كرة الثلج في ليبيا 🇱🇾 عمالة تكبر بسرعه

اللي غرقان في أخبار مصر هلخص لك بسرعه أبرز اللي حصل في ليبيا 🇱🇾

*️⃣ في الشرق الليبي 🇱🇾 عندك حفتر اللي بيحظي بدعم مالي وعسكري من الإمارات 🇦🇪 وعسكري ولوجيستي من مصر 🇪🇬 وعسكري وميليشات فاغنر من روسيا 🇷🇺 واستخباراتي وعسكري من فرنسا 🇫🇷

*️⃣ في الغرب الليبي 🇱🇾 في فايز السراج ودا معترف به دوليا بما فيهم (رسميا) الدول اللي بتدعم حفتر؛ وعسكريا بياخد دعم تركيا 🇹🇷 مع مليشيات سورية سبق وقاتلت في سوريا 🇸🇾

كانت الكفة في صالح قوات حفتر حتي مع وجود الميليشيات السورية؛ لغاية ما تركيا 🇹🇷 دخلت بسلاح ال درونز (طائرات بدون طيار) اللي قلبت الموازين + ازمة كورونا

أزمة كورونا خلت الامارات 🇦🇪 تخرج نسبيا من المعادلة وكذلك مصر 🇪🇬 برضك نسبيا وفي نفس الوقت تركيا 🇹🇷 اللي زودت التركيز وبعتت قوات دعم عالارض ؛ وقتل منهم بالفعل واعترفت تركيا 🇹🇷 بدا.

بغياب الدعم المصري الإماراتي وغياب قوات فرنسا 🇫🇷 ف تركيا (وقوات الوفاق) استفردت بقوات حفتر مع مليشيات فاغنر وهزمتهم في الغرب وسيطرت علي قاعدة الوطية الأهم لحفتر بالغرب وبكده مبقاش ليه رجل بالغرب الليبي. القاعدة تم السيطرة عليها دون قتال تقريبا أي انسحبت قوات حفتر

حتي الان عادي جداً وخبر مكرر مفيش بقي حاجات جديدة

*️⃣ بدخول قوات الوفاق المناطق اللي حفتر سابها لقوا اسلحة كثير روسية ودفاع جوي وبالمناسبة الوفاق أعلنوا انهم دمروا 9 منظومات دفاع جوي من طراز (بانتسير) الروسية الصنع اللي سعر الواحدة 15 مليون دولار وكانت الامارات نقلتهم ل ليبيا 🇱🇾.

*️⃣ روسيا 🇷🇺 هنا اتغاظت قوي وحست بالإهانة للسلاح الروسي وقررت التدخل أكثر فبدأ كرة الثلج

*️⃣ الأسبوع الماضي كشفت أمريكا صور لطائرات حربية روسيه 🇷🇺 في ليبيا وقالت إن روسيا 🇷🇺 نقلت 14 طائرة من طرازي ميج 29 و سوخوي 24 الي قاعدة الجفرة الجوية التابعه لحفتر

*️⃣ ف تركيا 🇹🇷 ردت بإعلانها رسميا عن استخدام الدرون التركية الصنع (اكينجي) المتطورة في ليبيا بكده تنضم للطائرات الدرون المستخدمة بالفعل في ليبيا 🇱🇾

*️⃣ أمريكا 🇺🇸 قررت لأول مرة تتدخل علني بس بطريقة أمريكا 🇺🇸 المعتادة وهي فتح الدفاتر القديمة فطلع المتحدث باسم الخارجية الأمريكية وقال إن مالطا 🇲🇹 أوقفت فلوس ليبية 🇱🇾 تم طباعتها في روسيا 🇷🇺 وقالت إن في طرف في ليبيا 🇱🇾 هو اللي طلب طباعة الفلوس دي (يقصدوا حفتر عشان السراج عنده البنك المركزي الليبي فيقدر يطبع عادي)؛ واتهموا روسيا 🇷🇺 انها عاوزة تولع الوضع في ليبيا 🇱🇾 وتسبب ازمة بطرق قذرة عبر اغراق البلاد بعملات مزورة؛ الفلوس المظبوطة قيمتها 1.1 مليار دولار 💵

بقول فتح الدفاتر عشان الشحنة دي اتظبطت نوفمبر 2019 ووقتها مالطا 🇲🇹 قالت انها قفشت 2 حاوية 56 متر مكعب فلوس مطبوعه؛ ووقتها تم تبرير الطباعه ان السراج رافض يبعت فلوس لحفتر؛ فالمناطق تحت سيطرة حفترة عاوزة فلوس فهنا حفتر قرر يطبعها لهم في روسيا. وبالمناسبة الخبر وقتها نشر في روسيا اليوم عادي. فيا تري ايه مسكت مالطا شحنة جديدة مثلا 🤔🤔

*️⃣ مساء أمس الجمعة قيادة Africom (قيادة القوات الأمريكية في أفريقيا) أعلنت استعدادها لنشر قوات في تونس 🇹🇳 لمساعدتها في السيطرة علي الوضع؛ وان قائد القوات الأمريكية تواصل مع وزير الدفاع التونسي.

*️⃣ نرجع أسبوعين ونلاقي اجتماع لقائد الناتو مع اردوغان وفيه قائد الناتو قال إنهم هيحافظوا علي موقف متوازن في ليبيا 🇱🇾 لكن برضك قالوا هيساعدوا قوات السراج لبناء مؤسسات دفاعية وأمنية لو عاوز. ودا تلميح صريح إنهم هيتم بناء جيش ليبي يتبع الحكومة بخلاف الجيش الليبي المتمرد بقيادة حفتر؛ يعني ليبيا هيبقي فيها جيشين.

*️⃣ أول إمبارح 28 مايو هنلاقي إن وزير الخارجية الفرنسي قال إن حكومة السراج جلبت بواسطة تركيا آلالاف المقاتلين السوريين؛ وقال إن روسيا هي كمان بتجيب مقاتلين سوريين كانوا في صف بشار معاها وبتنقلهم دلوقتي ل ليبيا 🇱🇾 لمساندة حفتر ومساعدة قوات فاغنر... افكركم ان فرنسا 🇫🇷 حليف حفتر العسكري لسنوات وسبق وقتل لها جنود في ليبيا 🇱🇾 وشهر يوليو 2019 قوات السراج لقت صواريخ جافلين امريكية وفرنسا قالت انها كانت مع قوات فرنسية في ليبيا 🇱🇾 لكنها كانت قوات مكافحة إرهاب؛ يعني حليف ل حفتر اعترف انه بقي بينقل هو كمان ميليشات سورية.


بصراحة ربنا يستر عالشعب الليبي؛ وصراحة مصر في موقف صعب

يعني لو جينا للقوانين الدولية فالسراج هو المعترف بيه؛ لكن برضك مصر 🇪🇬 معادية علناً للسراج فكارثة لينا إنه يكسب ومش منطقي دولة تسيب نظام هي معادية ليه يتكون جنبها... فكروا في الموضوع بشكل براجماتي؛ مصلحتنا ك دولة إن السراج يخسر لاننا معاديين ليه وواقفين ضده علي طول الخط.

ربنا يسهل وتبقي مجرد توترات عادية والموضوع ميوسعش وروسيا تنزل مليشيات اكثر وتركيا برضك المليشيات المؤيده ليها؛ والكل يسخن وتبقي سوريا جديدة 😔😔

وبصراحة بالرغم من وردية 🌸 الكلام القادم؛ بس فعلاً الحل في ليبيا لازم سياسي؛ روسيا 🇷🇺 في القتال نفسها طويل؛ وتركيا وأمريكا خسروا في سوريا 🇸🇾 فمش هيخسروا تاني بسهولة


نقاط جانبية خليها في بالك

آبار البترول/الغاز في ليبيا 🇱🇾 هي صراع منذ سنوات بين شركة توتال الفرنسية 🇫🇷 و إيني الايطالية 🇮🇹 فممكن تكون السبب ان ايطاليا 🇮🇹 مع السراج وفرنسا 🇫🇷 مع حفتر. لكن المؤسسة الوطنية للنفط (أي مؤسسة في ليبيا يعني حكومة يعني تبع السراج) عرفت تحسن علاقاتها مؤخراً مع توتال ومنحتها موافقة توسع واستحواذ شهر ديسمبر الماضي علي حصة شركة ماراثون أويل الامريكية 🇺🇸 في حقل الواحة مقابل 650 مليون دولار ؛ فيا تري تحسن العلاقات بين الحكومة وتوتال هو سر ان فرنسا 🇫🇷 بقت تعارض حفتر! ولا الوجود الروسي وضغوط من الناتو! ولا ايه

أما امريكا 🇺🇸 فهي ضد التواجد الروسي جنوب المتوسط؛ وروسيا 🇷🇺 بعد ما حطت قواعد شرق المتوسط في سوريا 🇸🇾 عاوزة قواعد جنوب المتوسط في ليبيا 🇱🇾

(((( أنا قولت بس احكي لكم حاجة بتحصل حولينا وأسف مش هعلق عالأحداث برأي شخصي )))

أكثر 3 أسئلة بتيجي لي آخر شهرين هم:

1️⃣ قلقان على فلوسي في البنك 🏦
2- قلقان من الشمول المالي اتصرف إزاي في شغلي.
3- قلقان من الأزمة العالمية بسبب الكورونا.

