بوست شرح شرائح الكهرباء وصل إلى أكثر من 600 شير ولصعوبة الرد على كل تعليق دي أكثر الأسئلة تكراراً

1️⃣ هو مش السيسي كان أجل رفع الدعم 3 سنين بسبب الكورونا؟ إيه الزيادة دي؟

دي معلومة مش دقيقة وصلت للناس.. الحكومة كانت مقرره رفع الدعم خلال سنتين 2020/2021 و 2021/2022 لكن السيسي قالهم خلوا الدعم يتشال في 5 سنين... فالحكومة وزعت الزيادة على 5 سنين بدلاً من سنتين... يعني الزيادة الظريفة اللي شوفناها كلنا دي مفروض كان هيحصل أدها مرتين ونص لولا الكورونا.

2️⃣ هى مش وزارة المالية في فبراير 2020 صرحت إن فاتورة دعم الكهرباء في النصف الأول من العام المالي (يوليو-ديسمبر 2019) كانت صفر جنية؟ فإزاي في دعم؟

تكلفة إنتاج الكهرباء انخفضت ولاتزال تنخفض؛ فنتيجة للانخفاض فالشريحة الأعلى الغير مدعومة (فوق 1000 كيلو) كانت وزارة الكهرباء بتكسب منها فلوس... كم الفلوس اللي كسبتها كان أكثر من الدعم بتاع الغلابة (الشرائح المنخفضة). فالصافي كده مفيش دعم... لكن مش معنى كده إن في ناس مش مدعومة... في ناس مدعومة بس اللي فوق شايلنهم. والخطة الحالية محدش هيشيل حد وكله هيترفع الدعم من عليه عدا أول شريحتين"

*** موازنة عام 2020/2021 اللي هتبدأ 1 يوليو مذكور في البيان المالي بتاعها جدول 7 صفحة 77 إن دعم الكهرباء صفر... كده فهمنا الصفر جه منين وإزاي في دعم بس صفر.

3️⃣ طيب ليه عاوزين يشيلوا الدعم؟ مش لما الغني اللي بيستهلك كثير بقىنا نكسب منه فندعم الفقير اللي بيستهلك قليل؟

وزارة الكهرباء عليها ديون بمئات المليارات لإنشاء محطات الكهرباء المختلفة دا غير تطوير الشبكة؛ وفي كمان قرض 25 مليار دولار الخاص بالمفاعل النووي بالضبعة.. فلازم الوزارة تكسب فلوس عشان تعرف تسدد شوية من ديونها.

4️⃣ شرائح الكهرباء بتفرق اللي عنده كارت عن اللي شغال فاتورة؟

لا الإثنين نفس الشرائح وزي بعض مفيش فارق... لكن اللي بيستخدم الكارت لازم ياخد باله من عميلة إعادة المحاسبة اللي بتحصل في الكيلو 101 و 651 و 1001 عشان ميلاقيش الرصيد خلص والكهرباء قطعت فجأة.

5️⃣ الكهرباء بتكلفنا كام؟

السؤال دا محدش يعرف إجابته لكن الوزارة قالت إنك لما تعدي 650 كيلو هيتشال الدعم ونحاسبك سعر الكيلو 118 قرش... ممكن يكون دي التكلفة... ولما تعدي 1000 الحكومة هتحاسبك 145 قرش يعني هامش ربح كويس.

6️⃣ لو أنا معايا عداد كارت ؛ العداد بتاعي هيعرف الشرائح الجديدة منين؟

شركة الكهرباء بتقولك حط الكارت في العداد قبل ما تروح تشحن؛ لما بتحط الكارت بيتم تحميل استهلاكك والشرائح بتاعتك؛ تروح الشركة عشان تشحن أو فوري فهنا هيتم تحميل الشرائح الجديدة ومحاسبتك عليها ولو فات شهور تتحاسب بأثر رجعي... لو هتشحن من موبايلك NFC بالفيزا فالأبلكيشن متوصل بالإنترنت وهينقل للكارت الشرائح الجديدة.

7️⃣ لو مدفعتش الفاتورة هيحصل ايه؟

سبق وأعلنت وزارة الكهرباء قبل سنة تطبيق الفائدة البنكية؛ يعني الوزارة قالت لو مدفعتش فاتورة هيعتبر إنك واخد قرض من الوزارة بسعر الفاتورة دا وقالوا إن القرض "الفائدة" هتكون الفائدة الخاصة بالبنك المركزي + 1% رسوم إدارية... يعني مش هيتحسب غرامة تأخير بل هيحسب إنك واخد قرض من وزارة الكهرباء بيعد عليك فائدة... على حد علمي لسه متطبقش دا بالرغم من إنهم قالوا عليه أبريل 2019.

8️⃣ المحصل مش بييجي يقرى العداد أعمل ايه؟

كل شركات الكهرباء دلوقتي فعلت رقم واتس آب؛ روح الشركة اللي تبعك وخد الرقم وفي معاد محدد خاص بيك هتصور لهم العداد وتصور آخر إيصال عندك... نصيحة بس ابقى صور العداد كل 5 أيام كده بحيث يبقى عندك صور كثير وإنتا عارف الباقي... لكن خد بالك في كشاف برضك هينزل يشوف القراية.

9️⃣ليه الفاتورة كل شهر تيجي لي باستهلاك مختلف خالص عن اللي قبله؟

عشان الفاتورة بتحسب من تاريخ أخذ القراءة؛ نفرض العداد جه يوم 20 وبعدين جه يوم 29 الشهر اللي بعده؛ كده أخد القراية بتاعة 29 يوم+ 10 الشهر السابق يعني استهلاك 39 يوم... تخيل راح بعدها جاي يوم 13 في الشهر يعني كده أخد قراية 14 يوم استهلاك.... عرفت المشكلة في ايه.... فالأفضل ابعت بنفسك على الواتس آب.

🔟 ايه هو السعر العالمي للكهرباء؟

بصراحة معرفش السؤال دا لإنه بيختلف من دولة لأخرى وحسب مصدر توليد الكهرباء والضرائب والرسوم. فالسعودية سعر الكيلو فيها 77 قرش للاستهلاك أقل من 6000 كيلو و 130 قرش للاستهلاك فوق 6 الاف كيلو. الإمارات عندهم الشرائح 101 قرش أقل من 2000 كيلو وبتوصل لـ 167 قرش للي فوق 6 الاف كيلو. أمريكا المتوسط 13.19 سنت يعني 215 قرش

الحكومة أعلنت منذ قليل عن الإجراءات الجديدة للتعايش الفترة من 15 الي 30 يونيو

طبعا هتلاقوها في كل الجرايد مكتوبة والمواقع

أكثر حاجة لفتت نظري ان الحكومة يبدو انها هتطبق سياسة مكافأة وعقاب المحافظات طبقا لحالات الاصابة

يعني قالوا بالنسبة للمساجد هنبدأ فتحها من 1 يوليو لكن هيختلف الوضع

فمحافظات زي جنوب سيناء والبحر الأحمر ومرسي مطروح دول الأقل اصابة وبناء عليه هيفتح المساجد بهم

ونفس المحافظات دي (البحر الاحمر وجنوب سينا) هيتفتح لهم السياحة تدريجي

اما محافظات القاهرة والجيزة والقليوبية (القاهرة الكبري يعني) دول الاكثر اصابة وبناء عليه لا يتوقع فتح المساجد فيهم

حلوه الحركة؛ صايعه؛ تخلي الناس هي السبب في الاجراءات عندها؛ اتحركوا في محافظتكم كثير وزودوا الاصابة وبالتالي هتفضل محافظتكم مقفولة...

صايعة

كثير منا تابع ان محلات Zara هتقفل ما بين 1000 الي 1200 محل حول العالم وهتتحول للبيع الاونلاين؛ وطبعا قبلها شوفنا القفزات في ثروة جيف بيزوس وحسدناه لغاية ما المخازن بتاعته ولعت 😂😂

الكورونا بتشقلب السوق العالمي وسرعة وتيرة التجارة الالكترونية

تعالوا نفكر سوا كورونا هتأثر إزاي علي السوق المصري في مجال التجارة الإلكترونية وكل ما يتبعه بتأثير الفراشة

الأول نبص علي شوية معطيات

*️⃣ السوق المصري متخلف جداً في المجال دا؛ فطبقاً لمؤشر التجارة الالكترونية الصادر من الأمم المتحدة 2019 الذي يضم 152 دولة ف مصر في الترتيب 102؛ وتأتي بعد دولة افريقية مثل بتسوانا 100 والسنغال 98 وغانا 97 وتنزانيا 96 ودول كثير اخري؛ افضل دول أفريقية هي موريشيوس 58 وعربيا الامارات 28. المراكز ال 5 الاوائل هم هولندا ثم سويسرا ثم سنغافورة ثم فنلندا ثم انجلترا.

*️⃣ نسبة التجارة الاكترونية في مصر نهاية 2019 متوسط 5-7% من حجم التجارة في مصر وتقدر ب 17 مليار جنية (تقديرات).

*️⃣ طبقاً للجنة الاتصالات في مجلس الشعب مايو 2019 فإن حجم التعاملات الإلكترونية في مصر 2 مليار دولار ودا يشمل اي خدمة عالانترنت حتي لو حجز فنادق وتذاكر طيران

*️⃣ متوقع ان الكورونا تسبب نمو ضخم في التجارة الاكترونية في مصر لتصل الي 15% بنهاية 2020 دا بسبب ان التباعد الاجتماعي هيجبر الملايين علي تجربة الشراء عبر الانترنت.

*️⃣ التباعد الاجتماعي تسبب ان لاول مرة شركات تطلق خدمات عبر الإنترنت زي بيع السيارات (غبور عملها) ودي خدمة موجودة من سنين بره.

*️⃣ الشمول المالي هيخلي الحكومة توفر معظم الخدمات الحكومية عبر الإنترنت كمان.

طيب من المعطيات السابقة هتخلينا نفكر هو السوق المصري أصلا جاهز للتحول دا؟ بصراحة في مشاكل كثير وجاري العمل علي حلها

*️⃣ البنية التحتية محتاجه تطوير؛ ودي كان وزير المالية قال انه هيتم مضاعفة الاستثمار فيها 300% الموازنة القادمة. وبصراحة متأكدتش لسه من دقة التصريح لكني حالياً بذاكر موازنة 2020/2021 وهنتكلم عنها في بوستات لاحقاً ونفهم سوا ايه هيحصل السنة الجاية.

