4️⃣ القطار المكهرب ؛ اللي بيمشي طريق الاسماعيلية رايح العاشر هيشوف التجهيزات؛. دا قطار مكهرب يعني شغال بالكهرباء مش ديزل تقليدي أو أو؛ يبدأ من محطة عدلي منصور في موقف العاشر ويكمل العبور الشروق بدر ويتقسم خطين واحد للعاشر من رمضان والثاني العاصمة الادارية. وهيتكلف القطار دا 26 مليار جنية

*️⃣ اللي هيقول مش ممكن والمترو دا غير منطقي... فلازم يعرف إن المشاريع دي معلن عنها وخط السير وبيتعمل مناقصات خلاص توريدات ولسه رئيس الهيئة قايل من أسبوعين إنهم هدفهم تتحرك من أكتوبر إلى التجمع في 45 دقيقة بالمترو

أخبار متنوعة:

5️⃣ أتوبيس BRT : مش سكة حديد بس أهو قولت أحشيها في البوست.. الحكومة بتدرس أو خلاص شبه وافقت على تشغيل اتوبيسات نوعيات BRT وممكن تكتب في جوجل BRT Bus وتشوف شكلها. دا هيكون بشكل أساسي عالدائري. الأخ BRT هيكون أتوبيس شكله مختلف شوية وبيمشي في حارات مخصصة ليه وبسرعات عالية وهدفه استبدال الميكروباصات عالدائري.

كل المكتوب في البوست دا مفروض من 2022 وطالع يبدأ تدريجي افتتاحه... يعني قول مترو الأنفاق تشوفه كده 2030

*️⃣ اه متنسوش تصريح وزير النقل إنه جاري تخطيط وتنفيذ 1000 كوبري جديد بمتوسط تكلفة 130 مليون للكوبري أي إجمالاً 130 مليار.

*️⃣ اللي هيقولي رأيك ايه في المشاريع دي والإنجازات؛ فأنا مش بقول رأيي في مشاريع الدولة أنا راجل بخاف 😂. لكني قايل شيء وهو إني بشوف تركيز الاستثمار في "عالم الأشياء" مضيعه للموارد ولازم تركيز موازي إن لم يكن أكبر في "عالم الأفكار" وإلا الأفكار هتدمر الأشياء دي.

*️⃣ هدفي بالبوست إن الناس تعرف مشاريع حيوية زي المترو والقطارات؛ ومش هدفي يعرفوا عشان يقولوا الله عليكي يا حكومة أو يالهوي كل دي ديون؛ الهري دا غير مفيد؛ يعرفوا عشان يكون في بالهم الحكومة هتحفر فين؛ وقبل ما يتعمل مترو في مكان هيكون قبله في حفر عشان يغيروا مسار خطوط الكهرباء والمياه والغاز والصرف؛ وكمان هيكون في مشاريع تحويلات مرورية ومشروعات كباري. فالناس في خطوط السير تبقى متوقعه إيه هيحصل في حياتها الفترات القادمة. دا هدفي بالبوست.

بوست خفيف بقى بمناسبة فترة الراحة الحالية وأشوفكم لاحقاً

خريطة الخط الرابع للمترو

خريطة الخط الخامس للمترو

خريطة الخط السادس للمترو

خريطة المونوريل

مونوريل اكتوبر

*تحديث
المترو للمطار اتلغي الشهر الماضي وتم استبداله ب (شاتل باص)

كل ما يطلع خبر إن الحكومة المصرية بتجري جلسات نقاشات مع فيسبوك وجوجل وأبل بخصوص الضرائب فالناس بتاخد الموضوع تريقة أو ناس تانية تفتكر إن قصدهم المواقع دي تدفع ضرائب للحكومة هنا.

يا شباب اللقاءات عشان يفرضوا ضرائب على المعلنين والتجار والأشخاص عالمواقع دي. يعني يتحط ضريبة القيمة المضافة 14% على أي خدمات تدفع بواسطة مصريين في مصر.

يعني ايييييه؟ بص يا سيدي معايا.

*️⃣ يعني مثلاً لعبة في متجر البرامج بتاع جوجل سعرها 100 جنية تيجي تشتري تلاقيه يقولك السعر 100 + 14 جنية قيمة مضافة وجوجل تخصم منك الـ 14 جنية دي وتوردها للحكومة هنا.
*️⃣ تيجي تشترك في خدمة أفلام 🎥 مثلاً سعرها 50 جنية تلاقي الخصم 57 جنية عشان في 7 جنية هى 14%

*️⃣ تيجي تعمل حملة إعلانية عالفيس بوك ب 8000 جنية مثلاً فتلاقي الفاتورة والخصم جايلك 5700 جنية وتتورد الـ 700 جنية للحكومة

دي المرحلة 1️⃣ وبشكل شخصي متوقع صدور القانون الخاص بيها في 2021 في البرلمان القادم.

المرحلة 2️⃣ هى فيلم الرعب لينا... لينا أحنا يعني كتجار وهى إن الحكومة تكلف سوق وجوميا ونون بخصم 14% قيمة مضافة وتوريدها باسمك إلى الدولة. يعني تبيع سلعة ب 1000 جنية تلاقي سوق تقولك عمولتنا 130 جنية وضرائب الحكومة 140 جنية خد 730 جنية الباقي. وبعدين انتا تروح بقى لمصلحة الضرائب تجيب لها فواتير الشراء انك دافع 100 جنية قيمة مضافة في الشراء وتستردها.

المرحلة 2️⃣ دي بتحصل في عشرات الدول بس عشان تتنفذ محتاجة إعادة هيكله لمصلحة الضرائب ودي بتم حالياً بالفعل بس نظراً لإننا مصريين (بنشتغل بسرعة) فمتوقع مش قبل 2023 عالأقل.

طبعاً اللي عاوز يقولي بطل هبد ومش هيحصل الكلام دا.. عادي يا سيدي هو انتا شايفني عاوزه يحصل أصلاً... بس الكلام دا بيحصل بره؛ ومصر حالياً بتشوف ايه لم الفلوس اللي بيحصل من الشعب بره وتنسخه لينا.

