كل يوم أنا شكلي هنزل بوست دلوقتي؛ مهو معاد قطع الكهرباء عندي في المكتب من 1 ل 3؛ وبوكس التليفونات بيفصل وشبكات الموبايل زفت برضك... فأعمل ايه؟ بمدد عالكنبة في الشغل اكتب بوست وأنام شوية في 25% من يوم الشغل المهدر دا 😭😭

*️⃣ إمبارح لما نقلت تصريح مجلس الوزراء إن سبب زيادة قطع الكهرباء هو زيادة الاستهلاك + إن الجهة اللي كانت بتورد لمصر 800 مليون قدم يوميا بقت تورد صفر (اسرائيل بس مقالوش اسمها)..

*️⃣ كذا حد علق وقال كده اسرائيل بتضغط علينا عشان موافقناش نرحل الفلسطنيين عندنا وووو... بس معلش اسمحوا لي أعلق بإنهم ميقدروش يبتزوا مصر بموضوع الغاز دا؛ غير خااالص أوروبا مع روسيا.

*️⃣ أولاً الغاز الفلسطيني المسروقة ملوش تصريفه غير مصر؛ أي غاز بيتصدر بحاجة من 2؛ إما بواسطة الأنابيب؛ ماسورة تربط الكيان مع أوروبا مثلا أو المستوردين عامة؛ هما معندهمش مواسير غير معانا إحنا و الأردن؛ يعني لو مأخدناش منهم فخلاص بخ.

*️⃣ الخيار الثاني هو الإسالة والتصدير؛ تبعت الغاز لمحطة إسالة تضغطه وتسيله وتيجي سفن تشيله؛ إسرائيل معندهاش محطة إسالة ولا قبرص ولا الأردن ولا حد في منطقتنا عنده غير مصررررررر ؛ عندك 2 محطة؛ يعني هما ييجوا يسيل عندنا عشان يعرف يصدره؛ مفيش خيار تاني.

*️⃣ فالغاز الفلسطيني المسروق دا مفيش حد ممكن يصرفه لإسرائيل غيرنا؛ فلو حد هيضغط عالثاني يبقي مصر اللي تقدر تضغط عليهم بملف الغاز بإننا نوقف لا نشتري منهم ولا نسيل لهم؛ ويلبسوه بقي...

*️⃣ قبل ما تقولي خلاص ينفضوا لنا ويعملوا محطة إسالة ليهم؛ بص مش هقولك التكلفة ممكن تبقي 10 مليار دولار بدل محطاتنا؛ ولا هقولك ان صحيفة جلوباس الإسرائيلية قالت في 2019 إن حكومة مصر وإسرائيل بيدرسوا المشاركة في محطة إسالة ب 15 مليار دولار في سيناء ؛ لكن هقولك المحطات دي بتحتاج سنين شغل. فهو مش هيقولك طز فيك ويشتري من بره؛ لا دا هيبقي صادراته صفر يعني ايراد صفر وفي نفس الوقت ياخدله 4 او 5 سنين علي ما يعمل محطة ويشغلها بكفاءة...

*️⃣ ثانياً وهو الظريف في الموضوع كده بالصلاة على النبي وهو إن انتا مش مواطن أوروبي؛ المواطن الأوروبي عايش بدون حاجة اسمها قطع كهرباء؛ ومعتمد عالغاز في التدفئة وحياته... فلو قطع عنه الكهرباء هيزعل وهيزعل الحزب والحكومة في أول انتخابات... أما انتا مصري؛ لو الحكومة قررت بكره قطع الكهرباء يبقي 6 ساعات هتعمل ايه يعني 🤣🤣 ؛ متكبرش دورك ومتتخيلش ان حد يقدر يلوي ذراع الدولة... انتا مش أوروبي.

*️⃣ ففكرة إنهم بيضغطوا علي مصر؛ ما يمكن العكس مصر هي اللي بتضغط عليهم؛ مفروض مصر هي اللي ليها اليد العليا... مفروض يعني.

*️⃣ بالمناسبة إسرائيل عارفه إن مصر لها اليد العليا حالياً ودا شيء هي مش بتحبه حتي وإن كانت علاقاتها مع مصر كويسة؛ هما بيحبوا يأمنوا نفسهم؛ فعشان كده تلاقيهم في 5 سبتمبر 2023 يعني من شهر مضوا اتفاقية مع قبرص واليونان لمد أنابيب غاز لأوروبا... وقبلها في 2022 باعوا 22% من حقل الغاز الاساسي تمارا إلي دولة الإمارات لإن علاقات الإمارات بمصر ممتازة؛ وكمان الإمارات قبل كام شهر اقترحت إنشاء محطة إسالة عائمة (سفينة) تتحط جنب الحقل تسيل وتصدر... فولاد الكلب مش معتمدين علينا وساكتين؛ لااا قاعدين بيعملوا بديل لينا بحيث أي وقت يقولك شكراً... لكن حالياً ولسنة وسنتين قدام مفيش بديل ورجلهم فوق رقبتهم غير لمصر إن كان عاجبهم أو مش عاجبهم.

بس يا سيدي ودا كان بوست انقطاع الكهرباء بتاع النهاردة؛ وحسبنا الله ونعم الوكيل في الوقت المهدر دا.

الصحة النفسية موضوع معظمنا متجاهل وجوده؛ لو ركزنا بيكون عالصحة الجسمانية؛ كلي قلب مفاصل معدة إلخ إلخ. مع إن الصحة النفسية قادرة تدمر لك كل دا.

*️⃣ المشكلة إن حتى تفكيرنا في الاستقرار النفسي بيكون بعد حدوث صدمات فقط؛ يعني شايفين اللي ممكن يأثر علينا هو أمر كبير؛ وفاة شخص أو خسارة ضخمة... مفيش شك إن الصدمات الكبرى بتأثر علينا لكن في قاتل صامت شغال.

*️⃣ عشرات ومئات من التفاصيل الصغيرة اللي بتضغط على حالتنا النفسية؛ مفيش حاجة فيهم كبيرة إنها توقفك تفكر في تأثيرها عليك؛ لكنهم كثير جداً... بيكونوا زي النمل الصغير اللي بينشتر في جذر الشجرة؛ حجم كل نملة صغيرة بالنسبة للشجرة لا شيء... لكنهم هياكلوا الشجرة؛ هياكلوا جذورها...