*️⃣ المدفوعات: مفيش تجارة الكترونية بدون تسهيل المدفوعات؛ وحالياً البنك المركزي بيدعم شركات ال FinTech وشوفنا تحسن ضخم في خدمات زي فودافون كاش ومحافظ البنوك اللي بقيت تقدر تدفع بيها خدمات كثيرة.

*️⃣ كروت ميزة انتشرت بشكل ضخم ؛ دا حتي العمالة الغير منتظمة تم عمل 2 مليون كارت ميزة ليهم (عارف دول مش بتوع شوبنج اونلاين؛ بس دا حاليا وهقولك ليه في الاخر)

طيب ايه تاني هيتشقلب الفترة القادمة؟

*️⃣ شركات الشحن؛ بالرغم من حجم السوق المصري بس الشركات المصرية في المجال عشوائية وضايعه وشغالة بطرق بدائية غالبيتها؛ النمو الضخم في التجارة الالكترونية هيخلي السوق دا يتشقلب وهيتضخ فيه مليارات وهنسمع عن شركات شحن جديدة كل يوم؛ ومش لسه هنسمع دا بالفعل بقالنا فترة بنسمع لكن هيزيد بقي.

*️⃣ الحكومة : هنا بقى الحتة الصعبة؛ زمان زي ما قولنا الناس اللي عالنت دي بتمثل 5% يعني 95% أوفلاين عالأرض؛ لكن مع النمو المستمر الضخم في التجارة الالكترونية هتخلي الحكومة تركز؛ فدا هيخلينا نشوف سيل من التشريعات والقوانين؛ يعني مع الوقت هنشوف الفاتورة الافتراضية معترف بيها ومش لازم ورق ومختوم بالحبر والتخلف دا؛ وطبعا نتذكر ان يوم 1 يوليو بداية الفاتورة الضريبية الإلكترونية اللي منعرفش عنها حاجة 😂😂

*️⃣ الرقابة : دي نقطة محورية صعبة ؛ عشان التجارة الالكترونية تتم وتنمو والناس تثق فهيا لازم الجهات الرقابية كمان تتطور وتفهم طبيعه شغلها؛ بحيث تقدر تحس بالأمان وانتا بتطلب أونلاين؛ ومتقعدش لازم تتصل بتليفون يقولك فين الفاتورة المختومة وبعدين يعاملوك بطريقة ما انتا اللي عبيط مشتري من النت؛ التخلف دا لازم ينتهي... مش ممكن تنمو بشكل حقيقي دون تطوير في الجهات الرقابية؛ واكيد مفهوم قصدي تطوير حقيقي علي أرض الواقع مش شوية قرارات عالنت ونتصور جنبها.

*️⃣ الانفلونسر واليوتيوبر : حبايبي واصحابي اللي مش بحب اكتب حاجة عنهم عشان ميتصدموش في مستقبلهم؛ نمو التجارة الالكترونية هيخليهم محتاجين مسوقين عالانترنت أكبر؛ فدا هيخلي الشغل اكثر ؛ حلو اهو خبر جميل؛ لكن برضك الدولة هتقول الناس دي مش بتدفع ضرايب ليه هما مش بيحققوا دخل! يلا افتحوا لي ملف في الضرايب لكل واحد منهم (دا بفرض ان الملف متفتحش دلوقتي 😔) خدوا بالكم ؛ اديني قولت ؛ دا لو انتم يا يوتيوبرييين هتقروا بوست طويل زي دا 😜😜 احسن احسن ادي اخرة اللي مش بيحب القراية 🙈 🙈.

مش عاوز أطول عليكم لكن البلد بتشقلب بهدوء

بس هل معنى كده ان الناس اللي أونلاين هيعيشوا عصر ذهبي؟

مؤقتا الإجابة القصيرة أه لكن فعلياً بعد مرور شهور قليلة فعالم الأوفلاين هيتحرك ويطلع عالنت؛ اه كان السوق عالانترنت كان صغير بس برضك التجارة قليلن؛ الصعوبات اللي هيواجها الكبار عالأرض هتجبرهم يطلعوا عالنت فهنا هيبقي الصدمة المزدوجة؛ بتوع

الأرض مش متعودين عالنت وخدمة عملا اونلاين؛ وبتوع النت مش متعودين علي حجم المنافسين الضخم وحرق الأسعار اللي عالأرض خاصة وان الحيتان دول اللي طالعين من عالأرض بحجم أكبر من بتوع النت هيلاقوا ان تكاليف البيع عالنت ارخص؛ زمان كانوا بيشتروا أو يأجروا محل في مكان مميز بعشرات الألوف واخرهم بيكون دائرة حولهم؛ الآن المبلغ دا بالدعايا هيوصلهم لكل مكان في مصر ومش محتاجين محل بمكان مميز؛ ممكن مخزن او شقة عادية

بصوا كفاية كده البوست دا مش عاوز يتقفل قفلة حلوه

ودي 3 مرة اكتبه في 4 ايام الماضية ومش بلاقي نفسي راضي عليه اعيد تاني فخلاص قررت الثالثة تابته ومش هعيد تاني كفاية... 😭😭😭😭

المهم انتوا كده بقي عندكم فكرة ايه هيحصل في السوق المصري والعالمي قريب سواء من الشركات او الشحن او الضرايب والمسوقين وكله.

موازنة مصر 2020/2021 الجزء رقم 1

دي هتبقي سلسلة بوستات ان شاء الله هشرح وهتكلم فيها علي الموازنة للعام القادم واللي من وجهة نظري أحد أهم الموازنات في تاريخ مصر 🇪🇬 لييييه؟ عشان في ازمة عالمية.

طبعا السؤال التقليدي وهو ليييه نهتم بيها! يعني أنا مواطن عادي مالي ومال الموازنه؟ ولو السؤال في بالك فدي الاجابات

#️⃣*️⃣ تعرف توجهه الدولة : لما تبص في الموازنة تلاقيهم زودوا او خفضوا بند معين فتلقائي عرفت توجهه الدولة ايه؛ تخيل شغلك في قطاع التعليم فتلاقيهم قرروا يزودوا بند الاستثمار في التعليم؛ فكده عارف ان في تحسن في مجال شغلك؛ والعكس شغلك فيه رسوم وضرايب واستيراد كثير وتلاقيهم بيقولوا هيحصل زيادة كبيرة في ايراد الجمارك فكده تتوقع ايه بالنسبة لشغلك!! فهمت ليه الموازنة مهمة!!

*️⃣ صدق التصريحات : العوام ب يصدقوا ويكذبوا المسئولين بناء علي بنحبهم أم لا؛ فلو قال مسئول هنهتم بالقطاع الطبي فهنا هنقرر نصدقه ونكذبه بناء علي مشاعرنا نحوه؛ طيب ليه ميكونش في أليه احترافية للحكم بعيد عن المشاعر!!! وطبعا نخلي الفساد علي جنب لانه كان ولا يزال ومستمر فبالتالي هو هيطرح من طرفي المعادلة والقياس.

*️⃣*️⃣*️⃣*️⃣*️⃣ شوف الخدعة دي *️⃣*️⃣*️⃣*️⃣*️⃣

عاملها وسط نجوم كثير عشان دي خدعة ظريفة بحبها؛ تخيل معايا لقيت بند في الموازنة كان في 2017 يساوي 200 مليون وفي 2018 يساوي 200 مليون وفي 2020 برضك 200 مليون ومستمر؛ كده البند دا الحكومة بتعمل فيه ايه؟

التفكير البسيط بيقول الحكومة سايبه البند دا في حاله؛ الاجابة غلط؛ في حاجة اسمها تضخم؛ تخيل معايا لو انتا مصروف بيتك في 2020 هو هو اللي كان في 2017 يبقي كده مستوي حياتك حصله ايه؟ ففي وجود تضخم مرتفع فالرقم اللي مش بيزيد معناه انه بيصغر.

تجنباً للجدال فالتضخم نسبي يعني مش هيأثر عالبند بنفس القيمة الفعلية بتاعته.


*️⃣ بشكل عام الموازنة إجمالي الانفاق فيها 1713 مليار جنية وإجمالي الإيرادات 1288 مليار جنية أي في عجز 432 مليار بعد اضافة 7 مليار صافي الحيازة.

➖➖➖➖➖➖➖➖➖➖➖➖➖

لمحات من موازنة مصر 2020/2021

1️⃣ الاقتراض

الحكومة هتستلف 921.16 مليار جنية محلياً و 66 مليار جنية سندات دولية

الفلوس دي الحكومة هتاخدها تسدد بيها 432 مليار جنية عجز موازنة و 519.3 سداد ديون محلية و 36.2 مليار جنية سداد ديون أجنبية

الحكومة قالت إن بسبب الأزمة العالمية فالفوايد عالقروض المحلية والأجنبية منخفضة وإحنا هنستغل دا ونبدل القروض القصيره ذات الفايدة العالية بأخري متوسطة وطويلة

2️⃣ التحرك 1 قرش للدولار 💲 قصاد الجنية يعني :

*️⃣ تغير 44 مليون جنية إيراد قناة السويس 🛥️🛥️.
*️⃣ تغير 45 مليون جنية قيمة مضافة لسلع مستوردة.
*️⃣ تغير 32 مليون جنية جمارك.
*️⃣ تغير 9 مليون جنية ايراد الهيئة العامة للبترول 🛢️
*️⃣ تغير 114 مليون جنية دعم مواد بترولية 🛢️🛢️
*️⃣ تغير 18 مليون جنية دعم سلع تموينية.
*️⃣ تغير 22 مليون جنية في دعم الكهرباء 💡💡
*️⃣ الاجمالي تغير 28 مليون جنية في صافي الموازنة

للتوضيح تشوف البند ازاي؛ يعني ارتفاع الدولار معناه زيادة ايراد قناة السويس وزيادة الجمارك والقيمة المضافة (دول ايجابي إيراد) وبرضك هيزود المصروف زي دعم التموين ودعم البترول والكهرباء.


3️⃣ التحرك 1% في الفايدة المحلية 🏦 يعني 8-10 مليار جنية ؛ يعني الفوايد تزيد 1% يبقي الدولة تتكلف 10 مليار؛ تنقص 1% فالدولة تنخفض التكلفة 10 مليار.

