ايه اللي هيحصل في الاقتصاد دلوقتي محدش عارف بس تعالوا نتخيل

*️⃣ بالنسبة للذهب العالمي فسعر الاغلاق الرسمي كان 5277 دولار للأوقية؛ سبت واحد عالمي؛ بكره الاثنين هيفتح السوق العالمي وهنشوف السعر لكن عملة PAX وهي عملة رقمية مربوطة بالذهب كانت شهدت ارتفاع ل 5550 دولار ثم تراجعت والان تساوي 5343 دولار. يعني نقدر نخمن مجازاً ان بكره في ارتفاع مش ضخم يمكن في حدود 100 دولار (عملة باكس مؤشر بس لكن مش قوي لان حجم الكاش فيها مهواش بضخامة سوق الذهب لكن اللي عاوزين يتحوطوا دلوقتي بيشتروها).

*️⃣ محلياً بقي الذهب بقي متسعر كإن سعر صرف الدولار يساوي 51.5 جنية؛ دا تحوط مبني علي الطلب؛ يعني في (زبون) شايف ان الدهب هيجيب مثلاً 9000 جنية لعيار 24 فليه ميروحش يشتري ب 8700 جنية الجرام. السعر الرسمي النظري الجرام مفروض 5277 دولار الاوقية * 47.9 الدولار / 31.1 وزن الاوقية = 8075 جنية ودا معناه الجرام فيه 700 جنية تحوط.

*️⃣ بالنسبة لسعر الدولار فدا هيخضع لحركة الهوت ماني؛ عادة مفيش حركة يوم الأحد لان الاجانب إجازة فالنهاردة مفيش أكشن؛ لكن ممكن البنك المركزي يتحوط ويزود سعر الصرف ل 48.5 جنية ويستني بكره يشوف الاجانب هيعملوا ايه؛ لو باعوا 1+ مليار دولار فيطلع بسعر الصرف ل 49؛ لو حصل جنان وارقام كبيرة ممكن يذبح ويقفز ل 50 كمان؛ لكن لو لقي الاجانب بتبيع بهدوء زي 200 و 300 و 400 مليون دولار فهنا ممكن يهدي بل وينزل ل 48.25 مثلاً او يقعد عند 48.5.

*️⃣ في عندنا 52 مليار دولار احتياطي منهم 32 مليار دولار كاش و 20 مليار ذهب؛ البنك المركزي عنده فلوس علي جنب بره الاحتياطي (الاحتياطيات غير الرسمية) تقدر ب 17.5 مليار دولار في يناير يعني يعتبر عندك احتياطي 70 مليار دولار فخروج 1 ولا 2 مليار دولار مش هيعملوا ازمة حقيقية.

*️⃣ بمجرد هدوء الاوضاع او سيطرة المعسكر الغربي عالوضع في ايران هيبدأ الذهب والدولار في التراجع؛ فممكن تستغل فترة الحرب دي وتبيع في القمة وخاصة اللي كان محبوس في دولار غالي؛ وانتا وتقديرك بقي؛ يعني شايفها هتولع اكثر يبقي لسه في قمم اعلي؛ شايف خلاص قربنا يبقي اجني الارباح وبيع ولما ينزل تروح شاري اللي انتا بعته... يعني دي تخضع لتوقعاتك بس اكيد اكيد محدش عفريت يقدر يصطاد القمة المطلقة؛ فلما تبيع قول بارك الله فيما رزق ومتندمش.

⬅️⬅️ كتبتها بوست اهو عشان الناس اللي زعلانه مني عشان مش بنزل بوستات وبعمل فيديوهات؛ لكن ممكن لما أوصل المكتب اصور فيديو صغير كده بدون مونتاج ولا حتي اضاءة قوية عشان ارغي بشوية تفاصيل أكثر عن الوضع المالي والاقتصادي مش عن الحرب؛ لان الحرب قولت ولازلت ان دي حرب عبثية صفرية يعني النظام الايراني لن يسقط ومفيش دولة مستفيدة ولا حد مستفيد غير الاخص صنان (بيبي نتنياهوو).

الحاقا ببوست الصبح

قالك بلاش فرهدة ايه استني يوم الاثنين 49 دي

هو من النهاردة 49 😂

في فيديو كنت نزلته وهو هو البوست بتاع الصبح

طبعا هو كان قبل السوق ما يفتح والدولار يزيد 😁

فمليش دعوة هو زيادة الاحد زيادة

https://youtu.be/te4_Rh4P0sM

تحديثات الوضع الاقتصادي

*️⃣ إمبارح قولنا ان سعر الذهب 5277 دولار ومتوقع انه لما يفتح السوق يزيد 100 دولار؛ بالفعل السوق الآن لحظة كتابة البوست 5378 دولار؛ وللتوضيح دا لسه السوق الأسيوي؛ الإنجليزي والأمريكي الأهم لسه مفتحوش. وطبعاً سعر الذهب هيتحرك حسب الحرب ماشية إزاي.

