من الحاجات اللي تضايقني إن برنامج زي InstaPay أكون عارف عنه من قبل صدوره من أصدقاء وقاعد مستنيه عشان ينزل وأكتب عنه. وبعدين ينزل وأنا مشغول؛ فالبلد كلها تتكلم عنه وتكتب وأنا لا 💔💔؛ لدرجة انه بقي يتبعت لي متكلمتش عنه ليه 😭😭... كده بقيت Out Of Date 😔😔... عامة لو حد صادف انه لسه ميعرفوش كمل معايا.

*️⃣ في شركة اسمها شركة بنوك مصر؛ او اختصارا EBC ودي شركة تأسست سنة 1995 بشراكة بين البنك المركزي ومعظم البنوك المصرية؛ لكن في 2019 قرر 14 بنك يخرجوا منها والمركزي اشترى الحصص بتاعتهم وبقت حصته تقريباً 60% من الشركة وبقى الملاك هم البنك المركزي والبنك الأهلي وبنك مصر وبنك الاستثمار القومي بس.

*️⃣ ايه بقي الشركة دي؟ بدون ما نخرج من موضوع الأبلكيشن بس مضطر اكتب شوية رغي أهو تحسوا البوست بتاعي مختلف عن الآخرين؛ جو محنكين يعني 😂... الشركة دي دورها تعمل منظومات تساعد العملية المالية؛ يعني مثلا سنة 1997 عملوا شبكة ماكينات 123 وسنة 2013 اطلقوا الدفع بالهاتف اللي لاحقا بقينا عارفينه فودافون كاش واتصالات كاش ومحافظ البنوك... واشهر خدمة ليهم دلوقتي هي منظومة (ميزة). عشان كده كثير قالوا برنامج البنك المركزي؛ لا هو مش البنك المركزي لكنه من شركة المركزي ليه اكثر من نصها 😁.

*️⃣ نرجع بقي للبرنامج؛ فكرة البرنامج دا انه يربط البنوك ببعضها مع المحافظ الهاتفيه.. يعني عاور تشوف رصيدك في بنك CIB والبنك الاهلي وبنك QNB من نفس المكان شغال؛ تحول بينهم شغال مباشرة.

*️⃣ حاليا البنوك المدعومة هي البنك الأهلي وبنك مصر وبنك اسكندرية و EG Bank و البنك العربي و بنك CIB وبنك QNB بس لكن تباعاً البنوك الأخرى هتنضم خاصة مع انتشار البرنامج.

*️⃣ هتنزل البرنامج من تليفونك اللي عليه رقمك في البنك

نسخة أبل

http://apple.co/3CtIXhN

نسخة الأندرويد

http://bit.ly/3CzaE90

*️⃣ في تليفوني الأندرويد عادي بعت رسالة للتأكد من الرقم وتمام خلص؛ في الاي فون مش عارف ليه طلب مني اشغل الداتا (قفلت الواي فاي) رغم انه هيبعت SMS يعني لتأكيد التسجيل.

*️⃣ المهم سجلت دخول؛ هات بقي كارت حسابك في البنك المذكور في اعلي وضيفه ودخل ال PIN بتاع الكارت ولو عندك في البنك دا أكثر من حساب هيقولك عاوز تضيف انهي حساب.

*️⃣ هتلاقي تحت بيقولك تحب حسابك دا يبقي اسمه ايه؛ يعني زي اسم مستخدم بحيث لاحقاً اكنك بتقول ابعت من حسابي BnSamy الي فلان الفلاني.. زي الايميل... فاللي يسجل الاول هيلحق يخصص الاسم بتاعه 😁 زي الايميلات كده... وانا اخدت بن سامي عشان محدش يغلس عليا 😜😜😜....

*️⃣ هيطلب منك البرنامج تدخل PIN او رقم سري خاص بيه هو بس؛ عشان العمليات اللي تعملها عالحساب دا من البرنامج؛ الرقم السري من 6 أرقام مش 4.

*️⃣ بس يا سيدي مبروك عملت حساب وتقدر في اي وقت تشوف رصيدك في البنك؛ وتقدر تبعت فلوس؛ وهحط لكم صور في تعليقات الفيس وأنا ببعت من حسابي في CIB الي محفظتي ورقمي... وحاطط لكم ايميلي ظاهر اهو عشان اللي حابب يبعت لي فلوس علي CIB ابقي متشكر 😜😜😜 مهو مش هتاخدوا مني؛ ايش تاخد الريح من البلاط 😂 مفييييش مفييييش.

*️⃣ عامة ايميلك دا بتاع انستاباي هو اللي هتستخدمه؛ بدل ما تقول لحد ابعت لي علي رقم حسابي الطويل العريض دا؛ تقوله خد ايميلي انتساباي اهو ابعت لي.

شوية ملاحيظ 😂

1️⃣ إضافة الحسابات الشخصية فقط؛ جربت اضيف حساب الشركة بتاعتي في CIB منفعش

2️⃣ هتقدر تحول لأي حساب انستاباي (ايميل) او محفظة هاتفية من اي بنك او شركة اتصالات؛ او اي بنك من ال 7 اللي فوق.

3️⃣ لما تيجي تحول لاي رقم هيظهر لك اسم صاحبه بحيث تبقي متأكد.

4️⃣ البرنامج موجود في الاستور المصري فقط؛ فاللي عامل ستور المتجر دولة ثانية مش هيلاقيه... لو اندرويد امرك سهل؛ تنزله APK؛ (تحديث اللي معاهم ابل لقوه في كل المتاجر؛ الاندرويد بس اللي مش لاقيه)

تحديث

⬅️ 5️⃣ ميزة البرنامج للفارقه هي انه بيدعم شبكة التحويلات اللحظية 24 ساعة؛ يعني تدوس ارسال من اي بنك لاي بنك يوصلك فورا؛ البنوك لسه بتاخد عادة ساعة والتحويل يكون في مواعيد العمل الرسمية.

اعذروني في البوست المتأخر لكني في شبهة إجازة استجمام منعاً ل BurnOut؛ لكني مش لعرف افصل برضك تماماً

مضطر اكتب بوست تاني عشان موضوع الدولار بييجي لي عليه عشرات الرسايل والمينشن يومي؛ متقولش انا خبير اقتصادي مش بتاع دكانه 😂

⬅️ 1️⃣ بالنسبة لأي تقارير دولية

*️⃣ التقارير الدولية بتحكم من واقع ورق واحصائيات وشوية أمور سياسية جنبها... تقولك في عرض وطلب ؛ الدولار سلعه يحكمها العرض والطلب... دلوقتي شايفين مخاطر وانخفاض متوقع في دخل الدولة الدولاري زي السياحة وخروج أموال ساخنة؛ فيروحوا قايلين كده متوقعين تحرك العملة الاجنبية بنسبة كذا عشان يعوض العجز... طيب هي المعادلة طرف واحد؟ العرض قل طيب والطلب؟ كنت كتبت بوست سابقاً قولت ان كثير من تحليل الارقام لمصر فيه مشكلة لان الداتا وتفكير الحكومة متعرفوش... ما الحكومة عادي ممكن تخنق الطلب أكثر بخطوات السياسة المالية وقرارات غلسة كده... عندك انخفاض متوقع في العرض 5 مليار ؛ قشطة عاوزين نخفض الطلب 5 مليار يا جهات رقابية... ومش هنعمل زي زمان نمنعهم فيشتروا من الصرافة ويستوردوا... لا مش هدخل لهم الشحنات أصلا فيبقوا عارفين لو اشتروا حتي من السوق السوداء فشحناتهم مش هتدخل... فهمتوا قصدي... معادلة عرض وطلب والطلب غير معروف هيحصل فيه ايه.

⬅️2️⃣ رعب الدولرة

*️⃣ بصوا لو الحكومة سمحت للدولار يتحرك بشكل واضح في وقت المواطن متوقع فيه يتحرك؛ عارفين هيحصل ايه؟ كل واحد هيقولك تولع مصر بشعبها؛ انا ومن بعدي الطوفان؛ كل فلوسي حولها دولار؛ هوبا دولرة... والحق بقي الدولار؛ لا تقولي 20 ولا حتي 22؛ هيبقي سباق ونوصل بقي 25 ونكمل... في عبر البحر كده دولة اسمها تركيا شوفوا الدولرة عملت في عملتها ايه... اتخن تخين لو البلد بتاعته قفش فيها الدولرة عملتها هتتدمر... فلو فرضنا اقتصاديا مثلا مثلا مفروض الدولار يبقي ب 20 مثلاً؛ ويزيد 4 جنية؛ فالشعب يخش يعمل دولرة فيخلي الدولار 30 ويزيد 14 جنية... ونبقي دمرنا اقتصادنا بإيدينا. ونبص عالناس في الشارع ونقول يا حرام الاسعار غليت عليهم بعد ما الدولار بقي ب 30 جنية... نقتل القتيل وهنمشي قي جنازته.

*️⃣ فصانع القرار عارف كويس قوي حب المصريين للدولرة؛ فدا ممكن يخليه ميسبش العملة تنزل قصاد الدولار عشان يمنع عودة تكالب الدولرة تاني... فالقرار مش اقتصادي صرف دا معاه بعد اجتماعي نفسي للشعب... علم نفس سلوكي وشوية أمور ثانية... عرفتوا ليه بقولكم التقارير الاجنبية نظرية خالص... فاكرين قبل تعويم 2016 لما توقعوا 12 و 14 والدولرة وصلته ل قرب ال 20...

