هو ليه كل ما حد يقول هيتم اصدار عملة جديدة؛ بلاستيك؛ او فئة جديدة زي 500 جنية او حتي خبر ال 2 جنية

تلاقي التعليقات ماسكة موضوع هيتم تخفيض قيمة العملة يعني

ايه يا شباب في ايه؛ ما الامارات عندها ورق ب 500 درهم و 1000 درهم عادي ومحدش قال حاجة والأوروبيين عندهم كوين معدني 2 يورو.

مش طباعة فئة جديدة هي اللي بتثبت انخفاض قيمة العملة

ذهابك للسوبر ماركت وتلاقي نفسك مشترتش حاجة وبتدفع مبلغ كبير؛ دا هو اللي بيثبت ان العملة ضايعه؛ مش وجود فئة جديدة من العملة

روح السوبر ماركت؛ اعتبروا دا معيار اقتصادي 😂 روح شوف وانتا تعرف

أقولكم سر؛ سر عالعلني كده 😂... لما وصلت دبي عملت check in... في نفس اليوم بالليل في شيء ما صحياً حصلي...

*️⃣ إمبارح بقى الصبح نشرت صور من مول دبي مع الآي فون 14 الجديد... بس يا سيدي وإمبارح بالليل جالي دور برد ورشح والموضوع دلوقتي ضارب معايا 😭😭.

*️⃣ دلوقتي أي حد مصري تقليدي هيقولك (شوفت العين شوفت الحسد بتاع الناس)... لكني صراحة مش من بتوع الجو دا... فمثلاً التعب بتاع أول يوم سفر دا أصلاً كان في بوادر له بقالها أسبوعين قبل السفر وأنا مفهمتهاش وتجاهلتها... ودور البرد الحالي برضك مبرر ومنطقي؛ إمبارح استحميت الصبح وخرجت وقفت في التكييف.... وللتوضيح انا في الفنادق بعمل التكييف 20؛ مهو مش انا اللي دافع الكهرباء 😂.

*️⃣ لكن برضك نفترض إنه حسد... طيب هو الحسد ليه؟ عشان سافرت دبي يا عم الثري؛ مليونيييير انتا.... صح مش هيكون دا التفكير؟

*️⃣ طيب تجاهل معايا إن دي سفرية شغل؛ دلوقتي انتا شخص عاوز تسافر دبي؛ يا تري هتكلفك كام؟ طبعاً موضوع تكلفك كام دا واسع قوي... ممكن الرحلة ب 7/8 الاف جنية وممكن تتكلف 700/800 الف 😂...

⬅️⬅️⬅️⬅️ الكام سطر القادمين دول للناس اللي نفترض هما اللي بيحسدوا؛ وهتخيل معاهم انهم عاوزين يروحوا دبي لأي سبب كان؛ حتي لو يعيشوا الدور... من منظور يعني ان اللي بيسافر دبي ثري... لكني هوضح لهم ان دا مش صح. وان منظورنا ان اللي بيسافر معاه ملايين دا غلط.

*️⃣ أول حاجة التأشيرة؛ دي بتطلع في نفس اليوم؛ تخش موقع ليكن طيران الإتحاد وتقول عاوز اسافر من معاد كذا لمعاد كذا؛ دي صور الباسبور وووووو... وتدفع حوالي 100 دولار بالفيزا... بس يا سيدي في نفس اليوم معايا التأشيرة.

*️⃣ ندخل عالطيران؛ في الأول كده قرر السفر واحجز بدري... يعني نتخيل انك عاوز تسافر كمان شهر هتبص تلاقي التذاكر جو 7 الاف جنية او ارخص بسيط ؛ رايح جاي علي مصر للطيران وطيران الإمارات...

*️⃣ حرام عليك يا بن سامي عاوز أوفر... طيب بص يا سيدي كده تشوف الطيران الغير مباشر؛ يعني طيارة رايح قطر ولا الكويت ولا الاردن؛ تروح ترانزيت هناك وتطلع على دبي... دول بقي هتلاقيهم ارخص يعني ممكن تنزل ل 5 الاف جنية رايح جاي.

*️⃣ يا عم بن سامي أنا عاوز أرخص.... خلاص خلاص يا عم فهمتك... قولي هو ال Go Bus النظيف أعلي درجة للغردقة وشرم كام؟؟ ايه يا عم بن سامي غردقة وشرم ايه؛ انا مسافر دبي؛ عامة ب 700 جنية يا سيدي... حلو قوي؛ 700 جنية يعني بالسعر الرسمي للدولار في كروت الفيزا وماستر كارد يعملَا 35 دولار...

*️⃣ بص بقي يا سيدي هتنزل أبلكيشن Wizz ودي شركة طيران ضمن خطوطها برج العرب الي ابو ظبي؛ هتلاقي رحلات من 41 دولار يعني 800 جنية للاتجاه الواحد... اه 800 جنية تسافر دبي طيران 😂؛ بس خد بالك الطيارة صغيرة شوية؛ والاهم انتا مسافر بشنطة ظهرك بس؛ عاوز شنط تانية ادفع يا سيدي ادفع

*️⃣ وصلت يا سيدي دبي؛ تقعد فين؛ بص يا سيدي دبي فيها كل الأسعار حرفياً... يعني عاوز تاخد غرفة 2 شخص لمدة 7 ايام ب 500 درهم (يعني الليلة ل 2 شخص ب 400 جنية)... عاوز تدفع 1000 درهم في الاسبوع موجود؛ عاوز تدفع 5000 درهم في أسبوع موجود... عاوز حتي تدفع 50 ألف جنية مصري في اليوم موجود برضك (فندق برج العرب).

*️⃣ بس يا سيدي شوفت بقي... يعني لو حابب تقدر تطلع دبي ب 2 الف تأشيرة و 2 الف طيران و 3 الف إقامة يعني 7 الاف جنية اسبوع في دبي موجود... طبعاً فاضلك الأكل والشرب؛ براحتك بقي شوف الاكل اللي تحبه. يعني لو عاوز ف 10 الاف جنية تروح دبي اسبوع وترجع بس خد باااااالك

*️⃣ الطيران الرخيص بيكون طيارات Narrow Body ودي طيارات صغيرة؛ طيارة صغيرة = طيران منخفض = العوامل الجوية تأثر عليها = هتوصل مرهق... فخد بالك يا عم.

