بيعجبني قوي فيلم صندوق النقد مع دول العالم الثالث... الدول تروحله تقوله يا صندوق وضعي وحش عاوز اتفاق معاك يقول إني حلو فالهوت ماني ييجي فالدولار يستقر فكده المستثمرين ييجوا.

*️⃣ الصندوق؛ عنيا يا حبيبي؛ وريني كده أرقامك وميزانيتك؛ يالهوي دا إنتا معكش تدفع هتاخد مني قرض وتسدده إزاي؟

⬅️ الدول: بص دي خطتي هنفخ المواطن وأحلبه وأجيب الفلوس أسدد؛ وهصلح مشاكل كذا كذا عندي؛ ها ايه رأيك يا صندوق.

*️⃣ يا سلام عليك هو دا؛ هاجي لك كل 6 شهور أشوفك عملت ايه؛ اتفقنا... يلا أدي إمضاء أهي؛ يا هوت ماني الدولة X كويسة تعالوا.

*️⃣ بعد 6 شهور ييجي الصندوق؛ هااا وريني كده عملت ايه في خطة الحلب اللي وعدتني بيها؛ اييييه دا إنتا معملتش ربع اللي متفقين عليه؛ مينفعش كده.

⬅️ الدول: يا إعلام كلموا الشعب؛ الصندوق عاوزني أنفخ الشعب؛ عاوزني أحلب الشعب؛ يرضيكم؛ إحنا لم ولن نفعل ال احم احم في شعبنا 😂😂؛ الصندوق دا عنده مخططات لتدمير البلد وافساد السلام الداخلي والمش عارف ايه؛ الحقونااا.

*️⃣ الصندوق: ايه يا عم إنتا؛ هو أنا عملت شيء؛ دا إنتا اللي حاطط الخطة وقايلي؛ عامة بص إنتا حبيبي ومتوصي عليك من الغاليين؛ هصرف لك الشريحة دي وهاجي بعد 6 شهور نشوف إيه وضعك خلاص.

*️⃣ فات 6 شهور؛ الصندوق جه؛ هااا عملتم ايه يا بلد؛ متقوليش لسه معملتش حاجة؛ لا كده كثيير شكلي قصاد الدول؛ هيقولوا عليا صندوق عبيط.

⬅️ الدول: يا إعلام؛ طلعوا الاسطوانة؛ الصندوق بيضغط علينا عشان بلدنا مستهدفة بخطة صهيوأميركو ايرانوا صيني روسي موزمبيقي صومالي أثيوبية.

*️⃣ الصندوق؛ يووووه بقي يا عم انتا اللي حاطط الخطة والشروط والخطوات؛ بص هو لولا إنك من الغاليين كنت طلعت لك تقرير يخوف الهوت ماني ويهرب المستثمرين ووو... بس عشان إنتا حبيبي هطلع اقول إني اتفقت معاك نأجل المراجعة دي للي جايه 😁...

وتستمر القصة والفيلم

بعد دقائق هكون لايف عاليوتيوب من 9 إلى 10 هندردش حولين تقرير الصندوق الجديد اللي طلع... فعليا التقرير قديم لكن لسه طالع لينا جديد

الايف هيكون مسجل عادي عشان الناس اللي مش فاضية

اللينك عاليوتيوب

https://youtube.com/live/JUNDlK5FBzU?feature=share

بمناسبة زيارة رئيس الفلبين لأمريكا وكمان الانتخابات اللي عندنا في مصر دي وإن يفط فيها صور ناس 99% من الشعب ميعرفش مين دول بس هينتخبوهم؛ الانتخابات دايماً تفكرني بقارة أسيا؛ للي ميعرفش فمعظم آسيا وإن كان دلوقتي فيها انتخابات ديمقراطية بجد لكن زمان كانت دكتاتورية بس بيحصل برضك فيها حاجات طريفة قوي.

⬅️ في الفلبين فرناندو ماركوس كان شاب محامي ناشط قاوم الاحتلال الياباني للفلبين وبني سمعته إنه وطني قاوم الاستعمار؛ ودا خلاه وهو في سن ال 32 يخش البرلمان (النواب والشيوخ) وخلال 14 سنة بقي رئيس المجلس سنة 1963 وبعدين قرر في 1965 يرشح نفسه للرياسة ضد الرئيس الحالي وبالفعل كسب ب 52%.

*️⃣ كسب ماركوس وقالك حان وقت نهوض الفلبين ومش هينفع نفضل دولة متخلفة كده؛ وبالفعل أطلق مشاريع بنية تحتيه في كل مكان؛ كباري طرق صرف صحي موانئ مطارات؛ مشاريع ضخمة قللت البطالة بس فعليا مغيرتش من مستوي معيشة المواطن الفلبيني لإن الفساد خلى السبوبة كلها لحاشية ماركوس.

*️⃣ في عام 1969 خلصت فترة ماركوس لكنه استخدم كل شيء عشان يكسب؛ كانت لسه الانتخابات ديمقراطية والفلبين منذ الاستقلال عن الاحتلال الياباني والأمريكي كانت كل 4 سنين تغير رئيس؛ لكن ماركوس قالك لا كفاية كده؛ استخدم الفلوس وشراء الأصوات وأمر رجالة الحاشية بحشد أنصارهم وموظفيهم للانتخابات وقمع بالشرطة المعارضين وسجن البعض وفي النهاية عرف يكسب ب 62% لفترة ثانية؛ وأخيرة حسب الدستور تخلص سنة 1973.

*️⃣ ماركوس كمل برنامج نهوض الفلبين والانفاق الضخم وخاصة عالبنية التحتية الممولة بقروض خارجية وبالمناسبة ديون الفلبين قفزت في عهد ماركوس من 2 ل 35 مليار دولار 😁؛ عالعموم أمريكا دعمت ماركوس لكن المعارضة انتشرت؛ معارضه من أحزاب شيوعية وكمان المسلمين تعوضوا للقمع الكبير من ماركوس ونفوذهم زادت في ولايات معينة وخاصة بعد فضيحة جابيدة.

