قولت شكل التطورات سريعة روحت ناشر الفيديو

الفيديو هدفي فيه نفكر في السؤال الشهير وهو ليه كل ما يحصل خنافة في العالم الجنية... اذا تعثرت دابة في العراق ارتفع سعر صرف الدولار في مصر 😂... فليه بقى؟ ايه هيحصلنا أو تأثير الحرب علينا ايه.. احنا لا في مرمي صواريخ ولا حد جاب سيرتنا من قريب أو بعيد.

مش هطول عليكم؛ الفيديو دردشة وحكاوي كده

https://youtu.be/aM3F56WO0mY

على فكرة، إيران بتعمل الفيلم بتاع ضرب القواعد ده عشان الليلة دي ماتش الأهلي، ودي مؤامرة علينا ضمن سلسلة المؤامرات الكونية على مصر 😁 لإننا الوحيدين اللي صامدين.

فكرة كأنك فلوطة الزعبوطة الـ... احم احم؛ مكتشف المؤامرات الدولية وخطط أجهزة الاستخبارات من على كنبة الأنتريه.

خبر وتوضيح ورأي؛ بوست كومبو عالسريع

1️⃣ الخبر:النهاردة بعد نهاية الحرب وإنهم اتفقوا خلاص فركش؛ حصل نزول مفاجئ للدولار في مصر ورجعنا 50 جنية؛ الغريب هو إن النهاردة عاد الهوت ماني للخروج من السوق الثانوي ب 10.4 مليار جنية أي 207 مليون دولار بعد هدوء خميس واحد واثنين... المنطقي كان يتحرك الدولار صعود اليوم بس احنا عاوزين كده المرونة بقى... يمكن يكون في دخول فلوس للسوق الرئيسي؛ محدش يعرف بس أهو دا اللي حصل.

*️⃣ عامة هو واضح إنه خلاص المنطقة هتهدى معرفش إزاي بس الظروف بقي؛ وأهو الدولار نزل والذهب نزل والبترول نزل وكل سنة وانتم طيبين نشوفكم الخناقة الجاية.


2️⃣ التوضيح: يا بن سامي هو خلاص انتهي عصر الكتابة بتاعك وهتعمل فيديوهات بس؟؟؟ دا السؤال اللي بييجي لي كثير مع كل فيديو؛ وصراحة الأسابيع الأخيرة الكتابة قلت بس دا حتى من قبل الفيديوهات؛ الموضوع نفسي أكثر؛ يا جماعة أنا بكتب عشان بحب الكتابة؛ أيوا هو دا عشان كده لما بقعد اكتب بوست طويل عريض ومحدش يعبرني فيه مش يزعل ولا بوقف كتابة لإني بكتب عشاني.

*️⃣ بالنسبة للفيديوهات فبغض النظر اني مش شاطر لا مونتاج ولا حركات بس أنا اكتشفت حاجة إني اقدر ارغي براحتي؛ أول إمبارح نزلت فيديو اشرح فيه الاقتصاد المصري ودخله الدولاري ونفكر هو أي خناقة أو حرب في الكوكب بتأثر علينا ليه؛ يعني فكرة لو تعثرت دابة في العراق لزاد سعر صرف الدولار أمام الجنية 😅 دي سببها إيه.

*️⃣ المهم بقي الفيديو دا عملته إزاي؛ الكاميرا حطتها واتكلمت 19 دقيقة متواصل بدون اسكربت بدون نقاط مكتوبة؛ رغي متواصل وبعدين حطيت فوق ال 20 صورة توضيحية فوقه... تخيلوا بقي هكتب بوست افقط فيه كلامي رغي ثلث ساعة هيبقي شكله إيه؟ 🤔🤔 عامة هجرب اعيد تعديل الفيديو واخليه عام أكثر مش بس حرب زي بتاعة إيران وانشره خلال الايام القادمة...

⬅️ اللينك بتاع الفيديو هحطه في التعليقات برضك.

3️⃣ الرأي : الناس مستغربة طريقة إنهاء الحرب؛ الموضوع تقليدي جداً علي فكرة؛ الحروب بتكون إما طرف علم جامد عالطرف الثاني وسحقه زي حرب الهند باكستان 2025 أو حرب قره باغ الثانية 2020؛ طرف علم عالطرف الثاني فخلاص اتفاق هدنة صريح.

*️⃣ النوع الثاني من الحروب هي الحروب الأزلية؛ مفيش طريقة طرف يقدر يخلص ع الثاني؛ محدش هيقدر يحسمها فدي بتخلص بالشكل دا؛ الطرفين يتفقوا تقف فجأة؛ ممكن معركة طرف يكسب فيها وبعدين خلاص شكراً زي معركة قادش التاريخية بين جيش رمسيس الثاني والحيثيين؛ الحيثيين سيطروا علي قادش ومناطق تبع رمسيس فخرج لهم؛ نظرياً يعتبر كسب في الحرب بس مقدرش برضك ياخد المناطق منهم... نفس الحكاية حرب ايران العراق؛ قعدوا 8 سنين يضربوا بعض وخسروا مليارات ومئات الالاف من الشعب وبعدين الناس صحيت في 1988 لقت الحرب خلصت.

*️⃣ الدولتين عبر وسطاء بيتفقوا علي الختام؛ انتا تضرب وهو يعمل رد عبيط وخلاص شكراً.. لو فاكرين اكتوبر 2024 وقت ما ايران واسرائيل قعدوا يضربوا؛ بعدين ايران ضربت ضربك صاروخية كبيرة وثاني يوم اسرائيل ضربت ضربة طيران عبيطة قوي ووقفوا... هي بتخلص كده؛ طرف يضرب جامد والثاني يعمل رد شكلي؛ فالاولاني ضارب جامد وقصاد شعبه مخلص؛ والثاني اهو اخر واحد ضارب يا سيدي... كله متراضي...

