بالرغم من إني لما حد كان بيسألني ايه توقعاتك لاجتماع المركزي النهاردة للفايدة كنت بقول متوقع 1% (ومتوقع 2% اجمالي لنهاية السنة يعني في 1% كمان).

بس فعلياً مش حاسس إن في لازمة ينزل المرة دي الفايدة :

1️⃣ يستني يشوف قرار الطاقة هيأثر إزاي في السوق والتضخم؛ النهاردة بالليل يمكن البنزين ياخد 2-3 جنية وإن كنت بقول ليلة الأربعاء القادم... فعامة يستني ويشوف؛ لكن لكن هو عنده براح كبير بين التضخم والفايدة فمهما البنزين أثر مش هيكون تأثير كبير.

2️⃣ التخفيضات السابقة بلح مأثرتش علي سعر اقتراض الحكومة؛ كفاية تعرفوا إن معظم اقتراض الدولة نهاية سبتمبر (اذون وسندات) يساوي أو يزيد عن بداية سبتمبر؛ ودا عشان في معدلات اقتراض خزعبلية شغالة؛ يعني الربع الماضي (يوليو-سبتمبر) اقترضنا 3.2 ترليون جنية يعني متوسط 35 مليار جنية يومي ودا ضعف معدل الاقتراض المعتاد؛ فالطلب العالي للاقتراض أجبر المركزي ياخد فايدة عالية؛ فإنتا عالورق بس نزلت الفايدة لكن الحكومة زودت الاقتراض فالمقرضين قالك نعلي الفايدة مننزلش وقد كان.

*️⃣ فنظرياً وحسابات تضخم وكده ينزل النهاردة عااادي جداً بس لسه مش حاسس إنه هيعملها؛ ولو عملها هيكون عشان يقلل تكلفة الأموال عالبنوك (الفلوس اللي بيدفعها البنك لأصحاب المال) فالبنوك تبدأ توافق انها تسلفه بفايدة أقل طالما التكلفة قلت عليكم. يمكن

الحاقا بالبوست السابق

خفض 1%

يبدو إن خلاص المرة دي الحرب هتخلص أخيراً؛ نهاية الحرب دي في 2 قاعدين بيناموا بالليل يحلموا بيها:

1️⃣ ترامب، منتظر يوم الجمعة يعلنوا جايزة نوبل للسلام بصفته اللي خلّص حرب مبتخلصش؛ تقريباً ترامب كل يومين يجيب سيرتها؛ هو أوباما أحسن مني ولا أحسن مني عشان ياخد نوبل للباذنجان اللي بياخدها كل مجرمي الحرب عبر التاريخ، وحتى أبو شنب النازي كان مرشح للجايزة في 1939؛ آه بجد، وبغض النظر عن الموضوع، كان هزار وقلب جد منهم واترشح فعلاً، بس الحرب العالمية قامت 😂بالمناسبة موسوليني اترشح للجايزة سنة 1935، وستالين سنة 45 و49 فعادي 😁 غالباً السويد حدفت نوبل للسلام على النرويج عشان تبعدها عن نوبل العلمية. دا أونغ سان سو تشي معاها نوبل للسلام وعملت مذابح لمسلمي الروهينجا؛ كسنجر معاه نوبل للسلام 😁؛ مناحم بيجن وشيمون بيريز وإسحاق رابين معاهم... فكل دول ياخدو والرجل البرتقالي مياخدهاش ليييييه لييييييه 🤔🤔🤔

2️⃣ محافظ بنك مركزي لدولة ما مش هنقول اسمها، قاعد سهران يحلم بعشرات مليارات الدولارات هتيجي له السنين الجاية من عقود إعادة إعمار وسلع تتباع وقناة عطلانة هتشتغل وسياحة هتزيد ووو... ده هيقدر يخلي سعر الدولار أي رقم يحلم بيه، ومش مهم الهوت ماني يكسب فوايد 20% ومعاهم 10% كمان انخفاض في سعر الدولار... والفلوس دي تخلي تصنيف ائتماني يتحسن وتأمين ديون CDS يقل؛ ده زمانه بيقول: "أوديكي فين يا دولارات؟ أنزلك في كيس الكاراتيه زي الربع جنيه زمان" 😂 بس جنبه شخص شيك أرستقراطي ماسك البترول بيقول له: "متخافش، هخلصك من كل الفلوس اللي تفضل من فوايد الهوت ماني" 😁


