شباب عاوز منكم خدمة سريعة

في حد كان دخل من شهر حط صور بالغلط لمحل بقاله في الخليج، حطها لدكان تك علي جوجل مابس

بقالنا شهر عمالين نبعت لجوجل ونعمل تكت ان جوجل تقتنع وتشيل الصورة مفيش... ونحط احنا صور تروح محطوطة في الاخر وصورة الراجل دا هي اول صورة متفهمش ليه.

فالحل بقى تعملوا ريبورت للصورة

خشوا دكان تك من اللينك تحت واختاروا الصورة وال 3 نقط اللي فوق واعملوا ريبورت للصورة انها مش بتاعة المكان

ريبورت للصورة مش ريبورت للمكان 😂😂 ركزوا الله بكرمكم

1️⃣ دوسوا اللينك هيفتح في جوجل مابس

2️⃣ افتحوا الصور هتلاقوها اول صورة

3️⃣ وانتم عالصورة دوسوا عال 3 نقط اللي فوق بعض فوق يمين او شمال حسب لغة الخريطة واختاروا Report او ابلاغ

4️⃣ اي شيء هتختاروه شغال بس الانسب هو
Off topic

Content doesn't pertain to an experience at or with this business

بس فعليا اي شيء شغال

تحديث في ناس ظاهر لها خيار
Not a photo or video of the place

احسن وافضل



لعل وعسى تتشال

https://maps.app.goo.gl/Ei9RDrpqtVqY5xyD7?g_st=ac

من الحاجات اللي توريك إن OpenAI معاها فلوس كثير قوي، إنك لما تبعت رسايل لـ Chat مش بتخصم من الليميت، وفقط Work وCodex اللي يخصموا من الليميت، عكس كلود لو قلت له صباح الخير، هيخصمها من الليميت...

*️⃣ عشان كده بستغرب الناس اللي تقولك مفروض ChatGPT يقلد كلود ويدمج المحادثات مع Work، طيب ليه يا بشر. يعني لما بنخلص الليميت بنقعد نرغي في المحادثات، عكس كلود تخلص الليميت تقفله.

*️⃣ كمان شيء لما الشات يديك Reset تدوس عليه، فهنا يبقى معاد الريست الأسبوع بقى بعد 7 أيام من وقت الريست دا، كلود الريست عندي بتاعه يوم الجمعة 2AM، روحت عملت ريست يوم الأربعاء بالليل قالي الليميت اتجدد، بس برضه هنجدد في معادنا يوم الجمعة 2AM، فكنت هعيط 😭😭😭.

*️⃣ فلوس كثير عند عم سام البسكلته، لكن داريو حريص ومش بيبعزق، لكن في النهاية كله بيقلد كله، وبيقولك الشات هيعمل باقة برو ماكس بـ500 دولار عشان الوحوش اللي باقة الـ200 مش بتكفيهم، اللي هي بالمناسبة 20x باقة الـ20 دولار، غالبًا باقة الـ500 لو نزلوا هتبقى 50x أو 60x باقة الـ20 دي من باب التشجيع.

⬅️ طبعًا كل دا للناس اللي بتشتغل بيه، عشان الناس اللي بتستخدم AI في سؤال وجواب خسارة تدفع 1 دولار حتى، والمجاني كفاية، بس قايتك كثير في شغلك أي كان مجال إيه. بس خد بالك النداهة هتندهك، هتخش تشترك بـ20 ثم 100 ثم تشترك في كذا شيء 😭.

من مزايا ال Ai إن معندوش "يوووووه بقى" فمش هيعترض، يعني مثلاً بعمل حاجة في شغلي ب كلود كود وبعدين قولت له عاوز كذا كذا وبالفعل عمله زي ما أنا طلبت بالظبط... بجرب معجبنيش قولت له بص عدل كذا.

*️⃣ المهم عدل بالفعل واداني وقعدت اجرب لقيت حاجات مش هتظبط لسبب ما، يلا عدل كمان مرة، ثم عملنا مرة ثالثة ثم رابعة وخلاص تمت وشوفتها زي الفل.

*️⃣ بعت للموظفين فهنا جالي ملاحظات منطقية وبالفعل دخلت تاني لكلود وقولت له عدل للمرة الخامسة 😂 الجميل اللي فورا راح عدل... بتخيل لو جايب مبرمج وتعمله كده، زمانه اخد سكرين شوت من رسايلك وشخبط على اسمك وخفاه ونشرها عالفيسبوك عن المعاناة اللي بيشوفوها من العملاء المجانين.

