الفلوس المصدرة في مصر بالمليون جنية

المركزي وقف خلاص طباعة الربع جنية الورق لكن النص جنية والجنية لسه عادي مكملين

والغريب انه بيسحب ال 50 جنية من السوق؛ داهية ليعيد احياء مشروع العملة البلاستيك تاني وينزل منها 50 جنية 😂😂

يقعدوا يقرفونا بـ "ممنوع تزود فلوس عالعميل عشان عاوز يدفع فيزا"، ونلتزم إحنا بالقانون.

*️⃣ تيجي بقى على جهات الدولة، فأي مكان تروحه تلاقي "رسوم فيزا"! لا، ورسوم جاحدة 😂 يعني المتعارف عليه إن رسوم الفيزا بتكون في رينج 2%، لكن تبص تلاقي هيئة السكة الحديد حاطة 8% رسوم فيزا! تروح تطلع الرخصة الدولية يقولك: 800 كاش و825 فيزا، يعني 3% رسوم... ومش فاكر شركة الكهرباء كام بقالي سنين مروحتش.

*️⃣ طيب يا جدعان، ليه بتطلبوا من الشركات حاجة أنتم نفسكم مش بتنفذوها؟ ما خلاص، كلنا نحط رسوم فيزا عالعملاء، ومتبقاش مخالفة للقانون. ده حتى الشركات بتحط 2%، مش 3 و5 و8% 😂😂

*️⃣ لا، والجمدان بيكون لما الموظف الحكومي يقولك: "متنفعش البطاقة دي عشان دي كريديت كارد، عاوزين كارت حساب" 😂 يعني الماكينة هترفض؟ لا طبعًا مش هترفض، بس بيكون في فارق عمولة حسب اتفاقهم مع البنك...

*️⃣ آه، سوري، ولازم كارت حساب ويكون مصري، مش كارت دولي، وباسمك! يعني لو عايش بره ونزلت تعمل معاملة، ولسبب ما معندكش حساب في مصر، أو حتى نسيت تحط الكارت المصري في محفظتك… خلاص، "فوت علينا بكره يا سيد" 🤷‍♂️

*️⃣ التحويل الرقمي المصري 💪💪💪؛ بص إحنا معندناش تحول رقمي، بس إيه رأيك في المانشتات الصحفية والبروباجندا؟ 😁

لما من اسبوع قولت اننا عندنا تراكم في السفن بتاعة الغاز لعدم الحاجة واننا اتفاجئنا ان الحرارة بتقل شهر 9 و 10 عن 7 و 8 فالاستهلاك هيقل للكهرباء 😂 طلع لي كام فلوطة قل... يقولي لا دا تأخير لأسباب لوجيستية مقلية مشوية كندوز ضاني؛ إحنا مخططين صح...

اه طيب ايه يا فلوطة؛ عرفت ان انتا اللي طلعت مخطط

بالمناسبة هحرق للبترول المفاجأة وهقولهم ان نوفمبر ديسمبر سقعة 😁

عرفتوا ليه كنت بقولكم من يومين نهاية لما يتم ان شاء الله

المرة دي الموضوع كبير قوي واضح وربنا يستر

لكن اقتصاديا دا ممتاز لينا ك مصر

هنوديك فين يا أخضر بعد كده 😂 (واكيد دي هزار عشان المستجدين اللي لسه ميعرفونيش)

طيب ما إحنا في مصر عندنا شبيه صلاح وشبيه السادات وشبيه كل حاجة في الكوكب

*️⃣ طيب ما نعمل جايزة شبيه نوبل ونديها لترامب ونقوله دي جايزة نوبل الفرعونية وعملنا تصويت شعبي وشارك فيه 110 مليون مواطن كلهم شاركوا وقالوا نعم ترامب السلام

*️⃣ ويبقي أخد حاجة مننا قبل ما يمشي وهيدي ألو للصندوق فيقول إن اسكتوا مش مصر خلصت المراجعة ال 5 و 6 وكله فله والتخارج تم وسعر الصرف مرن والست كريستالينا رئيسة الصندوق تعمل زي حسن مصطفي في مرجان احمد مرجان وتخرج تقول مصر دي عندها أحسن اقتصاد في الدنيا.

