هو واضح ان مقولة ذاكرة العوام 3 أيام حقيقية؛ الناس فعلا نسيت أيام مبارك ففاكرة ان الحياة كانت احسن. فاللي ناسي نفكره بشوية أمور اقتصادية وليس سياسية واجتماعية.

*️⃣ مبارك لما مسك الحكم في مصر سنة 1981 فتح حنفية القروض؛ استلف من الجميع بلا حساب... استلم الحكم بديون خارجية 22 مليار دولار... وطلع قال مصطلحات عنق الزجاجة ووو؛ وفتح حنفية القروض؛ دا قرض عشان نعمل مترو الانفاق ودا قرض عشان نسدد قرض قديم ودا قرض عشان مش هنقولكم بتاع ايه وهكذا... وبحلول عام 1991 كانت وصلت ل 70 مليار دولار والرقم دا مش دقيق وكمل بس.

*️⃣ الدين المصري ال 70 مليار دولار كان كارثي وقتها ؛ مصر كان عندها ازمة كبيرة وهي التخلف عن سداد الديون؛ لكن الحكومة كانت بتسعى ان دا ميحصلش فكانت النتيجة انها بتسحب من كل الموارد وتقلل من توفر السلع المدعمة...

*️⃣ عارف دلوقتي الحكومة بتعلن عن تضخم كام؟ 14-15% واحنا عمالين نعيط من الغلاء... عارف سنة 1991 الحكومة اعلنت عن كام تضخم؟ 20.7%... فتخيل وقتها الغلاء كان ازاي.

*️⃣ حرفياً الناس مكانتش لاقيه؛ والدولة الشفافية فيها عالية فمقالتش حاجة وتفاصيل... والبلد عايشة فترة 1990-1991 اليوم ب يومه زي ما بيقولوا... طبعا الظروف خدمتنا؛ فاكرين ايه حصل في فترة 90-91... صدام حسين دخل الكويت.

*️⃣ واتعملت قمة عربية في مصر في 1990 ثم قمة اخري في 1991؛ ومصر بعتت قوات في تحرير الكويت... لكن دا مكانش مجاناً

*️⃣ تحالف الدائنين (نادي باريس) قرر إعفاء مصر من 50% من ديونها بل وكمان اعادوا جدولة باقي الديون؛ ودول الخليج عملت ودائع دولارية في البنك المركزي المصري... غير معروف الرقم الاجمالي كام لكن الكلام ان المساعدات (منح + تخفيض ديون + ودائع) تراوحت ما بين 35 ل 43 مليار دولار.

*️⃣ عاوز افكر الناس ان 43 مليار دولار سنة 91 = 93 مليار دولار في 2022. كل دي مساعدات وتخفيض ديون.

*️⃣ المهم يقال ديونا بعد التخفيض بقت 33-32 مليار دولار... هنا مبارك اخد القرار بإن الدين المصري لن يتجاوز الحاجز دا تاني... البلد يحصل اللي يحصل فيها... مش هنفتح تاني حنفية القروض تحت اي ظرف؛ وللامانه مبارك مشي بعدها ب 20 سنة يعني سنة 2011 كان الدين الخارجي المصري 35 مليار دولار... يعني فعليا هو قعد 20 سنة في نفس معدل الديون. وبالمناسبة الاحتياطي الدولاري كان 35 مليار... يعني الراجل كان ماشي بسياسة ديون مصر أد اللي معاها... بس دا متعملش بشكل بسيط.

*️⃣ هل دا سحر؟ لا خالص هو قال البلد تمشي زي ما تمشي او متمشيش خالص... ايه دا في طلب عالدولار عشان الاستيراد؛ خلاص زود سعر الدولار.

*️⃣ سنة 1990 الدولار ب 83 قرش؛ سنة 1991 الدولار ب 3 جنية... ايوا حضرتك ياللي بتعيط لما زاد من 9 ل 18 يعني 100% ودلوقتي بتعيط لما زاد من 15.5 ل 19 يعني 22%... الناس سنة 1991 شافوا زيادة 360%.

*️⃣ السياسة بقت كده وقتها واللي معهوش ميلزموش... والحكومة كمان حظها كان حلو لإن فترة ما بعد 1991 كان العالم مستقر والاتحاد السوفيتي انحل؛ والخليج بينمو بشكل كبير والرواتب في الخليج محترمة فكان اللي شغال في الخليج يقدر يعول العائلة بتاعته مش مراته وعياله بس عكس دلوقتي يادوبك يعيش كويس.

*️⃣ ضيف عليهم إن حولك مكانتش دبي عملت النهضة الحالية... تركيا كانت في أزمة اقتصادية ضخمة وانقلابات عسكرية؛ الصناعة المغربية مكانتش صعدت قوي... فكان في شوية ظروف يكده

*️⃣ فقررت الحكومة مع صندوق النقد الدولي والبنك الدولي... اه حضرتك صندوق النقد الدولي ؛ ايه مستغرب كده ليه ما أخدنا قرض في 1991 من النقد.... المهم مع الأختين الحلوين دول بدأت معركة الخصخصة... الحكومة باعت 382 مؤسسة مملوكة للدولة... بدأت بالتدريج يعني براحة لإنها في الأول مش مزنوقة مهما مخفضين الديون وعاملين إعادة جدولة؛ لكنها كانت شغالة بنظام تتزنق تبيع... امشي يا عاطف صدقي وتعالي يا جنزوري... امشي يا جنزوري وتعالي يا عاطف عبيد؛ ايه دا دخلنا الألفينات... نمو اقتصادي حولينا ومزنوقين... افتح يا ابني حنفية الخصخصة.

*️⃣ الألفينات والعقد الأخير؛ الحكومة بقت مزنوقة... هنستلف يا ريس من بره؟ لا مفيش سلف إلا في الحدود اللي انا حاططها من ساعة أزمة 1991... طيب هنعمل ايه؟ عوم الجنية... يلا هوبا الجنية كان إمبارح ب 3.4 هوبا بقى ب 5 هوبا بقى ب 6 ووو...

*️⃣ يعني المواطن اللي سنة 1990 كان الدولار ب 0.83 قرش بعد 13 سنة بس لقاه ب 6.25 وأكثر يعني 750%... يعني كده أكننا في مصر سنة 2016 الدولار ب 8.88 فاكرين... يبقى 2029 ب 66.6 جنية... متخيلين ايه حصل في الأسعار والناس وقتها؟

*️⃣ المشكلة إننا صغيرين في السن... يعني عشان حد منا يعاني في فترة 91 فهو لازم يكون متخرج وشغال وقتها يعني مواليد قبل 1970... وعشان تحس بمعاناه 2003 والتعويم وقتها لازم تكون عالأقل عمرك 20-25 سنة يعني مواليد قبل 1980 ...