يوم 1 سبتمبر 2020 يعني أول إمبارح شركات أبل وجوجل وفيسبوك بعتت للشركات اللي هما شغالين معاهم إن في تعديلات ضريبية في بعض الدول مثل:

*️⃣ السعودية 🇸🇦 : قيمة مضافة 15% بدلاً من 5%.
*️⃣ تركيا 🇹🇷 : ضريبة جديدة اسمها خدمات إلكترونية قيمتها 7.5% دي بالإضافة للقيمة المضافة هناك 18%
*️⃣ فرنسا 🇫🇷 : ضريبة خدمات إلكترونية 3% بالإضافة للقيمة المضافة التقليدية 20%
*️⃣ إيطاليا 🇮🇹 : نفس الضريبة ال 3% ودي جنب القيمة المضافة التقليدية 22%
*️⃣ إنجلترا 🏴󠁧󠁢󠁥󠁮󠁧󠁿 : ضريبة خدمات إلكترونية 2% جنب القيمة المضافة الـ 20%
*️⃣ المكسيك 🇲🇽 : ضريبة قيمة مضافة جديدة لأول مرة (دي اللي هنبقى زيها في فكرة التطبيق لأول مرة) بنسبة 16%
*️⃣ شيلي 🇨🇱 : قيمة مضافة لأول مرة 19%.
*️⃣ ألمانيا 🇩🇪 : تخفيض القيمة المضافة (أيوان حضرتك تخفيض) من 19% إلى 16% (اتطبقت من 1 يوليو)

للتذكير بس الضريبة دي بتفرض عالسلعه ويدفعها المواطن المستخدم (قيمة مضافة) وطبعاً لو مقدم السلعه حابب ثبت السعر يبقى يدفعها هو للدولة بقى

فصلوا علي النبي كده والخير كثير جاي ومن اتجاهات لا تتخيلوها 😭😭😭


بيان أبل يوم 1 سبتمبر أهو للي حابب
https://apple.co/2EWIRpx

أنا أتولدت في المطرية؛ ومدرسة ابتدائي وإعدادي كانت مودرن سكول حلمية الزيتون والثانوي ابن خلدون في النعام اللي برضك جدتي كانت في نفس المنطقة؛ فكانت حياتي بين المطرية والحلمية والنعام؛ وانتقلنا أسرياً من 2006 للرحاب وتدريجي قليت خالص أروح المناطق اللي تربيت فيها؛ والفترة اللي فاتت الظروف خلتني روحت كذا مرة المناطق دي... وهو بطبيعة الحال كل شيء بيتغير ومفيش مكان بيفضل زي ما هو. لكن في حاجة معينة بقت بتلفت نظري بشكل كبير في التغير هناك.

*️⃣ كثير من المحلات اللي أعرفها قفلت أو تم تجديدها بشكل كامل؛ بقت بشكل أكثر شياكة وسيراميك بقى ولافتات ضخمة ومنورة جامد وحاجة آخر شياكة؛ لكن في نفس الوقت الجودة بتاعة كل شيء بقت أقل بكثير... للأسف الداء بتاع الشكل ضرب كل مكان.

*️⃣ الرأسمالية بطبيعتها بتشجع على الاستهلاك العنيف؛ وعشان تشجع الاستهلاك لازم تخدع العميل وتظهر لك شكل مميز؛ الموضوع دا منتشر في كل مكان سواء في مصر أو خارج مصر؛ وحتى أبل يقال هتنزل الآي فون 12 برو بلون جديد "أزرق غامق" بحيث يحسس الناس باختلاف وتميز؛ ونفس الحكاية حصلت مع 11 برو اللي نزل بلون أخضر كده.

*️⃣ فأنا معنديش مشكلة في الاهتمام بالشكل؛ لكن بقى عندي مشكلة كبيرة إن مفيش اهتمام حقيقي غير بالشكل؛ والموضوع بقى ساري في كل شيء وكل الأشخاص؛ وأنا نفسي بقع في نفس الفخ الشكلي؛ مهواش بكتب وأنقد وانا يعني ملاك.

*️⃣ تبص عالمدارس الخاصة تلاقيهم يبنوا لك مدارس فخمة قوي وشيك قوي؛ مع إن فخامة المدرس لا تعني جودة تعليم؛ بس الناس بتهتم بالشكل فنديهم شكل ونحاسبهم عليه. المهم ابنك يكون متخرج من مدرسة اسمها وشكلها فخم كده؛ حتى لو هو نفسه مش متعلم وحمار؛ وحتى لو المحتوى والجودة اللي حصل عليها دي تستحق مثلاً 30 ألف سنوي لكن عشان المدرسة "فخمة" فإنتا بتدفع 80 ألف مصاريف. المهم الشكل.

*️⃣ نفس الحكاية في المستشفيات؛ بقت فنادق... رخام من الأرض للسقف... طيب هو الرخام بيحسن الجودة العلاجية!!! ومش هضرب أمثلة لمستشفيات فخمة وضخمة وشهيرة عندنا في التجمع لكن الناس بتشتم في الجودة العلاجية؛ وجربنا بشكل عائلي مرة مع والدتي واحدة منهم وكانت زفت. لكنها مستشفي فخمة وضخمة وشيك قوي وفي مكان مميز وعلى أشهر شارع...

*️⃣ وعشان أوضح؛ أنا مش ضد الشكل يبقى كويس؛ لكن أنا بالنسبة لي لو تعمل مستشفي فخمة جداً وشكراً؛ أو مستشفي مقبولة وتوفر ليكن 20 مليون جنية وتصرف المبلغ دا في تطوير الفريق الطبي؛ فأنا بالنسبة لي النموذج الثاني هو الأفضل. أنا أفضل دكتور ممتاز يعالجني؛ والدكتور واقف على بلاط عالأرض؛ بدل دكتور متوسط وضعيف يعالجني لكنه واقف على رخام عالأرض.

*️⃣ الموضوع دا بقى في كل شيء... تلاقي النقاش على جمال الجامعه... كإن التعليم هيبقى أفضل لو تم في جامعة 5 نجوم شكلاً.... فاكر زمااان أيام ما كنت في علوم عين شمس إن فترة قيل إن في "هدية أو منحة سعودية" جت للكلية؛ اتجددت واتعمل رخام واتدهنت وكلام شيك قوي. لكن فضلت لما ادخل المعمل ألاقي نقص في المواد الكيماوية عادي؛ لكني بقيت بدخل من واجهة رخام وممر رخام مش البلاط العادي.

*️⃣ مكاتب البريد والشهر العقاري والضرائب هتلاقيهم بيتجددوا دلوقتي؛ مباني بقت شيك قوي؛ لكن نفس الموظفين ونفس السيستم الروتيني العقيم ونفس المشاكل. لو الخيار بإيدي هقول إن المشاكل تتحل حتى لو هتقدم لي الخدمة وانا واقف في الشارع تحت شمسية.

