يااااه لقد هرمنا؛ رسوم تدبير العملة Markup Fees هتبقي 3%... كده نتوقع كل البنوك هتقلدهم قريب

⬅️⬅️ يعني كده من بكره لما تدفع بالكريديت كارد البنك هيحاسبك الدولار ب 50 جنية بدل من 51 اللي كانت حاصله (بفرض سعر الدولار بالبنك 48.5)

*️⃣ ولسه مفيش جديد بخصوص كروت ال Debit كروت الحساب؛ ومفيش نية عند البنوك إنها تشتغلها دولي؛ قولت اسبق عشان هتسأل عليها 😂 البنوك مش هتشغلها واللي نفسه في معاملة اجنبية بكارت بنك مصري اما كريديت كارد او كارت من حسابك الدولاري؛ دي الخيارات في البنوك

احلي هدية عيد ميلاد دي ولا ايه

شخص من المتابعين الاعزاء لقاني بقول عاوز اعمل اشتراك في موقع الجهاز المركزي ودا بيتعمل اوفلاين؛ فراح عملي اشتراك وبعته لي 😍😍

ومش عاوز ياخد فلوسه كمان بيقولي دي هدية عيد ميلادي اللي كان الشهر الماضي

يا سلااااام 😍😍

في خبر بالنسبة لي خبر مهم قوي حصل إمبارح وهو موافقة البنك المركزي على إطلاق أول بنك رقمي كليا تحت اسم OneBank.

*️⃣ قوة الخبر مش في البنك الرقمي؛ دا خبر كويس؛ بنك رقمي كلياً يعني تفتح حساب في بنك ملوش مقر عالأرض؛ كل المعاملات 100% تتم إلكتروني؛ وهنا بقى النقطة المهمة اللي قولت إنها خبر مهم جداً.

*️⃣ هو ليه البنوك والمؤسسات في مصر بتحب تشوفك؛ يعني شرفنا وتعالى قدم عالطلب في الفرع واعمل كل حاجة في الفرع؟ عشان ببساطة احنا نعرف منين إن هو انتا فعلاً مش حد منتحل شخصيتك وهيعمل أونلاين الإجراءات دي؟

*️⃣ خارج مصر هتلاقي عندهم برنامج أو أكثر مسئولين عن تأكيد إنه إنتا زي UAE Pass في الإمارات و "أبشر" في السعودية و QDI في قطر؛ برامج انتا بتدخلها وتأكد بخطوات معينة إنك إنتا فعلاً فلان الفلاني وتأكد إنك عاوز تعمل المعاملة دي.

*️⃣ فمعنى إنك هتفتح بنك رقمي كلياً في مصر يعني كده إن مصر هتطلق تطبيق الهوية الرقمية المصرية (هوية Haweya) أخيراً بعد طول انتظار.

*️⃣ البرنامج دا مشروع مشترك بين البنك المركزي المصري ووزارة الاتصالات ووزارة الداخلية شغالين عليه من 2022 هدفه يعرف يعمل برنامج بيه تقدر تأكد إنه إنتا؛ لو بتركزوا في الاخبار هتلاقوا مثلا في 2023 أخبار زي (المركزى يعتزم إطلاق الهوية الرقمية فى 2024) ولما تدخل 2024 تلاقي في بدايتها اخبار زي (المركزي" المصري يدشن شركة "الهوية المالية الرقمية" في النصف الثاني) والنصف الثاني لما ييجي تلاقي أخبار زي (أبرزها E-KYC ؛المركزي يستعد الإطلاق مشروعات رقمية مبتكرة خلال 2025) ثم في 2025 أخبار (المركزي" المصري يطلق "الهوية المالية الرقمية" بالنصف الثاني) والخبر الاخير دا بلومبيرج مايو 2025.

*️⃣ فالموضوع قديم وشغالين عليه من زمن بس الموضوع في مصر معقد وخاصة ان في تحديات كثير وخاصة انك بتتعامل مع شعب نصه شايل ارقام موبايل مش باسمهم 😂. وبالمناسبة موضوع OneBank دا اللي اخد موافقة إمبارح دا مش جديد قوي😁 معلش أصلي بتابع الأخبار

*️⃣ القصة إنك في مصر بتاخد ترخيص وموافقة اولية وموافقة نهائية وعشروميت خطوة؛ في يوليو 2023 المركزي اعلن الموافقة علي فكرة البنوك الرقمية؛ في اغسطس بنك مصر قدم طلب وقيل Opay و فوري قدموا طلبات لانشاء بنوك رقمية؛ في مايو 2024 بنك مصر اخد موافق مبدأية عبر شركته (شركة مصر للابتكار الرقمي) لتأسيس بنك رقمي براس مال 3 مليار جنية؛ الشركة دي بقى امبارح اخدت موافقة نهائية وقالوا الاسم معقد ما انتم اول بنك رقمي فنخلي اسمنا OneBank 😁 بس كده ويبقي بنك مصر معانا في مصر ب 3 بنوك؛ بنك مصر؛ وبنك القاهرة؛ وبنك OneBank الرقمي. وبصراحة هو بنك متطور مش زي بنك العصور الوسطى والمعروف باسم البنك الأهلي.

*️⃣ المهم نرجع لمرجوعنا؛ الهوية الرقمية دي مفيدة إنها هتسهل علينا كل الخدمات؛ تبيع وتشتري شقة عربية أرض؛ كله أونلاين.. والحاجات الغريبة دي اللي بنشوفها في الخليج وأوروبا وعشرات الدول حول العالم.

*️⃣ يعني ويأكننا في المستقبل عندنا اللي هو الماضي في الدول التانية؛ هتخش على مصر الرقمية تلاقي عربيتك؛ تقول عاوز ابيع دي وأنا اخش عندي اشتري؛ البنوك كثير منها وفر التحويلات IPN اللحظية في برامجهم بليميت 2-5 مليون يومي؛ أحولك لحظي وتأكد من (هويتي) عندك وشكراً الملكية انتقلت واختفت العربية من مصر الرقمية عندك وظهرت عندي ومش محتاج فيلم هندي مصري عشان بيع عربية... ونفس الحكاية عاوز أعملك توكيل اخش اعمل وأكد بهويتي وخلاص مش محتاجين فرهدة كثيرة... مش عارف وقتها مركز الإصدارات المؤمنة الجديد اللي عملناه بمليار دولار واللي عشانه خلينا صلاحية شهادة الميلاد والوفاة والزواج 3 شهور عشان نشغله؛ دا هيبقى ايه وضعه في الإجراءات الرقمية دي.