*️⃣ في 1968 قرر ماركوس عمل خطة جابيدة وهي ضرب عصفورين بحجر؛ عندنا صراع حدودي مع ماليزيا وعاوزين ناخد منطقة صباح منهم؛ وعندنا مسلمين ثائرين في مورو؛ خلاص التجنيد الإجباري ياخد الجنود دول يدربهم ويخليهم يهجموا علي ماليزيا؛ نجحنا يبقي اخدنا المدينة؛ فشلنا يبقي ضحينا بالمسلمين اللي مزهقينا؛ لكن حصلت مشكلة؛ المجندين لما عرفوا ان دورهم الهجوم على ماليزيا رفضوا لإنه حرام مسلم يحارب مسلم فهنا قرر الجيش الفلبيني عما مجزرة وابادة للمجندين وقتل عشرات منهم بتهمة خيانة الفلبين وتفضيل الإسلام علي الفلبين والإرهاب ودا خلى الأخبار تتعرف والخطة تنتشر وتتلغي ومعروفة باسم خطة جابيدة.

*️⃣ من بعد خطة جابيدة ومسلمي الفلبين قالوا الانفصال وشكلوا جماعات عسكرية تحارب الدولة سميت بجماعة مورو وانتشرت في مناطق المسلمين زي سولو ومينداناو وردت الدولة بالعنف المضاد ومذابح في القري واستمر القتال دا عشرات السنين؛ مورو تعمل عمليات وتفجير ضد الفلبين والدولة تعمل مجازر في مناطقهم.

*️⃣ نرجع لماركوس اللي سنة 1972 قالك ايه دا أنا فاضلي كام شهر وأمشي؛ على جثتي؛ ومش هعدل الدستور؛ طلع قال يا شعب عشان الظروف اللي احنا فيها؛ بنحارب الشيوعين والانفصاليين المسلمين؛ لذا أعلن فرض الاحكام العرفية ومن الآن أنا رئيس مكمل معاكم.

*️⃣ أمريكا طبعاً بتأيد أي دكتاتور في الكوكب يكون ضد المسلمين أو السوفيت فماركوس كان حبيب أمريكا وخاصة إنه ادي أمريكا قواعد عسكرية كمان؛ فأمريكت فتحت له الخزائن يقترض ويصرف علي مشروعاته الضخمة زي مشروع مفاعل نووي للكهرباء في مدينة (باتان) اللي صرف عليه مئات ملايين الدولارات وبدأوا الشغل فيه من 1978 ومشتغلش لغاية النهاردة بالمناسبة (خد بالك مئات ملايين الدولارات في السبعينات تعادل مليارات النهاردة).

*️⃣ الوضع في نهاية السبعينات ودخول الثمانيات كان صعب اقتصاديا؛ الفلبين بتستورد بترول اللي غلي بعد حرب 73 فراعوا عملوا مشروع الفنكوش النووي وفشلوا يشغلوه عشان اتعمل اصلاً رشاوي وفساد ففحوصات السلامة رفضت تشغله؛ دخل الثمانيات لقي كارثة وهي التضخم الأمريكي اللي خلى الفيدرالي وقتها رفع الفايدة في 1980 لتصبح 20% وآه الفايدة عالدولار بقت 20% فبقي مستحيل حد يعرف يستلف (الفايدة اللي ارتفعت بعذ كورونا وخلتنا عيطنا كانت قمتها 5.5%).

*️⃣ المعارضة زادت الضغط عالحكومة واتهمها ماركوس بالعمالة للأعداء وزود القمع بشكل مبالغ فيه خلى حتى أمريكا تبدأ في انتقاده؛ ماركوس اتهم زعيم المعارضة بينينيو أكينو المنفي في أمريكا بالخيانة والعمالة (مع إنه في أمريكا حليفة ماركوس)؛ المشكلة إن بينينيو أكينو سخن وقال لماركوس أنا جاي أعارضك من الفلبين والكل قاله انتا عبيط؛ وبالفعل ركب الطيارة ونزلت المطار فحاصرت قوات الشرطة الطيارة وطلعوا قتلوا أكينو؛ لا مقبضوش عليه؛ طلعوا ضربوه بالرصاص في الطيارة.

*️⃣ وعشان الدقة الشرطة قالت انتا عليك احكام اتفضل معانا وبالفعل أكينو قام معاهم لكن في شخص منهم طلع السلاح وطلقة في موخرة رأس أكينو؛ وسبحان الله الشرطة قتلته برضك عشان قتل أكينو وبكده محدش هيحاكمه ولا هيقول هو قتله ليه.

*️⃣ هنا الفلبين غرقت مظاهرات والشرطة والجيش فشلوا يصدوها؛ الموضوع زاد لدرجة إن امريكا بلغت ماركوس إنه يهرب؛ أخد مراته اللي لقوا في قصرها 2700 زوج احذية 🤣🤣 وأخد عياله وهرب سنة 1986 وسيطرت المعارضة عالحكم ومسكت كورازون السلطة وبقت رئيسة الفلبين؛ مين كورازون دي؟ مرات أكينو... وتم تعديل الدستور وبقت فترة الرئاسة 6 سنين لا يجوز تجديدها؛ وفي سنة 2010 وصل لبنينو نجل أكينو للسلطة وبقي رئيس لغاية 2016.

*️⃣ لو بتسأل الفلبين دلوقتي مين ماسكها؛ فالرئيس الحالي بونج بونج كان عضو برلمان من 1992 ومسك عدة مناصب زي وزير زراعة ورئيس مجلس شيوخ؛ اه و بونج بونج يبقي ابن ماركوس 😁🤣🤣🤣 وصل للسلطة بالديمقراطيه.

*️⃣ لو مستغرب الحدودته دي فأنا كان مفروض أقولك اختها من كوريا الجنوبية اللي الجنرال بارك تشونج-هي اللي عمل انقلاب سنة 1961 وقمع المعارضة بس بني كوريا؛ في 16 سنة عمل نهضة صناعية رهيبة هي اللي خلت كوريا هي اللي نعرفها؛ لولاه مكنتش هتسمع عن سامسونج و LG وهيونداي وكيا.