*️⃣ لكن بصراحة وبأمانة؛ الغوغائيين بياكل معاهم الشكل كويس؛ ودول يمثلوا 90-95% من الشعب؛ فطبيعي الشركات والأفراد والحكومة وكله يقدموا لهم اللي هما عاوزينه؛ انتم عاوزين تقولوا "بصوا كذا بقى شكله إزاي" طيب ومضمونة!!! كام مرة سمعتم شوفتوا كذا شكله بقى حلو إزاي؟ وكام مرة سمعتم شوفتم الخدمة اتحسنت في جهة كذا إزاي؟

*️⃣ وكلامي عام زي ما قولت أفراد وشركات وحكومة وكله.

*️⃣ في فيديو جميل لأشرف حمدي اسمه "أيمون" كان اسمه "دولة الماكيت"... تقريباً دا افضل توصيف للحالة. إحنا عاوزين حاجة شكلها حلو... شكلها بس.

*️⃣ *️⃣ بحيث لو قابلت واحد أجنبي تقوله إنتا جامعتك بالشياكة دي؟ يبص في الأرض ويقولك بصراحة لا؛ اه جامعتي متخرج منها 5 أخدوا نوبل ومسجلة 15 ألف براءة اختراع ومتصنفه من أحسن 50 جامعة في الكوكب. بس معندهاش الجمال اللي عندكم دا للأسف.

*️⃣ أتمنى تكون الفكرة وصلت؛ طبعاً لو أنتا ثري قوي قوي؛ يعني تقدم شكل كويس قوي ومحتوى كويس قوي؛ النموذج دا موجود... بس أحنا منقدرش عليه؛ فلوسنا متقدرش تكفي الصرف على الإثنين؛ هتصرف على حاجة واحدة أساسي 80-90% من الفلوس والثانية 10% الباقية. وعادة الشكل هو اللي بيكسب ال 90% دي

هو حتي يوسف والي بقى اذكروا محاسن موتاكم ومتدعوش عليه 😡😡😡

طيب في دكر يقدر يعدد لي مين الاخت محاسن بتاعته اللي عاوزينا نذكرهاله 🤔🤔

اصلي ممكن الاقي محاسن لشيمون بيريز بس صعب الاقي ليوسف والي..

ايه الهبل دا

*️⃣ فعلا صدق اللي قال اننا في مدارسنا مش بنتعلم دين غير شكليا؛ شوية قصص وسورتين نحفظهم ومش بيتضافوا المجموع

*️⃣ ولا بنشوف فقة في تعليمنا؛ ولا حتي بنعرف عربي بجد.

*️⃣ وبعدين يكبرونا يقولوا لنا (انتم اعلم بشئون دنياكم)؛ و (الدين يسر لا عسر)؛ و (استفتي قلبك ولو افتوك) اللي تقريباً جابوهم من كتاب طبق اليوم؛ عشان لو من كتب دين كان هيشرحوا احكام وضوابط وأسباب ذكر الأمور دي وتنطبق فين.

*️⃣ وبعدين نكبر اكثر و منعرفش حاجة عن دينا؛ ونمشي بقي نحكم بالنقاط دي.

*️⃣ ايييه دا حد بيقولي كذا غلط؛ دا اتدخل في حريتي الشخصية؛ يا عم بسطها (الدين يسر).

*️⃣ ايييه دا حد بيقولي كذا حرام؛ دا هبل انا استفتيت قلبي وقالي حلال ومتقوليش ايه (اتخذ الهه هواه)؛ هو اكيد انا صح.

*️⃣ ايييييه دا حد بيقولي كذا مينفعش يتم؛ لالا ايه العبط دا لان (انتم اعلم بشئون دنياكم) فانا عارف ان دا من مصلحتي وصح.

*️⃣ بس ونديها بقي؛ خلاص ايه لازمة الشيوخ والمفتين ورجال الدين.

*️⃣ يعني الفلسفة القديمة بتاعة انه بيجي شيخ مدلس يجيب احاديث ضعيفة او تفاسير شاذة يروح قايلها عشان يدلس عالناس؛ خلاص ملوش لازمة؛ مبقناش عاوزين نعمل مجهود لتخريب الدين عالناس.

*️⃣ خلاص الموضوع بقي بسيط وبقي كل شخص عادي يقدر يهري في الدين؛ وطبعاً طبعاً الدين مش حكر لحد بس بقيت تلاقي ناس مش حافظة جزء حتي في المصحف؛ ولا حتي لو قولت له قولي 3 احاديث يعرف يقولهم؛ او حتي لو اديته مصحف يعرف يقرأ بالاحكام البسيطة للتجويد زي الاخفاء والادغام والاظهار وغيرهم... ويمكن ميعرفش يقرأ اصلا العربي المكتوب صح بالتشكيل

*️⃣ وبعدين تلاقيه يقولك انتم مصعبين الدين عالناس؛ الدين دا جميل قوي وكيوت وسكسي خالص و قلوب 😍 ودبدوب؛ ومفيش حاجة حرام في الاسلام؛ الاسلام دا عسول خالص...

*️⃣ منك لله يا يوسف زفت والي 😡 اللي جبتني هنا؛ بس حاجة تقرف انك تلاقي ناس يقولوا مش بس ميصحش نشتمه وندعي عليه ودا مات؛. لا خالص دول محرمين؛ يعني يقولوا حراااام تدعوا عليه دا بين ايدين ربنا

ياخي تييييييت عليكم يا بتوع مذهب الامام تيكا أنص انتم

طب بما إن وزير النقل كان قال انهم بيخططوا ل 1000 كوبري جديد بتكلفة 130 مليار (الكوبري ب 130 مليون)

طيب ما يخلوا المبلغ 150 مليار ويعملوا 2000 كوبري مشاة باعتبار الحكومة بتعمل كوبري المشاة متوسط 10 مليون (في كباري مشاه 15 مليون وفي كباري 5 مليون فنقول متوسط 10 مليون)

الكباري للعربيات جميلة بس بتحول حياة الناس لجحيم في مناطقها

واتمني بس الاخوة البسكويت اللي اخرهم مناطق طريق السويس فيلاقوا كوبري الفطيم؛ والماظا فيلاقوا كوبري الماظا؛ اتمني دول يسكتوا خالص؛ عشان لما تكملوا لجوا الموضوع كارثي

امبارح جبت سرعة 70 عادي في المطرية ومسطرد والناس بقت تعدي وهي بتقرأ الشهادة؛ وجربت بنفسي ركنت العربية في الحلمية وعديت الشارع الساعة 2 الظهر كتجربة عملية

كارثة؛ انا شاب ولوحدي فالموضوع كارثي؛ امال لو ست؛ امال لو عندها فوق 50 سنة؛ طيب لو مريض او وزن مرتفع

ملحوظة : كوبري مشاة يتعمل سلم كهرباء؛ انما كوبري 3 ادوار سلم عادي فدا مش معمول عشان كبار سن؛ دا معمول عشان نقول للناس اهوووو عملنا كوبري والناس هي اللي مش بتطلعه

تعرفوا ان في عهد كل من

الخديوي عباس حلمي الثاني (نص فترته)
السطان حسين كامل
الملك فؤاد
الملك فاروق
الرؤساء عبد الناصر والسادات

زادت مساحة الأرض الزراعية في مصر 1.2 مليون فدان خلال 83 سنة

وفي عهد حسني مبارك ال 30 سنة زادت مساحة الأرض الزراعية 2.3 مليون فدان منهم حوالي 1.8 مليون فدان تقريبا في عهد يوسف والي.

