إزاي الشركات العالمية بتهرب من الضرايب؟ أو بتدفع ضرايب لا تتناسب مع حجمها الحقيقي؟

كثير منا عارف ان الشركات الكبري حول الكوكب مش بتدفع ضرايب تذكر؛ وأشهر طريقة استخدام ما يعرف بالملاذات الضريبية أو ال Offshore بس دا بيحصل ازاي بقي فعليا؟

تعالوا نتخيل مثالين

*️⃣ نتخيل شركة ملابس؛ ليكن H&M أو أديداس أو نايكي أو أو أو... عندهم تي شيرت بيكلفهم 1.5$ وعاوزين يبيعوه في أمريكا ب 20$ بدون ما يدفعوا ضرايب أرباح يعملوا ايه

1️⃣ يروحوا دول نامية فقيرة زي بنجلادش 🇧🇩 او سريلانكا 🇱🇰 أو فيتنام 🇻🇳 بحيث ياخدوا خصومات ضريبية وعمالة رخيصة وكل التصنيع مش مكلف وهناك يعملوا التي شيرت دا ب 1.5$ زي ما قولنا

2️⃣ يروحوا دولة مفيهاش ضرايب أو فيها ضرايب قليلة او يروحوا هونج كونج اللي النظام الضريبي بتاعهم هو (الشركات المسجلة في هونج كونج لا تخضع للضرائب شريطة ألا تتم أية صفقات في هونج كونج 🇭🇰 ) وبعدين الشركة اللي مؤسسة في هونج كونج 🇭🇰 تشتري التي شيرت دا من الشركة اللي في بنجلادش 🇧🇩 مقابل 2.0$

3️⃣ الشركة الأم اللي في أمريكا 🇺🇸 تروح تشتري التي شيرت من الشركة اللي في هونج كونج 🇭🇰 مقابل 18$ وتصرف مصاريف دعايا وأبحاث ووو ليكن 3$ وتبيع التي شيرت ب 20$

تعالوا بقي نبص اللعبة دي عملت ايه

الوضع الطبيعي

في الوضع الطبيعي التي شيرت اتكلف 1.5 في بنجلادش 🇧🇩 فلو اتباع للشركة الامريكية ب 18$ كده اللي في بنجلادش كسبت 16.5$ فهتدفع ضرايب هناك؛ ولو باعوه للامريكية ب 2$ عشان ميدفعوش ضرايب في بنجلاديش فكده الأمريكية اشترته ب 2$ وصرفت البنود الاخري 3$ فكلفها 5$ وباعته ب 20$ يعني لبست

في وضع النصب دا بقي ايه اللي هيتم

بنجلادش 🇧🇩 عندها شركة صنعت ب 1.5$ دولار وباعته ب 2.0$ يعني مفيش ارباح تذكر وغالباً هيبقي في حد إعفاء الضريبي بتاعهم = مفيش ضرايب في بنجلاديش

أمريكا : اشتروا التي شيرت ب 18 وصرفوا 3 عليه يعني 21$ وباعوه ب 20 يعني خسروا 1$ وبكده مش هيدفعوا ضرايب في امريكا بل مش هيدفعوا حتي (ارباح للعمالة) لان الشركة بتخسر

هونج كونج : الشركة اشترت ب 2 وباعت ب 18 وكسبت 16 دولار؛ الصفقة لم تتم في هونج كونج فكده إعفاء من الضرايب

ايه رأيكم في النصب القانوني دا!!!

*️⃣*️⃣ شركة أبل

تعالوا نشوف مثال تاني للنصب القانوني وهو شركة أبل ؛ واللي بينطبق علي أبل برضك شغال مايكروسوفت وأمازون وجوجل وغيرهم.

1️⃣ أبل عاوزة تبيع في أوروبا فتختار دولة أوروبية اقتصادها بعافية وتقدم لحكومتها عرض؛ هنعمل عملياتنا في القارة من دولتك مقابل تخفيض ضريبي؛ تعالوا نفترض إن ايرلندا 🇮🇪 النظام الضريبي عندهم 20% وكانوا هيطلعوا من ابل في الظروف العادية ب 0.5 مليار ضرايب؛ يخفضوا لها الضريبة ل 10% او 5% مثلا وفي المقابل عمليات القارة تتم من عندهم فال 5% دي تحقق لهم 3 مليار مثلاً.

2️⃣ ابل تأسس شركة في ايرلندا والشركة دي تأسس فروع ليها في كل الدول الأوروبية

3️⃣ قانون الاتحاد الأوروبي 🇪🇺 مفيهوش جمارك بين الدول وبعضها ومفيش ازدواج ضريبي؛ وبكده ابل بتبيع في كل الدول الاوروبية وبتتحاسب ضريبي في أيرلندا 🇮🇪 بالنسبة المخفضة.

4️⃣ لو في دولة زي انجلترا مثلا فدي ليها حيلة خاصة؛ كل الجزر اللي في المحيطات تابعه ليها؛ وعشان بريطانيا 🏴󠁧󠁢󠁥󠁮󠁧󠁿 تدعمهم فبيدوا الشركات دي إعفاء جمركي بصفتهم دول تابعه للتاج؛ والجزر دي بتدي الشركات العالمية إعفاء من الضرايب عشان ييجوا عندها ؛ فابل تروح تأسس شركة في الجزر البريطانية ومنها تصدر وتبيع في انجلترا بدون ما تدفع ضرايب. ومتنسوش إن أيرلندا نفسها برضك تتبع التاج البريطاني... يعني أبل بتعمل مصلحة مزدوجة عالإنجليز... سنة 2018 أبل باعت في بريطانيا بـ 1200 مليون استرليني ودفعت ضرائب 3.8 مليون... زي ما قريتم كده باعت بـ 1200 مليون ودفعت 3.8 مليون بس ضرائب. ولو في صديق عايش في انجلترا قرأ الكلام دا هيتجلط عشان عارف الضرائب عندهم عنيفة إزاي.


شوفتم النصب بالشركات العالمية عامل ازاي؟ دي بقي الرأسمالية العالمية الحالية

بالمناسبة اللي بيحصل دا اكيد مش واحد قاعد في مصر 🇪🇬 اسمه محمد سامي عارفه والحكومات مش عارفاه؛ هما عارفين وبيحاولوا يحاربوه بشتي الطرق بس مش ناجحين

الاتحاد الأوروبي 🇪🇺 فاتح تحقيق مع أبل وحكومة أيرلندا 🇮🇪 من 2016 بسبب الموضوع دا وبيراجعوا مبيعات أبل من 1991 لغاية 2015. والاتحاد الأوروبي 🇪🇺 نصح الدول الاعضاء انهم يحققوا برضك مع فروع أبل في دولهم

إيطاليا 🇮🇹 مثلاً دخلت تحقيقات مع أبل طويلة وبعدين اتفقوا في 2016 إن أبل تدفع 318 مليون يورو ضرائب عن 6 سنين... أيوا بس كده هو دا المبلغ.

فرنسا 🇫🇷 بقى أخدت الموضوع جد وماكرون حط في يوليو 2019 مشروع قانون بفرض ضريبة إضافية عالشركات التقنية الأمريكية كبديل للضرائب اللي بيهربوا منها... ترامب مسكتش وطلع شتم ماكرون ووصفه علناً بالأحمق وقال صراحة إن أبل شركة أمريكية وتحت حماية أمريكا 🇺🇸 ولو في حد هيدفع أبل ضرائب يبقى أمريكا 🇺🇸 بس. وهدد ترامب بفرض عقوبات على فرنسا لو دا تم... وبالفعل يناير 2020 فرنسا وأمريكا أعلنوا تأجيل تنفيذ الضريبة دي... لكن بعد شهرين أي في مارس 2020 اتهمت فرنسا أبل رسمي بالغش في الضرائب وغرمتها 1.23 مليار دولار 💵 💵 ...

بالمناسبة أمازون دفعت في 2017 و 2018 للحكومة المركزية في واشنطن يعني 0 دولار ضرائب... اه يا جدعان صفر... بس في 2019 اللي هي بيتم دفعها دلوقتي هيدفعوا 162 مليون دولار ضرائب... وأمازون بالمناسبة أعلنت أرباح 13900 مليون (13.9 مليار) يعني 1.16% ضرائب 😂😂... الموضوع فيه تفاصيل كثيرة بس الضرائب الفيدرالية في أمريكا مفروض The federal corporate tax rate is 21% بس أمازون بتعرف تسلك أمورها... وبالمناسبة بقول ضرائب فيدراليه عشان في ضرائب للولايات محلية.

كالعادة أسف للإطالة بس قولت أديكم فكرة عن الرأسمالية الحقيقية شغالة إزاي...

