هل دا وقت التقسيط ولا الكاش؟

*️⃣ النهاردة بدأت عروض البلاك/وايت/يلو/بلو/... فرايدي على نون وكذلك أمازون هتبدأ بكره لكنها بدأت النهاردة للبرايم... سواء بقى العروض قوية ولا ضعيفة لكن التركيز هو التقسيط التقسيط... أمازون فتحت صدرها وتعاقدت مع 10 جهات للتقسيط ونون قالت لك أنا هجيب الكبير بتاع مصر البنك الأهلي... وعروض التقسيط بدون فوائد وصلت ل 18 شهر.. ومن هنا يأتي السؤال أشتري كاش ولا قسط؟

*️⃣ في الكام سطر القادمين هناقش فكرة كاش ولا قسط بشكل عام؛ يعني بناقش الفكرة نفسها.. لا بقول لحد قسط مع بنك ولا كارت ولا أي شيء؛ فأنا هنا مش بناقش نوع معين من التقسيط بل بناقش المفهوم نفسه... وضحت عشان متوقع تعليقات معينة. نبدأ بقى البوست

*️⃣ من فترة قريبة الخبير الاقتصادي الكبير هاني توفيق قال في بوست صغير كده إن دا وقت الشراء بالتقسيط مش وقت الكاش... كثير مفهومش دا معناه ايه... خاصة إن في مفهوم منتشر وهو خد بالك متدخلش نفسك في أقساط وكده... فإزاي يعني دا وقت التقسيط من وجهة نظره؟

*️⃣ نفترض في سلعة ما ب 24 ألف جنية وإنتا تقدر تقسطها على 24 شهر بدون فوائد... وتقدر تشتريها كاش برضك فأنهي بقى؟

*️⃣ خيار التقسيط دا وقته بيقولك إن في عصر التضخم المرتفع فالتقسيط أفضل شيء... السلعة دي بعد شهور معدوده سعرها هيزيد... فالتقسيط هيخليك تمتلك السلعة دلوقتي... بس تدفع في المستقبل بسعر جنية المستقبل.

*️⃣ يعني ايه جنية المستقبل؟ بص يا سيدي هو الألف جنية دلوقتي بتشتري اللي كانت بتشتريه من سنتين؟ طبعاً لا ولا من 3 شهور... فقيمة العملة عمالة تقل... فانتا لما تدفع دلوقتي قسط 1000 جنية؛ فبعد 6 شهور قيمتهم الشرائية مبقتش 1000 جنية بل 900 جنية مثلاً... فقيمة العملة بتقل وبالتالي الرواتب بتزيد وحجم القسط عليك بيقل ك تكلفة.

*️⃣ فال 24 ألف جنية اللي انتا عاوز تطلعهم دلوقتي دول؛ يمكن قيمتهم "الشرائية" تساوي بعد سنتين 30 ألف جنية.

*️⃣ مثال ثاني تخيل واحد اشتري شقة قسط على 10 سنين ثابت (مبقاش في أظن وبطلوا دا وكله بيزيد لكن نفترض مثال قديم)... الشقة كانت في سنة 2013 والقسط كان 3000 جنية.

*️⃣ وقتها هو كان طلعان عينه في القسط في سنة 2013 و 2014 ومع الوقت قيمة الفلوس بتقل؛ الرواتب بتزيد؛ فدلوقتي القسط ال 3 الاف جنية عليه مبقاش بيوجعه خالص... ال 3 ألاف جنية في 2013 قيمتهم دلوقتي كإنها حوالي 9 الاف جنية. كده وضحت الفكرة.. مع الوقت قيمة الفلوس بتقل...

⬅️ مثال ثالث؛ تخيل لو في حد عايش معانا وبيدفع قسط مثلاً 500 جنية؟ دا ولا شيء عادي... تخيل لو دا قسط عليه ثابت من سنة 1992 مثلاً يكون في شيء ما بيقسطه 500 جنية شهري... ال 500 جنية بالنسبة لسنة 1992 تعني 50 ألف جنية تقريباً دلوقتي على أقل تقدير... فهو سنة 1992 كان بيدفع مبلغ خزعبلي في بداية أقساطه لكن دلوقتي بقى ملاليم.

