بمناسبة العيد قعدت فترة قصاد التليفزيون


تصادف وشوفت اغنية محمد فوزي ( ذهب الليل وطلع الفجر) الشهيرة والكارتون القديم

في الحته بتاعة وعصام بكره هيبقي ظابط ويدافع عنكم؛ لقيت الكارتون فيه عسكري واقف جنب علم مكتوب فيه (تحيا مصر 🇪🇬) تخيلوا 😂


وبعدين قلبت لقيت مسرحية الواد سيد الشغال والمسرحية دي من 85 ال 92 على حد علمي؛ المهم في الحته بتاعة عادل امام وهو بيقاول عمر الحريري ياخد كام ويتجوز مشيرة ؛ قاله عاوزين كذا وكذا وكذا؛ وبعدها قال وعاوزين 2000 جنية عشان مصر ؛ ديون مصر؛ فالحريري قاله ايييه؛ فرد عليه عادل امام؛ دي عشان مصر 🇪🇬 اييييه تقدر تعترض 😂😂

ياااه يا جدعان دا احنا عايشين في ديجافو Deja Vu كبير قوي 😂😂

كان أول مرة أسمع مصطلح (الاتساق مع الذات) من صديق لي في شغلي القديم قبل حوالي 7 سنين؛ وممكن نقول ان دا مصطلح بديل ل (عنده مبدأ) وهنا بدأت أفرق بين نوعين من البشر:

1️⃣ نوع هو عنده مبدأ معين ليكن نقول حقوق الإنسان؛ هو هيدافع عن أي في أي موقف يختلف مع مبدأه؛ يعني نفترض إنه علماني لكنه لو لقي مسلم مسيحي يهودي شيعي ملحد بوذي سلفي اخواني الخ الخ بيتعرض لانتهاك لحقوق الانسان هيدعمه ويقف معاه؛ النوعية دي ممكن تختلف مع بعض مواقفه مثلاً ليكن دعم الشواذ والالحاد لكن الشخص نفسه عنده مبادئ وكل تصرفاته متزنه أو زي ما بنقول (متسق مع ذاته)

2️⃣ النوع الثاني دا مسخ؛ تلاقيه مع حقوق المرأة لكن مع حقوق المرأة في قلع الهدوم 👙 لكن تلبس لا؛ ضد القمع لكن لو القمع دا لمتدينين مسلمين شغال زي الفل؛ مع الديمقراطية لكن لو الديمقراطية هتجيب ناس مش بحبها فأنا مش معاها وهكذا... الناس دي مسخ وتصرفاته متناقضه مع بعضها لدرجة متعرفش تناقشه

النوع الثاني دا أنا شوفته كثييير عالفيس مؤخراً

*️⃣ شوفتهم في بوستات الكويت 🇰🇼 لما كلب يضرب مصري 🇪🇬 بالقلم يحط 100 بوست شتيمه ويقوله حررناكم (مقابل 40 مليار دولار بالمناسبة مش روحنا جدعنه مننا) ووو ؛ وفي نفس الوقت من يومين سعودي 🇸🇦 قتل 2 عمال مصريين ؛ ولا يفتح بقه ولا يحط بوست واحد ولا الهوا... مسخ مش متسق مع ذاته

وطبعاً مش معني كلامي إنه مفروض يسكت علي اهانة ابن... الكويتي 🇰🇼 للعامل المصري؛ لكن مفروض هو ضد اهانة المصريين عامة؛ مش ضد اهانتهم من الكويتيين بس والباقي عادي.

*️⃣ المسوخ دول برضك تشوفهم في انه يعمل صوت صرصور الحقل لما تركيا 🇹🇷 تعمل غارة على سوريا ويتكلم لما بشار وروسيا وايران يضربوا السوريين 🇸🇾 ؛ وساعات العكس يعني هو معارض لتركيا فيشتم لما تعمل غارة وبعدين بشار يضرب مدن بالبراميل المتفجرة فيعمل عبيط عادي. يا مسخ انتا ضد قتل المدنييين يعني تعارض تركيا 🇹🇷 وتعارض روسيا 🇷🇺 وسوريا وأمريكا 🇺🇸 وكل من يقتل مدني.

*️⃣ نفس الحكاية تلاقيه مشير أوضاع الاجئيين السوريين ويشتم بشار؛ وبعدين في مليون انسان يمني بيموت وهو مش من هنا متلاقيش بوست واحد..

*️⃣ تلاقيه مشير بوستات يشتم تركيا 🇹🇷 علي خبر انهم هيسلموا 50 الف من الايجور الي الصين 🇨🇳 ؛ بغض النظر ان الخبر اتنفي لكن حتي لو صح فمصر سبق وسلمت الايجوريين للصين للمعتقلات ومنشرش بوست؛ ومحمد بن سلمان أيد ابادة مسلمي الايجور والامارات صوتت ضد قانون كان هدفه ادانة الصين 🇨🇳 لاضطهاد الايجور (صوتت ضد القانون وقالت الصين مش بتعمل حاجة)... ومش هتلاقيه حاطط بوست واحد عنهم.

*️⃣ تلاقيه مشير عن اوضاع العمالة الاسيوية في الامارات 🇦🇪 ؛ وفي نفس الفترة صدر برضك تقرير فوربن بوليسي بأوضاع العمالة في قطر 🇶🇦 لكنه يعمل مش من هنا...

يا مسوخ بطلوا؛ يا عم عاوز تقول انا شخص... وعشان كده بنشر لطرف واحد قشطة حقك انتا شخص...

لكن تدعي الفضيلة وانك مع حقوق الإنسان والضعفاء وضد التدخل في ارض الغير ووو

فانتا مجرد مسخ يا....

تعرفوا إن ممكن سامسونج أو شاومي أو أوبو أو هواوي ينزلوا شيء جديد مبتكر في أجهزتهم وأبل متقدرش تنزله قبل سنة او سنتين مثلا! وبقول متقدرش وليس مش عاوزة أو بتوفر زي حركات أبل لكنها فعلياً متقدرش... يعني مثلاً شاومي تضيف ميزة X فتعجب الناس تروح أوبو ضايفها ثم هواوي.. وأبل تقتنع بالميزة دي لكنها متقدرش تضيفها زيهم قبل سنة أو سنتين.

في البوست دا هشرح عقبة بتواجه الشركات الكبيرة قوي وهيكون المثال عن أبل والآي فون.

في البداية كده نعرف بسرعة حاجتين عن عالم السمارت فون:

1️⃣ إن أبل عندها قسم تصميم لكن مش تصنيع... يعني أبل بتصمم Body لكنه بيتصنع في شركات تانية؛ تطلب مواصفات معينة في البطارية 🔋 ثم تصنعها لها شركات تانية... أبل في الماضي كان عندها مصانعها لغاية عودة ستيف جوبز واللي مجرد رجع عين تيم كوك كمدير للتشغيل في أبل وقاله حل لي أزمة المصانع؛ فتيم كوك طبق سياسة شراء العبد ولا تربيته وقفل المصانع بتاعة أبل وبقت تجمع في شركات كثير زي فوكسكون وويسترون وبيجاترون وغيرهم. فالآي فون بيكون شاشة من سامسونج وحساس كاميرا من سوني (كل الآي فون والآي باد سوني) على شرائح اتصال من إنتل (سابقاً) وكوالكم تصنيع TSMC ومعالج تصميم أبل وتصنيع TSMC على ذاكرة من سانديسك وماكرون وهكذا.

2️⃣ السمارت فون بيصنف في 3 فئات...

*️⃣ الاقتصادي ودا تحت 150$ وبعدين متوسط ودا 150-400 دولار ثم البريميوم ودا فوق 400$. طبعاً في تصنيفات تانية بتحب تعمل فئة إضافية 650$ وطالع لكن خلينا في الأوسع من أول 400$.

*️⃣ الفئة دي أبل "البريميوم" بتحقق مبيعات سنويه 300-350 مليون تليفون مبيعاً وأبل عادة حصتها 200-250 مليون يعني ممكن نقول متوسط 60%. وأحدث تقرير قريته كان مركز الأبحاث counterpoint research قال إن حصة أبل الربع الأول 2020 في الفئة دي 57% وسامسونج 19% وهواوي 12% وأوبو 3% وشاومي 2% وللتذكير الربع دا أبل منزلتش تليفون جديد. ونفس التقرير قال إن أكثر 5 تليفونات في الفئة دي مبيعاً كان 4 منهم آي-فون.

*️⃣ بعض التصنيفات لما بتتوسع لفئة 650$ وأكثر بتبقى حصة أبل توصل 70-75%. لكن نخلينا في التقرير الأعم والأشمل.

*️⃣ كده يعني نقول الربع الأول (بكرر اللي أبل منزلتش تليفون فيه) تم بيع 70 مليون تليفون بريميوم كانت حصة أبل فيهم 40 مليون تليفون وسامسونج 13 مليون وهواوي 8 مليون وأوبو 1.2 مليون وشاومي 0.8 مليون.
طيب نبص على مبيعات التليفونات الغالية ... تلاقي إن هواوي أعلنت نهاية 2019 إن مبيعات كل عائلة Mate 20 وعائلة P30 مع بعض (دول فيهم نسخ Lite اقتصادية) مجموعهم 37 مليون تليفون.

*️⃣ سامسونج بقى عائلة S20 حققت مبيعات 8.2 مليون في 3 شهور من الإطلاق.. بالمناسبة رقم 8 مليون دا موقع 9To5Mac قال في تقرير يوم 4 أكتوبر الماضي يعني بعد إطلاق الآي فون بأسبوعين إن أبل بعتت للموردين يزودوا إنتاج الآي فون 11 (11 بس لوحده مش برو) بنسبة 10% والـ 10% دي تساوي 8 مليون. يعني اللي سامسونج بتبيعه من عائلة S في 3 شهور تساوي طلب أبل بعته للمصانع يزودوا إنتاج تليفون من تليفوناتها.

لو بقى في حد وصل لغاية هنا ولسه مملش وزهق أو قلب الموضوع سامسونج وأبل وراح التعليقات؛ فأنا دلوقتي هوضح ليه طولت في توضيح فارق مبيعات أبل والآخرين في الفئة العليا.

*️⃣ ضخامة مبيعات أبل دي عاملة لها مشكلة وهى إن التقنيات الحديثة محدش يقدر يصنعها... يعني مثلاً شاومي نفترض أفتكست تقنية في الشاشات وحطتها في أغلى تليفون عندها. التليفون دا بيبيع عالمياً 300 ألف قطعة شهرياً فالمصانع بسهولة تقدر توفرله.. لكن تخيلوا أبل عاوزة تضيف نفس التقنية فهتبعت لنفس المصنع تقوله عاوزة نفس الشاشة بس أنا عاوزه في شهر الإطلاق بتاع التليفون 25 مليون وبعد كده 10 مليون شهري. المصانع متقدرش توفر الكميات دي.

*️⃣ تعالوا لمثال حصل بالفعل.. شاشات OLED أبل اقتنعت بيها من سنين وأبل بتطلب شاشات بتقنيات ومواصفات معينة قوي لدرجة إن شاشة الآي فون دائماً تحصل على لقب أفضل شاشة في سمارت فون... حتى سامسونج نفسها اللي بتصنع الشاشات لأبل بتتهزم في الجودة تخيلوا يعني سامسونج بتورد شاشات لأبل أعلى جودة من اللي في S و نوت.

