معلش هي أبل بتقول خدمتها مدعومة في مصر من دول

البنك الاهلي ومصر والتجاري الدولي
و
S.A.E

مين دا؟
هو مفروض SAE
ترمز لشركة مساهمة مصرية

مين بقي دي؟

معلوماتي هنا صفر مش عارف؛ محدش يعرف كل حاجة؛ فهل حد يعرف ايه دا ومين SAE دي 🤔🤔

بيان محامي أحمد أبو زيد في قضية الأموال اللي متهم فيها

https://www.facebook.com/share/v/14gRWPqnfT/

توضيح بخصوص بوست إمبارح الصبح لما قولت عودة قناة السويس تعني 6 مليار دولار مفقوده وكذا حد اعترض وقال مبالغ فيه

*️⃣ دا ميزان المدفوعات الخاص الربع الثالث السنوي 2023 و 2024

*️⃣ هتلاقي قناة السويس حققت ال 3 شهور قبل الطوفان 2.399 مليار دولار؛ وال 3 شهور المماثلة من 24 حققت 931 مليون دولار يعني الفارق 1468 مليون دولار يعني متوسط شهري 489 مليون نقول 500 مليون دولار شهري يعني 6 مليار دولار سنوي اللي كنت قولتها

⬅️⬅️ وبشكل عام دا احدث ميزان مدفوعات لمصر لو حد حابب يعرف دخل الدولة الدولاري ككل وانفاقها في الربع

من شوية صندوق النقد نزل تحديثه الدوري لتوقعات الاقتصاد العالمي؛ الصندوق بيعمل توقعات كل 3 شهور وبيطلعها للدول؛ التقرير صغير 10 صفحات لو حد حابب هبقي اسيب رابط في التعليقات؛ عامة دا ملخص توقعات النمو للدول مقارنة مع توقعاته في أكتوبر.

*️⃣ كل اللي جاي دا كان يكفي سكرين شوت بداله بس وقتها كان هيتقالي اشرح؛ فقولت انقل الارقام من الاسكرين شوت... طبعا عارف هيتقال ليه نزلت وليه طلعت؛ دا موضوع تاني 😁... خلصت لكم الأسئلة اهي 😁؛ اه صحيح هيتقال فين باقي الدول؛ الصندوق هو اللي طلع توقعاته ل 30 اقتصاد عالمي ومعرفش اشمعني (هما الاكبر أصلاً).

*️⃣ للتذكير بس لو قولنا عندي اقتصاد ضخم قيمته مثلا 2000 مليار دولار عمل نمو ب 2% فكده يعني 40 مليار دولار.. بينما لو اقتصاد دولة تانية قيمته 200 مليار دولار حقق نمو 5% فدا يعني 10 مليار دولار... كده وضح بس ليه الدول الصغيرة بتحقق نمو عالي؛ لإنها الصغير سهل ينمو لكن الكبير مفيش مكان خلاص 🤣. 

*️⃣ طبعاً في دول كبيرة زي الصين والهند كبار أصلاً وبيعرفوا يعملوا نمو كبير؛ ملناش دعوة بيهم دول ناس جاحدة 🤣 تخيل الصين اقتصادها اد مصر 50 ولا 60 مرة وهتعمل نمو أكبر من مصر؛ يعني نموها في 2025 ممكن يبقي 3 اضعاف حجم مصر؛ النمو بس 😁 عامة دا ملخص التقرير. 

*️⃣ منطقتنا اللي هي MENA الشرق الأوسط وشمال أفريقيا

1️⃣ مصر توقع نمو في 2025 ب 3.6% وفي 2026 ب 4.1. 
2️⃣ السعودية توقع نمو في 2025 ب 3.3% وفي 2026 ب 4.1%
3️⃣ تركيا توقع نمو 2.6% في 2025 وفي 2026 ب 3.2%
4️⃣ إيران توقع نمو 3.1% في 2025 وفي 2026 ب 2.8%

⬅️⬅️⬅️⬅️ توقعات سنة 2025 النمو الاقتصادي:

*️⃣ أعلي نمو اقتصادي متوقع

الهند 6.5%
الفلبين 6.1%
كازخستان 5.5%
اندونيسيا 5.1%
الأرجنتين 5.0%

*️⃣ اقل نمو اقتصادي متوقع

ألمانيا 0.3%
ايطاليا 0.7%
فرنسا 0.8%
اليابان 1.1%
روسيا 1.4%

*️⃣ أكبر الدول انخفاض مقارنة بالتوقع السابق يعني التوقع الجديد أقل من القديم بالنسب التالية:

السعودية 1.3%
مصر  0.5%
ألمانيا  0.5%
كندا 0.4%
فرنسا 0.3%

*️⃣ أكبر الدول تحسن في التوقعات مقارنة بتوقع اكتوبر 2024:

كازخستان 0.9%
أمريكا 0.5%
اسبانيا 0.2%
الصين 0.1%
روسيا 0.1%

⬅️⬅️⬅️⬅️ سنة 2026 

*️⃣ أعلي نمو اقتصادي متوقع وهما هما بس شيلنا كازخستان:

الهند 6.5%
الفلبين 6.3%
اندونيسيا 5.1%
الارجنتين 5.0%

*️⃣ اقل نمو اقتصادي متوقع

اليابان 0.8%
ايطاليا 0.9%
فرنسا 1.1%
ألمانيا 1.1%

*️⃣ أكبر الدول انخفاض مقارنة بالتوقع السابق يعني التوقع الجديد اقل من القديم بالنسب التالية:

مصر  1.0%
المانيا 0.3%
السعودية 0.3%

*️⃣ أكبر الدول تحسن في التوقعات مقارنة بتوقع اكتوبر 2024

كازخستان 0.6%
الصين 0.4%
الارجنتين 0.3%

لينك التقرير بالعربي 😁 بالعربي أهووو يعني تقدر تقراه عربي؛ شوفت المفاجأة دي؛ مهو الصندوق بينزل تقاريره بالعربي برضك. 

https://www.imf.org/ar/Publications/WEO/Issues/2025/01/17/world-economic-outlook-update-january-2025

بالرخم إني بعتبر نفسي شخص أرشيفي لكن نادر ما بتصور؛ عندي صور وداتا كثير قوي عن تفاصيل كثير... بس صور شخصية ليا دا نادر؛ عشان كده قعدت أدور كثير على صورة ليا مع أحمد أبو زيد 😔.