عارف ان الكلام صادم بس كان عندي فضول شوية في مجال الزراعة في مصر فجايبه من عصر محمد علي للنهاردة وبدور فيه

ففوجئت ب المعلومة دي فقولت اقولهالكم

بالمناسبة طول فترة الخمسينات زادت الارض المزروعة 100 الف فدان فقط والستينات 100 الف والسبعينات برضك 100 الف فدان في حين الاربعينات في وسط حرب عالمية زادت 500 الف فدان. وبكرر الكلام علي زيادة المساحة المزروعة مش الاستصلاح.

ملحوظة :

اللي هيقولي كده يوسف والي دا راجل زي الفل بقي؛ هقوله بطل تفكر بالارقام المجردة؛ ولو ربنا كرم وقدرت اكتب بوست الزراعة دا هتعرف ليه بقول كده.

في صورة منتشرة لطريق ضخم بحارات كثير ؛ والتعليقات عليه عادة يا تري بيدفعوا كارته او يا تري بيعدوا الشارع ازاي ووو ؛ فتعالوا احكي لكم قصة الطريق دا.

*️⃣ الطريق دا اسمه M11 وهو بيربط بين مدينة موسكو في روسيا الي مدينة سانت بطرسبيرج بطول 680 كيلو تقريباً.

*️⃣ نرجع لسنة 2004 والحكومة الروسية بتدرس تعمل الطريق دا ؛ حصلت معارضة شعبية بسبب ان الحكومة قالت ان الطريق دا هيبقي ب رسوم وكارته يعني.

*️⃣ الشعب الروسي كان معترض ان الحكومة تعمل طريق ويدفعوا كارته من منطلق ان الحكومة هتاخد فلوس من الشعب وتعمل الطريق؛. فكمان تاخد الفلوس تاني من الشعب عشان يمشي فيه؛ يعني المواطن يدفع سعر الطريق مرتين 🤔🤔.

*️⃣ سنة 2006 وزارة النقل الروسية بدأت تبحث تمويل للمشروع دا ويقدم دراسات الجدوي للبنوك يعني؛ وطلع ايجو ليفنتين وزير المواصلات والنقل الروسي بتصريح قال فيه انهم مجبرين علي الطرق اللي برسوم عشان الطرق الحالية بقت الكثافة 1.5 مرة و 2 مرة الكثافة المفروضة.

*️⃣ سنة 2008 الحكومة الروسية اصدرت قرار ببناء الطريق دا؛ والخطة كانت ان القطاع الخاص هو اللي هيعمل المشروع علي حسابه ويشغل الطريق وياخد كارته.

*️⃣ بالفعل بعض شركات القطاع الخاص كسبت مناقصات انشاء وتطوير اجزاء من الطريق لكن فشلت الحكومة الروسية من ايجاد شركات لكامل الطريق.

*️⃣ اضطرت الحكومة الروسية للتدخل بنفسها ومولت باقي المشروع وبدأ بالفعل سنة 2010.

*️⃣ تظاهرات من محبي البيئة ضد المشروع فقرر الرئيس الروسي وقتها ميدفيديف ايقاف المشروع والتفاوض مع الرافضين؛ وبعد فترة اتفقوا على صيغة اتفاق وتم استكمال المشروع.

*️⃣ كانت الخطة انهم يبدأوا في 2010 ويخلص بداية 2018 بحيث يلحق كأس العالم؛ لكن العقبات اخرت المشروع فتم التأجيل لنهاية 2018 ثم اتأجل ل 2019 وافتتحه بوتين في نوفمبر 2019.

*️⃣ الطريق بطول 680 كيلو وفيه 16 محطة تحصيل رسوم ؛ والرسوم فيه بتختلف حسب اليوم يعني وسط الاسبوع ارخص من الإجازات ونوعية العربية تفرق وكده.

*️⃣ الرسوم لكامل الطريق متوسط 1820 روبل (الدولار ب 75 روبل والجنية ب 4.8 روبل يعني 320 جنية).

*️⃣ الطريق يسمح بسرعات تصل الي 150 كيلو؛ متوسط السرعة 130 وبتنزل في الشتاء ل 110 عشان الثلوج والجو.

*️⃣ الطريق فيه 167 معبر فوقه للي بيقطعه و فيه 85 كوبري.

*️⃣ الطريق تكلف 520 مليار روبيل اي 109 مليار جنية منهم 150 مليار اي 31 مليار جنية مش من الدولة (قطاع خاص).

*️⃣ النقطة المهمة ان المواطن الروسي غير مجبر عالطريق دا؛ الطريق القديم M10 شغال ومجانا بيوصل برضك بين موسكو وسانت بطرسبيرج لكنه زحمة وطوله 870 كيلو... فاللي عاوز الطريق ابو بلاش موجود وهتوصل في 10 ساعات؛ عاوز ابو فلوس كثير موجود وهتوصل في 5 ساعات... الخيار ليك.

بس هي دي قصة الطريق بقي اللي اخد من الروس 4 سنين دراسة وبحث عن تمويل ثم 2 سنة بحث عن منفذين ودراسة الشركات والخطة ثم 10 سنين انشاءات ليصبح اضخم مشروع في تاريخ روسيا.

المصدر باللغة الروسية
https://www.vedomosti.ru/business/articles/2019/11/27/817263-ot-pitera-do-moskvi

صورة الطريق من لينينجراد (سانت بطرس بيرج)

بما إن من يومين كان عيد الفلاح 9/9 فهكتب شوية عن الزراعة في مصر. وتحديداً الأراضي الزراعية. وهيكون علي جزئين ؛ والثاني هضيف المصادر فيه

للتوضيح بس أنا مش متخصص في المجال دا؛ أنا بس كان عندي شوية اسئلة فقعدت فترة أدور على الايجابات؛ فالبوست دا هيكون تجميع ما وصلت له يمكن تكون نفس الاسئلة عند غيري. ويا ريت لو متخصص لقي معلومة غلط قولي وهصلحها عادي.


