النوم مهم جداً للمخ البشري

*️⃣ لما يكون ناقصك نوم تركيزك هيقل وحتي ذكاءك هيقل وهتبقي غبي ومخك بيكون مهنج... عاوز تشوف مثال صريح وبسيط.

*️⃣ بص للعيال الصغيرة وهما عاوزين ينامو؛ قريفة بقي وعياط وزن وتصرفات غبية... خلاص مخهم هنج من قلة النوم لدرجة إنهم بقوا أغبياء بحيث إنهم مش فاهمين إنهم يقدروا ببساطه يناموا ويحلوا المشكلة 😂😂.

*️⃣ فنفهم من البوست دا إيه؟ نفهم منه إن واحد صحي من النوم متأخر وحب يتفلسف كده ويوضح للبشر أهمية النوم 😂😅😅؛ وإن مش راحت عليه نومه كده؛ لا دا عشان مصلحتكم وكانت خطه تكتيكية عشان يشحن مخه 😂.

صباح الفل؛ وبوست فيتش شبه خلصان بس إمبارح بالليل كان ماتش مصر فمكنتش هنشر ومحدش متابع يعني؛ فهنشره النهاردة ان شاء الله

بسرعة كده إيه حوار الدمغة الجديدة للذهب بعد تصريحات وزير التموين إن 2023 مش هنعترف بالدمغة القديمة.

*️⃣ الذهب سلعة منذ بداية البشر معترف بيها؛ ميزتها إنها عالمية.. ودا عيبها برضك لإنها مغرية للصوص يسرقوها أو ناس تانية تغش الذهب.

*️⃣ فعشان كده كان ولا يزال في مفهوم الدمغة؛ فكرته إن جهة رسمية تعترف بالقطعة دي إنها أصلية وزي الفل ودي ذهب 24 ودي 21 ودي 18 وهكذا.

*️⃣ الدمغة القديمة كانت تحفة شبه يدوي؛ فكان شكلها مش حلو من ناحية؛ ومن ناحية ثانية ممكن محترفي الغش يقلدوها؛ وبقول محترفي مش الكل.

*️⃣ طيب الدمغة صعبت الغش؛ طيب والسرقة؟ السرقة دي ملهاش حل حاسم؛ عشان كده تعارف على الفاتورة؛ عاوز تبيع قطعة ذهب لازم تجيب للمحل الفاتورة بتاعة الشراء؛ بحيث كده عرفنا إنها من جهة موثوق فيها. طب لو ضاعت الفاتورة؟ ربنا معاك بقي وهتخش في حوارات كده وغالباً المحلات هترفض تشتري منك؛ وبعض المحلات الشمال هتشتريه بسعر واقع.

*️⃣ المهم يا سيدي ظهر في العالم الدمغة بالباركود؛ وبقول العالم مش مصر... فكرته باختصار بقي إن يتحط باركود كده او QR عالذهب بواسطة الكومبيوتر بدل الحفر التقليدي.

*️⃣ تقدر تعرف منه رقم القطعة اللي مش بيتكرر؛ امتي اتدمغت؛ اسم المصنع؛ نوعها وكله... والفكرة الشاملة بيكون في ابلكيشن كده عالموبايل تقدر تعرف الداتا منه والاهم تبلغ سرقة.

*️⃣ دلوقتي انتا اتسرق بقي حته الذهب بتاعتك؛ غويشة كانت او سبيكة... تقدر تروح مبلغ برقم الباركود اللي مش بيتكرر وشكراً... اتقفلت في مصر كلها ومش هتتباع في حته... لان أي حد هيمسكها وييجي يقرأ الباركود هيطلع له (قطعة مسروقة)... فمفروض المنظومة تتعمل كده.

*️⃣ الحل بقي إن القطعة دي تتسيح ويعاد صناعة قطعة ذهب جديدة منها؛ ودا صعب جداً ومش متاح لأي محل ذهب (شمال).

*️⃣ حاجة كمان وهي الشمول المالي الأدق؛ يعني مصلحة الضرايب تعرف إن محل الذهب X اتدمغ له السنة الماضية 4000 قطعة؛ وهو باع ومسجل 2500 يبقي عالسيستم فيه عنده 1500 قطعة؛ يقدروا ينزلوا يقولوا له طلع لنا القطع دي بالأرقام المسلسلة دي... فكده الضرايب تعرف تراقب أفضل.

*️⃣ كمان ممكن مستقبلا متبقاش محتاج الفاتورة... القطعة سليمة؛ مش متبلغ سرقة؛ تمام...

*️⃣ بل ممكن وبقول ممكن مش رسمي يتحط داتا بيز؛ تشتري قطعة ذهب؛ تخش الداتا بيز تسجل رقم الباركود ورقم الفاتورة الضريبية ورقم بطاقتك؛ فتبقي قطعة الذهب دي مربوطة ببطاقتك... وتقدر تبيعها في أي وقت؛ مجرد التاجر يعمل سكان فيطلع له صاحب قطعة الذهب هو بطاقة رقم قومي كذا. بس خد بالك الكلام تحسه جميل بس فعليا صعب جداً تتنفذ لانها عاوزة درجة تشفير وتأمين عالية؛ انتم متخيلين قاعدة بيانات زي دي لو وجدت؛ لو حد اخترقها هيبقي عنده منجم ذهب حرفياً؛ عارف مين عنده ذهب ايه... منجم ذهب

*️⃣ طبعاً دي هتكون مفيدة في ظبط المرتشين؛ الموظفين الحرامية او اللي شغالين شمال ويخزنوا فلوسهم ذهب بعيد عن الحكومة والشقق والبنوك.... هيبان ان في ناس عندها كيلو جرامات من الذهب وهو موظف حكومي أو شخص صاحب شركة بيعلن عن خساير كل سنة؛ فمنين كل سنة بيزيد الذهب عندك؟

*️⃣ عارف إنكم هتسألوني طيب ومصير الذهب الحالي... عادي شغال ومقبول؛ وعندك سبيكة مثلا شاليها للعيال؛ روح (لما الحكومة تعلن امتي) مصلحة الدمغة والموازين وقولهم عاوز اعملها دمغة جديدة وادفع الرسوم وتم شكراً... امتي دا هيتم وايه الاجراءات وبكام؛ معرفش أنا مش شغال في الحكومة... اسألوا الدمغة والموازين 😂😂... معلش قولت اسبق التعليقات.

*️⃣ يعني الطريقة دي يا بن سامي مش معمولة عشان حصر ثروة الشعب؟ اه عادي من ضمن الفوايد حصر الثروة... بص انسي ان حد بعد كده هيكون عنده ثروة ومش معروف؛ كان في وخلص

*️⃣ طيب هل مصر هتنفذ بالشكل اللي انتا كاتبه فوق؟ ابلكيشن وابلاغ سرقة وكده؟ معرفش؛ انا بشرح لكم الشكل المثالي للتطبيق بحيث تبقي في فايدة تعم عالمواطن... مصر تعمل ايه معرفش؛ احنا بنحب نحط التاتش بتاعنا او نمشي نص الطريق 😂😂 فانتا شخص كبير عن انك تسألني السؤال دا

ملحوظة : المشروع دا مش افتكاسة امبارح؛ دا مشروع بقاله سنين وسبق وقالوا هيطبق فبراير 21 ثم يوليو 21 واتأجل؛ فمش جديد ولا التصريحات جديدة... هو بس الوزير تعمد يقولها بشكل مستفز عشان تنتشر والناس تتكلم.

أخيراً هنشر بوست فيتش اللي مكتوب من يومين بس كان بالليل؛ وإمبارح كان الماتش فمعرفتش أنشر.

*️⃣ ايه بقي تقرير Fitch اللي قالب الدنيا في مصر بقالنا يومين؟ وايه عجز البنوك (الدولاري) وهل دي أول مرة؟ طيب لو استمر ايه هيحصل؟

*️⃣ في البداية لو عاوز شوية كلام علمي شوية فممكن تشوف الصور في البوست بتاع صديقي عبد الرحمن التالي دا ولو عاوز الكلام بالهجايص كالعادة كمل معايا

https://www.facebook.com/permalink.php?story_fbid=3057569414506028&id=100007589988327

*️⃣ نبدأ كده؛ اللي ميعرفش مين فيتش Fitch فدي مؤسسة من ال 3 الكبار اللي بيعملوا تقييمات للدول مع ستاندر اند بورز ومودز.

*️⃣ البنوك بيكون ليها تصنيف برضك زي الدول؛ تصنيف إئتماني... كل حاجة ليها تصنيف؛ الأفراد زي مهو معروف في مصر ب iScore و البنوك والشركات والدول برضك ليهم تصنيف.

*️⃣ البنوك برضك جهة بتسلف وتستلف؛ فزي ما الأفراد بيتعمل لهم تصنيف يقيس حجم الديون والمسئوليات وكده.