*️⃣ أبل لما قررت سنة 2017 تحط شاشات OLED بعتت للمصانع اللي بتتعامل معاها وهم شركة LG وشركة شاشات اليابان (هيتشاي توشيبا سوني) وشركة شارب قالت لهم عاوزة 50 مليون شاشة OLED والسنة القادمة 75 مليون شاشة وبعدها 90 مليون وبعدها 120 مليون بمواصفات 1-2-3 (الأرقام مثال)... الثلاثة قالوا منقدرش الكمية دي مهولة منقدرش.

*️⃣ فهنا أبل راحت لسامسونج غريمتها اللي قالت لأبل صراحة كده إن الكمية ضخمة بس نقدر نصنعها لكن عشان تتصنع هنعمل توسعات في المصانع والتوسعات دي هتكلفنا مليارات فأنتم هتتفقوا معانا إنكم تشتروا حد أدنى كل ربع لو نزلتم عنه تدفعوا لنا تعويض.

*️⃣ من أسبوعين أبل مقدرتش في الربع الثاني 2020 تشتري عدد الشاشات المطلوبة فدفعت بالفعل لسامسونج تعويض 950 مليون دولار.

*️⃣ فهنا بقى الأزمة اللي عند شركة زي أبل؛ حجم الطلب المهول من عدد قطع محدد وهاي إند بيخلي مصانع التوريد متقدرش توفره.

*️⃣ تخيلوا معايا إن أبل عاوزة تنزل الآي باد برو بشاشة OLED وقالت عاوزة 10 مليون شاشة كبيرة تابلت OLED... الكوكب كله مفيهوش 1 مليون تابلت OLED بيتباعوا فمفيش مصنع جاهز لحجم الطلب اللي أبل عاوزاه.

*️⃣ عاوز أقولكم إن تقارير إخبارية قالت إن أبل دعمت LG ب 2.7 مليار دولار سنة 2017 عشان يعملوا مصانع OLED وأهو السنة دي بيقولوا LG هتورد لأبل 20 مليون شاشة للآي فون 12 في نفس الوقت سامسونج هتكون وردت 55 مليون شاشة يعني برضك في الآي فون 12 أبل معتمدة أساسي على سامسونج بعد 3 سنين من دعمها لـ LG وبالمناسبة برضك أبل دعمة شركة شاشات اليابان بمليار دولار؛ وخلت فوكسكون تشتري شارب عشان تورد لها شاشات وبرضك كل دا وبعد 3 سنين مش قادرين.

*️⃣ فساعات بيكون في تقنيات هارد وير ناس بتشوفها في تليفونات صيني وتقولك ليه أبل متعملهاش... ممكن أبل مش بتعملها توفير للفلوس أو مش مقتنعه بيها لكن ممكن برضك تكون مصانع الكوكب متقدرش تلبي طلب لأبل لتوفير نفس الشيء. آخرهم يصنعوا 1-2-3-4 مليون يعني يكفى شغل شاومي وأوبو وحتى هواوي لكن أبل لا.

*️⃣ *️⃣ وخد بالك الكلام مش عدد الأجهزة لان أبل أقل من سامسونج وهواوي؛ لكن عدد الأجهزة اللي شبه بعض بمواصفات Hi-End. لكن لو نفس العدد بتاع أبل لكن تليفون Low/Mid فعادي يتصنع بدون مشاكل

البوست دا طويل وفيه أرقام كثير فكتبته من الكومبيوتر عكس العادة. لكني حبيت أوضح لكم عقبة بتكون عند شركات كبيرة مش عند الصغيرين

الشركة الكبيرة زي المقطورة لما تتحرك بيكون حركتها بطيئة ومينفعش تدخل أي شارع؛ الموتوسيكل سريع وخفيف لكن يوم ما المقطورة هتخش قصاده نفس الشارع هتسحقه.

إمبارح خوان كارلوس هرب من أسبانيا 🇪🇸

*️⃣ فقولت اكتب بوست عن الموضوع

*️⃣ وبعدين قولت يمكن الناس متعرفش مين خوان كارلوس فهكتب قصته

*️⃣ وبعدين قولت لازم اكتب عن فرانكو طالما هكتب عن خوان كارلوس

*️⃣ وبعدين قولت طالما فرانكو يبقي لازم الحرب الاهلية الأسبانية

*️⃣ وبعدين قولت لازم نشوف الجمهورية الاسبانية الثانية اللي قامت عليها الحرب الاهلية

*️⃣ وبعدين قولت لازم نتكلم عن عصر قبل الجمهورية الثانية والجنرال ريفيرا وفترة الحكم بتاعة الفونسو ال 13

*️⃣ وبعدين قولت لازم اتكلم عن معركة انوال للامير العظيم عبد الكريم الخطابي اللي غيرت شكل اسبانيا ودمرت شعبية الملك

*️⃣ وبعدين قولت لازم احكي عن أسباب تورطت أسبانيا مع المغرب ووصلت لغاية نابليون وغزو المماليك الفرنسيين لمدريد.

*️⃣ وبعدين قولت مش بحب التاريخ الصافي لازم اربط القصة بالحاضر والمستقبل

*️⃣ فقررت أكتب حاجة عن اردوغان وهل هيطوله مصير خوان كارلوس مستقبلاً.

دا أنا رغااااي قوي يا جدعان 😂😂

فالجماعة اللي بتحب القراية الطويلة عندكم النهاردة تحدي بوست عملاق بالمتر كده هجيب بشكل سريع تاريخ اسبانيا من ساعة خروج المسلمين من الاندلس لغاية امبارح وعلاقته بتركيا.

هنشره ان شاء الله الساعة 6 مساءا؛ مستعدين 💪💪

خوان كارلوس هرب إمبارح من أسبانيا؛ فيا تري أردوغان هيقابل نفس المصير مستقبلاً.

الناس بتاعة المؤامرات والإخوان والعثمانيين والجو دا؛ البوست دا عن تاريخ أسبانيا 🇪🇸 وفي النهاية هقولكم ايه علاقة أردوغان ب خوان كارلوس؛ فإهدوا أنا مش بتاع بوستات عاشت الخلافة ولا يسقط العثمانلي والهبل بتاع المعيز المنتشرة دي؛ دا بوست تاني خااالص وعن تاريخ دولة أسبانيا 🇪🇸.

*️⃣ بعد هزيمة المسلمين في الاندلس علي يد ملوك قشتالة وليون فرناندو وإزابيلا بدأت أسبانيا 🇪🇸 التوسع العالمي وفي نفس سنة خروج المسلمين من الاندلس؛ الأخ كريستوفر كولومبس اكتشف شرق قارة أمريكا (شوية الجزر).

*️⃣ أسبانيا عرفت تكون إمبراطورية ضخمة في الأمريكتين وأماكن مختلفة من العالم زي الفلبين وغيرها.

*️⃣ بدأ القرن ال 19 بظهور نابليون اللي مش بس حارب الإمبراطورية الأسبانية؛ لا دا سحقها وغزا مدريد بقوات المماليك بتاعته (اه نابليون عمل جيش مماليك جابه من مصر وطوره وسحق بيه مدريد سنة 1808).

*️⃣ في السنوات التالية فقدت الإمبراطورية الأسبانية مستعمراتها تدريجي بما فيها أمريكا 🇺🇸 لصالح انجلترا وفرنسا.

*️⃣ مع خسارة مستعمراتهم في امريكا 🇺🇸 وكندا 🍁 خسروا كمان المكسيك 🇲🇽 وبعدين تدريجي خسروا قارة امريكا الجنوبية اللي كانوا مسيطرين عليها عدا البرازيل (عشان كده كل أمريكا الجنوبية بتتكلم أسباني عدا البرازيل برتغالي).

*️⃣ بنهاية القرن 19 يعني علي سنة 1898 كانوا خسروا كل مستعمراتهم في الكوكب عدا الفلبين 🇵🇭 وكوبا 🇨🇺 واجزاء من المغرب 🇲🇦

*️⃣ سنة 1898 عملوا اتفاقية مع أمريكا إنها تشتري منهم الفلبين وجزيرة جوام وبورتريكو (آخر 2 لسه تبع أمريكا لليوم بس مواطنيهم مش امريكان قوي 🙂).

*️⃣ نسيت اقولكم سنة 1885 مات الملك الفونسو ال 12 ومكانش في ولي عهد؛ لكن مراته كانت حامل استنوا لغاية ما ولدت سنة 1886 واعلنوه ملك؛ وبقي ملك من اول يوم ولادته "الفونسو 13" والراجل دا مكمل معانا شوية في القصة.

*️⃣ الفونسو ال 13 لما كبر شوية وبقي ملك فعليا كان عنده مشكلة وهي ان في صراع داخل دولته؛ المغرب كانت مولعه بقيادة المجاهد العظيم الأمير عبد الكريم الخطابي وكان في فريق قوي بيقول نطلع من المغرب مش جايبه همها. لكن الفونسو قرر يقف مع التيار الثاني اللي قال نتوسع في المغرب؛ اللي هو مش عارفين يسيطروا علي مناطقهم ودا قالك نتوسع 😂😂.

*️⃣ بدأت معارك الريف المغربي سنة 1920 وفي العام التالي حصلت معركة من أهم المعارك في التاريخ العربي والإسلامي اللي هتغير شكل أسبانيا 🇪🇸؛ معركة (أنوال) اللي للأسف مغمورة جداً عندنا كمصريين ومسلمين؛ المعركة دي الأمير عبد الكريم الخطابي سحق الجيش الاسباني؛ كلمة سحق دي بالمعني الحرفي يعني الأسبان نفسهم مسمينها (كارثة أنوال)؛ عارفين الجو بتاع جيش يروح وميرجعش... دا حصل في الأسبان.

*️⃣ الجيش المغربي كان مكون من 3 الاف والجيش الأسباني 20-25 الف؛ واحنا في الزمن الحديث يعني في مدافع وبنادق ورشاشات مش جو فروسية وسيوف يعني مفروض التفوق كاسح للأسبان. لكن النتيجة ان جيش المسلمين المغاربه ال 3 الاف خسر 800 جندي بينما جيش العدو ال 20 الف خسر 13 الف جندي 😍😍😍.

*️⃣ الكارثة دي قلبت أسبانيا كلها والناس اتقسمت؛ فريق قال الثار وهنردها وفريق ثاني قال ما احنا عمالين نقول نطلع من المغرب الله يحرقكم؛ الفريقين قالوا فين الملك؛ وهنا انتشر معلومة وهي ان الملك بيصيف في فرنسا 🇫🇷 وكان بيلعب جولف ولما بلغوه بالهزيمة كمل الماتش عادي ولا فرق معاه سحق جيش ليه.

*️⃣ شعبية الملك انهارت خاصة انه كان ممشي الحرب في المغرب غصب عن الدستور وبدون موافقة البرلمان؛ فبدأت تحقيقات ومظاهرات ضد الملك اللي خلاص بقي مش عارف ايه الحل خاصة إن البرلمان خلاص قرر يحقق معاه شخصياً.

*️⃣ الحل جاله من الجيش؛ انقلاب عسكري عمله الجنرال "ريفيرا" سيطر على االحكم وعزل البرلمان والحكومة؛ الملك اعلن تأييده ل ريفيرا وعينه رئيس وزراء.