ودا الرد اللي دايماً بقوله للناس
===============

1️⃣ قلقان على فلوس في البنك

كل ما الناس تسمع إن الحكومة أخدت قروض تخاف وإن الدين المحلي وصل 4.5 ترليون جنية تخاف... يا جدعان متقلوش من الدين المحلي إن الحكومة تطمع في فلوس الناس يعني لسبب بسيط... الدين دا بالجنية؛ طيب هو المطبعة باظت يعني؟ دي شغالة وزي الفل وبنعمل مطبعة ثانية في العاصمة الإدارية

سنة 2011 اتسأل آلان جرينسبان محافظ البنك المركزي الأمريكي من 1987 إلى 2006 هل ممكن أمريكا تتخلف عن سداد ديونها رد ببساطة إن دا مش ممكن يحصل عشان الدين الأمريكي بالدولار 💵 💵 💵 وأمريكا قادرة على طباعة الدولار في أي وقت.

كون إن الحكومة ديونها بالجنية كثير فدا لا يعني إنها هتطمع في فلوسك... لو زنقت قوي هتطبعها (سندات وصكوك للمركزي وإطبع يا معلم).

تقلق إن فلوسك هتقل قيمتها لكن تروح عليك لا تقلق.

أما موضوع تقييد السحب ب 5 الاف ثم بقى 20 ألف وربنا يستر ميرجعش 5 تاني فالسبب هو إنك الحكومة عاوزاك تدفع إلكتروني بحيث حركة الفلوس تكون مرصودة... محافظ المركزي قال صراحة عاوز مليار جنية أديك مليار بس مش كاش.

فمحدش يقلق من فلوسه في البنك... بالعكس دا دلوقتي فلوسك في البنك يعتبر نسبياً فرصة... شوية لما الحكومة تزنق بقى التعاملات هتروح تحط فلوسك في البنك هيقولوا لك جيب لنا مصدر الفلوس دي ايه.

==================

2️⃣ قلقان من الشمول المالي

كذا حد بيبعت ويقولي أنا قلقان من حوار الشمول المالي والضرائب وأنا مش بدفعها وبعمل سبوبة ووو... بص دلوقتي متقلقش... وبكرر الكلمة دلوقتي... حالياً الهدف مش انتا الهدف الشركات اللي شغالة ب 7 و 8 و 9 و 10 أصفار... يخلصوهم وهينزلوا للي تحتهم... انتا أخرك يعني بتكسب كام في السنة؟ ربع مليون جنية أرباح يعني متهرب من 50 ألف ضرائب.. مش انتا اللي الحكومة عاوزاه دلوقتي... هييجوا لك بس مش دلوقتي... حالياً عاوزين اللي بيتهربوا من ملايين ضرائب.

هيوصلوا لك يمكن كمان سنتين... افتح يا عم المشروع بتاعك واشتغل وبعد سنتين إما ربنا يكرمك ويشتغل كويس ووقتها يا سيدي مبلغ صغير كده من 3 أصفار لمحاسب ضريبي هيقولك تعمل ايه ويرتب لك ورقك. وممكن بعد سنتين تلاقي المشروع مش ظابط تقفله وكفى الله المؤمنين شر القتال يا سيدي.

أما بقى لو انتا بالفعل عندك بيزنس مستقر وشغال زي الفل وعاوز تشوف تعمل ايه... فدي الحيلة الوحيدة ليها اللي أعرفها بعيد عن التلاعب في الورق يعني هى المصاريف... لو عاوز ثلاجة في بيتك اشتري ثلاجة باسم الشغل واكتب ثلاجة الشركة؛ تليفزيون الشركة؛ هات موبايل لمراتك باسم الشركة. آه أصحابي المحاسبين الضريبين هيقولوا دلوقتي الضرائب مش هتقبل كل دا؛ ماشي بس ياخد أقصى مبلغ يعرف يعمله... وبالمناسبة دا اللي بيحصل في الكوكب كله ودي طريقة التهرب الرسمية بقى... تلعب في الورق دا شيء يخصك ودي فيها سجن.

===================

3️⃣ أعمل ايه في الأزمة الاقتصادية الحالية

دا بقى السؤال التعجيزي اللي ملوش حل واللي ملوش إجابة مثالية واللي هيعرف إجابته يبقى وزير اقتصاد ولا ياخد نوبل... إحنا في بداية أسوء أزمة اقتصادية شافها العالم من بعد الكساد الكبير.

عامة هما 3 اقتراحات تقليدية:

*️⃣ طور شغلك: حتى في عصر الأزمات في ناس بتكسب؛ لو تعرف تخلي البيزنس بتاعك أو شغلك الشخصي أو وظيفتك في المجالات اللي بتكسب في عصر الأزمة دا.
*️⃣ استثمر: لو لقيت نفسك مش عارف تغير شغلك أو البيزنس بتاعك أو وظيفتك فالحل الثاني لو عندك فلوس تشوف حد شغال في المجالات اللي عايشة في الأزمة وتستثمر معاه وأهو يبقى مصدر دخل.
*️⃣ قلل مصاريفك: دا الحل الثالث والأصعب بقى؛ تقلل المصاريف بتاعتك... هنا عندك خيارين الأول تقلل بالفعل من دلوقتي حتى لو شغلك لم يتضرر؛ والثاني تخط خطة من دلوقتي للتقليل لكن متنفذهاش.

موضوع حط الخطة من دلوقتي مهم قوي؛ دلوقتي شغلك لم يتضرر لكن ممكن يتضرر؛ استفيد بقى من رفاهية الوقت وبدون ضغوط؛ لما بيحصل إن الإنسان يكون مضغوط فهنا بيكون معظم قراراته غلط... فدلوقتي إنتا مش مزنوق وشغلك لم يتضرر فممكن تقعد براحتك خالص تحط سيناريو أعمل ايه لو دخلي قل 25% مثلاً وأقلل مصاريفي إزاي وأعمل ايه لو قل 50% ولو هغير مدرسة الأولاد أبعتهم أنهي مدرسة وايه الخيارات المتاحة... دلوقتي عندك رفاهية إن مفيش زنقة وضغط فتقدر تفكر بهدوووء... فلو لا قدر الله حصلك مشكلة خطتك جاهزة... محصلكش مشكلة خلاص مخسرتش أي حاجة.

طبعاً أسف إن السؤال الأخير ممكن مكونش عرفت أساعد فيه بجد لكنه فعلياً سؤال تعجيزي ملوش حل مثالي.

ولو حد عنده فكره أحسن ممكن يقولها ويفيد بيها الناس طبعاً

ربنا يخلي لنا البنك الدولي دا يا جدعان... يوم 17 مايو أدي مصر 50 مليون دولار وقال الفلوس دي تتصرف في 6 حاجات:

1️⃣ شراء وتوزيع التجهيزات والمستلزمات الطبية اللازمة لمواجهة الفيروس.
2️⃣ تدريب الكوادر الطبية.
3️⃣ عمليات الحجر الصحي، والعزل، ومراكز العلاج المُعدة خصيصا.
4️⃣ تعبئة فرق الاستجابة السريعة في تتبع المخالطين لحالات الإصابة بالفيروس.
5️⃣ تطوير منصات وأدوات تقديم المحتوى لتحسين الوعي العام بالوقاية من الفيروس.
6️⃣ الرصد والتقييم المبتكر لاستراتيجيات التباعد الاجتماعي، ومنها التعبئة المجتمعية.

هو آه البنك الدولي مأفور الصراحة وعاوز كل الحاجات دي بالمبلغ التافهه اللي اداهولنا دا كله 50 مليون دولار يعني 800 مليون جنية يعني 10% من تكلفة كباري وتطوير مصر الجديدة.

بس طلع بفايدة والحكومة وسعت الفحوصات وبعد ما كنا يوم 17 بنعلن عن 500 حالة بقينا نعلن عن 1400 حالة.

ف يوم القرض كانت مصر عندها 12 ألف حالة ودلوقتي بعد أسبوعين بقى عندنا 26 ألف حالة.والحالات الـ Active كانت 8.5 ألف بقت 19 ألف حالة.

أيوا كده نخلي البنك الدولي يشوف إن فلوسه مراحتش في الفراغ.. عشان البرامج الأخرى يدينا فلوس فهيا.

شايفين البنك الدولي (المسيطر عليه أمريكياً) بنطلع منه بفائدة ومصلحة اهو

عكس صندوق النقد (المسيطر أوروبياً) اللي مش بنطلع منه بمصلحة بل ب صب في المصلحة

عاش البنك الدولي نصير الغلابة 😂😂

(البوست للهزار عشان متقلبش جد ومقارنات بين صندوق النقد والبنك الدولي) نفك شوية وبعدين نرجع لبوستات الشروحات والبيزنس والاقتصاد والشملول المالي 😁😁

خدعة اللقطة الأخيرة

*️⃣ تيجي تسأل حد هو الازمة الاقتصادية العالمية الان سببها ايه؟ يقولك الكورونا؛ الاجابة دي صح وغلط؛ الكورونا بالفعل السبب او لو أردنا الدقة هو عمل اللقطة الأخيرة؛ الاقتصاد العالمي بينهار بقاله سنوات؛ الكورونا جه بس اخر مشهد خبط الاقتصاد فانهار؛ لكن بالكورونا او بدونها كان الاقتصاد بينهار

*️⃣ تسأل حد لماذا انهارت دولة المماليك يقولك بسبب غزو العثمانيين ومعركتي مرج دابق والريدانية ؛ تمام صح بس دولة المماليك كانت بتنهار بقالها 100 سنة والعثمانيين بس كانوا اللقطة الأخيرة.