*️⃣ من أيام الفراعنة والقاعدة في مصر إن أرض مصر ملك الفرعون؛ ومش معنى دا انه مكانش في مصريين ليهم أرض؛ بل كانت فعليا أرض مصر جزء للفرعون مباشرة؛ وجزء الفرعون مديه لكبار القادة والمسئولين؛ والجزء الأكبر بيديره المصريين وركز هنا؛ بيديره لإن زي ما قولت الأرض ملك الفرعون؛ لكن فعليا الناس بتشغل الأرض وتدفع رسوم أو ضريبة أو أي كان اسمها للدولة و للفرعون نظير انه سايب لهم الأرض يعني.

*️⃣ بعد الفراعنة جه البطالمة ثم الرومان اللي سابوا الموضوع زي ما هو والأرض للناس تديرها وتدفع للدولة فلوس وتتوارث الأرض. يعني ضمنيا مالكين للأرض يعني. والرومان سموا النوعية دي من الاراضي اللي رسميا ملكهم لكنها بتدار من الشعب ويدفعوا ضريبة باسم ge ousiake اللي هي لاحقا تعدلت لغويا الي الوسية (مين اللي قال الدنيا دي وسية؛ في عبيد ملك الايد وفيها السيد 😂😂)

*️⃣ جه الفتح الاسلامي واقر نفس النظام واعتبر الحائزين دول بمثابة ملاك للأرض ويدفعوا الخراج بتاعها.

*️⃣ عصور الدولة الأيوبية ثم المماليك اللي مغيروش حاجة بل عملوا تشجيع للوقف الإسلامي وهو إن شخص يخصص أرض لله؛ أوقاف إسلامية يعني وتوسعوا في منح أراضي للمقاتلين وقادة الجيش اللي بدورهم برضك جابوا ناس تديرها؛ يعني فعلياً مفيش تغيير قوي غير ان بقي في جزء مهم أرض أوقاف إسلامية اي لا تخضع لأحد ولا يفرض عليها ضرائب ولا خراج لان كل العائد موقوف لله.

*️⃣ جه العثمانيين ومغيروش حاجة في الأول لكن بعد قرن ونص وتحديدا سنة 1658 كان العثمانيين في وقت صعب؛ حروب ضد روسيا وحروب ضد الصفويين وحروب ضد الإمبراطورية الرومانية المقدسة؛ يعني أقوي 3 دول في الأرض بيحاربوهم ويبدلوا عليهم؛. خزانة العثمانيين فضيت فقرروا يعملوا تغيرات مالية وضريبة في شتي أنحاء الخلافة.

*️⃣ نال مصر 🇪🇬 منها نظام الملتزم؛ العثمانيين قالوا الفلاحين بيزرعوا ويدفعوا اه بس يا تري دا الخراج بجد؟ 🤔 وهنا عينوا ناس اسمهم الملتزمين؛ يعني بالبلدي كده واحد يتعين مسئول ليكن عن الفيوم وأرضها؛ هو بقي يتابع الفلاحين ويلم الضرايب منهم وهو هيكون مقيم معاهم فعارف الأوضاع فمش هيتضحك عليه في محصول وكده.

*️⃣ نظام الملتزم كان لعنة علي الفلاحين وخاصة ان اتطبق مع بداية النصف الثاني من عصر العثمانيين وهو الضعف؛ المهم الفلوس تيجي؛ الملتزم كان عنده سلطات مهولة عالفلاح يعني يقدر ياخد منه الارض ويديها لحد تاني؛ مهو نفتكر سوا دي ارض الدولة؛ اه ممكن تكون عائلتك بقالها 500 سنة بتزرعها بس تفضل ارض الدولة مش ارضك.

*️⃣ جت الحملة الفرنسية مصر وبدأت تتعامل معاها انها مستمرة هنا فبدأت تراجع القوانين والأوضاع؛ مفهموش قوي منظومة إدارة الأرض وبدأ "مينو" يدرس عمل قانون تملك للأرض لحائزها زي الطبيعي؛ لكن خرجت الحملة ومصدرش القانون.

*️⃣ جه بقي محمد علي؛ وهنا نشد خط بقي؛ اللي فات حمادة واللي جاي حمادة تاني خاااالص.

*️⃣ محمد علي كان شخصية عسكرية قوية؛ هدفه تكوين جيش قوي والسيطرة الشاملة؛ وفي الطريق لدا قام بإبادة أي حاجة تقف أو تعارض؛ مييين ليه كلمة عالشعب؟ علماء الدين؟ اقتل وانفي منهم ناس؛ زي عمر مكرم اللي نفاه الي دمياط (وقتها منفى)؛ هااا مين تاني؟ المماليك؟ خلاص مذبحة القلعه؛ هاااا خلصنا؟ الفلاحين مالهم بيخافوا من الملتزم أكثر من الدولة ليه؟ قرار بإلغاء نظام الملتزم دا.

*️⃣ في البداية كأي شعب طيوب كده في نفسه؛ الناس فرحت للتخلص من الملتزم اللي كان قارفهم (طيبين قوي الناس دي) ؛ لكن بعدها عمل محمد علي سلسلة قوانين وقرارات فعلياً خلت الفلاحين كلهم أشبه بعبيد في الأرض؛ يعني زمان كنت بتشتغل في الأرض وتدفع مبلغ معين الملتزم كل شوية يزوده عليك والباقي ليك؛ لاااا دلوقتي الأرض دي بقيت انتا شغال فيها وعليك تطلع خيرها للدولة.

*️⃣ مكتفاش محمد علي ب دا وفي ديسمبر 1812 طلع قرار بإلغاء أرض الأوقاف؛ قالك يعني ايه ناس توقف أرض لله؛ أمال انا هنا بعمل ايه؛ مفيش حاجة اسمها أرض للانفاق علي وقف خيري وأرض للانفاق علي طلبة العلم وأرض للانفاق علي الشيوخ وو ؛ لااااا كل الارض دي تروك للدولة؛ والدولة تبقي تدي الناس دي اللي فيه النصيب بقي.

*️⃣ الخلاصة قوانين محمد علي المتتالية خلته هو المزارع الوحيد ومالك الأرض الوحيد فعلياً؛ اه فضل في شوية ملكيات خاصة لبعض كبار رجال الدولة لكن في النهاية الكلام دا شكلي.

*️⃣ محمد علي ركز بقي في توسعه الأرض الزراعية؛ زمااان كانت الارض مسؤلية الشعب لكنها دلوقتي ملك خاص بيا؛ فقعد يعمل قنوات وجسور وسدود ومشاريع ري فدا زود مساحة الارض القابلة للزراعة من 2 مليون فدان ساعة وصوله للحكم 1805 الي 3.9 مليون فدان وقت وفاته 1848.

