الفيسبوك بيفكرني ببوست كنت نزلته من 6 سنين وجبت سيرة الصندوق السيادي النرويجي، وكان وقتها فيه 9 تريليون كرونة. المهم ببص دلوقتي لقيت الصندوق فيه كااام؟ كسر الـ 20 تريليون كرونة، اللي هما قرابة 100 تريليون مصري (يعني 100 ألف مليار أو 100 مليون مليون جنيه؛ رقم 1 قصاده 14 صفر).

*️⃣ المهم، فضولي أخدني أبص على التفاصيل، وهنا لقيت شيء رفعت القبعة للنراوجة عليه 3 – 4 – 5 مرات:

1️⃣ قايلين لك تفاصيل عن شكل تقسيمة القيمة. يعني مقالوش لك قيمة الصندوق 20 تريليون وخلاص؛ لا، تفاصيل الـ 20 تريليون دي إيه.

2️⃣ لقيتهم قايلين أصل الفلوس كام والأرباح كام. فلقيتهم في أحدث تفاصيل (30 يونيو 2025) بيقولوا: أصل الفلوس اللي دخلت الصندوق 5.25 تريليون، والأرباح 11.8 تريليون. أنتم متخيلين الجمدان؟ الأرباح بتاعة الفلوس بقت أكثر من ضعف الأصل اللي دخل الصندوق.

3️⃣ بعد غزو روسيا لأوكرانيا، أوروبا قاطعت روسيا تدريجي. فهنا يجيبوا غاز من ميين؟ النرويج. فحصلهم تدفقات مهولة. في 2021 الصندوق فيه أصول عبر تاريخه كله 2.9 تريليون، في 2024 بقوا 5.1 تريليون. الناس مقالوش "رزق وجالنا" وخلاص، والصندوق فيه كثير.

4️⃣ ودي بقى الكبيرة: ضمن قيمة الصندوق موضحين إن في جزء اسمه Krona Rate ودي تساوي 2.5 تريليون كرونة. دي ليه؟ عشان أصول الصندوق منتشرة حول العالم، وعملة الكرونة النرويجي نزلت قصاد العملات التانية. وبناءً عليه، لما تحسب بالكرونة فالرقم يكبر. لكن دا نمو خادع، سببه فروقات العملة مش ربح حقيقي. فقالك: نقول للناس فروقات العملة دي تسببت في نمو كام في الصندوق. أنا أعرف دول بتحسب فروقات العملة إنها إنجاز. يكونوا مثلًا بيسددوا 2000 مليار وسعر الدولار 30، وبعدين يسددوا 3000 مليار وسعر العملة 50، فيقولوا: "انخفاض قيمة اللي بنسدده من 66 مليار دولار إلى 60 مليار دولار"، والناس تقولك إنجازات. إيه ملناش دعوة يا موهيي... عاش النراوجة الصراحة. وأدعوهم لزيارة مصر والاستفادة من تجارب صندوقنا السيادي.

*️⃣ عامة، سيبك منهم. الكهرباء غالية عندهم، والمواطن النرويجي بيعيط من سعر الكهرباء والبنزين. وبيقولوا لهم: "مش أحسن ما تبقوا زي ألمانيا والدنمارك وهولندا؟" بس عشان إنت حبيبنا، الحكومة النرويجية قررت تعملك دعم كهرباء جديد غير النظام القديم، والكيلو هيبقى بسعر 40 أوره (0.4 كرونة) وهو ما يعادل 2 جنيه مصري، وذلك اعتبارًا من 1 أكتوبر 2025. الحكومة قررت تفك الكيس وتستغل إن كل مواطن محطوط له في الصندوق 3.65 مليون كرونة. فيلا بقى ندعم شوية، هنسيب كل الفلوس دي لمين؟ (2 تريليون دولار لشعب 5.6 مليون نسمة).

بيقولك بصوا رئيس هيئة الدواء الأمريكي أصله مصري؛ فالمصريين لما ياخدوا فرصة بيعملوا ايه... أيوا مش فاهم هو المصريين يعني عرق متخلف مثلاً فإنتا بتحاول تثبت خلاف ذلك... واحد مولود في إنجلترا وواخد دكتوراه من هارفارد فاتعلم صح... يكون بقى أصول مصرية أصول ضفدعة؛ هتزرع صح هتحصد صح...