*️⃣ في يوم من الأيام الشجرة هتبقي انتهت؛ مهما حاول المزارع ينقذها؛ خلاص انتهت؛ الغريب إن ساعات يكون آخر قطمة هتنهي الشجرة ممكن تيجي من أصغر نملة بالخلية... يعني إنتي يا أضعف نملة اللي قضيتي عالشجرة الضخمة دي؟ الحقيقة لا... بس هي كانت القشة.

*️⃣ فحالتنا وصحتنا النفسية زي الشجرة؛ كل يوم يتلم عليها نمل صغير ياكل فيها؛ صغير قوي لدرجة مش هتاخد بالك من تأثر القضمة بتاعة كل نملة؛ بس هتوصل في يوم تلاقي نفسك منهار؛ ليه حصل وإزاي وصلت كده؛ مش هتقدر تعرف؛ بس خلاص الشجرة انتهت.

خدوا بالكم من صحتكم النفسية قبل ما الشجرة تنتهي ويفوت الأوان.

حدث بالفعل

*️⃣ زوجتي : حمد لله عالسلامة من عودتك من السفر؛ في شغل كثير متراكم وراك لازم يخلص بكره (زوجتي شغالة معايا في دكان تك)

جسمي:

*️⃣ شغل + متأخر.... أحلى دور برد وسخونية على عيونك؛ أرقد بقي الخميس في البيت 😭... وطبعاً كلنا متوقعين إنه برد المروحة إياه 😩😩 ربنا يستر إن شاء الله.

⬅️⬅️ ملحوظة للي بيحبوا يغلسوا في نوعية البوستات دي

دا بوست للقلش؛ واحد سخن وبيقلش ويخرف؛ المرض والشفاء بإيد ربنا عز وجل وجسمي مش هو اللي بيقرر؛ وربنا هو اللي أراد أمرض دلوقتي... البوست للقلش ارحموني؛ بطلت أكتب بوستات بسبب والتنظير لإني ضغطي عالي فمش ناقص فقع.

دعواتكم بقى.

أخيرا صحيت من غيبوبة الحرارة ال 40 اللي كنت فيها؛ لقيت خبر فوري اللي بيقولوا اتهكر

صعبان عليا الهاكر اللي هياخد داتا كروت مصرية هييجي يستخدمها هيلاقيها مش شغالة دولي 🤣 ولا ليميت ال 250 دولار خلصان بفرض إن دا كريديت كارد 😁

بالمناسبة مش فاهم موضوع خشوا امسحوا الكروت دي؛ مهو لو الاختراق تم يبقي الهاكر أخد داتا الكروت؛ تمسحها او تسيبها هيفرق في ايه؟؟ لو في إجراء أمان هيكون إيقاف الكروت من البنك.

أروح أكمل نوم تاني

هما القادة المسلمين والعرب لما بيسافروا قمم ؛ بيصرفوا بدل انتقال؟ أصلي ملاحظ انهم بيحبوا الفسح بتاعة القمة اللي مش عارف ايه دي كثير... هي فيها بدلات انتقال ولا فسحة بالطيارة ولا الموضوع رسالة وفن ولا ايه

كل يومين نسمع قمة عربية قمة خليجية قمة اسلامية قمة افريقية قمة السلام عرب اسكندرية الجراج السلام السلام السلااااام 🤣🤣🤣🤣 (دي مناطق ورا بعض في القاهرة للي متابع من بره وبقولهم ك قلش)

حد يقولهم يقعدوا في دولهم ويستخدموا فيديو كونفرانس لذيذ ومريح ومش هتفرق النتيجة الختامية كثير.

عاوز أشارك في موضوع توقعات هبد التعويم

توقعي التعويم هيحصل ما بين 20 ديسمبر و 10 يناير

لما يحصل التعويم هقول ليه توقعت التاريخ دا

⬅️ بالمناسبة التعويم بيحصل مرة واحدة بس؛ اللي عملناه مارس 2022 و اكتوبر 2022 و يناير 2023 اسمه تخفيض للعملة مش تعويم

اسيب بقي البوست هنا ونرجع له

⬅️ اه بالنسبة لتتوقع كام؛ فانا لغاية من اسبوعين كان توقعي التعويم 40-45 جنية... دلوقتي السوق بقي كوميديا فممكن علي 20 ديسمبر دي تلاقي السوق السودا ل 70 جنية 🤣🤣🤣 محدش بقي فاهم حاجة في الضحك دا وبيحصل لمصلحة مين

تحديث بعد 8 دقايق كده للتوضيح

لو استنينا ل يناير هيبقي الموضوع كوميدي ومفروض نتحرك بدري؛ بس في مصر مش بنحب حاجة اسمها بدري دي؛ بقالنا سنتين بنتحرك سلو موشن هتيجي علي شهر

بص معايا يا كابتشن كده ودي عينة أخبار

*️⃣ بلومبيرج بتقولك في حزمة مساعدات اقتصادية لمصر قادمة من الاتحاد الأوروبي ب 9 مليار يورو قادمة

*️⃣ الكويت تقرر تجديد الودائع المنتهية وعدم سحبها

*️⃣ مؤسسات دولية هتدينا كام مليار دولار كده في بنود مختلفة

*️⃣ ضخ الغاز من ولاد الكلب رجع تاني بداية الاسبوع دا

*️⃣ السندات المصرية بره في أحسن وضع ليها من شهور

*️⃣ التأمين عالسندات المصرية برضك في أحسن وضع ليه من شهور.

*️⃣ الطبيعي لما دولة يخفضوا تصنيفها الائتماني يحصل معاها العكس؛ يتخاف حد يديها فلوس مش العكس اللي حاصل مع مصر اخر اسبوعين.

*️⃣ لكن نفس ذات الوقت الدولار محلياً ماشي العكس؛ وطبعاً فاهمك ياللي هتقولي أصل دول قروض وسلف ومش هتصلح وعمر ما في بلد بتنصلح كده ووو... صح عندك حق بس الأسواق مش بتشتغل كده؛ السوق بيقول جايلك فلوس يبقي ينزل السعر حالياً... طول ما قادر تدخلك دولار يبقي ينزل؛ جايبه من عائد تصدير جايبه سلف جايبه صفقات سياسية.... المهم جايب ومش مهمين منين؛ تاجر في المخدرات يا أخي...