*️⃣ وحتي دولة العثمانيين نفسها تسأل حد لماذا انهارت يقولك أتاتورك؛ صح برضك لكن الدولة العثمانية كان بقالها قرنين بتنهار وأتاتورك جه خلص؛ انتا متخيل لو اتاتورك جه سنة 1600 وقال هلغيها كان هيقدر مثلا! لا طبعا لكنه جه في دولة بتنهار اخد آخر لقطة

*️⃣ نظام مبارك برضك كان بينهار؛ وثورة 25 يناير هي فقط اللقطة الاخيرة

لما تشوف حدث بيحصل قصادك بلاش تنخدع وتخش في نقاش وتركيز في اللقطة الأخيرة؛ اللقطة الاخيرة دي ممكن تغير ببساطة القائمين عليها وبرضك الحدث كان هيحصل.

اركب آلة زمن وروح اقتل اتاتورك وارجع زمنا تاني؛ برضك مش هتلاقي الدولة العثمانية لانها كانت بتحتضر واتاتورك مجرد الاداة الختامية

وسعوا تفكيركم وبلاش تغرقوا في اللقطة الأخيرة

كل حدث بيحصل قدامك هتلاقيهم بيقولوا كذا السبب؛ فكر كويس

هل كذا دا فعلاً السبب ❗ ولا هو بس (اللقطة الأخيرة)

لو هشغل فلوسي في مشروع مفروض أكسب كام؟

كثير منا بيفكر في يشغل فلوسه بدل ما يركنها جنبه أو يحطها في البنك يقول أشغلها في مشروع مع حد؛ محل سوبر ماركت؛ تاجر بلاستيكات؛ مربي فراخ؛ تاجر قماش؛ الخ الخ

بيبقي السؤال؛ هو إمتي يبقي العائد بتاع التجارة مقبول وامتي مش مقبول

قبل ما ابدأ 3 نقاط علي جنب

1️⃣ الكلام كله للي عاوز فلوسه بالجنية.

2️⃣ مش بنتكلم علي الجانب الشرعي للفائدة البنكية.

3️⃣ الكلام والشرح كله بالبلدي والحب؛ اللي عاوز دراسات وكلام معقد وعلمي هيلاقي خبراء اقتصاد بيشروحه؛ هنا أنا بشرح للشخص العادي..


في البداية نشوف المعادلة دي

Min ROI = Risk Free + Risk

ال Min ROI يعني أقل عائد علي الاستثمار Minimum Return on investment ؛ يعني أقل حاجة تقبلها عشان تحط فلوسك في البيزنس دا

ال Risk Free دي يعني الفلوس والربح اللي ممكن تكسبه بدون مخاطرة؛ في مصر معناها الفايدة البنكية.

ال Risk ودي أصعب حته؛ المخاطرة بتاعة المجال دا

تعالوا نطبق بقي

ال Risk Free في مصر حاليا هو الفايدة البنكية الاعلي وهي 15% حاليا وممكن تحسبها 13% كمتوسط البنوك

ال Risk بقي ؛ هنا نتا شوف مجال البيزنس دا المخاطرة فيه تساوي كام؛ وهي ليها طرق علمية لحسابها بس ممكن نحسبها بالبلدي كده

تخيل معايا حد هيربي فراخ؛ لو قولنا هو احتمالية خسارة 100% من الكتاكيت ممكن تحصل امتي؟ نفترض ممكن مرة كل 3 سنين وفيهم تكون ربيت 10 دورات فراخ

يعني مرة كل 10 مرات ممكن تخسر كل فلوسك

يعني كده المخاطرة 10%

بكرر كده بالبلدي وبكرر دي طريقة بلدي عشان لو حد دارس هيخش يقولي ايه الهبل دا

يبقي هنا نفترض المخاطرة 10%

يبقي كده

Min ROI = 15% + 10% = 25%

يبقي متقبلش تخش المشروع دا أقل من 25% ربح سنوي

ممكن مجال تاني المخاطرة بتاعته أعلي ليكن 25%
فهنا متدخلوش أقل من 40% ربح وهكذا

طيب ليه نقرف نفسنا بالكلام دا

لاننا لو فكرنا في الرقم بس

ممكن يتعرض علينا 2 نوع بيزنس

واحد 20% والثاني 35%

فتلقائي الناس تقولك أبو 35%

لكن لما نقيس بالحسابات السابقة

ممكن نلاقي Min ROI للاول 17% ومعروض عليا 20% يبقي بيزنس كويس

الثاني ال Min بتاعه 50% ومعروض عليك 35% يبقي كده غلط تدخله

طبعا لازم نفتكر دايما

More Pain More Gain

كل ما ال Risk زاد يبقي لازم العائد يزيد؛ امال تجار المخدرات بيكسبوا كثير ليه؟ عشان ال مخاطرة عندهم مهولة فلازم المكسب يكون يستحق

وبرضك لو انتا في الخليج او اوروبا مثلا فهنا ممكن تكون الفايدة البنكية Risk Free عندك 3% فعادي ممكن تخش بيزنس بيكسب 10% سنوي؛ احسب المعادلة حسب معطيات دولتك

فممكن تلاقي بيزنس في الامارات تطلع المعادلة بتاعته 8% وهو هو في مصر يطلع 30%

اتمني اكون قدرت اشرحها كويس

اللي بينشروا الجهل والخرافات والهبد بيكونوا مخلصين جداً للهدف بتاعهم ومش بيتكسفوا منه. أنا بشوف ناس كل يوم صبح وليل لازم تنشر أي هبده

ومقصدش سياسة بس... هما مخلصين لنشر أي خرافات... سياسة اقتصاد تاريخ معلومات طبية غلط

ماكينة نشر الجهل لا تكل ولا تمل

الناس الأخرى اللي أعرف إن عندهم علم محترم مش بشوف عندهم إخلاص لنشر الوعي حتى 10% من إخلاص ماكينات الجهل دي

مش عارف هل بسبب انشغالهم ولا محرجين يحطوا معلومة بسيط صغيرة ومستصغرينها...

لكن الخلاصة إن بتوع الجهل بيكسبوا وكل يوم العقل الجمعي للمجتمع أقل من اليوم اللي قبله

يا شباب اللي يعرف معلومة حلوه هو بحث ولقاها صحيحة... اعلم إن بنسبة 99% أكيد في عالاقل 1 بيتابعك ميعرفهاش... انشرها عشان ال 1 دا ولو لقيت الباقيين قالوا معلومة قديمة ... متزعلش عشان نشرت حاجة معروفة... بالعكس افرح عشان الوعي بيزيد

افرح لو لقيت الناس بقت عارفه كل شيء انتا عارفه في الدنيا...

كده ربنا يوم القيامة لما يحاسبك على علمك هتقوله يا رب أنا كل معلومة عندي قولتها للناس لغاية ما تأكدت إن الكل بقى عارف كل اللي عندي مشلتش شيء.

اتعلموا من ماكينات الجهل المركب

((( فرقوا بين بوستات الرأي وبوستات المعلومات ؛ لو قولت لكم أني شايف أو حاسس بكذا فدا رأي شخصي مش معلومة )))

في ذكر هزيمة 1967 تعالوا نحكي قصة الحرب بتفاصيل أوسع شوية وبشكل مختصر برضك

*️⃣ قصة الحرب حصلت ان اسرائيل فضلت تتحرش بسوريا واسقطت لها شوية طيارات

*️⃣ عبد الناصر قرر يعمل عنتر فجلة وقرر يوم 22 مايو 67 قفل مضيق تيران (ايام ما كان بتاعنا) قصاد الملاحة الإسرائيلية؛ واللي ميعرفش موضوع الملاحة فبعد حرب 48 مصر عملت حظر ملاحة في خليج العقبة وقناة السويس قصاد إسرائيل؛ اسرائيل لما احتلت سينا في حرب 56 فضلت قاعدة لمارس سنة 57 ومقدرش الجيش بتاعنا يهجم عليهم أصلا وفي الاخر الأمريكان اتفقوا مع ناصر انه يلغي قرار فاروق الخاص بحظر الملاحة في خليج العقبة مقابل انسحاب اسرائيل وبالفعل قد كان...

*️⃣ جنرالات اسرائيل كانوا مقررين الحرب سابقا وبالقرار بتاع القفل قرروا الحرب؛ لانهم انسحبوا سنة 57 مقابل فتح القناة؛ وطالما اتقفلت يبقي نرجع تاني سيناء.

*️⃣ وبالفعل جهزوا الخطة بس كان في مشكلة؛ وزير الدفاع الاسرائيلي هو هو رئيس الوزراء وهو ليفي اشكول؛ دا مكانش عسكري بل رجل سياسي واقتصادي فمكانش معاهم قوي

*️⃣ بدأت الضغوطات عليه انه يمشي من منصبه ويجيب قائد عسكري ⚔️ مكانه؛ وبالفعل ليفي بدأ يعمل مفاوضات مع موشي ديان

*️⃣ تم الاتفاق علي موشي ديان؛ وفي مرة كان موشي رايح الاجتماغ مع ليفي فالتليفزيون الاسرائيلي سأله وانا شوفت دا بالفيديو بس للاسف مش لاقي الفيديو دا تاني؛ سأله عبد الناصر عمال يهددنا ايه تعليقك فهنا كان الرد التالي

عبد الناصر بيقول اللي الشعوب العربية عاوزة تسمعه؛ هو عليه ضغوط من الشعوب العربية فهو طالع يقولهم اللي عاوزين يسمعوه مش اللي هو عاوزة؛ هو عارف كويس قوي فارق القوة بينا واننا لو دخلنا حرب معاه هنهزمه بس هو مضغوط بقي من الشعوب.