انا ومعظم اللي هيشوف البوست مواليد بعد 1980 فكنا عيال في حضانه وابتدائي وقت أزمة 90-91 وكنا لسه في ثانوي أو دخلنا الكلية وقت 2003 ففي الحالتين مكناش احنا اللي بنصرف...

دلوقتي احنا اللي بنصرف فحاسين وبنعاني... دلوقتي في سوشيال ميديا فنعرف منه... زمان كان برضك عدم معرفتك بمدى ثراء الآخرين يساعدك عالتحمل؛ لكن دلوقتي تلاقي ناس في الساحل بتاكل طبق فول ب 70 جنية ومسقعة ب 60 جنية وقرص طعمية ب 10 جنية... دلوقتي تلاقي سوبر ماركت جروميه منزل لحم واجيو سعر الكيلو 2500 جنية فانتا تقعد تتحسر... الحاجات دي بتشكل ضغط أكثر نفسي علينا وتحسسنا اد ايه احنا فقرا

واكتفي بهذا القدر وللحديث بقية ان شاء الله

تصحي من النوم تقول لنفسك صباح الخير يا محمد عيد ميلادك النهاردة؛ يلا أمازون عاملة عروض وخاصة مع ماستر كارد خصم 20% لغاية 300 جنية...

شوفلك هدية لنفسك بقي اشتريها بمناسبة عيد ميلادك

*️⃣ يلا هوب علي موقع أمازون والحمد لله اشتريت من الاكونت بتاعي وبتاع مراتي وبتاع الشغل شوية حاجات زي

1️⃣ كراتين ورق A4 للشغل.
2️⃣ بامبرز للاستاذ أرسلان ابني 😭
3️⃣ وايبس برضك للأخ أرسلان مهو لازم مع البامبرز.
4️⃣ فيري لغسالة الأطباق. وآخر منظف غسالة أطباق.
5️⃣ لعبة للآنسة لولي بنتي.

وشوية حاجات كده للبيت والعيال 😁💪

*️⃣ طبعاً الشباب السناجل والمراهقين هيقولوا ايه دا وإنتا دا عيد ميلادك.

⬅️ هقولهم شوية وهتعرفوا إن من أمتع الحاجات ليكم انكم تشتروا حاجة بخصم علي السعر اللي تعرفوه... مهو لما تكون لابس وهتشتري الحاجات دي كده كده... وهوبا تجيب شوية عروض وخصومات توفر 1000 جنية بجد مش وهمي... يبقي انا كده عملت هدية لمحفظتي الشخصية ألف جنية يفضلوا فيها ميطلعوش.. هدية عيد ميلاد دي ولا مش هدية... قولوا لهم يا أصحابي المتزوجين 😂😂

عامة من مكاني هذا أقول لمراتي كل سنة وهي طيبة عشان النهاردة برضك عيد ميلاد مراتي؛ إحنا الإثنين نفس اليوم من باب التوفير 😍😂😍❤️

⬅️⬅️⬅️ تحديث للرد علي تعليقات العروض

دور عالعروض براحتك عادي عالموقع؛ المهم في خصم اضافي لما تدفع ب ماستر كارد كود برومو mc300 ؛ خصم 20%... فمثلا تشوف كرتونة ورق ب 625 جنية هوبا تبقي ب 500 جنية... بامبرز اللي ب 185 وفي فتح الله ب 175 احسن منهم؛ لكن تحط كود ماستر كارد تلاقيه بقي ب 148 جنية... وهكذا

من الحاجات الجميلة اللي بتحصل في السعودية هي التحول الرقمي؛ يا جدعان دول سابقينا بزمن... والموضوع دا واضح قوي آثاره عالسعودية وحتى غير السعودية

*️⃣ ابسط مثال لما تحكم السيطرة بالذكاء الصناعي والتقنيات الحديثة تقدر توفر مليارات بتهدرهم؛ وحتي تقدر تعدل قوانين وقيود كانت موجودة.

*️⃣ يعني كلنا فاكرين القيود في السعودية علي السفر؛ تروح تعمل عمره تلاقي تأشيرة أسبوعين وشركات سياحة هناك وهنا وحوار معقد... ليييه؟

*️⃣ عشان الرعب من انك تسافر وهوبا تهرب وتروح تشتغل وكده ومين هيعرفك عشان يدور عليك وكده

*️⃣ دلوقتي كله كومبيوتر؛ لو دخلت الدولة وعديت المدة بتاعتك هتنور لهم عالسيستم فالدولة كلها هتبقي عارفه مين حيوان هربان ووقت ما تتقفش هتتعلق حرفياً.

*️⃣ ودا خلي السعودية كل شوية تسهل اجراءات السفر ليها وانك تقدر تعمل تأشيرة عمرة أونلابن بدون شركات سياحة مصرية؛ والنهاردة أعلنوا ان تأشيرة العمرة مدتها 3 شهور بل وكمان يا سيدي ليك حرية التنقل في السعودية... قشطة اتفضل اتنقل وروح أي مدينة واصرف فلوس ونشط الاقتصاد السعودي... وكده كده لو كسرت المدة بتاعتك هنعرف نجيبك.

*️⃣ برافو السعودية الصراحة وعقبالنا لما موقع مصر الرقمية اللي معنين موظفين يراجعوا الطلبات الالكترونية 😂 تقدم طلب الكتروني يروح لشخص بشري يتراجع كانك مقدمه لمدام عفاف دور 4 بالظبط 😂😂...

*️⃣ التحول الرقمي في مصر بيفكرنا بماكينة البيبسي ؛ نجيب ماكينة اللي بتطلع البيبسي بدل جو الاكشاك القديم؛ ونعين موظف يقعد جنب الماكينة معاه فكة للناس عشان تستخدم الماكينة 😂 طيب ما كنت تجيب له كشك وخلاص؛ لااااا عيب؛ تقدم وتطور رقمي.

⬅️ طبعاً اللي هيخش يجود ويقولي مصر الرقمية زي الفل وخدمة كذا ممتازة؛ فدا شخص ميعرفش العالم وصل لايه؛ دا زي شخص كان بيصور فيديوهات SD يعني 480p وبعدين جاب موبايل بيصور FHD يعني 1080 فقاعد عمال يقول شايفين الانبهار والانجاز... والكوكب بيتكلم في 2160p اي 4K و 4320p اي 8K... فالمشكلة مش انه منبهر بال FHD عادي هو حر كإنسان كهف؛ المشكلة انه عاوزني أنا كمان ابقي انسان كهف زيه وانبهر بال FHD

لما بقعد أبص عالتصريحات والعقوبات الأوروبية علي روسيا وتعليقات مسئوليها بفطس من الضحك لما بقعد افكر فيها بحسها كالتالي:

*️⃣ ايه يا روسيا الهبل دا؛ احنا عمالين نعمل عليكي عقوبات اقتصادية تدمر اقتصادك؛ فإزاي تلعب بالغاز وتضري اقتصادنا؟ دا استهتار.