4️⃣ الحكومة بتقول التوقعات الدولية للبترول 🛢 خلال الموازنة هي 30 الي 35 دولار 💵 لكننا عاملين الافتراضات علي 61 دولار 💵 وكل 1 دولار 💵 هيقل عن الافتراضات دي يعني توفير 1.5 مليار جنية (ومحدش يسألني ليه متوقعين ب 35 وعاملين الحسابات علي 61 عشان مش لاقي سبب؛ يمكن عشان اخر السنة يطلع المتوسط السنوي 33 مثلا فكده نحقق وفر في البند دا 42 مليار ونقول دا انجاز 😂😂 ؛ لو حد فاهم بجد يشرح لي).

5️⃣ متوقعين انخفاض 11% في التجارة العالمية 🛥 🛥 في 2020 ثم زيادة 8.4% في 2021 ؛ بشكل عام ال 1% تجارة عالمية تعني 1.5 مليار جنية ايراد ل خزينة الدولة من قناة السويس 🛥 🛥

نكتفي ب دا في الجزء الأول؛ والجزء الثاني هيكون عن الدعم ايه وضعه السنة القادمة

من الأمور اللي بتلفت نظري في التاريخ إن العثمانيين عرفوا يطوروا منظومة السيطرة والولاء اللي مستمرة لغاية النهاردة وبتطبق من الغرب

تعالوا احكي لكم الحدوته من 600 سنة فاتوا

*️⃣ زمان زي ما قولنا كانت حدود دولتك هي المنطقة اللي قادر جيشك يحميها؛ وبناء عليه كل دولة بتطور أسلحة وتكتيكات عسكرية تخليها تقدر توسع دايرة نفوذها

*️⃣ المرحلة الأولي في التوسع العثماني كانت تقليدية زي كل الدول ؛ نخش منطقة نسيطر عليها ونجيب واحد من رجالتنا يحكمها؛ الطريقة دي كانت مثالية في المرحلة الأولي لإن المناطق كانت قريبة فكلها شبه بعض بنفس العادات والتقاليد وحتي اللغة.

*️⃣ مع التوسع العثماني خارج الأناضول بدأوا يلاقوا مشكلة وهي إنهم سيطروا عسكريا علي مناطق مختلف تماما عنهم؛ فلا هي قريبة ولا العرق اللي عايش فيها العرق التركي ذيهم (العرق التركي دا أكبر من تركيا 🇹🇷 الحالية وممتد لغاية الصين 🇨🇳 ومناطق تركستان الشرقية المعروفة باسم مناطق الايجور اللي الصين بتقمعهم) ؛ فهنا عندنا مشكلة نسيطر عالناس دي ازااااي!

*️⃣ في مناطق كانت مسلمة زي الشام ومصر 🇪🇬 وغيرهم؛ دول السيطرة عليهم كانت بطريقة يبقي الوضع علي ما هو عليه؛ يعني لما العثمانيين هزموا المماليك في معركتي مرج دابق والريادنية بقيادة قنصوة الغوري وطومان باي؛ السلطان العثماني سليم الأول في البداية أصدر أمر بقتل المماليك فوراً kill on sight بحيث نوريهم العين الحمراء وبعدها عملوا شبه اتفاق كده ؛ هاااا شايفين احنا أقوياء ازاي؟ ليه بقي نقعد نضربكم! ملككم مات خلاص يبقي نطبق سياسة عاش الملك مات الملك؛ وانا هبعت لكم والي عثماني من عندي يحكم بس فعليا أنتم اللي هتحكموا عالارض زي ما كنتم بتحكموا وهتديروا البلد لكن تسمعوا كلام الوالي بتاعي؛ وعشان كده المماليك فضلوا موجودين وقاموا نابليون وفضلوا موجوديم لغاية ما محمد علي ابادهم في مذبحة القلعة؛ لان العثمانيين شالوا حكم المماليك لكن سابوا المماليك.

#️⃣ الفلسفة دي في السيطرة كويسة ووحشة؛ كويسة عشان سهلة وصريحة وهتدير البلد بنفس الطريقة المداره بيها والناس اللي معاها مفاتيح الدولة عارفاها؛ عيب الطريقة دي انها بتعتمد علي وجود سلطة قاهرة؛ يعني المماليك في مصر هما مسيطرين فليه ميعملوش تمرد!! عشان السلطة القاهرة دي وهي في حالتنا قوة العثمانيين العسكرية وكذلك الدينية والروحية بكون ملكهم 👑 هو الخليفة الإسلامي... فمع الوقت وبضعف الدولة العثمانية بدأ بسهولة يحصل تمرد في مصر زي ما عمل علي بك الكبير ومحمود ابو الذهب وتمرد لانه شاف عنده قوة عسكرية؛ اما الدينية فهرب منها بإنه واصل الدعاء للخليفة العثماني في مصر؛ الخليفة اللي هو متمرد عليه وبيحاربه 😂😂😂.

طيب دي طريقة السيطرة عالدول المسلمة طيب غير المسلمة في اي اختلافات؟

*️⃣ الدول الغير مسلمة كانت بتتطبق بفلسفة أقوي؛ المرة دي مش هبعت أصلاً والي عثماني من عندي يحكم؛ دا أنا هثبت حكام البلاد في كراسيهم عادي جداً؛ طبعا هتقولي ايه العبط دا ما هيتمردوا بسهولة؛ هقولك لا عشان العثمانيين طبقوا المفهوم اللي مستمر في العالم 🌏 لغاية النهاردة؛ تعالوا نربي حكام الدولة

*️⃣ لما انتا تيجي تعلن الولاء للخليفة العثماني فمن أفضل طرق اعلان الولاء هي انك تبعت أولاد الي عاصمة الدولة العثمانية؛ فشكليا المقصود انك تخاف علي ولادك؛ لكن فعلياً الموضوع أكبر؛ الدولة العثمانية مكانتش واخد دول رهاين عندها؛ بل كانت عاملة مدرسة ليهم ؛ تعلمهم الادارة والحكم وتزرع فيهم الولاء للدولة العثمانية بحيث في يوم ما لما يحكموا بلادهم ميبقاش حكمهم ليها بولاء زائف للعثمانيين ؛ لا دا هما مقتنعين بالفكر العثماني وعندهم ولاء داخلي.

*️⃣ تربية الاولاد برضك بتمنح الدولة العثمانية الفرصة تعرف مين من الأولاد للطبقة الحاكمة يصلح اكثر لاحكم وولاءه لينا؛ وبعدين نقدر نعينه هو الملك حتي لو مفروض غيره يحكم.

*️⃣ الفلسفة دي كانت لسه في بدايتها ومكانتش ناجحة 100%؛ من أشهر القصص في الموضوع لما فلاد الثاني حب يمسك حكم منطقة (الأفلاق Wallachia ) فراح للسلطان العثماني مراد الثاني وطلب المساعدة؛ وبالفعل مراد وصل فلاد للحكم وطبعا ك اعتراف للولاء بعت فلاد الثاني أولاده الي الدولة العثمانية؛ أولاده هم فلاد الثالث و رادو.

*️⃣ الأخوين تربوا في مدرسة الحكام اللي كان فيها ولي العهد العثماني محمد الثاني؛ يقال كان دائماً في خلافات بين فلاد الثالث و محمد الثاني وخاصة انهم في سن متقارب (فارق سنتين).

*️⃣ حصل تمرد في مناطق الآفاق وتم قتل فلاد الثاني وهنا قام السلطان مراد بإرسال جيش عثماني وحط ولي العهد فلاد الثالث في الحكم؛ وبعدها انشغلت الدولة العثمانية في أمور كثيرة فهنا المتمردين عرفوا يطيحوا ب فلاد.

*️⃣ لاحقا عرف فلاد يرجع للسلطة وكانت الدولة العثمانية خلصت انشغالها فهنا بعتت لفلاد الثالث انه يدفع الجزية ويقسم بالولاء ليها؛ طبعا فلاد رفض وخاصة ان السلطان العثماني بقي محمد الثاني.

*️⃣ وهنا شنت الدولة العثمانية سلسلة حروب شهيرة استمرت لسنين ضد فلاد الثالث ؛ الحروب كانت شهيرة مش عشان معارك ضخمة لكن عشان الطرفين من أشهر شخصيات التاريخ؛ محمد الثاني هو (محمد الفاتح) و فلاد الثالث هو (دراكولا) ايوا يا جدعان الشخصية الحقيقية لدراكولا. وهو كان دموي جداً بالفعل؛ سلسلة المعارك دي استمرت سنين واتهزم في بدايتها محمد الفاتح (عادي يا جدعان ايه المشكلة ان فاتح القسطنطينية يخسر) وفي النهاية قتل دراكولا وقطعت رأسه واحضرت لمحمد الفاتح. وعين محمد الفاتح رادو الابن الثاني لو فاكرين بقي حاكم المناطق دي من رومانيا 🇷🇴.

الموضوع قلب تاريخ ونسينا محور البوست

*️⃣ الفلسفة اللي عملها العثمانيين دي عجبت لاحقا الانجليز؛ فلما الانجليز يدخلوا أي دولة كانوا يثبتوا الحاكم في مكانه عادي لكن الطبقة الحاكمة تيجي عندنا وطبعا فاكرين دا حصل معانا هنا في مصر؛ ومجرد تذكير بس لما الملك فؤاد مات كان ولي العهد الملك فاروق بيدرس في إنجلترا.

*️⃣ الانجليز تميزوا بشكل مش طبيعي في النقطة دي وتوسعوا في تربية وتدريب الحكام للدول الخاضعه لهم ؛ وعاوزكم تكتبوا في النت (أكاديمية ساندهيرست العسكرية الملكية) وتفتحوا ولو صفحة ال ويكيبيديا بتاعتها وتشوفوا أسماء الخريجين وأوعدكم هتتصدموا. ومش هقولكم ليه روحوا شوفوا بنفسكم.


*️⃣ الأمريكان ورثوا الانجليز في كل حاجة فطبعاً ورثوا معاهم أساليب السيطرة دي؛ الأمريكان قالوا نطورها أكثر؛ ليه نجيب الامراء وأولاد الملوك بس عندنا؟ 🤔 ليه منعملش توسع أكثر ونعمل طبقة كاملة من علية القوم يبقوا دارسين في مدارس أمريكية ويدخلوا جامعات أمريكية ويتلقوا دورات تدريبية أمريكية وثقافتهم بالكامل أمريكية بحيث مع مرور الوقت أهلهم لما يموتوا الأبناء دول هيوصلوا لقيادة شركات ومؤسسات الأهل؛ ويبقي ولاءهم الكامل لينا 🤔 وتلقائي هيدخلوا عيالهم جامعتنا سواء اللي عندهم او اللي عندنا... فكده ضمنا ان مش الملك أو الأمير بس اللي ولاءة لينا فكان يحصل تمرد وانقلاب ضده فيروح شغلنا زي ما حصل مع فلاد الثاني فوق ثم الثالث في الأول ؛ لا دا هيكون في طبقة ضخمة فيها الالاف بقوا أمريكان وهيدافعوا عن مصالح أمريكا 🇺🇸 وهما مش واخدين بالهم. هيبقوا أمريكان لابسين لبس أمريكي وبياكلوا في مطاعم أمريكي وعربيات أمريكي ولغة انجليزي (امريكي)..