*️⃣ برضك قولت إمبارح ان سعر الصرف هيتحرك للتحوط ل 48.5 ثم يوم الإثنين نشوف 49؛ لكن واضح ان الوضع أصعب أو المركزي قال بلاش فرهدة فزود سعر الصرف ل 48.9... النهاردة متوقع نشوف حركة اضافية من الساعة 11 الظهر كده في سعر الصرف بس في نقطة مهمة وهي النهاردة في حركة هوت ماني.

*️⃣ توقعي الشخصي النهاردة هيكون في بيع أجانب في مستوي 50-70 مليار جنية ودا متناسب مع زيادة الدولار ل 49 او 49 وشوية اللي هتحصل النهاردة؛ لو حصل بيع أقل فدا يطمن المركزي إن السوق مش مرعوب وفي اطمئنان جزئي إن مصر بعيد عن الخناقة.

*️⃣ أما في حالة كان في بيع قوي يعني 100+ مليار جنية فهنا عااادي جداً نشوف سعر الصرف رايح ل 50 جنية والمشكلة هتكون لو بكره وبعده استمر لاننا مش هينفع نكر ونطلع كمان؛ احنا مش بنحب نعدي 51 جنية.

*️⃣ الخلاصة الساعة 1 الظهر هيكون ظهر حجم البيع الاجنبي؛ والسوق اصلا بيقفل 1 ونص؛ إن شاء الله مش هيحصل هل؛ لكن نفتكر برضك ان في مستويات من الاجانب؛ في مؤسسات كبيرة ودول هيكون حركتهم ثقيلة ك فلوس لكن برضك ثقيلة مش حساسين قوي عكس المضاربين اللي كانوا جايين عشان مصر بتدي أعلي مكاسب وفوايد عالدولار في كوكب الأرض؛ فدول ناس بتراهن ودول اللي بيخرجوا؛ لكن زبونا الثقيل دا مش مرعوب... ما سبق تخميني يعني وهيحسمه حجم البيع.

*️⃣ خام برنت وصل 78 دولار؛ وهو سعر ليه مش مرعب؛ الموازنة كانت 75 دولار حسب تقارير سابقة لكن مفيش تأكيد رسمي؛ طول الشهور الماضية كان سعر برنت 65 وساعات 60 دولار فدا يخفف الضغط؛ وللتوضيح محسوب علي 75 يعني حسابات العجز علي 75 دولار؛ يعني لما كان بيقل عن 75 كان العجز بيقل عن المخطط وليس بنكسب... دا توضيح عشان في دايماً سوء فهم؛ نكسب دي لما نكون بنبيع بالتكلفة وال 75 دولار مش بتسبب عجز مدفوعات.

*️⃣ مصر وقفت ضخ الغاز ل سوريا ولبنان عشان نعوض العجز؛ لكن في المقابل زودنا تصدير الكهرباء للأردن بنسبة 29%.

⬅️⬅️⬅️ نقاط غير اقتصادية

*️⃣ الناس المنتظرة أكشن ؛ معلش في أول أسبوع متتوقعش قوي؛ بطاريات الصواريخ لسه متضربتش؛ وبطاريات الدفاع الجوي عند الدول اللي بتتضرب لسه مليانه؛ لكن بعد أسبوع هيكون الطرفين استنزف جزء محترم فهنا يبدأ اللبش؛ عشان كده الحرب الماضية خلصت في 12 يوم؛ وكان آخر يومين في اصابات عنيفة بالصواريخ عشان قدرة الصد بتضعف؛ وطبعاً قدرة الإطلاق برضك بتضعف؛ فنعدي الأسبوع الأول ونشوف.

*️⃣ تقارير بتتكلم ان بريطانيا وبعض الدول الأوروبية هتبدأ تحط خطط إجلاء رعاياها من دول المواجهة؛ يعني كده بدأ يبقي في تفكير إن شكل الحرب مطولة أسابيع مش أيام.