*️⃣ ايه يا روسيا احنا خرجنا شركاتنا وقفلناها وطردنا العمالة وشردنا مواطن روس وتلاقيهم مش لاقيين ياكلوا؛ ايه الهبل بتاعك بإنك تلعبي في المحاصيل الأوكرانية وسوق الاغذية العالمي وتضري شعوبنا وشعوب الكوكب دا؟

*️⃣ ايه يا روسيا احنا عندنا خطة منع استيراد البترول والغاز منك عشان ندمر اقتصادك؛ فمش معنى كده انك كل شوية تقللي على مزاجك الغاز! انتيي تضخي لنا سليم عشان نعرف نشتغل ونخلص خططنا ونوقف استخدام الغاز بتاعك بمزاجنا؛ مش تعملي حركات تضر اقتصادنا وتقللي انتي الغاز بمزاجك؟

*️⃣ ايه يا روسيا مش معنى اننا مستولين علي 350-400 مليار دولار من فلوسك في البنوك العالمية؛ انك تجبرينا ندفع بعملتك ولا تروحي تأممي شركات بتاعتنا عندك؛ كده قلة ادب؛ احنا هندفع بالعملات بتاعتنا وبعدين نضرب عالفلوس ناخدها.

*️⃣ ايه يا روسيا مش معنى اننا بتناقش علي تحديد سقف لسعر البترول والغاز الروسي ونختار لك هتبيعي بكام؛ انك تهددي وتقولي لو حصل كده مش هبيع؛ ايه العبط دا هو انتي هتقرري عاوزة تبيعي بكام؟

*️⃣ ايه يا روسيا مش معني اننا حظرنا الطيران الروسي يطير فوق اوروبا؛ تروحي تحظري الطيران الأوروبي يطير فوق روسيا وتزودي 1-2 ساعة طيران علي رحلاتنا لكوريا واليابان والصين ودا يزود التكلفة على مواطنينا غير تكلفة الوقود اللي انتم السبب فيها... لالا كده كثير كثيير.

*️⃣ الخناقة والتصريحات كوميدية قوي؛ تحس ان اوروبا مستغربة ازاي تجرؤ روسيا تعمل حاجات تضايقنا؛ هي ليه مش بتتضرب وهي ساكته؟ دي حرب وبغض النظر عن أسبابها بقي لكن الخلاصة انتا واقف مع عدوي وبتتحرك ضدي فإزاي متوقع اني معملش حاجة... الجماعة الأوروبيين لسه عايشين في عقلية العصر الإمبريالي الأوروبي وفكرة احنا أوروبا نضربك ومحدش يرد

⬅️ زي كده فرنسا لما فضلت تسحب من الجزائر اكل وتمول بيه الحروب بتاعتها؛ ولما الديون تراكمت فحاكم الجزائر قال للسفير الفرنسي فين الفلوس فالسفير رد عليه بشكل مش كويس؛ فحدف حاكم الجزائر مضرب الذباب على السفير... ففرنسا اعلنت دي اهانة واحتلت الجزائر 150 سنة واسقطت الديون بل وشيلت الجزائر ديون عكسية كمان...

ايه دا يا جزائر انتي كمان بتطالبينا بديونك؛ ايه قلة الأدب دي؛ انتم تسلفونا وانتم ساكتين؛ إحنا أوروبا العظمى؛ إحنا 100 عتريس في بعض؛ انا حسحس وحسحس انا 😂

وعندك 0.75% كمان من الحاج الفيدرالي... أديني موجات جديدة من القوة للدولار وما يتبعه من انخفاض قيمة كل العملات بما فيهم الأخ الشملول الجنية المصري.

وهنا يأتي السؤال اللي هنزلكم بوست عنه قريب... مفهوم بتاع غلاء الأسعار ومفروض الحكومة تتدخل لمنع غلاء الأسعار.

رأيكم دا فعلاً كلام منطقي؟ يعني هل فعلاً مفروض الحكومة تتدخل لمنع ارتفاعات الأسعار وجشع التجار؟

ورأيكم تتدخل إزاي أصلاً يعني تعمل ايه؟ تنزل تسعيره في الجرائد زي الستينات؟

دا بوست مفتوح دعوة للنقاش يعني وبالنسبة لرأي الشخصي فدا هيكون في بوست مستقل... دلوقتي عاوز أعرف رأي الناس وايه هيكون طريقة "محاربة جشع التجار" يعني تتعمل إزاي دي بواسطة الحكومة زي ما الناس بتطالب.

يا تري نون مصر هترفع الراية البيضاء وتستسلم امتي؟ هما خلاص عرفوا ان حرب الأسعار مع أمازون + انفاق ملايين عالانفلونسر والبرومو... مش هتقدر تستمر عليه كثير وأمازون عارفه.

أهي البشاير بدأت بعد ما خفضوا العمولات للمسوقين والخصومات للنص؛ وراها اهي بتبلغ التجار برفع العمولة... وتخيل في الوقت نفسه أمازون بتعمل هجمة مضادة؛ بنود منتجات نون هتاخد فيها 9% الي 12% وامازون عندها من 3% ل 6% لنفس المنتجات بحيث تخلي الربحية للتاجر عندها أحسن...

أدينا هنشوف بقي؛ صندوق الاستثمار السعودي أكيد مش هيسكت وهيبعت شوال فلوس جديد لنون مصر تحرقه وتواصل الصراع مع أمازون وإلا فرع مصر هيشهر افلاسه

أدينا قاعدين بقي نتفرج

انتا فاكر إن تسابق البنوك المركزية في العالم لرفع الفائدة دا مضر لدول العالم الثالث وسحب الأموال الساخنة بس؟ طيب بص معايا كده

*️⃣ دلوقتي إنتا شركة X في أمريكا مثلاً... كنت قاعد في بلد فيها معدل التضخم (اللي هو ندلعه مجازاً ونقول فقدان العملة لقوتها الشرائية) تقريباً 2% وعندك الفائدة البنكية 0.5%

*️⃣ فمن الآخر كده المواطن متعود إن فلوسه شبه مش بتفقد قيمتها؛ وبرضك متعود لو حط فلوسه في البنك فهو شبه مش بياخد فائدة.