*️⃣ ريفيرا أعلن حاجتين؛ الأولي استكمال حرب الريف والثانية انه هيعمل مشاريع قومية كثير وطرق وكباري ومنشئات وبجد هو عمل كده مش بقلش عليه.

*️⃣ وفي نفس الوقت مفيش ديمقراطية احنا في حالة حرب؛ فالنتيجة الالاف بيموتوا والشعب الاسباني بيفتقر اكثر.

*️⃣ عرف ريفيرا يكسب حرب الريف عبر انزال بري وجوي الاول في التاريخ وهو انزال الحسيمة سنة 1925 وتحالف ثلاثي اسباني فرنسي انجليزي ضد الامير عبد الكريم اللي اتهزم للاسف وتم القبض عليه وسجنه الي ان حرره الملك فاروق.

*️⃣ بعيد عن الموضوع بس الامير عبد الكريم اتقبض عليه من الفرنسيين وتم نفيه؛ سنة 1947 كان بيتم نقله من المنفى وأثناء عبور سفينته بقناة السويس تم إبلاغ الملك فاروق بانه في السفينة واداله لجوء سياسي واخده من فرنسا 🇫🇷 واقام في مصر لغاية ما مات واتدفن هنا بالقاهرة وبالمناسبة الأمير عبد الكريم الخطابي يعد مؤسس حرب العصابات بشكلها الحالي وحتى تشي جيفارا لما جه مصر راح قابله.

يا ترى بقى هييجي اليوم اللي مصير أردوغان يبقى زي خوان كارلوس على أيد الشعب اللي هو طوره.

كفاية كده أنا اختصرت البوست كثير لكنه لسه طويل

*️⃣ نرجع للجنرال ريفيرا؛ الوضع بقي زفت في أسبانيا مع مرور الوقت فالملك اقاله سنة 1930 بعد خلاص ما خربت.

*️⃣ المظاهرات كانت ضد الملك وبالفعل اجبروه علي الانتخابات اللي كسبها الجمهوريين فغادر الملك الفونسو 13 أسبانيا.

*️⃣ الجمهورين مسكوا الحكم وأعلنوا الجمهورية الأسبانية الثانية وكان يغلب عليهم التيار اليساري. أسبانيا كان عندها مشكلة كبيرة وهى إن الإقطاعيين مسيطرين عالحياه واليساريين طبعاً عارفينهم وجو الشيوعية يعني نقصقص فلوس الأثرياء... وفي نفس الوقت برضك بدأوا يشتغلوا عالجيش ويسيطروا عليه.

*️⃣ مفيش سنتين والثوار اختلفوا مع بعض وكل يوم الصبح يعملوا حكومة لدرجة إن الفترة من سنة 34-36 اتعملت 8 حكومات. المهم سنة 36 عملوا انتخابات وتيار اليسار أخد 47.1% وتيار اليمين 45.6% يعني صباح الزنقة.. المهم اليسار حكم لإن القاعدة اللي الأكثر يلم كله.

*️⃣ مجرد اليسار حكم تاني (المرة الأولى بعد شيل الملك 31-33) قالك خلاص كده البلد بقت في إيدينا وشالوا جنرالات الجيش المؤيدين لليمين أو الملك وأعلنوا حملة تغيرات ضايقت كمان الناس اللي معاه فلوس "البرجوازيين الأرستقراطيين".

*️⃣ اليمين معاه 45.6% ولقى نفسه بره الملعب؛ والجيش برضك قالك ايه دا هما هيتحكموا في الجيش ليه؛ البلد دي بلدنا والموضوع كان معقد قوي قوي الفترة دي.

*️⃣ هوب انقلاب عسكري لكن فشل لكنه مفشلش قوي دا تسبب في كارثة... الحرب الأهلية الأسبانية.

*️⃣ الحرب الأهلية الأسبانية دي كانت عبارة عن حرب عالمية مصغرة... الجمهوريين اللي في السلطة معاهم الاتحاد السوفيتي بما إنهم اشتراكيين يعني وبرضك فرنسا معاهم عشان برضك الحزب فيها كان يساري والمكسيك بعتت لهم قوات على متطوعين من دول كثير.

*️⃣ الفريق الثاني بقى اسمه القوميين ودا كان الجيش الأسباني الانقلابي "جيش أفريقيا" ومعاه دعم من 2 طيبين قوي قوي قوي كمان... هتلر وموسيليني 😂😂. طبعاً في ناس تانية بس لما يكون معاك هتلر وموسيليني مش محتاج تبص مين تاني.

*️⃣ الملك الفونسو 13 قالك اليمين بتاعي حبيبي والجيش رجالتي عاملين حرب عشان يرجعوني.. وقال يبعت ابنه خوان لأسبانيا... اتقبض على ابنه من على الحدود بتاعة فرنسا ورجعوه تاني لأبوه. والجنرال فرانكو قائد الإنقلابيين والتيار القومي قال الملك مش راجع تاني؛ بحيث ميشقش التيار بتاعه يعني

*️⃣ بعد 3 سنين طحن مات فيهم 400-500 ألف بني أدم ؛ كسب التيار القومي وبقى فرانكو هو الحاكم... طيب ايه يا عم فرانكو هتعمل دولة شيوعية؟ لا طبعاً... طيب انتا ديمقراطي جمهوري! لا دا أنا بحارب الجمهوريين؛ طيب يعني هترجع الملكية؟ لا برضك... أنا هعمل فرانكويية 😂

*️⃣ بعد 5 شهور من سيطرة فرانكو بدأت الحرب العالمية الثانية؛ هتلر وموسيليني كلموا فرانكو وقالوا له معانا يا هندسة قالهم كان على عيني انتم شايفين الحرب الأهلية فشختني... بس ممكن في قوات تييجي لكم من عندي أنا معرفش جت منين ولا عمري سمعت عنهم أصلاً.

*️⃣ الطرف الثاني انجلترا وفرنسا كلم فرانكو تيجي معانا قالهم أسبانيا محادية وهتلر صاحبي ومينفعش أضرب صاحبي لكن انا محايد.

*️⃣ بمجرد هزيمة هتلر راح فرانكو أقال كل القادة المؤيدين لهتلر وشال كل شيء بيقول إنه بيحب هتلر. وبدأ العصر الفرانكووييني ( مش عارف بيتكب إزاي دا).

*️⃣ فرانكو حكم الدولة بطريقة مظنش حد هيحسها غريبة... جنرال في السلطة وسيطر عالإعلام والاقتصاد والقضاء والسياسة وادى نفسه صلاحيات بابا وماما يعني بقت أسبانيا مملوكة لفرنكو شعباً وأرضاً واقتصاداً وكل شيء.

*️⃣ طبعاً المعسكر الغربي اللي كسب منساش إن فرانكو كان صديق لهتلر بس برضك مفيش داعي لحرب جديدة فعملوا له مقاطعة؛ راح هو رادد وقافل البلد وقال للشعب هنزرع ونصنع كل شيء واللي مش هنعرف نعمله خلاص نعيش من غيره؛ فالنتيجة إن أسبانيا بقت متخلفة وفقيرة جداً.

*️⃣ سنة 1946 فرانكو صحي الصبح قال يا شعبي الحبيب الطيوب المكافح؛ قررنا عودة الملكية... طبعاً مين فرح! لا مش ألفونسو ال 13 دا كان مات لكن ابنه خوان اللي اتقبض عليه عالحدود زمان؛ قالك الله هرجع ملك. ففرانكو قاله لا إنتا مش هترجع... ليه يا عم مش انتا رجعت الملكية؟ اه رجعتها بس أنتا مش هترجع.. طيب مين الملك؟ لا مفيش ملك أنا هفضل بحكم برضك عادي لكني قولت أرجع الملكية بس.

*️⃣ فضل خوان يعيط بره أسبانيا ونفسي أبقى ملك؛ وفرانكو بيحكم ودخلنا الخمسينات ووضع أسبانيا بقى بؤس ؛ ففرانكو قالك يجيب شوية متخصصين في الحكومة بدل ما هى جنرالات كده لاحسن شكل الجنرالات اللي بقالهم معايا 20 سنة مش عارفين يديروا الاقتصاد وبالفعل بدأت الدنيا تتحسن شوية بسيط.

*️⃣ دخلنا الستينات والوضع لسه مش كويس ومظاهرات عمالية ووو وبرضك فرانكو مكمل وبيسحق الجميع. لغاية سنة 1969 فرانكو بعت جاب أمير هو ابن خوان اللي قاعد بره وحفيد ألفونسو ال 13.

*️⃣ الأمير دا هو خوان كارلوس وقاله إنتا هتبقى خليفتي في الملاعب الفرانكوويه ... وبالفعل بدأ خوان كارلوس يعيش دور ولي العهد.

*️⃣ سنة 1975 وأخيراً بعد زمن مات فرانكو... ومسك الحكم خوان كارلوس اللي الدستور بيديه صلاحيات مهولة يعني يقدر يسجن أي حد ويعدم ويعقد اتفاقيات ويلغي اتفاقيات ويغير البرلمان ويلغي أحزاب ويعمل أي شيء.

*️⃣ خوان كارلوس قال للشعب عصر إن أسبانيا مملوكة لشخص خلص؛ وأقال الحكومة وعمل انتخابات ديمقراطية. والحزب اللي كسب مسكه الحكومة وقاله اعملنا دستور جديد نوفي شيل الصلاحيات اللي عندي واديها للشعب والغي الرقابة عالصحف وقصقص يعني سلطات الملك.

*️⃣ الدستور اتعمل بالفعل وبدأت الدولة طريقها للإصلاح؛ مين بقى لسه زعلان؟

كالعادة الجيش.

*️⃣ قادة في الجيش كانوا شايفين دا عك ويعني ايه مدنيين يحكموا ويفهم ايه المهندس في الهندسة والطبيب في الطب ورجل الاقتصاد في الاقتصاد. فعملوا انقلاب عسكري سنة 1981 وسيطروا عالبرلمان وقالك نرجع زي زمان العسكريين الكل في الكل والملك كبيرنا.

*️⃣ وهنا كانت الصدمة وهى إن خوان كارلوس عارض الانقلاب وتواصل مع باقي فرق الجيش اللي أعلنت ولاءها للملك؛ وفشل الانقلاب واتحاكموا واتسجنوا؛ وقيل إن خوان كارلوس طلب يخفف الأحكام عليهم عشان نيتهم كويسه هما بس اتعودوا على شيء غلط.. بس للأسف يا خوان التعديلات الدستوريه شالت سلطتك عالقضاء لو انتا كنت فرانكو كنت تقدر تطلعهم فوراً.

*️⃣ مرت الأيام وتحول الملك خوان كارلوس إلى موظف بدرجة ملك بيقبض مرتب يقدر حالياً بـ 194 ألف يورو وليه شوية امتيازات زي استخدام قصور ملكية وتفصيل عدد معين من البدل سنوياً. والشعب بقى هو اللي بيحكم.

الناس اللي زهقوا خلاص قربنا خلاص الحته بتاعة أردوغان.