*️⃣ خطة الردع الدفاعية الإيرانية واضح إنها قايمة علي فكرة توسيع الاشتباك؛ يعني هضرب الدول العربية فدا يشتت الجيش الأمريكي وميعرفش يدافع عن كل الدول والمساحة دي... لكن ميعرفوش إن الأمريكان الموضوع عندهم بسيط؛ هو اللي بيتضرب دا جنسيته ايه؟ زف الطين خلاص نحميهم؛ عرب يبقي خلاص شهداء أبرار وربنا معاهم... فكده خطة إيراني مش ماشية قوي وممكن تجبر الخليج علي المشاركة العسكرية للأسف 😓... غدر وحش من أمريكا بس دي أمريكا المعتادة؛ دافعوا عن نفسكم انا يهمني دولة واحدة بس بالمنطقة.

⬅️⬅️⬅️ ان شاء الله هبقي اتابعكم بالمستجدات الاقتصادية ايه بيحصل

خبر اقتصادي ايجابي يا شباب

*️⃣ النهاردة اجمالي بيع الاجانب اسهم وسندات واذون عامل 285 مليون دولار ودا اقل بكثير من التوقعات ورقم عادي جدا جدا

*️⃣ والنتيجة البنوك بعد ما كانت رفعت الدولار ل 49.85 نزلوا 60 قرش وبقي دلوقتي 49.27

*️⃣ بصراحة دا شيء ايجابي ولو الدنيا فضلت هادية كده هنشوف الايام القادمة تراجع الدولار تحت 49 جنية

⬅️⬅️⬅️ في سعر الصرف ركز علي البنك الاهلي ومصر و CIB وممكن العربي الافريقي؛ دول يعرفوك السعر الحقيقي؛ أكبر 2 بنك في مصر+ أكبر بنك خاص + البنك اللي رئيسه السابق هو محافظ المركزي الحالي... أما باقي البنوك نفض

خبر ايجابي اهو عشان كل شوية تقولوا لي انتا بتاع أخبار سلبية

ليه كده ليه كده

شكلنا هنشوف رقم كبير خروج النهاردة

حتي الان في خروج 430 مليون دولار 😓

تحديث

الرقم بقي 900 مليون دولار

النهاردة في 2 اختبار للقطاع المصرفي والمالي المصري

1️⃣ النهاردة الخميس يعني الأجانب أجازة جمعة وسبت وأحد مفيش خروج هوت ماني فيا ترى يا هل ترى هيحصل خروج مليار دولار ولا ايه؟ الأجانب بعد النهاردة هيقعدوا 3 أيام يتفرجوا وعارفين أن أمريكا بتحب تعمل أكشن سبت وأحد وبورصتها قافله.

2️⃣ النهاردة المركزي طالب أذون خزانة 40 مليار آجل 6 شهور و 55 مليار آجل سنة؛ الأسبوع الماضي كانت الفائدة المقبولة 23.84% و 22.78% بالترتيب ووقتها كان عاوز 40 مليار و 50 مليار وأخد بالفائدة دي 40 مليار و 80 مليار... يعني المطلوب وبزيادة... دلوقتي التحدي بقى البنوك والهوت ماني هيطلب منه كام فائدة؟ هيقدر يغطي المطلوب بفايدة كام ولا هياخد أقل من المطلوب؟

خلينا نشوف

مجرد دردشة لغاية ما أخلص تصوير فيديو توقعات الوضع الاقتصادي والاجراءات الاقتصادية القادمة قريباً 😭😭 والبنزين 😢😢


فيديو بيناقش فكرة هل من مصلحتنا ومصلحة الخليج هزيمة ايران وتغيير نظام الحكم لآخر غير معادي للغرب ولا دا هيكون بيطبق مقولة

Be Careful What You Wish For

https://youtu.be/nNMj4oXLD9o

من شوية نشرت فيديو دمجت فيه أخبار الأسبوع الماضي ومعاه توقعات الأسبوع القادم وكذلك الإجراءات الاقتصادية القادمة في حال استمرار الحرب بداية من رفع سعر البنزين 2-3 جنية واحتمال رفع الكهرباء وغيرهم وكمان قولت ليه زي ارتفاع سعر البترول 50% مقابل الجنية لكن برضك في تحديات قصاد الدولة وهي السيطرة على التضخم

*️⃣ ومنستش الذهب برضك وشرحت ليه عمل تصحيح ومش قادر يطلع زي ما كان متوقع من الجميع إنه هيطير ونشوف 6 الاف والجو دا

*️⃣ ومعاهم توقعات حركة الدولار الأسبوع القادم وأسباب التوقعات دي

وميكس أخبار كده

*️⃣ هتلاقوا تحت الفيديو أنا مقسمه أجزاء عشان أسهل عالناس اللي بتحتب تختصر

*️⃣ الناس اللي هتقولي أحنا بنحب الكتابة؛ عارف وانا أهو شارح لك معظم اللي في الفيديو شوفت بقى...

https://youtu.be/N6RRn11m17Q

البنك المركزي واضح انه عنده توقعات خروج عنيف فقرر يسبق الكل ويرفع الدولار لاعلي مستوي من ساعة التعويم

مستوي غريب؛ انا قولت مستحيل نكسر ال 52 حاليا بس واضح ان في شيء ما

بعد ما كسرنا الـ52 وده كان السقف اللي كنت بقول إنه آخرنا، فخلاص كده كل شيء دلوقتي متاح؛ السقف اتكسر ومعانا الطريق مفتوح بقى نجيب 55. الله أعلم، بس تعالوا نرص مع بعض الوضع الاقتصادي الحالي.

