خام برنت 😭😭

عقود يونيو 123
عقود يوليو 113
عقود أغسطس 105
عقود سبتمبر 100
عقود أكتوبر 95
عقود نوفمبر 91
عقود ديسمبر 89

*️⃣ عارفين عقود ايه اللي تحت 70 زي قبل الحرب؟ عقود يناير 2031 (هي عقود نظرية قوي لكن اللحظة دي اللي يطق في نافوخه يتعاقد ل 2031 هيشتريه ب 70)

⬅️ لكن الفعلي هو عقود ال 3-6 شهور القادمة والباقي دا اقرب لحسابات ومضاربات

*️⃣ سبب الارتفاع دا هو جمود المفاوضات، الجمود بعده لازم ييجي من طرف مش قادر يستحمل الاستمرار، لازم حد يرمي طوبة في الماية الراكدة، زي جمود 71 و 72 جه وراه حرب 73... وجمود 75 و 76 جه بعدها زيارة السادات ليهم...

*️⃣ فالقلق دلوقتي هو إن الجمود يسبب تحرك عسكري أمريكي لكسر الجمود.

⬅️ خلينا نشوف الأكشن دا هيوصل لإيه وان شاء الله يكون صعود مؤقت ورجالة ترامب يبيعوا العقود اللي معاهم ويطلع تصريح ينزل السوق ويرجعوا يشتروا من تحت، يا رب تبقي سبوبة، عشان لو مش سبوبة فال 3 جنية السابقة بتاعة البنزين هنخاويها كده عالعيد 😭

بحب قوي أبص على بوستاتي "مثل هذا اليوم" والنهاردة قعدت أضحك لإن البوستات هي:

*️⃣ زي النهاردة في 2025 نشرت بوست بقول فيه إني بتكلم فيه عن بوست أقدم سنة 2020 إن رئيس الوزراء قال إن الرقم القومي العقاري هيكون موجود قبل نهاية 2021... هانت يا شباب وصلنا 2026 أهو... وييجي ناس تقولي موضوع كذا مش بتعلق عليه ليه... حضرتك لما ينفذوا نبقى نتكلم؛ دا في بوستات من 2019 بقول فيها إن الحكومة بتقول خلال شهور طروحات حكومية وبيع بنك القاهرة والجو دا... خلال شهور من 2019.. فلما نشوف تنفيذ نبقى نتكلم؛ في ناس بتحب تتكلم عالدخان من غير ما تشوف كفته. تشيد بالدخان الجميل.

*️⃣ النهاردة الدولار داخل على 54 جنية تاني... المهم زي النهاردة في 2023 كنت كاتب بوست بقول فيها إننا مفروض نعيد تسعير إزاي شغلنا على 40-42 وإحنا أصلا بنعاني على 35-37 ههههههههههههه.... أنجوي يا محمد عيد يلا التسعير على 54 جنية.... نفس اليوم.

*️⃣ في بقى بوست كمان زي النهاردة من 2019 عن قرار لوزارة المالية بيقول إن كل جهات الدولة الدفع فيها فيزا ولو عاوز نقدي هتدفع زيادة 10%... فكرة كانت صايعة وقتها بس الحكومة لقت فكرة أصيع وهي إنها تلغي الكاش وتدفع الكل فيزا عليها رسوم إضافية يعني هتدفع فيزا + تدفع رسوم وبتوصل ل 7% في حالة السكك الحديد. فكده الدولة وفرت العبء النقدي للكاش (أيوا الكاش عبء) + أخدت رسوم تفوق رسوم الفيزا أصلاً.

يوم حافل وجميل بالبوستات

⬅️ اه صحيح معلومة على جنب عشان تخليكم متشوفوش البوست وأوجه بيها التعليقات

*️⃣ موازنة 2026/2027 الدولة متوقعة إيرادها من ضرائب ورسوم السيارات هتزيد 42.4% فدا معناه تفتكروا أكيد إن مبيعات وتسجيل العربيات هيزيد 42.4% صح... أكيد مش معناه شيء تاني كلنا عارفينه.... قوم رخص عربيتك يلا 3 سنين 😂😂

يلا لايف بعد 10 دقايق كده لو في حد فاضي يعني ندردش في التطورات دولار وبترول وايه الدنيا ماشية على فين

https://youtube.com/live/IGWANCbPe_o?feature=share

أصدقائي الأعزاء… بن سامي مرهق شوية… لا هو مرهق من زمان أصلاً بس كان بيكابر 😁 😩.