*️⃣ وطبعاً فاهم الناس بتاعة التخطيط المركزي وانه تعمل برين ستورم وتجمع المشاكل وتعمل خطة عمل وترسم Product Requirements Document وبعدها ترسم Product Roadmap والكلام الجميل بتاع الناس اللي بتنور على لينكد ان دي... بس دا مش أنا، الكلام الحلو دا لما تكون جايب مبرمج وشركة برمجة بتدفع لهم 20 و 30 و 40 دولار وأكثر في الساعة فهنا انك تعاني من زهق ومراهقة وتقعد تعدل زي حالاتي فحسابك البنكي هيزعل، لكن مع ال Ai لا هيقولك يوووه ولا هتعمل شيء واخرك تستني 5 ساعات الليميت يتجدد، يا سيدي اطلع لباقة 100 او حتى 200 دولار شهر خلص اللي نفسك فيه وارجع ما انتا مش مبرمج واحتياجك للبرمجة لا ينتهي...

فالناس العظيمة المنظمة دي اللي عارفه هي عاوزة ايه، انا مش منكم، قلشت على نفسي قبل ما تنظروا عليا، انا بعمل واطبق عالارض وارجع اعدل وهكذا.

أنا عمري في حياتي ما كنت مسحول ومشغول زي حاليا وآخر شهر، فعلى مدار شهور طويلة كنت عايش Low Power بسبب حوار مشكلة النوم Sleep apnea فكانت طاقتي القليلة مخلياني شغال بالحد الأدنى، وبحاول أوازن اللي أقدر أعمله بأقل طاقة ممكنة.

*️⃣ لغاية من شهر لما بدأت مع Bi-PAP حسيت اني فجأة اتشحنت فهنا الحماس أخدني، فتح يا ابني كل اللي حصل الشهور الماضية، هاتلي كل شيء اتأجل، افتح كل الأفكار اللي حطتها في الدرافت ومقبرة الأفكار بتاعتي في تليجرام Saved، وريني يا ابني كل شيء اتعلمته آخر سنتين في Ai وكنت مش لاقي طاقة أنفذه.

*️⃣ فجأة لقيت جبال شغل فتحتها على نفسي، غرقت فيها بشكل مهول، بقيت مش لاقي وقت للحياة 😭 وكان في أيام بروح الشغل 8 ص وأمشي 9 م يعني 13 ساعة قاعد عالمكتب... والمشكلة في القاعدة الكلاسيكية هي إن الشغل بيجيب شغل، أخلص دي يطلع لي دي... واغرق أكثر في الشغل لدرجة سبت قناة اليوتيوب ماتت وبقالي شهرين منزلتش غير 3 او 4 فيديوهات، ويستمر الغرق وحتى هوايتي المفضلة الكتابة بقالي 10 أيام مكتبتش حاجة.

*️⃣ السحلة لا تنتهي، التاسكات خلصت كثير بس الجدول فيه أكثر كإنك بتسحب من بحر، عندي في الواتس آب 98 محادثة Unread غير عشرات في الماسنجر... كل دا وإيه؟ وأنا بستخدم Ai بشكل كثيف وحتى Dot الجديد بتاع ChatGPT مشغله يتابع لي حاجات منها الإيميلات.

*️⃣ عاوز أفصل وأنام وأبص في السقف وأطبق مقولة (ما أعظم ألا تفعل أي شيء، ثم ترتاح) 😂😂 ، انا فتحت على نفسي فتحة كبيرة، حالة الفوقان عملت لي ما يشبه وهم القوة، أنا فايق ادوني تاسكات، أدوني سلاح وأنا هشيل... 😭😭😭... عامة أنا لقطت وقت صورت 2 فيديو ورا بعض وطلعت 2 قدامي كانتوا اتصوروا بدون مونتاج وهنشرهم الايام القادمة ونحاول نرجع تاني للحياة

وزارة البترول تصدر بيان رسمي بتثبيت سعر البنزين

امبارح طلعت الاشاعة
والبيان الرسمي صدر

لما ثبت الفايدة انا استغربت وقولت هيتم تعويض الاجانب برفع جنية مثلا في سعر الصرف طالما الفايدة مزادتش، توقعي كان نوصل ل 53 جنية، لكن النهاردة وصلنا 54.5 جنية ودا كده غريب وخاصة ان مفيش خروج اجانب عنيف زي مارس، وقتها خرج 9 مليار دولار فصعد سعر الصرف ل 54.8 لكن الشهر الجاري هو مليار واحد اللي خرج... فمش مفهوم الصعود العنيف دا.