*️⃣ شيء تاني برضك بيعتمدوا عليه في مفهوم دا وقت التقسيط وهو إنك غير قادر على شراء السلعة... تخيل لسبب ما انتا عاوز جهاز آي فون 14 بسعر 24 ألف (مجرد مثال عشان نحسب) ففي شخصين الأول قرر يقسط 1000 شهري والثاني قالك لااا مش هقسط هحوش واشتريه... الأول من دلوقتي معاه الآي فون والثاني فضل يحوش الألف كل شهر... بعد 24 شهر الأولاني خلاص خلص الأقساط ومعاه الآي فون؛ والثاني بقى معاه 24 ألف.... طبعاً مش هيروح يشتري الآي فون 14 بل 16 وقتها... هيروح يشتريه هيلاقيه ب 30 ألف فيقولهم هحوش سنة وهرجع فيحوش سنة وييجي يلاقيه ب 35 ألف فيروح يحوش ويرجع وهكذا... التضخم هيخلي السعر يجري... الأولاني بقى هيبيع الآي فون 14 بتاعه ويحطه مقدم ل 16 ويقسطه.

*️⃣ كده يا سيدي أنا شرحت لك ليه أي اقتصادي هيقولك دا وقت التقسيط مش الكاش؛ واللي عاوز تحوش وتشتريه مش هتطوله... اه أنا بشرح لك كل ما سبق عشان عارفك ياللي روحت التعليقات تشتم... ربنا يسامحك بس أنا مش هسامحك وهديك بلوك.

*️⃣ طيب هل فعلاً ما سبق صح؟ الإجابة اه صح من ناحية الأرقام والحسابات والاقتصاد؛ بس في مشكلة صغيرة قوي وهى إنك في أزمة اقتصادية وليس مجرد ارتفاع سعر وتضخم تقليدي... طيب هتفرق في ايه؟ ببساطة الإجابة هى "هل إنتا هتكمل؟"

*️⃣ النموذج اللي فوق بيعتمد على شيء؛ إنك موظف شغال في مكان؛ ومع الوقت الأسعار بتزيد لكن برضك مرتبك بيزيد إما بسبب فروقات التضخم أو عشان خبرتك بتزيد... فطالما دخلك هيزيد يبقى القسط حمله عليك هيقل فدوس وقسط... لكن في وضع اقتصادي صعب ايه ممكن يحصل؟

*️⃣ ممكن يتقالك السلام عليكم وشكراً ليك معانا... يعني صاحب العمل يستغنى عنك أو حتى يخسر ويقفل بسبب الأزمة الاقتصادية؛ فوقتها إنتا دخلك بقى صفرررر... وبسبب الأزمة واغلاق الشركات فالوظائف هتقل ويبقى صعب تلاقي... فتبدأ تضغط مصاريفك وتقلل من هنا وهناك... لكن غصب عنك هتدفع القسط. فالقسط أصبح وبال عليك وكان الكاش ارحم

⬅️ وكما قال حزلقوم... يعني اعمل ايه يا أستاذ غسان؟

*️⃣ للأسف مفيش إجابة سحرية ولا "إعمل الصح" لكن ممكن تبقى نصيحة وهى لو ناوي تقسط

*️⃣لو الشغل بتاعك تمام ومستقر وبالعكس الأزمة الحالية جت في مصلحتك بشكل ما؛ دوس يا ريس وقسط أطول فترة تقدر عليها بدون فوائد.

*️⃣لو الشغل بقى مش واضح المعالم؛ فنصيحة متطولش في التقسيط؛ يعني ممكن بتقسط مع محل 3 أو 4 شهور.. لو فيزا اختار ال 6 شهور... لو Tabby فدا برضك 4 شهور؛ يعني المهم شيء صغير عشان المستقبل لسه مش واضح.

*️⃣وعلى سيرة تابي كان في سؤال وكان مفروض أحطه في بوست الردود اللي قولت عليه لكن مكتبوش لسه فقولت أرد هنا بالمرة... السؤال وهو إني في البوست بتاعه قولت إن لينك الإحالة بيدي 100 جنية للمشترك بس الناس اشتركت ومفيش فلوس... لازم تشتري منهم مرة وبعدها هينزلك ال 100 جنية رصيد وتقدر تستخدمها في الأقساط التالية... فلازم تشتري عشان ينزلك رصيد

*️⃣ودا لينك بوست تابي اللي بيشرح ايه المفهوم بتاع شركات BNPL شغال إزاي

https://t.me/BnSamyPosts/809

الناس اللي بتكتئب متمكلش البوست

*️⃣بعيد عن أحلام الطفولة اللي كلنا نقعد نقول هطلع دكتور او ظابط أو مهندس أو أو أو... فأنا في حياتي تنقلت بعده مراحل

*️⃣مرحلة الكلية في علوم عين شمس؛ كنت افكر في بكره وأقول يا تري هشتغل في معامل كيمياء ولا مصيري هيبقي بالفيزياء اللي مكنتش بحبها.