*️⃣ فاللي بيحصل دلوقتي دا ملوش سبب منطقي اقتصادي؛ اه في التزامات علينا؛ اه تمام ما حتي الان معظمها بنسدده من البنوك المحلية؛ اخرهم ال 1.6 مليار دولار من كام يوم؛ جددناهم ل نوفمبر 2024 عادي يعني... فالطلب الحكومي اكيد بس ليه كل العنف دا... فلو هنخمن هنقول ان في 2 محتملين سبب للي بيحصل.

*️⃣ السبب الأول اعتبروه كده (لورد فولدمورت) من سلسلة هاري بوتر؛ سبب كلنا عارفين انه موجود بس مينفعش نتكلم عنه... فنروح للسبب الثاني مباشرة 🤣؛ طيب اللي هيقولي طيب قولت ليه في سبب بس مقولتوش ولا ناقشته؛ فدا عشان اللي هيطلعوا في التعليقات يقولوا بس في سبب تاني؛ يا راااجل؛ علي رأي ريتشارد في فيلم الناصر صلاح الدين (البابا فى روما وكل الحطابين فى الجبال النائية والفلاحون فى مزارعهم والعجائز حول نار المدفأة فى ليالى الشتاء) كل دوا عارفين إن في سبب تاني... مهواش إنبهار... تذكر فولدرمورت من هاري بوتر أو We Don't Talk About Bruno من فيلم انكانتو.

*️⃣ السبب الثاني هي نظرية نفسيه شهيرة في الاقتصاد إسمها The Greater Fool ودي باختصار كده للي مش فاكرها لإني اتكلمت عنها سابقاً؛ إن بيكون في سلعة سعرها ليكن 10؛ بس أنا عارف إن في (زبون) مستعد يشتريها ب 11؛ فهنا بشتريها أنا وابيعها له ب 11؛ الزبون دا اشتراها ليه ب 11؟ عشان مقتنع ان في (زبون تاني) هيشتريها منه بكره ل 12 والزبون ابو 12 مقتنع ان في ثالث هيشتري منه ب 13 وهكذا... فتبقي السلعة ب 10 بس سعرها عااادي يوصل ل 17 و 18 و 20.

*️⃣ من هنا جه اسم النظرية (الأحمق الأكبر) ؛ إنتا بتقول (آه أنا احمق وبشتري حاجة سعرها 10 بس يشتريها ب 15 عشان أنا عارف إن في حد احمق أكثر مني هيشتريها مني ب 17) كله معتمد إن في حد أحمق منه...

*️⃣ فحالياً سوق العملة فيه طلب من المركزي؛ وطلب من المستوردين؛ وناس بتحوش فلوس؛ وناس تانية بتتبع (الأحمق الأكبر) ؛ داخله تشتري ب 50 عشان واثقة إنه يجيب 51 وهتشتري ب 51 عشان واثقة ان حد هيشتري منها ب 52؛ وهتشتري ب 52 عشان واثقة ان بكره هييجي حد يشتري منها ب 55 وهكذا.

*️⃣ يونيو 2022 لما سألوا بيل جيتس علي NFT وهي الصور الرقمية دي رد وقال 100% based on greater fool theory... ورغم كده صور اتباع بملايين الدولارات.. طيب إزاي؟ عشان مقتنع ان في حد غيرك هييجي يشيل... الزلطة اللي في الارض دي تساوي ولا حاجة؛ لكن لو عندك قناعة ان حد ممكن يشتري الزلطة دي ب 100 جنية؛ عااادي جدا مستعد انتا تشتري الزلطة دي ب 70 جنية ليه لا...

*️⃣ خد بقي نظرية الأحمق الأكبر دي وضيف عليها عدم وجود أدني ثقة لأي مواطن في الأقتصاد مع حكومة بتعتبر إن المواطن مش من حقه يعرف تفاصيل... فدا خلق شعور مفادة الدولار طالع طالع؛ وهنا ييجي دور نظرية الأحمق الأكبر اللي تغذي الموضوع وتخليه يتوقع ما لا نهائي وجود أحمق أكبر؛ لإنها بتلاعبه لعبة؛ يعني واثق في الجنية المصري؟ لا صح؛ يبقي اشتري دولار بأي سعر ولو 60 ولو 70 وهكذا بقي...

وأكتفي بهذا القدر ونلتقي في بوست آخر؛ ويا رب يطلع عند الحكومة خطة ما بدل ما هنزعل كلنا لو الانفلات دا فعلاً إنفلات.

هي جامعة الدول العربية نشأت إزاي؛ مبقولش الخطوات الإجرائية لكن الفكرة مين بدأها؟.

*️⃣ يعني ولاد الكلب جيرانا كلنا عارفين قصتهم بداية من المؤتمر الأول في بازل لغاية رعاية بريطانيا ليهم بالوعد الشهير ورعاية الهجرة وقمع أهلنا وتسليح الكلاب... هما ولاد بريطانيا يعني وعشان كده الرئيس محمود عباس قالهم (مش هتقولوا لنا حتي سوري ولا هتزبلونا كما زبلتومنا كل مرة) الراجل عاوز حتي سوري منهم بس مقالوهاش.

*️⃣ المهم دي دولة ولاد التيت؛ احنا بقي جامعة الدول العربية جت إزاي وايه قصتها؟؟

*️⃣ تبدأ القصة من أيام الحرب العالمية الثانية؛ قوات موسوليني كانت مش قادرة تحتل اليونان وقعدت 6 شهور تحارب؛ هتلر زهق من حليفه الضعيف خاصة إن الجهة بتاعته حصل فيها خلل بتمرد يوغوسلافيا بانقلاب عسكري مدعوم من الحلفاء....