*️⃣ ركز العصر بتاع الباشا على زراعة القطن عشان التصدير وزراعة القمح كالعادة. ولاحظ محمد علي الأرباح من القطن اللي في الفترة من 1820 الي 1834 كان متوسط سعر شرا القطن 12 قرش والبيع 60 قرش؛ يعني هامش ربح ممتاز فتوسع في زراعته.

*️⃣ في مشاريع محمد علي التوسعية دي للجسور والأنهار؛ كان عاوز يقلل التكلفة علي نفسه فعمل نظام عمل إجباري مجاني عرف لاحقاً باسم (السخرة) فكان كل مصري أو مصرية من سنة 18 الي 50 عليه يأدي عمل مجاني مستمر لصالح مشاريع الدولة. للأمانة نظام السخرة كان موجود من ايام الفراعنة وكان المصريين عبيد في الأرض؛ لكن محمد علي عمله نظام وقواعد ورتبه بحيث محدش يفلت منه ولا يعرف يهرب؛ نظام السخرة وصل لاحقا ان العامل يشتغل 100 يوم في السنة لدا الباشا مجانا وبدون حتي مسئولية للدولة والباشا انهم يأكلوه.

*️⃣ الخلاصة محمد علي ضاعف أرض مصر وزود انتاجها وشق ترع وانهار ونظم الزراعة وو؛ عمل دولة عظيمة لكن علي حساب استعباد المصريين كما لم يفعل أحد من قبله.

*️⃣ بعد وفاة محمد علي وابنه ابراهيم وانتهاء العصر الغامض الخديوي عباس حلمي الأول؛ جه الخديوي سعيد ودا كان بيكره جده محمد علي ومشي علي كل عهده بأستيكه حرفياً؛ خير أو شر؛ يعني محمد علي بيبعت بعثات تعليمية يبقي وقفها؛ محمد علي فتح جامعات اقفلها؛ محمد علي بيخلي الفلاحين خدامين في الأرض والدولة تختار بعد موت الفلاح ايه يحصل؛ لا خلي الفلاح ممكن يورث الارض اللي بيديرها لاولاده عادي. هو شاف جده عمل ايه وعمل عكسه. الخلاصة عصر الخديوي سعيد عمل شوية قوانين تخلي الفلاح كإنه مالك خلاص للارض لكن مع استمرار دفع ضرائب باهظه للحكومة. لكن بدأت بوادر ملكية الفلاح والمصري للأرض.

*️⃣ جه الخديوي اسماعيل ودا كان نسخة من جده محمد علي ونفسه يعمل مجد شخصي زيه؛ وكمان مجد عسكري زي ابوه ابراهيم باشا؛ فقال يأمن مجري النيل وبعت جيشين اثيوبيا تم ابادة الاثنين للأسف؛ وفي الوقت نفسه شق عشرات الانهار والترع والقنوات قيل ان عددهم 112 ترعة اشهرهم الترعة الإبراهيمية باسم ابوه؛ ترعة الاسماعيلية باسمه؛ وطبعا الاثنين استخدم فيهم السخرة ومعاهم قناة السويس سخرة برضك فمات في عهده عشرات الالاف من المصريين من الاستعباد. وفي المقابل مساحة الارض المزروعة زادت من 4 مليون الي 4.8 مليون.

*️⃣ حصل بداية عهده خبر كويس؛ الحرب الأهلية الامريكية اللي كانت شغالة قبل وصوله اوقفت خالص أمريكا من سوق تصدير حاصلات زراعية؛ وأوروبا كانت معتمدة علي أمريكا في القطن؛ فهنا بقي مفيش غير مصر؛ فتصدير القطن حقق ارباح تاريخية؛ وهنا بدأت بذرة فكرة فضلت تكبر مع الزمن.

*️⃣ الفكرة كانت هو ليه احنا نزرع قمح عشان نأكل المصريين لما ممكن نزرع قطن ونصدر ونجيب فلوس للدولة 🤔🤔 مين المصريين دول اللي نهتم لأكلهم 🤔🤔 وبشكل تدريجي عبر سنين طويلة بدأت كل سنة مساحة القمح المزروعة تقل تدريجي ومساحة القطن تزيد. وعلي 1900 كان القطن يمثل 80-90% من صادرات مصر ومصر بتستورد قمح.

نكتفي بهذا القدر في الجزء الأول وقريب الثاني (لسه مخلصتوش)

وهضيف المصادر في الجزء الثاني لو كان الاخير

الفيسبوك مرهق بيستنزف الشخص بشكل مش طبيعي... كم المعلومات والأحداث اللي بتتضخ في مخنا غير منطقي ومينفعش المخ يحصل فيه كده.

مئات البوستات والأخبار المختلفة في شتى المجالات... حتى لو قعدت تفلتر الفيس وتقلل الناس فهو مصمم عشان يظهر لك كم هائل ودا الهدف أصلاً.

إنك تلاقي تفاصيل كثير عن ناس أنتا أصلاً مش هيهمك تعرف كم التفاصيل دي عنهم...

خبر حلو وراه خبر وحش... وفي مجالك حتى إن أردت ودخلت جروبات للبيزنس بتاعك... برضك مفيش فايدة مع الوقت الجروبات دي بيكون فيها آلاف الأشخاص اللي بينزلوا غشرات البوستات...

الموضوع بقى مرهق بالفعل والتلاعب بالمشاعر مش طبيعي.. خبر كويس وانتا تفرح وراه تقرأ خبر سلبي يجيب مودك الأرض.

وبالنسبة لي الفيسبوك بقى ضرره عليا أكثر من فائدته؛ لولا إن في كذا شخص أنا عارفهم وبستفاد من بوستاتهم لكنت قفلته... بس مع الوقت الناس دي عددها بيقل تدريجي وكذا شخص منهم ساب الفيس أو اهتم بشغله الخاص وبطل الفيس

وهنا ييجي السؤال هو ليه نكتب... ايه الازمة إننا نكتب أصلاً؛ أو حتى نبقى في الفيس لو كل اللي بيفيدونا مشيوا

نحب نفكر الناس إن بعد ما يخلص موضوع غرامات التصالح في شوية حاجات طلع لها قرارات برضك:

*️⃣ أي محل لازم يعمل ترخيص بيوصل 50 ألف جنية (كمان بتوصل ل 100 ألف للمميز زي المولات والمحلات فوق 90 متر مساحة).
*️⃣ أي قهوة لازم تعمل ترخيص عشان تقدم الشيشة ب 10 الاف جنية غير ال 50 بتوع المحل نفسه.
*️⃣ عربيات الفول بقى وأي عربيات أكل ليها ترخيص 20 ألف جنية وشوية شروط كده.
*️⃣ الأخوه السياس ليهم ترخيص 2000 جنية ويجدد.
*️⃣ حتي الشوارع في قانون صدر يسمح بتأجير الشوارع؛ يعني مفيش حاجة اسمها مش هدفع للسايس؛ دا الشارع بتاع شركته ومأجرينه يعني كده تعدي علي املاكهم
*️⃣ والمواقع ليها ترخيص 50-100 ألف بس مش كل المواقع.
*️⃣ القنوات الفضائية بقى ليها رسوم ترخيص 250 ألف جنية.