*️⃣ لكن طالما وصلنا للمستويات دي فاتوقع نبدأ من بكره او بعده نشوف خروج أجانب من اذون وسندات الخزينة، ويزيد مع الصعود فوق 55 جنية، فهل يا ترى هنكسر ال 55 ولا هنحافظ على مستويات القمة بتاعة مارس ونلف ونرجع 🤔🤔🤔...

*️⃣ يعني المؤسسات الدولية ترفع تقيمك (موديز) او تثبت (ستاندر) ودا معناه سهولة اقتراض اسهل، بالمنطق تيجيب فلوس... فالسعر يزيد... ليكون طالعين نشتري منهم بالغالي وراجعين تاني 😂.

*️⃣ عامة أنا عندي ثقة واسعة في كفاءة حسن عبد الله في ملاعبة السوق عكس السابق ليه تماماً... خلينا نشوف عشان في أكشن كثير شكلها وهو لعيب شاطر حسب اللي شوفناه حتى الآن

بنتي صاحية بتجهز للمدرسة فبقولها (الحلوة دي قامت تعجن في الفجرية، والديك بيدن كوكو كوكو) فقالت لي ايه يا بابا اللي بتقوله دا. فقولت لمراتي هي متعرفش الاغنية دي قالت لا طبعاً دي جيل ألفا ميعرفوش.

*️⃣ ثواني بس هي الأغنية دي كانت بتاعتنا ك جيل الألفية (Millennials) ولا الجيل اللي قبلنا (جيل X) ولا جيل أهلنا اللي قبله جيل الطفرة (Baby boomers) ولا الجيل اللي قبله الجيل الصامت (Silent Generation) اللي بمناسبة جدي الله يرحمه كان مولود في اول سنة في الجيل دا ومعاه برضك حسني مبارك والشيخ طنطاوي (ومعاهم الخنزير شارون) كلهم نفس السنة 1928....

*️⃣ المهم يعني الاغنية دي من الجيل السابق ليه، غناها سيد درويش سنة 1920 يعني من 107 سنة، وقت ما غنى الاغنية دي كان عبد الناصر والسادات عندهم 2 سنة لسه مفطومين 😂... فدي مش أغنية من جيلنا عشان نعرفها احنا، دي اغنية من 1920 السنة اللي اتولد فيها الملك فاروق 😂.

*️⃣ حاسس ان جيلنا هيكون آخر جيل فاكر الحاجات القديمة دي.

بما إننا كسرنا ال 55 جنية
ف بهذة المناسبة الحزينة

هظبط كده واطلع لايف معاكم الساعة 9 م لو قدرت نقعد نعيط ونلطم سوى 😂😂

ربنا يكرم، لو اكيد هبعت اللينك بتاع الايف قبلها او هقولكم يعني مش هطلع من غير ما أبلغكم

بعتذر لوجود مستجدات، الايف هيكون بكره ان شاء الله... واهو ندي نفسنا فرصة نشوف كل التصريحات والتعليقات ونفهم شوية

مع نزول الذهب اللي حصل امبارح بقى صافي حركة الذهب قصاد الدولار آخر 365 يوم هي نزول 2% يعني اللي كان معاه دولار زي النهاردة من سنة وقلبه ذهب خسران 2%...

*️⃣ حصلت حرب والكوكب اتشقلب والتضخم زاد في كل دول العالم والذهب هو كمان خسر فوقهم 2%... طبعًا لما تفتح 5 سنين هتلاقيه كسبان 126% يعني اللي شاريه زي النهاردة من سنة خسران واللي شاريه زي النهاردة من 5 سنين كسبان.

*️⃣ فمش شرط عشان شوفت حروب وتضخم إنك هتلاقي صعود للذهب، لكن على المدى الطويل وهو سنين هتلاقيه صاعد... فاللي بيجيب ذهب يشتريه لسنين مش أسابيع ولا شهور... هو أكلاشيه بقوله بس بلاقي نفس الأسئلة فلازم نرد نفس الإجابات.