*️⃣ لكنه كان دكتاتور سفاح ومحدش عرف يثور عليه؛ حاولوا يقتلوه مرة بس قتلوا مراته سنة 1975 وبنته بقت تقوم بدور السيدة الأولى؛ لغاية سنة 1980 في اجتماع ليه مع رئيس المخابرات هو اهان وشتم رئيس المخابرات فالثاني قالك انا اتشتم؛ راح قاتله؛ اه ضربه بالرصاص قتله عادي كده 🤣؛ هي ليها قصة بس الموضوع تم كده.

*️⃣ المقارنة بين قبل عهده وبعدها؛ دخل الفرد كان 100 دولار بقي 1600 دولار يعني 16 ضعف؛ الصادرات كانت 50 مليون دولار بقت 15 مليار دولار يعني الصادرات زادت 300 ضعف...

*️⃣ اه نسيت أقولك شكلي؛ بنته بقت رئيسة كوريا برضك سنة 2013 لكن تم اقالتها في 2017 بعد فضيحة ان صديقتها الانتيم بتاخد رشاوي وتتوسط للشركات زي سامسونج وهيونداي عند الرئيسة؛ واتهمت الرئيسة بتقاضي الرشوة برضك كانت سامسونج بتبعتها للرئيسة بواسطة صاحبتها وتم اثبات رشاوي مثل شنط ايد حريمي ماركة هيرمس ولوي فاتيون وحصان فاخر لتدريب بنت الرئيسة؛ وتم اقالتها والحكم عليها بالسجن ب 32 سنة سجن لكن لاحقاً طلع لها عفو وخرجت من السجن هي والمعلم سامسونج. اييييه دنيا ابوها كان يقدر يقتل اي بني آدم في الشارع عادي وهي اتحبست عشان شنطة 🤣🤣 وهي دي الديمقراطية ليها أنياب 😁.

⬅️⬅️ كفاية كده بوست طويييل عشان اللي بيقولوا بن سامي قلب فيديوهات ونسي الكتابة؛ لم يحدث؛ بس دا لا ينفي انكم مش متابعين القناة ومشوفتوش الفيديوهات اللي بتنزل هناك 💔💔.

لولي: بابا بابا إنتا عارف بكره في إيه

أنا: لا يا لولي معرفش لسه صاحي

لولي: بكره الأربعاء عيد ميلادك إنتا وماما

أنا: يااااه؛ طيب أخد دش وأنزل الشغل 🤣؛ قال عاوز هدية إيه؛ أنا عاوز أعيش في سلام

I just want to live in peace

لقد هرمنا وبقينا نتكلم زي أبهاتنا وكنا بنستغربهم وإحنا عيال إزاي معندهمش حماسة إن عيد ميلادهم جه؛ أهو يوم زي باقي الأيام 🤣🤣... العيد فعلا لو سابونا في حالنا غير كده شكليات يا بيه

كم الناس اللي عمالة تبعت لي بشكل شخصي أو بوستات بخصوص الحركة الشمال اللي عملتها NTRA بتاعة لو شغلت التليفون بشريحة مصرية بره مصر لما تنزل مينفعش تسجله...

*️⃣ دي حركة قمة الشمال لإن سهل قوي يعرفوا هل هو لقط الشبكة جوا مصر يعني حد معاه تليفون مقفول فقرر يديه لصديق مسافر يسجله لما يرجع؛ ولا التليفون دا عمره ما لقط من جوا مصر شبكة وكان شغال تجوال.

*️⃣ بس كالعادة الموضوع استسهال؛ المشكلة إنها حركة تضر الافراد بس ومش هتقرب من إمبراطوريات ادخال وتسجيل الهواتف اللي شغالة في مصر؛ اخر الحركة دي تنكد علي شخص لقي تليفون عليه ضريبة فقالك يشيلها ؛ بس الحيتان في أمان.

*️⃣ مش فاهم ليه مصر بتعيد اختراع العجلة؛ يا أخي دا حتي الغشومية ليها كتالوجات؛ يا عم مش احنا وتركيا حالياً صحاب وحبايب وحتي هنشارك في مشروع المقاتلة الشبحية التركية؛ طيب ما نستلف منهم منظومة الهواتف؛ دي بقي غشيمة بس مش هطلة؛ وفي فارق بين الغشومية والهطل.

*️⃣ يعني ببساطة لو اخدت السيستم التركي وطبقته فهنا التليفون اللي اخد اعفاء جمارك هو فعليا مأخدتش اعفاء بل اخد استثناء؛ يعني التليفون مقفول شبكة لكن في استثناء حصري ليك انتا؛ لو حطيت شريحة بالرقم القومي بتاع الشخص اللي سجل في الجمرك؛ هيشتغل؛ أي شريحة تانية هيقف.

*️⃣ وبكده يا سيدي من ناحية الناس خلاص أجهزتها شغالة ولو جايب تليفون لاخوك اختك اقارب درجة أولي سهل تتحايل وتديهم شريحة باسمك؛ لكن مش هينفع تكون جايبه بيزنس لانك مش هتدي الغريب شريحة باسمك 🤣 فكده حليت الازمة وبرضك ضربت تجارة تهريب الهواتف.

*️⃣ لكن تروح تخلي ناس جابت تليفون طبيعي وحطت شريحتها المصرية علي ما تنزل مصر؛ هوبا تليفونها دا بخ؛ يا صلاة النبي؛ يعني لو انتا مسافر عمرة ولا روحت دبي وفكرت تجيب تليفون جديد مفروض الجديد دا تسيبه في كرتونته لغاية ما تنزل؛ ولا تخيل موبايلك وقع اتكسر وانتا بره مصر؛ اشتري موبايل واشتري شريحة وارمي المصرية لغاية ما ترجع عشان مينفعش تحطها في التليفون... ايه العبط دا

*️⃣ ولا عبط ليه صحيح؛ ما نترا اعلنت انها بقت 2 أكبر هيئة اقتصاديا ارباحاً في مصر بعد ما كانت رقم 5؛ مهي بتفرض رسوم علي كل تليفون؛ وبتفرض غرامات على شركات الاتصالات عشان شبكتهم وحشة؛ اه الشبكة وحشة عند المستخدم فنترا تاخد فلوس غرامة ليها هي 🤣 مش تغرمهم دقايق وانترنت لصالح المستخدم؛ احنا ناخد سوء الخدمة وهي تاخد فلوووووس. فيا تري من مصلحتها سوء الخدمة تخلص؟؟؟

الحلزونة ياما الحلزونة

*️⃣ دلوقتي الحكومة عندها هدف وهو السيطرة عالتضخم ⬅️ الفايدة تقل ⬅️ بند خدمة الدين يقل.