*️⃣ القصة باختصار… إني من زمان وأنا بحب أكون موجود… أي حد من صحابي يبعتلي ألاقي نفسي برد، مكالمة (زمان وحالياً رسالة) أرد، مشكلة أحاول أحل، خروجة تعالى، هاجيلك المكتب اتفضل ولو حتى قعدنا ساعات… ودي حاجة كنت مبسوط بيها والله ومش شايفها حمل خالص.

*️⃣ بس اللي حصل في السنين الأخيرة 3 حاجات كده دخلوا على الخط وقرروا يقولوا لي: “كفاية يا عم” 😂

1️⃣ دايرة المعارف كبرت بشكل مش طبيعي… اللي هو انت فاكر نفسك لسه بتتعامل مع نفس 20 واحد؟ لأ يا معلم… دول بقوا 200 وبقوا 300 وانت مش واخد بالك 😅، الموضوع بقى كبييير... وأنا أصلاً بدعي إني مش اجتماعي كمان.

2️⃣ الحياة نفسها بقت زحمة… شغل + مشاريع + فيديوهات + التزامات + دماغ مش بتفصل… فبقيت مش عارف أكون “available” طول الوقت زي زمان حتى لو أنا عايز.

3️⃣ ودي بقى المفاجأة الجميلة… إننا كبرنا 😁 آه والله… الطاقة بقت أقل… والنفسية مش دايماً مستحملة تفضل فاتح لكل الناس 24 ساعة.

*️⃣ فلو بصينا على الوضع الحالي… هتلاقوا عندي فوق 30 رسالة واتساب مش مترد عليهم… و10 إيميلات… و10-15 رسالة ميسنجر… غير تيليجرام… وأنا واقف ببص لهم كده زي الطالب قبل الامتحان 😅.

*️⃣ فتلاقي الأصدقاء زعلانين عشان متأخر في الرد عليهم، والشركاء زعلانين، والمتابعين زعلانين، والمعارف زعلانين، كله منتظر (حاضر من عنيا هشوفلك) اللي قولتها لهم... إني أغرق ٱغرق أغرق.

*️⃣ فمعلش يا جماعة… اعذروني بجد ❤️
الفترة الجاية هتلاقوا بن سامي بيعمل حاجات جديدة شوية:

⬅️ ممكن أتأخر في الرد، هو مش ممكمَن هو أكيد.

⬅️ ممكن أقول “لأ” لأول مرة من غير ما أقعد أبرر نص ساعة، وبدون ما أحرج، أنا آسف بس أنا مش قادر.

*️⃣ مش عشان أنا اتغيرت عليكم…
بس عشان أحاول أفضل مكمل أصلاً.

*️⃣ البوست خلص... وهو بوست شخصي بس بقالي شهور عاوز اكتبه لكن بيكون حد طالب مني شيء وبخاف يفهم إني أقصده هو بالذات فبقول خلينا استني، لغاية ما خلاص قولت كفااايه كفاية كفاية.

يبدو اشتراك كلود ماكس ب 100 دولار هيكون مع الزمن هو أحسن بديل لتوظيف شباب جيل Z وأرخص، بلا وجع قلب

دا لو مكانش البرو ابو 20 دولار يكفي للاستبدال

إن شاء الله أنا منتظر ترند حوار الطيبات يخلص وهعمل بوست طويل وكمان فيديو عنه، بس مش عن النظام نفسه لإني مش هتكلم قوي عن الدجل، لكن عن مفاهيم أساسية ساقطة من عقولنا بسبب الجهل وعدم التعلم، والبوست دا مجرد مثال واحد ووحيد من اللي ناوي يكون في البوست/الفيديو.

*️⃣ مشاهداتك وتجربتك الشخصية لا يُعتد بها ولا تعبر عن أي ابن لذينا ومينفعش أصلاً تنشرها لو متعارضة مع العلم لإنك كده بتضلل.

*️⃣ تخيل معايا حد يخش يقولك أنا بشرب سجاير بقالي 40 سنة ومجاليش سرطان الرئة، فدا دليل إن السجاير بتجيب سرطان دي خرافة طبية... فهنا هو صادق في النصف الأول وهو إنه بيشرب بقاله 40 سنة لكن الاستنتاج كارثي، هو مين قالك إن كل شخص بيشرب سجاير بييجي له سرطان؟ أو تضرب مثال بجدك اللي مات 90 سنة وبيدخن في حين واحد ابنه (عمك) كان رياضي ومات 45 سنة فكده يبقى الرياضة مضرة والتدخين مش مضر.