وإلا بقى نقول بالطريقة دي

*️⃣ عارف بوريس جنسون شبيه ترامب الإنجليزي اللي مسك شوية رئيس وزراء وكان عنصري ضد المهاجرين؛ أهو دا جده تركي وكان وزير في الدولة العثمانية. شوفت بقى الأتراك لما بياخدوا فرصة.

*️⃣ طيب أخر 50 سنة أطول رئيس حكم الأرجنتين يبقى كارلوس منعم... السوريين يا أخي لما بياخدوا فرصة بيبقوا رؤساء دول.

*️⃣ رئيس السلفادور الحالي نجيب بوكيلة من أصول فلسطينية... الفلسطنيين يا أخي لما بياخدوا فرصة.

*️⃣ وأوعا تكون فاكر إن نجيب لوحده فهتقولي استثناء؛ لا دا نجيب الرئيس ال 43 أما رقم 40 فكان أنطونيو سقا برضك فلسطيني.

*️⃣ امشي يا سلفادور نطلع على جارتك الإكوادور... مين دا عبد الله بوكرم الرئيس من أصول لبنانية؛ وييجي بعده جميل معوض برضك اللبناني.

*️⃣ كفاية سياسة بس في 11 رئيس في أمريكا الجنوبية من أصول عربية (لبنانينن وفلسطنيين وسوريين)

*️⃣ يا جدعان دا ترامب نفسه؛ جده ألماني؛ الألمان دول لما يتاح لهم فرصة يبقوا رؤساء أمريكا

*️⃣ التخلف والتطور مش مرتبط بعرق أو جنس؛ كل البشر زي بعض؛ هتزرع صح هتحصد صح؛ هتزرع علم هتحصد علماء؛ هتزرع دين هتحصد التزام؛ هتزرع بوستات ريتش هتحصد متابعين برأس شطافة.

كنت ناوي أقولكم يلا النهاردة لايف بس We قاطعة عني الإنترنت بالبيت من إمبارح وشغال Hotspot للبيت 😓 فنخليها بكره الساعة 9 م؛ وهجرب إن شاء الله إن البث يكون ببرنامج فهعمله بث فيسبوك يوتيوب مع بعض. والموضوع هيكون برضك السردية للي مشافش الفيديو أو حابب يسأل عنها.

*️⃣ أما تعليقي عالسردية فبحضر له فيديو تفصيلي بس الكلام المكتوب جميل قوي بس تطبيقه في 5 سنين خيال علمي؛ المكتوب دا عاوز حكومة بتجري وتقطع نفسنا وراها؛ إحنا في مصر شغالين بال Super Slow Motion؛ عارفين من 5 سنين يعني سبتمبر 2020 كانت الحكومة بتتكلم عن إنها هتطبق الرقم القومي العقاري 😂 اه والله من سبتمبر 2020 ل سبتمبر 2025 مظهرش؛ فإحنا عايشين بالتصوير البطيء وبالتالي مستحيل نحقق المكتوب... نعرف التفاصيل بكره في الايف.

*️⃣ طيي النهاردة أسيبكم؟ لا ميحصلش؛ نزلت الفيديو الثالث من اقتصادك في جيبك وشرحت الاقتراض من الخارج والفارق بين الاستلاف من أسواق المال العالمية وبين صندوق النقد وبين الدول العربية والتأمين عالديون وشوية تفاصيل كده؛ إنجوي

https://youtu.be/fHPclSfE6rM

عملت لكم فيديو عالسخان كده بدون منتجه لموضوع الموبايلات دا

انجوي

وبكره نعمل الايف ان شاء الله؛ يمكن النت اللي رجع يكون أحسن 😓

https://youtu.be/euNITCIciH8

دخول مفاجئ في بث عاليوتيوب

بس بنظبط الصوت مفيش شيء فاتكم

https://www.youtube.com/live/we5-biFB3ag?si=rYIDaBc4wNqwgTO0

السفينة الخامسة لفك الاسالة في الطريق ل من تركيا خلاص أهي داخلة علي دمياط؛ وبكده يبقي عندها 3 سفن في العين السخنة و 1 في العقبة بالأردن و 1 في دمياط.