⬅️⬅️⬅️ تحديث : إيه كمية الناس اللي فاكرة إني بقول السلام الشامل المستمر وخلاص مش هيضربوا تاني خالص وحمامة السلام هترفرف في المنطقة ووو... الحرب هتخلص بس السلام مش هيحصل؛ اسرائيل خسرت كثير اقتصادي وسياسي وحتي عسكري محتاجة تلقط نفسها تظبط وضعها في كل مناحي الدولة وبعدين ترجع تاني تحارب؛ تقولك بص في فرد بص لي بصة مش كويسة أنا هدخل تاني أضرب؛ لازم اعادة ترتيب أوراق؛ هتحصل دلوقتي؛ هتحصل بعد شهور؛ هتحصل يعني هتحصل؛ كمان هما عندهم أمل ان المرة دي هيتكون قوة دولية عربية هي اللي هتبقي عالأرض؛ يعني حد ميوت غيرنا؛ مجرد فكرة تانية للقضاء؛ لو فشلت نرجع عادي؛ مهياش اتفاقية كامب ديفيد لانهم مش هيلاقوا السادات في غزة.

إثبت إن سامي يبقي أبوك 😁

*️⃣ بوست لصديق لي إمبارح اشتكي من ثلاجة beko عنده باظت فكلم الشركة فقالت له قولنا السريال اللي الثلاجة فقالهم فقالوا له تمام الضمان شغال؛ فين الفاتورة؛ فقالهم مش لاقيها فقالوا له دور عليها وروح للتاجر واحنا هنبعت لك الفني يصلح؛ جه الفني وصلحها وقاله مطلوب كذا؛ ليه يا جدعان؛ أصل الثلاجة بره الضمان؛ يكلمهم؛ هي الثلاجة اللي بالسريال كذا ايه وضعها؛ اه دي ضمان؛ طيب ليه عاوزين مني فلوس ؟ عشان انتا بره الضمان لان مفيش فاتورة؛ طيب سريال الثلاجة؟ لا الثلاجة في الضمان لكن انتا بره الضمان 😂... طيب المعتاد الضمان بيكون مدة X من تاريخ الشراء في الفاتورة؛ مفيش فاتورة يبقي من تاريخ التصنيع المسجل؛ دلوقتي مفيش فاتورة وتاريخ التصنيع بيقول اني ضمان صح؛ اه بس انتا بره الضمان لكن الثلاجة لي الضمان 😂.

*️⃣ القصة دي فكرتني بمأساة عشتها بتاعة عنواني في البطاقة؛ تعالوا أحكي لكم الحدودته؛ سنة 2006 نقلنا من المطرية للرحاب وروحت اغير البطاقة وجبت ايصال مرافق؛ مكانتش وقتها الرحاب مشهورة فالموظف بالعباسية قالي هي دي تبع ايه؛ قولت له القاهرة الجديدة التجمع الأول؛ فهنا قرر يكتب عنواني مجموعة x مرحلة 4 التجمع الأول وشال خالص كلمة الرحاب.

*️⃣ ولسنين بعاني؛ عنواني مش موجود بالوجود؛ التجمع شغال مجاورات أو أحياء بينما مجموعات دي بالرحاب؛ فكل جهة بتعامل معاها لازم أقولهم ضيفوا الرحاب عشان يوصلي الجواب بتاع البنك ولا الكارت ولا أي ورق.