*️⃣مطولش حلم الكلية كثير وانتقلت لمرحلة الشغل في موقع آي-فون إسلام؛ بكتب مقالات يومية عن الآي فون وأبل والآي باد وكده... فهنا افكر في بكره وأقول يا تري هكمل هنا؛ طيب هبقي شغال في المقالات والكتابة وكده.

*️⃣وبعدين بدأت المرحلة الثالثة وهي مرحلة دكان تك؛ لما كنت افكر في بكره اقول شغلي هيكبر وأبيع أكثر وأوسع شغلي وهكذا.

*️⃣لكن المشكلة الاقتصادية الحالية؛ اللي أصلاً إحنا في بدايتها والازمة الحقيقية في 2023 أصلاً... والغموض بتاع الدولار؛ والجنان بتاعه في السوق الموازية والتقارير البنكية الدولية اللي بقت تتكلم ان الرسمي هيروح ل 27.8 في ظل الظروف الحالية؛ والموازي اللي راح لحته ال 30... وازمة الاستيراد والتشديد الضريبي والجمركي. والتعويم الديكور وووو

*️⃣كل ما سبق يخلي الواحد حيران؛ هو مفروض ابدأ افكر في المرحلة 4 من حياتي المهنية؟ المستقبل صعب والوضع مش ظريف خالص.. وحرفيا محدش عارف في ايه.

*️⃣معظم التجار والبضاعه كانت متسعر علي دولار 25/26... دلوقتي بقي التسعير علي 30 بل واللي عاوز يخطط لقدام في 2023 بقول يفكروا في مستويات تانية

*️⃣بس في مشكلة؛ هل الناس معاها فلوس؟ لسه تأثير الدولار موصلش للناس بشكل كامل؛ انتم ناسين الكهرباء في بيوتنا بيتم توليدها بمحطات معمولة بقروض بالدولار؟ وباستخدام غاز ومازوت وو مدفوع سعره دولار؟ طيب بنزين العربيات دا مش محتاج دولار؟ طيب القطارات مش مستورده بالدولار وبيتدفع قسط دولار ليها؟ كل دول لسه تأثير الدولار موصلهاش... الحكومة مأجله زيادة الكهرباء والمياه والغاز والبنزين والسولار والمواصلات عشان التضخم ضارب لوحده في البلد.. لكن هتزيد هتزيد... لتر البنزين هيوصل علي اقل تقدير 15 جنية (سعره المدعوم بالسعودية) بينما سعره العالمي الحر يتجاوز 20 جنية... ومفروض مصر موقعه مع صندوق النقد انها هتبيع وتحرر وتلغي الدعم.

*️⃣ايه الحل؟ لو عندك فرصة اطلع من البلد؛ هتفيد نفسك وكمان هتفيد مصر عشان هتجيب دولار للبلد.. فالحل سيبوا البلد واطلعوا هاتوا لها دولار... مفيش حل جوا للاسف... او يمكن في حل بس سري ومحدش عاوز يطلعنا عليه..

ربنا يستر

من المهم جداً استقرار سعر الدولار؛ أي كان الرقم بس لازم يستقر لأسباب كثيرة ابسطها لو في استثمارات هتيجي فهي مش هتيجي في دولة فيها الدولار دايس بنزين.

*️⃣تخيل مستثمر هيجيب 100 مليون دولار يعمل مشروع ومصنع.. َ دلوقتي الشركة بره هتبعت لمصر 100 مليون دولار؛ يروح المستثمر يغيرهم في البنك أول السنة ب 1.5 مليار جنية ويبدأ يبني المصنع؛ بعد كام شهر يلاقي الدولار بقي ب 19 ثم كام شهر بقي 25 ومكمل ما شاء الله... دلوقتي مصنعه لسه هيبدا انتاج وهو بقي النص.