بصوا هكتفي بكده؛ أنا بس قولت أقولكم شوية قوانين صادرة بالفعل لكن الحكومة واخده المواطن بالدور كده؛ اللي هو يلا شد حيلك وادفع في شقتك المخالفة عشان هتنزل القهوة تلاقيه زود الأسعار عشان الترخيص (القانون بيقول 5 سنين لتوفيق الأوضاع).

فيا ريت بقى مش كل ما حد يشوف قانون طلع ولا قرار زيادة 16 قرش دمغة موبايل يروح عاملي مينشن يقولي بص 16 قرش زادوا... بص هياخدوا 2 جنية في استعلام وسحب...
نكبر كده ونبص عالآلاف ونبطل بقى نركز مع الفكة

أنا عارف إن البوست دا ممكن يزعل ناس مني لإني هقول رأيي في موضوع مخالفات ورسوم التصالح في موضوع البناء.

هو المعتاد الناس تقعد تكتب يالهوي ايه الافترا دا وايه الظلم دا ووو؛ لكني مش شايف الموضوع غلط بشكل كامل؛ اه في حاجات ناقصة زي حساب موظفي الأحياء اللي كانوا بياخدوا رشاوي؛ لكن الموضوع ك مجمل انا موافق عليه.

*️⃣ يقعدوا يقولوا اصل الناس اضطرت تبني؛ ليه اضطر يبني حضرتك؟ هو غالبية المخالفات هي ناس عندها بيت راحت بانية دور شقتين لعيالهم الاثنين اللي كبروا يتجوزوا فيها!!!! ولا اللي كان بيبني دا كان تاجر مقاول عاوز يكسب ملاييين ويتحرق البلد باللي فيها.

*️⃣ هتقولي طيب وهو اللي اشتري ايه ذنبه؟ معلش هو اللي اشتري دا بيكون جاي من كوكب زحل مثلاً؛ ما كلنا بنكون شايفين ان دي عمارة 5 ادوار بقالها 20 سنة هوووب الراجل صاحب البيت خلاها 10 ادوار؛ وبيبيع... فمفيش حد في الحته غير بيكون عارف ان دي مخالفة... والشقق المخالفة بتباع بسعر أقل من سعر الشقق الطبيعية. فانتا شاري شقة بسعر ارخص عشان هي مخالفة؛ فانتا شريك في الجريمة.

*️⃣ ايه دا يا عم بن سامي انتا هتخليها جريمة ليه؟ 🤔 🤔 هقولك ليه؛ عشان منطقة زي اللي جدتي رحمها الله كانت فيها وهي منطقة النعام؛ وانا صغير كنت بحب أروح هناك قوي؛ معظم المنطقة فيلات والجو الملكي القديم؛ هووووب كل فيلا تتباع ومقاول يشتريها ويهدها ويبني عمارة 10 و 15 دور. فبقت كارثة.

*️⃣ ومش بكلمك هنا ان الكارثة ان شكل المنطقة وياااي وجو الفرافير دا؛ لا خالص؛ كارثة ان شبكات المرافق من صرف صحي ومايه وكهرباء مش مصممه لعدد السكان دا؛ انتا دفعت رشوة للحي والعمارة اتبنت وكإن كده المشاكل خلصت؛ هوووب المنطقة بقي فيها 5 اضعاف عدد السكان؛ فكل شوية ماسورة صرف تضرب ومايه تضرب والكهرباء البوكسات متستحملش وتفصل والنت يبقي زفت لان الكباين والسنترال غير مصمم للعدد دا.

*️⃣ مين بقي اللي عمل دا وبهدل الناس اللي عايشة في المكان دا من زمان؟ مين اللي تسبب ان شبكات المرافق تنهار ودا اهدار للمال العام؟ مين تسبب ان الشوارع بقت هناك زحمة عشان عدد السكان الرهيب اللي زاد فيها 🤔🤔 متقوليش المقاول لان المقاول لو ملقاش زبون يشتري مكانش هيصرف ويبني عمارة... انتم اللي دفعتم فلوس للمقاول وساعدتوه في الجريمة دي؛ وتسببتم ان الناس تقول بص اخد الارض وعمل عمارة وكسب ملايين يلا نعمل زيه فالوباء انتشر.

*️⃣ ايوا يعني الناس تعمل ايه هتسكن فين؟ 🤔 🤔؛ اقولك تسكن فين؛ مش لازم تسكن جنب بعضها؛ اللي مولود في شبرا بيدور علي شقة في شبرا واللي من المطرية عاوز يسكن في المطرية؛ ودا نظريا مش عيب عادي حق لكل شخص؛ لكن المشكلة ان المكان خلاص مش مستوعب عدد جديد؛ لكن الناس عاوزه هنا؛ فييجي المقاول يبني مخالف والناس تشتري منه. فالطلب بتاع الناس يخلي الاسعار تزيد؛ فلما الأسعار فالمقاولين يلاقوها فرصة ويعملوا العماير المخالفة... وتقعد الناس تعيط وتقول شوف الاسعار بتاعة الشقق زادت ازاي 🤔🤔. مهو انتم السبب.

*️⃣ فاكرين التسعينات كانت الحكومة بتدلل علي الشقق في التجمع واكتوبر والعبور؛ اي حد عاوز شقة كان بيقدم وياخدها وكانوا بيدفعوا 5 الاف اظن وقسط 80 جنية وحاجات بسيطة؛ لكن الناس تقول ايه؟ 🤔 🤔 انا ايه اللي يوديني بعيد انا عاوز شقة هنا جنبي حتي لو مخالفة وحتي لو هسبب ازمة وادمر البنية التحتيه واعمل زحمة؛ خلاص بقي انتا اللي كنت عاوز ومصر فليه معترض دلوقتي انهم بيدفعوك.

