مرة كان في 2 ماشييين لقوا حفرة... فالأول قال للثاني بص أنا هردم الحفرة دي بالذهب... فالثاني قاله ذهب ايه يا عم إنتا عبيط.

فالأولاني قاله يعني إنتا عاوز الحفرة تستمر!!! إنتا عاوز الناس تقع فيها؟ إنتا شكلك اللي حافرها أصلها؟ يعني أجي أحل لك المشكلة فتعترض عليا.

نوعية التفكير دي من الإخوه المركوبين فكرياً بنشوفها كل يوم... تيجي تتكلم حتى في التاريخ وتقول عبد الناصر كان وحش... فيرد عليك يعني كان عاجبك الملك وعاجبك الإقطاع والإنجليز...

تقول لحد على رأي في موضوع ما وليكن ديني فهنا يقولك يعني عاجبك الإرهابيين ؛ ولو الرأي الناحية الثانية يترد عليه يعني عاجبك الملحدين.

فلسفة الأبيض والأسود... اعترضت على فعل يبقى إنتا موافق على المضاد تماماً. عارف لو قولت لحد بس الكوبري دا... هيقولك يعني عاجبك الزحمة صح...

بطلوا فلسفة الأبيض والأسود دي... مش لازم الحفرة إما تتردم بالذهب أو تتساب موجودة... خيار تردمها بالتراب عادي دا مش موجود.

إزاي تطور الدين الإسلامي الكونفوشي؟

مش بحب أكتب بوستات دينية لأسباب كثيرة منها إني شايف إن مش أنا اللي أكتب عن الدين (يعني أنا علي قدي ويكون حد أحسن مني) وكمان عشان المواضيع الدينية بتقلب خناقات بالتعليقات

لكن المهم تعالوا نرغي في حاجة؛ اللي عاوز يعتبرها وجهة نظر ماشي واللي عاوز يعتبرها قصة خيالية هو حر:

1️⃣ إحنا ناخد الدين الإسلامي ونقرر نختار المعاملات هي أهم حاجة؛ ونطلع بشعار ونردده في الراديو (الدين المعاملة) لدرجة إن في ناس تفتكره حديث.

2️⃣ بعد ما خلينا (الدين المعاملة) نروح مقصقصين المعاملة دي لشوية نقاط زي العدل وحقوق الحيوان والإنسان؛ جمعيات خيرية وكده... ونقول هي دي المعاملات

3️⃣ المرحلة اللي بعدها نقوم مقارنين بين تعاملاتنا في الدول الإسلامية وبين التعاملات في الغرب؛ وطبعا إحنا قصقصنا التعاملات لنقاط معينة... فهنا هيطلع لنا مصطلح تاني شهير (وجدت إسلاما بلا مسلمين).

4️⃣ بناء علي المعطيات الجديدة بخصوص الدين وإنه بقي لأمور محددة في التعاملات والغرب حالياً أحسن فيها؛ نبدأ نغرس السؤال الأهم (إنتا مسلم ليييه) والسؤال دا يضرب لك شوية نقاط وخد أمثلة :

*️⃣ صحيح هو أنا مسلم ليه؟ دا المسلمين افعالهم بعيدة عن الاسلام؛ وهنا تروح طريق مرحبا بالالحاد.

*️⃣ انتا مسلم ليه؟ يعني هتروح لشخص ألماني أو فرنسي أو ياباني تقوله يبقي مسلم ليه! مهو كده كده بيعمل شوية التعاملات الكويسة دي في حياته يبقي يتحول للاسلام ليه؟ وهنا تروح لحرب ضد فكرة الدعوة للإسلام.

*️⃣ هو أنا مسلم ليه؟ اكيد الخلل في الامور الأخرى اللي في الدين؛ (الدين المعاملة) دي حاجة كويسة والغرب بيعملها بس الأمور الاخري اللي احنا بنعملها دي لكن الغرب مش بيعملها ؛ والغرب متقدم ماديا يبقي الخلل في الأمور دي نلغيها؛ وهنا نطور دين إسلامي جديد أو زي ما بسميه الإسلام الكونفوشي.

5️⃣ وصلنا للإسلامي الكونفوشي؛ نبدأ كل واحد فينا يقول رأيه في الدين من باب هو مقتنع أم لا؛ مهو الدين دا ملوش أحكام وهو مجرد معاملات؛ فلازم نفكر في كل حاجة و (ربنا عرفوه بالعقل)؛ عاوز تعرف كذا حرام ولا حلال؟ شوف إنتا مقتنع إنه حلال ولا حرام؛ يعني مثلاً نقطة خلافية بين الناس وهو تربية الكلاب 🐕 للترفيه؛ في ناس هتقول حلال عشان 1 و 2 و 3 وفي ناس هتقول حرام عشان 1 و 2 و 3؛ انا هنا مش هتكلم علي الحكم الشرعي؛ انا هنا بتكلم عن فصيل ثالث؛ نوع هيقول (ربنا مش ممكن يحرم حاجة "كيوت" كده) وبناء عليه يقرر تبني وجهة نظر الفريق الأول؛ مش عشان الحجة بتاعة الفصيل الأول أقنعته لكن عشان ربنا مش هيقول حاجة كيوت حرام؛ ايه هو ربنا ضد الكيوت في الكون؟ (وربنا يسامحني لو دا تعدي علي الذات الإلهية لكني بوصف تفكيرهم)

6️⃣ بما إن الحاجة تبقي موجود في الدين لما بس تقنعك وتحسها منطقيه فنوصل لمرحلة جديدة؛ لان انا هقتنع بحاجة وانتا بحاجة وكده كل واحد فينا هيكون عنده اصدار خاص من الإسلام؛ وهنا مش بقول خلافات مذهبية زي الأئمة الاربعة وابن حزم وغيرهم؛ لا خالص دا عندنا دين كل واحد يعمل اللي نفسه فيه في أصول مش الفروع.

7️⃣ هنا يبدأ المشاهد من بره يسأل؛ يفرق ايه الإسلام عن اي دين تاني مهو كلهم نفس المبادئ الاخلاقية؛ وكمان متقوليش جنة ونار مهو ربنا هيحاسب بالأخلاق ومفيش دين وأي حد هيعمل شوية المبادئ الأخلاقية هيخش الجنة وطالما كل الأديان فيها نفس المبادئ الأخلاقية يبقى كلهم مفروض هيخشوا الجنة... وغلط أصلاً تفكر إن ممكن حد يخش النار؛ ومش بتكلم عالتكفير خالص نهائي... أنا بقول يكون حد مش مقتنع إن في ربنا فإنتا تقول لا بس ربنا هيدخله الجنة برضك عشان هو عمل المبادئ... مهو مفيش دين خلاص ولا معيار نقيس عليه... المعيار بقى بالحب كده.

8️⃣ فتلاقي بعد كده حد يسأل كذا حلال ولا حرام؛ محدش هيشوف بقى أصول دينية ومعيار ديني ويشوف فتاوي ويعترض عالفتاوي بناء على ثوابت دينية أو متعارضه مع نص قرآني... لا خالص الموضوع هيمشي بالحب وبالقناعات في الدين ككل.

9️⃣ القناعات دي بقى بتيجي منين؟ من التعليم والتربية والإعلام؛ فمع الوقت نبدأ نقنعك بحاجات معينة؛ حرية الشذوذ والزنا وغيره. وإنتا تلقائي تخليها مش متعارضه مع الدين

🔟 وبكده نبقى حولنا الدين لمجرد رأيك ورأي أنا ؛ الشيء اللي مقتنعين إنه صح؛ من الآخر نطبق حرفياً النص القرآني "أفرأيت من اتخذ إلهه هواه وأضله الله على علم وختم على سمعه وقلبه وجعل على بصره غشاوة" ... هتبقى شايف الغلط وحد يقولك دا غلط وأهو من الدين غلط... فبدل ما تناقشه في الدين هتقوله هو منطقي يعني ربنا يقول الشيء دا غلط... لالا مش مقتنع.

أتمنى الفكرة نفسها تكون وصلت؛ ودا مجرد بوست ديني وغالباً مش هيتكرر عشان ميتمش تصنيف الأكونت بتاعي بصبغة دينية وما يتبعه هذا الأمر من حاجات ملناش دعوه بيها... وبعد كده هرجع تاني للكلام عن الاقتصاد والبيزنس بقى اللي بعدنا عنهم شوية.

لكني بجد بقى خانقني فكرة إن الدين اختزل في شوية أخلاق... لو سألت أي مسلم هو الاسلام بيدعوا لإيه هيقولك العدل واحترام الكبير ومساعدة الصغير والعطف على الفقير ونصرة المظلم... مع إن دول مبادئ عامة وعمري ما سمعت عن دين بيدعوا لقتل كبار السن والسرقة والظلم مثلاً... ما كل الأديان كده فرق الإسلام عنهم في ايه؟!!!

بس خلاص ولنا عودة بقى للاقتصاد والبيزنس تاني ودا كان مجرد خروج جانبي مؤقت عن التيار. وبجد أتمنى ربنا يكون وفقني في إني أوصل الفكرة عشان لو موصلتش صح هلبس تهم توديني في داهية وشتيمة وخناقات في التعليقات... ربنا يستر

والله حرقة دم إنك تلاقي تلاقي حاجات حسمت من أكثر من 1400 سنة ولسه مسلمين 2020 بيهروا فيها

بعد ما عم الرسول مات؛ الرسول دعى له ربنا يغفرله وقال صراحة " لا أزال أستغفر لك ربي حتى يردني " فوقتها الصحابة كمان قالوا ما سيدنا إبراهيم دعى لأبوه والرسول أهو كمان بيدعى لعمه وهو مشرك يبقى عادي احنا كمان ندعي لآباءنا الكفار اللي ماتوا

فراح ربنا قايلهم صراحة بقى

*️⃣ ((ما كان للنبي والذين آمنوا أن يستغفروا للمشركين ولو كانوا أولي قربى من بعد ما تبين لهم أنهم أصحاب الجحيم))

وبعدها قال

*️⃣ ((وما كان استغفار إبراهيم لأبيه إلا عن موعده وعدها إياه؛ فلما تبين له أنه عدو لله تبرأ منه؛ إن إبراهيم لأواه حليم))

يعني ربنا قفلها للمسلمين... المشركين والكفار في النار... ومينفعش مسلم يستغفر لكافر حتى لو أقاربه وقال إن سيدنا إبراهيم توقف عن الدعاء لأبوه وتبرأ من أبوه...