⬅️3️⃣ خايف علي فلوسي أعمل ايه

*️⃣ مش بحب انصح حد في الفلوس؛ دا شقا الناس ولو طلعت نصيحتي بلح؛ فمش انا اللي هخسر... لكن هقول كلام عام شوية.

*️⃣ لو ليك في المخاطرة وتعرف تخش تستثمر في عقود البترول والقمح والسلع دي؛ دوس وخد بالك من المخاطرة.

*️⃣ ملكش وعاوز الامان يبقي عندك الذهب والدولار... الذهب دا هيفضل طالغ نازل مع الازمة ومع قرار الفيدرالي الأمريكي... فانتا هتشتريه فممكن بعد 6 شهور مثلا تلاقي نفسك كسبت حلو او ممكن خسرت برضك حبه حلوين... ففي مخاطرة لكن أقل من البورصة والسلع شوية.

*️⃣ الدولار؛ فرصة انه ينزل شبه معدومة؛ يطلع بقي لكام ولا يفضل ثابت محدش عارف؛ فممكن تفكر فيه من منطلق مفيش خسارة... طبعا مفيش خسارة دفترية لكن معروف ان الفلوس بتقل قيمتها بالتضخم وكمان تكلفة الفرصة البديلة؛ فالبنك يديك 10% سنوي؛ فلو شايل فلوسك دولار ولقيتها نفس القيمة بعد سنة؛ فكده انتا خسران 10% اللي كان البنك يدهالك او خسران ال 8% التضخم مثلا لو مش عاوز تدخل التفكير بالبنوك... لكن في النهاية خيار اقل مخاطر بكثير. اه ومتنساش ان لو الدولار زاد فالذهب بيزيد معاه 😁 والعكس.

اتمني اكون جاوبت السؤال وال 3 نقط اللي جالي فيهم 100 سؤال ولا اكثر

ومرة ثانية انا مش خبير؛ انا بتاع دكان تك 🤣 تسألني الماوس دا؛ الشاحن دا؛ عاوزين كابل؛ كاميرا ويب؛ كده يعني... بقال تقني يعني؛ تقولي دا الماوس دا غالي ليه اقولك جشع تجار؛ كده يعني 😂😂😂

⬅️⬅️⬅️ اه معلش حاجة اخيرة؛ هي منطقية بس لازم اقولها... هل انتا شايفنا زي الفل يعني ومستقبلنا الاقتصادي جميل وسعر الدولار يعبر عن الوضع؟ .... الاجابة هي: يا راجل يا مفتري هو انا قولت كده... انا بقول ان ساعات بيكون في مشكلة؛ فتقول عاوزين نحلها بطريقة X اللي تخلي المشكلة تمشي فعلا؛ وييجي مكانها كارثة تخليك تقول يا ريت المشكلة كانت فضلت موجودة... كده وضح قصدي.

⬅️⬅️ كمان ملحوظة تاني هكررها : أنا مش صانع قرار؛ أنا واحد بيفكر معاكم مش أكثر؛ عادي ممكن يطلع اي قرار ونلبسه كلنا... فبلاش تعاملوني كإني صانع قرار زي ما حسيت اني مطور برنامج انستا باي والكام الف اللي نزلوه النهاردة حسسوني اني المطور 😂😂❤️❤️

مجرد استفسار لتجربة بوست جديد

في رأيكم ليه بيحصل ارتفاعات أسعار عشوائية في مصر؛ يعني ساعات يكون في ارتفاع سعر سلعة ما 1 جنية فتلاقي المردود أكبر

البنزين والسولار مثلا يزيد 50 قرش فتلاقي الميكروباص او أوبر زاد مبلغ يفوق التكلفة وهكذا..

كيلو الدقيق يزيد 2 جنية فيزيد سعر منتجات دقيق 2 جنية؛ ليه هي وزنها كيلو؟

في رأيكم دا بيحصل ليه وايه الأسباب؟

هو بالفعل بكتب بوست بخصوص دا لكن لسه مخلصتوش لكن حابب أشوف رأي الناس؛ ك تجربة جديدة قبل البوستات

ايه حكاية طوفان التقسيط؛ فاليو طبعا واخواته أمان وسهولة؛ ومعاهم برنامج InstaPay وكمان قريب بنوك رقمية زي Telda و Nexta اللي الاخير أخد لسه 2.2 مليون دولار تمويل من قبل ما يبدأ لسه شغل... هو فيه ايه وليه الاغراق اللي شغال دا...

*️⃣ بما إن النهاردة هو آخر يوم في الإجازة الشتوية بتاعتي فهكتب بوست طوييييل اختم بيه الإجازة؛ ونرجع تاني للبوستات المتفرقة كل ما ربنا يكرم...

*️⃣ للتوضيح البوست مجرد وجهة نظر صرفه؛ يعني دا تخمين وتحليل شخصي للي بيحصل مش أكثر؛ فعادي لو مختلف معايا قول؛ ولو معترض قول عادي؛ ولو عاوز تشتم اتفضل البلوك موجود 😁.

*️⃣ النقطة الأساسية هي إننا في مصر متأخرين عن العالم سنين طويلة؛ ففي خطوات العالم مشي فيها قبل 10 و 20 سنة لسه في مصر هنبدأها... ومش بقول الخطوات دي صح أو غلط؛ احنا ماشيين في ذيل الكوكب ووراه وراه مشي صح وراه؛ وقع في حفرة بنيجي قعد 10 سنين لما نوصل نروح واقعين زيه... فالخلاصة تعالوا نبص عالعالم مشي إزاي وهتفهم مصر رايحة لفين.

*️⃣ طول القرون الماضية كانت المشكلة هي الانتاج؛ عاوزين نصنع؛ لغاية ما جت الثورة الصناعية وتطور التصنيع الرهيب اللي خلي البشرية لأول مرة تلاقي وفرة انتاج؛ زمان عندي زباين ومعنديش سلع ليهم... لكن الوضع اتغير عندي سلع عاوزة زباين.

*️⃣ فمن قرن كده بدأ قادة الصناعة في الكوكب يفكروا نعمل ايه؛ وهنا مشيوا في كذا طريق؛ الأول بيحبه أصحاب نظريات المؤامرة وهي التقادم المخطط له؛ يعني مصنعش سلعة تعيش 20 سنة؛ لالا هي تعيش 3 وتبوظ عشان تيجي تشتري غيرها... هتلاقوا حلقة جميلة لدكتور اشرف ابراهيم (المخبر الاقتصادي) عاليوتيوب بخصوص الموضوع دا واجتماع صانعي اللمض لتقليل عمرها الافتراضي.

*️⃣ الطريق الثاني كان التسويق؛ زمان كان المبيعات يلا نبيع؛ لكن مع الزنقة ظهر التسويق؛ هو زبون واحد وعاوزينه يختارنا احنا... نخطف الزباين من بعض يعني...

*️⃣ أصحاب المال شافوا الصراع دا وقالك لازم نسهل عالعميل يشتري في أسرع وقت؛ أدي يا عم كروت الفيزا والماستر كارد وامريكان اكسبرس ووو... الكروت دي هتشيل من عنيك قيمة الفلوس؛ دا بتديهم كارت يدوك سلعة؛ عكس انك تقعد تعد الفلوس فممكن نفسيا تتراجع.

*️⃣ بعد شوية لقوا مشكلة؛ الناس بتشتري سلع اه؛ والسلع بتبوظ مثلا بعد 3 سنين فيحوشوا ويشتروا سلعة جديدة... طيب في مشكلة في التحويش دا وهي الحرمان.

*️⃣ دلوقتي انتا عاوز تحوش 300 الف جنية وتقدر تحوش 10 شهري بفرض؛ تقعد 30 شهر تحوش... يعني 30 شهر تحرم نفسك وتجمع فلوس... فهنا وقت صرف ال 300 هتكون حريص اضافي؛ عاور اكبر عائد يعوضك عن 30 شهر حرمان... ودا مش اللي احنا عاوزينه؛ احنا عاوزينك تفرتك ال 300 بسرعة وحتي متقعدش 30 شهر... ومن هنا ظهر التقسيط.

*️⃣ بقولك يا كابتشن؛ هو انتا مش عاجبك كذا؟ اه جدا دا ب 300 الف؛ هقعد احوش 10 شهري واشتريه بعد 30 شهر.... امممم طيب بص يا كابتشن 30 شهر انتا ضامن يعني يفضل بسعره... مش بتقول تقدر تدفع 10 شهري؛ ماشي بلا خش اشتريه علي 30 شهر بدون فوايد؛ ومتشغلش بالك احنا هناخدها من التاجر...

*️⃣ لعبة التقسيط خلتك تشتري امتي؟ النهاردة مش بعد 3 سنين؛ طيب عارف هيحصل ايه بعد 3 سنين؟ هتكون السلعة دي قديمة وهتخش تشتري سلعة جديدة بالقسط؛ يبقي التاريخ اللي كان مفروض هتحوش ال 300 فيهم وتشتري السلعة لأول مرة؛ بقي هو تاريخ شراء السلعة ل 2 مرة.

*️⃣ وبكده سهلنا عليك وضمنا مبيعات أكثر... كمان في حاجة؛ احنا فرضنا انك قوي ماليا وتقدر تدفع 10 الاف شهري؛ طيب بص المنتج دا قسطه 500 بس شهري؛ والمنتج دا قسطة 200 بس شهري وهكذا... هوب بقيت تقدر تشتري سلع كثير دلوقتي وممكن تفكس للسلعة الكبيرة دي...