*️⃣ المهم بقى يا سيدي الأخبار بتقول البنك هيشتغل في 2026 يبقي كده ايه؟ الهوية الرقمية هتشتغل قبله يبقي الخبر اللي جالي من كام شهر إن الهوية الرقمية المصرية هتشتغل الربع الاخير 25 أو الأول 26 حقيقي... يااااه لقد هرمنا وورمنا

أوروبا دي راحت نهبت دول العالم الثالث لقرون؛ عملوا تراكم الثروات بشكل رهيب صرفوه على تطور الدولة والبحث العلمي فبقوا متفوقين عن العالم فبكده ضمنوا ان العالم الثالث يفضل تابع لانه معندوش ثروة راكمها يصرفها عالبحث والتطوير.

*️⃣ بنهاية الحرب العالمية الثانية أجبرت أوروبا على التخلي عن المستعمرات؛ فقدت نهب كبير الثروات لكن فضل شركاتها لانها أكثر تطوراً تعرف تبيع برضك لإن المنافسة معدومة والحكام معظمهم دكتاتورييين وهما بيساعدوهم عالبقاء بحيث يضمنوا ان شعوب العالم الثالث تفضل متخلفة فنفضل نهيبة لشركاتهم.

*️⃣ لكن مع الوقت دخل منافس جديد؛ الأمريكي عاوز يخرج الأوروبي ويسرق هو مكانه؛ اجبره يطلع من المستعمرات وجاب هو حكام بدل الموالين للأوروبي وخلى الحاكم دا يشيل شعارات وطنية ويعيش في دور المعارض للمستعمرين القدامى بحيث تضمن أمريكا إن عيون الشعوب باصة عالمستعمر القديم ومش شايفاها ولا شايف الحاكم العميل وهو مع أمريكا لإن الكل مراقب علاقته مع المستعمر السابق بس.

*️⃣ أوروبا في خطر ووضعها وحش؛ كده هتضعف مع الوقت؛ فهنا تخدم أمريكا أوروبا بالصدفة؛ صراع السيطرة عالكوكب مع السوفيت؛ فهنا أوروبا تستفيد وتخلي أمريكا تعمل قواعد عسكرية في أراضيها وتنشر المظلة النووية الأمريكية؛ هنا هتقول طيب فين الاستفادة؟

*️⃣ ببساطة أوروبا مبقتش محتاجة جيش؛ خلاص نوفر فلوس الجيوش ونصرفها عالشعوب فكده نوفر رخاء للمواطن بتاعنا؛ ومن الناحية الثانية أمريكا هتصرف عن طيب خاطر فلوس المواطن الأمريكي عشان تحمي أوروبا. شكراً أمريكا وفرتي لنا فلوسنا.

*️⃣ مشكلة أوروبا دلوقتي إن ترامب قرر يغير دا وبقى يطالب أوروبا تحمي نفسها بنفسها؛ المشكلة إن أوروبا بقت بدائية لدرجة في دول عالم ثالث بتاخد معونات من أوروبا وجيوشها أكثر قوة من غالبية دول أوروبا... الموضوع مهزلة لدرجة إن الجيش الألماني شارك في استعراض عسكري تابع للناتو في النرويج في 2014 وهو حاطط عصاية مقشة عالعربية المدرعة بدل الرشاش؛ عارفين الرشاش المثبت عالعربيات العسكرية دا؛ مكانش عندهم منه فجابوا عصيان مقشة ودهنوها أسود ومحدش هياخد باله إن شاء الله 😁.

*️⃣ تقريباً القارة الأوروبية مفيهاش جيوش حقيقية غير إلاثنين القدامي فرنسا وإنجلترا؛ طيب يا طنط أمريكا نعمل ايه؛ الإجابة سهلة تشتروا مني سلاح؛ سلاح كثير؛ كثير جداً... اصرفوا اللي وفرتوه دا وقللوا برامج الدلع لشعوبكم وافرضوا ضرايب ولموا لي فلوس وإلا البعبع بوتين هييجي لكم بالليل يشوف مين مش غسل سنانه اقصد مش مسلح جيشة؛ طلعوا فلوسكم.

*️⃣ ألمانيا مثلا ميزانيتها العسكرية في 2021 قبل ما بوتين يغزو أوكرانيا في 22؛ كانت 47 مليار يورو؛ حاليا في 2025 بقت 95 مليار يورو؛ واعلنوا ان في 2029 هتبقي 162 مليار يورو.. الاتحاد الاوروبي ككل في 2021 كان بيصرف عسكريا 214 مليار يورو؛ حاليا وصل ل 326 مستهدفين 450-500 مليار يورو في 2030.

*️⃣ طيب ال 250 مليار يورو اللي هيزدوا سنوي دول هييجوا منين؟ من جيب المواطن الأوروبي وجزء كبير منهم هيروح لشركات السلاح الأمريكية 😁 فزاعة العو بوتين شغالة خدوا بالكم يا أوروبيين بوتين طمعان فيكم؛ هاتوا فلوسكم هشيلهالكم عندي 😁.

*️⃣ صورة النهاردة المهزأة لقادة اوروبا وهما قاعدين زي الموظفين قصاد ترامب اللي استعداهم بالتليفون ومهتمش يرحب بجد؛ أقعد ياض منك له بوس ايد سيدك والا هسيب عليكم العووو ياكلكم... ياااه يا جدعان الصور حلوه قوي للدول المهزأة دي.

*️⃣ احنا خلاص بنشهد عصر نهاية قوة أوروبا؛ بعد انحسار قوتها الدبلوماسية وبقى تأثير القارة كله صفر عالشمال جه وقت انحسار باقي نفوذها وخاصة ان العالم الجديد مختلف؛ وعلى أوروبا اختيار السيد وسماع أوامره والا السيد هيعاقب أي عبد متمرد وخاصة اللي خلاص ايده نعمت وبقى فرفور مش أد الأكشن بتاع زمان وبقت أجياله متتحملش المرمطه عكس أجدادهم.