*️⃣ عشان تعمل دا مش بتزود ولا بتبيع الكهرباء ولا البنزين ولا الغاز بسعرهم الحقيقي ⬅️ تستلف فلوس عشان تدعم القطاعين دول ⬅️ خدمة الدين تزيد.

*️⃣ فالحكومة تقولك خلاص هزود سعر الكهرباء والبنزين ⬅️ هقلل القروض اللي بستلفها عشان احطها ك دعم ⬅️ رفع سعرهم هيزود الأسعار ⬅️ التضخم هيزيد ⬅️ الفايدة مش هتنزل ⬅️ خدمة الدين هتفضل عالية 🤣.

*️⃣ حلزونة بنت لذينا ملهاش حل هتجيبها كده تجيبها كده هي كده؛ حلزونة الطاقة بلا حل... والمشكلة انها مرتبطة بسعر البرميل والدولار والغاز العالمي فلو زادوا تزيد المشكلة.

بيبهرني اللي يخش يقولي أنا مش بستخدم الذكاء الصناعي عشان هو بيهبد؛ وخد بالك من الهبد ويدني نصيحة كإني مش بشوف الذكاء الصناعي وهو بيهبد.

*️⃣ مهو ألف باء مخ بقري كندوزي هو إنك توقف كل معلومة داخله تبص بصه عليها؛ تشوفها من الفيسبوك تشوفها من أبو الاشتات تشوفها في بوست لبن سامي؛ بص بصه على أي معلومة أو خبر يعدي عليك قبل ما تدخله مخك.

*️⃣ وإلا هتلاقي عبط كده يعدي عليك؛ كنت مديله شوية داتا يحللهم واخدت النتيجة لقيتها مش هي اللي في بالي؛ مهو لازم يكون في بالك رقم قريب وتستخدم التقنيات للوصول للأدق؛ لقيت رقم غريب فراجعت وراه الخطوات لقيته جامع لي كده 🤣🤣🤣 لا وفضل يقاوح معايا كمان 😆.

*️⃣ هل معنى كده إنك هتبقي فله ومفيش حاجة هتخدعك؛ لا خالص هتتخدع برضك ويخش مخك معلومات مش دقيقة؛ بس ميبقاش كل من هب ودب يضحك عليك... يعني شايف حد مشهور كبير في السن فتقول للشات هو مواليد سنة كام؛ في بالك هيكون موالي 40s او 50s فتلاقي الشات يقولك 1920؛ أكيد دي متضحكش عليك؛ لكن لو هو مواليد 1955 والشات قالك 1958 فهنا تخدعك؛ عادي بس يقولك دا فوق 100 سنة وتصدق... هي مصر بتستورد بكام؛ في بالك رقم 80-90 مليار دولار؛ يقولك 85 تصدقه ويطلع 95 مليار ماشي... بس يقولك 30 تصدق كده الخلل منك.

كده وضحت 😁 سامعني يا شات يا أبو 45 المجموع قال.

يااااه لقد هرمنا؛ بنك CIB ضاف منظومة التحويلات الفورية IPN في الابلكيشن بتاعه؛ يااااه أخيرا حصل بنك اسكندرية ومصر و القطري.

*️⃣ للي مش عارف أو متخلبط ف IPN هي منظومة التحويلات الفورية اللي أشهر تطبيق ليها هو انستاباي؛ لكن دي منظومة تحويلات والبرنامج بتاع انستاباي بيستخدمها... البنوك المحترمة بتضيفها في برامجها فتقدر تحول لحظي من برنامج البنك مش لازم انستاباي.

*️⃣ لسه منعرفش حدود التحويل بتاعة CIB لكن أظنه هيعملها 500 ألف يومي و 5 مليون شهري غالبا أو 10 مليون شهري مش عارف؛ ودا طبعاً مقارنة ب 400 ألف شهري انستا باي.

*️⃣ أخيراً بنك CIB بيطور وعقبال ما يعبر الشركات ويبطل موقعه ياخد إجازة في الجمعة والسبت ونقدر نعرف تحديث رصيد الشركة أونلاين بالإجازات بدل ما موقع البنك بيقفل الخميس اخر النهار ويرجع يحدث الرصيد يوم الأحد 9 الصبح ونعرف ايه تم بالإجازة 😂😂. ما انتم شركات عاوزين تعرفوا رصيدكم ليه جمعة وسبت؟ روح الماكينة شوف رصيدك متقرفناش.

الحمد لله في شوية شاحنات بدأت تدخل للقطاع؛ عشان بس نتخيل مدى احتياج القطاع فأعرف ان الانسان العادي محتاج أكل في يومه 1.5 الي 2 كيلو؛ فلما تفكر في 2 مليون وربع فدا معناه محتاجين يوميا عالأقل 3500 طن من الأغذية غير الزيوت والأدوية والملابس وو.

*️⃣ وعادة الشاحنة تقدر تشيل 50 طن من الأغذية والرقم يقل لو حاجات خفيفة زي الدواء وو؛ حتى الأخبار اليوم طالعه دخول 100 شاحنة فيهم 1200 طن يعني 12 طن للساحنة الواحدة... الرقم لما تبص له بالطن تقول ياااه 1.2 مليون كيلو أكل؛ لكن لما تعرف ان البشر الطبيعيين هنا في العادي محتاجين 3.5 مليون كيلو يومي أكل فقط؛ يعني عالأقل 5000 طن متنوع يومي يدخل؛ يعني لو حسبنا متوسط وزن الشاحنة 20/30 كيلو فدول عاوزين يومي بشكل دائم 150 شاحنة عشان الحياة العادية.

*️⃣ دول بقي مش في وضع عادي؛ دول تحت الصفر يعني احتياجهم يفوق العادي؛ يعني عشان يعيشوا محتاجين يومي 200+ شاحنة.

*️⃣ اتمني يكونوا اتفقوا عالاعداد دي ونشوف كل يوم بال 150 و 200 شاحنة يدخلوا؛ والا يبقي الموضوع هو اقرب للمحافظة على الحياة مش أكثر.