*️⃣ فالشركة دي لو اشتغلت وحققت 5% ولا 7% صافي نهاية السنة يبقى شاطر وزي الفل كنشاط تجاري ربحي عادي.

*️⃣ لكن هوبا التضخم يبقى 9% والبنوك بتزود الفائدة عشان توقف ارتفاع الأسعار... دلوقتي نفس النشاط بتاعه حصل عنده مشاكل مش كويسة... في البداية معظم الشركات العالمية عليها قروض وبتاخد بشكل مستمر.

*️⃣ يعني تكلفة زيادة عالشركة بزيادة الفائدة؛ كمان المستثمر بقى عاوز أرباح أعلى عشان تعوضه على فقدان الدولار لقيمته الشرائية... يعني الشركات بقت مش بس مطالبه تدفع قروض أعلى لكن كمان تكسب أكثر.

*️⃣ تعمل دا إزاي؟ إما تزود المبيعات ودي مشكلة في حالة الركود العالمية؛ أو تزود هامش الربح ودي مشكلة لإنها هتسبب تضخم إضافي فيروح المركزي مزود لهم الفائدة.

*️⃣ فالخلاصة دلوقتي كل الشركات العالمية بقت مزنوقه؛ تكاليف الإنتاج زادت ك مواد خام + تكاليف القروض زادت + مطالبين بتحقيق أرباح تعوض التضخم = نقفل أحسن

*️⃣ فحتى لو انتا عايش في دولة معندهاش مشكلة الأموال الساخنة ومش هتعيط يعني منها؛ فبرضك ارتفاع الفائدة هيخلي شركاتها تعيط وبالتبعية المواطنين

*️⃣ الفائدة مضرة بالجميع لكنها العلاج الوحيد المعروف في شكل الاقتصاد الحالي للتضخم. ارفع الفائدة؛ وقف الاقتصاد خالص؛ ابدأ براحتك بقي

اه صحيح؛ متنساش لما الأسعار تزيد تقول ايه؟ تقول جشع تجار... برافو عليك شطور

زمان في حد قالي إن اسرائيل لازم تعمل كل سنة او سنتين حرب او معركة او اشتباك او اي لبش

دا عشان تضمن ان كل المجندين في فترة التجنيد عاشوا أجواء الحرب؛ وميبقوش اسمهم خدموا في الجيش ويطلع أخرهم كام رصاصة في مركز التدريب بس اللي شافوهم.

بصراحة كنت مش مقتنع لكن باللي كل شوية يعملوه ولاد الجزمة دول وكل سنة بلطجة؛ شكلي هقتنع فعلا بالتفكير دا

اللهم انصر غزة علي ولاد الجزمة

نرجع للبوستات اللي بتجيب خناقات؛ البوستات اللي كاتبها بقالي فترة ومش عاوز انشرها عشان التعليقات؛ عالعموم المرة دي بخصوص النقطة اللي كنت سألت عليها من فترة وهي (هل فعلاً تقدر الحكومة تحارب جشع التجار؟).

*️⃣ بالرغم من إنه مر أكثر من نصف قرن على نهاية التجربة الاشتراكية لكنها تمكن من برمجة عقولنا بشكل ما ولأسباب مش هينفع نذكرها لعدم إطالة البوست وكذلك منعاً للمشاكل... لكن فعلياً لا نزال مبرمجين علي التواكل على الحكومة.

*️⃣ في الاشتراكية الحكومة بالنسبة للمواطن هي أمه؛ هتوفر له التعليم ثم السكن والوظيفة؛ هتحدد له السلع اللي يشتريها ايه هي وأسعارها كام... وبالرغم من نهاية العصر دا لكن لسه الرواسب مستمرة... ايه دا سعر السلعة X زاد... يا ماماااااا يا مااااماااااا اتصرفي وحاربي لي الوحشين اللي هما سبب زيادة الأسعار. لكن فعلياً ماما الحكومة أصلاً متقدرش فضلاً عن عدم رغبتها في دا لكنها حتي لو عايزة متقدرش وكمل معايا.

*️⃣ في العهد الاشتراكي كانت السلع في الدولة محددة؛ مصانع الغزل والنسيج هتعمل بيجاما مخططة ويلبسها كل الشعب من رئيس الجمهورية لأصغر موظف... السلع في الأسواق محددة؛ شركات الدولة هتعملك السكر ومطاحن الدولة هتوفرلك الدقيق وو...
*️⃣ طب حضرتك أنا عاوز مولتو؟ عاوز تي شيرت اديداس وساعة كذا؛ طيب عاوز انواع اخري من الملابس غير بتاعة الدولة طب سمك سلمون ووو.... بص مفيش ؛ شوف المتهرب وانتا ورزقك بقي...

*️⃣ نعود لموضوعنا وهو هل تقدر الدولة تحدد سعر السلع زي زمان؟ فعلياً دا مستحيل؛ بداية من إن عدد السلع الموجودة دلوقتي مئات أضعاف اللي كانت موجودة زمان لكن قشطة مش مهم نتجاهل دا ونفكر سوى.

*️⃣ أولاً عشان تحدد سعر بيع سلعة يبقي لازم تحدد سعر الشراء؛ يعني مينفعش تقول محل دا يبيع علبة التونة بكذا يبقي لازم تحدد سعر الشراء للمحل من المورد؛ والمورد مفروض تحدد له هو كمان سعر الشراء من المصنع.. والمصنع بقي تحدذ له سعر البيع بناء عالتكلفة... وهنا تعالى معايا.

*️⃣ تخيل معايا عندي 2 مصنع بس وهنفرض هما 2 للتسهيل للتونة.... واحد حدائق كاليفورنيا والثاني دولفين... دلوقتي هتقولهم سعروا منتجكم بكذا بناء على ايه؟ هل مصاريف المصنعين زي بعض؟ واحد عامل براندج لنفسه وبيصرف وصرف كثير والثاني أقل منه... فاللي صارف براندج عاوز يحط سعر اعلي اومال هو حاطط نفسه في صورة ذهنية اعلي ليه.