*️⃣ طيب هنديله قلادة النيل ووشاح تحتمس وحته أثرية كده نقوله دي جدك باعتهالك.

*️⃣ فاحنا ننبسط وهو ينبسط؛ مش كده ولا اييييه 🤔

واضح إنكم إمبارح كنتم فاكرين إني بتريق وبتقول ترامب يدي الصندوق ألو يقولهم مصر مرضي عنها دلوقتي ساعدوها.

⬅️⬅️ أدي أول مكالمة 😁

*️⃣ للي مش فاهم؛ تصنيف ائتماني أفضل = سهولة اقتراض أكثر + فوايد أقل

*️⃣ راجع الجزء الثالث من سلسلة اقتصادك في جيبك الخاصة بالاقتراض من الخارج

https://youtu.be/fHPclSfE6rM

⬅️⬅️ طبعاً مؤسسات التصنيف الائتماني هي جهات مستقلة لا تخضع للسياسة الأمريكية ومفيش خالص الكلام دا وأمريكا ممكن تبقي غضبانه من دولة وهما يقولوا الدولة دي كويسة والعكس تبقي راضية علي دولة وهما يقللوا تصنيفها؛ المؤسسات دي مستقلة 😁😁

صباح لذيذ

ايييه دنيا

فاضل حته الاثار كده عشان يبقي زي البوست قبل الماضي

البنك المركزي كشف عن (هويتي) ودي هتبقي الهوية الرقمية المصرية

الخبر دا حزين إني ببعته كده

حزين ليه؟ عشان أنا من أسبوعين صورت فيديو بشرح فيه الهوية الرقمية المصرية دي وازاي ممكن تغير كل شيء مستقبلاً؛ لكن حصل شوية مشاغل مفضتش أقعد اظبط الفيديو وانشره

فالنتيجة اهو ببعت الخبر زيي زي كل الناس 😢😢

الله المستعان 😓😓😓

خلاص الفيديو ظبطته

هتلاقبني بحكي القصة كلها بتاعة البنك الرقمي والهوية الرقمية

وامتي هنشوفها وايه استخدامها المستقبلي واهميتها

https://youtu.be/2PjM-GmnSpU?si=lXbFSrQiqTjCW0Ex

لقد استيقظ الشخص اللي زادت بند البنزين لبيته 500 جنية 😭😭😭

اتمني يكون حالة النشوة ب القادة العالميين (مش وقف الحرب عشان الناس خلطتهم) واليونسكو التصنيف الائتماني وو قادرة تمون لك العربية 😂

توضيح: اللي اقصده انك مواطن فافرح وازعل علي اللي يهمك ك مواطن

⬅️⬅️⬅️ مفرووض بيقولوا البنزين كده تم تحريره؛ بس لو زاد سعر البرميل بالجنية كده هنزود (يعني زاد سعر البرميل $ أو زاد سعر الدولار قصاد الجنية فكده يبقي هنزود السعر)... كمان زمان قالوا هنعمل دعم بيني يعني السولار مفروض ليه مدعوم؛ فشوية وهيقولك نزود سعر البنزين عشان نكسب منه وندعم السولار.

⬅️ لولا الازمة الاقتصادية العالمية اللي خلت البترول مشي من مستواه التقليدي 75-80 وكمان فيضان الهوت ماني اللي نزل سعر الدولار ل 47.5 كان لسه في 2/3 جنية كمان 😢

خبر كويس: الحكومة قررت تثبيت سعر البنزين لمدة سنة يا جدعان

عقود إعادة الإعمار اللي هتيجي + الهوت ماني + تحسن التصنيف الائتماني خلانا متوقعين تدفق فلوس كثير فمش محتاجين خلاص 😁

زي النهاردة تقريبا بس سنة 1956 اجتمع في باريس قادة اسرائيلين وانجليز وفرنسيين واتفقوا مع بعض على خطة كالتالي:

1️⃣ يوم 29 أكتوبر هيهجم الإسرائيليين على مصر والطريق فاضي ومفيش حد ويجروا في سيناء ناحية القناة.