*️⃣ مقال فيتش باختصار بيتكلم عن نقطة وهي عجز في صافي الأصول الأجنبية للبنوك المحلية؛ يعني صافي معاهم كام وعليهم كام... وقالت ان الوضع الصافي كسر سالب 7 مليار دولار (مش الرصيد سالب لكن لو فرضنا بتصفي البنوك المحلية كلها وهتخرج كل الدولار لكل الناس هيبقي في سالب 7 مليار دولار). والكلام دا ل ايداعات ومديونيات البنوك (الاصول والخصوم) بالدولار لغير المقيمين.

*️⃣ الرقم بالسالب عادي حصل كذا مرة ففي 2020 كان سالب شهور 4 و 6 و 7 و 8 وبعدبن رجع موجب من شهر 9 سنك 2020 لغاية 6 سنة 2021 وبعدين رجع سالب تاني من يوليو... فظهور السالب مش حاجة مفاجأة استثنائية غريبة.

*️⃣ لكن المختلف هو ان السالب الحالي (نوفمبر 2021 أحدث أرقام) أكبر من سالب أبريل 2020 وقت بداية الكورونا.

*️⃣ التقرير مش بيقول ايه السبب لكنه بيرجح إن المركزي سحب ودائع لسداد ديون... للي مش متابع فمصر خلال الربع الأول المالي ( شهور 7 و 8 و 9) الدين الخارجي لمصر انخفض نص مليار دولار... للتوضيح مصر عمرها ما وقفت سلف... بس صافي ال 3 شهور كان اننا سددنا أكثر من مجموع كل اللي استلفناه.

*️⃣ طيب التقرير بقي عاوز ايه؟ لا هو مش عاوز حاجة لكنه بيقول استمرار السالب الدولاري دا مش حلو عالبنوك... ومقصدش ب مش حلو يعني تعويم وتخفيض عملة وكده... لكن يعني ان كده المخاطر لتسليف البنوك المصري هتزيد... يعني تصنيف البنوك هيقل. فالبنوك مش هتلفس لإنك مش هتروح تصفي البنك وكل واحد حاطط فلوس دولار هيسحبها منه... لكن المخاطر بتزيد.

*️⃣ طيب ايه المشكلة إن المخاطر تزيد؟ المشكلة هي إن كل ما انتا تسليفك بيكون خطر فالفايدة عليك هتزيد؛ فلو تصنيف البنوك او حتي مصر انخفض فكده الفايدة هتزيد عشان الناس تقبل تسلفنا... ولو الفايدة زادت فدا معناه بند خدمة الدين يزيد ودا معناه جزء أكبر من دخل مصر رايح للديون وهيتسحب من البلد.

*️⃣ طيب ليه فيتش طلعت بالتقرير دلوقتي؟ لا عادي فيتش أصلا بقالها فترة مركزة شوية كده وبتزق مصر في طريق صندوق النقد تاني... يوم 17 ديسمبر أنا شيرت مقال عن نصيحة فيتش لمصر تروح لصندوق النقد وتعمل برنامج اصلاح اقتصادي جديد... والمقال دا متسق مع الثاني... فيتش شايفه مصر لازم تروح تاني لصندوق النقد وهو دا الحل... اعتبره بقي مؤامرة او نصيحة مخلصة أو تظبيط مصالح... براحتك؛ بس دا اللي حصل.

*️⃣ طيب ايه المفروض يحصل؟ مفروض البنك المركزي يتدخل ويشوف البنوك دي وضعها ايه وليه هى بالسالب وايه خطتها للخروج من السالب؛ وممكن يعمل هو إيداعات.

آخر شيء هو سؤال " هو مش دا معناه تعويم قريب"؟

*️⃣ بص يا سيدي عشان يحصل تعويم تاني أو تخفيض العملة يعني وهو المقصود بالتعويم التالي فالسيناريو هيكون كالتالي:

*️⃣ البنوك هيكون عندها عجز كبير متزايد ومستمر؛ البنك المركزي يحاول يساعدها ويفشل؛ تقييم البنوك ومن وراه مصر هيقل؛ الفائدة اللي مصر بتقدمها للدولار هتزيد عشان نجيب دولار... المستثمرين مش متطمنين لينا وبرضك مش بيدوا مصر كمية الدولار اللي محتاجاه؛ فالحكومة تبدأ تسعر الدولار ومتسيبوش للسوق؛ ويبدأ المستورد لما يحتاج دولار ميلاقيش؛ تظهر السوق السوداء وتبيع أعلى من البنك ربع جنية ثم نص جنية ثم جنية... الحكومة تضيق على كل مخارج الدولار زي كروت الفيزا تاني... وبرضك تفشل في توفير الدولار... تخش عالاحتياطي ويفضل يقل يقل الاحتياطي... فهنا متلاقيش حل غير إنها تخفض العملة عشان تجذب أصحاب الدولار تاني للسوق.

*️⃣ شوفت السيناريو التخيلي السابق دا؟ أساسه إنك تقول عاوز دولار ومتلاقيش.... النهاردة بقى مصر أخدت 3 مليار دولار سندات اسلامية وخضراء... تمام كده

*️⃣ الأزمة الحاصلة حالياً متكررة في كل العالم الثالث؛ الكوكب قاعد مستني أمريكا تزود الفايدة؛ وكثير قاعدين بيعملوا زي تسييل للفلوس واسحبها يلا واجهز... لكن مصر كانت ولا تزال أعلى دولة في كوكب الأرض بتدي فائدة حقيقية "فارق الفائدة والتضخم" ودا كلام بلومبيرج مش كلامي... فانتا دولة مغرية.

*️⃣ غالباً من أسباب الأزمة إن الحكومة كانت في خطتها دخول يورو كلير وكذلك مؤشر جي بي مورجان... المواضيع دي اتأخرت؛ كان التوقع يجيبوا لمصر قروض "سندات" ب 5-7 مليار دولار.. فغالباً دا سبب ال Drop الحالي...

*️⃣ آخر كلمة هقولها؛ احنا محترفين سلف فلوس وبنعرف كويس نستلف؛ وحالياً مش مغضوب علينا ولا علينا عقوبات. وكمان بندي فايدة عالية قوي. فمش هنغلب في الدولار.. والكام شهر القادمين دول هتسمعوا شوية قروض زي الفل 🙈

*️⃣ كنت هنسي الملحوظة المعتادة ( أنا مش شغال في فيتش؛ مش شغال في الحكومة؛ مش شغال في بلومبيرج؛ مش شغال في المالية؛ مش شغال في الدمغة والموازين؛ مش شغال في الشهر العقاري؛ المعترض يروح يكلم الناس دي؛ أنا بتاع فول وعندي دكانه تكنولوجية صغنونة فبلاش الخناق معايا 😁)

أمي ماتت؛ حصلت بابا بعد 16 سنة فراق.

ادعوا لها بالرحمة

إن شاء الله صلاة الجنازة في مسجد حسن الشربتلي بالتجمع الخامس بعد صلاة الظهر بإذن الله

دا لينك المسجد

https://maps.app.goo.gl/638jUYtRF2hQ8UWh8

الدفن في مدافن طريق السويس بعد الرحاب

والعزاء بالمنزل للعائلة والأصدقاء لظروف الكورونا

شكراً لكم وربنا يرحمها ودعواتكم لها بالرحمة

بغض النظر إن معنديش طاقة للهري بتاع فيلم منى زكي... بس واخدين بالكم إن في نقاش داير؛ ان ميصحش كده دي مش أخلاق المجتمعات العربية وإن الفيلم لا يعبر عننا ووو...

*️⃣ دي نقطة الاعتراض لكثير من المعترضين؛ إن مجتمعاتنا مش كده... مش إن التصرفات دي غلط وحرام... لا هي مجتمعاتنا مش كده...

*️⃣ وفي فريق ثاني بيقولك مهو في اوسخ من كده في المجتمع بتاعنا... طيب مسألتش نفسك ليه مجتمعاتنا فيها الوساخة دي؟ مهو من الافكار اللي انتا بتأيد نشرها؛ ومعارضتك لأي حد يقول حرام من منطلق إن دا تخلف ورجعية وجو أفلام عادل إمام اللي برمج بيه معظم الشعب شائوا أم ابوا فهم تم برمجتهم؛ وهيشتموا عادل إمام بس مجرد تيجي سيرة حلال وحرام هوبا مخهم هيفكر باللي برمجه وحيد حامد في عقولهم.

*️⃣ كمان الفريق الثاني دا ظريف قوي؛ فكرته طفولية؛ وجهة نظرهم قايمه إن لو في حد بيسرق يبقي لازم يشرب خمرة ويقتل ويزني كمان... فكرة إن في نماذج بالمجتمع اوسخ يبقي خلاص بقي منعترضش ووساخة بوساخة... يعني في قتل وجاي تعترض عالسرقة... وجود القتل مش هيخلي السرقة حلال... ولو في مجتمع بيعمل 5 بلاوي... مسكت 3 حاربتهم ومنعتهم وفشلت تمنع 2... دا كده مجتمع أفضل... مهو مش هيبقي مجتمع الصحابة هو (اللي برضك كان بيحصل بشكل محدود فيه أخطاء لانهم مش ملائكة)... لكن عشان التفكير الطفولي.. طالما في حاجة غلط يبقي خلاص باقي الغلط يعدي عادي ومفروض منقولش عليه غلط...