طولت عليكم بس الصور عملت اي دماغ الصراحة 😍

يوم 25 أغسطس 2024 كان الدولار في البنك تقريباً ب 48.8 جنية؛ والنهاردة 25 أغسطس 2025 الدولار في البنك متوسط 48.5 جنية يعني السعر طبيعي جداً.

*️⃣ نفسي أفهم بقى التفائل الرهيب والحملة المنظمة الترويجية إن الدولار هابط ونازل وهيكمل لشهور كده؛ ما نفس السعر يا جدعان من سنة ومحدش يسألني فارق التضخم بينك وبين أمريكا راح فين طالما مظهرش في سعر الصرف عشان دي أسئلة مينفعش نسألها 😂

*️⃣ إحنا مستقرين حالياً والتضخم مستقر عشان الدولة قررت تأجيل كل الصدمات لشهر أكتوبر؛ زيادات البنزين والسولار والكهرباء والماية وكله محدوف لأكتوبر عشان ندي التضخم فرصة ينزل عشان البنك المركزي يخفض الفايدة في اجتماع الخميس القادم؛ وبعدين نضرب كرسي في الكلوب 😓...

*️⃣ الأول كان مفروض القرارات الاقتصادية في اغسطس وبالتالي كنت بقول أغسطس تثبيت لكن دلوقتي الخطة بقت نهدى شوية لغاية ما الربع المنتعش دا يخلص ويحلها ربنا الربع القادم بقى اللي مش بس فيه رفع أسعار سلع لكن كمان أعلى ربع سداد ديون خارجية وداخلية 😓😓.

*️⃣ فأنا بقول حسن عبد الله يمسك العصاية من النص ويوم الخميس يديها 1% تخفيض بس؛ هو نظرياً تراجع التضخم يديله براح يخفض 2% عادي جداً وممكن أكثر بس هو عارف اللي هيحصل في أكتوبر فبلاش فتحة الصدر أحسن ييجي لك برد 😁.

*️⃣ بالمناسبة بسبب قلق المستثمرين من خفض الفايدة ففي تكالب كبير على شراء الاذون والسندات (الاقتراض الحكومي) يعني في شهر يوليو الحكومة استلفت ترليون جنية (1074 مليار بالظبط) يعني متوسط 400 ألف جنية في الثانية... في أغسطس الحالي هديت شوية واستلفت 875 مليار جنية حتى تاريخ اليوم 😁 ولما السندات الأسبوع دا يخلص هنعدي 900 مليار للشهر الحالي ((( تحديث الرقم بقي 1028 مليار جنية 😓 )) ... فالهوت ماني والبنوك المحلية عاملين سباق شراء أكبر قدر اذون وسندات قبل ما الفايدة تنزل... فبلاش نحسسهم انهم غلطوا وتسرعوا فننزلها لهم 1% بحيث ندي برضك فرصة لاخواتهم ييجوا؛ هو احنا نقدر نعيش من غيرهم. يعني في الظروف الطبيعية ينزل 2% لو مقلق من بكره ينزل 1%

يا خبر النهاردة بفلوس يوم الخميس يبقي ببلاش

بعد غياب 3 أسابيع كنت فيهم مشغول بظروف خاصة بشغلي؛ أخيراً رجعت وطلعت أول فيديو أو بمعنى أدق أول فيديو في سلسلة فيديوهات هشرح فيها الاقتصاد من الألف للياء ببساطة... الظريف إن الفيديو دا متصور من 3 أسابيع هو والجزء الثاني ونصف الثالث كمان بس مكنتش فاضي اظبطه ومش لاقي اسم للسلسلة ولا حتى صورة ثمبنيل وبعدين قولت هو من امتى المتابعين بتوعي بيفكروا في الشكليات دي؛ روحت ضارب الفيديو في الخلاط وقررت اطلعه والاسبوع القادم إن شاء الله الجزء الثاني وكل أسبوع جزء من السلسلة دي... دا غير في فيديوهات تانية متصورة بقالها شهرين زي فيديو الاونجات وبرضك مفضتش أظبطها... مأساااة والله


عالعموم ربنا يكرم وبكره بعد اجتماع المركزي نعود ونعمل لايف على 9 وربع كده إن شاء الله

الفيديو الجديد أهو

https://youtu.be/3kQHw4mQcIY

للأسف طلع عنيف

هو فعليا مش غلطان عشان التضخم نزل كثير؛ لكن لما تبص للي متشال لقدام تخليك تستغرب

السؤال بقي ليه توسعنا في الاقتراض المحلي آخر شهرين ب 2.1 ترليون جنية واحنا نيتنا خفض الفايدة 🤔 وخاصة ان جزء كبير من المبلغ دا كان لمدد 12 شهر و سنتين و 3 سنين مهواش شهرين ثلاثة؛ ليه ناوي تخفض بكره فبتستلف كثير دلوقتي بالغالي؛ ما تستلف بكره بالرخيص ؟

اسئلة بلا إجابة

ترامب ظهر أهو وهو رايح يلعب جولف؛ كمية بوستات شوفتها خزعبلي وكله بيركب الترند؛ المهم يعني إن الموضوع دا مصدره هناك عندهم ودا يثبت إن كل شعوب العالم شبه بعض؛ هياكل معاهم الإشاعات ونظريات المؤامرة والكلام الشعبوي والمشاعري... وميفرقش كثير شعب عالم أول مع عالم ثالث كله
هيصدق الشعبويات

⬅️⬅️ بالمناسبة انا شايف فينس اوسخ منه فمش عاوز ترامب يموت عشان هيمسك فينس ودا العن من ترامب علينا... مش عشان بحبه احسن الأغبياء يفهموا كده 😂 انا بس شايف مين بعده فترامب ارحم من فينس

⬅️⬅️ في ناس قالت الاخبار اللي نقلتها المواقع دي مش سليمة؛ ادينا هنشوف؛ بس ليا صديق قال اشمعني الاخبار دي والاشاعات دي مش بتطلع والبورصة الامريكية شغالة؟ ليه طالعه في الاجازة زي ضرب ايران كان بيحصل في الاجازة برضك وغيره... صدفة وتصادف نطلع اشاعة في الاجازة عشان ميبقاش في تأثير لغاية ما نطلع نقول التحديث

مصر النهاردة شالت الحواجز الأمنية قصاد سفارة بريطانيا عقاباً ليهم على اللي بيحصل هناك قصاد سفارتنا في لندن.