*️⃣ مع دخول الألفية الجديدة بدأت شعبية الملك تنزل. وهنا بقى لازم نفهم إزاي حصل دا... الجيل اللي كان عايش أيام فرانكو كبر في السنة ومات فالجيل اللي شاف الدكتاتورية كان بيحب قوي خوان كارلوس لإنه هو اللي حول بلدهم لأسبانيا الحالية.. لكن في جيل جديد اتولد وبقى الأغلبية؛ جيل اتولد في الديمقراطية ولما كبر مش شايل أي جميلة لخوان كارلوس لإنه شايف دا حقهم أصلاً ومفيش شيء اسمهم جميلة عشان حد مش بيستعبدني؛ هو أصلاً مش من حقه يستعبدني ومينفعش أشكر حد عشان اداني حقي. وعندهم حق.

*️⃣ مرت السنين ودخلنا العقد الأخير وبدأت الصحف تراقب أنفاق العائلة المالكة ولقوا إنهم بيصرفوا كثير ورحلات صيد ببذخ في أفريقيا والخليج؛ إزاي المصاريف دي مرتبات العيلة المالكة متكفيش الانفاق دا؛ فيا ترى في رشاوي أو تهرب ضريبي؛ وبالفعل ثبت إن بنت خوان كارلوس بتتهرب من الضرائب والاتهامات وصلت للملك نفسه إنه بيحصل على دخل غير رسمي.

*️⃣ اضطر خوان كارلوس سنة 2014 إنه يتنازل عن الحكم وظهرت تقارير إن خوان عنده ملايين الدولارات في بنوك سويسرا وأملاك كثير وكاتب في وصيته إنه لما يموت تروح لابنه الملك الحالي فيليب السادس؛ فهاجمت الصحف الملك فيليب اللي أعلن إنه متنازل من دلوقتي عن أي ميراث هييجي له في يوم من الأيام من أبوه خوان كارلوس.

*️⃣ في المعجنة دي اكتشف محققون أسبان شيء؛ خوان كارلوس أخد 100 مليون دولار رشوة من السعودية أيام الملك عبد الله في وساطه وسمسره يعني في مشروع قطار السعودية اللي أخدت المناقصة شركة اسبانية؛ يعني خوان كان وسيط وأخد عمولة من تحت الترابيزة على حساباته في بنما. وراحت العمولة لعشيقة الملك.

*️⃣ مش بس كده لكن اكتشفوا كمان إن ملك البحرين كان ادى الملك مرة 1.8 مليون دولار كاش؛ اه في شنطة كده... ومش معروف سبب دا.

*️⃣ بدأت التحقيقات مع الملك السابق وبقى بالدستور مهدد بالسجن.

*️⃣ إمبارح هرب خوان كارلوس بره أسبانيا خوفاً من السجن بسبب تضخم الثروة وتلقى رشاوي وعمولات والتهرب الضريبي.

خوان كارلوس اللي ادى أسبانيا الديمقراطية الحالية خايف ليدخل السجن بل ووصل الأمر دلوقتي إن الشعب بقى فيه تيار بيطالب بإلغاء الملكية أصلاً.

نفس اللي بيحصل وحصل مع خوان كارلوس متوقع في يوم يحصل مع أردوغان.

*️⃣ تركيا كانت في التسعينات متخلفة وسكان اسنطبول مش بيشوفوا الماية غير أيام محددة؛ لغاية وصول أردوغان للحكم.

*️⃣ تحولت تركيا لدولة ضمن ال G20 الأكبر عالمياً وبقت بتصنع كل شيء وبتخش خناقات مع ترامب شوية وبوتين شوية وألمانيا كثير وفرنسا دائماً وعندها صناعات عسكرية متقدمة سواء تصنيع سفن حربية أو طائرات درون وحتى الصناعات المدنية.

*️⃣ الجيل الأكبر سناً اللي حضر تركيا المدمرة عنده ولاء لأردوغان لكن الجيل الشباب مش شايف شيء استثنائي بالعكس الوضع الاقتصادي في تركيا آخر 4 سنين سيئ والأسعار بتزيد وقيمة العملة بتنزل.

*️⃣ جيل شباب معندوش الولاء الأعمى وجو "نشيل الجمايل" والأفلام دي؛ عشان كده تلاقي أردوغان بيستقطبهم شوية بأمور دينية وساعات بشعارات قومية وشوية بوعود اقتصادية.

بوست نشر بالأمس علي الفيسبوك ولم يتم نشره هنا

-----
في موضوع لبنان؛ المحتل السابق فرنسا والوصي دائماً على لبنان أعلن إنه هيسعى لجمع مساعدات دولية ليها... والكويت أعلنت إنها هتبعت طيارة وبالفعل وصلت النهاردة والإمارات برضك طائرتها وصلت من دقائق وقبرص بعتت طائرتنين هليكوبتر انقاذ.

مصر بقى أعلنت إن المستشفي الميداني مفتوح وعادي مكمل مفتوح وهنبقى نبعت لكم طائرتين مساعدات إن شاء الله.

قطر بقى بعتت بالفعل طائرة وقالت في 3 كمان جايين النهاردة وفرق الإنقاذ القطرية يقال وصلت لبنان بالفعل وقالوا إن في 2 مستشفي ميداني مجهزين لاستقبال 500 مصاب وإن دي مش بس المساعدات لكن هيكون في جسر جوي مستمر لنقل المساعدات وحتى المصابين يعني.

في الكوارث لازم تتحرك بسرعة عشان تكسب البنط والقوى الناعمة. هتتأخر هيبقى الموضوع روتيني زيك زي عشرات الدول... اللي هياخد اللقطة هو اللي هيوصل الأول.

نتعلم من قطر؛ بتحبها أو بتكرهها بس هما صيع الصراحة.

بالمناسبة إسرائيل بعد الانفجار بساعة تقريباً عرضت إرسال مساعدات للبنان لكن الحكومة اللبنانية "نفضت" لهم.

يا رب ميطلعش لي حد بيفكر بعقلية مؤامرات ويفهم البوست غلط عشان اتهريت منهم البوست السابق الصراحة؛ أنا بقول مفروض تتحرك الأول وبسرعة وبعدين تبقى تتكلم. عشان لو اتأخرت يبقى خلاص فقدت البنط اللي أنتا بتعمل الشو عشانه.

الاستعمار دا ظريف قوي

*️⃣ ياخد جيوشه ويدخل الدول عشان ينهب ثرواتها.

*️⃣ يصنع طبقة من أبناء المستعمرات عشان يكونوا الجنود اللي يحارب بيها أبناء الشعب؛ لسه هيقمع الشعب بجنوده يعني 🤔؛ يقمعهم بأخواتهم.

*️⃣ يصنع كمان طبقة من الشعب تكون درع ليه ضد الشعب بس درع اقتصادي وسياسي.

*️⃣ الظروف تتغير لزوم زي ما حكيت قبل كده التطور الطبيعي للزمن ؛ فمضطر يخرج من الدول اللي احتلها؛ فهنا يخرج بعد ما يثبت وجوده فعلياً.

*️⃣ يثبت وجوده وسط طبقات النخبة الاقتصادية اللي بياخدوا توكيلات شركات الاستعمار ويبقوا فروعها في البلد.

*️⃣ يثبت وجوده باحتلال عالم الأفكار وعقول الشعب ويخلي المواطن فاكر انه ضد الاستعمار وعاوز يخرجه؛ لكن في نفس الوقت لا اراديا نفس الشخص شايف اللي بيتكلم بلغة المستعمر دا يبقي شخص مثقف و A Class ؛ فتلاقي المصريين الفئة A بتتكلم انجليزي اغلبها؛ والهنود انجليزي ويعيش أثريائهم في لندن؛ والافارقة فرنساوي بس الفرنجة شطار عرفوا يخلوا كل الطبقات تتكلم لغتهم..

*️⃣ يبقي عندي شعب محتل فكريا؛ بيفكر زي المستعمر وياكل زيه؛ اوووه يااااي ناكل بإيدينا انتا كده (بلدي) أنا بحب أكون (أفرنجي)؛ ودا مجرد مثال عشان الناس اللي بتحب تسيب فكرة الموضوع وتناقش اتفه نقطة فحطيت لكم مثال تافهه ترغوا فيه.

*️⃣ المستعمر بعد كده لقى حاجة وهي إن ساعات الطبقة الحاكمة تقلل نفوذهم؛ مجرد تقلل بس بتأميم شركات مثلاً وهي فاكرة نفسها بتشيل وجودهم؛ لكنهم لسه محتلين عالم أفكار الشعب بداية من أكلهم ولبسهم وطريقة التعليم واللغة وحتي القوانين المعيشية من المستعمر؛ لكن الاستعمار بيحب السيطرة الكاملة عالشعوب.

*️⃣ هنا الاستعمار اقنع الطبقة الاقتصادية اللي صنعها إنها تخش في السياسة والبرلمان والمناصب العليا.

*️⃣ وعشان يواصل السيطرة عليها مستقبلاً عمل جامعات ومدارس وتعليم كامل تابع ليه؛ بحيث تربي طفل علي لغة المستعمر وثقافته وحتي يدرس تاريخ دولة العدو؛ باختصار ماكينة تصنيع مسوخ متشبعين بأفكار المستعمر ومنفصلين فكريا عن بلدهم؛ والاهم يبقوا شايفين ان مصلحة دولتنا عشان تبقي متقدمة انها تقلد المستعمر في كل حياته؛ وتحيد الدين برضك زيهم.

*️⃣ ولزوم الاحتياط فالطبقة الامنية اللي دربها المستعمر زمان عشان تحميه من ابناء الشعب دا؛ دلوقتي الطبقة دي لازم تبقي درع احتياطي تعمل انقلاب وتوصل للحكم لو فشلت الطبقة الاقتصادية عشان تحمي مصالح المستعمر.

*️⃣ وزي ما عملنا كليات اجنبية عشان نربي أبناء الطبقة المدنية؛ نعمل في العسكرية ونخليهم يختاروا بعثات عسكرية تروح للمستعمر؛ وخبراء الاستعمار يختاروا مين يصلح يكمل لمناصب عليا وقياده ومين لا؛ وتلاقي مصادفة غريبة ان الدول اللي عالم افكارها فرنساوي واستعمارها فرنسي وطبقتها الحاكمة فرنسية اللغة تلاقيها بتبعت ابناءها لفرنسا؛ واللي بيتكلموا انجليزي بيبعتوا لامريكا وانجلترا؛ شوف الصدف يا اخي.

ومتنسوش تراجعوا البوستات قديم بخصوص طرق السيطرة العثمانية ولغاية الامريكية الانجليزية الحالية من اللينك دا

https://bit.ly/3fDrc2u

*️⃣ طيب كده الطبقة الحاكمة سواء مدنية او عسكرية بقت معانا؛ لكن ازاي نضمن اكثر استمرارها 🤔؛ بالفساد طبعاً.

*️⃣ نقنعهم يعملوا مشاريع ضخمة؛ متقلقش المشاريع دي بتتعمل بالفساد؛ فيمسكها شركات الطبقة الحاكمة فيزدادوا ثراء؛ وهتتعمل بقروض من المستعمر فيزداد ولاءه وضعفهم قصادنا وسيطرتنا عليهم؛ والمشاريع مش هتتعمل مفيدة فمش هتحقق الجدوى فالدولة مش هتتقدم وتستغني عن الاستعمار.

*️⃣ طبعا الديون هتزيد فالحكام يفضلوا يزودوا الضرايب عالشعوب؛ فالشعب تصبح فقيرة أكثر وتكرهه الحكام أكثر.