بالمناسبة هى برضك مطبقة في مصر بنفس الفكرة لكن بلاش كلام عن مصر عشان مروحش في داهية... خاصة لما تعرفوا إن الشركات الكبيرة ضرائبها لا تمثل شيء يذكر من حصيلة مصلحة الضرائب... وإننا كأشخاص المورد الرئيسي للضرائب هنا... اسكت يا لساني عشان مروحش في داهية

هقوم بتجميع ونشر البوستات القديمة اللي بتشرح أي موضوع

تاريخ نشر البوست الأصلي 26 مايو 2020

تعالوا نتكلم عن العربيات

نبعد عن الكورونا والكلام الغلس اللي يضايق دا...

فتعالوا نرغي في موضوع ملوش لازمة ومعلش الأفكار مش مرتبه يعني البوست بطريقة "خد فكرة"

تعرفوا إن سوق السيارات في مصر صغير قوي بالقياس بالعالم؛ دا سر إن الشركات الكبرى منفضة لمصر والتوكيلات تلعب بينا ووو... عادي مش سوق محوري أصلاً.

تعالوا برضك ناخد أرقام مركز "أميك" وللتذكير هى مش بترصد 100% من السوق لكن ممكن نقول 80-90% مرصود...

أميك قال إننا بعنا في (يناير فبراير مارس ) 2020 عدد 37 ألف عربية... يا عم قول 40 ألف عربية باللي مش مرصود.

عربية زي شيفورليه ماليبو دي باعت في نفس الفترة في أمريكا 35 ألف عربية... ودي ترتيبها رقم 7 وتويوتا كورولا رقم 2 عندهم باعت 69.2 ألف عربية.

طيب بلاش السوق الأمريكي دا كبير

السوق السعودي في 2019 باع 542 ألف عربية... السوق المصري باع 127 ألف عربية... قول يا عم 150 ألف

بلاش السعودية دي كبيرة سكانها 33 مليون

الإمارات بقى اللي عدد سكانها مكملش 10 مليون باعوا 243 ألف عربية.

عشان كده لما بشوف شائعات زي المصانع قفلت فالعربيات هتغلي في مصر بقعد أضحك
يا جدعان إحنا سوق صغير قوي... دا المصنع وهو قافل يقدر يغرق مصر عربيات.

دا عربية زي هيونداي أكسنت باعت في السعودية في 2019 عربيات أكثر مبيعات كل العربيات في مصر من كل البراندات ما بتبيع في 3 شهور.

طيب تعرفوا إن المغرب بتصنع ما يقارب 700 ألف سيارة سنوياً وبتصدر ما يقارب 300 ألف عربية لأوروبا... اه يا جماعة المغرب بقت تنين سيارات.

تركيا بتصنع 1.5 مليون عربية سنوياً وبتصدر عربيات بـ 30 مليار دولار سنوياً.

عارفين مصر في 2019 كام عربية تجميع محلي ؟ 47.2 ألف عربية... بس كده شكراً مجبناش 50 ألف عربية... وبكرر المغرب 700 ألف وتركيا 1.5 مليون.

وبالمناسبة سنة 2008 مصر جمعت 77.5 ألف عربية... وقتها المغرب كانت انتجت 41.7 ألف عربية وبعد 11 سنة إحنا نزلنا من 77 إلى 47 وهما زادوا من 41 إلى 700

عامة ربنا يسهل ونشوف مبادرة تصنيع السيارات اللي أعلن عنها كذا مرة تحقق شيء ونشوف مصر دولة منتجة ومصدرة قوية... المغرب عملتها أهي يعني مش أشطر مننا.

تاريخ نشر البوست الأصلي 25 مايو 2020

كوررنا ؛ هل تصبح المسمار الأخير في نعش العولمة؟

من الأمور اللي الكورونا هيساعد علي تسريع نهايتها (العولمة)

تعالوا نحكي القصة والصراع العالمي من الأول

قبل أكثر من نصف قرن كانت أمريكا 🇺🇸 وأوروبا 🇪🇺 مسيطرين؛ بيصنعوا وبينتجوا كل شيء وبكميات كبيرة

وهنا رجال الأعمال والرأسمالية فكروا في طريقة يكسبوا بيها أكثر وينتجوا أكثر وأكثر

الحل كان في استغلال موارد الآخرين

ليه منروحش نصنع في دول متخلفة وفقيرة فنتكلف أقل؛ ليه أحط مصنع في ألمانيا 🇩🇪 ومصنع في فرنسا 🇫🇷 ومصنع في إيطاليا 🇮🇹 لنفس السلعه لما ممكن أروح أعمل في الصين 🇨🇳 مصنع كبيير يكفيهم كلهم وأوظف عمالة أرخص وكمان مفيش حقوق إنسان فممكن أقتلهم بظروف شغل صعبة ومفيش رقيب (بيحصل بالفعل)

ومن هنا بدأت العولمة وبدأت قصة الصين 🇨🇳

بعد 4 عقود ظهرت مشكلتين:

1- الصين 🇨🇳 مبقتش مكتفية بدور المصنع وعاوزة تبقي دولة فعالة بجد في الكوكب.

2- رجال أعمال أكثر بيروحوا الصين 🇨🇳 فالبطالة عمالة تزيد في الدول المتقدمة؛ يعني خيرنا بقي بيروح ل غيرنا

فهنا بدأت دعاوي محاربة العولمة اللي كانت عادية والرأسمالية العالمية بتتجاهلها. وناخد مثال سريع

سنة 2009 شركة فورد بدأت تتحول بشكل كبير للمكسيك وشركة جنرال موتورز راحت اوروبا والصين وأوباما قال ان في وظائف خسرناها مش هترجع تاني

سنة 2011 أوباما عمل اجتماع سيلكون فالي وسأل ستيف جوبز صراحة كده ازاي ممكن نجيب الاي فون لامريكا ومصانع أبل تبقي هنا عشان نرجع الامريكان للوظائف دي فستيف جوبز رد عليه "Those jobs aren’t coming back".

سنة 2013 أوباما طلع قال انه عرف يقنع ابل تصنع Mac Pro وقتها في أمريكا 🇺🇸 والمستقبل هييجي منتجات اخري ومحصلش...

الوضع استمر كده؛ محاولات Cute من حكام الدول والرأسمالية بتسحقها بسهولة لغاية ما وصل ترامب للحكم.

ترامب بقي بيزنس مان وعنده مشكلة صراحة مع الصين وفاهم كويس خطورتها

فمن قبل ما يمسك الحكم قال للشركات الأمريكية صراحة كده هتبقي أيامكم سودا لو مرجعتوش الفلوس والمصانع أمريكا؛ كده وش يعني

وصل الحكم وقابل كل قادة الشركات الكبري وقالهم الكلام دا؛ هترجعوا المصانع والفلوس بتاعتكم ليتم استثمارها في أمريكا هتبقي صاحبي وحبيبي وكفاءة؛ هتعندوا هسحقكم وأطلع منكم شركات أحداث 😂😂

الشركات في البداية عندت وعملت اجتماعات بيلدربيرج أملا في ايجاد حل لترامب لكن مفيش فايدة

ترامب أعلن قايمة جمارك ضخمة عالمنتجات المستوردة وكان كل يوم الصبح يصحي يزود بنود في القايمة دي 😊😊

فبدأت شركات زي أبل ترضخ وبالفعل اجتمعوا مع ترامب اللي قالهم انه عارف مشكلتهم الاساسية؛ الضرايب؛ القانون الامريكي بيفرض ضرايب علي ارباح الشركات الامريكية بره امريكا

فالشركات الامريكية كانت لما بتحقق ارباح بره امريكا بتسيب الفلوس بره عشان لو رجعت أمريكا هتدفع عليها ضرايب؛ وهنا أعلن ترامب مشروع تخفيضات ضريبية ضخمة لو رجعوا الفلوس ؛ فالضرايب عالشركات مفروض هناك من 21% الي 35% ترامب هيخليها 15% خصم للفلوس الراجعه

وبالفعل بدأت الشركات ترجع فمثلا يناير 2018 اعلنت ابل اعادة 245 مليار دولار الي امريكا خلال ال 5 سنين التالية وهتدفع عليهم 38 مليار ضرايب

المهم بقي في شركات أمريكية الأصل نفضت وقالت أنا خرجت بره أمريكا ومش راجعه وأبوك يا ترامب هتعملي ايه

أشهر الشركات دي شركة broadcom الشهيرة في مجال ال Chips بتاعة الاتصالات وأشباة الموصلات اللي اعلنت سنة 2017 نقل مقرها الي سنغافورة 🇸🇬 وطز فيك يا ترامب