*️⃣ نفس التعليق بتاع موشي ديان قاله الفريق محمد فوزي وزير الحربية فترة حرب الاستنزاف؛ قال ان ناصر مكانش عاوز يحارب اسرائيل سنة 67 بل كان عاوز يعمل مكاسب شعبية؛ وشوفوا وثائقي MBC القديم اللي كان جورج قرداحي اللي عاملة

*️⃣ تم الاتفاق علي ان موشي ديان يمسك المنصب اعتبارا من يوم 5 يونيو

*️⃣ المخابرات السوفيتية بعتت لعبد الناصر خطة الهجوم؛ وكمان الجواسيس المصريين زي رفعت الجمال (رافت الهجان) بعتوا ان تاريخ الهجوم هيكون 5 يونيو.

*️⃣ عبد الناصر قال في خطاب بعد 67 انه دعي يوم 2 يونيو قادة الجيش ومجرد دخل قالهم عندي معلومات ان اسرائيل هتهجم علينا خلال 48-72 ساعة يعني يوم 4 او 5 يونيو

*️⃣ المخابرات السوفيتية والسفير السوفيتي بعت تاني لعبد الناصر استعد للحرب بس احنا ك سوفيت بنديك نصيحة انك تستعد لكن متبدأش بالحرب

*️⃣ قادة الجيش لاحقا أكدوا الكلام دا وقالوا ان ناصر بلغهم في اجتماع يوم 2 يونيو ان اسرائيل هتهجم خلال يومين ثلاثة يعني إبلاغ ناصر للقادة بالحرب أمر مؤكد تاريخياً.

1️⃣ بعض القادة قالوا لاحقاً ان ناصر قال لقادة الجيش متبداوش بالحرب واستنوا اسرائيل تضرب الضربة الاولي وبعدين ردوا عليهم... وفي قائد مش متذكر اسمه ومش فاضي ادور قال مستحيل يا ريس نستحمل ضربة جوية؛ فناصر قاله دي الاوامر.

2️⃣ بعض قادة الجيش قالوا إن بعد ما ناصر مشي فعبد الحكيم عامر قالهم هو ناصر مكشوف عنه الحجاب يعني وهينجم؛ هيعرف منين معاد الحرب (ناصر قالهم اسرائيل هتهجم استعدوا ومقالش مصدر المعلومة منين) فعبد الحكيم قال دا تنجيم وهبل وإسرائيل مش هتعملها؛ والفعل دا كان من منطلق ان عبد الحكيم عامر عاوز يظهر إنه هو الجامد يعني وكده وناصر مش فاهم؛ صراع نفوذ يعني.

*️⃣ عبد الحكيم عامر قال مش ناصر بيقول الحرب يوم 5 يونيو؛ طيب قرار ب استدعاء كل قادة الجيش والفرق اللي في سيناء للقاء في القيادة المركزية في القناة يوم 5 يونيو الساعة 8 الصبح

*️⃣ مش واضح ومش معروف عبد الناصر عمل ايه الفترة من 2 الي 5 يونيو يعني قالهم الحرب بعد 3 ايام وبعدين خلاص كده ضميره ارتاح يعني وسكت ولا ايه...

*️⃣ قادة الجيش تركوا كتائبهم يوم 5 يونيو الفجر وتحركوا للقاء عبد الحكيم عامر في القناة وبالفعل وصلوا علي الساعة 7 او 8.

*️⃣ زي ما قولت لكم الساعة 8 الصبح اللقاء فالساعة 7 و 45 دقيقة الطيران الإسرائيلي دخل المجال الجوي المصري

*️⃣ عبد الناصر كان ساكن قريب من قاعدة جوية والقاعدة دي اتضربت؛ اتصل علي طول بقائد القوات الجوية وردوا عليه في مكتبه انه رايح يوصل عبد الحكيم عامر للمطار عشان رايح الاجتماع

*️⃣ عبد الناصر اتصل بقائد الدفاع الجوي قاله تعامل مع الطيران الإسرائيلي فالقائد قاله مش ممكن عشان طيارة المشير عامر في الجو فكده هنصيبها ولازم نستني لغاية ما ترجع.

.*️⃣ نفس المعلومة السابقة اكدها الفريق الشاذلي في لقاده في الجزيرة وثائقية وقال ان الدفاع الجوي كان متوقف في طريق المشير يعني من القاهرة الي القناة

*️⃣ صحيح يوم 30 مايو الملك حسين جه مصر بطلب من عبد الناصر؛ ناصر قاله هتمضي اتفاقية دفاع مشترك؛ الملك حسين رفض فناصر قاله أنا ممكن انفي ان طيارتك وصلت مصر؛ يعني بالبلدي هقتلك وادفنك هنا ونقوا طياراتك وقعت؛ الملك حسين وافق ومضي الاتفاقية وناصر أرسل الفريق عبد المنعم رياض ليصبح قائد الجبهة الأردنية؛ وبعت معاه فرق صاعقة ودفاع جوي عشان يعمل جبهة هناك

*️⃣ نرجع تاني ليوم 5 يونيو؛ محطة الانذار المبكر في الاردن (الفريق عبد المنعم رياض عملها) رصدت الطيران الإسرائيلي وهو جاي علي مصر وبعتت إشارة انذار لمصر (عنب عنب 🍇) بس للاسف كانت الشفرة اتغيرت يوم 4 يونيو ولم يتم الابلاغ بيها؛ شوفتم الحلاوة

*️⃣ الطيران الإسرائيلي استغل فترة ان الدفاع الجوي واقف + سلاح الجو المصري قائده مش موجود + كل الكتايب في خط المواجهة وسيناء القادة بتوعهم مش موجودين فقعد يتسلي علي الجيش المصري

بس وكانت النكسة

*️⃣ في تفاصيل كثير قوي زي سفريات شمس بدران وزير الحربية المصري في 67 الي الاتحاد السوفيتي؛ وسلسلة زيارات ابا إيبان وزير خارجية اسرائيل لأمريكا للتنسق (بالمناسبة هو كان معارض للحرب وكان مؤيد لمفهوم الأرض مقابل السلام يعني بعد 67 اسرائيل تعمل اتفاقية زي بتاعه 57 ؛ تنسحب من سيناء بس المرة دي مش بس الملاحة في القناة بل يكون في سلام شامل؛ لكن مصر رفضت العرض دا).

*️⃣ عامة في تفاصيل كثير... وبالمناسبة أمريكا مهجمتش علينا في 67 وساعد إسرائيل عسكرياً؛ ملقتش أي دليل على دا زي ما ناصر روج وقتها عشان يبرر الهزيمة بإننا كنا بنحارب قوي عظمي مش بس إسرائيل... بالعكس دا أمريكا لما الحرب بدأت قربت سفينة التجسس ليبرتي بحيث تعرف التفاصيل عالأرض راحت إسرائيل قصفت السفينة... وإسرائيل فضلت تقاوح وتقول مكنتش اعرف لغاية ما اعتذرت رسمي ودفعت تعويضات سنة 1980 بقمية 6 مليون دولار بالإضافة لفائدة الفلوس دي طول 13 سنة مقاوحة...

*️⃣ وبالمناسبة أمريكا لم تصوت ضد أي قرار لمجلس الأمن وقتها بخصوص إسرائيل. يعني القرار 233 اللي بيطلب من إسرائيل وقف إطلاق النار في سوريا أمريكا لم تصوت ضده... القرار 234 يوم 7 يونيو برضك وقف إطلاق النار أمريكا سابته... دا حتى القرار 236 اللي فيه تم إدانة إسرائيل باختراق وقف إطلاق النار أمريكا صوتت معاه بإدانة إسرائيل و القرار 237 اللي بيطالب إسرائيل باحتراق حقوق الإنسان أمريكا صوتت مع القرار ضد إسرائيل.

الخيانة الأكبر كانت في سوريا

*️⃣ الجيش السوري كانت مفروض متحصن في الجولان... اه فارق القوة لصالح اسرائيل بس الجولان جبل وحصن

*️⃣ الجيش الإسرائيلي لسه بيطلع الجبل

*️⃣ حافظ الأسد (وزير الدفاع) طلع بيان إن القيادة المركزية للجولان في القنيطرة تم احتلالها (اسمه البيان 66 التاريخي دوروا عليه عالنت).

*️⃣ الجنود السوريين مبقوش فاهمين طيب اسرائيل وصلت إزاي للقيادة واحنا قصادها واقفين؛ لفت من ورانا إزاي ووصلت للقنيطرة بتاعنا🤔🤔🤔

*️⃣ فالقوات السورية انسحبت وكالعادة انسحاب عشوائي.

*️⃣ فإسرائيل بعد كذا ساعة من بيان 66 من القيادة السورية باحتلال القنيطرة؛ وصلت للقنيطرة ودخلتها بالفعل

وكده تم احتلال الجولان حتي اليوم

بوست طويل لكن حرب 1967 بيتعمل فيها وثائقيات بالساعات الطويلة فأنا قولت بس أكتب شوية تفاصيل يمكن مش مشهورة قوي.

بالمناسبة استكمالاً

وزير الدفاع الأمريكي وقت 67 قال إنهم كانوا وقتها عملوا دراسة وقالت لو إسرائيل هجمت على مصر الأول فإسرائيل هتكسب خلال 7 أيام... أما لو مصر هجمت على إسرائيل الأول فهنا الوضع هيتغير وإسرائيل برضك هتكسب لكن هتحتاج 10 أيام..

تعرفوا إن موقع الأرشيف الوطني الأمريكي

مسجلين فيه اسم كل شخص مات في الحروب...

