من المزايا اللي عند الشيطان إنه بيحط خطة طويلة الأمد وبيلعب علي زراعة مركزية الانسان بالتغيير ال تدريجي البطيء؛ وتعالوا نبص عالفتوحات الإسلامية عبر التاريخ إزاي لعب فيها.

*️⃣ نبدأ بعصر الرسول والخلفاء الراشدين؛ كان الموضوع الخاص بالفتوحات صريح وهو تأمين الدولة ونشر الإسلام... وبعدين في بدأ الشيطان في اللعب؛ وزي ما تقولوا كده كإنه راح للخلفاء قالهم ايه المشكلة لما تضيفوا سبب ثالث؛ يعني تفضل فتوحاتك وحروبك لتأمين الدولة ونشر الإسلام؛ وبرضك دولة أكبر يبقي عائدات أكبر يعني ثروة أكبر ليك ك خليفة... ايه رأيك 🤔.

*️⃣ وبعد قرون بدأ السبب القديم يختفي والتركيز عالجديد؛ الخلفاء بقوا يحاربوا للمجد الشخصي والإمبراطوري وشكراً...

*️⃣ النتيجة هتبان في الدول؛ فالدول اللي دخلها الاسلام لما كان هدفه نشر الدين؛ زي الاندلس وغيرها شعوبها معظمها تحولت للاسلام وحصلت محاكم تفتيش وابادة رهيبة لتنصير المسلمين... وحتي العصر العثماني فالدول اللي دخلوا الاسلام في عصر القتال من أجل الاسلام زي البوسنة والهرسك والبانيا وكوسوفو لا تزال دول مسلمة؛ لكن دول ثانية سيطروا عليها بهدف امبراطوري فتلاقي العثمانيين دخول ومشيوا ومفيش اثار للاسلام؛ يعني مثلا العثمانيين سيطروا علي اليونان وبلغاريا والمجر وررمانيا... ومش مذكور عن مذابح شهيرة اتعملت لرد السكان عن دينهم (وجدت لكن ليست مثل الاندلس)....

*️⃣ حتي عارف لما تبص لعصرنا وفلسطين؛ تلاقي ل 30 سنة كان الشعار المرفوع اننا لازم نقف معاكم عشان دا الواجب... ثم ل 30 سنة اخري يتعدل ويتقال احنا واقفين معاكم عشان احنا عاوزين دا لانكم زينا عرب ومسلمين.. وبعدها يتعدل ويبقي دلوقتي كتر خيرنا اننا معاكم وضحينا عشانكم.

*️⃣ لو فضل المفهوم القديم وهو إن دا واجب عليكم؛ فتضحيتك إن وجدت هي مش عشانهم؛ دا فرض عليك... لكن لما تحول السبب وأصبح النفس البشرية فيه؛ فمع الوقت ادينا بنشوف الأصوات اللي تقولك طيب إنتا رأيك نقف معاهم وأنا رأيي ان ملناش دعوة بيهم... فطالما دخلت الآراء فهنا يبدأ الشيطان بلعب دوره. زي ما دخل النفس البشرية للخلفاء وخلي الحروب للإمبراطورية فرضك هنا خلي القضية الفلسطينية مجرد آراء

*️⃣ الصراع الأساسي الحالي والخلاف بين الفكر العلماني الرأسمالي الغربي هي نقطة المركزية للإنسان؛ رأي الإنسان هو مركز النقاش والحوار والقرارات..

*️⃣ الغربيين تمكنوا من زراعة مفهوم مركزية الانسان اللي محتاج بوستات ضخمة في مخ المسلمين؛ المركزية دي هي المسيطر عالمخ الغربي؛ فالمسلم مفروض مقيد بقيد خارجي عام وهو الإسلام وأحكامه؛ لكن الغربي مقيد فقط بمركزية الانسان وهل التصرف دا هيضر انسان آخر أم لا.

*️⃣ فالمخدرات مثلاً بالفكر الغربي حرية طالما مش هتسوق عربية وتمشي في الشارع تضر الآخر؛ قاعد في بيتك بتحشش إنتا حر... لكن في الفكر الإسلامي إنتا مش حر تشرب مخدرات لإنك بتضر نفسك ومش من حقك تضر نفسك مش بس متضرش حد زي الفكر العلماني الغربي.

*️⃣ ساعات دولة غربية تقولك هنحط قيود علي الحجاب؛ في غربيين عادي هيعارضوا القانون بحجة انها حرة تعمل الل ينفسها فيه؛ لكن المشكلة لما تلاقي عرب ومسلمين يعلقوا مع بعض بنفس الكلام انها حرة تلبس حجاب أو حجاب.

*️⃣ عارفين فيلم الحاسة السابعة القديم بتاع مكي مخرج والفيشاوي ممثل؛ بيفكر بالصيني؛ هي دي... عادة الانسان بيفكر باللغة الأم بتاعته؛ يعني ممكن أنت تعرف 5 لغات بس مخك لما يسمع انجليزي فهو في ثانية بيكون مترجم دا ل عربي وبعدين يجيب الرد بالعربي ويترجمه ل انجليزي... يعني ممكن تقول ان المركز أو Core التفكير هو العربي او اللغة الأم بتاعة الشخص.

*️⃣ فلما بنقول الشعب دا متدين بطبعه؛ دا عشان ال Core ومركز التفكير جواه هو الدين؛ هو بيفكر كل حاجة بالمركز والدين وبعدين يطبع دا علي الحياه... اه ممكن مع الزمن يكون واصله مفاهيم مشوهه عن الدين؛ لكن يبقي إنه بيفكر مركزياً بالدين.

*️⃣ عكس الشخص الرأسمالي العلماني الغربي؛ هو المركز و Core بتاع التفكير اللي نابع منه أي قرار واللي مخه بيترجم بيه هو المركزية للإنسان والنفعية...

*️⃣ عشان كده نفس السؤال ممكن تسأله ل 2 والاثنين متفقين في الرد النهائي؛ بس واحد مخه بيصيغ بالمحور التفكيري بتاعه الدين والثاني بالمحور التفكيري بتاع مركزية الإنسان.

*️⃣ الغرب بيدعم إن محور تفكيرك يبقي مركزية الإنسان؛ عشان بعد فترة الانسان بيتغير؛ فتقدر تغير التفكير... والاعلام بيقدر يغير الانسان وتفكيره وكده يقدروا يتحكموا في النتيجة والتفكير.

*️⃣ الناحية الثانية بيكون الشغل علي الدين؛ نركز في اننا نخترع حاجات ونقولهم دي من الدين؛ عشان المرجعية الفكرية تقبل وتعدي؛ اه ساعات بينجح برضك بس صعب قوي ومش بسهولة التلاعب ب المرجعية بتاعة المركزية للإنسان.

*️⃣ لما بتشوف الجيل الثالث عادة للمسلمين المهاجرين بتلاقي قطاع ضخم منهم مبقاش مسلم؛ أو مسلم علي ما تفرج كده؛ دا عشان الجيل الأول عشان ينسجم مع الغرب بيقرر يحول مرجعيته الفكرية. يحول دوافعه للأمور بدل ما هي الدوافع الدينية الثابته تبقي دوافع شخصية.

*️⃣ الجيل الثاني بيكون أعلي في مرجعية الإنسان ومعندوش ال Core الديني بتاع الاب؛ فبيكون أكثر تحررا... الجيل الثالث والرابع شكراً خلاص مبقاش عنده نفس دوافع الجيل الأول.