*️⃣ هنا اطلق هتلر حملة عسكرية سريعة في أبريل 1941 تمكنت من احتلال يوغوسلافيا وكذلك اليونان في 24 يوم (اليونان اللي موسوليني فاشل يدخلها بقاله 6 شهور) وتم ترحيل العائلة الملكية اليونانية للاسكندرية وبنت الملك دخلت مدرسة النصر عندنا ولاحقاً بقت الملك صوفيا ملكة اسبانيا وزوجة خوان كارلوس...

*️⃣ الحملة النازية موقفتش وهاجمت قاعدة بريطانيا في البحر المتوسط وهي جزيرة كريت. وتمكنوا من احتلالها هي كمان في أسبوع ويوم 28 مايو أعلن الانجليز بداية الانسحاب نحو مصر برضك وانتهي الانسحاب في 1 يونيو.

⬅️ عارفك هتقولي ايه علاقة دا بجامعة الدول العربية؛ معلش كمل معايا معلش هانت اهو

*️⃣ يوم 29 مايو يعني اليوم التالي لبداية الانسحاب من كريت؛ طلع انتوني ايدن وزير خارجية بريطانيا 🇬🇧 اللي لاحقاً بقي رئيس الوزراء في حرب 56 وقال تصريح غريب.

*️⃣ قال (كثيرون من مفكري العرب يرجون للشعوب العربية درجة من الوحدة أكبر مما هي عليه الآن، وحكومة صاحب الجلالة من ناحيتها ستؤيد كل التأييد أية خطة تلقى من العرب موافقة عامة)

*️⃣ لو محدش فهم التصريح فهو قال ما معناه ان بريطانيا 🇬🇧 موافقة ان الدول العربية تعمل تحالف بينها وباختصار كده هو يومها اقترح انشاء جامعة الدولة العربية. وقال دا وسط الحرب العالمية؛ شوف الفراغ يا أخي.

*️⃣ بريطانيا 🇬🇧 في الوقت اللي قواتها بتتسحق في كل مكان بتدعوا الدول العربية لإنشاء الجامعة العربية.

*️⃣ الدعوة دي تلقفها الملك فاروق ومصطفي النحاس باشا رئيس الوزراء ؛ وبدأوا عمل مفاوضات ومباحثات.

*️⃣ نجري شوية في الزمن ونروح يوليو 42؛ قوات روميل دخلت مصر وحصلت معركة العلمين الأولي اللي فيها تمكن الحلفاء من إيقاف تقدم روميل. وبدأ الألمان يحشدوا قواتهم خلال اغسطس ؛ والانجليز شحنوا جيشهم من كل مكان في الكوكب من استراليا ونيوزلاندا لغاية الهند وجنوب أفريقيا.

*️⃣ العالم كله مستني معركة جديدة بين قوات روميل والحلفاء ويا تري مين هيكسب.

*️⃣ يوم 5 سبتمبر 42؛ يطلع بيان من حكومة مصطفي النحاس المصرية بدعوة كل من السعودية 🇸🇦 والأردن 🇯🇴 والعراق 🇮🇶 و لبنان 🇱🇧 وسوريا 🇸🇾 واليمن 🇾🇪 انهم يبعتوا... لا مش قوات يبعتوا وفود لمناقشة إنشاء جامعة الدول العربية 😂😂.

*️⃣ بالمناسبة الشهر التالي أكتوبر حصلت معركة العلمين الثانية واتهزم الجيش الالماني.

*️⃣ نجري في الزمن تاني ونروح شهر فبراير 1943؛ الاتحاد السوفيتي بيطلع بيان يعلن نهاية معركة ستالينجراد ؛ والعالم مش مصدق هو جيش هتلر ممكن يخسر عادي كده 🤔.

*️⃣ بعد البيان السوفيتي يطلع انتوني ايدن وزير خارجية بريطانيا 🇬🇧 تاني ويعلن موافقة وتأييد بريطانيا لإنشاء جامعة الدول العربية. اه والله يا جدعان 😂😂😂 قال الحكومة البريطانية تنظر بعين «العطف» إلى كل حركة بين العرب ترمي إلى تحقيق وحدتهم الاقتصادية والثقافية والسياسية.

*️⃣ ندخل سنة 1944 وقوات السوفيت بتطارد الالمان؛ في شهري 8 و 9 تنسحب المانيا من دول رومانيا 🇷🇴 وبلغاريا 🇧🇬 وفنلندا 🇫🇮 والسوفيت وراهم.

*️⃣ الشهر التالي أكتوبر 1944 مندوبين من الدول العربية بيتقابلوا في الاسكندرية ويوقعوا ما يعرف ببرتوكول الاسكندرية لإنشاء جامعة الدول العربية؛. وبريطانيا تعلن تأيدها كالعادة.

*️⃣ بداية 1945 ؛ قوات السوفيت والامريكان والانجليز جوا المانيا ؛ مارس 45 بدأت تحضيرات السوفيت لغزو برلين بجيش قوامه أكثر من 2 مليون جندي.

*️⃣ برضك مارس 45 والعالم بيستعد لغزو برلين؛ تحديداً يوم 22 مارس يتم إعلان إنشاء جامعة الدول العربية.


*️⃣ فما شاء الله بريطانيا عملت لنا الدولة بنت الكلب وكمان عملت لنا جامعة الدول العربية... للأمانة طبعاً كان مجهود ضخم في تأسيسها من مصر (عبد الرحمن عزام رئيس الجامعة الأول / مصطفي النحاس / الملك فاروق).. فمينفعش نقول ان دول جواسيس وخونة بالعكس كان يعرف عن المؤسسين الوطنية و ال (القومية).

البوست خلص؛ اه بجد مفيش تكمله؛ حبل الافكار خلص ولو دخل الدرافت مش هيتنشر 🤣🤣🤣 بلاش يخش ال Draft عندي مقبرة البوستات

في المشكلة دلوقتي في شركة We منهارة دلوقتي كلياً؛ مفيش خدمة انترنت؛ وحتي الأرقام المختصرة مش شغالة يعني جربت اكلم بنكين والإثنين مرفوعين من الخدمة

*️⃣ المشكلة بقى إن شوية والموضوع يتحل والشركة لا هتقدم اعتذار ولا تعويضات ولا حد بيحاسب حد؛ حتى مش هيقولوا لنا ايه المشكلة... انتم مين أصلاً ؟؟؟ إنتا مواطن دولة عالم ثالث عشان مفيش عالم رابع ياض... قال هنقولكم ايه اللي حصل وهنعتذر حتى... قلة أدب صحيح

*️⃣ تخيلوا كده حد عنده مشكلة وكارت البنك اتسرق وبيحاول يكلم الرقم المختصر لقاه مش بيجمع؛ ويفضل يتسرق يتسرق عشان We بتعك عادي...