1️⃣ بالنسبة للبترول، عندنا برميل البترول كان من شهر بـ68 دولار والدولار بـ47 يعني فعليًا البرميل بـ3200 جنيه، والنهاردة بقى 93 دولار والدولار بـ52 جنيه أي 4840 جنيه تقريبًا بزيادة تفوق الـ50%... وزير المالية كان قال إننا متحوطين ضد ارتفاع الأسعار لـ50% من استهلاكنا، يعني ممكن مجازًا نقول في زيادة تكلفة 25%. وده يخلينا ننتظر قرار مؤلم بزيادة قد تصل إلى 3 جنيه في البنزين... يا ترى بقى هتم قريب ولا هيستنوا ثالث يوم العيد؛ الله أعلم.

*️⃣ مصر يوميًا بتستهلك 850 ألف برميل وإنتاجنا 510 ألف برميل وهو الرقم الأقل من 40 سنة. لو قولنا نصفه للشريك الأجنبي يبقى هو 255 ألف وإحنا 255 ألف ونستورد الباقي... يعني فعليًا كده ثلثي استهلاكنا بنحاسب عليه بالسعر العالمي؛ فالسعر العالمي مؤثر علينا وبشدة لأننا بنحاسب على ثلثي الاستهلاك عليه. ولا ننسى إن المضيق بيعدي فيه 20% من بترول الكوكب فدي مأساة؛ السعودية هتقدر تعدي شوية من إنتاجها للعالم بواسطة خط شرق غرب، والهند قالت هتستلم من ينبع عادي... الشيء الكويس إن لسه ما حصلش عجز عالمي؛ فعندك المستهلك الكبير الصين اللي بتستورد يوميًا 10 مليون برميل عندها مخزون 900 مليون برميل؛ فحتى رغم فقدانها لـ5 مليون برميل من الخليج/إيران ففي 900 مليون طوارئ يسحبوا منهم. وبالمناسبة الصين أعلنت إنها هتزود سعة المخزون وهتشيل بعد كده رقم يفوق المليار برميل للطوارئ (إنتاج كوكب الأرض 100 مليون برميل يوميًا).

2️⃣ لما نروح للغاز فالمعضلة صعبة؛ مصر إنتاجها انخفض لـ4 مليار قدم بل تحت الـ4 مليار قدم؛ واستهلاكنا حوالي 5.5 مليار قدم بالشتاء وفي الصيف بنوصل لـ6.5 مليار قدم... كنا بناخد من الـ... مليار ونزق الباقي بسفن فك الإسالة... المضيق قفل والعالم فقد 20% من الغاز المسال فمحدش لاقيه... مصر كانت بتشتري الغاز بتاع العدو بـ8 دولار للمليون وحدة حرارية mmBtu وده أوفر من شرائه بـ12 دولار غاز مسال؛ المهم دلوقتي محدش لاقي غاز، والأخبار بتقول الهند وبنجلاديش اشتروا شحنات غاز بـ20 و23 و28 دولار فدي قفزة خزعبلية... الخبر السار الوحيد إن قناة العربية ذكرت قبل ساعات إن حقل تمار بدأ التشغيل التجريبي فيه وهيرجعوا ضخ الغاز لينا خلال أيام...

3️⃣ من الغاز نروح للكهرباء اللي بقت كده مدعومة وبشدة وخاصة إن الدولة قررت تثبت الأسعار من أجل مكافحة التضخم؛ وزارة الكهرباء تقريبًا بتشتري الغاز من البترول بـ6 دولار (الغاز اللي بقى بـ20 و28 ده) فتخيلوا حجم العجز بقى؛ وربنا يستر وما يحصلش زيادة كهرباء.