*️⃣ الحرب تقف والطرفين يقولوا احنا كسبنا؛ الطرف المضروب اكثر بيكونوا قايلين له هتاخد تعويض ما؛ لسه مش واضح ايه التعويض اللي ايران هتاخده بس لو تابعتم الاخبار فأمريكا شالت يعتبر حظر استيراد البترول من إيران واعلنت السماح للصين باستيراد منها؛ من شهر امريكا عملت عقوبات علي اي حد يستورد من ايران ودا عمل مشكلة للعراق عشان معتمدة عالغاز الايراني؛ دلوقتي إيران هترجع تشتغل أهي؛ متقوليش صدفة ولا حنيه؛ دا أكيد اتفاق تعويضي.

*️⃣ فكرة بقي إن ايران واسرائيل وامريكا اتفقوا يدمروا الاقتصاد الإسرائيلي ويرفعوا سعر البترول 15 دولار يعني يكلفوا الكوكب يومي فوق المليار دولار عشان يضحكوا على مواطن في دول عالم ثالث قاعد عالانتريه بيلعب في صوباع رجلة... حضرتك انتا الكوكب مش شايفك أصلا؛ يمثلوا عليك ليه ما لو عاوزين منك حاجة هياخدوها؛ بعدين الموساد وال CIA هيعملوا خطة وعم بهاليلو هيعرف خطتهم 😂😂 طيب الخطة اللوزعية دي مين المستهدف منها لما العبيط عرفها؟ خطة فهمها كل الناس فدي هيعملوا ايه بيها؟

*️⃣ بالمناسبة من أسبوع بعت لصديق بقوله الحرب هتخلص قريب يا تري هتخلص فجأة ولا يفضلوا يخفضوا الضرب لغاية ما يقف خالص... اه الموضوع كوميدي بس دا السيناريو التقليدي لانهاء الحروب وقفلها او ايقافها.

تصبحون علي خير واللينك بتاع الفيديو في التعليقات.

والله ومشاكل الزمن بقت تاخدنا وبقي يوم 25 يونيو هيعدي بدون ما اكتب بوست وأقول فيه كان هيبقي عيد ميلادك ال 70 اليوم يا والدي بس انتا اخر عيد ميلاد حضرته معانا كان ال 50 😢.

في يوم من الايام هيتكرر دا مع عيالي وهينسوا يوم ميلادي عشان بس فات 20 سنة على وفاتي زي ما حصلي مع والدي 😓😢😢

ربنا يرحمك

تجربة جديد وهي إني صورت فيديو وكتبت البوست مع بعض؛ الموضوع اتأخر يومين عشان مشغول بس أهو أن تأتي متأخراً خير من ألا تأتي 😁... فاللي مش عاوز يقرأ هيلاقي لينك الفيديو في التعليقات واللي حابب يقرأ خلاص زي الفل. وعاوز أقولكم في حاجات مكتوبة مش متقاله وحاجات متقالة مش مكتوبة 😓😓😓. بس الغالبية موجود

مجلس الشعب إمبارح صوت خلاص على إلغاء الإيجار القديم؛ كده عدت مرحلة ايه مفروض كان يتم والنقاشات دي وخلاص القانون صدر فتعالوا نعرف سوى ايه هيتم الفترة.

⬅️ من المخاطب بالقانون الجديد؟

*️⃣ المخاطب بالقانون هي الوحدات اللي تم اسئجارها من عصر الملك فاروق وحتى صدور قانون الإيجار الجديد في 30 يناير 1996... يعني لو أجرت شقة سنة 2000 بس إيجار قديم (دفعت مبلغ كبير وايجارك ثابت 59 سنة) فعقدك ساري وملكش دعوة بالخناقة دي لإن المالك كان عنده الإيجار الجديد وهو قرر يأجر لك القديم... القانون الجديد ساري الجبرية اللي مكانش في خيار للمالك قبل 1996... فمش كل عقد إيجار قديم هيتلغي.

⬅️ ايه اللي هيتم بالترتيب كده؟

0️⃣ الوحدات الغير سكنية؛ يعني محل كشك مخزن الخ الخ إيجارهم هيزيد يبقي 5 أضعاف الحالي لمدة 5 سنين. السكني بقي ليه تفاصيل كثيرة.

1️⃣ كل الوحدات السكنية في مصر هتزيد من الإيجار التالي لنشر القانون في الجريدة الرسمية إلي 250 جنية يعني نقول مثلاً من إيجار 1 اغسطس (لو) نشر القانون في يوليو هيبقي 250 جنية.

2️⃣ المحافظات هتشكل لجنة لتقييم مناطق المحافظة والعقارات ل 3 تصنيفات وهي مميز ومتوسط واقتصادي. اللجنة دي مفروض تطلع التصنيف خلال 3 شهور بس يجوز للحكومة مد اللجنة 3 شهور كمان يعني نقول هيطلعوا التصنيف حد أقصى يناير 2026. اللجنة مفروض هتدرس الحي السكني والمرافق والقيمة الايجارية الحالية وتوفر المواصلات العامة للمكان وتوفر المدارس ووو وبناء عليهم هيطلع التصنيف لكل مكان.