*️⃣ أنا مكنتش في الظروف العادية بتكلم مع أحمد كثير؛ وغالباً هو بيحرم يكلمني 🤣؛ يبعت يسألني في موضوع أرد عليه برسايل صوتية نص ساعة وكده؛ عارف صاحبك اللي تقوله صباح الخير يرد عليك 100 رسالة؛ تخاف تقوله صباح الخير 😁 ... بالمناسبة البودكاست الأخير أصلاً حصل كده.

*️⃣ أحمد بعت يسألني في موضوع في رسالة؛ رديت عليه بعدد مهول من الرسايل هسيب صورة للشات في التعليقات دا 😁 بعت له 23 رسالة صوتية بمجموعة 56 دقيقة و 13 ثانية (خليت ChatGPT يجمع لي المدد)؛ أحمد قالي انتا عملت بودكاست في الواتس لا احنا نصور واحد تاني تقول الكلام دا فيه ايه رأيك؟ قولت له ماشي بس عاوز لحمة محمرة مش مسلوقة 🤣...

*️⃣ اه أومال ايه تقمصت هنيدي في فيلم فول الصين العظيم لما قال عاوز فول بقوطة ومحدش ياكل معايا 😁؛ هو كده الموضوع بسيط وأحمد بسيط قوي والكلام بيكون على طبيعتنا عادي؛ البودكاستات متصورة واحنا حافيين 😁.

⬅️ ربنا يفك كربك يا أحمد النهاردة إن شاء الله

لولي النهاردة راحت راحت أول امتحان ليها رسمي في حياتها؛ هي لسه 8 سنين لكن فجأة قرروا إن 2 ابتدائي تمتحن (عارف اسمها Grade 2 بس أنا من بتوع ابتدائي مش Grade معلش)...

*️⃣ واضح إن يوم 20 يناير عنده إصرار إنه يبقي في ذاكرتي؛ أنا والدتي توفت يوم 19 يناير 2022؛ إمبارح كانت ذكرى 3 سنين؛ بس اللي في ذاكرتي أكثر حاجة صباح يوم 20 يناير 2022 وصباح يوم 26 فبراير 2006 اللي هما اليومين اللي بعد وفاة ماما وبابا.

*️⃣ نفس السيناريو بصحي من النوم ولمدة كام ثانية اقف كده واقول هو دا كان كابوس صح؛ يعني دا كان حلم طويل وبابا موجود او ماما موجودة. مش هعرف اشرحها مظبوط بس مخك بيكون مش فاهم شوية أو حالة نكران وبرمجك في المرتين اللي في فارق بينهم 16 سنة ان دا حلم مش أكثر.

*️⃣ الله يرحمك يا أمي ويا أبي وكان الله في عونك يا لولي؛ بكرهه أيام الامتحانات بالرغم إني كنت شاطر وأنا طفل؛ طفل بس.

عارفين العدوان الثلاثي؛ هو مين اللي كسب في العدوان الثلاثي؟

*️⃣ خساير مصر كام؟ طبعاً الارقام بتختلف حسب المصادر بس مصر خسرت ما بين 2500-3000 شهيد... نبص العدو بقي؛ فرنسا عندنا 10؛ ايوا 10 مستغرب الرقم ليه؛ انجلترا خسائرها أكبر وصلت ل 22 يعني خساير انجلترا وفرنسا معا 32... وصراحة في مصادر بتقول العدد 80-90 وانجلترا وفرنسا خبوا... وولاد المبقعة عندهم خساير كبيرة وصلت ل 172.

*️⃣ لما بييجي اي حد يكتب عن الحرب دي بيقول ايه؟ انتصار عسكري لدول العدوان الثلاثي؛ وانتصار سياسي لمصر.

*️⃣ انتصار عسكري ليهم يعني مدخلوش في معركة واتهزموا؛ سحقوا مصر كليا؛ شايف ارقام الخساير فوق؟ المصابين بقي يقال مصر عندها 5000 مصاب و 6000 أسير... الفرنسيين عندهم 33 مصاب وانجلترا 97 مصاب 😔 وحتي ولاد ال... اللي وصلوا ل 800 مصاب.

*️⃣ دا مصر من ضمن خسائرها مدمرة حربية تدعي إبراهيم الأول اتأسرت واسرائيل اخدتها وعدلتها وبقت سفينة حربية تبعهم وهجموا علينا بيها في حرب 1967... دا تم إجبار مصر على الغاء قرار الملك فاروق باغلاق مضيق تيران ومنع الملاحة العسكرية للعدو وتفتيش أي سفينة مدنية تعدي حتي لو امريكية او انجليزية ولو شايلة سلع مصر حاظرة دخلوها لميناء إيلات كانت السفينة بترجع.. واستمر القرار تفتيش السفن من 1949 لغاية الغاءه في 1957.

*️⃣ فعسكرياً انتا اتسحقت؛ لكن مصر انتصرت؛ العدو جه مصر أهدافهم محددة؛ القضاء علي النظام الناصري وفشلوا؛ واستعادة قناة السويس وفشلوا وايقاف دعم مصر للثورة الجزائرية وفشلوا... بل امعاناً في الفشل بعد الحرب حكوماتهم سقطت.