*️⃣ الإعلام بقى مستفز بيبرمج الناس؛ وهو عاوز يحط الناس في الوضع دا.. في اوسخ من كده فخلاص عادي بقي...

*️⃣ كل دا تم عن طريق تغيير المسطرة؛ تغيير المرجعية؛ تبقي المركزية للإنسان؛ فييجي انسان يقولك دا تصرف غلط ومفروض نقف قصاده؛ وييجي انسان تاني يقول مش شايفه غلط من وجهة نظري؛ وثالث يقول هو أنا شايفه غلط بس عادي يعني كل واحد حر... بس كده بقت الأمور تخضع لرأي الإنسان وكل واحد حر بقي...

*️⃣ المرحلة الأولي نخلي الانسان يقرر بناء على رأيه؛ وفي نفس الوقت نبرمج رأيه بقي بواسطة افلامنا... فاكرين من 18 سنة روبي لما غنت اغنية طب ليه بيداري كده... قولنا ايه قلة الادب دي... ومع الوقت الإعلام برمجنا... فبقت عادية خالص ولو في مراهق دلوقتي بيشوف اغاني قولت له الاغنية دي قلبت الدنيا في 2004 وحتي مرتضي منصور طلع شتمها وقال ملهاش اهل يربوها ووو (قال يعني هو في حد مشتموش)... هيبص لك مواليد الألفية الجديدة بصه بعنوان... ايه الهبل اللي كنتم فيه دا؟ انتم كنتم متشددين قوي؛ دا اكيد فكر سلفي.

*️⃣ نفتكر كده علي 2030 هتبقي المواضيع في الفيلم عادية؛ والناس هتتبرمج وتتقبل؛ افتكروا دا.

قولت اكتب بوست سريع من الموبايل لاني مش في المود بتاع الكتابة لسه؛ لكن البوست طول معايا. يلا معلش شوية شوية نرجع للبوستات الطويلة

مفيش حاجة اسمها هتحس بنقص حاجة انتا متعرفش انها موجودة... الكابتن اللي هناك دا مش منطقس يقول وحشني طعم لحم الغزال وهو عمره ما داقه عشان مش هيدفع 800 و 900 جنية في الكيلو... ولا لحم الواجيو لانه مش مرفهة لدرجة يشتري كيلو لحم ب 1500 و 2000 جنية وأكثر كمان..

*️⃣ لما بنقول لحد الحل مقاطعة نتفليكس وأشباهها؛ وأنا مش هشترك فيها... مينفعش تقول الحل مش حرمانك نفسك وأولادك من الافلام الجميلة اللي بتتعمل (في أفلام كويسة فعلاً)... حضرتك إنتا لو مشوفتش الفيلم الكويس فمش هتحس بحرمان عشان ميعرفش وجوده أصلاً.

*️⃣ أنا شخص مشوفتش مسلسل Game Of Therons فمش هحس بإن في حاجة نقصاني في حياتي ومحروم منها...

*️⃣ الحرمان بيكون في أساسيات الحياة؛ سواء أكل أو شرب؛ أو حتى حقوق معينة طبيعي أي إنسان يحتاجها... قاع هرم مازلو يعني... دي لما تتحرم منها حياتك هتبقي مش مستقرة.

*️⃣ الخلل فينا والنجاح الرهيب اللي الإعلام نجح فيه؛ إنه بقي يخلي الأفلام والمسلسلات من أساسيات الحياة؛ فالناس تدمن عليها؛ ويبقي هنا التوقف حرمان فعلاً لإنها بقت جزء من حياته.

*️⃣ المشكلة بقت إن ناس كثير بقت تصحى من النوم تتطحن في شغلها؛ تروح تقولك خلاص كفاية شغل لما اشوف مسلسل أو فيلم بقي... ودا طبيعي عادي لكن اللي مش طبيعي ان دا يبقي 365 يوم في السنة... معلش يا كابتن هو الشيء الهلامي اللي شايله معاك وقاعد ورا عنيك جوا الجمجمة دا... هتدربه وتطوره إمتى؟

*️⃣ لما يبقي يومك مقسم ل 6-8 ساعات نوم و 2 ساعة مواصلات و 8 ساعات شغل و 1 حمام و 1 أكل و 2-3 فيلم مسلسل... امتي هتدخل مخك الأكل بتاعه؟

*️⃣ مخنا عاوز داتا؛ هو مصمم كده عاوز داتا ومعلومات؛ مع الوقت هتبقي الافلام والمسلسلات هي مصدر المعلومات الوحيد اليومي له في الحياة؛ من هنا مخك هيتشكل.

*️⃣ مش معنى ما سبق إني بقول نتدروش بقي ونقاطع العالم دا؛ لو قدرت تعملها تبقي جدع... بس أنا نفسي مبقدرش؛ أنا بحب السينما؛ بس لو قعدت سنة مروحتش مش هحس بحرمان... أنا بتفرج علي مسلسلات وأفلام... بس الريموت معايا فلو لقيت ممثل/ممثلة/قناة بنت.... بقرر مشوفش حاجة له تاني أو الغي اشتراك الشيء دا...

*️⃣ أنا مدمن جبن؛ وكانت الكيري 365 يوم في السنة مش بتفارق ثلاجتي بل وكنت بشتري قوالب كيري كيلو (كيري كيري الفرنسية مش اللي بيسموها كيري) بس لما قررت أقاطع قاطعت ومدخلتش بيتي تاني وكل منتجات شركات بل ودانون.

*️⃣ فهي دي الفكرة ؛ لاعيبة الكورة والماتشات؛ الأكل؛ الممثلين والأفلام... كل دول حاجات ثانوية في الحياة؛ دورها ترفيهي ليك... استمتع بيها؛ ولو حصل بينها وبين الأساس بتاع حياتك؛ طز فيها تتمسح... ومفيش حرمان لإنها ثانوية بالحياة... لكن تحولها لأساس لحياتك ومقاطعتها تبقي حرمان فهنا المشكلة.

*️⃣ تلاقي حد قاعد يشتم فرنسا وينزل يشتري منتجات فرنسية؛ يهاجم صلاح وقاعد يحط بوستات تلميع ليه؛ ينتقد منى زكي ويقول عالم اعلاميين ابن تيت؛ وتلاقيه بيروح يدخل افلامهم بالسينما وقاعد عالتليفزيون في رمضان ويقولك شوفت مسلسل كذا حصل فيه ايه والاسطورة و بنجر وان وبعدها متابع مهرجان الجونة...

*️⃣ لو انتا كده فخد بالك انتا أدمنت؛ مش بقولك زي الهبل متنتقدش الغلط طالما بتعمله؛ لالا انتقد؛ ولو هتوقف يبقي توقف عن الغلط مش توقف عن انتقاده... لكن بقولك خد بالك انتا كده مدمن؛ مدمن والتوقف حرمان ليك... لانك لو مش مدمن فعادي هتقدر توقف... انا مثلا مدمن كتابة؛ وللاسف برضك مدمن متابعة أخبار؛ وأي أخبار... ربنا يشفيني.

⬅️ ملحوظة : لو حاسس إنك تايهه وبتقول يعني مين عاوز ايه رايح فين؛ عااادي عااادي البوست دا كان كذا فكرة مع بعض؛ وقولت أجلهم لغاية ما يتربوا؛ وبعدين قولت لا هكتب وييجي زي ما ييجي؛ وكتب ونشر من مرة واحدة؛ يعني مسكت الموبايل كتبته مرة واحدة ونشرته بدون فواصل او مراجعة.

عصر التيك أواي

من المآسي اللي بتواجه الناس في زماننا الحالي إننا عايشين في عصر التيك أواي؛ التيك أواي تم ابتكاره في الزمن الحديث لما الناس بقت تقعد فترات أطول بره البيوت؛ أو الستات بقت تشتغل فمحدش عنده وقت يطبخ ويعمل؛ عاوزين أكل عالسريع كده وإحنا شغالين ولا مكسلين نقوم نطبخ ولا مسافرين ولا أي حاجة.

*️⃣ تخش عالفيسبوك تلاقيه هو عايش عالتيك أواي؛ معلومات عالسريع؛ الناس بقت تجيب ثقافتها من الفيسبوك أصلا... محدش هيقرأ والكل عاوز فيديو ولا تسجيل صوتي؛ بسرعة عاوزين المعلومة عالسريع... تلاقي الصحافة شغالة على النقطة دي؛ مانشيت وعنوان ملوش علاقة بالمحتوى ومحدش هيقرأ أصلا الخبر ولا يدور عالتفاصيل بتاعته.

*️⃣ بص عالشباب حديثي التخرج برضك؛ بقوا يخلصوا الكلية ورافضين الشغل العادي؛ عاوزين نشتغل بمرتب كويس؛ يعني ايه اخلص كليه اشتغل ب 2500 و 3000 جنية؛ هو طبعاً معروف إن الفلوس دي متعيش بني أدمين بس المعروف برضك إنك لما بتتخرج بيكون في ملايين زيك؛ صفر معلومات وخبرات؛ بتشتغل وتبني لنفسك سعر عبر السنين وتوصل للرقم اللي بتحلم بيه... لكن محدش عاوز يجتهد وكله عاوزها تيك أواي.