*️⃣ حاجة كمان؛ لما تيجي تحجز الطيران تشوفها غير حجم الطياره Narrow ولا Wide Body... والحاجة دي هي انك متحجزش تذاكرك سوا... يعني مسافر مع 2 صحابك؛ متدورش علي عدد 3 تذكرة... لان سيستم البحث بيدور على طيارة فيها 3 تذاكر جنب بعض... فكده هيزيد السعر؛ عادي افكس واحجز كل واحد لوحده ومش لازم تقعدوا جنب بعض... طبعاً الكلام دا مش للي مسافر مع مراته وعياله...

*️⃣ وأكيد الأعياد والمناسبات والجو دا تبعد عنها؛ مفهوم طبعاً بس كان لازم اقولها تجنباً للي هيسبوا البوست كله ويقولك لالا سعر التذاكر بيختلف الفندق بيختلف حسب المواسم.

ساعات بحس إننا بنحب في مصر نكرر الأمور... يعني زمااان عملوا هرم... يقعدوا ورا بعض يلا أهرامات اهرامات... بعد فترة مسلة.. جميلة المسلة يلا أعملوا منها كثييير لمئات السنين.... حتى عصرنا الحالي... كباري.. حلوه الكباري أديني منها 1000 كوبري كده.

*️⃣ دا حتى في الاقتصاد؛ قرارات.... أزمة في 2016... قرارات عك... كبر الأزمة وخليها خازوق... الله أنا بحب الخوازيق قوي... إنجوي

*️⃣ وغالباً بنعمل أخو 2016... بنكبر الخازوق عشان مينفعش نروحله وهو صغير

*️⃣ عاوز أقولكم إن السوق بدأ يعيد تسعير المنتجات بتاعته على سعر دولار 24-26... يعني التجار المستوردين بقوا يحسبوا سعر السلع باعتبار الدولار بالرينج دا....

*️⃣ طبعاً استمرار الغموض + التجاهل + زيادة قفل البلد = أجري ورا الدولار لأرقام غريبة = عجز الموازنة هيضرب = نعيط كلنا...

الفيدرالي الأمريكي عمال يزود الفايدة؛ والتضخم بيعند معاه؛ وفي نفس الوقت الدولار عمال يتوحش... الدولار الأمريكي بقى في اقوي وقت ليه من عشرات السنين.

*️⃣ الاسترليني فقد أكثر من 20% من قيمته قصاد الدولار خلال سنة؛ ووصل دلوقتي 1.088 وللتذكير أقل قيمة في التاريخ للاسترليني قصاد الدولار كانت بداية 1985 (سنة اتفاقية بلازا الشهيرة)... وكان 1.054... يعني خلاص قرب الدولار يبقي في أقوي ظروفه قصاد الاسترليني.

*️⃣ الين الياباني بقي نفس الموضوع؛ فقد قرابة 30% من قيمته قصاد الدولار اللي بقي في اعلي قيمه ليه من 24 سنة وقرب خلاص يكسر القمة دي ويروح لعصر ما بعد اتفاقية بلازا ( أواخر الثمانينيات).

*️⃣ اليورو برضك مش غريب عنهم وان كان وضعه احسن شوية؛ يعني يادوبك خسران 16-17% من قيمته بس قصاد الدولار وحالته بقت تصعب عالاتحاد الأوروبي خالص.

*️⃣ حتي العملات التقليدية العنيدة قصاد الدولار زي الفرنك السويسري والدولار الاسترالي والدولار الكندي؛ حتي دول وان كان محصلهمش انهيار زي الثلاثي ( يورو استرليني ين ياباني) لكن برضك كل التقارير طالعه انهم بدأوا يرجعوا قصاد الدولار الغشيم.

*️⃣ طبعاً للتذكير الخليج مسعر العملة يعني مفيش تعويم حر وعرض وطلب.

*️⃣ طبعاً لا داعي لإننا نجيب سيرة الجنية المصري؛ يعني العملات المحترمة اللي وراها اقتصاديات محترمة؛ الدولار سفلتها وجابها الأرض... هتيجي عالعملة اللي وراها اقتصاد القش؛ يا راجل كبر مخك... دا احنا داخلين على كوكب مراجيح. واحنا اصلا لو في ظرف عادي هنكح تراب وكنا لمسه ونجيب اكتاف أرض؛ فتخيلوا ظرف مش عادي بقى.

لقاء مارثوني مع صديقي أحمد أبو زيد دروس اونلاين

اللقاء قارب علي 3 ساعات؛ فيلم هندي 😂😂😂

ودا بعد المونتاج 😂

https://youtu.be/2T1eTM2NFL4

الناس عمالة تتريق علي المزايا المدفوعة في تليجرام اللي بحبه 😢😢 ويقولك دي مزايا تستحق الدفع؛ مع ان تليجرام قايلين دي الاشتراك المدفوع دا للدعم المالي لينا.

*️⃣ المهم يا اخي قررت اتجنن وادفع 60 جنية واشترك شهر؛ تحديداً اشترك عشان ميزة Voice To Text

*️⃣ الميزة دي عبقرية يا جدعان؛ تبقي قاعد وسط ناس او في اجتماع وييجي لك رسالة صوتية ومش هتعرف تسمعها؛ بس مش يمكن في حاجة مهمة؟

*️⃣ دوسة واحدة يروح محولك الرسالة الصوتية الي كلام مكتوب؛ وشغالة مع العربي ومع العامية المصرية بنسبة كفاءة أديها 80/90% يعني هتفهم كويس محتوي الرسالة.

*️⃣ والاجمل شغالة وانتا بتسجل رسالة؛ تخيل وانتا بتسجل لحد رسالة صوتيه هو بعت لك رسالة صوتية بتكلم حد؛ عادي كمل اللي بتسجله له ودوس علي رسالته فتحولها ل نص مكتوب.