*️⃣ طبعا الانجليز مش معني دا انهم مش عارفين؛ دول هما الأصل في الصراع وبرضك بيحاولوا يتصارعوا مع الامريكان مناطق النفوذ؛ تبقي الطبقة اللي فوق دي انجليزية ام امريكية.

*️⃣ الفرنسيين أكثر ناس طبقوا المفهوم دا؛ هما لما كانوا بيدخلوا دولة كانوا بيلغوا التعليم فيها من الأساس ويحولوا شعبها لفرنسي؛ سواء فرنسي ببشرة عربية زي الجزائر 🇩🇿 وتونس 🇹🇳 أو بشرة سمراء زي معظم قارة أفريقيا سواء 🇲🇱 وكوت ديفوار 🇨🇮 والكاميرون 🇨🇲 وأفريقيا الوسطي وغيرهم... فرنسيين ببشرة افريقية.

#️⃣#️⃣ أتمني محدش يفهم البوست إني بقول منتعلمش في امريكا 🇺🇸 وبريطانيا 🇬🇧 وفرنسا 🇫🇷 واني بدعوا وبدعوا اننا نفضل جهلة ورجعيين عشان محدش يسيطر علينا؛ صحتي مش هتسمح بالرد عالغباء دا فأنا انسان مريض باخد 2 دواء ضغط مختلفين.

كفاية كده وبفكركم متنسوش تخشوا تشوفوا قايمة خريجي الأكاديمية البريطانية دي 😊😊

مرة كان في 2 ماشييين لقوا حفرة... فالأول قال للثاني بص أنا هردم الحفرة دي بالذهب... فالثاني قاله ذهب ايه يا عم إنتا عبيط.

فالأولاني قاله يعني إنتا عاوز الحفرة تستمر!!! إنتا عاوز الناس تقع فيها؟ إنتا شكلك اللي حافرها أصلها؟ يعني أجي أحل لك المشكلة فتعترض عليا.

نوعية التفكير دي من الإخوه المركوبين فكرياً بنشوفها كل يوم... تيجي تتكلم حتى في التاريخ وتقول عبد الناصر كان وحش... فيرد عليك يعني كان عاجبك الملك وعاجبك الإقطاع والإنجليز...

تقول لحد على رأي في موضوع ما وليكن ديني فهنا يقولك يعني عاجبك الإرهابيين ؛ ولو الرأي الناحية الثانية يترد عليه يعني عاجبك الملحدين.

فلسفة الأبيض والأسود... اعترضت على فعل يبقى إنتا موافق على المضاد تماماً. عارف لو قولت لحد بس الكوبري دا... هيقولك يعني عاجبك الزحمة صح...

بطلوا فلسفة الأبيض والأسود دي... مش لازم الحفرة إما تتردم بالذهب أو تتساب موجودة... خيار تردمها بالتراب عادي دا مش موجود.

إزاي تطور الدين الإسلامي الكونفوشي؟

مش بحب أكتب بوستات دينية لأسباب كثيرة منها إني شايف إن مش أنا اللي أكتب عن الدين (يعني أنا علي قدي ويكون حد أحسن مني) وكمان عشان المواضيع الدينية بتقلب خناقات بالتعليقات

لكن المهم تعالوا نرغي في حاجة؛ اللي عاوز يعتبرها وجهة نظر ماشي واللي عاوز يعتبرها قصة خيالية هو حر:

1️⃣ إحنا ناخد الدين الإسلامي ونقرر نختار المعاملات هي أهم حاجة؛ ونطلع بشعار ونردده في الراديو (الدين المعاملة) لدرجة إن في ناس تفتكره حديث.

2️⃣ بعد ما خلينا (الدين المعاملة) نروح مقصقصين المعاملة دي لشوية نقاط زي العدل وحقوق الحيوان والإنسان؛ جمعيات خيرية وكده... ونقول هي دي المعاملات

3️⃣ المرحلة اللي بعدها نقوم مقارنين بين تعاملاتنا في الدول الإسلامية وبين التعاملات في الغرب؛ وطبعا إحنا قصقصنا التعاملات لنقاط معينة... فهنا هيطلع لنا مصطلح تاني شهير (وجدت إسلاما بلا مسلمين).

4️⃣ بناء علي المعطيات الجديدة بخصوص الدين وإنه بقي لأمور محددة في التعاملات والغرب حالياً أحسن فيها؛ نبدأ نغرس السؤال الأهم (إنتا مسلم ليييه) والسؤال دا يضرب لك شوية نقاط وخد أمثلة :

*️⃣ صحيح هو أنا مسلم ليه؟ دا المسلمين افعالهم بعيدة عن الاسلام؛ وهنا تروح طريق مرحبا بالالحاد.

*️⃣ انتا مسلم ليه؟ يعني هتروح لشخص ألماني أو فرنسي أو ياباني تقوله يبقي مسلم ليه! مهو كده كده بيعمل شوية التعاملات الكويسة دي في حياته يبقي يتحول للاسلام ليه؟ وهنا تروح لحرب ضد فكرة الدعوة للإسلام.

*️⃣ هو أنا مسلم ليه؟ اكيد الخلل في الامور الأخرى اللي في الدين؛ (الدين المعاملة) دي حاجة كويسة والغرب بيعملها بس الأمور الاخري اللي احنا بنعملها دي لكن الغرب مش بيعملها ؛ والغرب متقدم ماديا يبقي الخلل في الأمور دي نلغيها؛ وهنا نطور دين إسلامي جديد أو زي ما بسميه الإسلام الكونفوشي.

5️⃣ وصلنا للإسلامي الكونفوشي؛ نبدأ كل واحد فينا يقول رأيه في الدين من باب هو مقتنع أم لا؛ مهو الدين دا ملوش أحكام وهو مجرد معاملات؛ فلازم نفكر في كل حاجة و (ربنا عرفوه بالعقل)؛ عاوز تعرف كذا حرام ولا حلال؟ شوف إنتا مقتنع إنه حلال ولا حرام؛ يعني مثلاً نقطة خلافية بين الناس وهو تربية الكلاب 🐕 للترفيه؛ في ناس هتقول حلال عشان 1 و 2 و 3 وفي ناس هتقول حرام عشان 1 و 2 و 3؛ انا هنا مش هتكلم علي الحكم الشرعي؛ انا هنا بتكلم عن فصيل ثالث؛ نوع هيقول (ربنا مش ممكن يحرم حاجة "كيوت" كده) وبناء عليه يقرر تبني وجهة نظر الفريق الأول؛ مش عشان الحجة بتاعة الفصيل الأول أقنعته لكن عشان ربنا مش هيقول حاجة كيوت حرام؛ ايه هو ربنا ضد الكيوت في الكون؟ (وربنا يسامحني لو دا تعدي علي الذات الإلهية لكني بوصف تفكيرهم)

6️⃣ بما إن الحاجة تبقي موجود في الدين لما بس تقنعك وتحسها منطقيه فنوصل لمرحلة جديدة؛ لان انا هقتنع بحاجة وانتا بحاجة وكده كل واحد فينا هيكون عنده اصدار خاص من الإسلام؛ وهنا مش بقول خلافات مذهبية زي الأئمة الاربعة وابن حزم وغيرهم؛ لا خالص دا عندنا دين كل واحد يعمل اللي نفسه فيه في أصول مش الفروع.

7️⃣ هنا يبدأ المشاهد من بره يسأل؛ يفرق ايه الإسلام عن اي دين تاني مهو كلهم نفس المبادئ الاخلاقية؛ وكمان متقوليش جنة ونار مهو ربنا هيحاسب بالأخلاق ومفيش دين وأي حد هيعمل شوية المبادئ الأخلاقية هيخش الجنة وطالما كل الأديان فيها نفس المبادئ الأخلاقية يبقى كلهم مفروض هيخشوا الجنة... وغلط أصلاً تفكر إن ممكن حد يخش النار؛ ومش بتكلم عالتكفير خالص نهائي... أنا بقول يكون حد مش مقتنع إن في ربنا فإنتا تقول لا بس ربنا هيدخله الجنة برضك عشان هو عمل المبادئ... مهو مفيش دين خلاص ولا معيار نقيس عليه... المعيار بقى بالحب كده.

8️⃣ فتلاقي بعد كده حد يسأل كذا حلال ولا حرام؛ محدش هيشوف بقى أصول دينية ومعيار ديني ويشوف فتاوي ويعترض عالفتاوي بناء على ثوابت دينية أو متعارضه مع نص قرآني... لا خالص الموضوع هيمشي بالحب وبالقناعات في الدين ككل.

9️⃣ القناعات دي بقى بتيجي منين؟ من التعليم والتربية والإعلام؛ فمع الوقت نبدأ نقنعك بحاجات معينة؛ حرية الشذوذ والزنا وغيره. وإنتا تلقائي تخليها مش متعارضه مع الدين

🔟 وبكده نبقى حولنا الدين لمجرد رأيك ورأي أنا ؛ الشيء اللي مقتنعين إنه صح؛ من الآخر نطبق حرفياً النص القرآني "أفرأيت من اتخذ إلهه هواه وأضله الله على علم وختم على سمعه وقلبه وجعل على بصره غشاوة" ... هتبقى شايف الغلط وحد يقولك دا غلط وأهو من الدين غلط... فبدل ما تناقشه في الدين هتقوله هو منطقي يعني ربنا يقول الشيء دا غلط... لالا مش مقتنع.

أتمنى الفكرة نفسها تكون وصلت؛ ودا مجرد بوست ديني وغالباً مش هيتكرر عشان ميتمش تصنيف الأكونت بتاعي بصبغة دينية وما يتبعه هذا الأمر من حاجات ملناش دعوه بيها... وبعد كده هرجع تاني للكلام عن الاقتصاد والبيزنس بقى اللي بعدنا عنهم شوية.