*️⃣ المهم أنا مكنتش فاهم يعني؛ هو اصلا وجودها يعني رسالة ضمنية إن بلدي خطر وعندي ارهابيين ممكن يهاجموكم فأنا بحكميكم... القاعدة المنطقية العقلية بتقول كل ما بتشوف أمن كثير يبقي الوضع الامني منهار والامن الكثير هدفه كتم الوضع الأمني المنهار... فكل ما تشوف شرطة أكثر يبقى كده البلد دي مش أمان وناشرين الشرطة للسيطرة.

*️⃣ فكنت مش فاهم يعني انتا عشان تعاقبهم فتقولهم البسوا يلا اللي أنا كاتمه من انهيار أمني وإرهاب عندي؟ هلبس نفسي شبهة إني مش بلد الأمن والأمان؟ ودا مش منطقي أصلاً لإن مصر أمان وزي الفل.

*️⃣ شوف كل ما سبق بقى؟ افكس له؛ بريطانيا نزلت بيان من شوية أعلنت قفل المبني الرئيسي للسفارة البريطانية نظراً لدواعي أمنية وإزالة مصر للحواجز الأمنية اللي بتحمي السفارة يعني...

*️⃣ السؤال بقى مفروض نفرح كده إننا علمنا على بريطانيا ولا نزعل عشان كده بنقول إن البلد خطر ولولا الكردون الأمني حول كل سفارة كان هيحصلهم هجوم إرهابي؟ فأهي بريطانيا مش قادرة تشغل سفارتها بدون الكردون الأمني؟

*️⃣ يعني أنا دلوقتي أفرح في الإنجليز ولا أزعل ولا ايه؟ عامة إحنا مش في المنطقي ولا في السياسة وخلينا نمشي مع الموجة الشعبوية ونقول هيييه علمنا عالإنجليز وأحسن أحسن.

*️⃣ طيب ما الأسهل نجيب شوية شباب يقفلوا باب السفارة البريطانية بجنزير وخلاص ونجيب 2 مزنوقين يعملوا محمد رمضان اقصد نمبر 1 عالحيطة بتاعتهم 😂😂😂 ولو مجابوش ورا نعملهم نمبر 2 وننتقم

⬅️⬅️⬅️ تعمدت القلش آخر البوست عشان الناس هتاخد البوست بجد قوي؛ والموضوع دول قاعدة تغلس علي بعض وتعمل لبعض ان فرند عالفيسبوك 😂 فخدوا الموضوع هزار؛ كردون امني ايه وجنزير ايه والعبط دا.

التاتش المصري كما يجب أن يكون

*️⃣ فاكرين لما قولنا جهاز تنظيم الاتصالات عمل منظومة تنظيم المكالمات التسويقية؛ فرحت قوي وقولت يااااه... بعدين كان السؤال هيعرف منين إن دي مكالمات تسويقية؟ لقينا الجهاز نزل آلية الإبلاغ عن المكالمات التسويقية والشكاوى... فكنت فاكر بقى عشان أنا طيب وغر ساذج إن المنظومة هتتعمل بشكل احترافي ومفيش التاتش العبقري المصري... لغاية ما طلع التاتش بتاعنا.

*️⃣ قالك ايييه بقى؟ قالك هنصف الرقم دا إنه بيعمل مكالمات تسويقية لو بيتصل بالناس كثير؛ اه بس كده... اللي عرفني صديق ليا بقوله رقمك اتشال منه ال 0 اللي في أوله... يعني يرن عليك تلاقي رقمه 11 على طول مفيش 0 فمتعرفش تتصل بيه لازم تروح مدور عليه في الكونتاكت... فقالي دا بقى يتكرر كثير ولما اشتكى اتقاله رقمك متصنف دعائي.

*️⃣ عارفين الفيروس فيه أنتي فيرس واللي بيحب أفلام مارفل و DC ففي Hero وفي Anti-Hero... أهو صاحبي دا Anti-BnSamy... يعني كل شيء هو عكسي تماماً ... أنا مثلاً مرة أحتفلت ب 30 ساعة تليفوني مرنش ولا مرة ولا حتى بالغلط... هو ممكن يعمل 30-40 مكالمة في اليوم وممكن أكثر عااادي... طول ما انتا معاه إما بيستقبل أو يتصل؛ هو عايش جوا التليفون... فدا بالنسبة ل NTRA شخص بيتصل كثير يبقى رقم دعائي.

*️⃣ المشكلة فين بقى؟ المشكلة إن الأرقام اللي تتصنف دعائي لو مروحتش تسجل في خدمة CNAM فالجهاز هيوقف الخط والتليفون... انتا فاكر هيوقف الخط ترميه وتجيب غيره؟ حضرتك هيوقف التليفون نفسه فانتا اشتري خط واستخدم التليفون دا قطع غيار ولا بيعه بره مصر.

*️⃣ قولت لصاحبي إمبارح روح سجل فقالي دا خطي أنا هقدم شكوى... شكله طيب زي حالاتي؛ المهم اتصل قالوا له مفيش حل وهو كده؛ أي رقم بيعمل مكالمات كثير يومياً (وقالوا له أو رسائل أو واتس آب كثير ودي مفهمتهاش؛ يمكن يقصدوا ترافيك الواتس آب كبير فكده يبقى بيبعت فايلات العروض للعملاء) فدا السيستم بيصنفه تلقائي كده واللي اتصنف خلاص بخ اتلط ميقدرش يطلع ومفيش ألية شكاوى وإن كان عاجبكم يا مصريين.