*️⃣ فالحكام يحسوا بكراهية الشعب؛ وكمان لانهم فقرا قوي فمستوي تعليمهم ضعيف قوي وتصرفاتهم (همجية) وفوق دا كارهين لينا؛ فالحل نعمل مدارس خاصة بينا ومدن وكومباوندات وننعزل أكثر عنهم.

*️⃣ الطبقة الحاكمة تشوف الشعب متخلف بدائي رجعي همجي وبيكرهنا عشان عاوزين نطوره ونعمله مشاريع؛ طيب ايه الحل عاوزين نحمي نفسنا نعمل ايه 🤔.

*️⃣ الاستعمار يظهر تاني؛ خدوا سلاح ؛ اقمعوا الشعوب دي؛ خايفين من حقوق الانسان 🤔؛ متخافوش حقوق الانسان دي مش بتظهر غير لما نزعل من حد؛ وانتم مش اي حد انتم؛ دا الصين لما نتضايق منها ناخد بالنا انها بتقمع الايجور؛ دول تانية نكتشف انها معندهاش ديمقراطية فجأة.

*️⃣ طبعا الشعوب مش شايفه دور الاستعمار؛ شايفه حكامها بس؛ فتبص علي دول الاستعمار وتقول واااو شايفيهم أثرياء وعندهم ديمقراطية وعدل ووو واحنا لا ازاي. شايفين ناس بتناقش حقوق النمل واحنا في دولنا مفيش حقوق للبشر.

*️⃣ فيطلع شوية ناس يقولوا ل ماكرون عاوزينك تحكمنا؛ ارجع ايها المستعمر؛ ولا يوم من أيامك.

*️⃣ فالشعوب تلاقيها تشتم واقعها وتنسي مين عمله؛ تشتم حكامها وتنسي مين وصلهم الحكم؛ تبص وتقول احنا فقرا وهما أثرياء وتنسي مين سرق مواردهم...

*️⃣ عرفتم بقي ليه في توقيعات في لبنان بتطالب بعودة الاستعمار؛ والناس اللي راحت تقول لماكرون احكمنا بدل حكامهم.. متسغربوش اللي حصل في لبنان 🇱🇧؛ الشعب اتفحت ظلم وفساد.

*️⃣ اه صحيح عارفين حاجة كمان عملها الاستعمار؛ انه سمى نفسه استعمار؛ اه هو اللي اختار اسمه في مرحلة احتلال عالم الأفكار بتاعة الشعوب؛ احنا استعمار يعني احنا جايين مكان خرب مدمر وجايين نعمله (اعمار)؛. ربنا لما قال للانسان (هو أنشأكم من الأرض واستعمركم) فمصطلح استعمار مفروض مصطلح حلو؛ شايفين هما بيرسموا تفكيرنا لانهي درجة؛ بيوصلونا لمرحلة ان حتي عدوهم يطلع يقول انا بحارب الاستعمار؛ حتي عدوهم متبرمج علي كلامهم..

خدوا بالكم من احتلال عالم افكاركم.

وبالمناسبة مصطلح عالم الافكار واخواته (عالم الأشياء وعالم الأشخاص) دي مصطلحات المفكر العبقري الجزائري 🇩🇿 مالك بن نبي؛ مش بتاعتي يعني.

لأول مرة هكتب عن خناقة شرق المتوسط

بقالي فترة قاعد عمال أقرأ وأحاول أكتب لكم بوست عن خناقة البحر المتوسط وقانون البحار وايه موضوع الجرف القاري ووو. لكن صراحة الموضوع دا صداع ومحتاج مجهود وطاقة مش عندي؛ فأنا هشارككم برأي عام كده في المواضيع دي عندي؛ ودا رأب شخصي صرف يعني ملوش مصادر 😂.

*️⃣ من الحاجات اللي مقتنع بيها صراحة إن الاتفاقيات الدولية والقانون الدولي والكلام دا؛ دي اتفاقيات الدول الكبيرة عاملاها عشان يبقي في قاعدة كلام مشترك بينها وبين بعضها بدل ما نلجئ للسلاح.

*️⃣ المشكلة في ايييه؛ ان ساعات دول صغيرة تعيش في الدور وتصدق ان الاتفاقيات دي ليها لازمة بالنسبة لها؛ بصراحة اه ممكن يبقي ليها لازمة لو الطرف الثاني دولة صغيرة زينا؛ فاحنا 2 سمكة صغيرين قاعدين نتناقش؛ لكن لو دولة صغيرة لقت نفسها طرف قصاد أمريكا 🇺🇸 أو روسيا 🇷🇺؛ فالدول دي هتقولها لمؤاخذة خد الاتفاقية دي ولفها وحطها في.. حله واعتبرها صوباع محشي ورق اتفاقيات عنب.

*️⃣ الرأي دا كان عندي دايماً؛ وبالصدفة النهاردة الصبح لقيت مقال قديم في واشنطن تايمز بخصوص جلسة في الكونجرس مع جنرالات بخصوص قانون البحار؛ وان في 6 من الظباط ال 4 نجوم ✨ (جنرال يعني) قالوا للكونجرس انهم عاوزين أمريكا تصدق علي اتفاقية البحار؛ أيوااان اتفاقية البحار أمريكا مش مصدقه عليها.

*️⃣ المهم الخبر كله تقليدي لغاية نقطتين لفتوا نظري.

1️⃣ ادميرال قال إن بدون الاتفاقية هنفضل معتمدين فقط عالقوة العسكرية لاخذ وحماية حقوقنا في البحار والمحيطات؛ فلازم نوقع بحيث نريح جنودنا؛ نظام مش كله ضرب ضرب وممكن ناخد حاجة بدون سلاح.

2️⃣ ان كاتب المقال موضح ان سبب رفض الكونجري التصديق علي الاتفاقية اييييه؛ ان أمريكا وشركاتها هيبقي عليهم التزامات نحو البيئة ودي نقطة والثاني ان أمريكا هتتنازل عن سيادتها عالأرض وتسلمها للقانون الدولي؛ تخيلوا يا جدعان أمريكا بتقول كده إنه هزلت يعني قانون دولي ايه اللي يمشي علينا هو احنا دولة عالم ثالث.

*️⃣ حاجة علي جنب كده ؛ في الجلسة دي دونالد رامسفيلد وزير الدفاع الأمريكي السابق عارض الاتفاقية برضك لكن لاسباب اقتصادية زي رسوم البيئة عالشركات ومعاها قال ان الاتفاقية دي بتحدد حدودك بره أرضك الفعلية فلو وقعنا عليها ممكن تبقي حجة ضدنا مستقبلاً في استغلال موارد الفضاء ؛ أيوان قال كده موارد الفضاء؛ مهو الفضاء خارج الحدود الأرضية فقالك ممكن يعامل بالمثل مستقبلاً فليه نحجر علي نفسنا للمستقبل.

*️⃣ المهم بقي نرجع لقانون البحار؛ وقعدت قريت شوية فيه وجبت صفحة الدول الموقعه واللي كان فيها حاجة ظريفه وهي إن كل دولة عندها كلمة تحب تقولها مع التوقيع أو عدم التوقيع عادي تقولها.

اللينك للي حابب يشوف بيانات الدول

https://bit.ly/3a4gf90

*️⃣ القانون دا الدول بتكون بالنسبة له 3 مستويات:

1️⃣ دول رافضة توقع خالص ودي منها دول تركيا 🇹🇷 وإسرائيل 💀 وسوريا 🇸🇾 و 12 دولة أخرى؛ ودي دول رافضة كليا القانون.

2️⃣ دول وقع عالقانون لكن لم تصدق عليه؛ يعني فعليا هي برضك مش شاملها القانون وغير ملزم لها زي الفريق الأول؛ عدد الدول دي 14 دولة وأشهرهم 🇺🇸 والإمارات 🇦🇪 وإيران 🇮🇷 وكوريا الشمالية.

بالمناسبة ال 29 دولة السابقين في بس منهم 12 دولة مطلين عالبحار و 17 دولة حبيسة يعني معندهاش بحر لكن رافضة توقع زي الفاتيكان.

3️⃣ الدول الموقعه وعددها 164 دولة منهم 25 او 26 مش فاكر برضك دول حبيسة.

*️⃣ قانون البحار دا فكرته تنظيم التعامل مع البحر؛ يعني كل دولة عندها 12 ميل بحري قصادها دي مياة الدولة خالصة ليها وكانها أرض؛ والقانون قال وليك لغاية 200 ميل بحري دي اسمها EEZ يعني المنطقة الاقتصادية الخالصة ودي منطقة كل الثروات في البحر بتاعتك.

*️⃣ القانون اعتبر الجزيرة زيها زي الأرض يعني ليها محيط اقتصادي برضك 200 ميل بحري.

*️⃣ تركيا بعد ما هزمت اليونان وفرنسا وانجلترا في حرب الاستقلال 1923 عمل اتاتورك اتفاقية لوزيان وفيها اكدوا بنود معاهدة سيفر 1920 بخصوص الجزر؛ يعني اي جزيرة بين اليونان وتركيا تعتبر يونانية حتي لو لازقة في تركيا واقفل البوست وروح افتح جوجل مابس واختار اي جزيرة لازقة في تركيا ودوس دوسة طويلة عشان تحط 📍 هتلاقي جوجل بيقولك جزيرة يونانية 😂. ظريفة قوي معاهدة لوزيان دي وظريف قوي ان المنتصر يتنازل عن أراضي (ياكد تنازل كان عمله وهو خسران يعني كسبان خسران هو متنازل).

*️⃣ المهم تركيا بقت متحاصرة بجزر يونانية. فدا معناه ايييه 🤔 ان ملهاش حدود بحرية؛ اه يعني انتا تيجي ترسم حدود بحرية هوب تلاقي دولة تانية (الجزر) فكده اقعد جوا بلدك.

*️⃣ سنة 1983 لما الاتفاقية اتعملت تركيا رفت توقع عليها وقالت في بيان رسمي هتلاقوه في موقع الأمم المتحدة في اللينك فوق إن اليونان بموجب الاتفاقية دي هتخلي تركيا بلا حدود اقتصادية بحرية.

*️⃣ للتذكير تركيا غير موقعه علي اتفاقية البحار؛ وليبيا ليبيا 🇱🇾 وقعت لكن لم تصدق يعني برضك قانون البحار غير معترف بيه وغير ساري عليها؛ مين بالمناسبهم زي ليبيا لم يصدق عالقانون؟ 🤔 الإمارات 🇦🇪 اللي طلعت امبارح قالت اتفاقية مصر واليونان انتصار للقانون الدولي؛ انتصار للقانون الدولي اللي هما مش مصدقين عليه 😂😂 بس عشان مش بنحب تركيا 🇹🇷 يبقي عاش القانون الدولي.

طبعا ما سبق حاولت اشرح اللي حصل وبيحصل بأقصي قدر من الحياد لكن أنتم هتروحوا سألني عن رأيي.

*️⃣ بصراحة أنا شايف الموضوع دا ملوش حل؛ نفتكر كلام الجنرالات الأمريكان اللي قالوا ان محتاجين قانون بدل السلاح ؛ يعني خيارين حسم الموضوع هم القوانين. وشرق المتوسط الدول المطله عليه هي مصر (موقعه) ليبيا (غير موقعه) اليونان (موقعه) تركيا (غير موقعه) قبرص اليونانية (موقعه) سوريا (غير موقعه) لبنان (موقعه) وجيرانا ولاد... (مش موقعين)... يعني نص الدول مش موقعه فلازم يتحسم باتفاقيات ثنائية؛ ومتنسوش في لبنان 🇱🇧 وسوريا 🇸🇾 دول برضك مطلين علي بحر شرق المتوسط ولولا انهم غرقانين في مشاكلهم لكانوا برضك نطوا لنا وقالوا فين نصيبنا.