لكن ترامب قرر إن اللي هيعمل كده هيتعاقب بس بالطريقة؛ هنمنعه انه يكبر

سنة 2018 شركة برودكوم قالت نعمل أكبر خطوة استحواذ في التاريخ؛ نشتري شركة كوالكم Qualcomm وبالفعل قدموا عرض ورفضته كوالكم فزودوه اترفض فقدموا عرض لا يرفض؛ استحواذ بقيمة 117 مليار دولار 💵 💵 💵 وبالفعل مجلس إدارة كوالكم كان شبه وافق

ترامب طلع قال مفيش الكلام دا VETO خلاص؛ وطلع قرار بمنع الصفقة وقال ان برودكوم شركة أجنبية مينفعش تستحوذ علي شركة استراتيجية أمريكية زي كوالكم؛ ف broadcom طلعوا قالوا احنا شركة امريكية ومقرنا في كاليفورنيا ومؤسسنا ومديرينا أمريكان فرد عليهم مش غيرتم الورق القانوني إلى سنغافورة 🇸🇬؛ خلوها تنفعكم بقي. واتلغت الصفقة

وبدأ ترامب حرب تكسير العظام مع الصين 🇨🇳 ؛ وكل يوم يفرض عقوبات وجمارك؛ والشركات الأمريكية تتحايل عليه أعقل يا عم الأسعار هتزيد لكن ترامب مفيش خلاص عند بقي.

والشركات شايفه اللي حصل مع broadcom وكمان محدش عاوز يخسر السوق الأمريكي الثري والأكبر عالمياً

ترامب أعلنها صراحة إن جو العولمة بقي والعالم قرية صغيرة ومصنع واحد ووو؛ دا هري وكان في وخلص وأبوكم كلكم.

الناحية الثانية كانت الصين قاعدة صاحية؛

وتعالوا نحكي عن الصين 🇨🇳

الهند 🇮🇳 دي وحش اقتصادي قادم انتظروه 2030 هيخبط في الصين نفسها

الهند 🇮🇳 بتطبق سياسة واضحة وصريحة؛ اللي عاوز يبيع في دولتي يصنع عندي؛ يعني سياسة ضد العولمة من الأول وصريحة ؛ فتلاقي شركة زي أبل بتصنع موبايلات في الصين 🇨🇳 عادي؛ وتلاقي الهند 🇮🇳 بتقولها صنعي عندي اي فون ؛ وترامب يقولها رجعي المصانع أمريكا 🇺🇸 😂😂

يعني الشركات مع الوقت هتعمل مصنع في كل مكان ودي تكلفة كارثية

الكورونا هتكون الأداة اللي الحكام بيها هيقدروا يفرضوا سياسات جديدة؛ هتبقي فرصة لأول مرة من سنين طويلة الحكومات تملك سلاح ضد الرأسمالية العالمية.

فيا تري هنشوف تغيير؟ (لا اقصد نهائي ان العولمة هتختفي لكنها هتتراجع)

الصين 🇨🇳 كانت بدائية ومتخلفة وفقيرة لدرجة من إن من قرن فقط كانت ملطشة؛ بريطانيا تنزل تفشخها وتاخد هونج كونج 🇭🇰 منها وتجبرها تستورد أفيون منها؛ فرنسا 🇫🇷 حطت عليها؛ ألمانيا 🇩🇪 برضك حطت عليهم واحتلت حته؛ وبعدين جت اليابان 🇯🇵 زقت المانيا واخدت مستعمراتها في الصين 🇨🇳 سنة 1914 وبعدين احتلت الصين كلها في الحرب العالمية الثانية

الصين 🇨🇳 فضلت ملطشة لغاية ما جت لها العولمة فرصة لحد عندها؛ والعالم اختار الصين لانها مثالية؛ بلد كبيرة وموارد ومواد خام (العناصر النادرة rare earth elements) اللي الصين 🇨🇳 بتطلع 80% من انتاج العالم منها ؛ فالشركات العالمية جت لها وقالت فرصة نستغلهم

ميعرفوش إن الصين هي اللي بتستغلهم

لسنوات الصين فضلت تكنز فلوس وتكون جيش الكتروني واستخباراتي؛ تجسس علي كل الشركات في الكوكب وسرق التقنيات منهم؛ واللي معرفش يسرقه عمله هندسة عكسية reverse engineering وبدأت الصين تكون جيوشها الاقتصادية..

في الأول العالم نفض؛ عادي دول شوية همج نسحقهم في أي وقت ونخرج شركاتنا يموتوا تاني؛ لكن مع الوقت كانت الصدمة

*️⃣ الصين تعمل أسطولها البحري COSCO ويبقي رقم 3 وخلال سنوات هيهزم ميرسك ويبقي رقم 1

*️⃣ الصين تعمل شركة هواوي اللي هي بديل صيني لسامسونج ؛ ومنافس لمجموعة شركات امريكية سوا (أبل وسيسكو و IBM).

*️⃣ الصين تستغل أطنان الفلوس اللي عندها وتبقي أكبر دائن لأمريكا بإجمالي 1.07 ترليون دولار في ديسمير 2019

*️⃣ صندوق النقد الدولي يتوقع أن الصين تتجاوز أمريكا كأكبر اقتصاد عالمي قبل 2030 من حيث الناتج الإجمالي GDP..

*️⃣ الصين تتجاوز أمريكا في 2018 وتصبح أكبر تاجر بضائع للسوق العالمي (بعيد عن السلاح)

وأمثلة كثير ثانية

والصين موقفتش هنا

*️⃣ مايو 2015 الصين 🇨🇳 أعلنت خطة Made in China 2025 و هدفها التفوق في 10 مجالات حيوية وبالفعل الخطة شغالة مظبوط

*️⃣ قبلها في 2013 الصين كشفت عن خطة الحزام والطريق Belt and Road Initiative اللي بدأنا نسمع عنها باسمها طريق الحرير Silk Road والمبادرة دي هدفها الصين تربط اقتصادات الدول بيها؛ واستثمرت الصين أكثر من 100 مليار دولار خارج الصين بالمبادرة ولسه في عشرات المليارات بل مئات قادمة

والكل بيستعد للحرب الاقتصادية
الصين 🇨🇳 مش نايمة وعارفه انها مينفعش تفضل معتمدة علي أمريكا 🇺🇸؛ والصين 🇨🇳 برضك عارفه انها لسه مش متفوقة تصنيعياً في مجالات كثير وإن امريكا لسه متفوقة عنها عشان كده عاملة مشروع صنع في الصين 2025 دا

كثير برضك فاكر إن الصين 🇨🇳 بتصنع كل حاجة فمش عاوزة العالم في شيء؛ دي خرافة ساذجة؛ الصين في 2019 استورد ب 2069 مليار دولار بضائع من العالم ودي اهم 10 بنود

1- Electrical machinery, equipment: US$496.8 billion (24% of total imports)
2- Mineral fuels including oil: $343.6 billion (16.6%)
3- Machinery including computers: $190.3 billion (9.2%)
4- Ores, slag, ash: $163.6 billion (7.9%)
4- Optical, technical, medical
5- apparatus: $98.7 billion (4.8%)
6- Vehicles: $75.1 billion (3.6%)
7- Plastics, plastic articles: $71.6 billion (3.5%)
8- Gems, precious metals: $60.5 billion (2.9%)
9- Organic chemicals: $57.8 billion (2.8%)
10- Copper: $40.8 billion (2%)

ايوا يا جدعان الصين 🇨🇳 بتستورد الالات ومعدات وكومبيوترات وعربيات ومواد كيميائية وكله

اه هي الصين بس لسه معتمدة عالعالم وخاصة في الصناعات القوية المتقدمة.

الكورونا بقي فين في الموضوع دا 😂😂😂

الكورونا هتسبب اسوء ازمة اقتصادية في ال 100 سنة الماضية ؛ الشعوب هتلاقي نفسها في اوروبا وامريكا بتنطرد من وظايفهم والشركات بتاعتهم شغالة في الصين

يعني شركتي اللي مفروض أمريكية بتسرح وتقفل فروع هنا في امريكا 🇺🇸 وشغالة عادي في الصين!! يعني الصين 🇨🇳 او فيتنام 🇻🇳 أو تايلاند 🇹🇭 أو ماليزيا 🇲🇾 أو كوريا 🇰🇷 أو اليابان 🇯🇵 يستفيدوا من شركتي وأنا لا 🤔🤔🤔

فدا هيمنح معارضي العولمة القوة والفرصة اللي كانوا عاوزينها لمحاربة الشركات؛ في السابق الزخم الشعبي مكانش موجود؛ المواطن شغال فمش فارق معاه قوي التفاصيل والحسابات السياسية لكن دلوقتي الوضع اختلف وبقي الموضوع كارثي

والحكومات بقت بتعاني اقتصادياً؛ البطالة الاضافية يعني اعانات للمتضريين؛ فالشركات اللي شغالة بره دي ترجع لي هنا عشان تديني أنا ضرايب مش تديها للأسيويين؛ وتشغلي مواطني دولتي مش تشغلي الغريب.