*️⃣ الظريف إن بلومبيرج من يومين قالت إن سفن الغاز متكدسة في العين السخنة؛ فبسبب تحسن درجة الحرارة فتراجع استهلاك الكهرباء ليصبح 3.1 مليار قدم حالياً مقابل 3.7 مليار الشهر الماضي. ومعاه 2.6-2.7 باقي استهلاك مصر فكده نزل استهلاكنا اليومي ليصبح حوالي 5.8 مليار قدم.

*️⃣ لما نحسب الانتاج المحلي 4 مليار والغاز من ولاد ال... حوالي 1 مليار حالياً يبقي كده عندنا غاز جاهز 5 مليار قدم يبقي محتاجين نقول 2 سفينة بس يشتغلوا حد أقصى بل وممكن في ايام يبقوا 1 سفينة بس من ال 4 اللي عندنا (هيبقوا 5 أهو).

*️⃣ بلومبيرج كانت مستغربة بس إن وزارة البترول مكانتش عارفه إن شهر 9 الحرارة اقل من شهر 7 و 8 فاشترت غاز لكل السفن؛ فالنتيجة السفن بقت تقف بالسخنة منتظرة؛ لإنه مش هينفع نشغل السفن كلها هنودي الغاز فين بالشبكة.

*️⃣ دلوقتي السفينة التركية هتنضم للسفن اللي قاعدة بدون شغل... في انتظار الصيف القادم بقى لما الحرارة ترتفع يبقى وقتها نشغلهم (فعلياً هنقعد نخليهم يتسلوا كل مرة واحدة تشتغل عشان ميزهقوش)... والحكومة برضك وقعت اتفاقية لإنشاء محطة برية لفك الإسالة مفروض خلال سنتين تخلص وبعدها مع الغاز بتاع الشرق اللي بدأوا خلاص ووقعوا عقد توسعة الخط للضخ إلى مصر؛ فبعد سنتين نبدأ نتخلص من السفن لإنها بلا عمل دي لما عقودها تخلص (بعض السفن عقودها ل 2035 والعقود دي لا تفسخ يعني هتفضل تدفع 150-200 ألف دولار الإيجار اليومي للسفينة لغاية عقدها ما يخلص بعدها تمشيها أو تمشيها وتدفع برضك الإيجار أو تشوف للسفينة عقد بديل).

*️⃣ فكده نقدر نقول لا تقلقوا مش هيحصل تاني في مصر تخفيف أحمال غير لما فلوسنا تخلص منقدرش نشتري... عندنا كم سفن فك إسالة يكفي العجز بتاع مصر ويشيل دولة تانية معاها.

صباح الفل

بما إن الناس هتكون بتستعد تتابع ماتش الأهلي والزمالك اللي لسه عارف انه النهاردة فاسمحوا لي ببوست شخصي وهو بخصوص الفيديو بتاع أحمد أبو زيد الدعائي لبرنامج محمد بن راشد لإعداد القادة.

*️⃣ طبعاً للي ميعرفش فأحمد أبو زيد صديقي وأنا صورت معاه مرتين بالمناسبة؛ وكل اللي هقوله هنا أنا قولته أصلاً في تعليقات ورسايل بين أصدقاء آخرين وهو رأيي ومأخدتش رأي أحمد فيه.

*️⃣ أولاً لازم نفهم إن السياسة الخارجية للإمارات دي حصرياً لأبو ظبي؛ أما داخلياً فكل إمارة حرة؛ عاوز تبقي متحرر خالص ومنفتح بزيادة جداً ومظهرك غربي زي دبي اتفضل؛ عاوز تبقي ملتزم بشكل واضح والمظهر الإسلامي والعربي باين حتى في تصميمات مباني الدولة زي الشارقة برضك اتفضل.

*️⃣ خلاف الناس مع الإمارات مش عشان الانفتاح الاخلاقي بتاع دبي؛ لا حضرتك دا عشان الخلاف السياسي مع أبو ظبي؛ قبل التحفظ السياسي محدش كانت بيفكر في دبي غير إنها فل شمعة منورة إلا قلة قوي قادرين يشوفوا أد ايه الحياة المادية الفجة بتنتزع روح الإنسان... لكن الغالبية مكانش زعلان من دبي في حاجة... ففعلياً دبي دلوقتي مش بتعمل حاجة جديدة مكانتش بتعملها من 5 و 10 سنين.