3️⃣ التصنيف دا ليه؟ عشان يحدد الإيجار هيبقي كام؛ لو تصنيفك فاخر فإيجارك هيبقي 20 ضعف الإيجار اللي كان شغال عندك بحد أدني 1000 جنية... يعني لو الايجار 10 جنية فال 20 ضعف تبقي 200 ⬅️ يبقي هتدفع 1000 جنية... ولو ايجارك 150 جنية فال 20 ضعف تبقي 3000 جنية يبقي هتدفع 3 آلاف جنية دا في حالة المميز الفاخر... بالنسبة للمتوسط والاقتصادي فالإيجار هيبقي 10 أضعاف الإيجار الحالي بحد أدنى 400 جنية للمتوسط و 250 جنية الاقتصادي ويتم دفع الفروقات زي المثال التالي:

*️⃣ دلوقتي نفترض شقة ايجار قديم في مصر الجديدة زي شقة حسني مبارك وكنت بتدفع 15 جنية ايجار قديم زيه فالسيناريو هيكون كالتالي: هتدفع من 1 اغسطس 250 جنية... نفترض اللجنة صنفت المكان انه مميز يناير 2026 فمن ايجار شهر فبراير 2026 هتدفع 1000 جنية (عشان 20 ضعف الشقة يبثي 300 جنية يبقي هتدفع الالف الحد الأدنى)... بس كده في 6 شهور انتا دفعتهم 250 جنية يعني عليك 750 جنية فارق؛ هتقعد 6 شهور تدفع 1000 الإيجار الجديد + 750 جنية فروقات الكام شهر السابقين لصدور التصنيف.

4️⃣ دلوقتي إيجارك بقي 1000 جنية أَو 400 جنية أو 250 جنية؛ الإيجار دا هيزيد 15% سنوي؛ يعني 1000 هتبقي 1150 جنية في 2026 ثم 1322 في 2027 ثم 1520 في 2028 وهكذا لغاية مرور 7 سنين يعني ايجار يوليو 2032 وبعدها إيجارك خلص.

5️⃣ اعتباراً من يوليو 2032 الإيجار القديم خلص خلاص وكده المستأجر يشوف الوضع إيه مع المالك اللي هو مفترض جاره بقاله 36-87 سنة (من قانون فاروق 1947 وان كان في قبله ايجار قديم) ؛ فحسب ما يتفقوا سوى بقي وحسب علاقتهم النصف قرن الماضيين مع بعض... وهنا واضح الخلل الاجتماعي الرهيب وحالة عدم الاطمئنان بين ناس بقالها نص قرن تعرف بعض؛ فدا للأسف يوضح العلاقات بين الجيران 😓😓.

⬅️ طيب هل كل الإيجار القديم خلاص كده هيخلص 2030 غير سكني و 2032 للسكني؟

الإجابة هي لا؛ لو ثبت إن المستأجر (وبطبيعة الحال من هم في حكمه يعني الزوجة الأبناء القصر) لديهم عقار تمليك يصلح لنفس الغرض فهنا يلغي فوراً (فوراً دي محتاجة قرار قاضي الأمور الوقتية)... نفس الحكاية لو ثبت إن أي وقت حالي أو مستقبلي المستأجر ساب الشقة أكثر من سنة والمرجعية هتبقي عادة استهلاك الكهرباء للشقة. في الحالتين دول بس الإيجار يلغي فوراً مش هيستني 7 سنين أو 5 سنين...

⬅️ يعني الناس هتترمي بالشوارع في اغسطس 2032؟

*️⃣ طيب هي الناس اللي ساكنه في ايجار جديد بتترمي في الشوارع؟ عادي هيكون وضعهم زي الناس اللي عايشة في ايجار جديد وعقدهم خلص... لكن عامة الدولة بتقول وبكرر بتقول 😂 هتعمل في مكان ما في سنة ما بشكل ما بمبلغ إيجاري ما شقق توفرها لغير القادرين من سكان الإيجار القديم... طبعاً الناس كبيرة وعجوزة في مصر ففاهمه فتبدأ من 2030 تشوف وضعها هتسكن في شقة ولا مع أحفادها ولا هتعمل ايه ومتستناش الحكومة.

⬅️ القانون دا هيزود الإيجارات عشان الطلب هيزيد؟

*️⃣ هو نظرياً مفروض هيقلل الإيجارات مش هيزودها؛ تعداد 2017 قال الايجار القديم 3 مليون وحدة منهم 1.88 مليون شقة سكنية ودا يمثل 7% من الاسكان في مصر اللي هو 42 مليون وحدة سكنية... المهم يعني التقديرات بتقول ما بين 250 ألف الي 400 ألف وحدة مغلقة بشكل دائم؛ دول هينزلوا السوق فدا هيزود المعروض بالسوق؛ هتقولي ما الطلب هيزيد عشان المستأجر القديم هيشوف شقة هقولك وشقته هتنفجر؟ مهي هتنزل السوق.

*️⃣ بل فعليا في عمارات ممكن في أماكن تقدر تهدمها وتبني عمارة أكبر واطول فتوفر شقق أكثر (او عمارات قديمة من ام شقق 200+ متر وشقتين ثلاثة بالدور؛ تهدها وتبني مكانها 4 و 5 شقق بالدور فنفس العمارة تشيل ضعف او 3 اضعاف الشقق)... ففعلياً القانون مش مؤثر قوي عالأسعار بالسوق لإن الحوار كله 7% من الشقق السكنية في مصر.

*️⃣ آخر شيء عاوز أقوله هو حالة القلق الرهيبة من إن المستأجرين إنهم هيتطردوا؛ الناس قلقانه من بعضها بشكل رهيب زي ما ناقشت قبل كده ودا يوحي بخلل اجتماعي كبير إن ناس جيران بقالهم 30-40-50 سنة بس عارفين إنه لو جت فرصة للآخر هيطرده؛ طيب والجيرة وعشرة عشرات السنين؟ الناس دي ايه علاقتها ببعضها؟ دي قنبلة اجتماعية إن العلاقات الأجتماعية بين الجيران كده؛ المستأجر اللي مرعوب من المالك والمالك اللي عايش في شقة إيجار جديد وهو يملك شقة نظرياً... في خلل اجتماعي مينفعش يستمر والناس تبقى خايفة من بعض كده.