*️⃣ بالمناسبة آخر 365 يوم الدولار صعد قصاد الليرة التركية 🇹🇷 18.6% والجنيه المصري 🇪🇬 16.5% والفرنك السويسري 🇨🇭 3.4% واليورو 🇪🇺 3.6% والين الياباني 🇯🇵 2.8% والروبل الروسي 🇷🇺 2.0% (بعتذر للعملات دي إني حاطط الليرة التركية والجنيه المصري معاهم).

*️⃣ في حين الدولار هبط قصاد عدد من العملات وأشهرها البيزو الكولومبي 🇨🇴  18.0% و النيرة النيجيرية 🇳🇬 8.9% والوون الكوري الجنوبي 🇰🇷 7.7% والكورونا النرويجية 🇳🇴 6.4% واليوان الصيني 🇨🇳 6.3% والريال البرازيلي 🇧🇷 6.1% والراند الجنوب أفريقي 🇿🇦 4.7% والدولار السنغافوري 🇸🇬 1.6% والجنيه الإسترليني 🇬🇧 0.5%

*️⃣ حبيت بس أزود كولومبيا ونيجيريا وجنوب افريقيا عشان محدش يقولي جايب دول كبيرة وعظمى بس ليه احنا غلابة.

بالرغم إن معنديش كلام أقوله لكن من الصبح عمال اقنع نفسي اني وعدت الناس أكثر من مرة اطلع لايف وارد عالاسئلة وموفتش بوعودي فكده كثير

وبناء عليه قررت بعد ربع ساعة هطلع لايف ان شاء الله وربنا يكرم ونقول حاجة مفيدة

اللي عنده اسئلة يكتبها، واللي مش فاضي عادي متوقعش هيفوتك كثير 😭 والايف كده كده بيكون مسجل عاليوتيوب

بعد ربع ساعة ان شاء الله على اللينك دا

https://www.youtube.com/live/trCgXsCDWgU?si=-Q95NscSd2A4EOjK

لالا متقولش، هو جيمناي بعد ما نزل أرجون 4 كمان ربط ب Google Ads و Shopify ومحدش قالنا... لالا احنا هنلحد ولا ايه يا جوجل، جيمناي هيبدأ يقتنع انه برنامج ل جوجل ويقدر يشوف خدمات جوجل...

ياااااه يا جدعان لقد هرمنا وورمنا

انا مشوفتش الهبدة دي من ساعة افلاس ليمان برازر 😂

هي هتظبط معايا الهبدة ولا إيه 😂 اللي شاف لايف يوم الجمعة هيلاقيني قلت يوم الأحد والإثنين نزول بالبورصة وارتفاع دولار، نستقر من الثلاثاء ثم نتحسن أربعاء وخميس. يعني مش هيكون أسبوع نزيف متواصل زي الأسبوع الماضي.

*️⃣ حتى الآن النزيف فعلًا خلص يوم الإثنين، الثلاثاء تحسن بالبورصة والدولار، والأربعاء استقرار (الدولار كما هو والبورصة هبوط طفيف).

*️⃣ لو الوضع هيكمل طريق التحسن بكرة نشوف دخول صافي أجانب بقى بعد 9 جلسات خروج متتالية خرج فيهم 3.6 مليار دولار... يعني نشوف بكرة أجانب موجب لأول مرة من 15 أكتوبر ويا سلام لو معاها الدولار يكسر 56 نازل، وبكده ندي مؤشر إيجابي للتحسن لكن لا يعني إن الوضع خلص...

*️⃣ بالمناسبة في بوست طويييييل جداً كاتبه بقالي كذا يوم وهنشره بكرة إن شاء الله كما هو بدون تعديلات عن رأيي في الأزمة الحالية وليه لازلت شايفها مؤقتة ومش هتفلت لـ60+ وكده، هنشره أيًا كان السوق بكرة إيه سواء زي توقعي اللي قلته فوق ولا سلبي ويحصل المزيد من قفزات الدولار.