*️⃣ لما حد مثلاً يقولك أنا بطلت اللبن ومشتقاته زي ما النظام دا قال ومعدتي ارتاحت، طيب هل دا دليل إن اللبن فعلاً مضر ولا الخضار ولا الفاكهة ولا ولا؟ هل عملت تحاليل طبية وشوفت هل انتا عندك حساسية لاكتوز مثلاً ولا سوء هضم نشويات ولا مشاكل معينة....

*️⃣ أقرب صديق لي وأنتيمي عنده حساسية شديدة من السمسم، ممكن لو أكل ساندوتش فيه طحينة يروح مستشفى، تخيل واحد عنده مستوى حساسية أقل، بتعمل له مشاكل بس صغيرة، هو ميعرفش دا وعايش عالتيك أواي شاورما وكفتة ويضرب طحينة، بعدين يلاقي نظام غذائي فيه السمسم ممنوع فيبطل السمسم فبسرعة معدته ترتاح وجسمه يتحسن، هنا هو هيكتب ويقول النظام دا عبقري دا من ساعة دا بقالي 10 سنين في مشاكل مزمنة في معدتي والنظام دا ريحها في يومين، وهو لا النظام ولا نيلة انتا كان عندك حساسية وانتا متعرفش ووقفت الأكلة اللي مضرة بجسمك بالصدفة.

*️⃣ عشان يتحكم على شيء إنه صح ولا غلط ومفيد ولا مضر، بيتم عمل عينات ضخمة لناس مختلف الأعراق والطبائع وتدي ناس الشيء اللي عاوز تفحصه وتمنعه عن الناس التانية وتلاحظ ثم تعكس التجربة.

*️⃣ مهو حضرتك لو عندي 100 عيان وروحت اديتهم كلهم دواء جديد بعدها ممكن ألاقي 10 خفوا و90 لا... وبعدين يطلع الدواء دا فنكوش، مجرد حبوب سكر مفيش دواء نهائي... طيب إزاي يا عم في 10 خفوا فعلاً... لا دول مخفوش من الدواء دول خفوا بالبلاسيبو (Placebo) أو بالوهم...

*️⃣ فالتجارب العلمية هي وحدها فقط وحصرياً اللي تقدر تثبت إيه الصح وإيه الغلط، لكن المشاهدات الفردية دي تحتفظ بيها لنفسك، أنا طبيعة جسمي وتعاملها مع الأكل غير زوجتي، أنا ممكن أتعشى طرب وأخش أنام عااادي لكن زوجتي هتسهر لثاني يوم، والعكس لو أنا أكلت قطعة جاتوه قبل النوم فالسكر هيخليني معرفش أنام وأرق ومشاكل تنفس وهعاني ويطلع عيني، حساسية عنيفة للكربوهيدرات... هل ينفع أقول بقى نصيحة غذائية كلوا طرب قبل النوم، دي تجربة شخصية أهي.

*️⃣ العلم والطب مفيهوش شغل جو المصاطب ونظام سيبك من كلام الكتب أنا هقولك عالواقع... دا نقوله وممكن يمشي لو كلامنا في الاقتصاد أو التسويق أو حتى خدمة العملاء، لكن في الطب والعلم مفيش دا... جو اسأل مجرب ومتسألش طبيب دا تحتفظ بيه لنفسك ومتنشروش عشان الجهل مينتشرش، ولو خلاص حزقاك قوي لازم توضح كل دقيقة إن مش معنى إن دا نفع معايا إنه هينفع معاك... ومش معنى إن جسمي هيتعامل مع الدهون والطرب يبقى خلاص دا دليل إن دا أكل صحي وممارسة غذائية سليمة ينفع تكرر... دي حالة خاصة.
نكتفي بهذا القدر وربنا يكرم والهوجة تخلص عشان أعرف أكتب براحتي لأني مش عاوز أركب الترند وفي نفس الوقت عارف إن وقت ما المشاعر بتطلع، العقل بيلم شنطته ويروح، ومن العبث إنك تتكلم بالعقل مع ناس عقلها لم شنطته وسابه ومشي.

