الكوكب بقي كوميدي قوي

الأسبوع الماضي حقق الذهب أسوء أسبوع له منذ 43 سنة وتحديداً منذ انهيارات عام 1983...

*️⃣ صراحة أنا مسبوط واللي متابعني من زمان هيلاقيني كنت متضايق وكتبت كذا مرة إن صعود الذهب المستمر مؤذي للعالم والبيزنس والناس كلها بتجري تجمد فلوسها في ذهب لكن جت الأزمة العالمية الحالية وضربت السلعة الأغلى عالمياً لمدى أسابيع قادمة (لا يزال الذهب في منظور الشهور والسنوات في صعود).

*️⃣ فكرة سعيد ليه عشان شرحت كثير إن الذهب سلعة مضاربه؛ ممكن يحقق لك أرباح ضخمة وممكن عادي يمر عليك فترة تلاقي كل السلع يزيد سعرها وهو يقل عادي... حسب اتجاه المضاربة... لكن يضل وبكرر إن على المدى الطويل هو صاعد طبعاً. كان الله في عون اللي محبوس في الذهب ولا تقلق بعد الحرب احتمال يتحرك تاني صعود على حسب تفاقم الأزمة الاقتصادية العالمية.

*️⃣ الأزمة الحالية ضربت مضيق هرمز والبعض يتخيل إن الأزمة هي شوية بنزين وغاز لكن ميعرفش إن المضيق هيأثر حتى على علف الحيوانات وعلى زراعة فول الصويا والبطاطس وعلى سعر شباك بيتك الألوميتال وسعر كيس الساندوتشات والعلبة البلاستيك.

*️⃣ عشان كده عملت 2 فيديو مدمجين في فيديو واحد جمعت فيه توقعات الأسبوع الرابع للذهب والدولار وكذلك شرح أبعاد الأزمة الاقتصادية العالمية اللي بتتكون حالياً لو استمرت الحرب واغلاق المضيق

فيديو ماراثوني طويل

https://youtu.be/g2OuUCQHt5A

انتا هتحرجني ولا ايه يا عم الذهب

*️⃣ انا لسه قايل في الفيديو من يومين ان السعر 4500 والاسبوع دا هنكمل نزول بس نهدي شوية
هنكسر 4400 وهنوصل 4350 وقد نري 4300

⬅️⬅️⬅️ ايه هتجيب توقع الاسبوع في يوم 😂😂

امسك نفسك شوية 😁

بس أنا فرحان برضك، كان بدأ يتكون عداء بيني وبين الذهب شخصي بسبب قتله للسوق

⬅️⬅️⬅️ السوق المحلي هيبدأ يظبط من بكره مش دلوقتي، ويبدأ يظبط دي يعني الفارق الكبير بين العالمي والمحلي هيقل بشكل ملحوظ ويختفي خلال يومين، بس برضك وتيره هبوط الذهب تقل عشان يلحقوا

⬅️⬅️⬅️⬅️ تحديث 1 :

مع السلامة 4300

يلا يا 4150/4175 احنا جايين، وشكلك يا 4000 هتسخني قريب 😁

حتي الآن طلوع هادي وطبيعي بل أقل من الطبيعي

*️⃣ بعد العيد بيكون في طلبات كثير Hold فدايما نطلع بعد العيد ننفذها وننزل واللي متابعني السنين الماضية هيلاقيني حكيترالموضوع دا كثير

*️⃣ مش موضوع هوت ماني

*️⃣ فدا طلوع هادي قوي ولو اليوم قفل كده فدا خبر حلو للسوق ان رغم كل قلق الأيام الماضية + إجازة العيد ويطلع دول بس 😍😍 حلو قوي

⬅️⬅️ محدش يقولي توقعك ايه عشان أنا قايله في فيديو من 3 ايام ومقسم الفيديو فقرات عشان محدش يقول أصله طويل، بس انتم مش عاوزين تشوفوا الفيديو عشان متطلعونيش بمصلحة 😭... فمهما تضغطوا عليا لا يمكن أقولكم ان توقعي كان اننا نتحرك فوق وتحت الأيام دي بس نحاول منكسرش ال 53 عشان منخوفش الهوت ماني، وعادي الأربعاء دخل 2 مليار دولار ومنزلناش السعر فعادي لو طلع 2 مليار منطلعش السعر، بس لو طلع رقم كبير هنطلع ونكسر 53... ولو دخل رقم كبير و عمليات كبيرة مش صفقة زي قبل العيد هننزل.