خلينا نشوف

دخول 650 مليون دولار هوت ماني حتى الآن

مبن قالكم إمبارح ان بكره هتشوفوا عودة الهوت ماني؟

الدولار الان وصل بيع 55.94 وشراء 56.04

مين قالكم إمبارح ان بدأنا رحلة هبوط الدولار

والناس الجدعةاللي حضرتك لايف الجمعة السابقة ايه يا شباب الاخبار 😁

تفتكروا هنكسر 55 هبوطا الاسبوع القادم 😀

المركزي رفع الفايدة

كنت بحكي مع صديق لي بقوله المفروض يرفع الفايدة 1% النهاردة ميعملش عنتر 😁

كده صح

تعالوا نضحك شوية عالصبح

*️⃣ الشركة القابضة للكهرباء منزله بوست غامض ان اللي هيسافر اكثر من 3 شهور ومش هيستخدم العداد لازم يعمل اجراءات معينة.

*️⃣ لو عاوز تعرفها سيب تعليق عشان نبعت لك ايه الاجراءات انبوكس 😂😂😂 ايه شغل الصفحات الرخيصة دا اللي عاوزة تلم ترافيك دا...

*️⃣ دا الحكومة (جهاز حماية المستهلك) نظرياً عالورق مانع السعر انبوكس عشان الشفافية وإن الشيء دا مفروض يبقي عام لإنه موحد للجميع، فجهة حكومية تخلي الاجراءات الحكومية المطلوبة انبوكس 😂😂.

*️⃣ ايه خير شركة الكهرباء خايف تقول الإجراءات بابلك أحسن المنافسين بتوعها يقلدوها ويسرقوا فكرتها 🤔🤔🤔 زي ما الصفحات بتقولك عامل السعر انبوكس عشان منافسيني ميعرفوش وألم ترافيك وازود تفاعل مع الصفحة فأقدر أجيب الناس دي بال Pixel بتاع فيسبوك وكده 😂😂.

خام برنت تسوية ديسمبر بقى +18 🔞 فوق ال 100 😂

كده عيب ايه +18 دي ميصحش يا أستاذ انزل احسن في ناس هترجع في كلامها بخصوص التثبيت لنهاية السنة.

ملحوظة: البوست ساخر عشان الناس اللي بتاخد كل شيء جد، فرفش احنا في رحلة، كله رايح... ولا تقلق الحكومة ثبتت البنزين عشان التضخم ميضربش واحنا عاوزين نسيطر عليه عشان الفوايد متضربش مننا والحكومة بتقترض 150 مليار جنية اسبوعي فهتزعل قبلنا.

كام نقطة AI تذكيرية متفرقة 2 للي بيدفعوا كثير و1 للي ببلاش:

1️⃣ الناس المشتركة في ChatGPT الباقات 100 دولار وطالع فلو مش عارف فالشات بقى يديك بنفس قيمة اشتراكك API تقدر تستخدمه في برامجك أو شغلك، تمامًا زي ما كلود برضك لنفس فئة الباقات دي، لو مش عارف إيه دا اسأل البرنامج بتاعك (لو إنتا على باقة 20 دولار متشغلش بالك).

2️⃣ الناس اللي بتستخدم جيمناي وعندها اشتراك مدفوع أو رجعت له بعد هجرته بعد صدور أرجون، متنساش إن عندك 2 ليميت، واحد في جيمناي والثاني في Antigravity ودا أخو جيمناي البرمجي لكنه كومبيوتر بس، فلو خلصت ليميت جيمناي خش افتح أنتي جرافتي، هيقدر يعمل معاك بعض مهام جيمناي خصوصًا البسيطة، لكن هو أساسًا معمول لمهام برمجية وأتمتة الشغل على الكمبيوتر، وبالعكس عنده قدرات تانية جيمناي العادي ميقدرش يعملها بنفس الطريقة.

3️⃣ الناس اللي عاوزة Agent ببلاش ومش هتشترك في ChatGPT بـ100 دولار عشان تشوف Dot ولا هتشترك في Grok بـ1750 جنيه عشان تشوف Grok Bot ففي خيار ثالث وهو Muse من فيسبوك، هو حتى الآن متاح رسميًا في أمريكا وكندا، بس عادي لو فتحت VPN ودخلت موقعهم muse.ai مجرد بس تسجل دخول خلاص كده هيفتح معاك بعد كده بدون VPN، ولو إنتا أندرويد هتقدر تنزله APK بس شوف موقع ثقة عشان التجسس...