2️⃣ يوم 30 أكتوبر هيكونوا وصلوا للقناة فيطلع فرنسا وانجلترا انذار للدولتين؛ ابعدوا عن القناة عشان الملاحة العالمية.

3️⃣ انتي يا اسرائيل هتقولي عنيا بس مصر توافق؛ ومصر طبعاً هترفض؛ نروح إحنا كفرنسا وانجلترا مضطرين بقي نخش نحتل قناة السويس عشان نحمي الملاحة العالمية.

*️⃣ وبالفعل الثلاثي عملوا الخطة بس الإسرائيلين اتعطلوا وموصلوش للقناة ثاني يوم؛ لكن يبدو إن انجلترا وفرنسا كانوا مجدولين الرسالة 😂 فطلعوا الإنذار واصلا محدش بيحارب حول القناة؛ فكده اتفضحوا ان دي خطة.

*️⃣ وبالفعل حصلت وبدأوا العدوان الثلاثي وامريكا أدانت العدوان على مصر (أيوا أمريكا وقفت في صف مصر بل ونزلت مساعدات وادوية لمصر).

*️⃣ وخلصت الحرب بالقصة المشهورة وهي إن امريكا قررت تحكم إن انجلترا وفرنسا يخرجوا بس مصر هتدفع لهم فلوس قناة السويس اللي أممناها؛ ومصر اخدت قروض من السوفيت بنينا بيها السد العالي عشان ايراد القناة راح لسداد سعرها... وبالنسبة لإسرائيل مصر أعلنت فك الحصار البحري الجنوبي وفتح مضيق تيران أمام الملاحة العسكرية الإسرائيلية اللي كان مستمرة بقرار ملكي من فاروق من سنة 1949 ومصر كانت بتفتش أي سفينة داخلة لإسرائيل حتي لو امريكية أو بريطانية ولو شايلة أي حاجة غير الاكل والشرب تتمنع تدخل خليج العقبة.

*️⃣ ومصر وافقت علي الدفع لانجلترا وفرنسا مقابل انسحابهم وكذلك فتح الملاحة لإسرائيل مقابل انسحابها وخلصت الحرب وتعتبر الحرب دي انتصار مصري لان الهدف الاطاحة ب عبد الناصر ومحصلش دا وظهرت مصر إنها اللي الكوكب بيحاربها.

*️⃣ وأخيراً تظل القصة دي دليل على إن مش شرط عشان شايف دولتين بيشتموا بعض علني إن دا الحقيقة؛ ساعات الدول بتتفق مع بعض ويقولوا بص هطلع اشتمك ب كذا وانتا هترد عليا تقول كذا عشان نمثل قصاد الشعوب.

⬅️⬅️ معلش بقالي اسبوع مختفي بسبب دور برد عنيف + السفر خارج مصر... بدأت افوق وهكتب عن الذهب حاضر بس مش هكتب اي نصايح لكن مجرد دردشة.

أنا منبهر الصراحة إن الناس كلها بقت عارفة خطط الدول؛ يقولك أمريكا بترفع الذهب عشان عاوزة تعمل مش عارف ايه في الدول الثانية؛ لالا دي الصين والدول المعارضة لأمريكا هما اللي بيرفعوا الذهب عشان بيعملوا نظام مالي جديد. خطة أمريكا عارفها حمادة فيسبوك والصين معرفتهاش وهتلبسها؛ أو العكس.

*️⃣ حتى إقليمياً يقولك اسرائيل بتعمل كذا عشان عاوزانا نعمل كذا فترد ب كذا وتحرجنا قصاد العالم؛ ما شاء الله خطة الموساد والشين بيت عارفينها احنا عالفيسبوك بس العالم مش عارفها ولا صناع القرار

*️⃣ فالواحد كده يقعد يفكر إن المخابرات بتاعة الدول بتقعد تخطط وتفكر وترسم ومؤامرات ولقاءات سرية واتفاقيات وتربيط مصالح؛ وييجي أي حد عادي كده عرف الخطة بلا مجهود؛ ايه الحلاوة دي.