*️⃣ مبسوط فحت بالميزة لدرجة جالي رسالة صوتية في واتس آب قولت يووووووه لسه هسمعها؛ عاوز اقراها

*️⃣ خدوا بالكم تحويل الكلام لنصوص بيشيل اهم عامل وهو النبرة؛ فتعرف الاخر قال ايه بدون نبرته فلا تعرف هو بيزعق ولا عادي. فساعات يكون في حوار عنيف مع حد ورسايل رايحة جايه؛ وتلاقي نفسك مش بتركز هو قال ايه؛ مركز في ازاي يكلمني بالنبره دي. فشوية وتلاقي رسالة جديدة من الشخص دا فمستمعهاش عشان متسمعش صوت اللي قالها؛ بسيطة؛ حولها نص. تعرف قال ايه من غير ما تضطر تسمع صوت شخص مش بتحبه.

*️⃣ فالمزايا كويسة وحتي بدونها أنا بحب تليجرام وبدعمه ضد الواتس آب في أي نقاشات بوصف استخدام الواتس آب بإننا بنستخدم الحمام الزاجل... وبتخنق كل ما افتحه اكلم حد منه... بحس اني رجعت للعصور الوسطى ورايح لبرنامج مفيهوش جدولة رسايل ولا يعرف يعني ايه تنبيه باقتراب الشخص الآخر منك (يعرف بس share live location وتقعد تفتح تشوف الثاني وصل لفين كل شوية) وميعرفش الواتس يعني ايه قنوات ويعني ايه مشاركة ملفات جيجا و 2 جيجا... اصلا واتس آب ميعرفش يعني ايه آي باد أصلاً... برنامج من عصر ما قبل 2010 أصلاً عتيق

بس يا سيدي حبيت أعمل تعليق سريع؛ وعارف ان في تعليقات هتيجي بخصوص ايه اخبار الخصوصية في ميزة تحويل الرسايل لنصوص... صراحة معرفش بس اكيد مش تحويل On Device لان محدش في العالم غير أبل والاي فون يقدر يشغل خواص One Device والجميع بيرفع عالسيرفرات يحلل...

فقط نظام ومعالجات أبل اللي تقدر تعملك تحليل محلي... فكده صوتك راح السيرفرات؛ بس متقلقش هو اصلاً هناك 😂

الصورة المرفقة للتوضيح فقط

ليه خدمة العملاء الجيدة في مصر مش من أول مرة؟

*️⃣ كلموني شركة Etisalat Egypt ومفروض تم حل المشكلة بشكل أفضل من المتوقع بكثيييير؛ فمن ناحية أشكر أستاذ أحمد اللي اتصل وتابع... لكن من ناحية ثانية ييجي السؤال المهم

*️⃣ خلال السنة دي حصلي مشكلة مع BOGO plus ومع Jumia ومع Lucky Egypt ومع اتصالات؛ ايوا معلش أنا منحوس شويتين لكني مش عميل عميل غلس بتاع خناق وتصيد؛ يعني مشاكل بوجو و لاكي كانت اني اخش اشترك في خدمة وبعدين ملاقيش الخدمة موجودة 😂 منحوس منحوس.

*️⃣ في أي مشكلة أنا بحب الطرق التقليدية؛ أخش اكلم خدمة العملاء؛ يقولوا لي استني 48 ساعة استني؛ يقولوا استني 5 أيام انتظر... يعني دلوقتي في مشكلة في بنك saib ان الكريديت كارد بتاعي فجأة اتحول ل سالب 37 الف جنية 😂 بجد رصيدي بقى سالب مش بقولكم منحوس؛ وبقالهم أسبوع بيقولوا لي يومين؛ ومنتظر الحل اهو.

*️⃣ المهم أنا مش بعتبر نفسي مشهور؛ كل عدد المتابعين في أي مكان لسه موصلتش 100 ألف أساساً.... لكن بعتبر نفسي محظوظ جداً ب المتابعين؛ فبداية من إن عندي تفاعل عالي مبيحصلش في ناس بيتابعها أضعاف العدد عندي؛ وثانياً محظوظ في قايمة الأصدقاء الصغيرة بتاعتي ال 765 شخص إن فيهم ناس متابعيهم بالملايين.

*️⃣ فلما أحس باليأس من حل المشكلة؛ بروح كاتب علني؛ فهوبا ييجي صديق من المشاهير اللي بيحبوني يتفاعل ويشير... هنا بقى قسم السوشيال ميديا في جهة المشكلة ينور عنده لمبة حمراء؛ ويطلع أوامر إن المشكلة الفلانية تتحل.

*️⃣ فهنا يظهر موظف خدمة العملاء الاسطوري المثالي؛ اللي هو شخص لبق جداً وهاااادى ومعاه صلاحيات واسعة ففي دقايق المشكلة اللي يكون بقالها ايام وساعات اسابيع تتحل؛ ومش بس كده دي تتحل وبشكل أكبر بكثير من اللي بتكون متوقعه؛ بجد حرفياً شغل يحسسك انك خرجت من مصر....

*️⃣ طب ليه يا جدعان؛ ليه ميبقاش الموضوع من أول مرة؛ ليه متزودوش في الموظفين ال VIP دول؟ هل خسارة للشركات مثلاً وجودهم؟ ولا الشركات مبقاش فارق معاها العملاء الا لو اكتشفوا ان العميل دا مشهور شوية او بشكل ما ممكن يعملنا دوشة وصورتنا... والكلام مش لشركة محددة وموضح فوق اني قابلت عك مع شركات كثير في مختلف المجالات.

*️⃣ على فكرة العميل العادي برضك مهم؛ والعادي بيكلم أصحابه ومعارفه؛ بالعكس العادي أخطر لانه بينتشر بهدوووء وهوب تلاقي سمعتك اتضربت ومش لاقي مشكلة كبيرة حصلت... حاجة زي صغار أو محقرات الذنوب؛ صغيرة بس كثيرة فتعمل جبل.

الشيء اللي يضحك اني بتكلم عن خدمة العملاء وأنا اصلا يدور علي موظف عندي للسوشيال وكده 😂 صدفة وتصادف؛ فاللي بنشتكي منه بنعاني منه وهو البحث عن موظف جيد 😂😂.

نشرت البوست دا الصبح في الفيسبوك ونسيت أنشره هنا

طيب عشان احنا داخلين سيناريو 2016 كوبي بيست فنتعلم من اللي حصل فينا. ف لو انتا عندك أي التزامات بتسددها خارج مصر بالفيزا؛ حاجات زي إيجار سيرفرات أو اشتراك خدمات؛ حاول تدفع مقدماً سنة لو عندك ملائة مالية... مفيش أدفع 3 شهور.