4️⃣ نروح بقى للدولار، وشهدنا الأسبوع الماضي خروج 2.2 مليار دولار وزيادة سعر الصرف 2.2 جنيه؛ النهاردة فجأة البنوك زودت 2 جنيه دفعة واحدة في أكبر تغير يومي في سعر الصرف؛ فإحنا أمام 2 سيناريو: الأول هو تحوط احترازي لغاية ما يشوفوا بكرة هيحصل إيه، والسيناريو الثاني هو داتا عند المركزي إن في صناديق ومؤسسات هتبيع بكرة... نتمنى الخيار الأول لكن الثاني يبدو الأقرب خاصة إن النهاردة ولأول مرة يوم الأحد مؤسسات أجنبية تخش تبيع أذون وسندات الخزينة؛ وباعوا 10.6 مليار جنيه واشتروا صفررر وده برضه غير معتاد؛ تحسه كده حد كان حاطط Stop Loss تساوي 52 وضربت معاه فباع.

⬅️ دي المعطيات اللي معانا حاليًا، واللي حابب يحط الطرف الثاني فهو وجود احتياطي عند المركزي يساوي 52.7 مليار دولار ومعانا 17.5 مليار دولار أرصدة غير مضافة للاحتياطي حسب آخر تقرير في يناير، يعني معانا 70 مليار دولار عند المركزي بخلاف اللي عند البنوك؛ يعني فعليًا مفيش أزمة من خروج 2 ولا 3 ولا 5 ولا حتى 10 مليار... الخوف بس من تأثير الدومينو يعني الخروج يجيب خروج + الصعود يجيب توقف من المصريين عن بيع الدولار، فكده بيزيد الصرف "التدبير للأجانب" ويقل الإيراد "التغيير من المصريين"، لكن القلق حاليًا مش المواطن بل من المؤسسات الأجنبية اللي تحت إيديها رقم مجهول. لو شلنا اللي مربوط باتفاقيات الريبو ممكن نشوف لسه 30+ مليار دولار هوت ماني صريح.

*️⃣ دي المعطيات حتى لحظتنا الحالية، وخلينا نشوف الدنيا هتمشي إيه بكرة. وكل ما سبق هو الفيديو اللي نزلته إمبارح لكن في تحديث وهو كسر ال 52 ودي اللي إمبارح كنت بقول مش هتحصل الأسبوع دا... اللي عاوز يشوف الفيديو هحط الرابط في التعليقات

⬅️⬅️ تحديث:

*️⃣ اللي عاوز يشتري حاجة ينزل يشتريها دلوقتي؛ دبي واقفة ودي مصدر اساسي؛ والشحن من الصين زادت مدته عشان راس الرجاء الصالح؛ والتأمين البحري زاد؛ أسعار كل البضايع هتزيد فاللي ضروري عاوز حاجة ومأجل يبطل كسل ويفطر وينزل يشتريها.

*️⃣ في رأيي الشخصي لو الحرب وقفت بكره؛ هناخد شهرين او 3 عشان نرجع لل 47 دي تاني.

الحاقا بالبوست السابق

بورصات آسيا فتحت وبرنت قفز ل 109 دولار

البترول بقي 117 دولار يعني بالجنية = 6100 مقابل بترول 3100 جنية قبل شهر يعني تقريباً الضعف

يا تري احنا نستحمل زيادة بنزين كام

كذا حد باعت لي وحتى عاملي مينشن يقولي في بوست إمبارح السردي للوضع الاقتصادي قولت في نهايته إن دبي مقفولة والشحن البحري مدته زادت والتأمين زاد فاللي مأجل يشتري حاجة ينزل يشتريها بعد الفطار... فأنتا كده يا محمد بتدعوا الناس ينزلوا يعملوا تكالب عالسلع الأساسية ويعرضوا الأمن الغذائي للخطر.

*️⃣ لا حول ولا قوة إلا بالله... ربنا يسامح التعليم المصري واللي بتحدفه علينا... طيب سيبك من إن أكيد مش مصر كلها بتابعني وسيبك أن مش مصر كلها معاها فلوس تتكالب بيها عالشراء... وسيبك إن السلع الأساسية مش بتجي من الصين؛ لكن واخد بالك انتا بتقول ايه... السلع الأساسية.

*️⃣ هو في شيء يا اذكي من في فصيلتك منك له شيء اسمه اللي مأجل شراء لسعة أساسية؟ هي السلع الأساسية بتتأجل؟ يعني هو في حد يقول مليش نفس الشهرين دول اشتري دقيق وسكر ورز ومكرونة وزيت؟ هيعيش بالتمثيل الضوئي.

*️⃣ الشيء اللي بيتأجل هو الشيء الغير ضروري لحياة الإنسان؛ دا الشيء اللي بتقعد تقول انزل اشتريه دلوقتي؟ لا بص يوم الخميس هفطر بره هبقى بعد الفطار اشتريه... لكن الأكل هتقول هو محتاج اشتري بس فاكس بعد رمضان هبقى آكل.