*️⃣ سنين حاولت اعدلها فشلت؛ طيب بطاقتي ضاعت يلا بطاقة جديدة وايصال الكهرباء أهو؛ لا برضك تطلع نفس البطاقة؛ لغاية سنة 2022 ودي المحاولة الأكبر.

*️⃣ طلعت علي سيتي ستارز قولت دي خدمة لسه جديدة وبفلوس ففي ناس هتفهم؛ لو سمحت عنواني ناقصة كلمة الرحاب؛ سيب مجموعة كذا وعمارة كذا والمرحلة 4 زي ما هما وضيف بس الرحاب... أسف يا فندم كده تغيير عنوان؛ طيب موافق غير العنوان.

*️⃣ اتفضل ايصال مرافق أهو المالك سامي عبد المنعم؛ ايوا ايه علاقتك ب سامي عبد المنعم؛ أبويا يا فندم انا محمد سامي؛ لاااا انتا تجيب لنا سامي عبد المنعم يقول دا 😂؛ طيب هو مات من 16 سنة (وقتها) أعمل ايه؛ طيب والدتك بطاقتها في العنوان بتاع الرحاب ومكتوب فيها ارملة سامي عبد المنعم؟ ايوا؛ هاتها؛ ماتت يا فندم من 3 شهور..

*️⃣ حضرتك أنا يتيم ابويا مات وأمي ماتت 😓 وأنا ورثت الشقة أنا واخواتي تحب أجيبلك اعلام وراثة 😂؛ لا بس بتقول اخوك؛ طيب اخوك بطاقته فيها كلمة الرحاب دي؛ اه فيها؛ طيب هات اخوك يشهد ويمضي اقرار انك معاه في الشقة؛ طيب هو أنا واخويا زي بعض وارثين نفس النسبة من نفس الشخص يفرق أخويا عني في ايه؟ ما ايصال المرافق معاك.

*️⃣ لا يا فندم مينفعش اخوك لازم يشهد انك اخوه وان الشقة دي بتاعتكم؛ قولت له بسيطة؛ ألووو أحمد البس عشان عاوزك في سيتي ستارز؛ جبت أخويا للموظف شاف بطاقته وصورها ومضاه اقرار وقالي تعالي بعد يومين استلم بطاقتك الجديدة.

*️⃣ بعد يومين روحت استلم البطاقة؛ لقيتها نفس العنوان بدون أي تعديل؛ قعدت اضحك اضحك ومشيت وخلاص قررت محاولش تاني.

*️⃣ وحتى الآن ماشي معايا بطاقة فيها عنوان مش موجود بالوجود 😂😂 وييجي الناس تنتقد نجيب ساويرس عشان بيقولهم في دبي عندكم سيستم وكل حاجة بتم بسهولة وسرعة وسلاسة...

بس يا سيدي ودي قصة بطاقتي الكوميدية؛ اه صحيح وبطاقة مراتي برضك مهي لما اتجوزتني غيرت بطاقتها علي نفس عنوان الزوج 😁😁.

يوم 7 سبتمبر عملت فيديو عن توقع الاقتصاد الشهور القادمة وقولت الذهب دلوقتي 5500 اتوقع انه يكسر ال 6000 اخر السنة

ما شاء الله عملها في اليوم ال 30 😂 قالي قبل ما اكسر الشهر هكون عملتها

دا بالرغم من اننا عمالين نخنق الدولار وننزله كل يوم باعتبار ما سيكون وان جايلنا دولار كثير قريب وكده وسياسة اصرف ما في الجيب بقي

شكلنا محتاجين أبديت للفيديو اللي عمره شهر 😂😂

الفلوس المصدرة في مصر بالمليون جنية

المركزي وقف خلاص طباعة الربع جنية الورق لكن النص جنية والجنية لسه عادي مكملين

والغريب انه بيسحب ال 50 جنية من السوق؛ داهية ليعيد احياء مشروع العملة البلاستيك تاني وينزل منها 50 جنية 😂😂

يقعدوا يقرفونا بـ "ممنوع تزود فلوس عالعميل عشان عاوز يدفع فيزا"، ونلتزم إحنا بالقانون.