لكني بجد بقى خانقني فكرة إن الدين اختزل في شوية أخلاق... لو سألت أي مسلم هو الاسلام بيدعوا لإيه هيقولك العدل واحترام الكبير ومساعدة الصغير والعطف على الفقير ونصرة المظلم... مع إن دول مبادئ عامة وعمري ما سمعت عن دين بيدعوا لقتل كبار السن والسرقة والظلم مثلاً... ما كل الأديان كده فرق الإسلام عنهم في ايه؟!!!

بس خلاص ولنا عودة بقى للاقتصاد والبيزنس تاني ودا كان مجرد خروج جانبي مؤقت عن التيار. وبجد أتمنى ربنا يكون وفقني في إني أوصل الفكرة عشان لو موصلتش صح هلبس تهم توديني في داهية وشتيمة وخناقات في التعليقات... ربنا يستر

والله حرقة دم إنك تلاقي تلاقي حاجات حسمت من أكثر من 1400 سنة ولسه مسلمين 2020 بيهروا فيها

بعد ما عم الرسول مات؛ الرسول دعى له ربنا يغفرله وقال صراحة " لا أزال أستغفر لك ربي حتى يردني " فوقتها الصحابة كمان قالوا ما سيدنا إبراهيم دعى لأبوه والرسول أهو كمان بيدعى لعمه وهو مشرك يبقى عادي احنا كمان ندعي لآباءنا الكفار اللي ماتوا

فراح ربنا قايلهم صراحة بقى

*️⃣ ((ما كان للنبي والذين آمنوا أن يستغفروا للمشركين ولو كانوا أولي قربى من بعد ما تبين لهم أنهم أصحاب الجحيم))

وبعدها قال

*️⃣ ((وما كان استغفار إبراهيم لأبيه إلا عن موعده وعدها إياه؛ فلما تبين له أنه عدو لله تبرأ منه؛ إن إبراهيم لأواه حليم))

يعني ربنا قفلها للمسلمين... المشركين والكفار في النار... ومينفعش مسلم يستغفر لكافر حتى لو أقاربه وقال إن سيدنا إبراهيم توقف عن الدعاء لأبوه وتبرأ من أبوه...

الموضوع مش شياكة دي حرااااام شرعاً يعني مش بمزاج حضرتك... دي حاجة حرمها ربنا ومانع المسلمين يعملوها

*️⃣ لكن الإسلام بتاع 2020 اللي الناس ماشيه بيه دا شغال بطريقة وانتا مالك ما يدعوا لهم يا عم.

دول ميعرفوش شيء عن إسلام سيدنا محمد اللي أبسط شيء فيه إنك لو لقيت حد بيعمل فعل ربنا ناهي المسلمين عنه إنك تروح تقوله... ولو شوفت حد بيكذب على ربنا تروح توضح له... لازم تقول دا فرض عليك توضح له... والله بقى هو عاوز يعمل اللي يعمله هو حر بس تبقى عرفته إنه بيعمل فعل ربنا حرمه... مهمتك كده خلصت مهو دورك إبلاغه...

دي أبجديات الإسلام بتاع سيدنا محمد اللي أنا مؤمن بيه... لكن أنا غير مؤمن بالإسلام 2020 دا.. دا أسلام يهودي إسلام كونفوشي أنا معرفوش.

والله كان نفسي البوست بتاع النهاردة يبقى على الدعم في ميزانية 2020 والتغيرات اللي هتحصل في ميزانية وزارة التعليم ووزارة الصحة والزيادة بتاعتهم كام ومحطوطة في أنهي بنود

بس معلش كده البوست هيتأجل لبكره عشان انا بسعى لنشر 1 بوست يومي بس منعاً للإزعاج عشان عارف إن في ناس حاطيني See First.

ألقاءكم بوست بكره إن شاء الله

أمازون الآن في السعودية؛ مصر فيييييين ؟

((( البوست دا حصري هنا وهنشره بعد ساعة في الفيس؛ تمييز لمتابعب تليجرام يعني)))

من كام ساعة سوق السعودية خلاص تحولت وبقت أمازون السعودية... فكده مبقاش فاضل غير سوق مصر تتحول لأمازون مصر

طبعاً محدش عارف الخطوة دي إمتى لكني هحلل وهخمن ايه العقبات والمزايا والعيوب من وصول أمازون... فالكام سطر التاليين مش قايمين على معلومات رسمية لكن تحليل وتخمين شخصي فممكن يكون صح وممكن يكون غلط... كده تمام وصلت؟

*️⃣ عشان تبقى أمازون فالطبيعي بيكون في شحن دولي... يعني يتوفر إنك تقدر تشتري من أمازون أمريكا مباشرة من جوا أمازون مصر... دا الوضع في أمازون الإمارات وأمازون السعودية الجديد وحتى أمازون الصين الفاشل الضعيف وحتى لو أمازون أوروبا برضك... الخلاصة لازم يبقى في Amazon Global Store... ودا اتوفر في سوق السعودية قبل ما يتحولوا إلى أمازون. وهو غير متوفر لسه في مصر.

*️⃣ طيب ايه اللي يمنع أصلاً بقى إن أمازون توفر Amazon Global Store في مصر؟ الإجابة مفيش شيء "يمنع" بس هى بتكون سلسلة من العقبات؛ مفيش سبب منهم بيكون هو الرئيسي لكن مجموعهم سوا بيكونوا السبب... وممكن نلخصهم بسرعة للي مش متابع.

في البداية كده راجع بوست الكورونا والتجارة الإلكترونية في مصر اللي كتبته الأسبوع الماضي في اللينك

https://bit.ly/2Y8lz6L

واللي مكسل يرجع أو شايف البوست دا طويل فمش هيروح يقرى بوست طويل تاني فخد الخلاصة أهى وكمان فوقها نقاط جديدة

*️⃣ السوق المصري متخلف جداً في التجارة الإلكترونية وتصنيفه 102 من 152 دولة في تصنيف الأمم المتحدة. وفي دول أفريقيه سابقه مصر زي بتسوانا والسنغال وغانا وتنزانيا والمغرب ونامبيا وكينيا ونيجيريا وجنوب أفريقيا ومورشيوس وتونس وليله كبيرة قوي سعادتك... ومرة ثانية دا تصنيف الأمم المتحده مش تصنيف محمد سامي عشان اللي هيشتم يعني.. تقدروا تنزلوا التقرير باللينك دا
https://bit.ly/3d66eb7

*️⃣ تصنيف التجارة السابق حاطط السعودية 49 يعني أفضل من أفضل دولة افريقية "مورشيوس 58".. أما الإمارات فـ 28 وكده بالمناسبة تصنيف الإمارات أحسن من دول شهيرة زي لوكسمبرج 29 وأسبانيا 33 وماليزيا 34 وإيطاليا 36.... أظن كده وضح ليه أمازون راحت الإمارات ثم السعودية... وممكن كده تتخيل مصر فين.

*️⃣ أمازون لما تحب تعمل Amazon Global Store هتحتاج بعض الأمور في منها اللي ممكن يعدوه زي استقرار سعر الصرف واللي مش مستقر في مصر... لكن في نقاط قاتلة زي الجمارك.

*️⃣ طبقاً للبنك الدولي تقرير التجارة عبر الحدود فالجمارك المصرية تحتل المركز 171 في تقرير فيه 188 دولة... يعني إحنا من اسوء 20 جمارك في كوكب الأرض ودا لينك التقرير من موقع البنك الدولي https://bit.ly/37MUF7X ومعلش هصدمك وأقولك إن دولة فيها حروب مستمرة زي الصومال تصنيفها 166 أحسن من مصر.

*️⃣ رئيس مصلحة الجمارك يوم 20 فبراير أعترف بترتيب مصر السيء وإن الجمارك فيها مشكلة. وبناء عليه أعلن خطوات جديدة هيتم تفعيلها منها شركة MTS هتمسك تنسيق وتطوير الجمارك وبالفعل من يوم 15 أبريل الشركة اشتغلت بمطار القاهرة (قبلها كانت موجودة) والحمد لله الجمارك اتطورت واتقفلت ومفيش حد تقريباً بيخش له شحنات خلاص والبضاعة نقصت في الأسواق فالأسعار غليت.. اللي متابع أي سلعة مستورده زي موبايلات وكومبيوترات وأكسسواراتها (دا مثال بس) هيلاقي في نقص في الأسواق حالياً والأسعار بتزيد. ولو حتى أنتا طالب كمامة زي فاين جارد فشركة MTS مش هتدخلك الكمامة بتاعتك. الشركة بتطبق سياسة قفل الجمارك خالص وبعدين نطورها ونفتح على نظافة إن شاء الله وربنا يكرمهم.

*️⃣ تيجي بقى شركة زي أمازون عاوزة تقلب سوق مصر إلى أمازون... تيجي تشغل المتجر العالمي... تلاقيهم مش عارفين امتى الشحنة هتوصل للعميل ولا عارفين سعر الصرف هيكون ايه وقت الجمارك ولا عارفين أي حاجة... دا يخلي أمازون تتأخر وتخاف على سمعتها..

*️⃣ مش معنى دا إن أمازون هتغلب؛ أمازون شاطرة في التعامل مع الحكومات ومتوقع إنها تعمل أجتماعات مع مسئولين مصريين دا لو مكانتش عملتها لتسهيل شغل أمازون. بس غالباً هتاخد شوية وقت محترم فمش متوقع تغيير في 2020 خالص.

لكن إن آجلاً أو عاجلاً أمازون هتيجي وهتدخل مصر... وهنا السؤال التأثير بتاعها عامل إزاي؟

تعالوا نقسم التأثير دا لـ 4 اتجاهات ونتجاهل واحدة وهى المنافسين زي جوميا ونون لإنهم مش فارقين معانا... ونبص عالـ 3 الآخرين:

1️⃣ العملاء : دول أكثر فئة هتبقى مبسوطة من وجود أمازون؛ ملايين المنتجات الجديدة هتلاقيها متوفرة من أمازون أمريكا مباشرة؛ تلاقي سعر نهائي مكتوب لكن تشتري تدفع تستني شوية المنتج هييجي لك. فالخلاصة منتجات اكثر وأسعار أفضل وخدمة عملاء أحسن.

2️⃣ التجار: الناس اللي هتزعل؛ من ناحية عشان المنتجات أمازون هتعرف تستوردها أرخص منهم وتنافسها؛ ومن ناحية أخرى لإن أمازون شركة احتكارية من الطراز الأول؛ هى عندها فرق مسئولة عن تتبع المشتريين ومعرفة اشتروا ايه وبحثوا عن ايه؛ والمنتج اللي يلاقوه بيتباع كثير تروح أمازون مشترياه بنفسها وتبيعه بسعر أقل بكثير؛ فأمازون فعلياً مش هتاخد عمولة من نفسها (نظرياً بتاخد) وكمان أمازون مش هدفها الربح قد الدعايا والانتشار والسيطرة والقضاء على المنافسين. فالخلاصة كثير من التجار هياخدوا كتف قانوني من أمازون... وبالمناسبة دا شغال حالياً من سوق لكن لسه تجربة Lite يعني.