*️⃣ صاحبي قالي ايه الحل فقولت له للأسف هتسجله رقم دعائي CNAM بس خد بالك من البند دا وهنقله ليكم كوبي بيست.

في حالة المكالمات الترويجية يلتزم العميل ألا يجري الاتصال بالمستخدمين النهائيين إلا في الأوقات المحددة والتي تكون من الساعة 9 صباحاً الي الساعة 10 مساءا فيما عدا الجمعة من الساعة 11 صباحا إلى الساعة 10 مساءاً، وألا يجري الاتصال بذات المستخدم النهائي أكثر من 3 مرات يوميا.

*️⃣ قالي يعني ايه؟ مش هتصل بحد بعد 10 م؟ ومش هقدر اتصل بمراتي مثلاً أكثر من 3 مرات في اليوم؟ قولت له اه خليها هي اللي تتصل بيك وانتا ابعت لها كلمني شكراً.

*️⃣ ونختم بالأكلاشيه الفيسبوكي الاستعلائي الشهير؛ دي خطوات للإصلاح يا شعب وكل إصلاح ليها تضحياته وليه ضحاياه فهنضحي بشوية ناس عشان الإصلاح يعيش. فعادي يعني انتم اللي بتتصلوا كثير حد قالك ترغي في التليفون كثير؟ اعمل زيي Silent Man أو DND... سياستي سهلة؛ الشيء دا ينفع واتس آب ليه تتصل؟ اتصل لو في كارثة بس... أو لو إنتا مراتي

⬅️⬅️⬅️⬅️⬅️ توضيح للي مش فاهمين

*️⃣ هما معتبرين مكالمات كثير يبقي تسويق؛ يعني بتعمل 30 مكالمة وكل مكالمة 3 دقايق كذه تسويق؛ انتا بقي حبيب وبتتصل بخطيبتك 5 مرات وكل مرة 60 دقيقة؛ عااادي جداً... هما مركزين انتا بتكلم ارقام كثير ولا قليل؛ وليس مدة الاتصالات طويلة؛ العدد وتغير الأرقام.

ميزة القيادة الآلية تعتبر أهم ميزة بتتطور بقوة في مجال السيارات وخاصة العربيات الكهرباء؛ وبصراحة أنا شايفها أكثر ميزة عدوة للسيارات؛ يعني بعتبر الشركات بتطور التقنية اللي هتضرهم.

*️⃣ غالبية الأسر اللي عندهم أكثر من عربية بيكون ليه؟ عشان عادة الزوج معاه عربية والزوجة عندها مهام وحياة؛ عيال رايحة تدريب رايحين دروس؛ الست عاوزة شوبنج.

*️⃣ تخيل بقي البيت فيه عربية ذاتية القيادة؛ تنزل الشغل وتوصل تقول العربية ارجع البيت؛ العربية ترجع المدام والعيال ينزلوا تودي العيال التدريب وهي تروح لصديقة ليها وبعدين تبعت العربية تجيب العيال من التدريب وتعدي تاخدها وتروحهم؛ يكون الراجل خلص شغله ترجع تجيبه.

*️⃣ عادة الأسرة بقت محتاجة عربية واحدة خلاص لإنه كإنك بقى عندك سواق؛ يا أخي مش لاقي ركنة انزل عند الشغل وروحي يا عربية اركني بعيد ولما اخلص شغل ابعت لها تيجي لي.

*️⃣ فشركات السيارات قاعدة عمالة تطور تقنية هي فعليا هتقلل الطلب عالعربيات 😂 أو هكذا وجهة نظري يعني اللي شرحتها.

⬅️⬅️⬅️ وكل ما سبق كلام عن أوروبا والخليج وامريكا والدول المتقدمة؛ والمتخلفة برضك؛ بس تبقي تقابلني خاصية القيادة الذاتية دي انها تشتغل في مصر 😂

الفيسبوك كله : مصر هتقطع العلاقة مع صندوق النقد؛ خلاص قررنا انه مضى عهد الاستعباد؛ وعميد كلية تجارة مشهور قالك هعمل خطة اقتصادية و الحكومة يوم الأحد هتعلن عن السردية الوطنية للتنمية الاقتصادية وووو

*️⃣ بلومبيرج النهاردة بتقولك مصادر ليها في الحكومة بلغتها اننا خلال الربع القادم هنتسلم 500 مليون دولار كأول دفعة من البرنامج الجديد مع صندوق النقد اللي اسمه (الصلابة والاستدامة 😊😊).

⬅️ كبروا مخكم يا جماعة الموضوع بسيط؛ احنا السنة الماضية عملنا نفس الفيلم ورئيسة الصندوق جت زارت مصر يوم 3 نوفمبر لو فاكريت وبعدين عادي كملنا....

*️⃣ كل ما في الأمر إن الصندوق جه في مارس/أبريل لقى مفيش حاجة تمت؛ قالوا خلاص هنيجي لكم آخر السنة وقيل للصحافة وقتها غالباً أكتوبر ونعمل مراجعة 5 و 6 مع بعض... فكده مطلوب مننا حاجات كثير؛ فهنتقمص شوية فالصندوق يقولنا خلاص بقي متزعلوش انتم حبايبي وزباين قدامى عندي؛ طب خلاص بلاش تخارج من الاقتصاد دلوقتي؛ زودوا البنزين 1.5 جنية والسولار 2 جنية والغاز للكهرباء ل 5 دولار وعشين جنية عالانبوبة و30% عالكهرباء وسددوا مليار لشركات البترول متآخرات؛ وادوني وعد رجالة لما اجي في 2026 الاقي الشركات اللي قولتم هتتطرح بداية 25 تمت؛ خلاص وعد رجالة... أحلى إمضاء وتمرير مراجعة على عيونك يا برنس؛ وادي 2.5 مليار دولار أهم ومعاك 0.5 صلابة تبقي اخدت مننا 3 مليار دولار السنة دي (وإحنا اخدنا منك 5.5 مليار دولار اقساط قروض في 2025 فاحنا الكسبانين 😂)