*️⃣ تيجي بقى على جهات الدولة، فأي مكان تروحه تلاقي "رسوم فيزا"! لا، ورسوم جاحدة 😂 يعني المتعارف عليه إن رسوم الفيزا بتكون في رينج 2%، لكن تبص تلاقي هيئة السكة الحديد حاطة 8% رسوم فيزا! تروح تطلع الرخصة الدولية يقولك: 800 كاش و825 فيزا، يعني 3% رسوم... ومش فاكر شركة الكهرباء كام بقالي سنين مروحتش.

*️⃣ طيب يا جدعان، ليه بتطلبوا من الشركات حاجة أنتم نفسكم مش بتنفذوها؟ ما خلاص، كلنا نحط رسوم فيزا عالعملاء، ومتبقاش مخالفة للقانون. ده حتى الشركات بتحط 2%، مش 3 و5 و8% 😂😂

*️⃣ لا، والجمدان بيكون لما الموظف الحكومي يقولك: "متنفعش البطاقة دي عشان دي كريديت كارد، عاوزين كارت حساب" 😂 يعني الماكينة هترفض؟ لا طبعًا مش هترفض، بس بيكون في فارق عمولة حسب اتفاقهم مع البنك...

*️⃣ آه، سوري، ولازم كارت حساب ويكون مصري، مش كارت دولي، وباسمك! يعني لو عايش بره ونزلت تعمل معاملة، ولسبب ما معندكش حساب في مصر، أو حتى نسيت تحط الكارت المصري في محفظتك… خلاص، "فوت علينا بكره يا سيد" 🤷‍♂️

*️⃣ التحويل الرقمي المصري 💪💪💪؛ بص إحنا معندناش تحول رقمي، بس إيه رأيك في المانشتات الصحفية والبروباجندا؟ 😁

لما من اسبوع قولت اننا عندنا تراكم في السفن بتاعة الغاز لعدم الحاجة واننا اتفاجئنا ان الحرارة بتقل شهر 9 و 10 عن 7 و 8 فالاستهلاك هيقل للكهرباء 😂 طلع لي كام فلوطة قل... يقولي لا دا تأخير لأسباب لوجيستية مقلية مشوية كندوز ضاني؛ إحنا مخططين صح...

اه طيب ايه يا فلوطة؛ عرفت ان انتا اللي طلعت مخطط

بالمناسبة هحرق للبترول المفاجأة وهقولهم ان نوفمبر ديسمبر سقعة 😁

عرفتوا ليه كنت بقولكم من يومين نهاية لما يتم ان شاء الله

المرة دي الموضوع كبير قوي واضح وربنا يستر

لكن اقتصاديا دا ممتاز لينا ك مصر

هنوديك فين يا أخضر بعد كده 😂 (واكيد دي هزار عشان المستجدين اللي لسه ميعرفونيش)

طيب ما إحنا في مصر عندنا شبيه صلاح وشبيه السادات وشبيه كل حاجة في الكوكب

*️⃣ طيب ما نعمل جايزة شبيه نوبل ونديها لترامب ونقوله دي جايزة نوبل الفرعونية وعملنا تصويت شعبي وشارك فيه 110 مليون مواطن كلهم شاركوا وقالوا نعم ترامب السلام

*️⃣ ويبقي أخد حاجة مننا قبل ما يمشي وهيدي ألو للصندوق فيقول إن اسكتوا مش مصر خلصت المراجعة ال 5 و 6 وكله فله والتخارج تم وسعر الصرف مرن والست كريستالينا رئيسة الصندوق تعمل زي حسن مصطفي في مرجان احمد مرجان وتخرج تقول مصر دي عندها أحسن اقتصاد في الدنيا.

*️⃣ طيب هنديله قلادة النيل ووشاح تحتمس وحته أثرية كده نقوله دي جدك باعتهالك.