*️⃣ شغلة البنك الأساسية هي تأجير الفلوس؛ فاحنا دلوقتي دلعنا العميل فعمال يشتري يشتري... كده ضمنا ان مرتب العميل دا ل 30 شهر لقدام محجوز جزء منه لحسابنا؛ خلاص مبقاش عنده فرصة بشتري كاش دي.


*️⃣ طيب هنستفاد من ايه؟ هتيجي لنا محلات جديدة تقولنا عاوزين نشترك معاكم؛ مهو خيار البيع الوحيد بقي القسط... فالمحلات تشتري؛ فالعميل يلاقي عنيه تزغلل؛ محلات جديدة وسلع جديدة تظهر؛ يلا 400 جنية شهري دا و يلا 50 جنية شهري دا و 900 شهري المنتج الفلاني ووو...

*️⃣ فيبدأ عملاء أكثر يلاقوا أصحابهم بقي عندهم كل حاجة دلوقتي عشان بيقسطوا... فيقولك خلاص نقسط زيهم؛ فتدخل عملاء جدد؛ فدول يحجزوا علي مرتبات ناس جديدة لسنين؛ فالعملاء الكاش يقلوا؛ فمتاجر أكثر تروح للبنك وهكذا تستمر الحلزونة.

*️⃣ حتي الان حكينا الفيزا والتقسيط بيها وليه انتشر؛ ايه بقي حكاية البرامج؟ وسواد التقسيط زي فاليو وأمان وسهولة أو البنوك الرقمية دي؟

*️⃣ دي بقي الخطوة الثانية؛ مشكلتنا زي ما قولنا في البداية اننا متخلفين قرن؛ فالعالم بدأ من سنين رحلة التطبيقات التقنية المالية FinTech واحنا في مصر بناخد المرحلتين سوا في نفس الوقت فصدمة.

*️⃣ دلوقتي الزمن بيتقدم؛ انا عاوز اسهل عليك الدفع؛ الفيزا والماستر كارد بتوع التقسيط دول متاحين؛ بس لكام؟ مصر فيها اظن 40 مليون كارت حساب و 4 مليون بس كريديت كارد اللي يعمل التقسيط بيه... فكده معناه ان هما 4 مليون بس عميل من ال 100 مليون؟ هنسيبهم؟ لا طبعا.

*️⃣ وهنا تظهر البرامج دي اللي بسرعة وبسهولة تقدر توفر لك حد ائتماني؛ وبسرعة وسهولة دي مقارنة بالبنك... يعني لو عاوز كريديت كارد ب 50 حد ائتماني وانتا عميل بنكي اصلا؛ لازم البنك يمشي في إجراءات واستعلام بيت وشغل ووصل كهرباء وووو... لكن حاجة زي فاليو ممكن الموضوع ياخد دقايق في بعض الحالات وبكرر بعض مش كل ؛ لكن الاكيد انه اسرع من البنك بكثييير وبدون افلام استعلام.

*️⃣ وبكده أمان وسهولة وفاليو هيدخلوا ملايين من العملاء لعالم التقسيط مكانوش عارفين يدخلوه من بوابة البنوك... وطبعاً لازم العروض الجامدة اللي بيتجذب ناس تشتري وتجبر المحلات انها توفر الخدمة عشان العميل عاوزها وهكذا والحلزونة اللي فوق دي...

*️⃣ طيب انا مش هعرف اعمل دا؛ يعني روحت قالوا مليش تصنيف اي سكور عشان عمرب ما اخدت فيزا ولا قرض ولا اي حاجة؛ ايه الحل؟

*️⃣ الحل هيكون ضمن البنوك الافتراضية وتطبيقات تحويل الفلوس... التطبيقات دي زي ما الاخ علي بابا شغال في الصين ب ابلكيشن النملة بتاعه Ant Group... هنعملك ابلكيشن تدفع بيه في اي مكان؛ وتحلل الداتا؛ وممكن الابلكيشن وبكرر ممكن مش اكيد مستقبلا يبدأ يقولك انتا عميل مميز ايه رأيك في حد ائتماني بدون أي ورق عشان احنا شايفينك بتدفع كثير ومعاك فلوس... دا مجرد تفكير وتخيل عشان متسألش هيتم امتي ومين هيعمله...

*️⃣ نفس الحكاية في البنوك الرقمية؛ هتبقي بنوك شغالة عالذكاء الصناعي؛ ملهاش مقران فعليا وحسابك هو الابلكيشن وممكن الفيزا؛ وتشتغل علي تحليل الداتا والسلوك الانفاقي بتاعك وتديك قروض برضك وتسهل عليك تشتري بالقصة اللي اتشرحت فوق.

*️⃣ طبعا الشمول المالي موجود وفكرته من ناحية ضريبية ونعرف الفلوس فين وناخد ضرايب؛ ومن ناحية ثانية تدخل ملايين في المنظومة البنكية فتلقائي تخش الحلزونة اللي فوق...

*️⃣ طيب آخر حاجة؛ هما عاوزين دا؟ اكيد الشيطان قاعد وراهم ودا هدفه اغراق الشعوب بالربا الفاحش... لا خالص الموضوع مالي بحت؛ قولنا البنوك شغلتها تأجر فلوس؛ فكل ما نقنع ناس اكثر تخش المنظومة فجالنا زباين جدد... فالشركات كده تبيع اكثر وتكسب اكثر فتعين ناس جديدة وتدفع مرتبات اكبر فناس اكثر وهم العملاء بتوعنا يلاقوا دخلهم زاد فيزودوا الكروت والقروض ويأجروا مننا فلوس أكثر وهكذا

*️⃣ وهنا دورة الفلوس في الإقتصاد تزيد والشركات تكسب زي ما قولنا وتدفع لنا ضرايب أكثر ك حكومة؛ عشان كده لو لاحظتم مشاريع الدولة العقارية الدفع فيها تقسيط فقط؛ عشان متروحش تخليك تكيش وتدفع كل فلوسك وكده تفلس... لا خالص مش معاك ال 500 الف بتوع الشقة ؛ هتقسطها برضك والقسط اهو صغير... فنفسيا تلاقي نفسك بتقول طب ما اقسط عربية كمان؟ اجيب عربية ب 300 الف واهو معايا ال 500 لو حصل ظرف في شغلي تغطيني واسدد قسط قرض السيارة... طيب ما اقسط شالية ب 300 الف كمان ومعايا ال 500 في البنك امان اسحب منهم لو في قسط عجز معتيا ؛ اقسط لاب توب اقسط موبايل اقسط كذا... فمع الوقت تلاقي مخك بيقارن بيم سعر السلعة اللي انتا قررت تقسطها ب ال 500 الف اللي معاك بالبنك فتلاقي السلعة اقل فتقسطها... لو اخدنا منك ال 500 الاول ودفعتها كاش في شقة هتفلس ومش هتفتكر في قسط عربية لانك معكش ال 500 اللي بتأمنك نفسيا تستعين بيها لسداد اي قسط يحصلك ظرف متعرفش تسدده... لما نسيب لك ال 500 الف؛ ممكن تلاقي نفسك داخل اقساط سلع ب 2 مليون.

*️⃣ لما الاقساط تزيد عليك؛ هتبدأ حريتك الشخصية المهنية تقل؛ ظروف شغل مش كويسة؛ لازم أكمل أنا عليا أقساط مينفعش... وممكن كمان شوية وتخلي مراتك تنزل تشتغل تساعد في الاقساط؛ فكده زودنا عدد العمالة بالسوق؛ وبما ان العمالة زادت فالرواتب تقل؛ فتلاقي نفسك اتضغطت أكثر انتا ومراتك فتشتغلوا أكثر؛ وطبعا كل ما تشتغل اكثر هتستهلك اكل ولبس ومكياج ومواصلات وووو... وكمان هنضمن كده انكم تسيبوا عيالكن فترات أطول بدون الأب والأم... مين هيربي العيال؛ الاعلام بتاعنا؛ هيبرمجهم علي أفكارنا الرأسمالية الاستهلاكية؛ بابا ماما عاوزين كذا.. من جواك هتقول اشتريهاله مش كفاية مش قاعدين معاهم وحارمينهم؛ كمان مجبش لهم اللي نفسهم فيه؛ اشتريه لك يا حبيبي بالقسط برضك؛ مجاتش عليه يعني الحاجة دي؛ دا انا معايا ال 500 الف مأمنين ظهري 😁.

*️⃣ بس يا سيدي ودا كان بوست الوداع من الإجازة؛. ونعود تاني للوضع الطبيعي 😁 وفي انتظار رأيكم

*️⃣ المهم بس مش عاوز حد يتفاجئ من كم شركات التقسيط و ال FinTech اللي هتشوفوها الشهور القادمة... احنا متأخرين عن الكوكب والطريق دا... فبلاش تتفاجئوا.