*️⃣طيب هو دلوقتي بعد اشتغل وكسب حلو؛ ييجي يقول عاوز اخد ارباحي يتقاله يحنن؛ طب بص الدولار بقي ب 30 او بقي 35... بخ ارباحك مفيش

*️⃣وكل ما سبق هو السيناريو الجميل؛ ان المستثمر دخل وغرس ولبس وبقي طموحة يهرب

*️⃣تخيل بقي انه مستثمر عاوز يدخل البلد؛ يلاقي الدولار عمال يزيد بال 5% شهرياً... هو اصلا لو وقف علي راسه مش هيكسب 5% شهري.. يقولك طيب اصبر شوية يستقر علي 25... تمام يلا هدخل بقي؛ ايه دا تقارير انه رايح ل 27؛ طيب استني يستقر وادخل؛ وهكذا

*️⃣مفيش مستثمر هيدخل طول ما سعر الدولار بيقفز؛ وحز فز فين المشكلة؛ المشكلة هي ان الدولار مش هيستقر غير لما يحصل وفرة؛ ومش هيحصل وفرة غير لما مستثمرين يدخلوا؛ اللي هما مش هيدخلوا عشان مفيش استقرار... يعني هو اصلا دخولهم اللي هيحل المعادلة اللي هما منتظرينها.

*️⃣لكن القاعدة رقم 1 في البيزنس هي ان (رأس المال جبان)؛ اديني استقرار اقتصادي وسياسي والا مش هتشوفني... او هتشوف استثمارات اللقطة؛ يعني شركة مفروض تساوي 100 وعاملين عليها اوكازيون ب 25 وبطاطس وبيبسي ووجبة هابي ميل؛ فانتا كده عاوز تضحك على نفسك وتوهمها ان في استثمارات؛ عيش في الوهم.

ربنا يستر وتكمل على خير؛ لان اللي اعرفه ان في مئات الاشخاص اللي عندهم شغل في مصر اما صفوا وبيطلعوا من مصر او بيبحثوا عن طريق الخروج؛ واعرف كمان أصدقاء علي اعلي مستوي علمي ومهني بدأوا يسيبوا البلد ودي كارثة وهي تفريغ مصر من الكفاءات.

*️⃣فلما تلاقي المصري مش مطمن لمستقبله؛ عاوز الاجنبي يطمن وييجي لك؟ لازم تطمن المصري الاول؛ لاااازم والا المستقبل في خطر...

بمناسبة ال 83 نشاط اللي عاوزين موافقة أمنية؛ في بعض الدول بره بتعمل طريقة للموازنة بين تحكم الدولة وسرعة الاقتصاد... يعني الدول مش عاوزة سلطة هي أي حد يعمل أي حاجة؛ شركة بقي أو محل أو حتى مظاهرة... لكن في نفس الوقت عاوزة متخليش البيروقراطية الحكومية توقف حياة الشعب... فعملوا اختراع ظريف اسمه الإخطار.

*️⃣ يعني مثلاً بتأسس شركة ومن ضمن الخطوات عمل (معاينة) لمقر الشركة... تقعد ب الأسابيع بقي منتظر الموضوع دا أو تمشيه بطريقة كل سنة وانتا طيب... لا الموضوع يكون غير كده خالص ويكون إخطار.

*️⃣ الجهة X مفروض توافق أو ترفض؛ يعني الضرايب او التأمينات أو جهة أمنية... خلاص انتا بتعمل كل الإجراءات وبعدين بتعمل إخطار للجهة المختصة؛ وهنا الجهة المختصة بيكون قدامها مدة زمنية ليكن 30 يوم... لو معملتش المعاينة فتلقائي الشركة دي أخدت الموافقة.

*️⃣ وبكده ضربت كل العصافير بحجر؛ من ناحية الشركات متقعدش شهور انتظار تحت رحمة موظف بيروقراطي حكومي... ومن ناحية ثانية الموظف يكون عارف انه لما ينام في شغله؛ الشركات هتاخد موافقات وتشتغل؛ والمديرين بتوع كل موظف هيعرفوا نسبة الاخطارات اللي وصلت له وكام % بيتعمل عشان المهلة خلصت.. يعني KPI عالسريع كده.

*️⃣ طبعاً لو بتفكر في نقطة إن الموظف الحكومي دا يروح عامل رفض بدون معاينات فهنا كل سنة وهو طيب؛ المعاينة لازم توقيع الطرف الثاني ببدايتها؛ يعني لما ينزل بيجيب ورقة انه هيبدأ معاينة؛ امضي يا استاذ ابراهيم يا صاحب الشركة او من ينوب عنك بإننا هنبدأ المعاينة؛ وقبل عشان ميتحولش الموضوع عكسي وابتزاز من صاحب الشأن بإنه مش هيمضي علي محضر معاينة رفض.