يعني مثلاً الحرب العالمية الثانية هتلاقيهم مقسمين أمريكا لولايات... تختار الولاية تلاقي المدن جواها... وتختار أي مدينة تعرف أسماء اللي قتلوا

دا لينك خشوا اتفرجوا

https://www.archives.gov/research/military/ww2/army-casualties


لما تروح لحرب أحدث شوية زي حرب فيتنام

هتلاقيهم عملوا تفاصيل أكثر

تلاقي أسم المتوفي واتولد امتى وهو كان بيخدم في سلاح ايه ومن مدينة ايه وولاية ايه ومات امتى... ومش بس كده لكن كمان بيقولك عرفوا يستعيدوا الجثة أم لا

لينك أهو اتفرجوا

https://www.archives.gov/research/military/vietnam-war/casualty-lists/state-level-alpha.html

حاولت أشوف الحاجات الأحدث زي العراق وافغانستان لقيت الموقع تحت الصيانة

https://www.dmdc.osd.mil/dcas/pages/casualties.xhtml

المهم المهم يتحرق الأمريكان

احنا بقى فين؟ ليه منعملش موقع زي دا لشهدائنا في حروبنا ؟ حرب 48 و 56 و 67 و 73 وحرب اليمن وتحرير الكويت؟

اتفقنا أو اختلفنا سياسياً مع نتائج وحكام مصر في الحروب دي

لكن التقارير دي بتعرفك مين وكام واحد بالظبط ضحي بنفسه عشان مصر...

القادة أسماءهم معروفه دائماً.. لكن الجنود... إنك تدخل الموقع تشوف الحي بتاعك وتعرف أسماء الشهداء من منطقتك...

ولا احنا اصلاً مش مسجلين وفيات الجنود

ليه مصر أخدت قرض 2.7 ثم 5 ثم 5.2 مليار دولار؟

في الكام سطر القادمين انا هشرح ايه اللي بيحصل؛ ونقطة إن دي قروض وهنلبسها احنا والأولاد والأحفاد أمر مفروغ منه

لكني هشرح بشكل براجماتي يعني هجنب المشاعر والموضوع مصالح

*️⃣ خلال أعوام 2018 و 2019 كان التدفق الدولاري لمصر يفوق الانفاق الدولاري ؛ وللتذكرة القروض تعتبر تدفق دولاري والسداد بتاعها انفاق.. بل ووصل ان ميزان المدفوعات موجب الفترة (يوليو الي ديسمبر 2019) والسياحة حققت اعلي ايراد ب تاريخها ؛ وتحولات المصريين في الخارج برضك.

*️⃣ مع نهاية 2019 بدأ تظهر بوادر الازمة الاقتصادية العالمية؛ وبدأ يحصل خوف وسحب استثمارات اجنبية في الاسواق

*️⃣ دخلنا 2020 وظهرت الكورونا؛ توقفت السياحة اللي كانت بتدخل 1.5 مليار دولار شهري لمصر ؛ وتوقعات بعودة 1 مليون مصري من العاملين بالخارج يعني ازمة في كله.

*️⃣ بدأ المستثمرين الاجانب يسحبوا فلوسهم ووصل السحب الي 21 مليار دولار خلال شهري مارس وابريل ؛مما اضطر المركزي للجوء للاحتياطي اللي انخفض 8.5 مليار دولار شهري مارس وابريل


دلوقتي السيناريو والتقارير بتقول إن مصر عندها عجز في ميزان المدفوعات 15 مليار دولار لو استمر الوضع كما هو؛. وضيف معاه خروج الاستثمارات

كده في طريقين

1️⃣ طريق العناد : مش هنروح للقروض دا الطريق التركي الحالي وكفاية تبص بصه ايه بيحصل في العملة التركية تعرف؛ للتذكير بس تركيا رقم 6 في السياحة بعدد 50 مليون سائح وايرادات 40 مليار دولار وكانت تستهدف 58 مليون سايح؛ هنا في مصر عندنا كارثة والسياحة اللي قولنا الافضل في تاريخنا كنا بنحلم ب 15 مليون سايح؛ فتخيل حجم الكارثة هناك... بص عالليرة وانتا تعرف. (السياحة مثال)

الطريق دا لو مصر مشيت فيه نشوف هيحصل ايه

*️⃣ نهاية العام هتلاقي الاحتياطي انكمش ل 20-25 مليار ؛ أفكركم بس ان عندنا 18 مليار دولار اقساط وسداد قروض في 2020.

*️⃣ لما الاحتياطي بتاعك هيقل بالشكل دا؛ فالدولار هيزيد بشكل مستمر

*️⃣ لما الدولار يزيد والاحتياطي يقل ؛الشعب هيبدأ يروح للدولرة فهنا طلب اضافي عالعملة

*️⃣ كده بنكرر سيناريو 2016 والمستثمرين هيبداوا يهربوا؛ هيقولك اللي بكسبه من السوق هخسره فارق سعر الدولار؛ والفايدة هتزيد عشان حد يوافق يسلف الدولة

*️⃣ فاكرين التضخم وارتفاع الاسعار بتاع 2016/2017 لما حصل التعويم ؛ هنروح الطريق دا


تعالوا بقي نشوف السيناريو الثاني ايه خطته

2️⃣ السيناريو الثاني : السيناريو دا مبني علي أن بكره أحسن؛ اه هو كده بجد 😊😊 ؛ فكرته إني هجيب الفلوس اللي مزنوقين فيها دلوقتي بالقروض وأخلص؛ وبالمناسبة القرض اللي اعلن عنه النهاردة 5.2 دا مدته 12 شهر؛ اما سندات الخزانة السابق طرحها فهي لمدد يصل بعضها ل سنة 2040 بقي.


فكرة السيناريو دا ليها شقين

الاول انا هأجل (الخازوق) لبكره؛ ولما ييجي بكره هيكون الوضع فك شوية والسياحة رجعت والتجارة العالمية؛ وكمان في 2021 اقساط القروض (القديمة) اقل وكده... فممكن وقتها يكون ربنا حلها ورجعنا تانب تدفق دولاري موجب.

الثاني : خلال السنة دي هتكون الدولة شافت طرق للوصول للمتهربين ضريبيا وزودت ايراد الدولة ومواردها بالشمول المالي ؛ ومفروض معاهم تكون عملت تقشف وخاصة فيما يخص الانفاق الدولاري للدولة.

طيب السيناريو الثاني دا بفرض انه بعد سنة والدنيا مبقتش أحسن ايه هيحصل؟؟ 🤔 🤔

ولا اي حاجة؛ هتقدم علي قروض تاني بفايدة اعلي ؛ وتكبر الخازوق لبكره

باختصار كده

الخيارين هما

*️⃣ تلبس خازوق النهاردة
ولا
*️⃣ تأجله لبكره بس احتمال يبقي خازوق أكبر

الحكومة اختارت السيناريو الثاني

ملحوظة

أنا بشرح ايه اللي حصل وايه وجهة النظر؛ انا مواطن من اللي بيحسبوا عالمشاريب زيكم والله ولست صانع قرار... فاللي معترض يكلم الدولة مش أنا عشان عارف هتخشوا تحسسوني اني وزير المالية 😂😂😂

في تارجت عند الشعب لازم يحققه

احنا نقول الحكومة هتمنع الجواز

فبسرعة نجمع الناس افراح وكتب كتاب

ايه دا ناس اتصابت

ايه دا ماتت

طيب يلا نعمل عزاء

ناس اتصابت في العزاء

ماتت

يلا نعمل عزاء تاني

وهكذا

العقلية الهمجية هتدمر مصر

المشكلة ان العقليات دي عارفه كويس انها لا معاها فلوس تدخل نفسها مستشفيات خمس نجوم

ولا عندها علاقات زي رجاء الجداوي

ولا عندهم ثروة فمش خايفين يموتوا؛ أهو مستقبل الأولاد متأمن

لا خالص الناس دي عارفه انها هتتبهدل في المستشفيات وحتي معهاش تجيب سعر الادوية؛ ولو لا قدر الله توفوا عيالهم هيتشردوا بعدهم

وبرضك بيخاطروا بحياتهم

طيب لييييه حد يفهمني لييييييه

معلش بوست عادي بس اتحرق دمي من كمية الأفراح وكذلك المياتم اللي بسمع عنها

دي مش مواصلات مضطر تركبها عشان تروح شغلك

دا تعمد قتل

أنا مش شيخ بس شايف اللي يستهتر بحياة غيره ويصيبه فيموت يعتبر قاتل للنفس عن عمد

ولازم الازهر يطلع يقول الموقف والحكم الشرعي لتعمد اصابة الاخرين بالفيروسات ب الاستهتار عمداً

في خطأ كارثي بيحصل لما تيجي تقرى التاريخ وهو إنك تقرر تحكم على سنة 500 مثلاً بمعاييرك الحالية لسنة 2020

وتعالوا نوضح دا بمثال وحركة تاريخية شهيرة وهى الفتوحات الإسلامية وحوار "الجزية"

تقول هل من الحريات وحقوق الإنسان ووو إنك تروح تغزو دولة غيرك عشان مختلفين عنك في الدين وتفرض عليه "الجزية".

هنا بقى الحكم دا جاب معايير سنة 2020 وهى إن في حريات بشكلها الحالي وحدود للدولة وكده ومعتدي ومحتل والمفاهيم دي كلها. وتطبقها على أحداث من الماضي

في الماضي كانت الدول إما بتقوم ب غزو الدول المجاورة أو تتحالف معاهم لغزو الآخرين... والخيار الثاني هو إنك تتعرض للغزو

أما مفهوم الدولة الكيوت الطيوبة اللي ماسكة مصاصة ورابطة فيونكة وقاعدة تلون وترسم دا في عالم ميكي... مكانش في عالم ميكي زمان.