*️⃣ عاوزين تخيل أكثر؛ ممكن الشركة تنفي ان في مشكلة حصلت وإن دي إشاعات روجها اعداء الوطن 😁😁 وذلك للنيل من تقدم شركة وي وانها تبقي مش عارف إيه وكده...

*️⃣ بعدين حد يقولي بطلت تكتب ليه؛ خلاص نفسياً بقيت محبط وفاقد الأمل؛ مفهوم إنك قاعد تناقش لون دهان حيطة عمارة آيله للسقوط مقطوع عنها ماية ونور وتليفونات يعتبر شيء عبث؛ مفيش فايدة؛ لو في شيء يتقال فهو المقولة الشهيرة (إنج سعد فقد هلك سعيد)

بيقولك عطل تقني (يؤثر) مش قطع لا بيأثر عليه بس؛ وفي (بعض) المناطق 😂😂😂

ناقص يقولوا دا هما 3 اشخاص كان عندهم سرعة 100 ميجا بقوا 80 ميجا

مقللين قوي من المشكلة

تقرير دوائي بيوضح ان البنادول أكثر دواء المصريين بياخدوه؛ يعني أكثر دواء هو فعلياً مش دوا لكنه مسكن آلالام...

المهم أكبر 5 أدوية مبيعا في مصر من حيث القيمة هي

1️⃣ دواء (Controloc) لعلاج التهاب المريء وقرحة المعدة الذي تنتجه شركة تاكيدا اليابانية حصل علي مبيعات 1.2 مليار جنية 11.8 مليون عبوة

2️⃣ المضاد الحيوي (Augmentin) شركة غلاكسو سميثكلاين البريطانية مبيعات 1.1 مليار جنية 12.2 مليون عبوة

3️⃣ مسكن الآلام (Panadol) شركة غلاكسو سميثكلاين البريطانية مبلغ 1.1 مليار جنية لعدد 38.8 مليون عبوة.


4️⃣ علاج التهاب المريء والحموضة (Zurcal) الذي تنتجه شركة "AUG" المصرية 1 مليار جنية لعدد 17 مليون عبوة

5️⃣ حقن (Clexane) لعلاج الجلطات والسيولة والتي تنتجها شركة "سانوفي" الفرنسية مبلغ 977 مليون جنية لعدد 5.3 مليون عبوة

مهم قوي الاحصائيات دي عشان تفكر صحة المصريين عاملة ازاي ورايحة فين وايه الأمراض وسببها ايه؛ دا لو يعني يهمنا حياة المواطن المصري مش نظام عندنا منه كثير ما يغور ويفضي مكان 😩😩😔😔


المصدر بتاع الخبر

https://bit.ly/3uUsoeY

جهاز تنظيم الاتصالات غرم المصرية للاتصالات 20 مليون جنية بسبب عطل الإنترنت اللي حصل... ولو فاكر إن دي غرامتهم الوحيدة فإسمح اي اوضح لك

*️⃣ فالجهاز بيغرم شركات المحمول كل 3 شهور تقريباً بسبب سوء الخدمات؛ يعني تلاقيه غرمهم في فبراير 2023 غرامة 36 مليون وفي مايو 2023 مبلغ 32 مليون جنية وغرمهم في اغسطس 2023 مبلغ 52 مليون جنية... ارجع يا عم 2021 هتلاقيه غرمهم 20 مليون لسوء الخدمة... عامة منتظرين غرامة نهاية السنة بقي 😁😁😁 ولا هتخلوها يناير.

منظومة الاتصالات بتم في مصر كالتالي

*️⃣ الحكومة أجبرت الشركات علي تثبيت الاسعار بقالها 5 سنين؛ فالتكلفة بتاعة الأبراج وتجديدها وصياناتها تضاعفت 4 و 5 اضعاف في الفترة دي بسبب إن كل حاجة بالدولار...

*️⃣ فشركات الاتصالات بقت مش بتجدد المنظومة وسايباها مترهلة عشان توفر وتحقق الأرباح يعني؛ لإنهم حسبوا حسبه كده بالبلدي يعني كإنهم قالوا لو نجدد الخدمات للمستوى اللي مفروض تكونه هنتكلف 2 مليار مثلاً... طيب ليه ما ننفض ونصرف 350 مليون بس علي ترميم الخدمة؛ وندفع 150 مليون مثلا غرامات لجهاز تنظيم الاتصالات ونبقي وفرنا مليار ونص.

*️⃣ ومن الناحية الثانية الجهاز مبسوط لإنهم بقوا مصدر دخل ليه؛ الشركات تقدم خدمة سيئة للمواطن؛ فبدل ما يتغرموا تعويضات للمواطن؛ بقوا يتغرموا تعويضات للدولة 😂😂😂... فالمواطن يدفع فلوس لشركة الاتصالات وياخد خدمة سيئة؛ فالشركة تروح تدي حبه منها للدولة غرامة علي تقديمها خدمة سيئة 😁... وتحط الباقي أرباح...

*️⃣ علاقة Win-Win-Lose... واللوز دي في الاخر هي للمواطن لان الشركات بتوفر فلوس والدولة بتحقق ربح.. تخيل كده الشركات قدمت خدمة كويس للمواطن؛ كده ال 100 او 150 مليون الغرامات هتروح عليهم... فبقي تقديم خدمة سيئة هو مصدر دخل للجهاز ؛ فيمنعهم ليه بقي من تقديمها 🤔🤔🤔 فكر معايا كده بالمنطق.