*️⃣ حبيت بس بالبوست دا أفكر بشكل براجماتي رقمي عشان بعض الكائنات ممكن تستغل دا وتنفض يدها وتقول دخل اهو مليون كيلو ولا 2 مليون... حبيب بس أوضح مدى الاحتياج الطبيعي وكل دا بنتكلم في الطبيعي لناس طبيعية وهم أبعد ما يكونوا عن الوضع الطبيعي؛ دي ذرة رماد؛ إنسان بيموت من الجوع فدخلت ايده رغيف عيش صغير وكوباية ماية واحدة؛ مش هتشبعه ولا هتكفيه بس هتخلي موته من الجوع ابطئ 😔.

ربنا معاهم؛ ويرحمنا يوم القيامة من السؤال والمحاسبة عنهم 😔

من صغري وأنا عندي قناعة تامة إن مصر بلد كبيرة؛ احنا مش زي أي بلد تانية حولينا؛ إحنا مصر... كبرت شوية وقصص نبيل فاروق بقى رجل المستحيل وملف المستقبل غذت الشعور دا... كبرت أكثر وحبيت التاريخ ولقيت إن فعلياً مصر مؤثرة جداً في مسار التاريخ سواء القديم أو الحديث وكل الصعود والهبوط في التاريخ الإسلامي كانت برضك مصر مؤثرة فيه

*️⃣ عشان كده بتعصب قوي قوي قوي لما أشوف بوستات بتقارن مصر بقطر مثلاً وتقول يعني قطر عملت ايه اشمعنى احنا؟... نعم حضرتك أنتا بتقارنا إحنا مصر بقطر؟ بتقارن مصر بالإمارات؟ المغرب تونس الخ الخ... هما دول كويسة ومعنديش مشاكل معاهم بس إحنا مصر إحنا الكبير... عارف يعني ايه الكبير؟!!!

*️⃣ في كل شلة أو عيلة كبيرة أو قبيلة حتى بيكون في شخص هو "الكبير"؛ مش شرط الكبير دا يكون أغنى واحد لكنه بيكون في الكبير وهنا ييجي السؤال يعني ايه الكبير؟

*️⃣ الكبير هو الشخص اللي عليه مسئوليات وبرضك ليه حقوق؛ أي حد بيتضرر أو عنده مشكلة مش بيروح يتصل بأغنى واحد لإنه كثير بيكون "الندل" بل بيروح ل "الكبير" لإنه هيقف معاه لو كان ايه الوضع... مريض هتلاقي الكبير معاك؛ يا أخي لو روحت فجأة على بيت الكبير هتلاقيه بيستقبلك ويرحب بيك ولو معندوش غير أكلة واحدة هيدهالك وهو ينام من غير عشاء لإنه هو الكبير؛ حاسس إنه المسئول.

*️⃣ الناحية الثانية برضك الكبير دا كلمته بتمشي عالجميع؛ غني فقير صغير سن كبير السن؛ محدش يقدر يرد له كلمه ولا حد يقدر ياخد خطوة كبيرة بدون ما يشور الكبير فيها. يعني من الآخر الكبير مواقف ليه وعليه... دا هو الكبير ودي كانت مصر دائماً.

*️⃣ بقول كانت عشان بلاقي الناس مبقتش خلاص مقتنعة إن مصر الكبير؛ اه المصريين نفسهم مش بتكلم عالسياسة لا الشعب؛ تلاقيهم يقولوا ليه الناس تلجئ ليا ما يروحوا لغيري؛ ليه أنا أساعد ما غيري يساعد؛ ليه أنا أعمل ليه أنا أسوى... حضرتك انتا الكبير؛ مش عاوز مسئوليات الكبير؟ خلاص تمام بس خد بالك المسئوليات لو مشيت مش بتمشي لوحدها.

*️⃣ الحقوق كمان بتروح؛ تفتكر مصر لما بتمر بأزمة ليه كانت الدول بتقف معاها؟ الأفريقية والعربية؟ ليه بعد حرب 67 السعودية نسيت الخلافات ووقفت معانا؛ ودي مش خلافات عادية دي كانت شبه حرب بينا في اليمن؛ الاقتصاد المصري لما كان بيحصله مشكلة ليه بيقفوا معانا؟ الموقع الرسمي للحكومة السعودية بيقول إن أكثر بلد في الكوكب السعودية أدتها مساعدات هي مصر بقيمة 32.5 مليار دولار... طيب ليه واشمعنى احنا؟

*️⃣ الإجابة عشان أنتا الكبير؛ مصر كان ليها أفضال عالجميع فالناس بتردها لمصر بشكل أو بآخر؛ طب يا ترى الاقتصاد الأردني لما يبقى في أزمة هل بيخشوا يعملوا مشروعات ضخمة وينقذوه دي مصر؟ التونسي اللبناني؟ طيب الاتحاد الأوروبي ليه حالياً بيعمل برنامج دعم الاقتصاد المصري ب 10 مليار يورو؟ عشان عندها لاجئين كثير وصعوبات بنواجهها.

*️⃣ فالمعادلة هي هات وخد؛ لو مصر بقى قررت تتقوقع على نفسها؛ مليش دعوة بحد ومش هقف مع حد ومحدش ييجي لي؛ تفتكر بقى لو بقينا زي تونس ولا المغرب متفرج عالأحداث؛ تفتكر وقتها لو وقعنا في حد هيقف معانا؟

*️⃣ عارفين الموضوع واصل لفين؟ لإن المصريين نفسهم بقوا مش مقتنعين إننا دولة كبيرة؛ بوستات تقولك لو مصر كانت دخلت شوية مساعدات بدون موافقة إسرائيل كانت إسرائيل هتضربنا؛ ياخي تيت يضربوا مين؟ انتا فاكرنا لبنان ولا العراق ولا سوريا عادي كده يكونوا قاعدين في قعدة في تل ابيب فيقولوا ما نضرب مصر يلا بينا؟ أنتم للدرجة دي مستقلين بمصر؟ انتم المصريين مستقلين بمصر وشايفين إن عااادي خالص أي حد ياخد خطوة إنه يحاربك؟

*️⃣ دا إيران الهطلة اللي لا عندها دفاع جوي ولا سلاح جو ولا بحرية طلعت عنيهم أومال إنتا ايه؟ انتم متخيلين حرب معانا سهلة؟ دا لو طلقة مدفع اتضربت مننا عليهم أو العكس عادي جداً الدولتين يقعدوا مع بعض وتتسوى وميحصلش حرب. بقولك طلقة مدفع مش كيس دقيق؛ هيحصل شوية شتيمة واسحب السفير واحتج وبعدين تسوية من تحت لتحت والموضوع يتقفل ونرجع السفراء لبعض تاني.

