل اوروبا وكوريا واليابان وسنغافورة ووو... والدول الغير داعمة تلاقيها دول عالم ثالث فقيرة للغاية فمفيش تأثير علي مبيعات الشركة... وحتي لو التفكير بالمنطقة... عندك السعودية والإمارات والكويت وقطر وعمان والبحرين وتونس والأردن وفلسطين والمغرب... فكده تقول مين مش داعم؟ بعض الدول العربية زي سوريا والعراق ومصر والسودان وجزر القمر وكده (كنت كاتب الصومال وليبيا بس تم توضيح ان عندهم 😂) ... تفتكر أبل هتفكر فيهم وتقول لا بلاش احسن ميشتروش؟ دا الكاميرون وبوركينا فاسو فيهم eSIM 😁

*️⃣ طبعاً أبل لما هتنزل تليفونات كلياً eSIM هيحصل ايه من شركات الأندرويد كمان سنتين؟ خلاص بقى محفوظ.

*️⃣ حاجة علي جنب؛ في تقارير قالت من كذا سنة إن أبل عمالة تعمل تجارب لإلغاء منفذ الشحن؛ بس لسه النتيجة ضعيفة؛ يمكن عشان كده أطلقت MagSafe واتوقع تطور ملحوظ في تقنية MagSafe في 2023 لان مفضلش غيرك يا منفذ الشحن ويبقي تليفون مقفل.

لما قولت كارت تيلدا الناس قعدت تقولي زي كارت Yalla بتاع البريد وكارت البريد احسن

المهم في سفرية دبي قررت استخدم الكارتين لأول مرة

*️⃣ تيلدا : اللي انتا عاوزه يا باشا؛ شراء شغال ؛ سحب نقدي شغال... احنا خدامينك

*️⃣ البريد المصري : ايوا يعني انتا عاوز ايه؟ ايه دا عاوز تدفع باقة 99 درهم يعني 525 جنية مصري اونلاين في موقع du؛ رسالة رفض اهي... ايه دا هتشتري حاجة من موقع أمازون الإمارات؟ رسالة رفض... ايه يا كابتشن زهقت وقولت تنزل تسحب من ماكينة البنك كاش... احلي رسالة رفض لتجاوز حدود السحب... هتقولي انتا طلبت كثير؛ طلبت 2000 درهم رفض؛ طلبت 1000 رفض؛ طلبت 500 رفض؛ طلبت 200 درهم يعني 1100 جنية مصري برضك رفض 😂... اللي هو ايوا يعني انتا عاوز ايه؛ انا بريد مصري ياض... بص خد 100 درهم؛ اه بجد وافق يطلع لي 100 درهم 😂

⬅️ الظريف ان البريد كلموني من شوية قالوا لي احنا بنبلغ حضرتك باستخدام كارتك خارج مصر... قولت لها اه انا في دبي... كان نفسي اقولها فين الاستخدام بس هو قابل أي حاجة 😔... قال بريد قال... الغريب اني عملت المحاولات امبارح؛ والبريد كلمني النهاردة... يعني لو في غريب بيستخدم الكارت فمعاه 24 ساعة براحته 😂

تفتكروا الموظفة هتفتح لي الكارت؛ يكون مسموح ليك 500 جنية لغاية ما نتأكد من هويتك لحمايتك 🤔🤔 اتمني اطلع غلط والكارت يشتغل... أوغاد

قال البريد المصري قال

ملحوظة

عارف رسوم التعامل الاجنبي ورسوم السحب النقدي والليميت؛ ومكنتش موقف حياتي علي كارت البريد ولا تيلدا؛ فعادي لو طلع الاثنين بلح كنت هتعامل عادي بكروت البنوك اللي معايا... بس قولت أشارككم تجربتي

حد يعرف ايه سر ان مصانع الموبايلات اللي بتتعمل بمصر موحده رقم 20 مليون دولار ك حجم استثمار ؟ 🤔🤔

*️⃣ يوم 28 أغسطس كشفت شركة Vivo عن أول هاتفين في السوق المصري مصنعين لمصر؛ وهم Y31A و Y21A.

*️⃣ تروح الشهر اللي قبله وتحديداً اليوم اللي قبل عيد ميلادي أي يوم 22 يوليو؛ وزير الاتصالات تفقد مصنع فيفو في العاشر من رمضان وقالت الصحف ان المصنع باستثمارات 20 مليون دولار يمكن ان تصل ل 30 مليون دولار.

*️⃣ ومن يومين الحكومة أعلنت إن شركة أوبو هتعمل مصنع في مصر بتكلفة 20 مليون دولار برضك زي اختها فيفو... وللي ميعرفش فبراندات Oppo Vivi Real Me OnePlus كلهم مملوكين لنفس الشركة الأم BBK.

*️⃣ صراحة خبر مصانع الموبايلات جميل بس مش عارف ليه الناس عاوزة تربطه بقفل الاستيراد؟ ونظام شوفتم لو مقفلناش استيراد الموبايلات مكناش شوفنا المصانع دي في مصر.