*️⃣ سيبك من دا؛ التكلفة أصلاً اللي هتحسب ليها بناء علي ايه؛ كل مصنع بينتج جودة مختلفة؛ كل مصنع ليه حجم انتاج مختلف... هتظبط التكلفة ازاي وتعتبر مين فيهم هو الاساس للتسعير؛ ولا هتسعر لكل مصنع بسعر مختلف؟

*️⃣ يعني دلوقتي انتا هتقول للاثنين تبيعوا بسعر زي بعض ولا هتقول لدا انتا العلبة كلفتك 10 جنية بيعها ب 12 اما انتا مصاريفك اعلي العلبة بتكلفك 15 بيعها ب 18 جنية.... طب هل انتا ضامن لي ثبات التكلفة؟ يعني التونة مستوردة فهل هتسعر الدولار ليا ثابت؟ طيب البنزين والكهرباء هتثبتهم ليا؟

*️⃣ طيب التونة اخدناها وودناها للمحلات؛ انتا محل في الرحاب بتدفع ايجار 50 الف جنية؛ وانتا محل في المطرية بتدفع 5 الاف جنية... دلوقتي مصاريف المحلين مختلفين يبقي ازاي هيبيعوا السلع بنفس السعر؟ يبقي كده لازم تطلع قرار توحيد الايجارات.

*️⃣ طيب انا سوبر ماركت كبير زي كارفور بقدر اشتري من المصانع بسعر أقل؛ هل هتحدد لي هامش محدد... يعني ليكن 20% فمحل صغير بيشتري المنتج دا ب 50 جنية يبيع ب 60 وانا كارفور هقدر اخدها ب 40 جنية ؛ لو بعت ب 60 زي المحل الصغير فكده هامش ربحي 50%.

*️⃣ هو مفهوم طبعا وموجود في كل مكان ما يعرف ب RRP يعني السعر المقترح من المصنع للعميل؛ بس خد بالك السعر دا مجرد مقترح مش الزامي... وكمان ما يعتبر السعر المقترح من المصنع جشع تجار... هو السوبر ماركت زود سعر الزيت والجبنة والمكرونة من دماغه؟ كان بياخد زجاجة الزيت ب 20 ويبيعها ب 22 وبعدين نام صحي قرر لا هشتريها ب 20 وابيع ب 30؟ مهي قوايم اسعار جت لهم من المصانع اصلا... يعني انتا معترض من الاساس عال RRP وبتقول عليه جشع تجار.

*️⃣ نروح بقي لمشاكل اكبر؛ قولي هتعمل ايه في سعر الصرف؟ اسعار الطاقة؟ مشاكل الاستيراد؟ يعني دلوقتي الدولة معقدة الاستيراد فعلياً لكن رسمي الدنيا زي الفل... دلوقتي المصنع بيحط هامش تحوط للمخاطر... هتوافق له على دا وتقر ان عندك فشل في الاستيراد فحقه يحط... ولا هتنكر وتقول لا التكلفة دي مش محسوبة؛ وبناء عليه المصنع ممكن يلاقي نفسه خسران يقفل؟

*️⃣ وعلي سيرة المجالات؛ هتحدد هامش الربح علي اساس ايه؟ متقوليش هنشوف عالمياً المجال دا هامش ربحه ايه؛ لان مفيش مجال هامش ربحه موحد... كمان لما تشتغل في بلد تضخمها 2% غير لما تشتغل في بلد تضخمها 20%... فممكن شركة تفتح في أمريكا تكسب سنوي 8% وزي الفل؛ ونفس الشركة لو لقت نفسها بتكسب 15% في مصر تقفل اصلا عشان التضخم وكمان الفايدة البنكية أكبر من ربحهم....

*️⃣ طب بلاش هل انتا فاهم في كل المجالات؟ يعني مثلا مربي الدواجن مفروض يعملوا حسابهم علي هامش اولي عالي لان في مخاطر عالية؛ موجات الحر الشديد او البرد القارص بيموت الفراخ... فهو بيعمل حسابه في الحسابات علي دا ولو معملش حسابه ممكن يلبس ويخسر خسارة فادحة... فهل انتا فاهم في كل المجالات وحساباتها ومخاطرها ووو

*️⃣ طيب الموردين بره لو قرروا زيادة السعر هتعمل معاهم ايه؟ هتجبرهم برضك يسعروا بسعر ثابت؟ طب شركات الشحن العالمية؟ طيب شركة X بتعرف تسلك أمورها بالجمارك وتعدي بسرعة وشركة Y متعرفش؛ هتضيف البنود دي في الحسابات ازاي؟

*️⃣ زي ما قولت فوق زمااان في الستينات كانت البلد مقفولة؛ المنتجات المستوردة نادرة؛ والمحلي إما حكومي أو الحكومة ليها يد فيه... السلع معدودة؛ دلوقتي ممكن عدد أنواع وأصناف وشركات الدقيق في السوبر ماركت تفوق عدد أنواع المنتجات اللي كانت موجودة بمحل البقالة.

⬅️⬅️⬅️⬅️ طب هما بره بيعملوا إييييه؟

*️⃣ طبعاً بفرض إن حد وصل لغاية هنا ومتخنقش وراح التعليقات يتخانقظ فتعالوا نشوف الاليات اللي الدول بره بيها بتحارب جشع التجار؛ لا بتسعر السلع ولا بتتدخل في أرباح الشركات لكنها بتستخدم آليات تانية.

*️⃣ بداية في سلع أساسية الدولة ممكن تتدخل في سعرها عن طريق انها هي تستوردها وتبيعها او توزعها زي البنزين؛ فهي الدولة اللي متدخله بالسعر؛ استوردت ب 10 جنية وباعت ب 5 فهي وفرت للناس بسعر محدد... ممكن دا يحصل في القمح والزيوت مثلا وكام سلعة محددة... لكن متقدرش في كله... فالباقي بقي هتكلم عن السلع بره الاساسيات اللي تتعد عالصوابع اللي الدولة بتجيبهم بنفسها.

*️⃣ دلوقتي فكر معايا... هو لو منتج بيتكلف 10 شامل حساب المخاطر وكله ويتباع ب 20... فكده مربح جداً... فسوق مربح يجذب مستثمريين جدد؛ ناس تقولك دول بيكسبوا 100% انا هخش المجال دا واكسب 80% بس. ثم ثالث يقول دول بيكسيوا 80% انا هخش واكسب 60% بس وهكذا... وابسط حاجة افتكروا الكمامات والكحول ووو بداية الكورونا وكم الشركات اللي دخلت في المجال دا فالاسعار انهارت. يعني من الاخر لو هامش ضخم فدا هيشجع ناس تخش السوق دا فتنزل السعر فالسوق يظبط نفسه زي ادبيات الاقتصاد القديمة.

*️⃣ بس في مشكلة؛ التكتلات؛ دلوقتي المعلمين بتوع المجال دا قعدوا مع بعض واتفقوا مع بعض عالأسعار؛ ولما ييجي منافس يدخل هيعملوا تحالف ضده وهيخلوا الموردين للمواد الخام ميبيعوش ليه ويخلوا المحلات متشتريش منه ووو.