*️⃣بس وبعد ما يخلص يرفض او يقبل؛ وبكده ميقدرش يقعد في مكتبة ويكتب رفض رفض لانه محتاج اصحاب الشأن يكونوا معاه وهو قاعد يرفض ورقهم.

*️⃣بس يا سيدي؛ فكرة بسيطة تخليك تقدر تراقب وتتحكم بالاقتصاد برضك؛ لكن مع وضع قيود متخليش التحكم يوصلك لوفاة الإقتصاد عبر ترك الملفات بالشهور والسنين بانتظار موافقات... لا خالص كل خطوة ليها حد اقصي زمني بمجرد يخلص يبقي اتوافق عليها تلقائياً ويتحمل الموظف الحكومي أي مسئولية قانونية تنتج عن الموافقات التلقائية.

⬅️⬅️ عارف هتقولوا رجعت خلاص تكتب؛ صراحة لا لسه نفسياً مش مؤهل للكتابات الطويلة المنتظمة؛ بس أنا بحب الكتابة؛ حتي اصحابي المقربين عارفين إني حلمي ييجي يوم اعتزل فيه الشغل ويبقي الكتابة شغلي؛ بس يكون معايا وقتها ما يكفيني باقي حياتي لاني مش عاوز امتهن الكتابة فييجي وقت اضطر لكتابة ما لا اقبله مقابل المال؛ وابقي مصطفي بكري كده... فالبوست دا صغير كده عالسريع بمناسبة خبر الموافقات الأمنية عالمحلات بما فيهم الحمامات ومحلات الجزم والعصير ومكتبات الأقلام والمسطرة والكراريس ومحلات الحلاقة والبيوتي سنتر.

أتمني تكون الحكومة بتجمع موارد دولارية تخش معركة التعويم الحر اللي الصندوق طلبه... يعني مفروض زي سيناريو 2003 اللي وقتها ارتفع من 3.7 في 2003 الي 6.2 جنية في 2004 لكن فاروق العقدة كان برنس وعرف يسيطر عليه ومن 2005 فضل ينزل وعلي 2007 و 2008 كان الدولار في كل مكان؛ تروح اي بنك تقوله عاوز 1000 دولار يديك بدون ذكر سبب.

*️⃣فيا تري هنعرف نعملها ثاني؟ يا رب ننجح لإن بصراحة الوضع الحالي مؤسف.

*️⃣وضع الاقتصاد المصري حالياً محتاج تعامل بالشوكة والسكينة بل بالملقاط؛ واحنا بنحب نتعامل بالمغرفة بتاعة الأكل... فأتمني نسيب شغل الحلل ونمسك الجراحة عشان نظبط الدولار.

*️⃣ فسواء بتأيد أو تختلف مع البنك المركزي لكن مش في مصلحة أي حد عايش في مصر استمرار الوضع الحالي والارتفاعات الجنونية دي.

صباح الخير

البنوك اليومين اللي فاتوا عملت مجزرة في ليميت الكروت والرسوم

*️⃣ البنك الأهلي خلي رسوم استخدام الفيزا 10% يعني هتشتري بيه هتلاقي الدولار محسوب عليك فوق ال 27 جنية.

*️⃣ بنك اسكندرية خلي الرسوم 6% وسحق المشتريات والسحب ل 5 الاف جنية شهرياً في معظم الكروت.

*️⃣ بنك HSBC خلي الرسوم 6% ونزل الليميت ل 1500 دولار سحب لكل كروت العميل معاً. والمشتريات متوسط 25 الف. وقبل ما تقول حلو دا؛ البنك دا مش لأي حد؛ وكان بيدي العملاء بتوعه سحب 10 الاف دولار وقللهم في اكتوبر ل 5 ثم في نوفمبر ل 3 ثم قلوا ل 1.5.

*️⃣ بنك CIB الفيسبوك شاف القيود بتاعته بل بعت رسالة قال انه هيقيد بعض عمليات الشراء؛ يعني ممكن عملية شراء والليميت يسمح لكن البنك مش هيسمح.

*️⃣ بنك QNB خلي رسوم 6% ونزل الليميت لدرجة كروت الحسابات بتسحب 4 الاف جنية شهري عدا البلاتينوم والانفينت بيسحبوا 16 الف جنية شهري. والمشتريات الليميت بتاعها احسن شوية.