*️⃣ البنوك بدأت حملة تخفيض الليميت الدولار وزيادة العمولات؛ الدولار في فيزا بنك مصر النهاردة بقي 20.85 وطبعاً دا بفرض ان التسوية النهاردة لكن اللي هتشتري النهاردة بالفيزا هيتسوي يوم الاثنين بسعر الدولار وقتها... يعني 21 جنية.

*️⃣ ضيف علي دا ان الليميت هيقل فلو بتدفع حاجة غالية شهري؛ ممكن الأسبوعين القادمين تلاقي الليميت بتاع الكارت بتاعك قل ومتعرفش تسدد وتزعل... ف ريح نفسك وأمن شغلك وادفع مقدماً والحق الدولار وهو 20.30 في معظم البنوك قبل ما يحصلوا بنك مصر.

*️⃣ طب ليه بقول لو تقدر سنة؟ لانك بعد شهر هتلاقيه ب 22 إن لم يكن أكثر؛ فدي زياذة تكلفة عليك 10% فلما تحول اشتراكك عادة من شهري ل سنوي فمعظم الخدمات بتديك شهرين ببلاش... فلو فرضنا بتدفع 100 دولار شهري يعني النهاردة 2030 جنية؛ قررت تروح تشترك سنة عادة هتلاقيها ب 1000 دولار يعني 20300 جنية سنة... يعني الشهر بقي 1690 جنية...

*️⃣ قول لا خليني شهري؛ قشطة نوفمبر او ديسمبر تلاقي الدولار ب 22 عالاقل بالبنك ورسوم الفيزا 6% يعني ال 100 دولار تكلفك شهري 2332 جنية يعني 40% زيادة عليك.... طيب ليه 🤔

*️⃣ تخيلوا اللي شغلهم بيدفعوا الالاف الدولارات شهري بالفيزا لخدمات؛ زيادة 40% تكلفة تزعلك.. دا لو لقيت ليميت تدفعها أصلاً
اديني قولت عشان اللي حصل فينا في 2016 مش ناسينه.

في صديق بيسألني هو مش غلط تقول للناس اللي عنده اشتراكات وسيرفرات وخدمات يروحوا يسددوها في أقرب وقت؛ طب هو مش دا هيسبب ضغط عالدولار 🤔

⬅️ الاجابة ببساطة؛ أنا بدي نصيحة لناس عندها حاجة مهمة؛ في ناس عندها ايجار سيرفرات شغلها ولو متدفعش شغلها يقف؛ ناس عندها اشتراكات برامج وخدمات بتدفعها...

*️⃣ أنا لا قولت لحد يشتغل في العملة ولا يشتغل شمال؛ أنا بدي نصيحة للناس عشان ميتخربش بيتها؛ ودا منطقي لان مش عشان الدولة عندها سوء ادارة موارد فشخص ملوش ذنب يتخرب بيته عشان مش عارف يسدد ايجار سيرفر بتاعه.

*️⃣ كده وضحت عشان كل شوية مينشن وسؤال

*️⃣ تحس الناس عاوزة تحور كلامك عشان توديك في داهية؛ متخافوش انا الضرايب متوصية بيا بقالي كام شهر فرايح رايح هنا؛ مش لازم جهات تانية مساعدة للضرايب 😂 كفاية.

*️⃣ وبطلوا تحوير لكلامي هتودوني في داهية؛ هرجع احكي لكم عن الضرايب واخليكم تقولوا كله راااايح مفيش فايدة 😂😂😂

سبت الفيسبوك شوية وارجع الاقي في ترند اسمه (انتش واجري)؛ كل شوية اسفاف أكثر من اللي قبله.

*️⃣ عارفين مقوله (نفسك إن لم تشغلها بالحق شغلتك بالباطل) ؛ فهي نفس الفكرة؛ العقول محتاجة حاجة تدخلها... هو ربنا خلقها كده... كل يوم عاوزة حاجة؛ معلومات بقى أي كان شكلها... وطالما ممنوع الشيء الصح بالأمر؛ فالمخ مش هيقعد ساكت؛ هيدور علي هبل.

*️⃣ الشباب هيدور على قدوه؛ مش معنى انك بتخفي القدوة الكويسة فخلاص الشباب والمراهقين هيطلعوا بدون قدوة؛ لا خالص هيدوروا علي أي حمار ويقتدوا بيه. كده كده فطرتهم هتخليهم يبحثوا عن حد يمشوا وراه.

*️⃣ زي البشر من بداية الخلق؛ ربنا خلقهم جواهم فطرة اتباع وتبعيه حاجة؛ عارفين ربنا فعبدوه؛ لما اختفت عبادته؛ فضلت مشاعرهم بتدور؛ راحوا عبدوا اصنام واشجار وحيوانات ووو... حتى اللي قرروا يلحدوا دلوقتي؛ فعلياً مألحدوش هما عملوا الهه جديد اسمه (الإنسان ورغباته) ويجب اتباع هذا الالهه الجديد وتنفيذ رغباته.

*️⃣ دي الخلاصة لكل ترند هتشوفوه؛ فراغ وفي نفس الوقت طبيعتنا اللي ربنا خلقها عاوزة تدخل Data؛ وهتدخل داتا... في غياب القدوة الحسنة هتطلع كل رقاص وهلاس وكل طبال ووو تاخد منه الداتا... كده كده اخر اليوم مش هتنام بدون قدر من الداتا تدخل عقولنا.. دورك فقط تختار نوعها مش أكثر.

من كام يوم د. أشرف إبراهيم المخبر الاقتصادي عمل حلقة رائعة عن صناعة السيارات في المغرب وازاي هي وصلت للمستوي دا.

ومن شوية معرض الخليج للسلع الشهير GITEX أعلن عن إطلاق نسخة أفريقية منه GITEX Africa وهتكون فييين 🤔 المغرب طبعاً

خلينا احنا قاعدين كده والعالم بيجري

المشكلة إن اللي بيجذب العالم مش المباني البراقة الجميلة؛ اللي بيجذبهم شيء أساسي وهو القوانين السهلة الواضحة والانفتاح الاقتصادي الحقيقي وحرية التجارة وتطور المنظومة البنكية... اه البنوك مهمة قوي في البيزنس وحتى في بيان اطلاق جايتكس أفريقيا اتقال إن قارتنا السمراء هي أسرع سوق بنكي نمواً في العالم...