*️⃣ انجلترا يوم 22 ديسمبر غادر اخر جندي إنجليزي؛ يوم 9 يناير انهارت حكومة إيدن وانتهي مستقبله السياسي فمن 1957 لغاية ما مات سنة 1977 ممسكش اي منصب تاني ولا حتي عضو برلمان؛ تقاعد وقعد عالكنبة ولبس الجلابية الانجليزي.

*️⃣ فرنسا بقي كانت حكومي (كوتي) وأصلا كانت غرقانه في المشاكل الداخلية والثورة الجزائرية مطلعه عينهم؛ ضحي كوتي في يونيو 57 ب (موليه) رئيس الوزراء وممسكش تاني باقي حياته ولا حتي وزير ري وان كان فضل عضو برطمان... لكن في النهاية في 1959 انهارت الجمهورية الرابعة الفرنسية وقعدوا كلهم في البيت.

*️⃣ ولاد المبقعة بقي وضعهم احسن؛ فضلوا قاعدين في سيناء لمارس 1957 واخدوا فك حصار مصر البحري عليهم وتشغيل ميناء إيلات فالحكومة كملت ورباعي بن جوريون وجولدا مائير وشيمون بيريز وموشيه ديان بعد كده وضعهم بقي أفضل.

*️⃣ فهنا ييجي السؤال؛ انتا خسرت ولا كسبت في حرب 56؟ خسائرك 10 اضعاف العدو؛ اتدمرت مدينة بورسعيد واتضربت القاهرة وإسكندرية بالطيران... وتم اجبارك علي فك الحصار البحري؛ وتم اجبارك علي دفع تعويضات وشراء قناة السويس لدرجة ان مصر اخدت قروض من السوفيت عشان تبني السد العالي لان ايراد القناة رايح لسداد سعرها.

*️⃣ لكن بسبي عدم تحقيق العدو لاهدافه بتتكتب كده في الكتب... حرب 1956 تسببت في انتصار عسكري لجيش الثلاثي وانتصار دبلوماسي سياسي لمصر... اسمها بقي يتردد في كل مكان وبقت رمز للصمود حول العالم. وللتذكير انا ضد عبد الناصر والفكر الناصري ككل لكن للأمانة بس بسبب الحرب دي بقي هو الرمز في العالم الثالث؛ بقي يعتبر UnderDog للكوكب.

*️⃣ فرؤيتك الفلسطنيين كسبوا ولا خسروا؛ هي زي حرب 56 لو شايف مصر خسرت فغزة خسرت؛ لو شايفنا كسبنا فبرضك هما كسبوا. بالمناسبة هما قتلوا واصابوا من ولاد الكلب 10 اضعاف اللي احنا عملناه... بل اللي اصابوه منهم يفوق اللي جيوش مصر وسوريا المدعومين من كوريا الشمالية وكوبا والعراق والمغرب والاردن والسعودية اصابوه للعدو في حرب 73... فبلاش تقلل من مجهود الآخرين...

⬅️ بالنسبة لي احنا اللي انتصرنا في 56 رغم الخسارة العسكرية والتنازلات

أنا كنت بقول إن الحد الأدني للأجور هيتغير ل 7500 الشهر القادم؛ وبعدين الجرايد كانت كاتبه 7000 جنية التوقع؛ فأنا قولت مفروض نقسم البلد نصين؛ المهم من إمبارح والأخبار بقت تقول التوقع 7200 يعني زيادة 20% هتعلن في فبراير والتنفيذ في مرتبات مارس عشان الناس تعيد بالزيادة 😁.

*️⃣ اللي مهتم قوي بيه هو حد الإعفاء الضريبي؛ يعني حالياً الرواتب 6000 جنية يعني سنوي 72 الف؛ وحد الإعفاء الضريبي 60 ألف للموظفين؛ يعني اللي خاضع للضريبة 12 ألف بس. (حد الاعفاء 40 الف وفي 20 الف فوقهم شخصي للموظفين فقط)

*️⃣ دلوقتي هيبقي 7200 يعني سنوي 86.4 ألف فمفروض حد الإعفاء يزيد ل 75 ألف؛ أصل لو سبناه 40+20 كما هو فكده في 26.4 بقوا خاضعين للضريبة.

عامة ادينا هنشوف الدنيا هتمشي إزاي.

البوست خلص 😁 ايوا خلص اصلي مشغول فمش فاضي اكتب وقولت مسبش الناس كده بدون بوستات جديدة احسن ينسوني؛ البعيد عن البوست بعيد عن القلب 😁 قلش رخيص 🙄

الذكاء الصناعي

*️⃣ حكومة أبو ظبي أعلنت عن خطة تستثمر فيها 13 مليار درهم عشان تتحول في 2027 لتصبح أول حكومة تعتمد الذكاء الصناعي في العالم.

*️⃣ ترامبو اعلن عن مشروع ستارجيت للذكاء الصناعي بقيمة 500 مليار دولار.

*️⃣ السعودية ستعلن قريباً عن مشروع ضخم ب 100 مليار دولار في مجال الذكاء الصناعي؛ وبتخطط السعودية بحلول 2030 تبقي استثماراتها السنوية في الذكاء الصناعي 70 مليار دولار.

*️⃣ شركة بايت دانس المالكة لتطبيق تيك توك الشهير أعلنت إنها هتصرف 12 مليار دولار السنة دي 2025 في الذكاء الصناعي.

*️⃣ الصين اعلنت عن صندوق (جديد) للاستثمار في للذكاء الصناعي برأس مال 8.2 مليار دولار... دا مجرد استثمار جديد اعلن من يومين

*️⃣ محدش يقولي مصر فين؛ روح اختم الورقة دي من الدور الثالث وبعدين تعالي كلمني 😁 بهزر طبعا أكيد عندنا خطة بس مش عاوزين حد يبوظها لنا فشغالين في السر عشان نبهرهم؛ فاكرني بهزر او بتريق 🤔؛ احنا خلاص خلصنا الإصدار الأول من استراتيجية الذكاء الصناعي المصري اللي بداناها في مايو 2021.