الموضوع مش شياكة دي حرااااام شرعاً يعني مش بمزاج حضرتك... دي حاجة حرمها ربنا ومانع المسلمين يعملوها

*️⃣ لكن الإسلام بتاع 2020 اللي الناس ماشيه بيه دا شغال بطريقة وانتا مالك ما يدعوا لهم يا عم.

دول ميعرفوش شيء عن إسلام سيدنا محمد اللي أبسط شيء فيه إنك لو لقيت حد بيعمل فعل ربنا ناهي المسلمين عنه إنك تروح تقوله... ولو شوفت حد بيكذب على ربنا تروح توضح له... لازم تقول دا فرض عليك توضح له... والله بقى هو عاوز يعمل اللي يعمله هو حر بس تبقى عرفته إنه بيعمل فعل ربنا حرمه... مهمتك كده خلصت مهو دورك إبلاغه...

دي أبجديات الإسلام بتاع سيدنا محمد اللي أنا مؤمن بيه... لكن أنا غير مؤمن بالإسلام 2020 دا.. دا أسلام يهودي إسلام كونفوشي أنا معرفوش.

والله كان نفسي البوست بتاع النهاردة يبقى على الدعم في ميزانية 2020 والتغيرات اللي هتحصل في ميزانية وزارة التعليم ووزارة الصحة والزيادة بتاعتهم كام ومحطوطة في أنهي بنود

بس معلش كده البوست هيتأجل لبكره عشان انا بسعى لنشر 1 بوست يومي بس منعاً للإزعاج عشان عارف إن في ناس حاطيني See First.

ألقاءكم بوست بكره إن شاء الله

أمازون الآن في السعودية؛ مصر فيييييين ؟

((( البوست دا حصري هنا وهنشره بعد ساعة في الفيس؛ تمييز لمتابعب تليجرام يعني)))

من كام ساعة سوق السعودية خلاص تحولت وبقت أمازون السعودية... فكده مبقاش فاضل غير سوق مصر تتحول لأمازون مصر

طبعاً محدش عارف الخطوة دي إمتى لكني هحلل وهخمن ايه العقبات والمزايا والعيوب من وصول أمازون... فالكام سطر التاليين مش قايمين على معلومات رسمية لكن تحليل وتخمين شخصي فممكن يكون صح وممكن يكون غلط... كده تمام وصلت؟

*️⃣ عشان تبقى أمازون فالطبيعي بيكون في شحن دولي... يعني يتوفر إنك تقدر تشتري من أمازون أمريكا مباشرة من جوا أمازون مصر... دا الوضع في أمازون الإمارات وأمازون السعودية الجديد وحتى أمازون الصين الفاشل الضعيف وحتى لو أمازون أوروبا برضك... الخلاصة لازم يبقى في Amazon Global Store... ودا اتوفر في سوق السعودية قبل ما يتحولوا إلى أمازون. وهو غير متوفر لسه في مصر.

*️⃣ طيب ايه اللي يمنع أصلاً بقى إن أمازون توفر Amazon Global Store في مصر؟ الإجابة مفيش شيء "يمنع" بس هى بتكون سلسلة من العقبات؛ مفيش سبب منهم بيكون هو الرئيسي لكن مجموعهم سوا بيكونوا السبب... وممكن نلخصهم بسرعة للي مش متابع.

في البداية كده راجع بوست الكورونا والتجارة الإلكترونية في مصر اللي كتبته الأسبوع الماضي في اللينك

https://bit.ly/2Y8lz6L

واللي مكسل يرجع أو شايف البوست دا طويل فمش هيروح يقرى بوست طويل تاني فخد الخلاصة أهى وكمان فوقها نقاط جديدة

*️⃣ السوق المصري متخلف جداً في التجارة الإلكترونية وتصنيفه 102 من 152 دولة في تصنيف الأمم المتحدة. وفي دول أفريقيه سابقه مصر زي بتسوانا والسنغال وغانا وتنزانيا والمغرب ونامبيا وكينيا ونيجيريا وجنوب أفريقيا ومورشيوس وتونس وليله كبيرة قوي سعادتك... ومرة ثانية دا تصنيف الأمم المتحده مش تصنيف محمد سامي عشان اللي هيشتم يعني.. تقدروا تنزلوا التقرير باللينك دا
https://bit.ly/3d66eb7

*️⃣ تصنيف التجارة السابق حاطط السعودية 49 يعني أفضل من أفضل دولة افريقية "مورشيوس 58".. أما الإمارات فـ 28 وكده بالمناسبة تصنيف الإمارات أحسن من دول شهيرة زي لوكسمبرج 29 وأسبانيا 33 وماليزيا 34 وإيطاليا 36.... أظن كده وضح ليه أمازون راحت الإمارات ثم السعودية... وممكن كده تتخيل مصر فين.

*️⃣ أمازون لما تحب تعمل Amazon Global Store هتحتاج بعض الأمور في منها اللي ممكن يعدوه زي استقرار سعر الصرف واللي مش مستقر في مصر... لكن في نقاط قاتلة زي الجمارك.

*️⃣ طبقاً للبنك الدولي تقرير التجارة عبر الحدود فالجمارك المصرية تحتل المركز 171 في تقرير فيه 188 دولة... يعني إحنا من اسوء 20 جمارك في كوكب الأرض ودا لينك التقرير من موقع البنك الدولي https://bit.ly/37MUF7X ومعلش هصدمك وأقولك إن دولة فيها حروب مستمرة زي الصومال تصنيفها 166 أحسن من مصر.

*️⃣ رئيس مصلحة الجمارك يوم 20 فبراير أعترف بترتيب مصر السيء وإن الجمارك فيها مشكلة. وبناء عليه أعلن خطوات جديدة هيتم تفعيلها منها شركة MTS هتمسك تنسيق وتطوير الجمارك وبالفعل من يوم 15 أبريل الشركة اشتغلت بمطار القاهرة (قبلها كانت موجودة) والحمد لله الجمارك اتطورت واتقفلت ومفيش حد تقريباً بيخش له شحنات خلاص والبضاعة نقصت في الأسواق فالأسعار غليت.. اللي متابع أي سلعة مستورده زي موبايلات وكومبيوترات وأكسسواراتها (دا مثال بس) هيلاقي في نقص في الأسواق حالياً والأسعار بتزيد. ولو حتى أنتا طالب كمامة زي فاين جارد فشركة MTS مش هتدخلك الكمامة بتاعتك. الشركة بتطبق سياسة قفل الجمارك خالص وبعدين نطورها ونفتح على نظافة إن شاء الله وربنا يكرمهم.

*️⃣ تيجي بقى شركة زي أمازون عاوزة تقلب سوق مصر إلى أمازون... تيجي تشغل المتجر العالمي... تلاقيهم مش عارفين امتى الشحنة هتوصل للعميل ولا عارفين سعر الصرف هيكون ايه وقت الجمارك ولا عارفين أي حاجة... دا يخلي أمازون تتأخر وتخاف على سمعتها..

*️⃣ مش معنى دا إن أمازون هتغلب؛ أمازون شاطرة في التعامل مع الحكومات ومتوقع إنها تعمل أجتماعات مع مسئولين مصريين دا لو مكانتش عملتها لتسهيل شغل أمازون. بس غالباً هتاخد شوية وقت محترم فمش متوقع تغيير في 2020 خالص.

لكن إن آجلاً أو عاجلاً أمازون هتيجي وهتدخل مصر... وهنا السؤال التأثير بتاعها عامل إزاي؟

تعالوا نقسم التأثير دا لـ 4 اتجاهات ونتجاهل واحدة وهى المنافسين زي جوميا ونون لإنهم مش فارقين معانا... ونبص عالـ 3 الآخرين:

1️⃣ العملاء : دول أكثر فئة هتبقى مبسوطة من وجود أمازون؛ ملايين المنتجات الجديدة هتلاقيها متوفرة من أمازون أمريكا مباشرة؛ تلاقي سعر نهائي مكتوب لكن تشتري تدفع تستني شوية المنتج هييجي لك. فالخلاصة منتجات اكثر وأسعار أفضل وخدمة عملاء أحسن.

2️⃣ التجار: الناس اللي هتزعل؛ من ناحية عشان المنتجات أمازون هتعرف تستوردها أرخص منهم وتنافسها؛ ومن ناحية أخرى لإن أمازون شركة احتكارية من الطراز الأول؛ هى عندها فرق مسئولة عن تتبع المشتريين ومعرفة اشتروا ايه وبحثوا عن ايه؛ والمنتج اللي يلاقوه بيتباع كثير تروح أمازون مشترياه بنفسها وتبيعه بسعر أقل بكثير؛ فأمازون فعلياً مش هتاخد عمولة من نفسها (نظرياً بتاخد) وكمان أمازون مش هدفها الربح قد الدعايا والانتشار والسيطرة والقضاء على المنافسين. فالخلاصة كثير من التجار هياخدوا كتف قانوني من أمازون... وبالمناسبة دا شغال حالياً من سوق لكن لسه تجربة Lite يعني.