*️⃣ هنا ييجي دور الدولة بقي؛ منع التكتلات الاحتكارية؛ جهاز حماية المنافسة وحماية المستهلك وكده... دوره يدمر أي تكتل احتكاري؛ مش يغرمه لا يدمره؛ انتم متحالفين عشان تطلعوا ب ربح 20 مليون؛ طيب غرامة 100 مليون... بحيث يبقي رعب للي يفكر يحتكر؛ ويبقي مساعد للي داخل السوق لو لقي تكتل ضده يروحله... طبعاً عشان ينجح الجهاز دا لازم يبقي مفيش فساد؛ يعني الشركات الكبيرة دي هتروح تكلم حد ثقيل في الدولة ان لم يكن الجهة او الشخص دا شريك في شركاتهم؛ فيقولوا للجهاز دا العب بعيد... فلازم يكون له صلاحيات لا محدودة ويقدر يعاقب أي شركة مخالفة أي كان مين صاحبها.

*️⃣ طيب افرض بقي السعر غالي ومفيش تكتلات؛ يعني السوق حر فعلا السعر غالي لان صعب دخول السوق دا... يعني مهواش مجال أي حد معدي يدخله؛ دا محتاج رأس مال ب مئات الملايين او مليارات عشان تبني مصنع... فعدم دخول منافس نابع من صعوبة دخول المجال... والسوق بيستغل دا... هنا الدولة تلعب بسيف الجمارك.

*️⃣ تعالى يا ابني شيل الجمارك والضرايب عالسلعة المستوردة في المجال دا؛ طبعاً دا هيكون كارثي عالحيتان دول... هجيب لهم منافس عالمي مش محلي؛ والخيار ليهم؛ عاوزين هامش الربح الضخم يبقي مش هتبيعوا وهتفلسوا وتقفلوا... انزلوا بالأسعار... بعد شوية الحكومة تجتمع معاهم وتعمل اتفاق ودي علي رينج سعري معقول (مهما عادة 5 ولا 10 شركات طالما الموضوع محتاج رأس مال ضخم فمش هيكونوا شركات كثير) وبعد الاتفاق ترجع الدولة الجمارك تاني بحيث تحمي الصناعة الوطنية... لكن في أي وقت عقلهم هيوزهم هشيل رسوم الجمارك واغرق لهم البلد من منافسهم المستورد.

*️⃣ طيب علي سيرة المستورد؛ افرض الدولة لقت سلعة مهمة غالية في مصر ؛ عملت ابحاثها ولقت ان سعرها بره ارخص من مصر؛ لكن في نفس الوقت السعر في مصر غالي يعني الانتاج نفسه غالي مش عشان هما حراميه؛ تكلفة الانتاج عالية... ايه الحل.

*️⃣ هنا الدولة تبدأ في كذا طريق؛ الأول ممكن دعم مباشر وصريح؛ يعني هخفض الضرايب عالمجال دا او هشيل الجمارك من واردات الخام المستخدمة في المجال دا؛ المهم اقلل التكلفة؛ وطبعاً دا هيكون باتفاق مسبق مع تحالف المنتجين في المجال دا.

*️⃣ طيب برضك لسه السعر بتاع السلعة غالي؛ شلت الضرايب والجمارك والرسوم من عليهم ولسه غالي؛ دعمت الكهرباء والمايه للمجال دا بس غالي... ندرس ونشوف ليه بره ارخص... ايه دا السبب هو ان الغرب بيستخدم تقنيات تصنيع احدث وفي مصر لسه التقنيات والمصانع قديمة فالتكلفة عالية...

*️⃣ طيب لو الموضوع كله معدات؛ الدولة تروح المصانع دي وتقولهم بصوا هديكم قروض بدون فوائد؛ وبفترة سداد طويلة 10 و 20 سنة؛ بشرط هتشتروا المعدات الجديدة دي وتصنعوا بيها عشان تقل التكلفة. فالدولة تتحمل عبئ الفائدة عشان تدعم الصناعة.

*️⃣ لكن ممكن تكون العقبة تقنيات وبراءات اختراع وليس معدات تشترى؛ يعني من الاخر ال Know How احدث... هنا الدولة تروح للشركات الغربية اللي عندها سر الصنعة الحديث وتقولهم تعالوا مصر؛ إعفاء جمركي وضريبي ودعم كهرباء ووو 10 سنين بس تنقلوا التقنيات دي لمصر....

*️⃣ طيب افرض طلع السبب ان الشركات المصرية صغيرة ولما بيشتروا الخامات بتكون بسعر غالي لان حجم الطلب المحلي صغير... هنا الدولة ممكن تعمل حاجة زي تحالف بين الشركات؛ توحد الشراء بتاعهم بحيث يكون الاوردر بتاعهم اكبر ومجمع؛ يعني بدل ما 10 مصانع كل مصنع بيبعت لجهة يشتري؛ هيبقَا كأنهم مصنع واحد وطلباتهم موحدة أكبر... وفي نفس الوقت تروح لدول عربية وافريقية تمضب اتفاقيات تبادل تجاري حر او في المجال دا بحيث توفر فرص تصدير للمصانع فيقدروا يشتروا كميات خام اكبر لانهم مبقوش مصنع للسوق المحلي فقط.

*️⃣ يعني الخلاصة هي إن الدولة هتتدخل؛ تستخدم الرقابة لضمان حرية السوق وعدم الاحتكار؛ هتسهل عالشركات الشغل والانتاج؛ هتلعب بالجمارك والضرايب عشان تساعد وتعاقب... المهم هي هتتدخل بطرق كثيرة مش منها طريقة (كتف لي الشركات دي وهات الحزام واقفل الباب ونضربهم لغاية ما يحطوا سعر معين) لان الطريقة الاخيرة دي نتيجتها اننا نلبس كلنا بدلة صيفي نص كم لونها بني؛ ويبقي عندنا ترنج بيت مخطط؛ ونقعد نستني الجمعية عشان نعرف نشوف الفراخ... وتحجز تليفزيون او ثلاجة وتستلمه بعد 12 شهر وكده


⬅️ البوست بقي طويل جداً فهكتفي بدا دلوقتي؛ لكن الخلاصة الدولة هتشتغل عشان تحسن كفاءة السوق والمنافسة والتقنيات المستخدمة في الانتاج... أما فكرة روح اعمل تسعيرة فدي خيال.