⬅️⬅️ متحاولوش مش هضعف واقولكم توقعي 😂😂 شوفوا الفيديو

الصعود القوي المتواصل للذهب والهبوط الرهيب للبترول يعني ان خلاص الحرب في آخر أيامها والسوق متفائل جداً

*️⃣ نبدأ نتوقع من بكره والأسبوع القادم نشوف هوت ماني داخل، مش النهاردة (إمبارح دخل 175 مليون دولار لكن اقصد أرقام كبيرة) فالنهاردة متتوقعوش تشوفوا دخول كبير لكن يومين الهوت ماني يطمن ويدخل

*️⃣ عارفك هتقولي طيب هي خدعة ولا نهاية الحرب؟ هقولك نعرف بعد الويك ان ليييه؟ عشان المارينز والوحدات البحرية المطلوبة هتوصل الشرق الأوسط الجمعة، مهلة ترامب تخلص بنهاية الجمعة، واسواق المال بتقفل السبت والأحد.

*️⃣ كل الضربات كانت بتحصل في السبت والأحد وبداية الحرب دي والحرب الماضية برضك، فلو السبت والأحد عدوا على خير يبقي خلاص خلصت الحرب، لإن ممكن تكون خدعة.

*️⃣ المضحك ان مفاوضات قبل الحرب إيران كانت وافقت عالتخلي عن البرنامج النووي لكن تحتفظ بالصاروخي، دلوقتي بيقولوا ان أمريكا قالت لها هتتخلى عن النووي أما الصاروخي هيبقي دفاعي فقط + هيتشال من على إيران العقوبات الاقتصادية 😂 طب ما كان من الأول 🤔🤔🤔.

خلينا نستني ونشوف

رئيس الوزراء بعد تصريح إمبارح قولت يلا نطير، دا يمهد ويخوف

عامة طالما طلعنا فوق 53

عدي النهاردة الاجانب نايمين
عدي بكره مش فايقين
من يوم الثلاثاء تعالوا نتفرج على خروج الهوت ماني 😭😭

نشوفكم الثلاثاء بعد نهاية اليوم نشوف هيكون خرج كام مليار دولار الأسبوع دا 😭😭

الفيديو الأسبوعي الخاص بتحليل أخبار الأسبوع الماضي و توقعات الأسبوع الجديد بترول وذهب ودولار وإجراءات اقتصادية

https://youtu.be/SZFGO3OWQQI

كسرنا ال 54

يلا نستعد من بكره للأكشن في الهوت ماني زي ما قولت لكم إمبارح 😭😭😭

ربنا يستر عشان هنشوف 9 أصفار خارجين 😩😩

تسمحوا لي اهبد هبده صباحية، بس هنشرها هنا مش فيسبوك، اصلي بحس تليجرام إننا أسرة مع بعضينا 😂 الفيسبوك ناس بتكون عارفاني أول مرة تشوف بوستات ساعات.

*️⃣ أول إمبارح لما كسر 53 قولت لكم النهاردة الأحد راحة والإثنين لسه مصحيوش ونبدأ نشوف خروج الهوت ماني من يوم الثلاثاء.

*️⃣ يومي الأحد والإثنين كل حركة الهوت ماني في مصر مجابتش 70 مليون دولار مجموع اليومين، النص الثاني بقى هو إن من النهاردة الخروج فيا ترى ايييه بقى توقعي؟

*️⃣ توقعي النهاردة نشوف خروج ما بين 500-800 مليون دولار، وبكره الأربعاء متوقع نشوف خروج ما بين 900-1100 مليون دولار، دا توقعي ومبني على معطيات مش هقدر أكشف سر شويبس 😁.