3️⃣ الحكومة: أمازون شركة صديقة وعدوه برضك للحكومات؛ فمن ناحية أمازون بتجمع الضرائب على المبيعات VAT من كل عمليات الشراء اللي بتم عليها في كل الدول وبتديها للحكومات؛ وركز معايا دي ضريبة VAT يعني اللي بيدفعها العميل... أمازون هتلمها وتسلمها للحكومة وهى يعني دافعه شيء من جيبها... أما بقى الأرباح بتاعتها اللي مفروض خاضعة لضريبة الارباح التجارية والصناعية 22.5% فأمازون مش بتدفع شيء. بتخرج كل أرباحها مصاريف وتخرج صفر؛ وحتى في أمريكا نفسها أمازون مش بتدفع ضرائب فيدرالية عالأرباح... لكن عامة الحكومة مهتمة حالياً بالضرائب عالشعب VAT وهى بقت مصدر الضرائب الأساسي أما ضرائب عالشركات وأرباحها فنسبتها بتقل سنة بعد سنة من إجمالي حصيلة الضرائب.

طولت عليكم بس دا المختصر كمان

زي النهاردة 16 يونيو 1956 كان الجلاء...

بالمناسبة دي أنا هعيد نشر بوست قديم كتبته في 2017... وهنقله كوبي بيست مع تنقيحات وتوضيحات

إزاي خرج الانجليز من مصر 🤔🤔؟!!

دا سؤال كان شاغلني من فترة طويلة؛ ايه اجبر الانجليز عالخروج من مصر؛ محصلش موقعة حربية بينا وبينهم ولا ميليشيات وحرب عصابات ضخمة زي الجزائر 🇩🇿 ولا مقاطعة شعبية مهولة زي الهند 🇮🇳 ولا أي حدث ضخم فإزاي حصل بعد الإطاحة بالملك إن الضباط الاحرار قالوا لهم فجأة سيبوا مصر فمشيوا!!!

*️⃣ القصة بدأت لما الإنجليز دخلوا مصر أيام عرابي 1882 ووقتها الشعب كان مدجن فقبل عادي بوجودهم (نفس الشعب اللي كان رفض دخول الفرنسيين قبلها ب 80 سنة) واستمر الإنجليز تحت مسمى الوصاية على مصر لغاية ما جت سنة 1922 اعترفوا باستقلال مصر لكن تحت وصايتهم برضك.

*️⃣ استمرت محاولات الحكومات المصرية إقناع الإنجليز بالخروج وإعطاء مصر الاستقلال الحقيقي لغاية معاهدة 1936 اللي كل اللي درسناه عنها في المدرسة إنها كانت اتفاقية دفاع مشترك بس؛ لكن كان فيها بنود بتقول الانجليز يخرجوا من مصر كلها عدا قواعد حول قناة السويس لحمايتها لمدة 20 سنة يخلصوا في 1956.

*️⃣ هوب قامت الحرب العالمية ومصر منفذتش بنود مساعدة الانجليز فحصل "تثبيت" الملك فاروق الشهير بمحاصرة القصر الملكي سنة 1942 وتم اجبار مصر عالحرب في صف الحلفاء.

*️⃣ بعد الحرب ما خلصت راحت مصر مباشرة قالت للانجليز نفذوا البنود وانسحبوا من مصر وبالفعل خلال أعوام 46-47-48 انسحب الانجليز من كل القواعد في مصر في كل أرجاء مصر عدا منطقة قناة السويس.

*️⃣ جت حرب 48 مصر والجيش المصري خسر.. اللي ميعرفوش كثير إننا مش بس خسرنا بل تم عمل مطاردة من الجيش الإسرائيلي لينا وإسرائيل دخلت جوا سيناء؛ فالحكومة المصرية راحت للجيش الانجليزي في القناة وقالت له بينا اتفاقية دفاع مشترك 1936 ومصر بتتعرض للهجوم فلازم تساعدونا ولازم تضربوا الإسرائيلين؛ لكن وقتها الانجليز محركوش قواتهم لكن بعتوا برضك إنذار للجيش الإسرائيلي إنه ينسحب وبالفعل انسحبوا لكن اخدوا ام الرشراش. وبالمناسبة وقتها الملك فاروق طلع قرار بقفل مضيق تيران أمام البحرية الإسرائيلية. وظل الإغلاق دا شغال لغاية ما الإسرائيلين أجبروا عبد الناصر سنة 1957 على إلغاء قرار فاروق وفتح الملاحة مقابل الخروج من سيناء. وناصر وافق بس دا مش موضوعنا.

*️⃣ بعد حرب 48 الحكومة رجعت تاني للمفاوضات مع الإنجليز والمرة دي طلبوا خروجهم كمان من قواعد قناة السويس وإعطاء مصر الاستقلال التام.

*️⃣ بدأت بالفعل سنة 1950 واستمرت سنة المفاوضات لكن الانجليز تعنتوا ورفضوا طلب الحكومة المصرية وقالوا لها مش هنخرج من القناة؛ فالحكومة رداً على كده حصل الموقف الأخطر تاريخياً.

*️⃣ في اكتوبر 1951 اعلنت الحكومة المصرية الغاء معاهدة 1936 وتجميد أي مفاوضات وإعلان الإنجليز قوة احتلال رسمية لمصر. عارف إنكم هتقولوا إزاي يعني مكانوش قوة احتلال.

*️⃣ قبل الالغاء كان وجود الانجليز في القواعد يعد قانوني باتفاق بينهم وبين حكومة مصر يعني مش احتلال ولا قاعدين غصب عننا رسمياً؛ لكن بالالغاء بقوا يعتبروا قوة احتلال.

*️⃣ لما بقوا قوة احتلال فهنا بدأ الفدائيين بمهاجمة القواعد بكثرة ووتم إصدار أوامر سرية من الحكومة للشرطة المصرية بمساعدة الفدائيين سراً واستمر الوضع دا لمدة 3 شهور.

*️⃣ في يناير 1952 أعلن قائد الجيش الانجليزي في مصر أن الحكومة والشرطة بتساعد المقاومة وحرك قواته ودخل الإسماعيلية وطلب من مدير الأمن والمحافظ الاستسلام وهنا حصلت الموقعه الشهيرة بين الشرطة المصرية والانجليز يوم 25 يناير ومن هنا جاء عيد الشرطة.

*️⃣ بعد الاحداث دي غرقت مصر في فوضى 6 شهور واقالات متتالية لحكومات ثم تم الاطاحة بفاروق وجه الظباط الاحرار

*️⃣ مع وصول الظباط الاحرار أعلنوا مواصلة تنفيذ نفس الطريقة للحكومة السابقة لفاروق وهى المفاوضات لكن في نفس الوقت نسيب برضك الفدائيين. والأمر فضل يزيد وبقي شبه يومي الاعتداء (مش شرط قتل لكن اي نوع اعتداء).

*️⃣ هنا هدد قائد الانجليز في مصر للمرة الثانية بتكرار نفس فكرة الهجوم بتاع الاسماعيلية؛ لكن الحكومة المصرية تجاهلته تماماً وتفاوضت مع إنجلترا مباشرة؛ ولسبب ما قائد الانجليز منفذش التهديدات وحكومة بريطانيا أعلنت موافقتها على تنفيذ بند معادة 1936 وهو الخروج من مصر بعد 20 سنة

*️⃣ وزي النهاردة من 64 سنة خرج آخر جندي إنجليزي من أرض مصر

الانسحاب ومفاوضاته بدأوا من العهد الملكي لكن اتنفذت في عهد الظباط الاحرار.

دي خريطة توضح مراحل انسحاب القوات الإنجليزية من مصر من سنة 1946

من أكثر الفروقات الأساسية بين نظام iOS والأندرويد هو إن أبل بتعرف تدير كويس قوي منظومة الطاقة في الجهاز؛ وعشان كده تلاقي عدد ساعات عمل الاي فون بالنسبة لسعة البطارية أكبر من الأندرويد؛ وخد بالك بنتكلم في النسبة؛ يعني لو جبنا اي فون واندرويد نفس سعة البطارية هتلاقي بنسبة 99% الاي فون هيقعد فترة أطول.


*️⃣ السبب الرئيسي لدا هو إن ابل بتراقب بشكل عنيف أي حاجة بتستهلك البطارية وخاصة في الخلفية؛ عشان تسمح لبرنامج يشتغل في الخلفية (يعني خرجت منه وروحت برنامج تاني) لازم يكون في سبب قوي؛ بينزل حاجة أو بيكمل مهمة محددة ومجرد يخلصها أبل بتوقفه.

أنا بقي مش كاتب البوست دا عشان نتكلم عن أبل وجوجل؛ معلش صدمتكم ياللي رايحين التعليقات

#️⃣ البوست دا عن البشر؛ أيوا عن البشر يا جدعان؛ عن بطاريتنا احنا.

كل واحد فينا عنده بطارية جواه وتنام بالليل تشحنها وتصحي تستخدمها وفكر معايا في استخدامك ليها كده

*️⃣ لو منمتش كويس فكده أكنك شلت الشاحن قبل 100%؛ هيشتغل معاك جسمك بس مش هيكمل اليوم.

*️⃣ الموبايلات عندها برامج في الخلفية؛ احنا كمان كده؛ لما تكون متخانق فانتا بتشغل برامج في مخك تستهلك طاقتك؛ لو بتركب مواصلات صعبة فبتستهلك طاقتك؛ لو عربيتك قديمة بتستهلك طاقة برضك منك.

*️⃣ النقاط اللي فاتت دي اسمها الاستهلاك الخفي؛ يعني لما تيجي تلاقي نفسك مرهق هتقول محتاج أنام أحسن؛ محتاج أقلل شغل وهكذا؛ لكنك مش هتاخد بالك خالص من نقاط بسيطة قوي زي عربيتك.

*️⃣ موقف شخصي حصل معايا وهو ان عربيتي مؤخرا كنت بجددها فاستلفت سيارة موديل 2019 خاصة ب صديق عزيز وبدأت اتحرك بيها؛ لاحظت حاجة غريبة وهو اني بروح مشاوير أكثر وبلاقي نفسي بوصل فايق.