قعدت ساعة دلوقتي صورت فيديو بحكي فيه عن الذكاء الصناعي وقصتي معاه وازاي استخدمته في شغلي
وازاي حل مشكلة مجنناني في شغلي بقالها 4 سنين

وبالمرة قولت فقرة ازاي تخلي نفسك غير قابل للاستبدال بال Ai وميحصلش فيك البوست السابق بتاع كلود بستبدلك وكده

ان شاء الله هظبط الفيديو وهنشره بعد كام يوم (هنزله بكره ان شاء الله للناس اللي بتتبرع كل شهر ومش بتشوف محتوى حصري فهدلعهم وانزلهم الفيديو بكره وبعد 3 ايام احوله لكل الناس 😁)

وان شاء الله بكره لو لقيت وقت هرجع اصور فيديو بتاع توقعات الأسبوع تاني

دعواتكم وتصبحون على خير

الاسطورة بتقول

الناس زمان كانت صحتها حلوه وعمرها طويل

واحنا نصدق 😂😂😂

واخد بالك من فارق سعر الاشتراكات وخاصة في الآيفون

لو مشترك كلود شوف صديق ليك معاه آي فون واشترك من جهازه يا عم

بمناسبة ان النهاردة دخل 1.1 مليار دولار هوت ماني، كنت بتكلم مع صديق الخميس الماضي وقولت له اتوقع نشوف 2 مليار دولار الأسبوع القادم.

*️⃣ عارف كذا حد قالي ليه مش بتكتب بوست عن توقعات الأسبوع، هو الموضوع ممل أصلا شغالين طالع نازل، كنت بقول لحد النهاردة إننا نعمل الدولار ب سوسته 😂

*️⃣ شغالين فريقين، فريق الصعود وفريق الهبوط، الأيام الماضية فريق الصعود كان شغال، يلا بقى بكره يسلم الشيفت لفريق النزول ياخدهم يومين ويرجع يسلم فريق الصعود

*️⃣ هنفضل كده لغاية ما الكوكب دا يوضح، مهو نفس الوضع شغال في البترول والذهب وكله، شغالين حبه فوق وحبه تحت 😂😂.

*️⃣ مش هناخد اتجاه واصح صريح لغاية ما الخناقة دي يبقي ليها وضع واضح، يرجعوا يحاربوا ودا مستبعد في رأيي، او يفتحوا المضيق بجد وفركش... غير كده هنكمل في ال يويو دا كثير، فمش كل ما يتحرك جنية طالع نازل تتأثر، لما نكسر 55 فوق ولا ننزل تحت 52 كذا يوم نبقي نشوف.

فيديو طويييل دردشة مدتها ساعة (هتلاقوا تقسيم تايم لاين تحت الفيديو للي مش بيحب الرغي)

الفيديو بحكي فيه عن تجربتي الشخصية مع Ai في شغلي وبحكي مشكلة قعدت مزهقاني 4 سنين وبعدين كلود حلهالي 😍

وكمان جبت سيرة هل فعلا الذكاء الصناعي هيستبدلنا ولا نقدر نستفيد منه حتى لو داخل في مجالنا وبينافسنا

فيديو عن تجربة شخصية فعليه ملوش علاقة بالكلام الكبير قوي بتاع الفيسبوك وجو ريادة الأعمال المتطور دا.

يهمني رأيكم وكمان هل أعمل جزء ثاني أكمل القصة ولا كفاية رغي كده 😂

https://youtu.be/9QZY9gSojgk

كنت بفكر في موضوع كده احتمال استخدمه في فيديو قريب فقولت اسأل ChatGPT هو ثروة فلان كانت كام سنة كذا، الشات قالي وانتا مالك وهيفرق معاك في ايه بس بالطريقة وبشكل غير مباشر 😂 ، شوفوا الرد 😂😂

الشات عدى مرحلة التطبيل ودخل في مرحلة قلة الأدب، وانتا مالك يا حشري بتتدخل في ثروات الناس ليه

لا متقلقش دا خبر روتيني، أنا بس قولت أعمل الحركات بتاعة اخضك 😂

أخيراً الأسبوع دا خلص، يااااااه يا جدعان كان أسبوع مضغوط قوي، موبايلي معمول صامت فيه بقاله أسبوع تقريباً 😂

نكتفي بهذا القدر من هذا الأسبوع، ونروح نريح بقى.

صح بعض الأكل مضر، بس إنتا مريض عشان إنتا فقير

*️⃣ في الترند بتاع الطيبات، كانت العبارة اللي شغالة إن الأكل هو سبب الأمراض، وبغض النظر إن دا معلوم بالبديهة، وحتى زمان قالوا: «المعدة بيت الداء، والحمية رأس الدواء»، لكنهم اعتبروا دا اكتشاف للطبيب الراحل، باعتبار إن الحارث بن كلدة عاش في العصر الجاهلي... لكن السؤال المخادع هو: هل فعلاً الأكل هو السبب الحقيقي ولا السبب الظاهري؟

*️⃣ كنت زمان كتبت إن في حاجة اسمها مراحل التفكير والعمق في البحث، فمثلاً إنتا ماشي في الشارع حد خبط فيك خبطة بسيطة بس إنتا قلبتها خناقة. فعلياً صح إنتا السبب، لكن بالبحث نلاقي إن يومها مديرك تعسف ضدك، وخسف حقك، ورقّى زميل ليك بدالك، فإنتا شايط. ففعلياً مديرك هو السبب غير المباشر، وممكن تبحث أكثر وتكشف إن زميلك قريب لشخص مهم قوي وهدد المدير لو مدالوش الترقية هيتأذي. تأثير الفراشة يعني؛ دا هدد دا، فدا رقّى دا، ودا اتعصب، فاتخانق مع دا.

