قصص ولادة بعد التثقيف

بسم الله ماشاء الله لاقوه الا بالله

إسراء. ام غيث JD1135020
من أمهات دولا منيرة بينبع

قصة ولادتي الحماسيه🙈🔥
الحمدلله الذي بلغني هذا💞
الحمدلله على منه وكرمه وعظيم عطاياه💞
إسراء ....ام غيث ...بكرية...ولادتي كما اتمنى الحمدلله💗💗💗

"حبيت الولادة بكل مافيها من تعب بعد ما درست منهج اماني الحمدلله...صارت في عيوني شي جميل وقريب للقلب وراحت كل الافكار الخاطئه عن الولادة بسبب المجتمع..."

صباحاً يوم السبت الساعه ٩ صحيت ولقيت نقط دم قبلها كانت السدادة المخاطيه تنزل لمدة اسبوع...حسيت انها نهاية السدادة وانو ممكن قربت الولادة ، بس اتحمست وجلست على الكورة وسويت تمارين الحمل كلها وشربت مويه واكلت تمرات وبعدها قررت ارجع انام..
صحيت وقضيت يومي مع اهلي وزوجي مني حاسه بشي اقوم وامشي واتحرك واحل واجباتي..
الساعه ٦ مساءً بدأت انتبه للانقباضات قلت شكلها زي الايام الي فاتت كملت اشغالي جلست على الكوره مع اهلي نتكلم وانا بالي مع الانقباضات بدأت احسبها بالمؤقت بعد رابع انقباضه اتأكدلي انها انقباضات منتظمه كان بين كل انقباضه ٦ دقايق ونص وكانت تاخد ٣٧ثانيه تقريباً بس برضو كنت مشككه قلت الالم محتمل وشكلها زي الايام الي فاتت...الساعه٨ ونص بدأ يجيني احساس انو اليوم ولادتي...سرت اطلع وانزل الدرج وبأحس بإنقباضات تروح وتجي رحت اساعد ماما في العشا بعدها رجعت احسب الانقباضات بدأت الانقباضة تطول٤٠ ثانيه واكثر شويه وانا اتعشى كنت احس بالانقباضه وكان المها محتمل بس بدأت اركز معاها ومااقدر اتكلم كانت تألم وقتها جاني احساس قوي انو اليوم ولادتي، دخلت غرفتي استكن وجالسه على الكوره ومعايا زوجي يحسب مدة الطلقات معايا الساعه١٢ اتصلت على دولا منيره احس بس بكلمها حتى لو ماكانت ولادة فعلاً بس كنت عارفه انها حتديني شعور بالأمان واني حلقاها تحفزني وفعلاً 💗 كلمتها سريع وبدأت بعدها اسوي الي عليا عشان احتوي نفسي وجسمي في ديك اللحظات ....على طول دخلت بانيو مويه حاره وبدأت اتحرك فيه ومعايا ماما تشربني سوائل دافيه شاي زنجبيل كنت احرك نفسي تحت المويه ماسكه من الجنبين واحرك جسمي من فوق لتحت ويمين ويسار واسوي قرفصاء تحت المويه الانقباضات الى الان محتمله بدأت اتنفس بعمق كل ماجاتني انقباضه بدأت احس بتعب خرجت من البانيو واكلت الي اقدر عليه موز..تمر ..توست بزبدة الفول..ومويه ، واكل وانا على الكوره
خرجت الحوش امشي قد مااقدر كان زوجي معايا وكل ماجاتني طلقه كنت اوقف وهوا يذكرني اتنفس ويتنفس معايا مره هاذي الحركه ساعدتني لمن الشخص قدامك يتنفس وانتي تقلديه في نفس الوقت لأنه مع الألم كنت انسى كيف اتنفس وهذا الشي اكتشفته انو فعلاً التنفس العميق يبغاله تدريب وانك تدخلي مرحلة الاسترخاء العميق لازم يكون جسمك من قبل متعودددد، وهذي من الاشياء الي ان شاءالله حشتغل عليها، بدأ الطلق معايا يشتد وفي هاذي الاوقات ماعرف كم كانت الساعه كنت احس بتعب طلعت ثاني مره اتغطست في مويه حاره واحاول اتحرك بس كانت حركتي اقل هذي المره بسبب الم الطلق كان الالم يدوخ ماما تقلي اشوف عيونك انحولت وانتي تطلقي وساكته واقول في نفسي شكلها لسا في البدايه كانت مستغربه اني ساكته عشان كدا على بالها اني في المرحله الأولى وانا ساكته لأني قاعده احتوي جسمي وافهمه في هذيك اللحظات المويه الساخنه ساعدتني كثير كثير خففت الالم كنت في بداية المرحله الثانيه وكان الطلق يشتد معايا خرجت من البانيو لبست قميص فضفاض وماما تأكلني تمر في داك الوقت من قوة الطلق وانا كنت متعشيه عشاء دسم فيه قلي استفرغت العشا كان المفروض اكل اشياء مافيها زيوت...
بدأت مااحس بشي حولي غير انو الطلق بدأ يسير قريب من بعض وكنت لا ارادياً جسمي ياخد وضعية الركوع وقت الطلق وكنت اسوي حركات غريبه عجيبه 🤭😅 بس كنت مرتاحه اسوي الي جسمي يقلي عليه في هذاك الوقت امي تسألني طلق؟ اقول ايوه وتبدأ تمسجني مع كل طلقه من تحت ظهري الين كتوفي كان هذا الشي مساعدني جدا جدا وكانت تمسج بضغط شبه قوي كان يريح كثير، دخلت الحمام واحس بشي تحت واحس بدفع كان الكيس بس مني عارفه وقتها امشي ورجولي مفرقه غصباً عني كان الرحم خلاص مفتوح وماما كانت تجهزلي زيت سمسم تبا تدهنه في جسمي هذيك اللحظات جات ورا بعض سبحان الله كانت مرحلة الانتقال بس ماكنت مستوعبه الحمدلله من كثر ماحسيت اني قدرت احتوي المي بالتنفس وهاذي المره كنت اخرج الهوا وانا زامه شفايفي وبقوه اكبر كانت حركه مساعده كان الالم قوي واخر الطلقه بالذات كنت احس اني بستسلم ولا ارادياً تطلع من تنهيدة قويه آآآآآآآآآه واكمل تنفس وماما ورايا تمسجني بدأت تحط زيت في رجولي وانا بوضعيه مستقيمه ماكملت تدهين الا سرت احس بدفع وجلست قرفصاء فوق الكنبه بس اردافي كنت جالسه عليها ماما هنا شافت الكيس انفجعت قالت لا لا قومي على المستشفى تقدري تتحملي؟ وانا اقولها ايوه😂😂 ومن جد كنت حاسه اني قادره اكمل ماعرف اشبي ماكنت مستوعبه انو الرحم خلاص مفتوح وجاهز!

3.29K viewsedited 18:37