انتهى البوست وممكن تلقي نظرة عالفيديو

لو عاوز تحتل مصر اضرب سنترال رمسيس والبلد هتتشل مفيش اتصالات ومفيش نظام بنكي

ايه الكوميديا السوداء دي؛ فين ال Backup Plan ومفروض حاجات حيوية كده في خطط B و C وجاهزين ومتدربين علي كل السيناريوهات المحتملة

افرض فعلاً عدو ولا ارهابيين عاوزين يعملوا حاجة سهل يشلوا البلد كده ؟

نروح للكلام اللي بجد

السفينة
Energos Eskimo

*️⃣ فك الاسالة رقم 2 اللي جت من الأردن بقالها شهر وكانت قاعدة تتشمس في السخنة لغاية ما الأردن زهقت أجرت سفينة جديدة وغالباً هندفع لهم إيجارها

*️⃣ خلاص أخيراً السفينة دخلت ميناء السخنة والحمد لله وشكلنا اخدنا بالنا اننا من ديسمبر 2024 متفقين عليها واتفاجئتا انها جت والرصيف مش جاهز فكانت بتصيف في بورتو... خلاص الرصيف جهز

*️⃣ أما لو مش عارف قصة السفينة وايه علاقة الأردن بالموضوع وايه سفينة الأردن وايه علاقة قطر وسوريا بالكلام

*️⃣ يبقي انتا مش عاملي فولو في اليوتيوب ومشوفتش الفيديو اللي نزل من يومين يلا روح شوفه حالا متزعلنيش منك 😓😓 واعملي فولو

https://youtu.be/TvcAHG5qeck

*️⃣ دا أنا نزلت خبر السفينه اللي رايحة الأردن قبل ما وزارة البترول نزلت الخبر 😂😁😁 أصلها هتشتغل علي سوريا + باك اب لمصر

*️⃣ يلا عقبال سفينة فك الاسال اللي من مايو راكنة في ميناء الدخيلة ما تشتغل؛ وبرضك عقبال السفينة التركية لما تتحرك هي كمان من تركيا وتيجي؛ لاننا اتفقنا عليهم بس نسينا نجهز لهم رصيف 😂 لدرجة جبنا معدات ليهم بالطيران بأكبر طيارة شحن في كوكب الأرض عشان نسينا نجهز.

التضخم العام في يونيو انخفض من 16.8% ليصبح 14.9%

*️⃣ صراحة انا كنت متوقع انه ينخفض ل 15.7% بس الانخفاض كان اعلي من توقعاتي.

*️⃣ طيب يا مركزي التضخم الأساسي كان 13.1% وتوقعي كان انخفاض ل 12.2% فيا تري هتنزله لكام؛ هيضرب توقعي برضك ولا ايه 😂

*️⃣ قولت أشوف الشات متوقع ايه قالي 11.7% الي 11.8% وانا كنت بقول 12.2% وبعدين قولت يبقي 12%

فمين اللي هيكسب؛ هذا ما سيكشف عنه البنك المركزي النهاردة او بكره ان شاء الله

تثبيت المركزي للفايدة كان متوقع للجميع فمحبتش اعمل اكني فلحوس وجبت الديب من ديلة واكتب بوست مستقل 😂

بس لما حد كان بيسألني في التعليقات كنت برد عليه انه هيثبت

هنوديك فين يا هوت ماني؛ من أول الشهر مشتريات الأجانب داخله في 2.5 مليار دولار 😂 فلوس كثييير

وييجي حد متوقع الدولار يطلع دلوقتي؛ عالشتاء بقي دلوقتي بتمطر علينا دولار ومش عارفين نوديه فين

رئيس الوزراء طلع تصريح اليوم قال فيه إن الحكومة ملتزمة بسداد مديونياتها لشركات البترول الأجنبية.

*️⃣ التصريح دا جه بعد تقرير صندوق النقد إمبارح اللي قال إن رغم التعويم لسه مصر مسددتش الديون ولسه عليها 3-4 مليار دولار للشركات؛ ودا بخلاف تصريحات حكومية كثير إننا زي الفل بنسدد.

*️⃣ التقرير قال مديونيات هيئة البترول ضمن فقرة قال فيها إن مديونيات الهيئة متصاعدة لدرجة البنوك بما فيها البنوك المحلية والحكومية بترفض إقراض الهيئة إلا بضمانات حكومية؛ وقال إن الضمانات الحكومية وصلت ل 18% من الناتج المحلي الإجمالي؛ ودا رقم خزعبلي إن جهة واحدة تاخد 18% من الناتج المحلي ضمانات.

*️⃣ عالعموم التقرير لذيذ وتعالوا بكره نعيد تاني ذكريات الايف بعد غياب ونشوف التقرير سوى؛ بكره الساعة 9 نطلع لايف علي اليوتيوب

بيعجبني قوي فيلم صندوق النقد مع دول العالم الثالث... الدول تروحله تقوله يا صندوق وضعي وحش عاوز اتفاق معاك يقول إني حلو فالهوت ماني ييجي فالدولار يستقر فكده المستثمرين ييجوا.

*️⃣ الصندوق؛ عنيا يا حبيبي؛ وريني كده أرقامك وميزانيتك؛ يالهوي دا إنتا معكش تدفع هتاخد مني قرض وتسدده إزاي؟

⬅️ الدول: بص دي خطتي هنفخ المواطن وأحلبه وأجيب الفلوس أسدد؛ وهصلح مشاكل كذا كذا عندي؛ ها ايه رأيك يا صندوق.