*️⃣ أنا لما شوفت كلمة رعاه الله دي عادي محستش في حاجة غلط؛ ملفتتش نظري أصلاً غير لما قريت التعليقات والناس بتقول ايه دا بيدعي له؛ رجعت اشوف تاني؛ فين الدعاء؛ ياااا راجل... طيب اسأل أي حد في الخليج كده هيقولك؛ كلمة حفظه الله رعاه الله أدام الله عمره وبقاءه ووو دي تحسها عندهم متلازمة كده مش ممكن يتقال اسم الشيخ أو الأمير بالخليج بدونها؛ دي بقيت تحسها جزء من اسمهم كده.... عارفين في مصر لما بنقول ان شاء الله؛ احنا مش بنقدم المشيئة فعلياً؛ لا خالص دي بقت متلازمة بنقولها لا إرادياً.

*️⃣ أنا لما شوفت الفيديو زعلت؛ ومزعلتش عشان بخلط بين دبي وأبو ظبي؛ ولا عشان قولت بيدعي للي نشر الحريات الأخلاقية في دبي والكلام دا؛ لكن زعلت عشان أحمد ذكي ومفروض عارف إن الناس مش هتعرف تفرق؛ وعارف إن الناس بتتعامل أبيض وأسود؛ وإن طالما فلان أبيض يبقي كل حاجة بيعملها حلوه؛ ولو بقى أسود يبقي كل حاجة عنه وحشة وكل برامجه فاشلة ومشاريعه لازم تشتمها...

*️⃣ إحنا فاهمين أكلاشيه إن الحياة مش أبيض واسود؛ بس عارفين دي بس لكن فعلياً كلنا بنفكر فيها إنها أبيض وأسود؛ ومفروض أحمد يكون فاهم دا وفاهم الناس بتفكر إزاي وإن في حساسية ضد هناك... زي مثلاً تروح تقابل رئيس حاخامات طائفة يهودية؛ الطائفة دي ضد الصهيونية لكن خلاص دلوقتي مفيش حد هيفكر؛ لو شافك جنب حاخام يبقي إنتا صهيوني؛ نفس الفكرة الإمارات؛ يعني لو حتي مدح في الشيخ سلطان القاسمي حفظه الله (بكتبها عمد عشان هو محترم) حاكم الشارقة واللي هناك يقولوا لكم مجهودة إنه يحافظ عالشارقة بطابع إسلامي وسط توحش التغرب في باقي الدولة؛ برضك هيتشتم لإن اللي بره ميعرفش مين الشيخ سلطان.

*️⃣ فدي غلطة أحمد اللي شايفه عملها؛ وبعد ما أنشر البوست دا هبعتهوله؛ يعني هيشوف رأيي بابلك الأول 😁..

*️⃣ آخر شيء هقوله هو إن ساعات بتكون فاكر إن الإنسان عنده خيارات يروح المالديف وبورا بورا وسانت بارتيس؛ ولا تروح تنزل في ترعة الإسماعيلية؛ وتقول ايه دا فلان اختار ترعة الاسماعيلية والبلهارسيا... الخيارات مش بتكون كده بالحياة؛ ساعات بتكون تحب الخازوق ولا الهونجا بونجا؛ فلما تقول الخازوق يقولك شوفت بيحب يتخزوق... مش هوضح أكثر وغالبا هقفل التعليقات أو هصعب الرد عشان عارف إن الهجوم هيقلب عليا؛ ولا أقولكم هسيبها؛ عادي حرية؛ إنجوي خناقة يلا

⬅️⬅️ توضيح

متلازمة يعني بقت جزء من اسمه يعني لو متقالتش في الخطاب الرسمي العلني يبقي بتعيب فيه؛ كده وضحت

هحكي لكم حدودته

*️⃣ الخميس الماضي كنت في مشوار وبعدين جالي نداء الطبيعة؛ قوم روحت بنزينة شل أوت عندنا بالتجمع ودخلت ماستر لقيت الحمام بباسورد فروحت اشتري حاجة عشان اخد الباسورد؛ المهم اخدته بعدين لقيت الحمام مقفول تنظيف.

*️⃣ المهم يا جدعان مزنوق؛ فحد قالي جنبنا ماكدونالدز خش عندهم؛ بس أنا جوايا قولت طيب افرض دخلت ماك وحد يعرفني شافني؛ شكلي إيه دلوقتي مش مقاطع؛ أقوله والله كنت في الحمام 😂... فعااادي جداً يا جدعان دي مفيهاش مقاطعة؛ بس النقطة لو حد شافك مش هيفهمها كده.