*️⃣ نعود للأكل. الصورة المباشرة صحيحة نسبياً؛ كثير من الأكل مضر، لكن لكن أنهي أكل وليه؟ يعني فكرت ليه بيقدموا لك أكل ممكن يبقى فيه ضرر؟ ولاحظ إني بكرر دايماً «ممكن» عشان عندي عداء رهيب مع مفهوم التشكيك في كل حاجة. شكك الناس في الأكل، وفي العلاج، وفي الطب، وفي البحث العلمي، وبعدين سيبهم للجهلاء... كارثة.

*️⃣ عبر قرون، كان الفقراء بيعانوا بشدة ومكانوش بيلاقوا ياكلوا فعلياً. مجاعات ضربت عشرات الدول، واضطرابات سياسية كانت بذرتها الجوع، بما فيها الثورة الفرنسية نفسها. الجياع آخرهم بذرة، لكن الثورات بتكمل بالأقوياء وناس قراراتهم من عقولهم وعندهم أهداف غير بطنهم. في مصر حتى، كان الملك فاروق أطلق في 1941، بسبب تحسن موارد الدولة عشان الحرب العالمية الثانية، حملة مكافحة الحفاء... دا كان شكل الفقراء في كل زمان.

*️⃣ جه القرن الـ20 والثورة الإنتاجية الضخمة. العلم تطور واكتشف طرق إنتاج كبيرة... طرق أرخص في زيادة إنتاج الأكل، ولكن ولكن في جانب تاني، وهو إن الأكل الكثير دا مش بجودة القديم تماماً.

*️⃣ مع تطور مسبب المرض النفسي الأول في القرن الـ21، والمعروف باسم وسائل الإعلام الاجتماعي، إنستجرام وتيك توك وغيرهم، الناس بقت تشوف الأغنياء بياكلوا إزاي وعايشين إزاي.

*️⃣ إيه دا؟ أنا عاوز «هبة دبي» بس أنا فقير مقدرش على سعر الفستق. المحلات تقولك عنيا يا فقير، خد توليفة البسلة بالزيوت والسكر بطعم الفستق.

*️⃣ أنا فقير بس عاوز جبنة كثير زي الأغنياء. اتفضل مخلوط نشا مع زيوت نباتية زي النخيل، ومعاهم شوية مواد كيميائية.
أنا فقير وعاوز آكل فاكهة كذا. عنيا، بس متقوليش عاوزها طبيعية. احقن ورش مبيدات غشيمة وانتج أكثر.

*️⃣ الفقر نفسه لا يسبب المرض، لكنه بيخلق بيئة للمرض. الفقير، وخاصة مع عصر السوشيال، هياكل شيء شبه بتاع الأغنياء، بس هل إنتا متخيل إنك بتاكله هو نفسه؟ ولا شيء شبهه؟ مجرد Clone شكلي.

*️⃣ الفقراء هيضطروا ياكلوا كربوهيدرات أكثر، مكرونة وزيوت نباتية ودهون رخيصة وسكر كثير عشان يشبعوا... فالنتيجة يتخن جداً.

*️⃣ آه، ولأنه فقير، معندوش رفاهية الرياضة في الكومباوند بتاعه، ولا شغله مرن يقدر يروح الجيم الصبح يلعب رياضة.

*️⃣ بقيت مريض، ألف سلامة عليك. هتروح للدكتور. قصاد الدكتور دواءين ليك؛ الأول العلبة بـ80 جنيه، والثاني بـ1000 جنيه، نوع أفضل ومادة فعالة بدون أعراض جانبية... طبعاً إنتا فقير، فيكتب لك الدواء الأول.

*️⃣ فالفقر هو سبب تدهور صحتك. النظر لطبيعة حياة ناس معينة على إنستجرام ومحاولة محاكاة حياتهم له ثمن، ولازم تدفع الثمن. لاااازم.

*️⃣ يقولك العيش مضر. كل دكاترة الرجيم يقولك متاكلش عيش. طيب أسرة أب وأم و3 أطفال مش هياكلوا عيش، هيقعدوا يفطروا فول وطعمية هياكلوهم حاف؟ متخيل محتاجين قد إيه وبكام؟!