*️⃣ ومحدش يقولي يعني اعمل ايه يا استاذ غسان؛ عشان أنا نفسي بشتري قسط برضك 😭😭 ايييه لقد وقعنا بالفخ

في بوستين لأصدقاء عملتهم لهم شير عالفيس فبرضك ابلغ الناس بيهم

1️⃣ البوست الأول لصديقي وأحد الأشخاص اللي بتعلم منهم؛ شريف سيد وهو بيشرح هنا حاجات تربوية عن الأبناء وكيف اختلفت المدارس زمان عن دلوقتي... البوست جميل

https://bit.ly/3KOdARR

2️⃣ البوست الثاني لأستاذ مالك سلطان وهو خبير اقتصادي وبيشرح ليه الهيمنة القوية الأمريكية بالدولار وفكرة ان دولتين يقرروا يتعاملوا بعملات أخرى زي حوار السعودية والبترول باليوان

https://bit.ly/3Iujoi5

بشكل عام بنصح بشدة بمتابعة الإثنين وأنا نفسي بتابعهم وهما في See First عندي بالفيس

العملات الرقمية لا تصلح بديل للدولار عالمياً لأسباب كثيرة وأهمها

*️⃣ عنيفة التغيرات؛ يعني تخيل دولتك قررت تحط احتياطي يوازي 100 مليار دولار بس بالعملات الرقمية؛ وعامل حساباتك بقي شراء سلع وخدمات ورواتب وكله على كده... فممكن تصحي الصبح تلاقي الاحتياطي بتاعك يساوي 120 مليار وممكن يساوي 80 مليار وكده... فالموضوع عنيف قوي قوي ولا يصلح للدول تحط خطة على أساسه أصلاً...

*️⃣ ان كل العملات الرقمية وكل التعاملات اللي بتحصل بالعملات الرقمية بالكوكب هي في الأساس معتمدة عالدولار؛ يعني يقولك ممكن تشتري سلعة X وتدفع بالبتكوين أو الايثريوم؛ حقيقي بس فعليا السلعة X مكتوب سعرها دولار وانتا بتدفع الموازي بالعملة الرقمية... يعني انتا قاعد تشوف العملة الرقمية دي تساوي كام بالدولار وتدفع علي اساسة... لكن مفيش سلعة مقومة أساساً بالعملة الرقمية بشكل مطلق.

*️⃣ بمعنى هل يقدر حد يعين موظف ويقولك مرتبك هتاخده 1 بتكوين سنوي؛ والله بقي البتكوين يطلع ينزل؛ مرتبك 1 بتكوين... شركة تصنيع عربيات تقولك عربيتي سعرها 2 بتكوين؛ أي كان سعر البتكوين كام؟ فعلياً كلهم بيقولوا كذا بالدولار وممكن نديك الموازي له بالبتكوين بقي او اليورو أو الين الياباني أو فرنك سويسري او او....

*️⃣ فالسلع بالكوكب بيتم تقييمها بالدولار وتسعيرها بيه... عاوز تروح تدفع بأي سلعة موازية قشطة حقك عيش؛ في لنهاية انتا معتمد عالدولار في التقييم؛ يعني رجعت لماما أمريكا برضك في حساباتك.

*️⃣ عشان يقدر صانع أي سلعة يقرر بيعها بعملة رقمية؛ لازم يكون بيدفع مرتبات عملة رقمية؛ وبيشتري السلع برضك بالعملة الرقمية؛ وبورصات السلع كلها بالدولار وصعب تتحول لعملة رقمية عشان ايه؟ عشان النقطة 1 وهي عنف وتقلبات العملات الرقمية + لازم بائع السلعة نفسه يكون بيدفع مدخلات انتاجه بالعملة الرقمية من رواتب عمال المناجم والفلاحين وكده... واخد بالك.

*️⃣ اه واخد بالك بقول عملة مش عملات؛ مهو المصنع مش هيروح يشتري خامات بالبتكوين ويدفع مرتبات بالاثيريوم والضرايب بالدولار والشحن بتثير ووو... كل دا عبئ إضافي.

*️⃣ لييييه عشان الصناع بيدوروا عالاستقرار ويعرف يخطط؛ فبيعملوا ايه؟ تأمين وصناديق تحوط؛ يعني يتفقوا مع جهة تثبت لهم سعر سلعة لفترة مقابل مبلغ... فانتا كل ما تزود لهم المتغيرات يزيد التحوط فتزيد التكلفة... يعني من الاخر انتا محتاج عملة واحدة بس وليس عملات.

*️⃣ بس يا سيدي مش هطول؛ لكن جالي كذا تعليق علي بوست استاذ مالك بخصوص ان العملات الرقمية تحل المشكلة؛ هي نظريا هتحل مشكلة بس هتخلق مشاكل 10 اضعاف المشكلة الحالية.... امشي يا مشكلة حالية وهاتلي 10 اخرين بس ميكونوش نفس المشكلة 😁.

*️⃣ ونعمل ال Disclaimer التقليدية نهاية البوست وهي أنه لا يعني أي مما هو مذكور إن المقصود التقليل من اهمية البلوك شين والعملات الرقمية؛ خالص والله لكن المقصود هي ان العملات الرقمية سلعة مضاربة؛ اشتري بيع اعمل سبوبة بيها؛ لكن عشان تبقي بديل للدولار... ربنا يكرم ويدينا ويديك طولة العمر وتحل المشاكل... مع مراعاة ان ما هو مذكور نقطة في بحر العقبات

لما شيرت وكتبت بوستين عن الدولار والعملات الرقمية في طن لبس وسوء فهم حصل مع الناس وغالباً مكنتش واضح كفاية فهعيد توضيح دا في نقاط:


1️⃣ الناس افتكرت اني بقول الدولار جميل ومثالي والدنيا زي الفل... غلط خالص دا خيار ابن جزمة وهو من أسباب هيمنة أمريكا علي الكوكب وأدينا شوفنا أهو أمريكا عاوزة دلوقتي تثبت إن حتى لو عندك نووي فعاادي طز في النووي برضك لان عندي الدولار... الكلام كله إنه بلا بديل حالياً وكل البدائل من يوان ويورو دول ولا الهوا. فآه الكوكب شاف أمريكا بتعمل ايه والصين شافت؛ لكن هل 2022 الصين هتغير التعاملات؟ طيب 2025 حتي؟ طيب هتبطل الصين تشتري سندات أمريكية؟ لا برضك... مش معني انك شايف خيار زفت إنك مش هتستخدمه؛ هتستخدم بطريقة مجبر أخاك لا بطل... روسيا من أكبر 5 دول عندها ذهب؛ انقذها في حاجة؟

2️⃣ لما كنت بكتب زمان في آي-فون إسلام مقالات؛ كان لما يحصل ونقارن بين الآي فون وتليفون تاني؛ كان يدخل لنا ناس تقولك لاااا عاوز تحديثات شوف جوجل نيكسس/بيكسل لاحقاً... تقولي معايير الشاشة فعندك سامسونج ؛ تقولي كاميرات فشوف كاميرات هواوي (الله يرحمها بقي 😂) وأقعد أشرح للناس إن الاي فون جهاز واحد يعني لما تقارن بتقارن مع جهاز واحد؛ ومفيش جهاز اسمه جالاكسي بيكسل ميت اوبو... مينفعش تجيب من كل فيلم اغنية وكده خلاص خلصت المقارنة.

*️⃣ أهو نفس المثال دا جالي بعد سنين في بوست العملات الرقمية؛ ايه دا بتقول مفيش استقرار فعندك عملات كذا وكذا وهتقولي مفيش انتشار فعندك بتكوين وهتقولي مفيش مش عارف ايه ففي مكافئات الذهب ووو... ايوا لكن مفيش عملة واحدة فيها كل ما سبق؛ البديل لازم يكون عملة واحدة فيها كل ما سبق؛ واحدة مش مجموعة.

3️⃣ نقطة كمان وهي إن البيزنس علمني ان الماية تكذب الغطاس؛ يعني انتا شايف حاجة وأنا شايف حاجة؛ السوق بقي هو اللي يحكم؛ عالأرض ايه الوضع؟ الأرض بتقول معايا دولار هعرف ابيعه في كل دول العالم؛ معاك عملة رقمية أي كان اسم امها ايه ملهاش ولا 1 في المليون من قبول الدولار... هتقولي لا القبول موجود؛ قشطة اقنع مزارعي البن في اثيوبيا يتعاملوا بيها؛ اقنع مزارعي الكاكاو في كوت ديفوار يتعاملوا بيها... انا اقتنعت او لا طز؛ احنا ملناش وزن عالأرض؛ اللي ليه وزن عالارض هما اللي معاهم السلع؛ اقنعهم هما... وطالما مقتنعوش يبقي خلاص.

4️⃣ البيزنس علمني برضك إن مش معني إن في خيار مثالي جميل يبقي هو اللي هينجح؛ هي أكثر عربية بتتباع في مصر هي احسن عربية؟ هو أكثر تليفزيون بيتباع هو احسن واحد؟ مين العبقري اللي خلي الناس تفتكر ان طالما في خيار بديل فيه مزايا أكثر يبقي هينجح؟

*️⃣ تعرفوا مشاريع ال Startup بتفشل 95% منها ليه؟ عشان اصحابها فاكرين إن الموضوع مزايا أحسن؛ فيقعدوا يحطوا مزايا وبعدين هوب ميلاقوش اقبال ويبقوا قاعدين مش فاهمين ليه؛ دا الخدمة بتاعتنا أفضل من اللي في السوق؛ ازاي دا حصل؟

*️⃣ الموضوع مش مزايا بتترص؛ في البيزنس في حاجات كثير قوي؛ لازم تفكر في المزايا لكن تفكر برضك في micro environment و Macro برضك... الثنائي دا كفيل يخلي كل مزاياك بلح.