3️⃣ الحكومة: أمازون شركة صديقة وعدوه برضك للحكومات؛ فمن ناحية أمازون بتجمع الضرائب على المبيعات VAT من كل عمليات الشراء اللي بتم عليها في كل الدول وبتديها للحكومات؛ وركز معايا دي ضريبة VAT يعني اللي بيدفعها العميل... أمازون هتلمها وتسلمها للحكومة وهى يعني دافعه شيء من جيبها... أما بقى الأرباح بتاعتها اللي مفروض خاضعة لضريبة الارباح التجارية والصناعية 22.5% فأمازون مش بتدفع شيء. بتخرج كل أرباحها مصاريف وتخرج صفر؛ وحتى في أمريكا نفسها أمازون مش بتدفع ضرائب فيدرالية عالأرباح... لكن عامة الحكومة مهتمة حالياً بالضرائب عالشعب VAT وهى بقت مصدر الضرائب الأساسي أما ضرائب عالشركات وأرباحها فنسبتها بتقل سنة بعد سنة من إجمالي حصيلة الضرائب.

طولت عليكم بس دا المختصر كمان

زي النهاردة 16 يونيو 1956 كان الجلاء...

بالمناسبة دي أنا هعيد نشر بوست قديم كتبته في 2017... وهنقله كوبي بيست مع تنقيحات وتوضيحات

إزاي خرج الانجليز من مصر 🤔🤔؟!!

دا سؤال كان شاغلني من فترة طويلة؛ ايه اجبر الانجليز عالخروج من مصر؛ محصلش موقعة حربية بينا وبينهم ولا ميليشيات وحرب عصابات ضخمة زي الجزائر 🇩🇿 ولا مقاطعة شعبية مهولة زي الهند 🇮🇳 ولا أي حدث ضخم فإزاي حصل بعد الإطاحة بالملك إن الضباط الاحرار قالوا لهم فجأة سيبوا مصر فمشيوا!!!

*️⃣ القصة بدأت لما الإنجليز دخلوا مصر أيام عرابي 1882 ووقتها الشعب كان مدجن فقبل عادي بوجودهم (نفس الشعب اللي كان رفض دخول الفرنسيين قبلها ب 80 سنة) واستمر الإنجليز تحت مسمى الوصاية على مصر لغاية ما جت سنة 1922 اعترفوا باستقلال مصر لكن تحت وصايتهم برضك.

*️⃣ استمرت محاولات الحكومات المصرية إقناع الإنجليز بالخروج وإعطاء مصر الاستقلال الحقيقي لغاية معاهدة 1936 اللي كل اللي درسناه عنها في المدرسة إنها كانت اتفاقية دفاع مشترك بس؛ لكن كان فيها بنود بتقول الانجليز يخرجوا من مصر كلها عدا قواعد حول قناة السويس لحمايتها لمدة 20 سنة يخلصوا في 1956.

*️⃣ هوب قامت الحرب العالمية ومصر منفذتش بنود مساعدة الانجليز فحصل "تثبيت" الملك فاروق الشهير بمحاصرة القصر الملكي سنة 1942 وتم اجبار مصر عالحرب في صف الحلفاء.

*️⃣ بعد الحرب ما خلصت راحت مصر مباشرة قالت للانجليز نفذوا البنود وانسحبوا من مصر وبالفعل خلال أعوام 46-47-48 انسحب الانجليز من كل القواعد في مصر في كل أرجاء مصر عدا منطقة قناة السويس.

*️⃣ جت حرب 48 مصر والجيش المصري خسر.. اللي ميعرفوش كثير إننا مش بس خسرنا بل تم عمل مطاردة من الجيش الإسرائيلي لينا وإسرائيل دخلت جوا سيناء؛ فالحكومة المصرية راحت للجيش الانجليزي في القناة وقالت له بينا اتفاقية دفاع مشترك 1936 ومصر بتتعرض للهجوم فلازم تساعدونا ولازم تضربوا الإسرائيلين؛ لكن وقتها الانجليز محركوش قواتهم لكن بعتوا برضك إنذار للجيش الإسرائيلي إنه ينسحب وبالفعل انسحبوا لكن اخدوا ام الرشراش. وبالمناسبة وقتها الملك فاروق طلع قرار بقفل مضيق تيران أمام البحرية الإسرائيلية. وظل الإغلاق دا شغال لغاية ما الإسرائيلين أجبروا عبد الناصر سنة 1957 على إلغاء قرار فاروق وفتح الملاحة مقابل الخروج من سيناء. وناصر وافق بس دا مش موضوعنا.

*️⃣ بعد حرب 48 الحكومة رجعت تاني للمفاوضات مع الإنجليز والمرة دي طلبوا خروجهم كمان من قواعد قناة السويس وإعطاء مصر الاستقلال التام.

*️⃣ بدأت بالفعل سنة 1950 واستمرت سنة المفاوضات لكن الانجليز تعنتوا ورفضوا طلب الحكومة المصرية وقالوا لها مش هنخرج من القناة؛ فالحكومة رداً على كده حصل الموقف الأخطر تاريخياً.

*️⃣ في اكتوبر 1951 اعلنت الحكومة المصرية الغاء معاهدة 1936 وتجميد أي مفاوضات وإعلان الإنجليز قوة احتلال رسمية لمصر. عارف إنكم هتقولوا إزاي يعني مكانوش قوة احتلال.

*️⃣ قبل الالغاء كان وجود الانجليز في القواعد يعد قانوني باتفاق بينهم وبين حكومة مصر يعني مش احتلال ولا قاعدين غصب عننا رسمياً؛ لكن بالالغاء بقوا يعتبروا قوة احتلال.

*️⃣ لما بقوا قوة احتلال فهنا بدأ الفدائيين بمهاجمة القواعد بكثرة ووتم إصدار أوامر سرية من الحكومة للشرطة المصرية بمساعدة الفدائيين سراً واستمر الوضع دا لمدة 3 شهور.

*️⃣ في يناير 1952 أعلن قائد الجيش الانجليزي في مصر أن الحكومة والشرطة بتساعد المقاومة وحرك قواته ودخل الإسماعيلية وطلب من مدير الأمن والمحافظ الاستسلام وهنا حصلت الموقعه الشهيرة بين الشرطة المصرية والانجليز يوم 25 يناير ومن هنا جاء عيد الشرطة.

*️⃣ بعد الاحداث دي غرقت مصر في فوضى 6 شهور واقالات متتالية لحكومات ثم تم الاطاحة بفاروق وجه الظباط الاحرار

*️⃣ مع وصول الظباط الاحرار أعلنوا مواصلة تنفيذ نفس الطريقة للحكومة السابقة لفاروق وهى المفاوضات لكن في نفس الوقت نسيب برضك الفدائيين. والأمر فضل يزيد وبقي شبه يومي الاعتداء (مش شرط قتل لكن اي نوع اعتداء).

*️⃣ هنا هدد قائد الانجليز في مصر للمرة الثانية بتكرار نفس فكرة الهجوم بتاع الاسماعيلية؛ لكن الحكومة المصرية تجاهلته تماماً وتفاوضت مع إنجلترا مباشرة؛ ولسبب ما قائد الانجليز منفذش التهديدات وحكومة بريطانيا أعلنت موافقتها على تنفيذ بند معادة 1936 وهو الخروج من مصر بعد 20 سنة

*️⃣ وزي النهاردة من 64 سنة خرج آخر جندي إنجليزي من أرض مصر

الانسحاب ومفاوضاته بدأوا من العهد الملكي لكن اتنفذت في عهد الظباط الاحرار.

دي خريطة توضح مراحل انسحاب القوات الإنجليزية من مصر من سنة 1946

من أكثر الفروقات الأساسية بين نظام iOS والأندرويد هو إن أبل بتعرف تدير كويس قوي منظومة الطاقة في الجهاز؛ وعشان كده تلاقي عدد ساعات عمل الاي فون بالنسبة لسعة البطارية أكبر من الأندرويد؛ وخد بالك بنتكلم في النسبة؛ يعني لو جبنا اي فون واندرويد نفس سعة البطارية هتلاقي بنسبة 99% الاي فون هيقعد فترة أطول.


*️⃣ السبب الرئيسي لدا هو إن ابل بتراقب بشكل عنيف أي حاجة بتستهلك البطارية وخاصة في الخلفية؛ عشان تسمح لبرنامج يشتغل في الخلفية (يعني خرجت منه وروحت برنامج تاني) لازم يكون في سبب قوي؛ بينزل حاجة أو بيكمل مهمة محددة ومجرد يخلصها أبل بتوقفه.

أنا بقي مش كاتب البوست دا عشان نتكلم عن أبل وجوجل؛ معلش صدمتكم ياللي رايحين التعليقات

#️⃣ البوست دا عن البشر؛ أيوا عن البشر يا جدعان؛ عن بطاريتنا احنا.

كل واحد فينا عنده بطارية جواه وتنام بالليل تشحنها وتصحي تستخدمها وفكر معايا في استخدامك ليها كده

*️⃣ لو منمتش كويس فكده أكنك شلت الشاحن قبل 100%؛ هيشتغل معاك جسمك بس مش هيكمل اليوم.

*️⃣ الموبايلات عندها برامج في الخلفية؛ احنا كمان كده؛ لما تكون متخانق فانتا بتشغل برامج في مخك تستهلك طاقتك؛ لو بتركب مواصلات صعبة فبتستهلك طاقتك؛ لو عربيتك قديمة بتستهلك طاقة برضك منك.

*️⃣ النقاط اللي فاتت دي اسمها الاستهلاك الخفي؛ يعني لما تيجي تلاقي نفسك مرهق هتقول محتاج أنام أحسن؛ محتاج أقلل شغل وهكذا؛ لكنك مش هتاخد بالك خالص من نقاط بسيطة قوي زي عربيتك.