*️⃣ عشان كده اللي كنت بقوله إمبارح في البوست؛ في حاجات مينفعش تعملها عشان بقت كده؛ مقتنع مش مقتنع مينفعش؛ مش هتقعد تشرح للناس انه والله رايح الحمام؛ والله المشروع دا كويس.

بس يا سيدي؛ ومن كل قلبي اتمني ظاهرة الحمامات اللي بباسورد دي تقل عشان كده كثير 😓😓

صباح الخير

*️⃣ مصر إمبارح عملت طرح سندات دولية بقيمة 700 مليون دولار لأجل 3 سنوات تستحق في 7 أبريل 2029 بعائد قدره 6.375%، وقيمة 800 مليون دولار لأجل 7 سنوات تستحق في 7 أكتوبر 2032 بعائد 7.95%. ودا يعتبر أقل فائدة مصر تقترض بيها دوليا منذ الكورونا؛ واللي ساعدنا على دا انخفاض الفايدة عالمياً + انخفاض ال CDS ولو مش فاهم حاجة يبقي مشوفتش الجزء الثالث من اقتصادك في جيبك اللي نزلته الخميس الماضي 😁... أيوا ما أنا وغد وقررت أعمل السلسلة دي عشان اللي يسألني على حاجة يعني إيه أقوله لو كنت مهتم كنت عرفت لوحدك 😊؛ اقصد لو كنت بتتفرج 😂.

*️⃣ بلومبيرج قالت إن خلاص الصفقة المنتظره بين مصر وقطر وفيها قطر هتتنازل عن 4 مليار دولار ودائع ليها في مصر مقابل هتاخد بيهم 5000 فدان في مرسى مطروح منطقة علم الروم (بالمناسبة هي رأس علم الروم بس الدارج يقال علم الروم بس؛ لكنها راس برضك 😂).

*️⃣ البنك المركزي المصري إمبارح أعلن ارتفاع الدين الخارجي في الفترة (أبريل-يونيو 2025) بقيمة 4.5 مليار دولار ووصل ل 161.2 مليار دولار ودي قيمة تفوق قيمة الدين الخارجي قبل توقيع رأس الحكمة وتحويل الإمارات 11 مليار دولار لجنية مصري؛ عامة الدين زاد 4.5 مليار وأدينا هنشيل 4 بتوع قطر عشان نرجعه تاني. وللتذكير أعلي قيمة للدين الخارجي كانت نهاية 2023 وتساوي 168 مليار دولار.

بس يا سيدي وصباح الفل

بالرغم من إني لما حد كان بيسألني ايه توقعاتك لاجتماع المركزي النهاردة للفايدة كنت بقول متوقع 1% (ومتوقع 2% اجمالي لنهاية السنة يعني في 1% كمان).

بس فعلياً مش حاسس إن في لازمة ينزل المرة دي الفايدة :

1️⃣ يستني يشوف قرار الطاقة هيأثر إزاي في السوق والتضخم؛ النهاردة بالليل يمكن البنزين ياخد 2-3 جنية وإن كنت بقول ليلة الأربعاء القادم... فعامة يستني ويشوف؛ لكن لكن هو عنده براح كبير بين التضخم والفايدة فمهما البنزين أثر مش هيكون تأثير كبير.

2️⃣ التخفيضات السابقة بلح مأثرتش علي سعر اقتراض الحكومة؛ كفاية تعرفوا إن معظم اقتراض الدولة نهاية سبتمبر (اذون وسندات) يساوي أو يزيد عن بداية سبتمبر؛ ودا عشان في معدلات اقتراض خزعبلية شغالة؛ يعني الربع الماضي (يوليو-سبتمبر) اقترضنا 3.2 ترليون جنية يعني متوسط 35 مليار جنية يومي ودا ضعف معدل الاقتراض المعتاد؛ فالطلب العالي للاقتراض أجبر المركزي ياخد فايدة عالية؛ فإنتا عالورق بس نزلت الفايدة لكن الحكومة زودت الاقتراض فالمقرضين قالك نعلي الفايدة مننزلش وقد كان.