*️⃣ طبعا الشركات كل شوية تجيب لها كام برج وكام جهاز جديد عشان يحافظ عالمنظومة شغالة؛ هو عاوزها شغالة وليس متوفقة؛ لازم البقرة تفضل عايشة عشان تتحلب؛ مش مهم تبقي شغالة بكفاءة؛ المهم شغالة عشام تتحلب. ومش بعيد لما نجيب الكام برج دول نطلع نعمل حملة اعلانيه ونجيب كل الأرواح مقدسة ونقول ضاعفنا الشبكة 😂😂

*️⃣ اه ملحوظة؛ الجيجا ب 1 جنية ومش بتكلف الشركة؛ عشان كل شوية حد يقولي اهو ادوا تعويض 10 جيجا؛ حضرتك دي عشه جنية؛ دي متجيش ربع دولار؛ ربع كيلو بص 😂😂 فمتحسسنيش بالتعويض...

*️⃣ هكتب بوست تاني عن شوية لمحات ايه بيحصل كخساير من اي توقف في الإنترنت... قال خد عشة جنية قال.

*️⃣ دا حضرتكم لو الانترنت عطل ومعرفش ارفع الفواتير الضريبية عالبوابة ؛ فدي غرامتها فيها رقم به 4 اصفار؛ يقولك خد تعويض عشرة جنية؛ لا حضرتك العشه جنية دي تاخدها تلفها وتحطها في... في طبق السلطة جنب البصل ابو 40 جنية.

بقالي فترة مش بكتب لكن شوفت إمبارح حلقة رائعة لدكتور أشرف إبراهيم "المخبر الاقتصادي" عن موانئ ولاد المبقعة والأوضاع الخاصة بيهم وإنهم بقوا مزنوقين فنقلوا الاعتماد على ميناء إيلات جنوباً وحيفا شمالاً وشوفوا الحلقة على قناته الرائعة. فمن هنا فكرت أحكي حدودته كده للناس اللي مش قديمة معايا.

*️⃣ بعد هزيمة مصر في 1948 قررت مصر تستخدم الحصار الاقتصادي ضد ولاد البوبي؛ وأعلن الحكومة والملك فاروق إن مضيق تيران وصنافير بما إنه مصري لمؤاخذة وبناء عليه يحظر دخول أي سفينة رايحة إلى إيلات في المضيق إلا لو شايلة أكل وشرب وضروريات الحياة...

*️⃣ بالفعل القرار اتنفذ وكان بيتم إيقاف السفن وتفتيشها أي كان جنسيتها حتى لو بريطانية وحصل مرة إن في سفينة بريطانية تم العثور على سلاح فيها فتم احتجازها؛ طبعاً المندوب السامي البريطاني شبشب للحكومة فتم الإفراج على السفينة بشرط تلف وترجع وقد كان .

*️⃣ المهم تمر السنين وتيجي حرب 1956 وبعد الهجوم الثلاثي على مصر تتدخل أمريكا وتقرر الوساطة والتحكيم وبعد مفاوضات مع الفرنسيين والإنجليز يقولوا لأمريكا عاوزين حقنا في قناة السويس اللي ناصر أممها.

*️⃣ هنا أمريكا تصدر قرارها بإن مصر تدفع السعر اللي أمريكا هتقول عليه ك سعر لقناة السويس لملاك القناة لإننا أممناها وبالفعل مصر تبدأ السداد... بالمناسبة مصر أخدت قرض من السوفيت عشان تبني السد العالي لإن إيراد القناة كله كان بيروح لسداد أقساط تعويض أصحابها وفوقهم فلوس تانية... فأخدنا كذا قرض من السوفيت عشان نبني السد العالي.

*️⃣ المهم بقى كده فرنسا وإنجلترا خرجوا من مصر؛ ولاد البوبي جيرانا كانوا في سيناء ومصر رفضت تتفاوض معاهم وقالت للأمريكان خرجوا الفرنسيين والإنجليز وسيبوهم لينا دول وبالفعل الأمريكان نفذوا والثنائي خرج من مصر وفضل ولاد القرود في سيناء.

*️⃣ مصر مهاجمتش عليهم ولا هما تقدموا وفضل الوضع مجمد لشهور... دخلنا سنة 57 وهما قاعدين لنا في سيناء... يمر الشتاء وهما قاعدين في سيناء.. وفي النهاية مصر قالت لأمريكا ممكن تخلوهم يخرجوا؛ فهنا كان للخنازير طلب واحد من مصر وهو إلغاء الحصار الاقتصادي وفتح حرية الملاحة أمام سفنهم في مضيق تيران وصنافير.

*️⃣ مصر وافقت وألغت القرار الملكي الخاص بمنع ملاحتهم وبالفعل بقوا أحرار في استخدام الميناء اللي بقى ضخم ومدني وحربي واللي عملناه عليه فيلم الطريق إلى إيلات وتوسيع العسلية الشهير.

*️⃣ تمر السنين ونيجي لسنة 1967 وبعد تحرش ولاد البوبي بسوريا وإسقاطهم لعدة طائرات ليها طلع الرئيس الأسبق جمال عبد الناصر في خطابة الشهير قال إن جزيرة تيران مصرية وسيناء مصرية وبناء عليه الممر اللي بتمر فيه السفن يعتبر مياة إقليمية مصرية وبناء عليه قررنا زي قبل سنة 1956 نمنع السفن واحنا قبل 1956 كنا بنفتش السفن أمريكي وفرنساوي وإنجليزي كلهم اتفتشوا ووووو الخلاصة قال خلاص إننا قررنا نقفل وحقنا بقى وأرضنا وبيهددونا بالحرب لو عملنا كده فإحنا مستعدين للحرب.

*️⃣ إسرائيل بلغت الأمريكان وقالت لهم معلش يا كابتن أمريكا فكرني سنة 1957 أنا خرجت من سيناء مقابل ايه؟ فتح الملاحة صح... طيب قفلوا الملاحة... أخد سيناء بقى أخد سيناء تاني... هيلا هوب وحصلت حرب 1967 اللي قال الزعيم الأسبق إننا جاهزين ليها وحدث ما حدث.