الموضوع صعب وشائك جداً خاصة إن فلسفة العولمة اتبنت عليها الامبريالية العالمية والاقتصاد العالمي الحالي؛ والشركات لو رجعت مصانعها هتتكلف كثير جداً وكمان تكلفة التشغيل في اوروبا وأمريكا أعلي والضرايب أكبر.

الصين من ناحيتها زي ما قولنا عارفه دا وبتجهز شركاتها هي عشان تعمل الهجمة المضادة علي الشركات العالمية.

والموضوع الأكبر تعقيدا ان في دول هي كمان قررت تخش عالخط؛ زي الهند 🇮🇳

ليه الأسعار في مصر 🇪🇬 غالية عن بره؟ وامتي الأسعار ممكن ترخص؟

البوست دا ممكن يكون بيزنس أكثر من هو بوست اقتصادي او سياسي...

دايما هو في سؤال هو ليه الأسعار في مصر غالية! ليه الموبايلات 📱 و الكومبيوترات 💻 بالرغم من إنهم معفيين من الجمارك زي الخليج بس نلاقي أسعارهم في الخليج أرخص؟

ليه العربيات الأوروبي 🇪🇺 ال Zero جمارك في مصر أغلي من الخليج؟

قبل ما أشرح نتفق علي كام نقطة

1- خلي موضوع جشع التجار علي جنب؛ مش بنفي وجود تجار عاملين هامش كبير لكن خلينا نتكلم في نقاط اخري؛ بقول كده تجنباً لكومنتات هتقول هو جشع التجار السبب

2- في أسباب كثير هقول بعضها وفي اللي مش هيتكتب؛ مش شرط كل الأسباب تتحقق في نفس البيزنس؛ ممكن مجال ينطبق عليه سبب وممكن مجال آخر ينطبق عليه 3 أسباب.

3- الأسباب صالحة لأي منتج لكننا هنركز أكثر علي منتج مصر 🇪🇬 بتستورده والخليج بيستورده مثلاً فليه يكون عندنا اغلي!

تعالوا بقي نشوف الأسباب ايه

1️⃣ التضخم العالي/ فايدة البنك 🏦 : لو انتا عايش في بلد التضخم فيها/ فايدة البنك قليلة 2% واقل زي اوروبا والخليج؛ فلو انتا عملت مشروع وكسبت 5% يبقي انتا كده برنس؛ دا حققت صافي حقيقي 3% اهو... نفس المشروع لو عملته في مصر وحقق 10% في حين التضخم/فايدة البنك تساوي 15% يبقي فعليا انتا خسرت 5% ؛ فاهم معني الكلام ايه! 🤔 🤔 المشروع اللي بره بيكسبوا فيه 5% ويبقوا مبسوطين؛ هو هو لو اتعمل في مصر لازم يكسب 20% عشان يستمر؛ فبالتالي هامش ربح التاجر لازم يكون أكبر.

2️⃣ القروض غالية 💲💲💲 : أخت النقطة السابقة؛ تخيل معايا مشروع كبير اخدوا قرض 100 مليون في أوروبا بفايدة 3% سنوي يعني الفايدة السنوي 3 مليون؛ فالمصنع هيبقي مطالب في حساباته انه يوفر 3 مليون سنوي + أصل المبلغ... لما تيجي مصر تلاقي الفايدة 20% يبقي لازم سنوي توفر 20 مليون + أصل المبلغ... فالزيادة الكبيرة في القرض بتخلي صاحب المصنع والمشروع عليه تكلفة عالية محتاج يغطيها.

3️⃣ رسوم 💵 في كل مكان : بحب قوي اتفرج عالناس البريئة اللي تقولك السلعه كذا معفية جمارك يبقي خلاص سعرها زي بره؛ في مصر انتا عندك كم كبير من الرسوم مش بس الجمارك؛ يعني عندك 14% قيمة مضافة وعندك رسم تنمية موارد الدولة وعندك ضريبة رفاهية (ضريبة الجدول) وضرايب كثير منوعه بس باسماء مختلفة (دمغات وغيره). العربيات مثلا ال Zero جمارك بتدفع رسوم ما بين 19% الي 58% في حين بالخليج هما 5% بس. وبكرر دا ال زيرو جمارك.

4️⃣ صعوبات رسمية : تخيل معايا انك في دولة منظمة؛ هتشتري شحنة تكون عارف الجمارك كام والاجراءات ووقت التخليص وكله؛ مصر بقي الموضوع فيها مختلف؛ ممكن تجيب شحنة وربنا يكرم بالحب؛ ممكن يطلع قرار بمنع دخول منتجك وهو في الطريق جاي واللي كان شغال في كيماويات قبل 5 سنين فاكر حصل ايه؛ ممكن تكون بتستورد سيارات SUV وفجأة جهة ما يطلع قرار يوقفها شهور بالجمارك؛ وحتي لو السلعه هتدخل برضك فالإجراءات في مصر طويلة قوي... رئيس مصلحة الجمارك بنفسه اعترف ان الجمارك في مصر كارثة وان ترتيبنا 171 علي العالم في سهولة الاجراءات.. ودا كلام رئيس الجمارك بنفسه عن مصلحته. هو اللي قال اهو مليش دعوة

5️⃣ صعوبات غير رسمية : لو انتا مضايق حد في الجمارك فشحنتك ممكن متدخلش ؛ او ممكن تقعد شهور؛ ممكن ومشيها ممكن تحتاج تشخلل عشان تعدي؛ بصوا اللي بيكتب مصري واللي بيقرأ مصري فمش محتاجين كلام؛ تقرير دافوس (اللي مصر عضوة فيه) مصنفنا 91 من 141 في الفساد ؛ وقبل ما تقول 91 دا حلو فاعرف ان رواندا والسنغال وتونس ونامبيا وموريشيوس والمغرب وجنوب افريقيا وليسوتو والجزاير وكوت ديفوار كل دول أحسن مننا افريقيا. اما بقي لو بصيت تقرير الشفافية الدولية فمصر 106 من 180 دولة. الفساد يعتبر تكلفة اضافية علي السلع.

6️⃣ المنظومة البنكية 🏦 : البنوك في مصر 🇪🇬 عقلياتها لسه موصلتش سنة 2000 والاجراءات بدائية بشكل لا تتخيلوا؛ تعطيل الاوراق والتحويلات والوقت الضايع وصعوبات في اجراءات الاستيراد والاعتمادات وغيره يعتبر تكلفة اضافية.

7️⃣ غموض المستقبل التشريعي : الحكومة بتحب تعمل مفاجئات للشعب؛ دا طبعا جميل لما تبقي مواطن و بتعملك surprise party 🎉 بس في الشركات دا مش حلو؛ انتا تبقي شغال ومش عارف هو الكهربا هتزيد؟ طيب لكام! طيب الغاز والبنزين؟ طيب هيحصل تغيير في تفاصيل ضرايب؛ بصوا باختصار كل ما يبقي في معلومة غامضة فصاحب العمل هيعمل حساباته علي السيناريو الاسوء والنتيجة تكلفة اعلي.

8️⃣ انخفاض القوة الشرائية : دي بقي نقطة معقدة شوية ؛ القوة الشرائية المنخفضة ساعات بتخلي الاسعار تنزل وساعات العكس؛ يعني مثلاً دلوقتي عالمياً في أزمة بسبب الكورونا فالشركات الموجودة بالأسواق العالمية هتحارب بعض عالزباين الفاضلين؛ فالعروض عالمياً هتشجع الناس تشتري وكل شركة بتحاول تخطف الزبون؛ دا عشان في سوق عالمي كان الوضع جيد وفيه شركات كثير فلما حالة الناس انهارت فكله اتزنق؛ أما في حالة مصر بقي فالوضع مختلف؛ السوق من الأول وضعه ضعيف فبالتالي اللاعبين في السوق قليلين من الأول؛ وجود سوق ضعيف القوة بيخلي التاجر او المستورد عليه تكلفة عالية؛ وعادة كل ما يزيد حجم التصنيع تقل التكلفة؛ ولو سلعه مستوردة فالمستورد يقول للشركة الأم عاوز 1000 قطعه غير لو طلب 10 الاف غير لو قالهم يخصصوا خط انتاج لمصر ؛ كل ما يزيد حجمك هتزيد قوتك قصاد المصنع بره؛ وامازون مثال وهو بيشتري خطوط انتاج كاملة من المصانع بالصين.