⬅️ إمبارح مصر كشفت عن الإصدار الثاني من استراتيجية الذكاء الاصطناعي وهي تعتمد على 6 محاور أساسية وهي محور الحوكمة ومحور للتكنولوجيا ومحور البيانات ومحور البنية التحتية ومحور النظام البيئي ومحور المهارات. آخر 3 محاور هي تبع الاصدار الثاني؛ الاصدار الأول كان حوكمة وتكنولوجيا وبيانات. ضيفنا 3 محاور في الاصدار الثاني. ولسه في اصدارات قادمة جديدة يمكن سنة 27 او 28 كده.

خناقة كبيرة شغالة بقالها كذا يوم على قرار كلية طب الازهر بداية تعريب التدريس طب وصيدلة فقولت أخش فيها أنا كمان؛ ولا هي جت عليا 😁.

فريق المعارضين

⬅️ الفريق شايف دا تخلف وهنستخدم مصطلحات غريبة زي زمان لما كان حمض الكبريتيك H2SO4 لما كان اسمه (يد 2 كب أ 4).. فبطلوا تخلف بقى... دا 90% من المنشورات العلمية بتكون بالإنجليزي وانتا جاي تقولي عربي... إحنا معندناش نتاج علمي؛ لما تبقي حاجة ابقي قول هعمل تعريب علوم خلاص ذلك شوف أصحاب العلوم عاوزين إيه وماشيين إزاي واعمل زيهم... هتعلم الناس بالعربي وبعدين؟ هيسافروا يشتغلوا يقولوا لهم مثبطات والنشواني والكلام دا؟ بطلوا تخلف وخليكم زي الدول المتحضرة.

الفريق المؤيد

⬅️ بيقولك طيب طالما لغة العلم في العالم و 90% من الابحاث العلمية هي انجليزي؛ طيب ليه كل دول العالم بتدرس بلغاتها المحلية؛ عدا الدول العربية +افريقيا + الهند بس... وحتي افريقبا والهند بيدرسوا انجليزي وفرنساوي اه بس دي أصلا من اللغات الرسمية هناك؛ السنغالي بيدرس طب بالفرنساوي بس هو اصلا بيتكلم فرنساوي.... مفيش في الكوكب دول بتدرس العلوم بلغة غير متداولة غير حصراً الدول العربية... فليه الصين بتدرس بالصيني هما معرفوش ان العلم لازم يبقي بلغة الاسياد بس؟ طيب هو في بلد بتتكلم روماني غير رومانيا او سلوفاكي او ايطالي او او عشان الدول دي تدرس بلغتها؟ هيطلعوا خريج مش عالمي وجاهل كده. الانسان بيفكر بلغته الأم فليه يدرس بلغة غير اللي بيفكر بيها؟

الطرفين على حق

*️⃣ دي خلاصة الخناقة... وبصراحة الطرفين عندهم حق؛ أيوا الاثنين ففعلا العلم في العالم اساسة انجليزي؛ وهنا ييجي السؤال وهو إزاي الدول بتتغلب على دا؟ يعني بيدرسوا بلغتهم الأم وبرضك مش بيطلعوا خريج منفصل عن الكوكب ومش مواكب العلم؟

الدول عملت إيه

*️⃣ لما دورت لقيت الدول بتمشي في كذا مسار؛ فمثلاً في عدة دول عندها نظام أساسي وهو التعليم من الصغر لغاية ما تتخرج من الجامعة باللغة الأم؛ حابب تتطور بقي وتعمل ماجستير ودكتوراه فدول بالإنجليزية...

دول أخرى

*️⃣ في دول تانية زي مثلاً ماليزيا وتركيا بيدرسوا باللغة المحلية؛ لكن في نفس الجامعات في أوبشن تاني التدريس بالانجليزية وهدفهم بالخيار دا جذب الطالب اللي عاوز يكمل بره + الطلبة الاجانب؛ يعني واحد مصري هيسافر يدرس في تركيا بالتركي إزاي 🙄 فعاملين أوبشن انجليزي.

تجهيز للتطور

*️⃣ طيب النموذجين من الدول دي يعملوا إيه في الطالب بتاعهم؟ يعني حد درس وتخرج من المسار التعليمي باللغة المحلية النرويجية ولا التركية ولا الماليزية وبعدين الراجل حب يسافر يكمل بره يعمل ايه؟ هنا برضك الدولة مش بتسيبه وعندها سيستم كامل معمول عشان يرشدك ويساعدك في الاختلافات الطبية؛ وأصلا في اثناء الدراسة تعليم انجليزي وفي توضيحات الكلمة دي معناها ايه بالانجليزي بحيث يعني ميبقاش أول مرة يشوف الكلام دا في المعادلة 😁 عدى عليه الكلام أثناء الدراسة وإن كام ممتحنش فيه.

*️⃣ بالإضافة لدا فالعملية التعليمية مش بتكون النهاردة بنقول H2O الماية وبكره تقوله يد 2 أ... دا كده اشبه بالدبلجة؛ في فارق بين التعريب وبين الترجمة؛ تلاقي في مطعم (أصابع سيدة) ويكون دا Ladyfinger ودي ترجمة حرفية؛ التعريب بيكون انك بتسميها اسم تاني؛ ومتقوليش صوابع زينب (قولت اسبق التعليقات واقلش علي نفسي)... فإنتا إما بتشوف معني محلي مناسب أو خلاص الحاجات دي تتنقل كما هي... هو يعني الغرب لما نقل العلوم راح عمل بديل لأسماء البشر وقالك مينفعش نقول خوازميات لا عادي قالها algorithm؛ حرف بس الاسم شوية عشان يتنطق.