*️⃣ مفيش حاجة بتتدمر في يوم وليلة؛ هما عارفين كده وعشان كده عاوزينك تعيد برمجة نفسك وتغير مركزية تفكيرك من الدين للانسان؛ وشكراً؛ جيلك الثاني والثالث هيبقوا غالبا بتوعنا... الرابع هيبقي بالتأكيد بتاعنا.

*️⃣ فصلاح مقالش شيء غلط؛ هو بس رده كان بالمرجعية الفكرية بتاعة الغرب؛ المرجعية للانسان؛ وانا ك انسان مش عاوز الشيء دا... فالرد بتاعه نابع من مركزية الإنسان... وعشان كده الناس اللي زي حالاتي؛ مرجعيتهم الفكرية مفيهاش المنطلق الرأسمالي بتاع مركزية الإنسان معترضين..

*️⃣ أتمني كده تكون وضحت؛ إحنا وهو عندنا نفس الرد وهو لا للخمور؛ بس احنا بنقولها من مركزية الدين والله وهو قالها من مركزية الإنسان.. ودا سبب خلافنا... وعادة ركز في المؤيد والمعارض هو عادة في المواضيع بيكون تفسيره للأمور من انهي مركزية؛ وهتعرف بشكل كبير تفسر فعله. هتلاقيهم قالوا عادي علي حد يطلع ب مايوه بكيني اصله بيلعب كمال اجسام؛ وعادي لاعبة رياضة معينة تبقي ب هوت شورت عشان عادي دي رياضة... المرجعية الفكرية والمركزية للانسان ومصلحته بغض النظر عن الدين.

*️⃣ طبعا محتاج اوضح ان لا يعني التفكير بمركزية الانسان انك بتكفره عشان في ناس ابوها الروحي هو افلام عادل امام؛ وطالما قولت حد بيعمل حاجة يبقي اكيد قصدك تكفره... مركزية الإنسان لا تعني كارثة الا في أحيان يكون فيها عليك الاختيار وهنا يقرر ان الحكم لمصلحة الانسان وينسي ان ربنا حذر وقال (وما كان لمؤمن ولا مؤمنة إذا قضى الله ورسوله أمرا أن يكون لهم الخيرة من أمرهم) فهنا بس هتبقي مشكلة... لكن في الامور العامة عادي.

علي فكرة بجد إحنا منعرفش الاقتصاد المصري رايح علي فين؛ هو بغض النظر اني مش خبير ولا بطيخة ولا حتي هاوي بس بييجي لي كثير أسئلة كثير؛ الاقتصاد؛ الدولار؛ طيب هننهار؛ طيب هنتقدم... الإجابة الأكثر دقة (منعرفش).

*️⃣ عشان تحلل أي حاجة؛ بتعتمد علي معطيات محددة؛ يعني معلومات منها تبدأ تحلل وتتوقع... والمشكلة في مصر إن مشاركة المعلومات مع الشعب قليلة قوي فمنعرفش كثير منها وبالتالي تحليلنا بيكون علي أساس معطيات قليلة والباقي تخمين والتوقع.

*️⃣ وعلي فكرة مش دايماً المعلومات المحجوبة سلبية؛ مفيش تعمد إن نوع معين يتحجب؛ في إيجابي محجوب كمان.

*️⃣ طبعاً ممكن حد يقول بس إحنا عارفين حجم الدين وعارفين الاحتياطي كام ومفروض نسدد كام كل سنة وبالتالي عارفين المستقبل... كلامك منطقي ومظبوط لو بتتكلم عن سويسرا سنغافورة النرويج وأي بلد المعلومات كلها واضحة.

*️⃣ طيب هل إنتا عارف خطة الحكومة للاقتراض ايه خلال 2022 ؟ لا أنا أعرف ولا انتا ولا يمكن وزير المالية يعرف 😂😂... طيب هو دخول مصر (يورو كلير) هيجيب كام مليار دولار ؟ طيب مؤشر جي بي مورجان هيجيب كام مليار دولار ؟ محدش عارف.

*️⃣ طيب بلاش قروض؛ طيب طرح وبيع شركات حكومية في البورصة مش ممكن يجذب مستثمرين أجانب؟ طيب كام؟

*️⃣ بلاش بيع وبلاش قروض؛ طيب مش ممكن الحكومة تقولك طرح رخصة 5G في مصر؛ أهي الرخصة دي تجيب للدولة بالميت 3 مليار دولار من شركات الموبايل وممكن الحكومة تقفل عالثلاثي فودافون أورانج اتصالات بحيث يجيبوا الفلوس من بره مش يسحبوها من البنوك المحلية ويدوها للحكومة... انتا في مصر فكل شيء ممكن يحصل والمعترض المحكمة الاقتصادية جنب كارفور المعادي لو راجل روح ارفع قضية يا خاين يا عميل.

*️⃣ طيب هي عودة السياحة هتأثر إزاي عالاقتصاد؟ طيب تصدير الكهرباء للشام وليبيا والعراق لو المشاريع تمت؟

*️⃣ طيب ليبيا عندها انتخابات كمان اسبوعين؛ لو لو لوووو حصل استقرار ففي أكثر من مليون مصري هيروحوا ليبيا وفي عقود اعادة اعمار برقم فيه 9 اصفار دولار لمصر ان لم يكن 10 اصفار.

*️⃣ طيب في تقارب قطري تركي مصري بيحصل؛ مش دا هيساهم برضك؟ افتكر ان اكبر مشروع ل قطر بره قطر هو محطة مسطرد للبتروكيماويات اللي اتنفذت ما بين 2015 الي 2020 والسيسي افتتحها والمحطة دي قادرة علي تكرير كل انتاج مصر من البترول وزيادة فممكن توفرلك في استيراد البترول بشكل كبير؛ واكيد بتسمعوا تصريحات اكتفاء ذاتي من وزير البترول... طيب لو التقارب الثلاثي زاد مش هيبقي في حاجات كده تيجي لمصر ومشاريع جديدة ب 9 اصفار دولار... دا محطة مسطرد اتعملت وقت ما كنا بنشتم بعض فلما نتصالح يبقي ايه؟

*️⃣ طبعا الناحية الثانية عشان برضك متقولوش الدنيا ربيع والجو بديع... لو امريكا زودت الفايدة مش دا هيسحب اموال ساخنة من الاقتصاد المصري؟ استثمارات الاجانب في ادوات الدين المحلية الحكومية 33 مليار دولار علي ما اذكر فتخيل لو حبه منهم عاوزين يخرجوا ايه الوضع.

*️⃣ طيب أمريكا لو فرضنا زعلت من مصر لاي سبب ولو حقوق الإنسان فقرصت شوية؛ دا هيقلق مستثمرين وخاصة الاموال الساخنة فخرج شوية منهم... هيبقي ايه الدنيا.

*️⃣ الخلاصة عشان مطولش؛ محدش يعرف ايه المستقبل خالص... هو طبيعي في أي بلد المستقبل مجهول؛ بس في مصر فقلة المعلومات المتاحة بيخلي التوقع أصعب.

*️⃣ هل معني الكلام دا ان كل التحليلات غلط؟ لا برضك عشان في مؤسسات كبيرة بيكون ليها تحليلات ومصادر معلومات مش متاحة لأمثالنا من الرعاع العوام 😂😂

بيقولك امازون اتغرمت في إيطاليا ما يقارب 1.3 مليار دولار؛ بس فعلياً الخبر دا بحس إنه معمول عشان الناس؛ لإن في حاجة بسميها الاستفادة من الشمال ودا شغال في الرأسمالية الحالية زي الفل.