*️⃣ التيك أواي برضك هو سبب أحلام الثراء السهل السريع؛ اعمل محتوي أهبل وحطه علي اليوتيوب ولا تيك توك مش يمكن تشتهر؛ نزل برنامج كذا واشترك فيه وهتلاقي فلوس جت لك؛ برنامج يقولك شغل اعلانات ولا نزل برامج؛ الخ الخ... كل دول شغالين علي أحلام التيك أواي وإن الناس مش عاوزة تعمل مجهود وفاكرة الحياة تيك أواي والثراء والنجاح سهل.

*️⃣ أكثر ناس بياكلوا عيش علي أحلام التيك أواي دي هما بتوع ايفينتات رواد الأعمال entrepreneur اللي انتشارهم بقي عامل وهم للشباب؛ إنتا هتجيب فكرة حلوه وتعرضها بشكل جذاب وهوبا خلاص هتلاقي مستثمرين يدوك ملايين... وكل شوية تلاقي صفحات تشير لك قصة نجاح مش عارف مين؛ ويزيد الوهم عند الشباب... ميعرفوش إن من كل 100 مشروع هينجح من 2 ل 5 بس؛ هيحكوا لك قصة ال 2 الناجحين؛ أما ال 98 اللي فشلوا فمحدش هيجيب سيرتهم... فدا يزود الوهم عن الشباب؛ مهو النجاح سهل أهو كل دي مشاريع بتكسب...

*️⃣ فالشاب يقولك بلا وظيفة بلا وجع دماغ؛ ايه اشتغل وأخد خبرة وبعدين أعمل مشروعي؛ أنا عبقري وعندي فكرة مجاتش في بال حد في الكون؛ وهوبا هعملها والبلد كلها هتشوفها هتستخدمها وبقيت غني... يبقي ليه اخش كارير الوظيفة الاستغلالية دا اللي أصحاب الشركات فيها بيكسبوا ملايين ومش بيدوا الموظف غير ملاليم؛ ما إدارة الشركات سهلة.

*️⃣ في ناس بتحب تسمي ثقافة التيك اواي؛ ب ثقافة التوك توك؛ وهي إن بقي المراهقين بعد ما كان المعتاد يروحوا يشتغلوا صبي ميكانيكي ولا نجار ولا حداد ولا اي حرفة؛ يشتغل سنين وبعدين يبقي أسطى يفتح ورشته؛ فبقي يختصر ويروح يجيب توك توك؛ ودا ليه تأثير كارثي ومبقاش حد يلاقي صنايعي شاطر ومع الوقت هينقرضوا... لسه هتعب سنين؛ اشتري توك توك وعدي المرحلة بالتيك أواي.

*️⃣ طبعاً مش معني ما سبق إن الناس كلها بتفشل؛ طبعا فين ناجحين ومئات والالاف كمان؛ بس قصادهم في ملايين فشلوا؛ زي ما قولت فوق هيحكوا قصة ال 2 الناجحين ومش هيجيبوا سيرة ال 98 الفاشلين... وأصلا حتي لو جابوا سيرتهم فالنفس البشرية بيهزمها الطمع وفي أحاديث يوم القيامة إن الفرات هيحسر عن جبل من ذهب وكل الناس هتتقاتل عليه وكل 100 هينجوا 1 لكن الناس هتتقاتل وكلهم هيقولوا لعلي انا ابقي الواحد دا... فغالبا برضك هيقولوا هنا لعلي أكون من ال 2 أو أنا أصلاً أذكي من الاخرين دول وهما فشلوا عشان مش فاهمين زيي.

*️⃣ نكتفي بهذا القدر لان دور البرد مدمر التركيز وعاملي غيبوبة عمال أنام وأصحى... لكني مقرر أصلا إن لو جت لي فكرة أروح كاتبها حتي لو طلعت بوست صغير و تيك أواي كده

الا ما شوفت بوست واحد عالفيسبوك من إمبارح عن وصول خام برنت ل 90 دولار بل وصل 91 ورجع 90 تاني للبرميل.

*️⃣ يا شباب سعر 90 دولار دا البترول من سبتمبر 2014... وبصراحة أنا لا أتمني إني أكون مكان لجنة تسعير البنزين في مصر في مثل هذا الموقف.. وتعالى أوضح لك المزنق

*️⃣ في البداية إحنا منعرفش الحكومة بتشتري بترول بكام ولا عاملة تحوط علي كام ولا أي ابن لذينا؛ دي أسرار سيادية؛ فهنتعامل إننا بنتعامل بالسعر المعتاد ال 90 دولار دا.

*️⃣ سعر البترول دا يعني إن بنزين 92 يساوي 10-11 جنية وسعر 95 يبقي 11-12 جنية... ايوا شايف السعر دا 😂

*️⃣ طبعاً هتقولي هو يعني يفرق معاهم دول جبابرة ويغلوه كده؛ للأسف المرة دي لا؛ ومش عشان قانون التسعير للبنزين بيقول الحد الأقصى للزيادة هو 10% يعني أقصي حاجة 92.5 قرش للتر ال 95 زيادة يعني كبيره يبقي 10 جنية او 10 وربع.

*️⃣ بعيد عن كده بقي خالص؛ سيبك من القانون إحنا نقدر نعدل القانون النهاردة عادي؛ القانون قانونا والبلد بلدنا والشعب عارف مصلحته وهيقعد مؤدب.

*️⃣ لكن المشكلة في التضخم؛ سعر البنزين والسولار بيضربوا في كل شيء بالبلد؛ الحكومة عارفه كويس إن تصريحات بتاعة الزيادة تعني ارتفاع 25 قرش في تكلفة النقل ووو دي تصريحات مصممة عشان أحمد موسي ومصطفي بكري يستغلوها بيها عالبهايم... لكن فعليا بيحصل تأثير واضح.

*️⃣ في مصر معندناش أليه تسعير سلع محترفة معروف فيها تكلفة كل مدخل من المدخلات يعني كام تكلفة نهائية؛ فممكن يكون فعلا مفروض سلعة X تزيد نص جنية؛ بس لان صاحبها ميعرفش فتلاقيه زودها 1 جنية احتياطي... الخلاصة التضخم هيزيد.

*️⃣ المشكلة بقي إن في تبعات عالمية بتخلي في تضخم عالمي؛ فلما يبقي فوقهم كمان حاجات محلية؛ فهنا التضخم ممكن يبعد عن الرينج المحدد له.

*️⃣ التضخم لو زاد هيضطر البنك المركزي لزيادة الفايدة؛ زيادة الفايدة أصلا قرار متشال عشان تبعات الفايدة الأمريكية... فنعمله عشان تضخم محلي 😞😞.

*️⃣ ضيف مع دا إن رفع الفايدة البنكية = زيادة تكلفة الاقراض؛ يبقي زيادة التكلفة علي كل الشركات... وكمان علي أكبر مقترض في مصر وهو مييين؟ الحكومة المصرية نفسها... تزيد الفوايد عليها فيزيد بند خدمة الدين فالحكومة تفرض ضرايب جديد عشان تعوض العجز دا... ضرايب جديدة تعني ارتفاع اسعار يعني تضخم جديد 😂

⬅️ الكابتن اللي هناك بيقول يالهوي علينا من دا بإيه؛ يثبتوا الاسعار للبنزين وخلاص.


*️⃣ ودي مشكلة ثانية؛ هتثبت الاسعار يعني هتدعم البنزين والحكومة مقررة إن مفيش دعم محروقات تاني؛ ووزير البترول من اسبوعين صرح بدا وإننا مش هنرجع لعصر دعم البنزين تاني. وطبعا مش محتاج أقولك إن دعم البنزين يعني محتاجين بند دعم يعني زيادة عجز الموازنة يعني.... عيد الفيلم فوق.


*️⃣ فالخلاصة عشان كده بقول لا اتمني إني أكون مكان لجنة تسعير البنزين والحكومة في القرار دا؛ هي بتختار بين عودة دعم البنزين ولا تضرب البلد باسعار بنزين عالية خاصة إن روسيا لو ضربت في أوكرانيا هنشوف بنزين فوق 100 دولار و 110 دولار؛ يعني مفروض اللتر ب 15 جنية 😭😭.

*️⃣ كل ما سبق بقي والدولار ب 15.7 بتاعنا... وييجي شوية ولاد تيت مصرين يعملوا اخبار ان الدولار هيبقي 18 و 20 جنية... طيب هل اقتصادك حمل دا يا كابتشن؟ هل المواطن مستعد يخش يحط 50 لتر بنزين ويدفع 700 و 800 و 1000 جنية في المحطة وهو خارج (اللتر ب 15 الي 20) فبلاش لعب عالنبوء المحققة لذاتها عشان انتم مش حمل تحققها... في النهاية الحكومة مش خسرانه حاجة؛ لا في مسئول مش هيلاقي يمون عربيته؛ ولا مليونير رايح هاسيندا ولا مراسي وهيقول لا معييش فلوس بنزين... احنا اللي هنحاسب عالمشاريب فبلاش تطلبوا مشاريب انتم مش حمل حسابها... كفاية المشاريب اللي غيرنا بيطلبوها علي حسابنا وحساب أولادنا وأحفادنا.