باي بال بتوزع سنة علي بربلكستي برو مجاناً؛ خش عاللينك دا

https://www.perplexity.ai/join/p/paypal-subscription

وخد السنة؛ وطبعاً لازم يبقي عندك باي بال فيه كارت بنكي وشغال؛ وطبعاً افتكر انتا كده مشترك سنة فمتنساش تكنسل بعدها والا هتدفع 20 دولار شهري 😂 حط ريمايندر 😁

هتقولي ايه الفارق بين برو وعادي؛ طيب بلاش انك مكسل تقرأ في الابلكيشن؛ بس اهو يا سيدي البرو ببلاش؛ فارق حاجة حلو؛ مش فارق حاجة فانتا مدفعتش حاجة

على سيرة التراشق الإعلامي بين مصر وإسرائيل وإن النتن حسب الإعلام عمل للاتفاق Hold ورد رئيس هيئة الاستعلامات المصرية إن الاتفاق دا في مصلحة اسرائيل وهما الخسرانين وإن مصر عندها بدائل لاستيراد الغاز لكننا مضينا الاتفاقية معاهم؛ فلو لغيتوها هتخسروا...

*️⃣ بعيد عن إني مش بقتنع بسهولة بالتصريحات السياسية وخاصة إن النتن عنده تراجع شعبية رهيب ومحتاج لقطة إنه حامي الحمي والمدافع الوحيد عن مصالح شعبهم ويكأن الشركة الحكومية ووزير الطاقة بتاعهم اللي أعلنوا الصفقة مكانوش قايلين له؛ بس خلينا نمشي في السيناريو بتاع إن الاتفاقية الجديدة بالسلامة فإيه بدائل مصر؟

*️⃣ في البداية كده مصر انتاجها 4 مليار قدم وبتحتاج 5.5-6.0 مليار في الشتاء و 6.5-7 مليار بالصيف؛ يبقي عاوزين متوسط 2-3 مليار يومي زيادة فوق انتاجنا.

*️⃣ مفروض سفينة فك الاسالة التركية تحركت في طريقها لمصر وهتخش ميناء دمياط وبكده هيبقي عندنا سفينة في دمياط و 3 سفن في السخنة وسفينة في ميناء العقبة الأردني؛ دول يدونا 2 مليار قدم يومي مرتاحين (قدرتهم فوق ال 2 فعليا).

*️⃣ ففعليا في فصل الشتاء نقدر نعتمد كلياً عالغاز المحلي + فك الاسال ومش عاوزين غاز منهم (الغاز المسال ب 14 دولار وغاز الانابيب منهم ب 7.75 لكن سيبك من التكلفة لإننا بنحسب حالة طوارئ)

*️⃣ فعليا بقى الاتفاقية دي لو اتلغت فترجع للاتفاقية القديمة اللي بيها الضخ شغال أصلاً 1.2 مليار قدم؛ يعني انتا في الشتاء القادم هتريح سفينة العقبة و 2 سفينة من عندنا ونشغلهم في الصيف.

*️⃣ بحلول 2029/2030 هتكون الاتفاقية خلصت؛ هي مفروض 2030 بس الاتفاقية فيها كمية غاز فلو فضلنا علي ضخ 1.2 مليار هنخلصها قبل 2030؛ طيب ايه الحل؟ هنتصرف إزاي؟

*️⃣ شايف الاستاذ اللي بيشاور هناك ويقول المفاعلات هتكون اشتغلت؛ بص يا سيدي أولا كده ال 4 مفاعلات دول بال 30 مليار دولار بتوعهم طاقتهم 4.8 جيجا وات ودي زي طاقة بتاع 1 محطة سيمنز زي اللي في بني سويف او العاصمة الادارية ب 3 مليار دولار (الكهرباء من النووي 10% تكلفة من الغاز عشان كده تكلفته اغلي).

*️⃣ هتقولي طيب اهو ال 4.8 جيجا بتوع النووي هيخشوا يحلوا الازمة؛ هقولك طيب والنمو السكاني؟ لو متابع الاخبار هتلاقي ان السنة دي ذروة الاحمال زادت فوق 2 جيجا عن العام الماضي؛ فلما تبص علي احمال 2030 الفعلية مش بس الذروة هتلاقيها زادت 4-6 جيجا؛ يعني النووي مش هيكفي يشيل زيادة الاستهلاك؛ هو مش في شعب بيكبر ومصانع عاوزة طاقة ولا حاطين خطة نمو اقتصادي وسياحي بدون خطة نمو استهلاك طاقة 😂.

*️⃣ طيب ايه الحل يا بن سامي؟! الحل موجود وهو أولاً في سلسلة مشاريع طاقة متجددة ونظيفة بتتبني؛ من طاقة رياح وشمسية وكهرومائية؛ كثير منهم قطاع خاص بتبني وهتبيع للدولة (بالدولار) فهتخش الخدمة بحلول 29/30/31 فهتزق معانا برضك.

*️⃣ وكمان عندنا قبرص؛ ايه انتا متعرفش... عارف خط الانابيب الغاز المسروق اللي جاي من الشرق دا؟ في اتفاق مع قبرص على خط أنابيب شبهه كده مفروض يوصلنا بحلول 27/28 ومتفقين نهاية 28 وبداية 29 يكونوا بيبعتوا لنا 1.3 مليار قدم يومي؛ ارجع بداية البوست وشوف غاز الشرق بييجي دلوقتي كام يومي منه؟ ايوان برافو 1.2 مليار يعني هيكون جالك من القبارصة بداله.

*️⃣ فلو علي 29 الاتفاقية خلصت ووقفوا؛ نخش على غاز قبرص اللي مفروض كانت الاتفاقية معاهم هي للتسييل؛ يعني كانت خطتنا الإسرائيلي استهلاك محلي والقبرصي تسييل؛ وبالمناسبة برضك الشركات اللي شغالة في قبرص هي اللي بتدور ع الغاز في مصر زي ايني مثلاً 😁؛ اللي بالمناسبة برضك ايني شريكة في محطة من محطتي الاسالة 😂؛ فايني انتجت من ظهر في مصر كويس؛ مصر وقعت؛ خلاص حقولنا في قبرص هتشتغل ونصدر لمصر؛ لو مصر شغالة فبرضك حقولنا في قبرص شغالة تبعت لمحطة الاسالة بتاعتنا برضك؛ يعني شركة ايني علاقة win-win-win اي كان الوضع هي كسبانه.