*️⃣ فاحنا ننبسط وهو ينبسط؛ مش كده ولا اييييه 🤔

واضح إنكم إمبارح كنتم فاكرين إني بتريق وبتقول ترامب يدي الصندوق ألو يقولهم مصر مرضي عنها دلوقتي ساعدوها.

⬅️⬅️ أدي أول مكالمة 😁

*️⃣ للي مش فاهم؛ تصنيف ائتماني أفضل = سهولة اقتراض أكثر + فوايد أقل

*️⃣ راجع الجزء الثالث من سلسلة اقتصادك في جيبك الخاصة بالاقتراض من الخارج

https://youtu.be/fHPclSfE6rM

⬅️⬅️ طبعاً مؤسسات التصنيف الائتماني هي جهات مستقلة لا تخضع للسياسة الأمريكية ومفيش خالص الكلام دا وأمريكا ممكن تبقي غضبانه من دولة وهما يقولوا الدولة دي كويسة والعكس تبقي راضية علي دولة وهما يقللوا تصنيفها؛ المؤسسات دي مستقلة 😁😁

صباح لذيذ

ايييه دنيا

فاضل حته الاثار كده عشان يبقي زي البوست قبل الماضي

البنك المركزي كشف عن (هويتي) ودي هتبقي الهوية الرقمية المصرية

الخبر دا حزين إني ببعته كده

حزين ليه؟ عشان أنا من أسبوعين صورت فيديو بشرح فيه الهوية الرقمية المصرية دي وازاي ممكن تغير كل شيء مستقبلاً؛ لكن حصل شوية مشاغل مفضتش أقعد اظبط الفيديو وانشره

فالنتيجة اهو ببعت الخبر زيي زي كل الناس 😢😢

الله المستعان 😓😓😓

خلاص الفيديو ظبطته

هتلاقبني بحكي القصة كلها بتاعة البنك الرقمي والهوية الرقمية

وامتي هنشوفها وايه استخدامها المستقبلي واهميتها

https://youtu.be/2PjM-GmnSpU?si=lXbFSrQiqTjCW0Ex

لقد استيقظ الشخص اللي زادت بند البنزين لبيته 500 جنية 😭😭😭

اتمني يكون حالة النشوة ب القادة العالميين (مش وقف الحرب عشان الناس خلطتهم) واليونسكو التصنيف الائتماني وو قادرة تمون لك العربية 😂

توضيح: اللي اقصده انك مواطن فافرح وازعل علي اللي يهمك ك مواطن

⬅️⬅️⬅️ مفرووض بيقولوا البنزين كده تم تحريره؛ بس لو زاد سعر البرميل بالجنية كده هنزود (يعني زاد سعر البرميل $ أو زاد سعر الدولار قصاد الجنية فكده يبقي هنزود السعر)... كمان زمان قالوا هنعمل دعم بيني يعني السولار مفروض ليه مدعوم؛ فشوية وهيقولك نزود سعر البنزين عشان نكسب منه وندعم السولار.

⬅️ لولا الازمة الاقتصادية العالمية اللي خلت البترول مشي من مستواه التقليدي 75-80 وكمان فيضان الهوت ماني اللي نزل سعر الدولار ل 47.5 كان لسه في 2/3 جنية كمان 😢

خبر كويس: الحكومة قررت تثبيت سعر البنزين لمدة سنة يا جدعان

عقود إعادة الإعمار اللي هتيجي + الهوت ماني + تحسن التصنيف الائتماني خلانا متوقعين تدفق فلوس كثير فمش محتاجين خلاص 😁

زي النهاردة تقريبا بس سنة 1956 اجتمع في باريس قادة اسرائيلين وانجليز وفرنسيين واتفقوا مع بعض على خطة كالتالي:

1️⃣ يوم 29 أكتوبر هيهجم الإسرائيليين على مصر والطريق فاضي ومفيش حد ويجروا في سيناء ناحية القناة.