*️⃣ من الدول المشهورة في المجال دا كوريا الجنوبية بتعرف تعمل تعديل مصطلحات لكلام ذو معنى؛ لان الترجمة النصية متنفعش؛ محدش ييترجم نصي والا هتبقب كوميديا؛ ومتاكلش دماغي بقي 😁 ترجمها دي حرفي كده 🙄🙄.

مواكبة العلم

*️⃣ الحاجة الثانية المطلوبة هي مواكبة العلم؛ طيب أنا ترجمت المناهج بس في علوم جديدة وابحاث بتنشر وكده؛ احنا قولنا هيبقي في خيار تعليم اجنبي طيب وهل دا متاح للكل؟ طبعاً مستحيل فهنا برضك الدول بتعمل حركة ترجمة ضخمة برعاية الدولة نفسها.

*️⃣ فالابحاث اللي بتنشر والمقالات العلمية والكتب كل دا بنقعد نترجم لك طبقاً للقواعد بتاعتنا عشان تفهمها؛ فحتي الخريج بتاعنا اللي تعلم بالصيني او الكوري او البرتغالي او الاسباني او تركيا ومش قوي في الانجليزي ومش مهتم يطلع من البلد فبرضك مش هنسيبه خلاص؛ هيلاقي كل يوم كتب بتنزل ومقالات؛ هيفضل يتابع العلم والمستجدات... ومع الزمن المكتبة العلمية باللغة المحلية هتزيد؛ هيتطور الخريج بتاعي وممكن يعمل ابحاث خاصة بيه وييجي الوقت اللي هو يكتب فيه ابحاثه وينشرها؛ والعكس موجود يعني هينشر الكوري هتلاقي الصيني قاعد يترجم وهينشر الصيني هتلاقي الإيطالي بيترجم وكله بيستفيد... مفيش اي منطق ان لازم 100% من سكان الكوكب يعرفوا انجليزي عشان يتعلموا ويتطوروا.

نساعد بعض

*️⃣ البرتغال بتتكلم برتغالي ومترجمه العلوم برتغالي؛ البرازيل برضك بتتكلم برتغالي فمش هتفتكس هي وترجم العلوم بمصطلحات تانية؛ في تعاون بين الاثنين... فهنا انتا 22 دولة عربية تعمل تعاون بواسطة جامعة الدول العربية؛ اهي تعمل حاجة بدل ما هي شاغلة مكان في وسط البلد لو بعناه نكسب ذهب؛ المهم يبقي في مشروع للناطقين بالعربية سوى هيشتغل عشرات السنين عالتعريب؛ مهو مش بين يوم وليلة ممكن يتم.

التدريج وتقبل التشوهات مرحلياً

*️⃣ مينفعش النهاردة بتدرس انجليزي بكره هتبقي بالعربي ومظبوط والمنظومة زبادي خلاط؛ الأول بتعرب جزء وبعدين تدمجه في المناهج بدون الزام؛ يعني هيتعلم إنجليزي بس عينه شايفه دا معناه ايه عربي؛ ثم تدريجي تعمل إحلال عبر سنين طويلة... هيحصل خلل وهيحصل تعطل وربما تعرب حاجة وبعدين تكتشف ان في حاجة أدق ترجع تصلح تاني وثالث... محدش أول لما يعوم بيعدي المانش.

الخلاصة

⬅️ معني الكلام دا ايه؟ معناه انك عشان تحول من تدريس انجليزي لعربي محتاج عملية تعريب ضخمة هتستمر سنين طويلة وعملية ترجمة متواصلة دائمة ومحاولات وخطة نفس طويل... لو مش ناوي تعمل ما سبق؛ هتفرهد في النص يبقي بلاش خليك زي ما انتا كده. نص العمى ولا العمى كله.

صندوق النمل الدولي اقصد النقد الدولي أعلن عن جدول اجتماعاته لغاية 5 فبراير ومصر لم تضاف في الاجتماعات حسب المتوقع؛ لأول مرة قرض الصندوق يبقي واقف من الصندوق وليس من مصر...

*️⃣ احنا خلصنا المراجعة الرابعة أونلاين زووم ميتنج 😁 والصندوق ليلة الكريسماس 24 ديسمبر اعلن إننا زي الفل وخلاص كده مفروض المجلس يجتمع ويقر صرف 1.6 مليار دولار لمصر.

*️⃣ وبعدين بقي يا صندوق ما انتا مش هتيجي تاني قبل مايو؛ وانتا ليك مستحقات اقساط قديمة عندنا لغاية مايو 2.2 مليار دولار؛ ففلوسك راجعة وفوقهم بوسة ❤️؛ هاتهم بقي.

*️⃣ قول بقي يا صناديقو يا خويا عاوز ايه من مصر؛ قول متتكسفش طالب منا ايه ومعطل لنا الدفعة على حس الموضوع دا؟ قول احنا اخوات وزباينك من زمان عملنا مع بعض 12 برنامج تمويل في 62 ثم 77 ثم 78 ثم 87 ثم 91 ثم 93 ثم 96 ثم 2016 ثم 2020 برنامجين ثم 2022 وامتداده في 2024... فبلاش تتقل علينا والا مش هنعمل برنامج في 27/28 جديد معاك 😔.

*️⃣ هنكلم عمو ترامبو يزعق لكم ويخليكم تصرفوا لنا الفلوس 😔 خدوا بالكم عمو بيحبنا ولسه من يومين مطلع قرار بايقاف المعونات الأمريكية لكل كوكب الأرض عدا اسرائيل ومصر بس... هاااا هتدفعوا بالزوق ولا نشتكيكم 😈😈

حلو البيان اللي الخارجية نزلته رداً على تصريحات ترامب؛ بيان قوي صريح واضح لا يحمل أكثر من معنى؛ هو أنا عندي قناعة إن حوار التهجير دا فنكوش ومش أكثر من بص العصفورة. ومش عشان هما مش عاوزين يعملوه لإن لو عليهم نفسهم كلنا نختفي من قصادهم لكن عشان مفيش منطق.