*️⃣ بالنسبة لسعر الصرف بقى فدا هنا أقرب لتمني منه توقع وهو ان النهاردة يحصل تثبيت او تخفيض بسيط كده نقول ربع جنية، لو دا حصل هنبدأ نشوف دخول هوت ماني تاني (توقع الثلاثاء و الأربعاء خلاص مش هيتغير مهما حصل في سعر الصرف النهاردة)... لكن لكن لكن لو كسرنا ال 55 صعود ودا استبعد انه يحصل الأسبوع دا، لو كسرنا ال 55 فدا هياخدنا لحته مش حلوه وهنواصل خروج الهوت ماني الملياري اليومي.

بس كده دا توقعي وأمنيتي وفرقوا بين التوقع المبني على معطيات مش هقدر أشاركها زي الخروج النهاردة وبكره، وبين التوقع المبني على أمنيات ومنطق زي سعر الصرف النهاردة، في فارق بين قرار الحسابات وقرار المشاعر.

الحاقاً ببوست الصبح

*️⃣ انا توقعت وتمنيت تثبيت سعر الصرف او تخفيض 25 قرش، فعليا سعر الصرف ثابت (فكر في سعر المركزي وسعر البنك الاهلي، ودول زادوا 1 قرش يعني ثابت) فالأمنية تحققت ✅.

*️⃣ توقعت خروج ما بين 500 ل800 مليون دولار، اللي خرج صافي 74 مليون دولار ولكن ولكن ركز في دي، الاجانب باعوا ب 763 مليون دولار والعرب اشتروا 610 مليون دولار فبقى الصافي سالب 153 مليون دولار.

*️⃣ لو فاكرين قبل العيد العرب دخلوا اشتروا ب 2 مليار دولار لكن سعر الصرف متأثرش، نفهم من كده ان المركزي مش بيحرك بناء على الصافى بل على حركة الأجانب، العرب بيكونوا جايين محبه وأخوات اتفاقيات عبر زيارات، فالقلق من الأجنبي... وبناء عليه نعتبر الاجانب خرجوا 700 مليون عشان أدي نفسي كمان ✅✅ برافو عليا شطور كركور 😂😂😂.

*️⃣ ننتظر بكره ال 0.9 ل 1.1 مليار دولار بقى ولووو بكره سعر الصرف نزل هنشوف من الأسبوع القادم دخول، الخميس اتوقع له استقرار (دخول عرب او صافي هادي مفيش بيع كبير).

احم احم

ها يا شباب، دارحتى كنت طيب وبقول هينزل ربع جنية بس

شايفين النزول دا
برضك لسه مصر ان النهاردة خروج 😁
بكره دخول بسيط

والاسبوع القادم دخول هوت ماني

الااااا لو حصل تطور كبير بالحرب

بما ان الحرب يبدو انها بتلفظ أنفاسها الأخير فدا فيديو ضخم كنت حاطه في الفريزر وقررت اطلعه بيتكلم عن العالم بعد الحرب وهل انتهت الازمة الاقتصادية ام تستمر بعد الحرب

فيديو طويل مدته ساعة بس متقسم لعدة اقسام تحت الفيديو هتلاقي وقت اختار القسم إللي يعجبك

وافتكر بس انه متصور 23 مارس فلو حاسس حاجة قديمة

https://youtu.be/FoFQIgFlzOQ

بعيد عن ترامب والدولار والاخبار اللي تزهق دي، قولت انشر خبر حلو

*️⃣ شركة ويز قررت زيادة رحلاتها من مصر من 80 رحلة أسبوعي ل 240 رحلة وهتفتح خطوط جديدة من 9 دول أوروبية إلى المطارات المصرية، هي مقدونيا ورومانيا وبلغاريا وسلوفاكيا وبولندا وليتوانيا وأرمينيا وألبانيا ومولدوفا

*️⃣ الدول دي كثير منها معندوش ربط مباشر بمصر فدا هيكون خبر كويس للسياحة

*️⃣ لو مهتم بتفاصيل الرحلات فهي 45 رحلة أسبوعياً من بولندا إلى مطارات سفنكس والغردقة وشرم الشيخ ومرسى علم، و27 رحلة من رومانيا إلى الغردقة وشرم الشيخ وسفنكس، و27 رحلة من ألبانيا إلى شرم الشيخ والغردقة وسفنكس.