2️⃣ يوم 30 أكتوبر هيكونوا وصلوا للقناة فيطلع فرنسا وانجلترا انذار للدولتين؛ ابعدوا عن القناة عشان الملاحة العالمية.

3️⃣ انتي يا اسرائيل هتقولي عنيا بس مصر توافق؛ ومصر طبعاً هترفض؛ نروح إحنا كفرنسا وانجلترا مضطرين بقي نخش نحتل قناة السويس عشان نحمي الملاحة العالمية.

*️⃣ وبالفعل الثلاثي عملوا الخطة بس الإسرائيلين اتعطلوا وموصلوش للقناة ثاني يوم؛ لكن يبدو إن انجلترا وفرنسا كانوا مجدولين الرسالة 😂 فطلعوا الإنذار واصلا محدش بيحارب حول القناة؛ فكده اتفضحوا ان دي خطة.

*️⃣ وبالفعل حصلت وبدأوا العدوان الثلاثي وامريكا أدانت العدوان على مصر (أيوا أمريكا وقفت في صف مصر بل ونزلت مساعدات وادوية لمصر).

*️⃣ وخلصت الحرب بالقصة المشهورة وهي إن امريكا قررت تحكم إن انجلترا وفرنسا يخرجوا بس مصر هتدفع لهم فلوس قناة السويس اللي أممناها؛ ومصر اخدت قروض من السوفيت بنينا بيها السد العالي عشان ايراد القناة راح لسداد سعرها... وبالنسبة لإسرائيل مصر أعلنت فك الحصار البحري الجنوبي وفتح مضيق تيران أمام الملاحة العسكرية الإسرائيلية اللي كان مستمرة بقرار ملكي من فاروق من سنة 1949 ومصر كانت بتفتش أي سفينة داخلة لإسرائيل حتي لو امريكية أو بريطانية ولو شايلة أي حاجة غير الاكل والشرب تتمنع تدخل خليج العقبة.

*️⃣ ومصر وافقت علي الدفع لانجلترا وفرنسا مقابل انسحابهم وكذلك فتح الملاحة لإسرائيل مقابل انسحابها وخلصت الحرب وتعتبر الحرب دي انتصار مصري لان الهدف الاطاحة ب عبد الناصر ومحصلش دا وظهرت مصر إنها اللي الكوكب بيحاربها.

*️⃣ وأخيراً تظل القصة دي دليل على إن مش شرط عشان شايف دولتين بيشتموا بعض علني إن دا الحقيقة؛ ساعات الدول بتتفق مع بعض ويقولوا بص هطلع اشتمك ب كذا وانتا هترد عليا تقول كذا عشان نمثل قصاد الشعوب.

⬅️⬅️ معلش بقالي اسبوع مختفي بسبب دور برد عنيف + السفر خارج مصر... بدأت افوق وهكتب عن الذهب حاضر بس مش هكتب اي نصايح لكن مجرد دردشة.

أنا منبهر الصراحة إن الناس كلها بقت عارفة خطط الدول؛ يقولك أمريكا بترفع الذهب عشان عاوزة تعمل مش عارف ايه في الدول الثانية؛ لالا دي الصين والدول المعارضة لأمريكا هما اللي بيرفعوا الذهب عشان بيعملوا نظام مالي جديد. خطة أمريكا عارفها حمادة فيسبوك والصين معرفتهاش وهتلبسها؛ أو العكس.

*️⃣ حتى إقليمياً يقولك اسرائيل بتعمل كذا عشان عاوزانا نعمل كذا فترد ب كذا وتحرجنا قصاد العالم؛ ما شاء الله خطة الموساد والشين بيت عارفينها احنا عالفيسبوك بس العالم مش عارفها ولا صناع القرار

*️⃣ فالواحد كده يقعد يفكر إن المخابرات بتاعة الدول بتقعد تخطط وتفكر وترسم ومؤامرات ولقاءات سرية واتفاقيات وتربيط مصالح؛ وييجي أي حد عادي كده عرف الخطة بلا مجهود؛ ايه الحلاوة دي.