*️⃣ مع إن لو حد تعب نفسه في جوجل شوية هيلاقي مثلا فيفو في مؤتمر للشركة في يونيو 2021 يعني من سنة و3 شهور أعلنوا إنهم خلال 2022 و 2023 هيضخوا 30 مليون دولار بمصر... وبالفعل في 2022 عملوا المصنع ب 20 مليون والاخبار بتقول هيتم توسعته ب 10 مليون دولار كمان. من سنة مكانش في أزمة.

*️⃣ وبالنسبة ل أوبو ففاكرين شهر أبريل لما اتقفلت الموبايلات ظهر خبر تسريحها للموظفين وخروجها من السوق... وقتها أوبو ردت صحفياً (خبر للجرايد مش بيان) بإن دا مش صحيح وعشان تأكد قالت إنها من شهور وهي في اجتماعات مع الحكومة لعمل مصنع في مصر... واخد بالك شهور يعني من قبل الازمة.

*️⃣ بالفعل لما تبص بالاخبار تلاقي يوم 3 مارس يعني قبل زيادة الدولار والجو دا؛ الاهرام قالت ان في اجتماع تم بين وزير الاتصالات ومسئولي أوبو للتنسيق لمصنع للشركة.

*️⃣ فمش معني ان الحكومة طلعت بيان يبقي في خبر جديد... البيانات الحكومية معمولة للدعاية السياسية؛ يعني حاجة بتتم من شهور لكن لان المصريين لا يقرأون (مقولة تنسب ل موشي ديان وقال المصري لا يقرأ ولو قرأ لا يفهم؛ لكني شلت النص الثاني عشان مش صح واحتفظت بالأول لان الناس بتابع العناوين لو تابعت)... فلإن الناس مش بتابع الاخبار فممكن تنبهر بأي حاجة عادي... يعني تفتكر ان في مفاوضات لمصنع وهو اصلاً شبه خلص في المنطقة الصناعية في أكتوبر 😂.... اييييه دنيا

*️⃣ بلاش تشتموا موشي ديان فينا... وبلاش تحملوا الاحداث ما لا تحتمل وتحاولوا تعملوا من الفسيخ شربات...

⬅️⬅️⬅️ دا مجرد خبر كاتبه بقالي شوية وناسي انشره؛ بوست خبري يعني؛ زي بوست الصبح بتاع الموافقة المبدئية علي عملة 2 جنية معدنية كده

هو ليه كل ما حد يقول هيتم اصدار عملة جديدة؛ بلاستيك؛ او فئة جديدة زي 500 جنية او حتي خبر ال 2 جنية

تلاقي التعليقات ماسكة موضوع هيتم تخفيض قيمة العملة يعني

ايه يا شباب في ايه؛ ما الامارات عندها ورق ب 500 درهم و 1000 درهم عادي ومحدش قال حاجة والأوروبيين عندهم كوين معدني 2 يورو.

مش طباعة فئة جديدة هي اللي بتثبت انخفاض قيمة العملة

ذهابك للسوبر ماركت وتلاقي نفسك مشترتش حاجة وبتدفع مبلغ كبير؛ دا هو اللي بيثبت ان العملة ضايعه؛ مش وجود فئة جديدة من العملة

روح السوبر ماركت؛ اعتبروا دا معيار اقتصادي 😂 روح شوف وانتا تعرف

أقولكم سر؛ سر عالعلني كده 😂... لما وصلت دبي عملت check in... في نفس اليوم بالليل في شيء ما صحياً حصلي...

*️⃣ إمبارح بقى الصبح نشرت صور من مول دبي مع الآي فون 14 الجديد... بس يا سيدي وإمبارح بالليل جالي دور برد ورشح والموضوع دلوقتي ضارب معايا 😭😭.

*️⃣ دلوقتي أي حد مصري تقليدي هيقولك (شوفت العين شوفت الحسد بتاع الناس)... لكني صراحة مش من بتوع الجو دا... فمثلاً التعب بتاع أول يوم سفر دا أصلاً كان في بوادر له بقالها أسبوعين قبل السفر وأنا مفهمتهاش وتجاهلتها... ودور البرد الحالي برضك مبرر ومنطقي؛ إمبارح استحميت الصبح وخرجت وقفت في التكييف.... وللتوضيح انا في الفنادق بعمل التكييف 20؛ مهو مش انا اللي دافع الكهرباء 😂.

*️⃣ لكن برضك نفترض إنه حسد... طيب هو الحسد ليه؟ عشان سافرت دبي يا عم الثري؛ مليونيييير انتا.... صح مش هيكون دا التفكير؟

*️⃣ طيب تجاهل معايا إن دي سفرية شغل؛ دلوقتي انتا شخص عاوز تسافر دبي؛ يا تري هتكلفك كام؟ طبعاً موضوع تكلفك كام دا واسع قوي... ممكن الرحلة ب 7/8 الاف جنية وممكن تتكلف 700/800 الف 😂...