توقعي الشخصي إن البنزين 9 جنية ال 92 و 10 جنية ال 95

ايجابي كورونا

أنا قعدت سنة ونص بوجود الكورونا؛ بمشي لابس ماسك وساعات جوانتي لما استخدم ماكينات البنوك وكده

وبعدين شهر 5 اخدت التطعيم الجرعة الاولي ثم شهر 8 الجرعة الثانية؛ فقولت خلاص بقي فاكس يا جدعان

فضلت بلبس كمامات بس في حدود ضيقة واستهتار لذيذ كده

اتصابت نهاية شهر 9 وكان دور خفيف وظريف وحرارة بسيطة وكده؛ في الغالب عشان كانت الاجسام المضادة للتطعيم الجرعة الثانية لسه طازة

وادينا اهو شهر يناير اصابة جديدة والمرة دي اشد؛ اه العنف بتاعها مكملش 48 ساعة وحاليا في كحة غبية وارهاق

بس دا مثال بسيط للي بيهمل؛ سنة ونص عايش ملك؛ سافرت وروحت وجيت وايييه عادي براءة؛ و كام شهر اهمال تتصاب مرتين

اييييه دنيا؛ ربنا يستر علي مراتي لاني بتكح من قبلي ب 3 ايام وهي مش متطعمة؛ اصل مصر مش بتطعم حوامل او مرضعات 😡😞...
(تحديث ؛ كان دا شهر 6 الماضي وبعدها التعليقات وضحت ان مصر سمحت بتطعيم الحوامل والمرضعات؛ غالبا مرضوش يطعموها عشان شهر 6 كان في عجز لقاحات؛ ودلوقتي عندنا كثير فبقينا نطعم عادي)

دعواتكم للمدام بقي؛ انا براءة ان شاء الله؛ التطعيم والاجسام المضادة فينا لكن ربنا اللي هادينا 😂😂

تعالوا أحكي لكم حدودته عن أمريكا اللي بتحضر العفريت ويطلع عنيها عشان تصرفه؛ فيا تري تعرف تعملها مع الصينيين.

*️⃣ في القرن 17 وفي عصر إيدو (اليابانيين بيعملوا تاريخهم كده فترة ايدو فترة ميجي فترة مش عارف ايه؛ اصل عمرهم طويل فبيعتبروه فترة وعصر كده مش مجرد حكم)... المهم يعني ان كبير الساموراي المعلم شوغون توكوغاوا طلع قال انا بحب قعدة البيت قوي... محدش هيسيب البلد دي وكله يقعد زيي...

*️⃣ طلع يعني قرار ان اي حد هيدخل او يخرج من اليابان إعدام؛ اه هو كده اعدام علي طول... طبعا الاجانب بسرعة خرجوا من البلد؛ واليابانيين رجعوا من بره؛ والقانون بقي ساري من سنة 1639 واتقفلت اليابان. واقصد اتقفلت بجد.

*️⃣ ناس تتولد وتعيش وتموت وهي متعرفش في ايه بره اليابان؛ عزله تامة عن العالم... وفي فترة العزلة بقي حصلت النهضة الصناعية العالمية وامريكا استقلت عن انجلترا وبعدين دخلت سلسلة حروبها مع الانجليز اللي حرقوا فيها البيت الأبيض وحرق الجيش الانجليزي واشنطن سنة 1812 واييه...

*️⃣ ثواني يا عم محمد؛ ايه سنة 1812 ايه مش احنا قولنا القرار صدر 1639... اه عادي مهو كمل وساري واجيال تتولد وتموت والقانون ساري... الكوكب يتشقلب واليابان مقفولة... نابليون يتولد ويموت ومحمد علي يتولد ويحكم مصر ويموت وكله واليابان مقفولة.

*️⃣ المهم يا سيدي بقي امريكا شد حيلها وقالت والله يا انجليز لنطلع عينكم؛ احنا نعمل مستعمرات ونضرب مخاليق ربنا؛ ونسرقهم... ايه دا مكسيك؛ حرب عليها يلا اطحن امها واحتلها... خلاص خلاص يا مكسيكيين هنخرج بس هناخد ولايات تبقي بتاعتنا... حاجة بسيطة يعني تكساس وكاليفورنيا دول مش مكسيكيين دول امريكان... ايوا دول ولايات مكسيكيه 😂😂 (ولاد المحظوظة لقوا ذهب بعد كده في كاليفورنيا وبترول في تكساس).


*️⃣ طيب يلا نحتل بره ونقتل؛ نحتل مين مفيش دا الانجليز محتلين الكوكب؛ منك لله يا حاجة فيكتوريا. طيب عاوزين اي حد نتاجر معاه يشتري بضايعنا اي حاجة يا جدعان هو الانجليز ليه واخدين كله.

*️⃣ احم احم؛ بقول لمعاليك في دولة قافلة علي نفسها ومحدش بيتاجر معاها وهي اليابان... الله حلوه؛ كولونيل بيري خد الاسطول البحري واطلع عاليابان قولهم عاوزين نتاجر معاكم... حاضر يا فندم بس انا قائد حربي اتاجر ايه... ايوا عارفين ما انتا هتروح بالسفن الحربية تقولهم عاوزين نتاجر معاكم...

*️⃣ جنرال بيري اخد السفن ودخل عاليابان؛ وهنا اليابانيين يتصدموا؛ ايه التقدم دا هو مش السفن بتشتغل بالمجداف 😂😂... المعلم بيري يقول لليابانيين هااا يا حلوين انا بقترح تتاجروا معايا وعندكم الخيار؛ موافقين هبعت اجيب سفن التجارة السنة القادمة؛ رافضين هبعت اجيب الاسطول الحربي يسحق بلدكم علي اللي فيها يا شوية دول بدائية... ابعت اجيب مين..

*️⃣ طبعا امبراطور اليابان والاخ كبير الساموراي وكله دخلوا في خلاف وحوار واجبروا عالتوقيع وحصلت حرب اهليه لاحقا وتم القضاء عالساموراي (بتاعة فيلم الساموراي الاخير ل توم كروز).

*️⃣ من الاخر سنة 1854 اجبرت اليابان عالخروج من العزلة؛ هتاجر معانا وتشتري وتبيع وتستورد مننا...

*️⃣ اليابانيين اول حاجة استوردها الاسلحة عشان الحرب ضد الساموراي الرافضين؛ ولاحقا القطارات والألات... فالياباني بص قال ايه دا؛ حلوه الحاجات دي... هعمل زيها.

*️⃣ ادرس يا معلم وانقل الاسلحة دي وطور البلد واستورد معلمين وتقنيات... ابني سفن حربية كده... وهما قاعدين كده يلاقي قيصر روسيا شعبيه في الارض؛ لالا انا اشوفلي حرب... دايما عندك مشكلة اخلق عدو وحاربه عشان العوام بياكل معاهم دا قوي... فاضرب مين؟ اوروبا اقويا... العثمانيين بقالنا 300 سنة في حروب... امممم اليابانيين؛ الجماعة البدائيين دول... هات يا ابني الجيش ويلا عندنا طلعة نعلم عاليابان..

*️⃣ بسم الله الرحمن الرحيم؛ هزيمة ساحقة للجيش الروسي... ايوان اتعلم علي روسيا تعليمة عنيفه كانت من اسباب الثورة البلشفية وظهور السوفيت... اليابانيين اتعلموا الاسلحة صح واشتغلوا عليها في 50 سنة... رجعوا للعالم 1854 وحاربوا الروس 1904...

*️⃣ هنا اليابانيين قعدوا يفكروا؛ طب ما احنا جامدين اهو... ابني جيش الشمس الامبريالي... هوب هوب جيش قوي شباب. وفي 1910 اليابان تجرب تعمل غزو؛ الهجوم علي كوريا وللامانة قبلها اليابان كانت مسيطرة سياسية علي كوريا؛ لكن قالوا طب ما نسيطر عسكريا؟

*️⃣ كده اليابان معاها كوريا... اممم طيب ما نكبر الجيش ونطوره.. ايه دا حرب عالمية أولي... اممم نحارب مع الانجليز ونستولي علي مستعمرات الالمان بالجزر اللي عندنا... تم فعلا... طيب يا مؤتمر فرساي بعد الحرب عاوزين نحتل الصين... امريكا وانجلترا يقولوا لهم انتوا مين... احنا اليابان... يابان مين ياض يلا من هنا... بس انا حاربت معاكم... يلا ياض من هنا وابقي قرب من الصين وغيرها... يلا ياض...

*️⃣ اليابان تغضب وتقرر تروح تطور جيش مهول؛ والعالم يخش في الكساد الكبير... امريكا عندها ازمة مالية وأوروبا مفلسة... كده محدش هيقدر يحاربنا... الجيش الياباني يغزو منشوريا ثم الصين ناوو ناااو... وبالفعل يحتلوا منشوريا سنة 31... طبعا امريكا قالت ندين هذا العدوان... مهما مش لاقيين يدفعوا مرتب حد والوضع منيل هيروحوا حرب... ندين العدوان يا عم.