*️⃣ الحسم العسكري مش منطقي لان مفيش دولة ليها تفوق كاسح؛ اه البحرية المصرية هي الاقوي من التركية وكل دول شرق المتوسط؛ لكن الخناقة دي علي غاز يعني مش محتاج حسم عسكري واحتلال او تحرير ارض؛ كفاية تضرب صاروخ من طيارة او حتي من أرضك علي سفينة تنقيب فهنا كل السفن هتسيب المنطقة دي؛ لان اللي هينقب شركات رجال اعمال مش هتخش منطقة فيها خطر.

*️⃣ بالمناسبة شرق المتوسط ثري جدا بالغاز وهو مرشح يكون البديل رقم 1 للغاز الروسي لأوروبا؛ يعني في مين مش عاوز برضك الغاز دا يطلع 🤔 روسيا 🇷🇺؛ وروسيا مسيطرة علي سوريا 🇸🇾؛ يعني ممكن شوية لو لقينا الموضوع هيتحسم تخش روسيا تقول هو حق سوريا فين في التقسيمة دي؛ وتقلب الترابيزة.

*️⃣ بالمناسبة جزء كبير من غاز روسيا 🇷🇺 بيروح اوروبا عبر تركيا 🇹🇷 يعني تركيا win-win؛ الغاز طلع من شرق المتوسط هنكسب منه؛ مطلعش هيفضل الروس يدفعوا لنا نعدي الغاز بتاعهم.

طبعا اخر نقاط هي تحليل شخصي ؛ عشان اللي مش مقتنع بيه انا مش مضطر اقنعك برأيي انا حر وانتا حر..

اسف معنديش تفاصيل اكثر من كده وان كنت لخصت قدر الامكان لكن الموضوع ضخم وفي تفاصيل ثانية لسه انا مش فاهمها كويس فمكتبتش عنها

*️⃣ باختصار تركيا قالت انا غير معترفه ان الجزر تتعامل معاملة الأرض؛ ومينفعش شوية جزر صغيرة قوي حجم جزر تيران وصنافير والجيفتون (مقالوش كده بس بوضح ب امثلة جزر مصرية عشان المتابعين مصريين فيفهموا قصد تركيا) فشوية جزر صغيرة جنبي تلغي وجودي 🤔 لا مش هوقع عالاتفاقية.

*️⃣ تعالوا نبص علي حته تانية ؛ قبرص 🇨🇾؛ قبل الاتفاقية بتاعة البحار ب 9 سنين حصل انقلاب عسكري في قبرص وتم الاطاحة برئيس قبرص القسيس مكاريوس؛ قادة الانقلاب كانوا من تيار توحيد قبرص 🇨🇾 مع اليونان 🇬🇷؛ وكان في موضوع عنف طائفي ضد القبارصة من أصول تركية أيام مكاريوس اللي كان معتدل شوية؛ أمال لما ييجي تيار يميني ضد الأتراك.

*️⃣ فهنا تركيا قالت هوب يلا بينا واخدت جيشها وهجمت علي قبرص 🇨🇾 وبالفعل احتلت ثلث الجزيرة؛ الأمم المتحدة عملت وساطة والمتشددين مشيوا ورجع مكاريوس للحكم؛ خلاص رجعنا الوضع للقديم أهو يا تركيا احنا اسفين يا بوصلاح؛ لكن تركيا 🇹🇷 قالت اسفين مين كان قبل ما احرك جيشي؛ مش خارجة من قبرص؛ واعلنت بعدها الجزء اللي اخدته انه قبرص التركيه دولة ومحدش اعترف ليها في الكوكب غيرها.

*️⃣ ايه يا عم محمد اللي جاب الحوار دا؛ هقولك يا سيدي. تركيا زي ما قولت فوق متغرقة جزر لصالح اليونان فكده منطقة الغرب ملهاش حدود ؛ طيب والشرق 🤔؛ لا في الشرق في دولة قبرص 🇨🇾 😂😂. اللي هو مفيش حدود اقتصادية خالص كده. والمرة دي مش جزيرة هفأ زي بتاعة اليونان فتقول مش معترف بيها ؛ لا دي دولة ذات سيادة يعني مفيهاش لعب.

*️⃣ نروح بقي للمشكلة الحالية؛ فاكرين القانون قايل 200 ميل منطقة اقتصادية خالصة؛ وفي حاجة اسمها الجرف القاري ودي منطقة ارض تحت البحر امتداد لارضك وبتوصل ل 350 ميل؛ لما تيجي ترسمها لمصر هتلاقيها دخلت في المنطقة بتاعة قبرص دا من الشرق؛ ولما تيجي ترسمها من الغرب هتلاقي تعارض مع منطقة اليونان 🇬🇷 تركيا 🇹🇷.

*️⃣ فهنا القانون بيقول ايييه؛ اقعدوا مع بعض متتخانقوش 😂😂😂 فالدول تقعد سوا تتفق تقسم الموارد بينها بقي.

*️⃣ مصر بقي علي خلاف مع تركيا؛ فمصر فالت طبقا لاتفاقية البحار فانا معترفة ك مصر بالجزر اليونانية انها امتداد لدولة اليونان يبقي تركيا ملهاش في المنطقة دي حدود؛ وبالنسبة للشرق فانا غير معترفة بالغزو التركي لقبرص وبناء عليه هقعد مع قبرص اليونانية بصفتها الممثل الوحيد للجزيرة.

*️⃣ ومصر 🇪🇬 اتفقت مع اليونان وقبرص علي منطقة اقتصادية بتاعة اليونان 🇬🇷 ومنطقة بتاعة قبرص 🇨🇾 ومنطقة مصر 🇪🇬. يلا كل واحد يدور في منطقته.

*️⃣ تركيا قالت سوري حسرتكم انتم بتقسموا بناء علي قانون البحار اللي انا مش معترف بيها. لاااا طبقا ليا بقي... فمنطقة قبرص انتي يا مصر قولتي الحته دي بتاعة قبرص 🇨🇾 ليا ثلث قبرص فمن حقي انقب فيها. اما المنطقة اللي بتقولوا دي بتاعة اليونان 🇬🇷 عشان معتبرين الجزر امتداد للبلد؛ فانا مش معترف بالجزر يبقي منطقة اليونان 🇬🇷 دي بتاعتي انا انقب فيها.

*️⃣ يعني ظاهريا الخلاف الاساسي هو بين قبرص واليونان وتركيا مش مع مصر 🇪🇬 لكن مصر عاوزة تريح نافوخها لان لو اليونان 🇬🇷 وقبرص 🇨🇾 مش عارفين يستغلوا منطقتهم فممكن يقولوا طيب بصي يا مصر نعمل Hold بقي للحوار كله ووقفي استخراج لغاية ما نشوف ايه الحوار.

*️⃣ عشان كده مصر بتتصدر في الدفاع عن حقوق قبرص واليونان وبتهاجم تركيا 🇹🇷 اكثر من اليونان 🇬🇷 نفسها؛ فتركيا على مدي سنين كانت بتطلع تصرح انها ملهاش دعوة بمصر وخناقتها في شرق المتوسط مع قبرص واليونان؛ لغاية ما حصل موقف غريب يوم 2 اغسطس.

*️⃣ بيان خرج من وزارة الخارجية المصرية قال انه وصلنا انذار ملاحي من سفينة مسح تركيه انها هتعمل مسح يعني لمناطق في البحر المتوسط؛ لكن المنطقة رقم 8 المكتوبة دي تابعه لمصر حسب اتفاقها مع قبرص واليونان وقانون البحار؛ ومصر قدمت شكور للامم المتحدة؛ ودي اول مرة تركيا يحصل تداخل في المسح السيزمي مع مناطق مصرية؛ سابقا زي ما قولنا الشغل قبرص واليونان.

*️⃣ يوم 6 اغسطس مصر وقعت اتفاقية ترسيم حدود مع اليونان؛ تركيا قالت انها غير معترفة بيها؛ المتحدث باسم الخارجية المصرية قال ان الاتراك رفضوا الاتفاقية بدون ما يقرأوها؛ الاتراك قالوا هي مبنية علي قانون البحار اللي احنا مش معترفين بيه أصلاً.

*️⃣ الاتفاقية دي بتقصقص الحدود التركية بواسطة الجزر اليونانية؛ فطالما تركيا ملهاش مناطق بحرية (اقتصادية) فازاي توصل ل ليبيا وتوقع اتفاقية ترسيم بينهم 🤔 هي كده ملهاش حدود مع ليبيا 🇱🇾 صح ولا ايه 🤔 لما مالكش حدود معاها هتتفقوا ازاي ترسيم حدود سوا 🤔.

المفهوم الثلاثي اللي كان مالك بن نبي عمله بتاع "عالم الأفكار وعالم الأشياء وعالم الأشخاص" تقريباً بيشرح معظم المشاكل والعقبات اللي بتواجهنا...

*️⃣ وللتبسيط هو قسم أي شيء حولنا لثلاث أقسام وهو الأشخاص وهم البشر.. الأشياء يعني معدات كومبيوترات ترابيزات معامل سيارات ألخ ألخ... وعالم الأفكار وهو فكر البشر عامل إزاي.

*️⃣ هو بيشرح إنه لما بتيجي أمه ما تبقى متخلفه فيا ترى هى متخلفه ليه؟ والغلطة الكارثية التقليدية إننا بنفتكر إن السبب هو التخلف في "عالم الأشياء".... يعني الطب متخلف يبقى السبب مفيش مستشفيات؛ التعليم متخلف يبقى محتاجين نبني مدارس أكثر... وهكذا.

*️⃣ فلما تيجي الدول المتخلفة تعمل نهضة تركز فقط على تطوير "عالم الأشياء"؛ هاتلي أحدث ماكينات وأحدث طائرات وسيارات وابني أضخم مستشفي وأكبر مدرسة وووو.

*️⃣ في مثال مشهور كده وهو لو أنا روحت جبت الشعب الألماني ونقلته لغابات الأمازون؛ وبعدين روحت جبت قبائل الأمازون البدائية نقلتهم لألمانيا... فكده أنا بدلت عالم الأشياء بالكامل يعني الشعب الألماني بقى عايش بدون موارده... وزعيم قبيلة الأمازون اللي كان بيصطاد أسود حطيت قصاده أحدث كومبيوترات في العالم.... وسبت الشعبين دول 50 سنة ورجعت بصيت ... يا ترى ايه هيحصل؟

*️⃣ الألماني هيعمل حضارة أو دولة متقدمة في الأمازون (مش شرط نفس تطور ألمانيا أكيد) في حين قبائل الأمازون استخدمت الكومبيوترات كهدف للتصويب بالأسهم والمعدات الضخمة بقت مكان كويس يناموا تحته في الشمس... ونصهم مات بالصعق بالكهرباء أو لإنفجار مفاعل نووي معرفوش يشغلوه.