*️⃣ يا سلام عليك هو دا؛ هاجي لك كل 6 شهور أشوفك عملت ايه؛ اتفقنا... يلا أدي إمضاء أهي؛ يا هوت ماني الدولة X كويسة تعالوا.

*️⃣ بعد 6 شهور ييجي الصندوق؛ هااا وريني كده عملت ايه في خطة الحلب اللي وعدتني بيها؛ اييييه دا إنتا معملتش ربع اللي متفقين عليه؛ مينفعش كده.

⬅️ الدول: يا إعلام كلموا الشعب؛ الصندوق عاوزني أنفخ الشعب؛ عاوزني أحلب الشعب؛ يرضيكم؛ إحنا لم ولن نفعل ال احم احم في شعبنا 😂😂؛ الصندوق دا عنده مخططات لتدمير البلد وافساد السلام الداخلي والمش عارف ايه؛ الحقونااا.

*️⃣ الصندوق: ايه يا عم إنتا؛ هو أنا عملت شيء؛ دا إنتا اللي حاطط الخطة وقايلي؛ عامة بص إنتا حبيبي ومتوصي عليك من الغاليين؛ هصرف لك الشريحة دي وهاجي بعد 6 شهور نشوف إيه وضعك خلاص.

*️⃣ فات 6 شهور؛ الصندوق جه؛ هااا عملتم ايه يا بلد؛ متقوليش لسه معملتش حاجة؛ لا كده كثيير شكلي قصاد الدول؛ هيقولوا عليا صندوق عبيط.

⬅️ الدول: يا إعلام؛ طلعوا الاسطوانة؛ الصندوق بيضغط علينا عشان بلدنا مستهدفة بخطة صهيوأميركو ايرانوا صيني روسي موزمبيقي صومالي أثيوبية.

*️⃣ الصندوق؛ يووووه بقي يا عم انتا اللي حاطط الخطة والشروط والخطوات؛ بص هو لولا إنك من الغاليين كنت طلعت لك تقرير يخوف الهوت ماني ويهرب المستثمرين ووو... بس عشان إنتا حبيبي هطلع اقول إني اتفقت معاك نأجل المراجعة دي للي جايه 😁...

وتستمر القصة والفيلم

بعد دقائق هكون لايف عاليوتيوب من 9 إلى 10 هندردش حولين تقرير الصندوق الجديد اللي طلع... فعليا التقرير قديم لكن لسه طالع لينا جديد

الايف هيكون مسجل عادي عشان الناس اللي مش فاضية

اللينك عاليوتيوب

https://youtube.com/live/JUNDlK5FBzU?feature=share

بمناسبة زيارة رئيس الفلبين لأمريكا وكمان الانتخابات اللي عندنا في مصر دي وإن يفط فيها صور ناس 99% من الشعب ميعرفش مين دول بس هينتخبوهم؛ الانتخابات دايماً تفكرني بقارة أسيا؛ للي ميعرفش فمعظم آسيا وإن كان دلوقتي فيها انتخابات ديمقراطية بجد لكن زمان كانت دكتاتورية بس بيحصل برضك فيها حاجات طريفة قوي.

⬅️ في الفلبين فرناندو ماركوس كان شاب محامي ناشط قاوم الاحتلال الياباني للفلبين وبني سمعته إنه وطني قاوم الاستعمار؛ ودا خلاه وهو في سن ال 32 يخش البرلمان (النواب والشيوخ) وخلال 14 سنة بقي رئيس المجلس سنة 1963 وبعدين قرر في 1965 يرشح نفسه للرياسة ضد الرئيس الحالي وبالفعل كسب ب 52%.

*️⃣ كسب ماركوس وقالك حان وقت نهوض الفلبين ومش هينفع نفضل دولة متخلفة كده؛ وبالفعل أطلق مشاريع بنية تحتيه في كل مكان؛ كباري طرق صرف صحي موانئ مطارات؛ مشاريع ضخمة قللت البطالة بس فعليا مغيرتش من مستوي معيشة المواطن الفلبيني لإن الفساد خلى السبوبة كلها لحاشية ماركوس.

*️⃣ في عام 1969 خلصت فترة ماركوس لكنه استخدم كل شيء عشان يكسب؛ كانت لسه الانتخابات ديمقراطية والفلبين منذ الاستقلال عن الاحتلال الياباني والأمريكي كانت كل 4 سنين تغير رئيس؛ لكن ماركوس قالك لا كفاية كده؛ استخدم الفلوس وشراء الأصوات وأمر رجالة الحاشية بحشد أنصارهم وموظفيهم للانتخابات وقمع بالشرطة المعارضين وسجن البعض وفي النهاية عرف يكسب ب 62% لفترة ثانية؛ وأخيرة حسب الدستور تخلص سنة 1973.

*️⃣ ماركوس كمل برنامج نهوض الفلبين والانفاق الضخم وخاصة عالبنية التحتية الممولة بقروض خارجية وبالمناسبة ديون الفلبين قفزت في عهد ماركوس من 2 ل 35 مليار دولار 😁؛ عالعموم أمريكا دعمت ماركوس لكن المعارضة انتشرت؛ معارضه من أحزاب شيوعية وكمان المسلمين تعوضوا للقمع الكبير من ماركوس ونفوذهم زادت في ولايات معينة وخاصة بعد فضيحة جابيدة.