*️⃣ بص تصدقوا أنا برضك غلطان؛ بوست بابلك فمفروض أراعي وجود عقليات غير بشرية معانا؛ لازم أنزل بمستوى البوست دون التفكير البشري لإن كل الناس أي كان مستوى ذكائها معاها موبايلات وتقدر تعلق وتشير وتتحسب بني آدم والمصيبة يعتبر ليها صوت انتخابي زيها زي أي دكتور جامعة... دي مصيبة.

*️⃣ لا والمشكلة انك مش بس تلاقي انهم محتفظين بغبائهم لنفسهم لا ويعملوا منشن لجهات أمنية ويبعتوا بلاغات؛ اللي هو احنا متخلفين وهنلبسك بغبائنا؛ دا انتم مفروض يتقبض عليكم عشان نحمي المجتمع؛ ويتم منعكم من الانجاب والتكاثر.

كم غباء غير طبيعي شوفته في الشير للبوست بتاع إمبارح؛ الكندوز لا يفني ولا يستحدث من بقر.

في 14 يناير 2024 وقت الجري بتاع الدولار بالسوق السوداء ل 70 جنية قولت إن نهاية السنة هتكون أفضل إن شاء الله؛ وبعد شهرين حصل التعويم ووقتها اللي كان بيسألني كنت بقوله كان في رأيي إن سعر ال 50 جنية دا يكون Overshoot وينزل لتحت ال 45 لكن يبدو إني مكنتش لوحدي اللي شايف دا لكن المؤسسات الدولية برضك وبناء عليه قالك فرصة نضخ مليارات الدولارات بل أكثر من 20 مليار دولار دخلوا في الشهور الأولى للتعويم.

*️⃣ لما كان حد بيسألني بعدها تتوقع السنة تخلص على ايه فكنت بقول 53 جنية ثم نهاية 25 يوصل ل 57 جنية ثم نهاية 26 يوصل ل 65 جنية. وفضلت مقتنع بيها يعني دا كان جزء من رسالة بعتها لشركائي في دكان تك في يناير 2025 ( توقعاتي كما ذكرتها بالمعطيات الحالية هي نهاية 2025 ما بين 55 إلى 57 جنية... ونهاية 2026 هي ما بين 63 إلى 65 جنية) .. وكان في رأيي إن دا يحصل عشان سببين الأول يقلل هوامش الربحية الخزعبلية للهوت ماني وبالمرة يقلل وجودهم فبناء عليه منتعرضش لهزات عنيفة في خروجهم لإن دخولهم نفسهم هادي وانتا فعلياً مقصقص منهم شوية فعلياً بدون خروج لكن سايبه بيكسب حلو وبالمناسبة مصر أكثر بلد في كوكب الأرض الهوت ماني بيكسب منها ك نسبة عالدولار ومفيش غيرنا بيكسبهم 20-25% عالدولار سنوياً.

*️⃣ كمان إن فكرة الصعود الهادئ دي بتخلي الأسعار برضك متعملش صدمات سعرية؛ يعني أنتا تاجر مثلاً اشتريت بضاعتك ب 50 جنية الدولار وبعد شهرين لقيته ب 51 يعني زيادة 2% ففعلياً هتنفض وتستني تغير عند 52 وتاجر ثاني يغير أسعاره عند 51.5 وثالث عند 52.5 وهكذا يبقى في حركة صاعدة هادية؛ عكس لو نمت 50 صحيت 55 فهنا بدون تفكير هتوقف بيع وتزود الأسعار بل وقتها مش هتعيد التسعير على 55 لكن على 60 تقولك اضمن منين؛ فالصعود الهادئ يخلي حركة السعر براااحة كده.

*️⃣ الدولة كان ليها وجهة نظر تانية وهي إن الصعود الهادئ ممكن ميخليش المصريين يتخلصوا من الدولار؛ مهو عارف إنه صاعد... لازم يثبت وينزل عشان الناس تبيعه؛ وآه صعود 5% سنوي كلام فارغ بس في ناس مش بتحسبها وبتفكر إنه صاعد يبقى كسبان ومش بيبص إنه صعد 5% والتضخم 20% مثلاً وقتها فكده هو خسران... كمان الهوت ماني لازم يكسب كثير قوي وإلا مش هييجي عندنا. ولازم يخشوا ب 50 ويكسبوا وننزل لهم سعر الصرف ل 47 ويخرجوا بيها زي كان بيحصل بقالنا سنة ونص.