*️⃣ حضرتك إنتا قاعد محاصر ناس بأحدث تقنيات في الكوكب وعملوا فيك اللي حصل؛ فتطلعهم من الحصار دا توزعهم على دول عالم ثالث معرفتهم عن التكنولوجيا إن الآي فون جهاز بيدفع 20 الف في برنامج تليفوني. يا حلاوة؛ دول حضرتك يعملوا نفق من أسوان يطلعوا تحت بيت النتن بيه وياخدوه ومش هتلاقي فتحة النفق عشان تثبت حاجة 😁.

*️⃣ فمش منطقي خالص تفك الحصار عليهم وتقعدهم في محيط مهما كان اللي حوليهم فيه بيحبهم؛ مصري أردني اندونيسي جزائري تركي قطري تونسي عراقي كويتي كلنا بنحبهم...

*️⃣ وحتى حوار يحطوهم عندك عشان لما يحصل حاجة يبقى مبرر ليهم يخشوا يحاربونا... يا راجل يا مفتري يعني هما سالكين قوي في حربهم معاهم عشان يخشوا يحاربونا احنا كمان؛ قعدوا 15 شهر علي 2 مليون ومش سالكين؛ يخشوا يحاربوا 110 مليون 🤣.

*️⃣ بعدين يحاربك ليه؟ انتا راجل بتستورد منه غاز طبيعي ب 2 مليار دولار وبتستورد بذور طماطم وتقنيات زراعية وبتصدر له اسمنت وحديد وحتي ملابس داخليه بياخدوها مننا؛ يخشوا يحاربونا ويفقدوا كل دا ليه؟ هما أغبياء مثلاً؟ يعني دخلوا حرب في لبنان عشان نفسهم شريط حدودي صغير 81 كيلو خطر؛ وداخلين يعملوا خط عازل مع سوريا عشان شريط حدودي 83 كيلو؛ فيخشوا خناقة مع مصر والاردن ويخلوا شريط حدودي 208 كيلو مع مصر و 307 كيلو مع الأردن مكان قلق 🤔.

*️⃣ موضوع التهجير دا فنكوش للاستهلاك الشعبوي؛ هو راجل بيحب الكلام الشعبوي حتى وهو عارف انه مش هيتنفذ وهيتلغي بحكم محكمة زي ما حصل في موضوع منع الجنسية بالميلاد في أمريكا؛ حتى موضوع المهاجرين برضك كلام شعبوي لإن في قوانين محلية في كثير من الولايات بتمنع التهجير دا وتخلي حاكم أي ولاية يقدر يعترض على قرارات الحاكم المركزي لأمريكا... نفس الفكرة بقي في السياسة الخارجية.

*️⃣ أنا هاخد جرينلاد؛ يتصل برئيسة وزراء الدانمارك يتخانق معاها ويقولها غصب عنك هتديني جرينلاند؛ ويقولك هاخد قناة بنما وهاخد كندا... كلام هو نفسه ميعرفش هينفذه إزاي؛ بس كلام شعبوي جميل يناسب العقليات اليمينية... فنيجي بقى على كلامه عندنا وانه هيهجر وناخده بجد؛ كلام شعبوي يا جدعان بيقوله لزوم التهليل... يعني تفتكروا الصحف الغربية اللي نقلت كلامه هتنقل الاحتجاج اللي العرب نزلوه؟

*️⃣ التصريحات كلها هدفها الاستهلاك المحلي الشعبوي؛ ترامبو عشان التيار المؤيد ليه يقولهم اللي نفسهم فيه. مش معنى أي مما سبق إن معندهمش خطة ما شغالين عليها؛ بس هما هيطلعوا بص العصفورة الشعوب تنشغل بالعصفورة وتتخانق عالعصفورة وتقولك لونها حلو لا وحش صوتها شكلها؛ في حين هما شغالين على شيء تاني خالص مستغلين اننا مع العصفورة.

⬅️⬅️ لكن يبقى ارض الواقع؛ تقدروا تفرضوا ارادتكم الأرض؛ الإجابة هي اللي حصلت 15 شهر؛ تقدر تدمر الأرض لكن متقدرش تفرض إرادتك عليها ولا تخرج صوباع واحد بدون موافقة صاحب الأرض.

احساس غريب لما تلاقي التايم لاين ميكس بين أخبار عالمية عن الذكاء الصناعي وال DeepSeek واللي عامله في الكوكب... ووسطها أخبار محلية للحكومة تجتمع عشان بحث توفر الزيت والسكر والمكرونات والسلع الأساسية في الأسواق بمناسبة رمضان...

*️⃣ احنا لسه بنكافح لتوفير قاع هرم ماسلو يا جدعان؛ قاع الهرم مبقاش من المسلمات اللي مش محتاجة تأكيد وتفكير فيها بل لسه تعتبر مستهدفات وخطة 😔...

*️⃣ المهم أنا فرحان باللي بيعمله DeepSeek في شركات الكوكب؛ مش عشان هو أكثر تطوراً من الغرب بل عشان هو بيثبت إن مش شرط يبقي معاه ترليونات عشان تتقدم؛ محتاج يكون عندك مخ بيفكر وحسن إدارة الموارد يخليك تنافس اللي معاهم ترليونات زي الغرب... فقط مخ بيفكر صح. وإن موضوع فلوس كثير دا مش شطارة لإن يا فرحتي فلوس كثير تروح تشتري اغلي حاجة... لا الشاطر هو اللي ينجح بإمكانيات قليلة؛ عرفوا بارقام ممكن 1% من اللي منافسيهم صرفوها يوصلوا لنتائج قريبة منهم. هنا الشطارة فعلاً

البودكاست دا اتصور من شهرين؛ وكان ابو زيد حاضر فيه بالخلفية قاعد يعني بيحضر التصوير؛ شاهين صبر كثير عشان ينشره وبعدين مونتاج وتم النشر.