ايييه ملناش دعوة احنا؛ خلينا في حفرتنا 😔😔

اه بالمناسبة؛ الاستاذ اللي رايح التعليقات عشان يكتب فين لينك الحلقة بتاعة المخبر الاقتصادي والمغرب ؛ جربت تستخدم جوجل كده قبل ما تسأل؟ جرب جوجل.. أو اقولهالك بالطريقة بتاعتة الاعلانات (لقد كنت أعاني من مرض السؤال عن كل شيء؛ ثم استخدمت جوجل ووجدت انني يمكنني الوصول للأجوبة بسهولة؛ جربوه الآن فهو رااائع)

يا جدعان؛ كلاكيت المرة رقم ألف

*️⃣ لا يوجد دولة بتعجز عن سداد دين بعملة هي قادرة علي طباعتها؛ وعارف هتقولي بس في قيوذ اصل في مش عارف ايه... ايوا في بس في النهاية لو الخيار هو طباعة او ازمة فالطباعة اسهل...

⬅️ معلش هعمل كمان مرة الاقتباس التالي من بوست قديم

*️⃣ في 2011 اتسأل آلان جرينسبان حاكم الفيدرالي الأمريكي السابق هل ممكن أمريكا في يوم تعجز عن سداد ديونها؟

فرد وقال

Well, The US Can Always Print Its Way Out Of Debt So there is zero probability of default

*️⃣ فمش كل ما الحكومة تعلن عن حاجة تقولوا مش هتسدد... شهادات قناة السويس... خدوا بالكم مش هتسددها لكم لما تخلص؛ هيضربوا عليها... وعادي الحكومة سددت....

*️⃣ لما الحكومة نزلت شهادات ال 20% ثم 18% وحاليا نفس الحوار برضك مع شهادات ال 18% طلع ناس قعدوا يحسبوا ويقولوا للناس الحقوا مش ممكن الحكومة تعرف تسدد الرقم دا ووو... وعااادي الشهادات شغالة والفوايد بتتصرف شهري....

*️⃣ دلوقتي نفس الحوار في موضوع العربيات؛ خدوا بالكم الوديعة اللي بفلوس الجمارك ؛ بعد 5 سنين الحكومة مش هترجع لكم فلوسكم تاني بالجنية.... طيب ليه حضرتك؟ هي مطبعة شارع شريف بايظة؟ طب خلاص مطبعة شارع شريف بايظة؛ طيب المطبعة الجديدة نوفي بتاعة العاصمة الإدارية مش هتعرف تطبع لكم شوية ورق ملون؟؟؟ الحبر خلص مثلا؟

*️⃣ أصلاً الحكومة عادة مش بتطبع؛ دي بتخش علي الحساب وتزود... يعني مثلا تستلف من البنك الاهلي 100 مليار ؛ وقت السداد مفروض المركزي يرد ال 100 مليار للبنك الأهلي... انتم فاكرين ان المركزي هيعبي عربيات نص نقل فلوس؟ لا خالص دا ببساطة بنك البنوك... يعني انتا ليك رقم حساب في البنك بتاعك صح؛ اهو البنك بتاعك دا ليه رقم حساب بقي في المركزي... عاوز ال 100 مليار بتوعك؟ قشطة... يكتب رقم الحساب؛ يعمل اضافة 100 مليار؛ يدوس انتر... يلا شوف حسابك عندنا يا بنك يا اهلي هتلاقيه زاد 100 مليار....

*️⃣ هو ما سبق تبسيط قوي لكن عمليا دا اللي بيحصل فعلاً... فلوس البنك الأهلي مثلاً في مثالنا اتردت عالسيستم... يوم بقي ما الاهلي يقول المركزي عاوزين فلوس من حسابنا عشان العيد... المركزي يقوله من عيوني تحبهم فئة ايه؛ هطبع لك شوية طازة وبتلعب لسه 😁.... وبالمناسبة يوم ما الحكومة تقول للاهلي عاوزة 100 سلف يقولهم خدوهم من حسابي 😂... والحكومة تاخد الفلوس كده عالسيستم... عاوزة تحاسب مقاول؛ تعمله تحويل لحسابه... الفلوس بتتحرك افتراضياً... المطبوع دا اقل بكثييير من اللي بيتحرك فعلياً.

*️⃣ ف كبروا مخكم ومتفكروش في هل هتعجز الحكومة عن سداد دين بورق ملون طباعة محلي... فكروا بس في الدين اللي بالأخضر... العملة اللي متقدرش تطبعها...

⬅️ آخر حاجة وهي اللي هيسألني ويقولي رأيك ايه في حوار سيارة المغتربين... فرأيي انه قانون حلو؛ بس كالعادة افلح ان صدق؛ وننتظر الائحة التنفيذية... عشان عارف ان دايما القوانين في مصر زي صور انستجرام كده؛ كلها فوتوشوب... لكن الواقع مختلف كلياً

يا جدعان بلومبيرج مقالتش إن الدولار هيبقى ب 24.6 جنية خالص

*️⃣ الكلام كان تحليل للوضع وبيقولوا مصر عشان تسيطر على عجز الميزان التجاري بشكل كويس لازم الدولار يوصل 24.6 جنية.. يعني ايه بقى؟

*️⃣ هو دلوقتي لما سعر سلعة يزيد مش بتقلل شراءها؟ فهي دي الفكرة لو الدولار زاد ل 24.6 دي طبقاً للتحليل بتاعهم ففي منتجات مستورده هيقل استهلاكها بشكل كبير وبناء عليه الواردات هتقل فعجز الميزان التجاري هيقل...