*️⃣ تخيل معايا شركة مثلاً بحب منتجاتها زي أبل؛ هى عاوزة تطور منتج ما لكن دا ليه براءات اختراع عند شركة منافسه أو جامعة .. ببساطة أبل بتقرر تطلع المنتج بغض النظر عن براءات الاختراع دي... وطبعاً صاحب براءات الاختراع بيتجنن ويروح يرفع قضية.

*️⃣ جيش محاميين أبل يقدروا يهربوا من معظم القضايا؛ وحتى لو فشلوا بيحصل غرامة؛ طيب الغرامة دي كام؟ القاضي بيطلب من لجنة تشوف هي الشركة دي عادة بتدي تراخيص لحق استخدام براءة الاختراع دي بكام؟ نقول 100 مليون؟ طيب هنغرم أبل 100 مليون معاهم 100 كمان عقوبة.

*️⃣ مبسوطة يا شركة أو يا جامعة؟ زي الفل قشطة... بس هنا السؤال؛ أبل كسبت كام؟ أبل أنتجت جهاز مكانش هيكون موجود بدون سرقة براءات الاختراع للآخرين دي؛ الجهاز دا نزوله للسوق تسبب في زيادة شعبية أبل ومبيعات أجهزة أخرى عندها عشان العميل يخش ال إيكوسيستم بتاع أبل.

*️⃣ ففي النهاية الغرامة دي ولا شيء؛ خلاص الاستفادة من سرقة براءة الاختراع تمت... طيب افرض يا سيدي أنا مكنتش عاوز أدي لأبل حق استخدام براءة اختراعي وكنت هعمل شيء ما بيها؟ لا خلاص البس انتا

*️⃣ يعني مثلاً من كام شهر أبل اتغرمت 300 مليون دولار لفيزا لسرقة تقنيات خاصة ب Visa واستخدمتها في أبل باي؛ طيب التقنيات دي أبل خلاص استخدمتها وكان ليها طبعاً دور ولو 1% في شعبية وتطور Apple Pay... طيب الغرامة هتأثر في أبل باي؟ لا خلاص التأثير تم وهى بقت في مركز قوة.

*️⃣ طبعاً اللي بتعمله أبل بتعمله كل الشركات عشان عارف الظيطة بتاعة شوفتوا أبل شوفتوا أبل.

*️⃣ تعالى مثلاً لأمازون؛ تخش سوق وتعمل ممارسات معينة تقضي عالشركات الصغيرة في السوق دا؛ جهات حماية المنافسة والمستهلك تاخد بالها وترفع قضية على أمازون.

*️⃣ جيش موظفي أمازون ليه دور محدد؛ قعد القضية أطول فترة في المحكمة حتى لو دا هيخلي الغرامة تبقى أكبر مش مهم؛ طول القضية.

*️⃣ وتخلص القضية ويصدر قرار بتغريم أمازون من القضاء أو جهاز المنافسة أو أي كانت الجهة مبلغ ضخم؛ مليارات الدولارات... تلاقي أمازون تدفع عادي جداً... طيب هى كده استفادت ايه؟

*️⃣ في الفترة اللي القضية فيها وقت الجدال كانت أمازون بتواصل ممارساتها المدمرة؛ فكانت بتقضي كل يوم على منافس في السوق للأبد؛ وبعدين يطلع الحكم... تدفعه عن طيب خاطر وخلاص مش هعمل الممارسات الوحشة دي تاني... أصلاً مش محتاج أعملها أنا قتلت المنافسة في السوق والغرامة مش هترجع الأموات للحياة تاني.

*️⃣ فهمتوا ليه مش بتفرق معاهم الغرامة... الغرامة مؤثرة بس "التأثير قد تم" وهو تفضية السوق... هنشتغل يا سيدي شغل شريف؛ ولو ظهر منافس تاني هنشتغل شمال نموته على ما يتحكم علينا تاني يكون خرج من السوق المنافس دا.

*️⃣ ومش شرط الموضوع عالسوق العملاق؛ تخيل معايا 2 تجار بدأوا سوا برأس مال يا سيدي 1 مليون جنية؛ الأول شغال قانوني وورق وضرائب وتأمينات ومعاشات وكله؛ والثاني شغال شمال 100% ومفيش شيء قانوني.

*️⃣ بسبب إن الثاني شغال بشكل غير قانوني تماماً فالتكلفة عليه أقل؛ فهو لا بيدفع ضرائب ولا أي شيء؛ وتكلفته الأقل تخليه يقدر يبيع بأسعار أرخص في السوق وينافس أقوى ويقدم عروض أفضل... والعميل مش هيدور مين قانوني ومين لا؛ هو عاوز الأرخص.

*️⃣ فالنتيجة سنة واثنين وثلاثة تلاقي الأول إما معرفش ينافس وخرج من السوق أو يادوبك كسب بسيط؛ والثاني الغير قانوني بقى 5 و 10 أضعاف حجم الأول... وبسبب حجمه الكبير يقدر يشتري أرخص وأوفر من الأول فيفضل يكبر ويكبر.

*️⃣ وحتى لو فرضنا إن الضرائب هوب قفشت الثاني في مرة؛ فمهما عملت الضرائب مش هتعرف تحاسبه صح؛ ولو حتى فرضنا إنها هتدفعه صح كل جنية؛ ففي شيء حصل عليه الثاني مش هتعرف الضرائب تغرمه عليه؛ الشهرة والسمعه والانتشار في السوق والأمور اللي قدر يوصلها لما بقى بالحجم الكبير.

*️⃣ فبرضك مرة كمان يطلع اللي بيخالف وشغال غير رسمي هو المنتصر في الصراع الرأسمالي وزي ما الشركات اللي هتمشي قانوني وتروح تقدم طلب ترخيص براءة اختراع وتخش في مفاوضات سنين فالمنتج بتاعها يتأخر صدوره؛ في حين منافسها هيسرق براءة الاختراع ويطلع منتجه بكره ويكسب ويقتل منتج المنافس... فبرضك التاجر الغير رسمي هيقدر يعدي بسهولة التاجر اللي قاعد كل خطوة يدرسها قانوناً تمشي إزاي.

*️⃣ فبلاش الأحكام على أي مخالف تخليكم تفتكروا إن العدل بياخد مجراه وكلام الأطفال دا؛ الأحكام دي دورها إنها توهم المواطن إن شوفتم أهو اللي بيخالف بيتعاقب... دور الأحكام دي اقناع المواطن الكيوت اللي ماشي في الطريق القانوني إنه يفضل ويكمل؛ بدل ما كله يبقى شمال... لازم نديله أحكام تحسسه إنه صح برافو شوفت لولا إني قانوني لكنت اتعاقبت زي دا... لكن في الحقيقة انتا مضحوك عليك.

لو تشوفوا فارق النقاشات علي حوار الولية الأوكرانية بتاعة الرحاب 2

البوستات بتاعة الناس العادية كلها فين الفيديو وكده 😂

*️⃣ جروبات سكان الرحاب بقي عندنا عبارة عن دا اختراق للخصوصية وبلكونة بيتك انتا حر تقعد بالشكل اللي نفسك فيه فيها ودي ضمن حدود شقتك؛ ومفروض اللي صورها يتسجن (قانونا ممكن)؛ واللي يجيب صورة لهيفاء وهبي وهي قاعدة في بلكونة بيتها ويقولك جيرانها مشتكوش يعني ووو.... محدش خالص بينتقد الفعل نفسه وعادي والنقد بس عالمعترضين.