بصراحة أحلى حاجة في البودكاست هو شريف مش أنا.

أنا كنت جاي أهزر واتكلم عن الثلاجة والجبنة 🤣🤣 هتشوفوا قصدي لو حد شاف البودكاست... إنتي جايه تشتغلي ايه 😁.

لكن شريف ما شاء الله كان رائع في البودكاست وبتعلم من شريف دايماً 😍😍

https://youtu.be/OSLAXkkl0Q0?si=0IgpWpuFLBjU0JPj

إزاي بييجي لي فكرة البوستات؟

*️⃣ من يومين شركة ميتا أعلنت إنها رصدت عمليات تجسس على الواتس آب بتم بواسطة شركة إسرائيلية تسمى باراجون وإن عملية التجسس دي استهدفت 90 مستخدم؛ موضحتش ميتا أي تفاصيل عنهم ولا دولهم لكنها قالت انها طلبت من الشركة الإسرائيلية التوقف عن الاختراقات 😁... ووضحت ميتا إن الاختراق تم بواسطة تقنيات zero-click يعني مفيش لينك هيتبعت لك وتدوس عليه؛ لا خالص دا ملف هيتبعت لك PDF وشكراً خلاص مش محتاج منك حاجة.

*️⃣ حتى الآن الخبر خلص؛ دا الخبر زي ما هتقراه في أي مكان تقني؛ هيقولوا بعض تفاصيل عن الشركة والحدث ووو؛ طيب أنا لو عاوز أكتب بوست طويل عن الموضوع دا أعمل ايه؟ يلا بينا؛ خد بالك البوست دا هشرح فيه بمثال أنا فكرت إزاي؛ حاجة كده اكنك مشغل DeepThink في DeepSeek؛ فلو حسيت انك فصلت معلش؛ مش هكررها تاني بس قولت فكرة جديدة جت لي.

*️⃣ مين صاحب الشركة دي؟ مش ممكن واحد من مؤسسيها هو إيهود باراك رئيس وزراء اسرائيل الاسبق 🤔؛ طيب ما نحكي للناس شوية عنه وعن كفاحة؛ هو ابن... بس شق طريقه طويل.

*️⃣ بداية من إنه خدم بالصاعقة وكان ضمن عمليات اغتيالات شهيرة وأهمها فردان لما تسللت فرقة اسرائيل عبر البحر الي لبنان ورصدت تحركات ابو يوسف أحد اهم قادة حركة ايلول الأسود وقائد عملية ميونخ الشهيرة... وكمال عدوان اللي كان رقم 3 في منظمة التحرير؛ وكمال ناصر الناطق باسم المنظمة.

*️⃣ أثناء تنفيذ العملية دي اتنكر ايهود باراك في زي واحدة ست؛ وبالفعل تم للاسف اغتيال القادة الثلاثة واستشهدوا مع بعض افراد الأمن اللبنانيين... وصعدت اسهم باراك ويقال انه شارك او خطط لاغتيال ابو جهاد في تونس؛ وفضل يترقي لغاية ما ساب الجيش.

*️⃣ انتقل للحياة المدنية وبصراحة كان وشه حلو قوي؛ يعني مسك وزير داخلية؛ اتقتل رئيس الوزراء اسحق رابين 😁؛ عملوا حكومة مؤقته ومسكوه وزارة الخارجية؛ الحكومة انهارت... بعد شوية عرف يكسب ومسك أهم منصبين مدنيين في اسرائيل وهم رئيس الوزراء ووزير الدفاع؛ اسرائيل مينفعش ظابط جيش يمسك وزارة الدفاع؛ لازم يقعد شوية مدني ويشوف مناصب مدنية.

*️⃣ المهم بقي هو فشل في الاثنين 🤣 مظاهرات غرقت البلد من مواطنيه ومن الفلسطنيين؛ والمنصب الثاني الدفاع؛ حصل ضرب في لبنان وحزب الله أجبر الجيش الإسرائيلي على الانسحاب من جنوب لبنان ... فشله خلى الليكود بقيادة شارون يسحقه في الانتخابات 2001...

*️⃣ المهم فضل يكافح برضك مسكتش واستغل في يونيو 2007 ان في شقلباظات وحماس سيطرت على غزة وطردت فتح؛ قالهم حماس دي عاوزة راجل يقفلها؛ فهوبا جابوه وزير دفاع 2007 وبالفعل شن حرب ضخمة نهاية 2008 استمرت 3 اسابيع لكن فشل؛ اللي قديم شوية يفتكر صورة زميلته بالحكومة تسيبي ليفني وهي بالقاهرة عالسلم ماسك ايديها ابو الغيط؛ هي الحرب دي.

*️⃣ المهم يعني دي كانت قصة ايهود باراك... حلو البوست يا بن سامي؛ امممم لا برضك ما تيجي نكبر البوست؛ بس نكبره ازاي نكبره ازاي؛ ايوا صحيح نحكي برضك قصة النتن حصلت إزاي...

*️⃣ سنة 1976 منظمة فلسطينية خطفت طيارة عليها اسرائيلين ونزلت في اوغندا؛ وهنا حركة اسرائيل قوات الكوماندوز وهجموا الطيارة؛ قتلوا الخاطفين ال 7 وقتلوا بتاع 30 او 40 من الجيش الاوغندي ودمروا 15-20 طيارة اوغندية وحرروا 102 رهينة من ال 106... وراح للكلاب فطيسة واحدة وهو يوناتان نتنياهوو... ايوا اخوه الكبير.