*️⃣ أنا مش صانع قرار وصناع القرار في مصر أدرى مني وعندهم معلومات مش عندي أكيد بس اللي كنت اقصده إننا سوق مش منظم وعشوائي؛ يعني لما تزود سعر البنزين/السولار 3 جنية مثلاً فسواق التاكسي ولا سواق النقل ميعرفش يحسبها فعلياً دي تكلفتها عليه ايه وبناء عليه مفروض الميكروباص مثلاً يزيد كام فعلياً.. فكلنا بنزود عشوائي وعشان كده مفروض تسرسب الزيادات بحيث براااحة تعدي ومياخدش باله... زيادة صغيرة قوي تعدي بدون صدمة...

*️⃣ فالصعود الحالي صدمة عشان الحرب وبناكل شوية من الهوت ماني اللي خارج لكن لو الهوت ماني قرر الخروج هيطلع بأي سعر... لكن ممكن برضك نكون بنعمل لهم اغراء ما تخشوا ب 53 وبعدين الحرب هتخلص ننزل ل 47 فتكسبوا 20% فوايد و 10% فرق سعر صرف وتبقوا كسبتوا 30% عالدولار... ممكن تكون دي الخطة...

*️⃣ عامة الدولة هتعلن حزمة قرارات وهيكون منها الحد الادني للاجور 9 الاف جنية خلال أيام يعني 7600 الصافي تقريباً... وهيكون في شوية حزم إجتماعية دعم المواطنين ومعاهم إجراءات اقتصادية عشان ناخد اللي وزعناه دا وزيادة

*️⃣ المهم اللي كنت اقصده بالبوست دا ان دايما في خيارين؛ تحب الطريق براحة واحدة واحدة ولا تحب راحة ثم ضرب ثم راحة ثم ضرب... الباكدج تاخده تدريجي متواصل ولا دفعات متقطعة.. انا مع التدريجي بس أنا مواطن بهري علي الكنبة ومعنديش الداتا اللي عند صناع القرارات.

مظنش حد متابعني اتفاجئ بال 3 جنية
انا قايلها لكم بالظبط 3 جنية

وقايلكم الرقم دا من 3 أيام في فيديو اجراءات اقتصادية مؤلمة قادمة 😢

اخواتنا بتوع عربيات الكهرباء متفرحوش قوي 😉 وافتكروا اني قولت لكم دا 😁

النهاردة السوق الثانوي شهد خروج 1.15 مليار دولار هوت ماني؛ لكن في ملحوظة إيجابية وهي عودة مشتريات العرب بشكل ملحوظ وكانوا صافي موجب 70 مليون دولار؛ وكمان من يومين كانت مشتريات الأجانب صفر؛ كان بيع فقط وشراء صفر؛ النهاردة اشتروا أذون وسندات ب 14 مليار جنية (باعوا 77 مليار)؛ فكده معناه إن في أجانب بدأوا يقولوا كويس سعر الصرف دا أو واضح إن الوضع كويس في مصر فهنخش تاني مش هنطلع. اه في عدد أكبر بيبيع لكن المشتريين بدأوا يظهروا.

*️⃣ لو استمر بكره دخول للأجانب وحتى لو اليوم طلع سالب صافي (دا متوقع طبعاً) بس في أجانب بيشتروا فممكن قريب نشوف المعادلة تتقلب والأجانب يرجعوا للسوق تاني... وعودة الأجانب تعني استقرار سعر الصرف وممكن نهدي وننزل ل 51 ثم تدريجي بهدوء نتسحب لل 50...

*️⃣ دي مجرد خواطر كده لسعر الصرف وأدينا هنشوف؛ النقطة الإيجابية هتكون ان بكره صافي أجانب أحسن من النهاردة + مشتريات أجانب أكثر = الأجانب راجعين = هتستقر مش هتضرب مننا.

خلينا نشوف

خناقة مضيق هرمز اللي حاصلة دي مبهرة؛ فكرة إن في مكان في الكوكب تطلع دولة زي إيران تقول محدش يعدي هنا؛ أمريكا تقول للناس عدوا متخافوش.

*️⃣ وكلام إيران يمشي والشركات تسمعه عن كلام أمريكا؛ فكرة رهيبة وخاصة لما تفكر فيها مع وجود عدد ضخم من قطع البحرية الأمريكية. بل قطع البحرية الأمريكية نفسها خايفة تعدي 😂 واقفطن بعيد في المحيط بيحدفوا منه؛ مفيش جو نعدي قدام السواحل اللي هما مفروض مسيطرين على جوها.