*️⃣ الأسبوع الماضي كان في نقاش تاني برضك بالجروبات عندنا وهو إن في واحدة بتقول ان ليهم جار شاب وهو محترم وكل حاجة بس طول الوقت بنات داخلة وبنات خارجة وكده. وايه الحل وهل تخلي جوزها يكلمه ولا ايه

*️⃣ الست دي حصل عليها هجوم برضك رهيب وانتي مالك وماله هو جوا شقته يجيب اللي نفسه فيه؛ واللي يقول دول يمكن زميلاته في الشغل جايين يشتغلوا؛ واللي يلبس لبس ديني كده ويقولك دعوا الخلق للخالق ومن حسن اسلام المرء تركه لما لا يعنيه؛ ومن تتبع عورات الناس تتبع الله عورته وشوية كلام عنب كده... وناس تانية جابت قانون العقوبات اللي بيقول ان الزنا لا يعاقب عليه القانون طالما بموافقة الطرفين؛ وحد غيره طلع قال ايه الناس اللي تروح كومباوند وتدفع ملايين في شقة ولسه تفكيرها متخلف عاوزين يفرضوا اخلاق الريف والفلاحين علي ال كومباوندات.

*️⃣ وطبعا اللي يقول يا جدعان كده حرام مينفعش يترد عليه بتعليقات انتشار الوهابية في الجروب بتاع الرحاب وايه تفكير الاخوان دا... وياما شوفت بوستات نوعية الخدامة نزلت حمام السباحة وايه القرف دا واشتكيت للادارة؛ وتخيلوا العمال بعد ما خلصوا قص النجيلة قعدوا تحت شجرة وقعدوا يفطروا؛ ايه المنظر دا.


*️⃣ بصراحة مأساة بنشوفها هنا وكم الناس اللي بتأيد العنصرية وكمان اشاعة الفاحشة تحت مسمي حريات وبطلوا تخلف منتشرة وميسطرة بشكل غريب لدرجة ان اللي شايف دا غلط بقي يحرج يتكلم عشان هييتعمل عليه حفلة انه متخلف رجعي اخواني وهابي سلفي ووراها هياخد بلوك من الجروب لانه لا يدعم حرية المليطة.

*️⃣ اللي مستغرب له ان دا جروب سكان الرحاب؛ يعني ناس اخرها شققها ب 2 و 3 و 4 و 5 مليون؛ قول يا سيدي عندك فيلا حلوه كده ب 10 مليون... اومال جروبات ال كومباوندات اللي الفيلات ب 30 و 40 و 50 و 100 مليون بيفكروا ازاي...

*️⃣ المشكلة ان انتشار التفكير دا في طبقات المجتمع اللي مسيطرة عالاعلام والصناعة والصحافة... طبقة الكريمة اللي ظاهرة في المجتمع واللي طبقة الغلابة بيكونوا دايما نفسهم يبقوا زيها... يلبسوا زيهم براندات ويعيشوا في كومباوند زيهم ويسافروا نفس المصايف بتاعتهم ويقلدوهم في كل شيء... مأساة بجد وربنا يستر عشان الشعوب عادة بتقلد طبقة الكريمة دي؛ والشعوب المتخلفة بيكون تأثير الطبقة دي فيها أكبر...

لولي مقعداني دلوقتي نلعب في الاختلافات والتوصيل وو... وبغض النظر عن انها بتقعد تقولي قاعدة افكر اهو في الاختلافات عشان افتكرها وأنا اقولها تفتكريها ازاي وانتي متعرفيهاش فتقولي مهو انا لما اعرفها هفتكرها 😂😂

بس اللعبة دي لما وصلنا لها؛ مجرد شوفت الصورة مخي قال بسيطة؛ ادوات الطعام مع بعضها واللبس مع بعضه والأكل مع بعضه

لولي وصلت كده فقولت لها غلط فقالت لا صح؛ فقالت لي بنوصل اللي ليه علاقة ببعضه؛ والسكينه ماما بتقطع لي بيها التفاحة؛ والشوكة باكل بيها المتقطع.

صراحة وقفت كام ثانية؛ صح علي فكرة؛ التفاحة بتتقطع بالسكينة فكده صح فعلا.

احنا حرفيا لما بنكبر مخنا حفظ قوالب محددة هي تمشي كده؛ خلاص يعني المخ بيقابله الالاف المواقف يومي هو هيقعد يفكر في كل موقف؛ فخلاص هو بقي شغال Auto Pilot طيار الي بيطلع الاجابة من الذاكرة مش بيفكر فعلياً..

ينفع المنظر دا؛ طفلة هتم يوم الخميس القادم 5 سنين تعلم عليا وتقولي لا صح وتطلع فعلا هي صح 😂😭😭😭

دا انتي هيعقدوكي في المدرسة بالاجابة النموذجية؛ اصبري اصبري 😁

لتنمية موارد الدولة في مشروع قانون اتوافق عليه

فرض ضريبة 5% عالمشروبات الغازية

فرض ضريبة 2% علي السلع المعمرة

فرض رسم 100 جنية لمغادرة مصر للمصريين و 50 للاجانب.

فرض رسوم علي مشتريات المنطقة الحرة

زيادة ضريبة الدمغة 1% لبعض البنود

تحديث توضيحي
دا قانون كبير ومنشور في الجرايد؛ بس لسه مجلس شعب يعني لسه لم يطبق؛ القانون بيطبق لما ينشر في الوقائع المصرية... فمش هتنزل النهاردة تلاقي البيبسي زاد...

امتي بقي هيصدر الله اعلم بس خلاص المجلس وافق؛ علي اساس انه ممكن يرفض 😂😂

دا البنود فيها صابون ومسارح وسينمات وحاجات جميلة

تعليق علي بوست شوفته الصبح كده

مقرر القومي للسكان السابق: استمرار الزيادة السكانية يؤدى لتراجع نصيب الفرد من الإنفاق على الصحة والتعليم والإسكان

⬅️ يعني مش هيؤدي برضك لزيادة عدد الناس اللي الدولة هتفرض عليهم ضرايب؟ مهو لو عندك 10 مليون مواطن غير لو عندك 100 مليون. طيب مش بتأثر ان سوقك يبقي أكبر ففي شركات تهتم بسوقك وتفتح فيه والدولة تفرض ضرايب عليهم؟ طيب هو احنا لو بلد 10 مليون مثلا هيكون عندنا 6 مليون بالخليج بيبعتوا دولار وهما المصدر رقم 1 للعملة الصعبة؟

*️⃣ توء توء ؛ الزيادة بتأثر عالخدمات بس لكن الضرايب لا؛ لإننا بندي المواطن خدمات كثير جدا ومتنوعة لكن مش بنفرض عليه ضرايب خالص.

ملحوظة لغاية ما اكتب بوست بعنوان ارحموني شوية 😂... بلاش كل بوست لازم اوضح نقطة بصوا للمعني وبلاش تعليق عالكلام حرفي... عشان عارف اللي هيقولي يعني ينفع نزيد مش عارف كام سنويا وينفع مش عارف ايه...

صراحة مش قادر أفهم هو أردوغان عاوز يعمل ايه في الاقتصاد التركي والعملة.

*️⃣ في البداية كده تركيا بلد مقترض من الخارج بشكل عنيف جداً؛ زي حالاتنا يعني؛ احنا شبه تركيا من 15 سنة... المهم يعني إن اردوغان محتاج دولار وعنده عجز ميزان تجاري وعجز في كل شيء والسياحة منهارة لسه فكل عام وانتم بخير.