*️⃣ بس يا سيدي وهي دي قصة ميناء إيلات وشكراً لدكتور أشرف عالمجهود اللي بيعمله الصراحة


فيديو عبد الناصر

https://youtu.be/np9VPNQ1U00?si=0cxCrMGRTRcSVTv3

منتظر جداً نتيجة الانتخابات عشان أشوف المرشح الواعد والصاعد في الانتخابات المصرية المتتالية

*️⃣ في 2012 جولة أولي اخد 0.4 مليون صوت والجولة الثانية اخد 0.84 مليون صوت ثم في 2014 اخد 1.04 مليون صوت وفي 2018 اخد 1.76 مليون صوت

*️⃣ في 2012 جولة اولي كان ال 6 وفي الاعادة طبعا الثالث؛ لكن من 2014 وهو بياخد المركز الثاني فعلياً؛ فيا تري المرة دي هياخد المركز الكام؟

المرشح هو الأصوات الباطلة؛ يا تري هيواصل قصة صعوده المبهرة ولا خلاص راحت عليه وعجز 😁😁😁

يوميات مواطن قاعد منتظر نتيجة الانتخابات 😂😂😂

من كام يوم كنت بحكي ل لولي بنتي وبشرح لها قوانين الانقاذ البحري وبقولها إن لو سفينة بتغرق وسفينة تانية قريبة فلازم غصب عنها تروح تنقذهم؛ ولو متقدرش ومفيش مكان فيتخلصوا من كل حاجة عالسفينة غير البشر وياخدوا الناس اللي بتغرق

*️⃣ فهي قالت لي يعني يرموا الشنط والحاجات بتاعة الناس اللي هي عندهم أمانة ومش بتاعتهم

*️⃣ فقولت لها اه يا لولي يرموها؛ هي لو شنطتي ضاعت وفيها كومبيوتر وموبايل وورق كثير؛ كل الحاجات دي هقدر بكره أنزل اشتري غيرهم يا لولي؛ هبقي خسرت فلوس كثير بس... لكن لو إنسان غرق؛ دا هعرف اشتريه تاني؟ مش هعرف اعوضه صح.

*️⃣ لولي قالت اه صح مش هنعرف نعوضه؛ لسه هنجيبه بيبي صغير ونقعد نربيه ويكبر ويروح مدرسة 😂😂😂... هنا مقدرش أمسك نفسي من الضحك الصراحة. ايييه عقول الأطفال دايماً بتجيب كلام بره الصندوق😁 مهو برضك يعني طفلة 7 سنين وبحكي لها لوايح الإنقاذ البحري.

⬅️ دا بوست اهو عادي لعل وعسي الفيسبوك يرضي عننا 😔.

⬅️ مش معتاد أنشر البوست اللي فيه هري ورغي وفضفضة علي تيليجرام؛ بس بفكر جدياً افكس للفيسبوك بعد كده وانشر كله في تليجرام؛ كده كده الفيسبوك بقي مهجور وميت.

بما ان المركزي خلاص ثبت الفايدة كما هو متوقع يعني بحيث يخلي الدلع في 2024 ويختم 2023 بيبقي الوضع علي ما هو عليه😔؛ فتعالوا نبص بصه عالموازنة كده ونشوف ايه اخبارها مع القروض والفوايد.

*️⃣ خد بالك في الأول كده إن الحكومة هي أكبر مقترض في مصر؛ الحكومة بتستلف أكثر من الشعب كله مع بعضه 😂😂... فزيادة 1% في الفايدة يعني زيادة التكلفة عالحكومة 70 مليار جنية حسب تصريح وزير المالية من كام شهر ويمكن الرقم يكون زاد؛ فتخيل بقي الطموحات الواسعة انك تعمل زي تركيا وتزود بال 10% دي معناها 700 مليار 😂 وال 700 دول زيااادة في خدمة الدين وليس كل الدين دول تكلفة اضافية مش أكثر؛ طيب الفلوس دي بتروح فين؛ بص يا سيدي.

*️⃣ إجمالي انفاق الحكومة أي كان ايه البند او زي ما بيسموها الاستخدامات يساوي 4350 مليار جنية.

*️⃣ أول بند هو سداد القروض سواء المحلية أو الاجنبية ودا قيمته 1316 مليار جنية.

*️⃣ كده فاضل معانا 3033 مليار جنية؛ نروح لثاني بند وهو سداد فوايد الديون؛ اللي فاتت كان سداد الديون نفسه يعني أصل المبلغ؛ لكن في فوايد؛ بند فوايد الدين 1120 مليار جنية... عشان كده بنقول زيادة الفايدة هيخزوق الحكومة لإن بند خدمة الدين هيزيد.

*️⃣ قبل ما تتوه؛ كان معانا 4350 مليار جنية؛ صرفنا 2436 مليار جنية أصل الدين وفوايد الديون فكده فاضل معانا 1914 مليار جنية.

*️⃣ نروح لبند الرواتب وهو 470 مليار جنية والدعم 530 مليار جنية يعني كده 1000 مليار جنية.

*️⃣ يبقي كده كان معانا 4350 دفعنا كل ما يخص الديون والرواتب والدعم فبقي معانا 914 مليار جنية.

*️⃣ نروح بقي لبند المقاولات؛ يعني إنشاء المباني السكنية 34 مليار جنية وغير السكنية 61 مليار جنية وإنشاءات أخرى 387 جنية يعني بند المباني والإنشاءات أي كان شكلها عامل 483 مليار جنية.

*️⃣ يبقي كده ال 4350 مليار اللي بدأنا بيهم فاضل فيهم 431 مليار جنية؛ دول بقي بيصرفوا عالدولة كل شيء بداية من شراء اتوبيسات وتجديد موقع للحكومة واستصطلاح أراضي ولغاية دورات تدريبية للموظفين والحفاظ عالبيئة بقي وكل شيء. يعني يعتبر انفاق الحكومة عالمواطن بعيد عن الدعم والاجور يساوي 11 جنية وربع في اليوم؛ فدا يمكن سبب انخفاض جودة كثير من الخدمات الحكومية.

*️⃣ فدلوقتي لما الفوايد هتزيد؛ يبقي بند خدمة الدين هيزيد؛ وطبعاً قبل ما تقول هياخدوه من المواطن؛ لا خلاص المواطن مبقاش مكفي؛ اه بجد؛ هات يا ابني الموازنة تاني.