*️⃣ ولا الكوارث في الأراضي الزراعية؛ الناس عاوزة تسكن هنا في المدينة دي هو كده؛ دخلي لنا يا حكومة ارض نجرفها وما يسمي (كردون المباني) ولو الحكومة معملتش كردون مباني الناس مع نفسها تجرف وتعمل؛ ياخي تييييت؛ تجرف الارض الزراعية 😡😡😡 عشان جنابك عاوز تسكن هنا جنب اهلك؛ ونخسر اراضي ونستورد اغذية اكثر فالدولار يزيد سعره واسعار الاكل تزيد؛ والناس تقعد تعيط وتقول سعر الاكل زاد سعر الدولار زاد؛ يعني انتا مكنتش شريك في الجريمة دي؛ دولة 96% من ارضها صحراء وشعبها قاعد يجرف ال 4% اللي فاضله.

*️⃣ وييجي واحد يقولك مساحة الأرض الزراعية عمرها ما نقصت؛ اه الناس جرفت اراضي لكن الحكومة ورجال الاعمال استصلحوا غيرها؛ لا يا راجل 😡😡 وبالنسبة للزيادة السكانية معاليك؟ 🤔 لما يكون مساحة ارضك الزراعية 6 مليون وشعبك 40 مليون ؛ فلما شعبك يبقي 80 مليون ارضك الزراعية مفروض تبقي عالاقل 9-10 مليون وتقنيات الزراعة تخلي الانتاج يوصل يوازي 12 مليون قديم فكده انتا عوضت الزيادة... مش تروح مجرفلي 1 مليون فدان قديم... استصلاح الاراضي دوره يعوض الزيادة السكانية مش يعوض تجريف الأرض يا بهايم.

*️⃣ فمن الاخر اه احنا السبب؛ اه عارف هتقولي اصل مفروض الحكومة كانت تمنعه؛ طيب اسأل نفسك سؤال؛ لو عندك دلوقتي حته ارض والحكومة قررت تمنع البناء في المنطقة بتاعتك؛ هااا انتا موافق؟ 🤔 طبعا لا معترض وعاوز تبني برضك؛ شايف منطقتك منهارة وزحمة؛ هااا انتا موافق ولا هتقول اشمعني انا مبنيش انا عاوز ابني عمارة برضك واكسب مجتش عليا؛ طيب لو الحكومة سابتك تبني هل مش هتعرض على تردي حال المرافق عندك ولا هتشتم برضك 🤔 هتقول اشمعني سنترالات المدن الجديدة الناس عندها نت 100 ميجا عادي واحنا مش بيعدي 15 ميجا 🤔 ولما تعملوا كارثة مرورية في منطقتكم وتيجي الحكومة كالعادة ترزع كوبري مش هتعيطوا منه 🤔 هااا كونوا صادقين مع نفسكم.

*️⃣ أنا لو كملت شوية هقولكم كلام شبه بتاع أحمد موسى 😂 بس بجد الناس هي سبب رئيسي (مش وحيد طبعا لكن رئيسي) في كثير من مشاكلها.

*️⃣ ساعات كثير بحس ان الناس بتطالب بعموم الفساد وليس عموم الإصلاح؛ يعني لو في تصرف غلط بيتم اصلاحه؛ الناس مش بتطالب ان الاصلاح يشمل الكل؛ لااااا هما عاوزين يتسابوا زي ما الاخرين متسابين مش عاوزين الاخرين يتحاسبوا زي ما هما بيتحاسبوا؛ وشتان الفارق بين الاثنين.

*️⃣ انا معرفش رسوم التصالح مناسبة ولا مرتفعه بعد التعديلات؛ بس انا كان نفسي الاراضي الزراعية يكون في عقوبة ضخمة عليها؛ اللي يجرف فدان ارض فهو ملزم بدفع تعويض يساوي تكلفة استصلاح 3 فدادين أرض؛ مش مبالغ محددة حاليا بل المصيبة ساعات القري التصالح فيها ارخص من المدن؛ ودا قمة التخلف؛ دا في المدن اللي بيخرب فهو اخره بيضر ماسورة ماية ويعمل زحمة ؛ بس خراب القرى بيضر شعب بحاله في أكله وحياته ويفقد البلد ارض كانت هتطلع لهم أكل بقينا دلوقتي بندفع دولارات عشان نستورده

واللي عاوز يفهم كلامي دا اني بقول المسئولية فقط وحصري عالشعب فدا عنده مشاكل في الاستيعاب؛ لكن بقول ان برضك مهواش الحكومة وحشة كخه والشعب كيوت بيرفرف بجناحات ومظلوم يا عيني. انا حاسس اني هكتب كلنا فاسدون 😂😂

*️⃣ كفاية فوضي ولازم نظام يتعمل؛ اه النظام فيه استثناءات لكنه عالاقل هيقلل الفوضى اللي بتحصل عندنا؛ وعشان كده انا مع عقاب كل شخص خالف وتسبب في ضرر لينا عشان هو عاوز يعمل مصلحة ويكسب ؛ او عاوز يسكن هنا حتي لو سكنه دا هيضر الناس؛ وطالما هو طبق سياسة طز في غيري انا عاوز مصلحتي؛ عاوزني ليه اتعاطف معاك دلوقتي يعني؛ هذه بضاعتكم ردت إليكم

في خبر ظريف بلومبيرج نشرته من كام يوم وهو إن أبل بدأت خطة عصر ما بعد القادة الحاليين

بيقولك إن تيم كوك دلوقتي بقاله فوق ال 10 سنين وثروته تجاوزت المليار دولار... ومعظم القادة بتوع أبل والحرس القديم لستيف جوبز خلاص بقالهم فوق الـ 20 سنة وبقى معاهم عشرات الملايين من الدولارات وكمان أعمارهم ما بين 55-60 سنة

عشان كده الشركة بدأت تجهز نفسها للقادة دول لو حد فيهم قرر يتقاعد في أي وقت مين هيكون بداله ودا يسري على تيم كوك نفسه اللي هيمسك وقتها بداله جيف وليامز اللي هو برضك ماسك Operation. الظريف إن تيم كوك برضك كان ماسك العمليات ايام ستيف جوبز ولما ستيف استقال تيم كوك مسك المنصب فواضح إن اللي هيمسك الأوبريشن بعد كده بيكون رئيس أبل :D ... فكده نتوقع إن خليفة جيف وليامز في الأوبريشن "صبيح خان" وبكده نتوقع أبل كمان تبقى مستقبلاً زي أخواتها جوجل وماستر كارد ومايكروسوفت و IBM وأدوبي ونوكيا وماكرون وغيرهم اللي مديريهم CEO هندي