*️⃣ لما قعدت ركزت مع نفسي لقيت ان سيارتي القديمة بتسحب من طاقتي في التركيز في السواقة والجو الحر وساعات أعطال مفاجئة والتركيز لان ودني بقت متدربة تلقط أقل صوت يظهر بحيث ارصد المشكلة مبكراً

*️⃣ فلما سوقت عربية حديثة الملفات دي وقفت شغل في مخي؛ مش محتاج افكر يا تري هتعطل او ايه الصوت دا وتفاصيل كثير وit Just Work ؛ فدا دون أن أدري وفر لي طاقة كانت بتتسحب سراً طاقتي اليومية.

*️⃣ فهنا بدأت أفكر؛ تخيل حياتك لما تلاقي طاقة بتهدر عشان توصل الشغل وطاقة في قلق ليرفدوك لو شغلك فيه تعثر وطاقة مهدرة في القلق علي مدارس أولادك وعلاجهم ووو كمية طاقة رهيبة ضايعه؛ فيبقي الطاقة اللي فاضله لحياتك وتطويرها عشان تخليها أحسن قليلة.

في دول بتحاول توفرلك الطاقة المهدرة بحيث تستغل الطاقة كلها في الانتاج والتطور؛ وفي دول تانية بتلاقيها تستنزف طاقة مواطنيها في التفكير في قاع هرم ماسلو.

#️⃣ مؤخراً أنا كتبت بوستات كثير وكنت بحاول مش بس أرد علي كل تعليق لكن كمان أشوف مين شير البوست ولو حد عنده سأل أرد عليه؛ بس البوستات اللي كتبتها اخر 10 ايام أخدت ما يقارب 3000 شير؛ فدا استهلك طاقة مهولة مني ومقدرتش أرد عالجميع

وفي عشرات الرسايل المرسلة ومعرفش أرد عليها لسه

المشكلة إن طاقتي استنزفت بشكل كبير؛ واستهلكت في الردود مش قراية وتعلم جديد؛ والقاعدة الأساسية هي عشان تكتب لازم تقرأ؛ أنا محتاج ارتاح عشان اشحن البطاريات بتاعي؛ هقلل شوية وتيرة البوستات عشان ألحق اشحن وكمان اعرف اتعلم جديد؛ وكمان عشان شغلي ميحصلش تأثير ضار عليه

مش بقول اني هوقف لكن شوية هتقل الوتيرة بس وهترجع تاني


*️⃣ ونصيحة لكل واحد شوف ايه بيستهلك طاقتك اليومية من غير ما تشعر وحاول توقفه لو قدرت.

المصادر دايماً بتكون أحسن طريقة تدلل إن كلامك صح؛ لكنها برضك أحسن طريقة لخداع القارئ

ببساطة تخيل سنة 2200 واحد بيشرح لآخرين زمنا فقالهم حصل كذا وكذا وكذا

والمصادر كتاب كذا لمصطفي بكري وكتاب كذا لاحمد موسي وكتاب كذا لتوفيق عكاشة

الناس زمانها مش عارفين مين دول لكنهم معاصرين للأحداث فيصدقوا

دي بقي أشهر خدعة للكذب والتدليس؛ ييجي يقولك حاجة وتستغربها فيقولك المصدر كتاب كذا للكاتب فلان بن فلان بن فلان

فهنا تحس بقوة كلامه ومصداقيته؛ مع ان فلان بن فلان دا كان مصطفى بكري زمنه

خدوا بالكم من الخدعة دي لما تقرأوا التاريخ

ولما أرجع اكتب بوستات طويلة هعمل ان شاء الله بوست ضخم ازاي تخدع القارئ سواء بوست اقتصادي أو سياسي أو تاريخي وطبعاً ديني؛ بحيث تعرفوا اشهر الحيل؛ يمكن أنا مرة أغلط واستخدموا فتاخدوا بالكم وتحدفوني بالطوب 😔😔

مصر 🇪🇬 أعلنت فشل الجولة مش فاكر رقم كام في مفاوضات سد النهضة ولذا قررنا نقل الملف لمجلس الأمن والشكوى هناك ويا رب نعرف نلحق ناخد قرار ضدهم عشان فاضل 10 أيام علي بداية ملئ خزان السد 🥤.


المهم السؤال المعتاد هو إحنا هنضرب السد🤔؟

لو الهدف الرد العسكري فأنا واثق في قدرة الجيش بتاعنا علي ضرب السد خاصة مع تسليحنا المرتفع مؤخراً (رقم 3 في واردات السلاح عالمياً) لكن مش معنى القدرة إن يبقي في إمكانية لان في فارق بين Ability و Capability.

⛔ لان عشان دولة تاخد إجراء عسكري ⚔ فلازم حسابات كثير؛ والكام سطر القادمين هشرح شوية حسابات وأكيد في تفاصيل أكبر إحنا منعرفش عنها حاجة؛. بس هدفي من الشرح نبص لل Big Picture وخاصة إن العقلية المصرية التقليدية بتبص لدولة أفريقيا إنهم شوية ناس بدائيين ملهمش في حاجة وإننا متفوقين في كله

ف خد فكرة عن تعقيدات الوضع في أثيوبيا وعلاقتها الدولية

*️⃣*️⃣دول مؤثرة*️⃣*️⃣

*️⃣ الصين 🇨🇳 : أكبر شريك تجاري لأثيوبيا 🇪🇹 ويقال إنها مقرضه إثيوبيا 🇪🇹 16 مليار دولار وكذلك هي ممول خط السكك الحديد الأثيوبية الجاري تطويره وكذلك شبكة الطرق؛ مولدات الكهرباء الخاصة بسد النهضة من الصين؛ وتعتبر أثيوبيا رجل الصين في شرق القارة ضمن مشروع (الحزام والطريق) الصيني الشهير.

*️⃣ أمريكا 🇺🇸 : حطيت أمريكا بعد الصين 🇨🇳 لسبب رئيسي وهو إنك تعرف نفوذ الصين فين؛ وتعرف إن أمريكا 🇺🇸 مش هتسيب الصين تلعب في منطقة؛ حالياً أمريكا بتزود التقارب مع إثيوبيا 🇪🇹 عبر تمويلها من المؤسسات الدولية (هقولها تحت)؛ وبالمناسبة أمريكا هي صاحبة فكرة سد النهضة من الخمسينات. وأثيوبيا 🇪🇹 تعد أكبر متلقي للمساعدات الاقتصادية من أمريكا في القارة الأفريقية ورقم 3 في العالم بعد أفغانستان 🇦🇫 والعراق 🇮🇶.

*️⃣ إيطاليا 🇮🇹 : المحتل السابق لأثيوبيا أثيوبيا 🇪🇹 وأحد أكبر 5 شركاء اقتصاديين لها خلال آخر ربع قرن؛ وأثيوبيا تضم أكبر عدد مدارس ومعاهد ايطاليه في قارة أفريقيا. وشركة ساليني الايطاليه هي مصمم ومهندس ومقاول السد الرئيسي.

*️⃣ فرنسا 🇫🇷 : مكانتش العلاقات قوية قوي لغاية وصول آبي أحمد للحكم؛ لكن في 2018 زار آبي فرنسا ثم رد له ماكرون الزيارة في 2019 ووقعوا سلسلة اتفاقيات اقتصادية وعسكرية ومنحت فرنسا إثيوبيا 🇪🇹 100 مليو يورو؛ وبالمناسبة أثيوبيا الحبيسة (بدون بحر) طلبت من فرنسا 🇫🇷 بناء اسطول بحري ليها وآه زي ما قريت؛ يبقي أثيوبيا عاوزة أسطول يقعد في جيرانها الساحليين (الصومال وأريتريا وجيبوتي) اللي هما حاليا في حلف الصين وبتعمل لهم مواني (الصين بتبني أول قاعدة عسكرية بحرية ليها في جيبوتي 2017 وهدفها حماية السفن اللي هتجيب البضايع اللي تتنقل بخطوط السكة الحديد اللي فوق قولت لكم ادت اثيوبيا قروض عشان تعملها ؛ اربطوا المواضيع ببعض وشوفوا الصورة الكبيرة؛ اه في صحيح جارة رابعة بحرية لأثيوبيا وهي كينيا 🇰🇪 اللي في اشاعات ان الصين اخدت ميناء مومباسا بسبب عجز كينيا عن سداد القروض ). بالمناسبة في شركات فرنسية مساهمة في بناء السد

(((شكلي هكتب لكم مقال عن الصين بتعمل ايه في القارة السمراء بتاعتنا)))

*️⃣ إسرائيل 🏴‍☠️ : العلاقات الإثيوبية الإسرائيلية قوية جدا؛ ففي البداية يهود الفلاشا هم يهود أثيوبيا وفي حاليا 140 ألف منهم بقوا مواطنين (درجة ثانية وفي تمييز عنصري ضدهم) في اسرائيل وفي مشروع قرار صدر في اسرائيل 2003 لنقل كل يهود اثيوبيا الباقيين ؛ وضيف معاهم مساعدة اسرائيل العسكرية ليهم في حربهم ضد إريتريا 🇪🇷 ويقال في فرق من الجيش الاثيوبي اسرائيل هي اللي اسستها ؛ وكمان هي اللي حدثت لهم طائرات سلاح الجو القديم بتاعهم ؛ وخلال آخر سنتين زار نتنياهوو أثيوبيا والعكس وقيل إن هناك دفاع جوي اسرائيلي حول السد لكن اسرائيل نفت الكلام دا؛ ضيف مع ما سبق كمااان العلاقات التجارية وتعاونهم في مشاريع المياة والري ومذكرة التعاون اللي مضوها في 2016 وغيرها... أثيوبيا معروفة بإسم بوابة اسرائيل لقارة أفريقيا.

*️⃣*️⃣*️⃣ مؤسسات دولية *️⃣*️⃣*️⃣

*️⃣ ديسمير 2019 صندوق النقد الدولي يقرض اثيوبيا 2.9 مليار دولار
*️⃣ ديسمير 2019 البنك الدولي يقرض أثيوبيا 3 مليار دولار
*️⃣ ديسمير 2019 مجموعة (شركاء تنمويين غير معلنين) تقرض أثيوبيا 3 مليار دولار
*️⃣ حاجة ثانوية فأبي أحمد واخد نوبل للسلام فدا بيدي وهم كاذب في الرأي العام العالمي عن مصداقيته.