*️⃣ موقف شخصي حصل معايا وهو ان عربيتي مؤخرا كنت بجددها فاستلفت سيارة موديل 2019 خاصة ب صديق عزيز وبدأت اتحرك بيها؛ لاحظت حاجة غريبة وهو اني بروح مشاوير أكثر وبلاقي نفسي بوصل فايق.

*️⃣ لما قعدت ركزت مع نفسي لقيت ان سيارتي القديمة بتسحب من طاقتي في التركيز في السواقة والجو الحر وساعات أعطال مفاجئة والتركيز لان ودني بقت متدربة تلقط أقل صوت يظهر بحيث ارصد المشكلة مبكراً

*️⃣ فلما سوقت عربية حديثة الملفات دي وقفت شغل في مخي؛ مش محتاج افكر يا تري هتعطل او ايه الصوت دا وتفاصيل كثير وit Just Work ؛ فدا دون أن أدري وفر لي طاقة كانت بتتسحب سراً طاقتي اليومية.

*️⃣ فهنا بدأت أفكر؛ تخيل حياتك لما تلاقي طاقة بتهدر عشان توصل الشغل وطاقة في قلق ليرفدوك لو شغلك فيه تعثر وطاقة مهدرة في القلق علي مدارس أولادك وعلاجهم ووو كمية طاقة رهيبة ضايعه؛ فيبقي الطاقة اللي فاضله لحياتك وتطويرها عشان تخليها أحسن قليلة.

في دول بتحاول توفرلك الطاقة المهدرة بحيث تستغل الطاقة كلها في الانتاج والتطور؛ وفي دول تانية بتلاقيها تستنزف طاقة مواطنيها في التفكير في قاع هرم ماسلو.

#️⃣ مؤخراً أنا كتبت بوستات كثير وكنت بحاول مش بس أرد علي كل تعليق لكن كمان أشوف مين شير البوست ولو حد عنده سأل أرد عليه؛ بس البوستات اللي كتبتها اخر 10 ايام أخدت ما يقارب 3000 شير؛ فدا استهلك طاقة مهولة مني ومقدرتش أرد عالجميع

وفي عشرات الرسايل المرسلة ومعرفش أرد عليها لسه

المشكلة إن طاقتي استنزفت بشكل كبير؛ واستهلكت في الردود مش قراية وتعلم جديد؛ والقاعدة الأساسية هي عشان تكتب لازم تقرأ؛ أنا محتاج ارتاح عشان اشحن البطاريات بتاعي؛ هقلل شوية وتيرة البوستات عشان ألحق اشحن وكمان اعرف اتعلم جديد؛ وكمان عشان شغلي ميحصلش تأثير ضار عليه

مش بقول اني هوقف لكن شوية هتقل الوتيرة بس وهترجع تاني


*️⃣ ونصيحة لكل واحد شوف ايه بيستهلك طاقتك اليومية من غير ما تشعر وحاول توقفه لو قدرت.

المصادر دايماً بتكون أحسن طريقة تدلل إن كلامك صح؛ لكنها برضك أحسن طريقة لخداع القارئ

ببساطة تخيل سنة 2200 واحد بيشرح لآخرين زمنا فقالهم حصل كذا وكذا وكذا

والمصادر كتاب كذا لمصطفي بكري وكتاب كذا لاحمد موسي وكتاب كذا لتوفيق عكاشة

الناس زمانها مش عارفين مين دول لكنهم معاصرين للأحداث فيصدقوا

دي بقي أشهر خدعة للكذب والتدليس؛ ييجي يقولك حاجة وتستغربها فيقولك المصدر كتاب كذا للكاتب فلان بن فلان بن فلان

فهنا تحس بقوة كلامه ومصداقيته؛ مع ان فلان بن فلان دا كان مصطفى بكري زمنه

خدوا بالكم من الخدعة دي لما تقرأوا التاريخ

ولما أرجع اكتب بوستات طويلة هعمل ان شاء الله بوست ضخم ازاي تخدع القارئ سواء بوست اقتصادي أو سياسي أو تاريخي وطبعاً ديني؛ بحيث تعرفوا اشهر الحيل؛ يمكن أنا مرة أغلط واستخدموا فتاخدوا بالكم وتحدفوني بالطوب 😔😔

مصر 🇪🇬 أعلنت فشل الجولة مش فاكر رقم كام في مفاوضات سد النهضة ولذا قررنا نقل الملف لمجلس الأمن والشكوى هناك ويا رب نعرف نلحق ناخد قرار ضدهم عشان فاضل 10 أيام علي بداية ملئ خزان السد 🥤.


المهم السؤال المعتاد هو إحنا هنضرب السد🤔؟

لو الهدف الرد العسكري فأنا واثق في قدرة الجيش بتاعنا علي ضرب السد خاصة مع تسليحنا المرتفع مؤخراً (رقم 3 في واردات السلاح عالمياً) لكن مش معنى القدرة إن يبقي في إمكانية لان في فارق بين Ability و Capability.

⛔ لان عشان دولة تاخد إجراء عسكري ⚔ فلازم حسابات كثير؛ والكام سطر القادمين هشرح شوية حسابات وأكيد في تفاصيل أكبر إحنا منعرفش عنها حاجة؛. بس هدفي من الشرح نبص لل Big Picture وخاصة إن العقلية المصرية التقليدية بتبص لدولة أفريقيا إنهم شوية ناس بدائيين ملهمش في حاجة وإننا متفوقين في كله

ف خد فكرة عن تعقيدات الوضع في أثيوبيا وعلاقتها الدولية

*️⃣*️⃣دول مؤثرة*️⃣*️⃣

*️⃣ الصين 🇨🇳 : أكبر شريك تجاري لأثيوبيا 🇪🇹 ويقال إنها مقرضه إثيوبيا 🇪🇹 16 مليار دولار وكذلك هي ممول خط السكك الحديد الأثيوبية الجاري تطويره وكذلك شبكة الطرق؛ مولدات الكهرباء الخاصة بسد النهضة من الصين؛ وتعتبر أثيوبيا رجل الصين في شرق القارة ضمن مشروع (الحزام والطريق) الصيني الشهير.

*️⃣ أمريكا 🇺🇸 : حطيت أمريكا بعد الصين 🇨🇳 لسبب رئيسي وهو إنك تعرف نفوذ الصين فين؛ وتعرف إن أمريكا 🇺🇸 مش هتسيب الصين تلعب في منطقة؛ حالياً أمريكا بتزود التقارب مع إثيوبيا 🇪🇹 عبر تمويلها من المؤسسات الدولية (هقولها تحت)؛ وبالمناسبة أمريكا هي صاحبة فكرة سد النهضة من الخمسينات. وأثيوبيا 🇪🇹 تعد أكبر متلقي للمساعدات الاقتصادية من أمريكا في القارة الأفريقية ورقم 3 في العالم بعد أفغانستان 🇦🇫 والعراق 🇮🇶.

*️⃣ إيطاليا 🇮🇹 : المحتل السابق لأثيوبيا أثيوبيا 🇪🇹 وأحد أكبر 5 شركاء اقتصاديين لها خلال آخر ربع قرن؛ وأثيوبيا تضم أكبر عدد مدارس ومعاهد ايطاليه في قارة أفريقيا. وشركة ساليني الايطاليه هي مصمم ومهندس ومقاول السد الرئيسي.

*️⃣ فرنسا 🇫🇷 : مكانتش العلاقات قوية قوي لغاية وصول آبي أحمد للحكم؛ لكن في 2018 زار آبي فرنسا ثم رد له ماكرون الزيارة في 2019 ووقعوا سلسلة اتفاقيات اقتصادية وعسكرية ومنحت فرنسا إثيوبيا 🇪🇹 100 مليو يورو؛ وبالمناسبة أثيوبيا الحبيسة (بدون بحر) طلبت من فرنسا 🇫🇷 بناء اسطول بحري ليها وآه زي ما قريت؛ يبقي أثيوبيا عاوزة أسطول يقعد في جيرانها الساحليين (الصومال وأريتريا وجيبوتي) اللي هما حاليا في حلف الصين وبتعمل لهم مواني (الصين بتبني أول قاعدة عسكرية بحرية ليها في جيبوتي 2017 وهدفها حماية السفن اللي هتجيب البضايع اللي تتنقل بخطوط السكة الحديد اللي فوق قولت لكم ادت اثيوبيا قروض عشان تعملها ؛ اربطوا المواضيع ببعض وشوفوا الصورة الكبيرة؛ اه في صحيح جارة رابعة بحرية لأثيوبيا وهي كينيا 🇰🇪 اللي في اشاعات ان الصين اخدت ميناء مومباسا بسبب عجز كينيا عن سداد القروض ). بالمناسبة في شركات فرنسية مساهمة في بناء السد

(((شكلي هكتب لكم مقال عن الصين بتعمل ايه في القارة السمراء بتاعتنا)))

*️⃣ إسرائيل 🏴‍☠️ : العلاقات الإثيوبية الإسرائيلية قوية جدا؛ ففي البداية يهود الفلاشا هم يهود أثيوبيا وفي حاليا 140 ألف منهم بقوا مواطنين (درجة ثانية وفي تمييز عنصري ضدهم) في اسرائيل وفي مشروع قرار صدر في اسرائيل 2003 لنقل كل يهود اثيوبيا الباقيين ؛ وضيف معاهم مساعدة اسرائيل العسكرية ليهم في حربهم ضد إريتريا 🇪🇷 ويقال في فرق من الجيش الاثيوبي اسرائيل هي اللي اسستها ؛ وكمان هي اللي حدثت لهم طائرات سلاح الجو القديم بتاعهم ؛ وخلال آخر سنتين زار نتنياهوو أثيوبيا والعكس وقيل إن هناك دفاع جوي اسرائيلي حول السد لكن اسرائيل نفت الكلام دا؛ ضيف مع ما سبق كمااان العلاقات التجارية وتعاونهم في مشاريع المياة والري ومذكرة التعاون اللي مضوها في 2016 وغيرها... أثيوبيا معروفة بإسم بوابة اسرائيل لقارة أفريقيا.