*️⃣ فنظرياً وحسابات تضخم وكده ينزل النهاردة عااادي جداً بس لسه مش حاسس إنه هيعملها؛ ولو عملها هيكون عشان يقلل تكلفة الأموال عالبنوك (الفلوس اللي بيدفعها البنك لأصحاب المال) فالبنوك تبدأ توافق انها تسلفه بفايدة أقل طالما التكلفة قلت عليكم. يمكن

الحاقا بالبوست السابق

خفض 1%

يبدو إن خلاص المرة دي الحرب هتخلص أخيراً؛ نهاية الحرب دي في 2 قاعدين بيناموا بالليل يحلموا بيها:

1️⃣ ترامب، منتظر يوم الجمعة يعلنوا جايزة نوبل للسلام بصفته اللي خلّص حرب مبتخلصش؛ تقريباً ترامب كل يومين يجيب سيرتها؛ هو أوباما أحسن مني ولا أحسن مني عشان ياخد نوبل للباذنجان اللي بياخدها كل مجرمي الحرب عبر التاريخ، وحتى أبو شنب النازي كان مرشح للجايزة في 1939؛ آه بجد، وبغض النظر عن الموضوع، كان هزار وقلب جد منهم واترشح فعلاً، بس الحرب العالمية قامت 😂بالمناسبة موسوليني اترشح للجايزة سنة 1935، وستالين سنة 45 و49 فعادي 😁 غالباً السويد حدفت نوبل للسلام على النرويج عشان تبعدها عن نوبل العلمية. دا أونغ سان سو تشي معاها نوبل للسلام وعملت مذابح لمسلمي الروهينجا؛ كسنجر معاه نوبل للسلام 😁؛ مناحم بيجن وشيمون بيريز وإسحاق رابين معاهم... فكل دول ياخدو والرجل البرتقالي مياخدهاش ليييييه لييييييه 🤔🤔🤔

2️⃣ محافظ بنك مركزي لدولة ما مش هنقول اسمها، قاعد سهران يحلم بعشرات مليارات الدولارات هتيجي له السنين الجاية من عقود إعادة إعمار وسلع تتباع وقناة عطلانة هتشتغل وسياحة هتزيد ووو... ده هيقدر يخلي سعر الدولار أي رقم يحلم بيه، ومش مهم الهوت ماني يكسب فوايد 20% ومعاهم 10% كمان انخفاض في سعر الدولار... والفلوس دي تخلي تصنيف ائتماني يتحسن وتأمين ديون CDS يقل؛ ده زمانه بيقول: "أوديكي فين يا دولارات؟ أنزلك في كيس الكاراتيه زي الربع جنيه زمان" 😂 بس جنبه شخص شيك أرستقراطي ماسك البترول بيقول له: "متخافش، هخلصك من كل الفلوس اللي تفضل من فوايد الهوت ماني" 😁


⬅️⬅️⬅️ تحديث : إيه كمية الناس اللي فاكرة إني بقول السلام الشامل المستمر وخلاص مش هيضربوا تاني خالص وحمامة السلام هترفرف في المنطقة ووو... الحرب هتخلص بس السلام مش هيحصل؛ اسرائيل خسرت كثير اقتصادي وسياسي وحتي عسكري محتاجة تلقط نفسها تظبط وضعها في كل مناحي الدولة وبعدين ترجع تاني تحارب؛ تقولك بص في فرد بص لي بصة مش كويسة أنا هدخل تاني أضرب؛ لازم اعادة ترتيب أوراق؛ هتحصل دلوقتي؛ هتحصل بعد شهور؛ هتحصل يعني هتحصل؛ كمان هما عندهم أمل ان المرة دي هيتكون قوة دولية عربية هي اللي هتبقي عالأرض؛ يعني حد ميوت غيرنا؛ مجرد فكرة تانية للقضاء؛ لو فشلت نرجع عادي؛ مهياش اتفاقية كامب ديفيد لانهم مش هيلاقوا السادات في غزة.