*️⃣ مش عاوز اطول عليكم... كام سنة حرب عالمية واليابان تاكل نص اسيا وباقي القصة معروفة.

*️⃣ امريكا تحتل اليابان بنهاية الحرب؛ تذلهم قوانين ورسوم وتقولك دول لبش؛ بصوا مفيش جيش؛ ادفعوا ليا فلوس للحماية... بالمناسبة 6 ديسمبر 2021 اليابان وافقت علي زيادة رسوم الحماية الامريكية بقيمة 1.8 مليار دولار... لغاية النهاردة بيدفعوا.

*️⃣ المهم الامريكان قالوا لهم مفيش جيوش؛ انتم اشتغلوا ازرعوا اصنعوا؛ يلا تجارة حرة دولية وتعالوا منظمة التجارة الدولية وتعالوا اي اتفاقية نمضي عليها...

*️⃣ اليابانيين بصوا للاجهزة والمعدات والتقنية نفس البصة القديمة للاسلحة... بصه محمد رياض غريب قوي المنتج دا... هنصنع منه.

*️⃣ نهضة يابانية تفشخ امريكا... مفيش 30 سنة كان الامريكان بيعيطوا... اليابانيين بيصنعوا من الابرة الصاروخ؛ العربيات الياباني في كل مكان وشركاتهم وصادراتهم... العالم بقي مرعوب من اليابان...

*️⃣ امريكا تقولك يالهوي ايه الصداع دا... يعني اضربهم نووي تاني دول... دخلتهم الكوكب احتلوه... قولت لهم صنعوا احتلوه صناعي... انا هخلص عليهم خالص...

*️⃣ تعالي يا يابان امضي اتفاقية بلازا... دي بتنص ان الين الياباني هيبقي عملة غالية والدولار ضعيف... اليابان تمضي مجبرة... اليابانيين يلاقوا فلوسهم كثير يشتروا الكوكب... لكن خازوق بيلبسوه ببطء... ين غالي يعني منتجاتهم غالية... كده محدش هيشتريها... بس يا سيدي وفقاعة يابانية وينهار اقتصادهم... وشكرا تنتهي اليابان ك رعب وتبقي بلد كويسة لكن مش مرعبة. وتنتهي اليابان بالفقاعة العقارية فترة 86 الي 91.

*️⃣ امريكا تقولك يااااه... لما اشوفلي خازوق جديد البسه... ايه دا هو انتي يا صين قاعدة ليه ساكته... مش الرئيس بتاعكم السابق دينغ سياوبنغ قال سنة 1978 ان عنده خطة وهدف ان 50 سنة يعني 2028 هتكون دولة عظمي... وفتح الاقتصاد الصيني... طيب احنا اهو سنة 91 خلصنا من الخازوق الياباني... سنة 92 يوصل كلينتون للحكم... ويقول للصين... فاكرين اللي لبسناه لنفسنا مع اليابان وقت حملة بيري... عاوزيين نلبس اخوه.

*️⃣ تعالوا نفتح التجارة مع بعض؛ شوية شروط اهي موافقين عليها؛ هنخفض لكم الجمارك عشان تعرفوا تصدروا لنا... واحنا برضك هنصدر لكم ونخلي شركاتنا تيجي تفتح عندكم...

*️⃣ الصين توافق عالشروط مجبرة عشان تخش المنظومة... وكلينتون يضحك ويقولك عبط قوي مين هيشتري منتجات صيني... دا احنا هنغرق اسواقهم منتجاتنا الامريكية اللي الكل يتمناها... هههه عبط قوي الصينيين.

*️⃣ وبعدين يزور كلينتون امريكا ويقولهم مش بتفكروا تخشوا منظمة التجارة العالمية وتتاجروا افضل مع الكوكب؟ الصينيين يقولوا يا ريت... طيب شوية شروط مذلة اهي كثيير تمضوا عليها..

*️⃣ يعترض الصينيين شوية وكام شهر وسنة ومفاوضات... الامريكان يقولوا لهم تدونا امتيازات ومتاخدوش زيها... هو كده وهنخليهم تخشوا التجارة العالمية... الصينين يوافقوا ويمضوا ويخشوا منظمة التجارة العالمية سنة 2001 ويضحك الامريكان بوش وكلينتون عالصين العبيطة اللي فتحت لهم الاسواق بتاعتها 😂😂. وطبعا مش محتاج اقولكم باقي القصة والصين عملت ايه في التجارة.

بس يا سيدي وزي اليابان امريكا بتحاول تشوف صرفة في العفريت اللي هي حضرته.

زيادة أسعار البنزين 25 قرش فقط

الحمد لله الحكومة قررت تاخد الخيار الثاني اللي كنت حكيته الآمن وهو تمتص صدمة السعر ومتعملش زيادة كبيرة تضرب التضخم

للي ميعرفش فالبنزين وصل ل 12 جنية في دولة منتجة زي الامارات؛ و كسر 20 و 25 جنية بالدول المستوردة الغير مدعمة

السعودية شبه مدعمة عن طريق وضع حد اقصي سعري فوق الدولة بتدعم وحاليا مدعمة

ربنا يكرم وقرار اوبك برفع الانتاج يخفض شوية البترول والا في ابريل نزعل 😅 … وربنا يستر علي شوية الضرايب اللي هتفرض للم فارق الدعم الحالي للبنزين؛ لان الموازنة محسوبة برنت 61 وهو دلوقتي 91

قولت اقولكم الخبر بتاع الزيادة لان كله مركز في نتيجة الماتش

علي فكرة تأخر اعلان البنزين الطويل دا حسسني إن في خلل في البروسيسور منتشر ؛ وهو من زمان أصلاً مش فاهم ليه…

*️⃣ البنزين معروف إن في إعادة تسعير؛ قوم إيه نقعد نتفاجئ ان في ظروف عالمية ومقلية ومشوية؛ وتلاقي عادي الدول اللي بتسعر شهري يوم 30 تقولك عادي السعر من بكره كام… بسيط قوي يعني مهواش فيلم معقد.

*️⃣ تيجي مثلا عند بوابة الرحاب؛ السكان اللي معاهم الكارت مش البادج؛ كارت NFC للدخول؛ تلاقيهم يخشوا البوابة يتفاجئوا إن في كارت ؛ تلاقيهم يقفوا وينزلوا الشماسة ويفتحوا الشباك يطلعوا الكارت؛ يعطل العربيات وراه؛ عارف بقي العربية اللي وراه متعطله؛ اوعي تقول هيستغل الوقفة ويطلع الكارت؛ لا دا هيكرر نفس السيناريو ويوصل للباب يفتكر برضك انه هيطلع كارت….

*️⃣ تروح تشتري دونات من كريسبي كريم ولا اي محل بتقف طابور بتاع 10 دقايق ولا اكثر… طابور طويل كده علي ما ييجي دورك؛ الفاترينه زجاج وانتا واقف منتظر؛ تفتكر ايه بيحصل؟ عااادي الناس تستني لغاية ما توصل الكاشير وتبدأ تتناقش اجيب انهي دونات؛ طب ما انتا واقف في الطابور وعارف ان هييجي دورك ومطلوب تختار؛ والاستاند زجاج وانتا شايفه من قبل ما ييجي دورك؛ لااا البروسيسور مش مستوعب دا.

*️⃣ طبعا في المطار تلاقي نفس الحوار؛ نوصل للبورد وتفتكر انك مفروض تطلع الباسبور… نوصل للبوابة بتاعة الباركينج ونبدأ ندور علي فكة وايه دا معناش ولا اشوف في العربية؛ كاننا اتفاجئنا اننا هندفع فلوس الباركينج.

*️⃣ يا رجل دا لو هتقابل حد؛ ورايحله تحت بيته؛ تستناك لما تبقي تحت وبعدين يفتكر انه مفروض يلبس الكوتشي ويشوف المحفظة ويشوف موبايله فين وو؛ ومش بقول متأخر لا حد يكون قاعد فاضي ويتفاجئ وقت التنفيذ

*️⃣ غالبا دا الجين بتاع الامتحانات واننا ننسي نذاكر لغاية يالهوي ليلة الامتحان؛ او احنا عايشين في انترنت اكسبلورر او شغالين بروسيسور عتيق من 10 سنين وفي تأخير…. بس بجد تتنقط من الناس اللي بتتفاجئ انها حاجة هما لو ركزوا ثواني هياخدوا بالهم…

*️⃣ ربنا يستر وييجي يوم وحاجة معروف معادها يوم السبت تلاقيها بتحصل يوم السبت عادي كده… مهواش ابتكار ولا انبهار ولا تقنية متطورة.