*️⃣ والموضوع مش عمالة أحسن كلامي يتفهم غلط لكن عشان الحرب معاك موضوع كبير محتاج سنين تخطيط وتجهيز وهما أصلاً شوية رجالة بصنادل مطلعين عين أبوهم فما بالك بحرب شاملة مع دولة زي مصر.

*️⃣ أنا مش قادر أفهم الناس اللي عايشة في دور الوطنيين فعشان يثبتوا إنهم وطنيين يروحوا مقللين من مصر... شوية يقارنونا بدول أصغر من حي في مصر وبعدين يقولوا احسن إسرائيل تضربنا ووو... كده أنتم مفروض وطنين وقوميين؟ أومال لما تكونوا معاديين للبلد دي هتقولوا ايه؟

*️⃣ مصر بلد كبيرة بلاش تصغروها؛ بلاش تعاملوها إنها مش الكبير وتقولوا دور الكبير مش عاوزينه إحنا عاوزينه؛ لإن كرسي الكبير لو اتاخد منك مش هيرجع تاني؛ خاصة إن اللي عاوز ياخده منك نفسه فيه من زمان؛ ودلوقتي بيصرف مئات المليارات عشان يرسم دولته إنها الكبير للمنطقة دي؛ فبلاش احنا نساعده. لإن وقتها هتبقى اديته هدية على طبق من ذهب؛ وقتها متسغربش لما تلاقي كل شيء بيتم في المنطقة بدون علمك؛ ما انتا اخترت متبقاش الكبير يبقى ناخد رأيك ليه ما هنكلم الكبير بتاع المنطقة وهو هيقولك.

*️⃣ مصر الكبير ولازم تفضل هي الكبير متقللوش منها

في ما يقارب 6-8 مليار دولار دخلوا مصر هوت ماني خلال شهر يوليو؛ كم الفلوس الرهيب دا هو سبب هبوط الدولار المستمر؛ الفلوس دخل جزء (3.3 مليار دولار) من السوق الثانوي والباقي من السوق الرئيسي.

*️⃣ السوق الرئيسي لا يعلن فيه ع الأقل لينا نسبة الأجانب لكن مصر اقترضت 1074 مليار جنية خلال شهر يوليو ودا اعلي شهر اقتراض في تاريخ مصر كلها؛ سددنا بيهم 436 مليار جنية اذون وسندات خلصت مدتها يعني فعليا اقترضنا 638 مليار جنية؛ الرقم دا لو ربعه من الهوت ماني يعني هيعدي ال 3 مليار دولار.

*️⃣ الهوت ماني بيدخل مصر عن طريق المؤسسات؛ مش مؤسسات صغيرة لا احنا بنتكلم عن سماسرة ديون كبار زي جولدمان ساكس اللي قال الجنية اعلي من قيمة 30% يعني الدولار مفروض ينزل؛ و سيتي بنك و HSBC وغيرهم؛ مؤسسات عندها أجهزة استخبارات مالية عالمية.

*️⃣ المؤسسات دي مش هتخش مكان وهي متوقعه الغدر يعني يحصل تعويم يخزوقهم؛ ولا يخشوا دولة هما متوقعين ولو 1% انها في مؤامرات ولبش حقيقي؛ هما بيعرفوا يفرقوا بين الشو الإعلامي لزوم الاستهلاك المحلي والجعجعة وبين القلق الحقيقي؛ دي مؤسسات بتدير ترليونات حول العالم وحطت في مصر ارقام ذات 10 أصفار بالدولار.

*️⃣ اللي منتظر وشايف تعويم والدولار ب 60/70 ربنا معاك؛ واللي شايف ان في مرحلة عصيبة ومؤامرات صعبة وخطر محدق مدمر فدا ربنا يشفيك؛ علي علوكا عالفيسبوك شايف الخطر؛ ومؤسسات دولية بتدفع عشرات المليارات وعلى علاقة بالبنك الدولي وصندوق النقد والمخابرات الأمريكية للأسف معندهاش المعلومة اللي عند زعبولة القلة. غالبا عشان هما بيشتغلوا مش فاضيين للفيسبوك.

⬅️⬅️ الخلاصة: الوضع مستقر؛ الدولار بيدخل حالياً وبكرر حالياً بشكل يفوق المستهلك؛ الوضع تحت السيطرة اقتصادياً وأمنياً وسياسياً وكله تمام حالياً وحتى تغير الظروف.... نشوفكم الربع القادم اكتوبر مع زيارة وفد الصندوق؛ قبلها يبقى الوضع على ما هو عليه وعلى المتضرر اللجوء لبوستات الفيسبوك 😁. البلد مستقرة لا تقلقوا 💪

تحديث

⬅️⬅️⬅️ يالهوي يا جدعان أنا مقولتش الدولار هيبقي 35؛ احنا قاعدين في حته 48-51؛ سمسار الديون عاوز زباينه يكسيوا فبيطلع اشاعات انه هينزل ل 35 بس دا فنكوش؛ كل جنية يعني 2% ربح للهوت ماني؛ اللي هو 50 مليار دولار يعني كل 1 جنية ينزل يساوي 1 مليار دولار للهوت ماني لان الجنية ب 2%

لما شوفت شوية فيديوهات عن زلزال روسيا اللي ضرب جزيرة كامشاتكا بقوة 8.7 رختر وعمل تحذيرات تسونامي من اول روسيا لغاية نيوزلندا لفت نظري شيء صافرات الإنذار وافتكرت الحرب الأخيرة وصافرات انذارهم وقعدت افكر هو عندنا ايه يحصل.