إثبت إن سامي يبقي أبوك 😁

*️⃣ بوست لصديق لي إمبارح اشتكي من ثلاجة beko عنده باظت فكلم الشركة فقالت له قولنا السريال اللي الثلاجة فقالهم فقالوا له تمام الضمان شغال؛ فين الفاتورة؛ فقالهم مش لاقيها فقالوا له دور عليها وروح للتاجر واحنا هنبعت لك الفني يصلح؛ جه الفني وصلحها وقاله مطلوب كذا؛ ليه يا جدعان؛ أصل الثلاجة بره الضمان؛ يكلمهم؛ هي الثلاجة اللي بالسريال كذا ايه وضعها؛ اه دي ضمان؛ طيب ليه عاوزين مني فلوس ؟ عشان انتا بره الضمان لان مفيش فاتورة؛ طيب سريال الثلاجة؟ لا الثلاجة في الضمان لكن انتا بره الضمان 😂... طيب المعتاد الضمان بيكون مدة X من تاريخ الشراء في الفاتورة؛ مفيش فاتورة يبقي من تاريخ التصنيع المسجل؛ دلوقتي مفيش فاتورة وتاريخ التصنيع بيقول اني ضمان صح؛ اه بس انتا بره الضمان لكن الثلاجة لي الضمان 😂.

*️⃣ القصة دي فكرتني بمأساة عشتها بتاعة عنواني في البطاقة؛ تعالوا أحكي لكم الحدودته؛ سنة 2006 نقلنا من المطرية للرحاب وروحت اغير البطاقة وجبت ايصال مرافق؛ مكانتش وقتها الرحاب مشهورة فالموظف بالعباسية قالي هي دي تبع ايه؛ قولت له القاهرة الجديدة التجمع الأول؛ فهنا قرر يكتب عنواني مجموعة x مرحلة 4 التجمع الأول وشال خالص كلمة الرحاب.

*️⃣ ولسنين بعاني؛ عنواني مش موجود بالوجود؛ التجمع شغال مجاورات أو أحياء بينما مجموعات دي بالرحاب؛ فكل جهة بتعامل معاها لازم أقولهم ضيفوا الرحاب عشان يوصلي الجواب بتاع البنك ولا الكارت ولا أي ورق.

*️⃣ سنين حاولت اعدلها فشلت؛ طيب بطاقتي ضاعت يلا بطاقة جديدة وايصال الكهرباء أهو؛ لا برضك تطلع نفس البطاقة؛ لغاية سنة 2022 ودي المحاولة الأكبر.

*️⃣ طلعت علي سيتي ستارز قولت دي خدمة لسه جديدة وبفلوس ففي ناس هتفهم؛ لو سمحت عنواني ناقصة كلمة الرحاب؛ سيب مجموعة كذا وعمارة كذا والمرحلة 4 زي ما هما وضيف بس الرحاب... أسف يا فندم كده تغيير عنوان؛ طيب موافق غير العنوان.

*️⃣ اتفضل ايصال مرافق أهو المالك سامي عبد المنعم؛ ايوا ايه علاقتك ب سامي عبد المنعم؛ أبويا يا فندم انا محمد سامي؛ لاااا انتا تجيب لنا سامي عبد المنعم يقول دا 😂؛ طيب هو مات من 16 سنة (وقتها) أعمل ايه؛ طيب والدتك بطاقتها في العنوان بتاع الرحاب ومكتوب فيها ارملة سامي عبد المنعم؟ ايوا؛ هاتها؛ ماتت يا فندم من 3 شهور..

*️⃣ حضرتك أنا يتيم ابويا مات وأمي ماتت 😓 وأنا ورثت الشقة أنا واخواتي تحب أجيبلك اعلام وراثة 😂؛ لا بس بتقول اخوك؛ طيب اخوك بطاقته فيها كلمة الرحاب دي؛ اه فيها؛ طيب هات اخوك يشهد ويمضي اقرار انك معاه في الشقة؛ طيب هو أنا واخويا زي بعض وارثين نفس النسبة من نفس الشخص يفرق أخويا عني في ايه؟ ما ايصال المرافق معاك.

*️⃣ لا يا فندم مينفعش اخوك لازم يشهد انك اخوه وان الشقة دي بتاعتكم؛ قولت له بسيطة؛ ألووو أحمد البس عشان عاوزك في سيتي ستارز؛ جبت أخويا للموظف شاف بطاقته وصورها ومضاه اقرار وقالي تعالي بعد يومين استلم بطاقتك الجديدة.

*️⃣ بعد يومين روحت استلم البطاقة؛ لقيتها نفس العنوان بدون أي تعديل؛ قعدت اضحك اضحك ومشيت وخلاص قررت محاولش تاني.