*️⃣ بالمناسبة شركات الطاقة في المنطقة واحدة؛ يعني هتلاقي شيفرون وبنتها نوبل انرجي عندهم حقول في مصر وهما برضك المشغلين لحقل ليفاثان في اسرائيل وحقل افروديت في قبرص؛ وهتلاقي مبادلة الامارتية ليها 22% من حقل تمارا وهتلاقي قطر البترول عندها استثمارات في قبرص واكتشفت غاز هناك مع اكسون موبيل؛ وبرضك قطر هي شريكة في محطة مسطرد في مصر اللي بتكرر لنا البترول وتدينا البنزين وبالمناسبة محطة مسطرد هي من اكبر مشروع لقطر؛ وقطر للطاقة في شراكة مع شيفرون في حقل شمال الضبعة... الموضوع طويييل ومعقد قوي

*️⃣ ففعلياً كلام رئيس هيئة الاستعلامات سليم ان لو الاتفاقية اتلغت مش هنقع وعندنا بدائل؛ اه طبعا هنتكلف 10-20 مليار دولار زيادة (غاز مسال) بس مش هنقع.. نقع بس لو قرروا قطع دائم من دلوقتي ومنفذوش الاتفاق القديم بس وقتها هناخد منهم تعويض خزعبلي من المحاكم الدولية؛ وهنشغل مازوت وسفن اسالة وهنرجع نعيش بس بتكلفة رهيبة.

طولت عليكم بس طلبت معايا اكتب بوست صباحي زي زمان.

على سيرة التراشق الإعلامي بين مصر وإسرائيل وإن النتن حسب الإعلام عمل للاتفاق Hold ورد رئيس هيئة الاستعلامات المصرية إن الاتفاق دا في مصلحة اسرائيل وهما الخسرانين وإن مصر عندها بدائل لاستيراد الغاز لكننا مضينا الاتفاقية معاهم؛ فلو لغيتوها هتخسروا...

*️⃣ بعيد عن إني مش بقتنع بسهولة بالتصريحات السياسية وخاصة إن النتن عنده تراجع شعبية رهيب ومحتاج لقطة إنه حامي الحمي والمدافع الوحيد عن مصالح شعبهم ويكأن الشركة الحكومية ووزير الطاقة بتاعهم اللي أعلنوا الصفقة مكانوش قايلين له؛ بس خلينا نمشي في السيناريو بتاع إن الاتفاقية الجديدة بالسلامة فإيه بدائل مصر؟

*️⃣ في البداية كده مصر انتاجها 4 مليار قدم وبتحتاج 5.5-6.0 مليار في الشتاء و 6.5-7 مليار بالصيف؛ يبقي عاوزين متوسط 2-3 مليار يومي زيادة فوق انتاجنا.

*️⃣ مفروض سفينة فك الاسالة التركية تحركت في طريقها لمصر وهتخش ميناء دمياط وبكده هيبقي عندنا سفينة في دمياط و 3 سفن في السخنة وسفينة في ميناء العقبة الأردني؛ دول يدونا 2 مليار قدم يومي مرتاحين (قدرتهم فوق ال 2 فعليا).

*️⃣ ففعليا في فصل الشتاء نقدر نعتمد كلياً عالغاز المحلي + فك الاسال ومش عاوزين غاز منهم (الغاز المسال ب 14 دولار وغاز الانابيب منهم ب 7.75 لكن سيبك من التكلفة لإننا بنحسب حالة طوارئ)

*️⃣ فعليا بقى الاتفاقية دي لو اتلغت فترجع للاتفاقية القديمة اللي بيها الضخ شغال أصلاً 1.2 مليار قدم؛ يعني انتا في الشتاء القادم هتريح سفينة العقبة و 2 سفينة من عندنا ونشغلهم في الصيف.

*️⃣ بحلول 2029/2030 هتكون الاتفاقية خلصت؛ هي مفروض 2030 بس الاتفاقية فيها كمية غاز فلو فضلنا علي ضخ 1.2 مليار هنخلصها قبل 2030؛ طيب ايه الحل؟ هنتصرف إزاي؟

*️⃣ شايف الاستاذ اللي بيشاور هناك ويقول المفاعلات هتكون اشتغلت؛ بص يا سيدي أولا كده ال 4 مفاعلات دول بال 30 مليار دولار بتوعهم طاقتهم 4.8 جيجا وات ودي زي طاقة بتاع 1 محطة سيمنز زي اللي في بني سويف او العاصمة الادارية ب 3 مليار دولار (الكهرباء من النووي 10% تكلفة من الغاز عشان كده تكلفته اغلي).

*️⃣ هتقولي طيب اهو ال 4.8 جيجا بتوع النووي هيخشوا يحلوا الازمة؛ هقولك طيب والنمو السكاني؟ لو متابع الاخبار هتلاقي ان السنة دي ذروة الاحمال زادت فوق 2 جيجا عن العام الماضي؛ فلما تبص علي احمال 2030 الفعلية مش بس الذروة هتلاقيها زادت 4-6 جيجا؛ يعني النووي مش هيكفي يشيل زيادة الاستهلاك؛ هو مش في شعب بيكبر ومصانع عاوزة طاقة ولا حاطين خطة نمو اقتصادي وسياحي بدون خطة نمو استهلاك طاقة 😂.

*️⃣ طيب ايه الحل يا بن سامي؟! الحل موجود وهو أولاً في سلسلة مشاريع طاقة متجددة ونظيفة بتتبني؛ من طاقة رياح وشمسية وكهرومائية؛ كثير منهم قطاع خاص بتبني وهتبيع للدولة (بالدولار) فهتخش الخدمة بحلول 29/30/31 فهتزق معانا برضك.