*️⃣ ومعاهم 10 رحلات أسبوعياً من سلوفاكيا إلى شرم الشيخ ومرسى علم والغردقة، و7 رحلات من ليتوانيا إلى مرسى علم وشرم الشيخ والغردقة، و3 رحلات من ملدوفا إلى شرم الشيخ والغردقة، ورحلتين من مقدونيا إلى الغردقة، ورحلتين من بلغاريا إلى شرم الشيخ، إضافة إلى رحلتين من أرمينيا إلى مرسى علم.

*️⃣ قطاع السياحة المصري السنوات القادمة هيشهد طفرة كبيرة وبالمناسبة الدولة مستهدفة دا في السردية الاقتصادية المنشورة لو فاكرينها.

يوم الأحد الماضي لما نشرت الفيديو الاسبوعي قولت المزيد من الإجراءات الاقتصادية في الطريق وقولت إن الكهرباء هتيجي بس اتوقع شوية كده ومن 1 مايو لكن إن (عاجلاً أو عاجلاً) هنشوف زيادة كهرباء 😁 ايوا قولتها عاجلا او عاجلاً.

*️⃣ الحكومة قالت انتا بتستعجلنا، طيب الزيادة تمت من 1 أبريل 😁😁 عشان تفتح بقك تاني 😂...

*️⃣ عامة الزيادة ظريفة يعني الشرايح اللي تحت الألف كيلو في أمان، لكن اللي فوق الالف كيلو هيزيد... والتجاري هيزيد، يعني معظم الشعب فاتوره مش هتزيد، لكن التجاري بقى في زيادات عنده في شرايح هتزيد 90% لكن لو زودوا الأسعار بتاع خدماتهم هيطلع لك فلحوس أفندي يقولك جشع التجار 😃... كهرباء ايه اللي زادت أنا فاتورة بيتي مزادتش، وبكده الشعب يشتم التجار وكل سنة وانتم طيبين يا مصريين

*️⃣ فيديو الاسبوع دا لسه متصورش الصراحة والوضع محير بالنسبة لي رغم ان التصعيد الامريكي دا وحتى ضرب الجسر انا قايله من بداية الحرب ان الشهر الثاني هو اعادة ايران للعصر الحجري وضرب كل شيء. لكن فعليا مش قادر أحلل لانشغالي جداً في شغلي لكن ربنا كريم

رغم خروج الهوت ماني + انخفاض الذهب لكن الاحتياطي منزلش ودا معناه ان اللي كنت قولته في الفيديوهات 😃 وهو ان المركزي هيتسخدم الفلوس اللي متشاله على جنب

*️⃣ في 17.5 مليار دولار (رقم يناير) مش متضافين في الاحتياطي ومتشالين على جنب تحت مصطلح الاحتياطي الغير رسمي

*️⃣ استخدمناه وخرجنا الهوت ماني منه 😃 وكمان عوضنا نزول الذهب، واضح اننا سحبنا 10 مليار دولار مثلا منهم، عامة حركة حلوه تطمن الناس ان الاحتياطي لم ينهار رغم خروج الأموال الساخنة

⬅️⬅️ للأمانة أنا في الفيديوهات توقعت ان خروج الهوت ماني يكون من الاحتياطي الغير رسمي لكن متوقعتش خالص اننا نعوض كمان انخفاض قيمة الذهب منه، دي جديدة.

⬅️⬅️ عامة ما سبق لسه تخمين، لسه هنشوف صافي الأصول للقطاع المصرفي لإن ممكن نتفاجئ انه خرج الهوت ماني من البنوك 😭😭 حركة كان محافظ مركزي سابق بيعملها بس حسن عبد الله سياسته مفروض مختلفه... غالباً خرجوا من الاحتياطي الغير رسمي معظمهم.

السؤال بقى مش بتشوفوا فيديوهاتي ليه، دا هو فيديو وحيد اسبوعي ، اه طويل شويتين ثلاثة اربعة خمسة بس هو واحد بس اعتبره دواء وخده عشان أحبكم 🤩🤩