*️⃣ وحتى الآن ماشي معايا بطاقة فيها عنوان مش موجود بالوجود 😂😂 وييجي الناس تنتقد نجيب ساويرس عشان بيقولهم في دبي عندكم سيستم وكل حاجة بتم بسهولة وسرعة وسلاسة...

بس يا سيدي ودي قصة بطاقتي الكوميدية؛ اه صحيح وبطاقة مراتي برضك مهي لما اتجوزتني غيرت بطاقتها علي نفس عنوان الزوج 😁😁.

يوم 7 سبتمبر عملت فيديو عن توقع الاقتصاد الشهور القادمة وقولت الذهب دلوقتي 5500 اتوقع انه يكسر ال 6000 اخر السنة

ما شاء الله عملها في اليوم ال 30 😂 قالي قبل ما اكسر الشهر هكون عملتها

دا بالرغم من اننا عمالين نخنق الدولار وننزله كل يوم باعتبار ما سيكون وان جايلنا دولار كثير قريب وكده وسياسة اصرف ما في الجيب بقي

شكلنا محتاجين أبديت للفيديو اللي عمره شهر 😂😂

الفلوس المصدرة في مصر بالمليون جنية

المركزي وقف خلاص طباعة الربع جنية الورق لكن النص جنية والجنية لسه عادي مكملين

والغريب انه بيسحب ال 50 جنية من السوق؛ داهية ليعيد احياء مشروع العملة البلاستيك تاني وينزل منها 50 جنية 😂😂

يقعدوا يقرفونا بـ "ممنوع تزود فلوس عالعميل عشان عاوز يدفع فيزا"، ونلتزم إحنا بالقانون.

*️⃣ تيجي بقى على جهات الدولة، فأي مكان تروحه تلاقي "رسوم فيزا"! لا، ورسوم جاحدة 😂 يعني المتعارف عليه إن رسوم الفيزا بتكون في رينج 2%، لكن تبص تلاقي هيئة السكة الحديد حاطة 8% رسوم فيزا! تروح تطلع الرخصة الدولية يقولك: 800 كاش و825 فيزا، يعني 3% رسوم... ومش فاكر شركة الكهرباء كام بقالي سنين مروحتش.

*️⃣ طيب يا جدعان، ليه بتطلبوا من الشركات حاجة أنتم نفسكم مش بتنفذوها؟ ما خلاص، كلنا نحط رسوم فيزا عالعملاء، ومتبقاش مخالفة للقانون. ده حتى الشركات بتحط 2%، مش 3 و5 و8% 😂😂

*️⃣ لا، والجمدان بيكون لما الموظف الحكومي يقولك: "متنفعش البطاقة دي عشان دي كريديت كارد، عاوزين كارت حساب" 😂 يعني الماكينة هترفض؟ لا طبعًا مش هترفض، بس بيكون في فارق عمولة حسب اتفاقهم مع البنك...

*️⃣ آه، سوري، ولازم كارت حساب ويكون مصري، مش كارت دولي، وباسمك! يعني لو عايش بره ونزلت تعمل معاملة، ولسبب ما معندكش حساب في مصر، أو حتى نسيت تحط الكارت المصري في محفظتك… خلاص، "فوت علينا بكره يا سيد" 🤷‍♂️

*️⃣ التحويل الرقمي المصري 💪💪💪؛ بص إحنا معندناش تحول رقمي، بس إيه رأيك في المانشتات الصحفية والبروباجندا؟ 😁

لما من اسبوع قولت اننا عندنا تراكم في السفن بتاعة الغاز لعدم الحاجة واننا اتفاجئنا ان الحرارة بتقل شهر 9 و 10 عن 7 و 8 فالاستهلاك هيقل للكهرباء 😂 طلع لي كام فلوطة قل... يقولي لا دا تأخير لأسباب لوجيستية مقلية مشوية كندوز ضاني؛ إحنا مخططين صح...

اه طيب ايه يا فلوطة؛ عرفت ان انتا اللي طلعت مخطط

بالمناسبة هحرق للبترول المفاجأة وهقولهم ان نوفمبر ديسمبر سقعة 😁

عرفتوا ليه كنت بقولكم من يومين نهاية لما يتم ان شاء الله

المرة دي الموضوع كبير قوي واضح وربنا يستر

لكن اقتصاديا دا ممتاز لينا ك مصر

هنوديك فين يا أخضر بعد كده 😂 (واكيد دي هزار عشان المستجدين اللي لسه ميعرفونيش)