*️⃣ داخليا في أي دولة لو حصل قلق من العملة بيحصل دولرة؛ الدولرة يعني الشعب هيحوش بالدولار بدل العملة المحلية؛ الدولرة دي كفيلة تدمر أي عملة أصلاً بغض النظر عن حجم الدولة... وعلى فكرة سبب إننا بعد تعويم 2016 ثم 2017 الدولار قفز ل 16 ثم 18 ودخل علي 20 هو الدولرة؛ الشعب شايف الدولار بيزيد فبيحوش دولار.

*️⃣ مفيش دولة هيكون عندها دولار يكفي احتياج الشعب كله يحوش؛ فالطلب عالعملة مفروض يكون تجاري؛ تصدير واستيراد؛ اقتراض وتسديد؛ سفر للخارج وسياحة واردة... انما تحوش دولار فدا طلب اضافي عالعملة محدش يستحملة... شوف كده لبنان واللي حاصل فيهم وتركيا دلوقتي بسبب ان المواطنين بقوا كمان يحوشوا دولار..

*️⃣ عشان كده لو فاكرين في 2017 كان البنك المركزي بيغرق السوق دولار عشان ميخليش الدولار يطلع بل ينزله؛ ولما ينزل فالناس اللي اشترت بهدف تحوش دي لبست... لان اللي بيحصل ان في ناس بتقولك دا الدولار هيبقي ب 25 مثلا فتروح تستلف فلوس من معارفها وتقولك بكره الدولار هيطلع ونكسب؛ وهكذا بقي... لو الدولار طلع فعلا فدا يشجع ناس جديدة تعمل نفس الفكرة...

*️⃣ فلما انتا تعرف متخليش العملة تطلع؛ الناس دي تخسر؛ ولما تطول شوية وتنزلها كمان؛ فالناس دي بتخسر أكثر فدا يخلي الناس تقولك كفاية خسارة بيع بيع... ودا يفهمك ليه بعد ثبات 2017 هوبا الدولار نزل من 18 ل 16 وثبت عليها... عشان خرج جزء من الدولرة من السوق.

*️⃣ المهم بقي تركيا العملة نزلت أكثر من النص خلال سنة؛ فدا يشجع أي مواطن يحول للدولار فلوسه؛ فدا يعمل ايه؟ يخلق طلب أكثر عالعملة فناس أكثر تخش دولرة وهكذا.. وممكن تبصوا علي نسب مدخرات المواطنين بالعملات الاجنبية في تركيا وهتلاقوا دا واضح.

*️⃣ كل دا بقي واحنا بنتكلم عن حاجة واحدة بتفشخ العملة؛ تركيا بقي بيحصل عندهم كثييير قوي؛ تقريبا أي عامل في الكوكب ممكن يأثر عالعملة بيحصل في تركيا؛ فاضل بس الحرب وتبقي قفلت اللعبة كده.

*️⃣ ضيف بقي معاهم إن الليرة متداولة وبقوة حاليا في الفوركس؛ يعني أي حد في الكوكب ممكن يشتغل في العملة دي 😅 مش بس الأتراك وجوا بلدهم لا دا الكوكب كله يخش يلعب فيها؛ مصر مش كده وعملتنا مش متداولة كده واللعب فيها حتي الآن محلي بس 😅😂😂.

*️⃣ المهم يعني إن الخلاصة إن تركيا جوا المنظومة المالية العالمية بشكل قوي جداً وأكثر مننا بكثير؛ من قروض علي تداول عالمي لكله... فللأسف طالما إنتا جوا المنظومة يبقي مجبر تلعب بالادوات بتاعتها... لكن تبقي جوا وتقرر تمشي علي سطر وتسيب سطر فانتا كده بتعدم نفسك بنفسك... اما تخش المنظومة أو تسيبها كلها وتطلع... او تطلع تدريجي؛ لكن عناد وخلاص مع المنظومة المالية فكده زحاليق.

*️⃣ عشان كده العملة نزلت للربع في سنتين ثلاثة؛ وهتنزل أكثر... طيب هل دا معناه ان الاقتصاد والدولة نفسها انهارت للربع؟ لا بس العملة نزلت للربع... هي المنظومة المالية العالمية كده ممكن توقع عملتك وتطلع عملتك عادي... واللي بيحصل في تركيا هو تدمير ذاتي؛ كانت الأول في مؤامرة وكده وترامب اعترف انهم ضربوا اقتصادهم... بس الانهيار الحالي دا تدمير ذاتي... هما خلوا العملة تقلب مراهنات؛ فكل الكوكب بقي يراهن؛ داخليا بيعملوا دولرة؛ وخارجيا في الفوركس بيعملوا Short Selling وكل عام وانتم بخير للأسف الشديد.

كان عندي خطة إني أنشر بوست هل الدولة الفقيرة فعلاً فقيرة عشان بيخلفوا كثير

وكنت هجيب القصة من 500 سنة كده ونحكي سوا؛ ونشوف هل الدول المتقدمة دي أغنياء ومتقدمين عشان مش بيخلفوا كثير

يعني هولندا بقت هولندا الثرية دي؛ وبلجيكا وفرنسا وأمريكا وإنجلترا دول بقوا أغنياء كده بس عشان مش بيخلفوا كثير

كان مفروض هنشر البوست دا عشان التعليقات بتاعة البوست من أسبوع بخصوص السكان والضرايب؛ بس لو نشرت هيتاخد علي محمل سياسي إني بنشر رداً علي حوار التموين والدعم وإننا بنخلف كثير وكده... بس يا سيدي وأنا مش ناقص أصلاً

فنستني اسبوع وننشر البوست دا 😞...

المشكلة مش حابب تاني اتكلم عن تركيا؛ ولا هعرف اتكلم عن السكان... طيب اكتب عن ايه؟ أحكي لكم يعني ايه تضخم وليه بيزودوا الفايدة معاه وهكذا 🤔 ولا البوست دا كمان هيبقي لبش وشبهة..

هكتب ايه كده في الويك اند دا 😂

نرجع للمقالات الأساسية؛ ويمكن كان أكثر سؤال بتسأله هو ايه بقي موضوع التضخم دا بقي؟ يعني ايه هو التضخم أصلا وليه بيحصل؟ يعني باختصار ما هو تعريف التضخم بالهجايص كده والشعبي.

*️⃣ باختصار كده التضخم يعني فلوسك قلت قيمتها كام؛ يعني مثلاً معاك 100 جنية وتقدر تشتري بيها 100 قلم رصاص؛ بعد فترة من الزمن ليكن سنة بتبص لقت ال 100 قلم رصاص بقوا ب 110 جنية... كده يبقي التضخم في الفترة دي 10% للقلم الرصاص.... يعني باختصار كده.

*️⃣ طبعا التضخم مش بيتقاس لسلعة واحدة؛ لكن بنشوف كده حياتك ككل؛ انتا بتعيش الشهر ب 3000 جنية؛ لقيت نفسك نفس الشهر السنة اللي بعدها عشان تعيش نفس مستوي المعيشة بالظبط محتاج 3450 جنية يبقي كده 15%

*️⃣ ممكن تلاقي الطماطم رخصت بس اللحمة زادت واللبن رخص والايجارات زادت ووو... مش مهم سلعة واحدة؛ المهم عامة انتا بقيت محتاج زيادة كام عشان تعيش نفس الحياة.