*️⃣ إيراد الدولة كله شاكب راكب بدون اقتراض هو 2142 مليار جنية منهم ضرايب 1530 مليار جنية... اطلع فوق كده وشوف الدين اصل وفوايد كام ؟ كان 2436 مليار جنية... يعني ايراد مصر كله بكل الضرايب وكل حاجة ميكفيش تسدد ديونك... فهتعمل ايه تفرض ضرايب جديدة؟ اوكي ال 1530 مليار هيزيدوا كام % يعني 20% او 30%؟ الموضوع كبيييير.

*️⃣ طبعاً البوست دا مش بقول ايه صح ولا ايه غلط؛ دا بوست خبري يعني بسرد معلومات ومليش علاقة بالتفاصيل ولا حد يقولي يعني نعمل ايه او عندك تضخم فلازم تزود الفايدة او عاوز تشجع الناس تستخدم الجنية فتزود الفايدة الخ الخ... انا بس بقولك (خد فكرة) عن الوضع المالي للدولة محلياً.

*️⃣ ملحوظة أخيرة؛ دا كان الوضع في الموازنة وقت ما اتعملت من أكثر من 6 شهور؛ الفعلي أكبر من كده بسبب تغيرات اقتصادية كثير.

بس يا سيدي وهي دي موازنة مصر للعام المالي الحالي

الفايدة في تركيا آخر 6 شهور؛ حاجة مأساوية 😔😔

للي بيسأل ايه حصل في تركيا فدا بوست من سنتين بيشرح جزء صغير من اللي حصل؛ مجرد جزء؛ وقتها كان الدولار ب 9 ليرة مش 29 ليرة زي دلوقتي

https://t.me/BnSamyPosts/544

بالرغم من إن ناس كثير وأنا منهم عندنا توقع بتحريك سعر الصرف لكن اللي بتعمله البنوك مؤخراً يوحي بإن الدولة مش ناوية على أي شيء وعاجبها الوضع الحالي ونظام عيشنا بيه سنتين ما نعيش بيه سنة ثالثة.

*️⃣ أصل لما تبص عالبنوك كده كل ما تتزنق في دولار تعمل ايه؟ هل هتبطل تسلف الدولة دولار بفايدة 5.5% والبنوك أصلاً بتستلف الفلوس من المواطن بفايدة 7%؟؟ لا طبعاً عادي هتكمل بس هتروح للكريديت كارد.

*️⃣ لو بصيت إنه بعد إيقاف الكروت بره مصر وشرط السفر... بدأ كل بنك يعمل التاتش بتاعته.

*️⃣*️⃣ بنوك زي CIB مثلاً حطت الليميت مجمع لكل عميل أي كان عدد الكروت اللي معاه.

*️⃣*️⃣ بنوك زي بنك مصر في الورقة المسربة التي لم تنفى قررت إن الكروت الجديدة مش هتشتغل دولي لمدة 6 شهور.

*️⃣*️⃣ بنوك ثانية لسه مفيش خبر مؤكده بقت أصلاً مش بتصدر كريديت كارد.

*️⃣*️⃣ بنوك زي ADIB قرر إن كروته شغالة وزي الفل بس مش هتستخدمها في PayPal ولا محلات الإلكترونيات..

*️⃣*️⃣ بنوك كثير بقى قسمت الليميت بتاعها... في اللي قالك الليميت الدولي في حالة السفر ليكن 100 ألف جنية (دا رقم ضخم بالنسبة للكروت) بس تستخدمهم بحد اقصى 15 ألف يومي... وفي بنوك تقولك ليك 1500 دولار بس هما 200 يومي.

*️⃣*️⃣ برضك في بنوك ثانية قررت إنها تقسم الليميت في السفر بالفئات وليس باليوم... يعني مثلاً ليك 1500 دولار يقولك نصهم أونلاين ونصهم في المحلات POS.

*️⃣ طبعاً كل الإجراءات السابقة مفهومة خاصة إن الفارق بين سعر البنك بعد العمولة سواء 6% في بنك اسكندرية أو 8% بنك كريدي أجريكول أو 10% باقي البنوك أو 15% بنك EG Bank فالدولار يساوي كام كبيره؟ 35.5 جنية مقابل 52 جنية في السوق السوداء. فالإجراءات مفهومة طبعاً.

*️⃣ لكن لو البنوك دي عارفه إن في تعويم خلال أيام هل هيعملوا قرارات زي كده؟ فكر معايا كده... لو في تعويم يعني في فلوس هتدخل للبنوك... يبقى خلاص يعني استحملنا سنتين جت على أسبوع أو أسبوعين؟؟ نقرف ليه العميل بتاعنا.

*️⃣ كده البنوك عرفت أو اتقالها شيء من إثنين... إما مفيش خالص ومكملين بالوضع الحالي؛ أو اتقالي هيبقى في تحريك محدود ل 37:40 ويفضل الوضع مقفول زي ما هو لكن التحريك عشان خاطر الصندوق بس..

*️⃣ بالمناسبة للي ميعرفش فالصندوق فعلياً مش طالب من مصر شيء... مصر هي اللي لما قدمت عالقرض ال 3 مليار دولار نهاية 2022 كتبت تعهد على نفسها بمرونة سعر الصرف؛ الصندوق بقى بيطالب مصر بتنفيذ التعهدات بتاعتها على نفسها... بس اللي سمع تصريحات رئيس الصندوق مؤخراً بقت تقولك المهم عندنا في مصر التضخم يقل عشان يا عيني التضخم بيأثر عالمواطن... بعدين نشوف سعر الصرف دا...

*️⃣ فواضح كده إن الصندوق بقى حنين معانا فكده ومستعد يقبل مننا أي شيء... فنديله تزويده كده في سعر الصرف مش تعويم حقيقي وهو هيسقف ويقول برافو عليكي يا مصر وخلاص جبرت ونصرف فلوس جديدة تمشينا شوية لغاية وقت الزنقة اللي بعدها.

*️⃣ ويمكن عادي يطلع مفيش خطة؛ وان حالة الغموض وإننا مش عارفين حاجة دي تشمل البنوك؛ يكونوا برضك مش عارفين حاجة فكل بنك بيشوف يأمن نفسه إزاي 😂 عادي يعني مش دايماً الوضع بيمشي بخطة؛ ساعات بيكون الموضوع بالحب ❤️

تفتكروا ايييه بقي 🤔🤔