*️⃣ في 1968 قرر ماركوس عمل خطة جابيدة وهي ضرب عصفورين بحجر؛ عندنا صراع حدودي مع ماليزيا وعاوزين ناخد منطقة صباح منهم؛ وعندنا مسلمين ثائرين في مورو؛ خلاص التجنيد الإجباري ياخد الجنود دول يدربهم ويخليهم يهجموا علي ماليزيا؛ نجحنا يبقي اخدنا المدينة؛ فشلنا يبقي ضحينا بالمسلمين اللي مزهقينا؛ لكن حصلت مشكلة؛ المجندين لما عرفوا ان دورهم الهجوم على ماليزيا رفضوا لإنه حرام مسلم يحارب مسلم فهنا قرر الجيش الفلبيني عما مجزرة وابادة للمجندين وقتل عشرات منهم بتهمة خيانة الفلبين وتفضيل الإسلام علي الفلبين والإرهاب ودا خلى الأخبار تتعرف والخطة تنتشر وتتلغي ومعروفة باسم خطة جابيدة.

*️⃣ من بعد خطة جابيدة ومسلمي الفلبين قالوا الانفصال وشكلوا جماعات عسكرية تحارب الدولة سميت بجماعة مورو وانتشرت في مناطق المسلمين زي سولو ومينداناو وردت الدولة بالعنف المضاد ومذابح في القري واستمر القتال دا عشرات السنين؛ مورو تعمل عمليات وتفجير ضد الفلبين والدولة تعمل مجازر في مناطقهم.

*️⃣ نرجع لماركوس اللي سنة 1972 قالك ايه دا أنا فاضلي كام شهر وأمشي؛ على جثتي؛ ومش هعدل الدستور؛ طلع قال يا شعب عشان الظروف اللي احنا فيها؛ بنحارب الشيوعين والانفصاليين المسلمين؛ لذا أعلن فرض الاحكام العرفية ومن الآن أنا رئيس مكمل معاكم.

*️⃣ أمريكا طبعاً بتأيد أي دكتاتور في الكوكب يكون ضد المسلمين أو السوفيت فماركوس كان حبيب أمريكا وخاصة إنه ادي أمريكا قواعد عسكرية كمان؛ فأمريكت فتحت له الخزائن يقترض ويصرف علي مشروعاته الضخمة زي مشروع مفاعل نووي للكهرباء في مدينة (باتان) اللي صرف عليه مئات ملايين الدولارات وبدأوا الشغل فيه من 1978 ومشتغلش لغاية النهاردة بالمناسبة (خد بالك مئات ملايين الدولارات في السبعينات تعادل مليارات النهاردة).

*️⃣ الوضع في نهاية السبعينات ودخول الثمانيات كان صعب اقتصاديا؛ الفلبين بتستورد بترول اللي غلي بعد حرب 73 فراعوا عملوا مشروع الفنكوش النووي وفشلوا يشغلوه عشان اتعمل اصلاً رشاوي وفساد ففحوصات السلامة رفضت تشغله؛ دخل الثمانيات لقي كارثة وهي التضخم الأمريكي اللي خلى الفيدرالي وقتها رفع الفايدة في 1980 لتصبح 20% وآه الفايدة عالدولار بقت 20% فبقي مستحيل حد يعرف يستلف (الفايدة اللي ارتفعت بعذ كورونا وخلتنا عيطنا كانت قمتها 5.5%).

*️⃣ المعارضة زادت الضغط عالحكومة واتهمها ماركوس بالعمالة للأعداء وزود القمع بشكل مبالغ فيه خلى حتى أمريكا تبدأ في انتقاده؛ ماركوس اتهم زعيم المعارضة بينينيو أكينو المنفي في أمريكا بالخيانة والعمالة (مع إنه في أمريكا حليفة ماركوس)؛ المشكلة إن بينينيو أكينو سخن وقال لماركوس أنا جاي أعارضك من الفلبين والكل قاله انتا عبيط؛ وبالفعل ركب الطيارة ونزلت المطار فحاصرت قوات الشرطة الطيارة وطلعوا قتلوا أكينو؛ لا مقبضوش عليه؛ طلعوا ضربوه بالرصاص في الطيارة.

*️⃣ وعشان الدقة الشرطة قالت انتا عليك احكام اتفضل معانا وبالفعل أكينو قام معاهم لكن في شخص منهم طلع السلاح وطلقة في موخرة رأس أكينو؛ وسبحان الله الشرطة قتلته برضك عشان قتل أكينو وبكده محدش هيحاكمه ولا هيقول هو قتله ليه.

*️⃣ هنا الفلبين غرقت مظاهرات والشرطة والجيش فشلوا يصدوها؛ الموضوع زاد لدرجة إن امريكا بلغت ماركوس إنه يهرب؛ أخد مراته اللي لقوا في قصرها 2700 زوج احذية 🤣🤣 وأخد عياله وهرب سنة 1986 وسيطرت المعارضة عالحكم ومسكت كورازون السلطة وبقت رئيسة الفلبين؛ مين كورازون دي؟ مرات أكينو... وتم تعديل الدستور وبقت فترة الرئاسة 6 سنين لا يجوز تجديدها؛ وفي سنة 2010 وصل لبنينو نجل أكينو للسلطة وبقي رئيس لغاية 2016.

*️⃣ لو بتسأل الفلبين دلوقتي مين ماسكها؛ فالرئيس الحالي بونج بونج كان عضو برلمان من 1992 ومسك عدة مناصب زي وزير زراعة ورئيس مجلس شيوخ؛ اه و بونج بونج يبقي ابن ماركوس 😁🤣🤣🤣 وصل للسلطة بالديمقراطيه.