⬅️⬅️ ملحوظة : للبوست جزء ثاني؛ شلته من البوست دا عشان هيطول قوي؛ وكمان عشان اكتبه براحتي... وهيكون الجزء الثاني بيناقش فكرة ( ليه الأسعار في مصر غالية وبتزيد بشكل أكبر من العالم الخارجي)... قريب ان شاء الله

نزلت الصورة السابقة في بوست قصير على فيس بوك
https://bit.ly/3dffjo1
وصراحة متوقعتش يعمل البوست خناقة وسوء الفهم دا

*️⃣ في اللي فهم إن نون بتقول إن منتج فيه مشكلة بايظ مش هيرجع ودا مش سليم

*️⃣ وفي اللي معترض إزااي يعني مش من حقي أشتري منتج استخدمه شوية وارجعه؟

*️⃣ المشكلة إن الناس فاكرة إن الشركات الكبيرة قوي بتدلع العميل من باب حب العميل وكده... خالص يا برنس الشركات دي بتاخد المنتج ترميه للتاجر فالتاجر يعمل شيء من اثنين... إما يلبس خسائر أو يكون بتاع حوارات يروح مقفل المنتج تاني وملبسه لزبون تاني... ملبسه هنا بقت وصف دقيق لإن شخص تاني هيشتري منتج وفاكر إنه أول شخص يستخدمه بس فعلياً لا...

*️⃣ ففعلياً الدلع دا بيكون تلبيس لحد تاني مش أكثر.

*️⃣ وأكبر لك شوية القصة... الشركات العملاقة مش بتعمل كده من جيبها لكن من جيبك إنتا بس إنتا مش واخد بالك مش أكثر؛ وأقولك قصة خيالية.

*️⃣ شركة عملاقة... تقعد تشتري منتجات وتبيعها أرخص من التكلفة كمان... عميل يستخدمها ويرجعها عادي... العملاء يحبوها والتجار المنافسين ميقدروش يستحملوا الخسائر دي... فالنتيجة ايييه؟ التجار تبطل تشتري المنتج X دا اللي بينافسهم فيه الشركة الكبيرة

*️⃣ بعد فترة تستفرد الشركة الكبيرة بالتوكيل أو المصنع وتقوله بص الأسعار دي مش عجباني إما هشتري منك بسعر كذا أو مش هشتري... ومعندكش خلاص زبون غيري... تسحق المورد دا وتخليه شغال عندها ويبيع بلا مكسب.

*️⃣ المورد أرباحه تقل بس هو خلاص وقع في الفخ عند الشركة الكبيرة... فيقرر المورد إنه يقلل العمالة أو يخفض الرواتب أو يلغي المكافئات... فتقل الفلوس المدفوعة للعمال.

*️⃣ فهنا يروح العامل دا ويقول ياااه صاحب شركتنا دا وحش قوي؛ أشحال بضاعته أول بأول بتتباع للشركة العملاقة الفلانية... يااااه لو كل الشركات في الدنيا بتعاملنا حلو زي الشركة العملاقة؛ دي شركة تحفة ودايماً نطلع منها كسبانين مش زي صاحب شغلنا اللي مستعبدنا ببلاش... خسارة...

*️⃣ والعامل ميعرفش إن الشركة العملاقة هى السبب في اللي بيحصله... هي بتديله خصم النهاردة قصاد عينه 5 جنية... بس هي بتعمل دا عشان هي عندها خطة تاخد من مرتبه بتاع بكره 10 جنية

*️⃣ فخ مثالي كل الكوكب بيقع فيه؛ كلنا بنجري وراء الجزرة ومش بناخد بالنا ايه هيحصلنا بعدها

أسوة ببوست صديقي شريف من كام يوم عن فلسفة حل المشاكل بتاعة 5 ليه... نبص عالوضع المصري

التقارير العالمية: مصر لازم تخفض العملة 10-20-30%

ليييييه؟

⬅️ عشان العملة مقومه بأكثر من قيمتها ولازم تعبر عن الوضع الحقيقي؟

لييييه الوضع الحقيقي قليل؟

⬅️ عشان الطلب عالدولار عندك أعلى من الإيراد الدولاري

لييييه الطلب عالدولار عندنا أعلى من إيرادنا؟

⬅️ عشان احنا مش شاطرين في الصناعة والتصدير ومش جذابين لرؤوس الأموال الأجنبية وبنهدر العملة الصعبة.

لييييه مصر مش جذابه بقى للصناعات وليه مش بنصدر؟

⬅️ عشان تصنيفك 93 في تنافسية السوق تبع دافوس و 102 في تقرير البنك الدولي بتاع سهولة القيام بأعمال و ترتيب 117 في الشفافية و 166 عالمياً في إنفاذ العقود... والجمارك عندك تعتبر من أسوء 10 دوائر جمركية في كوكب الأرض وووو


*️⃣ خلاص خلاص طيب انتم شايفين إن تخفيض الجنية لرقم كبير ليكن يا سيدي 0.04 دولار يعني يبقى الدولار ب 25 جنية كده تمام؟

*️⃣ اه تمام؛ دا هيخلي الواردات تقل والصادرات تزيد والميزان التجاري يتعدل وهتبقى دولة أرخص للسياحة العالمية.

*️⃣ طيب تعرف سيادتك إن الفنادق في مصر مسعره أصلاً بالدولار؟ يعني الدولار يزيد يقل مش هتفرق كده كده أساس التسعير دولار مش جنية؟ فمش هنبقى أرخص للسياحة؟

⬅️ طيب بص عارف مصر بتستهلك سنوياً بتاع 100 مليار دولار... إنتا بتقول إن دول لما الدولار يزيد هيقولوا صح؟

اه طبعاً

⬅️ طيب بص في 25 مليار دولار سداد ديون هل دا هيقل؟

لا دول بره الحسبة مش هيقلوا

⬅️ طيب بص عندك 5 مليار دولار قمح سنوي تفتكر هنطبل لما الدولار يزيد؟

لا خالص مش متوقع نهائي

⬅️ طيب يبقى أكيد هنبطل نستورد حديد ونحاس والومنيوم وشوية الخامات اللي بتاخد 8 مليار دولار سنوي دول

لا أكيد طبعاً مينفعش أومال المصانع عندك تشتغل إزاي

⬅️ يبقى خلاص هتبطل تستورد ال 7 مليار دولار بترول ومشتقاته والزيوت ووو...