*️⃣ يعني بره الدول مشتركة في نظام الانذار بتاع أبل وأندرويد يعني كل التليفونات فيها نت مفيهاش نت كلها هتزمر انذار؛ وصافرات الانذار هتدوي في البلاد؛ فالناس تبقي عارفه ايه هيحصل.

*️⃣ مصر ربنا أنعم علينا معندناش كوارث؛ لا بييجي زلازل مدمرة زي اللي حصلت لروسيا وحصلت لتركيا وايران سابقاً وكبيرنا كان زلزال 5.8 رختر سنة 92 طول شوية في المدة عمل كوارث؛ لكن زلازل 6 و 7 و 8 رختر معندناش؛ ومفيش اعاصير زي اللي بتيجي لشرق وغرق امريكا والصين؛ ومفيش عواصف ترابية حقيقية زي اللي بتيجي للكويت؛ ومفيش براكين ومفيش فيضانات وأمطار مهولة؛ ومفيش حروب حتى زي ولاد ال... جيرانا.

*️⃣ فدا مخلي انذار الخطر عندنا مفيش؛ يعني لو لا قدر الله حصل حاجة ونفترض ضربت صافرات الانذار ان وجدت؛ احنا مش هنعرف مفروض نعمل ايه؛ بجد محدش فينا يعرف اصلاً.

*️⃣ احنا ك ثقافة عامة مش مدربين نعمل ايه؛ لا اسعافات اولية ولا لو حصل زلزال نتصرف كذا ولو حصل كذا نتصرف كذا؛ التدريب دا مهم جدا؛ هو اكيد مش بيمنع القدر والكارثه بتضرب لكن بيساعد علي تقليل الخساير بشكل كبير.

*️⃣ حتي في الأمور البسيطة؛ الاسعافات الاولية؛ يعني لو حصل حادثة نعمل ايه؛ دا لما عربيات بتعمل حادثة الناس بتبهدل المصابين وممكن ضررهم من الناس يفوق الحادث.

*️⃣ الثقافة العامة مهمة؛ دي بتكون بالمناسبة من التعليم؛ يعني في دول بتدرسها بالمدارس اصلا بحيث الطفل يكبر فاهم يتصرف ازاي في اي ازمة؛ تفتكروا وزير التعليم هيضيفها في البكالوريا والتوجيهية اللي بيعملهم 😂😂😂

أنا في حد زمان قالي إن الناس بتستخدم الذاكرة في القراءة؛ إن المخ البشري كسول فبيحب يخمن من الذاكرة؛ بيعمل زي جوجل كده ويكمل تكتب له بيوت فيروح متفلحس ويقولك بيوت دعارة؛ تكمل تقوله بيوت باي او بيوت دوت كم يا عم 😁... أهو أنا البوست بتاع إمبارح شوفت دا كثير قوي.

*️⃣ الناس قرأت وعملت مع نفسها اكمال تلقائي؛ وكله من نوعية الاكمال بتاع بيوت الدعارة دا؛ اكمال تلقائي شمال 😂😂... تلاقي حد يقولك ازاي تقول الوضع كويس؛ أروح للبوست اشوف أنا كتبت كلمة كويس؛ ملاقيش اني قولتها؛ بس هو الاكمال التلقائي عنده كملها كده ودخل يتخانق.

*️⃣ حد تاني يقولك مستحيل نستمر وهنقع في 2027؛ يا عمي دا انا كاتب كذا مرة في البوست حاليا حاليا حالياً... يعني دلوقتي.... وبعدين كاتب نلتقي في أكتوبر؛ هي اكتوبر دي السنة الجاية ولا بعد شهرين عشان يقولي 27 و 28.

*️⃣ مجموعة ثالثة بقى أخدت إني بقول إن دا قرار سليم وماشيين صح ويهاجموني إزاي بقول دا صح؛ أروح أدور ملاقيش إني كاتب كده؛ أنا قولت قرار سليم؛ أنا أشدت بيه فين 🤔؛ يعني هكون بقول أكبر شهر اقتراض في تاريخ مصر؛ صح ايه بس 😂😂.

*️⃣ فريق كمان يقولك الهوت ماني مش بيعمل استقرار مستمر ولما يخرجوا هنقع؛ يا عمي هو أنا قولت انه استقرار للأبد؟ دا أنا قايل حاليا؛ هي كلمة حالياً دي شفافة 😂 محدش شافها رغم اني كررتها.

*️⃣ ومجموعة أصدقاء ودول ناس أفاضل وأساتذة كبار أخدوا فقرات بالمعني الحرفي اللفظي؛ يعني لما قولت المؤسسات الدولية عندها استخبارات فهموها انها جواسيس حرفياً وتخش المؤسسة تلاقي مكتب التجسس الدور الثالث كده؛ دي كناية عن العلاقات الشمال؛ دي مؤسسات شغالة في عالم 3 يعني في ناس بتسرب لهم معلومات وشغل من تحت الترابيزة وفساد؛ أو الدول بتقول معلومة لصندوق النقد وهو يباصيها لهم؛ دا انتا عومت وفي نفس اليوم الهوت ماني كان بيدخل وبيشتري؛ ايه عرفوا منين 😁؛ متبلغين؛ دي مش هتتعرف بمراكز الأبحاث؛ دي بتتعرف بالتليفون.

⬅️⬅️⬅️ يا جدعان اقفلوا خاصية الاكمال التلقائي واقروا البوست كما هو 😂 وكل حرف بيكون مقصود؛ لما اقول حاليا مقصودة ولما اقول اكتوبر مقصودة... متخمنوش قصدي.

*️⃣ عالعموم يلا بينا لايف الساعة 9 كمان مرة عاليوتيوب نكمل خناقات بقي عن الهوت ماني والدولار 😂😂😂؛ لسه هعمل لينك للايف بس هو هيكون في القناة اشتركوا فيها وهسيب اللينك لي التعليقات

الساعة 9 نطلع الايف

https://youtube.com/live/14W6C5ti1tw?feature=share

الصورة دي تعبر عن أكبر تحدي هيواجهه مصر السنوات القادمة؛ قطاع البترول والطاقة.