*️⃣ فين أيام الزمن الجميل لما الدول كانت بتعمل خطط كبيرة وتعمل شوشرة وتمويه بل وساعات تعمل حروب كاملة مجرد لغوشة غالخطة الأصلية... دلوقتي خلاص كله عارف خطط كل الدول... اه سوري كل المواطنين؛ لكن المسئولين ميعرفوش فإحنا ك مواطنين بنشرح لهم خدوا بالكم عاوزين يضحكوا عليكم 😂.

*️⃣ أنا فكرت أعمل فيديوهات عن المواضيع دي؛ بتعمل ترافيك واهي تعيد القناة للحياة تاني بعد غيابي 3 أسابيع نزلت فيديو يتيم فيهم؛ البوستات بتاعة المؤامرات الكونية بتجيب تفاعلات عسل.

*️⃣ الإنسان بطبيعته حابب يعيش في مفهوم السلطة العليا؛ من قديم الأزل بالفطرة فكر إن أكيد في إلهه؛ أكيد في كيان يفوقنا قوه هو اللي بيرسم حياتنا؛ البعض اهتدى لله والبعض الآخر للاصنام والشركيات؛ وحتي أفلان زي ماتركس قالت ميكونش في مخلوقات تانية عاملانا مزرعة... في الحياة العادية هيقولك مؤامرات عالدولة؛ دي خطة من مجلس إدارة العالم؛ الخ الخ... البورصة تقع يقولك حيتان السوق وقعوها.

*️⃣ وجود حاجة خارقة قادرة علي تحريك والتحكم في حياة البشر دي فكرة مريحة للإنسان؛ أنا اللي بيحصلي دا عشان الكيان الخارق دا متحكم فيا؛ مش أنا اللي فاشل دا أنا كويس بس الظروف. حتى لو الموضوع دا هو الحسد؛ أنا كويس بس محسود؛ وفي الشغل مؤامرة من كيانات كبيرة؛ وفي السياسة ظروف عالمية؛ المهم في مبرر مريح يتقبله الإنسان لإن كلنا مقتنعين بوجود كيانات كبرى مسيطرة.

*️⃣ وطبعاً مش معني كده إن مفيش كيانات كبري؛ لكن تضخيم قوتها؛ البرتوكولات الكبرى؛ مفيش حاجة بتحصل عادي صدفة؛ أي شيء دي خطة؛ الأرض مش كروية دي مسطحة؛ دي خطة كونية عشان منعرفش ايه وراء جدار الجليد ويفضل اللي عارفين بس؛ فيروس كورونا؛ الحمى الاسبانية؛ الكوليرا؛ أكيد دي خطط من كيانات كبرى بتعملها لأغراض ما ...

*️⃣ كثير بقابل البوستات دي؛ بعضها فعلاً مقنع؛ يعني تخيل حد كل يوم يعمل حادثة؛ لازم يخبط حاجة يحك العربية اي شيء؛ هيقولك اصل الناس بتحدف اصل انا بنزل وقت الذروة والناس بتجري؛ اه صح ممكن حادثة اثنين ثلاثة فعلا خارجة عن ارادته والظروف؛ بس كل دول مستحيل أكيد بسببك؛ بس الاريح هنقول القوى الخارجية والظروف.

*️⃣ البوست طول؛ هي نوعية البوستات دي بحبها رغم إن القارئ مبيبقاش عارف وماشي بنظام (أيوا عاوز تقول ايه) ؛ لا خالص مش عاوز أقول حاجة؛ دا مجرد رغي؛ دردشة أصحاب فضفضة؛ دا كنت فكرت أعملها فيديوهات اسمها فضفضة بن سامي؛ موضوع اقعد ارغي فيه فضفضة مهواش حاجة محددة وأرقام وإحصائيات؛ اعتبروها حكاوي بن سامي؛ زي حكاوي القهاوي كده.

يا تري ترامبو هيغير كلامه ويتخانق تاني إمتي؛ الخبر دا كويس ويهدي الدنيا في الكوكب

بس اشك ان ترامب يقدر يستحمل أسبوع بدون خناقة جديدة؛ مش هييجي له نوم بالليل

نفسي ييجي اليوم اللي لما حد يطلع يلقح علينا بكلام منردش عليه بطريقة احنا كنا احنا زمااان كان وزماااان عملنا.