نكتفي بال 8️⃣ نقاط دول (في تاني) ونرصهم جنب بعض ونشوفهم كده

البائع في مصر 🇪🇬 مطالب يحقق هامش ربح أكبر وهو بيدفع فوائد أكبر ورشاوي أكثر في سوق المخاطر فيه أعلي وعدد الزباين أقل فمتوقع يبيع بنفس الأسعار!!!

فالنتيجة لو بره السلعه ب 100 فممكن يبيعها ب 110 ويكون ال 10 الفارق دول 5 مصاريفه و 5 الربح وكده زي الفل

في مصر السلعة ب 100 يبيعها ل 150 ويكون ال 50 الفارق هم 30 للبنود ال 7 فوق و 20 الفاضلين هامش الربح بالتضخم (البند 1 لو نسيته)

كده وضح بقي الاسباب الاخري (بخلاف ما نسميه جشع التجار) وراء ارتفاع الاسعار في مصر لنفس السلع العالمية..

توضيح:

اللي هياخد البوست إني ببرر للتجار ربنا معاه ومش هعلق عليه؛ البوست دا بوضح عقبات بتواجه السوق؛ لو اتصلحت الأسعار هترخص عالشعب...

أشهر قواعد في مجال البيزنس والوظائف (سيبك من نقطة أخلاقية ام لا؛ انا بكلمك في الواقع غالباً وخاصة مصر)

1️⃣ السلعة سعرها هو أقصي سعر يقدر العميل يدفعه

في مفهوم غلط عند الناس وهو إن صاحب الشغل / المصنع / المحل /... هيبيع بسعر بناء علي التكلفة عنده؛ دا كلام بلح لمؤاخذة؛ سعر البيع هو أعلي سعر يحقق البيع؛ لو اشتري السلعه ب 100 جنية ولقي انها ممكن تتباع ب 1000 جنية يبقي يبيعها ب 1000 جنية؛ اديني سبب واحد منطقي يخليه يبيعها ب 900 جنية حتي... ولو اشتري السلعه ب 100 جنية وبعدين لقي السوق مش هيشتريها غير ب 80 هيبيعها ب 80 ويخسر ويبطل يجيبها تاني.

انسوا خرافة انه شاريها بكام دي

((( لا ينطبق ما سبق علي السلع الحيوية يعني قمح زيت دقيق ارز الخ الخ؛ دي سلع أساسية والمغالاه فيهم حرام شرعا وأحيانا قانوناً؛ بخلافهم عادي بيع ب 100 ضعف التكلفة)))


2️⃣ صاحب الشغل هيدفع أقل مرتب ميخليش الموظف يمشي

المرتب اللي صاحب الشغل هيدفعه مش المرتب اللي تستحقه وظيفتك؛ لا دا أقل راتب ميخلكش تمشي؛ أكيد كلنا شافوا أمثلة لناس كانت عاوزة زيادة راتب وتترفض ويوم ما يقرر يمشي ياخد الزيادة بل اكبر منها... الراتب هو أقل مبلغ ميخلكش تمشي... الكورونا خلت أصحاب الاعمال ممكن يخفضوا الرواتب والموظفين عارفين ان مفيش شغل بالبلد فمحدش هيمشي ويسيبهم؛ مستحيل كانوا يعملوا دا في السابق.


نروح للمشتري والموظف

3️⃣ العميل هيشتري السلعه بأقصي سعره شايفه مقابل لل قيمة اللي هيحصل عليها

فاكرين النقطة 1 ؛ دي بقي اختها للعميل؛ العميل بيشتري السلعه مقابل قيمة Value ؛ لو السلعه كلفت التاجر 100 والعميل مش شايفها حتى تستحق ال 100 دي مش هيدفعها ويقول اصل التاجر غلبان نديله فلوسه حرام يخسر؛ هو شايفها تستحق 80 يبقي يوم ما السلعه تبقي ب 80 هيشتريها ؛ والعكس لو قدامه السلعه ب 500 وهو مقتنع ان ال Value اللي هياخدها تستحق دفع 500 هيدفعها... ابسط مثال الكمامات دلوقتي؛ من شهرين كنت ترفض دفع 5 جنية في الجودة الحقيرة دي ؛ دلوقتي بقت حياتك في الحسابات فال Value بقت فيها حياتك فهنا بقت ال 5 جنية سعر ممكن تنفذ الصفقة بيه حتي لو مش عاجبك.


4️⃣ الموظف هيشتغل أقصي شغل يخلي صاحب العمل ميرفدوش

فاكرين النقطة 2 بتاعة المرتب ؛ دي بقي للموظف؛ بعيدا عن نقطة الضمير والاخلاق فالموظف هيدي أقصي مجهود يخلي صاحب العمل ميرفدوش؛ عشان كده تلاقي الموظف الحكومي مش بيشتغل لانه ببساطة ضامن مكانه. وشوف شركات لما سرحت موظفين بعد الكورونا تلاقي باقي الموظفين اشتغلوا بكفاءة أكثر خوفاً.


بوست خفيف عشان النهاردة اجازة

بجهز لكم بوست من بتوع ال 1000 كلمة لاخر اليوم بقي 😂😂

تعرفوا إن Uber Eats كانت بتتكلف 43.5$ مقابل وجبة بقيمة 40$

الكورونا بقي هتعرض المفهوم دا لخطر كبير؛ مفهوم التوسع التوسع ومش مهم نكسب الان؛ عادي ناخد فلوس مستثمرين ونحرقها وقروض ونحرقها.

تعالوا ننقاش سوا الفكرة دي؛ وبكرر ننقاش يعني دا رأي وتحليل مش قرار؛ مجرد (((تخيل وتحليل))) قد يصيب وقد يفشل

من الحاجات اللي الازمة الاقتصادية العالمية الحالية هتضربها بقوة فلسفة

(المنتج ببلاش لغاية ما نجر رجل الزبون)

في البداية كده في العالم الرأسمالية في قاعدة شهيرة ؛ مفيش حاجة اسمها ببلاش.

((( إذا لم تدفع ثمن السلعه فأعلم أنك انت السلعه )))

ونخلينا في التقنية ب الأمثلة

الشركات دايماً بتلعب لعبة ظريفة وهي جر رجل الزبون وبعدين ازنقه واحلبه

وتعالوا نشوف أمثلة تاريخية ناجحة للفلسفة دي

*️⃣ تلاقي جوجل قدمت خدمات زي الخدمات G Suite للشركات في 2006 ببلاش ثم في 2011 قالت انه ببلاش للشركات أقل من 10 موظفين ثم في 2012 قالت مفيش شركات جديدة ببلاش وبعدين في 2013 قفلت ابو بلاش وبعدين في 2019 زودت السعر

خلاص جرت رجل الزباين والشركات فمهما تزود خلاص انتا وقعت

*️⃣ أمازون نفس الفكرة قدمت خدمة Prime الشهيرة سنة 2006 بسعر 80$ وبعدين في 2014 قالت هخليها 100$ ثم في 2018 بقت 120$

طبعا فاهم الخدمات زادت بس افرض انا مش عاوز الزيادة؟ 🤔

بيع رخيص ؛ سيطر؛ زود السعر وعوض

*️⃣ كوالكم نفسها عملت الحركة دي في إنتل لما لقتها بتدخل عالم الموبايلات فاتفقت مع الشركات علي عقود توريد لسنوات بسعر مخفض جدا بشكل خلاهم جابوا منها فانتل تدريجي خسرت وقفلت؛ وبعدها كوالكم رفعت الاسعار وبتدفعهم سعر المعالج وسعر استخدام المعالج (براءة الاختراع)

*️⃣ ومحليا شركة سوق. كوم لما سيطرت رفعت حد مجانية الشحن المحلي ل 350 بدل من 250 وضاعفت الرسوم عالتجار؛ وشركة نون لما اتعرفت حطت رسوم عالتجار.

*️⃣ حتي الخدمات أم بلاش زي اليوتيوب مع الوقت بقت إعلانات أكثر وأكثر ومش عاجبك اشترك في YouTube Premium يا برنس...

*️⃣ ونتفليكس كذا مرة تزود الأسعار عبر السنين.

الفكرة بتاعة حرق الفلوس دي قايمة علي قصة شهيرة.