*️⃣ لو مستغرب الحدودته دي فأنا كان مفروض أقولك اختها من كوريا الجنوبية اللي الجنرال بارك تشونج-هي اللي عمل انقلاب سنة 1961 وقمع المعارضة بس بني كوريا؛ في 16 سنة عمل نهضة صناعية رهيبة هي اللي خلت كوريا هي اللي نعرفها؛ لولاه مكنتش هتسمع عن سامسونج و LG وهيونداي وكيا.

*️⃣ لكنه كان دكتاتور سفاح ومحدش عرف يثور عليه؛ حاولوا يقتلوه مرة بس قتلوا مراته سنة 1975 وبنته بقت تقوم بدور السيدة الأولى؛ لغاية سنة 1980 في اجتماع ليه مع رئيس المخابرات هو اهان وشتم رئيس المخابرات فالثاني قالك انا اتشتم؛ راح قاتله؛ اه ضربه بالرصاص قتله عادي كده 🤣؛ هي ليها قصة بس الموضوع تم كده.

*️⃣ المقارنة بين قبل عهده وبعدها؛ دخل الفرد كان 100 دولار بقي 1600 دولار يعني 16 ضعف؛ الصادرات كانت 50 مليون دولار بقت 15 مليار دولار يعني الصادرات زادت 300 ضعف...

*️⃣ اه نسيت أقولك شكلي؛ بنته بقت رئيسة كوريا برضك سنة 2013 لكن تم اقالتها في 2017 بعد فضيحة ان صديقتها الانتيم بتاخد رشاوي وتتوسط للشركات زي سامسونج وهيونداي عند الرئيسة؛ واتهمت الرئيسة بتقاضي الرشوة برضك كانت سامسونج بتبعتها للرئيسة بواسطة صاحبتها وتم اثبات رشاوي مثل شنط ايد حريمي ماركة هيرمس ولوي فاتيون وحصان فاخر لتدريب بنت الرئيسة؛ وتم اقالتها والحكم عليها بالسجن ب 32 سنة سجن لكن لاحقاً طلع لها عفو وخرجت من السجن هي والمعلم سامسونج. اييييه دنيا ابوها كان يقدر يقتل اي بني آدم في الشارع عادي وهي اتحبست عشان شنطة 🤣🤣 وهي دي الديمقراطية ليها أنياب 😁.

⬅️⬅️ كفاية كده بوست طويييل عشان اللي بيقولوا بن سامي قلب فيديوهات ونسي الكتابة؛ لم يحدث؛ بس دا لا ينفي انكم مش متابعين القناة ومشوفتوش الفيديوهات اللي بتنزل هناك 💔💔.

لولي: بابا بابا إنتا عارف بكره في إيه

أنا: لا يا لولي معرفش لسه صاحي

لولي: بكره الأربعاء عيد ميلادك إنتا وماما

أنا: يااااه؛ طيب أخد دش وأنزل الشغل 🤣؛ قال عاوز هدية إيه؛ أنا عاوز أعيش في سلام

I just want to live in peace

لقد هرمنا وبقينا نتكلم زي أبهاتنا وكنا بنستغربهم وإحنا عيال إزاي معندهمش حماسة إن عيد ميلادهم جه؛ أهو يوم زي باقي الأيام 🤣🤣... العيد فعلا لو سابونا في حالنا غير كده شكليات يا بيه

كم الناس اللي عمالة تبعت لي بشكل شخصي أو بوستات بخصوص الحركة الشمال اللي عملتها NTRA بتاعة لو شغلت التليفون بشريحة مصرية بره مصر لما تنزل مينفعش تسجله...

*️⃣ دي حركة قمة الشمال لإن سهل قوي يعرفوا هل هو لقط الشبكة جوا مصر يعني حد معاه تليفون مقفول فقرر يديه لصديق مسافر يسجله لما يرجع؛ ولا التليفون دا عمره ما لقط من جوا مصر شبكة وكان شغال تجوال.

*️⃣ بس كالعادة الموضوع استسهال؛ المشكلة إنها حركة تضر الافراد بس ومش هتقرب من إمبراطوريات ادخال وتسجيل الهواتف اللي شغالة في مصر؛ اخر الحركة دي تنكد علي شخص لقي تليفون عليه ضريبة فقالك يشيلها ؛ بس الحيتان في أمان.

*️⃣ مش فاهم ليه مصر بتعيد اختراع العجلة؛ يا أخي دا حتي الغشومية ليها كتالوجات؛ يا عم مش احنا وتركيا حالياً صحاب وحبايب وحتي هنشارك في مشروع المقاتلة الشبحية التركية؛ طيب ما نستلف منهم منظومة الهواتف؛ دي بقي غشيمة بس مش هطلة؛ وفي فارق بين الغشومية والهطل.

*️⃣ يعني ببساطة لو اخدت السيستم التركي وطبقته فهنا التليفون اللي اخد اعفاء جمارك هو فعليا مأخدتش اعفاء بل اخد استثناء؛ يعني التليفون مقفول شبكة لكن في استثناء حصري ليك انتا؛ لو حطيت شريحة بالرقم القومي بتاع الشخص اللي سجل في الجمرك؛ هيشتغل؛ أي شريحة تانية هيقف.

*️⃣ وبكده يا سيدي من ناحية الناس خلاص أجهزتها شغالة ولو جايب تليفون لاخوك اختك اقارب درجة أولي سهل تتحايل وتديهم شريحة باسمك؛ لكن مش هينفع تكون جايبه بيزنس لانك مش هتدي الغريب شريحة باسمك 🤣 فكده حليت الازمة وبرضك ضربت تجارة تهريب الهواتف.