*️⃣ العملية تعتبر من انجح عمليات تحرير الرهائن بالقوة فالصحافة هناك قعدت ترقص وتغني؛ وتعيط عالبطل اللي فطس؛ وطبعاً يكلموا اهله وأصحابه وكان علي رأسهم اخوه اللي بيدرس في MIT ماساتشوستس واخد شوية دراسة في هارفارد؛ الأخ بنيامين اللي كان بيتخرج وقتها وقعد يحاول يشتغل في أمريكا بس قالك هو أنا اقرف نفسي ليه.

*️⃣ شوية واخد ديلة في سنانه ونزل فلسطين المحتلة وقعد يعيط؛ اخويااااا؛ واستغلها في حملات دعائية وألف كتاب ووو.. بس يا سيدي وبقي النتن اللي كلنا شامين ريحته.

*️⃣ حلو البوست يا بن سامي طويل؛ طيب ما نطوله زيادة؛ بس ازاي إزاي؛ اشوف حد تاني احكي عنه؛ لا مينفعش مش مترابطة؛ الشركة وصلتنا لايهود باراك اللي وصلنا للنتن واخوه اللي فطس؛ اااه تصدق فكرة؛ ما عملية اخوه دي اشوفها كانت ملهمة لمين. وجدتها.

*️⃣ بعد عملية عنتيبي بسنتين وتحديدا سنة 1978 سافر وزير الثقافة المصري وصديق السادات العميد والأديب الشهير يوسف السباعي (شايف الحته دي؛ كثير ميعرفوش ان يوسف السباعي كان وزير ثقافة؛ وبرضك كثير ميعرفوش انه كان في الظباط الأحرار يعني لما ألف فيلم رد قلبي كان يعتبر زميلهم بيحكي؛ الرفايع دي بقي لما تحشيها في البوست بيكون لذيذ)..

*️⃣ المهم يوسف السباعي سافر سنة 77 مع صديقه السادات الي الكنيست وبناء عليه الجماعات الفلسطينية اعتبرته خائن؛ وبالفعل تم رصد سفره إلي قبرص وقاموا بالهجوم وطاخ طاخ اتقتل يوسف السباعي؛ خطفوا 40 رهينة وعاوزين طيارة؛ جابوا طيارة ولفوا محدش عاوز ياخدهم فرجعوا قبرص.

*️⃣ السادات غصب لاغتيال صاحبه وأمر بالهجوم عالطيارة؛ تم خداع قبرص وايهامها ان مصر هتبعت طيارة شايلة وزير للتفاوض مع الخاطفين؛ لكن هوبا قبرص لقتها طيارة عسكرية؛ الرئيس القبرصي كان بنفسه في المطار بيتابع الازمة؛ القوات المصرية تجاهلت وجود الرئيس والحرس الجمهوري وبدأت الهجوم واتضرب الرصاص عالرئيس القبرصي في برج المراقبة؛ الجيش القبرصي قام بالهجوم العنيف عالقوات المصرية.

*️⃣ بعد ساعة من القتال كنا خسرنا 15 من قواتنا وفي 15-20 مصابين والطيارة اتدمرت والعربية العسكرية اللي هجمنا بيها اتدمرت وتم القبض على القوات المصرية المتبقية... الطرف الاخر اتصاب 8 من الجيش القبرصي والخاطفين لما لقوا الموضوع كبير سلموا نفسهم.

*️⃣ مصر بعتت بطرس غالي إلي قبرص وبالفعل قررت قبرص اعادة كل الجنود إلي مصر وإعادة سلاحهم ليهم منعاً للدخول في مشاكل مع مصر؛ لكن بمجرد ما الطيارة اللي شايلة الجنود غادرت قبرص أعلن السادات سحب اعترافة بدوله في الكوكب اسمها قبرص وأمر بطرد السفير القبرصي وقطع كل العلاقات؛ واستمرت القطيعة إلى أن اعادها مبارك.

*️⃣ بس يا سيدي وهو دا كان البوست... ودي طريقة التفكير اللي بستخدمها؛ معظم المعلومات دي عارفها مسبقاً بس عادي لو مش عارفها هخش أدور؛ لكن النقطة المهمة مش إنتا تدور إزاي؛ المهم تدور على ايه؛ فالموضوع بيكون انك مش بتاخد الخبر وتعديه؛ لا خالص إنتا بتسأل نفسك هو مين دا؛ ايوا ايه؛ إزاي؛ فين... وتبحث ونقطة تاخدك لنقطة وهكذا.

مع تحيات بن سامي وهو عايش في دور الذكاء الصناعي 🤣

تحديث

خلاص شكرا يا شباب المشكلة اتحلت

------

يا شباب أعرف اي حد راجع من الامارات

دبي او الشارقة؛ ال 24 او 48 ساعة القادمين؟

لو في حد يا ريت يبعت لي

في حاجة مهمة محتاجها ومينفعش تتشحن

تحديث

1️⃣ مش جبنة

2️⃣ مش موبايل

3️⃣ مش حاجة بتتجمرك أصلا

4️⃣ مش حاجة عاوزة وزن؛ دي متجبش 100 جرام

تحديث

خلاص شكرا يا شباب المشكلة اتحلت

كنت مرة قولت إن مصر فيها قانون رد ضريبة القيمة المضافة بس مخبينه سر؛ بس واضح ان بيحصل تطورات في المطار لدرجة أنهم حاطين يافطة توضيحية تكشف الأسرار 😁... عامة دي اللوائح والقوانين التنظيمية لموضوع رد ضريبة القيمة المضاف للمسافرين

أكيد مش هتسألوني أنا لإني مصري يعني مش هتترد لي؛ الكلام دا لو حد جاي سائح يقدر يرد ال 14% اللي دفعها؛ دا بفرض إنه اخد فاتورة أصلا ضريبية 😁 بل إيصال إلكتروني وفيه رقم الباسبور 😁😁

لكن اهو القانون موجود