*️⃣ تقوله اشتري الجبنة الخالية من الزيوت. طيب 1 كيلو جبنة طبيعي بدون زيوت، عشان تصنعه محتاج 4-5 لتر لبن... ولتر اللبن بـ40 و50 جنيه. لكن إنتا فقير، فمضطر عشان تتعشى مع عيالك تشتري عيش عادي + علبة جبنة نص كيلو بـ60 جنيه.
طب مسألتش نفسك إزاي؟ والنص كيلو لو طبيعي محتاج 100 جنيه لبن بس، غير باقي التكاليف. يعني مينفعش تشوفه غير بـ150 مثلاً، لكن دا بـ60... إنتا دفعت باقي السعر في شيء تاني. صحتك.

لكن هتعمل عبيط. هتعمل إيه يعني؟

*️⃣ فالفقر هو سبب الأمراض الحقيقي. تقدر تشتري جبنة حقيقية، وتعمل دايت، وتاكل لحوم وفراخ طبيعية، وتشتري خامات أنضف، وخضار وفاكهة أعلى جودة، وتشرب عصير طبيعي نقي مش نكتار بمواد حافظة، إلخ إلخ. وقتها لو عكيت في الأكل ومرضت، فدا اختيارك. إنتا اللي قررت تمشي في الطريق دا.

*️⃣ لكن الفقير دا مش اختياره. هو معندوش اختيار وملاءة مالية يشتري الأفضل الصحي، وهو اختار الأسوأ... هو بيشتري اللي يقدر عليه.

*️⃣ وطبعاً مش معنى كده إنه بريء 100%، لأنه برضك مش مجبر يقلد حياة الطبقة المخملية ويقولك عاوز آكل شبه أكلهم. عيش عيشة أهلك. إنتا فاكر إنك أذكى منهم وبتشتري الطبق بـ100 جنيه مقابل 2000 جنيه في مطاعمهم؟ وطبعاً سعرهم مبالغ فيه، لكن برضك الخامات مختلفة ومش نفس بتاعتك. بطل تبص، واقفل إنستجرام عشان صحتك..

*️⃣ الخلاصة: المشكلة مش إن الفقير بيحب المرض. المشكلة إن السوق بيبيع له نسخة رخيصة من حياة الأغنياء، وبيحاسبه على الفرق من صحته. وفي الآخر يطلع لك واحد شبعان يقولك: متاكلش عيش. طب حاضر يا كابتن، هفطر تأملات وأتعشى وعي طبقي.

لما حد يقولي هشيل المتابعة، هو بيحسسني اني كده هخسر، احب اعرفكم الفيسبوك بيدفع كام، دا بوست احصائيات عن الطلاق يوم 24 أبريل الماضي من شهر عمل 173 الف مشاهدة و 10 الاف كليك و 273 شير و 166 تعليق

الفيسبوك دافع 61 سنت يعني 32 جنية (صلحتها يا جدعان)

انتوا فاهمين غلط، انا مش انفلونسر اصلاً، أنا مش من النوع اللي بخاف وبكتب ما يطلبه المتابعون، لا عادي انا اضحي بال 3 جنية دول ولا يهموني 😁

محدش يقولي اكتب ايه ومتكتبش ايه، عندك زرار البلوك لو اي بوست ليا ضايقكم زي بوست الفقر اللي كتبته النهاردة

بكره الصبح تليفوني يبقي كمل أسبوع صامت، معمول صامت... شوفت الاتصال تمام مشوفتش، حد قالك اتصل بيا 🤔

*️⃣ تجربة مجنونة شوية وخاصة ان الاي فون كمان عاملة تحويل للاندرويد

*️⃣ يعني فعليا مفيش طريقة حد يوصلي بيها غير لو شوفت اتصاله... محاىلة للانفصال عن الكوكب عشان عندي Waiting list لا تنتهي 😭

*️⃣ كل يوم يكون عندي مثلا 7 مهام اعمل منهم 4 ويطلع لي 10 جديد واعمل 3 من الجداد، ففعليا ابقي عامل 7 مهام، بس فاضلي 10 😭 ، ثاني يوم اقول شد واعمل 10 مهام فاخش أنام ورايا 20 😢😢

Endless tasks

والكل زعلان مني عشان متأخر عليه 😭

*️⃣ ملفات ذهنية كثير مفتوحة، بما فيها أمور زي ان عندي شنطة 20 كيلو في دبي، وكل ما اظبط مع حد عشان يجيبها متظبش 😭... هي الناس بطلت تنزل اجازة العيد وحاجزين اماراتية وليهم 3 شنط ففي فائض 😁... مهو مش هروح دبي اجيبها، مفيش تأشيرات 😀😀😀

قروض التمويل الغير مصرفي وصلت ل 417 مليار جنية عبر 9.4 مليون عقد تمويل ودا من أسرار التصريحات اللي قالها هشام عز العرب على تطبيقات التمويل في بداية حروب التمويل.