*️⃣ فين أيام الزمن الجميل لما الدول كانت بتعمل خطط كبيرة وتعمل شوشرة وتمويه بل وساعات تعمل حروب كاملة مجرد لغوشة غالخطة الأصلية... دلوقتي خلاص كله عارف خطط كل الدول... اه سوري كل المواطنين؛ لكن المسئولين ميعرفوش فإحنا ك مواطنين بنشرح لهم خدوا بالكم عاوزين يضحكوا عليكم 😂.

*️⃣ أنا فكرت أعمل فيديوهات عن المواضيع دي؛ بتعمل ترافيك واهي تعيد القناة للحياة تاني بعد غيابي 3 أسابيع نزلت فيديو يتيم فيهم؛ البوستات بتاعة المؤامرات الكونية بتجيب تفاعلات عسل.

*️⃣ الإنسان بطبيعته حابب يعيش في مفهوم السلطة العليا؛ من قديم الأزل بالفطرة فكر إن أكيد في إلهه؛ أكيد في كيان يفوقنا قوه هو اللي بيرسم حياتنا؛ البعض اهتدى لله والبعض الآخر للاصنام والشركيات؛ وحتي أفلان زي ماتركس قالت ميكونش في مخلوقات تانية عاملانا مزرعة... في الحياة العادية هيقولك مؤامرات عالدولة؛ دي خطة من مجلس إدارة العالم؛ الخ الخ... البورصة تقع يقولك حيتان السوق وقعوها.

*️⃣ وجود حاجة خارقة قادرة علي تحريك والتحكم في حياة البشر دي فكرة مريحة للإنسان؛ أنا اللي بيحصلي دا عشان الكيان الخارق دا متحكم فيا؛ مش أنا اللي فاشل دا أنا كويس بس الظروف. حتى لو الموضوع دا هو الحسد؛ أنا كويس بس محسود؛ وفي الشغل مؤامرة من كيانات كبيرة؛ وفي السياسة ظروف عالمية؛ المهم في مبرر مريح يتقبله الإنسان لإن كلنا مقتنعين بوجود كيانات كبرى مسيطرة.

*️⃣ وطبعاً مش معني كده إن مفيش كيانات كبري؛ لكن تضخيم قوتها؛ البرتوكولات الكبرى؛ مفيش حاجة بتحصل عادي صدفة؛ أي شيء دي خطة؛ الأرض مش كروية دي مسطحة؛ دي خطة كونية عشان منعرفش ايه وراء جدار الجليد ويفضل اللي عارفين بس؛ فيروس كورونا؛ الحمى الاسبانية؛ الكوليرا؛ أكيد دي خطط من كيانات كبرى بتعملها لأغراض ما ...

*️⃣ كثير بقابل البوستات دي؛ بعضها فعلاً مقنع؛ يعني تخيل حد كل يوم يعمل حادثة؛ لازم يخبط حاجة يحك العربية اي شيء؛ هيقولك اصل الناس بتحدف اصل انا بنزل وقت الذروة والناس بتجري؛ اه صح ممكن حادثة اثنين ثلاثة فعلا خارجة عن ارادته والظروف؛ بس كل دول مستحيل أكيد بسببك؛ بس الاريح هنقول القوى الخارجية والظروف.

*️⃣ البوست طول؛ هي نوعية البوستات دي بحبها رغم إن القارئ مبيبقاش عارف وماشي بنظام (أيوا عاوز تقول ايه) ؛ لا خالص مش عاوز أقول حاجة؛ دا مجرد رغي؛ دردشة أصحاب فضفضة؛ دا كنت فكرت أعملها فيديوهات اسمها فضفضة بن سامي؛ موضوع اقعد ارغي فيه فضفضة مهواش حاجة محددة وأرقام وإحصائيات؛ اعتبروها حكاوي بن سامي؛ زي حكاوي القهاوي كده.