فحالياً الدول موجودة بالمفهوم المتعارف عليه وليها حدود واضعة ومسجلة وأمم متحدة وحدود بحرية وجوية وكله... لكن زمان مكانش فيه... حدودك هى أقصى نطاق يقدر جيشك وفرسانك يحموه.

أما النقطة الثانية دي موضوع الجزية... فبرضك المصطلح دا تلاعب ... لإن زمان لما جيوشك بقى بتخش المنطقة بتعمل ايه؟ بتفرض ضرائب على أهل البلاد اللي احتلتها... مصر مثلاً لما الرومان احتلوها كان في ضريبة "وفيات" يعني لما يموت لك حد تروح تدفع ضريبة عليه عشان يسمح لك بدفنه وميراثه وكده.

جه بقى الإسلام دخل المناطق دي وشعب المناطق دي بيدفع ضرائب زي ما قولنا للدولة اللي كانت قبل الإسلام... وقالهم بصوا إحنا هنعدل الضرائب دي ؛ هنعمل تغييرات في اسمها هيبقى "الجزية" وهيبقى ليها قواعد 1-2-3... بس بصوا لو انتا بقيت مسلم مش هتدفع الجزية... هتتغير اسمها وهتبقى زكاة ...

يعني باختصار كده... المواطن دا كان قبل دخول الإسلام بيدفع فلوس اسمها ضرايب... دخل الإسلام قالك اسمها جزية... الراجل بقى مسلم فاسمها بقى زكاة

طبعاً ممكن النسب تختلف واللوائح والبنود وأصلاً الضريبة مكانتش مبلغ قانوني دا كان الملك يقرر يفرض اللي هو عاوزه عالشعب

فلما تيجي تحكم على التاريخ متبقاش أهبل وتقول أطبق معايير 2020 في الحكم على حدث سنة 1000... شوف ايه المعايير والأنظمة المتعارف عليها وقتها والحدث التاريخي دا بالنسبة للمعايير بتاعة الزمن دي ايه.

عشان ميطلعش لك واحد مدلس زي يوسف زيدان يقولك صلاح الدين قفل الأزهر وهدم الآثار "أهرامات"... فتلاقي الخبر صحيح.. بس الأزهر كان منبر لنشر التشيع مش الأزهر بتاعنا...

وموضوع الآثار فأيام صلاح الدين مكانتش الآثار اسمها آثار ... يعني مكانش في سائح إيطالي يقولك هروح اشوف الأهرامات... المفهوم دا مكانش موجود وقتها... الآثار كانت مجرد "أثر لشعوب قديمة" وليس لها أي قيمة بالنسبة لهم

مفروض في مقال ضخم أنا كنت بحضر له في مجال الحكم على التاريخ بغير المعيار الزمني... بس ممكن أكتفي بـ دا مؤقتاً

تذكير للجميع : زي النهاردة كمان 3 أسابيع يعني تحديداً يوم 30 يونيو؛ مصر 🇪🇬 هتبدأ في استخدام ال IBAN وبكده احنا الدولة رقم 77 في تطبيقه

*️⃣ لو انتا بتبعت تحويلات أو بتستقبل تحويلات ليكن والدك أو زوج او أخ في الخليج بيحول فلوس ؛ فلازم تتصل بالبنك بتاعك وتسأله رقم IBAN بتاع حسابي ايه.

*️⃣ رقم IBAN في مصر عبارة عن 29 رقم؛ وطبعاً بدايته EG عشان مصر.

*️⃣ بعد 30 يونيو هتفضل لسه منظومة التحويلات الحالية شغالة يعني لو انتا متصلتش بالبنك وعرفت رقمك وحدثته عند الجهة اللي بتحولك؛ هيفضل بييجي لك التحويلات؛ لكن لكن لكن دا مؤقتاً لغاية ما يقرر المركزي الانتقال الكلي لل IBAN ؛ فالطيب أحسن وحدث بياناتك بدل ما تنسي وتلبس.

*️⃣ مش شرط تتصل بالبنك وتقعد يوم عالتليفون أو تروح الفرع وتتفيرس؛ خش الأونلاين بنك بتاعك وشوف حسابك هتلاقيهم ضافوا لك رقم IBAN.

*️⃣ منظومة IBAN او نظام التكويد دا باختصار كده هو ان رقم حسابك الحالي ممكن يكون 1000031343 في بنك QNB مثلا وييجي عميل تاني في CIB مثلاً برضك رقم حسابه 1000031343 برضك عادي؛ زي كده ما في واحد معاه نفس رقمك بس شبكة تانية 011/012/015... فعشان يحلوا اللخبطة دي عملوا IBAN ودا باختصار رقم حسابك مش هيتكرر في كوكب الأرض؛ يعني هتقول لاي حد في العالم خد دا رقم حسابي حول لي فلوس؛ مش محتاج تقعد تقوله دا حسابي دولة مصر بنك الأهلي فرع الرحاب مثلاً؛ لا خلاص الموضوع ب IBAN رقمك هيبقي فيه كل الداتا دا مدمجة.

*️⃣ رقم IBAN هيخلي التحويلات وخاصة الدولية أسرع لانه مبقاش محتاج مراجعة بشرية. تخيلوا معايا بنك زي HSBC مصر كان موحد السويفت وهو EBBKEGCX ومش حاطط تفاصيل للفروع وبنك اسكندرية ALEXEGCX (طبعا في الاثنين بتزود XXX) وتيجي تحول تروح باعت لسويفت مركزي وهو بقي يشوف الحساب دا في انهي فرع يحوله؛ ال IBAN بقي دقيق هو فلان الفلاني مباشرة.

*️⃣ تاني متنساش تجيب رقم IBAN بتاعك وتحدثه؛ ومتعتمدش ان البنك المركزي هيسمح بتحويلات بالنظام القديم انها تستمر بعد 30 يونيو؛ دا هيكون مؤقت ويقدروا في اي لحظة يوقفوها وتلاقي لخبطة في حياتك أو شغلك... بكرر اهو الطيب احسن.

*️⃣ ال IBAN هيتم تطبيقه محلي ودولي. يعني حتي التحويلات المحلية.

*️⃣ تطبيق ال IBAN مهم جداً في خطوة التحول المالي لمصر اللي هيبدأ تفعيله من 1 يوليو بس لسه تجريبي Soft Opening وبعد كده نخش في ال Hard 😂😂😂😂

تحديث :

*️⃣ ال IBAN لتطوير التحويلات البنكية اللي دلوقتي بتعملها بالسويفت ؛ مش ل ويسترن يونيون ولا الحوالات اللي بالبطاقة.

*️⃣ ال IBAN مش مدعوم في كل الدول؛ مصر رقم 77 ؛ امريكا وكندا والصين واليابان وكوريا الجنوبية واستراليا وغيرهم مفيهمش IBAN؛ فمهواش تخلف قوي.... ال IBAN بالاساس أوروبي ثم دعم ببعض الدول خارج اوروبا زي الخليج والبرازيل وبعض الدول الأفريقية اللي النفوذ فيها قوي للشركات الاوروبية.

تعالوا نفهم أسعار الكهرباء الجديدة ؛ وخاصة الناس اللي عدادها كارت عشان هتقعدوا تتفاجئوا وتتصدموا


تعالوا نحكيها خطوة خطوة من أول واحد معندوش غير لمبة لغاية فيلا ضخمة مكيفة بتتسهلك 5 الاف كيلو ؛ وخد بالك من اللي هتلاقيني حاطط فيه نجمتين *️⃣*️⃣

الكلام دا هيطبق اعتبارا من 1 يوليو يعني فاتورة كهرباء 1 اغسطس

*️⃣ بدات تستهلك فاول 50 كيلو هتتحاسب ب 38 قرش الكيلو ودلوقتي سعرهم 30 قرش الكيلو؛ يعني الزيادة 8 قروش في الكيلو.

*️⃣ من الكيلو 51 هتتحاسب ب 48 قرش الكيلو مقابل 40 قرش حاليا. دا لغاية ما توصل للكيلو 100

*️⃣*️⃣ لما تستهلك الكيلو 101؛ الحكومة هتقولك سوري هنعيد حساب ال 100 السابقين؛ فاكر اول 50 كيلو كنا حاسبناك عالكيلو ب 38 قرش ومن 51 الي 100 حاسبناك ب 48 قرش ؛ هنعيد الحساب وكلهم هيعاد تسعيرهم ويبقوا 65 قرش الكيلو ؛ يعني الكيلو 101 هيبقي سعره 22.65 جنية ؛ دا عبارة عن 22 جنية اعادة تسعير ال 100 كيلو الاوائل + 65 قرش سعر الكيلو الجديدة... حاليا الكيلو 101 سعره 15.5 جنية.

*️⃣ تفضل بقي تتحاسب ب 65 قرش الكيلو لغاية الكيلو رقم 200

*️⃣ من الكيلو رقم 201 الي الكيلو 350 يعني ال 150 كيلو دول هتتحاسب علي الكيلو فيهم بسعر 96 قرش الكيلو مقابل 82 حالياَ

*️⃣ من الكيلو 351 الي الكيلو 650 هتتحاسب بسعر الكيلو 118 قرش الكيلو مقابل 100 قرش حالياً


يعني مثال قبل ما نكمل

انتا استهلكت 600 كيلو

هتدفع 200 كيلو بسعر 65 قرش يعني 130 جنية
وفي 150 كيلو بسعر 96 قرش يعني 144 جنية
وال 250 كيلو الفاضلين تدفع 118 قرش الكيلو يعني 295 جنية

يعني تدفع 569 جنية

ولو 650 كيلو هيبقي 628 جنية

*️⃣*️⃣*️⃣ حطيت نجمة ثالثة عشان دي حاجج هتطبق لأول مرة؛ لما تيجي تستهلك الكيلو رقم 651 الحكومة هتقولك هنعيد تسعير ال 650 كيلو السابقين ونحسبهم كلهم ب 118 قرش الكيلو ؛ فاكر اهو قايلك ال 650 كيلو ب 628 جنية صح؛ نعيد التسعير بقي يبقي 650*1.18 يعني تساوي 767 جنية ؛ انتا دافع 628 جنية يبقي نخصم منك مرة واحدة 139 جنية.