*️⃣ الموضوع بسيط قوي عشان لو أنتا أخدت قرد ودخلته أكبر معمل كيمياء في الكوكب فمتتوقعش منه يقدم انتاج... وطبعاً مقصدش إن البشر قرود لكني بضرب مثال عنيف للتوضيح.

*️⃣ طبعاً ما سبق لا يعني نهائي إن عالم الأشياء ملوش لازمة؛ لكن عالم الأفكار وعقول البشر هى الأهم... دائماً الاقتصاديين بيتكلموا عن إن الموارد لا تكفي ومن هنا بييجي فكرة "تكلفة الفرصة البديلة".

*️⃣ باختصار كده؛ هيكون شيء جميل ومثالي لو معانا فلوس نطور بيها عالم الأشياء وكمان ندرب البشر ونطور عقولهم وأفكارهم... دي رفاهية جميلة بس للأسف مواردنا مش هتكفي فلازم نحدد هنصرف الفلوس على مين... يعني لو هقرر أصرف 100 مليار أوزعها إزاي؟ بالمناسبة هي كده كده هتصرف عالإثنين ومفيش حد بيقول هنصرف تطوير مناهج تعليم بس ومش هبني مدارس... مفيش طبعاً كده؛ لكن اقصد هخصص مبالغ احطها إزاي؟

*️⃣ يعني مثال تخيل معاك 100 مليون ومحتاج مستشفي... ممكن تقول هعمل مبني فخم ب 50 مليون وهشتري معدات ب 40 مليون وهصرف 10 مليون على تدريب وتطوير حياة ومهارات الأطباء... وممكن تفكير ثاني يقول هبني مبنى أقل فخامة ليكن ب 20 مليون وهشتري معدات ب 60 مليون وهدرب الأطباء ب 20 مليون.

*️⃣ طبعاً أنا أسف لإني كل شوية بوضح إن الأمثلة والأرقام دي مجرد "مثال" يعني بضرب أرقام وليس واقعي ولا أعرف تكلفة مستشفي أصلاً تأسيسها كام... دا عشان الناس اللي بتحب تمسك المثال وتناقشه وتسيب الفكرة.

*️⃣ طبعاً الموضوع لو تم النظر إليه ببساطة هنقول طبعاً نطور البشر ونصرف كل الفلوس على "عالم الأفكار". بصوا الموضوع مش بسيط بالعكس دا معقد... ومحتاج صبر ومجهود رهيب.

*️⃣ تخيل معايا في منطقة عشوائية تماماً وزبالة أكوام وفوضى لا نهائية... أسوء منطقة عشوائية تتخيلها... المنطقة دي محتاج أطورها ومش حابب المنظر دا يستمر... عندي خيارين الأول التركيز على عالم الأشياء... يعني أنقل الناس دي لمنطقة أخرى منظمة متطورة (وجميلة ونظيفة عشان نبقى كملنا أكليشهات حيطان المدارس). عيب الطريقة دي إنها هتكلفني كثير قوي وكمان إن عالم أفكار الناس زي ما هو فبعد شوية المنطقة النظيفة قوي دي هتبقى نظيفة بس ثم متوسطة ثم سيئة ثم عشوائية.

*️⃣ فكر معايا 🤔 هو في مكان ربنا خلقه "معفن"؛ يعني ربنا خلق شوارع وحط فيها زبالة وبعدين البشر جم سكنوا فيها؟ لا طبعاً البشر هما السبب. فلو طورت لهم عالم الأشياء بتاعهم بس وسبتهم هيفضلوا بنفس العقليات اللي تلقائي ترمي الزبالة في الشارع واللي ممكن يسرق الكهرباء ويقطع الزرع والورد من الحدائق.

*️⃣ الناحية الثانية لو فكرت تطور عالم الأفكار مع تطوير بسيط في عالم الأشياء... يعني تصلح شوية واحدة واحدة شارع شارع عندهم لكن التركيز الأساسي تدريب الناس على إنهم يبقوا متحضرين... نشوف وظائف الناس دي ايه ونطورهم فيها عشان مستواهم يتحسن وندرس للأطفال ونطورهم.

*️⃣ مع الوقت الناس لوحدها هتبدأ تقلل الفوضي والحياة تبقى أفضل والتكلفة هتبقى أقل بكثير من التكلفة الأولى... لكن في مشكلة في الطريقة برضك وهى الوقت والصبر.

*️⃣ الطريقة الأولى أنا هصرف مبلغ ضخم آه بس بعد شهور قليلة هلاقي البشر دول ساكنين في مكان كويس ... اه ممكن بعد 5-10 سنين المكان دا هيبقى عشوائي... لكنك دلوقتي أنتا لو قولت صرفت 200 مليون فانتا شوفت بعينك بسرعة في خلال شهور نتيجة ال 200 مليون. شوفت مكان نظيف كويس بسرعة.

*️⃣ الطريقة الثانية هتصرف مبلغ اقل وبشكل بطيء يعني ليكن هتصرف 20 مليون سنوي... المشكلة إنك بعد سنة عينك مش هترصد تغير واضح ملموس... ممكن تكون أكوام الزبالة المعتاد حجمها 100 طن بقت دلوقتي 90 طن... عينك مش هترصد الاختلاف لكن هتشوف زبالة... بعد سنة كمان الزبالة بقت 80 طن بس عينك شايفه زبالة... فتبدأ تسأل نفسك هو 20 ثم 20 مليون اتصرفوا هدر راحوا... فهنا توقف وبعد شهور وسنين قليلة هتلاقي اكوام الزبالة رجعت تاني 100 طن.

*️⃣ الطريقة الثانية محتاج صبر طويل... أنتا زي المزارع اللي بيحط بذرة ومستني شجرة بعد 5 أو 10 سنين. لو زهق بعد 3-4 سنين وبطل يروي الشجرة هتروح وتموت وضاعت السنين الماضية.

*️⃣ لكن عارفين ميزة الطريقة الثانية عن الأولى ايه؟ إن بعد 10 سنين المكان هيبقى بالطريقة الثانية نظيف ومتحضر... وهيستمر كده إلى أن يشاء الله ومش هيكلفني تاني فلوس عشان البشر اتعلموا خلاص... الطريقة الأولى بعد 10 سنين هحتاج تاني أعملهم إزاله وأتكلف تاني 200 مليون ونعيد من جديد.

*️⃣ الاستثمار في البشر مهم وهو أهم شيء على الإطلاق... لكنه محتاج سنين عشان تشوف آثاره... ممكن تبصوا على تجربة سنغافورة وتشوفوا شكل النهضة... هتلاقوا سنين في الأول مفيش نمو حقيقي بيحصلهم في اقتصادهم... لغاية مرحلة بيحصل انفجار وانطلاقه... كسرت Breaking Point وهنا هتبدأ الإنطلاق.

*️⃣ لو نهضتك قامت على عالم الأشياء... فلو قامت حرب دمرت عالم الأشياء والمصانع والمعدات بتاعتك فهنا هتنتهي دولتك... لكن لما تكون نهضتك قائمة على عالم الأفكار والبشر... ممكن تتضرب قنبلة نووية زي اليابان وممكن تدمر بلدك بالكامل زي ألمانيا... لكن طول ما البشر عايشين هيقدروا يعيدوا تاني النهضة. لإن النهضة في عقولهم.

*️⃣ عشان كده من يومين كتبت لكم بوست عن الاستعمار ليه هو مركز على احتلال عالم الأفكار. عشان لما يتغير الزمن ويمشي الاستعمار من عالم الأشياء ويغادر الدولة؛ يضمن إن عقول البشر لسه بتاعته

راجعوا بوست الاستعمار من هنا

https://bit.ly/3gIGmok

*️⃣*️⃣ طولت عليكم... والناس اللي هتقولي ايه أخبار القناة فإن شاء الله خلال أقل من شهر هبدأ التجارب لتسجيل الفيديوهات وربنا يسهل بقى دعواتكم ومعلش هتستحملوني في الأول إنها مش هتكون جودة محترفة لإني بالأساس "كاتب رغاي" مش "مذيع ومؤدي" فهاخد فترة علي ما أعرف اظهر كويس 😥😥.

في اكتوبر 1940 أطلق موسوليني 🇮🇹 حملة لغزو اليونان 🇬🇷 وبشكل أساسي كان معتمد علي ألبانيا 🇦🇱 في الغزو لانها شمال اليونان.

*️⃣ موسوليني 🇮🇹 كان فاشل فعلياً والمقاومة اليونانية طلعت عينه بل بدأت هجوم مضاد علي ألبانيا.

*️⃣ شمال ألبانيا والفاصل البري بين دولة ايطاليا 🇮🇹 والبانيا كانت مملكة يوغوسلافيا؛ حكومتنا كانت بتميل الي هتلر.

*️⃣ في الوقت دا هلتر كان خلص خلاص علي معظم اوروبا واحتل فرنسا 🇫🇷 وهولندا 🇳🇱 والسويد 🇸🇪 وبلجيكا 🇧🇪 ونص بولندا 🇵🇱 وتشيكوسلوفيكا ولوكسمبورج 🇱🇺 وبصوا هو اخد الخريطة كلها 😂.

*️⃣ هتلر بعت لحكومة يوغوسلافيا وقالهم يلا انضموا للمحور (ألمانيا وإيطاليا واليابان) وبالفعل حكومة يوغوسلافيا وافقت ويوم 25 مارس 41 وقعوا بروتوكول للانضمام.

*️⃣ يومين بالظبط وحصل انقلاب عسكري في يوغوسلافيا عمله انصار الغرب (الحلفاء) ومن الاخر يعني بقت يوغوسلافيا بعد ما كانت حليف حتي لو مش بيحارب؛ بقت عدو. وعدو واقف بين ايطاليا 🇮🇹 الفاشلة والبانيا 🇦🇱 وكده بقي غزو اليونان 🇬🇷 أصعب.

*️⃣ هتلر قالك بلا هبل ويوم 6 أبريل 41 يعني بعد انقلاب بتاع يوغوسلافيا ب 9 ايام بس هتلر هاجم يوغوسلافيا؛ ويوم 17 يعني بعد 11 يوم استسلمت يوغوسلافيا.

*️⃣ قوات هتلر موقفتش وكملت لغاية ما خلصت عاليونان علي يوم 30 أبريل وحكومة اليونان هربت جت القاهرة واعلنت حكومة من المنفى والامير صوفيا بنت ملك اليونان دخلت مدرسة (كلية النصر للبنات) بعد كده؛ وبالمناسبة صوفيا تزوجت لاحقاً الملك خوان كارلوس ملك أسبانيا السابق والهارب في الامارات حالياً.

*️⃣ نرجع لأوروبا؛ الأخ موسوليني قعد 6 شهور مش عارف يدخل اليونان؛ وهتلر دخل اليونان ويوغوسلافيا في 24 يوم 😂😂😂.

*️⃣ قوات اليونان المهزومة هربت علي كريت وبعضها هنا مصر؛ لكن الأساس جزيرة كريت؛ البريطانيين بهزيمتهم في اليونان خرجوا من أوروبا فنقلوا قوات لجزيرة كريت.

*️⃣ هتلر قال للقوات بتاعته تشرب كوباية شاي كده وتريح ويوم 20 مايو بدأ غزو كريت.

*️⃣ علي يوم 27 كانت القوات الانجليزية اليونانية اتهزمت وبدأوا يوم 28 الانسحاب من الجزيرة باتجاه مصر.