*️⃣ وخد بالك الواردات هتقل مش هتقف لإن في سلع هتفضل تستوردها مهما وصل سعر الدولار؛ عشان كده هما قالوا ودي منقوله بالنص من المقال بتاعهم

to bring Egypt’s trade deficit to a reasonable level

*️⃣ أما بالنسبة لسعر العملة فقالوا إنها في العقود (اعتبرها تحوط للتسهيل وخلاص) آجل شهر ب 21.7 جنية وآجل 3 شهور ب 22.9 جنية. ومن هنا جه توقع انخفاض 14% دي عشان المستثمرين العالميين مش مقتنعين بسعر 19.7 الحالي وبيتعاملوا في الاتفاقيات على انه 21.7 دي و 22.9 جنية اللي فوق

*️⃣ بس اللي قاعد مستني إنه ينام يوم ب 19.7 يصحي يلاقيه 22 فدا مش متوقع... والتقرير نفسه قال كده نصاً

*️⃣ Egypt may opt for a faster pace of depreciation of the pound, rather than another one-time devaluation as a sharper move in the currency risks fueling price pressures

*️⃣ معنى الكلام دا ايه؟ معناه باختصار إن نفسياً الشعب بيتأثر بالتحركات العنيفة... يعني فاكرين يوم عيد الأم 21 مارس لما طارق باشا عامر قرر فجأة يزود السعر من 15.75 ل 17.5... زيادة 175 قرش... البلد كلها فضلت تتكلم عن الدولار والجنية وسواقين الميكروباص زودوا الأجرة ووو البلد فجأة ضربت

*️⃣ طيب من مارس لدلوقتي زاد 220 قرش يعني أكبر من زيادة مارس ... بس بهدوووء... المركزي كل يومين كده يزود 10 قروش... فال 10 قروش دي مش هتخلي السوق يزود السعر بنفس السرعة والحدة...

*️⃣ فالتوقع الحالي بقى إن وتيرة الزيادة الأسبوعية دي تزيد... لو هو كل أسبوع يزود 15 قرش يخليهم 25/30 قرش... بحيث براحة خالص كده

*️⃣ فمن الآخر كده وأسف للتشبيه التالي الغير مهذب التالي بس أقرب تشبيه هو سياسة ادهن فازلين عالخازوق وبهدوووء... طالماً لو قررت تزود 2 جنية الدنيا هتتقلب... يبقي براحة وبهدوء بالتدريج تزود ال 2 جنية بس شلن علي بريزة كده ... فالخباثة كده.

*️⃣ طبعاً السياسة دي بتطلع عين أي منتج لسلع؛ يبقى قاعد مش فاهم يسعر بكام يا عم؟ مهو كل أسبوع الدولار بسعر جديد... لكن مش مهم خليه يزود الأسعار وهنطلع نشتمهم ونقول ليه يعني الزيادة في الأسعار دي؟ هو الدولار زاد كام يعني الأيام الماضية؟ 10-15 قرش؟ هي دي تستحق زيادة الأسعار يا جشعين يا مفتريين...

بس كده وصلت بقى

دلوقتي التضخم الرسمي وصل 18% ودا رقم ضخم اقتصادياً... الدول المتقدمة ب تستهدف ان الرقم يبقي ما بين 1% إلي 2% وفي مصر عادة بنستهدف 5-6%... المهم بقى في سؤال متكرر وهو (هل خلاص جبنا النهاية للارتفاعات؟) يعني السوق بقى خلاص مسعر البضاعة على أساس سعر دولار 23 و 24 و 25 كمان... فخلاص بقى كده جبنا آخر الزيادات ومفيش حاجة تاني ممكن تحصل؛ يعني لو زود المركزي الدولار ل 22 فعادي البضايع متسعره علي 24 فعادي مفروض مفيش تأثير... صح الكلام دا ولا مش صح؟

*️⃣ لما حد من أصدقائي بيسألني عن المستقبل القريب بقوله عندي فضول أعرف هيتم إدارة الأزمة إزاي وبص معايا المشكلة الحالية.

*️⃣ دلوقتي عندك تضخم رهيب 18% بينما فائدة الإيداع الرسمية في مصر 11.25% يعني فعلياً الفائدة البنكية الحقيقية تقارب سالب 7%... وحتي لو استثناء يعني حسبت عالشهادات الخاصة ال 14% فبرضك الفايدة الحقيقية - 4%

*️⃣ العلاج التقليدي اللي كلنا حافظينه للتضخم هو ايه؟ رفع سعر الفائدة... طيب مين أكبر مقترض في مصر؛ الحكومة ؛ يعني طبقاً للموازنة الحالية الحكومة مستهدفه اقتراض 1377 مليار جنية... يعني ال 1% زيادة تعني 13.77 مليار جنية... يعني لو المركزي زود الفايدة 4% يعني بالنسبة للدولة زيادة 55 مليار جنية زيادة في بند خدمة الدين.

*️⃣ طب ما عادي يعني دي ديون بالجنية؛ قشطة نزود ونستلفها... ماشي يا سيدي عادي لكن زيادة الفايدة بتعمل ايه؟ بتسحب السيولة من السوق.... طيب ايه اخبار السوق حالياً؟ ركود رهيب... فاسحب السيولة هتؤدي لزيادة الركود... زيادة الركود معناها انخفاض أرباح الشركات... وبالتالي تضر في الحصيلة الضريبية؛ فكده عجز الموازنة يزيد تاني.

*️⃣ يعني زودنا الفايدة فهنحتاج فلوس أكثر لتمويل فارق القروض؛ وكمان هتقل الحصيلة الضريبية فهنحتاج فلوس أكثر عشان نعوضها... هنحتاج فلوس أكثر يعني هتستلف أكثر؛ هتستلف أكثر دي بالفايدة العالية.

*️⃣ تعالى بقى للدولار؛ احنا متخيلين إن التأثير قد تم؛ والسوق بقي متسعر على سعر دولار متوسط 23-24... صحيح ومش صحيح الكلام... هي البضائع متسعره كده لكن ايه أخبار الدولة؟

*️⃣ الديون الحكومية بتسدد بالدولار الرسمي؛ الحكومة تاخد 19.7 مليار جنية تديهم للمركزي وتاخد مليار دولار تسددهم... طيب الدولار بقي 21 كده في 1.3 مليار جنية زيادة عاوزينهم؛ هنجيبهم منين؟ بالقروض؛ يلا لف اللفة بداية البوست تاني.

*️⃣ طيب الحكومة لما بتستورد البترول والقمح أو حتى بتحسب سعر الغاز والمازوت المستخدم في انتاج الكهرباء؛ بيتحسب الدولار الرسمي.

*️⃣ بصوا مش هدخلكم في حسبة برما وكفاية لخبطة... وزير المالية وضح إن زيادة سعر الدولار 1 جنية تعني زيادة الدين 84 مليار جنية... وبالنسبة للبترول فهو مسعر بالموازنة علي 80 دولار؛ وزيادة 1 دولار في سعر البترول تعني 1 مليار جنية بالعجز... فعاوز تتخيل زيادة سعر البترول وزيادة سعر الدولار الاثنين؛ هيعملوا ايه فينا.