⬅️ الفيسبوك بيوزع مليار توكن مجانًا صالحين مدى الحياة، كل اللي عليك تشغل VPN وتدخل موقع muse.ai وتعمل حساب، وبعد ما تفتح الحساب خش على الإعدادات (Settings) وادخل الكود P351UT خلال أول 48 ساعة من إنشاء الحساب، هتاخد مليار توكن مجانًا وأنا هاخد زيك 😊 التوكنز الإضافية مكتوب عليها Never expires يعني مش بتنتهي صلاحيتها، ومعاك كمان الليميت الأسبوعي المجاني بتاعك منفصل عنها.

معرفش هيفضلوا يوزعوا لغاية إمتى فنصيحتي خش خدهم وبعدين احتجت في يوم من الأيام كان بها، هما صالحين مدى الحياة.

*️⃣ اللي مش عارف إيه الإيجنت فدا ممكن نقول سكرتير شخصي ليك، تديله مهام معينة يتابعها 24 ساعة، وممكن تسأل برنامج الـAI اللي بتستخدمه يشرح لك.

⬅️ البوست دا غريب شوية وغير تقليدي لكن بعمله من منطلق إن الأسبوع دا أنا رافع شعار (أسبوع الترويق) فبعد شوية لخبطة وظروف مهنية وصحية مريت بيها آخر 3 شهور بقى في حياتي طن ذيول، بوستات عاوز أكتبها مقالات عاوز أنزلها تقارير أقرأها شغل أعمله، 80 رسالة واتس آب مش متشافة وماسنجر و10 إيميلات وفي بنكين عاوز أقفل حسابي فيهم ABC وADIB ووو... فأنا رفعت شعار أسبوع ترويق، مش هفتح شغل جديد، هروق القديم.

*️⃣ فكان في بالي الكلمتين دول وعمال أقول بعدين بعدين، لكن قولت خلص واعملهم، وغالبًا هعمل فيديو برضك هصوره وهنزله الأسبوع دا هيكون AI برضك بس الـAI للغلابة، الناس اللي ملهاش في الحوارات الكثيرة دي تعمل إيه، يعني ممكن تقول أشبه AI for dummies لو أنتم فاهمين القلشة يعني وسلسلة كتب for dummies اللي تعد من أشهر الكتب التعليمية بالعالم. يعني مش هدفي المحترف خالص بل الشخص العادي اللي ملوش في الحوار وحاسس إن الموضوع كبر عليه.

*️⃣ مش عارف ليه حاسس إني هتحول بكتاباتي التحول الرابع، للي ميعرفش فمن 2011 لـ2016 كنت بكتب في أبل والآي فون والأندرويد، ومن 2017 لـ2020 كان تركيزي عالتاريخ أكثر، ومن 2020 لـ2025 تركيزي كتابات اقتصادية، شكلي 2026 هختمها بكتب AI 😂😂 وكل مرة نهد ونبني، متابعين جايين عشان التاريخ يلاقوني قلبت اقتصاد يمشوا فبتوع الاقتصاد قاعدين يلاقوني بقلب AI يمشوا 😂😂 الله أعلم 2030 هكون إيه دا لو لينا عمر.

*️⃣ دعواتكم أسبوع الترويق يتم على خير عشان أفضي رامات مخي من الـCache اللي مالية الذاكرة القصيرة فخلاص بقت مهنجة. 😂😂

أنا كنت مرعوب من النهاردة بعد انهيار اسواق المال الأمريكية ان يحصل عندنا مجزرة برضك بس واضح اننا اخدنا قرار نزول خلاص، وخاصة بعد تجديد السعودية للوديعة بس خلاص اتكسرت ال 56

*️⃣ بالمناسبة شيء بحسه كده، لما بشوف اسعار البنوك ببص الاهلي و CIB فين، لو اغلى سعر بحس ان دي رسالة للسوق تعالوا فوق، لو أقل سعر بفهم انهم بيقولوا للسوق يلا ننزل... دي مش حاجة رسمي دي بلدي كده بحسها بالحب رسالة من الكبار الاثنين للسوق، كبير القطاع الخاص وكبير القطاع المصرفي كله.

كده نقول ان لم يجد جديد فإن شاء الله ممكن نشوف ال 55 نهاية الأسبوع دا ثم 54 القادم 😍

⬅️⬅️ لو في حرب ولعت محدش يسألني، مش محتاجة ذكاء، هتنسى كل شيء اتقال قبلها ونحسب من جديد 😂