⬅️ طيب بيحسبوه ازاي؟ يعني في سلع زادت وسلع نقصت بيعرفوا يعملوا الحسبه ومستوى المعيشة بتاعي ازاي؟

*️⃣ طريقة الحساب معقدة؛ لكن ممكن تقول كده ان الجهة المسئولية مثلا زي الجهاز المركزي عندها مصادر بتعرف منها الاسعار لمئات السلع في كل المحافظات بحيث في النهاية تعرف سعر السلعة زاد ولا نقص؛ لان ممكن سبب استثنائي في محافظة محددة يحصل زيادة لسلعة معينة لكن الباقي طبيعي... وفي النهاية بيقي عندهم كده خريطة لشكل الاسعار.

*️⃣ افترض بقي الطماطم وباقي الفاكهة زادوا 10% في حين الايجارات في الساحل رخصت 50% يعمل هو ايه؟ باختصار كده في حاجات زي بحوث الدخل والانفاق؛ بيها بيكون مرسوم هو المواطن بيصرف دخله ازاي.. فهنا معروف ان الوزن النسبي للأكل كام والترفيه كام؛ فيقدروا يعرفوا الزيادة تساوي كام كمتوسط للشعب. ( كل ما سبق شرح تبسيطي)

⬅️ طيب ليه التضخم دا بيحصل أصلا؟ يعني ليه أصلا بيحصل ارتفاع في أسعار السلع؟

*️⃣ بص يا سيدي ارتفاع سعر السلع ممكن يكون ليه أسباب كثير قوي؛ لكن مفروض السبب الأساسي هو العرض والطلب... يعني سلعة معروض في السوق منها 100 والطلب يعني الناس عاوزة تشتري 120... فهنا سعر السلعه دي يفضل يزيد؛ ولما السعر يزيد يبدأ ناس مش مناسب ليها السعر؛ فالطلب يقل ل 115 ثم 110 ثم 105 ثم 100... لما الطلب يبقي 100 فهنا خلاص كده تمام العرض زي الطلب فالسعر يثبت.

*️⃣ طبعاً ما سبق هو الوضع المثالي وهنقول بعدين ليه؛ لكن الخلاصة لو حصل طلب زيادة علي سلعة فطبيعي سعرها يزيد... والعكس برضك.

⬅️ يعني هو زيادة الطلب هي دايماً سبب ارتفاع الأسعار؟

*️⃣ نظرياً دا السبب الرئيسي؛ وحاليا التضخم في الغرب من أسبابه كده؛ وركز في من أسبابه دي وليس السبب الوحيد... الدول الغربية لما حصلت الكورونا راحت مديه الشعوب فلوس تساعدهم؛ وأشهر دولة عملت كده أمريكا... فالمواطن لقى معاه فلوس هو متعبش فيها؛ فيلا اشتري أي حاجة... فالطلب زاد في الأسواق.

⬅️ طيب هو انتا ليه مركز بس مع طرف واحد وهو الطلب؛ مش المعادلة عرض وطلب؟ هو ممكن الطلب ثابت والعرض يقل؟

*️⃣ اه طبعاً دا وارد وممكن الحدوث وبالفعل بيحصل عالمياً دلوقتي... عندك أزمة التصنيع بسبب الرقائق العالمية؛ وأزمة الطاقة اللي مش بتخلي المصنع شغال بطاقته القصوى؛ وأزمة الشحن فمحدش عارف يشحن كفاية... فدول بيخلوا المعروض من السلعه يقل... فحتي لو الطلب ثابت فالمعروض قل فالسلعة تزيد.

⬅️ طيب ممكن الاسعار تزيد بدون اللعب في العرض والطلب؟

*️⃣ طبعا ممكن وخد مثال شوفناه وهو اللي حصل في مصر نهاية 2016 ثم 2017؛ التعويم... دلوقتي انتا بتستورد كل شيء؛ الدولار سعره زاد فسعر السلعة زاد... مباشرة كده بدون ما نخش معادلة العرض والطلب... ونفس الحكاية لما تتفرض ضرايب علي اي سلعة فسعرها هيزيد مباشرة.

⬅️ طيب ايه اخبار طباعة الفلوس؛ دايما بنسمع ان الأسعار بتزيد عشان الفلوس بتتطبع.

*️⃣ بص يا سيدي؛ نظرياً كده ممكن تطبع فلوس بس الاسعار مش هتزيد ولا التضخم يحصله مشكلة... وممكن الطباعة تسبب زيادة اسعار برضك... والاجابة بسيطة وهي العرض والطلب.

*️⃣ دلوقتي مش الدولة دي شغالة؟ في مصانع جديدة بتتعمل وشركات بتفتح؟ يعني طبيعي انتاج الدولة بيزيد صح... تخيل معايا مثلا ان كل انتاج الدولة هو 1000 سلعة؛ وكل الفلوس اللي في الدولة 1000 جنية... كده تلقائي السلعة = 1 جنية صح؟

*️⃣ نشوف بعد سنة كده؛ تخيل ان الدولة بقت تنتج 1250 سلعة؛ ونفترض ان الدولة لم تطبع فلوس وفضلت الفلوس 1000 جنية؛ كده السلعة هتبقي ب 0.8 جنية.

*️⃣ ولو فرضنا الدولة دي طبعت 500 جنية يعني الفلوس بقت 1500 يبقي كده 1500 سلعة والفلوس 1500 جنية يبقي تفضل السلعة ب 1 جنية.. يعني هنا الاسعار مزادتش رغم اننا طبعنا فلوس عشان الطباعة كان مقابلها انتاج.

*️⃣ طيب تخيل كده حكومة الدولة دي عاوزة تفرح الناس فقالت يلا نطبع كثير؛ هوبا خلت الفلوس 3000 جنية والسلع قولنا 1500... فكده عندنا العرض 1500 سلعة والطلب 3000 جنية يبقي السلعة بقت ب 2 جنية.

*️⃣ يعني من المثال دا ببساطة كده؛ طباعة الفلوس بشكل مطلق مش سبب التضخم وزيادة الاسعار؛ لكن طباعة الفلوس أكثر من الانتاج المقابل ليها هو سبب زيادة الأسعار... فلما تسمع طباعة بس كده؛ قبل ما تحكم وتقول حلو ولا وحش؛ اسأل هي نسبة النمو في المطبوع كام والنمو في سلع الدولة او ممكن تقولها الناتج الاجمالي للدولة... فلو لقيت الدولة نمت 3% والفلوس زادت 10% فكده انتا عرفت هيحصل ايه

⬅️ طيب آخر سؤال؛ ايه علاقة الفايدة بالتضخم بقي؟ وليه يقولك التضخم زاد يبقي البنك المركزي هيزود الفايدة؟

*️⃣ نفتكر كده هو التضخم وزيادة الاسعار مفروض بتحصل ليه؟ زيادة الطلب... يعني ناس معاها فلوس كثير فكلها عاوزة تعمل شوبنج وتشتري... فهنا البنك المركزي يزود الفايدة في البنك... زيادة الفايدة بتشجع جزء انه يقولك بلاش بعزقة حط الفلوس في البنك وخد فايدة احسن... فكده المركزي بيسحب السيولة من السوق؛ يخلي الناس تحط فلوسها في البنك بدل ما تشتري.. فيقل الطلب ؛ فبالتالي تظبط معادلة العرض والطلب.