*️⃣ المهم زيادة سعر الدولار الرسمي هينتج عنه زيادة تكلفة العيش والبنزين والسولار والغاز والكهرباء... دلوقتي الحكومة عندها خيار من اثنين؛ الأول تثبت الأسعار للمواطن؛ ودا ميزته تخفيف الاعباء المباشرة؛ لكن عيبه ان كده الدين الحكومي يزيد فكده الحكومة هتروح تستلف أكثر بالفايدة المرتفعة.

*️⃣ الخيار الثاني هو إن الحكومة تمرر الزيادة للمواطن؛ يعني تمول العجز من جيب المواطن ك زيادة أسعار مباشرة ؛ دا ميزته إن مفيش أعباء مباشرة عالحكومة بس فيه مشكلة؛ زيادة أسعار الطاقة هيخلي سعر كل السلع تزيد؛ معني زيادة سعر السلع ايييه ؟ زيادة التضخم... برافو... تضخم زيادة يبقي البنك المركزي يعمل ايه؟ يزود الفايدة؛ ومين أكبر مقترض؟ الحكومة.

*️⃣ يعني من الآخر الاقتصاد مترابط؛ الحكومة هتلبس الشعب زيادة الأسعار؛ هتترد للحكومة في تضخم وزيادة الفائدة... يعني هما لابسينها لابسينها.

⬅️⬅️ طيب ايه الحل؟

*️⃣ اهو دا السؤال اللي قاعد مستني اشوف خطوات الحكومة ايه... الحل المثالي هو تدبير موارد غير تقليدية؛ يعني أجيب فلوس من حاجة جديدة؛ زي موضوع السيارات للمغتربين؛ وكذلك بيع الأصول المملوكة للدولة.

*️⃣ يعني بالبلدي؛ هيحصل عندي عجز مثلا 50 مليار جديد؛ فلو روحت لمتهم من المواطن ضرايب؛ هزود معدلات الفقر ؛ ولو زودت سعر السلع؛ هتضرب في التضخم والفايدة؛ ولو روحت اخدتهم قروض هدفع فايدة عالية... لكن لو لقيت أصول تتباع وتجيب ال 50 مليار؛ فكده حل مثالي..

*️⃣ طبعاً في حل تاني مع السابق وهو التقشف الحكومي؛ وتقشف حقيقي... مش زي ان مجلس الوزراء يروحوا كلهم العلمين؛ يتحركوا 250 كيلو ب عشرات السيارات والحراسة؛ َيعملوا اجتماع في العلمين علي إضاءة منخفضة لتوفير الكهرباء... يا راجل 😂... عاوز توفر يبقي كل وزير من بيته يعملوا فيديو كونفرانس... مش اصرف ملايين في التنقل ثم اقفل لمبة موفرة واوفر لي 50 جنية اضاءة.

*️⃣ طبعاً الحلول السابقة هي للطوارئ؛ يعني حلول يلا ننتج ونصدر ووو دي حلول طويلة؛ محتاجة سنين عشان تشوف المردود بتاعها... وانتا اصلا مش معاك تعيش للسنة القادمة بدون تقشف وحلول...

*️⃣ اكتفي بهذا القدر؛ وخلينا نتفرج ال 6 شهور القادمة هيتم ادارتهم ازاي... بس صدقوني كل اللي شوفناه في 2020 و 2021 و 2022 حمادة؛ واللي هيحصل ال 6 شهور القادمة حمادة تاني خالص... اللي فات كان مجرد حمية وتسخين... عشان الناس فعلا بتتكلم ان خلاص الزيادات حصلت... لا حضرتك دا احنا لسه في ال Demo ولسه مدخلناش اللعبة

هو ليه التركيز الأساسي إن ازمة مصر في الاستيراد؟ مع إن أزمتك الحقيقية في التصدير...

*️⃣ يعني لما بتبص عالكوكب؛ مصر بترتيب السكان رقمها 14 عالعالم؛ فلما بتبص في الاستيراد رقمنا 40 وتقريباً الواردات 78 مليار ؛ هتلاقي دول زي الإمارات اللي سكانها أقل من 10% من سكان مصر وارداتها 188 مليار؛ والسعودية اللي سكانها ثلث مصر بتستورد ب 144 مليار والدنمارك اللي سكانها 5% من مصر بتستورد ب 97 مليار... ودولة قريبة مننا في السكان زي تركيا 85 مليون بتستورد ب 220 مليار... دا ولاد المبقعة جيرانا وارداتهم قربت تبقي زي واردات مصر... يبقي كده واردات مصر طبيعية بالنسبة لدولة بحجمها وخاصة إن جزء منها إجباري زي الأغذية والبترول مهواش رفاهية...

*️⃣ لكن لما تيجي تبص عالصادرات تلاقي خلل رهيب؛ مصر رقم 60؛ فمثلا الإمارات اللي قولنا فوق وارداتها 188 مليار؛ وفي إحصائيات أخري زي OEC بتقول انها 214 مليار دولار؛ وتعالوا نبص صادارات الإمارات كام من نفس الموقع؛ هتلاقيها 216 مليار... كده يبقي وضحت... مش مشكلة تستورد ب 214 مليار طالما هتصدر ب 216 مليار.

*️⃣ طبعاً الشخصية الفزلوكة العتيقة هتطلع تقول يا عم بترول عندهم بترووول... ولو سمعت دي تعرف ان تفكيره متطورش آخر 20 سنة... طيب ال 216 اللي الإمارات بتصدرهم في منهم كام بترول؟ يا تري 200؟ لا... طيب 150؟ برضك لا... طيب النص 108 مليار؟ برضك لا... طيب 40% من صادراتها بترول يعني 87 مليار؟ برضك لا... يبقي ثلث الصادرات بترول يعني 72 مليار؟ بص هو لا برضك لكنه قريب... 70 مليار دولار بترول و 146 غير بترول... واخد بالك كام غير بترول؟ 146 مليار دولار... عارف مصر بتصدر كام سنوي كله بترول وغير بترول من نفس الموقع؟ هما 33 مليار دولار ؛ دا صادرات الإمارات من المجوهرات والمعادن النفيسة بس أكثر من 42 مليار دولار.