⬅️⬅️⬅️⬅️ الكام سطر القادمين دول للناس اللي نفترض هما اللي بيحسدوا؛ وهتخيل معاهم انهم عاوزين يروحوا دبي لأي سبب كان؛ حتي لو يعيشوا الدور... من منظور يعني ان اللي بيسافر دبي ثري... لكني هوضح لهم ان دا مش صح. وان منظورنا ان اللي بيسافر معاه ملايين دا غلط.

*️⃣ أول حاجة التأشيرة؛ دي بتطلع في نفس اليوم؛ تخش موقع ليكن طيران الإتحاد وتقول عاوز اسافر من معاد كذا لمعاد كذا؛ دي صور الباسبور وووووو... وتدفع حوالي 100 دولار بالفيزا... بس يا سيدي في نفس اليوم معايا التأشيرة.

*️⃣ ندخل عالطيران؛ في الأول كده قرر السفر واحجز بدري... يعني نتخيل انك عاوز تسافر كمان شهر هتبص تلاقي التذاكر جو 7 الاف جنية او ارخص بسيط ؛ رايح جاي علي مصر للطيران وطيران الإمارات...

*️⃣ حرام عليك يا بن سامي عاوز أوفر... طيب بص يا سيدي كده تشوف الطيران الغير مباشر؛ يعني طيارة رايح قطر ولا الكويت ولا الاردن؛ تروح ترانزيت هناك وتطلع على دبي... دول بقي هتلاقيهم ارخص يعني ممكن تنزل ل 5 الاف جنية رايح جاي.

*️⃣ يا عم بن سامي أنا عاوز أرخص.... خلاص خلاص يا عم فهمتك... قولي هو ال Go Bus النظيف أعلي درجة للغردقة وشرم كام؟؟ ايه يا عم بن سامي غردقة وشرم ايه؛ انا مسافر دبي؛ عامة ب 700 جنية يا سيدي... حلو قوي؛ 700 جنية يعني بالسعر الرسمي للدولار في كروت الفيزا وماستر كارد يعملَا 35 دولار...

*️⃣ بص بقي يا سيدي هتنزل أبلكيشن Wizz ودي شركة طيران ضمن خطوطها برج العرب الي ابو ظبي؛ هتلاقي رحلات من 41 دولار يعني 800 جنية للاتجاه الواحد... اه 800 جنية تسافر دبي طيران 😂؛ بس خد بالك الطيارة صغيرة شوية؛ والاهم انتا مسافر بشنطة ظهرك بس؛ عاوز شنط تانية ادفع يا سيدي ادفع

*️⃣ وصلت يا سيدي دبي؛ تقعد فين؛ بص يا سيدي دبي فيها كل الأسعار حرفياً... يعني عاوز تاخد غرفة 2 شخص لمدة 7 ايام ب 500 درهم (يعني الليلة ل 2 شخص ب 400 جنية)... عاوز تدفع 1000 درهم في الاسبوع موجود؛ عاوز تدفع 5000 درهم في أسبوع موجود... عاوز حتي تدفع 50 ألف جنية مصري في اليوم موجود برضك (فندق برج العرب).

*️⃣ بس يا سيدي شوفت بقي... يعني لو حابب تقدر تطلع دبي ب 2 الف تأشيرة و 2 الف طيران و 3 الف إقامة يعني 7 الاف جنية اسبوع في دبي موجود... طبعاً فاضلك الأكل والشرب؛ براحتك بقي شوف الاكل اللي تحبه. يعني لو عاوز ف 10 الاف جنية تروح دبي اسبوع وترجع بس خد باااااالك

*️⃣ الطيران الرخيص بيكون طيارات Narrow Body ودي طيارات صغيرة؛ طيارة صغيرة = طيران منخفض = العوامل الجوية تأثر عليها = هتوصل مرهق... فخد بالك يا عم.

*️⃣ حاجة كمان؛ لما تيجي تحجز الطيران تشوفها غير حجم الطياره Narrow ولا Wide Body... والحاجة دي هي انك متحجزش تذاكرك سوا... يعني مسافر مع 2 صحابك؛ متدورش علي عدد 3 تذكرة... لان سيستم البحث بيدور على طيارة فيها 3 تذاكر جنب بعض... فكده هيزيد السعر؛ عادي افكس واحجز كل واحد لوحده ومش لازم تقعدوا جنب بعض... طبعاً الكلام دا مش للي مسافر مع مراته وعياله...

*️⃣ وأكيد الأعياد والمناسبات والجو دا تبعد عنها؛ مفهوم طبعاً بس كان لازم اقولها تجنباً للي هيسبوا البوست كله ويقولك لالا سعر التذاكر بيختلف الفندق بيختلف حسب المواسم.