خبر زي دا يوضح ليه مترفعش البنزين غير ربع جنية؛ البنك المركزي مستهدف تضخم 7% مع سالب وموجب 2% رينج حركة في 2022... فاحنا لسه في الحدود المستهدفة بس بلاش نضغط عليها اكثر نروح فوق 8 ونبدأ في اللبش... كفاية علينا اجراءات الجمارك المنتظرة زي منع دخول غير المطابق للمواصفات الاوروبية اللي مفروض يتنفذ قريب وغيرها من العقبات

طيب هو عشان البوست السابق مش واضح
التضخم يعني كنت بتصرف مثلا يناير 2021 مبلغ 1000 جنية عشان تشتري مجموعة سلع محددة؛ يناير 2022 بقت 1073 يبقي تضخم 7.3%

وفي مواقع بتعمل حسابات
خش مثلا الموقع دا

https://www.worlddata.info/africa/egypt/inflation-rates.php

عندك من سنة 1979 لغاية 2021؛ تقول مثلا سنة 1985 كان مبلغ 100 جنية يساوي كام في 2021

هيقولك

فمثلا 1000 جنية سنة 1979 تساوي 100 الف جنية سنة 2021

و 1000 جنية في 2011 تساوي 3030 جنية في 2021 وهكذا

وبكده لو عاوز تعرف دخلك زاد حقيقة ولا زاد الرقم عالورق بس تقدر تعرف

المواقع دي بتحسبها بالارقام الرسمية للدولة؛ فخلي النقطة دي في بالك

أنا شوفت عالفيس النهاردة 100 بوست عن الأهلي والزمالك ومرتضى منصور وروسيا وأوكرانيا.

الغريب مشوفتش بوست واحد عن انتداب البحرين لظابط في الجيش الإسرائيلي للعمل في البحرين في مهمة كده في تحالف دولي مجهول من 34 دولة لمراقبة الإرهاب والتجارة ووو...

الأخبار دي مش مبقتش الناس تناقشها؛ دي مبقتش أصلا تاخد بالها من وجودها.

تفتكروا الإمارات هترد على البحرين 🤔🤔

من الحاجات اللي فعلاً منتظر اشوف تأثيرها عالسوق المصري؛ افتتاح العاصمة الإدارية.

*️⃣ بعيد عن انتا متفق أو مختلف سياسياً واقتصادياً لكن افتتاح العاصمة الإدارية فعلاً هيبقي مؤثر بشكل كبير من وجهة نظري وتعالى نشوف.

*️⃣ بغض النظر هيتم دا خلال 2022 او حتي 2023... هيتم تسليم عشرات وربما مئات الالاف من الشقق لأصحابها؛ وبالأمر في مئات الشركات الكبرى والوزارات للعاصمة.

*️⃣ شقق العاصمة مهياش شقق ل محدودي الدخل؛ دي شقق الطبقة فوق المتوسطة والعليا... يعني في الغالب أصحاب الشقق دي مهماش عايشين دلوقتي مع حماهم ومستنيين يستلموا الشقة عشان يعزلوا ليها... دول في الغالب عندهم شقق ثانية عايشين فيها حالياً.

*️⃣ معنى كده ان في الالاف مؤلفة من الشقق اللي مسكونة حالياً في مناطق زي مدينة نصر ومصر الجديدة والتجمعات هيتم تركها ويروح أصحابها للعاصمة الإدارية...

*️⃣ طبعاً بعضهم هيقفل القديمة لكن الغالبية هتطرح الشقق للبيع أو للإيجار؛ وللتذكير دي مش شقق الطبقة الكادحة اللي فيها عجز بالسوق؛ دي شقق من اللي بمليون وكده.

*️⃣ يعني فجأة الالاف الشقق الفاخرة هتنزل السوق ايجار وبيع... والمشكلة هتكون إن دا هيتم في وقت فيه ركود تضخمي... يعني يا باشا شقتك دي تساوي 1.5 مليون؛ طيب اعرضها للبيع... محدش يشتري... بعد 6 شهور... شقتك يا باشا تساوي 1.7 مليون؛ اعرضها ومحدش يشتري برضك... الأسعار تزيد دفترياً بس وبدون تنفيذ.

*️⃣ النقطة الكويسة شوية إن معظم الشقق القديمة في مصر مش تقسيط؛ فأصحابها مش مزنوقين يبيعوا فيحرقوا... لكن لكن الشقق في العاصمة تقريباَ كلها قسط؛ فلو لا قدر الله حصلت ازمة هيكونوا محتاجين سيولة للبيع فهنا هيروحوا للشقق القديمة.

*️⃣ كمان هيبقي في صراع الإيجار... الايجار مثلا لشقتك دلوقتي يساوي 8 الاف... دا حقيقي وبيحصل إيجار فعلاً بالسعر دا... لكن دا في الوضع الحالي؛ مش وضع فيه شقتك ومئات الشقق حوليك معروضين...

*️⃣ فبعد تسليم العاصمة وانتقال عشرات الالاف ليها؛ دا هياخد بتاع سنة مثلا يعني علي 2023؛ هيبدأ صدمة العقارات بالمناطق القديمة للبيع والايجار... واظن مش اقل من 6 شهور عشان يحصل تأثير خاصة إن العقلية المصرية عامة رافضة لفكرة العرض والطلب؛ وإحنا لو عارضين شقة للايجار ب 8 الاف وجالي زباين ب 7؛ ممكن نسيب الشقة سنة مش متأجرة ونخسر ايجار سنة ب 100 الف ولا اننا نخسر الف ايجار شهري...

*️⃣ فعشان كده منتظر اشوف تأثير تسليم العاصمة الإدارية عالسوق المصري والعقاري... طبعاً متنساش ان في عرض يومي متزايد...

*️⃣ كلاكيت للمرة الثالثة؛ السوق العقاري فيه عجز في الاسكان الشعبي؛ اللي هو تحت نص مليون؛ دا لو في عرض بيتشفط... الكلام عالعقارات من الفئة العليا...

*️⃣ طبعاً الطيبين بتوع إن الحكومة هتلغي الايجار القديمة يشوفوا حته ناشفة يقعدوا فيها... قال 1.5 مليون شقة مقفولة مهجورة داخل المدن يطلع قرار يفتحهم... يا حلاوة أومال الشقق اللي طازة وبسمسم بتاعتنا اللي علي بعد 40 كيلو من القاهرة مين يسكن فيها لما تطرحوا بالسوق شقق ب الزمالك والمهندسين ومصر الجديدة ووو للناس... انتا بتهزر يا بو صلاح؛ افتح ايدك.

*️⃣ وطبعاَ مش محتاج اوضح إن دا بوست نقاشي وإني مليش في العقارات ولا عندي... فعادي اللي فاهم ممكن يوضح ويقولي ان تحليلي غلط... اهو نشوف أفكار مختلفة

بصراحة صفقة وعرض استحواذ بنك ابو ظبي الأول علي هيرمس؛ لا أتمني إنها تكمل. او عالأقل دلوقتي شوية كده وتتكرر وتكمل

*️⃣ هيرمس في مرحلة نمو رهيبة؛ لسه مستحوذ علي بنك الاستثمار العربي؛ وبيتوسع في السوق ؛ وقطاع التمويل بتاعه للأفراد والمعروف ب ValU مكسر البلد حرفياً وحاطط عالكل سواء بنوك أو تقسيط مباشر... توسع خزعبلي وحرق وانتشار غريب.

*️⃣ للي ميعرفش هيرمس فهي مؤسسة مالية؛ يعني بتقدم خدمات مالية بس مش بنك... يعني يا سيدي عاوز تقسيط عندك فاليو بتاعتهم... عاوز تستثمر في البورصة فبتروح تفتح حساب في هيرمس وتبقي هي الوسيط بتاعك... عندك شركة كبيرة وعاوز تبيعها فتجيب هيرمس تقيم الشركة بتاعتك؛ والعكس يعني ملياردير عاوز تشتري شركة فتجيب هيرمس تقيم الشركة دي ليك... يعني من الآخر كده هيرمس بتدير الفلوس للمستثمرين وتديهم نصايح وتدبر لهم تمويلات وكله.

*️⃣ بنك ابو ظبي الاول برضك دا مهول؛ يعني هو موجود في مصر أصلاً؛ ومن كام شهر استحوذ علي بنك عودة؛ فكمان يخش يشتري هيرمس وبنك الاستثمار العربي بتاعها فدا معناه تأسيس كيان ضخم في السوق المصري... ودا شيء كويس برضك.

*️⃣ لكن هيرمس في مرحلة نمو كبيرة؛ فيا تري الملاك هيوافقوا يتباع دلوقتي ولا يرفضوا بحيث شوية وحجمهم هيكبر فممكن السعر يزيد... عرض الشراء مش مغري؛ سعر السهم في البورصة 18 وعرض الشراء ب 19 فعادي يعني مهواش رافعين السعر قوي...

*️⃣ من الحاجات الظريفة إن رؤساء الطرفين ستات؛ يعني رئيس بنك ابو ظبي بالإمارات ست؛ ورئيس هيرمس في مصر ست وهي منى ذو الفقار بنت الممثل الراحل صلاح ذو الفقار 😂..

*️⃣ كان عندي فضول أول ما سمعت الصفقة؛ فضول طفولي كده... هيرمس دا انتا بتروح لهم يقيموا شركتك ويشوفوا عرض البيع دا مناسب ليها ام لا... فدلوقتي هما نفسهم هيتباعوا؛ فشغل المعلم ل إبنه بقي؛ او هنا المعلم لنفسه 😂😂 يقيموا نفسهم لنفسهم...