الخدمة بتاعتي غالية وبتكلفني 10 دولار مثلاً

انا هقدمها لك ب 5$ عشان انا عندي فلوس كثير اقدر احرقها؛ المنافسين بتوعي مش هيقدروا وهيقفلوا؛ انا هلم الزباين كلهم لان الناس هتقول وااااو الخدمة التحفة دي ب 5$ بس دي عند المنافسين ب 8 و 10$

لما الزباين تزيد التكلفة عليا هتقل ل 7$ مثلا وانا هروح رافع سعر الخدمة ل 10$ ؛ وانتا اتعودت عالخدمة بتاعتي وخلاص المنافسين انتهوا وقفلوا فخلاص وقعت في الفخ؛ واللي انتا وفرته زمان هتدهولي الضعف دلوقتي

افكركم باللي بدأت بيه البوست إن أوبر بتتكلف 43.5 دولار عشان توصلك أكل ب 40$ يعني كل توصيله بتخسر فيها 3.5$ لتفتكر ان تكلفة التوصيل 43 نفسها 😂 ؛ هحط في التعليق رسمه توضح توزيع الفلوس.

الكورونا فيييين بقي من الحوار دا

الاقتصاد العالمي أصلا كان داخل في ازمة من 2018؛ سواء لان دا الطبيعي أو تراكمات ازمة 2008 أو بسبب حرب ترامب الصين 🇨🇳 الاقتصادية.

الخلاصة الاقتصاد العالمي 🌏 كان فاضله بس لمسة وينهار

جت الكورونا ادته طلقة مدفع مش لمسة

منظمة العمل الدولية توقعت ان بنهاية 2020 هيكون فقدان (ساعات العمل + الوظائف) ما يوازي 300 مليون وظيفة؛ أكسفورد توقعت فقدان 2.6 مليون مغترب وظائفهم بالخليج و تقرير ل CNBC توقع افلاس 70% من الشركات ب دبي لو استمر الوضع؛ ومحلياً المعهد القومي للتخطيط توقع فقدان 1.2 مليون مصري لوظائفهم بنهاية العام 2020

الخلاصة الكوكب بيتفقر ؛ البورصات العالمية بتخسر ؛ دا حتي المحلية بتخسر ب الترليونات زي البورصة السعودية فقدت الربع الاول من السنة 1.5 ترليون ريال

(((( طيب ماشي يا عم مال دا بالشركات!!! )))))

بص يا سيدي الشركات دي كانت بتفضل تحرق فلوس لييه ومنين؟؟؟ 🤔 🤔 🤔

بتجيب فلوس مستثمرين VC وتقولهم هنخسر النهاردة بس بكره هنكسب؛ دلوقتي المستثمر دا بيخسر في كل مكان والاقتصاد بينهار؛ وحتي لو فرضنا معاه فلوس ففي شركات انهارت وبقى سعرها لقطة (عشان كده الصندوق السيادي السعودي 🇸🇦 بيشتري في شركات) فليه بقي يشغل باله بشركة مجهول مستقبلها وقدامه شركات ممتازة بسعر لقطة!!!

يعني في الوضع الجميل للاسواق في شركات كثير ومستثمرين كثير معاهم فلوس فكله بيجرب

دلوقتي الوضع اختلف؛ الفلوس بقت قليلة والزبون اللي معاه فلوس قل (النقطة بتاعة فقدان الوظائف) فهنا المستثمرين هيفكروا هو الاستمرار في السوق دا ليه لازمة!!

بوادر الازمة الاقتصادية بدأت من قبل الكورونا و شوفنا محليا Glovo وهي بتخرج من كذا سوق ومع بداية الازمة Uber Eats خرجت من مصر؛ ومتفكرش ان اوبر خرجت من مصر 🇪🇬 بس لكن كمان السعودية 🇸🇦 والتشيك 🇨🇿 وأوكرانيا 🇺🇦 و رومانيا 🇷🇴 وغيرهم؛ وفي الامارات 🇦🇪 نقلت الخدمة الي كريم.

خلاص الكورونا حسمتها مبقاش في زمن رفاهية تجربة

او استمرار المخاطرة

المستثمرين بقوا أقل قبول لدا؛ او تحديداً مش قايلينها في كل المجالات ولا المخاطرة العالية زي موضوع الاكل في جلوفو وأوبر Eats

ضيف معاهم كمان بفكره بعيدة الشركات الشهيرة المديونة بشدة؛ كانت زمان بيفضلوا يعوموها يعني نديها قروض عشان تعيش وقروض وقروض...

لكن الأزمة دي هتعقد الموضوع؛ الشركات الكويسة بتغرق فخلاص الغرقان ربنا معاه

عشان كده تحالف رينو نيسان متشوبيشي في خطر وفرنسا رفضت تدي قرض ل رينو لغاية ما الرئيس الفرنسي اتدخل لإنقاذها... ورينو سربت للصحف انها هتعيد النظر في كل شيء وفي عربيات شهيرة هتختفي زي رينو ميجان

كورونا دلوقتي زنقت الجميع؛ معاك فلوس وبتكسب ماشي لكن عاوز تتوسع فهنا نفكر تاني

الازمة الحالية عاوزة شركات قادرة عالكسب القريب؛ ممكن نخاطر بس في مجال الازمة بتدعمه زي اي خدمات عن بعد.

------------

الفكرة ممكن تكون تاهت او مش مترابطة؛ زي ما قولت لكم بداية البوست دي دعوة للنقاش ورايكم ايه مش فكرة مكتملة

الموضوع ان حرق وخسارة فلوس دلوقتي من اجل التوسع ونلم بعدين مش هتكون مقبولة بالنسبة لشركات كثير ومستثمرين

كرة الثلج في ليبيا 🇱🇾 عمالة تكبر بسرعه

اللي غرقان في أخبار مصر هلخص لك بسرعه أبرز اللي حصل في ليبيا 🇱🇾

*️⃣ في الشرق الليبي 🇱🇾 عندك حفتر اللي بيحظي بدعم مالي وعسكري من الإمارات 🇦🇪 وعسكري ولوجيستي من مصر 🇪🇬 وعسكري وميليشات فاغنر من روسيا 🇷🇺 واستخباراتي وعسكري من فرنسا 🇫🇷

*️⃣ في الغرب الليبي 🇱🇾 في فايز السراج ودا معترف به دوليا بما فيهم (رسميا) الدول اللي بتدعم حفتر؛ وعسكريا بياخد دعم تركيا 🇹🇷 مع مليشيات سورية سبق وقاتلت في سوريا 🇸🇾

كانت الكفة في صالح قوات حفتر حتي مع وجود الميليشيات السورية؛ لغاية ما تركيا 🇹🇷 دخلت بسلاح ال درونز (طائرات بدون طيار) اللي قلبت الموازين + ازمة كورونا

أزمة كورونا خلت الامارات 🇦🇪 تخرج نسبيا من المعادلة وكذلك مصر 🇪🇬 برضك نسبيا وفي نفس الوقت تركيا 🇹🇷 اللي زودت التركيز وبعتت قوات دعم عالارض ؛ وقتل منهم بالفعل واعترفت تركيا 🇹🇷 بدا.

بغياب الدعم المصري الإماراتي وغياب قوات فرنسا 🇫🇷 ف تركيا (وقوات الوفاق) استفردت بقوات حفتر مع مليشيات فاغنر وهزمتهم في الغرب وسيطرت علي قاعدة الوطية الأهم لحفتر بالغرب وبكده مبقاش ليه رجل بالغرب الليبي. القاعدة تم السيطرة عليها دون قتال تقريبا أي انسحبت قوات حفتر

حتي الان عادي جداً وخبر مكرر مفيش بقي حاجات جديدة

*️⃣ بدخول قوات الوفاق المناطق اللي حفتر سابها لقوا اسلحة كثير روسية ودفاع جوي وبالمناسبة الوفاق أعلنوا انهم دمروا 9 منظومات دفاع جوي من طراز (بانتسير) الروسية الصنع اللي سعر الواحدة 15 مليون دولار وكانت الامارات نقلتهم ل ليبيا 🇱🇾.