*️⃣*️⃣*️⃣ مؤسسات دولية *️⃣*️⃣*️⃣

*️⃣ ديسمير 2019 صندوق النقد الدولي يقرض اثيوبيا 2.9 مليار دولار
*️⃣ ديسمير 2019 البنك الدولي يقرض أثيوبيا 3 مليار دولار
*️⃣ ديسمير 2019 مجموعة (شركاء تنمويين غير معلنين) تقرض أثيوبيا 3 مليار دولار
*️⃣ حاجة ثانوية فأبي أحمد واخد نوبل للسلام فدا بيدي وهم كاذب في الرأي العام العالمي عن مصداقيته.


*️⃣*️⃣*️⃣*️⃣ دول إقليميه *️⃣*️⃣*️⃣*️⃣

*️⃣ السودان : أثيوبيا هي اللي عرفت تعمل وساطة والوصول لشكل نظام الحكم الحالي في السودان.

*️⃣ الاتحاد الافريقي : مقر الاتحاد الافريقي في أثيوبيا.

*️⃣ الإمارات 🇦🇪 والسعودية 🇸🇦 : فاكرين فوق القروض بتاعة النقد والبنك الدولي والشركاء ؛ المبالغ دي أعلن عنها آبي أحمد يوم 13 ديسمبر 2019 علي حسابه في تويتر؛ وفي نفس التغريدة قال ونشكر السعودية 🇸🇦 والإمارات علي دعمهم أو بصوا دا نص كلامه كوبي بيست

نص التويته يوم 13 ديسمبر 2019

The support is focused on the three pillars: Macro-economic, Structural & Sectoral reforms. The pledge does not include additional reform financing from the World Bank ($3 billion) and from IMF ($2.9 billion). The UAE and Saudi Arabia’s support is also greatly appreciated. 2/2

مش هطول عليكم لكن عاوزكم تفكروا كده؛ لو ضربنا السد؛ الاقتصاد الإثيوبي هيتدمر؛ استثمارات الجماعة اللي فوق دول هتبوظ؛ فهل هيسمحوا لنا؟

*️⃣ أثيوبيا لعبت لعبة صايعه؛ عملت شبكة علاقات دولية مع نفس أصدقائنا؛ ودا سلاح ذو حدين؛ لانك برضك ممكن تطبق شغل العيال وتقول لأصدقاءك يا أنا يا إثيوبيا 🇪🇹 بس هل هنقدر؟ 🤔

ربنا يستر ويا رب ننجح في مجلس الأمن 🇺🇳 ونعرف نطلع قرار أممي بإدانة إثيوبيا 🇪🇹 مع إن شبكة علاقاتها دي إما هتعطل القرار أو هتطلع القرار وترمية في الزبالة 😔 ؛ بس ممكن يكون احنا عاوزين كده يعني قرار يترمي عشان تقول خلاص عملنا اللي علينا فخلاص نضرب؛ عارف إن دا خيال بس ارجوكم سبوني أحلم خاصة ان شكوتنا لمجلس الامن بنطالبه يجبر أثيوبيا تقعد تتفاوض معانا.

ربنا يستر علينا وربنا يكرم الحكومة وتنجح عشان المرة دي مش هنعرف نحاسب عالمشاريب عشان المشاريب محتاجة ماية 😔.

تحديث : دا نص شكوي مصر لمجلس الأمن وفيه بنطالب المجلس يجبر اثيوبيا تقعد تتفاوض معانا.


أعلنت جمهورية مصر العربية اليوم الجمعة الموافق ١٩ يونيو ٢٠٢٠ أنها تقدمت بطلب إلى مجلس الأمن بالأمم المتحدة حول سد النهضة الأثيوبي تدعو فيه المجلس إلى التدخل من أجل تأكيد أهمية مواصلة الدول الثلاث مصر وأثيوبيا والسودان التفاوض بحسن نية تنفيذاً لالتزاماتها وفق قواعد القانون الدولي من أجل التوصل إلى حل عادل ومتوازن لقضية سد النهضة الإثيوبي، وعدم اتخاذ أية إجراءات أحادية قد يكون من شأنها التأثير على فرص التوصل إلى اتفاق. وقد استند خطاب مصر إلى مجلس الأمن إلى المادة ٣٥ من ميثاق الأمم المتحدة التي تجيز للدول الأعضاء أن تنبه المجلس إلى أي أزمة من شأنها أن تهدد الأمن والسلم الدوليين.
- - -

بين أبل والأندرويد

بالرغم من إني في إجازة شبه مرضية راحه من الكتابة لكن ساعات بيحصل أحداث مستفزة ليا كده فبضطر أرجع شوية أكتب.

اللي متابعني جديد فأنا آه حالياً شغلي الأساسي هو البيزنس بتاعي دكان تك- DokkanTech لكن قبلها كان شغلي الأساسي الكتابة في مجال الآي فون من سنة 2011. فبحكم العادة لازم أكتب بقى.

1️⃣ أبل بتقلد الأندرويد ولا هما الإثنين بيقلدوا السيديا؟

أبل أعلنت إمبارح عن دستة مزايا موجودة بالفعل في الأندرويد؛ لكني بفضل دائماً أقول إن أبل والأندرويد بيقلدوا السيديا... للي ميعرفش فأبل لما نزلت الآي فون في 2007 مكانش في متجر برامج؛ فجه واحد اسمه جاي فريمان عمل ستور اسمه السيديا وظهر عالم الجيلبريك.. السيديا كانت وظيفته إن البرامج اللي أبل مش سامحه بيها هو يخلي المبرمجين ينزلوها عالآي فون.

*️⃣ إمبارح أبل خلت المكالمات تظهر فوق بدون ملئ الشاشة عشان متقاطعكش... الكل قال دا تقليد للأندرويد لإنها في الأندرويد من إصدار 7 سنة 2016 بل وقبلها بسنتين أظن في "روم" كانت منزلاها. طيب ايه رأيكم إن الميزة دي أنا كنت بنزلها في 2010 عالآي فون 3G بتاعي وقتها من السيديا... يعني شركات الأندرويد نسختها في 2014 ثم جوجل حطتها رسمي 2016 وجت أبل حطتها في 2020... وبقت أبل واخداها من الأندرويد... الإثنين أصلاً واخدينها من السيديا.

*️⃣ نسيبنا من المزايا الجديدة ونروح لميزة قديمة.. مركز التحكم CC أو Control Center ودا اللي منه تشغل الواي فاي والبلوتوث وكده... دي أبل ضافتها في iOS 7 في 2013 في حين الميزة موجودة بالأندرويد من أندرويد 2.2 في 2010... الميزة دي أصلاً من 2008 في السيديا تحت اسم Sbsettings نزلت النسخة الأولى النهائية في 2008 والنسخ التجريبية نزلت قبل ما يبقى في موبايل الناس بتشتريه اسمه أندرويد أصلاً... راحت جوجل نسختها في 2010 وحطتها في الأندرويد وجت أبل نسختها في 2013 فاتقال إنها بتسرق من الأندرويد.

طيب السيديا فين يا جدعان؟ 🤔 🤔 يعني لو مشينا باللغة الشعبي... حرامي سرق من حرامي. هل ينفع الحرامي الثاني يقول للأولاني دي بتاعتي إنتا سارقها مني؟ الوحيد اللي ليه الحق هو صاحب المنتج الأصلي هو اللي يقول غير كده "يا عزيزي كلنا لصوص".

الناس الجديدة في عالم التقنية مش هتكون فاكرة كلامي بس اللي استخدم الآي فون في فترات 2008-2011 فاكر كويس السيديا وهيلاقي لغاية النهاردة مزايا أبل وجوجل بينزلوها كانت أدوات عندهم زمان... هو طبعاً اتحسنت تصميم وكفاءة دا فارق 10 سنين لكن تظل فكرة من السيديا أصلاً.

----------

2️⃣ أبل لسه هى Market Leader

أهو شوفتم الضجة عالنت وبوستات الترقية دي بتقول إن لسه عالم السمارت فون أبل هى لا تزال الماركت ليدر... الماركت ليدر هو الشخص اللي السوق كله مركز معاه وبيشوف ايه الجديد عنده سواء لتقليده أو السخرية منه ومحاولة تسويق نفسه إنه كان عنده المنتج قبله... اللي عنده بيزنس فاهم قصدي كويس واللي ملوش في البيزنس بص يا سيدي:

*️⃣ من أسبوع جوجل أعلنت رسمي عن النسخة التجريبية من أندرويد 11؛ تعرف ايه عنه؟ الأستاذ اللي هناك يعرف ايه عنه؟ طيب الأنسة اللي قاعدة سمعتى أصلاً الخبر؟ طيب الحاج اللي ماسك الموبايل تقدر تقولي 3 حاجات جديدة فيه سواء بقى جديدة بجد أو منقوله من سامسونج أو حتى أي شركة ثانية... حد شاف بوستات مدح؟ طيب بوستات تريقة؟ حد يعرف أي شيء؟ حد مهتم أصلاً؟

*️⃣ طيب بلاش جوجل... شاومي بتنزل دلوقتي MIUI 12 يلا حد يعرف ايه الجديد فيه؟ طيب بلاش شاومي يا سيدي سامسونج بتنزل One UI 2.0 للتليفونات... ايه الجديد حد يعرف

وسؤالي للشخص العادي لان اللي معاه موبايل سامسونج وجاله التحديث أو منتظره فعادة ممكن يكون عارف الجديد؛ لكن اللي مش معاه سامسونج!!! محدش يعرف أو مهتم.