*️⃣ لا ويطلع الرئيس الأمريكي يقول لإيران إياكي تحطي ألغام بحرية وإلا هنعملك واوا كبيرة (أصل بيقولهم هنضربكم؛ على أساس انهم بيبعتوا لهم ورد)... يعني الرئيس الأمريكي اللي قال هو ووزير الحرب بتاعه انهم انهوا وجود البحرية الإيرانية قاعدين قلقانين ان إيران تزرع الغام بحرية؛ طيب يا عم انتا مش بتقول انهيت بحريتهم هيزرعوا ألغام إزاي 🤔.

*️⃣ فعلاً أمريكا والكيان قوة مفرطة غشيمة بس متمشيش مع دول عندها عقيدة أي كانت العقيدة سواء فيتنام أو أفغانستان أو إيران؛ مجرد القوة المفرطة تصطدم بناس عادي يموتوا؛ هنا القوة دي تهنج؛ هي مفروض حافظة إنها مجرد تظهر قوتها الثاني هيخاف على حياته؛ لكن الفيتنامي الأفغاني اللي بيدافع عن أرضه ثم الإيراني اللي واخدها انتقام لزعيمهم... هنا القوة الغشيمة بتعجز؛ عادي ممكن اقتل لك مليون بس برضك دا مش رادع؛ طيب أعمل ايه.

خلينا نشوف هتخلص إزاي.

النهاردة ثاني أكثر يوم خروج هوت ماني في آخر 12 شهر حيث كان اليوم صافي سالب 1.19 مليار دولار وهو الأعلى منذ 8 أبريل 2025 اللي كان وقتها خروج 1.24 مليار دولار (وقتها سعر الصرف كان 51.75 بالمناسبة).

*️⃣ الملاحظ إن العرب كان صافيهم (أحد إثنين ثلاثاء) صافي موجب 27 مليون دولار لكن النهاردة صافي سالب 67 مليون دولار... الأجانب النهاردة باعوا أقل بسيط من إمبارح (باعوا النهاردة 58 مليار جنية وإمبارح باعوا 62 مليار جنية).

*️⃣ الملاحظ بقى إن البنك المركزي يواصل لليوم الثاني عالتوالي تثبيت سعر الصرف عند 52 جنية ويمكن الإجابة عند بلومبيرج في نشرة خاصة اليوم قالت

Citi Closes Egypt Debt Call After Stop-Loss Level Is Triggered

*️⃣ يعني البنك المركزي لما عمل عنتر ورفع الدولار فوق 52 وقرب من 53 راح Citi Bank بايع أذون خزينة كان حاطط لها حسب الخبر 2.5% مارجن (-2.5% stop-loss) فالمركزي كده فهم إن في مؤسسات حاطه 52 وفوق شوية Stop Loss فمتفتكرش إنك أشطر مننا وهتطلع وتاكل من أرباحنا؛ لا يا برنس هنذبح ومش هنسمي... ومن هنا نفهم ايه ليه رغم خروج 2.3 مليار دولار إمبارح والنهاردة بس سعر الصرف ثابت.

⬅️⬅️ مين بقى عملكم فيديو يوم السبت وقال فيه إن مينفعش نكسر ال 52 وهو كده وخلاص ولما حصل يوم الأحد وكسرنا 52 قال يالهوي... عرفتم ليه عشان المؤسسات بره بتبدأ من فوق 52 تحط خط إيقاف الخسارة... في حاطط 52 وفي 52.5 وفي 53 وفي 54 وفي كثييير حاطين من 55 وطالع... فمجرد تطلع في ناس هيبيع تلقائي؛ كان في حرب مفيش حرب هيبيع دا سيستم. وعامة ال 52 و 52.5 خلاص ضربوا لما رفع ل 52.9... لكن المرحلة القادمة 53 لو شوفتوها هتلاقوا خروج هوت ماني كبير فجأة... دا إيقاف خسائر تلقائي.

ملحوظة مهمة : مش معني كده انه مش هيجيب 53؛ لكن معنى دا انه هيفلفص شوية ويحاول يأجل إنه يجيبها لكن لو اضطر هيعملها عادي ويطبق خيار شمشون

⬅️ شوفتم الفيديو بتاع السبت ولا مشوفتوش اعترفوا 😀😀 الفيديو قولت فيه هيزيد البنزين 3 جنية وقولت الصعود فوق 52 مينفعش ودا السقف 😁... ربنا يستر الكهرباء بقي لسه دي أول الشهر شكلها 😂

النهاردة دخول أجانب

مين قالكم دا أول إمبارح 😁😁😁

تحديث للتوضيح :

البند الاول صافي عمليات المصريين
البند الثاني صافي عمليات العرب
البند الثالث صافي عمليات الاجانب

يبقي الصورة بتقول الصافي مصريين سالب وأجانب موجب

الرقم لسه بيتحدث كل 5 دقايق والسوق بيقفل الساعة 1 ونص