5️⃣ هل معنى دا إن خلاص مستحيل العملات الرقمية تنجح؟ مين قال كده؟ أنا بتكلم عنها في صورتها الحالية؛ لسه كثير عليها يعني؛ يمكن تتطور في يوم وتحل المشاكل اللي بتواجهها وتنجح؛ بس لسه بدري؛ مش هتعرف تخربش المنظومة العالمية ولا علي 2030... لسه بدري وفكر في تحديات ال Macro و Micro الاول قبل ما تعترض

⬅️ دي علي جنب؛ السلفادور مش دولة؛. يا جدعان بتضربوا مثال بالسلفادور؟ دا الناتج المحلي لاسكندرية اكبر منها؛ واسكندرية ايه دا يمكن بورسعيد أكبر منها... دول 2 اصحاب بيشتغلوا ب 10 جنية فيقدروا يعملوا اللي نفسهم فيه؛ دا لو اعتبرنا الدولة دي شخص؛ يعني كل خدماتهم وكل الناتج بتاعهم GDP كله شخص واحد؛ فالشخص دا مش هيدخل قايمة اغني 50 شخص... يعني دولة كاملة متجيش زي رقم 50 عالعالم في الثروة... فاضربوا مثال بدولة بحجم كبير. عارفين مصطلح جمهورية الموز؛ دا طلع علي هندوراس؛ اهي نفس حجمها بالظبط... وطبعا مش معني دا اني بقول انهم ملهمش لازمة بالكوكب ؛ لكني بقول اللي يصلح لادارة اقتصاد شارع لا يصلح لدول كبيرة

⬅️ كلمة اخيرة متكررة؛ يا شباب احنا بنتخيل؛ نتخيل علي اساس معلومات وواقع متاح قصادنا... الواقع تغير بقي يبقي كل شيء يتغير عادي جداً مهواش قرآن

البنك المركزي يرفع الفايدة 1%؛ والبنك الأهلي والبنوك تحرك الدولار 20 قرش رسمي يعني بقي تقريباً 16 جنية رسمي الدولار.

خطوة متأخرة جداً وغالباً كده هيخش لعبة الدولرة وسباق الدولار

⬅️ تحديث

بقوا 30 قرش والدولار 16:05

⬅️ تحديث 2

المركزي اطلق يد البنوك في ارتفاع الدولار والصراع مع السوق السوداء

⬅️ تحديث 3

الدولار زاد جنية رسمي وبقي 16:65

⬅️ تحديث 4 ومش هحدث تاني

الدولار كسر 17 جنية في البنك رسمي

⬅️ تحديث 5 استثنائي

الدولار 17.5؛ دخلنا سباق دولرة خلاص والسيناريو اللي كنت بقول مش هيكونوا أغبياء ويعملوه... بتعرفوا تعدوا لغاية كام


لا حول ولا قوة الا بالله؛ لقد ركبنا الزحليقة

بمناسبة وصول الدولار ل 17.5 بالبنوك؛ نكتب بوست بقى عن رأيي الشخصي وقناعاتي حول اللي بيحصل.

*️⃣ اللي كان ب يسألني لغاية السنة اللي فاتت الدولار هيبقي ب 20 و 18 ووو كنت بقول لا؛ ثابت ومستمر او يمكن زيادة قروش...

*️⃣ بداية السنة دي حصلت متغيرات كثيرة وقولت اتوقع كبيره قوي يعني يتحرك 10% يعني ل 17.5 بس بالتدريج علي سنة؛ يعني علي ديسمبر كده بالكثير قوي نشوف 17.5 دي علي نهاية السنة... فدا كلامي ومش هنكره يعني عشان شوفناها في يوم...

*️⃣ المشكلة إن مصر عندها مشاكل اكسترا في موضوع الحرب دي؛ في البداية حوالي 30% من السياحة بتيجي لنا من روسيا وأوكرانيا وساعات أكثر؛ وكمان بنستورد منهم سلع كثير استراتيجية؛ وضيف عليهم انهم يعتبروا أسواق ناشئة زي حالاتنا؛ فاللي هو ضرب اكسترا أصلاً عن الطبيعي.

*️⃣ لكن في الشق الآخر تحريك الدولار بشكل عنيف شيء كارثي؛ وكنت بقول إن الدولة هتستخدم أدوات السياسة المالية للتحكم في الدولار؛ وأدوات السياسة المالية دي يعني زي الضرايب وتحجيم الاستيراد وكده... ومش هتروح هوبا لتحريك الدولار... بمعني تاني... عندنا عجز في الدولار الوارد لينا؛ يبقي اما نزود سعر الدولار بحيث الطلب يقل... او نخنق اصلا الطلب ونقلله بذراعنا بحيث يبقي اد المعروض.

*️⃣ يعني اكن بيدخل لمصر 50 مليار والطلب عالدولار 50 مليار (مجرد أمثلة رقمية) فهوبا حصل ظرف خلي اللي هيخش لنا 40 مليار؛ يبقي خلاص نقلل الطلب ونخليه 40 وبكده الدولار مش هيزيد.

*️⃣ بالفعل خلال آخر 3 اسابيع مصر قفلت؛ أيوا مصر قفلت الاستيراد؛ الشركات تقدم عاوزة اعتماد بنكي يتقالها من عنيا؛ شايف قايمة الانتظار دي اقعد فيها؛ لغاية امتي؟ لغاية لما ربنا يسهل إن شاء الله يا أخي مستعجل علي ايه.... واللي حتى يستورد وبضاعته توصل؛ مهياش خارجة من الجمارك... اقفلي يا ابني البلد دي ومحدش يستورد قشاية بدون موافقة مننا.

*️⃣ المشكلة إن عدم الشفافية دي اترجمت إن مصر مفيهاش دولار والبنك المركزي مفلس؛ ودا مش سليم؛ المركزي معاه دولار كثير ؛ عالاقل 3 اضعاف اللي كان معاه في تعويم 2016... ومتبصش بس للاحتياطي... طارق عامر معاه فلوس شايلها علي جنب بره الاحتياطي... ودا بجد ودا كلامه هو بنفسه ان في فلوس علي جنب 😂....

*️⃣ هتقولي بس البنوك بعضها عنده عجز ؛ دا صحيح بس وقت الزنقة بجد فالمركزي معاه فلوس تكفي لسد الزنقة؛ بس هو مش عاوز... ليييه الله أعلم محدش عارف بس الأكيد لو هتولع فعندنا طفايات كفاية...

*️⃣ لسبب ما المركزي قال للبنوك اتصرفوا؛ خدوا قروض او لموا من السوق دولار؛ المهم ان اللي معايا دا للطوارئ مش للاستخدام العادي.

*️⃣ فمن هنا البنوك بطلت تدي الناس دولار؛ قبل كده كانت بتديهم والمركزي في ظهرها... هو سابهم ورماهم في البحر وقالهم عوموا يلا؛ هو واقف واكيد لو حد هيغرق هينقذه... بس هو عاوز غالبا يشوفهم بيتصرفوا بعيد عنه.

⬅️ ايه بقي المتوقع في الوضع الحالي

في رأيي الشخصي في 4 سيناريو

1️⃣ ودا انا مستبعده ولا اتمني حدوثه؛ وهو إننا نخش سباق دولرة؛ الناس تقولك ايه دا بقي 17.5 يبقي بكره 18.5 وبكره ناس تشتري ب 18.5 وتقولك بكره يجيب 20 ولما يبقي 20 الناس تشتري وتقولك بكره 25 وهكذا... تخش سباق دولرة... هو الشواهد بتقول انك داخل الطريق دا؛ بس نفتكر المركزي معاه احتياطي وفلوس بره الاحتياطي تخليه يمنع دا... فنتمني يكون ذكي وميقعش في الفخ ونلبس.

2️⃣ السوق يبقي كيوت؛ ودا سيناريو مثالي؛ ان السوق يتعارف مع نفسه ان سعر معين ليكن 17 او 17.5 او 18 خلاص دا سعر الدولار الجديد؛ فالدنيا تهدي وخلاص يقف عند كده... دا سيناريو مثالي قوي وتوقعي له لا يزيد عن 10%... والمثالي يعني خلاص ستوب يقف؛ لكن يطلع وينزل وبعدين يستقر اكيد دا هيتم ويستقر لكني بقول بدون طلوع ونزول.

3️⃣ سيناريو هعوركم كلكم... دا السيناريو المفضل لطارق عامر وعمله في 2016 وعمله في 2018... وهو انه لما يشوف السوق السوداء اشتغلت؛ يطلع معاها في السعر؛ بحيث يعور ويزعل المضاربين؛ نفتكر سوا بعد تعويم 2016 لما الدولار قرب من 20 جنية وبعدين نزله؛ اللي اشتراه وقتها بالسعر دا خسران لغاية النهاردة اهو... فممكن يكون في بال المركزي سعر 17 جنية... فهو يخلي السوق يطلع ل 20 جنية وبعدين يضخ فلوس يغرق السوق فينزله ل 17 ويخرب بيت كل اللي اشترى علي 18 و 19 و 20 دول عشان يحرموا يدولروا تاني... عملها زي ما قولت مرتين طارق عامر فيا تري هيعملها الثالثة.