فيديو تفصيلي بحكي فيه القصة والمخاطر وبيجيبوا الفلوس منين للتمويلات دي وأمور أخرى

والأسبوع القادم ننزل بالجزء الثاني عن تليدا وثاندر وغيرهم

https://youtu.be/mQ6vZYiMcEU

يلا هجووووووم

ومن مكاني هذا عندي فضول أعرف وزارة المالية حاطة سعر برميل بترول بـ 75 دولار إزاي في الموازنة للعام القادم؟ دا عقود يوليو شغالة بـ 110 دولار، والتوقعات إن لو الحرب خلصت فسعر 75 متوسط (يعني فعليًا تتحرك من 70 لـ 80) مش هنشوفه غير في نهاية 27 لو متفائلين أو في 28.

*️⃣ أنا فاهم إن المالية بتحب تظبط الأرقام بحيث شكل الموازنة يكون حلو للتصريحات الإعلامية وكده كده نعدلها ومحدش هيراجع ورانا، نحط بترول 75 ودولار 47 فكده يبقى العجز = X هنستلفه.

*️⃣ بما إن الناتج المحلي الإجمالي زاد فكده نسبة العجز بالنسبة للناتج المحلي قلت فكده جميل وزي الفل وإنجازات... بس مش كده هتضرب يا جدعان، دا تظبيط لا مكشوف قوي بس لولا إن الصندوق حبيبنا وعاوز يخلص فهيقولنا برافو ويشيد، ما هو هيخلص في نوفمبر 26 والموازنة هتخلص يونيو 27 يكون الصندوق مشي فمش في وشه العجز اللي ضرب دا 😂😂.

*️⃣ عامة أنا لازلت عند كلمتي وهي توقعي 2 جنيه زيادة بالبنزين في شهور الصيف 7-8-9 وربما 2 آخرين شهر 12-1... والجدير بالذكر نائب رئيس الوزراء طلع إمبارح قال مفيش مليم هيزيد في سعر البنزين حتى نهاية العام المالي (يخلص 30 يونيو 😁) افهموا أنتم بقى قصده.

⬅️ ومن منطلق كوهين ينعي ولده ويصلح ساعات، إمبارح نزلت فيديو عن حوار تصريحات رئيس CIB مع شركات التمويل، ابقوا شوفوه أحسن حاسسكم كنتم نايمين، وتحت الفيديو في تايم لاين روح للجزء اللي مهتم بيه لو شايف الفيديو طويل 😁.

إنه يوم الفائدة المصري وقرار المركزي المرتقب، ويوم الخميس اللي مفروض أطلع لايف بقى بالليل 😁.

*️⃣ من المتوقع النهاردة البنك المركزي يثبت الفايدة، دا توقعي وتوقع معظم الكوكب ما عدا العاق جولدمان ساكس قال المركزي هيرفع الفايدة، دا عاق ملناش دعوة بيه ومخالف للجماعة وهنقيم عليه الحد. 😂😂

*️⃣ على سيرة الفايدة، في تصريح طريف قوي قاله وزير النقل وهو إن القروض من بره مصر أرخص من مصر، لييييه عشان الفايدة بره رخيصة وبتوصل 0.1% على 40 سنة في حين مصر ممكن يقولوا لك 30%.

*️⃣ وبغض النظر إن القروض اللي شبه بدون فوايد زي قروض الجايكا وقروض دعم سيمنز وغيرها ليها شروط إنك تشتري بفلوس القرض دي منهم، فأنا هديلك الفلوس بلا فوايد بس هبيع لك السلعة بالسعر اللي في بالي 😁... وبرضك مفيش في مصر قروض تنموية ودعم صناعة وكده بـ 30% لكن هنفترض جدلًا يا سيدي إن دا صح وتعالوا نفتكر قصة تركيا.

*️⃣ مع وصول أردوغان للحكم بدأ عصر النهضة التركية الحالية، الدولة انطلقت تبني مشاريع ومدن وكباري ومطارات وشوارع وعقارات وكل دا بقروض طبعاً، والقطاع الخاص برضك انطلق مشاريع صناعات متطورة وحصل في الدولة نمو اقتصادي رهيب.