*️⃣ وللتوضيح الأرقام دي الرسمية من البنك المركزي وهي صافي التصدير والاستيراد؛ رقم 24/25 دا تقديري لإن اعلن بس 9 شهور؛ ورقم 25/26 توقع شخصي مني من حجم الاتفاقيات والاستيراد وو

*️⃣ دلوقتي مصر عندها مشكلة لإن الغاز في أقل معدلاته من قبل ظهر والبترول في أقل مستوى من عصر السادات؛ لكن وزارة البترول بتوعد باكتشافات كبيرة معرفش إزاي بس ربنا يكرم إن شاء الله عشان البترول والغاز وعدم قطع الكهرباء بقي بند محتاج شهري 2 مليار دولار غير باقي الدولة.

⬅️⬅️ يلا الناس اللي شتمت امبارح تبدل الدور مع الناس اللي فرحت إمبارح 😁

صباح الخير

الحكومة تعلن رفع أسعار الغاز على المصانع اعتباراً من اليوم وتطالب المصانع بخفض الأسعار على المواطنين 😂

انتهى الخبر الفكاهي الحقيقي

كنت قريب في أحد المطارات في لاونج منتظر طيارة مصر؛ المهم في مشهد لفت نظري في ترابيزة جنبنا وهي ست مع بنتها اللي يمكن 15 سنة او الرينج دا؛ البنت قاعدة باصة في الموبايل والأم رايحة جايه حولت أكل ليها ولبنتها وبعدين جت تدوق الاكل لقيته ناقص ملح او فلفل حاجة كده راحت جابت ورشت لنفسها وبعدين سألت بنتها عاوزة.

*️⃣ البنت مرفعتش عنيها من الموبايل وقالت (توء) بدون ما تبص حتي لأمها؛ الموضوع مستفز قوي؛ عارفين أنا لو كنت عملت كده كع والدي الله يرحمه كان زماني أخدت كف بقيت بوستر عالأرض.

*️⃣ مرة سنة 2003 كنت مروح أنا وأخويا من النادي وبابا كام في البلكونة المهم طلعنا عشان كان معاد مسلسل بنشوفه؛ دخلنا وبابا نده علينا؛ روحنا له قالنا انتم شوفتوني في البلكونة وانتم جايين صح؟ ومحدش بص لي وقالي عاوز حاجة يا بابا قبل ما تطلعوا ليه؟ مستعجلين عشان التلفزيون صح... وهنا بابا طلع أقسى عقوبة في حياتنا كلها ومش الضرب.

*️⃣ ممنوع الموبايل (كان لعبة snake و sms) وممنوع التلفزيون وممنوع الكومبيوتر وممنوع تليفون البيت وممنوع النزول غير لشراء حاجة لماما وممنوع نطلع البلكونة حتى؛ نقعد أسبوع في البيت وشنا في وش بعض... أنا كنت محب للقراءة فمتضررتش قوي بس كنت بزهق برضك؛ أعمل أي حاجة زهقت... عارفين العقوبة دي استمرت اد ايه؟ أكثر من أسبوع لغاية ما زهقنا واعتذرنا كثير فقرر بابا العفو عننا.

*️⃣ دلوقتي التربية الحديثة يقولك ابنك دا صاحبك يناديك باسمك ويحط رجل علي رجل قصادك (في الثقافة الغربية عادي الرجل علي رجل بس الشرقية لا)؛ عادي يعني مفيش تكليف دا أبوك ولا أمك يعني بلاش تعقيد شوفوا الغرب ناجح ازاي اجتماعياً وقلدوه برافو عليكم 😂😂...

*️⃣ بالنسبة لي دا تخلف الأب أب والابن ابن؛ اه ابني ممكن يحكي لي لما يكبر وثقة ونلعب ووو لكن هيفضل ابني يعني لما اكلمه يبص لي ويقعد قدامي باحترام والا هسحقه؛ ومش لازم بالضرب ما بابا ياما ضربنا بس اكثر عقاب فاكره لما اتعاقبنا بال (ولا حاجة) نقعد 10 ايام مربعين من الصبح لبالليل؛ اضرب يا عم ارحم من الولا حاجة؛ عقاب الملل 😂😂.

*️⃣ عيل مش بيظهر أي احترام لأبوه فما ادراك بالغريب والمجتمع والآخر؛ حاجة تقرف من ساعة ما سمعنا عن التربية الملزقة دي وابتلينا بالاشكال اللي في الشوارع وكل مكان وناس ملهاش كبير وعيال مبتحرمش حد ومبتكبرش حد. أومال بتسغربوا ليه في المواصلات تلاقوا عيل 16 سنة قاعد وفي راجل 60 سنة واقف؛ احنا تربينا علي احترام الكبير؛ هما تربوا ان الكل زي بعضه وكبير على نفسك.

*️⃣ طبعاً هيطلع لي شلة في التعليقات تقولي ان تربية الطبقية الهايركية الشرقية دي متخلفة والفردانية الغربية أحسن... براحتكم بس أنا لن اعترف بدا؛ معلش أنا قديم من المتخلفين.

هو بمناسبة تصريحات إن رسوم ترامب فرصة لمصر عشان رسومنا 10% أقل من دول كثير زي الصين والهند وبنجلاديش وفيتنام والبرازيل ومش عارف مين فدي فرصة لمصر عشان تصدر لأمريكا وتجيب الشركات الاجنبية تفتح عندنا عشان يصدروا لأمريكا بجمارك مخفضة

*️⃣ بما إن طبيعتي بقي باحث عن الخوازيق في الحياة فليه محدش اتكلم عن الدول دي هتعمل ايه في انتاجها؟يعني كان عندهم سلع بتروح أمريكا؛ دلوقتي أمريكا قفلت قصادهم فمحتاجين بديل يسوقوا فيه منتجاتهم؛ دول فيها كثافة سكانية عالية وأنطمة مفيهاش حماية ضد الاغراق ووو... هل إحنا مستعدين وهنراقب الدول دي وتصديرهم لينا ونحمي الصناعات الوطنية... مهما مش هياخدوا انتاجهم يرموه في المحيط؛ هيسوقوه بخصومات لدول عالم 3 ويدمروا صناعاتها...

معلش طبيعتي الخازوقية بقي 😂 لكن فعلاً لازم ناخد بالنا عشان ممكن نلبس