4️⃣ دا مش سيناريو دا مشتق من فوق؛ وهو ان خلاص كده خلصت الشوطة المجنونة والدولار هينزل يعني 17.5 السقف وينزل وخلاص شكراً كده

توقعي الشخصي وامنيتي هي السيناريو رقم 3

*️⃣ افتكروا ان في بتاع 30 مليار دولار استثمارات اجنبية في اذون الخزينة المحلية؛ يعني اجانب دخلوا دولار وحولوه جنية واشتروا ديون حكومية بفايدة 10 و 12 و 15%... دلوقتي لو انتا جيت زودت لهم الدولار 15% مثلا فهما يكسبوا 12% من ادوات الدين؛ يروحوا يشتروا دولار يلاقوا نفسهم خسروا... كده هما خسروا ومش هييجوا لك السوق تاني... فلازم تحافظ عليهم كسبانين عشان ييجوا تاني...

*️⃣ في السنوات الماضية مصر كانت مفضلة ليهم؛ ياخدوا فايدة 12% وبعدين يروحوا بشتروا دولار يلاقوه رخص كمان 😂 فيكسبوا 15% فعليا عالدولار... ارباح خزعبلية محدش في الكوكب بيحققها... كنا سوق مثالي ليهم. فهل خلاص مش عاوزينهم تاني؟

*️⃣ بس خلاص واديني قولت رأيي وكنت ولازلت شايف ان اللي بيحصل دا مش منطقي؛ ومش مفروض القفزة السعرية دي تحصل... لكن ادينا هنشوف ايه هيحصل بقي.

*️⃣ اه متنسوش اي سلعة هتزيد تقولوا جشع تجار... استنوا زيادة بنزين خلال ايام

*️⃣ اه الاخوه اللي عايشين بره؛ عارف ان نفسكم الدولار ب 35 جنية والريال ب 10 جنية واليورو ب 40 جنية؛ عادي مهو انتم كده كسبانين دوبل... من ناحية ثرواتكم بتزيد؛ ومن ناحية ثانية تفرحوا في النظام السياسي اللي انتم معارضين ليه... بس عاوز افكركم ان الدولار لو حتى بقي ب 100 جنية؛ النظام السياسي مستمر؛ اللي مش هيستمر هو اخواتكم المصريين هيموتوا من الجوع... ف و انتا بتفرح في النظام وقاعد بتحسب دخلك الاجنبي بقي كام في مصر وهتقدر تشتري بيه ايه؛ افتكر ان في ناس هتموت حرفياً من الجوع... هتقولوا لي يعني هما عملوا ايه... مصدر اخبار يلا دولرة وحولوا كل فلوسكم لدولار وووو عادة من ناس بره... النار عشان تستمر محتاجة وقود واوكسجين وانتم بتوفروا دا بالفعل للنار.

طبعا هتسيبوا البوست كله وتعلقوا علي اخر فقرة عارف

كده أنا عندي 3 خيارات بالنسبة للحساب الشخصي هنا وتليجرام

1️⃣ إما هشغل البلوك بشكل عنيف عشان قلة الأدب والتحفيل والتريقة زادت

2️⃣ هقفل التعليقات أصلا واخليها بس للأصدقاء

3️⃣ اوقف الأكونت ككل سواء قفل تام أو هسيبه خالص ومش هبص عليه ولا اي مينشن ولا أي حاجة

⬅️ وغالبا هعمل ال 3 سوا عشان ميبقاش شغلي إلكترونيات يعني 100% مستورد؛ وقاعد بلف حولين نفسي؛ والاقي مينشنات سخيفة وتعليقات اسخف...

*️⃣ أنا وضحت رأيي وكنت ولازلت عليه؛ والسعر اللي شايفينه النهاردة دا مش السعر الحقيقي... مهو تعويم 2016 شوفناه قرب من 20؛ كان استمر عليه... اصبروا اسبوع وتشوفوا السعر الحقيقي اللي هيكمل عليه كام.

*️⃣ وكنت عمال اقول ان في طريقين؛ واحد هادي مؤدب براحة كده عشان البلد متضربش منهم... والثاني عنيف... وكنت بقول مينفعش العنيف عشان كذا وكذا... هما قرروا لا العنيف ينفع.

*️⃣ العنيف دا يعني ارتفاع كبير؛ يعني شهادات بنكية ب 18% تسحب السيولة وتعمل ركود... طيب القطاع العقاري مثلا متوقعين ايه الوضع؟ خامات مستوردة يعني زيادة تكلفة؛ وكمان سحبت السيولة من المشتريين... يعني صباح الركود التضخمي... البس بقي يا نجم عشان خارجين...

*️⃣ طيب لما كنت من كام شهر بتشتري برميل البترول ب 70 دولار والدولار ب 15.75 يعني البرميل يكلفك 1100 جنية... هوبا البرميل ب 110 وتخلي الدولار ب 18.3... يعني البرميل بقي يكلفك 2000 جنية!!! متخيل زيادة السعر في البنزين هتبقي ايه؟

*️⃣ لما يبقي عندك بند خدمة الدين 1020 مليار جنية؛ هوبا يزيد بتاع 100 مليار جنية بزيادة الفايدة والدولار... يعني عندك زيادة في الفايدة وزيادة في الدولار وزيادة في البنزين.

*️⃣ يعني الخيار العنيف دا معناه ان الحكومة بقت محتاجة بتاع 15 الي 20 مليار جنية شهري زيادة عن الخطة عشان تبعات القرار دا لو استمر الوضع علي ما هو عليه... يعني وزارة المالية مطلوب تجيب 500 مليون جنية يومي زيادة؛ وركز علي يومي وركز علي زيادة علي اللي بتجيبه.

*️⃣ لما يكون القرار سحب السيولة من السوق يعني ركود يعني خسارة للجميع؛ فالشركات تخسر بس المالية مفروض تلم فلوس اكثر من الناس... تخيلوا بقي الإجراءات

ففي بلاوي كثيرة؛ وكل شوية يطلع لي حد يقولي فرحان فينا او بتطبل للدولة؛ احين يعني انتم أغبياء؛ انا عايش في مصر معاكم وعندي بيزنس في مصر قايم علي منتجات مستوردة؛ وهينفشخ الضرايب والرسوم الجديدة؛ البيزنس شغال علي شحن البضايع يعني هيزعل ويجيب ناس تزعل في قرار زيادة البنزين اللي هيطلع خلال ساعات او ايام... يعني قاعد في مصر ودخلي بالجنية المصري؛ يبقي يتقالي فرحان

فرحان

طيب ماشي انا اقفل الاكونت دا واخلص عشان انا الضغط عندي مش هيخليني اعرف اكتب بدون ما اشتم؛ وانا مش بعرف اشتم الصراحة للأسف.

أول مرة أنزل أعمل شوبنج حقيقي من شهر

*️⃣ ايه الأسعار دي؟ أنا راجل بحب الأرقام فغالبا مخي مسجل سعر المنتجات؛ حرفياً مخي هنج؛ كل المنتجات سعر جديد... يعني اكن مخي قاعد يعمل Save لعدد مهول من الملفات.

*️⃣ الصدمة إن أكثر منتجات سعرها زاد هي المنتجات الغذائية؛ الباقي زاد بس مش زي الأكل والشرب.

*️⃣ المرعب إن الأسعار دي لسه هتتعدل بعد زيادة الدولار؛ أكيد المصانع لسه بتعمل اعادة تسعير وبتبعت للمتاجر واكيد في منتجات اتغيرت؛ بس لسه مؤكد ان الغالبية لسه هيتم تعديله وقليل اللي اتعدل امبارح.

*️⃣ صراحة مش قادر اتصور الناس هتعمل ايه في الغلاء دا؛ الجهاز المركزي كان عامل خط الفقر المصري يعني اللي يصنف فقير هو اللي دخله الشهري أقل من 840 جنية علي ما أذكر؛ والتقرير الحكومي قال إن بالخط دا الفقراء في مصر 27% تقريباً... وثلثي الفقراء في الصعيد..

*️⃣ طيب هل منطقي هيفضل حد ال 840 جنية مستمر؟ دا بعيد عن هل منطقي ان في فرد يكفيه 840 جنية في الشهر كل حاجة؛ لكن تخيل معايا ان أكثر من ربع الشعب دخله اقل من 840 جنية شهري؛ هيعملوا ايه في الأسعار دي.

*️⃣ طبعاً أنا مش داخل انظر واقول اني فقير ويا عيني؛ الحمد لله أنا ربنا كارمني واقدر اشتري السلع الأساسية للحياة أي كان سعرها؛ بس كام من الشعب يقدر كده؟ كام من الشعب يقدر يدخل السوبر ماركت وهو حاطط ورقة منتجات عاوزها وهيشتريها بغض النظر هي بكام؟

*️⃣ صراحة وقت غلط خالص لتحريك الدولار؛ في الاوقات اللي فيها غلاء مفروض دا وقت تدعم وتساعد الناس؛ ولما يكون الوضع مستقر شوية هنا تقرص عليهم... بس واحد متعور وبينزف تروح قارص عليه؟ طيب لما يموت منك؟ اااه صحيح لما يموت نقول الحمد لله عشان الزيادة السكانية تقل؛ مهي السبب في كل مشاكل الكون صحيح؛ ويا رب الشعب يموت وكده ونخلص منه.

*️⃣ ربنا يكون في عون الناس اللي معندهاش ملاءة مالية لتحمل فروقات الأسعار الغريبة والرهيبة دي؛ وبجد أنا اتصدمت وبقيت اكلم مراتي اراجع معاها الاسعار؛ واقولها هو كذا مش كان ب كذا؟ والله شكيت في ذاكرتي.