*️⃣ كان فضولي الطرف الإماراتي هيجيب مين يتفاوض ويبقي المقيم واللي بيدير الصفقة يعني ؛ مهو المشتري برضك بيكون عنده طرف يقيم؛ تقوله دي ب 10 يقولك ليييه دي ب 5 في كل حته 😂😂😂... المهم الإماراتيين اختاروا بنك روتشيلد؛ ايوا بنك روتشيلد 😂😂 طبعاً معروف مين روتشيلد بقي... فانتم يا هيرمس هتقيموا جبنا لهم ولاد.... بنفسهم يقيموكم...

*️⃣ طبعا اللي هيقولي ايوا يعني البوست دا نستفيد منه ب إيه؛ هقوله ولا حاجة؛ أنا مرهق نفسيا وحسيت إني عاوز أهري في صفحتي وسط جمهوري 😂 في مانع يا كابتشن.

*️⃣ اه اللي بيسأل ليه فاليو بتنتشر بالشكل دا؛ فببساطة طريقة تقسيط اسهل من البنوك؛ فكر كده تروح للبنك وتقول عاوز كارت فيزا؛ هينزلك استعلام بيت وشغل ومخاطر ائتمان وفيلم عربي طويل... روح الكشك بتاع فاليو؛ في دقايق الفلوس معاك لو طبعا إنتا في المنظومة البنكية... ففاليو جذبت ناس كثيرة عشان سهولتها بالمقارنة بالبنوك... وبالمناسبة مفيش تقسيط بدون فوايد؛ هي بتاخد الرسوم من البائع؛ فإما انتا هتدفعها او البائع؛ تماموز يا ريس كده وضحت.

*️⃣ طبعا تأثير انتشار فاليو والحاجات دي ايه؛ هيكون بوست تاني اهري فيه برضك؛ ضمن بوستات ممكن تقولوا خواطر كده

مجرد تفكير بصوت عالي زي ما عملت في بوست العاصمة الإدارية ؛ دي بوستات تفكير بصوت عالي مش أكثر

طيب عشان البوست اللي فات عالفيس نزلته وعمل خناقة كده فلازم أوضح شيء... أنا في حاجة شخصية ونفسية عندي وضدها بشكل عنيف وهى تسليع الحياة البشرية؛ أنا مقتنع إننا بني أدمين بنتعامل مع بعض ومش بالمفهوم الغربي.

البوست اهو عشان منشرتوش في تليجرام

https://www.facebook.com/BnSamy/posts/10159668195856181

*️⃣ المشكلة في المفهوم الغربي إن الحياه بالغرب مادية جداً والموضوع مصالح صرفة؛ من العلاقات العادية لغاية سياسات الدول البراجماتية؛ مصلحتك ويولع الكون من بعد مصلحتك... حتى الدول الاسكندنافية اللي بعتبرها أفضل نموذج في الغرب هى لعبت على نقطة؛ وهى إنها قدرت تقنع الشعب إن المصلحة الجماعية هتحقق لكل شخص مصلحة فردية بشكل مضاعف؛ فبقوا يفكروا في مصلحة المجتمع عشان هيرجع المصلحة ليهم برضك.

*️⃣ في السنوات الأخيرة المجتمعات بتاعتنا اتجرفت أخلاقياً ودينياً واجتماعياً بشكل بشع... بقى في عاهات على شكل بشر؛ بتشوف حوارات زي التحرش والاغتصاب وسرقة الحقوق والمواريث وفي ظلم بيحصل للستات فعلاً وفي ظلم مضاد للرجالة في حوارات طلاق والأطفال ووو... بصوا المجتمع اتنيل على عينه وبقى زفت.

*️⃣ هنا مفروض في خلل فنفكر إزاي نصلح دا؛ اللي حاصل بقى إن العقول المبرمجة عالفكر المادي الغربي قالك أحسن شيء هو قوانين رادعة صارمة؛ كل شيء يتحط له لوائح وقوانين واللي يعديها نقطع رقبته...

أنا بقى ضد الموضوع دا كلياً.

*️⃣ وللتوضيح أنا مش ضد وجود القوانين عشان بس في غباوة بتحصل دائماً فلازم تقعد توضح البديهيات؛ لكني ضد إنك تكون متخيل إن وجود قوانين عنيف هيحل الأزمات.... وفكر معايا كده.

*️⃣ هى قوانين المخدرات في الكوكب كله ايه؟ اعدام وسجن مدى الحياه... طيب المخدرات انتهت؟ هتعمل أعنف من الاعدام ايه؟

*️⃣ طب بلاش مخدرات؛ التحرش والاغتصاب؛ هو الغرب مش عنده قوانين عنيفة؟ الست في الغرب مش هتحرج تقول إنه تم التحرش بيها ومش هيكون صورتها قصاد المجتمع وحشة ووو فسهل تبلغ... طيب ايه الأخبار هل اختفى السلوك دا من الغرب؟ تحب نشوف التقارير الغربية عن ان 100% من الستات بيتم التحرش بيهم في المواصلات و 80% بالأماكن العامة ووو.

*️⃣ طيب ايه؟ انتا معندكش قوانين صارمة وعندك مجتمع هيقف ضد المرأة؛ وهما عندهم مجتمع مع المرأة وقوانين صارمة؛ وفي الحالتين الموضوع مستمر.

⬅️ يبقى هدفنا بالقوانين انتقام وليس ردع

*️⃣ في العلاقات الزوجية؛ في رجالة بتضرب زوجاتها؛ وفي ستات بنسبة أقل طبعاً بتضرب الأزواج... هل الحل هو القوانين؟ طيب مفيش خيار نربي الناس صح ونعلمهم دينهم وأخلاقهم.

*️⃣ أحسن رادع هو الإنسان نفسه إن القرار بعدم فعل الغلط يكون نابع من الإنسان... أو زي ما كان المفكر مالك بن نبي رحمه الله بيقول بناء الإنسان وعالم الأفكار وليس عالم الأشياء والمادة.

*️⃣ يعني لو أنا هنفق 100 ساعة من وقتي في حل مشاكل زي دي؛ يبقوا 20 ساعة للتفكير في القوانين؛ و 80 ساعة عشان أحسن من افكار البشر نفسهم بحيث يكونوا هم الردع؛ الوقاية خير من العلاج؛ ويبقى القوانين اللي بتتعمل هدفها ردع من لا يرتدع؛ لإن هتفضل فئة مش محترمة ومحتاجة تاخد على دماغها.

*️⃣ لكن فكرة؛ ايه دا جوزك بيقولك مش عارف ايه؛ انتي تروحي تديله في وشه وتتطلقي منه وشوفي القانون دا هيسجن أمه ومش هيشوف عياله... والطرف الثاني تقوله ايه دا انتا تقول عليها إنها شمال وتفضحها بحيث سمعتها تروح ومتعرفش تاخد حضانة العيال وتطلقها بدون حقوق.

*️⃣ فكرة يلا نشوف الحقوق... مفروض جوزك يجيب لك خادمة؛ ويدفع لك مرتب رضاعة ومفروض هو المسئول بس عن كل لبسك ولبس عيالك والأكل وكل شيء وإنتي تقعد في البيت الخدامة تطبخ لك وتغسل وتمسح وانتي تستمتعي بالحياه.

*️⃣ ونروح للطرف الثاني نقول على فكرة مفروض متفتحش باب بيتها بدون إذنك ولا حتى تشوف ابوها بدون موافقتك... وانتا مفروض اه تصرف عليها بس تصرف اللي انتا عاوزه يعني لا مفروض عليك تجيب لها موبايل ولا حتى تشحن لها رصيد انترنت ولا حتى مفروض عليك تجيب تليفزيون ولا لبس خروج كثير؛ ولبس خروج ليه مهي مش من حقها تخرج بدون موافقتك فمش هتخرجها كثير فمش هتستهلك لبس... ومش مفروض عليك توديها مصيف ولا أي دلع... المفروض عليك كسوة طقم لبس وأكل وشرب للحياه وشكراً.

*️⃣ ايه رأيكم كده في العلاقة الزوجية دي؟ طرفين قاعدين يدوروا عالحقوق بتاعتهم... علاقة بيزنس صريحة وأي طرف يخل بالعقد نلجأ للقضاء؛ مهو بقى نزاع قضائي وعقد تم الاخلال بالبنود بتاعته.

*️⃣ لما يحصل هجوم على شيخ الأزهر لأسابيع بسبب حوار ضرب الزوجات دا؛ فنراضيهم إزاي يا عضو لجنة سياسات حزب وطني سابق؛ امممم ندور في التاريخ على شيء اسمه حق الكد والسعاية.

*️⃣ راجل عنده شغل ومراته ساعدته فيه يبقى كده هى شريكة ليه فيه؛ صح طبيعي منطقي على فكرة بالحسابات وطريقة التفكير الغربية بتاعة 1 + 1 = 2 ... حقها ولا مش حقها؟