*️⃣ طيب خلال ال 3 شهور الماضية نزل OnePlus 8 و Mi 10 و Samsung S20 و Huawei P40... دول أكبر 4 موبايلات في عالم الأندرويد... حد شاف بوستات مدح أو بوستات ذم أو أي حد مهتم أصلاً !!! طيب نهاية شهر 9 أبل عادة هتنزل الآي فون 12 مقدماً كده من غير ما نعرف الموبايل نقدر نتحدي بعد (الرهان حرام) تحدي إننا هنشوف بوستات كثير مدح وأخرى تريقة سواء بقى من صفحات متخصصة زي صديقي Tech Comics أو أشخاص عاديين؟ هااااه؟ عرف السوق مهتم بمين بقى!!!

طيب بلاش يا سيدي

*️⃣ سنة 2019 جوجل أعلنت إنها عندها خطه تطبيق SandBox في الأندرويد من 2020 وتقريباً هتتأجل ل 2021... الآي فون و iOS من سنة 2007 شغال بمفهوم الساند بوكس... شوفت كام بوست بقى حد من Apple Fan Boy كتب في المجال دا وهو مش متخصص في التقنية؟ مجرد بوستات تريقة... خالص مفيش وغالبية مستخدمي أبل ميعرفوش أصلاً إن جوجل هتطبق الساندبوكس...

*️⃣ محدش مهتم أصلاً يعرف الجديد في الأندرويد أو سامسونج أو جوجل... الكل مهتم يعرف ايه الجديد من أبل... حتى لو الجديد طلع "قديم ومقلد" ففرصة نحاول نسوق لنفسنا إنه كان عندنا... تخيل مثلاً لو وان بلس

ضافت ميزة كانت موجودة في سامسونج... هل هتشوف أي بوست يقول ياااه قديمة يا وان بلس دي عندنا من زمان!!! ولا حد هيعبر البوست دا أصلاً

*️⃣*️⃣ طبعاً هلاقي الناس تقول (هاهاهاهاها Apple Fan Boy) أو أنتا تقصد إن أبل جميله وزي الفل ... أنا بشرح لكم هى حاطه نفسها فين وعارفه تسيطر وليه مش بتقع... يعني بوستات التريقة مستمره بقالها سنين وفي النهاية لو في 100 شخص قرروا يشتروا جهاز قيمته فوق 700$ فعاده هيكون 60-70 منهم هيختاروا الآي فون... هل لإنهم ناس هبلة كلهم؟ 200 مليون ثري أهبل في كوكب الأرض؟

طيب في 100 مليون يا سيدي عبيط وهدفهم ال Show... قشطة وانتا بالفعل بتريقتك حتى اديته ال Show إن العالم كله مركز مع التليفون بتاعه والشركة اللي اختارها... في حين انتا تليفونك اللي ممكن بسعر تليفونه يا سيدي وفيه مزايا يا عم أحسن منه... حد مهتم بيه؟ طيب لو دخلت انتا وهو مكان ليكن مول وبتعدوا من بوابة الأمن فحطيتم الموبايلات فيا ترى تلقائياً فرد الامن شايف مين فيكم الأكثر ثراءاً هااا عرفت إن "التركيز" على أبل هو اللي مخليها ال Leader بتاع السوق

كفاية كده بقى ونعود للراحة تاني مع إن البوست دا عارف ومتوقع هيتفهم إزاي... قديم أنا في المجال دا

رئيس الوزراء قال إن الدكاتره السبب في بعض الوفيات؛ ونقابة الأطباء رفضت البيان وقالت مات 100 طبيب وأصيب 3000 بسبب نقص العلاج والمعدات.

ما تيجوا بقى نشوف الجزء الثاني من الموازنة اللي هيبدأ العمل بيها من يوم 1 يوليو يعني الأربعاء القادم... والجزء دا كله عن الصحة والأدوية وكده بحيث نشوف ايه هيحصلنا السنة القادمة بقي.

في البداية تقدر تراجع الجزء الأول من تحليل الموازنة من اللينك دا

https://bit.ly/2BzrjxK

وتقدر تنزل الموازنة من موقع وزارة المالية من اللينك دا
https://bit.ly/3dpmbJz

والاول بوضح اني هقول شوية أرقام مجردة بدون تحليل عشان مبقاش بعمل توجيه للتفكير؛ وبعد ما أرص الأرقام هنشوف ملاحظات بقي

*️⃣ كانت مخصصات شراء الأدوية 9.11 مليار هتبقى 10.98 مليار أي زيادة 11% (جدول 5 صفحة 73)

*️⃣ كانت مخصصات دعم الأدوية وألبان الأطفال 1.5 مليار وهتبقى 1.75 مليار أي زيادة 17.7% (جدول 7 صفحة 77)

*️⃣ بند العلاج على نفقد الدولة + التأمين الصحي كان 10 مليار هيبقى 10.6 مليار أي زيادة 6.2% (صفحة 41)

*️⃣ مخصصات قطاع الصحة كانت 73 مليار هتبقى 93 مليار أي زيادة 28% (جدول 10 صفحة 97)

*️⃣ بند الرواتب كان 35.9 مليار هيبقى 41.6 مليار أي زيادة 15.9% (جدول 10 صفحة 97)
بند شراء السلع والخدمات كان 15.4 مليار هتبقى 22.1 مليار أي زيادة 43.5% (جدول 10 صفحة 97)

*️⃣ بند الدعم والمنح كانت 6.3 مليار هتبقى 7.5 مليار أي زيادة 18.6% (جدول 10 صفحة 97).

*️⃣ بند شراء الأصول (بناء مستشفيات مثلاً وأجهزة) كانت 13.5 مليار هتبقى 20.5 مليار أي زيادة 52% (جدول 10 صفحة 97)

*️⃣ إضافة لما سبق في مجموعة مبادرات رئاسية معظمهم شغال بالفعل ومخطط في 20/21 لـ ( أسرة عناية مركزة وزيادة الحضانات وصحة المرأة وتطوير المستشفيات والعلاج بالبلازما وضعف السمع لحديثي الولاده والفشل الكلوي وتوفير الأمصال ورفع مرتبات أطباء الامتياز والصحة النفسية وشوية حاجات تانية ) هتلاقوها صفحة 46 بإجمالي 23.3 مليار جنية.

يعني ممكن مجازاً نقول كل ما هينفق في قطاع الصحة بداية من مرتبات الأطباء والموظفين لغاية التأمين الصحي وبناء المستشفيات نقول 140 مليار جنية من إجمالي إنفاق 1713 مليار جنية وأتمنى بجد أكون حاسبها صح يعني الحكومة متكونش مدخله بنود في بعض (البيان التحليلي للموازنة لسه منزلش)

طيب مما سبق واللي هيقرأ اللي فوق هيقول ما شاء الله الحكومة عاملة زيادة في كل البنود أهي وناس عملت اللي عليها. لكن عاوزك تبص عالكام نقطة القادمة دي وبعدين قرر مع نفسك نتوقع ايه في 2020/2021

*️⃣ موازنة 19/20 اتعملت وصدرت إبريل 2019 وقتها مكانش في كورونا.. في الوباء مفروض المخصصات هتزيد عشان تقدر تقدم نفس الخدمة.

*️⃣ موازنة 19/20 اتعملت كان سعر الأدوية وسعر البنزين وسعر الكهرباء والماية وكل شيء أرخص... فمفروض تزود عشان تعوض زيادة التكلفة.

بصوا في الأرقام فوق ونسب الزيادات كام % وليس كام فلوس مليار... وفكر هل النسب دي كافية للتغيرات زي وباء كورونا وما يتبعه من إجراءات طبية + ارتفاع أسعار كل شيء + عاوز تعمل مكافئات وتعويضات للأطباء

أنا كمحمد سامي شايف الأرقام أقل من المفروضه

*️⃣ اه بالمناسبة... في بند نسيت اقولكم عليه اسمه دعم التأمين الصحي للأطفال دون السن المدرسة... كان 227 مليون جنية الحكومة هتقلله ويبقى 214 مليون جنية... دا دعم التأمين الصحي للأطفال الرضع نقص.

عاوز تاني

*️⃣ بند دعم التأمين الصحي لغير القادرين من أصحاب معاش الضمان الاجتماعي كان 1000 مليون جنية هيبقى 182 مليون.

عاوز تاني

*️⃣ بند دعم التأمين الصحي للمرأة المعيلة كان 166 مليون هيبقى 133 مليون.

سبب الانخفاض هو إن الحكومة زودت بند دعم التأمين الصحي الشامل. لكن تعالوا نجمع كل بنود التأمين الصحي كده سواء طلاب أو أطفال أو غير قادرين أو شامل أو مرأة أو فلاحين:

*️⃣ بند دعم التأمين الصحي عامة كان 2096 مليون هيبقى 1850 مليون جنية.

عاوزك بس تفتكر إن كل ما سبق هو النظري عالورق والفعلي شيء تاني... فربنا يكون في عون الأطباء... ومعلش لو في 1000 طبيب مقصرين في شغلهم ففي يا سيدي 50000 شغالين

اضحك خلي الفكرة تعدي

زي النهاردة من 4 سنين نشر بوست بالفكرة دي بس وقتها كل اللي تفاعلوا معاه 15 شخص (وقت الهدوء الجميل) وعشان كده هعيد كتابته وصياغته تاني.