*️⃣ أنا عارف ان في زيادة بس نسبة الزيادة هي اللي مخي معرفش يحسبها؛ كذا دا مخي فاكره كان ب 70 جنية؛ فلما اشوفه ب 100 جنية؛ اقول لا اكيد مخي فاكر رقم غلط ودا كان ب 90 وزاد ل 100 جنية؛ مفيش اكيد 70 دي يا مخي انتا كبرت وخرفت والضغط وحرقة الدم خلتك مش فاكر الرقم القديم صح.

لا حول ولا قوة الا بالله الصراحة؛ وبجد المشكلة اننا لسه في بداية الغلاء؛ لسه احنا في البداية والاسعار لسه هتزيد مش اقل من 10-15% كمان السنة دي 😔😔

تخلص من كارتونات الأطفال اللي جواك

⬅️ س : يعني هو التخفيض الجنية دا حصل بسبب الحرب صح؟

ج : لا مش بسبب الحرب

⬅️ س : أومال ايه

ج : تراكم أسباب.

⬅️ س : يعني تقصد بسبب زيادة الفيدرالي 0.25% وكده كل مرة من ال 6 هيزود الربع دا هيزيد معانا الدولار صح؟

ج : لا برضك

س : يبقي الفوايد والربا هما السبب

ج : الله اعلم بس لا برضك؛ تراكم أسباب

⬅️ س : يبقي السبب هو فشل الحكومة صح؟

ج: تراكم أسباب قولت

⬅️ س : ايه يا عم تراكم الأسباب دا ما تقول السبب

ج : هو انتا ليه عاوز سبب واحد؟ ليه دايماً تفكيرنا محصور في سبب وحيد؟ التحرش ليه يقولك بسبب لبس البنت؛ لالا بسبب عدم تربية الرجالة؛ لالا بسبب مفيش عقوبات رادعة؛ الخ الخ...

*️⃣ لسبب ما مخنا كسولي فمش عاوز فرهدة فدايماً في أي حاجة تحصل يقولك عاوز سبب؛ مش أسباب لالا هو سبب واحد ووحيد؛ في التحرش عاوز سبب واحد ووحيد؛ في خسارة فريق كورة القدم عاوز سبب واحد ووحيد وهو حارس او لاعب او مدرب؛ في مشاكل نادي الزمالك عاوز سبب وحيد وهو المؤامرات عالنادي؛ في الاقتصاد حتي عاوز سبب واحد ووحيد هو سبب المشكلة.

*️⃣ كل شيء بيحصل بيكون ليه أسباب كثير؛ في منها أسباب رئيسية ومنها أسباب فرعية؛ تراكم الأسباب دي سوا بيكون هو اللي بيأدي للنتيجة... لو قعدت فكرت في كل سبب بشكل منفرد؛ هتلاقي إنه مش منطقي السبب التافهه دا يؤدي للوضع الحالي... بس السبب دا مع دا مع دا هيوصلك للي انتا فيه.

*️⃣ حتى انتا نفسك؛ انتا فاكر ان معارفك وتفكيرك دا جاي منين؟ تراكم حاجات عرفتها من الدراسة علي حاجات من التربية والعائلة علي خبرات من الشغل على معلومات قرأتها في كتب أو الفيسبوك أو دورات... فمخك في النهاية ومعارفك دي حصيلة كل ما سبق... لو حد قالك قولي ابقي زيك ازاي؟ مش هتعرف لانك ممكن تخليه يقرأ نفس الكتب ويحضر نفس الدورات؛ بس مش هيكون عايش في نفس الأسرة ولا راح نفس المدارس... مستحيل يبقي نسخة تانية منك... ممكن يقرب بس مستحيل.

*️⃣ فبلاش تقعدوا تدوروا في مشكلة علي سبب واحد ووحيد؛ معلش عارف ان الموضوع مرهق بس السبب الوحيد دا كارتونات الاطفال والقصص ربته جوانا؛ الشرير اللي ورا كل المشاكل ونخلص منه تخلص المشاكل...

انتا كبرت فتخلص من الكارتون اللي جواك

عارفين موبايل سامسونج الأحدث والأغلي S22 دا مثال واضح علي ايه اللي بيحصل فينا

*️⃣ الموبايل دا سامسونج أعلنت عنه من شهر واتفتح الحجز؛ وكثير راحوا دفعوا وحجزوا؛ اللي من سوق واللي من 2B واللي من XPRS واللي من فودافون وووغيرهم كثير.

*️⃣ هوبا مفيش موبايل؛ فين الموبايل؟ مفيش موبايل... شتيمه بقى وبوستات هجوم عالمحلات اللي حاجزين منها الموبايلات؛ وكله يحط اياك تشتري من كذا عشان حاجز منهم وحصل كذا وكذا ومفيش موبايل.

*️⃣ هوبا إمبارح سامسونج تعلن قايمة الأسعار الجديدة اللي فيها زيادة كل الموبايلات وعلي رأسها S22 اللي زاد آلالاف... والبوستات تتجدد وحرامية ودي كانت خطة من التجار الجشعين؛ خزنوا الموبايل عشان يطلعوه بالأسعار الجديدة... وبرضك بوستات Don't Shop Here وووو.

*️⃣ اللي الناس متعرفوش؛ وبالمناسبة أنا مش شغال في الموبايلات عشان عارف العقليات اللي معاها شهادة معاملة الأطفال اللي علي طول تقولك بتبرر؛ اللي الناس متعرفوش إن الجمارك في مصر بقالها قرب الشهر مقفولة؛ الشحنات مش بتدخل بسهولة؛ والشركات اللي تطلب اعتماد استيرادي مش بتاخده.

*️⃣ فالموبايل كان مفروض داخل زي منتجات كثيرة لكن القرارات دي عطلته؛ مدخلش من معظم الموزعين؛ طيب تخيل سامسونج عاوزة تجيبه بسرعة النهاردة طيران؛ اعتماد بنكي؛ طيب اهي الفلوس؛ قشطة ماشي خش دورك في قايمة الانتظار للاعتمادات...

*️⃣ فمنتجات كثير ناقصة في السوق بسبب قفل الاستيراد وعطلة الاعتمادات؛ فلما منتج ينقص يحصل ايه؟ الطلب اكبر من العرض فيغلي.

*️⃣ فلما يغلي ايه يحصل؟ بالظبط كده الناس تشتم التوكيلات والمواقع والمتاجر إنهم السبب...

*️⃣ طبعاً متقدرش سامسونج مصر تطلع بيان تقول الجمارك والبنوك هي السبب؛ لإنها لو عملت البيان دا فإنا عارفين مصيرها ايه... فالنتيجة هي سكتت خالص؛ فالناس السكات بتاعها يخليها تقولك اكيد مؤامرة علينا...

*️⃣ زي بالظبط خبر الدولار الجمركي للسلع الاساسية اتثبت 16 جنية؛ فالناس تقولك اهو اهوووو 16 جنية؛ ليه بقي تزودوا الأسعار... طبعا هو مش واخد باله إن الدولار الجمركي لا يعني ان المستورد هيشتري السلعة ب 16 جنية الدولار ؛ بل لما تيجي هيدفع رسوم الجمارك بالدولار 16 جنية... لكن سعر السلعة وسعر الشحن وكله بيتدفع بالدولار الحر 18.25 النهاردة... لكن كالعادة... معلومة ناقصة تخلي الناس تشتم وتهاجم بعض.

في ورقة منتشرة بحظر استيراد قايمة سلع كده الا بموافقة البنك المركزي؛ وصراحة مش معروف مدى صحة الورقة دي ويقال حصل نفي ليها؛ لكن في شوية نقاط كده مؤكدة تعالوا نرصهم جنب بعض.

*️⃣ سبتمبر 2021 الرئيس يصرح ان مصر هتطبق في مارس 2022 المعايير الاوروبية؛ وان مش هيكون مسموح لاي حد يستورد اي حاجة؛ وان اللي عاوز يستورد لازم يقدم طلب وممكن ميتوافقش له... لكن الكلام كان علي جودة المنتجات وانها مطابقة للمواصفات الأوروبية. وقال انه فترة توفيق اوضاع لغاية مارس 2022

*️⃣ فبراير 2022 البنك المركزي يقرر تطبيق الاعتماد المستندي؛ يعني اي حد عاوز يستورد يروح يحط فلوس وتفاصيل الشحنة عند البنك وياخد اعتماد بالاستيراد.

*️⃣ مارس 2022 يتم بدون أي قرار رسمي ايقاف الاعتمادات لجميع الشركات في جميع الاصناف عدا المواد الغذائية والأدوية؛ يعني أي كان انتا جايب ايه؛ هدوم؛ لعب أطفال؛ لمض؛ أي حاجة مهياش أكل (اكل اساسي زي الدقيق والارز والسكر وكده وليس كافيار وجمبري) فمش هيتوافق لك؛ وبرضك مش بيترفض؛ يعني بتتحط Hold كده.

*️⃣ يعني الوضع الحالي كل المستوردين؛ كانوا موبايلات او كانوا عربيات او حتي شنط مدارس؛ كله مش بياخذ موافقة؛ وبكرر برضك مش بياخد رفض؛ يعني بياخد (حاضر ان شاء الله هتاخد الاعتماد وتستورد)...

*️⃣ مؤخراً بعض الشركات بدأت تاخد اعتمادات؛ بس دي شركات مفيهاش دفع دولار؛ يعني مش مغطي الاعتماد جنية؛ لا دا مغطية دولار فاتوافق لبعضهم بالفعل.