بصراحة صعب قوي يمكن يقل شوية لكن أكيد هتفضل تستوردهم

⬅️ خلاص فهمتك يبقى هنبطل نستورد زيت الذرة والصويا والقهوة والشاي والحبوب الزراعية والأكل دا صح اللي بياكلوا 3-4 مليار دولار من الواردات صح

*️⃣ ايه يا عم هتعملها إزاي دي طبعاً مش هتقدر

⬅️ يبقى انتا أكيد قصدك ال 4-5 مليار دولار اللي بيروحوا في أخشاب وأوراق واللحمة

*️⃣ لا يا سيدي مينفعش يعني... هو انتا هتزرع غابات في مصر ولا هتجيب مايه منين للحيوانات

*️⃣ يا عم احنا بنتكلم عالتفاهات يعني عربيات؛ لعب أطفال؛ أثاث مستورد؛ ملابس مستورده والموبايلات والكومبيوترات وو الخ

*️⃣ ااااه بس هي الحاجات دي كلها على بعضها ميكملش 10% من الانفاق الدولاري المصري... يعني بتصرف 100 مليار دولار سنوي هما 10 مليار رايح للأمور التافهة دي

*️⃣ لكن مش مهم هما ال 10 مليار دول اللي سبب الأزمة؛ ايه البديل عندك؟ يعني هتبطل تستورد ملابس طيب هل انتاجك المحلي يكفي؟

*️⃣ طب هي الكومبيوترات أمور تافهة والموبايلات والعربيات؟ هنركب كارته ولا هنحسب على ايدينا ونتواصل بالحمام الزاجل؟

*️⃣ طب سيبك من دا كله؛ الطبقة الثرية الفاحشة الثراء؛ اللي بتستورد رخام من إيطاليا والهند؛ وتجيب أثاث مستورد وعندها إحصنة وجيش حيوانات أليفة... لما أسعار السلع دي يزيد هل هيبطلوا يشتروها فبالتالي الدولة توفر دولار السلع دي؟ لا خالص هتفض تصرفه

*️⃣ عاوز تعرف الإجابة؟ بص سنة 2015 كانت مصر بتستورد ب 78.7 مليار دولار... حصل تعويم في 2016 والدولار بقى الضعف؛ تفتكر في 2017 استوردنا ب كام؟ 75.9 مليار دولار... وفي 2018 ب 88.8 مليار دولار... ايه دا يعني الدولار تضاعف

*️⃣ طيب بلاش نبص على طرف واحد للكوباية؛ الطرفين؛ الواردات والصادرات والفارق بينهم

*️⃣ سنة 2015 قبل التعويم كان الفارق 50 مليار دولار لصالح الاستيراد
سنة 2017 الفارق قل ل 42.6
سنة 2018 زاد ل 51.1
سنة 2019 رجع يقل ل 47.1
سنة 2020 الكورونا قل ل 42.8

⬅️ ملحوظة بس قبل ما تقول نجحنا أهو؛ في 2020 انهار سعر البترول فبدل ما كنا بندفع في 2019 مبلغ 12 مليار دولار؛ دفعنا في 2020 مبلغ 7 مليار دولار... ففي عوامل بتلعب في المعادلة مش بس تصدير واستيراد؛ فكر في السعر العالمي للمدخلات

⬅️ بالمناسبة سنة 2011 صدرنا ب 40 مليار والدولار كان ب 6 جنية وفي 2019 بقى 16 والصادرات بقت 38 مليار

⬅️⬅️ للأسف الأرقام في oec.world مفيهاش سنة 2021

*️⃣ عارفين المشكلة الأكبر فين ان أكثر من نصف أو قول 60% من استهلاك الدولار في مصر بتقوم به الحكومة... سداد ديون أو استيراد مشتقات بترولية أو قمح وزيوت أو حاجات مستورده زي القطارات وووو... يعني 60 مليار دولار بتوع الحكومة.. فلما يزيد الدولار من 15.5 ل 23.5 بتاعة الإشاعة معناها في بتاع 450 مليار جنية مصاريف زيادة عالحكومة... هتجيبها منين؟ هما مصدرين... الأول قروض جديدة والثاني ضرائب جديدة...

بس يا سيدي وخلصت الحكاية

معنديش مشكلة في موضوع تخفيض مصر لإنتاج الكهرباء من أجل توفير غاز وتصديره لأوروبا من منطلق اللي يعوزه الأسياد يحرم عالعبيد

*️⃣ لكن لو الموضوع وصل ل قطع كهرباء منظم لتقليل الاستهلاك؛ فلازم يكون قطع الكهرباء متناسب مع الاستهلاك... يعني قطع كهرباء عن فيلا لمدة ساعة هيوفر كهرباء زي قطع الكهرباء نص يوم عن عمارة في منطقة شعبية وهكذا.

*️⃣ وعلي سبيل المثال فطبقاً لشركة الكهرباء فواتير كهرباء الساحل الشمالي الشهر الماضي يوليو لقطاع صغار المشتركين كانت 35 مليون جنية بينما فواتير كبار المشتركين كانت 52 مليون جنية... مع إن عددياً مفروض الصغيرين أكثر من الكبار. لكن الكبار 60% من الاستهلاك

*️⃣ وبالانتقال لقطاع كهرباء مرسي مطروح فقيمة فواتير الكهرباء للصغار 25 مليون والكبار 38 مليون جنية يعني الكبار برضك 60% من الاستهلاك

*️⃣ ضيف بقي مع ما سبق نقطة... الكلام عن الفواتير؛ يعني عدادات قديمة؛ أي حد ركب عداد آخر 5 سنين جاله ب كارت... يعني الكلام اللي فوق مفيهوش كل الساحل الشرير... دا الكلام عن الغلابة في بداية الساحل والجماعة بتوع مراقيا ومارينا 1 و 2 و 3 وكده... لكن العلمين ومراسي وسيدي عبد الرحمن وهاسيندا ووو كل دول مفيهمش عدادات قديمة دول.

*️⃣ فلو دخلت استهلاكهم تلاقي ان كبار المشتركين بيستهلكوا 75% من الطاقة... يبقى مفروض يطولهم 75% من أي انقطاع يحصل.

*️⃣ وللتذكير فالجهاز المركزي كان اعلن في احصاء 2017/2018 ان فقط 12.2% من المصريين عندهم تكييف دا كمتوسط عام والنسبة بالحضر 21% وبالريف 4% ... فبالمنطق دا الريف ميشوفش انقطاع كهرباء.

⬅️ ملحوظة : أنا شخص مستفيد بعدم المساواه بمصر؛ يعني ساكن بالقاهرة الجديدة وعندي تكييف؛ فطبعاً الكوسة بتخليهم يقطعوا عن المطرية وعين شمس وشبرا... ويسيبونا 😁 بس أنا بتكلم في البوست عن اللي مفروض يكون... لكن تحيا الكوسة 😂💪💪

⬅️ توضيح للشفافية؛ الحكومة مقالتش هتقطع عن حد؛ قالت هنقفل كهرباء الشوارع والمولات بالليل والمباني الحكومية وهنقلل الاستهلاك... لكن أنا مصري من زمان ف عارف ايه اللي هيحصل 😂