((( قبل ما أبدأ الرجاء الدعاء لوالدي بالرحمة... النهاردة مفروض كان يبقى عيد ميلاده الـ 65 بس هو آخر عيد ميلاد له معانا كان الـ 50 )))

نرجع للبوست بقى

*️⃣ في 2016 أعلنت أبل عن نسخة الآي باد من Swift Playground (برنامج محاكاه وتعليم البرمجة يستهدف الأطفال) وكانت أول حاجة قالتها في الدعايا "التعلم مع المرح" ولغاية النهاردة مذكور في موقع أبل "Learn serious code. In a seriously fun way.
"

*️⃣ كثير إن لم يكن غالبية البشر بيكون عندهم "مناعة أو مقاومة" لإضافة الأفكار الجديدة فمن ناحية ممكن تكون الأفكار بتتصادم مع عادات وقيم.. ومن ناحية ثانية مقاومة المجهول وحب المعتاد ومش غريب عبارات زي اللي تعرفه أحسن من اللي متعرفوش... وحتى زمان قوي الكفار قالوا إنهم بيعبدوا الأصنام من منطلق "هذا ما وجدنا عليه آباءنا" أو حتى اللي بيحب مصطلحات التنمية البشرية Comfort Zone ومن الآخر إحنا متعودين على حاجات معينة ومش عاوزين جديد لإن أي شيء جديد محتاج تفكير أو مجهود وقياس هل دا متعارض مع أمور أساسية في حياتنا.

*️⃣ عشان كده أشهر ثغرة بتستخدم هى "الضحك" وقت الإنسان وهو بيضحك فالحواجز والفلاتر بتاعه مخه بتكون في إجازة تقريباً... فتلاقي من أساليب التعليم الجديدة اللعب والمرح فالأطفال وهما بيلعبوا يلاقوا نفسهم اتعلموا.

حتى الآن الموضوع جميل ومفيد لكن أحياناً الموضوع بيكون أكبر من كده

*️⃣ اللي بيكون عاوز يدخل ويزرع الأفكار الشاذة أو الغريبة عن أي ثقافة بيستخدم نفس الطريقة؛ وإللي عاوز برضك يقاوم أي أفكار فبدل ما يتعب نفسه ويناقشها فيستخدم التريقة والضحك؛ يمكن أشهر مثال شوفناه كلنا كان "باسم يوسف" وفاكرين كلنا كم التلميحات الجنسية اللي عديناها عشان كنا بنضحك... وكمان أغنية "كان في واد اسمه زيزو" وكل برامج SNL وغيرهم اللي بيستخدم الضحك لتمرير أي شيء مخالف لأخلاق ودين وقيم المجتمع. ما احنا بنضحك.

*️⃣ الموضوع دا مش جديد وحتى هتلاقي ربنا في القرآن قال ("ولئن سألتهم ليقولن إنما كنا نخوض ونلعب قل أبالله وآياته ورسوله كنتم تستهزئون") وفي موضع آخر قال ("إذا سمعتم آيات الله يكفر بها ويستهزأ بها فلا تقعدوا معهم حتى يخوضوا في حديث غيره") وموضع ثالث ( "وما يأتيهم من رسول إلا كانوا به يستهزئون") يعني الكفار كانوا بيحاربوا الإسلام بنفس الطريقة وربنا حذر منها المسلمين.

*️⃣ لما ترجع لأيام مكة والرسول تلاقي قصة النضر بن الحارث؛ واحد قال للمشركين أنتم تاعبين نفسكم بحرب الإسلام بطريقة غلط؛ وراح مسافر بلاد الفرس واتعلم هناك الموسيقى والعود والقصص وجاب شوية جواري ورجع مكة وبقى لما يشوف حد عاوز يقعد يسمع للرسول فيقعد هو يعزف بقى ويحكي القصص والجواري ترقص يعني عملهم مسلسلات رمضان كده عالضيق لإنه عارف إن دا أحسن طريقة مقاومة ونظام مش "سيدنا محمد" بيحكي لكم قصص الأولين وعاد وثمود ونوح؛ ماشي وأنا عندي قصص أهو ومش بقولكم دين جديد ... وربنا نزل فيه الأية (ومن الناس من يشتري لهو الحديث ليضل عن سبيل الله بغير علم)

*️⃣ وبما إننا في شهر الشواذ ففكر كده كام مسلسل أو فيلم كوميدي استخدم تلميحات "الشواذ" عشان يضحكك؟ نفس الموقف دا في موقف جد كنت هتنفر منه بس عشان في ضحك هيعدي صح؟

*️⃣ طيب تعالوا نفتكر الإعلان الشهير "الدندو" فاكرينه طبعاً... كان ضحك وجميل صح... الإعلان دا استخدم حركتين سوا (الضحك والهزار) والنقطة الثانية (تسمية الشيء بغير اسمه).

*️⃣ خدوا بالكم الإعلام بيعمل غسيل مخ في المجال دا إزاي... صورة جميل لقوس قزح المحبب للأطفال والكبار + تسميه بغير اسمه "المثلية" + ضحك وهزار وأفلام كوميدية ... كده إنتا عديت الخط الدفاعي الأول الرفض التام... وبقيت مش بتنفر من مجرد ذكر الكلام؛ يعني بقيت تستحمل تسمع الكلام دا وتتناقش.. فهنا ناخدك في نقطة تاني وهى نقاش حولين الحريات ووو.. مش هيعرف يدخلك في نقاش حولين الحريات لو إنتا أصلاً رافض من المنبع مجرد ذكر اسم الموضوع دا.

مش عاوز أطول عليكم وأظن الفكرة وصلت... خدوا بالكم أكثر حاجة من البرامج الكوميدية والظريفة.. ومرضتش أضرب مثال ببرنامج الدحيح اللي برضك وسط الكوميديا كان بيطرح أفكار كثير لدارون والتطور ووو إنها أفكار عادية لكن لو كنت عملت كده كان الكل هيسيب فكرة البوست ويقلب الحديث حولين الدحيح اللي بالمناسبة أنا نفسي تابعته.

هو الناس اللي كل ما الواحد يكتب بوست أو يشوف بوست حد بيتكلم عن الاباحية أو الشواذ أو الخمور أو أو أو

يعلقوا ويقولوا ملكمش دعوة دي حرية شخصية خليكم في حالكم متكلموش حد ومتروحش تقوله غلط ووو كده تدخل في حريته الشخصية

الناس دي لما بتسمع الأيه اللي ربنا قال فيها ("لعن الذين كفروا من بني إسرائيل على لسان داود وعيسى بن مريم ذلك بما عصوا وكانوا يعتدون. كانوا لا يتناهون عن منكر فعلوه لبئس ما كانوا يفعلون")

ركزوا كده اللعن لمين؛ مش للي بيعملوا المعصية لا؛ دا للي شايفين المعصية وقالوا دي حرية شخصية ملناش دعوة.

محدش مسك طوبة ولا عصاية وراح أجبر حد علي شيء؛ لكن الخيار ليك تحط لسانك في بقك وتنضم لبني اسرائيل في اللعن لكن في المقابل هيتقال عليك متحضر

أوووو

تقول للناس دا غلط وتحذر الناس منهم؛ بس كذه هيتقال عليك متخلف لا تعرف كيفية تقبل الاخر وخليك كيوت يعني ومتحضر

الخيار ليك؛ إنجوي

اه في خيار ثالث للظرفاء؛ إن الاية دي لبني اسرائيل بس 😊

ليه بيقولوا هنفتح البلد عشان الاقتصاد؟

تعالوا نشوفه بتبسيط

طبقا للبنك المركزي فحتي نهاية شهر مارس 2020 كان إجمالي التسهيلات الإئتمانية (القروض) المحلية مبلغ 4 ترليون و 427 مليار جنية (شلت الملايين الفكة) دا بكل العملات موزعه كالتالي:

1️⃣ الحكومة : قروض بقيمة 2 ترليون و 917 مليار جنية (منهم 2381 مليار قروض بالجنية )

2️⃣ القطاع الخاص 926 مليار جنية (منهم 700 مليار بالجنية)

3️⃣ القطاع العائلي 426 مليار جنية (منهم 416 مليار بالجنية)

4️⃣ القطاع العام 157 مليار جنية (منهم 125 مليار بالجنية)

*️⃣ يعني نقدر نقول القطاع الخاص + القروض الشخصية يعني القروض عالشعب تساوي 1 ترليون و 352 مليار جنية (كل العملات)

منهم القروض بالجنية تساوي 1 ترليون و 117 مليار جنية قروض محلية

*️⃣ البنك المركزي عمل مبادرة تأجيل أقساط القروض لمدة 6 شهور يعني هيرجعوا يدفعوا من أكتوبر الأقساط

*️⃣ فعليا المبادرة دي أنقذت السوق بشكل كبير فتخيلوا معايا مثلا شركات مبيعاتها انهارت 50% وأكثر وييجي البنك يقولها قسط القرض؛ هيقولوا له احجز علينا مفيش فلوس.

*️⃣ دا برضك من الحاجة دي كانت سبب إننا مشوفناش عروض ضخمة وحرق وبيع منتجات بعروض ضخمة زي ما شوفنا بره مصر؛ لان الشركات معندهاش سيف الاقساط فمستعدة تبيع المنتجات بأي سعر عشان تسيل الفلوس وتسدد الاقساط.

*️⃣ المهم فات 3 شهور وهنبدأ ال 3 الباقيين ؛ البلد تجارياً مقتولة بلا مبالغه؛ في قطاعات مش شغالة ب 50% ؛ فكده النقاش كان هل الحكومة هتمد تأجيل الاقساط!

*️⃣ ملقتش رقم عن تكلفة مبادرة المركزي لكن نفترض ان مبلغ الشعب 1117 مليار دا كان بفايدة 10% فدا معناه قسط سنوي 111 مليار ؛ يعني بنتكلم في ال 6 شهور دول ب 57 مليار جنية (نظريا حسابات نظرية)

*️⃣ فهنا الدولة والتفكير كان هل هنأجل؟ 🤔 وزير المالية طلع قال في 130 مليار اختفوا من الناتج المحلي (للتوضيح دول متسرقوش؛ الراجل كان بيتكلم اننا متوقعين نحقق كذا لولا الكورونا هتخلينا نحقق رقم أقل 130 مليار؛ شبه ان لولا الكورونا كان مرتب الموظف هيبقي 4000 جنية).