*️⃣ النهاردة 24 مارس في ورقة انتشرت ان في بنود كذا وكذا دول هتبلغونا بيهم قبل ما تدوهم اعتماد؛ ودي ورقة غريبة شوية لان حالياً الكل بيتم الابلاغ بيه؛ فيا تري دي معمولة ك خطة مستقبلية بعد فتح الاعتمادات؛ يعني اكنهم بيقولوا للبنوك بصوا لما نفتح لكم الباب؛ ادوا اعتمادات براحتكم عدا البنود دي ارجعوا لنا.

*️⃣ عامة محدش عارف بس غالباً هيطلع نفي من البنك المركزي خلال ساعات او دقايق او يمكن طلع وقت كتابتي للبوست... لكن يا ترى هل معني دا انهم هياخدوا اعتماد عادي لمجرد الطلب؟ ادينا هنشوف لكن اتمني لان اظن شهر ايقاف استيراد صعب؛ شهر كمان وهيحصل عجز بضايع في السوق؛ مش هتقولي السلعة غالية؛ لا حضرتك دي مش موجودة أصلاً.

*️⃣ بشكل شخصي اتمني تنظيم الاستيراد فعلاً بس اهم خطوة في التنظيم هي ان يبقي في قواعد واضحة؛ قوانين صريحة وظاهرة للجميع؛ مش يكون في قانون؛ وفي جنبه تعليمات شفوية تطبق لكن ننفي انها موجودة... مهم قوي قانون ساري علي الجميع أياً كانوا؛ مفيش استثناء لأي جهة أو أي شخص.

*️⃣ ومفيش مانع ان بعض السلع تتقصقص وتتمنع عشان نوفر عملة صعبة؛ بس المهم أي بند بيهدر عملة صعبة نوقفه برضك.

الا هو يا جدعان مين العبقري اللي افتكس فكرة إن الدولار زاد 15% يبقي قيمة فلوسك ومدخراتك قلت 15%

*️⃣ بسم الله ما شاء الله عليك؛ يعني كده السنة اللي فاتت الدولار فضل ثابت يبقي خلاص مدخراتك ثابته وزي الفل؟

*️⃣ طيب في 2017 لما الدولار نزل 20% قصاد الجنية؛ كده مدخراتك زادت 20% 🤔🤔

*️⃣ منطق في الشلاحات الغربية كده معمول عند بتاع كبدة والكل بيعمله شير في رغيف.

*️⃣ مدخراتك قيمتها نزلت دي يعبر عنها التضخم؛ مش سعر الدولار؛ واظن مثال 2017 واضح اهو قصادك الدولار خسر 20% من قيمته قصاد الجنية وفي نفس الوقت كان في تضخم علي ما اذكر فوق ال 25%...

*️⃣ يعني الدولار نزل وبرضك فقدت ربع قيمة مدخراتك. فبلاش فقاقة وتربط قيمة مدخراتك بالدولار....

*️⃣ ودلوقتي لو الدولار نزل 18% والتضخم 25% يبقي انتا فقدت 25% من مدخراتك؛ ولو الدولار نزل 18% والتضخم 15% يبقى انتا فقدت 15% من مدخراتك مش 18%.

⬅️ ان شاء الله ناوي اعمل سلسلة بوستات اشرح يعني ايه تضخم وبيحسبوه ازاي؛ وايه السياسة المالية والسياسة النقدية والفارق بينهم؛ وشوية مفاهيم اساسية... وطبعا هسعي ان الشرح يكون بالهجياص وببساطة مش اكاديمي لاني انا نفسي مش اكاديمي أصلاً 😁

وصباح الفل

من الحاجات اللي عاوز اتفرج علي أوروبا هتعمل فيها ايه؛ الانفاق بعد 6 شهور؛ وعاوزك تتخيل معايا أوروبا دلوقتي عندها تحديات إيه:

*️⃣ عاوزة تتخلص من الغاز الروسي؛ يبقي هيصرفوا عشرات ومئات المليارات في خطط عاجلة لمحطات طاقة نظيفة ومحطات فك الاسالة للغاز ووو... انفاق مهول قادم.

*️⃣ برضك محتاجين انفاق ضخم عالتسليح؛ أوروبا اكتشفت انها هفأ عسكرياً ومحتاجة أمريكا وألمانيا اعترفت بدا وقررت انفاق 2% من الناتج القومي عالتسليح؛ فكده في انفاق مهول هيحصل على برامج تسليح.

*️⃣ ضيف بقي معاهم لما الحرب تخلص التزامهم بدعم أوكرانيا ببرامج إعادة إعمار هتتكلف برضك عشرات المليارات.

*️⃣ كل دا هيتم وفي نفس الوقت أسعار كل حاجة غالية؛ يعني انفاق مهول علي الأساسيات...

*️⃣ طيب أوروبا بتجيب دخلها منين؟ الضرايب طبعا اللي بتوصل ل 80% و 90% من دخل الحكومات؛ فالمواطن هيتفرض عليه طن ضرايب عشان الانفاق دا كله؛ بس هيتم الانفاق دا كله إزاي والأسعار غالية يعني المواطن مفحوت لوحده ؟ صراحة مش عارف.

*️⃣ ضيف بقي مع ما سبق إن في خوف اتزرع من المليارديرات بتوع العالم الثالث والعالم النامي من أوروبا؛ الخوف دا بيقول إن لو أوروبا قررت تقلب علي دولتي؛ هياخدوا فلوسي وأصولي والشغل الأوروبي التقليدي في السرقة علي مر التاريخ... فممكن تلاقي توجه تدريجي إنهم يعيدوا تفكير في استثمارتهم في القارة العجوز.

*️⃣ يعني عندنا استثمارات وأموال تقل؛ وأسعار غالية فالمواطن مش هيلاقي؛ وهوبا هيتفرض عليه ضرايب اضافية عشان الكهرباء والسلاح.

*️⃣ يا ترى بقي المواطن الكيوت الأوروبي هيعمل ايه فيما سبق؟ هيفضل كيوت كده وينتخب رؤساء عندهم برامج دعم عالم ثالث ومنح للافارقة والجو دا وكمان دعم اعادة اعمار أوكرانيا مثلاً ؛ ولا هيقولك يولع الاجانب وتولع أفريقيا وتولع أوكرانيا؛ أنا ومن بعدي الطوفان.

⬅️ حاجة علي جنب؛ منتظر اشوف لو الحرب طولت هيقدر الأوروبيين يستحملوا الأوكرانيين اد ايه؟ ولو الحرب خلصت هنشوف وهما بيجبروهم عالعودة؛ وهيحصل أكشن كثير

بوست سريع للي مش كرويين؛ أو مشجعي السنغال الأعزاء 😂😂❤️

يا شباب صلوا عالنبي وبطلوا احباط في بعض:

*️⃣ محدش اشتري بتكوين وهو ب 20 ولا 200 ولا حتي 2000 دولار ومحتفظ بيه لغاية النهاردة وهو فوق ال 40 الف دولار وكسب 20 ضعف... مفيش التخيلات دي بتاع لو كنت استثمرت في البتكوين مبلغ كذا كنت كسبت 10 اضعاف و 20 ضعف فلوسك... اللي اشتري ب 2000 غالبا باع لما شاف 3 الاف؛ بل ممكن يكون باع لما نزل ل 1500 وقالك يالهوي فلوسي.

*️⃣ محدش كان عفريت ويعرف ان سنة 2015 كانت اقل سنة حصل فيها سعر للذهب في ال 10-12 سنة الماضية ؛ واشتري الذهب فيها وفاضل محتفظ بيه كل دا... المثال الخزعبلي دا مش موجود.

*️⃣ محدش كان يعرف ان أبل ولا أمازون ولا جوجل هيوصلوا ل ترليونات الدولارات واستثمر فيهم وهما لسه شركات صغيره ومحتفظ للنهاردة بفلوسه فيهم وكسب مليارات...

*️⃣ طبعاً كلامي ان مفيش ومحدش يعني ان لو في 1000 واحد يمكن 1 بس منهم او اقل اللي حصلت معاه فممكن تتجاهل وجوده.

*️⃣ البوستات بتاعة تعرف ان رونالد وين المؤسس الثالث لأبل كانت حصته 10% وباعها بعد التأسيس ب 800 دولار وهي دلوقتي تساوي 250 مليار دولار... مفيش الهري دا؛ حصته لو كان احتفظ بيها للنهاردة مكانتش هتبقي 10% ولا 1% ولا 0.1% حتى... دي خدعة حسابيه والشركة دخلت في طن عمليات تمويل أكيد مكانش هيشارك فيهم عشان يحافظ عالنسبة بتاعته.. دا ستيف جوبز نفسه وقت وفاته حصته في أبل كانت أقل من 1%

*️⃣ بحس إن نوعية البوستات دي بتلعب علي تنمية فكرة تجارة الوهم؛ فكرة يلا بص اشتري أي شيء غريب؛ أي فنكوش واصبر هتضرب معاك وتبقي مليونير...

*️⃣ مجرد نوع جديد من المخدرات الفكرية اللي بتقول للناس ان النجاح سهل قوي؛ انتا اختار حاجة واشتريها وسيبها سنين وهتبقي مليونير... بسيطة أهي... مخدرات وتجارة وهم

*️⃣ فبطلوا تكدير في بعض وتعرف لو كنت عملت كذا كان زمانك بقيت كذا... أيوا معملش وخلاص خلصت؛ ايه بتكدره يعني دلوقتي ولا ايه الهدف يعني؟؟