*️⃣ لكن تروح تخلي ناس جابت تليفون طبيعي وحطت شريحتها المصرية علي ما تنزل مصر؛ هوبا تليفونها دا بخ؛ يا صلاة النبي؛ يعني لو انتا مسافر عمرة ولا روحت دبي وفكرت تجيب تليفون جديد مفروض الجديد دا تسيبه في كرتونته لغاية ما تنزل؛ ولا تخيل موبايلك وقع اتكسر وانتا بره مصر؛ اشتري موبايل واشتري شريحة وارمي المصرية لغاية ما ترجع عشان مينفعش تحطها في التليفون... ايه العبط دا

*️⃣ ولا عبط ليه صحيح؛ ما نترا اعلنت انها بقت 2 أكبر هيئة اقتصاديا ارباحاً في مصر بعد ما كانت رقم 5؛ مهي بتفرض رسوم علي كل تليفون؛ وبتفرض غرامات على شركات الاتصالات عشان شبكتهم وحشة؛ اه الشبكة وحشة عند المستخدم فنترا تاخد فلوس غرامة ليها هي 🤣 مش تغرمهم دقايق وانترنت لصالح المستخدم؛ احنا ناخد سوء الخدمة وهي تاخد فلوووووس. فيا تري من مصلحتها سوء الخدمة تخلص؟؟؟

الحلزونة ياما الحلزونة

*️⃣ دلوقتي الحكومة عندها هدف وهو السيطرة عالتضخم ⬅️ الفايدة تقل ⬅️ بند خدمة الدين يقل.

*️⃣ عشان تعمل دا مش بتزود ولا بتبيع الكهرباء ولا البنزين ولا الغاز بسعرهم الحقيقي ⬅️ تستلف فلوس عشان تدعم القطاعين دول ⬅️ خدمة الدين تزيد.

*️⃣ فالحكومة تقولك خلاص هزود سعر الكهرباء والبنزين ⬅️ هقلل القروض اللي بستلفها عشان احطها ك دعم ⬅️ رفع سعرهم هيزود الأسعار ⬅️ التضخم هيزيد ⬅️ الفايدة مش هتنزل ⬅️ خدمة الدين هتفضل عالية 🤣.

*️⃣ حلزونة بنت لذينا ملهاش حل هتجيبها كده تجيبها كده هي كده؛ حلزونة الطاقة بلا حل... والمشكلة انها مرتبطة بسعر البرميل والدولار والغاز العالمي فلو زادوا تزيد المشكلة.

بيبهرني اللي يخش يقولي أنا مش بستخدم الذكاء الصناعي عشان هو بيهبد؛ وخد بالك من الهبد ويدني نصيحة كإني مش بشوف الذكاء الصناعي وهو بيهبد.

*️⃣ مهو ألف باء مخ بقري كندوزي هو إنك توقف كل معلومة داخله تبص بصه عليها؛ تشوفها من الفيسبوك تشوفها من أبو الاشتات تشوفها في بوست لبن سامي؛ بص بصه على أي معلومة أو خبر يعدي عليك قبل ما تدخله مخك.

*️⃣ وإلا هتلاقي عبط كده يعدي عليك؛ كنت مديله شوية داتا يحللهم واخدت النتيجة لقيتها مش هي اللي في بالي؛ مهو لازم يكون في بالك رقم قريب وتستخدم التقنيات للوصول للأدق؛ لقيت رقم غريب فراجعت وراه الخطوات لقيته جامع لي كده 🤣🤣🤣 لا وفضل يقاوح معايا كمان 😆.

*️⃣ هل معنى كده إنك هتبقي فله ومفيش حاجة هتخدعك؛ لا خالص هتتخدع برضك ويخش مخك معلومات مش دقيقة؛ بس ميبقاش كل من هب ودب يضحك عليك... يعني شايف حد مشهور كبير في السن فتقول للشات هو مواليد سنة كام؛ في بالك هيكون موالي 40s او 50s فتلاقي الشات يقولك 1920؛ أكيد دي متضحكش عليك؛ لكن لو هو مواليد 1955 والشات قالك 1958 فهنا تخدعك؛ عادي بس يقولك دا فوق 100 سنة وتصدق... هي مصر بتستورد بكام؛ في بالك رقم 80-90 مليار دولار؛ يقولك 85 تصدقه ويطلع 95 مليار ماشي... بس يقولك 30 تصدق كده الخلل منك.

كده وضحت 😁 سامعني يا شات يا أبو 45 المجموع قال.

يااااه لقد هرمنا؛ بنك CIB ضاف منظومة التحويلات الفورية IPN في الابلكيشن بتاعه؛ يااااه أخيرا حصل بنك اسكندرية ومصر و القطري.

*️⃣ للي مش عارف أو متخلبط ف IPN هي منظومة التحويلات الفورية اللي أشهر تطبيق ليها هو انستاباي؛ لكن دي منظومة تحويلات والبرنامج بتاع انستاباي بيستخدمها... البنوك المحترمة بتضيفها في برامجها فتقدر تحول لحظي من برنامج البنك مش لازم انستاباي.

*️⃣ لسه منعرفش حدود التحويل بتاعة CIB لكن أظنه هيعملها 500 ألف يومي و 5 مليون شهري غالبا أو 10 مليون شهري مش عارف؛ ودا طبعاً مقارنة ب 400 ألف شهري انستا باي.

*️⃣ أخيراً بنك CIB بيطور وعقبال ما يعبر الشركات ويبطل موقعه ياخد إجازة في الجمعة والسبت ونقدر نعرف تحديث رصيد الشركة أونلاين بالإجازات بدل ما موقع البنك بيقفل الخميس اخر النهار ويرجع يحدث الرصيد يوم الأحد 9 الصبح ونعرف ايه تم بالإجازة 😂😂. ما انتم شركات عاوزين تعرفوا رصيدكم ليه جمعة وسبت؟ روح الماكينة شوف رصيدك متقرفناش.