*️⃣ فهنا لازم تقف وتفكر؛ نعمل ايييه... بلاش تقعد تفكر في عاوزين نصنع اللي بنستورده؛ احنا بنستورد موبايلات كثير يبقي نصنعها؛ احنا بنستورد عربيات يبقي نصنعها... يا عم بلاش تخلف... شوف مجال تعرف تنافس فيه عالمي ودوس فيه؛ صنع قميص وبنطلون وبدل بس احترفهم وصدر منهم ب 100 مليار ؛ وطز في الموبايلات حتي لو هستورد منها ب 20 مليار.

*️⃣ مفيش دولة متقدمة بتصنع كل حاجة؛ أكبر دول مصنعه هي أكبر دول مستوردة... المهم تعرف تصدر وليس المهم تقلل الاستيراد... تقليل الاستيراد دا حل الفاشل.

*️⃣ عندكم احصائيات الكوكب؛ لو دولة بتصدر ب 500 مليار ؛ وشاطرة وناجحة؛ هتلاقي الاستيراد بتاعها 400 او 450 مليار... هو كده مفيش خيال هصدر ب 500 وتفضل الواردات بتاعتي 75 زي ما هي... دا الصين نفسها بتصدر ب 2650 مليار دولار... بتستورد ب 1550 مليار وهنا الشطارة إنها عرفت تخلي الصادرات أعلي 70% من الواردات... ودا مثال الناجح جدا الصين... ألمانيا تنين أوروبا الصناعي بيصدر ب 1330 مليار وبيستورد ب 1110 مليار يعني الصادرات أعلى 20% من الواردات. اليابان بتصدر ب 623 وتستورد ب 581 يعني 7% زيادة وكوريا الجنوبية بتصدر ب 531 وتستورد ب 446 يعني 19% والأخيرة جمهورية الصين الديمقراطية (تايوان) بتصدر ب 374 وتستورد ب 259 مليار دولار يعني 44% ودي تايوان يعني عملاق أشباه الموصلات.

*️⃣ فلو عاوز تحل وتتقدم؛ اتفضل فكر ليه معندكش تصدير؟ لو لقيت السبب عقبات بيرقراطية يبقي تحلها؛ لو السبب بيئة العمل مش كويسة تشوف ايه اللي مدمر بيئة العمل في مصر؛ لو السبب ضعف العمالة الماهرة يبقي تعمل مشروع ضخم تصرف فيه مليارات لتأهيل العمالة واعادة هيكلة التعليم كله وخاصة الجامعي والحرفي ووو... لو السبب قوانين متخلفة لسه موجودة تشيلها... لو السبب الفساد تعمل حملة تطهير ضخمة ونلاقي في الجرايد يوميا عشرات الفاسدين محالين للنيابة مش كل شهر شهرين واحد وكإن الواحد دا هو سبب الفساد.

*️⃣ ومهم جداً تعترف بالمشكلة ومتحورش؛ يعني مينفعش تطلع تقول في سنة كذا جالنا استثمارات اجنبية ب 5 او 10 مليار دولار... معلش وضح لي هي منطقتك ال MENA جالها كام؟ لو لقينا اللي جه 20 مليار ومصر اخدت 5 يبقي برافو اخدت ربع استثمارات المنطقة الجديدة... انما لو لقينا جه 100 مليار للمنطقة وانتا أخدت منهم 5 فهنا دي 5% ففشل ذريع.

*️⃣ خلاف ذلك ؛ انسي؛ محدش يقولي هيحصل وهنتقدم ووو... مفيش الكلام دا ومش هيحصل... حضرتك احنا صادراتنا حالياً أقل من عهد مبارك... احنا بنرجع للخلف... شوف ترتيبك في مؤشر التنافسية ومؤشر سهولة الأعمال وحش ليه وايه نقاط الضعف واشتغل عليها.

*️⃣ بالنسبة المؤتمرات؛ أتمني تنجح وينتج عنها قرارات حقيقية والأهم تتنفذ؛ المهم التنفيذ التنفييييذ مش الكلام؛ وصراحة في إعادة تشكيل اقتصاد عالمي فمفروض في فرصة كبيرة لمصر لو اشتغلت؛ مصر وغير مصر؛ في استثمارات بتغير مكانها من دول كثير؛ فيا تري هتعرف تخطف منهم شيء ولا هنقعد نتفرج عليهم معديين؟ ونشاهد عالهواء مباشرة إعادة توزيع خريطة الاستثمارات. 🤔

مرحباِ بالتعويم رقم 3

من يومين حوار بيني وبين صديق ليا وشريك

*️⃣ أنا : على فكرة أنا بفكر أعمل كذا كذا في الشغل ايه رأيك؛ بس قلقان من صندوق النقد

*️⃣ صديقي : ليه بس ايه هيحصل يعني؟

*️⃣ أنا : في وفد من صندوق النقد جاي مصر؛ فأنا مقلق الحكومة لما الصندوق ييجي تحب تجاملهم بشوية قرارات؛ وبعد ما يمشوا شوية تانيين...

*️⃣ الحكومة : انتا عبيط يا بن سامي؟ يعني الوفد هييجي بعد اسبوع؛ هننتظر ييجي عشان القرارات؛ لا طبعاً؛ القرارات تطلع قبل ما الصندوق ييجي وهو لما يشرف بداية الشهر كده يقولنا ايه رأيه كفاية ولا نعمل شيء تاني

*️⃣ بس يا شباب والقرار صدر النهاردة بإطلاق سراح الدولار يطلع زي ما يطلع وكل عام وانتم بخير...


⬅️ ملحوظة : معرفش هيحصل ايه ادينا هنتفرج ايه هيحصل؛ وأصلا النهاردة بالذات راحت عليا نومه؛ صحيت قريت بيان المركزي (دوروا عليه عالنت وبلاش كسل وتقولوا فين) وقعدت اضحك وبعدين كتبت السطرين دول.

بس اتمني المرة دي يكون تحرير منطقي؛ يعني حركة سريعة للدولار وليس قفزات دولاريه؛ كده يبقي صح. بلاش غباوة. ولا اقولكم... الغباوة عادة هي اللي بتنجح عندنا؛ اديها زي ما تديها.