نبقي احنا حاجة بجد وواقعنا يرد؛ نتعلم بالمقولة الشهيرة (ليس الفتى من يقول كان أبى ولكن الفتى من قال ها أنا ذا) أو زي الحكمة الشعبية (القرعة تتباهى بشعر بنت أختها)... اللي عمل زماااان وسوى زماااان وبني زماااان دا شخص مات زمان؛ انتا ايه علاقتك بيه؟ هو عشان انتا على نفس الأرض وممكن تبقي حفيده.

إن شاء الله ييجي اليوم اللي لو حد لقح علينا نقدر نرد عليه بواقعنا؛ دا لو اليوم دا جه ولسه فينا صحة وقادرين نتكلم يعني والأعمار بيد الله ويدينا ويديكم طولة العمر عشان نشوف اليوم دا.

في الستينات مصر كان عندها فكرة يلا نصنع كل حاجة، والموضوع كان شغال حلو، والناس كانت بتستني الإنتاج بالشهور وكانت المصانع بتخلص كله.

*️⃣ المشكلة حصلت مع الانفتاح الاقتصادي أواخر السبعينات؛ بدأت المنتجات الحديثة تدخل؛ هنا حصلت صدمة للمصريين؛ إيه الحاجات دي؟ هو مش كلنا مفروض نلبس نفس البيجامة في البيت؟ إيه العربيات دي؟ إيه الأجهزة المنزلية دي؟ فكانت صدمة، لكن من عيوبها إن الصناعة المحلية انهارت وقتها.

*️⃣ انهارت ليه؟ عشان ببساطة كده كانت صناعات بدائية؛ لكن البلد مقفولة فإنت متعرفش إيه بيحصل بره في الكوكب؛ فحاجة شبه اللي ماما هتطبخه هناكله؛ منعرفش أكل تاني؛ ومنعرفش أصلًا دا حلو ولا وحش... ودي أكبر خدعة ذهنية مش بناخد بالنا منها.

*️⃣ تفتكر لو قلت لك هو المواطن في كوريا الشمالية إيه شعوره وهو محروم من الفاست فود والإنترنت والذكاء الصناعي والسوشيال ميديا والعربيات الكهربائية ووو.. إيه شعوره؟ لو قلت أكيد متضايق فإنت كده اتخدعت... هو ميعرفش أصلًا بوجود الحاجة دي؛ عشان تتحرم من الحاجة لازم تبقى عارف إنها موجودة... فالكوري الشمالي ميعرفش شيء عن الكوكب وبناءً عليه هو مش مفتقد كثير من الأمور اللي إنت مفتقدها.

*️⃣ من عيوب السوشيال ميديا إنها زودت الحرمان؛ الأثرياء دايمًا عايشين في رفاهية رهيبة وبياكلوا واجيو وفواجرا ولحم غزال وحبار هوكايدو والكمأ والترافل مشروم والاستاكوزا والكافيار وغيرهم من الأكلات الغالية جدًا؛ بيركبوا عربيات بعشرات آلاف ومئات آلاف الدولارات؛ الشخص العادي ميعرفش؛ هو عارف إنهم عايشين في رفاهية لكن ميعرفش شكلها؛ فإحساسه الوحيد هو: يا رب أبقى غني وأدلّع نفسي؛ لو سألته إزاي هيقولك أكل أحسن أو لحمة كل يوم... السوشيال ميديا ضربت دا.

*️⃣ دلوقتي بقت الفيديوهات تشرح لك حياتهم وتوريك صورها والتفاصيل؛ فهنا يزيد حالة الحرمان؛ هنا إنت بقيت لأول مرة شايف إنت مش قادر تحصل على إيه؛ فهنا افتقدت دا... فالمواطن الكوري الشمالي ميعرفش الرفاهيات دي فمش مفتقدها.