*️⃣*️⃣*️⃣*️⃣ دول إقليميه *️⃣*️⃣*️⃣*️⃣

*️⃣ السودان : أثيوبيا هي اللي عرفت تعمل وساطة والوصول لشكل نظام الحكم الحالي في السودان.

*️⃣ الاتحاد الافريقي : مقر الاتحاد الافريقي في أثيوبيا.

*️⃣ الإمارات 🇦🇪 والسعودية 🇸🇦 : فاكرين فوق القروض بتاعة النقد والبنك الدولي والشركاء ؛ المبالغ دي أعلن عنها آبي أحمد يوم 13 ديسمبر 2019 علي حسابه في تويتر؛ وفي نفس التغريدة قال ونشكر السعودية 🇸🇦 والإمارات علي دعمهم أو بصوا دا نص كلامه كوبي بيست

نص التويته يوم 13 ديسمبر 2019

The support is focused on the three pillars: Macro-economic, Structural & Sectoral reforms. The pledge does not include additional reform financing from the World Bank ($3 billion) and from IMF ($2.9 billion). The UAE and Saudi Arabia’s support is also greatly appreciated. 2/2

مش هطول عليكم لكن عاوزكم تفكروا كده؛ لو ضربنا السد؛ الاقتصاد الإثيوبي هيتدمر؛ استثمارات الجماعة اللي فوق دول هتبوظ؛ فهل هيسمحوا لنا؟

*️⃣ أثيوبيا لعبت لعبة صايعه؛ عملت شبكة علاقات دولية مع نفس أصدقائنا؛ ودا سلاح ذو حدين؛ لانك برضك ممكن تطبق شغل العيال وتقول لأصدقاءك يا أنا يا إثيوبيا 🇪🇹 بس هل هنقدر؟ 🤔

ربنا يستر ويا رب ننجح في مجلس الأمن 🇺🇳 ونعرف نطلع قرار أممي بإدانة إثيوبيا 🇪🇹 مع إن شبكة علاقاتها دي إما هتعطل القرار أو هتطلع القرار وترمية في الزبالة 😔 ؛ بس ممكن يكون احنا عاوزين كده يعني قرار يترمي عشان تقول خلاص عملنا اللي علينا فخلاص نضرب؛ عارف إن دا خيال بس ارجوكم سبوني أحلم خاصة ان شكوتنا لمجلس الامن بنطالبه يجبر أثيوبيا تقعد تتفاوض معانا.

ربنا يستر علينا وربنا يكرم الحكومة وتنجح عشان المرة دي مش هنعرف نحاسب عالمشاريب عشان المشاريب محتاجة ماية 😔.

تحديث : دا نص شكوي مصر لمجلس الأمن وفيه بنطالب المجلس يجبر اثيوبيا تقعد تتفاوض معانا.


أعلنت جمهورية مصر العربية اليوم الجمعة الموافق ١٩ يونيو ٢٠٢٠ أنها تقدمت بطلب إلى مجلس الأمن بالأمم المتحدة حول سد النهضة الأثيوبي تدعو فيه المجلس إلى التدخل من أجل تأكيد أهمية مواصلة الدول الثلاث مصر وأثيوبيا والسودان التفاوض بحسن نية تنفيذاً لالتزاماتها وفق قواعد القانون الدولي من أجل التوصل إلى حل عادل ومتوازن لقضية سد النهضة الإثيوبي، وعدم اتخاذ أية إجراءات أحادية قد يكون من شأنها التأثير على فرص التوصل إلى اتفاق. وقد استند خطاب مصر إلى مجلس الأمن إلى المادة ٣٥ من ميثاق الأمم المتحدة التي تجيز للدول الأعضاء أن تنبه المجلس إلى أي أزمة من شأنها أن تهدد الأمن والسلم الدوليين.
- - -

بين أبل والأندرويد

بالرغم من إني في إجازة شبه مرضية راحه من الكتابة لكن ساعات بيحصل أحداث مستفزة ليا كده فبضطر أرجع شوية أكتب.

اللي متابعني جديد فأنا آه حالياً شغلي الأساسي هو البيزنس بتاعي دكان تك- DokkanTech لكن قبلها كان شغلي الأساسي الكتابة في مجال الآي فون من سنة 2011. فبحكم العادة لازم أكتب بقى.

1️⃣ أبل بتقلد الأندرويد ولا هما الإثنين بيقلدوا السيديا؟

أبل أعلنت إمبارح عن دستة مزايا موجودة بالفعل في الأندرويد؛ لكني بفضل دائماً أقول إن أبل والأندرويد بيقلدوا السيديا... للي ميعرفش فأبل لما نزلت الآي فون في 2007 مكانش في متجر برامج؛ فجه واحد اسمه جاي فريمان عمل ستور اسمه السيديا وظهر عالم الجيلبريك.. السيديا كانت وظيفته إن البرامج اللي أبل مش سامحه بيها هو يخلي المبرمجين ينزلوها عالآي فون.

*️⃣ إمبارح أبل خلت المكالمات تظهر فوق بدون ملئ الشاشة عشان متقاطعكش... الكل قال دا تقليد للأندرويد لإنها في الأندرويد من إصدار 7 سنة 2016 بل وقبلها بسنتين أظن في "روم" كانت منزلاها. طيب ايه رأيكم إن الميزة دي أنا كنت بنزلها في 2010 عالآي فون 3G بتاعي وقتها من السيديا... يعني شركات الأندرويد نسختها في 2014 ثم جوجل حطتها رسمي 2016 وجت أبل حطتها في 2020... وبقت أبل واخداها من الأندرويد... الإثنين أصلاً واخدينها من السيديا.

*️⃣ نسيبنا من المزايا الجديدة ونروح لميزة قديمة.. مركز التحكم CC أو Control Center ودا اللي منه تشغل الواي فاي والبلوتوث وكده... دي أبل ضافتها في iOS 7 في 2013 في حين الميزة موجودة بالأندرويد من أندرويد 2.2 في 2010... الميزة دي أصلاً من 2008 في السيديا تحت اسم Sbsettings نزلت النسخة الأولى النهائية في 2008 والنسخ التجريبية نزلت قبل ما يبقى في موبايل الناس بتشتريه اسمه أندرويد أصلاً... راحت جوجل نسختها في 2010 وحطتها في الأندرويد وجت أبل نسختها في 2013 فاتقال إنها بتسرق من الأندرويد.

طيب السيديا فين يا جدعان؟ 🤔 🤔 يعني لو مشينا باللغة الشعبي... حرامي سرق من حرامي. هل ينفع الحرامي الثاني يقول للأولاني دي بتاعتي إنتا سارقها مني؟ الوحيد اللي ليه الحق هو صاحب المنتج الأصلي هو اللي يقول غير كده "يا عزيزي كلنا لصوص".

الناس الجديدة في عالم التقنية مش هتكون فاكرة كلامي بس اللي استخدم الآي فون في فترات 2008-2011 فاكر كويس السيديا وهيلاقي لغاية النهاردة مزايا أبل وجوجل بينزلوها كانت أدوات عندهم زمان... هو طبعاً اتحسنت تصميم وكفاءة دا فارق 10 سنين لكن تظل فكرة من السيديا أصلاً.

----------

2️⃣ أبل لسه هى Market Leader

أهو شوفتم الضجة عالنت وبوستات الترقية دي بتقول إن لسه عالم السمارت فون أبل هى لا تزال الماركت ليدر... الماركت ليدر هو الشخص اللي السوق كله مركز معاه وبيشوف ايه الجديد عنده سواء لتقليده أو السخرية منه ومحاولة تسويق نفسه إنه كان عنده المنتج قبله... اللي عنده بيزنس فاهم قصدي كويس واللي ملوش في البيزنس بص يا سيدي:

*️⃣ من أسبوع جوجل أعلنت رسمي عن النسخة التجريبية من أندرويد 11؛ تعرف ايه عنه؟ الأستاذ اللي هناك يعرف ايه عنه؟ طيب الأنسة اللي قاعدة سمعتى أصلاً الخبر؟ طيب الحاج اللي ماسك الموبايل تقدر تقولي 3 حاجات جديدة فيه سواء بقى جديدة بجد أو منقوله من سامسونج أو حتى أي شركة ثانية... حد شاف بوستات مدح؟ طيب بوستات تريقة؟ حد يعرف أي شيء؟ حد مهتم أصلاً؟

*️⃣ طيب بلاش جوجل... شاومي بتنزل دلوقتي MIUI 12 يلا حد يعرف ايه الجديد فيه؟ طيب بلاش شاومي يا سيدي سامسونج بتنزل One UI 2.0 للتليفونات... ايه الجديد حد يعرف

وسؤالي للشخص العادي لان اللي معاه موبايل سامسونج وجاله التحديث أو منتظره فعادة ممكن يكون عارف الجديد؛ لكن اللي مش معاه سامسونج!!! محدش يعرف أو مهتم.

*️⃣ طيب خلال ال 3 شهور الماضية نزل OnePlus 8 و Mi 10 و Samsung S20 و Huawei P40... دول أكبر 4 موبايلات في عالم الأندرويد... حد شاف بوستات مدح أو بوستات ذم أو أي حد مهتم أصلاً !!! طيب نهاية شهر 9 أبل عادة هتنزل الآي فون 12 مقدماً كده من غير ما نعرف الموبايل نقدر نتحدي بعد (الرهان حرام) تحدي إننا هنشوف بوستات كثير مدح وأخرى تريقة سواء بقى من صفحات متخصصة زي صديقي Tech Comics أو أشخاص عاديين؟ هااااه؟ عرف السوق مهتم بمين بقى!!!

طيب بلاش يا سيدي

*️⃣ سنة 2019 جوجل أعلنت إنها عندها خطه تطبيق SandBox في الأندرويد من 2020 وتقريباً هتتأجل ل 2021... الآي فون و iOS من سنة 2007 شغال بمفهوم الساند بوكس... شوفت كام بوست بقى حد من Apple Fan Boy كتب في المجال دا وهو مش متخصص في التقنية؟ مجرد بوستات تريقة... خالص مفيش وغالبية مستخدمي أبل ميعرفوش أصلاً إن جوجل هتطبق الساندبوكس...

*️⃣ محدش مهتم أصلاً يعرف الجديد في الأندرويد أو سامسونج أو جوجل... الكل مهتم يعرف ايه الجديد من أبل... حتى لو الجديد طلع "قديم ومقلد" ففرصة نحاول نسوق لنفسنا إنه كان عندنا... تخيل مثلاً لو وان بلس