*️⃣ روسيا 🇷🇺 هنا اتغاظت قوي وحست بالإهانة للسلاح الروسي وقررت التدخل أكثر فبدأ كرة الثلج

*️⃣ الأسبوع الماضي كشفت أمريكا صور لطائرات حربية روسيه 🇷🇺 في ليبيا وقالت إن روسيا 🇷🇺 نقلت 14 طائرة من طرازي ميج 29 و سوخوي 24 الي قاعدة الجفرة الجوية التابعه لحفتر

*️⃣ ف تركيا 🇹🇷 ردت بإعلانها رسميا عن استخدام الدرون التركية الصنع (اكينجي) المتطورة في ليبيا بكده تنضم للطائرات الدرون المستخدمة بالفعل في ليبيا 🇱🇾

*️⃣ أمريكا 🇺🇸 قررت لأول مرة تتدخل علني بس بطريقة أمريكا 🇺🇸 المعتادة وهي فتح الدفاتر القديمة فطلع المتحدث باسم الخارجية الأمريكية وقال إن مالطا 🇲🇹 أوقفت فلوس ليبية 🇱🇾 تم طباعتها في روسيا 🇷🇺 وقالت إن في طرف في ليبيا 🇱🇾 هو اللي طلب طباعة الفلوس دي (يقصدوا حفتر عشان السراج عنده البنك المركزي الليبي فيقدر يطبع عادي)؛ واتهموا روسيا 🇷🇺 انها عاوزة تولع الوضع في ليبيا 🇱🇾 وتسبب ازمة بطرق قذرة عبر اغراق البلاد بعملات مزورة؛ الفلوس المظبوطة قيمتها 1.1 مليار دولار 💵

بقول فتح الدفاتر عشان الشحنة دي اتظبطت نوفمبر 2019 ووقتها مالطا 🇲🇹 قالت انها قفشت 2 حاوية 56 متر مكعب فلوس مطبوعه؛ ووقتها تم تبرير الطباعه ان السراج رافض يبعت فلوس لحفتر؛ فالمناطق تحت سيطرة حفترة عاوزة فلوس فهنا حفتر قرر يطبعها لهم في روسيا. وبالمناسبة الخبر وقتها نشر في روسيا اليوم عادي. فيا تري ايه مسكت مالطا شحنة جديدة مثلا 🤔🤔

*️⃣ مساء أمس الجمعة قيادة Africom (قيادة القوات الأمريكية في أفريقيا) أعلنت استعدادها لنشر قوات في تونس 🇹🇳 لمساعدتها في السيطرة علي الوضع؛ وان قائد القوات الأمريكية تواصل مع وزير الدفاع التونسي.

*️⃣ نرجع أسبوعين ونلاقي اجتماع لقائد الناتو مع اردوغان وفيه قائد الناتو قال إنهم هيحافظوا علي موقف متوازن في ليبيا 🇱🇾 لكن برضك قالوا هيساعدوا قوات السراج لبناء مؤسسات دفاعية وأمنية لو عاوز. ودا تلميح صريح إنهم هيتم بناء جيش ليبي يتبع الحكومة بخلاف الجيش الليبي المتمرد بقيادة حفتر؛ يعني ليبيا هيبقي فيها جيشين.

*️⃣ أول إمبارح 28 مايو هنلاقي إن وزير الخارجية الفرنسي قال إن حكومة السراج جلبت بواسطة تركيا آلالاف المقاتلين السوريين؛ وقال إن روسيا هي كمان بتجيب مقاتلين سوريين كانوا في صف بشار معاها وبتنقلهم دلوقتي ل ليبيا 🇱🇾 لمساندة حفتر ومساعدة قوات فاغنر... افكركم ان فرنسا 🇫🇷 حليف حفتر العسكري لسنوات وسبق وقتل لها جنود في ليبيا 🇱🇾 وشهر يوليو 2019 قوات السراج لقت صواريخ جافلين امريكية وفرنسا قالت انها كانت مع قوات فرنسية في ليبيا 🇱🇾 لكنها كانت قوات مكافحة إرهاب؛ يعني حليف ل حفتر اعترف انه بقي بينقل هو كمان ميليشات سورية.


بصراحة ربنا يستر عالشعب الليبي؛ وصراحة مصر في موقف صعب

يعني لو جينا للقوانين الدولية فالسراج هو المعترف بيه؛ لكن برضك مصر 🇪🇬 معادية علناً للسراج فكارثة لينا إنه يكسب ومش منطقي دولة تسيب نظام هي معادية ليه يتكون جنبها... فكروا في الموضوع بشكل براجماتي؛ مصلحتنا ك دولة إن السراج يخسر لاننا معاديين ليه وواقفين ضده علي طول الخط.

ربنا يسهل وتبقي مجرد توترات عادية والموضوع ميوسعش وروسيا تنزل مليشيات اكثر وتركيا برضك المليشيات المؤيده ليها؛ والكل يسخن وتبقي سوريا جديدة 😔😔

وبصراحة بالرغم من وردية 🌸 الكلام القادم؛ بس فعلاً الحل في ليبيا لازم سياسي؛ روسيا 🇷🇺 في القتال نفسها طويل؛ وتركيا وأمريكا خسروا في سوريا 🇸🇾 فمش هيخسروا تاني بسهولة


نقاط جانبية خليها في بالك

آبار البترول/الغاز في ليبيا 🇱🇾 هي صراع منذ سنوات بين شركة توتال الفرنسية 🇫🇷 و إيني الايطالية 🇮🇹 فممكن تكون السبب ان ايطاليا 🇮🇹 مع السراج وفرنسا 🇫🇷 مع حفتر. لكن المؤسسة الوطنية للنفط (أي مؤسسة في ليبيا يعني حكومة يعني تبع السراج) عرفت تحسن علاقاتها مؤخراً مع توتال ومنحتها موافقة توسع واستحواذ شهر ديسمبر الماضي علي حصة شركة ماراثون أويل الامريكية 🇺🇸 في حقل الواحة مقابل 650 مليون دولار ؛ فيا تري تحسن العلاقات بين الحكومة وتوتال هو سر ان فرنسا 🇫🇷 بقت تعارض حفتر! ولا الوجود الروسي وضغوط من الناتو! ولا ايه

أما امريكا 🇺🇸 فهي ضد التواجد الروسي جنوب المتوسط؛ وروسيا 🇷🇺 بعد ما حطت قواعد شرق المتوسط في سوريا 🇸🇾 عاوزة قواعد جنوب المتوسط في ليبيا 🇱🇾

(((( أنا قولت بس احكي لكم حاجة بتحصل حولينا وأسف مش هعلق عالأحداث برأي شخصي )))

أكثر 3 أسئلة بتيجي لي آخر شهرين هم:

1️⃣ قلقان على فلوسي في البنك 🏦
2- قلقان من الشمول المالي اتصرف إزاي في شغلي.
3- قلقان من الأزمة العالمية بسبب الكورونا.

ودا الرد اللي دايماً بقوله للناس
===============

1️⃣ قلقان على فلوس في البنك

كل ما الناس تسمع إن الحكومة أخدت قروض تخاف وإن الدين المحلي وصل 4.5 ترليون جنية تخاف... يا جدعان متقلوش من الدين المحلي إن الحكومة تطمع في فلوس الناس يعني لسبب بسيط... الدين دا بالجنية؛ طيب هو المطبعة باظت يعني؟ دي شغالة وزي الفل وبنعمل مطبعة ثانية في العاصمة الإدارية

سنة 2011 اتسأل آلان جرينسبان محافظ البنك المركزي الأمريكي من 1987 إلى 2006 هل ممكن أمريكا تتخلف عن سداد ديونها رد ببساطة إن دا مش ممكن يحصل عشان الدين الأمريكي بالدولار 💵 💵 💵 وأمريكا قادرة على طباعة الدولار في أي وقت.

كون إن الحكومة ديونها بالجنية كثير فدا لا يعني إنها هتطمع في فلوسك... لو زنقت قوي هتطبعها (سندات وصكوك للمركزي وإطبع يا معلم).

تقلق إن فلوسك هتقل قيمتها لكن تروح عليك لا تقلق.

أما موضوع تقييد السحب ب 5 الاف ثم بقى 20 ألف وربنا يستر ميرجعش 5 تاني فالسبب هو إنك الحكومة عاوزاك تدفع إلكتروني بحيث حركة الفلوس تكون مرصودة... محافظ المركزي قال صراحة عاوز مليار جنية أديك مليار بس مش كاش.

فمحدش يقلق من فلوسه في البنك... بالعكس دا دلوقتي فلوسك في البنك يعتبر نسبياً فرصة... شوية لما الحكومة تزنق بقى التعاملات هتروح تحط فلوسك في البنك هيقولوا لك جيب لنا مصدر الفلوس دي ايه.

==================

2️⃣ قلقان من الشمول المالي

كذا حد بيبعت ويقولي أنا قلقان من حوار الشمول المالي والضرائب وأنا مش بدفعها وبعمل سبوبة ووو... بص دلوقتي متقلقش... وبكرر الكلمة دلوقتي... حالياً الهدف مش انتا الهدف الشركات اللي شغالة ب 7 و 8 و 9 و 10 أصفار... يخلصوهم وهينزلوا للي تحتهم... انتا أخرك يعني بتكسب كام في السنة؟ ربع مليون جنية أرباح يعني متهرب من 50 ألف ضرائب.. مش انتا اللي الحكومة عاوزاه دلوقتي... هييجوا لك بس مش دلوقتي... حالياً عاوزين اللي بيتهربوا من ملايين ضرائب.