*️⃣ وكمان عندنا قبرص؛ ايه انتا متعرفش... عارف خط الانابيب الغاز المسروق اللي جاي من الشرق دا؟ في اتفاق مع قبرص على خط أنابيب شبهه كده مفروض يوصلنا بحلول 27/28 ومتفقين نهاية 28 وبداية 29 يكونوا بيبعتوا لنا 1.3 مليار قدم يومي؛ ارجع بداية البوست وشوف غاز الشرق بييجي دلوقتي كام يومي منه؟ ايوان برافو 1.2 مليار يعني هيكون جالك من القبارصة بداله.

*️⃣ فلو علي 29 الاتفاقية خلصت ووقفوا؛ نخش على غاز قبرص اللي مفروض كانت الاتفاقية معاهم هي للتسييل؛ يعني كانت خطتنا الإسرائيلي استهلاك محلي والقبرصي تسييل؛ وبالمناسبة برضك الشركات اللي شغالة في قبرص هي اللي بتدور ع الغاز في مصر زي ايني مثلاً 😁؛ اللي بالمناسبة برضك ايني شريكة في محطة من محطتي الاسالة 😂؛ فايني انتجت من ظهر في مصر كويس؛ مصر وقعت؛ خلاص حقولنا في قبرص هتشتغل ونصدر لمصر؛ لو مصر شغالة فبرضك حقولنا في قبرص شغالة تبعت لمحطة الاسالة بتاعتنا برضك؛ يعني شركة ايني علاقة win-win-win اي كان الوضع هي كسبانه.

*️⃣ بالمناسبة شركات الطاقة في المنطقة واحدة؛ يعني هتلاقي شيفرون وبنتها نوبل انرجي عندهم حقول في مصر وهما برضك المشغلين لحقل ليفاثان في اسرائيل وحقل افروديت في قبرص؛ وهتلاقي مبادلة الامارتية ليها 22% من حقل تمارا وهتلاقي قطر البترول عندها استثمارات في قبرص واكتشفت غاز هناك مع اكسون موبيل؛ وبرضك قطر هي شريكة في محطة مسطرد في مصر اللي بتكرر لنا البترول وتدينا البنزين وبالمناسبة محطة مسطرد هي من اكبر مشروع لقطر؛ وقطر للطاقة في شراكة مع شيفرون في حقل شمال الضبعة... الموضوع طويييل ومعقد قوي

*️⃣ ففعلياً كلام رئيس هيئة الاستعلامات سليم ان لو الاتفاقية اتلغت مش هنقع وعندنا بدائل؛ اه طبعا هنتكلف 10-20 مليار دولار زيادة (غاز مسال) بس مش هنقع.. نقع بس لو قرروا قطع دائم من دلوقتي ومنفذوش الاتفاق القديم بس وقتها هناخد منهم تعويض خزعبلي من المحاكم الدولية؛ وهنشغل مازوت وسفن اسالة وهنرجع نعيش بس بتكلفة رهيبة.

طولت عليكم بس طلبت معايا اكتب بوست صباحي زي زمان.

فيديو جديد عالقناة والمرة دي عملته عن الذهب والدولار والإجراءات الاقتصادية القادمة والعقارات

ولإنه فيديو طويل هتلاقي تحت الفيديو في الوصف كده تايم لاين دوس عليه يوديك الحته اللي انتا مهتم بيها

https://youtu.be/MoSa_Xv8wxk

بعد كده اللي هيسألني هبعت له الفيديو دا

⬅️⬅️ بالمناسبة في سلسلة بدأتها اسمها اقتصادك في جيبك كده نزل منها حلقتين وفي واحدة ثالثة متصورة وفي رابعة هتتصور؛ لما تبقوا رايقين شوفوها

ايه يا عم الذهب أنا قولت في الفيديو من يومين هنجيب جرام 6 الاف جنية اخر السنة مش آخر الشهر 😂

*️⃣ عالعموم هنشوف السوق في مصر هيفضل محافظ على سعر محلي أقل من العالمي ولا النهاردة هيكسر 5700 للجرام عشان يظبط مع السعر العالمي 🤔🤔.

*️⃣ عشان تكونوا متخيلين مدى التأثير عالسعر في مصر؛ عارفين زيادة أوقية الذهب 37 دولار يعني 3700 تبقي 3737 دولار؛ دي تساوي هي هي لو سعر الدولار في السوق تحرك من 48.2 الحالية ل 48.7.

*️⃣ يعني يعني لو فرضنا مثالين؛ الدولار رجع 51.6 والذهب ثابت عند 3700$ الأوقية الحالية (هو 3696 بس قولت على ما اكتب البوست وتقروه يبقي 3700)... فالدولار يتحرك راجع ل 51.6 والذهب ثابت عند 3700؛ تأثيرها عالسوق المحلي هو هو لو فضل الدولار ب 48.2 والسعر العالمي بقي 3960$ للأوقية 😂.

*️⃣ حالياً في سيطرة السوق المحلي والصاغة مسعره على 47.6/47.7 تقريباً لو السوق لازم يقفز؛ أدينا هنشوف آخرة الضحك دا ايه

لا ولسه الفيدرالي هيخفض الأسبوع القادم 😂😂


⬅️⬅️⬅️ دا سعر العقود الاجلة

⬅️⬅️⬅️ الدولار نزل 20 قرش وعوض كل صعود الذهب؛ للتذكير ال 1 دولار في الاوقية تاثيره علي سعر الذهب في مصر يتلاشي لو الدولار نزل 1.3 قرش؛ يعني نزول 20 قرش دا يشيل تأثير 15 دولار في الاوقية

سلاح الجو الإسرائيلي قصف مقر حماس في الدوحة قطر وهما بيناقشوا مقترح ترامب لوقف اطلاق النار 😓😓


⬅️⬅️⬅️ ملاحظ ان في ناس فرحانين وبتتريقوا؛ انتم بتهزوا صح؛ هو هنفرح في موت مسلم علي ايد صهيوني؛ ياخي.... ؛ انتم بتفكروا إزاي... انتم متعرفوش يعني ايه ولاء وبراء... طيب يا اخي متعرفوش قومية وعروبة بلاش الدين يا سيدي

يا اخي دا لو مش مسلم؛ دا مسيحي لبناني حتي مش مصري أفضل عندي من صهيوني اسرائيلي... تروحوا انتم تفرحوا في قتل اي عربي مسلم زينا 😓