⬅️ طب ما كده الفايدة العالية جميلة؛ ليه بقي الغرب عنده الفايدة 0% و 1% و 2% والكلام دا؟

*️⃣ افتكر كويس ان وظيفة البنوك ايجار الفلوس؛ يعني بتحط عندها فلوسك وتديك ايجار 10% سنوي (الفايدة) وبعدين انا اروح اقولها عاوز أجر منك فلوس فتقولي هدهالك ب ايجار 15% سنوي... اللي هما ال 10% بتاعتك و 5% للبنك... وهو يكسب من الفارق دا.

*️⃣ فلما الفايدة تزيد؛ انتا هتحط فلوسك في البنك وتكون مبسوط؛ لكن صاحب المصنع لما يحتاج فلوس عشان يبني مصنع جديد؛ هيلاقي التكلفة عالية عليه فمش هيستلف فمش هيفتح مصنع جديد.. وفي أصحاب مصانع آخرين هيستلفوا بس هيزودوا الأسعار عشان عاوزين هامش ربح عالي يغطي الفوايد العالية... يبقي كده الوضع هيبقي إما انتاج مش هيتم (فقدان عرض) أو أسعار عالية (تضخم). وفي نفس الوقت زباين أكثر تروح تحط فلوسها في البنك ومش بتشتري ( ركود)

*️⃣ عشان كده الفايدة العالية دي لازم تبقي مؤقته وفقط تسحب الزيادة في الفلوس في السوق؛ وبعدين تقل الفايدة عشان تسهل عالشركات تقترض؛ وكمان متفضلش تسحب سيولة من السوق فتسبب ركود.

*️⃣ الدول الغربية والمتطورة بيكون الوضع مستقر؛ البنوك شبه مش بتدفع فايدة لحد؛ فبالتالي الفلوس مش مكلفة البنك حاجة؛ فعادي يدي قروض ب 2% مثلاً.. وكده اللي بياخد قرض عنده تقريبا فلوس قرض حسن؛ يكاد مش بيدفع فوايد؛ فلما يحتاج هيستلف ويفتح مصانع ويوسع شغله... وكمان تكلفة القرض منخفضة فكده هو مش محتاج يغلي الأسعار قوي ويكون عنده هامش ربح مرتفع (تكلفة الفرصة البديلة / العائد خالي المخاطر يساوي تقريباً صفر)...

بس يا سيدي ودا كان التضخم بالمختصر قوي؛ ولو في اسئلة قولي وإما هرد عليها أو احطها في بوستات قادمة

من الفروقات الجوهرية بين الآي فون والأندرويد

*️⃣ إن المطورين نفسهم حالقين للأندرويد؛ نظام أي حاجة وخلاص بدون اهتمام لا بجودة ولا تقديم نفس المزايا... فكرة دا أندرويد يا عم محدش بيركز

*️⃣ ومش بس الشركات الصغيرة؛ حتي الشركات العملاقة نفس الفكرة ونفس التعامل؛ عندك الفيسبوك نفسه دا... مستخدم iOS يقدر يعرف مين عمل شير للبوست بتاعه؛ يفتح اي بوست هيلاقيه موضح في 50 شير؛ تدوس عليه يقولك فلان وفلان وفلان. وهحط صورة من شكل نفس البوست من تليفون الاندرويد مقارنة بالتليفون الثاني الآي فون

*️⃣ وخد برضك ال ويكيبيديا ؛ كله بيعمل ويدجيت؛ لكن في أبل تلاقيه يقولك تحب يا فندم الويدجيت يكون ايه؛ صورة اليوم ولا حدث في مثل هذا اليوم ولا مقالات مختارة ولا الأكثر قراءة ولا ايه... تروح بقي في الأندرويد تلاقي ويدجيت حقير كده 5*1 فيه لينك لمقال اليوم؛ انتا هتستهبل وعاوز تختار ؛ انتا معاك أندرويد يا كابتن.

*️⃣ دا حتي واتس آب يوم ما ييجي ينزل ميزة؛ تنزل في أبل وبعد شوية يقولك خلاص نديها للأندرويد بالتدريج 😂... حتي لو الميزة نقل البيانات بين الأنظمة... يعني ضافوا خيار نقل الداتا من أندرويد الي iOS الاول وسابوه كده شهر... طيب حضرتك لو معايا iOS وعاوز أروح اندرويد أعمل ايه؟ ايه دا انتا اتجننت دا هاني 😂😂 قال تنقل قال... وبعد بتاع شهر كده قالك خلاص تنزل المرة دي حطوها في أندرويد.

*️⃣ أنا من 5 سنين وأنا محافظ إن يكون معايا آي فون وأندرويد... فارق المعاملة في البرامج والتحديثات كبير... الشركات فعلا مش شايفة الأندرويد غالباً وبتعمل برامج ليه نظام أهو نبقي موجودين وخلاص... ومعروف إن التشتت بتاع أجهزة الأندرويد بين الأحجام والجودة بيكون سبب... بس ساعات فارق المزايا غير منطقي زي موضوع الشير بتاع الفيسبوك... ملوش مبرر.

وعلي فكرة لا جوجل فارق معاها دا ولا شركات الموبايلات ولا حتى المستخدم حاسس بحاجة لإنك لن تفتقد ما تجهل... يعني لو متعرفش إن حاجة موجودة فمش هتحس بإنها نقصاك.

من سنة و 6 شهور و 3 أيام نشرت 2 بوست هنا تحت عنوان "عندما تربح الشركات وتخسر الشعوب"... قولت فيه إن في كورونا لسه ضاربه الكوكب أهي بقالها 4 شهور وفي ملايين الناس بتفقد الوظائف بتاعتهم وملايين بيروحوا تحت خط الفقر ولكن...

*️⃣ ولكن الشركات هتكسب وهتحقق مكاسب ضخمة وهتحقق نمو وكل شيء زي الفل؛ ودا عشان الشركات العملاقة وصلت لمرحلة توحش إن الكوارث مفيدة ليهم؛ هما محتكرين والكوارث هتسبب في زيادة ليهم؛ لإنها ببساطة هتقضي على المنافسين الصغيرين اللي معندهمش حجم عملاق كده يستحمل الكوارث.

*️⃣ وعملت الجزء الثاني من البوست عن أبل وإزاي هى قادرة تحتكر وتتوسع وهتتوسع أكثر... وكان مفروض هيكون الجزء الثالث عن جوجل والرابع كوالكم والخامس مايكروسوفت... بس حصل نقد كبير وهجوم عليا إني شوال بطاطس مش فاهم شيء ودي أزمة كارثية هتدمر الشعوب وتأكل الأخضر والجرجير ووووو... فصراحة قولت اسكت ومكتبتش الأجزاء دي

*️⃣ دلوقتي مر سنة ونص وخد عندك بقى يا برنس.

*️⃣ بالنسبة لشركة أبل فقيمتها السوقية وقت البوست من سنة ونص كانت 1.5 ترليون دولار... إمبارح أبل بقت 3 ترليون دولار.

*️⃣ تقرير ل بلومبيرج قال إن سنة 2021 بتاعة الركود دي ومش عارف ايه؛ أغنى 500 شخص في العالم ثروتهم زادت 1 ترليون دولار وبقى إجمالي ثرواتهم 8.4 ترليون دولار... الترليون دا اللي هو 1000 مليار أو مليون مليون دولار.

*️⃣ ومن الناحية الثانية التقارير المختلفة بتتكلم إن الأخ كورونا تسبب إن في 500 مليون شخص نزل مستواهم المعيشي لطبقة أقل أو تحت خط الفقر. يعني 500 مليون دولار اتبهدلوا إضافه لل أصلاً تحت خط الفقر أو فقراء لوحدهم.