*️⃣ فالدولة حسمت القرار؛ هنفضل نخسر في الناتج القومي؛ والشركات والافراد مش هيعرفوا يجيبوا فلوس فنفضل نأجل أقساط قروض كانت بتحقق للبنوك 9-10 مليار شهري ؛ طب ليييه 🤔

*️⃣ وهنا قررنا نفتح البلد؛ ونشغل الشركات؛ طبعا البلد مش هتشتغل بين يوم وليله؛ قول شهر يوليو وأغسطس؛ فعلي سبتمبر تكون البلد شغالة (بغض النظر عن الوفيات) فلما ييجي أكتوبر البنوك ترجع الأقساط عادي بقي ونبقي وقفنا نزيف الناتج المحلي؛ والشركات تبقي وقفت أو قللت الخساير وبالتالي حصيلة الضرايب اللي بتمثل 75% من دخل الحكومة تتوقف عن النزيف والناس اشتغلت فتدفع ضريبة الدخل اللي هي المصدر الاساسي للضرايب مع القيمة المضافة وهكذا.

*️⃣ دا شرح مبسط لأحد اهم اسباب فتح البلد المقرر حالياً

أتمني قارئ ما في أعلى يفهم إني بشرح الحكومة فكرت إزاي وقررت ليه فتح البلد؛ مش أنا اللي واخد القرارات دي.

بالمناسبة الكورونا مش بتعرف تقرأ القرارات الاقتصادية والسياسية وبتخش بقلب جامد ولا تخاف

الاقتصاد السعودي 🇸🇦 إيه أخباره!!!

كثير بيوصلي سؤال؛ هو الكورونا اثر علي مصر كده واحنا فعليا معملناش حظر حقيقي؛ أمال الخليج والسعودية اللي قفلوا بجد والبترول نزل كمان تأثير دا عليهم إزاي؟

ممكن تراجع البوست عن الوضع الاقتصادي السعودي وعجز الموازنة التاريخي؛ البوست مكتوب نهاية أبريل تلاقوه في اللينك دا

https://bit.ly/3eQtDzf

والمرة تعالوا نبص علي الصادرات والواردات السعودية 🇸🇦 في أحدث تقرير لهيئة الإحصاء السعودية اللي طلع من يومين بس وكشف الأرقام حتى أبريل:

*️⃣ نرجع بسرعة بالذاكرة ونفتكر إن السعودية 🇸🇦 بعد انهيار مفاوضات ( أوبك +) أعلنت تحدي الدب الروسي 🇷🇺 وغرقت الأسواق العالمية بالنفط الرخيص 🛢 في أبريل وزودت انتاجها من 7.39 مليون برميل في مارس الي 10.23 مليون في أبريل بزيادة 38.5% ؛ ودا استفذ روسيا 🇷🇺 اللي قررت هي كمان تنتج أكثر؛ فالسعودية 🇸🇦 عملت عرض لزباين روسيا 🇷🇺 وهو خصم علي سعر أوبك يعني مثلا لو أوبك سعر البرميل 40 دولار 💵 السعودية تديهم ب 35$ ؛ حرق أسعار يعني؛ معاهم كان العالم 🌏 كله قفل عشان الكورونا وانخفض الطلب العالمي 15% فالنتيجة فاكرين مجزرة أسعار النفط وقتها.

كل بقي الكلام اللي في الفقرة السابقة يعتبر الكلام الشعبوي؛ يعني كلام 🗨 جرايد أو مممكن مبالغات؛ لكن اللي يحسم هو الأرقام الرسمية؛ تعالوا بقي نشوف الأرقام الرسمية من هيئة الإحصاء السعودية 🇸🇦 (زي الجهاز المركزي عندنا) وكانت الأرقام كالتالي (كلها بالريال السعودي وليس الدولار أو الجنية) :

قبل الحرب 🔫 🔫

*️⃣ فبراير 2020 صدرت بترول ب 50 مليار ريال بترول مقابل 59 مليار ريال فبراير 2019 أي انخفاض 15% تقريباً.

*️⃣ مارس 2020 صدرت بترول ب 33.1 مليار ريال مقابل 66.4 مليار ريال في مارس 2019 أي انخفاض قدره 50%

*️⃣ الربع الأول عامة في 2020 صدرت بترول ب 150.8 مليار ريال مقابل في 2019 كان 192.9 مليار ريال أي انخفاض قدره 22%

*️⃣ الميزان التجاري السعودي عامة (الفارق بين الصادرات والواردات) الربع الأول في 2020 كان فائض (موجب صادرات) ب 73.74 مليار ريال مقابل فائض في 2019 كان 119.5 مليار ريال أي تراجع الفائض 39% تقريباً.

(((( حط خط بقي وتعالى نبص بعد الحرب النفطية 🛢 🛢 🔫 وتسجيل رقم صادرات تاريخي كعدد براميل))))

شهر أبريل 2020 كان الوضع كالتالي :

*️⃣ صادرات البترول بقيمة 24.11 مليار ريال مقابل 69.67 مليار ريال في أبريل 2019 أي تراجع قدره 65.4%

*️⃣ الميزان التجاري السعودي حقق عجز سالب 1 مليار ريال سعودي مقابل فائض 36.4 مليار ريال في أبريل 2019 أي خسارة وتراجع 100%.

أظن كده فهمنا أكثر ليه القرارات الاقتصادية الصعبة اللي السعودية 🇸🇦 أخدتها ومجازر في التقشف وانهاء العمالة اللي بتحصل.

السعودية حصل عندها عجز في الميزان التجاري ودا شيء كارثي. ونراجع بسرعه التاريخ القريب ونشوف الميزان التجاري كان إيه :

*️⃣ سنة 2018 حققت السعودية 🇸🇦 فائض قدره 500 مليار ريال أي متوسط شهري 41.67 مليار.

*️⃣ سنة 2019 حققت السعودية فائض قدره 439.5 مليار ريال أي متوسط شهري 36.6 مليار ريال

*️⃣ الربع الأول 2020 حققت فائض 73.74 مليار ريال أي متوسط شهري 24.6 مليار ريال.

فجأة الرقم دا بقي صفر بل وسالب1 مليار ريال.


المشكلة الأكبر إن السالب 1 مليار دا حصل بالرغم من تراجع الواردات السعودية خلال أبريل لتصبح 38.08 مقابل 53.15 مليار ريال واردات في أبريل 2019 ؛ يعني السعودية الاستيراد بتاعها قل 29% تقريباً وبالرغم من كده حصل عجز؛ يعني لو الاستيراد كان في ب المعدلات العادية كان حصل عجز تاريخي محصلش من سنين طويلة.

اللي عاوز بقي يعرف تفاصيل اضافية يقدر يزور موقع الإحصاء السعودي من اللينك دا

https://bit.ly/3eEi6Tr

وممكن تشوف الكام نقطة دول عالصادرات والواردات السعودية وتأثرها في أبريل 2020 بحيث تعرفوا الاقتصاد السعودي رايح فين :

*️⃣ الصادرات إجمالي 37.1 مليار ريال مقابل 89.5 مليار ريال ابريل 2019 موزعه كالتالي:

1️⃣ النفط مبلغ 24.12 مليار ريال مقابل 69.67 مليار.

2️⃣ اللدائن (مطاط وغيره) مبلغ 4.6 مليار مقابل 6.2 مليار

3️⃣ الكيماويات 3.8 مليار مقابل 6.2 مليار

4️⃣ معادن 959 مليون مقابل 1547 مليون

5️⃣ مركبات 952 مليون مقابل 1479 مليون


*️⃣ الواردات في أبريل كانت 38.08 مليار مقابل 53.15 مليار في أبريل 2019 موزعه كالتالي :

1️⃣ مركبات مبلغ 7.5 مليار ريال مقابل 10.95 مليار.

2️⃣ إلكترونيات مبلغ 7.2 مليار مقابل 10.3 مليار.

3️⃣ الكيماويات 4.3 مليار مقابل 4.7 مليار.

4️⃣ معادن 3.8 مليار مقابل 4.7 مليار.

5️⃣ منتجات نباتيه 2.4 مليار مقابل 2.7 مليار.

6️⃣ مشروبات بما فيها التبغ 2.27 مليار مقابل 2.32 مليار

7️⃣ لحوم 1.55 مليار مقابل 1.77 مليار.

أتمني أكون وصلت بالبوست الطويل اللي كله أرقام دا ايه الوضع في السعودية 🇸🇦 اللي تعتبر أكبر اقتصاد عربي وثالث أكبر اقتصاد اسلامي بعد إندونيسيا وتركيا

الموضوع كبييير وصعب والضرر هيطول دول كثير واللي بيحصل في السعودية بيحصل اخوه في الامارات

للتذكير سفارة الهند 🇮🇳 في الامارات 🇦🇪 اعلنت ان في 450 الف هندي قدموا طلب بالعودة للهند والرقم دا معناه 15% من العمالة الهندية و 4.5% من سكان الامارات ؛ وسفارة باكستان 🇵🇰 قالت في 60 ألف عندها قدموا طلب العودة.

أسف إني بعملكم اكتئاب لكن الوضع في الخليج صعب فوق ما تتخيلوا وبلاش تنبهروا ب التليفزيونات والشو ؛ الامارات بتعاني عشان متفلسش خاصة وان المرة دي مش زي افلاس دبي 2009 وقتها أبو ظبي ضمنت دبي؛ المرة دي الازمة واصلة لأبو ظبي نفسها المنتجة ل 70% تقريباً من بترول الامارات؛ فلا امارة البترول عارفه تعيش ولا إمارة السياحة والتسوق دبي عارفه تتصرف.