*️⃣ توسع الدولة خلاها عاوزة فلوس، نجيب منين، استلف بغباوة، بس الفايدة كانت 20-25% نعمل إيه نعمل إيه، وهنا تفتق ذهن الأتراك لفكرة عبقرية، قالك ما نستلف من بره تركيا بـ 2 و 3% بدل ما ندفع 25% في تركيا، وبالفعل استلفوا وفتحوها عالبحري، الدين الخارجي التركي قفز من 130 مليار دولار في 2002 لـ 217 مليار في 2006 ثم 295 مليار دولار في 2008 ثم 350 مليار دولار في 2012 ثم 414 مليار دولار في 2014.

*️⃣ الأتراك طبعاً أخدوا بالهم من النمو بس في مشكلة، جم يسددوا الديون لقوا إن سنة 2002 الدولار يساوي 1.3 ليرة (1.3 مليون بالليرة القديمة) والقروض عادة دي طويلة 10 و15 و20 سنة، فهما قاعدين مرتاحين لغاية وقت السداد وهنا الأكشن.

*️⃣ سعر الصرف زاد، إيه دا اكتشفوا خير اللهم اجعله خير إن سداد القرض الأجنبي اللي أخدته وصرفته على مشروعات بتجيب بالعملة المحلية، لازم تفكر في سعر الصرف، فليكن الدولار بـ 1.3 ليرة وعاوزين 100 مليون دولار يعني 130 مليون ليرة والسوق المحلي قاله 25% فوايد، طب ما أخده من بره بفايدة 2% لـ 10 سنين يعني الـ 100 مليون دولار هتسددها 120 مليون دولار (فايدة بسيطة مش مركبة)، طيب إنتا هتسدد إزاي يا برنس هتصرف ليرة وتجيب دولار، تكتشف إن الدولار بقى بـ 5 ليرة، فكده الـ 120 مليون دول كلفوك 600 مليون ليرة.

*️⃣ نظرياً إنتا واخد قرض بفايدة 20% صح، لكن فعلياً إنتا أخدت 130 ورجعتهم 600 يبقى 360% فايدة، على 10 سنين يبقى كده متوسط سنوي 36%... نرجع كده نفتكر السوق المحلي كان قايل 25% سنوي وهما قالوا نعمل أذكياء فأخدوه من بره بـ 2% ونسوا سعر الصرف 😂😂.

*️⃣ الأتراك عملوا إيه، قالوا مبدهاش ونطبق الحكمة الأسطورية بتاعة نستلف تاني، فضلوا يدوروا في القروض، أصل الدين ندوره وربنا معانا في الفوايد الرهيبة.

*️⃣ اه حجموا نمو الديون جامد فلو فاكرين فوق الديون في 2014 كانت 414 مليار وقبلها بـ 12 سنة كانت 130 مليار، يعني لما تزق 12 سنة لـ 2026 تلاقيها 1.3 تريليون لو نفس النسبة بتاعة النمو، أو تبقى 700 مليار لو نفس رقم النمو.. الإجابة هي 520 مليار دولار يعني زادوا في 12 سنة 100 مليار دولار في حين في الماضي الـ 100 مليار دولار دول كانوا بيزيدوهم في 4 سنين.

*️⃣ طبعاً خلاص الزحليقة أخدتهم والليرة خلاص ركبت الزحليقة وخاصة بعد توقف الدولة عن محاولة المقاومة ووصل الدولار النهاردة لـ 45 ليرة ومن 5 سنين كان بـ 8 ليرة ومن 5 سنين قبلهم كان بـ 3 ليرة.

*️⃣ طبعاً في عوامل كثير للي حصل في الاقتصاد، وفي برضك نهضة مستحيل حد يقدر ينكرها، دا عندهم مطار في كل ولاية عندهم 58 مطار منهم 37 مطار دولي، اتحولت لدولة محورية مهمة ولكن ولكن الثمن إيييه.

*️⃣ بس يا سيدي بس الاقتراض من بره أرخص بكثير ما تقترض من جوا

وصباح الخير ونشوفكم في اللايف النهاردة إن شاء الله.

بصوا هو أنا مكسل بس يلا لايف بعد ربع ساعة وهيكون مركز عالأسئلة بس يعني مش موضوع موحد

هرد عالأسئلة اللي وصلت لي بخصوص الفائدة + كلود و ChatGPT + الدولار والذهب + برامج التمويل فاليو وTRU وغيرهم

جهز سؤالك و يلا بينا الساعة 8:40

https://youtube.com/live/GH5o5QmgMM4?feature=share