*️⃣ من الكيلو 651 لغاية الالف هتكمل عادي خالص بسعر 118 قرش... يعني لو استهلكت كده 1000 كيلو هتدفع 1180 جنية

*️⃣*️⃣ لما تيجي تستهلك الكيلو رقم 1001 الحكومة هتقولك تعالي نعيد تاني تسعير ال 1000 كيلو الاوائل ؛ كنا حاسبناك عليهم ب 118 قرش؛ لا هنحاسبك عليهم ب 145 قرش يعني هيخصم منك 270 جنية

أمثلة سريعة مقارنة بين الوضع الحالي والوضع من 1 يوليو

*️⃣ 100 كيلو = الان 30 جنية هيبقي 38 جنية أي زيادة 26.6%

*️⃣ 300 كيلو = الان 182 هيبقي 226 جنية أي زيادة 24.1%

*️⃣ 500 كيلو = الان 373 هيبقي 451 جنية اي زيادة 20.9%

*️⃣ 700 كيلو = الان 593 هيبقي 826 جنية أي زيادة 39.2%

*️⃣ 1100 كيلو = الان 1595 هيفضل نفس المبلغ بدون زيادة أي الزيادة 0%

*️⃣ 3000 كيلو = الآن ومستقبلاً 3420 جنية أي 0% زيادة

سبب عدم زيادة الشريحة الاخيرة (فوق الألف) هو أنها غير مدعمة حالياً وبناء عليه ثابته؛ ورفع الأسعار هدفه خفض الدعم مش تحقيق ربح اضافي من كبار مستهلكي الطاقة لدعم الشرائح الأقل.

*️⃣ متنساش تضيف رسوم الزبالة

*️⃣ الحكومة أعلنت عن أسعار السنوات القادمة فبلاش تتفاجئ يوليو القادم إن في زيادة.

معلش بوستين ورا بعض (خطتي 1 بوست يومي بس) ... لكن دا بسبب إن النهاردة الحكومة أعلنت عن الأسعار الجديدة فقولت اشرحها للناس.

لما بيطلع أي خبر سلبي... يعني ضرائب أو زيادة في الكهرباء... الفيس بيتحول لنوعين أساسيين من البوستات:

*️⃣ النوع الأول يقعد يشتم... يلا نشتم وندعي عليهم؛ وطبعاً حافظين البوستات دي.

*️⃣ النوع الثاني يقعد يدور في كوكب الأرض على مكان حصل نفس الشيء السلبي دا فيه؛ ويقول أهو بيحصل في كل مكان.

صراحة أنا مش بحب أنشر أي من النوعين دول... أنا بحب لما يحصل خازوق أقعد اشرحه للناس... وهنا بييجي لي تعليقات من نوعية:

1️⃣ في ناس تقولي يعني تفرق في ايه إنك تعرف الخازوق مهو كده كده هتلبس.

دا صحيح هتلبسه بس يفرق إنك تكون عارف... يعني مثلاً الحكومة قررت زيادة أسعار الكهرباء... انتا عارف إن في زيادة وقررت تشتمهم... لكن الشتيمة دي هتفيدك في شيء؟ طيب ما تشتم برضك بس تقعد تحسب وتشوف تأثير القرار دا عليك ايه؟ تجيب فواتيرك السابقة وتخمن التكلفة اللي هتزيد عليك... وبكده ممكن من قبل ما تبدأ شهر يوليو عارف إن في 50 أو 100 أو 200 جنية هتزيد عليك في مصروف البيت كهرباء.. تشوف تحل الموضوع دا إزاي. مش كده!!!

2️⃣ في ناس بقى تطلع تقولي إنتا بتبرر لهم!!

النوعية دي بتعصبني... نوعية بقري عجالي جاموسي كده متفهمش هى بتفكر بأنهي عضو في جسمها بس أكيد مش المخ... نوعية تحسسك إنك عمرو أديب يعني بتقبض زيه ربع مليون دولار شهري عشان تطلع تقول القرار جميل (دا مرتبه بجد) !!! أنا بشرح لكن أبعاد الخازوق ومدى تأثيره المالي عليك... فدا مش تبرير.

بوست شرح شرائح الكهرباء وصل إلى أكثر من 600 شير ولصعوبة الرد على كل تعليق دي أكثر الأسئلة تكراراً

1️⃣ هو مش السيسي كان أجل رفع الدعم 3 سنين بسبب الكورونا؟ إيه الزيادة دي؟

دي معلومة مش دقيقة وصلت للناس.. الحكومة كانت مقرره رفع الدعم خلال سنتين 2020/2021 و 2021/2022 لكن السيسي قالهم خلوا الدعم يتشال في 5 سنين... فالحكومة وزعت الزيادة على 5 سنين بدلاً من سنتين... يعني الزيادة الظريفة اللي شوفناها كلنا دي مفروض كان هيحصل أدها مرتين ونص لولا الكورونا.

2️⃣ هى مش وزارة المالية في فبراير 2020 صرحت إن فاتورة دعم الكهرباء في النصف الأول من العام المالي (يوليو-ديسمبر 2019) كانت صفر جنية؟ فإزاي في دعم؟

تكلفة إنتاج الكهرباء انخفضت ولاتزال تنخفض؛ فنتيجة للانخفاض فالشريحة الأعلى الغير مدعومة (فوق 1000 كيلو) كانت وزارة الكهرباء بتكسب منها فلوس... كم الفلوس اللي كسبتها كان أكثر من الدعم بتاع الغلابة (الشرائح المنخفضة). فالصافي كده مفيش دعم... لكن مش معنى كده إن في ناس مش مدعومة... في ناس مدعومة بس اللي فوق شايلنهم. والخطة الحالية محدش هيشيل حد وكله هيترفع الدعم من عليه عدا أول شريحتين"

*** موازنة عام 2020/2021 اللي هتبدأ 1 يوليو مذكور في البيان المالي بتاعها جدول 7 صفحة 77 إن دعم الكهرباء صفر... كده فهمنا الصفر جه منين وإزاي في دعم بس صفر.

3️⃣ طيب ليه عاوزين يشيلوا الدعم؟ مش لما الغني اللي بيستهلك كثير بقىنا نكسب منه فندعم الفقير اللي بيستهلك قليل؟

وزارة الكهرباء عليها ديون بمئات المليارات لإنشاء محطات الكهرباء المختلفة دا غير تطوير الشبكة؛ وفي كمان قرض 25 مليار دولار الخاص بالمفاعل النووي بالضبعة.. فلازم الوزارة تكسب فلوس عشان تعرف تسدد شوية من ديونها.

4️⃣ شرائح الكهرباء بتفرق اللي عنده كارت عن اللي شغال فاتورة؟

لا الإثنين نفس الشرائح وزي بعض مفيش فارق... لكن اللي بيستخدم الكارت لازم ياخد باله من عميلة إعادة المحاسبة اللي بتحصل في الكيلو 101 و 651 و 1001 عشان ميلاقيش الرصيد خلص والكهرباء قطعت فجأة.

5️⃣ الكهرباء بتكلفنا كام؟

السؤال دا محدش يعرف إجابته لكن الوزارة قالت إنك لما تعدي 650 كيلو هيتشال الدعم ونحاسبك سعر الكيلو 118 قرش... ممكن يكون دي التكلفة... ولما تعدي 1000 الحكومة هتحاسبك 145 قرش يعني هامش ربح كويس.

6️⃣ لو أنا معايا عداد كارت ؛ العداد بتاعي هيعرف الشرائح الجديدة منين؟

شركة الكهرباء بتقولك حط الكارت في العداد قبل ما تروح تشحن؛ لما بتحط الكارت بيتم تحميل استهلاكك والشرائح بتاعتك؛ تروح الشركة عشان تشحن أو فوري فهنا هيتم تحميل الشرائح الجديدة ومحاسبتك عليها ولو فات شهور تتحاسب بأثر رجعي... لو هتشحن من موبايلك NFC بالفيزا فالأبلكيشن متوصل بالإنترنت وهينقل للكارت الشرائح الجديدة.

7️⃣ لو مدفعتش الفاتورة هيحصل ايه؟

سبق وأعلنت وزارة الكهرباء قبل سنة تطبيق الفائدة البنكية؛ يعني الوزارة قالت لو مدفعتش فاتورة هيعتبر إنك واخد قرض من الوزارة بسعر الفاتورة دا وقالوا إن القرض "الفائدة" هتكون الفائدة الخاصة بالبنك المركزي + 1% رسوم إدارية... يعني مش هيتحسب غرامة تأخير بل هيحسب إنك واخد قرض من وزارة الكهرباء بيعد عليك فائدة... على حد علمي لسه متطبقش دا بالرغم من إنهم قالوا عليه أبريل 2019.

8️⃣ المحصل مش بييجي يقرى العداد أعمل ايه؟

كل شركات الكهرباء دلوقتي فعلت رقم واتس آب؛ روح الشركة اللي تبعك وخد الرقم وفي معاد محدد خاص بيك هتصور لهم العداد وتصور آخر إيصال عندك... نصيحة بس ابقى صور العداد كل 5 أيام كده بحيث يبقى عندك صور كثير وإنتا عارف الباقي... لكن خد بالك في كشاف برضك هينزل يشوف القراية.