هيوصلوا لك يمكن كمان سنتين... افتح يا عم المشروع بتاعك واشتغل وبعد سنتين إما ربنا يكرمك ويشتغل كويس ووقتها يا سيدي مبلغ صغير كده من 3 أصفار لمحاسب ضريبي هيقولك تعمل ايه ويرتب لك ورقك. وممكن بعد سنتين تلاقي المشروع مش ظابط تقفله وكفى الله المؤمنين شر القتال يا سيدي.

أما بقى لو انتا بالفعل عندك بيزنس مستقر وشغال زي الفل وعاوز تشوف تعمل ايه... فدي الحيلة الوحيدة ليها اللي أعرفها بعيد عن التلاعب في الورق يعني هى المصاريف... لو عاوز ثلاجة في بيتك اشتري ثلاجة باسم الشغل واكتب ثلاجة الشركة؛ تليفزيون الشركة؛ هات موبايل لمراتك باسم الشركة. آه أصحابي المحاسبين الضريبين هيقولوا دلوقتي الضرائب مش هتقبل كل دا؛ ماشي بس ياخد أقصى مبلغ يعرف يعمله... وبالمناسبة دا اللي بيحصل في الكوكب كله ودي طريقة التهرب الرسمية بقى... تلعب في الورق دا شيء يخصك ودي فيها سجن.

===================

3️⃣ أعمل ايه في الأزمة الاقتصادية الحالية

دا بقى السؤال التعجيزي اللي ملوش حل واللي ملوش إجابة مثالية واللي هيعرف إجابته يبقى وزير اقتصاد ولا ياخد نوبل... إحنا في بداية أسوء أزمة اقتصادية شافها العالم من بعد الكساد الكبير.

عامة هما 3 اقتراحات تقليدية:

*️⃣ طور شغلك: حتى في عصر الأزمات في ناس بتكسب؛ لو تعرف تخلي البيزنس بتاعك أو شغلك الشخصي أو وظيفتك في المجالات اللي بتكسب في عصر الأزمة دا.
*️⃣ استثمر: لو لقيت نفسك مش عارف تغير شغلك أو البيزنس بتاعك أو وظيفتك فالحل الثاني لو عندك فلوس تشوف حد شغال في المجالات اللي عايشة في الأزمة وتستثمر معاه وأهو يبقى مصدر دخل.
*️⃣ قلل مصاريفك: دا الحل الثالث والأصعب بقى؛ تقلل المصاريف بتاعتك... هنا عندك خيارين الأول تقلل بالفعل من دلوقتي حتى لو شغلك لم يتضرر؛ والثاني تخط خطة من دلوقتي للتقليل لكن متنفذهاش.

موضوع حط الخطة من دلوقتي مهم قوي؛ دلوقتي شغلك لم يتضرر لكن ممكن يتضرر؛ استفيد بقى من رفاهية الوقت وبدون ضغوط؛ لما بيحصل إن الإنسان يكون مضغوط فهنا بيكون معظم قراراته غلط... فدلوقتي إنتا مش مزنوق وشغلك لم يتضرر فممكن تقعد براحتك خالص تحط سيناريو أعمل ايه لو دخلي قل 25% مثلاً وأقلل مصاريفي إزاي وأعمل ايه لو قل 50% ولو هغير مدرسة الأولاد أبعتهم أنهي مدرسة وايه الخيارات المتاحة... دلوقتي عندك رفاهية إن مفيش زنقة وضغط فتقدر تفكر بهدوووء... فلو لا قدر الله حصلك مشكلة خطتك جاهزة... محصلكش مشكلة خلاص مخسرتش أي حاجة.

طبعاً أسف إن السؤال الأخير ممكن مكونش عرفت أساعد فيه بجد لكنه فعلياً سؤال تعجيزي ملوش حل مثالي.

ولو حد عنده فكره أحسن ممكن يقولها ويفيد بيها الناس طبعاً

ربنا يخلي لنا البنك الدولي دا يا جدعان... يوم 17 مايو أدي مصر 50 مليون دولار وقال الفلوس دي تتصرف في 6 حاجات:

1️⃣ شراء وتوزيع التجهيزات والمستلزمات الطبية اللازمة لمواجهة الفيروس.
2️⃣ تدريب الكوادر الطبية.
3️⃣ عمليات الحجر الصحي، والعزل، ومراكز العلاج المُعدة خصيصا.
4️⃣ تعبئة فرق الاستجابة السريعة في تتبع المخالطين لحالات الإصابة بالفيروس.
5️⃣ تطوير منصات وأدوات تقديم المحتوى لتحسين الوعي العام بالوقاية من الفيروس.
6️⃣ الرصد والتقييم المبتكر لاستراتيجيات التباعد الاجتماعي، ومنها التعبئة المجتمعية.

هو آه البنك الدولي مأفور الصراحة وعاوز كل الحاجات دي بالمبلغ التافهه اللي اداهولنا دا كله 50 مليون دولار يعني 800 مليون جنية يعني 10% من تكلفة كباري وتطوير مصر الجديدة.

بس طلع بفايدة والحكومة وسعت الفحوصات وبعد ما كنا يوم 17 بنعلن عن 500 حالة بقينا نعلن عن 1400 حالة.

ف يوم القرض كانت مصر عندها 12 ألف حالة ودلوقتي بعد أسبوعين بقى عندنا 26 ألف حالة.والحالات الـ Active كانت 8.5 ألف بقت 19 ألف حالة.

أيوا كده نخلي البنك الدولي يشوف إن فلوسه مراحتش في الفراغ.. عشان البرامج الأخرى يدينا فلوس فهيا.

شايفين البنك الدولي (المسيطر عليه أمريكياً) بنطلع منه بفائدة ومصلحة اهو

عكس صندوق النقد (المسيطر أوروبياً) اللي مش بنطلع منه بمصلحة بل ب صب في المصلحة

عاش البنك الدولي نصير الغلابة 😂😂

(البوست للهزار عشان متقلبش جد ومقارنات بين صندوق النقد والبنك الدولي) نفك شوية وبعدين نرجع لبوستات الشروحات والبيزنس والاقتصاد والشملول المالي 😁😁

خدعة اللقطة الأخيرة

*️⃣ تيجي تسأل حد هو الازمة الاقتصادية العالمية الان سببها ايه؟ يقولك الكورونا؛ الاجابة دي صح وغلط؛ الكورونا بالفعل السبب او لو أردنا الدقة هو عمل اللقطة الأخيرة؛ الاقتصاد العالمي بينهار بقاله سنوات؛ الكورونا جه بس اخر مشهد خبط الاقتصاد فانهار؛ لكن بالكورونا او بدونها كان الاقتصاد بينهار

*️⃣ تسأل حد لماذا انهارت دولة المماليك يقولك بسبب غزو العثمانيين ومعركتي مرج دابق والريدانية ؛ تمام صح بس دولة المماليك كانت بتنهار بقالها 100 سنة والعثمانيين بس كانوا اللقطة الأخيرة.

*️⃣ وحتي دولة العثمانيين نفسها تسأل حد لماذا انهارت يقولك أتاتورك؛ صح برضك لكن الدولة العثمانية كان بقالها قرنين بتنهار وأتاتورك جه خلص؛ انتا متخيل لو اتاتورك جه سنة 1600 وقال هلغيها كان هيقدر مثلا! لا طبعا لكنه جه في دولة بتنهار اخد آخر لقطة

*️⃣ نظام مبارك برضك كان بينهار؛ وثورة 25 يناير هي فقط اللقطة الاخيرة

لما تشوف حدث بيحصل قصادك بلاش تنخدع وتخش في نقاش وتركيز في اللقطة الأخيرة؛ اللقطة الاخيرة دي ممكن تغير ببساطة القائمين عليها وبرضك الحدث كان هيحصل.

اركب آلة زمن وروح اقتل اتاتورك وارجع زمنا تاني؛ برضك مش هتلاقي الدولة العثمانية لانها كانت بتحتضر واتاتورك مجرد الاداة الختامية

وسعوا تفكيركم وبلاش تغرقوا في اللقطة الأخيرة

كل حدث بيحصل قدامك هتلاقيهم بيقولوا كذا السبب؛ فكر كويس

هل كذا دا فعلاً السبب ❗ ولا هو بس (اللقطة الأخيرة)