*️⃣ والكروت الغير بنكية زي تيلدا قلل الليميت تاني فبقي 2500 جنية وبرضك الرسوم 6%

*️⃣المشكلة هتكون بشكل أساسي عند المصريين اللي مش بيحبوا الكريديت كارد اما بيخاف منها أو رافضها شرعياً... دا حرفياً مش هيعرف يسافر ولا يعمل شوبنج أونلاين. بل وبدأت البنوك تخنق علي مستوي عملاء عالي اللي هو البلاتنوم يعني تلاقي في بنك اسكندرية ل 7500 جنية مشتريات شهرية لكارت الحساب البلاتنيوم اللي هو مبلغ متقدرش تشتري تذكرة طيران بيه.

*️⃣هي القيود هدفها تحجيم سحب الدولار سواء للمشتريات أو السحب النقدي أو أي كان السبب؛ لإنك لو مسافر وروحت البنك؛ يقدر البنك يقولك خد 200 دولار مشي حالك او يقولك مفيش؛ لكن مش هيقدر البنك لو انتا بتدفع بالكارت بتاعك معاملة في ايطاليا مثلاً وتمت إنه يقول للبنك الايطالي سوري مش هديلك الفلوس أصل مش معايا... هيدفع هيدفع.

*️⃣ القيود أقل شوية عالكريديت كارد من منطلق إن أكثر من 95% من الشعب مش معاه كريديت كارد لكن نص الشعب معاه كارت حساب.

*️⃣ هتبقي مشكلة كبيرة قوي للناس اللي شغالة اعلانات فيسبوك أو أي حاجة عالانترنت؛ وبلاش عشان خاطري تفكير مهو بيعمل اعلان بالجنية المصري؛ ايوا بالجنية لكن السحب من بره مصر فبتتحسب برضك كإنه دولار وبينزل عليها ماركب اب (عمولة) وكله..

*️⃣ الحل الوحيد انك تكون من الصفوة ال 0.1% من الشعب اللي معاه كروت فيزا انفينيت وسينجتشر او ماستر كارد وورلد و وورلد ايليت او بالانجليزي infinite و signature و World Elite بس دول صفوة الصفوة وأصلاً الفئة دي كلهم معاه دولار كبير.

⬅️⬅️ تفتكروا النهاردة اجتماع السياسة النقدية للبنك المركزي هيطلع منه قرار ايه بخلاف رفع الفايدة.

اسوء حاجة في الأوضاع الاقتصادية السيئة انها بتدفع الحياة نحو الرداءة

*️⃣رءاة الطعام: فالناس تلاقي الأكل بقي غالي؛ تقلل جودته؛ علبة الجبن خالية الزيوت النباتيه بقت غالية؛ نشتري اللي بالزيوت... الخضروات والفاكهة غالية؛ نشتري كربوهيدرات تملى البطن بأقل سعر... ودا هيكون ليه تأثير مهول علي متوسط صحة الشعب بعد سنوات؛ وكم الأمراض والانيميا وضعف المناعة والتقزم... هيبقي شعب مدمر ذاتياً.

*️⃣رداءة المنتجات : بسبب الفقر فالناس هتدور علي بدائل أرخص للمنتجات؛ تشتري منين الجودة العالية والمتوسطة؛ عاوزين عربيات ارخص وقطع غيار ليها أرخص وثلاجات وتليفزيونات وووو... دا ليه تأثيرات سلبية كثير؛ من ناحية المنتج الرديء هيتلف سريعاً فتشتري ثاني وثالث ورابع؛ وكل دا استهلاك للدولار برضك... ومن ناحية ثانية جودة الحياة عامة هتقل.

*️⃣رداءة الصيانة: جزء من اللي فات؛ الناس هتبدأ تدور علي قطع غيار ارخص فدا يسبب مع الوقت تلف لمنتجاتها؛ يعني ممكن تلاقي حد يسترخص في قطعة غيار اصليه ب 500 ويجيب صيني رديء ب 200 ويركبه في منتج سعره بقي 10 الاف؛ وهوووب قطعة الغيار الرديئة تدمر لك المنتج الأساسي أبو 10 الاف... ولانك فقير فتروح تشوف منتج بديل ب 3 او 4 الاف فتكون جودته اقل فجودة حياتك تقل...