*️⃣ يبقى أنا مكنتش شوال بطاطس لما من سنة ونص قولت إن الشركات وأصحابها بالتبعية هيكسبوا والشعوب هيطلع عين أمها...

*️⃣ والموضوع مكانتش مؤامرة؛ الفكرة باختصار إن المنظومة الاقتصادية العالمية الحالية حافظة؛ في أزمة يبقى نعمل ايه؟ ندلع الشركات عشان تتوسع وتعين ناس؛ فالشركات تتدلع وتنبسط.

*️⃣ وفي نفس الوقت نضخ فلوس للشعوب؛ لكن الشعوب إحنا مربينهم بواسطة الرأسمالية على شيء وهو الترفيه والانفاق الاستهلاكي العنيف؛ فلما نضخ لهم فلوس هيعملوا ايه؟ الفلوس هتتفرتك؛ هتروح لمين؟ لأصحاب الشركات برضك فيتدلعوا وينبسطوا.

*️⃣ الأزمات تخلي وضع السوق وحش؛ فالشركات الصغيرة تتفرم ومتقدرش تكمل؛ فالمنافسة في السوق تقل؛ فمين يفرح وينبسط ويتدلع؟ الشركات الكبيرة.

بس يا سيدي ودي الحدودته باختصار

اللي عاوز المقالات القديمة يعمل بحث في الصفحة او تليجرام 😁 بس اهو مش هحطها 😂😂 غلاسة يا اخي... بقالي سنة ونص مستني قيمة ابل توصل لل 3 ترليون عشان انشر وانتقم... اسود قوي من جوا بن سامي دا؛ شرير 😂😂

لما كنت زمان اسمع عن علامات يوم القيامة إن منها إن هيبقي الرجالة والستات ينزنوا في وسط الشارع... وإن أحسن واحد في الأمة وقتها هو اللي هيروح يقولهم ممكن بس علي جنب.

كنت بقول هو إزاي دا ممكن يحصل؟ إزاي ممكن الناس يتحولوا من بشر عادييين لكده

*️⃣ لكن لما كبرت بدأت اشوف بداية الطريق وهو ملكش دعوة بحد؛ هو انتا اللي هتحاسبهم؛ كل واحد حر؛ سيب الناس في حالها؛ بتبص على غيرك ليك؛ خليك في نفسك؛ هو انتا كامل من العيوب عشان تقول علي فعل حد انه غلط

هو دا بداية الطريق؛ نفس الطريق اللي مشي فيه الغرب

*️⃣ بيسموه الطريق الي الجحيم مفروش بالنوايا الحسنة؛ النية كويسة وهو الخصوصية واحترام الآخرين وعدم التدخل في شؤونهم... النية كويسة... بس مرحبا بيك دخلت الطريق.

*️⃣ عاوز تشوف شوية الطريق هيوصلك لفين؟ عادي الغرب قال زيك من 50 سنة؛ شوف النهاردة وصلوا اخلاقيا وأباحياً لفين... نديك 20 سنة هتوصل للي وصلوا له دلوقتي وتشوف ناس قاعدين يبوسوا بعض في قلب الشارع... وقتها هما هيكونوا خدوا خطوة اكثر وهو احم احم علي جنب في الشارع؛ تحصلهم انتا بعدها.

بس يا سيدي وصلنا للي الرسول قال عليه.

*️⃣ مش مقتنع ان دا الطريق اللي يوصلوا للي الرسول قال عليه؛ حقك طبعا... طز في كلامي... اوصف لي طريق تاني هيوصلك لنفس الحكاية... ولا هتكذب الرسول وتقول دا مش هيحصل؟ الرسول قال يبقي خلصت هيحصل... انا تخيلت طريق؛ يلا قولي لا طريق تاني اللي هيوصل وتخيله وقولي عليه...

*️⃣ المشكلة يا اخي ان ربنا قايل في القرآن عن لعن بني إسرائيل؛ انهم كانوا لا يتناهون عن منكر... يعني حرفيا اتلعنوا عشان كان في حد. بيعمل منكر... والآخرين يقولوا ملناش دعوة هو احنا اللي هنحاسبهم؛ متقولهمش حاجة ومتتدخلش في حياتهم؛ دي حرية شخصية...

*️⃣ المصيبة ان ييجي مسلمين بيفوتوا عالآية دي في القرآن؛ بس كالحمار يحمل اسفارا... معناها ايه معرفش واحنا مالنا دي مش عننا دي عن قوم تاني... واللي يقولهم مينفعش... يقولك يادي التخلف عاوز تمشي كلام حد جه من 14 قرن قال كلام نازله من السماء بواسطة ملاك... علي كلامي أنا؟ لا أنا ليا رأي والخيرة من أمري وأنا أقرر وسيبك من كلام القدامى دا.

تحدبث

الفيسبوك شال الحظر

تم ايقافي 24 ساعة

عندي تعليقين صغيرين علي حوار المدرسة اللي قعدت ترقص دي وتحويلها للتحقيق وايقافها عن العمل ووو... والتعليقين بتوعي مش التعليق المعتاد في البوستات اللي شوفتها.

1️⃣ هو ليه الحساب بيكون عشان الناس اعترضت؟ يعني لو الفعل نفسه غلط؛ فغالبا انتشار الفيديو كان في اوساط المدرسين اولا ثم تدريجي وصل لباقي المجتمع... يعني الإدارة عرفت بيه؛ فلو الفعل غلط فمفروض يكونوا خدوا قرار قبل الانتشار والتعليقات... ولو الفعل عادي؛ فمفروض مش عشان الناس معترضه تعاقب حد على فعل عادي... كده القرارات والتحقيق بيكون عشان الناس وليس عشان الفعل. وهنا كارثة إن الثواب والعقاب يكون نتيجة للضغط وليس إنك عارف الفعل صح ولا غلط

2️⃣ هو ليه الكل يقول المدرسة وايقافها وتحقيق واللي يأيد واللي ينتقد واللي يقول منه لله اللي صورها واللي يدافع عنها وبتوع المرأة يقولوا حقها وناس تنتقد ايقافها وتطالب بالغاء التحقيق وو... طيب حد أخد باله إن قرار التحقيق والايقاف ووو دا طالع فيه 5 مدرسين؛ 4 رجالة و 1 ست... أنا أكاد أجزم إن في ناس متعرفش إن في 4 رجالة في الموضوع... يعني دلوقتي في 4 رجالة برضك لو كانوا رقصوا بمطاوي حتى مكانش الفيديو هينتشر لولا إن فيه ست؛ فلولا وجودها مكانوش هيتلطوا... والمضحك إن الكل برضك بيتكلم عن إن لازم الايقاف والتحقيق عن الست يتلغي وشكرا... ومفيش حد جاب سيرة ال 4 رجالة... يعني ممكن شوية ضغط سياسي كده الست تطلع... والرجالة بقي ملهمش مجتمع فيمينزم؛ أقصد رجالزم يدافع عنهم ولا حتى رجالة هتحط بوست عالفيس بتاعهم يقولوا حرام اتخرب بيت 4 رجالة... ولا أكن في 4 رجالة ملطوطين برضك... المحن بياخد المجتمع الذكوري فيخشوا يدافعوا عن الستات من باب إثبات إننا متحضرين ومش رجعيين وكده... والستات يدافعوا عن الستات من أجل سترونج اندبندت ست... طيب والرجالة... محدش هيدافع عننا يا جدعان.. مفيش جمعيات حقوق الرجالة ليه 😞😞😞... هذا ظلم