9️⃣ليه الفاتورة كل شهر تيجي لي باستهلاك مختلف خالص عن اللي قبله؟

عشان الفاتورة بتحسب من تاريخ أخذ القراءة؛ نفرض العداد جه يوم 20 وبعدين جه يوم 29 الشهر اللي بعده؛ كده أخد القراية بتاعة 29 يوم+ 10 الشهر السابق يعني استهلاك 39 يوم... تخيل راح بعدها جاي يوم 13 في الشهر يعني كده أخد قراية 14 يوم استهلاك.... عرفت المشكلة في ايه.... فالأفضل ابعت بنفسك على الواتس آب.

🔟 ايه هو السعر العالمي للكهرباء؟

بصراحة معرفش السؤال دا لإنه بيختلف من دولة لأخرى وحسب مصدر توليد الكهرباء والضرائب والرسوم. فالسعودية سعر الكيلو فيها 77 قرش للاستهلاك أقل من 6000 كيلو و 130 قرش للاستهلاك فوق 6 الاف كيلو. الإمارات عندهم الشرائح 101 قرش أقل من 2000 كيلو وبتوصل لـ 167 قرش للي فوق 6 الاف كيلو. أمريكا المتوسط 13.19 سنت يعني 215 قرش

الحكومة أعلنت منذ قليل عن الإجراءات الجديدة للتعايش الفترة من 15 الي 30 يونيو

طبعا هتلاقوها في كل الجرايد مكتوبة والمواقع

أكثر حاجة لفتت نظري ان الحكومة يبدو انها هتطبق سياسة مكافأة وعقاب المحافظات طبقا لحالات الاصابة

يعني قالوا بالنسبة للمساجد هنبدأ فتحها من 1 يوليو لكن هيختلف الوضع

فمحافظات زي جنوب سيناء والبحر الأحمر ومرسي مطروح دول الأقل اصابة وبناء عليه هيفتح المساجد بهم

ونفس المحافظات دي (البحر الاحمر وجنوب سينا) هيتفتح لهم السياحة تدريجي

اما محافظات القاهرة والجيزة والقليوبية (القاهرة الكبري يعني) دول الاكثر اصابة وبناء عليه لا يتوقع فتح المساجد فيهم

حلوه الحركة؛ صايعه؛ تخلي الناس هي السبب في الاجراءات عندها؛ اتحركوا في محافظتكم كثير وزودوا الاصابة وبالتالي هتفضل محافظتكم مقفولة...

صايعة

كثير منا تابع ان محلات Zara هتقفل ما بين 1000 الي 1200 محل حول العالم وهتتحول للبيع الاونلاين؛ وطبعا قبلها شوفنا القفزات في ثروة جيف بيزوس وحسدناه لغاية ما المخازن بتاعته ولعت 😂😂

الكورونا بتشقلب السوق العالمي وسرعة وتيرة التجارة الالكترونية

تعالوا نفكر سوا كورونا هتأثر إزاي علي السوق المصري في مجال التجارة الإلكترونية وكل ما يتبعه بتأثير الفراشة

الأول نبص علي شوية معطيات

*️⃣ السوق المصري متخلف جداً في المجال دا؛ فطبقاً لمؤشر التجارة الالكترونية الصادر من الأمم المتحدة 2019 الذي يضم 152 دولة ف مصر في الترتيب 102؛ وتأتي بعد دولة افريقية مثل بتسوانا 100 والسنغال 98 وغانا 97 وتنزانيا 96 ودول كثير اخري؛ افضل دول أفريقية هي موريشيوس 58 وعربيا الامارات 28. المراكز ال 5 الاوائل هم هولندا ثم سويسرا ثم سنغافورة ثم فنلندا ثم انجلترا.

*️⃣ نسبة التجارة الاكترونية في مصر نهاية 2019 متوسط 5-7% من حجم التجارة في مصر وتقدر ب 17 مليار جنية (تقديرات).

*️⃣ طبقاً للجنة الاتصالات في مجلس الشعب مايو 2019 فإن حجم التعاملات الإلكترونية في مصر 2 مليار دولار ودا يشمل اي خدمة عالانترنت حتي لو حجز فنادق وتذاكر طيران

*️⃣ متوقع ان الكورونا تسبب نمو ضخم في التجارة الاكترونية في مصر لتصل الي 15% بنهاية 2020 دا بسبب ان التباعد الاجتماعي هيجبر الملايين علي تجربة الشراء عبر الانترنت.

*️⃣ التباعد الاجتماعي تسبب ان لاول مرة شركات تطلق خدمات عبر الإنترنت زي بيع السيارات (غبور عملها) ودي خدمة موجودة من سنين بره.

*️⃣ الشمول المالي هيخلي الحكومة توفر معظم الخدمات الحكومية عبر الإنترنت كمان.

طيب من المعطيات السابقة هتخلينا نفكر هو السوق المصري أصلا جاهز للتحول دا؟ بصراحة في مشاكل كثير وجاري العمل علي حلها

*️⃣ البنية التحتية محتاجه تطوير؛ ودي كان وزير المالية قال انه هيتم مضاعفة الاستثمار فيها 300% الموازنة القادمة. وبصراحة متأكدتش لسه من دقة التصريح لكني حالياً بذاكر موازنة 2020/2021 وهنتكلم عنها في بوستات لاحقاً ونفهم سوا ايه هيحصل السنة الجاية.

*️⃣ المدفوعات: مفيش تجارة الكترونية بدون تسهيل المدفوعات؛ وحالياً البنك المركزي بيدعم شركات ال FinTech وشوفنا تحسن ضخم في خدمات زي فودافون كاش ومحافظ البنوك اللي بقيت تقدر تدفع بيها خدمات كثيرة.

*️⃣ كروت ميزة انتشرت بشكل ضخم ؛ دا حتي العمالة الغير منتظمة تم عمل 2 مليون كارت ميزة ليهم (عارف دول مش بتوع شوبنج اونلاين؛ بس دا حاليا وهقولك ليه في الاخر)

طيب ايه تاني هيتشقلب الفترة القادمة؟

*️⃣ شركات الشحن؛ بالرغم من حجم السوق المصري بس الشركات المصرية في المجال عشوائية وضايعه وشغالة بطرق بدائية غالبيتها؛ النمو الضخم في التجارة الالكترونية هيخلي السوق دا يتشقلب وهيتضخ فيه مليارات وهنسمع عن شركات شحن جديدة كل يوم؛ ومش لسه هنسمع دا بالفعل بقالنا فترة بنسمع لكن هيزيد بقي.

*️⃣ الحكومة : هنا بقى الحتة الصعبة؛ زمان زي ما قولنا الناس اللي عالنت دي بتمثل 5% يعني 95% أوفلاين عالأرض؛ لكن مع النمو المستمر الضخم في التجارة الالكترونية هتخلي الحكومة تركز؛ فدا هيخلينا نشوف سيل من التشريعات والقوانين؛ يعني مع الوقت هنشوف الفاتورة الافتراضية معترف بيها ومش لازم ورق ومختوم بالحبر والتخلف دا؛ وطبعا نتذكر ان يوم 1 يوليو بداية الفاتورة الضريبية الإلكترونية اللي منعرفش عنها حاجة 😂😂

*️⃣ الرقابة : دي نقطة محورية صعبة ؛ عشان التجارة الالكترونية تتم وتنمو والناس تثق فهيا لازم الجهات الرقابية كمان تتطور وتفهم طبيعه شغلها؛ بحيث تقدر تحس بالأمان وانتا بتطلب أونلاين؛ ومتقعدش لازم تتصل بتليفون يقولك فين الفاتورة المختومة وبعدين يعاملوك بطريقة ما انتا اللي عبيط مشتري من النت؛ التخلف دا لازم ينتهي... مش ممكن تنمو بشكل حقيقي دون تطوير في الجهات الرقابية؛ واكيد مفهوم قصدي تطوير حقيقي علي أرض الواقع مش شوية قرارات عالنت ونتصور جنبها.

*️⃣ الانفلونسر واليوتيوبر : حبايبي واصحابي اللي مش بحب اكتب حاجة عنهم عشان ميتصدموش في مستقبلهم؛ نمو التجارة الالكترونية هيخليهم محتاجين مسوقين عالانترنت أكبر؛ فدا هيخلي الشغل اكثر ؛ حلو اهو خبر جميل؛ لكن برضك الدولة هتقول الناس دي مش بتدفع ضرايب ليه هما مش بيحققوا دخل! يلا افتحوا لي ملف في الضرايب لكل واحد منهم (دا بفرض ان الملف متفتحش دلوقتي 😔) خدوا بالكم ؛ اديني قولت ؛ دا لو انتم يا يوتيوبرييين هتقروا بوست طويل زي دا 😜😜 احسن احسن ادي اخرة اللي مش بيحب القراية 🙈 🙈.

مش عاوز أطول عليكم لكن البلد بتشقلب بهدوء

بس هل معنى كده ان الناس اللي أونلاين هيعيشوا عصر ذهبي؟

مؤقتا الإجابة القصيرة أه لكن فعلياً بعد مرور شهور قليلة فعالم الأوفلاين هيتحرك ويطلع عالنت؛ اه كان السوق عالانترنت كان صغير بس برضك التجارة قليلن؛ الصعوبات اللي هيواجها الكبار عالأرض هتجبرهم يطلعوا عالنت فهنا هيبقي الصدمة المزدوجة؛ بتوع