*️⃣ رداءة تؤدي للموت : كانت منتشره وهتزيد؛ فكر في العربيات في الشوارع؛ السيارة هي أداة قتل متنقلة؛ طقم كاوتشات العربية لما يبقي ب 7 و 8 و 10 الاف جنية؛ فالناس هتقلل تغيير كاوتشات العربيات بل وهيزيد نسب اللي بتشتري مستعمل؛ وبكده يزيد فرص انفجار الإطارات مما يؤدي لقتل اما الركاب او المشاه... ضيف نفس الأمور في تيل الفرامل وباقي المكونات.. باختصار الناس (هتسترخص)... في 7 مليون سيارة بالشوارع؛ فحتي لو الاسترخاص تسبب في حوادث ل 0.1% منهم فالرقم دا يعني 7000 عربية. بخلاف بقي النقل وباقي المركبات.

*️⃣رداءة العقول: ممكن الوضع الاقتصادي يتسبب ان ناس تقلل دروس لأولادها أو بتشترك لهم في رياضة في نادي فتوقف الاشتراك أو مشتركة في مكتبة او بتشتري كتب او الفقر يقلل اشتراكهم لابناءهم في كورسات تعليمية أو أو أو... فدا يسبب في رداءة العقول المنتجة.

*️⃣رداءة المحتوى : النقطة السابقة تسبب في انخفاض متوسط الثقافة والعقل الجمعي؛ فيقل معها تقبل العقول للمحتوي الجيد؛ فيزيد الاهتمام بكل ما هو تافهه... فيجد أي صانع محتوى جيد نفسه بدون عوائد تكفيه فيعزف عن صناعة الجديد.

*️⃣رداءة القطاع الطبي : مع ضعف الحالة الصحية وانتشار الجهل؛ تقل الصحة العامة للشعب فيزيد الضغط عالقطاع الطبي وفي الوقت نفسه يشجع الفقر المزيد من الأطباء علي الهجرة خارج البلاد؛ فتجد أن المرضي يزيدون والأطباء يقلون... والنتيجة مفهومة... اضف الي ذلك فقر المريض الذي يمنعه من شراء الدواء والعلاج بشكل سليم.

*️⃣رداءة الأمن والأمان: مع الفقر والجهل تزيد الجريمة؛ فالمزيد من الأشخاص يجدون أنفسهم بلا عمل؛ وبلا مهارات تمكنهم من البحث عن عمل؛ فالحل هو السرقة.

*️⃣رداءة المكون الاجتماعي: تسبب النقطة السابقة في زيادة خوف وقلق الفئات الميسوره على ابناءهم وأسرهم؛ فإما الهجرة وترك البلاد؛ أو الاقامة في منتجعات سكانيه عالية الأسوار وشديدة الحراسة؛ فينفصل الشعب عن بعضه البعض فتزداد الفروقات الإجتماعية... بل وقد يشجع الميسورون الدولة علي زيادة القسوة علي الفقراء وبناء المزيد من السجون لهم لأنهم يرونهم خطراً على أسرهم وأبناءهم.

*️⃣البعد عن الدين: لا يمكنني هنا ذكر كلمة رداءة؛ لكن يكفي ان نذكر الأثر الذي يروى عن سيدنا علي حين قال لو كان الفقر رجلا لقتلته... فالفقر بيئة خصبة لكل ما هو مخالف وبعيد عن الدين؛ فينشط مروجوا الإلحاد والكفر في نشر أفكارهم في اواسط الفقراء مثلما ينتشرون في وسط الأثرياء ؛ فشديد الثراء نغريه بالملذات؛ والفقير نجعله يقول أين الله مما يحدث بنا...

⬅️⬅️ ما سبق لا يخص دولة محددة؛ وما هو مذكور حدث ويحدث في بلادنا العربية والإسلامية والافريقية منذ سنوات طويلة... لكن مع الازمات يزداد وتيرته...

⬅️⬅️ تذكر ان انتشار النمل في شجرة لا يؤدي لانهيارها مباشرة؛ فتظل شجرة ضخمة لكن بعد فترة من الزمن تنتهي الشجرة لان النمل التهم مكونها الداخلي فيصبح اعادتها لوضعها الأصلي شبه مستحيل... فالفقر والازمات هو نمل ينتشر؛ يظهر تأثيره بعد سنوات وليس مباشرة؛ فالنتائج لن تظهر سريعاً؛ لكنها حين تظهر تكون قاتلة.