*️⃣ يوم 29 يعني اليوم التالي لبداية الانسحاب من كريت (استمر 3 ايام)؛ طلع انتوني ايدن وزير خارجية بريطانيا 🇬🇧 وقال تصريح غريب.

*️⃣ قال (كثيرون من مفكري العرب يرجون للشعوب العربية درجة من الوحدة أكبر مما هي عليه الآن، وحكومة صاحب الجلالة من ناحيتها ستؤيد كل التأييد أية خطة تلقى من العرب موافقة عامة)

*️⃣ لو محدش فهم التصريح فهو قال ما معناه ان بريطانيا 🇬🇧 موافقة ان الدول العربية تعمل تحالف بينها وباختصار كده هو يومها اقترح انشاء جامعة الدولة العربية.

*️⃣ عارف انكم حاسين بالفصلان؛ ايه اللي جاب الجامعة بتاعتنا هنا؛ دي حرب عالمية وهتلر وغزو كريت وانسحاب؛ بس هو التاريخ الظريف بتاعنا كده.

*️⃣ بريطانيا 🇬🇧 في الوقت اللي قواتها بتتسحق في كل مكان بتدعوا الدول العربية لإنشاء الجامعة العربية.

*️⃣ الدعوة دي تلقفها الملك فاروق ومصطفي النحاس باشا رئيس الوزراء ؛ وبدأوا عمل مفاوضات ومباحثات.

*️⃣ نجري شوية في الزمن ونروح يوليو 42؛ قوات روميل دخلت مصر وحصلت معركة العلمين الأولي اللي فيها تمكن الحلفاء من إيقاف تقدم روميل.

*️⃣ وقفت الحرب شوية وبدأ الألمان يحشدوا قواتهم خلال اغسطس ؛ والانجليز شحنوا جيشهم من كل مكان في الكوكب من استراليا ونيوزلاندا لغاية الهند وجنوب أفريقيا.

*️⃣ العالم كله مستني معركة جديدة بين قوات روميل والحلفاء ويا تري مين هيكسب.

*️⃣ يوم 5 سبتمبر 42؛ يطلع بيان من حكومة مصطفي النحاس بدعوة كل من السعودية 🇸🇦 والأردن 🇯🇴 والعراق 🇮🇶 و لبنان 🇱🇧 وسوريا 🇸🇾 واليمن 🇾🇪 انهم يبعتوا... لا مش قوات يبعتوا وفود لمناقشة انشاء جامعة الدول العربية 😂😂.

*️⃣ الشهر التالي اكتوبر حصلت معركة العلمين الثانية واتهزم الجيش الالماني.

*️⃣ نجري في الزمن تاني ونروح شهر فبراير 1943؛ الاتحاد السوفيتي بيطلع بيان يعلن نهاية معركة ستالينجراد ؛ والعالم مش مصدق هو جيش هتلر ممكن يخسر عادي كده 🤔.

*️⃣ بعد البيان السوفيتي يطلع انتوني ايدن وزير خارجية بريطانيا 🇬🇧 تاني ويعلن موافقة وتأييد بريطانيا لإنشاء جامعة الدول العربية. اه والله يا جدعان 😂😂😂

*️⃣ ندخل سنة 1944 وقوات السوفيت بتطارد الالمان؛ في شهري 8 و 9 تنسحب المانيا من دول رومانيا 🇷🇴 وبلغاريا 🇧🇬 وفنلندا 🇫🇮 والسوفيت وراهم.

*️⃣ الشهر التالي أكتوبر 1944 مندوبين من الدول العربية بيتقابلوا في الاسكندرية ويوقعوا ما يعرف ببرتوكول الاسكندرية لإنشاء جامعة الدول العربية؛. وبريطانيا تعلن تأيدها كالعادة.

*️⃣ بداية 1945 ؛ قوات السوفيت والامريكان والانجليز جوا المانيا ؛ مارس 45 بدأت تحضيرات السوفيت لغزو برلين بجيش قوامه أكثر من 2 مليون جندي.

*️⃣ برضك مارس 45 يوم 22 تحديدا اعلان انشاء جامعة الدول العربية.

شيء طريف قوي في تاريخنا انك تلاقي اللي زرع وكبر ورعي (القومية العربية) هي انجلترا ؛ بداية من الثورة العربية الكبري اللي الانجليز عملوها بواسطة شريف مكة؛ لغاية انشاء جامعة الدول العربية نفسها.

مش هوضح اكثر لان اظن الرسالة وصلت

قبل الانجليز كانت الشعوب عندنا عندها انتماء تاني؛ الانجليز حطوا بدالها قومية عربية.

بما ان الذهب عمال يعمل شقلباظات وتقلبات في السوق العالمي ؛ ف تعالوا نرغي شوية عن الذهب؛ بس هنتكلم في مفاهم مش توصيات شراء وبيع عشان محدش يحبط:

*️⃣ لازم نفهم ان الذهب سلعه بيتم التجارة عليها بنظام العرض والطلب وبيحصل عليه مضاربات؛ الذهب زي الفضة زي البطيخ زي المانجة زي البترول ؛ يعني قيمته بيحددها العرض والطلب والمضاربات وركز مع الاخيرة دي وخليها في بالك.

*️⃣ لما نفهم ان الذهب سلعه؛ هنا في مفهوم غلط متوارث عبر الاجيال وهو ان الذهب مخزن للقيمة؛ هو لو عاوزين الدقة فالمفهوم دا فيه مغالطة وخداع؛ ف المقصود بيه حاجة واللي الناس بتفهمه حاجة ثانية خالص.

*️⃣ الذهب سلعه فعليه يعني ليها قيمة (طلب الناس هو اللي عمل القيمة)؛ ميزته انه قابل للتداول في أي مكان وأي زمان؛. يعني لو انتا عايش ايام محمد علي وجبت قطعه ذهب وزنها 1 كيلو وبعدين لقيت اله زمن فروحت سنة 2200 فعادي هتقدر تبيع الذهب ؛ لو معاك فلوس فهي اتلغت (تبقي محظوظ 🍀 لو طلعت عملات نادرة فهنا سعرها من ندرتها مش ان الفلوس دي ليها قيمة).

*️⃣ كمان الذهب بيباع في أي مكان؛. يعني أنا لو معايا سبيكة 100 جرام وعايش في مصر ممكن لو روحت روسيا 🇷🇺 الصين 🇨🇳 أستراليا 🇦🇺؛ أي مكان هتبقي مقبولة البيع.

*️⃣ كمان ان الذهب لا يمكن للحكومات انها تصدره ؛ يعني البنك المركزي محتاج مرتبات موظفي الدولة فتروح وزارة المالية مديه صك للبنك المركزي ليكن ب 20 مليار وهو يطبع لها 20 مليار. لكن الذهب دا مش ممكن الا بالتعدين.

*️⃣ النقاط اللي فاتت دي هي السبب اللي خلي الناس عندها قناعه ان الذهب مخزن القيمة.

*️⃣ الناس عندها اعتقاد ان الذهب بيعوض التضخم؛ يعني لو السلعه X دلوقتي سعرها 100 جرام ذهب فسنة 2030 هيكون سعرها 100 جرام ذهب. والكلام دا بلح عشان الناس بتنسي المضاربات.

*️⃣ أحيانا بتحصل ازمات؛ ازمة اقتصادية حرب كوارث طبيعية الخ الخ؛ الحكومات تتزنق في فلوس فتشغل المطابع؛ والشعوب بسبب الجينات المورثوه فيحسوا ان كده رايحين في داهية فيروحوا يشتروا ذهب. فهنا الذهب هوب يزيد بشكل مش طبيعي زي ما بيحصل دلوقتي.

*️⃣ بنهاية الازمة الناس تحس بالامان؛ الناس مش هتقعد تحوش ذهب؛ عاوزين يصرفوا ويعيشوا؛ بيع الذهب ؛ ف هوووب الذهب ينزل.

*️⃣ وعشان منبقاش بنتكلم نظري ؛ تعالوا نبص عالتاريخ ؛ سنة 2011 الذهب حصلت عليه مضاربات واسعه ووصل سعره ل 1900 دولار 💵 للأوقية؛ وبعدين المضاربات هديت؛ نهاية 2015 يعني 5 سنين الذهب بقي 1050 دولار.

*️⃣ بالنظر للمثال السابق؛ لو فرضنا الذهب مخزن حقيقي للقيمة ووو؛ فهل الاسعار والحياة رخصت 45% من 2011 الي 2015 (بالدولار). لا خالص واظن التضخم المعتاد 1-2% يعني مفروض الاسعار زادت قول حتي 5% بس يعني فعليا الذهب فقد نصف قيمته. ولو فب سلعه سعرها 100 جرام في 2011 فبقي سعرها 200 جرام في 2015 مع ان سعرها بالدولار تقريبا مفرقش حاجة.

*️⃣ تخيل معايا ونفترض جدلا حد شاري ب 1900 في 2011 ؛ دا لغاية يناير 2020 يعني فات 9 سنين كاملة فكان لسه خسران؛ يعني لو كان شايل طوب فسعر الطوب والأسمنت زاد اضعاف 😂؛ لما حصلت ازمة الكورونا الذهب كسر بقي ال 1900 دي ؛ يعني مضاربات 2011 عشان تتعوض احتاجة وباء عالمي واسوء لزمة اقتصادية من 90 سنة 😂.

*️⃣ طيب هل معني ما سبق اني بقول محدش يستثمر في الذهب او محدش يشيل ذهب او الذهب ملوش لازمة 🤔🤔؛ لا طبعاً لكن اقصد الذهب تشتريه في 3 أحوال :

1️⃣ بتعرف تستثمر؛ يعني تدرس السوق وتقول الذهب كسر مقاومة سعر كذا فكده هيعمل Up Trend هشتري دلوقتي وهعمل جني ارباح عند سعر كذا وهعمل ايقاف خسائر Stop Loss عند سعر كذا. بتقعد يعني تشتري وتبيع وتشتري وتبيع؛ بتثتمر في الذهب مش بتخزن ذهب.

2️⃣ مش بتتعامل مع البنوك وعاوز تشيل للأولاد؛ يعني نفترض انتا لأي سبب كان مش بتحط فلوس في البنك؛ ومش بتعرف تشغل فلوسك في مشاريع ولا استثمار؛ فعاوز تشيل فلوس لأبنك المولود دلوقتي تنفعه بعد 25 سنة؛ فالذهب هيكون خيار كويس في الظرف دا (مفيش بنوك ولا استثمار).

3️⃣ هيحصل كارثة في دولتك ؛ يعني حرب شاملة أو تعويم للعملة وهتفقد قيمتها فجأة أو أو فعاوز تطمن؛ هنا في خيارين مش خيار واحد؛ الذهب والدولار؛ تحول ثروتك لواحد فيهم لكن افتكر بمجرد الازمة تخلص رجع ثروتك لعملتك أو ادرس الوضع الجديد واحكم.

فدي ال 3 أسباب اللي شايفهم كويسين للذهب؛ لكن عاوز تشيل فلوس شهور او سنة او سنتين وتقول اشيلهم ذهب؛ احتمال كبير تخش تشتري في اعلي الكيرف وتلبس زي ما حصل مع الناس في 2011 و 2012 و 2013 لما لبسوا في انهيار 2014 و 2015