*️⃣ فمن هنا الشعب في الستينات كان بيشتري السلع المصرية بحب؛ هو ميعرفش جودة تانية؛ المستورد نادر قوي وحصري جدًا؛ لكن مع الانفتاح الاقتصادي فجأة اتصدموا؛ دا بنفس السعر نقدر ناخد جودة مختلفة... الصناعة المحلية اتصدمت؛ ما هو لما يكون إنتاجك مضمون البيع مش هتفكر في التطوير؛ فبقت السلع بدائية؛ الشركات بتكسب والمدير قصاد اللي فوقه شاطر في حين هو باع عشان مفيش بديل؛ بيرقراطية بقي وفساد وترهل فمجرد شاف البديل اتصدم والصناعة انهارت.

*️⃣ مع ضحالة التعليم وكراهية غالبية الشعب للقراءة والثقافة والاعتماد عالفيديوهات البراقة فمعلوماتنا عن العالم الخارجي ضعيفة بالرغم من الانفتاح العالمي؛ فبقينا أي حاجة تيجي من بره تبهرنا؛ يا راجل دا عروض الـDrone والهولوجرام الناس عمالة تكتب بانبهار؛ دا نابع إننا مش مواكبين الكوكب.

*️⃣ صراحة يوم بعد يوم بننبهر بعلم إدارة الحشود؛ السنين الأخيرة بقى الاقتصاد السلوكي وعلم إدارة الحشود أكتر حاجة بتلفت نظري؛ انبهار بالقدرة على تحريك الملايين بريموت كنترول؛ أيا كان الشعب دا في عالم أول ولا عالم نامي؛ كله تقدر تحركه؛ آه النامي أسهل بكتير جدًا بس في النهاية كله بيتجاب.

خدوا الخبر دا قبل النوم

*️⃣ وزير الطاقة الإسرائيلي جمد الاتفاقية الجديدة بتاعة تصدير الغاز لمصر؛ للي ميعرفش فالاتفاقية مفروض تتوقع قبل نهاية الشهر الجاري اللي هو بكره ولو متمش فمن حق مصر او اسرائيل الغاءها بدون أي عقوبات... الاتفاقية يعني اتمضت علي مستوي الشركات وفاضل الحكومات.

*️⃣ وزير الطاقة الإسرائيلي وهو من كبار المتطرفين هناك شايف مصر لا يعتمد عليها؛ وإنها مش حليف كامل فبيقول هنصرف ونوسع الخطوط وبعدين؟ افرض حصل خلاف مع مصر؟ لازم ضمانات وكمان شروط اضافية تحقق لهم اطمئنان.

*️⃣ أمريكا واقفة في صف مصر وبتضغط على اسرائيل وخاصة ان الشركة المنفذة للتوسعة شركة أمريكية فمن مصلحة أمريكا الصفقة تتم وبالمناسبة مصر كانت أكبر مستورد للغاز المسال الأمريكي في الصيف؛ فعلاقة مصر مع أمريكا في الطاقة سمن علي عسل.

*️⃣ وزير الطاقة الامريكي كان مفروض هيروح اسرائيل في زيارة 6 أيام لكن لما وزير الطاقة الإسرائيلي بلغه انه مش هيمضي الصفقة فقرر الوزير الأمريكي الغاء زيارته لإسرائيل.

*️⃣ مصر من طرفنا معلقناش خالص؛ سياستنا هي عاوزين تجيبوا الغاز شكراً وفرتم لنا دولار؛ مش عاوزين خلاص هنجيب مسال بضعف السعر آه؛ فالخناقة بقت أمريكية اسرائيلية 😂 واحنا جايبين فشار وبنتفرج.

*️⃣ النتن من يومين كان في المحكمة وهناك سألوه عالاتفاقية فقال دي اتفاقية استراتيجية مهمة المستقبل اسرائيل؛ اللي هو متفهمش يعني طالما مهمة ليكم ما تمضوا ولا هو شغل.... ومرقعة؛ ولو مش عاوزينها الغوها خالص وطز فيكم.

دلوقتي فاضل 7 أيام لو الحكومات لم توقع عالاتفاقية فبحلول الجمعة القادمة تعتبر الاتفاقية لاغية 😍😍😍 ويبقوا يشربوا الغاز